REVEUSE - 25

CHAPTER- 25

Ka ding khawng laha, ka tang ru teuh bawk.Ka bengkawm a rawn fawp dun duna, a hmui lum ham ham chuan min fan rawih rawih bawk.

‘Inbual dun i duh lo tak tak em?” a ti leh supa.

‘Ka..ih,ka hre lo...’ ka ti bah naka, ka aw a zawi hle bawk.Ka nervous zia thup tum mah ila a theih tlat loh,tumah hetiang khawpin an Pasal te bulah an nervous ve ka ring hek lo.Diktak chuan a awihawm loh hial zawk.

‘Ok,tak takin inbual la,phone ka lo hmang ang..chuan,hei pawh hi Party kan siamsak loh chuan...’ a nui a, ka dul a rawn khawih pah bawk..

Hahdam thei ang berin Bathtubah  ka inchiaha, ka mit ka chhing vang vang bawk,thil engkim inthlak danglam ta thawk hi a tha lam vek nimahse ka chhungrilah hlauhna nge ka hriatthiam si loh hian ka ti nuam lo a awm tlat,kan nupa kar danglam ta vek te, ka nu te nena kan in pawh leh ta viau mai te,avai mai hian rei lote hnua chhe leh thut mai tura ngaihna ka nei tlat bawk.

Ka inbual zawh a room ka let lehin a lo awm tawh lo,a lo let leh thut ang tih hlauin ka inthlak sawk sawka, ka dul engmah la lang lo,thep zaih mai chu ka chul a, Abel-a khan a fa anih loh chungchang engmah a la sawi leh lo,a landanah chuan a pawm hmiah niin ka hre zawk.

Inhnuaiah ka chhuk thlaa,ka rin loh deuhin Amawia a lo awm ve a,ani hi Abel-an kan inneih khan bestah  a hmanga, mahse amah hi Dept pakhatah hna sang tak chelhin a awma,District khawpui dangah a awm bawk avangin kan inhmu tam lo viau,a lo haw tum erawh cuan a lo kal ziah thung.

‘Hey,i tha em?’ min hmuh veleh din chhuah pahin a lo ti nghala,min chibai tumin a kut a rawn lek chhuak nghal bawk.

Ka pan hnaia, ka nui var var mai,ka chibaia,Abel-a ai chuan a tawi zawk deuh nangin pa te tak tih tur a ni lo,Mizo mipaah chuan a tawk pawl tak a ni tho.Amah mi fel tak a ni bawk nen hmu ngun deuh phei ila chuan ka ngaina hlein ka ring.

‘Engtik nge i lo chhuk?” ka ti a.

‘Vawiinah,in chhuak tih ka hriat rualin ka lo kal tlang nghala,chuan...Party neih lam kan lo sawi mek bawka’ a tih zawm leha,Abel-a ka en vata, a thle buk ringawt.A sam hnawng deuh chap leh a thawmhnaw hakah chuan a inbual vek tawh tih a lang thei bawk.

‘Eng party maw?” ka ti a,Abel-a bula thutna awl awmah ka thu thla ve a.

‘Wow, zep a la tul tihna mi?’ nui chung bawkin a ti leh a, a sawi awmzia ka hriat takah chuan ka nui ve ta ngawt.

‘Aih,engmah ka zep lo..i awm laia tih a tha ngawt ang chu,tiraw?’ tih pahin Abel-a ka en a, a bu nghuta,a hmui a petsawi zauh bawk.

‘Nia, a tha ang..Ka nu te kha lo phei an tum ta em?” a ti a.

‘Aih,naktuk lamah kan lo kal ang an ti a,zanin chu hahdam deuh la a duh a’ ka ti a, kan chhuah khan In thleng min thlah an tuma, mahse Abel-a nu te chhung lamah Boral an awm thut avangin an lo kal ta lo.

‘Ok,a tha lawm..Hei,chawei tur a lo kal tho bawka,i riak ve nghal ang chu’ Amawia hnenah a ti a, mahse a lu a thing mai thung.

Amawia’n chaw a ei ve nghala,kan boruak a hahdam takzet,chawei kham hnuah rei awm loin a haw ta thung,Ruati te nupa an lo let leh tawha, engmah tih ka tum hran lo.Tum pawh ni ila a phal ka ring chuang lo.

‘Mu ila...’  a ti supa,thatchhe hmel zetin thutthleng hnung a ngheng a, a ban a kham duai bawk.

‘Lo han chho la,kawngkhar ka’n check fel lawk ang’ ka ti a, Pawnlam hi chu enfiah angai lo,Security an awm reng.Tukverh leh kawngkhar ho ka check fela,a hnuah Roomah ka chho ta choh,diktak chuan ka zam leh titih ta tho.

Khumah a lo thu mu a,a phone a lo khawih pah bawk,ka lut thawm pawh hreawmin a awm lem lo.Hetah a mu ang tih chu ka hre tho nangin ka awm a nuam lo.Ka tang teuh mai.

‘I lo la mu dawn lo mi?”

‘I damdawi eitur hi ka en lawk mawle’

‘Ka ei tawh’

‘Maw?”

‘Ka ei tawh,nangmah zawk khan ei tur i nei em?” a ti supa, a hmelpa zetah chuan min ngaihtuahna niawm tak a lang thei bawk.

‘Aih,engmah eitur a awm rih lo..’

‘A that chu,lo mu la..’ tih pahin a mutna bul a beng thuka,chhuanlam tur engmah a awm lo.

Light ka off a, a thim tha viau,ka mit ka khap sak sak mai,khumah ka lawna,amah hlat deuhin ka mu ta than,mahse a rawn tawlh hnaia,ka kawngah a rawn kuaha,a mal sei thlurh chuan min rawn khan bet nghal bawk.

‘Engtikah nge Doctor i hmuh leh ang?” a ti supa, a kut lum thur thur chuan ka kut a rawn hum a,ka samah a rawn fawp vang vang bawk.

‘Karlehah..ih..thil ka zawt thei che angem?”

‘Sawi la....’

‘Naute hi midang fa anih i ring tak tak em?”

‘I that chak em tih min zawt zawk la...’

‘Abel....’

‘Sorry...mahse i bula ka hmuh apiang khan ka khawih chak lutuk kha insum har ka ti thin,i hrethiam phak lo ang’ a ti leh supa.

‘Mampuii vang khan maw? Tiang em em hian i lo hmangaih tih ka hre lo a...’

‘Lo hawi teh....’ a ti hmuka, amah en thei turin min kuai her a,a darah ka lu ka nghata,Light kan off vek avangin a hmel ka hmu chiang thei lo thung.

‘Mampuii hi ka hun kal tawh ami ka tih kha..i awih em ka hre lo,ka kalsan hnu khan let leh tumna ka nei miah lo..Ka nuna i lo luh atang phei kha chuan ka engmah a ni lo lehzual’ a ti duah,a awki nghet churh mai chuan dawt a sawi lo ang tih min rin tir ve ngawt bawk.

‘Anih chuan engvangin nge min neih?”

‘I lo hre lo tak tak tihna ni em?” a ti leh supa,ka mal a rawn vuana, a kawngah min kerhbeh tir a, amah hnaih lehzual turin min pawt hnai salh bawk.

‘Hre lo..aaa...hre tho,Mampuii nen in inkawpna thup turin min nei i tih kha’ ka sawi zawng pawn ka na vawng vawng thei.

‘A reuh lutuk mai,nupuiah ka nei che anih chuan ka duh che tihna a nimai’ a ti supa,ka thaw hak mai..

‘Mahse...’

‘Shh...engmah sawi tawh suh,hmeichhe ngeng leh induhtawk tak,Mampuii pawh khing leta, engahmah ngai lo tur i ni tih ka hria,mahse...kan inkar i titawp thuta,ka induhtawkna i tichhiaa,engemaw tal hmanrua ka mamawh tih i hria alawm...’ a ti leh duah,sawi harsa a tih hmel phian bawk.

‘Anih chuan Mampuii vang tho anih chu...’ ka ti nghata, ka tum aiin ka aw a chang hret bawk.

‘Aaah,ni hauh lo..thil pakhat ka hrilh ang che,ka pa hian ka nu hi tihluihna hmangin a nei tih i hria em?” ka thaw hak mai,ka awih thei lo zawk..

‘Maw?” mak ka tihzia ka awah a lang thei bawk.

‘Um,ka pa Diary hi kan In kan chinfel tum khan ka hmu a,tah chuan chiang deuhin a ziak a,keipawn ka ti ve ta anih kha...’

‘Mahse, Abel....ngatinge?”

‘Mipa ka ni a, ka pa fa ka ni bawk...mahse, i duh duh i sawi ziaha,thin hrep ka chak thin zia che i hre phak lo zawk ang’ a ti leh supa, ka samah a kut a rawn rawlha,a kut lehlamin ka hmai a rawn khawiha, ka hmui a rawn tuai zui leha,ka thaw tha ngam lo,ka duh duh ka sawi thin te, Mampuii chungchang apiang ka an chhuahpui mai mai lai te kha avaiin engmah ka la theinghilh lo.

Tawng tuma ka ang ziau chu a hmui lum thar thar chuan a rawn khar ta hmak zawk,ka chhang let mai lo,dim leh dam takin min fawpa, a zei lutuk hi mak ka ti zawk thin,ngenngawl zetin a rawn fawp leha,ka chhang let ta nge nge,ka chhan let takah chuan a rum hawka,hmanhmawh leh duhthawh lutukin min rawn fawp ta thung.

Ka kawr a rawn zena, ka hnute a rawn huma, ka ip chawih mai..a samah ka tham a,ka samah a rawn tham vea,min kuai daka, ka nghawngah a hmai a rawn phuma,a mipatna in min si run bawk..

‘Doctor khan enge a sawi?” ati supa, a aw a khur dur dur bawk.

‘Eng ti zawngin?” ka aw a lawi rat mai.

‘Kan ti thei em tih mawle..’

‘Oh...ka hre bik lo..’

‘Anih chuan,Room hran ka hman a tul dawn anih hi’ a ti leh hrawka, a let sawn zui daih bawk..Ka ruak nghal huaiin ka hre bawk.

‘Mahse, Abel...kan ti thei tho ang..’

‘Aih, risk lak ka tum lo..’

‘Ok, ka hrethiam che..’

‘I hrethiam maw? Anih chuan ka awm ang hian i awm tihna a nih chiah chu’ a nui hawk bawk..

‘Ni lo..aw,nia..ka mamawh che ’ ka ti ta nge nge, ka pasal ania,enge zah tur awm chuang ang? Ka pasal bulah ka mamawh tih ka sawi hi sual a ni hek lo.

A rawn tawlh hnai leha,dim tein ka hmai a rawn chul kual leh dan dan bawk.A awmah ka hmai ka phum kaka,a lungphu ri dat dat ka hrethei leh ta,ka thlamuang ngawih ngawih.

‘Ok..engmah i ti lo ang,ka ti vek ang...’ a ti supa, a inbengkanga, ka mal karah a rawn tla zepa,ka kawr hak a rawn nawr tawm chhoa,a kawngah ka kherh bet nghal chial bawk..

A tawp kan thlen meuh chuan kan thaw dun hlawp hlawp mai,a chungah ka bawk thlar a,thlasik lai mah nise thlan vangin kan hnawng dun chap bawk..Ka sam karah a kut a rawn rawlha, a hnute hmur tereuhte ka khal nauh nauh thung.

‘Doctor in tih phal loh a neih a sawi em?” a ti supa.A zawhna ka hrethiam chiah lo.

‘Sawi nual,ngatinge?”

‘Kei chu rit la lo tur leh Motor khalh lo turin min ti a?”

‘Kei pawh.Rit la lo turin min ti’

‘Anih chuan thu kan awih lo ve ve anih chu..’ a nui nghawr dat mai..

‘Nghal lutuk...’

‘Um,dik chiah,i kut che kha i tihtawp vat loh chuan thu kan awih loh lehzual angai dawn ania’ a ti leh a, ka tawp nghal chat mai.

December thla a intana, ka naupai la lang chiah lo mahse ka haw lutuk erawh a zia ta viau,Doctor ka hmuh dawn apiangin Abel-an min kalpui ziaha,Motor a khalh leh thei tawh bawk.Hna kal tura chhuah erawh a phal lo bur,nitin Inah ka awma, kan hna khawih lai kan zo fel tawh hlawm bawka, kal lo pawh ni ila thil pawi lutuk erawh a ni lo.Mahse, min duatna vanga hna ka kal phal lo anihna hian min ti lawm zawk.

‘Tlai kha ka nu te In lamah chaw ei tur kan nih kha aw’ a insiam mawlh mawlh laiin ka ti a.

‘Tunah ka rualin kal la,nge nakinah ka rawn lam zawk ang che?” rawn hawi let chuang loin a ti a.

‘Ka lo inkhalh chhuak mai dawn mawni ka ti...’

‘Enga?” a rawn hawi leta,a jacket hak tur a keng bawk.

‘Tuna kal chu a la hmaa,bakah Ruati kha bazar tura chhuah a tuma, tlaiah i lo let leh a buaithlak bawk sia, ka lo va kal dawn mawni ka ti’

‘Theihnghilh teh a..’ a ti hluk a, a Jacket a ha a,a hnuaia T-shrit dum a hak leh a kekawr tight lam lek lek te chuan a pian nalh zet an khuh bo zo lo.

‘Chutiang takin a hlauhawm tawh chuang hleinem...’

‘Duhtawk teh,tun kha i sawi tawpna ni bawk se...’ min rawn en a, a hmelpa leh ngeng ngulh maiah chuan nawr luih chi a ni lo tih a chiang.Ka bu ta nge nge.

Min rawn pana, ka samah a rawn fawp zauha, a kal chhuak tur chu ka thlira, thla rei lo te chhunga ka nuna thil thleng tamtak hi amah vang liau liau a ni tih ka hria,keimah hian Mood ka nei pawn ka hre tawh lo,ka mood tur hi min siamsak nimai hian ka hre thin.

Christmas bazar turin Ruati te nupa an chhuaka,a pasal hian Motor a khalh theih tho avangin ka Car ka ken tir a,tihtur engmah awm bawk si lo nen verandaah ka thu a,kan Compound chhung ka thlir vang vang bawk.

Ka awmna tur a ni tih ka hriat hma khan engkim Design ka siam vek a,pawn lam te pawh ka khawih tel vek bawk.Pangpar dahna tur leh Garrage te,avaiin ka siam fel vek.A tha ber tih tur ni lo mahse a nuam lo tih tur a ni lo.Nitin hna ka kala,tlai takah ka haw leh ziah bawk nen Pangpar lam engmah ka la dah ta lo.Tunah in ka awm tama, mahse ka mamawh thil ho te lek ti tur pawn Abel-an chet a phal leh lawi lo..Hlauhthawn tur awm loin ka tha vek tih hre mahse inchhung chet engmah ka tih a phal chuang lo.

Tihtur hre loin chawhma lam chu ka awm ta mai mai,chawhnu lamah erawh Room lamah ka chhoa, Abel-a thawmhnaw dahna leh ka thawmhnaw dahna ka tifela,mipa che fel tak a ni lo bawk  nen a thawmhnaw dahna a hnawk viau bawk.Chhuatah ka thehchhuak veka,thawmhnaw dum a duh bawk nen a dum lam a tam ngang mai bawk.

A chung bera a kekawr bul ho dahna ka la thla leha,ka thehthlak rualin thil eng lam tla tel zauh ka hmu a, thawmhnaw tla satliah ang lo deuh in a ri dat bawk,enge anih ka hre lo.Ka dinna atangin ka chhuka, thawmhnaw thleh  ka haia,Envelope lian deuh hlek a lo ni a, a puar lah bawk.

A chhunga awm ka bun chhuaka, Paper inthlep fel thlap mai a rawn tla chhuaka,ka pharha,thil inziak ka chhiar rualin ka mengphar awk mai.

‘Ka boral anih chuan ka thil neih zawng zawng hi ka nupui Martha Malsawmzuali ta vek tur a ni a,tuman an chuh buai thei lo ang’ tih a lo in ziak a,a hnuaiah a hming sign leh midang sign a awm bawk.

An ziah ni ka en a, ka mengphawk lehzual,kan inneih tuk a an ziah fel a ni tlat,chuti anih chuan a sawi ang tak tak khan min duh vanga min nei a ni angem? Kan inneih tirh ka ngaihtuaha,nupa tak niloin nupa lem kan ni thin kha ania, mahse a thil neih zawng zawng ka ta turin a dah lawi bawk si..

A hmel ka mitthlaah a lo langa, ka inrin hmain ka mittui a rawn tla a,ka insut hraih bawk.Ka duh duh sawia ka tihnat thin lai pawh khan hei hi a lo tifel vek tawha,ka awm ang ang khan min lo dawh mai mai bawka,kei chauh emaw hrehawm ka lo tih lai khan ani pawh a lo hrehawm ve tho chu a ni sia..

Motor thawm ka hriat takah chuan ka tho vata, ka mit ka hru hul chat chat bawk,Envelope chhungah ka khung leh sawk sawka, adang awm ve erawh ka en ta lo.A dahn ngaiah ka dah let leha,a kekawr ho ka thlep sawk sawk bawk.Ruati te zawk annih ka ring tho nangin Abel-a a lo haw har tawhin ka ring lo,Farm lama kal loin Meeting turin a chhuaka,rei tur a ni lo tih a sawi lawk sa vek bawk.

Ka rin ang ngeiin Ruati te an lo ni a, bazar na tur an nupa hlawh lak tir loin Bonus ka pe a, Abel-an a hranin a lo pe ve bawk,mahse a lo pe ve tho tih erawh Bazar an kal dawnah ka hre ta chauh,pawi ka ti chuang hauh lo bawk.

Abel-a lo haw hmain ka lo inbuala,kan awmna lai a tlang deuh bakah a boruak a nuama, a vawt tha var var tawh viau,ka lu ka su a,ka sam ka nuaia, a tla nasa leh ngang mai bawk.

‘I inbual tawh mi?” room a rawn luh pahin a ti a,ka sam ka lo buaipui mek thung.A hmel ka hmuh rualin Envelope a ka lehkha hmuh ka hrechhuak lehnghal zat.

‘Aw..ka rin aiin i rei a..’

‘Nia..hnamdang ho hi chu an buaithlak thin’ a ti awlsam mai,a bag sofaah a thleh thlaa.

‘Ka sam hi a tla nasa lutuka,a tla kawlh dawn mawni ka ti’ ka ti leha, ka lu lei lang deuh chu ka en vang vang bawk.

‘Tla kawlh lo tawp ang,i hman nghal chuan kan kal mai dawn mi?” a ti leha, min rawn pana, ka chal leh ka sam to tan na, tlema kawng deuh chu a rawn fawp zauha,a kalsawn leh a,Khumah a thu thlaa, a vang zawngin a mu zui nghal zat bawk.

‘Thil ka zawt duh che a..’

‘Sawi la...’

‘Lehkha....’ ka ti hman uk a, ka ngawi leh daih, ka hmuh tura a dah ni lo keiman ka lo en a,ka sawichhuah a ka zawhfiah kher tul in ka hre leh lo.

‘Eng maw?” a rawn tho a.

‘Engmah,ka hre leh si..’

‘Ok,kal ang’

Kan thlen chuan Rosalind-i te chhung an lo thleng tawh,Abel-a min hrilh danin Christmas dawn hian an chhungkaw ho chaw eikhawm an nei ziaha, Abel-a pi leh pu bakah a nu unau te an tel vek zel a ti bawk.

‘Matty,i tha em?” Rosalind-in min lo ti nghal sawt sawt,ani hi a nuta te ang lo takin a nema, a mizia a dam thlap bawk.A ngainatawm em em ti ila a dik ber.

‘Aw, tha e..nangni zawk?” ka ti ve a.

‘Um,tha..u,ngatinge Body guard ang maiin tikhan i din khawng renga?” a u en chungin a ti a, a nui zui kar kar bawk.

‘I sual em maia...’ ka nui ve tho bawk.A bulah ka thu thlaa,ka sirah Abel-a a rawn thu ve nghal bawk,a nau thilsawi ngaipawimawh awm pawn a awm hek lo.

‘Eve-i te an lo kal ve dawn lo mi?” thuphungin ka ti a, Abel-an min rawn melh zawk tih ka hmu ru kar bawk.

‘Kal lo ang, tun tum chu kan Family bik ania’

‘Maw?’ ka ti a, a sawi awmzia ka man lo,Eve-i te chu Abel-a nu u fa ni in ka hre si.

‘Ahh...eng lo ania..’ a ngawia, a hawi kual leh rih,Abel-a lam a en leha, ani erawh chu thatchhe zetin  a thu thluanga,a phone a khawih mawlh mawlh bawk.

‘Evelyn-i te lam hi chu Mama nu lam te annia’ a sawi zawi hle bawk.

‘Oh,anih chu...ka lo hre lo a’ ka ti sapa, mahse ka hrethiam ta kuar tho.Kan inneih zan khan Abel-a pu min chibai tira, kha kha Abel-a nu lama ka pu a ni lo,Tluangpuii khan Evelyn-i pu a ti awlsam mai kha ania..Abel-an a Cousin anih thu a lo sawi bawk nen ka hrethiam lo kha a awm ka ti leh hnuhnawh.

‘Diktak chuan kan sawi hrang ngai lo a...’

‘Aaaah,sawi hran a ngai hleinem..’ ka ti a, a nuam lo ti hmel chu hnem tumin ka nuih a,ka riruah thil dang a lo langa, kei pawh hi ka nu leh pa fa ka ni bik lo.Midang inzawmna ka sawisel thei ka ni lo.

‘Um..khawnge naute?’ ka ti leh a.

‘Ka pa khan a pawma,insawiselna i nei miah lo maw?’ a ti leha.Ka lu ka thing mai,vanneihthlak takin engmah insawiselna ka nei lo.

Abel-a pi leh pu an lo thlenga, a hnuah a pu,a nu unaupa te an lo thleng ve leha, Ka pa lamah tumah chhungte han tih em em tur kan nei lo tih ka hre tawh sa bawk.Engmah boruak nuam lo a awm lo,Abel-a accident atang khan kan Boruak rit em em thin kha a kiang ta hawk,chumai bakah ka nu hian Abel-a hi a hmangaih theihna zawng zawngin a hmangaih tih a damloh atang khan ka hrechiang em em tawha,Abel-a lungawihlohna lam kha ka theihnghilh ni loin ka lo haw ve rilru kha chu ka thlak ta vek,mahse Abel-a lo nat tawhna te kha chu ka dem chuang hauh lo.

Kan boruak a nuam viau,eitur ni se duhthusam a ni bawk..Kan eikham hnuah kan titi khawm a,kan ri laih laih mai,kan duh duh kan sawia,Mipa ho erawh an bo diak thung.

Dar 10 velah inlam kan pan ta chauh.Room ka pan ding nghala, ka thawmhnaw hak ka phelh sawk sawka, mutnaa hak chi ka ha a, Abel-a lam pawh ngaihven loin ka mu nghal daih.

‘Sorry...’ rawn mut ve pahin a ti a, ka chhang duh lo.

‘Zu ka in vangin i thinrim tih ka hria alawm’ a ti leha.

‘Thinrim lo...’ ka ti hmaka, min rawn kuaha, amah en thei lo zawngin ka mu lui tlat thung.

‘Tak tak?’

‘Aw...’

‘Anih chuan ngatinge haw kawngah khan i tawng miah loh?”

‘Sawi tur ka hre lo animai alawm’ ka ti leh hmak ringawt,diktak chuan ka thinrim ngei,a accident dawn zan khan zu a in a,khatiang kha a thlen leh ka hlau ngawih ngawih.

‘Ok,ka in tawh lo ang..tak tak’ a ti leh a, ka kawr a rawn zena, ka hnute hmur a kutzungtangin a rawn chep hruala, ka thaw hak mai.

‘Tawp teh...’ ka ti hlaka, a kut ka man behsak bawk.

‘Aih...’ a ti hmuka, a insiamrema, ka bekah a rawn fawpa,ka che duh lo lui tlat thung.

Christmas thlen nan karkhat chauh a awm tawh,Office lam pawh an chawl fel tawha,Kumthar hma chuan inhawn leh kan mamawh tawh rih lo,kumthar hlima tan turin hna kan la fel diam tawh zawk.

Zan lamah ka hnar a thi leh avangin Evelyn-i kan va hmu a, test kan nei kual leh ta teuh bawk,amah zawk tak pawh hian mak a ti ve tawh a,a khat tawka thi reng,engmah dik lohna nei bawk si lo hi a awih lo nimaiin ka hria.Abel-an phai lam pan a rawt deuh nangin Evelyn-i thungin tul a ti lo.

Abel-a phoneah msg a lut leh thina, amah a inbual mai bakah ka phone a ni lo bawka ka ngaihven lem lo.Mu chungin Tv ka en a, thlasik anih chu thuhran, ruah a tla seng senga, khawvawh dan a vin tak mai.

Call a dawng ta nge nge, ka pan hnaia,Evelyn-i a lo ni a, eng chu nimaw? Kan kalsan atangin darkar tam a la liam lo.

‘Msg en vat teh, test result kha a tha lo ania’ hello pawh ka tih hmain a rawn ti a, a off zui leh daih bawk..A awah khan hlauhthawnna niawm tak a lang chiang em em bawk..