REVEUSE- 26

CHAPTER- 26

‘Tu nge a? ‘

Rang zetin ka hawi leta, ka hnung lawkah a sam hru mawlh mawlh pahin Abel-a a lo ding reng tawh,a lo chhuah lai ka hre miah lo.

‘Evelyn-i’

‘Maw?’ tih leh rawn kal hnaih a ruala, a phone ka lo ken chu min laksak nghal zat bawk.

‘Eve-i..a sawi awmzia ka man chiah lo,test result kha a tha lo a ti a..’

‘Ok..ok.ka hria,nakinah ka call back ang’ a ti nghuta.

‘Keimah kha chu vawiin khan engmah tha lo a awm lo kha a ti a,nangmah i in check-up ve bawk si lo a..’ ka ti leh talh.

‘Um,check-up lo..midang mawle,firm lama kan nau ania..i ril a tam em?” a tih zawm leh daih bawk.

‘Aih..mahse midang lo thlen hmain ei kan ngai thoa,theihse chuan mut ka duh zawk,ka ei peih lo’ ka ti a.

‘Ahh,nangmah i ril a tam loh pawn hei zawk hian chaw a mamawh ania’ tih pahin ka dul a rawn khawih zauha, min pawt hnaia,amah si chetin min kuah beta, ka samah a hmai a rawn phum vang vang bawk.

‘Anih chuan naute vang chauhin min ei tir i tum tihna mi?” ka ti sapa, a kawngah ka kuah ve a.Boxer chauh a ha bawk nen a taksa lumnain min ur ham ham mai.

‘Ka tana pawimawh ber i hria alawm..’

‘Naute...’ ka ti sep ringawt,atthlak zetin ka na zawk bawk.

‘Min en teh..’ tih pahin a kut lehlamin ka khabeah a rawn dawma, amah en thei turin min kuai daka,a hmelpa leh tak ngul maiah chuan angaihtuahna engmah a lang lo.

‘Ka en che hi..’ ka nui a, a then ve suk bawk.

‘Ka tana pawimawh ber chu nangmah i ni tih i hriat kha,mahse kan nunah Naute a lo tel ve takah chuan ani pawh ka tan a pawimawh ber tho,in pawimawh dan a in ang lo mai zawk..’ a ti supa, a kutzungpuiin ka hmui a rawn tuaia.

‘Anih chuan kawr ha tawh la..i hritlan vaih chuan nakum thleng  a daih dawn ania’

‘Ha dawn e, mahse ka la sawi zo lo.I hriat atana ka duh ber chu engpawh thleng se i bulah ka awm dawn,Naute vang a ni emaw tu vang pawh nise ka tel lo a i awm ka phal ngai lo ang’ a ti leh a,ka nui hak mai,mahse a hmel thutak leh insehruh teuh chu ka hmuh rualin ka nui tawp chat a, a chhan ka hriat si loh in hlauhthawnna zawkin min fan nghal raih raih mai..

‘I tha vek tiraw?” ka ti ta ngawt.

Ka hriat lohin engemaw natna ruk a lo nei anih vaih chuan ka hriatchhuah ni chu ka kehchhiat ni a ni dawn chiang.A tel lo a nun hmang tur hian ngaihtuah pawh ka ngaihtuah ngam tawh lo.

‘Um,tha chiang.Ka bulah i awm anih phawt chuan ka tha vek ziah tih i hria alawm’ a ti leh a,chhan let tumin ka ang ziaua,mahse a hmui lum thar thar leh fawh nuam zetin a rawn khar ta zawk..

Min pawt hnai leh salha, a mipatna rawn tho tan chu ka hrethei hial bawk,ka mawngah a kut lehlamin a rawn vuana,a rum hawk mai.

‘Duhtawk ang..’ ka ti sepa, ka aw a mumal bik lo..

‘Min hrem hi chu i thiam mawle..’ a then suka, min rawn fawp leh zauha,mahse, a inlahrang ta tho.Hnial ka duh hrim hrim vang a ni lo,zanin hi Abel-a thiante leh ka thiante kan Inah Party kan neih dawn avangin engtik hunah pawh midang lo kal thei anni tlat.An lo thlen hmaa chaw lo ei fel kan ngai bawk nen,thildang tih na hun a awm lo.

Khuma a thawmhnaw hak tur ka dahchhuak sak chu a haa,kei erawh khumah ka thu fel at thung.Party hi a hmaa tih tum sa pawh kan ni hran lo,Tluangpuii vawiinah a lo hawa, Amawia a lo haw lai a ni bawk nen an rawt chawp chuk chuka,ka hnar thi vangin Abel-an thulh a duh,ka chau ziah tih pawh a hria, mahse keimah zawkin thulh tul ka ti bau lo.Kan lo tih lawk sa chu tih tlang mai a tha ber.

Chaw kan ei kham hnu lawkah Amawia a lo thlenga, ka la hmuh ngai loh mipa pakhat a rawn hruai tela,mahse College an kal laia an kawm thin a lo ni a, phai lamah hna thawka a awm avangin ka lo la hmu lo mai mai zawk.A hnu deuhah Tluangpuii leh Pantei an lo thleng rual veleh,Awmtei te erawh zan chhuah an huphurh deuha an lo kal ta lo,thian hnai zual tak tak chauh kan nih dawn avangin kan tam lo,kan vaiin sawm pawh kan tling lo.Jeffrey-a ka ngaihtuaha,mahse Abel-a duh loh zawng tih ai chuan ka hrilh loh mai a fuh zawk ka ringa, ka sawm ta  lo.A hriat hunah a lawm lo anih pawn a lawm lo nimai teh se.

‘Hon,Amawia te hian Drinks lam an tih theih leh theih loh an hre duh a’ ka hnung lam atangin ka kawngah a rawn kuaha.Midang an awm leh awm loh rang zetin ka en kual ve thung.

‘Hey,midangin min hmu ange?” a zawhna chhang loin ka ti hlak ringawt.

‘A ho em mai,midang nupui kuah pawh ka ni hleinem’

‘Mahse...’

‘Ka zawhna che chu?”
‘Ka hre lo,ka duhdan i hria alawm’

‘Ok,kei chuan ka in lo ang’

‘I tiam em?”

‘Tiam e,mahse Beer chu a theih ang tiraw?” ka darah a hmuiin a rawn nul kuala.

‘Beer pawh zu tho..’

‘Anih chuan ka in lo ang,mahse Midang hi chu zanin atan bik chauh dah free ve la..’ a ti leh a, ka bengkawm a fawp dun dun bawk.

‘A tha lawm,i duh chuan nangpawn Beer i in thei ang’

‘Yes,Boss..’ ka nui hak mai.

He nun hi kan mumangah pawh ka lo la mang chhin ngai lo,kan inneih tirh atangin engtiklai pawn inhauh inring rengin ka nun ka hmang a,hauh pawh kan inhau nasa,engtikah emaw chuan kan la inpawh ve maithei tih ngaihtuahna kha chu ka nei ve zauh thina, mahse tiang  em em hi chu thil thleng thei turah pawh ka lo ngai lo,mahse a thleng tlat.Vawi tam ka mumang a ni lo tih ka inhrilh tawh chung pawn ka mumang emaw ka la ti fo tho.

‘Khawnge in pa kha?’ Amawia’n a rawn ti a.

‘A awm lo mi?” tih pahin ka hawi kuala,ka hmu mai lo.

‘Nichin kha chuan a awm renga,ka hmu ta lo a’ tih pahin a hawi kuala.

‘Inchung lamah a chho aniang, ka han en lawk ang’

‘Angai kher chuang lo ang’  ati leh lawi.

Ka phone a rawn ri a, ka en vata, Abel-a nu a lo ni a, tun ang tlai tawhah enge rawn sawi a tum ang ka hre lo.

‘Aw, nu..’ hello pawh ka ti lo.

‘Matty, a tlai tawh deuh nangin Tea ka be duha’ a rawn ti a.

‘Um,mahse amah i call lo mi?”

‘Call a, a busy a,ka hmanhmawh deuh sia’ a rawn ti leh a.Engthil tak ni maw? Ka hriat ve loh tur thil awm niawm takin..

‘Ka’n en lawk ang’

‘Aw, ka lo call leh dawn nia’ a ti tha ve mai.

Inchung lam ka pana,Roomah a chho anih ka ring ve ngawt,Beer kha a inzawm deuh zat tih ka hre kara, zu pangngai in lo mahse a lo rui chiam ang tih ka hlau tho bawk.

Kan Room kawngkhar lo inhawng sa chu ka nem hawn belha, mahse Abel-a tawng vin thak ka hriat rualin ka ding chat mai,a sawi tak erawh ka hrechiang thei lo thung,tunge tunah hetah a awmpui ang ka hrethiam lo,inhnuai lamah khan kan inleng te an awm kim vek tlat.

Dimtein ka nem hawng riai riaia, Room chhung eng at maiah chuan Abel-a min hnungchhawn zawnga ding ka va hmu a, tumah midang an awm lo,Phone in tuemaw a lo be mek zawk.Mahse, tunge khatiang taka a vin ang? Tun ang tlai tawhah lehnghal..

‘Lawk...ngaithla rawh, engmah a hriat ka duh dawn lo.Ka theih chen chen ka chingfel ang’ a ti hmuka, thinrim insum a ang viau,a kekawr ipte a zen tut bawk.Lehlam tawng ngaithlain a ngawi leh rih..Mi tawng lo ngaihthlak ruk mawi loh zia ka hre ve reng nangin ka tawlhsawn mai chuang lo.

‘OK,ka hria,ka sawi tum zawk chu i ka lo chip hmak rawh ka tihna anih chu,tihtheih awm zawng zawng ka ti vek ang,an pahnihin ka duh ve ve,a chiang em?’ a ti leha, ngenna ni loin thupek anih zia a awah chuan a chiang ngawih ngawih bawk.

‘Aih,anni pawh ka duh lo..keimah leh nangmah animai.Result chu engpawh nise ka ngaipawimawh lo..’amah bawkin a ti leha,thil hriatchhuah ka nei..

Tlaiah khan Eve-i khan eng result emaw a rawn sawi kha..Abel-a khan a firm lama mi ti mahse ka awih ta tlat lo,a hnathawk satliah anih chuan tunah engvang mahin khatiang khan a tawng hauh lo ang,zan dang ang lo takin tunang tlaiah ka nuin a rawn be leh duh bawk nen..Ka nu ka hriatchhuah takah chuan kawngkhar dimtein ka pawr khara,ka ngaihtuahna tihfim tumin ka ding leh ren rawn.

Ka phone a rawn nghawr dar dara,  ka phu nasa viau,silent a ka lo dah hlauh ka lawm zia chu pui tak a ni.Ka lekkanga, ka rin ang ngeiin ka nu bawk.Thawm dim zetin ka pen phei tham thama,Step tawp ka thlenin ka pick-up a, thleng chho chiah niawm takin thawm dim lo thei ang berin Room lam ka pan bawk.

‘Lawk,hei Roomah ka en dawn mek a..’ tih lawng lawng pahin Room kawngkhar ka nem hawnga, Abel-a rawn chhuak tur nen kan insu thelh bawk.

‘Ka nu..a be duh che a’ tih pahin Phone ka pe a,chhuah leh mai tumin Kawngkhar hawnna ka vuana, mahse ka chhuah hmain ka ban rekah a rawn mana, amah si chetin min pawt bet nghal a, a thil in rim chuan ka hnar a verh a,ka ner nak mai.

‘Aw ... Nu...’  ka nu tawng ngaithlain a ngawi vung vung bawk.

‘Ka lo zuk chhuk ang’ ka hmui phunin ka ti a, a lu a thing ringawt, min thlah chuang lo.Tal chhuah luih talh pawh ka tum bik lo,diktak chuan amah ngheng a min kuah te, a lungphu nghawr dat dat ngaihthlak te hi ka thlahlel ve ngawih ngawih tho.

‘Naktukah kan sawi dawn nia,zingah ka lo kal ang’ a ngaihthlak vung vung hnuah a ti a,a mangtha a, a off zui daih.A pawimawh hmel tehlul nen..

‘Eng thil nge a? a tlai tawh si” ka ti a.

‘Ka pa chungchang ania, naktukah ka va kal ang’ a ti awlsam mai,ka sam tawn loh a ka thlah chu ka bengah a rawn zepa,a rawn kuna, ka chalah a rawn fawp zauh bawk.

Tluangpuii te haw hnuah ka mutsan ta nge nge, Mipa ho an la awma,a la tui dawn chauh nimaiin ka hria.Ka chau ngang aniang, Abel-a rawn mut lai pawh ka hre lo.Sava chiar nawk nawk thawmah ka harh leh ta chauh,khua a lo eng at tawha,ka inleta, Abel-a a lo awm tawh lo.A lukham delh khuar dak mai chu ka chula,ka la kanga,ka hmai ka phum vang vang bawk.

Tho mai loin ka mu ren rawna, khua a vawt a, zing thawh a peihawm loh,mahse Abel-a hi chu a tho tlai ngai lo,ka thawh hmain a tho ngei ngei.Nizan khan ka nu te inah a kal dawn tih a sawi lawk avangin Abel-a a chhuah daih tawh ka ring a, Ruati’n in chhung a tifai mek bawk ang,nizan khan mi pangngai vek kal khawm an ni bawka, engmah han hnawk em em erawh a awm lo ang tih ka chiang.

Peih lo zetin ka tho a,Tukverh ka nawr tawlha,Eucalyptus kung sang zet, kan inchung aia sang zawk chu ka en a, thliin a chhem kur siau siaua,zing nichhuakin a chhun eng at bawk.A zarah sava tereuhte te an awm sap sapa, hmuhnawm ti zetin ka thlir dauh dauh mai.

Ka hnar a rawn za a, rang lutukin Bathroom ka pana,Cotton roll ka phawrha, Darthlalang hmaah ka ding vat..Mahse, nidang ang lo takin tlem te chauh a thi a,rei a ni hek lo.Muangchangin ka inphih faia, khawvawt nen chet a peihawm loh takzet.Mahse, ka nu ka tlawh khata, kan In lamah kal ka duh,Abel-a ruala kal a remchan loh pawn Ruati pasalin min thlah thei tho bawk.

Dar 9 velah Abel-a a lo haw ta chauh,Kitchen lamah Ruati nen kan awma, min hmu lo nge ka hre lo, Roomah a tlang chho a,mahse a rawn chhuk leh rang viau,Ruati nui hak hak chu angaihna hre lo zetin ka en a.

‘Enge?” ka ti ha mai.

‘Engmah..Pu hi ka nuih a ti za alawm’

‘Maw? Ngatinge?”
‘A zawng reng mai che...bakah..’ Abel-a rawn lut a hmuh vangin a sawi zo ta lo.

‘Thil i ei tawh em?”  a rawn ti a, Dawhkana Grape awm chu a laa, a hmawm nghal zauh bawk.

‘Ei nang,ka lo nghak che..’

‘Um,ka rin aiin ka rei a,Roomah chho lawk ila..’ a ti a, a hmel thutak zetah chuan vei nei a ang viau bawk.

Room lam panin ka zui chho a, a bawp sei zet chuan pakhat te te a rap loin a pen chho pawk pawka, a hmanhmawh hmel viau,eng chu a hria nimaw?

‘Zin ka ngai dawna...’ Room kan thlen veleh a ti a.Ka mengphawk hra mai.

‘Khawiah? ‘

‘Ka pa nen kan zin chhuak lawk dawna, mahse Christmas hmain ka lo let leh hman ang’ a ti nghut ringawt.

‘Ka hriat ve chi a ni em?” ka ti ta nge nge,nizan atang khan an chhungkua bik hian ka lakah zep an nei niin ka hre tlat tawh.

‘Um, mahse hre lo la ka duh zawk’

‘Ok, a tha alawm’ ka tum loh tawpin ka awah lungawi lo aw a hriat tel theih.

‘Sorry...’

‘Ngatinge Sorry i tih a?’ nuam ka ti lo leh lawi.

‘I thinrim tih ka hria, mahse engkim hi sawi vek a theih rih loh a’ min rawn bana,a pian nalh zet thlawp zaihin min kuah bet zui hmak bawk.

‘A pawi lo ka tih kha...’

‘I lakah engmah zep ka duh lo,mahse hei hi chu a tul miau a..’

‘Ka hrethiam alawm..’ ka ti leh a, a inthiam lo tih ka hriat rual khan ka lawmloh rukna a reh leh vek tawh zawk.

‘A theih anga rangin ka lo haw ang,i tel lo a mut ka peih lo asin le...’ a ti leh a, ka nui hak mai..

Nupa inzawmna hi Sex a ni ngei mai, mahse a ber erawh a ni lo.Ka nu in pasal ka neih hlim khan min hrilh a,’nupa chu taksa insiin kan mu tur a ni a,sex kan hman leh hman loh chu a hran daih,khum hran emaw puan hran emaw hi hman loh tur ‘a ti thin.Ka nu nimahse a sawi dik zia ka hrechiang tawh,ka mangchhia avanga ka buaina te kha Abel-a bulah hi chuan hlauhna ka nei ngai lo..

A kal pahin ka nu te in lamah min thlah nghala,ka nu lawmzia ka hmuh rualin ka tlawh khat vangin ka inthiam lo vang vang mai.Tlaiah chaw ka ei nghala,riah erawh ka riak lo.Abel-a khan ka duh chuan a zin chhung awm turin min ti a, mahse In ka neia, damlohna vang ni si loa riah ngawt ka tum lo.

Tluangpui’n min rawn calla, Dine-out an lo rawt pek chu niin,ka hnial teh nangin hnial awmzia a awm lo,min rawn hruai pawh an inhuam thu a la sawi ta deuh deuh.Abel-a te ni thum lai an awm tawha,kartawpah an lo haw dawn tih a rawn sawi lawk tawh thung,vawiin bik erawh nilengin a buai dawn tih zingah min rawn hrilh lawk thlap.Msgin ka kalna tur ka hrilh a,dar 7 rik hma hretin Tluangpuii leh Jeffrey-a an rawn thlenga,Jeffrey-a a tel ve dawn tih ka hre lo.Mahse, a tel ve dawn vanga kal leh loh ngawt chi a ni chuang lo.

Ka beisei aiin num ka ti ta phian,mahse,a khat tawkin Abel-an min rawn biak ringin ka msg a read leh read loh ka ena, mahse ka haw thlengin min rawn be ta lo.

Ka phone nghar dar darah ka harh ta a,Abel-a a lo ni a,sana ka en a, Darkhat a ri tawh..Chuti taka buai chu engthil tak ni maw?

‘Hello..’

‘Ka tiharh che law?” a rawn ti a.

‘Aw,mahse a pawi lo..in va buai awm ve’

‘Buai..lawk aw..’ a ti leh rih.Hmeichhe pakhat tawng ri leh Abel-a nen an inbe thawm ka hretheia,tun ang hunah tu hmeichhia nge maw a biak ni?

‘Mate,zingah ka rawn bia ang che..mangtha phawt ’ a ti a, ka chhan let hmain a off zui daih bawk.Mahse,a tawng danah khan ruih a nei tih ka hre hman tho..Ka pa nen an zina,tun ang zan reiah ka pa nen an chhuah dun ka ring hauh lo thung.

Muhil lawk thei loin ka let ka leta,khawvar dawn lamah ka muhil ta chauh,Ka harh leh meuh chuan dar 11 a lo hnai thuak tawh,khawsik in min tham a, ka lu a rit luk mai.Abel-an min rawn call leh call loh ka ena, engmah a awm lo.Msg tak ngial pawh a awm lo.Nizana hmeichhia kha tu nge anih ka hre miah lo nangin ka thik tho..Ka thin a ur ru teuh a, ngaihsak hlawh lo tihna leh mahni inkhawngaihna vangin ka mittui a hnai ngang mai bawk.Hahthlak hian..Ka rai vang hian ka rilru te hi a zim zo vekin ka hria,mahni inkhawngaih ka ching thar nasa bawk..A reh ngawt thei der bawk si lo.

Inhnuaiah ka chhuk lawka, mahse khum ka pan leh ta zawk,tlaiah Doctor hmuh ka ngai bawk nen,kal hmain mut leh ka duh..Ka muthilh palh hlauin Ruati hnenah dar 3 a min kai tho turin ka chah thlap bawk.

‘Matty...’ ka inher vata, Mampuii a lo ni a.Doctor in ang kan pan tih ka hre miah lo.Ni lo,kan pan a in ang lo hrim hrim zawk.

‘Enge i tih a?” ka ti satliah..

‘I kal chhan ang tho kha..’ a dul a khawih zauha, a nui vak var bawk.Kei aiin a rai hmasa zawka, a dul pawh a lang tawh zawk.

‘Oh,hetah in kal ve tih ka lo hre miah lo a..’ ka ti tha ve mai..

‘Kan Doctor kan thlaka, helamah ka rawn kal  ve tan dawn anih hi’ a ti leha.

‘A tha vak lo nge?” ka ti satliah..

‘Aih,nichuang lo e..’Ka bula thutna awlah a rawn thu thlaa,Marcus-a hmuh mai ka inbeisei laiin ka hmu lo.

‘Keimahin ka lo kala,vawiin chu a buai deuha’ ka rilru hria niawm takin a ti leh a.Ka bu ringawt.

Kan thu dun nangin kan rilru inhlat tur zia ka ngaihtuaha, in khatah kan lawia,ka pasal nen nunhlui lo nei dun laih tawh a ni bawk.Kan inpawh hleithei lo hi ka thiam loh ni pawn ka hre lem lo.

‘I insawisel em?’ amah bawkin kan ngawih ren rawn hnuah a rawn ti leh a.

‘Aih,ka tha..nang zawk?” a tir lama inzawh tur niawm tak a ni ka ti rilru a.Mahse ka sawi chuang lo.

‘Ka lo hlauhthawn pui deuh che a..’

‘Engmaw?”

‘Ka hlauhthawnpui che mawle,engtik nge treatment i lak tan ang?” a ti leha, ka bo tulh tulh thung.

‘I sawi awmzia ka man lo..’ ka nui lui sak bawk.

‘Matty,ka haw lo che ania,engmah zep duh suh,a hmaa kan boruak kha chu ka theinghilh vek tawh zawk,mahse hmun khatah kan mo duna,midang ai chuan ka ngaihtuah lo thei lo che, i awih em chu ka hre lo a’ a ti leh duah,ka thle bak ringawt.

‘Engmah ka zep hleinem..’

‘Ok..nia,i sawi duh loh chuan i thu le..mahse i treatment lak tur vanga i naute kha i chan a tul anih chuan pawi ka tihpui ngawt ang che,Eve-i sawi dan kha chuan naupai zui a harsa dawn sia’ a ti leh salha.Kei erawh ka thu khawng nghal lah thung.