REVEUSE- 27

CHAPTER- 27

Hei ngei hi a ni ang Abel-a leh Eve-i sawi kha,mahse ngatinge chutiang khawpa ka serious anih chuan engmah a sawi loh? Zep chi a ni lul si lo.Lo zep pawh nise a seriou viau anih chuan zin chhuak loin Damdawiinah ka lut ngei ngei ang,anihna tak a sawi hreh anih pawhin Dawt tlem tal pawh a sawi mai ang chu,mahse engmah chutiang a ti lo..Khawi atangin nge Mampuii hian a hriat ka hre lo,a pawimawh hek lo.A pawimawh ber chu engmah ka ngaipawimawh lo tih hmuhtir a nimai,a dang chu a tlachawpin..

‘Pawi ka tihpui tak tak che ania’ amah bawkin a ti leha, a hmela hnehtu intihna lang chhuak chu ka hmuh hmaih hauh lo.Chu chuan pawi a tih loh zia a tilang chiang em em bawk.

‘Ka lawm e, mahse vawiinah Eve-i ka va hmu zo chauha, chutiang tur pawn a lo sawi lo a, i hresual anih ka ring’  ka ti a, ka tawngdan dam thlap mai chuan a barakhaih tih ka hria,a hmel buai deuh nak chu hahdam hmel takin ka en kar bawk.

‘Aih,an sawi dan kha chuan i tan a hlauhawm lutuk an ti a..mahse..ih.. Eve-i chuan engvangin nge chutianga a lo sawi leh ka hre miah lo..’ a ti bah nak mai.

‘Min ngaihtuah suh,keini pawn a tir chuan kan hlau alawm,mahse Eve-in a sawi chian takah chuan kan hahdam lutuk..’ ka ti lui leh salha,ka nui var var bawk.

‘Aw,nia...a lawmawm lutuk’ a ti sapa, a kut pahnih a hum kawp tlat chu ka hmuh hlau niawm takin a bag hnuaiah a thukru zal zal bawk.

‘Engzat na nge i nih?’ ka ti leha..

‘Ka hnung angreng,nang zawk?’ a ti tha ve mai. Ka luh hun tur ka hrilha,diktak chuan hahdam hmel taka ka lanna phenah hian thawpik lutukin ka thi lo chauh zawk.Mahse, ka chhungril awmdan zawng zawng hmuhtir hi ka tum lo,tul ka ti hek lo.

In ka thlenin a thim tawh,zing atangin vawikhatmah Abel-an min rawn be lo,Mampuii thilsawi te kha ka bengah a ri nawn tlut tluta, Abel-an a sawi loh avangin rin loh ka duh ngawih ngawih,mahse Eve-i leh Abel-a khan thil zep an nei tlata,kha kha enge anih ka hriat miau loh avangin Mampuii’n dawt a sawi ka ti ngawt thei chuang lo.Mahse, chuti taka ka serious anih si chuan engvangin nge engmah min hrilh loh? Ka nunna a ni a, hlutna ka nei miah lo zawk nge?

Ka hmaa ka eitur awm chu ka ena, ei chakna pakhatmah ka nei lo.Mahse, ka ei angai, keimah vang niloin Naute vang tal pawn ka ei ngei ngei a tul.Tihluihna takmeuhin tlem ka ei hram.Room a ka luh rualin ka phone a ri tawp ve chiah,ka pan hnaia,Abel-a anih ka beisei,mahse ka nu zawk a ni tih ka hmuh rualin ka phurna a reh nghal rawih rawih bawk.

‘Hello...’ Abel-a nuin a rawn ti a.

‘Inhnuaiah ka awm daiha, enge ni ta?” Khuma lawn pahin ka ti a.

‘Eng ni lo e, naktukah i pa te an lo haw dawn tho bawka, tlai lam chu chaw rawn ei ula..’

‘Abel-a tih dan dan animai’

‘Aw, kan inbe zo chiaha,i tihdan dan a ti ve thung a...’

‘A tha alawm,ka lo phei dawn nia’ ka ti sepa.Ka chau ngawih ngawiha,ka mut a chhuak em em bawk.

‘I tha em?” a rawn ti ta chat,ka in Control viau emaw ka tih laiin ka chau tih a rawn hre chat tho.

‘Aw, tha e..’

‘I chauh hmel lutuk a,in enkawl tha ang che aw’ a ti leha,ngaihbel luih ngial ka tum pawn chutiang lam engmah ngaihbel tur a awm miah lo.Nidang ang bawkin tha takin min be mai niin ka hria.

Ka mu meng kara, ka phone sana ka ena, dar 8 vel chauh,ka nu sawi hmang khan Abel-a nen an inbia a, mahse kei erawh min be miah lo,a nu a bia ka thik lo,a nu a ni miaua,mahse engvangin nge min biak miah loh? A buai anih pawhin a buai tih msg tal pawn a rawn sawi thei reng,ka thinrima,mahse, tihngaihna ka hre chuang der lo..

Ka phone ngawr dar darah ka harha, meng mang loin ka ban a,min rawn call tu ka ena,Abel-a..ka pick hmain sana bawk ka en leh te te,dar 11 a pel hret,engvanga tlai tak taka min rawn call kher nge maw anih thin ni? Reilote chhungin ka ngaihtuah tam hman lehpek.

‘Hello...’

‘Ka rawn tiharh lehpek che a ni maw?” dam thluamin a rawn ti supa, ruih nei a ang ta lo.

‘Aih,ka la muhil lo a..enge ni ta?”

‘Eheu! Ka nupui be tur hian a chhan ka mamawh tih ka lo hre lo a’ a ti hmuk a.

‘Aih,chutiang lam ka sawi lo..a tlai tawh bawk sia..’

‘Dik chiah,nileng khan i call ka changa, min rawn biak tak lohah chuan i tha em tih tal ka hre duh a..’

‘Um..’ ka ti sep ringawt.

‘Ka that leh that loh hre tur pawn min lo call lo a’ a ti leh sup a.

‘Nia..ih,eng lo ania, i buai thei sia, i buai ka hlaua’ ka ti bah nawk nawk mai.

‘ Ok,ka pawm e,naktukah ka lo haw dawn a,enge ka lo hawn ang che?”

‘Engmah...’

‘Tak tak?”

‘Aw, engmah angai lo,naktuk kha ka nuin an In lamah chaw eiturin min duh a’

‘Um,ka bulah a sawia, i tih dan dan ka lo ti a’

‘A tha lawm,tluang deuhin in lo kal dawn nia’ ka ti leh a,a chhan ka hriat si lohin ka awm a nuam lo,kan inbiak dan lah nupa inbia kan ang hek lo.Hmelhriat satliah,inbiak chhiat duh lo a polite chhuah kan ang ber in ka hre bawk..

‘Hon..i la awm em?”

‘Oh..aw..awm e’

‘I muhil leh hman amaw ka tia’ a nui a..

‘Muhil lo..enteh,engemaw ka lakah zep i nei em?” ka ti ta nge nge.Ka tum lawk sa reng pawh a ni lo,thinlunga khatliam chu ka in a sawi ang tih kha ka ang ber in ka hria.

‘Ka nei lo aniang, chutiang engmah ka hre lo..’

‘Ok..ka zawt mai mai che anih kha..’

‘Ka hria alawm,ka pa nen kan kal chhan tih chauh loh hi chu i lakah engmah zep ka nei lo tih i hria alawm’ a ti leh supa.

‘Um..Mangtha phawt aw..’

‘Ok..lawk,ka ngai hle che ania’ a ti leh supa.Ka ngai lutuk zawk tih hrilh ka duh, mahse ka induhtawkna hian ti lo turin min dal hneh lutuk.

Dar 11 velah ka insiama,Abel-a te rawn thlen hun tur erawh dar 2 velah daih a ni thung,mahse chumi hmain Evelyn-i hmuh ka duh,midangin an hriat ka duh lo.Enge ka lakah an zep chiah ka hre lo nangin thil tha tak a ni dawn lo tih ka chhungril hian a hre lawk thei tlat,mahse engpawh tawk thei turin ka rilru ka siam fel thlap thung.

Ka hmai dang deuh lap chu ka en a,ka sam rawng chuan ka hmai a ti lang dang lehzual bawk.Ka naupai ka huat lutuk a zia takah chuan tlemin ka thau ve ta deuh,mahse thau lutuk tih tur erawh ka ni lo thung.

Ka phone riin ka ngaihtuahna a la peng ta hram,ka ban vata, ka beisei loh zetin Evelyn-i .

‘Hello...Eve’ zangkhai thei ang berin ka ti nghal zat.

‘Matty,Sorry lutuk,vawiin hi Emergency Meeting ka nei dawn peka,naktuk lamah a pawi angem?” a rawn ti nghal bawrh bawrha.

‘Aih,pawi lo e’ ka ti tak nangin ka mood erawh a thlang danglam chiang viau.

‘Sorry tak tak,engmah hriat lawk a awm bawk si lo’ inthiam lo hmel fe hian a rawn ti leh a.

‘A pawi lo ka tih chu,naktuk lamah a nimai lawm..mahse...’ ka ngawi leh rih..

‘Mahse...aw,sawi la..’

‘Ka rawn hmuh tum che hi Abel-an a hriat ka duh lo ania..’ ka ti sepa, a thaw hak ri ka hrethei,min chhang loin a ngawi deuh vang vang bawk.

‘Khawngaihin...’

‘Ok, ka hrethiam alawm,mahse min biak duhna hi a serious dan azirin Abel-a hian engkim a hre ve ang tih erawh i hriat ka duh ania’ khauh zet hian a rawn ti a,Doctorin a Damlo te bula a tawng dan tur reng niawm takin a awah nek luih chi a nih loh zia hai theih a ni lo.Ka bu nghauh a, min hmu thei lo tih ka ngaihtuah chhuah rualin ka nui sak bawk.

Evelyn-i ka hmuh theih leh dawn tak loah chuan ka awm ta vel mai mai,Dar 12 velah Ruati pasal ka inthlah tir ta chauh,ka thlen laiin Ka nu leh an nula te chauh an lo awma, Marcus-a te nupa an awm lo thung,Marcus-a hi chu nitin chhuak ziah anih avangin a awm ka beisei lo sa ve hrim hrim.Mampuii erawh hna a thawk lo a,kan awmho lai pawh khan Dawr lamah a kal ve anih loh chuan Inah a awm mai zel.Kan Inneih hlim karkhat dawn kha Inah ka awma, ka awm ve lai kha chuan roomah a tawm deuh chawt thin kha ania.Mak ka ti deuh nangin engmah ka sawi chhuak ngai lo,an nun ania ka lo sawi tur awmin ka hre lo.

‘Matty...i tha em?’ ka dara rawn khawih pahin ka nuin a rawn ti a, ka phu zawk mai,a in thiam lo hmel ngang mai bawk.

‘Aw..aw,tha e..ngatinge?” ka nui lui sak bawk.

‘Engti lo e,ka biakna che engmah i hre lo a,i nuam lo emawni ka ti deuh a’ a ti a, ka bulah a rawn thu thla ve nghal bawk.

‘Aih, nuam e,thil ho mai mai ka lo ngaihtuah a..’

‘Um,nia i chen hlat hmel khawp mai..’ a nui a, za lo zetin ka then lui leh sak bawk.

‘Thil ho mai mai ngaihtuah ka ching a,a zia lo tak tak..’ ka ti leh niah niaha, nuam ka ti chiah lo.

‘A landanah hi chuan i tha hmel vak lo.I khua a sik anih hmel khawp mai’ ati leha, ka lu ka thing nangin keipawn ka chhungrilah khawsikin min tham tih ka hai lo.

‘Nia, tlemin a sik deuh maithei..Damdawi ei hi ka duh lo deuh thina’ ka ti leha.

‘Rai lai hi chuan a awm ve reng ania,keipawh Abel-a ka pai lai hian ka ni nasa,ka hlauthawnga, ka haw em em zui mai bawk nen,i pa hi a phili nasa thin,Abel-a hian a pa a chhun hlawm tawp zuia, a awmdan tur ka hrethiam vel vek ania’ a ti leh duaha, a nui zui hak hak bawk.

‘Nia, a hlauthawng thin khawp mai,mahse ka tha veka,engmah hlauh tur a awm lo a..’ ka ti leha, a hmel ka en ran bawk.Mahse, engmah danglamna a awm lo.A dam ngaiin a dam thlap mai.

‘Um,nia..i huat tehlul nen,ka beisei aiin i tha leh hmaa,bakah kum upat lama naupai i ni ve a,kan tawp ru riau zel ania, kei pawh ka nih tawhna bawk ania..Mahse, ka lo suangtuah thin chu tunah a thleng ta vek chu ania..’ a ti leha, thil kal tawh ngaihtuah niawm tak hian pawnlam a thlir vang vang bawk.

‘Nu...engemaw keimahah hian dik lo awm palh ta se,engtin nge Abel-a hi a awm ang?” ka insum hman lo..Ka nu tak niloin ka pasal nu zawk a ni tih hre mah ila ka ipikna hi sawichhuahna ka mamawh lutuk.

‘Maw?” min rawn en a.Ka sawi a hriat loh vanga min zawt a ang lem lo.

‘Ka hlauthawng thina, ka hnar thi fo te hian chhan a nei ang tih ka hlau thin a..mahse engmah testah dik lo a awm ngai si lo a,mak ka ti,keimah ka in ngaihtuah ai chuan Abel-a zawk ka ngaihtuah fo a....’ ka sawi zawm thei lo, ka tum loh tawpin ka insut ta hraih zawk.

‘Chutiang ngaihtuah tawh suh..Bakah chutiang thil tha lo chu a thlen ka phal ngai lo ang,Abel-a tan hian a nunna i ni a, a tha lo zawng ngaihtuah ngai tawh suh..In inneih hnua a mizia a thlak danglam nasat tawh zia te hi kei aia hrechiang an awm lo ang,chu chu a bul i ni bawka..’ a ti leh duaha,min hnem tumin ka kut a rawn vuana, a chul hauh hauh bawk.Kei erawh a hma aiin ka tah a chhuak zual sauh thung.

‘Mampuii nen an inthen khan na a ti a, a nunphung a hloh nasa, mahse a nunah i lo langa,ka fapa kha ka nei let leh ta tih ka hria..Ka beiseina zawng zawng neitu ka fapa hian ka hmangaihna a hrethiam lo fo chung hian ka zilh a, ka hrem thin..A u vanga a dikna rengah pawh ka hrem lai atang tawh khan min ti let ngai lo mahse ka fapa hi ka hlatah a awm daih tawh,mahse chu chu nang hian min pawtkhawm leha,min zawmkhawm bawk a... ‘ amah bawkin a ti leh a,ka bu ringawt.Tawng dawn pawh ni ila ka tawngchhuak thei kher lo ang.Mahse, ka nuin Abel-a laka a rilru put hmang diktak a sawi vang hian ka thawl hawk tih ka chiang.

‘Marcus-a hi mi luhlul tak a ni ve ngai lo,a nem em em reng, Abel-a erawh a tihmawha,a luhlul em em bawk,engkim a duhdan thlapa tih tum mi a ni thung,chu chu ka duh lo fo,ka hrem nasa thin,mahse,ka hmangaih lo tihna erawh a ni lo..Ka fa te hi ka en dan a in ang vek zawk.Mahse, tunah chuan tu hi nge ka tana tha ber ka chiang tawh...’ a ti leha, lehlam a hawi tak daih avangin a hmel ka hmu thei lo thung.

‘Ka hrethiam e..’ ka ti sepa, engber nge ka hriatthiam pawh ka hrechuang der lo.

‘Um,i hrethiam ang tih ka hria alawm,Abel-an tuna an kalna engmah a hrilh loh che pawh kha zaninah chuan i hrechiang tawhin ka ring..’ a ti leh a.Ka bu leh ngauh ringawt.Diktak chuan nichin lawka ka tap titih kha ka ngaihtuaha, ka zak veng veng tawh zawk.

An nula pakhat zawkin ka nu a rawn koh takah chuan engmah sawizawmna hun kan nei ta lo,Kitchen lamah an buaia, puih ka tum lahin an duh der lo.Damdawi eitur min pe a, mu hahdam rih turin min ti lui tlat bawk.Inchung lama kan room thin ka pan ta nge nge.

Kawngkhar ka hawnga, engmah khawih danglam a la awm lo,khum pakhat leh Cabinet hniam chen chawn pakhat tih loh erawh engmah bungrua a awm lo thung.

Khumah ka lawna, ka muthilh ka ring lo chungin ka inkhuh ta than,Abel-a ka ngai vawng vawng bawk,ka nu khan Abel-a tan ka pawimawh zia a sawi kha,Abel-a hian min duh tih ka hai lo.Min hmangaih erawh ka beisei ngam lo mai zawk,kei erawh hi chuan ka duh satliah lo a, ka hmangaih bawk.Hriattir tul ka ti lo mai zawk.

Kut vawt zetin ka biang a rawn khawih rualin ka mengchhuak nghala,rang zeta thawh ka tum chu Abel-a rawn kun hniam ve chiah bawk nen ka han tauh chawrh bawk,ka rak that mai,ani erawh a rum nghut thung..

‘Sorry...’ ka ti sepa, ka mut dan ngaiin ka mu thla leh rih..

‘I lu a chang lutuk,ka hnar i tauh tliak dawn alawm..’ a nui suka,thawh leh tuma ka che chu min rawn khapa,a rawn mu ve nghal zat bawk.

‘Tho rawh, mut hun a ni lo ania..’ ka ti nghata,mahse ka sawi hre lo ang hmakin ka puan sin a rawn pawt kau a, amah si chetin min pawt hnai nghal bawk.

‘Ka nuin i khua a sik atia,bakah ka mutpui che chuan a lawm ngawt ang...’ ka samah a hmai a rawn phuma, ka sam tlak nasat vanga ka lu lei lang titih chu a rawn fawp vang vang bawk.

‘A zia tawh alawm, in lo thlenna a rei tawh em?’

‘Aih, kan lo thleng deuh chiah,Motor chhia a awma, kan rei phah a...min ngai em?” a tih zawm leh daih..

‘Ngai lo...’

‘Oh...chuvang anih chu ka hnar pawh tauh tliah i tum” a rum nghut bawk.

‘Khawi maw ka lo en ang...’ tih pahin a biang tawn tawnah ka dawma, tlemin a sen deuh raih mai,dimtein ka chula,ka chhem hauh hauh bawk..A mit a chhinga, a kal atanga khan a inmet miah lo tih hriat zetin a khabe ruh kual nalh zetah chuan hmul a to siar siar a,a sam a pawr deuh bawk,mahse a inhmeh zawk mah in ka hre thung.

‘Min enreng lo la, ka tha lutuk tih ka hria ania...’ a ti supa, a rawn meng zui nghal a,ka biang a sa nghal hat hat mai.

‘Chutiang a ni lo...Oh..nia,a dik alawm’ a ner nak ka hmuh rualin ka ti leh a,a nui ri hawk bawk.

Min rawn kuah hnai leha, a kut lehlamin ka hmai a chul dun dun bawk..A zin lai khan a hriat lohin vawitam tak ka titau hmana, min biak loh vang leh a bula hmeichhe awm vang khan ka thinrim bawk,mahse amah ka hmuh rualin ka theihghilh titih,ka ngai a, ka mamawh em em tih bak ka ngaihtuah thei der lo bawk.Zawhna ka neih zawng zawng te kha chu nakinah ka la zawt mai ang chu.

Dar 6 rik dawnah Marcus-a leh Mampuii an lo haw a,kan titi leh nak nak,tuman an zinna chanchin an inzawt lo erawh tlem chuan mak ka ti deuh,ka lakah an zep vang pawh a nimahna.Abel-a min si chetin a thu a, ka shawl lianpui bah karah a rawn zena,midang hmuh loh turin ka kut a rawn huma, a hmer vang vang bawk.

Chawei kham hnuah Ka pa leh Abel-a an inbiak avangin pawn lamah ka hawi khawthawnga,Marcus-a erawh chawei kham hnu lawkah a thianpa u thihna lama kal turin a chhuak thung, a vawt deuh nangin lut mai loin pangpar dahna lamah ka lawn kai leh rih..Ral lehlam veng lang eng iar chu ka thlir dauh dauh bawk.

‘I lo hlauthawng viau niawm tak ania’ ka hnung lam atangin Mampuii awin a rawn ti a, ka inher vat bawk..A rawn lawn chho ve a,engmah sawi loin a che vel chu ka melh reng bawk.

‘Eve- i hmuh i tum tih te ka lo hria a..’ ka bula rawn din pahin a ti leha,ka mengphar ak bawk.Mahse, min rawn en hmain ka in control leh vat thung.

‘Um, tum e..Eve-i nen chuan kan inhmu fo a,thil thar a ni hleinem..’

‘Dik chiah, mahse nimin khan Eve-i khan i natna chungchang engmah a hrilh lo che tih ka hria alawm.Engpawhnise khalam chu sawi ka tum lo...Ka sawi tum zawk chu Abel-a hian eng ang takin nge a hman tangkai che tih zawk hi ania’ a ti leh a, In lam a hawi a,Light engin a hmeltha tak mai chu chiang takin a chhuna, pawisak nei miah lo tih a chiang.

‘Min hmang tangkai hleinem,Nupa kan nih angin kan inpui tawn mai zawk..’ ka aw a dam thlap bawk.A duh duh a sawi hi hlau leh ti deka chhan let ka tum hauh lo.

‘Wow..a ropui hle mai,mahse mak ka ti lo ania..hei hi chu Fahrawn te chan tur sa alawm’ a ti leh a,ka chil ka lem khalh mai.

‘Nang tal hi chuan hrethiam tur i nia sin,Abel-a hian kan chhungkaw sumdawnna aia lian zawk ama pualin a nei renga,chutichung chuan Marcus-an ka pa sumdawnna theih tawpa a tihlen belh hi ngatinge laksak a tum talh a? dang tur i nia sin’ a ti leha, a mitmeng lian leh mi melh na zet chuan min melh ngar mai, a thilsawi in min thawng em tih en a tum ni berin ka hre bawk.Diktak chuan he thil hi ka la hre ngai eih lo.A thawi pawhin..

‘Min hrethiam la, hei chu ka tel ve na tur a ni lo..ka lo va lut ang’ ka nui lui sang bawk.

‘Ding rawh..’ ka pen tan tawh ka tawp leh chat.

‘I pasal hian kan inkawp laia a fa ni lo ka pai vang leh a u zawk ka neih vangin hetiang khawp hian a che ania..’ a ti leh a, rapthlak ti lutukin ka melh reng ringawt,engtin nge a zah miah loh theih hi mak ka ti ngawih ngawih.

‘I tenawm ka ti...’ ka insum hman lo..A hmai dang lap mai chu ka ena, ka ten hluah hluah bawk.

‘Lo hrilhfiah rawh,khawngaihin’ a ti leh sapa,Khawngaih chu ka duh tehmeuh mai,mahse a nunhlui tenawm tak,a nunhlui a a mipa lo kawp thin Nupui bula tim miah loa a sawi thin hi ka rap ngawih ngawih zawk.Hetiang mihring hi an awm theih ngai ka lo ring lo.Mahse, a awma, ka hmaah a ding reng lawi si.

‘Ka lo va lut ange...’ ka ti leh a, sawi tur dang ka hre hlawl lo.

‘Nangpawh i nu leh pa fa i ni bik lo a,fahrawn nih awmzia chu i hria ang..Marcus-an na a tihzia hi ka haider thei lo..’ a ti leha, harsa ti zetin ka chil ka lem a,ka nu leh pa fa ka ni lo tih ka hmaichhanna min hrilhtu pahnihna a ni ta chiah tih ka ngaihtuah daih bawk.Na ka ti em tih erawh sawi kher lo pawn ka chhungril vawt raih raih chuan a hril chiang viau bawk.

‘Fa tak anih leh nih loh kha i sawi ri leh anih chuan i pasal hian tun a a neih zat pawh hi a nei kher lo ang..’ Ka chhan hmain Abel-a awin a rawn ti a, kan inher rual thawt.

Kan dinna bul chiaha Golden Oak kung upa zet bul atangin a rawn pen chhuaka, a hmelpa leh tihmawh zet mai chu  thinrimna avangin a dur khup bawk.

‘Abel...’ ka ti chhuak sep ringawt.

Step tlemte awm chu amal mala rap loin a rawn kar chho pawk pawka,ka bulah a rawn dinga, ka kawngah a rawn kuah zui nghal zat bawk..Kei erawh chuan Mampuii hmela na tuarna langchhuak chu ka hawisawn san thei lo..

‘Abel...kha thil kha nangpawn i hria a..’

‘Yeap..hrechiang, i hriat ve hma atang daih tawh khan mawle..Bakah Eve-i nen hian Matty chungchang ni loin midang zawk ania kan buaipui..’

‘Mahse, ....’

‘Duhtawk rawh, kha i mize tenawm lutuk kha chu midang bum nan i hmang dawn nia, bakah ka nupui hi i sawi vang mai maia buai tur khawpin a a lo nia’ a ti leh hmuka, min rawn en a, Mampuii a en laia a thinrim hmel kha awm loin a lang dam thlup bawk.

Ka biangah a rawn khawiha, ‘ I vawt vek ania,kal ang hmiang’ a ti supa, mahse a inher leh a.

‘A tawp nan, i pasal in a neihsa hi neih reng a duh chuan naktukah min rawn hmu se la tiraw,ka awmna tur chu a hriat kha”  Mampuii hnenah a ti leh a, a aw a ring lo,mahse a hlauhawmna a nep chuang lo.