REVEUSE- 28

CHAPTER- 28

An thilsawi awmzia engmah ka hre lo,ka pa te Motorin min thlaha,kan haw kawng tluanin kan tawng mang lo,an thilsawi awmzia kha zawh ka duh a, mahse ka pa te Driver a awm ve avangin sawina hun a ni lo tih ka hria.

Ruati te nupain kan haw hun an lo nghaka,kan haw hnu lawkah an haw phei ve ta chauh,ka chau nghulh a ni ber.

‘I inbual duh angem?” ka ti a.

‘Duh lo,sawtah ka inbual tawh’ a ti liam puat, a inbual lai ka hre miah lo.

‘I inbual lai ka hre miah lo,haw veleh i inbual duh ka rin vangin Ruati Geyser ka On tir a’ ka ti leh a,thutthlengah thatchhe zetin a thu thluang duaia,bang kila Meichhemna thuk a meiling vam sen huam mai chu hmuhnawm tih hmel zetin a thlir vung vung bawk.

‘I bula ka rawn mut hma khan ka inbual fel vek hman alawm,muthilh vang vang ka chak zawk’ a ti leh sup a.

‘Um,meiling hi ka tihlum anga, ka rawn chho dawn nia, lo han chho la’ ka ti a.

‘Aih, ka lo ti ang,Tukverh vel kha lo check zawk rawh..’

‘Um..’

Tukverh ho a in kalh fel em tih ka en kual dan dana, hei hi zantin ka tih than a ni a, ka thiam tawh lo.Ka rilru a nuam lo thin miaua.Pawn lamah Security tlaivar deuh thakin an duty tih hre mahila ka ti lo thei chuang lo.

Roomah kan inzui chho a,tlaiah khan a chau hmel ka hmu miah lo, mahse tunah chuan mut mamawh ngawih ngawih hmel a pu a,an zin lai khan zan mut a hmu meuh lo anih hmel,ka ngaihtuahnaah thil a rawn lang zawk,kha hmeichhia kha tunge anih ang?

Room kawngkhar a hawnga,Light a On nghala, a bag Sofaah a thehthla hnawk bawk.

‘Mu la,i bag ka lo check law law ang’ ka ti a, a bag zipper ka pawt hawng nghal bawk.

‘Dah mai mai teh,naktuk zingah i ti dawn nia,tunah chuan mut ka duh ka tih kha..’

‘Mu la, keiman alawm ti dawn..a rei lo ang’ tih pahin ka tihzawm leh mai.

‘Dah teh.Keimaha mut ka tum lo ania’ a ti leh supa, ka hnung lam atangin min rawn kuaha, ka darah a hmai a rawn nawr nghal zat bawk.

‘A rei dawn lo asin’

‘Karkhat deuhthaw nghah tawh hnuah chuan a rei tawk viau sia lawm’ a ti ve thung, ka nui hak mai..

‘Ok..a tha lawm,anih chuan lo mu la, ka inphihfai lawk ang aw’ ka ti ta nge nge.Thuawih zetin min thlah ve mai bawk.

Ka let leh chuan bawkkhup zawngin a lo mu a,muhil loin a phone a khawih thung,ka thawmhnaw ka hlip sawk sawka,pyjama lum leh hak nuam tak ka haa, Wool zangkhai zet kawr ka ha thung.

‘Engmah min zawt dawn lo mi?”a ti supa,a mal sei thlurh chuan min rawn khan bet titiha, ka kawr a hlima,ka dul a kut lawngin a rawn khawih a, a chul kual dun dun bawk.

‘Enge ka zawh ang che?” a kut ka zuk vuana.

‘Thil tamtak..ka zin chhan te,Mampuii thilsawi te kha..’

‘Oh..’ ka ti sep ringawt.

‘I lakah hian engmah thuruk neih ka duh lo ka tih kha, mahse tuna mi kha chu sawi mai theih a ni lo a..’

‘Anih chuan sawi lo mai rawh, ka hriat kher angai lo ania’ nuam ka ti lo tak tak.

‘Min zawt la..’ ka sawi a hre lo der hmak.

‘Hmanzan khan tunge i bulah awm? Chuan i rui bawka?” ka ngaihtuah zawng pawn ka thinrim tha leh tun bawk.

‘Engtikah maw?” angaihna hre lo hmel zet hian a ti hu thung.

‘Min rawn biaa, tlai tawkah..Hmeichhe pakhatin a ko chea, i off ta daiha...’

‘Aaaah,Rosalind-i anih kha..’ a nui huk huk mai,kei erawh mak ti zetin ka ang pham thung, Rosalind-i a kal ve tih ka hre miah lo.

‘A kal ve tih in sawi si lo,chumai bakah i hmingin a ko che a’ ka ti leh talh.

‘Um,adik..mahse, achang chuan ka hmingin min ko zauh zauh tho tih i hria ang’ a ti leh supa, ka ngaihtuaha,a sawi dik tih ka hria..’Au Te’ tih emaw  ‘U ‘ tiin emaw a ko tlangpuia, mahse a hminga a koh tum pawh a awm zauh zauh.

‘Chuan,a dang min zawt leh la..’

‘Engmah zawh tur che ka nei lo..muhil zawk rawh’

‘Kan zinna lam chu i hre duh lo tak tak maw?”

‘Hre lo ila a that ka ring zawk,chhungkaw thuruk a ni dawn sia’

‘Ni lo,i hriat a tha alawm,Family zingah i tel tawha, i hriat tur chin hriat hi a tur a ni hrim hrim..Ka nu hmingin Delhiah Flat kan neia,chu chu ka u in a lo hralh a,ka nu hnena a sawi dan chuan kan Dawr thar tihlen nan a mamawh a ti a,ka nu pawn a pawm mai bawka,mahse ka pa a hrilh tho.Ka pa ngaihdan a ni lo bur,kha flat kha ka nu kum 40 na puala a leisak anih avangin tuman kan tihral a phal lo.Bakah ka pa hian ka u kutah thil tamzawk a daha, Flat a hralh tih a hriat takah khan Account check a duha, Account a check khan thil fel lo a hmu leha,kan Dawr accountah hian karkhatah cash Deposit vawikhat chauh zel a lo awma,anihna takah chuan nitin Deposit a awm tur zawk,mahse a awm lo.Ka pain a chhui tur team a ruaia,chuta a hmuh tak chu ka u hian hmundangah pawisa tamzawk a lo invest a,chuan,tunah hian kan In sawn Loan lak tumin a lo buaipui bawka..’ a ti ta duaha, ka thaw hawk mai..Ka awih thei lo zawk.

‘Loan maw? Ka awih thei lo...’ ka ti chhuak halh mai.

‘Um,nia..keipawn a tir chuan ka awih lem lo,mahse ka pa hian thil mai mai a sawi ngai lo,a sawi anih chuan a lo nasa tawh viau ziah bawka..’ a ti leh a,a kut a ti chea, ka hnute a rawn khawiha,a hmur a kut zungtangin a chep hrual pah bawk..

‘Loan lak enge in mamawhna? Bakah Mampuii sawi ang khan i u neihsa laksak i tum tak tak zawk em?”

‘Ahh,teuh lo mai.Keima pualin engkim ka nei,Ka pa lo thawhchhuah tawhsa te hi chu ka u ta turah ka dah vek zawk..’

‘Um..nia’ a kut ka manbeh saka, a rum hawk thung.

‘Ka zirchhuah tirh atangin ka pa hna hi enkawlpui ka tum ngai lo,ka nu laka ka lawm loh vang anih rualin ka tuipui lo,keimahin ka kal hrang nghala,diktak chuan cheng khatmahin min pui lo zawk.Bakah Ka u lo buaipui vek anih angin ka ta tura ka dah lo hrim hrim..’ a ti leh duah.Sawi mai tur ka hre lo,engvangin nge Marcus-an hetiang a tih ka hrethiam lo hlawl.Ama ta tur vek anih zia pawh keini zawk kan chhuah atang hian a lang thei ruak vek si.

‘Ka u hian eng rilru nge a put ka hre hauh lo nangin hetiang a ti hi Thisen hran kan nih vang a ni angem tih ka ngaihtuah thin...’a ti leha, sawi chhuah harsa a tih hmel ngang mai bawk.

‘Ih...Mampuii sawi kha i hria tiraw?’

‘Eng ber kha?”

‘Ka nu leh pa fa ka ni lo tih kha..’

‘Aw, mahse ka hre loah ka ngai..’

‘Mahse, ka ni sia lawm..’

‘I thiam loh a ni chuang hleinem’

‘Anih chuan ngatinge i u thisen hran anih kha i sawi si?”

‘Oh..Hon,chutiang zawngin ka sawi lo.Enkawlna in ang vek dawng si hian hetiang rilru a pu hi mak ka ti mai zawk..’ ka samah a rawn fawpa, nghet zetin min kuah bet tlat bawk.

‘Ka u te nen kan danglamna hi keichuan ka hre lo asin..Ka nu leh pa hian Hmeichhia ka nih angin min dimdawi ngeia, mahse an rilru aia chhia ka pu bik miah lo,in enkawlna hi a pawimawh zawk daih ang’ ka ti leh a..

‘Sorry,nangmah lam ka lo ngaihtuah lo.Ka u awmdan mak lutuk hi sawifiah ka tum mai zawk a..Tunah chuan sawi tawh lo ang..um’ min thlem pah titih hian a ti leh a, a ngengawl takzet tih a hriat theih bawk.

‘Thil pakhat..Mampuii hian engvangin nge in inkawp lai chanchin hi ka bulah a sawi fo mai le? A lo la hmangaih reng che anih pawhin pasal a nei tawha...’ ka sawi zawh hmain ka hmui a rawn khawiha, ka sawi zawm thei ta lo.

‘I hrethiam thei ngai lo ang’ a ti sup bawk.Nia, ka hrethiam thei lo.Ka la hrethiam lo zel dawn pawh a ang.A kut ka laksawn saka.

‘I la hmangaih em?” ka ti chhuak phawng mai.

‘Ka hmangaih ngai hleinem’

‘Abel...engpawh sawi la ka pawm vek thei ania...’ ka ti halha, mahse ka chhungril erawh a na vawng vawng thung.

‘Enge sawi se min tih?” a ti leh supa, min kuahna a la sawna,a let sawn zui daih bawk.

Muangchangin ka inlet vea,mahse light kan off vek avangin engmah ka hmu thei lo.

‘Kan inneih zan khan in pahnihin ka hmu dun che u a,a hnuah ka in check-up tur min hruai hman loh thu i sawia,mahse khami tlai khan Mampuii nen bawk in chhuak dun leha..Kei ai hian Mampuii hian i nunah hmun a chang lian zawk tih ka pawm thlap..’

‘Duh tawk tawh la...’ zawi supin a ti a,a tho kang tih chiang lo ruaiin ka hmu theia,khum bula Lamp a on ri khapa, a eng ta iar..

‘Ngatinge?’ ka inbengkang nghal uaih bawk.

‘Ka sawi laiin ka hmel hmu la ka duh vang mawle..Kan inneih zan khan Amawia nen kan chhuak zuaia, ka rawn let lehin min lo ko dinga,min be duh tih a sawia, chuvangin ka zuk hmu anih kha.A sawi tur neih chu ka neih chhan che a hre duh,chuan..I incheck-up tur hruai lo che a amah nen kan chhuak dun i tih chu ka hrechhuak mai thei tawh lo..’

‘Min neih chhan..a va tha ve’ ka ti chhuak sep ringawt.Thil tamtak ka ngaihtuah chhuah leh phah miaua.

‘Um..a vawikhat min zawhna ni loin vawi tamtak min zawhna a ni bawka’ a ti leh supa.

‘Chuvang anih chu amah pawn a lo hriat ve..’ ka chungril natzia chu pui tak a ni ringawt.Hman deuh khan Mampuii ngeiin Abel-a min neih chhan min sawi khum fak fak tawh miau a.

‘Engmaw a hriat?”

‘Min neih chhan chu mawle..’

‘Oh..nia,hre tehreng mai,ka hrilh alawm..’

‘Misualpa..hei hi i nihna kha a ni reng zawk tak e...’ ka zangthala,ka mittui tla tur duh loin ka mit ka khap sak sak bawk.

‘Maw?!” mak tihna a awah a lang thei.

‘Fa neih i duh vang tih pawh i hrilh tel ang chu tiraw?” ka aw khur hrep pawh chu a..a hriat loh hram ka beisei takzet.

‘Hrilh tel lo hlauh,bakah tuemaw ka Hmangaih hi sual vang a ni tih ka lo hre lo a’ a ti leh a.

‘Nupui ni lo hmangaih te chu sual ania lawm..’

‘Anih si chuan ka nupui lo ka hmangaih tih ka sawi lai ka hre miah si lo...’ rang zetin ka en a,a hmelpa leh ngeng ngulh thin kha a dam thluama, mipa naupang ,a toys duhlai laksak ang maiin angaihna hre lo hmel a pu tak tak bawk.Ka rilruah beiseina chhete a rawn awm zawka, mahse ka mit ka chhing sawk thung, a ni ngai lo ang tih ka inhrilh nawn leh rih.

‘Muhil tawh la, i chau viau in ka ring’

‘Kan sawi lai sawi zo phawt ang,bakah muthilh hmain tihtur ka la nei bawka...’ ka hmai a sa nghal hat hat mai.

‘Engmah sawi zawh tur a awm lo’

‘Oh,awm tehreng mai..’

‘Diktak chuan Pasal te nena an Hmeichhe Hmangaih chanchin sawi hi nuam ka ti lo ve a, bakah ka induhtawkna a ti chhia a..’

‘Engvangin maw? Bakah ka neih chhan che chu Mampuii nen in lo sawi dun tih ka lo hre miah lo a...’ a ti leh a.

‘Sawi dun tih lemah,aman min hrilha..’

‘Han sawi la...’

‘I sual em mai..’

‘Aih,chutiang a ni lo.Enge i hriat kha ka hre ve duh’

‘I sawi ang chiah khan amah nen in inkawp ruk theih nan min nei...’a tawp lam a zuih ral a ni ber.

‘Min en teh..’ ka biangah a rawn dawna.

‘I at zia hi i hria em?” amah bawkin a ti leh supa,tawng tumin ka ang ziau hman,mahse ka hmuiah a kutzungtang a rawn ti si  leh a..

‘Mampuii hnena ka sawi dik tak chu hei hi..Ka hmangaih vangin ka nei che tih hi mawle..’

Ka ang pham mai,ka landan nalh loh tur zia pawh ka hre vek.Mahse, a thusawi chuan min thawng lutuk,ka mumangah pawh ka lo la mangchhin ngai lo.

‘Min..min...’ ka ti bah nawk nawk mai..A nui suka, a rawn kun hniama.

‘Min ring thei ang,ka Nunna ai pawn ka hmangaih zawk miau che a...’ ka mittui a rawn tlaa,Dim tein a rawn fawp ve thung...

Ka harh leh chuan khua a lo eng at tawh,a kiu a inbengkang chungin Abel-an min lo thlir vung vung bawk.Engchen nge min lo thlir hman ang ka hrethiam lo,nizan kha...ka ngaihtuah let zawng pawn ka mur ar ar thei hial bawk.

‘I va tho hma ve..’

‘I hnar ring em alawm.’ A nui suk bawk.

‘Awihawm loh,ka hnar ngai lo e a’ ka ti let hlak thung.

‘I hnar leh hnar loh te chu keiman ka hria alawm,i thlawkchhuak tep a...’ min rawn kuaha,a nui hawk hawk bawk.Ka kuah let ve a.

‘Vawiin chu Eve-i kan va hmu dawn mi niang?” a ti leh supa, ka rilruah hlauhthawnna a rawn lut nghal zat.Nizan khan midang an buaipui tih sawi mahse ka chhungrilah hian keimah ni tura ngaihna a awm tlat tawh.

‘Enge kan tih ang?” a ri erawh chuan ka ti ta tho.

‘Engemaw test duh a neia...’ a ti leha, ka sam ka bengah min rawn zeh saka.

‘Abel....’

‘Um...’

‘Thi ta ila engtin nge i tih ang?”

‘Hnek i duh em?” tehdaih chuan a..

‘Ka zawhna chhang mai teh a’ ka tum aiin ka aw a chang hret.

‘I sawi leh anih chuan ka hnek tawh ang che...’

‘Mahse,ka lo tha lo viau maithei a...’

‘Engvangin maw?” min melh run bawk.

‘Mampuii khan ka sawia, Eve-in enkawl ngai ka ni tih a lo hrilh a..’

‘Chuti maw?” a ngai awlsam lutuk chu ka thin a ram ta phat.Ka inlet thaka, khum atanga chhuk tumin ka che a,mahse ka chhuk hmain ka kawngah a rawn mana, amah si chetin min pawt hnai a,hnung lam atangin ka nghawngah a hmaiin a rawn nawr zui zat bawk.

‘Diktak chuan...’ reife a ngawih hnuah a rawn ti supa, sawi zo loin a ngawi leh daih bawk.

‘Enge?” ka chhungrila hlauhna awm tihreh turin ka aw chhuak ka ti khauh lui tlat bawk.

‘Eve-i khan hmanni khan i test result an ennawn thu leh i tha vak lo tih min hrilha,mahse hlauhawm lutuk a ni lo a, test nei nawn leh la, kum thar lamah emaw treatment lak tir che a duh a..Mahse, Mampuii chuan engtin nge a lo hriat ka hre hauh lo mai..’ a ti ta duah..

‘Chutiang thil liantham chu i lo zep amaw?”

‘Aaah,zep lo..ok,nia ka zep..mahse a serious lo a ti che a, bakah serious tak ni la chuan tihian ka awm nang,i damna tur atan chuan nasa takin ka bei ang tih i hria alawm’ a ti leha,a aw nghet churh mai chuan a tihtak zia a ti lang chiang ngawih ngawih.

‘Mampuii’n min hrilh laia ka natzia kha i hrethiam lo zawk ang,nangma hnen atangin ka hre turah ka lo ngaia’ ka ti leha,ka sawi zawng pawn ka na leh ta tho.

‘Ka hrethiam e,ka zin hma zan khan ania, mahse a lo hre ve tih ka hre lo tak tak..min ngaidam la...’ a ti leh a,ka chhang lo,mahse ka ngaidam dawn tih hi kei aiin amah hian a hrechiang zawk.

Eve-i kan va hmu ta ngei,engmah hlauhthawn tur a awm lo tih min lo hrilha,ka thaw huai mai,an lo zep avangin thupha a chawi luam bawk.

‘Mambawih,kha kha rawn thehphei lawk teh,kan tih vat vat loh chuan i u inkhawm tur a hmanhmawh leh dawn ania’ ka nuin a ti a,ka bula plastic basket tereuhte chu a kawk va bawk.

Naktuk Christmas a ni tawha,ka nu te ka tlawh khat bawk nen Abel-an a chhuah pahin kan In lamah min dah pheia,nilengin ka nu nen kan inkawma, engmah ka tih ve a phal lo.A thiltihna apiangah ka zui kuala,tlaiah Abel-an min rawn lam pahin chaw a rawn ei dawn a,eitur duh uluk em em thin ka nu kha a ni miaua,a rim ringawt pawn ka chil a ti put titih..

‘Ehe...ka hriat hnu i va ang ve’ ka sama rawn pawh zauh pahin mipa aw hian a rawn ti a, tunge anih hre turin en kher ka mamawh lo.A aw atang leh min fiamdan atangin kan upa ber a ni tih ka hria.

Ka ep chiaha Dinning chair chu a pawtchhuaka, a thu a,min nuih var var bawk.

‘Nangpawh ka hriat hnu i ang..’ ka lei ka chhuah khum zauh bawk.Ka nu a nui hak hak thung.

‘I pasal nei hi i tlei mah mah ka lo ti a, bakah Naute i ni tih hi i theihnghilh in ka hria..’

‘Ka ni tawh lo,nau ka nei ve tawh dawn zawk alawm mawle’ ka ti hlar mai,Min duata,naute anga min cheibawl hi an sim tak tak thei tawh lo.

‘Aaah, ka tan chuan Naute i la ni reng, kha..ha tihrualna nalh lo zet vuah,belthleng khum ang maia sam rual hmuk thin kha..’ a nui a, ka bula bean tereuhte awmin ka vawm ve thung.

‘I ninawm mai mai mange,khawiah nge Am-i te?’ ka nu in a lo ti a.An bazar an la haw lo tih a sawi awlsam mai, mahse a tawngchhung zawngin ka lak atangin a mit a lasawn eih lo.

‘Thil ka zawt ang che ka ti tak asin..’

‘Engmaw?” a hmel thutak ta sawt chu ka melh ran bawk.

‘Hmanni khan kan thawhpui pakhatin a sawia,Abel-a te unau ro inchuh tih vel...’ ka chil ka lem khalh mai,zawi sapa ka nuin ka u a khak zauh ri ka hre zui zat bawk.

‘Chuan...?’ ka ti sap ringawt.

‘Engmah ka hriat loh thu ka sawi mai,bakah mi chanchin lo sawi hi ka peih lo a’

‘Nia,engmah chutiang a awm lo,an sawi peih ka ti zawk’ ka ti ve hlak bawk.

‘Um,Abel-a te chuan Farm lian pangngai tak leh thangduang mek a nei a,a mamawh pawh ka lo ring lo,nangin i mamawh hek lo’ a tih zawm leha.

‘I ninawm mai mai,thildang sawi teh,Abel-a te an lo thleng thut mai tur ania’ ka nuin a ti hlak hlak.Ngaipawimawh lo zetin a thle bak duh chauh.

‘Nu, chutiang lam pawh a ni lo,a tir chuan ho ka tia, mahse a sawi dan zel dan chuan a nu hian a fa tak anih loh vangin engkim Abel-a pek a tum a ti a, M-i hian a fuihpawrh an ti tih vel...i fanu tel ve na thil anih chu ka sawi’ a ti leha, a tawng tawp lamah chuan thinurna niawm tak a lang thei bawk.

‘Engmah chutiang ka ti lo,bakah ka chhungten beihrawn pawh nise kei aia Marcus-a rilru tur hrethiam an awm dawn ami?”

‘A tawk...’ ka nuin min rawn kuaha,fa tak ka ni lo tih sawi chhuah anih apiangin kei aiin ka chhungte hi an lo na zawk ziah tih ka hrethiam tawh.

Christmas kan hmang liama, Kumthar pawh..Abel-a min duatna nitin ka dawng tam tial tiala,a changchuan min duat lutuk lo se tih chang ka nei ru zauh thin,Hmeichhe tamtak ang bawkin awm chin tawk ka hriat loh mai ka hlau rum rum bawk.

‘Office kal i tum talh amaw?” a Coat hak mawlh mawlh pahin a ti a,khaw vawt vin tuk mai chua chet min ti peih lo a, a insiam enin Sofaah puan lum nen ka thu khawr hlan bawk.

‘Kal chu ka duh,hna thar ho en angai dawna..Motor ken ka duh asin..’

‘Theihnghilh teh,Driver a lo haw tawha, i hmang dawnnia, ka mamawh ni a ka hriat tak leh kan lak belh mai ang..’ hnial chi rual loh hian a ti a, a aw a khauh fur bawk.

‘Ka inkhalh chhuak thei tho sia..eee,tuna i kalna tur hi Marcus-an a hria em?” ka ti leh rih,an loan lak tumna an cancel a, hmundanga pawisa a lo investna te nen pawh aman dawr tawh loin Abel-a vekin a dawr bawk.

‘Hre lo ang, hre mahse a pawi chuang lo..’

‘Um,achang chuan ka khawngaih thin..’ ka ti sepa.

Min rawn pana,a rawn thu thla ve a,a hmel hriatthiam har zetah chuan enge a ngaihtuah a hriat theih loh.

‘Insiam  la, chhuak rual ang..’ a ti daih bawk.

Hnial loin ka puan sin ka tlawh hlima, ka zi mar ar ar mai,tlemin ka lu a hai deuha,mahse awm ti nuam lo khawp erawh a ni lo..Min kai tho a,Bathroom ka pana,mahse ka lu a rawn hai nasa ta viau, ka pai dat mai..

‘Ngatinge?”

Ka hawileta, harsa ti zetin ka nui luia, Abel-an hmanhmawh zeta min rawn pan chu ka hmu phe ruai bawk...