REVEUSE- 29

CHAPTER- 29

Ka mengchhuaka,a var vek bak engmah ka hmu lo,thawh tumin ka inbengkanga,mahse tuemawin min rawn nem mu leha,ka hmuh theih turin a rawn kun hnai nghal bawk.

‘I harh tawh maw?” Ka nu a lo ni a, engtin nge a lo thlen hman ka hrethiam lo.

‘Nu...’ ka ti sepa, a ri chhuak zo mang lo thung.Ka hawk ro lutuk chu ka khuh zui kharh kharh bawk.

‘Bawihte, tawng rih suh,tui in rawh aw..’ tih pahin a tho nghala,a rawn let lehnghala,Straw min rawn hmuam tir bawk.

Duhtawh zetin ka fawpa, in pawp pawp ka chak zawk,mahse ka duhkhawp pawh ka in hmain a rawn la sawn leh ta daih.Thaw tumin ka che leha, tun tum chu min nem mu loin min pui ta thung.

‘Abel-a hi chhuah loh theih loh thil a awma,a lo let tep ang,I nu te pawh an haw deuh chiaha’ ka ngaihtuahna hria niawm takin a ti leha.

‘Khawiah nge ka awm?”

‘Eh,Damdawiinah lo khawiah nge ni ang?”

‘Mahse...ka lu a hai ringawt kha ania...’

‘Ringawt a?! nikhat deuhthaw i mu chung hian i ngai awlsam mang tak e’ lungawi lo ri a hriat theih.

‘Nikhat...’ ka ti nawn ve sep ringawt.Engtin nge chu chen chen ka mut hman ka hre bik lo.Darkar tam ka mut chhung khan mi thenkhat te angin Vanram emaw Hremhmun pawh ka fang hek lo..

‘Abel-an min rawn bia a,ani leh ni lo angin a mangang bawk nen kan phili nasa mai,mahse i harh tawh a..’ a insut hraih mai..

‘Zing atangin ka lu a haia,mahse awm tinuam lo khawp a ni loa,engmah Abel-a pawh ka hrilh lo a..’ ka ti leh sepa,Khum atangin chhuk ka tuma, mahse rang zetin min rawn khap vat thung.

‘Enge mamawh i neih? Sawi mai la..’

‘Ka kal ve thei reng alawm le,Nu..Pasal nei ka nih ve tawh hi..’ ka nui luia, mahse a nui ve hauh lo.

‘Sawi mai rawh ka tih chu,luhlul viau ziah mai..’

‘Ka lu pawh a hai tawh lo a, ka haw theih mai ka ring zawk,Eve- i te Hospitalah tiraw ka awm?”

‘Ni lo,Abel-a thianpa niawm tak khan a check che a’

‘Um,anih chu..Va hrilh la, Ina mut ka chak zawk’ ka ti leha.

‘I mamawh chu sawi phawt mai la,abak chu Abel-a lo thlen hunah a nimai..’ a ti leh ta tlat.Eng chu a hria nimaw? A fanu ai hian a makpa a hlau ta a nih hmel viau mai.Hahthlak hlawm hian a..

‘Toiletah kal ka tum mai zawk a..’

‘Bed pan ka lo la ang..’

‘Nu...’

‘Doctor khan che rih lo tur chein a duh alawm mawle,i naupai tan khan chet a him lo..’

‘Oh...’ ka ti sap ringawt.

‘A lo fual nasa a,engmah problem i sawi ngai lo mak a ti zawk,chuvangin mut i mamawh a ni tawp mai..’ a tih zawm leha.

Ka chhang lo,ceilling var hlung mai chu ka melh vang vang a,ngaihtuahna mumal ka pu thei lo.Keimah ka tha lo a, treatment lak ka ngai emaw ka tih laiin Naute zawk a lo ni leh daiha..Chuti taka a fual anih chuan ka incheck-up hun vawikhatmah ka pelh si lo a, engvangin nge Doctor in min hrilh miah loh?

Ka nuin ka harh tawh tih Duty te a va hrilha,ka pa a hrilh leha, Abel-a nu te a hrilh leh bawk.Dam lo na tak, thi mai tur ka ang dawn riauin ka hre lehpek.Ka Bp an rawn check nghal zung zunga,ka nu nen an sawi hmangin ka BP a sang viau bawk anih hmel.Chu pawh mak ka ti leh ta tho,engtiklaimahin ka Bp a sang ngai lo.

‘Ka Bp sang vak kha mak ka ti e’ an chhuah hnuah ka ti a.

‘Mak vak lo e, tiang hi chu rai laia thil thleng ve thei ania,nau i nei anga a reh leh mai ang..’ a ti awlsam et.

‘Thil ei la,i Pa leh i u an lo thleng tep in ka ring,ka chah dawm mi?” a ti leha.Eitur a sawi takah chuan ka riltam zia ka hrechhuak ta chauh.

‘Um,mahse an lo kal hmain ka lo muhil leh mai dawn,ka mut a chhuak lutuk’

‘Muhil rawh,ka’n bia ange,chuan,nurse te sawi kha awih viau ang che,chet tum reng reng suh’ a ti leha, ka nui ringawt,mu tam turin min ti a, che miah lo turin min ti hauh lo.

Ka tui hal lutuk ka harh hlawl,thawh tumin ka inleta, khum bawha Abel-a lo muhil ka hmu chiah bawk.Dimtein ka thuchhuaka,midang tumah an awm tawh lo.

Khum bula Locker chunga tui ka bana,tihharh hlauin ka dim viau,mahse a harh ta tho.Rang lutukin a thu mar zawta, min rawn en vat bawk.

‘I harh alaw?” a ti nghal hluai bawk.

‘Um,harh anih hi..ka tui a hal lutuk’

‘Ok,ka lo la ang’ a ti leh vuta, tui a bana,a chhin a hawng nghala.Khumah a rawn thu a, min intir a tum tih a awm danah ka hria,ka duh bau lo.

‘Khawi keiman..’ tih leh pawhthlak sak ka ruala,a rum nghut ringawt.

Ka in nghal khawlh khawlh mai,ka dam dawng sawngin ka hre hial bawk,a rawn bana, ka pe ve mai.A chhina, a dahna ngaiah a dah leha.Chaira thu tawh loin Khumah a rawn thu ve a.Ka kut a rawn hum nghal zat bawk.

‘Dar engzat nge?”

‘Dar 9 a la ri lo..’ a Sana a melh zauh bawk.

‘A va tlai tawh ve.Ka pa khan eitur min lo kensak ta em le?’ ka ti leha.Ka ril a tam mai pawh a ni lo,a tam huam huam zawk.

‘Keng e, mahse a dai vek tawh ang..Lawk,ka tilum mai ang chu’ tih leh Khum atanga chhuk a ruala.

Hnial tumna pawh ka nei lo,a chevel chu ka en mawl tawp,ka beisei loh zetin a thilti a khawr lem lo,a hnehsawh viau vek.Tiffin,Current hmanga tihlum mai theih an lo keng tela, eitur rim ka hriat ringawt pawn ka chil a put lo chauh bawk,tiang em em hian ka ril a la tam ngai pawn ka hre lo e.

Min rawn chhawp hnaih saka,ka insum zo lo,ka hma a awm apiang ka ei liam duak duak a ni ber.Thil hriatchhuah ka nei,Abel-a hian chaw a la ei lo tawp ang,mahse a chanve aia tam mah ka ei tawh,nuam ti lo zetin ka hawi chhuaka,ka thilei lai chu hmuhnawm ti hmel zetin min lo en vung vung mai,zahzelah ka nui lui sak ringawt.

‘I ei ve dawn lo ami?”

‘Aih..ei zo vek rawh...’ a ti supa,mahse nuam ka ti tawh lo,ei zel chakna pawh ka nei tawh hek lo.

‘I ei tawh leh tawh loh ka lo ngaihtuah hman lo a,Sorry aw..’

‘Ka ei tawh alawm,ei zo vek rawh..Naute i ei kep tih hrereng la...’ a then suk bawk.

‘Eeee,ngatinge kan riah kher a?” ka spoon dahthlak pahin ka ti a, tiffin ho ka chhin nghal bawk.Ka ngaihbel nge ka hre lo,ka zawh lai khan a hmelah ka hriatthiam chiah si loh danglam zawk a awm,mahse a rei lo lulai lutuka, ka hmusual anih ka ring leh hnuhnawh.

‘Zawma khan riak rih turin min ti a...’

‘Zawma...ka hria angem?”

‘I hre turah ka ngai..hetah hian a thawka’ a ti leha, ka chaweina a rawn seng fel a.

‘Hmeichhe lam Doctor tihna mi?” ka ti leha.

‘Aih, ENT tho..’

‘Um,mahse ka naupai fual thu te kha an sawi leh daih bawk sia,ka Doctor khan engmah a sawi si lo a’

‘I Doctor kha hetah pawh a thu tel tho alawm...’ a ti awlsam leh mai.

‘Zawma chu ENT tho anih chuan Eve-i aiin a tha zawk tihna mi?’

‘Tha zawk han tih dawn chuan ka hrethiam chiah lo,mahse Zawma hian a en ve duh che a,Eve-i a awm lo bawk nen tah zawk hian ka luhpui ta mai che’ a ti leh a, ka bu ngauh ringawt.

Ka BP an rawn check leha,a la sang tha viau,rilru nawm loh nana hmang lo turin min hrilh a, a hma ang bawkin che tam lo turin min hrilh leh bawk.

‘Khumah hian lo mu ve mai la..’ ka ti a,min chhang lawk loin min en vung vunga, a inngaihtuah anih hmel,a bu nghuta,a rawn tho a,Private Roomah kan awm thoa, harsatna bik riau ka nei anih loh chuan min rawn visit ka ring tawh lo.

A rawn lawn ve a,a kil lamah ka tawlh pheia,ka hnung lam atangin min rawn kuaha, ka dul a chul hauh hauh bawk.Kei erawh amah si a ka awm rualin ka thla a muang nghal huai thung.

‘Khatiang khan awm tawh suh aw...’ zawi supin a ti a, ka beng a thawkkhuma, a lum ham ham bawk.

‘Ka awm tawh lo ang,mahse, ka hriat loh tura zep i nei em?”

‘Aih...’

‘Tak tak?” ka ti leh sapa, diktak chuan hetah kher hi chuan kan in ang takzet tih ka hria,thil thup kan neih chuan zawhna rang lutuka chhan let kan ching miau a.

‘Nei ta ila engtin nge i  tih ang?” a ti ta nge nge.

‘Min hrilh vek la ka duh ang, keima himna tur lam aiin Naute ka ngaipawimawh zawk bawka..’

‘Um,mahse ka tan chuan i pawimawh zawk..’

‘Chutiang sawi lo la, Naute hi a lo pian veleh a chungchang i sawi dan vang khan a thinrim mai tur asin..’ a nui nghawr dat mai..

‘A hre lo turah ngai ang aw,diktak chuan maw...in pawimawh ve ve, mahse Naute hi chu beiseina nen ka nghaka, nang hi chu ka nunna pawimawh ber, keimah chanve hmawk i nih avangin eng vang mahin chan che ka tum lo..’ a ti leh a,atthlak zetin ka mittui a rawn tla nghal zawih mai,ka bekah a luangthlaa, ka mit ka chhing nghal daih bawk.

‘I tap alaw?” a hre ta tho.

‘Ka awm loh palh chuan engtin nge i awm ang?” ka aw a lawi vek bawk.

‘Khatiang kha vawikhatmah sawi leh tawh suh ka tih kha..bakah i tah chuan i chau zual ang, Naute tan khan a tha lo nasa ania’ a ti leha,min kuahna a lasawna, a inbengkanga, ka bekah a rawn fawpa, a tawlhhniam leha, ka dul puar ve lah tawh chu a rawn fawp leh vang vang bawk.

Thaw hleithei loin ka harha,ka che velah Abel-a a rawn harh ve nghal zat bawk,min pawt thoa, ka hnar a thi tih ka hrethiam nghal,ka ka chhung a rawn lum papa, ka thaw a chham leh titih bawk.

‘Hahdam rawh,In Control la, thawk tum rawh aw...’ a ti a,

Ka hnar a rawn hupa, nidang a a thi nen a in ang lo,a buakin a baw hawk hawk a,ka in control dawna,ka thei hlawl lo,zamna vangin ka chhungril a khur a,ka bing mum mum bawk.Vawiin khan ka Damdawi ei thin kha an thlak tih Nurse-in min hrilh zauha,kha vang kha anih ka ring ta ber.

‘Lo in tiharh hram teh,Nurse ka va ko lawk ang...’ tih leh Khum atang chhuk a ruala, hmanhmawh lutukin a tlanchhuak zui nghal bawk,rei vak loah a rawn let leha,Nurse pahnihin an rawn zui lut bawka,a kal chhung kha a rei miah lo ang, mahse chatuan tluk zeta rei niin ka hre thung.

Abel-an min buaipui ta lo,Nurse pahnihin min buaipuia, ka vai ruai mai,ka ral riai riai nimaiin ka hre bawk..

Zawi te tea tawng thawm ka hre hmasa ber,ka che peih hlawl lo,ka mut ngaiin ka mu a, thil thlen dan ka ngaihtuah leta, engmah chiangkuanga hriat ka nei lo.Oxygen min hip tir tih ka hria,mahse tunah chuan chutiang engmah min hreng tu a awm lo.

‘I vanneih zia hi amak ka ti zawk,Naute i chan lo a, Matty i chan chuang lo bawka...’Mipa aw hian zawite bawkin a ti leha,Zawma atih kha anih ka ring ve tawp.

‘Ka hria..chan vaih ila chuan enge ka tih ang ka hrethiam lo zawk’ Abel-a awin a ti ve leha, thi turin ka in ngaihtuaha,ka ip chawih mai..

‘Tunah chuan engmah i tih angai lo turah ngai ang aw..mahse fimkhur tih piahlama fimkhur angai dawn ania’ a ti leha.

‘Lawmthu sawisen loh ka ba leh ta anih hi..’ zawi supin Abel-an a ti leha, ‘leh ‘ a tih lai tak chu ka hrethiam chiah lo.

‘I lakah ka bat ngaihtuah chuan a ho hle zawk..Bakah Doctor ka ni a, ka theihtawp chhuah hi a hna a ni bawka,mahse Abel..thil pakhat ka hrilh duh che,i thinchhe lutuk hi i Control angai ania,Eve-i emaw i U te nupa chungah engmah ti lo la ka duh,i u hian thil tamtak tisual tawhin la ti mek mahse i nu tan chuan a chunga kut i lek aia na a awm lo ania...’ a ti leh ta duah..

Eve-i,Marcus,Mampuii...an vaiin ka mitthlaah an lo lang a, engvangin nge ka natna an sawi laia anni laka in Control turin Abel-a a tih leh si ka hrethiam lo..Loan leh thildang,Ro chungchang zawng zawng kha Zawma hian a hre ve vek tihna a ni mai angem? Mahse khatiang thil kha chu Family thuruk a ni a, a best Amawia pawn a hriatpui dawn lo tih ka chiang.Chutih laiin engvang mahin Zawma hian a hriat ve ka beisei lo..Mahse....mahse a awm tlat.

‘Ok,ka theihtawp chu ka chhuah ve alawm..mahse an chet dan azirin ka che ang tih chu i hriat lawk vek kha’ Abel-a awin a ti veleha, a ti mai mai lo tih chiang takin ka hrethei bawk..

Thildang an sawi zawm leh nuala,mahse hna chungchang a ni ta thung,reivakloah a chhuak thawm ka hriaa,Abel-an a mangtha riah chuan khua a la var lo tih a hriattheih mai bawk.Khum a che data, min si chetin a rawn mua,min rawn kuaha,ka chhipah a fawp vang vang bawk.

Ka harh leh chuan khua a lo var tawh,ka mit ka khap lui sak sak bawk.Harsa ti fein ka inleta, nizan lama ka mutnaah ka in delh sual nge ka hre lo,ka chet zawngin ka nak a na zawk a, ka inring hman lo,ka tum loh lutukin ka rak that mai.

‘Hon...i tha em?” Abel-a a rawn kun hniama, ka chhang mai thei lo..A natdan a mak lutuka, ka thlan a far zawih zawih mai bawk.

‘Khawilai nge na?” mangang hmel a lang thei,ka mit ka chhing leh rih..

‘Ka nak hi a na zawka,mahse a zia leh tawh..min lo pui lawk teh’ ka ti a..

Rang zetin min kuah tho a,ka thawk a sak tlat, ka thinah min hnawh ul mai bawk,muangchangin boruak ka hip luta,ka thawchhuak leha,ka nak kalh tlat pawh a zia ta deuh,Lukham ka nema, a khawng deuh uaih mai,ka zuk en a,thiin a bual nimai awm hian a sen duk thluaha, engvang nge tih hre turin midang zawh ka mamawh lo,nizan khan a far nasa hman ang tih ka hre miaua.

‘Nizan khan i hrawk lamah thi kharin a lo hnawh che a...’ khuma rawn thut ve pahin a ti a.

‘Um,nia..ka thaw a chham titiha..’

‘Tunah chuan i tha leh tawh tiraw?”

‘Tha chuan ka hria,mahse, nizan kha nidanga a thi thin dan nen a danglam tlat asin...ka damdawi an thlak vang a ni angem?”

‘Ka hre lo le,Zawma kha chuan a la thi nasa dawn a ti a, mahse Control a tum ber chu ania’

‘Testah ka tha vek ziah sia,a mak e...’

‘Mak lo ve, tunah chuan Zawma khan a hrechhuak tawh alawm,i hnar chhungah khan bawk a awm a ti a..’

‘Maw?” ka ti ha mai,chutiang bawk awm te chu engtin nge a hma khan Eve-in a hmuh loh theih ka hre thiam lo.

‘Um,a sawi dan chu ania,mahse tunah chuan zai tawk thei i ni lo a,nakinah Naute pian hnuah aniang,bakah zai kher loh pawn an hawlh maithei bawka’

‘Um..’ ka ti ringawt.

Bed Rest ka mamawh vang leh ka Bp control angaih vanga awm mai ka ni a, In lamah pawh thil harsa a nih loh nen karhnih lai ka awm ta,ka hnar lah vawi 5 zet a thi nawn leh tawh bawk,mahse a thi tlem tial tiala,a thi chhuak baw hawk hawk thin pawh a zia ta viau.

Ka nu leh Abel-a nu an lo kal nitina,zan lamah nise ka chanchin hre turin min rawn call ziah bawk.Abel-a lah In lamah awm hahdam tura ka tihna ka hlawhchham thak,midang rawn riah ve an tum pawn a phal lo bur,mahse, chhun lamah erawh chuan Farm lamah a kal deuh ziah thunga, Awmtei leh Diki an lo kal awl lo bawk.Tluangpuii call nikhatah vawikhat tal ka dawng ngei ngei a,mahse Marcus-a te nupa vawikhatmah an lo la lang ve ta lo.Mak tih tur a ni em ka hrethiam lo..Abel-a hnenah an Problem chungchang ka zawt zauh zauha, an tihfel tawh thu bak engmah a sawi ngai lo.

‘Awm tha teh..i thle zel a’ Awmtei’n a ti hlaka..

Ka sam a tla nasa tih piahlam a ni a,Zawma’n tan turin min ti a,Awmtei thianpa,tlema hmeichhe lam hnaih deuh mah zawk,Mizo hair Stylist tha pangngai takin min rawn tan saka,ho ka tih vei nen Awmtei’n a rawn hruai lui talh.Diki leh Jeffrey-a an awm ve bawk.

‘Le...ka zo e...’ nem deuh hlaiin a ti a, Darthlalang min rawn pe a, muangchangin ka lek chho a, ka inhmuh takah chuan ka mengphar awk mai..

Ka beng chungah a cut hmaia,ka chal kawlh nasa lai hliah turin chalsam min siamsak bawk..ka mawipui viau leh viau loh pawh ka hre lo,mahse ka naupan lai ka mitthlaah a lang iar iar thung.Ka u te ho ka ngai vawng vawng bawk.

‘Enge a an a?” Awmtei a rawn ding a.

‘A chhe lem lo e...’ ka nui lui sak bawk.

‘Dik chiah,bakah i naupanlai i ang tawp..Abel-an a rawn hai maithei che sin’ a nui leh kar kar mai.

‘Abel-a...’ Kawngkhar kik thawm a rawn awma, kan hawi rual thap bawk..

A rawn inhawnga, Abel-a a rawn luta, ka ang pham mai..Sam pakhatmah awm loin a lu nawr kawlh vek..

‘Abel...engthil nge a?” ka ti chhuak halh bawk..

‘A mawi lo viau tihna mi?” rawn kal hnaih pahin a ti a.

‘Aih,engvangin nge i tih?”

‘I sam i cut dawn sia,keipawn ka cut ve mawle...i nalh hle mai’ a rawn kuna, ka chalah a rawn fawpa, midang an awm ve tih hreawm pawn a awm lo..

Ka hawichhuaka, Awmtei ka ena, ka awm lohna lam a hawi vat,mahse a mittui hru zauh niawm tak ka hmu hman tho..

Ka Bp a la normal hleithei lo,mahse ka hnar thi leh ka nak na thin erawh a zia hret hret thung,Damdawiin awm ka hne ngawih ngawih tawh,kan In ka ngaia, kan khum thlengin ka ngai vel vek tawh..

Abel-a a zin ngei ngei angaih avangin ka nu leh Abel-a nuin min rawn riahpuia, keimah pawn ka riak thei tih ka sawi pawn an phal teuh lo,Abel-a phei chu a thinrim hlur bawk,ka nu rawn riah a tum tih a hre chungin Abel- a nu pawn a tum thulh mai mai a duh hek lo.Luhlul leh luhlul an in nawra,an pahnihin an riak ta nge nge.

‘Eng chen nge kan la awm dawn a hriattheih ta em?” Abel-a nu hnenah ka nuin a ti a, ka muhil emaw tiin zawi te tein an tawng bawk.

‘Vawiina a sawi dan kha chuan a taksaah Damdawi kha a lo thawk nasa hman lutuk a ti a,kha khan Naute a effect a, amah hi a lung a khawih hman titih bawka..’ ka hrethiam lo..Eng damdawi nge an sawi ngaihtuah dan ka thiam bau lo..

‘Engtin nge khatiang a lo tih theih aw” ka nuin a ti vang vang mai..

Reivaklo chu engmah sawi loin an ngawi dun rauh rauh mai,a chhan ka hriat si lohin ka hlauthawng ve ringawt bawk..

‘Diktak chuan sawi nuam ka ti miah lo,Abel-a leh a Pain Marcus-a thiltih an hriatchhuah hma atang khan Eve-i te nen hian an lo tang ho tawha,a hnar thi an Control emaw an tih lai khan muangchanga a taksa tichhe thei tur Damdawi zawk an lo pe a,a tlai lutuk hmain tihian kan hrechhuak ta hlauh anih hi..Kha Damdawi hnathawh vang khan ania a sam pawh a tlak nasat em em ni...’ Abel-a nuin a ti ta duah...Kei erawh ka mumang nge a tak tak tih ngaihtuahin ka mu khawng lah thung.