MON HOMME

MON HOMME (MY MAN)

Maengi Ralte.

Chapter-1

Kawngkawia Motor rawn lang ka hmuh rualin ka kawi zawka, chak zetin min tlan pel fuaa,kei erawh ka balance a buaia, kawng sir, Metal loh chinah ka thal der.

Eng nge thleng tih ngaihtuah in ka mu deuh vang vang,ka thih teuh zia ka ngaihtuaha,ka khur zui nghal dar dar mai.

Kha Motor kha,ni lo..keima thiam loh zawk,Scooty ka khalh tih ngaihtuah lek loin ka rilru kawmin ka tlana, mi tlawhpawh tam loh lam kawng nimahse Motor tawk thut thei reng ka ni a, mahse chutiang lam ngaihtuah loin ka rilru ka kawm a,a rawn lan thut khan ka buai ta der.Scooty ka khalh ve atangin kum 4 dawn a ni tawha,ka vawikhat accident na erawh a ni hauh lo.

Ka hlauhthawn zualpui a reh a, muangchangin ka tho a, ka sira ka Scooty let ngat chu ka tung a,vanneihthlak zetin a rang nin nian tih loh chu chhiatna nei hmel a pu lem lo.Ka in dap a,ka kiu thip deuh vang vang leh tlema ka khup na deuh tih mai loh chu engmah hliam na ka nei lo.

Scooty ka start a,a nung thei hlauh,vanduai vannei tak chu ka ni tho mai.Duati sawi dan kha chuan ka kal tumna ka thleng hnai tawh in ka ring, ka hawi kuala,ka thlang deuha kawng peng niawm tak awm ka zuk hmu theia,helai hi an huan thenawmte ram a tih kalna kha a ni ngei ang.

‘I tlan char char anga, darkar khat vel i tlan hnuah kawngpeng a lo awm anga, kha kha kan ri te annia, khami thlangah khan kan huan peng a lo awm leh ang,Motor a lut phei thei veka, mahse, kan kal khat deuh a, a hnim viau maitheia, Scooty aiin kein kal la a nuam ang’ a ti anih kha.Chuti nih chuan Aizawl ka chhuahsan atang leh Highway ka pensan hnunah hei hi huan peng niawm ka hmuh hmasak ber a ni a,anih chuan a thlang lawkah Duati te huan chu a awm tihna a ni ang.

Minute hnih vel lek ka tlan leh hnuah a sawi ang ngeiin huan Peng ka hmu nghal a, ka Scooty tan tlan luh luih a atthlak dawn tih ka hmuthiam nghal bawk.Ka chhuka, ka nawr pheia,kawngah kal an awm anih pawhin an hmuh mai lohna tur laiah ka dah a,ka lock thlap bawk.

An kal khat satliah pawh a ang lo,kum hnih vel lai tlawh pawh tawh loh a ang zawk.A hnim bur a,mihring sulhnu hmuh tur a awm lo.Kawng a awm thin tih a hriattheiha,mahse hnimin a zar hliah deuh vek,a pawi chuang lo.Engkim hre sa veka kal ka ni a, Chem ka pai sa thlap.

Ka chem ka phawrha, ka kalna tur ka vai kaw chawpa,chho awm loin a zawl phei vek.Sah fai that chu nise a nuam hle ang tih a lang thei ruak.

Darkar chanve dawn ka kal hnuah ka tum loh lutuk hmunah ka chuang chhuak ta hlawl,ka thaw hak mai.Ka inhai kuak na lamah ka chau a,chumai piah lamah ka hmalam zawl duai,phul hniam te te to khat vek chuan min Barakhaih takzet bawk.

Duati khan hetiang hmun nuam lutuk hi an huan chhungah a awm tih a sawi hauh lo.Min Surprise a lo tum sa a ni mahna,ka hawi kuala,mahse a sawi..Thlam leh thildang engmah ka hmu hauh lo.Hmun dikloah ka kal ti dawn ila a sawi ang chiah khan peng hmasaber dawtah ka penga, enkawl loh tih hriat em emin a hnim  bawk.

Ka kal pheia,a sir tawp thlengin ka kala, a zau over lo,siamluih niawm takin Thing in a sir tawn tawnah a huala, thlanglam ka hawi thlaa, awihawm loh khawpin a awih thla vut thung.Ka let leha,thlam awmna han zawn kual leh vel ka peih tawh lo,mamawh pawh ka mamawh hran lo.He phul hmun hi ka hmuh tirh atangin  nuam ti takin ka nileng thei ang tih ka chiang sa thlap tawh zawk.

Ka bag atangin thatchhe puan ka ken ka phawrha,ka phaha,eitur tlem ka pai leh Laptop ka phawrh leh a,Laptop hi ka hna nen thui tak inzawmna a neih avangin kalna apianga ken ngaiah ka nei tawh.Bag lukhamin ka mu zangthala,Van thiang kuk lam ka thlira, chhum engmah a awm lo,Mu niawm tak a thlawk kual vel a, thli thawin thingkung a chhem rik bak engmah thawm dang awm loin a reh vawng vawng a,ka duh ka hmu tih ka hria..Ni e.Thlamuanna, engmah vei nei lo a nun kha ka chak a ni lawmni?

Ka mit ka chhinga, mahse ka duh loh tawpin ka nu hmel ka mitthlaah a lo lang nghal zat.

Kum 15 ka tlin kumah ka pa hi ka pa tak a ni lo tih ka hrechhuaka,na ka tihzia leh hrehawm ka tihzia sawi ngaihna a awm lo.Ka naupan lai ka hriat theih tirh atangin Pa dang ka neih awm ka hre ngai lo,mahse ka pa Boral hian ka la naupanga,engmah hre rual ka ni lo a,tuna ka pa nen hian ka nu hi an lo innei zui leh mai niawm in an sawia, ka Pa tak tu nge anih ka hre lo.Min hrilhtu lahin tu nge ka pa a hre bik hek lo.Tihpalh thil takzeta sawichhuak a ni ve tho bawk.Mahse, an mahni tana hrehawmna thlen ka duh loh avangin Pangngai thei ang berin ka nun ka hmang luia,ka zirna erawh chuan a tuar ta tho.

‘Ngatinge i mark a va chhe em em ve?’ ka nuin min ti a,nu invawng fel leh Strict tak mai,nalh thlarh reng mai a ni a,Ka pa pawh hian a ngam meuh lo ni a hriat chang ka nei fo.Mahse, mi hmuh danah chuan ka nu aia Pasal te chawimawi thiam an awm ka ring lo thung.

‘Biak hian min chhang thin rawh, engemaw i hriat ni? Tunlai i awmdan hi ka duh lo tawp mai’ a ti leh hmarh hmarh a.

‘Eng maw i sawi?’ a sawi ka hre lo tak tak pawh a ni lo.

‘Zir tha nasa ang che,School fee mai pawh niloin Tuition i kal bawka,mahse i mark hi enteh,i Pa a sa hle ang’ a ti leh a.

‘Anih chuan min vaw dawn tihna mi?”

‘A vaw tawh che mi? mahse, chuvang ngawt chuan i pa hi nawrlui miah suh,chutilochu…” a ngawi leh daih..

‘Ka nawrluih chuan a fa tak ka nih loh vangin min hnawtchhuak dawn tihna mi?” ka tum reng vanga sawi pawh ka ni lo.

‘Eng maw?” a ti thawta, ka phu zawk.

Rang fein ka nu ka ena, a hmai dang lap maiah chuan ka thilsawiin a thawng nat zia ka hmu a, chumi rual chuan tak tak ni lo se ti a ka lo ngaihtuah thin kha a tak anih zia a lang chiang nghal vek.

‘Ka rindan hi a dik tihna mi?” ka huaisenna  zawng zawng sawmkhawmin ka ti leh a.

‘Eng …eng?’ a lu a thing nawk nawk ringawt.

‘Tu nge ka pa?”

‘Ngawi rawh, ngawi hmak ang che’ a ti leh nghek.

Tawng tumin ka ang ziaua, mahse kawngka lama thawm a rawn awm takah chuan ka ngawi ta zawk.Tu nge lo haw en tumin ka hawi pheia,ka pa leh ka nau,kei aia kum 5 laia naupang rawn inzui lut chu ka va hmu a,ka pa a ni ve lo tih ka hriat atangin thla li lai a liam tawh,nilose tiin ka ngaihtuah zantina, mahse engmah awmzia a awm ngai lo.Ka ngaihtuah na vang ngawtin engmah a danglam chuang hek lo.

Engmah zep theih a ni ta lo tih an hria nge ka hre lo,an pahnihin Roomah min ko luta, engkim an sawi faita vek,ka Pa boral hian kum pawh ka la tling lo a, ka pa ni a ka lo hriat hi ka nu te khuaah Sawrkar hna thawkin a awm a,Nupui sun ve bawk a ni a,rei pawh anih hmain dinhmun in ang chu an lo in ngaina chhoa,an tlan dun ta a.Ka nu chhungten ka nu an tuithlara, min hringtu ka pa chhungte phei chuan thi se an ti zawk niin a sawi.

Hun rei tak chu ka pa chhungte pawn ka nu an pawm mai thei bik lo,mahse hun a kal zela,kum tel a vei takah chuan chhungkua intihchhiat reng theih ni hek lo.An inzawm khawm leh ta nge nge,ka nau a lo piang ve leha,tuman ka nu leh pa inneih dan leh fa tak ka ni ve lo tih an sawi ngai ta loa, ka nu hmingchhiatna pawh khuhin a awm ta bawk.

Engkim ka hriat hnuah ka thawl huai dawn emaw ka ti a, mahse ka thawl chuang miah lo.A hma angin ka pa ka nel thei tawh lo a,a suala, min endan a danglam ka ti lo,keimah ka inthlahrung a ni ber mai.,Mahse, ani erawh chuan min endan angai renga, min duat dan ngai rengin min la duat tho.Pa tha tak chu a ni…Ni lo,min pawngsual tuma min beih hma khan Pa tha tak angin a lang zawk.Kum kha lehchen kan awm ho a, ka tleirawl tirh atangin dik lo zawnga min khawih ka hre ngai lo,kum 20 ka tlin hnuah ka nu a dam tha lo a,ka pain zu rawn nam haw a nei ta zauh zauh,ka nu lah that tak tak awm loin a nun a hmanga, nupa nun hman lamah harsatna an neih vanga kha thil tenawm lutuk kha ka chungah tih a tum ta a ni em ka hre lo,mahse ka awmzui thei dawn lo tih hriain lehkha ka hnutchhiaha,ngaihtuahawm ka ni lo tih ziakin ka thilneih zinga ka duhzual ka kenga, ka pawisa khawl sa tlem bakah ka nu Purse ami ka hmuh theih ang ang bang awm loin ka la fai pak bawk,nun tumin ka beia,tunah chuan khang hun te kha chu mumang ang mai anni ta zawk.

Ka thiante puihnain Mi in hnuai man tlawm thei ang ber ka luaha, Dawrah ka thawka,ka eikhawp tawk tawk chu ka thawkchhuak ve mai.Vanneihthlak takin ka Graduate hman hlauh a,tunah chuan ka Dawr thawhna thin te puihna a zarah hna pangngai tak ka nei ve ta a.Ka khua a har thina,ka nun mal ngawih ngawihnain a hrin chhuah,Thuziak lamah ka inhmang nasaa,Facebook lahin ka tan kawng a hawng tha em em lehzel.Tunah chuan ka nitin thawh hlawh leh ka Thuziak a ka hlawh hmuh atangin Pawisa lamah chuan ka lungngai ta lo.

 Mahse,sum lamah engmah harsatna lian nei loin nitin ka hna thawk thei mah ila ka nun a ruaka, ka nu hian tuna ka awmdan hria se engtin nge a awm ang?ka tlanbosan hnuah khan min ngaihven nasa tih hre mah ila ka bihruk sana, ama tana nat belhna nih ka duh loh vangin a hmuh phakah ka awm lo.A pasalin min beisei tih ka sawi thei lo a,ka let leh thei hek lo.A fanu hi ka puitling tawk tih hria se a lawm ve ka ring em em thung.

Ka naupanlai thian leh ka best in Pasal a nei tawha, tunah chuan ka tuina kawnga tui ve,Hmeichhe fel tak tak Panga thian ka neia, ka engkim,ka chhungte,ka thuruk vawngtu, ka nihna ang anga ka lanchhuahna te anni a,ka neih hlu ber te anni bawk.Chung zinga pakhat chu Duati a ni a, ka ipik na hriain vawiin hian awmdan tur min plan puia,keimaha awm ka duh ringin helai hmun hi min kawhhmuh a, a tisual lo nasa.

Ka thuchhuak ta nge nge,mahni a awm ka duha, ka awm ta ngei,mahse ka ipik dan angai reng,vawiin hi ka nu boral atangin karkhatna cham chiah a ni a.A hma pawn ka bulah a awm chuang miah lo nangin ka neihchhun a ni a, a thih thu ka hriat rualin mal intihna avangin awm ngaihna ka hre lo.Nun hi a ruaka,engtik niah emaw kan la inhmu ang ti a ka suangtuah thinna te kha a thlawn a,tumah neih nei loin ka mal ngawih ngawih tih ka ngaihtuaha, tah ka duha, ka tap thei chuang si lo.

Duati nen kan kal ve ngei,mahse a ruang pawh ka kil ngam lo.Mikhual ang maiin midang te hriatchhuah hlauin ka awma, ka tlanchhuah danah khan pasal um niawm ang hiala sawi ka nih avangin tumah kan chhungte thin hmuh ka duh lo.

Van lam ka ena,ka beidawng,nun hi eng nge a hlutna? Hetiang a mal tur hian ngatinge ka pian?

Ka au chhuak nghek,ka inring hman lo,mahse…keimahah danglam a awm,phurna niawm takin min fana,ka awmdan a danglam..Ka au ri hre tur an awm lo tih hrereng chungin ka hawi kuala, ka rin ang ngeiin tumah an awm lo..Ka ban ka phara,ka theih tawpa ringin ka au leh nghek,ka au zel a..Pathian ka chhuahchhala, ka nu ka ko a..Ka chhungrila ka lo vei ngawih ngawih te ka auchhuahpui ta vek…

Chau zetin ka thu thla hnawk,mahse ka zangkhai thung..Khatianga duhtawka au chhuah kha ka lo mamawh em em tih ka chiang ngang mai bawk.Thlanglam atanga thli rawn thawin ka sam chhawlleng a rawn chhem a,ka mit ka chhing vang vang bawk.

‘A ring hle mai a…’  ka phu nghek,rang lutukin aw lo chhuahna lam ka hawi nghal zawk bawk.

Mipa pakhat inkuangkuahin a lo ding reng tawh,nichin mai kha chuan tumah ka hmu hauh lo,Nizanah Jial tang tlanchhuak emaw tualthat tlanbo emaw an awm em tih ka ngaihtuah vata, chutiang tumah an awm lo,awm nise kei aia hre hma tur chuang an awm bik lo.Ka hna kaihhnawih anih tlat avangin.

Che miah loin kan inmelh ren rawn,ka chin than dan ngai bawkin a lang thei chin ka hmu kim leh nghal viau.Kekawr uk a haa,a tlang lam erawh Ramvah Boot niawm tak chhungah a thun lut ve ve.T-shirt dum,rawngdal lam a  haa,a nghawng kir danah a rei thawkhat tawh ang tih a rin hriat theih mai bawk.A sam buk zet chu enkawl loh tih hriat fahranin a ther deuh huang a,khabe hmul pawh a zuah vek..A hnar sang tha zet leh a mitmeng nelawm lo lutuk chuan Mizo ni loin hnamdang a pawl zawk mah,mahse Mizotawng kha a pai hauh lo.Thlahpawlh pawh a ni mahna..

‘Tu nge i nih?” ka tawngchhuak hmasa ta nge nge.

‘Ka zawh tur zawk che niin ka hria..’ bung zetin a ti hmuk.

‘Helai hi ka thiannu te ram a ni a, ka kal dawn tih pawh a hresa vek a…’

‘Eh,chutia law?’ ngaipawimawh lo zet hian a ti duh lek.

‘Aw, nang tu nge i nih? Midang an awm dawn tih a sawi si lo’

‘Che suh…’

‘Eng..eng maw?”

‘Che suh…’ a hma aia zawi zawkin a ti leh supa.

A che zauha, thawm nei mang lo khawpa rangin ka bul a rawn thleng chilh nghal,hamhaih lutukin a che zia ka thlir mawl tawp.A in thazo lutuk kha a awihawm loh hial zawk.Khatiang khawpa thawm nei lo kha mihring ni awm lo hial zawk a ni.

A thu hniam ruai ruaia,a kut a phe zawka, eng ngemaw a khai kanga,na zetin phul vuak nan a hmang nghal dawp bawk,ka phu leh vak thung.A vaw nawn leha, a rawn ding chhuaka,a thil ken ka hmuh takah chuan ka ip chawiha, ka thaw a chham lo chauh bawk.

‘Hei hi,i ngainat vak ka ring lo deuh..’ ka lamah a rawn lek hnai zauha, ka petek nawk thung.

Engtin nge ka hmuh loh theih? Bawkvaka kal chi engmah ka ngaina lo,a bik takin Rul leh lek phei chu,Khawvela an lo awm ve chhan hi ka hrethiam lo zawk.Tvah pawh ka en duh lo hlawl.

Thlang lam a pana, khamah a theh thlaa,a rawn let leh a, ka tawlh hnung hrat thung,amah chawp chawpin ka rap zo vek.Mahse, ka nunna chu min chhan sak tho mai,rul a rawn manna kha ka awmna atangin feet tam a ni lo.

‘Ka lawm e aw..’ ka ti sep ringawt.

‘Engvangin maw?”

‘Kha rul vang khan mawle.’

‘Um,mahse i tana that ka ni lo.Helaia ani nen khan chen dun ka duh lo mai zawk’

‘Enga?”

‘Zawhna i ngah ve hrim hrim thin nge i beng a tha vak lo zawk?’ ngei lutukin ka melh reng ringawt.

‘Min hrethiam teh,zawhna ka ngah hran lo.Ka zawh chhun che pawh a tul vang a ni tih i hria,bakah helai hi Duati te ram a ni a,a enkawltu atan an dah che anih pawhin Polite takin awm mai rawh.Ka kal dawn tih a hre lawk saa,I lo ngeiawm kual viau kha a tul lo ang’ ka ti ta duah,mahse mak takin a dar a ti sang uk duh chauh.Haw hmel pawh a pu chuang lo.