MON HOMME- 21

Chapter- 21

'I tha em?” ka hmai bula kut rawn vai pahin Seni'n a rawn ti a..Ka nui ringawt,ka mawl hmel ngawt in ka ring..

'Aw..aw..tha...' ka nui leh a..Ngaihngam zat lo niawm takin min en a,a nui ve miah lo bawk.

'I bang dawn tak tak em?” a ti leh cheu..

'Ka ring...mahse, a la chiang lo..'ka ti ta halh.Ka duh emaw duh lo emaw,engpawhni rawhse,Darian-an a tum tawh chuan ka tihluih theih ka ring chuang lo.

'A van ho tak...i awm loh chuan engtin nge niang le? Bakah Boss damthat loh lai tak in ban i tum bawk si..' a ti leh niah niah..

Dama a rawn thlenga,a thinrim tih a hmelah thup a tum teh nain kan thawk dun rei tawha,ka hmu thiam vek..Min be mang lo,hna tul tak tak bak engmah a sawi lo,nidanga kan rik dar dar thin ang kha awm loin a reh thiap..Hetiang tak hian min lo ui ve ang tih ka lo ngaihtuah phak ngai miah lo..

'Thi i ei dawn lo mi?” zangkhai thei ang berin ka ti a,min rawn melh zawk,a dawhkana Paper chap hnawk nuaih lam bawk a en leh..

'Ei lo ang..Lo va ei rawh..' a ti a.

'I ei chhung khan engvakmah i thawk hman lo ang,i birthdayah ka treat loh che kha,lo kal la...'ka ti leh talh..

'Ok..a tha lawm,thil kan ei dun tawpna pawh a ni thei a..' a then sak.

Kan chawlh thanna hmunah kan inzui luta,vanneihthlak zetin College naupang chawl ve thin ho an lo awm lo a, kan table hman than a lo awl hlauh.Kan chawl thang tawha,kan ei duh zawng pawh sawi ngai loin an hre vek tawh..

'Thla thar atangin maw i chawlh dawn?” a ti a,Dawhkan tlang a kutzungtangin a kik kauh kauh bawk.

'Um...chutiang deuh chu...' ka nui lui sak.

Diktak chuan keipawh hian Office ka thlen hnuah ka bang dawn tih ka hre chauh,nizan khan pawn chhuah min khapsak tur thu chauh a sawia,mahse keiman banna ka pe hreh tih sawiin Seni hnenah Lehkha a lo thleng hman vek..

'Maw?” min rawn en a..

'Eng?” ka ti ve thung.

'Sawi i neiin ka hria a..' a ti leh a,ka hmui ka pet vak ringawt.

'I pasal vang nge hnathawh mamawh i intih tak loh vang zawk?” a ti leh khauh.

'Chu chu ka sawi tihna mi?”ka ngaihtuahna kha ka sawichhuah loh hram ka beisei takzet..

'Ah,sawi nang,ka zawt che,i chhungte zawk nge?” a thle bak.

'Anni lo ve ve,In lamah an buaia,Sawrkar hna leh Sumdawnna lam a lo ni lo bawka,chawlhsan tha zawkin an hriaa...' ka tawng zawngin ka hrawk a ro halh,tiang em em a chiang hian dawt ka la sawi ngai lo.

'A dik ka ti tho mai,Seni khan Darian-a zawkin i banna tur letter a rawn dah a ti a...' a ti leh a..

'Um,a dik alawm,keiman ka pek theih che u ka ring lo...' Dawt pakhat chhan nan dawt engzat nge ka sawi leh ngai ang? Ka mit ka chhing sawk ringawt.

'Anih thil pakhat,kan la inhmu tho angem?” ka en vat,min lo melh kar mai.

'I awmdan a mak e,thi tur ka ang..' ka nui lui hak..A then saka,mahse a nuih a za miah lo tih a lang reng..

'I pasal neih zan khan ka sawi kha,hei hi ka rin lawk dan a ni a, mahse ka beisei aiin a thleng hma ta thung a..' a ti leh halh.

'Ni lo,ka sawi kha..Darian-a leh a chhungte vang a ni lo...'

'Kan thawk dun rei tawha,mumang a ang dawn riauin ka hria..'ka thilsawi a haider tlat..kan eitur an rawn daha,chhan let mai na tur ka hre lo bawk nen ka thaw huai mai..

Scooty dahnaah ka ding vang vang,haw chakna pakhatmah ka nei lo,Darian-a hmuh ka chak hlawl lo,chhunah khan engvanga ti nge anih zawh ka tum zeta,min chhanna tur ka hriat lawk avangin ka zawt buai ta lo law law,bakah thinrim engphiara ka inhauhpui hun pawh a lo chang reng a ni mahna..Ka phone humlai a ri thut,ka phu vak bawk,min rawn Call tu ka en a,Duati..

'Hello...' ka chhungril tawt lutuk tilang lo turin ka fimkhur viau..

' I haw tawh em?”

'Ka tum mek,Parkingah ka awm..Khawnge i awm a?” ka ti a..

'Ka lo chhuak dawn chiah,inhmu lawk ang..' a rawn ti nghal zat.

'Tunah maw?”

'Aw..tunah..a pawimawh'

'Phone a sawi mai chi a ni lo mi? Vawiin chu thlen hma deuh ka duha..' ka ti a..Diktak chuan eng nge min sawipui ang ka hre lo,mahse Darian-a khan engkim a lo hre veka,Duati tan a hlauhawm thei hle ang tih erawh ka chiang..

'Lo awm lawk teh,a rei lo ang..Parkingah khan ka lo kal mai ang..Bye aw..' a off nghal daih bawk..

Minute 10 velah a rawn thleng phei a,kalsawn loin ka Scooty dahna bulah ka lo la ding thung,ngaihtuahna mumal ka hmang thei hek lo..Min rawn pana,midang awmhnai an awm leh awm loh a enkual that that bawk..

'Le...sawi la..chuti taka pawimawh chu engthil nge?” ka ti a.Sawi mai loin a hawikual leh rih.

'Enteh,Phone a sawi mai kha chu a awlsama,mahse, ka hlau vel vek..' ati sapa,a thaw ham ham bawk.

'Eng nge a? Min ti hlau ve zo vek alawm mawle..' ka nui lui hak..

'I thil min zawn tir kha thildang zawn paha thup thei ang bera zawng ka nia, mahse tukinah ka Bossin min ko a, min khak ta chat a..Awi,ka hlauh zia chu....' a awm a dawma..Sawi mai tur hre loin ka lu ka thing nak ringawt,keimah min warning a,khawi atangin nge a hriat ang ka hre lo kha ania,mahse, khawi hmunah pawh an tana Spy rinawm tak an kuh tun ang tih ka lo ngaihtuah thiam miah lo..

'Darian-an a lo hre vek a..' ka ti sep ringawt.

'Maw?! Engtin nge a hriat ang?” a hlauhthawn zia a hmelah a lang vek.

'Ka hre bik lo,i hrilh miah lo ang tih ka chianga,mahse, nangpawh i zawng tih engtin nge i bossin a hriat a?”

'Tu emaw ber min hmu an awm animai..Mahse, ka zawn lai khan file dang nen ka keng kawp vek a..rinhlelhna tur engmah ka siamsak lo..' a thaw hak mai..

'I boss chuan bansan turin a ti che nge fimkhur turin?” ka ti leh sap.

'A pahnihin..bakah khatiang thil kaltawh kha ka buaina tur a ni lo tih min hrilh nek..'

'Um...' ka ti halh ringawt.

'Engpawhnise he thil hi tah hian ti tawp ang,a tha em?” ka kut a rawn vuana,ka mitah tak a en a ran bawk..Ka bansan angem ka hre lo,he ti taka an ngai serious hian min ti phur zual sawt nge ka hlau pawh ka hre hek lo..Ka kut a rawn hmer leh salh,engmah sawi loin ka bu nghat..Ka nui lui sak bawk..

Ka haw hnu lawkah Darian-a a rawn hawa,mahse, amaha lo haw loin Mka leh Emily an rawn tel ve a,hna lamah engemaw tih tur an nei anih hmel viau.An ri hlut,mahse ka nuin vawikhatmah Emily a be miah lo thung..

Chawei kham hnuah roomah ka lut chho nghala,Darian-a erawh a chhuak thung,ka banna chungchang sawi na hun ka la nei eih lo...Dar 1 velah a lo haw ta chauh,a lo haw thawm ka hre reng,mahse ka muhil tawhah ngai se ka duh avangin ka che lo..Min tihharh hlauh hmel zetin thawm nei mang loin a chea,khumah a rawn lawna,puan a rawn pawt kaua,ka kawngah a rawn kuaha,ka insangmar nghal teuh thung..

Ka harh leh chuan a lo awm tawh lo,tho mai loin ka mit ka chhing leh vang vang,nizan khan titi puina hun ka nei ta miah lo kha ania,tunah hna a kal tawh nge inhnuai lamah a awm ka hre lo..Ka tho chhuaka,tukverh ka pana,chhum a zing phui vek..Ruah a sur chiah lo a,mahse ni a lan hmel loh,ka mood chhe lutuk leh khaw awmdan a inmil lam mah chu a ni e.

Ka inphihfaia,darthlalanga ka hmel lo lang ka thlir vang vang,pasal ka neih hma nen danglamna a awm lo,mahse, ka nun erawh a inthlak hlawk.Zawi zetin roomah ka let leha,Darian-a a lo awm tawh.Sofaah a thua,a malchungah Laptop a daha,uluk zetin a en ngur bawk..

'I va nawm loh hmel ve..' a rawn ti thut.

'Nuam e..i kal hma dawn em?” ka ti a,ka thawmhnaw hak tur en tumin ka thawmhnaw dahna ka pana.

'Dawn lo..ee,nimin khan in Officeah letter ka daha..'

'Ka bang dawn lo..' a rum nghut ri ka hre zui zat..Muangchangin ka in hera, ka inkuangkuah fel at bawk.

'Ka sawi nawn leh ang,ka bang dawn lo..' min rawn en a,a hmel tak run maiah chuan angaituahna awm engmah a lang leh pek lo.

'Tum chhin la...' a ha var nalh zet langin a then suk.

'Ka tum chhin lo a, ban ka tum lo hrim hrim zawk..' ka ti leh hmak,nimin kha chuan ka thawhpuite hnenah ka bang dawn tih ka sawi a,tum pawh ka tum ngei,mahse tunah chuan ban ka tum leh tawh lo.

'Min tihluih hi a nuam vak lo tih i hriat kha..' a ti leh hmuk.

'Ka tilui dawn lo chea,nangman min nawrlui zawk a,a fair lo..' ka ban ka phar hliaia,beidawng zetin ka dahthla leh hnak ringawt.

'Ka tih chhan i hria alawm..'

'Aih,hre lo...' ka chhang rang lutuk,a hmui a ti sawi zauh bawk.

'Ka nu hi en la,ka pa nen an inneih hma chuan hna tha tak a nei,mahse a bansan..a chhan chu inchhung enkawl tur leh a pasal enkawl turin...' a ti supa, athle buk bawk.

'I nu ka ni lo..bakah engtikah nge nang hian min then dawn pawh a hriat loh a..' a tawp lam a zuih ral titih,engvang in nge khatiang ka sawi ngawt ka hre hek lo.

Min rawn pan a,ka tawlh hrat ringawt,ka bulah a rawn dinga, a hmel en duh loin a awm zawn ka en lui ngar mai.Min rawn bana,a kut ka beng per lawp.

'Min khawih suh' ka ti that bawk.

'Shh,au vak vak suh,kum khat em pawh inneih hmaa inhauh chiam hi ka duh dawn miah lo ania' a ti hmuk.

'I duh lo anih si chuan mihring khawsak in khawsa ta che...' ka aw a khur dar dar mai.

'Au vak vak lo teh,kan inah hian ka nu leh pa inhau thawm kan hre ngai miah lo ania'

'Mi lem ka ni lo,mihring ka nih hi..ka thinrimna tilang thei lo khawpa dawihzep ka ni lo' ka ti leh nghek..A hmel a dur nghal khup mai.Min rawn hnaih nghal ruak..

'Ola...tun chiah ka sawi ang,duh tawk rawh..' a tawng ring lo,mahse,nawr luih chi a ni lo tih mi a ber lo tan chuan haider theih a ni lo.

'Khatiang khan min ko tawh suh..' ka tawng ring ta lo..A sawi dik tih ka hria,nu leh pa awm lo nise inhauh chiam a pawi lo,mahse hetah chuan keimaha ka awm ang kha ni loin chhungkua anni tlat.

'Ola...' ka sawi ngaipawimawh lo zetin a ti leh nghut.

'Ka duh lo kha hming kha...'

'Sorry, tunah tak phei kha chuan i inhmeh lehzual..' ka thinrimna ngaipawimawh miah lo niawm takin a nui hawk bawk.

'Misual,midang ngaihtuahna nei miah lo..' ka chil ka chhak leh hman thelh..

'Min en teh...' ka khabeah a rawn dawma,ka thle sawn tur ka tukhumah a kut lehlamin a rawn vuan bet hmak,ka en lo thei ta lo.

'Ka ngaihtuah vang zawk chein engkim ka ti,chuan,nupui hi then leh mai mai turin ka nei lo,Inneihna inphuar tir tur hian risk ka la bawk lo,hrereng ang che ' a ti mai mai lo tih ka chiang.Chhan leh mai dan tur hre loin ka din ngaiin ka ding khawng lah,ka kawngah a rawn kuaha,min hnuk hnaia,a pian nalh zet thlawp zaihin min kuah bet nghal hmiah bawk.

'I pasal ka ni a,ka chungchang i hre duh anih chuan min zawt thei reng bawka' amah bawkin a ti leha,ka nghawng hliahtu ka sam a hui kianga, a hmui lum thur thurin ka nghawng a rawn nul thuak bawk.

'Min zawt la...' a ti leh supa,ka beng a fawp dun dun bawk.

'A tir atangin avaiin ka hre duh..' ka ti ta nge nge..

Min kuahna a thlaha,ka banrekah a vuan a,khumlam min panpuia,amah zawk a thu a, a malchungah min pawt thu nghal zat bawk..

'Tunah chuan Jared-a a thi tawh,a hming ka hriat apiang hian na ka tuar thar ziaha,theihnghilh ka duh em em bawka,thil kal tawh chu hun in a kal liampui vek tawha,engmah buaipui thar tur a awm tawh lo,chuvangin engmah hriat belh tum tawh lo la ka duh..' a ti ta duah.

'Mahse...ngatinge inchhung te anih thu i sawi loh?” ka hriatchhuah hmasak ber ka sawi tawp a ni ber.

'Ka pa lama kan chhungte annia,mahse a hla lutuk,han sawi em em tur a awm lo,kan chhungte annih ai chuan kan inthian thatna kha a lian zawk..'a ti sup.

'Mahse inchhungte anni tho alawm,bakah khami zan khan i awm ve lo i ti a..mahse..' ka hmuiah a kutzungtangin a rawn ti si a.

'Ka awm ve lo,min ring rawh..Ka awm lo tak tak...'

'Mahse, Darian..'

'Sawi tawh lo ang,engthil tha mah a chhuak tawh dawn lo,min hriatsak tura ka duh che chu kha thil avang khan ka thiantha ber te pahnih ka chan tih hi aw..' a awah na tihna a lang thei hial bawk.

'Engvangin nge min neih?” reife kan ngawih dun vang vang hnuah ka ti chhuak sap mai.

'I hre lo maw?”

'Hre lo,inchhung hna thawk turin maw?”

'Aih,inchhung hna khawih tu tur chu midang an awm,ka duh ber chu ka lo haw laiin Inah min lo nghak thin la..'

'Emily sawi dan chuan....'

'Shh,he Inneihnaah hian Emily emaw midang hrim hrim ngaihdan ka ngaipawimawh miah lo,ka nupui ni turin ka duh che a, ka mamawh bawk che a..Buaina ka neih changin ka bulah i awm anga,hahdam takin ka hun ka hmang thei ang tih ka hria..chu zawng chu..'

'Um..' ka ti sep ringawt.

Min hmangaih thu a sawi ngai dawn lo tih ka hre chiang tawh,a bula awm turin min duha,sexah min mamawh tel bawk,Hmangaihna kan chen dun apiangin min mamawh zia engmah a thup ngai lo,kan inhip tawnna chak lutuk hi mak ka ti zawk fo,kan la inneih rei loh vang a ni nge ka hre lo.Kei hian engvangmahin ka hmangaih ngawt tur a ni bik lo..Mahse, engtin nge ka tih chuan ang? Ka induhtawkna zawng zawng a tichhe fai vek zela,a duh loh zawngah ka nawrlui thei ngai lo tih ka hrechung pawh hian ka duhna nitin a zual zel tho..Mahse, a hre ngai lo ang,nupui ka nihna anga ka tihtur tha taka ka hlenchhuah hi a tawk tur a ni.

Hna ka bansan dawn tih Darian-an chawei laiin a sawia,ka nu a nui var var mai,mahse Darian-a tum dan erawh a dang a lo la awm cheu,hna ka bansan anga,mahse Inah ama hna ka khawih thung dawna,zin chhuah ngai chi erawh aman a ti vek anga,in lamah Computer atanga thawh theih chi zawng zawng ka kutah a dah dawn thung.

Darian-a inbual hlanin a thawmhnaw hak tur dahchhuah tumin a thawmhnaw dahna ka hawnga, a kamiz leh kekawr ka lachhuak a,khumah ka daha,a Mawza bawm ka pawt hawng chiah tihin ka phone a rawn ri a, ka en vat.Atei...ka nui sak..

'Vawiin kha i theihnghilh ange..' a rawn ti lawng lawng..Ka then nak mai,thiltihkhawm tur awm apiangin remind ka ngai ziah tih a hria.

'Ka la hrereng e..Kan kim thei dawn em?” ka ti ve a,vawiin hi kan thianho hmundanga awm an lo hawkhawm vangin Dine out an ti a, Darian-a hnenah ka hrilha,a lo remti ve mai bawk.

'Kim dawn e,kim dawn vang alawm kan tih,Pasal nei awmchhun i nia, i lo hruai a rem thlap..' a nui hak hak..

'Naah,a hman lo alawm..Nidangah a nimai,bakah keipawh ka awmrei hman dawn lo a, Ka nu te an zina' ka ti leh a.

'Ok..ok,lo thleng phawt la..'

Tukverh nghengin ka dinga,pawnlam ka thlir vauh vauh,kan inneih atangin thla nga lai a liam ve ta reng,Darian-a nen kan inhau buai leh ta miah lo,vawikhatmah Jared-a chungchang kan sawi ri leh ta lo,engemaw chang chuan ka ngaihtuahna a luah zauh zauh,mahse sawi chhuah erawh ka tum tawh lo,Duati lah sawipui chi a ni bau lo..Hna ka bansan tirh kha chuan hrehawm ka ti a,In a awm nilen thak thak kha ngaiah ka nei thei meuh lo,inchhungah engpawh tih tum ila awmpui pathum lai an awma,min tih khalh vek.Libraryah ka hun tam zawk ka hmang ta chawt..Ka beisei loh zetin tunah chuan ngaiah ka nei thei ta viau lawi..

'Eng nge i ngaihtuah a?” ka hnung lam atangin ka kawngah a rawn kuaha,ka bekah a rawn fawp zauh bawk.

'Engmah...eee,tlaiah khan ka kal dawn ania aw..' ka ti a, a rim fai zet ka hip vang vanga,ka ngheng ar ar,kawr a haw lo bawk nen a taksa lumnain min ur ham ham thei hialin ka hre bawk.

'Um,mahse,ka rawn lam hma deuh che angai maithei a..'

'Scooty ka keng mai ang chu ka ti' ka ti a.

'Ngai lo,Zuala in thlah tir mai rawh,chuan i haw dawnah ka rawn lam ang che,bakah nizanah i khuh nasat em kha,scooty khalh chi i ni lo 'a ti supa,ka bengkawm a fawp dun dun bawk.

'Um,nia.Mahse lo kal lo mai la,midangin min rawn thlah thei ang..'

'Ka hre lo,ka nupui tereuhte hi mi tuemawin a ru palh ang che tih ka hlaua..' zawi tein a nui hawk..

'An ngam lo ang,ka pasal hi an hria che alawm..' ka chhaih leta,ka nui hak hak mai.

'Dik chiah,ka chan dawn miah lo che tih ka chiang alawm'

'Min chan lo ang..'

'Ka hria alawm,i tel lo a nun hman hi ka tum miah lo..' a ti leh supa,ka nghawng hnunglam a fawp leh vang vanga,a mipatna in min nek run bawk..

'Insiam tawh la...'

'Tunah chuan thildang ka mamawhin ka hria...' a aw pa leh sexy zet chuan min fan raih raih mai,mahse a kut ka vuana...

'I hmanhmawh kha,insiam la...' ka ti ta zawk.

'Inbual nawn leh ka ngai in ka hria..' a rum hawk bawk..Ka nui ve hak tho.A chang chuan hrehawm sawithiam loh khawp a ni thin,mahse a hlimawm lai erawh a tam zawk..

A kal hmain hna thawh tur tam vak lo min pe a,a kal liam hnuah roomah ka let leha,a thawmhnaw suk tur a awm leh awm loh ka check leh rih,kan room chhung hi chu keiman ka tifai vek zela,a thawmhnaw suk tur pawh keiman ka su vek zel bawk.

Dar 4 pelh hretah in ka chhuahsana,Traffic jam hisapa chhuah ngei ngei angai,an lo awm kim thap tawh..Kan ri chel chul mai.

'Hey,i dam em?” ka dara rawn khawih pahin mipa awin a rawn ti a,ka melh chho vat.Tu nge anih ka hmuh takah chuan hlim zetin ka nui nghal sang mai.

'Dam e,i dam zawk em?” ka ti nghal zat..

'Um,mahse vawikhatmah min be lo ania aw..' a vui der a.

'Awi, i ho lutuk,lo kal rawh...thu ve la..' tih pahin ka bula Chair ka kawk a,phur zetin a rawn thu ve nghal mai bawk.

Ka ban hnuah kan inhmuh lehna hmasa ber a ni a,biak pawh kan inbe ngai lo,Seni nen erawh kan inbe zauh zauh thung.An thianho a Dinner ei tum ve bawk an lo ni a,rei pawh a thu ta lo..Kan chawei boruak a hlimawm takzet.Rei tak inhmu khawm tawh lo kan ni bawka, tawng kan inchuh a ni ber.

Min thlah kual an inhuam vek,mahse Darian-an lo kal a tum avangin ka hnial hlawm,pawnah keimahin ka lo nghaka,Duati'n min nghahpui a tum viau nain kal turin ka nawr lui ta zawk.Ka rin aiin a lo thleng har ta zek,ka call leha,mahse a la tlang thei lo zui..

'Haw na tur i nei na nge?” Dama bawk..Ka bulah a rawn dinga.

'Nei e,Darian-a a lo kal mek a..in haw dawn tawh mi?” ka ti a,a hmelah a in hnem thawkhat tih a lang reng.

'Um,ka thlah kual nghal ang che...' a ti a,a ding bu lak lak mai.

'Ngai lo,nangmah pawn i thleng thei lo ang tih tur i nih kha..' ka nui hak..

'Thei lutuk..ka thlah ang che ka tih chu,min ring tawp rawh,ka tlu teuh lo...' a ti leh a,ka inrin hmain ka banrekah a rawn vuana,min pawt kal titih..

'Hey,eng nge i hriat a??” ka ti that mai,ka sawi hre lo niawm takin min pawt leh sawk.

'Ka thlah ang che ka tih kha...' min rawn en a..A rui nawi takzet,tiang hian ka la hmu ngai lo..

'Angai lo....'

Min pawt leh vak,mahse kan hmaah Darian-a a rawn ding a,Dama a ding chut,ka kut a vawnna a thlaha,Darian-a kut a phe vuai,a ri nghal chawrh..Enge thleng pawh ka hriat chian hmain ka sirah Dama a tlu sawp nuaih mai.