MON HOMME- 23

Chapter- 23

Ka phone riin min ti phu vak,ka hawi chhuaka,mahse,room chhung thim mup maiah chuan engmah ka hmu thei lo,engtiklaiin nge Current a awm loh ka hre lo,ka mit ka nuai chat chata,eng nge thil awmzia? Oh..Darian,khawiah nge a kal ang? Ka phone ri a tawpa,tho mai loin ka thut ngaiin ka thu leh rih..Ka khupah ka khabe ka nghata,nichin a thil thleng kha ka mumang a ni em tih ka ngaihtuaha,a ni lo..

Min rek hlum dawn emaw ka tih laiin a kut a lasawna leh thut,chet pawh ka che sawn ngam chuang lo,ka ban tawn tawnah a rawn vuana,min thing nawka,a rum hawk bawk.Min thlah thuta,Kawngkhar a hawnga,na zetin a rawn khar thuaia,Banga kan inneih thlalak tar a tla keh nghal chhuai a,rapthlak ti lutukin ka melh tlawk tlawk ringawt.Eng nge ka tih dawn engmah ngaihtuah na nei loin Kawngkhar nghengin ka thu thla riai riaia,darkar engzat nge ka thut hman ka hre lo.

'Darian...' ka ti chhuak sep ringawt.

Ka phone a rawn ri leha,khawi lamah nge a rik ka hre mai thei lo,ka hawi chhuaka,ka mit ka khap sak sak mai,tlemin a thim lutuk a zia ta deuh,Khum lam bawkvak ti tihin ka pan pheia,kan room leh Jared-a room inkar a room awlah Inchunglam hman tur Inverter a awma,nidangah chuan Current a awm loh hian amahin a rawn eng nghal mai thin a,tun tum hi engvangin nge a thim ka hre lo.

Ka mutna lamah a lo awma,lukhamin a lo delh avangin a eng ka lo hmu thei lo anih hmel,ka la kanga,min rawn call tu ka en a,T-a leh Mka an lo ni a,vawi 10 aia tam mah an lo call hman,kei erawh chuan vawi hnih chauh ka hre thung.Tu zawk nge ka call ang tih ka ngaihtuaha,T-a ka call ta zawk.

'Zampui...' a pick rualin a rawn ti nghal zat.

'Aw,ka phone ri ka lo hre lo a...' ka ti a,ka awah thil dik lo awm ti lang lo turin ka fimkhur viau bawk.

'Um,nia..ka lo call ngun angrenga..' a thaw ham ham mai.

'A zia lo lutuk,eng nge ni ta?” ka aw ka thian khauh.

'Eng ni lo e,kan lo thleng tep..'

'Maw?” ka tum aiin ka aw a ring lam hret.

'Ahh,a tha vek alawm,in pa hi zanin chu a nawi deuha,mahse, a nasa lo...' a nui hak.

'A van zia lo tak,tunah khawiah nge in awm a?” ka ti a.

'Kan lo thleng a nimai,Gate in kalh em?”

'Aih..'

'Ok,athat chu,hei Gate bulah ka ding chiah..'

'Ka lo chhuk ang..' ka ti sep.

Chhuk mai loin ka din ngaiin ka ding leh rih,engtianga lo hmachhawn tur nge ka hre miah lo,ka thawpik vel vek a ni ber.Ka nu leh ka pa tal awmse a zia tur,ni lo..an awm anih chuan an fapa hi kei aiin an tan zawk maithei,kan chhungkaw boruak keimah vanga a chhiat ka duh lo bur.

Kawngkhar inkhar riah ka phu zawk,kal tumin ka inher chiah tihin a rawn eng ta uar.Stepah kan intawka,mahse,ka beisei loh dan lutuka ka hmuh takah chuan ka ding ta chawt.A luah hliam a tuar tih hriat zetin bandagein an vet kuala,a ban dinglam a awrh bawk.

'Eng....ngatinge?” zawh bik pawh ka nei lo.

'A tha vek e,a ban hi a pelh a,a lu lam hi chu a nasa lo..' T-a zawkin a ti a,Darian-a erawh chuan min en lo hrim hrim,min rawn kal pela,a hnungah T-an a zuia,Darian-a awmdan mak a tih miah loh danah khan kan nupa kan inhau buai tih a hresa anih ka ring thiam nghal mai.

Ka lu ka thing nawk,inhau pawh ni ila ka pasal a la ni reng,tunah chuan a luah hliam a neia,a ban a awrh bawka,Ka buaipui angai tih bak engmah ka ngaihtuah thei lo.

'Kal tawh rawh,ka tha reng' T-a hnenah a ti hmuka,a tawng danah engmah ruih neih hmel a pu lo.

'Kal dawn e,Zampui,engmah serious lutuk a awm lo ania,mahse, hun rei vak lo chhung chu a ban hi a hmang thei dawn lo a,amah hian a inhrechiang ber tho nain hna kal a tum talh chuan i vuak nat belh sak te pawh a tul ang' a ti duah,min rawn en a, a nui vur vur bawk.

T-a pawn thleng ka thlaha,a Accident dan ka zawta,engmah a hrechiang bik lo.

'Kan awm ho veka,a haw hnu lawkah amah in min rawn calla,a accident tih a rawn sawia,chu zawng chu a nimai'

Gate ka kalh fela,Sana ka en a, dar 12 a pel tawh,inchhungah ka lut a,kan thawmah khan Vuli a lo harha,hlauthawng hmel zetin Living roomah a lo ding a,a hawi phawk hra mai,thil awmzia ka hrilha,engmah dik lo a awm lo tih ka sawi takah chuan a hahdam huai tih a hmelah a lang thei nghal bawk.

Roomah tumah an lo awm lo,mahse Bathroom lamah thawm a awm avangin a lut tih ka hrethiam nghala,ka hawi kuala,a thawmhnaw engmah a hlip lo nge ka hmu lo,balbawm ka en leha,engmah a dah lo.Ka nghak ren rawna,mahse a lo chhuak mai tlat lo,Bathroom lam ka pan ta nge nge.Kawngkhar bulah ka dinga, kik tumin ka kut ka lek hman zuau,a rawn inhawng ta thut,ka phu deuh zawka,mahse ka insiamrem leh vat.

'I rei ta sia,lo en che ka tum a..' ka ti a,mahse, min kal pel satliah,min en lo a, min chhang hek lo.

A kut lehlama Towel a ken Sofaah a vawm thlaa,a kekawr phelh tumin a kekawr kawng kilhna a vuana,ka che vat,ka thleng phei nghal ruak bawk.

'Keiman ka lo ti ang..' tih pahin a kilhna ka vuana,ka kut sik hlau niawm takin a kut a lasawn nghal vut.

'Khumah sawn thu phawt la,i pheikhawk ka lo phelh hmasa ang' ka ti leh a,min chhang loin khum lam a pan ve mai.

A pheikhawk ka phelh saka,a kekawr ka phelh leh a,ka thil tih chhung zawng vawikhatmah a tawng lo,ka zawhna engpawh boruakah a thamral zel a ni ber.

'Le,mu rawh le,Lukham kha ka lo dah belh dawn em?”

Engmah chhanna a awm chuang lo,ngawirengin ka lukham a lak belha,puan a sina,a mit a chhing zui hmiah bawk.Ka thaw hak mai,engvangin nge a tawng miah loh ka hre lo,a tawng thei ta lo thut ti dawn ila nichin pawh khan T-a a be tho si.

Peih lo zetin ka mengchhuaka,nizan thil thleng kha,ka ngaihtuah chhuah rualin ka inlet vat,Darian-a mutna a lo ruak vek tawh,thawhphan pawh awm loin ka thu chhuak nghala,Bathroom ka kika,engmah thawm a awm lo.Ka hawnga, a ruak vek.Nizan khan biak engmah min chhang lo a, a luah hliam a nei bawk nen ka hlauthawng tha leh a,a hriatna lamah buaina a tawk a ni mai angem? Ka ngaihtuahna atthlak lutuk avangin ka lu ka thing nawk ringawt.

Inhnuai lamah ka thla thlaa,living roomah tumah an awm lo,Library ka pan leha, a awm chuang lo.

'Vuli..' earphone a lo vuah leh pek,ka pan hnaia,a darah ka vuana,a phu zuk bawk.

'U Zampui....' a ti nghal hluai ringawt.

'Darian-a i hmu em?”

'Aw,Zuala nen an chhuaka,ee..a ban kha ngatinge a?”

'Nizanah a intipalh ka tih kha,khawiah maw an chhuah?”

'Ka hre lo,i thawh hunah lo hrilh tur chein min ti a..'

'Ok..a pawi lo,a nuam vak si lo a,ka ngaihtuah mawle..' ka ti a,ka phone ka zawnga,khumah ka kalsan tih ka hre leh chauh.

Roomah ka let chho leha,phone ka bana,call tumin ka diala,mahse ka off leh rih,nizan khan vawikhatmah min chhang duh lo a,ka call a pick angem? Nimin leh nizan ka ngaihtuaha,darkar 24 chhunga thil thlengah chuan a rapthlak lam mah niin ka hria,engkim mai kha a thleng thut thuta,rilru mumal put na hun paawh a awm lo.Mahse, thil pakhat erawh ka chiang,ka ngaihtuah lo thei lo..

A pick dawn lo anih hi ka ti hman,mahse a tawp hmain a rawn pick ta hram.

'Hello...'

'Khawiah nge i kal?”

'Kan chhuak lawk..ngatinge?”

'Eng..engmah,i lo awm si lo a..'

'Kan lo let mek'

'Eh,a tha lawm' ka ti sapa.

Khumah ka phone ka thehthlaa,ka thu thla hnak bawk,ka pasal a ni a,ka duh takzet bawk,mahse kan pahnih inkar tha thei miah lo hi tu thiam loh nge ka hre tawh bik lo,Dama vangin a thinrim a, engmah rinhlelh na tur awm lo a ni tih ka hria,sawifiahna angaithla duh lo a, mahse a thinrim reng tho.Nizanah kha chuan ka tawngtam hret tih ka pawm thlap,mahse kha pawh tawng lo thei loin amah bawkin min nawr anih kha..

Ka thleng ka nawr sawna,Darian-an a la ei thung,a lo let hnuah min la be leh ta chuang lo fo.Ka awm ve lo nimai awmin a khawsaa,min chhang dawn chuang lo tih ka hriat avangin ka be ta lo law law.Ka nuin thlai chi a chah ho a lo thlenga,Inchung zawlah Green house lian vak lo a neia, leitha ho leh ka mamawh dang Vuli leh Zuala'n min dah chhohpuia,puih ka ngai lo ka tih avangin min chhuk san leha,ka awm chawhma ta thak,min be peih miah lo tu bula awm ai chuan a hahdamthlak zawk mahin ka hria.

'Ka rawn chho ve dawn chiah a' Vuli'n min hmuh veleh a lo ti a,ka thil ken min laksak nghal bawk.

'Ka zo tawh,Darian-a a chhuak leh em?” ka ti satliah.

'Aih,chhuak lo..inleng a neia, Libraryah an awm..'

'Chutia law? Tu nge lo kal a?” ka ti a, rubber kutkawr ka bun ka phelh paha.

'U Mka leh Emily an lo kala' ka chil ka lem te te.

'Anih chu,thingpui i pe em?”

'Aih,Lunch an ei dawn a,an duh lo an ti a..'

'Hetah maw?” ka aw a ring deuh nge ka hre lo,mak tih hmel deuhin min rawn en a.

'Aw,hetah..ngatinge?”

'Eng ni lo e,eitur i siam tawh em?” ka ti leh a.

'Siam chiah lo,U Darian-an inah a ei dawn chuan i siam a duh kher thin sia..' inthiam lo hmel deuhin a ti a,a rilru tih nawm nan ka bu nghata,ka nuih lui sak bawk.

Hna ka kal tak loh hnuah engemaw changin Kitchen lamah ka pui ta zauh zauha,ka nu leh ka pa mai bakah Darian-a thlengin ka siam ei an duh ta tlat,a reng erawh chuan min phut lo.Lunch ei tura a lo haw zauh tum hi chuan ka siam sak ngei ngei thung.Inchhungah kan inzui lut a.Library lam ka melh zauha,kawngkhar a inkhar a,hna lamah pawimawh a awm ka rin rualin ka chhungrilah engemaw ka sawi thiam chiah si loh a awm tlat.

'Ka han inbual lawk anga, ka rawn siam dawn nia' ka ti a,min chhang loin a bu liam mai.

Ka inbual sawk sawka,ka inbual zawh veleh Inhnuaiah ka chhuk thla lehnghala,tumah an lo la chhuak lo vek,va pawh tumna ka nei lem lo.Nidang ang chu nise ka awm ve mahna.

'Vuli,Lunch i peih tawh em?” Dinning room leh Kitchen indanna a rawn dah pahin a rawn ti a, ka hawi let vat,min hmuh a beisei lo nge pawh ka hre lo,a mitko a ti sang uk bawk.

'Kan peih tawh,tiraw u Zampui?” min rawn en a.

'Um,kan lo siam ang,lo nghak lawk ru' Darian-a ka en a.A bu nghut,a inhera, a kal zui nghal daih bawk.

Vuli leh kan nula pakhat zawk nen kan siam a,kan siam zawh veleh Vuli ka kohtir nghal bawk.

'Ekhai,i awm lo emaw ka tia..' Mka'n min hmuh veleh a rawn ti a,nidang ang bawkin nelawm takin a nui sun sun bawk.

'Inchung lamah ka awm daiha,in lo kal pawh ka lo hre lo a..Emily,i tha maw?” zangkhai vahin ka ti a, keimah leh keimah pawh ka inringhlel rum rum mai.

'Tha lawm,Lunch kan ei nghal mai ang kan lo tia,i buai phah viau em?” Chair pawhchhuah pahin a ti a.

'Aih,buai nang.Engmah tihtur a awm chuang lo a..'

'Um,inchhung hi a pawimawh lawm tiraw?” a ti leh a, a then sak bawk.Eng rilru puin nge a sawi ang tih ka lo ngaihtuah leh hman pek.

'I ei ve nghal dawn lo mi?” Darian-an min be ta nge nge.

'Maw?” ka ti hu,hahthlak hian a..

'Lunch...i ei dawn lo mi?” Dawhkan lamah a thle zauh bawk.Dawhkan ka en a,mi pathum eina tur chiah ka siam tir.

'Aw,aih,ei phawt ru..'

'Ok..' a ti nghut,a thutna tur a pawtchhuaka.A thu zui nghal mai,ei ve nghal tura in tih lam chu hnai lo tak a ni,mahse min be ta hram alawm le..

An eikham hnuah midang nen kan ei ve ta chauh,an vaiin Libraryah an lut leh dial,zingah tihtham ka ei lo bawk nen ka beisei aiin ka ei tha ta phian bawk.Roomah ka chho a, ka luh rualin ka phone ri a tawp ve chiah bawk.Ka la kanga,min rawn call tu ka en a,Seni a lo ni a,engtak ni ang maw? Ka mitthlaah Dama a lo langa, eng nge a an zawt tur pawn ka be ta miah lo kha ania.

'Min lo call lai ka lo hre lo a' tih pahin tukverh lam ka pan a.

'Nia,lo call leh ka lo tum meka..Eng lo mawle,Boss a tha lo leh a,ka rawn hrilh hre hrim hrim che'

'Awi,a va zia lo ve.Engtia that lohin nge?” ka ti a,ka ban hnuah mumal takin ka la hmu leh lo.

'Stroke...'

'Khawi Damdawiinah nge? Ka lo kal ang' ka ti nghal sawk sawk,a awmna damdawiin a rawn sawia.

'Kan inhmu dawn nia,keipawh ka kal dawn chiah' a rawn ti a..

Inhnuai lamah ka chhuk thlaa,Darian-a hnenah ka kalna tur hrilh loh ngawt tha ka ti lo.Library ka pana,kawngka tlema lo inhawng sa chu kik lem loin ka nem hawn belha,mahse ka thil hmuh avangin ka dingkhawng nghal lah mai.Darian-a tukverh bulah pawnlam thlirin a lo dinga,hnunglam atangin Emilyin a kawngah a kuah a,a hnungah thlamuan hmel zetin a bei tlan bawk.

Thawm nei lo thei ang berin ka tawlh chhuaka,ka thaw chhuak hleithei lo,ka awm ka dawma,boruak hip in ka thaw kawk kawk bawk.Khawiah nge Mka a kal hman ka hre lo,ka hriat lai kha chuan a awm ve ngei kha ania.

'I tha em?” Mka awin a rawn ti a, ka phu vak.Ka mengchhuaka,Tui bottle keng chungin a lo ding reng tawh.

'Aw..aw,tha e,i haw tawh maw ka tia' ka ti bah nak mai.

'Haw lo,Cigarette ka va lei lawka,i tha tak tak maw?” a ti leh a.

'Um,tha e..Roomah hian luh ka tuma,ka rawn tlanthla hmanhmawh lutuka' harsa zetin ka nui lui hram.

'Lut ila..' kawngka a nem hawnga,zui mai loin thawk ka la leh te te.

Chair hran ve veah an lo thu hman tawh.'Darian,biak lawk che ka duh a...' ka chhungril sahal hluah hluah thup tumin ka bei nasa viau.

'Um,sawi la...'

'Em,pawn lamah chhuak lawk ila..'Mka'n a ti vut.

'Angai lo,awm ru,kal chhuah lawk ka ngaia,chu mai chu mawle' pangngai takin ka ti thei hram.

'Khawiah?”

'Ka Boss thin kha a tha vak lo a..'

'Ook,kal la.Zuala hruai mai rawh' hrep tak hian a,ngaihtuah der ka ngai lul lo mai.

'Aih,Scooty ka keng mai ang..'

'Hruai rawh..'hnial tumin ka ang ziau,mahse a hmel thutak ngul maiah chuan inhnialna hun a ni lo tih ka hria.

'Ok' ka inher a, ka chhuak zui nal nal,diktak chuan hruai ka tum bau lo.

Ka insiam sawk sawka,ka kalna tur Vuli ka hrilha,inhnuai lamah Scooty la turin ka chhuka,Zuala ka hmu lo,a awmna hre duh ila chuan thil harsa a ni lo,mahse hruai ka tum lo hrim hrim zawk.

Damdawiin ka thlen hnu lawkah Seni a lo thlenga,Dama ka hmu hreh viau,khatiang tehnek hnuah kha chuan inhmuh leh chakna ka nei miah lo.A ruih vanga khatiang kha thleng nimahse nuam ka ti chuang lo.

'Zampui' ka hawi chhuaka,ka hmu ta nge nge.Mask a hmang thung.

'Um..i tha maw?” ka sawi zawh rualin ka inchhir nghal zat,a landanah ngawt pawh a tha lo tih a chiang reng,mahse awmzia a awm tawh lo.

'Ka lo thu ve thei em?” ka zawhna a haider hmiah.

'Lo thu la..' ka bag ka lasawna.

'I lo kal a phal ka rin loh nen..' ka hriat tur tawk lekin a ti a,ka ip chawih mai.

'Tu in maw?”

'I pasal in anih loh chuan tu in nge ni ang?”

'Ah,nge a phal loh ang? I ho lutuk,ih..hmanzan kha chu...'

'Ka rui em anih kha,ka thiam lo hulhual' ka sawi zawh hmain amah zawkin min tihkhalh a,a sawichhuah takah chuan ka thawl huai mai.

' Khatiang a thleng kha pawi ka ti..' ka ti ta sep.

'A ho lutuk,ka tihdan che kha a mawi lo alawm.ka nupui ni ta la keipawh a tih ang kha ka ti ve tho ang' ka en a,ka hriat thin Dama ngei kha a ni leh tawh.

'Enteh,thil pakhat...' sawi zawm loin ka ngawi leh daih.

'Eng maw?” min rawn en a.

Kha photo chungchang kha sawi ka tum a, mahse sawi loh tha zawkin ka hre leh,ani hian rilru kawi puin min en lo tih ka hria,chutihlaia Darian-a kha thil vang khan a thinrim tih sawichhuah tul ka ti lo leh lawi,a rilru a nuam lo viau thei zawk tlat.

'Ka haw mai dawn mawni ka ti...'

'Yeap,engmah tih theih a awm chuang hleinem,ti hian thut ngat ngat animai' a ti tha ve mai.

'Khawnge Seni kha a awm tak le?” ka ti a, ka hawikuala,kan thlen hnu lawk khan phone a hmanga, a lo let leh awm pawh ka hre lo.

'Officeah thil pawimawh a awma, a let leh anih kha,chhuk ila..' a ti a.Boss nupui hmuh leh ka duh viau laiin a chhung lamah an koh luh avangin ka nghak ta lo.

In a lo reh thiap,Vuli emaw Zuala zawk pawh ka hmu lo ve ve,tunah mut a la hun lo,mahse, khawiah emaw a kal chhuak ti dawn ila khua a thim tawh bawk si.Kitchen lam ka va en a, tumah an awm lo.Room lam ka pan chho ta zawk.Ka inthlak zawh hnuah duh leh ka phone mai ang chu.Room kawngkhar ka hawnga, a lo thim vek,ka thaw hak mai.Inhnuai lamah khan Darian-a ka hmu lo,a kalchhuah leh chhuah loh ka hre hek lo.Huh..Emily nen khan hna an la thawk dun pawh a nimahna..Ka ngaihtuah zawng pawn ka luak a chhuak hlui thei.

Kawngkhar bula Switch ka dap a,ka on a,mahse, Sofa a ngawirenga Darian-a lo thu ka hmuh rualin ka ding khawng ngal lah mai.

'I awm lo emaw ka tia..' ka ti chhuak nghal halh bawk.

'Khawiah nge i kal?” nelawmna pakhatmah a tel lo.

'Maw?” ka ti ve thung.Ka bag dahnaah ka bag ka daha,ka jacket hak ka hlip zui zat.

'I Boss nge dam lo i bialpa? oh..i thianpa” ngeiawm lutukin a nui hawk bawk.Muangchangin ka hawi leta, ka inkuangkuah fel than bawk.

'Ka boss hlui a dam lo,i duh chuan a awmna Hospital ka kawhhmuh thei che,an Doctor kha i hriat zawng anih ka ring..' ka tawngchhuak dam thlap mai chu keimah pawn ka awih lo.

'Ok,a pawi lo..i pasal ka dam lo ve tho a, mahse pawn lama Damlo an awm tih i hriat ruala i hmel danglam vek kha mak ka ti em a,chuti taka pawimawh chu Dama kha anih ka ring a,chhungte tih tur i nei bawk si lo..' a tawngkam chhuak tinreng chuan a mal malin min deng dawt dawt a ni ber.

'Inthen ka duh'

'Oh,tum chhin la...' min rawn pana.

'Ka tum khawp ang' ka ti hmak.Ka inhera, Bag dahna ka hawnga, Zin bag lian vak lo ka lachhuaka,ka khar leha,ka thawmhnaw dahna ka pan leha,ka hawng a,mahse ka hawn rual deuh thawnin a rawn nem khar thuai,a nek bet zui hmiah bawk.

'Kal sawn rawh..'

'Ah,khapa nen khan nuamchen turin ka thlah zalen ang che maw? Teuh lo mai..' ka awih thei lo zawk.

'Mipa dang mamawh lo thei loin min siam te pawh a ni maithei asin...' engvanga tiang zawnga tawng nge ka nih ka inhre bik lo.Dama nen min ringhlel se pawi ka ti tawh hek lo.Ka tawlh hnunga,ani erawh a din ngaiin a ding ngur thung.

'Kha mi tenawm kha i mutpui em? Aw nge aih?” a aw a ring lo.Mahse, a chiang.

'Vanduaithlak takin la mutpui lo hlauh,achhan chu tlemin ka inthiam lo ve deuha,mahse vawiin khan Libraryah thil ka hmu a,ka inthlahrung ta lo.Ka pasal pawn a nupui awm laiin a bialnu hlui,engkim a lo tihpui tawh a hruai luta,Chhunah khan Mka nen khan lo lut hman lo ila chuan chhuatah khan Hmangaihna in lo chen ang chu mawle...' ka tawng hnem lutuka ka thaw a chham lo chauh.

'Ola...'

'Khatiang khan min ko miah suh,i duh leh i Emily kha i lo ko tawh dawn nia' ka ti that mai.

'Lawk,thikna a ni em?” ka beisei loh lutukin a nui suk bawk.

'Enga? Thik maw? '

'Aw,ka nupui tereuhte hian a thik niin ka hria..' mak lutukin a hmelah nui hmel a lang leha,tihelna lam engmah a lang hek lo.

'Thik lo...ni lo,aw...aw..ka thik,in pahnih hnih khan ka hua che u...' ka sawi zawh rualin ka bag ken ka tum tel a,a thlawk phei fua bawk.Mahse, a thle zauha,bang a va deng dawt.

'Kut min thlak tum tawh suh ka tih che kha...' min rawn pan hnaia..

'Min rawn hnaih tawh suh,i na kha tihnat belh ka duh lo ania...' ka ti leh that mai.

'A pawi lo,chu aia pawimawh zawk chu hmuh tir che ka duh..' a ti supa,min rawn hnaih nghal ruak,ka khabeah a rawn dawma,thlek sawn ka tuma, mahse a vuan nghet lutuk,ka hawi sawn thei lo,ka tihluih vak chuan a kut na ka tihnat belh ka hlau tel bawk..Kan inmelh ta ran mai,

'Ka mitah en rawh...' a ti leh sup.

'Eng nge ka hmuh chuan ang?”

'I pasal mawle,i duh duh i sawia,na ka tih pawn ka khawih na thei lo che a,kut ka thlak thei bawk hek lo che,midang chu ni la i dam tawh lo ang,mahse, ka nupui,ka engkim....' a sehchilh nawk nawk mai.

'Darian...Emily nen...'

'Aw, i hmu ang,mahse kalsawn lo khan ka nupui ka hmangaih tih ka hrilh lai kha ngaithla la tha tur ania..' a ti leh sup,a awah na tuar a ang phian bawk.

'Ka...ka..ka lo ngaihdan chuan...ni lo,i sawi vanga awih ngawt tur ka ni lo..' ka khabe a vawnna kut a laksawn tumin ka han vuana,mahse ka kut a rawn vuana,a pawt hnaia,a fawp vang vang mai.

'Ka sawi vang ni loin min zirchiang ang chu,zaninah pawh Zuala leh Vuli riahchhuah ka phalsaka,engkim a bul atanga tan tha leh turin kan pahnih chauha Inah hian awm ka duh..' a ti leh duah,tumah ka hmu lo kha a chhan ka hrethiam ta uar.

'Mahse,Darian...'

'Shhh,min Hmangaih ve lo mahla min duh tho tih ka hria,nakinah min la hmangaih em em ang..Min hmangaih theih nan ka bei dawn alawm ' ani leh ni lo ang takin in rintawkna a nei lo hmel ve tlat bawk.Engmah ka sawi thei lo,ka kuai kuna,ka fawp ta vawng vawng zawk.

Ka nu leh ka pa bakah Jared-a a lo haw a,kan in reh thap thin kha tunah chuan ka nu tawng ri leh nui riin a khat leh ta vek.Tunah phei chuan Ruht-i fa te an rawn riaka,kan ri laih laih reng mai.

'Tho duh suh..' tih pahin Darian-a a rawn mu ve a,ka blanket sin a rawn pawt kaua,a bawp sei thlurhin min rawn khan beta, ka samah a fawp vang vang bawk.

'Ka lu a na..' ka ti sepa,ka ngheng ar ar bawk.

'Tarmit..a ni em? Lu nat chang chauha bun te chuan a na ang chu...' a nui hawk bawk.

'A ninawm e lawm,nangpawh hna i thawh lai loh chuan i bun peih loh kha..'

'Hna ka thawh laiin ka bun tal alawm,eeee.I thil ziah lai kha i zo dawn tawh em?” a ti leh supa,ka Thawnthu ziah hi a chhiar ngai lo nain a sawisel ngai lo.

'Zo tep ang,mahse Chapter tlem a la awm,ti nge?” ka ti a..

'Ambie-an a en duh a'

'Maw? Tu Ambie-a?”

'Nikuma Book of the Year ziaktu kha,i hria em?”

Ka inleta, amah en thei zawngin ka mu a,an lo inhre reng tih ka hre miah lo.

'Hria,khapa khan ka thilziah a en duh maw?” ka la awih thei lo zawk.

'Um,en duh..Ngatinge? A thawng deuh che mi?” ka hmui a rawn tuaia.

'Thawng lutuk...'

'Ok,i ziah sa thildang pawh a en duha,i Bloga mi ho a en hlawma,mahse luh kual sek a buaithlak a ti a..'

'A duh phawt chuan ka pe thei reng..'

'Um,nakinah la chhuak la,min pe la..ka lo pe dawn nia..'

'Ok,,mahse...tunah chuan ka lu a na,ka luak a chhuak deuh bawk..' a darah ka lu ka nghata,ka mit ka chhing vang vang bawk.

'Ka rualin Damdawiinah lo kal la,in check-up i ngai” a ti nghut.

'Aih,a zia leh mai ang,ka mit aniang' ka ti a, nihnih ka khua a sik tawh tih erawh ka sawi tel lo.

'Ok,a tha alawm,mahse tlaiah i kal peih dawn lo ni maw?” a ti leh a, ka hnungah a chul hauh hauh bawk.

'Kal loh mai ka duh,mahse Mka a thinrim awm sia..'

'Ola..i kal loh chuan keipawh ka kal lo mai ang..' a ti leh sup..

'Ngai lo,nang tal i kal ang chu..'

'Aih,i kal loh chuan ka peih lo...'

'Malsawmtluang...' ka tawng zawm leh hmain a hmui chhah leh hnawng deuh chapin ka hmui a rawn si a,ka kawr chhung a rawn zen nghal zat bawk.

Atei nen chhunah kan inhmuh dawn avangin dar 12 rik hmain in ka chhuahsana,ka nuam lo ngulh nain inhmuh kan tih tawh avangin thulh ka duh lo,bakah ka pu te tlawh ka duh pah bawk.

'I va dang ve,i nuam lo mi?” rawn thut ve pahin a ti a.

'Nuam e,tak takin ka ni nghulha,bakah ka khua a sik leh thina..'ka ti tha ve mai.

'Nang hi...i rai a ni lo maw?” ka thu ngil zawt,tunthla ka period hun a pel tawh,hun a insawn satliah emaw ka ti a,mahse naktuk mai hi thla thar a ni der tawh.

'I test em?”

'Aih...'

'Tlaw lutuk,pasal nei nih chuan in test ngei ngei tur..'

'A tir lam kha chuan ka in test a, mahse a rei tawh lutuk a..' ka ti tha ve mai.

'Lei sa i nei em?” a ti leh talh,ka bu nghat ringawt.

Drawer ka haia,pakhat a lo la awm,ka la chhuaka,ka en vang vang mai,Darian-a hian fa neih a chak anih pawn a sawi ngai miah lo,vawikhat chauh kan in check-up a, kan tha ve ve,nui chungin 'Honeymoon kan hmang rei a nimai' a ti awlsam then.

Beisei ngam lo chungin ka en dek deka,LALPA..line hnih a lo sen kalh mai..Ka phone ka phawrha,Darian-a call ka tuma, mahse a lo haw hunah surprise pek ka duh leh ta zawk.

Room kawngkhar inkhar ri dawtah ka harha,ka khua a sik leh avangin ka mu a, ka lo muhil zui daih pek anih hmel.Ka thuchhuaka,Darian-a Sofaa ngaihtuah muk hmel zeta lo thu ka hmu nghal zat..

'I lo haw na a rei tawh em?” ka ti a, ka tawng thawmah a rawn hawi pheia,a hmelpa leh dur khup mai ka hmuh rualin ka ip chawih mai.To haw tur intham nen danglamna a awm lo..

'Ola...eng nge i tih hi?”

'Maw? i sawi awmzia ka man lo..'

'Eng nge pek loh che ka neih? I tan eng nge ka tih loh?” a au a ni ta ber.Engmah a awmzia ka hre hlawl lo.

'Darian...i sawi awmzia engmah ka man lo ania'

Ka phone a rawn ri a, ka en vat,Duati a lo ni a..Darian-a ka en a, lo inpet ruh tlat.

'Aw,Thiannu...'

'Fbah lut rawh,a rapthlak lutuk..'

'Maw?'

'Fbah khan i lehkhabu thar ziah turah i pasal leh Jared-a tualthah case inzawmna an rawn ziak ania,a chiang em em lutuk...LALPA,engthil nge i tih taka?” ka phone ka thlauh tawp.