MON HOMME- 27

Chapter- 27

Office a let tawh loin ka haw tlang nghal nal nal,Ida-in hmuhnawm tih hmel zetin Tv a lo thlir dauh dauha,engmah sawi loin ka pana,a darah dim tein ka khawiha,min rawn en a,hai rual lohin a mitmengah Darian-a a lang,mahse,ka ta a ni..Keima ta chauh,ka pawm a,a thlawk bo mai ang tih hlau niawm takin ka kuah bet tlat bawk.

Ka thlah leha,nidang nen ka awmdan a danglam deuh tih a hre nghal chat,zawhna min zawt a,a tha vek tih ka hrilha,a chalah ka fawp leh vang vang.Ka ngaihtuah leta,Emily laka ka khawsak dan kha a mawi lo pawh a ni mahna,mahse mawi zawng thei ka ni lo.Ani pawn mawi a zawng lo,tikhawpa ka na tawh chung hian min tih natna tur a la zawng ngar ngar alawm le..Ka mitthlaah Darian-an mak ti hmel zeta min en kha a lo langa,ka ner nak mai.Hlawm tak hian a..Kei kha min neih a lo phu reng reng lo,a anpui chu Emily zawk..An chhungril tenawmna te midang ngaipawimawh miah lo annih na te hi a lo in mil thlap zawk.

Ka phone riin min tiharha,peih lo zetin ka bana,Duati a lo ni a, tun ang zing karah engtak sawi tum ang maw?

'Hello..' ka ti sapa,ka bawkkhupa, Lukhamin ka in delh tir nghal zat.

'I tho tawh em?” a ni leh ni lo angin a thawhna a rei tawh hmel phian zui.

'Tho lo..eng nge?”

'Eng lo...ih,nizanah Darian...' a ngawi leh daih.

'Chuan...?” ka ti halh ringawt.

'A lo kala,ih...Ida-i chungchang hriat a duh a..Min ngaidam rawh,ka hrilh ta vek mai...' mangan hmel zetin a rawn ti nawk nawk,kei erawh ka rum hak ringawt.

'A pawi lo,a la hre dawn tho alawm..' alangah erawh chuan ka ti dam thlap.

'Nia..i thinrim lo tak tak maw?” lawm hmel zetin a rawn ti leh a.

'Um,rim lo..'

'Ka van lawm,ka tum loh lutukin ka tawng a,bakah ka ngei bawk si nen khan ka lo chhang deuh hmawk hmawka' a ti leh a.Ka then sak ringawt.

'Ka fanu ka chan theihna tur Lehkha vawiinah buaipui ka duh ang aw..' ka ti ta zawk.

'Maw? A rawn chuh buai nghal der che mi?” a ti nghal hliai.

'Aih,a tih hmain ka lo inven lawk a tha ang chu ka ti..Bakah min chuh kher lo thei bawk..'

'Ni lo,a chuh ang che..a hmelah khan ka hre mai,Awi..Sorry...' a ti leh lawi.

'Ka hria alawm,engpawh ti se, keiin a tih hmain ka ti ve ang chu' ka ti dam thlap.Ni e, ka ti ngei ang,Jared-a laka hmingchhiatna nei lo a a chhuak ang leh ka tih ni miah lo a a tuartu ka nih ang kha chuan ka fanu chungah engmah a ti lo ang..Ka phal ngai lo ang.

Tho mai loin ka mu leh vang vang,ka chhungrilah Darian-a leh Emily ka huatna bak engmah a awm lo.Engtin nge ka lo Hmangaih thin ka hrethiam lo zawk.Fanu a nei tih a hre lo a,mahse a hriat tak avang maiin nu lak atangin a lahrang ang maw? A teuh lo lutuk..

Office ka tlawh zawka,Duati te Office lam ka pan ta zawk,tih tur tul ang ang kan buaipui nghala,mahse tuman an hriat ka duh lo.A hma a thil thleng tawh kha engmah ka la theihnghilh lo,Darian-a te beih ka tum anih chuan fimkhur lutuk a awm thei lo. Lunch ei turin an Office bulah kan lut dun a,vawilehkhata tihfel mai theih thil anih loh avangin a tuka tih leh turin kan ti ta zawk.

'Enteh,nizan chu a rawn kal thut bawk sia, ka hamhaih lutuk a' a ti siam siam.

'Ka hrethiam alawm' ka ti satliah ringawt.

'Nang hi..i hmu tawh chiang mai” thuruk sawi niawm takin a rawn kun hnaia.A hmel en duh loin ka phone ka en lui tlat thung.

'Mawh? I hmu tiraw?” a ti leh a.

'Diktak chuan hmu..'

'Hm,kan In a a lo kal thu ka sawi khan a thawng lo che ka ti reng a ni.Engtikah nge i hmuh a?” a ti leh duah.

'Kan building luah lai leitu hi an mahni an nia,chuan,a lo kal laiin Ida-i School bang a lo kal kawia..chu zawng chu...' ka thaw haka,ka nui lui var var bawk.

'Chu zawng chu? Takzet?' a mimeng fing zetah chuan ka ngaihtuahna hriat a tum tih ka hria.

'Um,chu zawng chu..ee,ni leh lo..Niminah Bon Appetiteah tuiin Emily ka theh...' mak ti lutukin a mengphar vaka,za zetin a nui ta hak hak.

'A va han nuam tak,a hmel ka hmu chak lutuk..Mahse, ngatinge i leih a?” a ti leha,a hmelah nuam tihna a lang chiang ngang mai bawk.

'Ida-i chungchang bawk mawle..' ka ti nghat,a tum nghal hmak.

'A ka bawlhhlawh khan a lo sawi ve tur a awm lo,awm ve ila ka van ti..'a ti vang vang mai.

'A ngam chuan sawi leh rawhse,a let a hmu nghal zel tawh ang'

Office kan insawn fela,ka lo rinlawk angin Darian-a te lam atangin engmah thawm a awm leh ta miah lo,ka hrilhhai letling zawk.Emily emaw zawk pawh ka hmu ngai lo hrim hrim bawk. Ka hmuh ngai loh vanga thawveng hawk tur ka nih laiin ka thawveng chuang miah lo, engemaw thleng mai tur angin ka inring renga,Ida-i lah ka thlahfal ngam hek lo.Mahse, tunah chuan ka hmuh hnuhnun ber atang khan thla a liam leh tawh a,ka thlamuang leh tan ta bawk.

Ida-i te School ka thlenin ban hun a pel hret,nidangah chuan ka tlai dawn chuan ka call lawk mai thina, mahse vawiin chu minute nga vel bak a ni lo.Darian-a te laka hlauhthawnna ka neih tak avang khan ka theih phawt chuan keiman ka lam ngei ngei,Chhuani hi chuan hawsan tawh loin a nghak mai thina, mahse keiin ka lam dawn thung chuan Office atangin ka kal tlangpui,a la naupang hle nain tumah mah kan awm loh pawn a tap ngai lo.Mi nau tap hi inah a sawi thina,' ngatinge an tah kher ?'a ti ziah bawk.

A rawn chhuak mai dawn emaw ka tih laiin a lo chhuak ta mai lo,midang an haw fai deuh vek tawh,ka hawi kuala,an Miss lo kalphei ka va hmu a, ka pan phei nghal vat.

'Ida-i hi ka hmu mai lo a..' ka ti a, ka beisei loh zetin a mengphawk ta hra mai.

'Ida-i maw? Lawk,nichin khan Mipa pakhatin a rawn lama...'

'Maw?” ka tum aiin ka au ring,mahse pawi ka ti lo.

'Aw,Apa a ni tih a sawia...' ni lo..ni lo..Ka lu ka thing nawk nawk mai.

'An kalna a rei tawh em?” ka ti chhuak thei hram.

'Aw,an ban khan a lo nghak tawha,thil dik lo a awm em?” hlauhthawn hmel zetin a ti leh a,aukhum nghek ka chak lutuk,engtiklaiin nge a Pa in a lo hruai tih ka chak bawk.Mahse, helaiah hian ka at ka so ngawt thiang lo.

'Aih..aih..a sawi lawk lo a' ka theihtawpa pangngaiin ka ti ta zawk.

'Um,anih chu..Tunlai chu a lo kal deuh ziaha,mahse i lo kal hma hian a kal leh mai zela..' ka awih thei lo zawk.

'Anih chu...' ka ti ringawt,harsa zetin ka nuih lui hram bawk.

Scooty ka dahna lamah ka pheia,a number ka save lo,mahse ka hria..A number a la thlak lo tih kan Building luahlai a leiah khan ka hmu vek tawh.Ka diala,a ring char char,a pick thei der lo.Manganna avangin ka a huih nimaiin ka hre bawk.Diktak chuan min chuhpui theih loh tura Courta ka buaipuinaah khan a Pa ka hriattir loh avangin min khing let theia,ka tihtheih awmchhun chu duhthlang thei anih hma chuan ka hnenah a awm ang tih zawng a nimai.

Ngaihtuahna thar ka nei,an Office phone number ka kawl tak alawm le,ka dial nghala,rei pawh a ring hmain an rawn pick nghal vat.

'Hello..' a hmaa ka biak tawh,hmeichhe aw puam lam bawk khan a rawn ti a.

'Darian-a hi a awm em le?” pangngai takin ka ti a.

'Aih,In lamah a haw lawka..Khawi atangin...?” a sawi zawh hmain ka off hmak.A bak hriat ka mamawh miah lo.

Gate pawnah ka ding a,ka luh dawn ruaiah ka huphurh tha leh a ni ber,he In atanga hnawhchhuah ka nih hnuah tun hi ka vawikhat kal lehna a ni a,a chhungah tu nge awm mek ka hre lo,eng angin nge min lo dawnsawn ang phei chu ka hre lo lehzual.Mahse, chung zawng zawng aia pawimawh a awm,a chhungah ka fanu a awm mek.Ka lakchhuah ngei ngei angai.

Gate ka hawnga,kum nga hnuah ka rap leh ta,an kawtzawl chei dan pawh danglam a la awm mang lo,an pangpar phunna siam belh tih mai loh chu ala ngai vek.Door bell ka hmeta,an rawn hawn hun nghakin ka tawlhhnung nghal zat,ka chhungrila zamna awm paih bo tumin keimah leh keimah ka infuih mawlh mawlh bawk.

A ri raka, Hmeichia, kum 20 bawr velin a rawn hawnga, ka la hmu ngai lo.

'Eng nge i duh?” a ti tawng.

'Darian-a ka hmu duha..'

'A lo la haw lo,tun ang hunah chuan Office anih loh chuan Hospital lamah zawk a awm thin' a ti leh a.Chik zetin min en bawk.

'Office lam ka calla,Inah a haw tih min hrilha..' ka ti leh hmak.Ka insum theihna ka hloh tan mek tih ka inhrethei.

'Aih,a lo haw miah lo..A number i nei em? Ka pe dawn che mi?” a tih zawm zat,a hmelah dawtsawi hmel a pu lo..Nia,engvangin nge dawt min hrilh ngawt ang? Tu nge ka nih pawh a hre nang.

Tih leh mai tur ka hre lo,Officeah a awm lo an ti a,Inah a awm hek lo..Hospitalah chuan a kalpui dawn miah lo tih ka chiang,Chhuani ka rilruah a lo lang zawk,tun thlengin engmah a la rawn sawi lo.Nidangah chuan kan thlen harin min rawn call ziah.

'Aw,U Zampui...' a rawn ti a.

'Ida-i a lo haw tawh em?'

'Aw,hei an lo thlenna a la rei lo...' ka thaw hawk mai.Eng chiah hi nge maw tih a tum hrep ni?!

'A that chu...' ka ti sap..A awmna chin ka hriat takah chuan ka thawveng hawk,mahse Darian-a ka hmuh ngei ngei angai.

Kan In kawtah Scooty a lo ding vang,Darian-a ta anih ka ring ve ngawt bawk.Ka hung fel sawk sawka,mahse lut mai loin duhthawh zetin Boruak ka hip leh vang vang phawt,ka chhungril thinrimna in up nasa lutuk hi Ida-i awm laia tih lan ka duh lo bur.

Ka luh rualin ka thil hmun vangin ka ding chawt,Sofaah Darian-a leh Ida-i an lo thu duna,Ida-i lehkhabu an lo en dun mek.Ida-i hian hetiang khawpa a nel anih chuan vawihnih khat chauh a hmu lo tawp tih ka chiang,vawi tamtak hmelhriat loh biak loh tur tih ka hrilh tawha,a kum phu loin a fing bawk nen a zawm tha viau ziah.Mahse, tunah Darian-a bulah thlamuang takin a awm anih chuan Darian-a hian tih tlangnel tumin a bei nasa tawk hle ang tih ka chiang.

'I va lo haw laklawh ve' Chhuani'n min rawn ti a,ka ngaihtuahna atangin ka harh zawk.

'Nia..ka lo haw hmaa' ka ti ta ngawt.A hmelah Darian-an Ida-i a hruai haw vangin mak ti hmel a pu hek lo.Tu nge anih a lo hre tawh anga, ngaih loh lamah angai lo pawh a ni maithei bawk.

Kan tawng thawm hriain Darian-a a rawn hawi phei vut,a then suk bawk.Ida-i darah a khawih zauha,ka lam a rawn kawka,Ida-in min hmuh veleh a chhuka,min rawn pana,kei erawh chuan ka chan mai dawn niin ka inhre ve thung.

Ka thingthi a,ka kuah bet nghal chawt,a ban tereuhtein ka nghawngah a rawn kuah ve chial bawk.A sam kir chiat leh nem thep maiah ka hmai ka phuma,ka mittui tla tur duh loin ka khap sak sak bawk.

Chhuani hnenah eitur a pek tawh leh tawh loh ka zawta, a lo pe fel vek tawh,Darian-an a hruai haw tih min hrilha,ka thianpa a ni tih a sawi bawk,ka bu liam vel mai mai,mak takin Darian-an a lo be thei vek,engmah buaina awm loin an titi dun thei tlat.

Chhuani inhnuai kal tur Ida-i ka hruai tir a,Darian-a nen chauh kan awm ta ran mai,ka thlen tirh atang khan ka la be ta miah lo,Ida-i lam ngawt ka ngaihvena,Darian-a lahin Ida-i ngawt angaihtuah ve tho bawk.Kan boruak nuam lo lutuk kha Chhuani tan khan haider theih pawh a ni lo ang,Puitling pahnih,inbe bawk si lo kha thilmak a ni lo thei lo.

'Eng nge i tum chiah?” ka ti hmak,han thup mawi kual vel tumna ka nei lo.

'Eng chu maw?” ngaipawimawh lo hmel zetin a ti sup.

'Ida-i i rawn hnaih hian enge tulna a neih?”

'Ah,ka fanu ania..'

'I fanu a ni lo..'

'Anih chuan kan test dawn mi niang?” ngei lutukin ka melh nghek ringawt.

'Thisenah chuan i fanu a ni ngei,ka pawm thlap.Mahse, keimah chauhin ka enkawla,khang hun chhung zawng khan fa i neih leh neih loh i ngaihtuah ngai lo,tunah chuan Pa a mamawh lo a,a mamawh tawh ngai lo ang..' ka tawng hnem bawk nen ka sawi zawh rualin ka thaw hawk mai.

'Chu chu tanchhan a tling lo..Tunah a pa a hmu tawha,a mamawh bawk,ka kalsan dawn miah lo' a aw nghet churh maiah chuan thinrimna emaw tihelna a lang lo ve ve.

'I tel lo hian kan hlim zawk...' sawi mai tur ka hre lo.Ka rilrua lo lang hmasa ber ka sawi tawp a ni ber.

'Um,nia..nang chu i hlim maithei,mahse ka fanu hi chuan Pa a mamawh'

'Ni lo,a mamawh lo che..' thinrimna vangin ka aw a khur titih ta hial bawk.

'Kum 4 tal tawp fanu ka nei tih ka lo hre lo a,chu chu tu thiam loh nge?” bung zetin a tu hmuk.

'Nangmah aniang chu..Fa i nei tih pawh i hre lo kha i chapopui tihna a ni em?” hmusit zetin ka nui nghek bawk.

'Ka hriat hlau in a nu in a thukru anih chuan hriat loh hi ka zak lo' a hmelpa leh chang rut mai chu ka en a, kei ang bawkin a inthununna a hlauh ve mek tih ka hmu thei.

'I hresual anih chu,engvangin nge ka thuhruk ang? '

'Anih si chuan engvangin nge fa ka nei tih ka hriat si loh?”

'Oh..Easy lutuk,In inchhung atanga petchhuah ka nih atang khan nang nen inzawmna kan nei tawh lo,a nu pawh duh lo chuan fanu phei chu duh ngaihna awm hek lo..' ka sawi zawh rualin ka kut ka beng thak mai.

'I thil tihsual kha i fanu tuartir tum miah suh..' enge ka tih a? Mahse, ngaipawimawh lo hmel zetin ka dar ka ti sang ak.

'Ok,tunah chuan sawi teuh awmzia a awm lo,chhuak la..Nidangah ka fanu hnaih lo tum tawh suh ang che..' ka ti leh hmak,ka dingchhuak nghal zat bawk.

'Saw lamah sawn Kawngkhar a awm' tih pahin Kawngkhar lamah ka thle bak,mahse chet tum awmpawn a awm chuang lo.Ka sawi hre lo ang hmakin a thut ngaiin a thu a,ngaihtuah muk hmel zetin hmalam a en ngur bawk.

'Darian..khawngaihin..Ida-i awm laia inhauh buai ka duh lo ania' ka ti leh a,tlemin ka aw a nem ta deuh.

Muangchangin a rawn tho a,kut kuangkuahin ka ding fel than thung,a kekawr ipte a zena,a rawn kal pheia,ka tawlh hrat,engvanga tawl hnung kher nge ka nih ka hre nek lo.Min kalpel mai dawn emaw ka tih laiin ka hma zawnah tak a ding chuta,ka inrin hmain ka ban bulah a rawn vuana,min pawt hnai a,a pian nalh zet nghengin min kuah ber zui nghal hmiah bawk.

'Enge i tih a?” ka ti that,talchhuah tumin ka che nghal phat bawk,mahse ka kawngah a rawn kuaha,min pawt bet leh hmiah,a awmah ka nem leh nghek.Mahse, awlsam zetin ka kut a rawn man beta,ka hnung lamah a herh let leh hmiah bawk.

'Ka kut i ti na ania' ka ti leh that,a rum nghuta,tlemin a thlah dul bawk,mahse talchhuah ngaihna a la awm chuang lo.

'I na chauh i hmu theia,ka mitah hian en la,ka na hi hmuh tum rawh..' a aw a ring lo,mahse ka hrechiang tawk viau.

'Min thlah rawh,i kut tenawm lutuk khan min khawih miah suh' ka ti leh that,ka tal leh phata, ka beisei loh zetin min thlah ve ta mai bawk,ka kalsawn a, in Control tumin boruak ka hip vang vang bawk.

'Ka sawi nawn leh ang,min khawih i tum leh anih chuan...' ka sawi laklawh laiin a ban a vai zauh.

'A hma ang bawk khan phuba lak nan engemaw i ti leh anga tiraw?” thil tenawm lutuk chanchin sawi ang maiin a ner nawk bawk.

'I sawi awmzia ka hre lo,hriat pawh ka tum lo..Mahse, min khawih emaw ka fanu pawh hnaih lo tum tawh suh'

'Sorry,a pahnih chuan ka ti leh ve ve dawn tih ka chiang...' a hmel thutak zetah chuan nuihzatna alang tel bawk,enge nuih tur awm tehhrep ni??

'I thu le,chuan,i Emily khan ka fanu chungchangah inrawlh lo tum tawh suh se.Lo hrilh rawh' ka ti leh salh,a mit a tizim sun.

'Chu kher chu ka pawm e,Ka fanu chungchangah tupawn tawngkam dik lo an hmang anih phawt chuan Dam nuam an ti hauh lo ang'

'Chhuak tawh rawh,Ida-i lo let hmain' ka aw a dam thlap.

'Tehreng mai,mahse, ka fanu hmu turin ka lo let leh ang,min dan tum suh ang che...' chhan pawh ka chhang buai peih lo,Kawngkhar lamah ka ban ka phar mawl tawp.

Ka thu thla hnawk,ka chau hluah hluah bawk.Ka mit ka chhinga, Darian-a nen kan inbkiakna zawng zawng ka ngaihtuah leta,ka rilru a buai vel vek.Ida-i thukruah min puh fel hmiah,kan inzawmna chhuchat tu chu kei ka ni lo,amah zawk.Mahse, tunah ka thiamlohah a pu leh ta hlauh.Enge a sawi kha? 'Phuba lak nan engemaw' tiah min puh bawk anih kha..Enge ka tih? Engmah ka tih ka hre hek lo,bakah tu lakah nge Phuba ka lak ang? ka hrethiam teh nuaih lo.

Chhuani hnenah Ida-i pa anih thu ka hrilha,mahse a lo hre lawk daih tawh.' Tun thla tir atang khan a lo kal ziah alawm,mahse ngeiawm deuhin a khawsa ngai lo a,a tir chuan Ida-i hian a nel vak loa,mahse, amak lutuk,kar hnihna vel atang khan a ngaina tan a,a hmuh mai loh chuan a zawng a,ka rilruin a pa anih vangin a ngaina aniang ka lo ti a' a ti ta duah.Ka hamhaih letling zawk mah.

'Nidangah chuan midang hetianga rawn hnaih tum an awm in min hrilh hmasa la ka duh ania' ka ti ta zawk.

'Um,ih..diktak chuan a tirah khan hrilh che ka tuma,mahse, Ida-i tan Pa a ni a,a dik lohna pawh a awm lo ka ti leha...' nuam ti chiah lo niawm takin a che sek.

'A pawi lo,nidangah ania ka tih..' ka ti dam thlap,hau hrep pawh ni ila engmah awmzia a awm tawh lo.A ngaihven lo a, a reh san emaw ka tih laiin School lamah a lo va kal a,tunah chuan a lo ngaina hman vek tawh.Mahse, Ida-i erawh chuan Pa tih lam hawiin vawikhatmah a la sawi lo.Thian angin a en nimaiin ka hria.

Office a ka awm laiin Dama'n min rawn calla,naute an nei tih min rawn hrilha,mipa ala ni zui,a awah a hlimzia haider theih a ni lo.Nidang aiin Office ka chhuahsan hmaa,Dama nupui eitur thil ka lei nual bawk.Cabina awm anni a, Dama nu leh a nupui nu an lo awma,zanah erawh Dama leh a nu an riak dawn thung.

Stepah ka chhuk thlaa,an awmna Floor hnuai ka thleng thla chiah tihin Darian-a leh Emily an rawn lang ve chiah,ka ding chat, a hnungah T-a rawn kal ve ka hmu leha,ka hawi kuala,mahse pen bo na mai tur a awm der lo.

'Hey,Zampui,enge i tih a?” T-an min hmuh veleh a rawn ti nghal vat,Darian-a erawh tawng tum awmin a awm lo.Emily-in a banah intineitu zetin a vuan tih ka hmu ru kar bawk.

'Ka kal lawk,enge in tih dawn a?” pangngai thei ang berin ka ti a.

'Kan thiante naute nei an awm a,Eee.Seni kha i hria em?” a ti leha,ka bu nghat,hmui hnawih sen thei zet leh mi tihnat nuam ti em em kha engtin nge ka theihnghilh theih tehlul ang ni?

'Anih chu...anih phawt u..' tihpahin ka ban ka vai zauha,Darian-a leh Emily ka nuih lui sak bawk.

Scooty dahna lam ka pana,a chhan ka hriat si lohin ka thinrim ru teuh bawk.Chabi ka dahna ka hre mai lo,ka bag Scooty chungah ka daha,ka hai leh rih.Ka hmu chuang lo,Dama te Roomah khan ka theihnghilh a ni ngei ang.Let leh ka huphurh hluah hluah,Darian-a te kha hmuh leh chakna pakhatmah ka nei lo.

Dama ka call ta ngawt,ka rin ang ngeiin ka lo theihnghilh chu niin,mahse amah zawkin min rawn pek pawi a ti lo hlauh,ka thaw huai mai.

'Enteh,i hmu em ka hre lo a...?” a thaw ham ham mai.

'Tu?” a sawi tum ka hria.

'Darian-a...Emily pawh...'

'Aw,hmu chiang...'

'Lalpa le(h)! that chu i tha tiraw?” ka kut a rawn vuana.

'Lutuk,ngatinge ka that loh ang?” ka nuih lui var var bawk.

Chabi min pe a, Dama a kalsawna,helmet lakchhuah tumin seat hnuai ka hawnga,ka din mar leh rualin ka bula Darian-a lo ding ka hmu nghal chiah,ka phu zawk bawk.Hriatthiam har zetin min en runa,a thinrim emaw a Mood a fuh fahran lo a ang viau.

'A hmuhnawm hle mai...' a ti supa,a sawi awmzia hre loin ka thle bak ringawt.

'I sawi tum ka man chiah lo..' ka nui lui sak bawk.

'Nupui Damdawiin khuma a mut laiin a Pasalin a bialnu Romantic lutukin a lo thlah thunga...' ten hmel zetin a ner nawk mai.A sawi awmzia ka hriat takah chuan ka sa phat,mahse ka rilru ka thlak lehnghal hmiah.

'Um...Mahse, a Nupui berin a hmuh loh phawt te chuan a pawi hleinem tiraw?” chimawm zetin ka mit ka siai zauh bawk.A duh duhin lo ngai mai mai tehse,ka ngaihpawimawh turin ka engmah a ni lo.