MON HOMME -18

Chapter- 18

'Min lo hrethiam lawk...' ka ti hmaka, a mithmul a ti sang uka, a hmui a pet sawi zauh bawk,rang zetin room lam ka pana,ka hmuh hmasak ber Towel hlai hlep hlawp ka sin nghal sawk sawk..

Chhuak mai loin duhthawh zetin boruak ka hip vang vang phawt,engvangin nge ka zam em em ka hre lo,a hmelpa leh sexy zetah khan eng nge angaihtuah ka hre lo,mahse ka kekawr hak tawngchham lutuk leh ka bra hak loh vanga ka t-shirt rawn do pawngtu,ka hnute ngai leh ngai deuhthaw a lang kha a hmu vek..

Sofaah a lo thu leh hman tawh,hahdam hmet zetin hnunglam a nghenga, a bawp sei set a thluang duai bawk.Amah ep zawng a thutthleng awmah ka thu thlaa,engmah sawi loin ka chevel min en ngur ringawt.

'Le...sawi la...' a ti ta nghut..

'Ih,eng lo..vawiinah Mka nen kan inhmu a, palai kal tir chungchang...' ka tawp leh rih.

'Um,chuan...engtin zel?”

'Tun dinhmunah chuan kal rih lo mai se ka duh zawk,ih...ka lo ngaihtuah tawha,kan tawp mai a tha zawk in ka hria...' ka ti ta nge nge..

'I duhdan a ni takzet em?” a ti thawp sut,muangchangin ka ena,ka beisei loh zetin hahdam hmel takin a la awm cheu tho mai.

'Aw,ka duhdan..khatiang thil thlen hnu kha chuan tawp mai a tha ka ti zawk...' ka ti leh a, ka awah inrintawkna a lang thei ta bawk..

A thle buka, enge a ngaihtuah a hmelpa leh tak ngul maiah chuan a hriattheih der loh,min hnial kalh a tum nge a pawm mai ang? Eng zawk nge ka duh pawh ka hre chuang lo..

Ka beisei loh zetin a tho chhuaka,min rawn pana,eng nge tih a tum ka man hlawl lo.Thil thleng tur nghakin ka thu ngil auh ringawt.Ka hma zawnah tak a rawn dinga, min en chhuk run bawk.

Ka hmaah a rawn thingthi a,ka kut pahnih a vuana,ka khupah a hmai a phum vang vang bawk..Ka beisei loh lutuk a thlen takah chuan ka ip chawih a, ka thaw a chham titih..

'Eng nge i tih a?” ka ti chhuak thei hram..Min rawn en a,a vawikhat nan nidanga a hmelpa leh luhlul tih hriat ngawih ngawih thin kha awm loin a lang dam thlup mai..

'Min nei rawh,i natna tur engmah ka thlen sak ngai lo ang che...' sawi harsa a tih hmel takzet..

'Darian...ka ngaihtuah...' ka ti hman chauh..

'Ka hria..ka chetdan a mawi lo,i natna tur ka siamsak bawk che,mahse, min neih chuan i natna zawng zawng kha i theihnghilh vek theih nan ka bei ang...Min nei rawh..' a aw a ring lo,mahse ka bengah hei aia chiang a awm chuang lo..Thil tisual,inchhir ka lo hmu ve tawh thina,mahse chung zawng zawng ai chuan tuna Darian-a hmelah hian inchhirna a langchhuak chiang zawk..

'Min tiam rawh...a chhan ka hriat si lohin thinrim tawh lo la,bakah...ih...' ka sawi maithei lo..

'Sawi rawh..ka tih theih chu ka ti vek ang...'

'Hmeichhe dang tumah kan inkarah an awm ka duh lo,Emily tiamin...' ka huaisenna zawng zawng sawmkhawmin a mitah tak ka en lui ngar bawk.

'Emily...ka tiam che, mahse ka sawi tawh kha,Emily hi Sumdawnnah ka partner a ni a,hna vangin ka hmuh fo angai dawn ka tih kha...'

'Um,mahse...thildang a awm palh thei,a accident vang in keiin ka lo tuar ve zela...' a nui hawk mai..Mak ti zetin ka ena, eng nge nuih chhan tur ka hre eih lo.

'Eng nge nuihtur awm a?” ka ti hmak..

'Emily accident vanga be duh lo cheah min ngai tak tak em?” nuihza insum thei lo a ang phian bawk..

'Ngai mai pawh ni loin ka hria... ' ka tum loh zetin ka awah titau aw a lang thei..

'Min en the...' a ti supa, a hmui a pet sawi zauh bawk..

Thuawih zetin ka en ve mai,ka biang tawn tawnah a rawn vuana,ka mitah tak a en bawk,ka ngaihtuahna zawng zawng a hmu tlang thei vek nimaiin ka hria,ka chhungrila induhtawkna hlawm,tuiral tan mek pawh hi a tuiral dan nen lam a hmu vek thei hialin ka hre bawk..

'Ka thinrim chhan i hre lo tak tak em?” a ti supa, a hmel a thutak leh run tawh..

'Hria,Emily vang....'

'Shh...' ka biang a kutzungpuiin a tuai hauh hauh bawk..

'Kan meeting zawh hnuah ka rawn call chea,i phone midangin an lo pick a..I best Dama khan...' ten hmel zetin a ner nawk bawk..Angaihna hre loin ka en hau mai..Engtiklaiin nge phone a lo pick ka hre lo,bakah engmah a sawi lo hrim hrim..

'Chutiang ka hre lo,i lo call na pawh ka hmu lo..'

'Ahh,call chiang khawp mai,a tuk zingah ka rawn kala,amah nen bawk in inphurchhuak leha,a riak anih ka ring...' a sawi tawp lam a zawi lutuk,bakah thinrimna leh na tuar nimai awm takin a lang bawk..

'Darian...kan riak dun lo..bakah ani te chu ka thian a ni a..' ka awih thei lo zawk..Engtin nge tiang tura min rin theih zawk ni?

'Ka hria alawm,mahse ka thinrimna khan khua min hmuhtir thei lo,khami ni khan ka hmu dun leh che u a,ka insum thei thlawt lo...' ka kuah ta ngawt,ka kawngah a rawn kuaha,a samah ka fawp vang vang mai,kan at dun zia ka ngaihtuaha,kan lo intihrehawm dun nasa lutuk..

'Ola...a tawp nan ka ngen leh ang che,min nei rawh..Ka nupui i nih hma chuan ka rilru a nuam thei lo ang..' a biang tawn tawnah ka vuana,ka kunhniama,a hmui chhah tap leh nalh zetah ka zuk si de de a,a rum hawk mai...

Engkim mai a kal tluang ta purh,thawklehkhatah hremhmun a awm kha Varamah ka cheng ta thut nimaiin ka hria,Inneih inbuatsaihna a kal tluanga,naktuk mai kan inneih ni a ni der tawh,Dan thianghlim kan tlin lo tih kan sawia,inru bawk si lo,rai bawk si loah chuan zahthlak ve tak a ni,mahse rilru lama nuam tih loh ai chuan dik taka tih mai kha zah thlak mahse a pawi kan ti lo ve ve.

'Zampui...' ka hawi vat,Emily a lo ni a, ka thaw hak mai..Min rawn pan hnaia,nidang ang bawkin a pian nalh zet tilang thei tur thawmhnaw a inbela,a make-up lah sawisel tur a awm lo..A lang cool leh raih tawh bawk..

Ka incheina uluk zetin a thlek te te, ka te chem chemin ka hria,a incheina zahawm thlarh leh kei pyjama leh T-shirt satliah ha hi tu tan mah khaikhin chi kan ni lo,thil ka la pawm bawr luk bawk..Ka lan dan nalh loh tur zia ka ngaihtuah a,ka thin a rim ru teuh bawk..

'I tha maw?” amah bawkin a ti leh a..

'Um,tha lawm,nang zawk?” Polite chhuahin ka nui lui hram..

'Ka zia lutuk..'

'Ka hmanhmawh deuha,ka kalsan mai ang che aw...' tih pahin ka then lui leh saka,ka inhera, mahse ka pen tan chiah,ka tawp leh chawt mai..

'Eng maw i sawi?” ka ti ro halh bawk..

'Lawmthu ka hrilh duh che...' a ti dam thlap..

'Engvangin maw? Ka hrethiam chiah lo...' ka thle bak..

'Darian-an inneih a duhna i lo pawmpui vangin mawle..'

'Oh...' ka ti halh ringawt..

'Thil pakhat chiah ka hrilh ang che,Darian-a hian engvangin nge neih a duh che i hria em? A hmangaih che tih a sawi lo ang tih ka chiang,a chhanchu maw,hmangaih vang che ni loin thil engemaw thup nan a nei che a,a chhan i hriat hunah chuan pawi i la ti vawng vawng ang' rapthlak ti lutukin ka melh reng ringawt..

'Hawisawn tawh lo teh...' Atei'n a ti hlar mai.

Ka inneih kawr ha tur min tihpuia,ka inneihna tur nimahse engmah ka thlang lo,nalh an tih apiang kha nalh ka ti ve zel nimaiin ka hria,a tawpah Atei leh a Cousin,Mizo Designer ka neih that ber te zinga mi in min thlan sak thei ta chauh.

'Le,in en teh...' a ti leh halha,ka inhera,ka hmaa darthlalang lian,taksa pum lan theihna chu ka en a, ka thaw hak mai..Ka hma darthlalanga lo lang chu keimah kha ka ni ta lo emaw tihmai a awl,ka kawr hak vangin ka hnute a lang lian zuala,a thui nalh leh zahawm em em mai bakah ka make-up,leh sam thlengin a tawk vel vek..

'Wow...' ka ti sep ringawt.

'Darling,i nalh over ania,vawiin chu i nuin a chhuang ngawt ang che...' a ti a,min rawn kuaha,ka mittui tla tur duh loin ka khap kir sak sak mai,vawiin hi ka tana ni pawimawh ber a ni a, tul ka ti miah lo nain ka pu leh Darian-a pain ka pa engkimah an ti tel ve vek,Hazel-i pasal neihnaah khan sawmna card zawng ka dawnga, kal ka tum lo teh nangin Darian-a ngaihdan a ni lo a, min kalpui a,mahse ka inchhir hauh lo.Ka nau hian thil tamtak a hresual ngeia, mahse ka tan chuan nu pakhat hrin leh ka neihchhun a ni tlat,engtik niah emaw chuan kan naupan deuh lai ang khan kan la hlim leh mahna le..

Inneih thutiam kan chham lai te,engkim mai ka mumang a ni lo tih ka inhrilh nawn mawlh mawlh angai hial,ka kut chelh rengtu,kei ang bawka inneihnain a phuar tawh a ni tih lanna tura a kutzungtanga zungbun,ka bun ang chiah buntu mipa hi ka Pasal a ni tih rin harsa ka la ti cheu..

Kawtzawl,pangpar dahna bula thutthleng inthen theiah keimahin ka thu a,vawiin chhun lam atan kawtzawl an chei vek,ka thutna pawh Vase lian leh nalh zeta Pangpar an khawiin a hliah titih,Darian-a leh T-a an kalchhuak lawka,ka rin aiin an lo let har ta phian,ka hawi kuala,hmuntin mai a hnawk vel nuaih a ni ber,inneihna a rawn kal tam zawk an haw tawha,Best atana ka hman,Duati nen lam Party na a kal turin an chhuak vek tawh,Kan inneih zan hun hmanna tur atan duh ka neih leh neih loh a hmain Darian-an min zawt tawha,hmundang thlan ka nei lo..A room ni thin,kan nupa room ni tawh tur tluka tha ka hre lo..

'An lo la let na nge?” Dama'n rawn thut thlak ve pahin a ti a..

'Um,let lo..i be duh mi?” ka ti a.A thle bak.

'Kal ka duh tawh zawk mawle' a ti a.

'Aaa,ala hma em mai,nge Party na lamah in kal leh dawn?” ka ti a,a lu a thing mai.

Kan inneih dawn hnaiah phei kha chuan Dama hian ka hna min kep nasa em em a, a hma kha chuan ka thawhpui satliah mai kha a ni thina, tunah chuan a ni tawh lo,thian tiin ka sawi ngam tawh..

'Kal pawh ka tum vak lo...enteh..' ka kut a rawn vuana.

'Eng nge?”

'Rin harsa ka la ti cheu mai...'a sawi awmzia ka man lo..

'Eng ber maw i rin loh?” ka nui a..

'Pasal tha tak neiin nun bul i tan ang tih hi mawle..'

'Naaa, min lawmpui lo tihna mi?” ka ti nghat..

'Lawmpui tur che chu ka nia lawm,mahse...ka lawmpui tak tak lo chein ka hria...' za lo zetin a then sak bawk..

'I sual lutuk a,nitin kan la inhmu dawn thoa,harsatna engkim kan la intawm vek dawn alawm..Nang leh Seni tluka ka tana tha an awm lo ania..' ka ti a..Hriatthiam har zetin min en a,nidangah tiang hian vawikhatmah a la awm ngai lo..

'Um,ka hria lawm,nangpawh ka thawhpui tawhah chuan i tha lawrlak,engpawhnise ka kal phawt ang..hna i rawn zawm hunah kan inhmu dawn nia,chuan..eng hunah pawh harsatna i tawk palh anih chuan ka awm reng ania..' ka inrin hmain ka chalah a rawn fawpa,a tho zui daih bawk..

Gate lam pana a kal phei chu ka ena,ka hriat thin Dama kha a ni tlat lo,engvangin nge khatiang khan a awm ka hre hek lo.Hna bansan nghal tur ka ni lo a,Darian-an ka peih chen chen thawh zawm min phalsak bawka,chung zawng zawng pawh chu a hre vek,mahse, a landanah kha chuan ka pasal nei min lawmpui aiin lusun a ang zawk daih..

Lut mai loin ka hmaa In lian leh nalh zet ding chu ka en leh rih,tunah chuan ka In a ni ve dawn ta chu ania,hei pawh awih har ka la ti ta fo mai.Living roomah Darian-a nu leh Pa bakah Darian-a chhungte,kum upa lam an lo awm nial,min tih tlangnel tum takin min lo be luam hlawm..

Room lam ka pan chhoa,ka thawmhnaw mamawh zual tak tak chauh min phawrhsak kha ania, ka thamwhnaw dahna bag ho an let rum mai,room chhung a zau hlauh zawk.Darian-a pa in ka pu hnenah mizo thuamchhawm pangngai bak engmah bungrua chhawm luh a phal lo tih a sawi sa vek,ka duh lo hle nangin ka tilui thei lo..Keima thawmhnaw bak engmah ka keng lut ta lo reng bawk..Ka inluah kum khat atan a man ka peklawk vek avangin ka bungrua an la awm vek a,ngaihtuah angai rih lo,mahni a awmhrang rei tawh ka ni a, chhungkaw pangngaiin an neih ang tlangpui chu ka nei kim vek hmana,ka pasal neihna inchhunga ken luh chi a ni lo hrim hrim bawk.

Tih hmasak ber tur hre loin ka hmaa bag let rum mai chu ka en vang vang mai,Darian-a te lah an lo la let mai bawk si lo..Inbual ila athat ka ring ta zawk,khawi berah nge ka underwear ho an awm pawh ka hre tawh lo..Ka hawng kual ta dan dan..

Room kawngkhar ri rak thawmah rang zetin ka hawi leta,Darian-a a lo lut ve chiah,a rimin ka hnar a verh zak mai..Chau hmel zetin Sofaah a thu thla hnawk..A kamiz chunglam kilhna a phelha,a necktie pawh a awrh tawh lo,a a kamiz ban a thlep chho bawk..

'Ka rin aiin in rei a...' ka ti satliah..

'Um,nia..rei..' a awah ka hriatthiam chiah si loh engemaw dik lo a awm tlat..

'I tha em?” ka thil tihlai ka tawp a..

'Tha,ngatinge ka that loh ang?” a nui hawk,nuihzat vanga nui ni loin tihelna lam a ang mah mah zawk.

'Ka..ka..eng lo,ka hrethiam chiah lo,i thinrim a ang ka tia..' ka ti bah nak mai,engvanga zam leh viau ngawt nge ka nih ka hre lo..

'Rim lo,thinrimna tur i ti zawk nge?' a ti leh hmuk,eng chu a hria ni maw? Engvanga ngeiawm em em nge anih ka hrethiam eih lo..

'Ka'n inbual lawk ang,i intifai ve nghal duh em?” thildang sawi mai a finthlak zawk..

'I zawh hunah,anih loh pawn room dang ami ka hmang mai ang...' a ti supa,thutthleng hnung lamah a lu a nghata, inchungah hmuhnawm a awm ta emaw tih mai turin a melh ngur bawk.

Vawiin khan Emily a lo kal ve a,ka va en apiangin hmuhsitna niawm tak a hmelah ka hmu ziah,a thusawi kha angai ang angin ka bengah a ri nawn ziah bawk,vawi tamtak Darian-a hnenah ka zawt ang ka ti thina,mahse hun remchang a awm lo,bakah Darian-a lakah rinhlelh tur eih ka hmu hek lo.

Ka chhuah leh chuan Darian-a a lo awm tawh lo,a thawmhnaw a thlak leh thlak loh ka ena,Balbawmah a lo dah vek,a intifai anih ka ring a,zawn kher a tulna ka hre lem lo,bakah a lo let leh hmain lo muhil hman ila a tha fe zawk ang.

Ka tum ang ngeiin a lo let leh lai ka hre miah lo,a hma khan ka chauh zia ka lo hre lo mai mai aniang,lukham ka sik rualin ka muhil nghal mai anih hmel..Peih lo zetin ka mengchhuaka,nidang ang bawkin thawm engmah awm loin a reh thiap,ka awmna ka hai thelh bawk..Che loin nizan lam ka ngaihtuaha,engmah a thleng lo...Pasal ka neia,mahse kan inneih zanah engmah a thleng miah lo.Darian...a rawn mu miah lo tihna a ni mai em?

Ka inlet vat,mahse, a awm lo,ka inbengkanga,a lukham ka en a, delhna hnu khuar engmah a awm lo,muangchangin ka mut ngaiin ka mu leha,ka phone sana ka ena, dar 7...Rang lutukin ka thuchhuak lehnghal..

Ka inphihfai sawk sawk,mahse, keimaha inhnuai lama chhuk ka chak lo,khawiah nge Darian-a hrep pawh hi a awm ang ni?Kawngkhar a ri raka,Darian-a a rawn lang nghal zat,ka thaw huai mai..Kekawrbul,a khup thleng lo hret a haa,T-shirt dum a ha bawk..A chawn,hmulin a khuh dap chu ka en a,ka chil ka lem ringawt,hetiang hian ka hmu fo tawh dawn..Mahse, ngatinge nizanah engmah a thlen si loh?

'Good morning..thlahrang hmu i va ang ve' a ti supa, min rawn pan hnai nghal bawk..

'Morning,ngatinge min kaihthawh loh?” ka ti ve thung..Min rawn din hnaiha,a perfume rim pa zetin ka hnar a rawn verha,amah nen a inhmeh hluah hluah..

'I chau hmel lutuk a...' ka biang tawn tawnah a rawn vuana,a kawngah ka kuah ve thung, rawn kun hniama,ka chalah a hmui lum ham hamin a rawn si a,ka mit ka chhing daih..

'Darian...'

'Um...'

'Nizanah...ih,ka sawi tum tak chu..i lo mu lo tihna mi?” ka tawng bah nak mai..

'Mu lo...' ka thaw hak bawk.

'Ngatinge? Tih dik loh ka nei em?” ka ti sep,amah en thei turin min kuai daka..A hmelpa zetah chuan ka hriatthiam chiah loh engemaw alang zawka, mahse a bo lehnghal vat..

'Nei lo,i chau lutuka,ka mut leh mut loh a danglam chuang dawn lo a...' a then suk..Chhan mai dan tur ka hre lo..

Kawngkhar kik thawmah ka kuahna ka lasawn vat,a nui hawk a,min thlah ve mai bawk,Duati a rawn daka,a hnungah T-an a rawn zui bawk..

'Mo thar mut duh ka rawn kaitho dawn a...' a rawn ti nghal lawng lawng..Za lo zetin ka then sak ringawt..

Kan vaiin inhnuai lamah kan inzui thlaa,nizana pawnlam hnawk nuaih kha an lo tifel zo duak tawh,Duati nen room lamah kan inzui chho leha,ka thawmhnaw dahna bag awm rum mai kan tifel a,ka thawmhnaw dahna turin an lo siam belh veka,engkim mai ka awm thinna ang maiin a dik thlup mai.

'Enteh,nizan lam eng nge a an?” min rawn nghawka,ka melh vak ringawt..

'Sawi mai teha,groupah phei chuan an kap nasa che ania..' a ti leh talh.

'I va han ninawm tak,eng nge ni vak anga? Nupa te chuan kan tihtur kan ti ang chu..' ka nui a, engmah a thleng miah lo tih hria se engtin tak ngai ang maw?

'Ka hria..ka hria,mahse dan phalna thlap ania,chunglam leh hnuailam dan ka tihna nih chu...' a nui hak hak.

'Vawiin chu midang hi an lo kal hman turah ka ngaia' thildang sawi tumin ka ti a.

'Kal hman ang,an phur khawp kha..ee,nizan Dama a che nawi lutuk a..' a tih zawm leh.

'Engtia chet nawiin?” ka ti a, ka kawr thlehsa min rawn pek ka rem pah bawk.

'A rui nawi mawle,khatiang khan ka la hmu ngai lo reng reng'

'A va mak awm ve,zu a in thin tih chu ka hriaa,mahse a in control thei ang chu ka lo tia' ka ti liam puat.

'An insual alawm,mahse an insual nasat hmain an thelha'

'Eh,a va mak ve...' ka thil tihlai ka tawp leh rih.

'Chu chu lawm,mahse mipa te hi chu an insual fo alawm,thil danglam vak a ni lo,ka lo ngaihtuah zawk chu...' sawi zawm loin a ngawi leh daih.

'Engmaw i ngaihtuah?”

'Sawi tul lo deuh niin ka hre leh a..'

'Awi,ka ning che,sawi mai teh..min ti hrechak vek..' ka ti hlak..

'A hmain Dama nen hian tlema thian aia thuk in kal mial lo maw?” ka nui hak, a a ta emaw tiin ka en a,Mahse, a hmel thutak zet ka hmuh takah chuan ka nuizatna a tawp ve nghal hmiah.

'Chutiang awm se i hriat loh i ring ami?” ka ti ta zawk.

'Um,dik ve tho mai.Mahse, amak e lawm..' a ti leh talh..

'Mak lo e, a bialnu nen an inthen khan a la na viau,hmeichhe dang phei chu a melh leh awm pawh ka hre rih lo a..' ka ti leh a..Ngaihtuah muk hmel fein a hmui a pet a,nizanah a sawi bak thil thleng a awm em ka hre lo,bakah Dama khan Party naa kal a tum lo tih a sawi a,a kal leh tho.Chuan,nidanga ka la hmuh ngai loh ang in nizan khan a khawsa bawk..

'Khawi min lo pe rawh,kan tifel zo har lutuk ang..' ka ti a, harh zawk niawm takin min rawn pe a,a hmel a thutak ran mai.

'Ka la hrethiam miah lo..Dama hi Darian-an a thik ngai hrim hrim em?” teh fo chuan a..

'Khawngaihin...Dama tunah sawi hun niin i hria em? Bakah thian aia thuk kan kal emaw kal lo emaw tunah chuan Pasal nei ka nih tawh hi...' ka nui hak..Mahse, a nui ve der lo..

'I kalchuah duh chuan i hna a lo khawih veka,eng hunah pawh i koh chuan a lo kal ziah bawka..'

Chhang loin ka bag pakhat lak tumin ka inhera,kawngkhar biang nghenga Darian-a lo ding reng ka hmu ta chauh,ka phu zawk..Kan thusawi awm ze nei miah lo kha a hria em ka hre lo,a hmel tak ngul mai chu ka ena,a mood a fuh fahran lo anih hmel viau..

'In zo dawn tawh em?” a ti hmuka, a rawn kal phei a..Ka lu ka thing ringawt..

'Chaw kan ei hma loh chuan chhuah kan ngai dawn a,midang an lo thleng dawn hnai tawh em?” amah bawkin a ti leha.

'Ka la be lo a,ka lo bia ang..' pangngai thei ang berin ka ti a,mak takin nizan atang khan chhan ka hriat si lohin kan inpawh hlawl lo..Kan inneih hmaa kan inpawhna boruak kha a bo vek,amah a inlahranga, pawh theih lohin a indang ping tlat niin ka hre ber.

Kan nileng ta thak,thlalak lah a duh uluk na ngiang mai bawk nen ka chau hluah hluah..Midang an haw fel veleh room ka pan nghala,ka thlan vangin ka ban chuapa, ka awm a nuam hlawl lo..Kan inneih kawr suk turin ka chiah nghala,ka dim bawka engmah reh thei lo tur tihkai ka neih pawh ka hre lo.

Darian-a a inbual hmasaa,a inbual zawh veleh ka lut ve thung,Bathtub zau tha zetah ka inchiah a, ka mit ka chhing vang vang,vawiin khan nilengin Darian-a mood a dik lo tluan ta thak,midang an awm avangin a insum mai mai zawk niin ka hria..Enge a chhan tur ni ang ka hrethiam lo..Inneih hnu a kan awmdan tur ka lo beisei dan nen a inmil hlawl si lo..

'Ola....' kawngkhar rawn kik pahin a rawn ti a,ka hawi phawk hra mai,rang lutukin kawngkhar ka kalh leh kalh loh ka en a,ka kalh tih ka hmuh rualin ka thaw huai bawk..

'Aw,ka zo tep..'

'A pawi lo,hmanhmawh suh,thil hmanhmawhthlak a awm a,ka chhuak dawn ania...' a rawn ti leh a..

'Um,i rei angem?”

'Ka hre lo,ka lo call ang che..'

Tun ang hunah enge pawimawh awm ang? Nia, a awm fo ang,Doctor a ni a,atan chuan hunbi hian awmzia a nei tehchiam lo maithei..

Mu chungin tv ka en a,ka chauh tehreng nen ka mut a chhuak leh ta miah lo thung,Sana ka en a,dar 11 a hnai tawh,Darian-a a lo la let lo a, min rawn call bawk lo..Ka call ang nge call lo ang tih ka ngaihtuaha,call pawh ni ila eng nge dik lo awm ang? Ka pasal a ni a, a chin hriat hi ka tihtur diktak a ni zawk..

'Hello...' hmeichhe awin a rawn ti a, tu nge anih ka hria..Ka khur nghal dar dar mai.

'Darian-a ka lo be lawk ang..' pangngai takin ka ti thei hram..

'Toiletah a kal lawk a...' hna pawimawh chu hei hi maw lo ni a? Kan inneih atangin zan hnihna chauh a la ni a,nizanah engmah a thleng lo a,zaninah pawh a thleng lo ang..

'Thil engemaw thup nan a nei che ka tih kha i la hrereng em?” amah bawkin zawi sapin a rawn ti a,ngeiawm zetin a nui lui hak bawk...

Ka ngaithla ngam tawh lo..Ka off hmak,min rawn call back ang tih hlauin ka switch off ta law law...