MON HOMME- 31

Chapter- 31

'He Agency hian Eizawnna hmuhsak thei ti a intiamin phai lamah leh Foreingah Mizo thalai te an tir chhuak thina,mahse an insawi ang ni loin an zawmpuite hian an tir chhuah te hi Spaah te an lo thawh luih tira,Inzawrhluihtir anni bawka,an Agencyah hian kalin an chhungte pawn an zawtfiaha,mahse an tir chhuah tawh teah engmah mawhphurhna an neih loh thuin an lo chhang beidawng zel thung.Hei thu hi an Agency kal tlanga an tirchhuah ngei hnen atanga hriat a ni a, a dik a rinawm hle.He Agency neitu hi Zampuii ti a koh niin kum 5 vel kal ta khan a Pasal,Dcotor hmingtha leh lar tak tihchhiat tumin chanchin mawihnai lo tak a lo nei laih tawh bawk'

Ka rap lutuk ringawt..Ka khup a sai hlawk hlawka,ka tluk mai hlauin muangchangin ka thu thlaa,engtin nge mi hian tiang khawpa Dawt an sawi theih ka hrethiam lo.

'Engtin nge kan tih ang?” Mapuii'n hlauthawng zetin a ti tham chal mai.

'Ka hre lo..Khawiah nge Ruatfela?” ka theihtawpa awki pangngaiin ka ti a.

'A chhuaka,a lo la let lo..Tu tih nge ni ang?” a ti leh a,ka lu ka thing nawk ringawt.

'A post tu kha fake a ni em? Han check lawk la,bakah phili lutuk lo ang,hahdam tum hram hram la' ka ti a,mahse keimah zawk pawh hahdam chu sawi loh,ka rilru a buai vel vek.

A phone a en a,a thai kual zung zung bawk,engtin nge hetiang thu lawi lo hi an vawrhdarh ngawt zel ka hrethiam lo,an duh anih phawt chuan lo kalin min rawn zawt fiah thei renga, chutiang engmah an ti chuang si lo.Thil hriat apiang,a dik leh dik lo pawh thlu loin an post chawt chawt a,Mipui lah hian enge thleng pawh hrechiang mang si loin kan han beihrawn nghala.Engvang tehlulin nge kei hian ka Mizopuite ka hralh ngawt ang le? Hlawh tha lua ni lo mahse midang tanpui ni a ka lo in ngaih laia tiang zawnga thu rawn awm ta hian min thawng satliah pawh a ni lo.

'Fake Ac anih hi,awi..Comment lah chu awihawm loh khawpin a tam hmana,hman hlawm lutuk mai' a ti hlak hlak.

'Anih chu,an thil ziah kha copy la,min lo thawn la..Hriatchhuah ka lo tum ang' ka ti a, a bu nghat,min rawn thawna,Office atangin a chhuaka.Ka hmai ka hup vang vang,ka thawpik hluah hluaha,enge tih hmasak ber tur pawh ka hre lo.

Duati call tumin ka phone ka lakanga,mahse ka call hmain Darian-an min rawn call ta zawk.Enge rawn sawi a tum ang ka hre lo.Ka pick ang nge pick lo ang tih ka ngaihtuaha,Ida-i chungchang anih ringin ka pick ta nge nge.

'Hello...' ka mood chhe lutuk tihlan loh tumin ka aw ka control viau.

'Officeah i la awm em?” a hmanhmawh hmel viau bawk.

'Aw,Ida-i ami? A dam lo thut nge?” ka ti nghal zat.

'Aih,ni lo..Ka lo thleng tep,lo kal chhuak suh' a ti nghut.

'Ngatinge?”

'Ka lo thlen hunah le...Ka dah aw' a ti a, a off nghal daih bawk.Eng chu a hria nimaw? Tun ang boruakin min chiah lai hi chuan hmuh ka chak loh ber a ni hial ang.Ida-i lakhran chungchang anih phei chuan a hun lo takzet ang.

Duati ka calla,a pick vat,a post tu min zawnchhuahsak turin ka ti a, mahse ka tih ngai loin an lo zawng mek tawh zawk.Chiai miah lo turin min rawn ti a,mahse amah zawk pawh a chiai tho tih a awah ka hrethei tho.Ka off chiah tihin Ate-in min rawn calla,a chhangchhe bawk nen kan inhmu khat viau,mahse buaina ka tawh meuh chuan thiantha anih zia tilangin min rawn calla,kei ai mahin a thinrim zawk emaw tihtur a ni.Ka pu faten min rawn calla,an In lamah riak phei turin min rawn ti a, mahse ka hnial thung.Min rawn riahpui an tum pawh tul ka ti hek lo.

Social Media hi a huatin ka huaa,midang tihchhiat nan bak an hmang tangkai pawn ka hre hek lo,mahse ka huaa,ka hmang duh lo chung pawn min beihna langsar ber chu Fb tho a ni chat chat zel,ka phone ka phawrha,ka tlanchhiatsan a tulna a awmin ka hre ta lo.Engkim hmu vek ila,hmachhawn tur pawh hmachhawn mai ila a tha zawk.

'A officeah a awm' Mapuii'n a tih ri ka hriaa,ka phone ka dahthla vat.Kawngkhar lam ka hawia,Darian-a a rawn langa,a hmelpa leh ngeng zetah chuan thinrimna a lang thei a,ka thaw hak mai.

'I tha em?” min rawn pan phei pahin a ti a.

'Aw,mahse,Darian..tunah tak hi chuan inhnialna moodah ka awm miah lo ania,i sawi tur eng anga pawimawh pawh ni se' ka ti hmak.

'Ok,hnial che tumna ka nei miah lo,mahse engmah ti suh.Keiman ka ti ang' a ti hmuk,a sawi awmzia ka hre map lo.

'Eng maw i tih ang?” ka ti hlak mai,engmah sawi loin min rawn pan hnai zela,ka inrin hmain ka biang tawng tawnah a rawn vuan a,hamhaih zetin ka ang pham mai.

'Engmah,tu nge hetiang taka tihchhiat tum che hi keiman ka zawng chhuak ang..a tha em?” a ti thawp suta,ka chhan hmain a rawn kun hniama,ka chalah a hmui lum thar tharin a rawn fawp nghal zat bawk.

Ka thu khawng lah mai,hetiang hi ka lo beisei lawk lo nasa lutuk,Ida-i chungchanga min hnial tur emaw an chhungkuain kawl an duh tih lam rawn sawi turah ka lo ngai kha ania,chutiang lam a ni ta hauh lo.Mahse,ani hi ka rinchhan anih chuan ka chhe vek ang,a hma ai pawh khan ka chhe hneh ang tih ka chiang.

'Kalsawn teh..' ka ti hmaka,ka chhungrila amah ka mamawhna awm ti lang lo turin ka awki a chang fal thung.

'Engkim hi kan pahnihin kan hmachhawn ang...Ka kal tir tawh dawn lo che..' a ti leh a,min thlaha,kalsawn loin ka dawhkan tlangah a thu ta zawk.

'Ni lo e,i telve na tur engmah a awm lo.Ka tan engmah i ni lo a, i engmah ka ni bawk lo a..' ka aw a damthlap bawk.A landanah chuan Hmeichhe inringtawk tak ka ang khawp ang le.Mahse, ka chhungril a khura,engtin nge ka hmachhawn ang ka hre hek lo.

'I telna apiang chu ka telna..' nghet churhin a ti leh hmuk.

'Kal tawh rawh,tihtur ka nei' ka tho a,ka bag ka la nghal zat bawk.

'Lawk...' ka banrekah nghet zetin a rawn vuana,ka thaw hak mai.

'Darian,engmah sawi tur a awm lo,diktak chuan nang nena intibuai lo pawh hian buaina ka ngah tawk ania'

'Tihbuai che ka tum lo,puih che ka tum zawk'

'I tumna vangin ka lawm e,mahse i tel lo a nun hman hi ka zir thiam tawh,tunah chuan ka mamawh tawh lo che'

'Takzet...' a ti sup.Ka banrek a vawnna ka thingthlaa.

'Um,hei aia tih takzet hi ka nei ngai lo ang' ka ti dam thlap,a mitah tak ka en ngar bawk.

'Ok,a tha lawm...' a ti supa,a thle buk bawk.A dingmara,a kekawr ipte a zen a,a inpet ruh fun bawk.

'Anih phawt,Eeee..Emily hnenah khan lo hrilh la,tun bak chu engmah a ti thei tawh lo ang..' ka ti leha,ka nui lui hak bawk.Min chhang loin a dar a tiching uka,a hmui a petsawi zauh bawk,hriatthiam har zetin min en vung vunga,ka ngaihtuahna a hmu tlang thei mai ang tih ka lo hlau ve thung.

'Ida-i zanin ka riahpui thei angem? I tan a awlsam zawk takin?” a ti chhuak sup,'Aih' tih ka tum zeta mahse ka awmdan tur engmah ka hre lawk si lo a, riak mai se zankhat lek a ni a, a pawi kher lo thei.

'A tha maithei,mahse aman a duh angem ka hre lo,ka tel loin a la riak hrang ngai lo a' ka ti ta nge nge.

'A duh ang...' mahni inrawngtawk hmel zetin a ti nghut,ka bu ngauh ringawt.A chhuak tur ka thlira,Ida-i ka riahtir kha ka tihsual em ka hre lo,tunah chuan ka ngaihtuah peih hrih lo,A pa a ni a,a tihnat ka ring lo bur.Mahse, Emily...

'Lo ding leh lawk...' ka ti chhuak nghal zat.A ding chuta,a rawn hawi let a.

'Emily a riak ve dawn em?” ka sawi zawh rualin a rum hawk ri ka hren nghal zat.

'Ka sawi tum zawk chu Ida-i bula awm turin ka duh lo..A awm ve dawn chuan riak lo mai rawhse' keimah bawkin ka ti leh a.

'A riah i ring tak tak em?”

'Ka rin leh rin loh a pawimawh hleinem,i nupui nimai tur a ni a,engpawh ti ula dik lo a awm lo,mahse Ida-i bula awm turin ka duh lo..' ka ti leh duah.

'A awm lo ang,a awm ngai hek lo ang...'

A kal hnuah Ruatfela a rawn luta,a thinrim lutuk a puakkeh a ni ber,awmngaihna hre loin a vei kual seka,Sahliam thinrim ka tehkhin ber,ka inthiam lo ru ngawih ngawih thung,keimah vangin ani hian a tuar ve zel ni berin ka hriaa,tun tum thil thlengah pawh hian a titu ka hre lo nain keimah vang bawka ti anni ang tih ka ring nghal hmiah tho.

Duati'n min rawn calla,a post tu an hriat chhuah tawh thu min rawn hrilha,ka thaw deuh huai mai,Ruatfela ka hrilh ve nghala,a duhdan chuan intihhmingchhiat tumna tiin FIR siam a duh,hnial ka tum lo.Duati ka hrilh leha,tha kan tih ang apiang a pawm vek.Police stationah kan kala,mahse,kan beisei loh angin thil a kal leh ta tlat.Kan Agency chhuichiang tura tihna FIR a lo awm reng tawh,a submit tu hming an sawi lah ka hriat zawng a ni hek lo.

Dar 8 pelh hnuah In ka thleng ta chauh,ka chau hluah hluah,Chhuani'n Ida-i haw dawn leh dawn loh min lo zawt a,A pa bulah a riak rih dawn tih ka sawi rualin a thaw halh mai.

'A tha zawk ang ka ring,enteh,khatiang thil kha tu tih nge ni ang le?” a ti leha,ka lu ka thing ringawt.

Ka intifaia,zing lamah thil ka ei mumal tawh lo a, ka khua a sik deuh reng bawk nen ei loh tawp aiah tlem ka ei a,a khat tawka ka phone ri sek chuan min ti thinrim hlur tawh bawk,min rawn call tu apiangin zawhna ngai vek.

Ka phone nghawr dar darah ka harh zawk,ka bana,Darian-a a lo ni a,tun ang hunah eng thil nge ni ang? Ida-i...Ka thuchhuak vat.

'Hello...'

'Ka tiharh che em?” thawp sutin a rawn ti a, a aw a dam thlup bawk.

'A pawi lo,Ida-in lo haw a duh chuan...?”

'Aih,a muhil tawh..Ngaihtuah suh..'

'Anih chuan ngatinge tun ang hunah min lo call a?” ka thin a rim ta phat.

'Sorry,mahse thil pakhat zawh che ka duha,a pawimawh..' a inthlahrun hmel tak tak..Mak zawk hian a..

'Naktukah kan sawi mai dawn mi niang?”

'Aih...Naktuk nghak thei ila tunah ka rawn tiharh nang che,i mutui lai kaihthawh in i thinrim thin tih hrechiang bertu ka ni chungin” zawi tein a nui hawk bawk.Thil kal tawh ka mitthlaah a lo langa,atthlak zetin ka biang a sa nghal hat hat bawk.

'Sawi la...' ka ngaituahna tilang lo turin ka ti sap.

'Ambie-a hnena pek tur Pendrive min kentir kha eng GB nge?” ka rum chhuak halh mai.

'Darian....eng fiamthu nge ni ngai?”

'Eng fiamthu mah..A pawimawh hle ania...' thutak zetin a rawn ti nghut.

'Ka hre nang,engtin nge ka hriat ang? Kum 5 lai a liam tawha,bakah chutiang ka lo en si se lo...'

'Ok,a pawi lo..Anih leh i Story kha eng eng nge i thawn i la hrethei angem?”ka mit ka chhinga, chu kher chu ka la chiang lutuk tlat.

'Aw..'

'Thnx...Ola...ka lawm takzet..Naktukah ka rawn hmu ang che..' a awah engemaw phurna a lang thei hial bawk.

'Lawk,enge kha thil khan pawimawhna a neih a? Engmah ka man miah lo ania'

'Sorry,a pawimawh lutuk tih bak engmah ka sawi thei rih lo..Mahse, ka tiam che..Tuman an tibuai leh tawh lo ang'

'Darian,ka tana ti tur i nih chuan engmah ka mamawh lo ka tih kha..Neih leh che tumna ka nei lo a,chu ai chuan Ida-i pawh i kawl mai ka duh maithei..' ka ti damthlap.A thaw hawk ri ka hre thei bawk.

'Mangtha le..' ka ti leh hmaka,ka off zui daih bawk.

Muhil thei loin ka meng kar mai,engvangin nge Darian-a hian min buaipui thar tak thut ka hre lo,min neih leh a tum tak tak nge Ida-i vang zawk? Ka chhungrila amah ka duhna la thi si lo vang hian a bula awm ka thlahlel tih ka hai hauh lo,mahse eng aiah nge ka neih leh kher ang? Kum 5 deuhthaw ka lo tuar fan fan tawh hi reilote nawmsak nan ka tichhe nawn leh ngawt ang maw? Aih...a theih loh tawp.Inneihnaah hian mi pahnih kanni tur a ni a, mahse ani chuan ka neih rual rualin Emily kut a chelh zawm lehnghal ang.Emily hian nula senior tak ni turin a nghak mawl tawp lo ang tih ka chiang.Hre lawk sa reng siin engvangin nge ka chhiatna tur kawng ka pan tehlul ang?

Laptop ka la ta zawk,Darian-a nen kan inthen hnu atang khan thuziak ka tuina zawng zawng a bo vek a,Ziah chakna ka nei lo satliah pawh ni loin a rapin min rap tlat zawk.Mahse, zanin hian ziah ka chak leh ta tlat,ka ngaihtuahna buai nuaih nuaih leh engmah ngaihtuah fel thei chuang si lo chhawk nan chuan Thawnthu ziak ila a nuam zawk ang,ka ngaihtuahna a lapeng daih bawk ang.

Ka ngaihtuah vang vanga,Thawnthu emaw duhthusam lam ai chuan keima nun ziahchhuah ka duh ta tlat.Engtikniah emaw chuan mi chhiar theih turin tlangzarh a la ni mahna.Ka nun tak tak ka ziakchhuak tih hre loin miin Thawnthu angin an la chhiar anga,thenkhat tan ka harsatna tawh te hi inzirna a lo ni mial maithei bawk.Ka mit thup lutuk vangin ka mit ka chhing vang vang,ka mengchhuak leha,tukverh lam ha hawia,khua a lo eng uar tawh.Ka ziak tui lutuka hun lam reng reng ka lo hrechang lo.

Ka thochhuaka,Kitchen lam ka pana,Chhuani a la tho lo.Nidangah chuan min thawhkhalh ziah.Thingpui ka luma,Ida-i awm bawk si lo nen tih leh mai tur ka hre lo.

'Awi,i va tho hma ve..I mu thei lo mi?” Chhuani'n rawn luh pahin a rawn ti bawrh bawrh..

'Mu thei e..Tak takin Ida-i tel lo a ka mut vawikhatna ania,tlem chuan a harsa ve deuh' a lo nui ka hmuh takah chuan ka ti leh ta zawk.

'Ka ring reng a ni.A harsa ve ngawt ang,School kal dawnah a lo dah dawn mi?” a ti leh a,Thingpui a insiam rak rak.

'Ka hre lo,ka la be miah lo a.' ka hre lo tak tak.

'Lehkhabu ken belh ngai tur a awm chuang lo a,nimin khan hetah an lo kal kawi lo a,Form nen a la awm vek ang' a ti leh a,ka bu ringawt.Nimin khan chutiang ken tir nachang reng reng ka hre lo.

'Darian-a ka lo be dawn nia..' ka ti sap,ka khawsik a reh tawha,mahse ka la pik viau tho.

'Vawiin i kal chhuak dawn tho ami?” a ti leha,nuam lo tih hmel zetin a che sek bawk.Angaihtuahna ka hrethiam,chhuak lo ila a tha zawk maithei.Mahse,tlanchhiat enge a tulna.

'Kal chhuak ang,hlauthawng suh...' hnem nan ka nui lui var var bawk.

Inbual tumin ka kalsana,ka inbual hmain Darian-a ka call leh ta zawk.

'Ida-i kha Shool kal angai dawna' ka ti sap.

'A kal tep,lo ngaihtuah suh..' a rawn ti dam thlup.

'Nimin khan thawmhnaw thlakna tur engmah ka kentir lo a' ka ti leh a.

'Ngaihtuah suh ka tih kha,enge i an?” a rawn ti leha.

'Ka tha...anih chuan ka lawm e ka ti mai ang,Schoolah Chhuani'n a lo nghak dawn nia'

'Angai lo,Ka nuin hruai a tuma,rem i tih chuan?”

'A tibuai viau dawn che u nih chu..' nuam ka ti chiah lo.

'Teuh lo,ka nu hian a ngaihtuah che a...' a rawn ti leh a,ka mit ka chhinga, ka mitthlaah ka nu hmel a lo langa,kan inneih chhung kha rei tak ni lo mahse ka nu hnen atanga duatna leh ngaihsakna ka dawn zawng zawng kha sawi sen a ni lo.

'Tlai lamah ka rawn hruai dawn nia' a sawi haiderin ka ti ta zawk.

'Ok,chuan i khua a la sik em?” a rawn ti leh sup.

'Aih,anih phawt..'

'Lawk...' ka off hmain a rawn ti leh hram.

'Eng nge?”

'I bulah ka awmreng dawn tih hria la ka duh....' ka mit ka chhinga, ka tum loh tawpin ka mittui a rawn tlaa,hruk pawh ka tum buai peih lo.

Ka nute hnen atanga ka tlanchhuah hnuah keimahin nun khawchhuah tumin ka fight a,Pathian zarah midang awt loin ka nun ka hmang theia,mahse ka nunah Darian-a a rawn langa,keimah ka inrintawkna aia nasain amah ka ring a,amahah ka innghat hlawm tawp.Mahse, a nun atangin min paihchhuaka,beiseina zawng zawng bo thak khawpin beidawnna khurah min hnuk luta,Ida-i vangin dam tumin ka beia,Pathian vang bawkin tun hi ka thleng leha,mahse ka nunah Darian-a a lo lang leha,a lo lan rualin buaina hlir.Pawnlamah chuan mamawh lo leh puih ngai lo angin ka inlantira,mahse....ka mamawh ka haider thei lo.Tu emaw,ka rinchhan tur awm se, a awmnghenga tah a,ka buaina zawng zawng min sut kianpui tur ka mamawh.Ka mamawh hi midang ni loin tu nge anih ka chiang em em bawk.Mahse, ka mamawh hi ka mamawhna ka lantir anih chuan ka bula ding siin engtikniah emaw min paihchhuak leh anga,ka tho kang zo tawh kher lo ang.Chu hun a thlen loh nan keimaha din hi ka zir zel mai ang chu..

Ka nun kal tawh ngaihtuah chungin muangchangin ka inbuala,harsatna ka tawh nasat zia te ka ngaihtuaha,ka inkhawngaih lo thei lo.Mahse, tuna ka eizawnnaah hian kei aia harsatna tawk nasa zawk ka hmu ta nual,kei chauh hian harsatna ka tawk lo tih ka hriatchhuah phah nasa,mi zawng zawng hian kan phurhzawh tawk harsatna kan phur vek mai,mithi te hi an awhawm lo angin lang mahse Midangte itsik tlat,kan tluk loh apiangte rel chhiatna tur zawng reng renga nungte,keimahni ngaihdan pela nung apiangte misual anga ngai tlat te,Mihring nireng chung si a Pathian ngaihdan tur a rin anga thil ngaih ve tum tlat te nena chen ho ai chuan thih hi a thlanawm zawk hle ta ve ang.Mahse, nunna hi a hlu a,ka beidawn vawrtawp lai pawh khan dam ka thlahlel lo chungin mahni thu a nunna lak erawh ka tum ngai lo.

Ka inbual zawhin Living roomah Duati leh Dama an lo thu reng tawh.

'In va hma ve' tih pahin ka thu thla ve a.

'Nia,chaw ei nghal ka tuma,mahse Dama hi chuan a tum ve lo a' a nui var var.

'Ei ve nghal la,in nu te an tha em?” ka ti zat.

'Um,tha..a ngaihtuah viau che tih erawh ka sawi tel hram ang' a thensak bawk.

'Ka lawm lutuk,in vai hian min ngaihtuah veka..Anih chuan tunah enge in lo kal chhan?” an pahnih ka en a.

'Kei chu i ruala Office kal ka tuma,kal suh pawh ti che ila i kal dawn tho a' a nui a,min hrechiang lutuk chu ka nui ve tawp bawk.Ka tan a him lo em ka hre lo,mahse ka hna,ka ta a ni a, buaina a chhuak anih pawhin keiman ka hmachhawn tur tih hi ka ngaihdan a ni tawp.Dama ka ena,ka mitmeiin zawhna ka zawt a.

'Rawn tlawh satliah che,i lo mangan viau takin mawle,thian i nei tih hria la ka duha' a thle buk.

'In awma,mangang lutuk lo'

'Ka ngaihtuah rual chein ka ngaihtuah vak lo che,tunge i nih ka hrechiang ve tawkin ka hriaa.Bakah tunah phei chuan...' sawi zo loin a ngawi leh daih.

'Tunah chuan..enge?” ka ti hlak.

'Kan awm vek...' a nui a.Ka nui ve sak bawk.

Chawei hmain Dama a hawa,tih zel dan tur kan sawiho ti ila han sawi ho vak ngaihna a vang viau thung.Duati' n eng eng emaw a lo buatsaih lawka,Ruatfela'n min rawn call a,kha thil post tu kha Police lamin an la tawh tih min rawn hrilh bawk.

'Khawnge Ida-i?” chaw kan ei laiin a ti thut.

'Ih...' atthlak zetin ka sawi hreh lehpek.

'Khawiah maw? Chhuani Inah a awm bawk sia,ka lo kal tirh atang khan ka la hmu miah lo a' a ti leh a.A thil ei lai a ei zawm mawlh mawlh bawk.

'Eng lo...Darian-a bulah a riaka..' ka sawi zawh rualin a thil ei a hak nghala,a khuh zui bawrh bawrh bawk.Tui ka pe a,a in a..Mahse, a khuh zawm leh tho.

'Nimin kha a Pu Birth Day ania,chhungkuain an lawma,telve turin an duha...Bakah nizan kha ka buai tak nuaih avangin riahpui min dil pawh ka hnial duh ta lo a' mahni inthiam ranin ka ti leh duah.

'I ti tak tak em?” a mit nuai chawt chawt chungin a ti chhuak halh.

'Aw...dawtsawi kher a tul hleinem,a ni lo mi?” ka ti leh rih.

'Tul miah lo,mahse ka hriat ve loh thil hi enge awm le?” a ti hlak.Ka thle bak.

'Engmah chutiang a awm lo,a fanu tih a hriaa,hnaih a tum nasaa,tunah phei chuan diktak chuan Ida-i hian kei aiin a thlang tawh zawk maithei' ka ti a, ka thaw halh mai.

'Laksak che tumin a buaia,chutih laiin nangin a bulah i lo riah tira,ka hrethiam lo che'

'Keipawh ka inhrethiam bik lo..Enge ka tih ang pawh ka hrethiam chuang lo' beidawng lutukin ka ti halh.

'Ka hrethiam lo na chein hriatthiam che ka tum mek tho..ih,..Darian-an nizanah min rawn calla..' phawk zetin ka en vat.

'Thil hriat duh a neia' amah bawkin a ti leha.

'Eng chungchang nge?”

'A tam mai,Darian-a nen hian mimal takin inzawmna in nei leh em?”

'Aih...'

'Ok...anih chu mawle,amak hle mai' min bia ni loin amah leh amah inbia a ang mah zawk.

'Eng nge maka?” ka ti sep.

'Engmah...mahse nakinah chuan engkim hi a fel duak ang tih ka chiang viau lawi nia' a ti leha,a hmel thutak zetah chuan engmah ka zawt chhuak dawn chuang lo tih ka hriaa,ka ngawi ta zawk.

Office ka thlen hnu lawkah Police an lo kala,engkim mai hi mumang ang ruai niberin ka hria,zawhna zawng zawng engmah chhan theih loh khawpa harsa a awm lo.An en duh zawng zawng entheihin kan nei veka,kan tirhchhuah takte biak pawhna tur zawng zawng kan pe thei a.Passport lem siam thina min puhna pawh kan siam lo tih kan prove thlap bawk.

Engmah tih theih awm si loin Officeah kan thu nileng ta ngawt.Ruatfela awmngaihna hre loin a tei seka,staff dangte pawh an thawpik em em vek tih ka hria,ka inbengdai lui hram hram chungin ka hlawhchham titih ve tho mai bawk.Hostela la awmlai te an ralkhel nasaa,an chhungten pathum an rawn lachhuak ta bawk.Tumah dan ka tum lo,an mimal zalenna a ni a, min ring lo anih chuan an thu a ni a,engmah sawitheih kan nei lo.

Chhuani ka calla,Darian-an Ida-i a la dahlet ta lo cheu.Ka thaw hak mai,Duati sawi ka hrechhuaka,mahse,ka ti zo vek tawh.Tunah inchhir engmah awmzia a awm lo.

'Ida-i inah in la dah let lo a' Phone a pick veleh ka ti nghal thawr.

'Um,ka hria lawm..Zanah ka rawn dah dawn nia'

'Ngai lo,tunah...'

'Ola..hahdam rawh,midang bula awm niloin a chhungte bulah alawm a awm' a ti dam thlup.

'Ni lo,buaina dang ka mamawh lo ania' ka ti hmak.

'Buaina a ni lo...Mahse, i duh phawt chuan ka lo dah dawn nia' a ti sup.Chhang let tawh loin ka off a,hnunglam ka nghenga,chunglam ka en vang vang bawk.

Haw pahin inchhung mamawh leh Ida-i thil tur lei ngei ngei ngai a awm avangin Mega Martah ka luta,ka kal ngun bawka a thawk te pawn min hre viau tawh,min hmuh veleh min lo be vat bawk.Ka thaw huai mai,ka lar dan duhawm lo zet avangin tupawh ka hmu hreha,mahse mihring ka ni ve a,mamawh ka nei lo thei bik si lo.

'Nang hi Zampuii i ni tiraw?” Hmeichhe pakhatin ka hnunglam atangin min rawn ti a, ka inher vat.Min betu ka ena,kum 40 leh 50 inkar bawr vel,nu lian vak lo,thau lam leh inchei nasa tak mai a ni a, ka hriat zawng a ni lo.

'Min bia em?” ka ti ha mai.

'Aw,nang hi tuna lar deuh Agency neitu kha i ni tiraw? Engtin nge pawnah i chhuah ngama?' min rawn din hnaiha,ka ding khawng lah thung.

'Miin vuakhlum mai che an duh laiin engtin nge thlamuang taka i len ngam le? i mak em em hle mai' amah bawkin a ti leha,chhan mai ngaihna ka hre lo. Ka lo haw tlang ta hle hle lo kha ka inchhir hluah hluah tawh.

'Ngatinge a?” Dawr nghaktu,hmeichhe tleirawl pakhat in a rawn ti a.Kan hawi rual thawt.

'He nu hi mawle,tiang khawpa mizo mipuiin kan thinrim khum laiin thlamuang em emin a lo bazara,a mak asin' a ti leh lawng lawng.

'Chu chuan buaina a thlen deuh che mi?” Mipa awin a rawn ti a,tu nge anih en kher ngai loin ka hrechiang lutuk,mahse muangchangin ka hawi pheia,kekawr ipte zen tut chungin a lo ding reng tawh.Jeans kekawr pawl takzet a haa,T-shirt var thianghlim zet chungah Leather Jacket chhing lam a haa,A dress leh a hmel tak ngul mai chu a inhmeh vel vek.

'Tibuai a? Kei chu tibuai nang,mahse tiang khawpa Mizo mipuiin kan buaipui luai luai laia pawn a chhuak ngam hi a mak alawm' a ti leh hlaih hlaih,midang an rawn kal hnai ta hlawm bawk.Ka dik lohna ni miah lo mahse zah vangin hawi ngaihna ka hre lo.

'Anih chuan an tirhchhuah zingah khan in chhungte an tel ve tihna ni em?” a ti leh nghut.A then suk bawk,mahse a nuihzat loh zia a mitmeng rum ul maiah chuan a lang vek.

'Tel nang..tu nge annih pawh ka hre reng reng lo,ka sawi tum zawk chu tunhma pawn chanchin mawihnai lo pui pui a lo nei tawha,tunah nise tiang khawpin a mualphoa,a la thlamuang em em mai hi a mak alawm,a Pasal pawh khan heivang chiah hi anih hi a lo then ni...' a ti leh chiam,kei erawh ka lo thaw hleithei lo..

'Duhtawk teh,hriatchian loh sawi hi a tha lo ania' a ti leh hmuk,a rawn kal pheia,ka bulah a rawn ding a.A tir atang khan sawi ve tur reng reng ka la hrechuang lo.

'Tu nge maw i nih le? I lo tan ve viau mai ni? Heivang hi alawm misual hian an sual man an hmuh theih thin loh” a ti leh hmak.Rum zetin min rawn en bawk.

'Tu nge ka nih maw? ' a ti hmuka,nelawmna pakhatmah a tel lo.

'Aw...tu nge i nih? A hlawkna ei ve tu i lo ni zawk nge?”

A pan hnaia,a chetdan mak lutuk chu ka en mawl tawp,enge tih tur ka hre hlawl lo.An insan hleih bawk nen a kun hniam deuha.Hnai zetah a en a,nu nasa zet,makti lutuka mengphawk hra chu ka en a,ka thawk a sak talh talh bawk.

'Darian Malsawmtluanga ka ni a,nichin khan i sawi kha.I ankhum mek Pasal hi ka ni e.Kan inthen chhan kha chu i hresual hret,hrilhfiah che erawh ka ba hauh lo thung' mak ti lutukin ka melh reng ringawt.

Thil tla ri chawrh thawmah thawm lo chhuahna lam ka hawi vat,Emily lo ding reng leh mak tih vanga ang deuh phiau ka va hmu nghal zat bawk.A hmeltha zet,danglap maiah chuan Darian-a thilsawi kha a rawn hria tih a lang thei vek bawk.