22/AUGUST - 11

Chapter-11

Remfela mak ti hmel chu ka hmu phe deuh ruai,ka lu a hai bawk nen ka awmdan a dik lo,ka luak a chhuak hlui a,khawsik tham ang maiin ka chhungril atangin vawtin min thama,ka khur titih bawk.

‘I thlah dawn nge ka thlah tir dawn che?” a ti leh hmuk,a then suk bawk.Mahse nuihzat vanga nui erawh a ni lo tih a hmel nelawm lo lutukah chuan a chiang reng.

‘Tu nge i nih a?” ka rilrua lo lang hmasaber ka sawi chhuak nghal pawp.A hmel tak ngul maiah chuan thinrimna niawm tak a lang zawk.Mahse, a rei lo.

‘Eng nge a?” Savio-an ka bula rawn din pahin a rawn ti a.Min ena,Ramsey-a a en leha,tuman kan chhang lo.

‘Ka kal phawt mai ang’Remfela’n a ti a.Kan boruak tang leh hahthlak lutuk chuan a ti zam nge pawh ka hre lo,hlauh hmel fein Ramsey-a a en leh zawka,min rawn en leha.Ka ban ka vai ringawt.

‘Mama..Kan kal dawn asin’ Savio-an Ramsey hnenah a ti a.A chhan hmain ka darah a rawn kuaha,ka ngheng nghal titih.

‘Ka lo drop ang…’ a ti vawt ruih.

‘Maw? Aw..mahse,amah hian a duh leh duh loh animai’ a ti leh a,min rawn en a.Zawhna min zawt tih a hmelah ka hrethei.

‘Kal ang,vawt ka ti lutuk..Ruah a sur dawn aniang’ ka ti buh nuaih.A then saka,Ramsey lam bawk a en leh a.

‘Keiman ka thlah mai ang’

‘Keiman ka tih kha’a aw khauh fur chuan min ti thinrim ta phat.Savio min kuahna ka thingthlaa,ka pan hnaia,ka kal bu deuh lak lak bawk.Mahse, ka in hnem ang huin ka chatthla mai tlat lo hi thilmak tak a ni.Ramsey hmaah tak ka dinga, kan insanhleih deuh bawk nen a mitah tak en turin ka dak chho ha mai.A inpetruh funa,pawisak a neih tlem hmel takzet.Mahse, hei hi chu a bialnu bulah lantir rawh se.

‘Tu nge i nih?” ka sawi zawh rualin Savio tlak karh ri ka hre nghal zat.Pawi a ti hmel viau bawk.Nia,pawi a ti ang,a hlau em mai.

‘Haw la a thain ka hria’ ka zawhna a haider hmiah thung.

‘I thu lo,ka duh leh ka haw anga,ka duh leh ka haw lo ang,ka thu thu’ ngeiawm zetin ka nui lui hak bawk.A hmui a tisawi zauha,ka tawngdan ngeiawm zet khan a engahmah a khawih lo tih a chiang reng bawk.Chu chuan min ti thinrim zual sauh thung.

‘Anih chuan i thuin kan kal mai dawn mi? I pain haw hma tur chein a duh a’ a ti leh nghut.

‘Ka haw ang,mahse i rual ni loin midang nen..Chuan,tu nge i nih ka hre lo a,ka nunah lo inrawlh tum suh.A chiang em?” ka ti leh salh.Ka sawi pahin ka kutzungtangin a awmah ka nawr sak sak bawk.

‘Duhtawk rawh..I kalthui lutuk ange’ a ti sup.Ka banrekah a rawn vuan,nghet lutukin a hmer zui nghal zat bawk.

‘Min thlah rawh,zaktheilo lutuk mai..Savio..’ ka hawi leta,tumah an lo awm tawh lo..Khawiah nge a kal hman?

‘A kal tawh,keini pawh kan kal a hun viau’ a ti leh nghut.

‘Min thlah rawh’ ka ti leh that.

‘Tehreng mai,I kal duh loh tlat phei chuan pawm luh che nuam ka ti khawp ang’ a then leh suk..A hmelah chuan a ti duh tak tak mai ang tih a lang reng,kan dine outna hmun hi Khawpui pawn a ni a,mi veivak an tam lo.Mahse, a khat tawkin Motor tlan a awm renga,chung ho tana hmuhnawm siam ka duh loh chuan ka kal mai angai.

‘Lut rawh..’ kawngkhar lamah a thle buk.Luh mai loh chu tihtur a awm chuang lo.

Ka thutna hnunglam ka nghenga,ka mit ka chhing nghal hmiah bawk.Tawng chakna ka nei eih lo.Ka luak a chhuaka,ka lu a hai bawk nen muthilh vang vang ka chak ber.Zu ka in tantirh atangin engtiklai mahin rui chunga phul hlut chi ka ni ngai lo hi ka vannei,ka ruih nasat leh ka cool ting mai zel.Mahse, ka thin a ram viau zela,han sualpui mai tur ka hmu thei viau lawi.Savio hian min chhan leh min puih a fawmkem nasa a.Ka ruih tawh chuan min veng deuh tawp a ni ber.

‘Khawnge i phone?” reife kan ngawih hnuah a tichhuak sup.Ka hre lo der hmiah thung.Ka awm ngaiin ka awm lui tlat bawk.

Motor a din takah chuan muthilh der reng theih pawh a nita lo.Ka mengchhuaka,kan awmna lai hriat tumin ka en a,kan Inbulah kan lo awm reng tawh.

‘Min thlah avangin ka lawm e’ ka ti nghat,Kawngkhar hawn tumin ka bana,mahse a tawng riah ka kut ka la let leha,muangchangin ka en ta zawk.

‘Eng maw i sawi?” ka ti hlak.

‘Haw suh,inruk mai a tha’ a hma pawh khan a sawi tawh.Ka hriat loh vanga zawt nawn ka ni hek lo.

‘I bungrua ka ni lo’ ka aw a chang fak mai.

‘Anih chuan tiang chung khan i pa i hmachhawn dawn tihna mi?”a ti sup.Ka chhan dan vanga thinrim hmel a lang lo.Tlaia thil thleng ka mitthlaah a lo lang nghal zat.

‘Ka rui emaw rui lo emaw ka pa tan chuan misual ka ni tho.Eng ang pawn hmachhawn ila buaina a awm lo’ ka tita duah.

‘Enge thleng?’ a ti leh daih.

‘Engmah…”

‘I sawi dawn lo tih ka hria,mahse I awmdanah khan thil thleng a awm tih ka hria’

‘I fing viau anih chuan chhui chhuak mai rawh..’

‘Nia,ka chhui chhuak tawh in ka hria’

‘A va lawmawm ve’ tielna ka awah a lang chiang ngang mai bawk.

‘Rui lo hian engkim hi hmachhawn la chuan a lawmawm lehzual ang’ a ti leh sup.

‘Ka hrilh tawh che kha,midang dinhmun hi sawi mai a awlsama,mahni tawn anih loh vangin..Chuvangin ka awmdan sawisel suh’ ka ti hmak.A then suk a,a hmelpa leh thutak ngul maiah chuan enge a ngaihtuah ang ka hrethiam lo.

‘I sawi dik,mahse,I awmthat nasat leh  nuhrawn tan hian a manganthlak tih hi chu ka tawn ni lo mahse ka hmuh dan a ni zawk’ a ti leh sup.A sawi dik mahna..Mahse, ka nu chunga a thil tih rapthlak lutuk ka hriat ruk pai chung hi chuan that a harsa lutuk,amah ka hmuh rualin min vit ngut ngut a,Ka pa bulah sawi dawn ila fiahna ka neih te a beitham miau a,engmah ka sawichhuak thei hek lo..

Mangtha le..’ ka ngaihtuahna tilang lo turin ka ti hmak.Kawngkhar hawn ka tuma,mahse ka  hawng thei der lo.

‘I hawng thei na nge?” a ti nghut,a awah nuihzatna niawm tak a hriattheih bawk.Ka chhungrila thinrim nain min rawn hnawh up up a,mahse ani bulah hian ka thinrimna tilangin nuihza siamna nih ka tum bau lo.

‘I locked miaua,hawng thei nang..Enteh,I hmuh ang hian fanu awmtha duh lo satliah mai ka ni a,neih engmah ka nei lo bawka.Min tihbuai hi duhtawk tawh teh.Keimah chauh pawh hian buaina ka ngah tawk lutuk..’ ka ti dam thlap.Ka chau takzet,muhil ila harhchhuak tawh lo ila ka duh ngawih ngawih,Mahse ka thih ruala hlima lam nghal tur an awm tih ka hriat tlat avangin chunglamin ka nunna a tihtawp hmaa keima thu a lo tihtawp tumna ka nei lo.

‘Ka duhtawk dawn lo tih i hriat kha,sawi duh lo mai rawh’ nghet churhin a ti hmuk.

‘Engvangin? I  bialnu nen khan min nuihsawh turin maw? Ni lo,ka chanchin aia nuihzat tur thildang a tam ang’ ka insum hman lo.Anchhe lawh niawm takin a phun hluka,mahse enge a sawi ka hre thei lo.

‘Maw?” min rawn hnaih nghal ruak bawk.Kawngkhar ka ngheng rawk thung.

‘Sawifiah angai dawn tihna mi?” ka ti hmak.Ka rui a reh vek tawhin ka hria.Mahse, ka lu hai leh ka luakchhuak nghulh chuan a la reh lo tih a tichiang thung.

‘Aw,Agnes-i nen kan tawp tawh tih ka hrilh che kha.Engvangin nge ani kha i sawi leh a?”

‘Oh..A va ropui ve.Nizan khan dar 11 velah i roomah a awma, i phone a lo pick bawka..I tenawm,i hria em?i tenawm”

‘Tenawm” a ti nawn ve sup .

‘Ni chiah e.I tenawm ka ti anih chu.Mahse, a ni leh lo.Ka lo fing lo ve em zawka,I awmdan han danglam vel kha ka lo awih hman peka..’ ka nui chhuak hak mai.

‘Ka sawifiah thei..’

‘Aih,dawt sawi i inhmeh lo.Sawi duh suh.Savio hian a ngaisang chea,I chanchin chhuang deuha a sawi leh hunah ka nuih tiza tur engmah siam belh suh’ ka awah hmuhsitna ri a hriat tel theih.Ka inrin hmain ka biang tawn tawnah a rawn dawma,a rawn kun hniama nghal zat.Thlek sawn ka tuma,mahse min vuan nghet lutuk..

‘I ngaithla ang.Dawt a ni hek lo.Nizanah Hotelah kan awm ho ngei,mahse i rin ang kha ni loin Akima leh Saii bakah kan Driver a awm ve bawk .Phone pick chungchang erawh ka hre hauh lo mai.I rawn call ngei em tih hre turin engmah a awm hek lo’ a tita duah.

‘Sawifiah suh..Ka tan a pawimawh lo,ka engmah i ni lo ka tihna nih chu’ ngaipawimawh lo hmel zetin ka ti leh a,a kut laksawn sak ka tuma,mahse min rawn nek bet titih.

‘Ngaithla rawh.Hmeichhe awm tha duh lo leh Drug addict ni a mi sawi luai luai nena inzawmna neih hi ka duh lova,ka chak miah lo..Mahse…’ sawi zo loin a chalin ka chal a rawn ti si a.A rum hawk bawk.A awmdan chuan min ti hamhaih lutuka,sawi mai tur hre loin ka awm ngaiin ka awm mawl tawp.

‘I awih emaw awih lo emaw ka duh che,engtiklai atangin nge ka hre lo’ a ti leh hrawih.Sawi harsa a tih zia haider theih a ni lo.A awmdan chuan min fana,ka tiril a khur dar dar mai.

‘Min duh suh…’ ka chhungril  tui zawih zawih mahse ka tawngchhuak erawh a chang fal thung.

‘Chu aia duh ka nei lo hial ang,mahse ka kalsan thei lo che’ a ti leh sup.

‘Mahse,Agnes-i neia.I tana tha …’ ka sawi zawh hmain a hmui chhap deuh leh hnawng chapin ka hmui a rawn si a.Ka khawng nghal lah mai.

Min thlah hnuah pawh chet mai nachang hre loin ka awm ngaiin ka awm mawl tawp.Eng hi nge rin ber tur ka hrethiam hlawl lo.Ka ngaihtuahna a mang ti dawn ila a ni chiah lo.Ka mawl huih a ni ber.Kan dinna lai a thim deuh nangin nichin khan  mi lo kal an awm anih chuan min hmu ngei ang,mahse pawi ka ti chuang der lo.

‘Lut tawh la,kei pawh ka lo kal ang’ a ti sup.Ka biangah a kut zungpuiin a tuai hauh hauh bawk.Ka thutna lam kawngkhar a hawnga,ka chalah a fawp leh zauh bawk.Ka awmdan a dik hlawl lo.

Gate  bulah Pa Rina te haw tur nen kan intawk chiah.A tlai viau tawh emaw ka tih laiin a lo la tlai lo tawp a ni  ngei ang.Anni pawh an haw dawn chauh tlat.

‘Mambawih,I lo awm lo daih a…’ min hmuh veleh a ti nghal lung lung.A rui leh tawh tih ka hria,kei nge in hnem ang amah ka hre lo.Mahse kei chu ka thil tawn te khan min ti harh zo vek tawh.

‘Nia,in haw dawn tawh ami?” ka ti a.

‘Aw..Haw mai ang,kan puar khawp mai..Eh,Ramsey,helamah daih ka hmuh che a’ Ramsey en pahin a tih zawm zat.A hnunga a nupui rawn chhuak ve mek pawhin Ramsey-a a hmuh veleh ka hmuh fo thin tlawn hmel a pu nghal zat bawk.

‘Nia..Hei,Zorini hi ka rawn thlaha..I dam maw?” a ti nghut.Tu bulah mah hian a tawngkam hi a nem ngai lo anih ka ring ta rum rum.Pa Rina a bu nghauha,eng eng emaw an sawi leh nuala,a nupui nen an inbe leh bawk.An inbiak danah an inhre tha thawkhat tih a chiang.Ka pa leh Ka nuhrawn erawh an awm ve reng nangin melh pawh ka melh eih lo.

‘Ramsey,I lo lut dawn na nge?” ka nuhrawnin a ti a.Ka insangmar talh talh mai.

‘Lut lo mai ang.Eee,Nu hming,naktukah Zorini ka hruaichhuak  thei angem?” ka en vat.A thle buk ringawt.Enge tih a tum ka hrethiam bau lo.

‘Enge in tih dawn a?’ zangkhai vahin a ti a.Ka ner nak ringawt.Nu tha ber ang hrimin a khawsa leh ta vel chu ania.

‘Ka thianpa nupui neihna lamah ania’ a ti leh a.Tu a thian nge nupui nei dawn ka hre map lo.Diktak chuan tunge a kawm thin ka hre lo ve hranpa hrim hrim.

‘Eee,kal rawh u,kal rawh u..Tiang lam hi a lawm lo leh lutuka hruai harh tak teh’ a ti leh zung zung.Hei erawh a sawi dik thlap.Kan chhungte chhiat thatah ka kal ngai mang lo.Ka mizia leh landanin a zir miau loh avangin tumah hnaih chakna ka nei lo.Bakah min hruai an tum ngai bik lo ve bawk.

Ka mu meng kar mai.Ramsey kal veleh Inah ka lut nghala,midangin min biak hmain room lam ka pan nghal daih bawk.Ka luakchhuak lutuk luak thei bawk si lo vangin reife Bathroomah ka tawma,a tawp a tawpah ka luak thei hram.Ka thawl hawk bawk. Muthilh vang vang tumin khumah ka lawna,mahse ka muhil thei miah lo.Ka phone ka lakanga,ka mut atangin darkar khat a liam tawh.Whatsapp msg ka en a.Nichin pawh khan ka chhiar tawh.

‘Ka kalsan dawn lo che.Engpawh tawk la min rinchhan la ka duh ber’ a sei duah lo.Tawngkam thluaithlum chiam a awm hek lo.Mahse,a chiang lutuk,amah nen a inhmeh ngawih ngawih bawk.

Ring tur ka ni em ka hrethiam lo.Agnes-i nen an tawp takzet anih chuan engvangin nge an zin ho leh ang? Kha lehchen a lo kawp tawh kalsanin keimah zawk min thlang takzet angem? Mahse,Savio vang nitur chuan a awmdan hi a lutuk mah mah in ka hre lawi si.Thil ngaihtuah chhuah ka nei.Ka tho nghal zat bawk.Ka thawmhnaw dahna ka hawnga,ka enkual dan dana,Inneihnaa hak tur chi thawmhnaw pakhatmah ka nei lo.Inkhawm thin tal ni ila chuan a zia,ka inkhawm ngai der bawk si lo..

‘Naktuk kha i ti tak tak em?” tih ka thawn ta ngawt.A tlai tawha,a zin a lo haw chiah bawk nen a men ka ring tawh lo.Mahse, rang zetin a rawn reply nghal zat.Ka open vat.

‘Aw.Dar khatah ania..Ngatinge?’

Engmah incheina thawmhnaw ka nei lo tih ka tum zeta,mahse ka thulh leh ta zawk.

‘Ka zawt mai mai che’ ka tita zawk.

‘Ok..Gudnite’

Ka rin aiin a reply rang thin.Mangtha let ve ka duh,mahse atthlak zetin ka hreh tlat pek.Ka thawh meuh chuan Ka pa leh Thanga dawrah an lo kal hman tawh.A chang chuan ka nuhrawn nen zingah an kal tum a awma,a tam zawkah chuan pakhat zawk zawk an kal hman tlangpui.

‘Thingpui i duh em?”Lun’in min lo ti vat.Ka lu ka thing ringawt.Ka rilruah vawiin lama kan kalna tur bak a awm meuh lo.Hmeichhe thian ka kawm mang lova,ka naupan lai atanga kawm ve thin,kan inbul lawka awm Mimi tih loh chu thian han tihtur Hmeichhia bik ka nei eih lo.Ani lah Phai lamah a awm a,ka khawsak dan a hoh tak viau hnuah phei kha chuan kan inkawm meuh lo zawk.Mahse awm se chuan min pui hreh hauh lo ang tih ka chiang.

Savio ka call ta nge nge.Ani leh ni lo ang takin rang fahranin a pick ve teh tlat bawk.

‘Kia?” Hello pawh ti loin a rawn ti a.Ka rilruah nizan lam a lang zawk.

‘Nizan khan khawnge i kal daiha?ka zawng che a’ ka ti hlak.

‘Ka awmreng kha.Mama khan Drop che a tum tho sia,ka kalsan che.Thil dik lo a awm em?” a rawn ti duah.

‘Aih,awm nang..Ka hmu ta si lo che kha mak ka ti mawle’ ka ti tha ve mai.

‘Ha..I nawi em anih kha..’

‘Hmm,I awm vanga nawi alawm ka nih’ ka ti hlak.

‘Uh,nizan kha chuan min mamawh vak lo.Remfela I mamawh zawk mahin ka hria’ ngeiawm zetin a nui kar kar mai.

‘I ninawm aw..Min thlah talh a tum lai kha I hmuh reng chuan min rawn chhan ta che’ ka thinrim tha leh tlat.

‘Hmm,ka chhan che ngai loin chhantu tur che a lo kal dawn tih ka hria lawm’ ka thinrimna ngaipawimawh lo zetin a ti sam et.

‘I over anih mai chu a’

‘Over nang,bakah Remfela khan kei aiin Mama kha a ngaipawimawh dawn tih ka chianga.Mama staff anih kha…’ a ti leh a, ka thaw hak mai.Khavang chiah khan anih kha hlau hmel a put ni.

‘Anih chu a…’ ka ti nghat ringawt.

‘Um..Ni e,Nge min lo call a?” a tih zawm zat.

‘Ih…Eng lo,vawiinah Ramsey khan inneihnaah min hruai a tum a” thil hlauhawm sawi ang maiin a tawp lam a zawi lutuk.

‘Eng maw i tih? I tawng ka hre tha thei lo’ a rawn ti a.Ka ner nak mai.Ka sawi ngai ka sawi nawn leha,a thawk hak ri ka hrethei.

‘Showroom a Sales Manager pakhatin nupui a nei dawna,tah chuan nih chu..’ a ti a.A hmaa a awki zangkhai zet kha a awm lo.

‘Anih chuan ka kal angem?”

‘Naaa,I thu thu niang chu’ a nui a.

‘Um..Mahse, thawmhnaw hak tur engmah ka lo nei lo a’

‘Ka ring a ni.Anih chuan min ngaihtuahpui rawh tih i tum ami?”

‘Aw..’

‘Keiin ka hriat ve chu Agnes-i a ni maia,mahse tunah hi chuan ani kher chu kan be thei lo tawp ang..I hrethiam em?” a nui leh hak hak mai.

‘Um,hrethiam maithei..Anih chuan khawiah nge kan lei ang?An inneih inkhawm kha dar 1ah ania’ ka ti leh a.

‘Hahdam phawt mai teh,ka nu ka lo zawt ang’

‘Ka lawm e aw’

‘I chhe lutuk’

‘Ka lawm tak tak alawm mawle’ ka ti hlar mai.

‘Ka hria..Mahse, kei chuan ka thianpain Hmeichhe thawmhnaw leitur a ngaihtuah ve ta hi nuam ka ti ania’

‘Hmela..’ a nui hawk hawk mai,keipawh ka nui chhuak ve hak tho bawk.

Khumah ka thu ren rawn,nizan khan Ramsey khan Remfela hnenah a bialnu ka ni tih a sawi a,ka rui nangin ka hresual lo tih ka chiang.Mahse,engvangin nge a staff bulah tiang khan a sawi? Savio vang ni tur chuan a theih loh.Min duh tak tak tihna a ni mai em? Ka lu ka thing nak ringawt.

Nu Hmingi nen inbe miah loin chaw kan ei duna,ka pa a awm lo bawka ka laka thatchhuah der a peih lo tih ka hria.Biak tumna ka nei bik hek lo.Nimin atang khan thil tamtak ka man thiama,ka thle mai mai lo tih a hrethiam tawh ngei ang.Chuvang takin a hma anga min tihkawi kha a tum tawh lo ang tih ka chiang.Mahse, min thehchhuah a tumna erawh a bansan dawn miah lo,atan chuan ka hnawk lutuk tlat.Ramsey sawi kha a dik ngei bawk ang.He inah hian fel taka ka awm anih chuan ani tan hian hling ka ni dawn.Ka nun a hoh zawh poh leh atan a nuam ting mai bawk tih ka hrethiam tan ta ek ek bawk.Mahse, that hi a harsa em a ni.

Savio-an a u hnen atangin thawmhnaw leina tur a lo zawt a,kan inzui kual ta zak zak.Eng nge tunlai a hmeichhe incheina In leh Out pawh ka hre lo.Hahthlak tak a ni ringawt.Mizo zinga Designer lo pung ta thut te pawh ka hre chawpchilh a ni ber.Darkar hnih zenzawn kan inzuai kual hnuah Dawr nghaktu te puihnain kan lei fel thei ta hram.Ka cher lem lo.Thau tak tihtur ka ni chuang hek lo.Mizo hmeichhiaah ka pian mil an tam tih hriat takin kan kalna apiangah khan ka hak mai theih tur chi chu a awm deuh zel.

‘I inpeih tawh em?” Phone ka pick veleh a rawn ti sup.

‘Aw,peih a nimai..’ ka ti a.Vawi engzat nge ka make-up ka tihthat hman ka hreseng lo zawk.

‘Ok…Ka lo thleng tep’ a ti leh sup.

Ka hmaa darthlalang,taksa pum lan theihnaah chuan ka in en a.Ka mitmeng,ka nu mitmeng ang maia lian kelkawl hi ka hmel ti thatu tiin min hrilh thina,nih pawh a nimahna le..Ka kawr hakin ka taksa a phuar deuh tanga,ka hnute a lang lian zualin ka hre bawk.Ka puan ka ena,a tlang a sawi.Ngil taka bih tumin ka bei nasa tawh,a dik thei hlawl lo.Tiang hian ka inchei ngai lo lutuka,ka awm dan a ni deuh huin ka hre bawk.

‘Awiii,I va inhmeh ve..Tiang khan inchei ziah tawh rawh’ Luni’n min hmuh veleh a lo ti chiam.Ka then nak ringawt.

‘Tianga inchei ziah na hun a awm lo alawm’ ka nui a.Ka beisei aiin Pheikhawk sang nen ka chet a khawr lem lo hlauh bawk.

‘Sunday te pawh..Aaaa,I nalh tawp..’ a ti leh hliaia,a mizia ka hriaa.A rilru a awm ang ang sawi phawng phawng chi a ni a,nalh min tih tak tak loh chuan a sawi lo ang tih ka hria,tlem chuan min ti confi ta deuh.

Motor horn ri thatah ka hriaa,lo luh a tum lo anih ringin ka chhuak nghal vat.Motor nghengin a lo ding a.Kekawr thui nalh zet leh Kamiz var a ha zuih.Necktie sin lam lek lek a awrh bawk.A kamiz hakin a taksa a phuar deuh tanga,a pian nalh zet a tilangsar lehzual sauh bawk.A kamiz var thianghlim lutuk vang nge tlemin a lang hang deuh thung.A nalh tihmai loh chu sawifiah dan a vang lutuk.A lam pana ka kal phei chu vawikhat min hmuhna niawm takin min en vung vung bawk.Ka zam tih piahlam a ni ringawt.Ka kut a thlan nghal dap dap bawk.

‘Enge ka an?” a bula din pahin ka ti sap.Zahzelah engemaw tal ka sawi ngei ngei angai.Anih loh chuan ka zam lutuk.

‘Sawi loh ka duh zawk..’ a then suk bawk.Kawngkhar min hawnsaka,ka awmdan ka tehkhin thiam dan ber chu Hollywood Movie engemaw ber a tel ve nimaiin ka inhria.

A rawn thu lut ve a,amah nena inhmeh lutuk Perfume rim pa zetin ka hnar a verh nghal zar bawk. A bana Gold Colour sana a bun a thlek zauh.Min rawn en a.

‘Ka hmuh tum tak ka hmu..’ a ti sup.A sawi awmzia ka hre lo.

‘Eng maw?”

‘Ka hmuh tum leh ni tura ka duh che aia tha zawkin ka hmu che’ a ti leh a,ka biang a sat nghal hat hat dana a sen nasa hle ang tih ka ringthiam nghal vek..

‘Ka lawm e’ ka ti sepa.Pawnlam ka hawi nghal daih bawk.

‘Chuan…’ ka en leh vat.

‘Ka fawp chak hle bawk che’

‘Oh…’ ka ti halh ringawt.Engtin nge tiang chuan a bulah hun ka hman theih ang? Ka zam em em lutuk..Hahthlak hian a..

Inneihna hmun tur kan thlen chuan an mi an lo tam viau tawh.Biakinah kawtah Ramsey hmelhriatte an lo awma,inchhung lama lut turin min lo tinghal sawk sawk bawk.Inneih inkhawm chhung zawng ka tang tluanchhuak ta parh.Nula tak tak ka nih hnua ka nuna mi pangngai anga hun ka hman hmasak ber na a ni a,mumang ang ruai nimaiin ka hria.

Inkhawm mai bakah a lawmna leh ruai theh vel pawh Biakin velah an tihvek dawn avangin hmundanga kal angai lo a,a zia phian mai.Ramsey hnuaia thawk rei tawh tak mai leh a rinrawl zinga mi a lo ni a.Ramsey naute an thahnem viau.Remfela ka hmu a,mahse min hmu awmin a awm lo.Min hmu lo tak tak pawh a nimahna le..

‘Toiletah ka zuk kal lawk ang’ ka ti a.Min rawn en vut.

‘Kal ila..’

‘Aih,lo awm rawh.Keimahin ka kal thei alawm’ ka ti sap.Kan thlen tirh atang khan min ngaihsak tha takzet.

‘Ok..A tha lawm’ a ti tha ve mai bawk.

Biakin hnuaiah ka chhuk thlaa,awm an lo awm nual..Hmeichhe thenkhat lo inchei tha mawlh mawlh tawk an awm laiin dingkhawm satliah niawm tak an awm bawk.Ka kalpel a,a ruak a awm leh awm loh ka en phei dan dana,a piah ber dawt a lo ruaka,ka lut nghal zat.

Ka chhuah leh chuan hmeichhe pahnih min hnungchhawn zawnga ding bak an lo awm tawh lo.Hall lamah an lutkhawm ta diak anih hmel viau.Muangchangin ka kal pheia,mahse an thilsawi ka hriat takah chuan ka ding ta chawt.

‘Sir Ramsey bialnu te chu Agnes-i alawm,an ni rei tawh lutuk’ sam kir buk deuh laih zawk chuan a lo ti mek.

‘Nia,mahse nizanah Remfela bulah a bialnu tiin tuna a lo kalpui kha a sawi alawm..Mahse khanu kha ka hrechiang lutuk.Kan veng ami ania,Drug Addict ania,chu bakah Call girl a ni bawka’ ka chil ka lem dawna,ka lem hleithei lo..Ka chanchin an sawi dan hi ka hre fova,ka ngaipawimawh ngai lo..Mahse, tun tum chu keimah mai niloin Ramsey tan a pawi thei ta tlat..

Thawm nei lo thei ang berin ka tawlh leta,ka chanchin in tihre zeta sawitu kha a hmel ka hmu chiang thei lo.Kan vengmi Ramsey hnuaia thawk lah ka hre hek lo.

‘Chutiang anih chuan engtin nge Agnes-i aiin Sir Ramsey hian a duh zawk anga? Ka awih lo..’ pakhat zawkin a ti leh a.An tawng ka hre phak vek.Ka mit ka chhing ta ngawt.

‘A zei aniang..Tiang ho hi chuan hnuailam an ui lo thina,bakah han hruaichhuah atan chuan a chhe lo bawk nen Sir Ramsey tan pawh..’ a sawi lak lawh laiin a tawp daih,enge thleng en tumin ka dak dek dek a,ka phu zawk.Ramsey a lo ding run tawha,a hmel a nelawm lo takzet bawk.