22/AUGUST- 12

Chapter- 12

Ka chhuak ang nge chhuak lo ang ka ngaihtuaha,ka hrethiam lo.Eng chen nge an thusawi kha a rawn hriat hman ka hre hek lo.Thil tha lo zawk a thlen hlauhnain ka khat thut.Ka pen chhuak nghal zat bawk.

‘Min rawn zawng ami?” an boruak hre lo niawm takin ka ti zangkhai vah bawk.Min rawn en a,a nui suk bawk.Hmeichhe pahnih hlau hmel zeta lo dingte chu ka ena,ka nui lui leh sak bawk.

‘Kal ila…’ tih pahin a banah ka vuana,engmah sawi loin a bu nghut ringawt.

‘I tha em?” kal pahin a ti sup.

‘Um,lutuk..Ngatinge?”

‘Engmah..Kei chu haw ka duh’

‘Nah,kan la awm dawn maw ka tia?”

‘I duh chuan awm thei e’

‘Mahse,I duh loh chuan ka duh bik chuang loa’

‘Ok..Anih chuan kal ang’ a ti hmuk.

Motor kan thlen veleh a coat phelha,a hnung seatah a theh lut nghal daih bawk.A kamiz ban a thlep chhinga,a necktie a pawt thawl nghal bawk.

‘Thil dik lo a awm em?” kan tlanchhuah hnuah ka tita nge nge.Ka chungchang an sawi vang khan a thinrim nge ka nihna a hriatsa an sawi thar leh avangin min zahpui ka hre lo.

‘Aih..Awm lo..’ a ti nghut.

‘Khawnge kan kal dawn?” kan tlanna lam kan inkawng a ni lo.

‘Kan Inah…’

‘Aih..ka duh lo’ rang lutukin ka ti nghal zat.

‘Ngatinge?” a ti sup. Ka ena,a motor khalh lai chauh ngaihtuah niawm takin hmalam a en ngur mai.

‘I chhungte…Ih,ka kal chak lo’ ka ti bah nak mai.

‘I vawikhat kalna a ni chuang lova..’

‘Mahse,a hma te chuan Savio nen ania.Tunah i ruala ka kal chuan…Aih,ka duh lo’ ka ban ka pharchhuak hliaia,beidawng zetin ka dahthla leh hnak ringawt.

‘Tunah ka rualin i kal anga,a tha em?” a ti leh nghut.Hnial awmzia a awm dawn chuang lo tih hriain ka thu ngawi ta hle hle.

An Colony pumpuiah min hre lo an awm lo,vawitamtak Saviote inah ka kala,ka riak bawka.An cousin tupawh ka kawm thei vek.Ka chanchin an hriat dan a mawi lem lo nangin min be chhe ngai hlawm lo.Mahse, tunah inchei pangngai taka Ramsey ruala ka kal anih chuan engtin nge an ngaih ang ka hre lo.Savio nu phei chuan Savio tana ka that tawk loh avanga insiamtha turin min duh hial ania..Huizz..Ka hreh hluah hluah.

Gate a lo inhawng saa,kan tlan luh takah chuan ka tang zual sauh.Chhuk mai loin ka hawi kuala,pawnah tumah an lo awm lo..’Chhuk ila’ tih pahin ka kut a rawn vuana,ka phu zawk mai.

‘Enteh..Tu emawin min lo hmu ta se’ ka ti chhuak halh mai.

‘Hmu ve bawk ang chu.An hmuh che avangin i damlo dawn chuang lo bawka’ a nui hawk.Mahse, a nuiriah tielna lam engmah a lang lo.

‘Apa..’ kan luh veleh Hani ‘n a lo ti chal mai.Thutthleng atangin a zuangthla tharha,a rawn pana.Mahse, a hnunga ka lo ding min hmuh takah chuan zak niawm takin a tawi leh hrat.Slipper bun loin mawza nen chauh a awma,Pyjama senno tial leh Kawrlum phiar zangkhai hmel tak a sen lar hlar a ha a.A sam tawn loin a thlah vek bawk.A hmeltha takzet.Mahse, a hmelah hian Ramsey te lam tumah chhun a nei lo.A nu hmelthat dan tur ka lo ngaihtuah leh  hmanhmawh bawk. Ka hawi kuala,hmeichhe pakhat Hani bula lo thu bak tumah dang ka hmu lo.

‘Come..Enge i lo tih a?” pan hnaih pahin Ramsey-an a ti a.A hmel a dam thlupa,a duatzia tur a hmel leh a awmdan atangin a hriattheih vek.

A rawn kal hnai leh hrat,a Pa nghawngah a kuaha.A pawm kang nawlh,a samah a fawp zauh a.Hmuhnawm ti em emin ka lo en thung.A pa dar kar atangin min rawn en kara,hmeichhe naupang fing lutuk a ni tih a hmain ka hre tawh.Vawi tamtak Savio titi tui ber siamsaktu a ni tawh miau a.

‘Buati,khawnge midang?” hmeichhe lo thu hnenah a ti leh a.

‘Seniorte Inah Pi a kala,Pu a chhuak..’ a ti a.A rawn tho chhuaka.A tawng danah Mizorama piang a ni lo tih a rinhriattheih mai bawk.

‘Um..Bawihte,u Buati bulah lo awm leh lawk la’tihpahin a dahthlaa.Min rawn en a.

‘Lo kal la,ka inthlak lawk ang’ a ti nghut.

‘Tah hian ka lo awm ang…Ok..’ a mitmeng tur zet ka hmuh takah chuan ka tih zawm zat.Inhnial a duh lo tih a lang reng bawk.

Living Room sir a Corridor niawm tak awmah ka zui phei dat dat,lang thei lo chinah Inhnuai panna step a lo awm reng chu niin..A chhukthlaa,engmah sawi loin ka zui thla ve dat dat bawk.Step tawpah Corridor lian vak lo a lo awm leha,kal pahin ka hawi kuala,Corridor bangah frame nalh zet zet mumal takin a intar khat vek.Room kawngkhar pakhat kan kalpelh hnuah a ding ta chut.

Kawngkhar a hawnga,ka tim leh deuh titih.‘Lo kal la…’ a ti sup.A lut zui nghal chu a ni der.

Muangchangin ka pen lut ve a,Room zau hek hawk chhunga ka din rualin Khum lian tha zet,lo inkhulh dulhin ka mit a la hmasa ber.Ka kal pheia,Khum piaha Hnangtah chair lian leh nalh zeta awm  chu ka pan ding nalh.Ka thu thla nghala,mahse ka tang nasa lutuk.Hahdam turin keimah leh keimah ka inhrilh ru mawlh mawlha,awmzia a awm lem lo.

‘I pheikhawk kha phelh la..’ min rawn en pahin a ti leh sup.

‘Aih,ngai lo..’ka chhang rang lutuk.A dar a tisang uka,a then suk bawk.

‘Ka ei dawn hleinem che..’a mitmeng thim raih maiah chuan min chhaih tih ka hmuthiam vek.Ka then ve sak ringawt.

‘Min thlah vat zawk la..’ ka tita zawk.

‘I pa hnenah khan zanah chauh kan haw ang ka ti a’ ka en vat.Mahse,min en loin a kamiz kilhna a phelh mawlh mawlh thung.

‘Ka pa maw?”

‘Aw,ka kal hmain Bank ka kal zuai,ka hmu a’ a ti awlsam leh mai.Ka thaw hak ringawt.

‘Enge kan tih anga?”

‘I duh duh…’ a kamiz a phelha.Rang lutukin ka hawisawn vat.

‘Duh ka neih pawh ka hre lo.Mahse,kan haw ta tho sia,in a haw tlang mai ka duh a’ ka ti sap.Ka bang hrui ka sik nauh nauh bawk.

‘Keiman tihtur ka hria alawm..’

‘Eng?”

‘Nakinah i hre mai ang’ a ti duh lek.Min hnungchhawn zawngin a dinga,kamiz ha loin kekawr chauh a haa,a dar pharh hlai hlap leh a kawng fek rat chu hmuhnawm tih loh rual a ni lo.Mizo mipa zingah palian leh pian nalh tak tak an tam tawh.Mahse,tumah hi nalh tih leh hmuhnawm thlirin ka lo la thlir ngai lova,Ramsey ang em a hnaihchilh pawh hi ka la nei ngai lo.A kekawr phelh tumin a kawnghren a vuana,hnuai lam ka en vat.A bulah ruakin ka mu tawha,a taksa lum ham ham nghengin ka riak zankhua tawh bawk.Mahse,tiang hian ka hmuchiang lo thung.

Ka phone ka phawrhchhuak ta ngawt,khawih ber tur hre loin ka keu kual sek ringawt.Ka rilruah Savio a lo lang thut,Inah a awm em ka hre lo.Ka be dawn uka,ka rilru ka thlak leh ta zawk.Ka bia anih chuan ka awmna min zawt ngei anga, dawtsawi ngawt mah ila Inah a lo awm si chuan Ramsey nen kan chhuah hunah min hmu palh thut thei tlat.

Kawngkhar kik thawmah ka hawi chhuak vat,ka bul lawkah Ramsey a lo ding reng tawh bawk,a lo kal hnaih lai ka hre eih lo zui.A thle buka,Kawngkhar lam a pan ta zawk.Kawngkhar a hawnga.

‘U Mama,Hani hi a tlua,a ha a tauh a”nichina hmeichhia kha a ni tih a tawng thlukah ka hrethei mai.

‘Maw? Khawimaw ka lo en’ a ti hmuk. Ka dingchhuak nghal vat.

A rawn kai luta,an nulain a rawn zui lut bawk,a tap tihhriat takin a mit a hnawng deuh chapa,a cute ngang mai bawk.A malchungah a thuttira,uluk fein a en saka,tih ve tur hre loin ka lo hawi mawl vel mai mai.

‘Khawi lai nge na ber?” duatna aw a hriat tel theih.

‘Hei hi…’ tih pahin a ha hmai a khawiha.Dimtein a sawi saka.

‘A nghing lo hlauh anih hi,engtin nge a tluk theih a?” an nula hnenah a ti a.

‘Ui nen an inchhaiha,a nek tlu a…’ nidawn tak.Ka kal apiangin ui lian zet,uluk taka enkawl ka hmu deuh ziah.Ui ka ngainat loh vei nen a zaidam bawka ka hlau lem lo.

‘Ui nen an infiam hian en fimkhur deuh teh u.A lian bawk si nen…Api a lo haw tawh em?”A fanu en pahin a tih zawm zat.Hani’n a lu a bu vei nghat,a pa khabeah a khawih pah bawk.Ramsey hmel damthlap leh landan danglam vek chu ka en vang vang.Hetiang ang hian a fanu bulah bak a lang ngai pawn ka hre lo.

Inchung lamah kan inzui chhoa,Hani a pawma,a hnungah an nula nen kan kala.Ramsey nu ka hmu hreh hluah hluah.Engtin nge min lo dawnsawn ang ka hrethiam lo.Mahse chiang taka ka hriat chu lawm takin min dawngsawng dawn lo a ni tawp mai.Nidangah min be chhe ngai lo mahse tunah chuan a fapa bialnu ka ni tih a la hre thuai ang..Bialnu..Ni e, bialnu..

‘I va lo haw leh hma si ve’ Ramsey hnenah a lo ti nghal a.Min rawn en zawk,a nui sak bawk.Mak takin ka hahdam deuh huai.

‘Nia,kal chhuah leh ngai a awma..Bawihte,I Api bulah lo awm rawh aw’ tih pahin a nu bul lam a pan pheia,a Piin a pawm veleha,a lian tawha,pawm em em ngai tur a ni tawh lo.Mahse an neihchhun a ni a,kehthei dawmin an dawm niberin ka hria.

‘Nu..Zorini..I hria tiraw?” min rawn en a.

‘Um,hria e..” a ti awlsam mai.Min rawn en leha,a nui leh var var bawk.

‘Aw..Anih kan kal aw..Zorini thlah hmasak angai a’ a ti leh a.A tawngduh lo viau nangin nufa inpawh tak anni tih hai rual a awm lo.

Gate kan chhuahsan chiah tihin ka thaw hawk mai.Ka lo insehruh nasat zia ka hrechhuak chiah bawk.Nidangah pawh ka kal fova,tiang em em khan ka zam ngai lo.Jail tang niberin ka inhria.Ka mit ka chhinga,hahdam thei ang berin nghenchhan ka ngheng ar ar bawk.Vawiin chu thil a thleng chak lutuk,engkim mai kha mumang ang ruai a ni tawp mai.Mahse,ka nunna a vawikhat nan mi pangngai niin ka inhre ve ta hial mai.

Motor ding datah ka mengchhuaka,ka hawikuala.Kan inlam kan la pan ta chuang lo cheu.Ramsey ka en a,chhuk tumin kawngkhar a lo hawng mek.

‘Khawnge i kal dawn?” ka ti sap.

‘Thil ka lei lawk dawn,Mamawh i nei em?” a ti awlsam mai.Kan dinna kawngchhak lam a kawk zauh bawk.

‘Aih,engmah angai lo’

Minute 10 hnu velah a lo rawn leta,Paper bagin eng eng emaw a rawn pawm tun bawk.Seat hnunglam a hawnga,a dah luta.Eng chu a lei ni maw? A nu khan engmah a chah ka hre miah lo.

‘Khawnge kan kal dawn?” a rawn thut luh veleh ka ti sap.

‘Inah…’

‘Eng a? kan kalsan chauh kha’ ka ti ha mai.

‘Keima Inah,Kan chhungkaw in ni loin’ a then suk.A sawi awmzia ka hriat takah chuan ka bu ngauh ringawt.Ka pa hnenah zana haw a dil anih chuan Ka pa tan pawh min hauh ngawt na tur a awm lo mahna le.Anih ngawt loh chuan ka awm mai mai pawh hi thiltisual sa ang reng ka ni miau a.

‘Enge kan tih dawn?” reife kan ngawih hnuah ka ti leh ta nge nge.

‘Chaw kan ei anga,a tul leh thildang pawh’ min rawn en tih ka hria,mahse pawnlam ka thlir lui tlat.

‘Inneihnaah khan kan ei thei reng sia’ ka ti leh a.

‘Um,nia..Mahse, ka duh lo’ a ti nghut.

‘Ngati nge?” ka ti satliah.

‘I bulah awm ka duh,Kan pahnih chauhin ’ a ti thawp sut..Chhan mai dan tur hre loin ka ngawi zawk.Kan thlen hma chu tumah mah kan tawng ta lo.

‘Inthlak la’ kan thlen hnuah a ti nghut.

‘Ngai lo,nakinah inthlak leh tho angai dawna’

‘Uh,a va fair lo ve..Keiman eitur ka siam vek angai dawn a ni maw?” a nui hawk bawk.Ka nui ve hak tho bawk.

Chutiang lam pawh a ni lo.Ka pheikhawk hi ka phelh anga,ka siampui thei vek ang che,mahse keimaha ka siam chuan i ei duh lo ang’ ka tita duah.A nui leh suk.

‘Ok,a tha vek..Ka siam anga,min pui ang..A tha em?”

‘Ka pawm zawng tak’ ka then leh sak bawk.

Kal kawngah khan eitur siam awlsam chi a lo lei nual a.Chaw ka chhuma,anin chawhmeh lam a siam thung.A sawi ang tak takin puan nena chet ka ning ta thuai,ka inthlak ta nge nge.Kan eifel meuh chuan khua a thim chiang tawh viau.Thleng seng min pui veka,sil erawh keiman ka sil thung.

‘I la zo lo mi?” ka hnung lam atangin ka kawngah a rawn kuaha,ka nghawngah a hmui lum thar tharin a rawn nawr nghal dun dun bawk.Ka mur ar ar a,ka thawk a sak nghal talh talh mai.Mahse,a hriat ka duh lo tawp.Min khawih hleka ka danglam nghal ziah hi mipa tianga ka awmpui ngai loh vang a ni ngei ang.

‘Zo…zo chiah,ngatinge?” ka ti bah nak mai.Ka bengkawm a fawp leh a,a thaw lum ham ham chuan engmawti takin min fan raih raih bawk.

‘Ka ngai che’ a ti sup..

‘I over em mai’ ka ti sap ringawt.Zawitein a nui hawk..Ka awmdan a dik lo nasa zual sauh,ka khup a sai dar dar a,ka ngheng titih bawk.

‘Over..Naupangchhia reuh lutuk..’ a ti leh sup.

‘Ramsey…’

‘Um..Sawi la’

‘Ih…Nakinah hrehawm i la tih ka ring a,kan tawp mai zawk a that ka ringa’ zawi sepin ka ti chhuak halh mai.

‘Tawp tih tawngkam hi ka hua…’ a ti nghut.

‘Ka tihchhan chu..Ih,eng lo..Nichin khan an sawi kha i hria tih ka hria,khatiang kha ka chungchang mi zawng zawng sawi dan a ni a,I la zak fo dawna…’ ka chil ka lem leh rih.

‘Chuan…’ a ti sup a..Ka bengkawm a fawp leh zauha,ka darah a hmai a phum nghal vang vang bawk.

‘I nihna nen a inmil lo a,I zahna ka thlen fo dawn che..Nuam ka ti thei lo.Insiamtha eng ang pawh ni ila miin ka nunhlui an hrereng tawh dawna’

‘Min en teh’ a ti nghut,ka che chuang lo.Ka kawng a kuahna a phelha,a kalsawn dawn emaw ka ti hman.Mahse, amah en thei turin min kuai her ta zawk.

‘Ka duh chu ka duh animai,keimah ka chiang.Tu pawn an sawi anih chuan ka an neia,an thu animai,mahse ka hriat laia an sawi anih chuan a sawitu tan a pawi viau zel ang’  a thutak lutuk mah mah.A ti ngei ngei dawn bawk tih a chiang vek.Mahse,khang a staff te kha engtin nge niang? Ka chanchin an sawi avang ngawtin a ban anih chuan a dik lo hulhual,a fair lo lutuk bawk ang.

‘Enteh…I staffte chungah khan engmah ti lo la ka duh,an sawi tur a tam zual mai mai.I hmingchhe lutuk ang’

‘Anih chuan ka dawh mai mai dawn tihna mi?”

‘A vawikhatna chauh ala ni a..Bakah an sawi kha dawt pawh a ni lova’

‘Shh..I rui thin pawh a ni thei,mahse,Sex vangin nang hian min zui lo..A sawitu che ai khan i thianghlim zawk’ ka insum hman lo..Ka mittui a rawn tlaa,ka biangah a luangthlaa,ka insut hraih bawk.

Ka biang tawn tawnah a rawn vuana,amah en thei turin min kuai dak nghal zat.A rawn kun hniama,a tihtum hriain ka mit ka chhing nghal chial..Dimtein ka biangah a rawn fawpa,a kut zungpuiin a tuai hauh hauh bawk.

‘Eng ang pawn lo khawsa mah la keiman ka ngaipawimawh lo anih chuan tu sawi mah ngaipawimawh suh,ka nu leh pa hnenah ka nei dawn che tih ka sawi tawh.Min hnial lo..’

‘Mahse…’ka hmuiah a kut zungtangin a rawn khawiha,a thle buk bawk.

A rawn kun hniama,a hmui chhah tapin ka hmui a rawn si a,zei lutukin a nawr kau nghal zat bawk.A kawngah ka kuah ta nge nge.Mipa ka fawh hmasak ber leh awmchhun a la ni a,ka zei loh dan tur ka ngaihtuah ngam lo.Chhan let phut in ngenngawl zetin ka hmui hnuai lam a rawn pet a,ka chhang let ve nghal zat.A rum hawka,min pawm kang nghal nawlh..Tlak hlauin a nghawngah ka kuah nghal chial bawk.

Thutthlengah min nghat,min rawn delh bet titih,min rawn fawp zui lehnghal zat bawk.Ka awmdan a chiang lo ruai a,engmah pawi tihna ka nei lo.Ni lo,ka ngaihtuahna a fim lo a ni zawk mah.Ka kawr hak a rawn zena,ka kawrhnuai chhanah ka hnute a rawn khawiha,ka mar deuh awk bawk.Ka  hmaiah a rawn khawih a,amah en thei turin min kuai dak leha,a mit thim raih maiah chuan a duh a lang vek.Ka kawrhnuai a nawr chhoa,a kut lawngin ka hnute a khawiha,ka tum loh lutukin ka rum nghal hak mai..

‘Tawp turin min duh em?” a ti sup.

‘Aw…Aih,ka hre lo…’ ka ti bah nawk nawk mai.

A rawn kuna,ka chalah a rawn fawp vang vang.A kut a lachhuaka,inthunun a tum a ang viau bawk.

‘Ka ta i ni tih theihnghilh suh ang che’ a ti supa,min rawn fawp zui lehnghal vang vang bawk.

In kan thlenin dar 8 a ri tawh,inkhawm zan a ni lo bawka Ka pa leh Nu hmingi an lo awm ve ve a.Keimah chauha haw loin Ramsey nen kan ni bawka,an hmel hmuh a nuam viau.Ka inthlak chhungin Living roomah ka pa nen an lo titi tui duna,Sumdawnna lam an lo sawi tui viau hman.Eng angin nge ka pain a hmuh ka hre lova,mahse hetiang mi ka bialpa a nita mai hi awih har a tih viau ka ring  ve ngawt.

‘Hello’ ka thil tih lai chawl chuang loin ka ti zangkhai vah.

‘I insiam zo tawh em?” Mimi awin a rawn ti lang lang.

‘Awm,ka hman tep..I hman tawh mi?” ka ti a.Ka bagah ka thil ken tur ka khung pah mawlh mawlh bawk.

‘Peih animai..Ka sawi tum zawk chu Zami a lo kal ve leh dawn thut sia,Scooty ka keng ve mai ang’

‘Ok.A pawi miah lo.Kan inzui mai dawn nia’

‘Um..Bye phawt aw’

‘Bye’ ka ti sap.

Khumah phone ka theh thlaa,ka kawr ken tur duh loin ka thawmhnaw dahna lam ka pan leh a,ka T-shirt dahna atangin a dang ka lachhuaka,ka hmanhmawh bawk nen a dang a rawn tla tel teuh,Ka phun hlak ringawt.Ka char khawm nawk nawka,ka hnawh chho a,ka lak kim loh ka zuk chhar leh dawna,Ramsey T-shirt ka hmuh takah chuan ka thu sawp thla hnak..

Kan inzui atangin thla hnih a tling ve der tawh,a sawi ang tak tak khan a nu leh pain min pawm thlap.Ka chanchin mawi lo tak tak an hre lo emaw tihmai turin min hmuh apiangin tha takin min be thei ziah.Anihna takah chuan Savio aia min hrechiang an la awm ta chuang lo fova,ani hian a sawi duh anih phawt chuan an sawi ang hi ka ni lo tawp tih an hre ngei ang.Ramsey nen kan inzui tih a hriat atangin ka hriatthiam chiah si lohin kan inhlat tial tial ni berin ka hria.

Nun pangngai neih tumin ka bei nasa a,thinrimna ka neih te pawh zu nena hman ai chuan ka tuar tlang pawp zela,ka tuar thei viau zel.Tunah phei chuan Mimi a lo haw tawha,kan inkawm tam leh ta viau,Savio a awm lo bawk nen kan thian dang ho phei chu ka hmu ngai mang lo.Nu Hmingi’n hnawk min lo tihzia ka hrechiang tial tiala,ka awm that duh loh lai pawh khan pawi ti em em anga lang si khan ka chanchin sawi nuam a lo tih zia ka hre tam tial tial bawk.Savio nen hna kan dil tur kan pamtul ta thak,engmah tih em em nei loin nitin inah ka awm a,Luni ka pui a,tihtur a awm loh chuan ka pute ka tlawh loh leh lehkhabu ka chhiar mai zel.

‘U Zorin…’ Kawngkhar rawn hawn pahin Lun’in a rawn ti a.Ka tho nghal vat.Ka thawmhnaw bawmah Ramsey kawr leh kawr dang ka ken ka hnawh lut nawk nawk bawk.

‘Eng nge? Mimi a lo kal tawh mi?”

‘Ka hre lo,Inchungah ka awm daih alawm..Enteh hei hi Pot hnuaiah ka hmu a’ tih pahin Polythene dum a rawn khai chhuaka.

‘Eng nge a?” ka ti awlsam mai.

‘Ka hre lo.A chhungah hian lehkha pawimawh niawm tak a awm a’ tih pahin min rawn pe a.Ka  laa,a suihna ka pawt phelha,a chhunga thil awm ka lachhuaka,uluk fein a intuam thlap.A tuamna ka phelha,engthil nge ni a tiang taka uluk a an tuam ni a?uluk hle siin Pot hnuaiah an dah leh lawia..

A chhunga awm ka hmuh takah chuan ka thaw hawk mai..Ka pa Cheque leh Dawr hminga Ac an siam cheque bu a lo ni a,ka keu a.In sign sa a awm nual bawk.

‘Eng nge a?” Luni’n a rawn ti a.Ka phu zawk.

‘Enteh,hei hi ka pa thilpawimawh anih hi..’

‘Anih chuan ngatinge Pot hnuaiah a awm le?” angaihna hre lo hmel fein a ti nang nang mai.

‘Ka hre bik lo..Engtik nge inchungah I kal tawp ber?”

‘Zingah ka kala,pangpartui ka pe alawm.Nidangah chuan Piin a pe ziaha’ ka harh zawk.

‘Anih chu..Ka hmanhmawh lutuk,ka pa nakinah ka pe mai ang.Chuan maw engmah lo sawi suh aw’

‘Um..’ a ti a,a bu nghauh bawk.

Luni chhuah veleh Ramsey ka call nghal zat.Zingah a kal dawnah min lo biaa,abak kan la inbe leh ta lo.A buai thina,msg type neuh neuh a peih loh mai bakah hun a nei lo.A hman veleh min lo call mai zel zawk.A pick lo..A buai anih ringin ka call nawn duh ta bik lo..

Hmanhmawh fein stepah ka tlanthlaa,Mimi ten min lo nghak reng tawh.Mimi te Dil sah naah kan kal dawna,zingah atam zawk an kal tawh a.Zingkarah Mimi’n tih ngei ngei ngai aneih avangin kan kal ve hman ta lo.A hmun kan thlen thlengin Ramsey-an min lo la call back ta lo cheu.

‘En lawk teh’ tih pahin ka hmai bulah a phone a rawn keng hnaia..

‘Eng nge?”

‘En la…’ a ti nghat,ka zuk en a.Ka lum nghal pup thei hial..Hei vang chiah hian anih hi min lo call back loh..Ka call kha a hre lo ni loin a pick duh lo anih ka ring ta zawk..Hrep taka..