22/AUGUST- 15

Chapter- 15

‘I chiang em?” ka tichhuak thei hram.

‘Aw,mahse ka chhuak lehnghala..Ngatinge?” a ti ha.Engkim a hrethiam emaw ka lo ti hman ngawt pek.

‘Aih,engmah…’ ka ti sap.

‘Eee,niminah Pi in a thil pawimawh dahna a theihnghilh tih a sawia,Polythene a tuam a ti a.Mahse,engmah sawi suh i tih vang khan ka sawi lo a.Aaa,kha chu Pu thil pawimawh zawk tiraw?’ a ti leh a.Ka bu nghat.

‘Anih si chuan enge a zawn ang le? Amak e,tunlai chu Pu thilbo atang khan bo a awm leh tawh sia,min ringhlel angem le?” mangan hmel fein a ti leh a.Ka chil ka lem hmasa te te.

‘Ka hre lo le,ringhlel lo ang.A thil dahna a hriat loh vangin ami ka room a haia?” ka ti hlak.Nizan khan ka nunah a vawikhatna takmeuh thil ka tawnga,ka room awmdan lamin ka ngaihtuahna a luah eih lo.Nidangah chuan ka thil dahdan danglam hlek pawh ka hre thei deuh ziaha,chumai bakah a tul fe loah chuan midang an lut ve mang lo bawk.

‘Ka hre lo..Mahse, Pot hnuaia mi kha nita ang se khalaiah kher han dah chu a mak ka la ti’ a ti leh niah niah.Ka thle bak ringawt.

Room lamah ka kalsana,ka thawmhnaw dahna ka hawng nghala.Luni khan a sawi dik thlap.Engkim a remtha leh vek nangin ka kut hnu erawh a ni lo tih ka chiang.Mahse,a hmu lo tawp ang.Savio kutah a awm daih miaua.Thil hriatchuah ka nei.Ramsey an engvangin nge Nu Hmingi cheque chungchang a sawipui ang? Luni khan a thilchhar kha min pek hmain a en em ka hre lo.A suihna ka phelh khan a nghet lutuka,ka hawng lawk thei lo kha nia.Anih chuan a en hmasa lo tawp ang.

‘Hello..’ thawp sutin a rawn ti a,atthlak zetin ka awmdan a danglam nghal titih.Ka biang a sa nghal hat hat bawk.

‘I buai em?” sana en zauh pahin ka ti a.Nidang ang anih chuan Gym atangin a haw a hun tawh zawk.

‘Buai lo..I tha em?” a ti leh sup.

‘Aw,ngatinge?”

‘Nizan vang khan…’ ka biang a sa nghal hut hut thei.

‘Oh..’ ka ti sap ringawt..Ka hmel a hmu thei lo ka lawmzia chu pui tak a ni ringawt.A hunlai ai khan ka zak zawh mah tawh..Huizz..

‘Keichu ka muhil thei lo a’ a aw pa leh cool zet chuan min fan rawih rawih thei.Ka hmu ka pet nghek.

‘Ih…I la tho lo mi?” sawi tur ka haihchham vek.

‘Aih..Sawi la..’ a ti leh sup.

‘Vawiinah hun i nei angem?”  pangngai thei ang berin ka ti a.

‘Eng turin?’

‘Ih…eng lo,thil…’ ka sawi hmain a nui hawk ri ka hrethei.

‘Sawi duh suh,min ngai anih kha…’ ka hmui ka pet leh nghek ringawt.Chimawm lutuk,engtin nge ka hmuh ngam ang ni a?

‘Lunch ei dawnah ka free ang.Dawrah i kal leh dawn em?” amah bawkin a rawn ti leha.

‘Aih,kal dawn pawh ka hre lo..’

‘Ok,anih chuan Inah ka lo kal ang,enge ka lo ken ang che?” a ti leh sup..

‘Engmah angai lo..’

‘Takzet?”

‘Um.Ka ti tak tak’

‘Ok,ka’n inbual lawk ang’

‘Bye’

Khumah avang zawngin ka mu a,chunglam ka en vang vang.Ka mitthlaah nizana kan awmdan a lo lang nghal zat.Mi tumah hi an nunah telve tumna ka nei ngai lo,an bialpate nen sex an lo hmang anih pawhin an Hmangaihte lakah an inpeah ka ngai mai.Thil dik lo ni mahse ka dem lem lo.Mahse, hmeichhe tamtak,mipa tupawh mutpui thei,Ks ni chuang si lo ka hre teuh,chutiang chu ka ni ve hauh lo nangin mi min hmuh danah hmeichhe lepchiah lutuk ka ni ve tho.Mahse,engkimah a hmasaber zel chu Ramsey a ni thung.Miin engtin nge min sawi ka ngaipawimawh lo,aman a hriaa,ka duhtawk.Ka thil tih kha a dik lo ngei,mahse mak takin pawi tihna ka nei lawi si lo.Pawi tih a hnekin ka engkim ka pek avangin nuam ka ti ngawih ngawih zawk.Nie,nuam ka ti..Chhan dang engmah a awm Lo.Ka hmangaih miau a.

Luni nen in kan tifaia,a hnuah ka thawmhnaw ka remfel leh vek.Ka lehkhabu dahna ka tifel leha,thil hlui eng eng emaw ka dah that en pahin chhuatah ka thu sawp a.Album pahnih chhah el awl ka inchhawp hnai bawk.High school ka kal laiin hmeichhe dang ang bawkin Boy Band ka atchilh nasa thina,an thlalak chi hrang hrang ka collect hi a.Album pahnih ngawt ka siam thei hial.A lunglenthlak takzet.

Ka phone riin ka ngaihtuahna ala peng ta chauh.Khuma ka phone dah tho chuang loin ka bana,min rawn call tu ka en a,Mimi..

‘Aw,thiannu’  ka ti a.Ka darah phone nawr beta,ka thil dah hnawk lam bawk ka en leh nghala.

‘Inah i awm em?”

‘Awm e,I lo kal dawn mi?”

‘I awm chuan lo kal dawn,thil ka en tir ang che’ a ti leh a.

‘Eng thil maw?” ka ti liam puat.Make-up bak a nileh lo taw pang,ka ngaihtuahna vangin ka then sak mai.

‘Ka lo kal hunah i hre mai ang,tha deuh nimai’ a nui hak hak.

Ka thil chhawp hnawk ho ka dahfel zawh hmain a rawn lut ve nghala,Paper bag a khai bawk.

‘I va in remtha nasa ve..’ a ti satliah.

‘Nia,a hnawk lutuka,ka pending char chara,vawiinah ka ti peih ta hram anih hi..Enge min entir tur chu?” ka tih zawm zat.Ka lehkhabu ken lai dahthat tumin ka kalsawn dawna,min rawn laksak vat.He lehkhabu hi Mizo Novelist kan neih zinga ka ngaihsan em em leh a thuziak ka duh berte zinga mi Zirsangkima ziah, RAMADA tih a ni a,a release tirh phatah ka lei nghala,vawi engzat nge ka chhiarchhuah tawh ka hre seng lo.

‘Hei i nei reng alaw? I chhiar zo tawh em?”a ti chhuak hliai mai.

‘Ka sawichhuak vek thei zawk ang chu le,I chhiar duh mi?”

‘Lutuk,ka lei ve em em a,ka chhiar hmain ka dahna ka hrechhuak zo hlawl lo’ a ti leh mawlh mawlh.

‘Kawl rawh,mahse ka ngaihlu ania’ ka then sak.

‘Enge min entir tur chu?” tih pahin khumah ka thu a,ka bawp ka khawkherh nghal bawk.

‘Eee..Ni tak,he lehkhabu vang hian ka lo theihnghilh hman tep alawm le’a nui hak hak mai.A bag a lakanga,a keu a.Paper a rawn phawrhchhuak a.Ka en theih turin khumah a rawn dah nghal bawk.

Eng nge anih hriat tumin ka lakanga,hna dilna..Sawrkar hnuaiah ni loin Private Company lian zet,Mizorama kumin kum tira rawn inbun fel te anni a,mahse englam hawi nge an hnathawh ka lo ngaihven ngai lem lo.An office hi Aizawl chhim lam,Daifem deuh a awm a ni a,kan tlanpelh zauh zauh avanga hria ka ni zawk mah.

‘Enge i ngaihdan?’

‘I dil dawn mi?” hawichhuah pahin ka ti a.

‘Dil dawn mawni ka ti,I dil ve duh lo mi? engmah ti loa awm ai chuan a tha zawk daih dawna” a ti leh a,a sawi dik.

‘Anih chuan kan dil ve mai dawn mi niang?”

‘Um,naktuk last date ania.Kan hmu kher ang tihna ni lo mahse dil ve pawp ang.Hmuh loh pawn engmah kan chan chuang lo a,ngai kan awh nimai’ a ti leh duah.

‘Ka pa te ka lo sawipui ang.Mahse, a phal chu ka ring sa tho’ ka ti leh a.A bu nghat.Kan pahnih hnihin hnathawh ngei ngei ngai khawpa harsa kan ni lo ve ve.Mimi pa hi Doctor a ni a,an fanu neihchhun ve tho a ni a,an duat em em zia ka hria,kei ang bawkin engmah thawh nei lem loin a tei vel mai mai ve bawk.A nau mipa tih loh a u mipa pahnih ten hna an nei ve ve tawha,awm mai mai pawh nise buaina a nei lo.Ka pa hian min ngaihtuah lo viau thin mahse thla tin ka Acah ka hman tur tlem tal a dah ziaha,a hranpaa dil ngai a ni lo bawka tam lo mahse ka duhtawk viau zel.

‘U Zorin,U Ramsey a lo kala’ Luni’n kawngkhar a rawn dah pahin a rawn ti a.Sana ka en zauh.Dar 1 a lo pel va tawh.

‘Um,kan lo chhuk nghal ‘ka ti a.Mahse,atthlak zetin ka hmu hreh leh titih.

‘Chhuk ila’ Mimi hnenah ka ngaihtuahna tilang lo thei ang berin ka ti nghal zat.A rawn tho a,ani leh ni lo angin hmelah engemaw zep ruk nei a ang viau.

‘Enteh..Ramsey leh Agnes-i hi an inthen tak tak em?”Kawngkhar bul ka thleng tawh,ka  ding chat.Ka hawileta,nuam lo tih hmel zetin a che sek bawk.

‘Kan inzui atangin thla hnih lai a liam tawha,ngatinge min zawh a?”

‘Aih..Ka hre chuang lo’ a then sak.

‘Hmanni vang kha ni em?”

‘Aih..Aw..Ni tho..Ih,diktak chuan Saii nau hi khutah khan kan in hmelhriat a,Inkawmngeih deuh chu kan ni lo.Mahse Ramsey te chanchin vel hi sawi nuam a ti thei tawpa.Ramsey hian a then thei lo tih vel’ a tita duah.Ka mitthlaah Saii a lo langa,Agnes-i best a ni a,Naupang tein Magistrate a ni a.Agnes-i ang bawka lian lem lo tak,mahse langsar zet a ni a.Ka hmuh hmasak ber atangin ka ngaina thei dawn lo tih ka chiang nghal thlap bawk.

‘Ka hre lo le..Inhnuaiah amah a awm chu,zawt ila..’Ka nui lui sak.

‘I ti ho em maia,engtin nge ani kan zawh theih anga?”

‘Ka fiamthu nih kha..Saii nau sawi chu a dik nachen pawh a awm maithei a,mahse tunah chuan keimah nen kan inzuia,ka ngaipawimawh lo..’ mahse,anihna takah chuan  Agnes-i tel ve tawhna apiang over khawpin ka ngaipawimawh.Ka thiannu ber pawh nimahse hriattir ka duh lo mai zawk.

‘Nia,keipawh ka hmuh danah chuan Ramsey hian a duh hlawm tawp che.Mahse, ka thiannu i ni a,I hlimna hi engemaw mai mai vanga a chhiat ka duh lo alawm’ a ti leh halh.

‘Ka hria lawm..Ka lo na ta hlauh anih leh i bulah ka tap nghek mai ang chu’ ka nui leh a.A nui ve ta nge nge.

Phai atanga a lo haw hnuah kan inkawmngeih ta tak tak,Savio nen kan inpawhna nen erawh tehkhin chi a ni chuang lo.Mimi hi hmeichhia anih angin ka ngainnaa,Savio erawh amah anih vangin ka ngaina a ni tawp mai.Rin zawk tur thlang dawn ila thlan tur ka hre lo maithei thung.Mahse, an pahnih hnihin Ramsey nen kan chungchang ka share tam lo ve ve.Ka rin loh vang ni loin keimah a thil tam zawk pai nuam ti mi ka nih vang a ni ber.

Living roomah a lo thua,kan chhuk thawm hraiin a rawn hawichhuak vut.Ka melh zawka,rang lutukin ka hawisawn lehnghal vat.

‘I hmanhmawh em?” ka ti a.

‘Dar 3ah mi hmuh tur ka neia,chu bak chu hmanhmawhthlak a awm lo.Mimi,I tha maw?” zangkhai vuhin a tih zawm zat.

‘Aw,tha lawm..Ka kal mai aw’min rawn en a.

‘Ngati maw? Thil ei phawt ila’

‘Aih,Dawr kal pahin ka lo kal zuaia,ka nuin rei min ti tawh viau zawk ang’ a nui a.

‘Ei chhung a rei hleinem’ ka ti leh talh.Atthlak zetin Ramsey nen chauha awm ka huphurh ru tlat bawk.

‘Aih,nidangah animai.Chuan,thil kha theihnghilh suh aw’ a ti leh a.Ka bu nghauh,kawngkhar thleng ka thlaha,keimah leh keimah zam lo turin ka infuiha,naupangchhia lutuka chet ka mamawh loh zia ka inhrilh ru mawlh mawlh bawk.

‘Enge eitur ka siam ang?” ka ti a,a nui suk.

‘Engmah angai lo,ka lo keng alawm’

‘Maw?”

‘Ka lo keng,min chah lo mahla i duhzawng ka theihnghilh hleinem’a ti leh a,a then leh suk.

‘Ei ila,ka ril a tam lutuk’ zahzelah ka ti leh ta ngawt,ka riltam leh tam loh ka hre nek lo.

Kitchenah kan inzui luta,a eitur rawn ken ka hmuh takah chuan ka chil a put lo chauh ta thung,Luni nen kan chhawpchhuak a,Thingpui a lo lum sa vek tawh bawk.Inbe mang loin kan eidun ta mawlh mawlh.

‘U Zorin,I chhuak dawn em?” Luni’n a ti a.

‘Aih,ti nge?” ka plate ka nawrsawn pah bawk.

‘Anih chuan ka chhungte thil thawn tur Chanmariah ka va dah lawk thei angem? Kan khua amite an lo kala’ a ti a.Ka bu nghauh.Kan thil eina sengfel a tuma,mahse kalsan turin ka tita zawk.

‘Ka lo haw har lo ang’ lawm zetin a ti a.

‘Hmanhmawh suh,I chhuak khat em mai.Tlai lam chu eirawng ka lo bawl dawn nia’ ka sawi zawh raulin Ramsey nui hawk ri ka hre zui zat.Ka en vat,hahdam hmel zetin Chair hnung a ngheng a.A hmelpa zetah nuihzatna a lang chiang viau bawk.Ka eisiam thiam loh zia a hrechiang lutuk,mahse lo nuih kher angai lo..Ka theihtawpa rumin ka en a,ngaipawimawh lo zetin a dar a ti sang uk duh lek.Tihngaihna hre lo lutukin ka lei ka chhuah khum zauh ringawt.Nuihza insum tih hriat zetin a hmui a petsawi zauh thung.

Kan thil eina ka sengfela,ka sil nghal vek.Ramsey erawh Living room lamah a awm thung.Luni a awm ta bawk si lo nen ka tang ru leh teuh tawh mai.Apron ka hlipa,Living room ka pan pheia,min hnungchhawn zawngin Tukverh bulah a lo dinga,a kut lehlamin a kekawr ipte a zena,lehlamin phone a beng bulah a kenga,tuemaw a be mawlh mawlh bawk.Nidang ang bawkin a dress a inhmeh lehpek.Cotton jeans uk eng lam a haa,T-shirt chungah kawrlum phiar,hmaphel zangkhai hmel zet a dum a ha bawk.Loafers a buna,engtiklai pawn a nalh thlup zela,eng thawmhnaw pawh inbel se a inhmeh vel vek nimaiin ka hria.

Sofaah ka thu a,ka ke ka hlang at bawk.Tu nge a biak ka hre lo nangin a tawng danah a Staff te zinga pakhat anih ka ring ve ngawt.Kan inzui tirha ka chungchang sawitu Staff pahnih te kha ka ngenna vang nge ka hre lo.Hna tun thlengin an la thawk ta zela,loh theih loh na avangin vawi hnih ka kal ve tawha.Remfela ka hmu ve vea,mahse min hmu lo der tlat thung,biak luih talh ka tum bik hek lo.

A be zova,a rawn inhera,a then suk bawk.A rawn kal pheia,ka bulah a rawn thu thla ve nghal bawk.

‘I tha tak tak em?” a ti sup.

‘Aw, tha lutuk..Hani te engtik nge an lo haw ang?” ka ti a.

‘Naktukah…’ a ti tawi tuk.Ka sam chhawleng ka bengah a rawn zepa,ka beng a tuai zauh bawk.Ka thaw hak mai,engvangin nge maw pangngai taka ka awm theih hlek loh ni?

‘Thil zawh duh che ka neia’ ka ti sap.

‘Um,sawi la…’

‘Ih..Eng lo…’ sawi tan mai dan tur hre loin ka chil ka lem leh te te.

‘Dik lo a awm em?” a ti nghut,a rawn thu ngila,ka biangah a kut lehlamin a rawn vuana,ka hmui sir a kutzungpuiin a rawn tuai a.

‘Aih, chutiang a ni lo.Hmana ka pa Cheque bo kha i la hria em?”ka ti sap.A mitah tak ka en ngar bawk.

‘Um…’ a ti sup.

‘Kha kha ka hmuchhuaka…’ a hmelah danglam a awm em tih ka ena,engmah danglam zeuh pawh a awm lo.

‘Chuan…?” a ti sup.

‘Nimin piah khan Luni’n inchung Pot hnuaiah a hmu a,tu dah nge ka hre lo a’ka ti leh a.

‘Pot hnuaiah..Ok..I pa i hrilh tawh em?” a ti leh nghut.

‘Aih,hrilh ka duha,mahse engtin nge a ngaih ang ka hre lo a…Nangmah lo hrilh che ka tuma,phone i pick lo a’ ka tum loh tawpin ka awah titau aw a hriattheih.

‘Engtikah nge min lo call a?” mak tih hmel deuhin a ti sup.

‘Mimi te Dila kal tura kan chhuah hma khan..Mahse,a pawi lo..Engmah i ti thei bik lo ang tih ka hria lawm’ ka ti nghat.

‘Um,tithei lo maithei..Mahse, I duh chuan ka ti thei reng’ a hmui a tisawi zauh bawk.

‘Ka hre lo le,bakah kan chhungkaw thil ania,I tel ve duh angem ka hre lo’

‘I duh phawt chuan tupawh ka hmachhawn thei..Anih leh enge buaina ber?” a ti leh hmuk.

‘Ih…Niminah ka awm loh laiin Nu Hming’n ka room a hai let chiam tih Luni’n a sawia..Chuan…’ ka chil ka lem leh rih..

‘Hetah ka kala,I nu hrawn nen roomah kan inbia tih a hrilh bawk che a tiraw?”ka ang pham mai.

‘Nangman i sawi thin kha,engmah hi pawnlam landan ang ngawt a ni lo tih kha..’ amah bawkin a ti leha,a rawn kun hniama,ka chalah a rawn fawp vang vang.

‘Ngatinge i hmuh a? eng sawi turin nge i biak angaiha?” reife kan ngawih hnuah ka tichhuak sap.

‘Cheque chungchang bawk kha..Abak engmah a awm lo’

‘I lo hria tihna a ni em?”

‘I hmu tih maw? Aih,hre lo..Mahse, a hma atang tawhin ani hian engemaw tak a ti ang tih ka hria alawm..Hahdam rawh,engmah i tana tha lo a ti zui lo ang.I duh phawt chuan i Pa pawh keiman ka lo bia ang’ a ti leh duah.

‘AIh,keiman ka be mai ang’

‘Ok..I tih dan dan le’ a ti leh a.Min pawt hnaia,a awmah ka hmai ka phum ta kak.Nu Hmingi nen enge an sawi tak engmah a sawi zui lo.Mahse, ka chhungrilah hian rinna mak tak,ka sawifiah thiam si loh a awm tlat a,ka thawveng hawk tho.

‘Mambawih,vawiinah dawr lamah i rawn kal ve leh dawn mi?” Ka pain min hmuh veleh a lo ti a.Tuktin a tih thin danin Vanglaini news paper, thingpui in pahin a lo chhiar mek thung.

‘Naa,Nu Hmingi a hman lo leh mi?’ thut ve pahin ka ti a.

‘Hman e, anni pawh awm mahse i lo kal ve ang chu ka ti mawle” a ti leh a.

‘In indaih lo viau loh chuan ka lo kal lo mai ang’ Ka hawikuala,Nu Hmingi ka hmu lo.

‘Indaih lo lam ai chuan i zir ve tha ka ti mawle,tihtur i nei ami?” a ti leha,min en loin Vanglaini a bih daih bawk.

‘Ih,hna ka dil ve dawn mawni ka lo tia,nizan khan hrilh che ka tuma,inleng kan nei ta sia’ ka ti a.A chanchinbu chhiar lai a dahthlaa,min rawn en a.A tarmit a nawrchho zauh bawk.

‘Eng maw i tih?”a awah mak tihna niawm tak a hriattheih.

Ka sawi ngai ka sawi nawn leha,Mimi nen dil ve kan tum thu leh an Company hming ka hrilh nghal bawk.A bu nghuta,ka rin lawk loh ang zawkin min hnial a tum emaw ka ti hman.

‘A tha lawm,dil la..Mahse, I tlin loh pawn hna i thawh kher angai lo a pawi ti suh,nakina tana inbuatsaih lawknaah i ngai mai dawnnia’ a ti dam thlup.Tawngka a chhang loin ka bu nghauh ringawt.

Luni’n thingpui min rawn pe a,in mai loin ka pa ka en leh a,a bek sam a tuak phauh phauh a,a hmai a zur ve tan ta bawk.Ka lo chik ngai lem lo a,tiang hian a lo lang upa ve tan tih ka lo hre lo mai zawk a lo ni.Keimah vangin rilru hahna a tuar nasaa,phurrit tak ka nih thin miau avangin a chauhpui viau thin in ka ring,Kohhran Upa a ni a,mahse ka awmdan avang khan Biakinah pawh a inthlahrung thin hial maithei..Ka rilru a siamfel vek tawh.Engpawh thleng se khatiang nunah khan let leh ka tum tawh lo bur.Ka rilruah cheque chungchang a lo lang zawk,Ramsey hnenah khan ka bia ang tih ka sawi nangin tun hi sawi hun niin ka hre lo.

Dar 10 velah Mimi nen kan in phur chhuaka,kan submit fel meuh chuan chawhnu lam a ni der tawh.Mi pathum lak tur anih laiin diltu erawh 100 kan chuang daih thung.Engmah Ramsey ka hrilh ta lo.Ka tling ta hlauh anih leh ka la surprise zawk ang chu.

Haw tlang loin Jojo’s cafeah thil ei turin kan lut kawia,kan hnuai kawnga Motor tawlh dul dul ka thlir thla dauh dauh mai. ‘Kan thahnem zia kha,Sawrkar hna phei chu an dil nasa thei tawp..’ a nui hak hak.

‘Dik chiah..Tlin deuh nalh chu a har ve khawp ang’ ka ti satliah.Kawngkhar lam ka hawia,ka beisei loh lutuk ka hmuh takah chuan ka thaw hak mai..Rang lutukin ka hawisawn nghal vat bawk.Ka awmdan hrethiamin Mimi ka hawina lamah a hawi ve nghal zat,a thaw ve hak tho mai.

Muangchangin ka hawi leha,kan thutna lo lam zawk pana Agnes-i leh Ramsey inzui phei mek  chu ka melh ngawt ngawt ringawt.