22/AUGUST- 17

22/AUGUST – 17

Tim daiin ka ban de de a,ka lakanga.Line hnih a sen kalh mai.Lawm tur nge lungngaih tur ka hrethiam lo,ka a huih rih niin ka hre ber,invenna lam reng reng ngaihtuah nachang ka lo hre lo a,Ramsey lahin engmah a sawi bawk hek lo.Vawikhat chauh a ni a, ka vawikhatna a  ni bawk nen ka rai ang tih ngaihtuahnaah a lang pha hlawl lo..Naupangchhia ni tawh lo mah ila ka ngaihtuah phak lo ve hrim hrim zawk.Ramsey ka mitthlaah a lo langa,engtin nge a dawnsawn ang ka ngaihtuah thiam chuang lo.Hria se ka tihna leh hre lo se ka duhna a inzat reng.

Ka pa,kohhran upa leh khawtlanga pa zahkai em em mai hi vawi tamtak zahna ka lo thlen sak tawh thina,tunah nun pangngaia nun tumin hmalam ka pan ve tan chauha,mahse tun dinhmunah hi chuan zahna bak ka thlensak leh dawn chuang lo tih ka chiang.Nu Hmingi tan lah lawma lam bak tihtur a awm lo.

Ramsey ka call ta nge nge,ka hrilh loh avangin engmah a danglam dawn chuang tlat lo..

‘Hello..’ a ti sup.Chawhnu lam a ni tawha,a buai zual lai a ni angem ka hre lo.

‘Naktukah hun i nei angem?” ka ti sap.

‘I tan chuan nei reng..Tunah pawh..’ ngaihthlak nuam zetin a nui hak bawk.Atthlak lutuki ka mittui a hnai nghal kuar thung.Ka rai tih a hriat hunah tun ang hian min la be tha tho angem ka ngaituah ngam lo.Pangngai taka tawngchhuah tumin thawk ka la vang vang.

‘Tunah chuan ka pute inah ka kal a hun tawha,naktukah hun i neih chuan animai..’ ka ti a, ka aw ka thian khauh.Tlaiah ka puin Family chaweikhawm ka rawta,kal ngei ngei ka ngai.

‘Ok..I thu vek alawm,Zanah Akimate Inneihna tur velah ka buai hmel a,ka lo be hman lo maithei che nia..’ a ti tha ve mai.Thla tharah Akima’n nupui a nei dawna,Ramsey bestah a hmang dawn tih ka hre sa tawh.

‘Um,a pawi lo..Keini pawh kan haw hma vak lo ang.Ka’n insiam ange’ ka sawi zawh rualin luakchhuakin min rawn hnawh thuta,insum hman loin ka uak nghal pawp bawk.

‘Ngatinge? I tha em?” min ngaihtuah hmel lutukin a rawn ti vat.Ka chhan hmain ka pum a let leh buta,rang lutukin ka hmui ka hup nghal vat,uak leh hlauin ka insum nasa lutuka,ka mittui a tling pam mai.

‘Ka tha..Ka tha...’ ka thaw hak bawk.

‘I chiang em? Ka rilru a nuam lo’  a ti leh sup.

‘Aih,min ngaihtuah suh.Toiletah ka luta,Meizial rim a nam nasa lutuka,chuvang mawle ‘ ka riilrua lang hmasaber ka sawi nghal pawp.A thaw hawk ri ka hretheia,dawt ka sawi tih min hmu phak lo hlauh ka lawm ve thung.

‘OK,i chungchangah dik lo a awm chuan hriat hmasak ber ka duh thin tih i hriat kha aw’ a ti dam thlup.

‘Lutuk..ka dah phawt aw..’

‘Ok..’

Che mai loin ka thut ngaiin ka thu deuh vang vang,ka awmdan min zawh rual khan hrilh mai na chance a awm reng,mahse phone a sawi mai mai atan chuan a liantham lutuk..

Ka pu tein ka thlenin an lo awm deuh vek tawh.Nidang ang bawkin Pa Rina a lo tawng bual bual a,a then an titi a,a then Kitchen lamah an au lawng lawng bawk.Family thilthih naah hian ka kal ngai mang lo,ka naupan deuh lai leh ka tleirawl chhuah hlim kha chuan ka kal ve ngei thina,mahse hun a kal zela,ka nu chungchang ka hriatchhuah hnua nun phung pangngai ka hloh takah khan tuman min lawm lova,chhungkaw hung leh zahawm pangngai tak kha keimah vangin a hmingchhia niin an ngai miaua,chuvang takin chhungkaw thiltih engmah ka kal ve ngai ta lo.

‘Zorin,helamah hian lo thu la..’ Zodini,Pa Rina fanuin a rawn ti a.Ka pan phei ve nghal zat.

Zodini nen hian kan inruala,kan naupan lai atangin school hmun khatah kan kal chho zela,College pawh hmun khatah tho kan kal bawk.Mahse, a hranpa takin kan inkawmngeih em em chuang miah lo thung.Ka nun a chiri tak viau khan Pa Rina nupui lawmah a tlaa,a hma atanga min lo er zia ka hmu thiam ta chiah bawk.Ka nu ka chhuna,ka hmeltha tih an sawi fo,ka vanneia,ka vun a nalh tel lehzel,mahse ka nu ang bawkin nu lian ti a sawitur ka ni lo.In ti no lo ve tak mai ka ni a,Sport lamah ka hmingtha phian bawk.Zodini hi chu a liana,a hmeltha lem lo thung.A pian erawh a nalh viau,college kan laiin Lady a ni nghe nghe.Mahse, a rai ta hlauh.

College a ka awmdan niawm tak,dik famkim chiah si lo sawi nuam a ti a,Zodini a zawt thin anih ka ring ber, rel tih dawna rel ni si lo,min lainat niawm tak anga lang siin kan chhungte bulah a sawi kur nguai ziah.Ka nu uire chhuah chhuaha a chhuah hnuah pawh a a kawmngeih zui bertu chu Pa Rina nupui hi a ni lawi.Naupang mai ka ni bawka fel ka ti thei em em kha ania,mahse ka kum tam ang zelin a mizia ka hmuh dan a danglam tial tiala,Thil engemaw hriatchaknain a khat vek ti ila a dik ber.Kei ngei pawh a langah chuan min ti tha em em a,ngaihtuah chian lem loh phei chuan min hmangaih ber emaw tihmai awl tak a ni.Mahse, hnunglama ka chanchin sawi nuamti ber chu Pa Rina nupui leh Ka nuhrawn anni tlat thung.Ka pa leh Nu Hmingi inneih tirh phat atangin an inkawmngeih nghal chata,mahse an inrel tawn ve ve thung.

Vanneihthlak nge vanduaithlak taka Zodini College kan kal laia a rai takah kha chuan ka chanchin sawi a bansan ta hlauh,a sawn paina pa kha neih tlak ni se chuan a tawpsan chuang lo ang,mahse neih tlak loh khawpa tawng,nu leh pa thlenga zu nena inchiahpiah an lo ni kher kher a,a hmai uang lutuk a reh ta hlauh.Tunah phei chuan Ramsey nen kan inzui a,min tlawn hlum lo chauh a ni ber tawh.

Kan chawei boruak a nuam pangngai viau,mahse chhungrilah vei lianpui ka nei tlata,ka awm a nuam tak tak thei lo.Chaw lah tihtham ka ei hek lo.Midangin an hriatchhuah hma ngeia Ramsey ka biak ngei ngei angai.

‘U Zorin,i phone kha’ Luni’n a rawn ti a, ka phu zawk.Ka pain mak tih hmel zeta min en chu ka hmu ru kar bawk.

‘Luni,ka ei zawm tawh lo ang aw..Lo seng mai rawh’ tih pahin dawhkan ka thawhsan nghala.Ka pa hmelah khan Mak tih hmel viau mahse engmah min zawt lo hlauh.

‘Chaw kan lo ei a’ a pick veleh ka ti sap.Khumah a vang zawngin ka mu a,chunglam ka melh vang vang bawk.

‘Um,vawiin chu lunch dawnah ka free a,ka lo kal dawn nge chhuah i duh?”

‘Chhuak ila,i hman chuan ?”

‘Um,hman ka tih kha..Khawiah nge kal i duh?” a ti leh a.

‘Ka hre chuang nang,eeee...I inah kal ila’ ka ngaihtuah chhuak zawk.

‘Maw?” a ti deuh hu..

‘I hman loh chuan pawi chuang lo..Ka sawi mai mai nih kha..’ ka sawi zawh rualin a nui hak thawm ka hre nghal zat.

‘Enge nuih tur awm a?” ka ti leh hlar mai.A nui chhuak leh hawk..

‘Sorry..i ti leh tawh nia’ a nui leh a..A sawi awmzia ka hriat takah chuan ka then ve sak mai.Mahse, ka nui tih a hriat ka duh bau lo..

‘I ngeiawm em lawma,i hman loh chuan sawi mai la’

‘Ka hman lo pawh ka la ti lo hrim hrim a..Ok,tihian ti ang,i lo va kal anga..Chuan,dar 1velah ka lo kal ve anga.A tha em?” a rawn tita duah.

‘Um...Tha ang,eitur enge ka ken ang?”

‘Ka lo keng ang...Siamsa a awlsam zawk..Chabi kha i kawl tiraw?’ a ti leh sup.A hmain ka kawl turin pakhat min pe a,ka duh hun huna kal turin phalna min pe a ni ber.Nizan lama Akima Nupui tur te nen an inhmuh vel chungchang a sawi zawm nual bawk.

In ka thlein dar 11 a pel fel awrh chauh,darkhat hma chuan a lo kal lo tawp ang tih a chiang reng.Tukverh ka hawng enga,inchhung lamah kawngkhar ka kalh thung.Lo muhil palh pawh ni ila Tukverhah Bar rinawm tawk tak a awm veka,hlauhawm a awm lem lo.

Ka phone riin min tiharh zawk.Ka lo muhil daih tak tak chu niin.Muangchangin ka bana,Mimi..

‘Thiannu...’ ka ti sap.

‘Inah i awm em?” zangkhai zetin a rawn ti lang lang.Ramsey nen kan awm tih hria se chuan min ei lo leh nasa khawp ang le..A sawi chiah lo nangin Ramsey hi a ring lo tih ka hmuthiam vek tlat.

‘Zorin..I hrethei em?” a rawn ti leh lawng lawng.Ka ner nak mai.Dawhthei lo reuh lutuk..

‘Hria e..Inah ka awm lo..Nge nita?”

‘Naaah,vawiin hi kan interview result an tarchhuah hun kha ania,kan va en ve mai mai dawn mi ka ti’ a rawn ti leh a.Calendar ka en vat.

‘Naktuk zawk alawm...Bakah kal kher ngai loin an lak tur chu an call dawn kha’

‘Maw? Chutiang an sawi ka hre lo reng reng..Naaa,vawiin hi ni 14 maw ka ti ve char char sin le’ a ti leh bai bai..

‘I va han harh lo tak,vawiin hi ni 14 chu a nia,mahse kan interview result an tihchhuah hun tur kha ni 15 aw...’ ka nui a..A chek tlak tlak mai.

‘Ka va han hresual ber mai tak,anih..Khawnge i kal reng reng?” a rawn ti leh a.

‘Ka chhuak,lo len i tum chuan tlaiah ka awm ang’ ka kalna min zawh hlau zetin ka ti vat.

‘I chhuak tih te chu ka hria lawm le,i kalna nih chu ka zawh che..Hhm,i pehhel nasat danah i kalpui ka hre mai’ a ti leh a.

‘Tumah ka kalpui lo...I ninawm lutuk,tihsual lianpui nei ang maiin min treat vel lo teh’ ka ti hlar mai..A nui ta hak..

‘Sorry..Ka fiam che nih kha,tun lawk khan in pa te chu ka hmu reng alawm,i Sakei khawi hi e,khawiahmah hai theih ni nghal lo chuan’ a rawn ti leh duah..A va han sual thiam thei tak..

‘Tha i tih vang anih mai chu a..’ ka ti hlak thung.A nui leh hak haka,keipawh in ti mi tak rei thei loin ka nui ve leh ta nge nge.

Ka Off a,Thutthlengah ka dahthlaa,ka kalsawn dawn chiah tihin a ri lehnghal zar..Amah bawk anih ringin nui chungin ka en a,mahse Savio zawk..

‘Hello...’ ka ti sap.

‘Khawnge i awm?”

‘Ka chhuak,enge?”

‘Naa,van ho tak..Apuia te inah kal ang tih ka lo tum sin le’ pawi tih tak tak hmel fein a ti vang vang.

‘Naktukah kal zawk mai ang,min lo nghak rawh’ ka ti ve thung.

‘Naktukah Am-in tihtur pawimawh a neia,ka hman dawn lo a..Mahse, pawi lo,an chhuak tawh tho thoa,naktuk tukleh lamah pawh pawi hleinem’ a ti leh duah.

‘Um,nia hmanhmawhthlak loh,tha lam ania lawm..’ ka ti ve sap.

‘A dik ta em?” a rawn ti leha,a sawi awmzia ka man lo.

‘Eng?”

‘Eng lo,hmanni a ka zawh che kha’ ka la hrethiam chuang lo..

‘Pehhel lo khan sawi mai teh,engmah ka hrethiam lo aw’

‘Ngai leh lo mai’ a ti leh lawi,Hepa tak hi chu a..

Ramsey lo kal hmain inchhung tihfai theih ang ang ka tifai ta zawka,a bal em em lo bawka tihchiam angai lem lo.Pawn lamah ka chhuaka,Verandaah thut mut theihna chi thing thutthleng a awm a,hahdam zetin ka thu ta than.

Ka hmaiah kut lum thur thurin a rawn khawih rualin ka mengchhuak nghal vat.Hnai zetah Ramsey nen kan in en ta ran mai.A then suk bawk.A kalsawna,ka thuchhuak ve nghal zat.

‘I lo thlenna a rei tawh em?” ka ti sap.Ka zi mar ar ar bawk.

‘Rei lutuk,ka haw leh tep tawh’ a then leh suk..

‘Maw? Tinge min kaihthawh loh a?”

‘Ka ti mai mai anih kha,ka lo thleng chiah..Lut ila...’ a ti a, kawngkhar lamah a thle zauh bawk.

A thil khai ho Kitchen lam a panpuia,ka zui ve zel bawk.Engtin nge ka sawi ang ka hrethiam lo.Sawi loh mai ka duhna leh sawi ka duhna a inzat reng bawk.

‘Enge ni leh ta?” a ti sup.Rang lutukin ka en vat,hriatthiam har zetin min lo melh run tawh.

‘Engmah...Ka ril a tam ‘ ka rilru a lo lang hmasaber ka sawi ta ngawt.

‘Anih chuan ei ila...A ei theih nghal vek alawm’ a ti tha ve mai bawk.

Eitur a rawn ken ho a dahchhuak mawlh mawlh chu ka en a,tihpui tur ka ni tih ka hria,mahse phurna ka nei eih lo.Diktak chuan ei chakna ka nei miah lo zawk ti ila a dik ber ang.

‘Ei ang..Keipawh ka ril a tam lutuk’ tih pahin Chair a pawtchhuaka,a thu thlaa,a ei nghal mawlh mawlh bawk.

Ka plate ka en a, ka luak a chhuak nghal hlui.Ei chakna pakhatmah ka nei lo..

‘I duhzawng a ni na nge?” min rawn en pahin a ti sup.

‘Ni e..Ka ei dawn lawm’ ka nui lui sak bawk.

‘Nidangah i duh thin vangin nia ka lei’ a ti leh nghut.

‘Um,ka duh lutuk..’ ka ti leh a,ka melh zawka,min lo en reng chu niin..Rang zetin ka hawisawn lehnghal vat  mai.Ka en rei ngam lo,a mitmeng fiah zet khan ka ngaihtuahna chhungril ber thlengin a hmu tlang vek ang tih ka hlau a ni ber.

‘Sawi la....’ a ti leh sup.

‘Eng??”

‘I hre zawk ang chu,i awmdan tidanglam vek thil kha i sawi chhuah phawt loh chuan i dik thei dawn lo tih kei aiin i hrechiang alawm’ a ti leh a,a aw a dam thlup bawk.Ka hmelah ka ngaihtuahna tihlan loh ka tum vei nen,bum theih a ni ngang lo..

‘Ih...Eng lo...’ ka sawi hmain a phone a ri a,min rawn en a.Hmui phunin thupha a chawi zauh bawk.

A chair a nawr tawlha,a tho chhuak nghal zat..Tu nge rawn call ka hre lo,mahse ka hriat ve loh tur chi a nimahna le.

Living room lam a pana,a kal hnuah ei luih ngial ka tuma,Masala rim ka tilui thei ngang lo.A lo let leh hma ngeia tihfel hman tumin hmanhmawh zetin ka che ta sawk sawk zawk.

‘Pawi ka ti lutuk,ka kal angai’ ka hnunglam atangin ka kawngah a rawn kuaha,ka darah a hmai a rawn phum nghal zat bawk.

‘Ngatinge?” ka ti nghat.Ka thilsil lai ka tawp hmak bawk.

‘Hnaah loh theih loha ka let angai,midang kutah ka dah dawna,mahse keimah ngei angai’ a ti leh sup.

‘Mahse,nizan khan i free i ti sia’ ka tum loh tawpin ka awah titau aw a lang thei bawk.Ka kawng a kuahna a phelha,ka ban rekah a rawn vuana,amah en thei turin min kuai her nghal zat bawk.

‘Nizan mai pawh ni lo call ka dawn hma thleng khan ka free niin keipawn ka hria,mahse hnaah hian hriat lawk loh thil a awm thina..’a ti leh sup.A sawi dik tih ka hria.Mahse, hunthawl tak ka mamawh lai a ni a, ka thinrim teuh tho mai.

‘Ka hrethiam alawm...Kal rawh,ka tihfel zawhah keipawh ka kal dawn nia’ ka theihtawpa pangngaiin ka ti a.A thle buk..

‘Naktukah nilengin hun ka lo insiam ang,a tha em?” a ti leh nghut.

‘Aih,angai lo..Hna thulh khawpa ngaihzawng neih hi a tha lo ania’ ka nui lui hak bawk.A then ve suk..Ka khabeah a rawn dawma,amah en thei turin min kuai daka,a kutzungpuiin ka biang a tuai huah hauh bawk.

‘I thinrim tih ka hria alawm..Mahse, ka tan hna a pawimawh zia i hriat kha..Mahse, chutiang bawkin nangpawh i pawimawh lutuk..Chuvangin naktukah chuan nilengin i bulah ka awm ang..Ka ti tak tak’ a tita duah.

Ka mu meng kar mai,nupa inkar ni lo mahse in ngaizawng kan ni a, zep kher ngai tur a ni lo.Mahse,amak lutuk..Nupa kan nih loh vang takin awlsam taka sawichhuah a harsa em em niberin ka hria,Nupa kar chu nise lawm takin hriat veleh Pasal te hnenah sawi kan chak ngei ang,mahse nupa niloin inngaizawng mai kan la ni a,awlsam taka sawi mai harsa tak a ni.Huizzz,A thlenna hmun tura a thleng anih chuan lawmawm tak nisi leh a nih lohna turah chuan lawmawm lo tak nibawk chu hei ngei hi a lo nih hi a..

Ka phonein ka ngaihtuahna a la peng ta hram,ka bana,Savio a lo ni a,ka pick hmain Sana ka thlek zauh,dar 9 a ri tawh..Eng chu a hria ni maw?

‘Aw,,’ ka ti sap..

‘I mu tawh mi?”

‘Mu daih tawh,mahse hil tel loin’ ka nui a...A nui ve hak bawk.

‘Agnes-i chanchin kha i lo hria em?” a rawn ti leha.

‘Aih,eng chanchin?’ ka ti nghat.

‘Vawiin khan nikhawhre loin a tlu an ti a’

‘Engtin maw i tih?” ka tum aiin ka aw a ring hret.Ka thuchhuak nghal zat bawk.Hei vang hi a ni ngei ang Ramsey kha a let leh a ngaih?

‘Vawiin chhun khan a Studioah a tlu an ti a,a la harh lo tunah pawh..’ a ti leha,ka chil ka lem khalh mai.

‘A va pawi ve,engvang nge an sawi em?” ka theihtawpa pangngaiin ka tichhuak thei hram.

‘Ka hriat ruk dan mai mai chuan mutna damdawi a ei nasa an ti a..A zo lo anih ka ring’

‘A ni maw? Ngatinge chutiang a tih le?” ka ti leh sap,Ka rilruah Ramsey lam aiin engvanga ti nge anih ang tih bak a awm rih lo.Hmabak duhawm tak a neia,Designer lar leh Mizoram mai ni lo a hmingchher mek a ni a,chhungkaw zahawm tak a nei bawk.Nun beidawng khawpa a lo awm ve hi mak ka ti lo thei lo.Ka khawngaih titih ta tlat bawk.

‘A chhan ka hre lo nangin Saii sawi dan chuan Mama nen an inthen kha a la na viau anih hmel ‘

‘Oh...’ ka ti sap ringawt.

‘Nuam lo i lo ti leh ngawt ange,i thiam loh a ni lo aw...I hria em?” uar fein a rawn ti leh a.

‘Ka thiam loh niin ka hria..’ a rum nghat mai.

‘A va mak e,ka sawi zawh chiah kha mawle.I thiam  loh a ni lo..A chiang em?”

‘Um..’

Ka muhil thei lo..Ka let kual seka,ka taksa a kham thum bawk.Engvangin nge Ramsey kha a let thut angaih ka hre lo,Agnes-i vang ni tur chuan ka ring phal lo..Mahse,a ni thei tho bawk.Thik tur ka ni em ka hre lo,amah buaipui duh hrim hrim vang a kal nge anih anga thildang zawk?ngaihtuah loh ka tum pawn ka thei hlawl lo.Ka call ang nge call lo ang tih ka ngaihtuaha,ka call ta nge nge..Vawihnih lai ka calla,a pick lo ve ve.

Ka harh veleh ka phone ka bana,mahse ka beisei ang engmah a awm lo.Call emaw msg pawh engmah Ramsey hnen atangin ka dawng lo ve ve.

Chawei kham veleh ka pa leh nu HMINGI dawr kal turin an chhuaka,Luni thil tifel ka puia,a khat tawkin Ramsey an min rawn biak ringin ka phone ka check sek bawk.Mahse,dar 11 thleng pawn engmah a rawn sawi lo..

‘I phone hi a ri char char a’ Luni’n min rawn pek pahin a ti a.Rang zetin ka ban vat.Mahse, min lo call tu ka hmuh rualin ka zuai nghal raih mai.Ramsey ni loin number hlang tawp.

‘Hello...’ ka ti sap.

‘Miss Zorinzuali ni em aw?” Mipa awin a rawn ti a,ka mengphar ak mai.

‘Aw,ni e.Tu nge aw?” ka ti a,ka beisei loh lutukin kan hna dilah ka tling tih min hrilh tura min lo call a ni a,ni 3 chhunga zawm hman tura min beisei thu a rawn sawi nghal bawk.

Phone ka dah rualin hlim zetin ka auchhuak raih mai..Mahse, Mimi..a tlin ve loh chuan a nuam dawn miah lo,ka ngaihtuah mek laiin amah zawkin a rawn call ta zawk.

‘Enteh...An lo call ve che em?” a rawn ti mawl tawp.Kei ang thoin a zam ve tih ka hre mai..

‘Aw..Call..kan tling’ kan nui dun hawk hawk mai..Ramsey hrilh nghal tumin ka call dawn zeta,ka thulh leh ta zawk..Vawiin nilenga hun min pek tiamtu kha a reh hmaka,engdang vang mah a ni thei lo.Agnes-i nizanah a riahpuia,a chau bak va ni suh..Savio ka call ta zawk.Ka rin lawk ang ngeiin chhuah a rawn rawt nghal chung mai..Pawi ka ti lemlo,khawiah emaw tal chhuah thawven ka mamawh lutuk tlat.

Kan kalna tur kan thlen hnuah ka phone ka theinghilh tih ka hrechhuak chauh,mahse pawi lo..Ka pain min be duh anih chuan Luni’n a lo pick mai ang..

Savio a tawng mawlh mawlh,thil ngaihtuah chhuah thut ka nei..

‘Ami i chhuahpui dawn maw tia’ ka ti chhuak nghal zat..

‘Angai leh lo a...’a ti liam puat.Eng ang taka serious nge annih ve ang ka ngaihtuah naah a lo lut zawk bawk.

‘I duh viau em?”

‘Ka hre lo...’ kan inchhang tawk viau mai..Kan in ena,kan nui dun hawk bawk..

Kan eitur an rawn daha,a rim rawn nam chuan thawklehkhatah ka pum a ti let buta,rang lutukin Toilet lam ka pan nghal vat..Ka thlen rualin kawngkhar pawh kalh hman loin ka uak nghal pawp pawp bawk.

‘Ngatinge?” ka hnungah a rawn chum a...Chhang thei loin ka uak leh rih..

‘Nang hi.....A dik em? I rai tiraw?” a ti leh a..Mmuangchangin ka ena,ka mittui ka kut hnung lamin ka hru a,engmah sawi loin ka but a nghat...

‘A hria em?” a ti leha,ka lu ka thing nak ringawt.

"Hetiang a rai chungchuan hna pawh i thawk thei dawn mi? A ti leh a..Ka thle bak mai,ka lo ngaihtuah miah lo..Pawi lo,hunin a hril mai ang chu.

In a kan let leh meuh chuan khua a thim titih tawh.Chawhnu pumpui chu Savio bulah ka hmang tluan ta parh..Ramsey hnena hrilh k tum dan leh ka beisei loh zawk thil lo thleng ta te ka hrilha,nidang ang bawkin ngawirengin ka tawng a ngaithla leha,mahse min chhan let ka mamawh lo..Ka harsatna tuemaw tal ka share takah chuan ka thawl hawk tho.Mahse,Ramsey hnena engkim sawi vat turin min ti thung.

‘I lo lut dawn em?” ka ti a.

‘Aih,a tlai tawh em mai..’

‘Ok,,Anih chuan kal la,ka lo thlir ang che’

‘Lut zawk rawh...’ kan nui dun leh rih..Hepa nena kan inzawmna hi chu tuman an neih ve ka ring lo.

‘Khawnge i kal?” ka phu nasa lutuk..Aw lo chhuahna lam ka hawi vat.Ramsey, kan gate bul thim lai atanga a rawn penchhuak mek chu ka en a,nichin khan ka hmu miah lo.

‘Ka chhuak...’ ka ti nghat ringawt.

‘Ka hmu...Kan chhuak ang kha ka tisia’ a ti hmuk.Ka ner nak mai.

‘Nia,mahse Agnes-i i buaipui duh dawn sia,hun ka pe che..Bakah Savio a awm tho lawm’ ka nui lui hak bawk.

‘Savio...Savio...’ ti nawn sup..

‘Um,nia..I nau kha...’ ngeiawm zetin ka ti leh salh..Kan awmna hmun hi kut inthlak leh mawi lo taka chetna hmun a ni lo tih ka chiang.

‘Ka hria,mahse i bula awm tawh lo tura hrilh angai anih chu’ a ti nghut..

‘Tum chhin la..Anih phawt aw...’ ka ti leh nghat,Gate lam ka pana,mahse ka kalpel tur ka banrekah a rawn man ta chat.Min pawt let deuh nawk bawk.

‘Min thlah rawh...’

‘Teuh lo...’ min hnuk kal titih..Engmah a tih duh ka ring lo kha ania,ka ringsual chhia va..

‘Mam...ngatinge a?” Savio a rawn lang thut.A kal daih tawh sia,tunah hetah a ding leh lawi..

‘Haw rawh,i  tel ve na tur a awm lo..’ a ti hmuk..Ka lo pi chawih thung.

‘Haw dawn e,Zorini thil tur ka bagah a awma,chu chu ka rawn pe leh lawk mawle’ a ti ve leha,ka hriat thin Savio,a u hlau em em kha a nita der lo mai.

‘A that chu,nakinah i pe mai dawn nia’ a ti leh hmuk.Min pawt kal titih bawk.

‘Nia,mahse Mam..khatianga i pawh kal nawk nawka,i dim loh viau chuan naute i chan palh thei ania...’ ka khawng vek...

Khawvelah hian thil a hun hmaa thleng thin tamtak a awm,chung zinga pakhat chu tuna Savio tih mek pawh hi a ni chiang...