22/AUGUST - 18

Chapter-18

‘Eng maw?” Ramsey-an a ti hmuk.Min en loin Savio a en run bawk.Sawi ve tur hlawl ka hre lo,engvangin nge khatiang thil kha a sawi tih bak ka ngaihtuah thei lo.A hun lo satliah lo mai pawh ni loin a hmun hlawl lo.

‘Savio…Khawngaihin…’ ka hrawk a ro lutuk,ka aw ka thian khauh bawk.

‘A ho lutuk,dawt pawh a ni hleinem,sawi la..Engmah hlauh tur a awm lo’ min rawn en pahin Savio-an a ti leha,engvanga hetianga khawsa nge anih ka hrethiam hlawl lo.Muangchangin Ramsey a rawn hawi leta,ka insehruha,ka ka chhung a ro nghal halh in ka hre bawk.

‘Savio,haw tawh rawh’ ka beisei loh lutukin Ramsey-an a ti hmuk.Mahse, ka lak atangin a mit a lasawn eih lo.

‘Nia,haw dawn..Inah kan inhmu dawn nia,Zorin..Hei aw’ tih pahin ka kutah a rawn hmehbela,a thil min rawn pek ka la mawl tawp.Ka thian nge aniha ka hmelma zawk pawh ka hre hrang nek lo e.

‘Kal ang le…’ Savio kal veleh Ramsey-an a ti nghut.Mahse,a hma anga min pawh luih tum hmel a pu tawh lo.

‘Aih…Ka..ka haw duh’ ka ti bah nawk mai.Ka hrawk ro lutuk tihreh nan ka chil ka lem a.Tunah chuan mahni a awm ka duh ber.Thil thleng hi chiang taka ka ngaihtuah phawt angai.

‘Ni lo,khatiang hnuah kha chuan ka kaltir dawn miah lo che tih i hria alawm’a ti leh sup.A sawi dik,min kaltir miah lo ang tih ka chiang.Savio ka huatna nge nasa anga Ramsey ka huatna zawk ka hrethiam lo.Ka best leh ka engkim nimahse engvangin nge khatiang thil lian tham lutuk a hun leh hmun pawh ngaihtuah miah loa a sawi ngawt ka hrethiam hlawl lo.A kawchhungah Ramhuai a lut zawk nge mawni?

‘Khawngaihin kal ang,helaiah hian midang titi siam tura awm i duh ka ring bik lo ania’ a ti leh sup.A awah min tihluih tumna lam engmah a lang lo.Hnial tumin ka ang hman ziau,mahse kal ila a that ka ring ta zawk.Engmah zep tur a awm tawh chuang lova,tunah sawifel law law ila a tha mahna.

Kan in piah deuhah Car a lo daha,kan haw lohna lam kawng anih avangin kan hmu lo mai zawk tih a chiang.Ka luhna turin kawngkhar min hawn saka,ka tawi deuh hrat nangin ka lut ta tho.A rawn thu lut vea,Motor a start zui zat.Khawiah nge kan kal dawn zawh ka tum uka mahse ka ngawi leh ta zawk,a duh duh na hmun pan se engmah a pawina a awm lo.

Kan tlanchhuah rualin ka mit ka chhing nghal hmiah.Ka ngaihtuahna buai nuai nuai tihfim tumin thawk ka la vang vang bawk.Savio ka mitthlaah a lo langa,engvangin nge ka sawi hun pawh nghak lo va a lo sawi ngawt ka la hrethiam chuang der lo.Nichin lawk kha chuan ka hriatthin Savio kha ni loin midang daih a ni tlat bawk.A rui miah lo tih lah ka chiang bawk si.A hma pawhin ka thuruk tamtak min vawnsan tawh thina,mahse vawikhat pawh hi a sawichhuah ka la hre lo.Zan inah erawh a sawichhuak ta tlat.Chu pawh nidang zawng zawng aia thuruk lian tham a la ni zui bawk.

Motor a din dawt rualin ka mengchhuak vat,Motor lightin a chhun en lam ka hawia,Motor light engin a en chin bak engmah hmuh theih lohin a thim vek.Ramsey lam ka hawi a,chhuk tum awm pawn a awm lo.Seat hnunglam nghengin a thu a,a kut zungtang sei thlurhin Steering wheel a vuan bawk.Ka awm a nuam lo,nichin kha chuan engkim anih nih nimai se ka ti kha ania,mahse ka awm a  nuam leh tawh lo,ka tang ru teuh bawk.

‘Engtikah nge i hriat?” reife kan ngawih hnuah a tichhuak sup.Ka phu deuh zawk bawk.

‘Eng lo…ih…Nimin’ ka sawi lak lawh laiin ka phone a ri a,ka bag ka zen vat.

Ka phone ka lachhuaka,Nu Hmingi a lo ni a,ka haw tlai dawn tih engmah ka sawi bawk si lo nen ka pain min ngaihtuah a ni ngei ang.Ni e,mi pangngai anga ka nun ka hman rualin ka Pa hmangaihna nitin a tharin ka dawng leh tan tawh miaua.

‘Hello..’ ka ti sap.

‘I lo haw dawn tawh em? ‘ zangkhai zetin a rawn ti lawng lawng,a tawng ring bawk nen Ramsey ka melh zawk,mahse min en loin hmalam a lo en a,a rawn tawng kha a hrethei em ka hre lo.

Nu Hmingi hian min haw ta lo a ni hauh lo.Diktak chuan engtiklaimahin ka pa hmuh turin min huatna a tilang ngai lo zawk. Ka awm that duh loh lai pawn ka awmna chin ngaihven zat zat tu chu amah hi a ni ziah.Mahse, pawnlam landan mai anih zia ka chiang lutuk.

‘Haw tep,ngatinge?” ka ti nghat.

‘Eng ni lo e,I rei dawn loh chuan chaweiah kan lo nghak dawn che nia’ a rawn ti tha ve mai.Tawng tumin ka ang leh hman ziau tihin ka beisei loh lutukin Ramsey-an ka phone min rawn laksak hmiah,phawk zetin ka en a,mahse engmah sawi lo turin ka hmuiah a kut zungtangin a rawn ti si leh hmak.Eng chu nge maw a hriat hrep ni a??

‘Hello…Keimah Ramsey ka nia,Aw..Nu hming,ka nuin chawei turin a  sawma’ mak ti zetin ka thaw hak ringawt.Nu Hmingi tawng ngaithlain a ngawi leh rih.

‘Ok..Nia,ka rawn hrilh ang che ka tih lai takin i lo call a..Aw,ka lo thlah dawn nia’ a ti leh a.A beng bul atangin phone a la sawna,a off nghala,min pe dawn emaw ka tih laiin a kekawr ipteah a thun ta daih.

A thilsawi kha Nu Hmingi ngaihdan tur ka hrethiam mai lo,mahse Ramsey kher kher hi chu ngam loh enin a en nge ka hre lo.Ramsey nen kan chungchangah Buaina min siamsak zawngin a awm ngai miah lo.Ka pain Ramsey eng ang a nasain nge a rin ka hre lo nangin mi Puitling tak hmuhin a hmu tih ka hre bawka.An Ina chawei tur ka nih chuan a sawisel kher lo maithei.

‘Sawi zawm la…’  a ti nghut.Ka thaw leh hak mai.Mak takin tawng tum awm pawn ka awm lo.

‘Savio aia hre hmasa tur ka nih ka lo ringa’ amah bawkin a ti leh nghut.A thinrim nge a ngaipawimawh lem lo tih ka hrethiam lo.Engtiklaimahin a aw a nem ngai tlat lo.

‘I ring dik anih chu..’ ka ti chhuak sap.Min enreng tih hriain luhlul hmel zetin hmalam ka en ding ngar bawk.

‘Anih chuan ka hre hmasa si lo va…’

‘Nia, I hre hmasa lo…’

‘Ka fa anih leh nih loh i ngaihtuah hmasa phawt tihna nge?”  ka nghing deuh lawih thei.Muangchangin ka en ta nge nge.Hriatthiam har zetin min lo en run a,a hmelpa leh ngeng zetah chuan enge a ngaihtuah ang ka hrethiam lo.

‘Ngaihtuah angaih leh ngaih loh chu i hria ang chu’ka aw a dam thlap bawk.A mithmul a tisang awka,a hmui a pet zauh bawk.

‘Hre tehreng mai,tu fa mah ni loin ka fa ngei a ni bawka,mahse ka hriat hmasak ber tur niawm tak kei aia hre hmasa an awm takah chuan a chhan tur ka lo ngaihtuah a’  a sawi zawh rualin a thle buk bawk.

‘Min dem tihna a ni em?” ka ti nghat.

‘Ahh,dem nang..Ka lo ngaihtuah zawk chu Savio khan ama faah pawm mai pawiti loin a ngen chiam che anih ka lo ringa…’ a nui zui hawk bawk.

‘Savio…’ ka ti nawn sap ringawt.Engtin nge khatiang ngaihdan tenawm leh rapthlak kha a nau ngei chungah a ngaihtuah theih ni ??? Rapthlak hian a…

‘Um..Savio..A duh zia che ka hre lo emaw ti miah suh’

‘Tenawm…’ ka tichhuak nghal that mai.Ka sawi zawh rualin min rawn hnaih nghal ruak bawk.Ka eu zawka,mahse han tawlh hlatsan na tur eih a awm lo.

‘A lo ti anih vaih chuan dam nuam a ti lo hle ang’ a aw a ring lo..Mahse, a hlauhawmna a nep chuang eih lo.

‘Ni lo…Engtin nge khatiang khan i ngaihtuah theih zawk?” ka ti chhuak tawk ringawt.Za miah lo tih hriat zetin a then suka,kei erawh hlauhna vangin ka tiril a khur a,ka ip chawih thung.

‘Ka ngaihtuah chhan maw? Ka bialnu a raia,mahse a hnen atanga hre loin a thianpa hnen atangin ka hria a,khatiang kha tu mipa pawn tawng se ka ngaihtuah ang vek hi an ngaihtuah ngei ang’ a tita duah.Ka thin a sa nghal zawk mai.Mahni thiam lohna hmu miah lo va midang dem ching hi ka haw lutuk ringawt.Tunah hian chutiang chuan Ramsey hi a awm ta chiah bawk.Mak takin ka hlauhna a bo nghal duak mai..

‘Nimin khan Agnes-i ni loin kei kha min ngaihtuah ni la chuan i hre hmasa tur ania,mahse kei aiin Agnes-i a pawimawh miaua…Ka sawi dik em?” ka ti chang fak mai.Hawisawn duh loin a mitah tak ka en ran bawk.

‘Agnes…Ni lo..I sawi tum ka man miah lo’ a ti sup..Kei erawh ka nui chhuak nghal hak mai.

‘Anih chuan ka hrilhfiah dawn che mi niang?’ ka ti nghat.

‘Nia,a that ka ring..’ a ti vawt ruih,ka tawng hun nghakin min melh run bawk.Ka hrawkah hnawhtu awm niawm takin ka hrawk a za tlat,ka aw ka thian hmasa te te.

‘Agnes-i a thi tep tih ka lo hriaa.Ih..Diktak chuan pawi ka ti..Kha lehchen i lo kawp tawh a ni a,tawp tawh mah ula khatiang hunah chuan a bula awm kha i tihtur pawh a ni ang,mahse khavang khan nang aiin Savio-an a hre hmasa ta anih kha’ ka sawi zawh rualin ka thaw hak bawk.

‘A bulah ka awm tih tu nge hrilh che?” ka beisei loh lutuk a sawi takah chuan ka en vat.Min en loin a thu mar a,hahdam hmel zetin a seat nghenchhan a ngheng zui  nghal bawk.A awmdanah chuan engmah danglam leh ngaipawimawh awm pawn a awm lo,chu chuan mak takin min ti hrilhhai letling zawk.

‘Ih…Min hrilh tu a pawimawh lo,I awm tih ka hria.Nimin khan chawhnu lam zawng ka bula awm i tiama,mahse hna pawimawh i nei leh thuta,ka awih ve maia.Mahse i kal hun leh Agnes-i nikhawhreloa a awm hun kha a in mil vel chiaha…’ ka ti leh duah.

‘Tu nge Detective tha tak nisi hlawh nei lo an tih thinte hi i hria em?”

‘Eng a?” a a ta emaw ka ti hial.Kan thilsawi lai nen inzawmna a nei hlawl lo.

‘Detective hlawh nei lo chu Hmeichhe zingah hian in tam mai…’

‘Eng….Engmah ka hrethiam lo..’ ka ti mawl tawp.

‘I hrethiam lo maw? Niminah hna pawimawh ka neih hun leh Agnes-i nikhaw hre loa a thluk hun a in ang tih i hriat rualin i ngaihtuah zawm chiama,I zeldin kuala,kei min zawt mai si loin niawm a i hriat kha i hmehbel kual ta vel a…A dik em?” a tita duah.Nia,amah ka zawt miah lo,a chhan chu ka zawt anih pawhin a pha maitheia,a pha lo a thudik min hrilh anih pawn ka na viau ang tih ka chiang..Chuvang takin engmah zawh loh mai ka thlang zawk.

‘Zawh che angai hleinem..’ ka ti nghat ringawt.

‘Nia,ngai lo..Mahse,min zawt ni la chuan nizan zankhuain Offcieah ka awm tih ka hrilh ang che,zingah ka haw chauha,ka lu a nat avangin chawhma zawng ka mu tih tal i hre tur ania’ a ti leh sup.Ka chil ka lem khalh ringawt.

‘Thu dik i sawi tih engtin nge ka hriat chuan anga?”

‘Uh…min en teh,ka mitah tak hian en la dawt ka sawi lo tih i hria ang chu’ a ti leh sup.A aw pa leh thawp sutah chuan mak takin thudik a sawi ang tih ka ring ve tawp.Mahse, chuti maia tlawm ka tum lo.

‘Theihnghilh ang..Tunah chuan i hre tawha,kan haw thei tawh em?” ka ti leh hmak.Ka chhungril nem tan mek hi a hriat ka duh hauh lo.

‘Thei lo…’ a ti nghut.

‘Anih chuan titla turin min duh tihna mi?” ka sawi zawh rualin min rawn hnaih nghal rawk.Min nek bet titih bawk.A lian bawk nen ka thaw a chham lo chauh bawk.

‘I ka tereuhte kha i chip thei em?” a ti chhuak hluk bawk.

‘Anih chuan enge kan haw theih loh chhan a?” ka ti ve thung. 

‘Engmah hi i vei tak tak lo em?”a ti leh nghut.A tawlh hla deuha,muk zetin min melh run bawk.

‘I sawi awmzia ka hre lo,ka duh zawng chu ka rai tih i hre tawha,kan sawi zo vek tawha,ka haw duh mai ania’ ka thle bak.

‘I rai avangin i thinrim tihna ni em?” a ti leh nghut.Chutiang lam ka lo ngaihtuah eih lo hrim hrim.

‘Thinrim tur ka ni em ni?” ka ti let hlak.

‘I zalenna a phuar dawn che vangin mawle..’

Ka rai tih a hriattirh atang khan lawmna lam engmah a lantir eih lo a,a lo duh lo viau tihna a nithei.Ka tawt up up a,engemaw kawng tala tih nat ka chak ber.

‘Lungngai suh,kei chauh ni loin nangpawh phuar i ni ve tho alawm.Kan tum loh tawpin min phuar ve ve dawn tihna nih chu’ ka tilui ta salh.Mahse,ka tihnat zawh ka ring nek lo.

‘Ka hnek chak zia che hi i hria em?”a ti sup.Ka thaw hak ringawt.

‘I duh duh i sawia,ka ngaithla anga maw? Teuh lo mai..Ka tana naute pawimawh zia hi i hre phak lo ang’ amah bawkin a ti leh sup.Sawi mai tur hre loin ka chil ka lem khalh ringawt.

Diktak chuan a fa nimahse a hmasaber a ni tawh lo va.Keiin ka ngaihpawimawh angin a ngai pawimawh dawn hauh lo tih ka chiang.Bakah atan chuan nu tel lo a fa enkawl hi thilthar a ni hek lo.A duh loh miau chuan fa engzat pawh neise Inneihna hmanga phuar beh theih a ni hlawl lo ang.

‘Anih chuan enge i tih ang? ‘ ka ti hlak.

‘Enge ti se min tih? Ka fa hi nu leh pa karah a seilian ang..A awmzia chu kan innei dawn tihna nih chu’ a hmelpa leh chang zet ka melh zawk,min lo enreng chu  niin rang zetin ka hawi let lehnghal vat bawk.

‘Hmangaihna tel loin naute vangin phuar kan ni anga’ ka aw a ring lo.Mahse, a rum hawk ri ka hriat rualin a hre thei tih ka hria.

‘Thildang engmah ka ngaihtuah lo,nu leh pa karah a seilian ang..Chu zawng chu ’

‘Hani aiin a dinhmun a tha deuh dawn tihna nih chu’ ka sawi zawh rualin ka banrekah na zetin a rawn hmera,min pawt hnai deuh dawrh bawk.Diktak chuan Hani chungchang sawi a huat zia ka hai lo..Mahse, atthlak zetin ka thik tlat.

‘I hre duh tak tak em?” a aw hlauhawm zia chu pui tak a ni ringawt.

‘Eng nge hriattur awm?” ka huaisenna zawng zawng sawmkhawm angai hialin ka hria.A chungchang sawi a duh lo tih hrereng chung siin ka sawi zo vek tawh.

‘Hani…Ka fa a ni lo…’ ka hresual emaw tiin ka en vat.Mahse, a hmel tak ngul maiah chuan dawt a sawi lo tih a chiang vek.Mak ti lutukin ka thaw ta hak..

‘Eng…Aih,ka hrethiam lo..’ ka ti bah nak mai.Min chhang dawn lo emaw tih turin a ngawi vung vunga,thil thui tak ngaihtuah a ang bawk.Ka ban a hmerna laksawn tumin ka vuana,mahse a hma aia na zawkin a hmer nghet leh salh..Ka then nak mai.

‘Min ti na ania’ ka ti lawi rat mai.Hmer tliah vek tum a ang ber in ka hria.

‘Hani hi ka thian pakhat fa a ni a…Mahse, tunah chuan ka fanu a ni tawh,tuman a chungchang an sawi ka duh lo bur’ a ti leh sup.Min hrilh pawh a ang lo.

‘Ramsey..Ka kut a na ania’

‘Sorry…’ a ti sup.A thlah ve mai bawk.A thlah veleh ka thutna nghenchhan ka nghenga, ka ban rek ka tuai nghal nauh nauh mai.

‘Engtia tih nge i duh?”’ a ti leh nghut.

‘Maw?”

‘Palai lo kal tir nge i duh inruk?” a sawitur engmah han thluaithlum awm thin lo hi ka hamhaih chang a tam ta viau bawk.

‘Ka hre lo..’ ka tita sap.Hre miau hek lo i le..

‘Ok,ka lo ngaihtuah ang..Naktukah kan inhmu dawn nia’ a ti leh sup.Order lam engmah a awah a lang lo.Chhang loin ka thu ngawi ngar ringawt.Duhthlan tur nei chuang pawn ka inhre lo,mahse min neih a duh chhan kha naute vang a ni a..A lawmawm nge lawmawm lo ka hre lo..Mahse, mahni a mualpho na tawn tlang ai chuan a zia tal ang chu.Anih loh chuan Nu Hmingi tan Vanram ka siamsak a ni ngawt ang.Chu aia duh loh ka nei lo hial ang.Atthlak zetin ka mittui a hnai nghal kuar mai.Mahni inkhawngaihna avangin ka chhungril a na vawng vawng bawk.

Kan tlanchhuah hnuah tumah mah tawng loin kan ngawi ngar mai.Ka rilru a fim hlawl lo,ka rai tih ka hriattirh atang khan engemaw hlauhthawnna,ka hriatthiam chiah si lohin min la fan ta reng.Ramsey-an engtiang chiahin nge a ngaih  ka la hrethiam chuang miah lo.Titla turin min tih kha ka hlau a,mahse a ti hauh lo,tih a hnekin a fa tih fahrah a duh loh avangin min neih a duh zawk.Mahse, a fa ka pai avanga lawmna emaw thinrimna pawh engmah a ti lang eih lo hrim hrim.A pawimawh tih bak engmah sawi miau hek lo le.Hani..Nia,tu fa nge nita ang? Mahni fa lo pui chu tu nge enkawl duh ang? Mahse amah ngeiin a fa a nih loh thu a sawi bawk si.Hmana Savio hnena Hani nu ka zawh tum khan a hriat loh thu a sawi tlat bawk anih kha…Huizzz,engthil hi nge a thup tlat ni???

‘Kan Inah haw tlang ka duh ania’ reife kan ngawih hnuah ka tichhuak sap.Pawn lam ka thlir a,thli thawin ka sam tawn kim loh a chhem leng dar dar bawk.

‘Kan Inah chaw kan ei ang ka tih kha…’

‘Khawngaihin…’

‘Thil ei i harsat em?”a ti nghut.

‘Aih…’ a nui hawk mai,ka chhang rang lulai bawk a tin ni.

‘I nawm loh chuan min rawn call la,nangmahin inkhalh chhuak suh’ thupe aw zetin a ti leh hmuk.Ka chhang lo..Ka khua a sik deuh ser ser renga,ka luak a chhuah ziah avangin ka thil ei a buai tih hrilh a,a bula pangchan ka chak tih hi sawi maia fiah chi pawh a ni lo.Mahse, ka hrethiam lo.Kan inhlat du a,nimin lawka min duatna kha chu la rei lo mahse mumang ang chauh nimaiin ka hria.

Ka mu meng kar mai,thil chi hrang hrang ka ngaihtuaha.Mahse,engmah fim takin ka ngaihtuah thei chuang miah lo.Ka nu ka ngai vawng vawng mai,la dam se chuan tunah hian engemaw tal chu ka hrilh thei maithei.Bakah ka tih tur leh tih loh tur pawh ani kha chuan a ngaihtuah fell eh thlap ang tih ka hria.Tunah chuan nupa kara lawmna nisi,nula tana zahthlak tawpkhawk leh manganna ni bawk si ka tuar meka,ka bulah tumah min puitu tur an awm si lo.Mimi tal hrilh ila chuan a zia mahna.Mahse, mak takin ka hrilh hreh ngawih ngawih thung.Ka rinngam awmchhun Savio lah mawl lutukin a khawsa bawk si.

Ka phone riin min tiharha,peih lo zetin ka mengchhuaka,mahse ka phone ka ban chuang lo.A tawp leh mai ringin ka mit ka chhing leh ta zawk .Nizan khan ka muhil ta miah lo,khawvar dawn lamah ka muhil ta tawk kha ania.Muthilh leh rih ka duh,anih loh chuan ka mut that loh vangin ka lu a na dawn tih ka chiang lutuk.Mahse, ka muhil leh dawn chauh tihin a rawn ri leh a,ka thin a rim teuh mai.

Ka phone ka bana,min rawn call tu ka en a.Mimi,zing kar karah eng chu a hria ni maw?

‘Hello…’ ka tum aiin ka aw chang lam hret.

‘Ka tiharh che law?” nuam lo tih hmel fein a rawn ti a,ka inthiam lo ru nghal zat.

‘Um,a pawi lo…Nge min lo call a?” ka ti a, ka aw a nem ta deuh.

‘Vawiinah hnaah khan kan va kal dawn mi ka lo tia’ nidawn tak..Nithum chhungin zawm hman turin min ti anih kha..Ka theihnghilh hmin hmak..

‘Nia…Mahse…’ sawi zawm loin ka ngawi leh daih.Ka raia,Ramsey khan a duhdan kha a kal tlangpui ngei dawn anih chuan ka thawh a phal kher lo maithei.

‘Mahse…Ngatinge? I hman lo mi?” ka rilru hre lo zetin a rawn ti leh lang lang.

‘Aih,aw..Nia,vawiin chu ka hman lo a,ka lo theihnghilha,ka pain thil tihtur min lo hrilh lawk vek a’ka tita duah,engvangin nge ka lakah a sual pawh ni si lo hi ka bum ziah ka hrethiam tawh bik lo.

‘Ok..Anih chuan naktuk animai lawm..Kan zawm hma leh a tha nimaia’ a rawn ti leh a.A sawi dik thlap.Mahse….

‘Enteh,min lo nghak duh suh.Vawiinah lo va kal la,ka hman tak thut leh chawhnu lamah ka lo kal dawn nia..A tha em?” ka tita zawk.

‘Um..Mahse, mahni a kal ka hreh deuh mawle’

‘Hreh suh,I lo va kal hmasak khan keima tan a nuam dawn asin’ ka nui lui hak..

‘Phakar leh ta..’ a thinrim lo tih a nuih hak hak danah ka hrethiam vek thung.

Inhnuaiah ka chhuk thlaa,Nu Hmingi leh Luni kitchen lamah an lo invin leh lawng lawng tawh,Ka pain amahin Tv roomah Chibai Mizoram a lo en thung.Ka ril a tam lutuk tlat,nizan khan an in kal ka duh tlat loh avangin Inah Ramsey-an min thlah ta kha ania.Mahse, Inah engmah ka ei ta chuang lo..Ka pum a ri raih raih mai.

Kitchenah ka luta,Luni’n min lo hmu nghal vat.A nui var var mai,Thingpui ka duh leh duh loh min zawt a,ka bu nghauh.Dawhkana Grape awmin ka mit a la chat,ka pan hnaia,ka hmawm nghal mawlh mawlh bawk.Thingpui a siam zawh veleh ka chawia,ka pa bul lam ka pan leh ta zawk.

‘Pa…’ thutthlak ve pahin ka ti a,a rawn hawi vat.A tarmit a nawr chho zauh bawk.

‘Enge a? sawi la…’ a nui sun sun bawk.

‘Hna kha…Ka tling a’ awlsam fein ka ti liam puat.

‘Eh…A va lawmawm si ve.Engtikah nge i hriat a?’ phur hmel zetin a ti a.

‘Niminah,nizan khan sawi ka tuma,zinga sawiah ka khek leh sia’ ka ti leh a.Thingpui ka in pah bawk.

‘A that nasat chu,Mama hi naktukah a lo haw dawna.A lo haw hunah law law lawm tur anih chu,Mimi a tling em?” a tih zawm leh duah.Ka bu nghat.Mahse, ka rilruah ka chhang chiah lo haw tur lam zawk a awm daih thung.A hmain a lo haw tur an sawi ka hre miah lo.

‘Ngatinge a lo haw dawn thut a?”

‘Thut hleinem,a hma daih atangin a sawi lawk alawm..Christmas chawlh pawh a hmang tlang law law thei ang chu’ a ti leh a.Ka bu nghauh ringawt.Ka haw hran lo a,mahse Tetea aiin ka pawh lo zawk.

Ka zawm hun tur leh kan Pay tur vel kan sawi dun leha,ka zawm hun tur kan sawi rualin ka rilruah thildang a rawn lut lehnghal zat.Engtin nge Ramsey-an a tih zel dawn ka hriat ngei ngei angai.

Chaw kan eikham hnu lawkah Ka pa leh Nu Hmingi dawr kal turin an chhuaka,zanah ka mu tha lo bawk nen Luni tihfel turin ka kalsan tawp.Ka phone charge lam ka pana,miss call a lo awm kalh.Min rawn call tu ka en a,Ramsey leh Savio..Ka thaw hak mai.

Khumah ka thu a,Savio ka call pah bawk.A pick dawn lo emaw ka tih hnuah a pick ta hram.

‘I lo call mi?” ka ti nghal tawng.

‘Um,call..’

‘Eng nge?”

‘I la thinrim tihna mi?”

‘Engvang chuan maw?’ ka ti hlak.

‘Nizan kha…Ih,diktak chuan khatianga sawi kha ka tum bik miah lo ania’ nuam lo a tih hmel tak tak viau.

‘I bei mak khawp mai..Mahse, a pawi lo’

‘Nia,ka hmuh dun thut takah che u khan engmah i sawi ngam ka ring lo ve ringawt a’ a ti leh a.

‘A pawi lo…’ ka ti tawi tak ringawt.

‘Pawi lo ti mahla a nuam lo ve lawm,boruak a tha zui thei em?” a rawn ti leh a.

‘Um,pangngai…’

‘I thinrim lo tak tak em?” a ti leh a.Nizan kha chuan ka thinrim mai pawh ni loin a a niberin ka hre zawk.Mahse,ani lakah hi chuan ka thinrim rei tak tak thei ngai lo,ani pawh a ni ve chiah bawk.

‘Nizan kha chuan i a maw ka ti mawle,mahse a pawi lo ka tih kha…’ ka nui hak bawk.

‘Ok,anih chuan thuphachawi nan Lunch ka chawi mai dawn mi niang?” zangkhai fein a rawn ti leh a.

‘Aih,ngai lo..Ramsey nen inhmuh kan lo tum a’

‘Ok…A that chu..Pawisa a hek lo tihna nimai’ a nui hawk hawka.Ka nui ve lo thei lo.

Mu loin thu chungin phone ka ena,thianho groupah Apuia Damdawiin awmlai thlalak nuihzatthlak fe fe an lo dah chu niin,ka nuihpui kar kar mai.Msg a rawn lut a,ka open vat.Ramsey a lo ni a,ka call back ta miah lo..’Dar 1ah Zama a lo kal ang,Farmah a hruai ang che..Riak turin lo in ready la…’ ka thaw hak mai.Engvangin nge ka riah kher ang?Kan inru dawn tihna a ni angem? Msg thawn let ka tum zeta,ka type vek tawh.Mahse, ka delete leh ta zawk.

Muthilh tum kha ka muhil ta miah lo.Ka teikual sek ringawt.Thla tam pawh a liam hma khan riahbo mai mai kha chu ka tan thil awlsam lutuk a ni thina,tunah chuan chhuanlam mai tur ka hre ta tlat lo.Kal dawnah chhuanlam tur ka ngaihtuah chhuak thei ta hram..

Dar khat rik hma hretin Zama a lo thlenga,ani hi Ramsey Driver a ni a,kan inhmu ngun bawka kan inhre tha tawh viau.Inah awm chilh loin zingah a kala,tlaiah a haw leh mai thina,Ramsey hi mahni a Motor khalh nuam ti chi a lo ni bawk nen a zin dawn te anih ngawt loh chuan a hunbi pangngai bak a pelh mang mangin ka ring lo.

Kan thlen veleh Zama a let lehnghala,tih mai tur hre loin ka thu deuh vang vang.Ka mut a rawn chhuaka,chhungril atangin vawt tihnain min rawn tham leh ta bawk.Ka khua a sik dawn tih ka hria..

Khum a che data,ka meng nghal zawk bawk.Thawh tumin ka che a, mahse ka thawh hmain tuemawin ka hnunglam atangin min rawn kuaha,amah si chetin min pawt hnaia,ka darah a hmai a rawn phum zui nghal zat bawk.A perfume rim pa zet leh amah nena inhmeh ngawih ngawihin ka hnar a verh nghal zar bawk..Hlauh angai lo,tu nge anih ka hria..

‘Ramsey….’

‘Muhil leh rawh,keipawh ka mut a chhuak…’ a ti sup.A che hruta,a ban ka kham theih turin a rawn daha,ka kawr hak a rawn zena,ka dulah a kut zungtang sei thlurhin a rawn khawih nghal zat bawk.

Thawh ka tum lui peih lo,ka mumang a lo ni anga ka harhchhuah mai ka hlau zek zek zawk..