22/AUGUST - 19

Chapter- 19

Ka harh leh chuan keimah chauhin ka lo mu tawh.Ka mit ka chhing leh vang vanga,nichina ka bula Ramsey lo mu kha a tak nge ka mumang tih ka ngaihtuaha,mumang a ni hauh lo.Ka puansin ka hlima,zan a ni tawh tih room thim khap maiah chuan a hriat theiha,mahse Kawngkhar inhawng atanga en rawn lut vangin a thim dan a ziawm viau.

Muangchangin ka tho chhuaka,thawm ka ngaithla vang vang,engmah thawm ka hre lo.A reh thiap mai.Khawiah nge Ramsey kha a kal ang? Min hawsanin keimaha riak turin min kalsan a nih teh chuan aw..Ka lu ka thing nak mai…A haw lo tawp ang,amah ngeiin riak tura in ready turin min ti a,keimah mai chuan min kalsan lo ang.

Living room ka thlen rualin pawna Motor thawm ka hre nghal zat.Khawiah emaw kal tumin a chhuak dawn nge a lo let chiah zawk ang ka hrethiam lo.Kawngkhar lam ka pana,mahse ka thlen hmain a rawn inhawnga,thil khai bawr luk chungin Ramsey a rawn lut nghal bawk.A lo kal hmasak khan engmah eitur keng loin a lo kal a ni ngei ang.Mahse, zankhat chauh kan riak dawna,engmah lei chiam a tul lem lo.Bakah ka siam thiam lo thei lutuka,aman a siam ziah angaia,siamsa lei mai a awlsam zawk daih bawk.

‘I harh na a rei tawh em?”  rawn kal phei pahin a ti a.A hmelpa leh ngeng zet thin kha awm loin a lang dam thlup.Jacket hak nuam hmel zet a haa,a hnuaiah T-shirt a ha bawk.Jogger pant dum a haa,Nike Running shoe a bun bawk.A inhmeh lehpek.

‘Ka harh deuh chiah,I chhuak leh mi?” ka ti sap.

‘Um,thil eitur ka lei ka theihnghilha,ka va la leh lawk..I ril a tam tawh em?” zangkhai vuhin a ti leh a,ka bulah a rawn ding a.Chik zetin min en bawk.

‘Aih,tam vak lo..Ka lo siam dawn mi niang?” ka ti a.A thilkhai ka kawk zauh bawk. A then suk ringawt.A rawn kun hniama,a tihtur nghakin ka din ngaiin ka ding mawl tawp.A hmui lum thar tharin ka chhipsam a rawn fawpa,ka mit ka chhing nghal chial bawk.

‘Keiman ka siam mai ang,mahse puih ka ngai ang…A tha em?” a ti sup.

‘Um..Ka lo pui ang che’

‘Ok…Siam ila..Ka ril a tam lutuk ringawt..’

‘Anih chuan kal la…’ ka melh chho a,light eng hliah zawnga ding anih avangin a hmel ka hmuchiang thei lo.

‘Chaw tam te,chaw lo te pawh…’ ka hmai a sa nghal hat hat mai.

‘Naaa….’ Ka ti sap ringawt.

‘Ok…ka nghak ngat ngat mai ang chu..’a nui hawk hawk a,a nui riah ngeiawm lam engmah a lang lo.Min fan raih raih bawk.

Chawhmeh siam tur a rawn lei ho dawhkanah a phawrh chhuaka,ka pui ve bawK.Engtin nge tiang hian eirawngbawl a thiam zawk ka hrethiam lo.An chhungkaw dinhmunah chuan engmah a naupanlai atangin inchhung chet a khawih angai dawn lo tih a chiang.Kei pawh awmpui nena seilian ka ni a,ka thiam lo.Awmpui neih ka sawisel tihna erawh a ni miah lo thung.Chhungkua azir mai a ni zawk.Chuti nilose Ramsey hian eisiam a thiam miah lo ang.A tih ngai miah loa titu tur an nei vek.

‘Soup hi test la…’ tih pahin a rawn dah hnaia. A hmel en ringawt pawn a tui hmel ngawih ngawih.Ka bana,tlem ka inchhina,a tui over.Ka hawi chhuaka,a rawn thu ve chiah bawk.

‘Eng nge a an?” a plate a eitur insuah mawlh mawlh pahin a ti a.

‘Tui lo…’ ka chhaih chak tlat.

‘Maw? Engtin nge a awm a?” tih pahin a rawn bana.Ka nui ta hak..

‘A tui over animai..Enteh,engtin nge eisiam hi i thiam zawk a?’

‘College ka kal laiin keimahin ka awm thin alawm’ a ti tha ve mai.

‘Maw? Khawiah nge College i kal thin a?” ka ti leh a.Min rawn en a,a nui suk.

‘Ei phawt la,I hriat duh zawng zawng hriat nan zanin zankhua a aw mania..Anih loh pawn inneih hnu zawng zawng nen..’ a then leh suk bawk.Mahse, kei erawh Inneih tih tawngkam tawite khan ka mood a ti danglam vek thung.Ka bu nghauh a,engmah sawi tawh loin ka eitur lam ka en ta zawk.

‘Eng nge ni leh ta?” a tawng thawm ka hriat rualin ka hawichhuak lehnghal vat.A chair hnunglam a nghenga,chik zetin min en vung vung bawk.

‘Eng…Ngatinge?” a nui hmel ka hmuh takah chuan ka tita zawk.

‘I mood a danglam thuta,I chaw khan a tithinrim zawk che nge?” a hmelah nuihzatna a la lang tho.

‘Aih,ka ei thei angem tih ka ngaihtuaha…’ ka rilru a lo lang hmasa ber ka sawi ta ngawt.

‘Anih chuan thil ei lamah Problem i nei tihna ni em?” a ti leh sup.

‘Um..Mahse, a chang changing,a ni reng chuang lo a’

‘Ok..Ei chhin la…’ a ti leh sup.A awah min duatna ri niawm tak a lang tel thei bawk.

Ka chawei chhung zawng ka rilruah thildang a awm thei miah lo,ka thilei pawh a tui leh tui loh ngaihtuah loin ka ei liam vel mai mai a ni ber.Hna chungchang engmah ka la hrilh lo va,engtin nge inneih lam a kalpui dawn ka hre chuang lo bawk.Tunah rih hi chuan kan boruak duhthusam a ni ringawt.Mahse,hei hian engchen nge a daih ang ka hre lo..Nikhat chu sawi loh darkar pawh tling loah a mood a thlak danglam thut thut thina, rindan tur tawk ka hrethiam lo eih lo bawk.

‘Sil duh suh,ka lo ti ang’ ka hnunglam atangin a rawn ti a.

‘Ngai lo,ka tithei reng..’

‘I thei lo ka ti hleinem,ka lo ti ang ka ti mai alawm’a ti leh talh.Chhang loin tap ka bana,ka herh nghal zat.Mahse,enge nge thleng hi???

Ka tum loh lutukin tui a rawn phuh chhuak nghal hawk,ka te thawt bawk.

‘Ehe…Kalsawn rawh’ tih pahin min rawn pawta,min rawn din hliah nghal zat bawk.Mahse, ka kawr hma a huh vek hman tho.Tui phuhchhuak hawk hawk chu siamthat tumin a buaipui nghal a,a hnungah tih leh mai tur hre loin ka ding mawl tawp ringawt.

Reife a siam hnuah a siam thei ta hram.A huh vek bawk.A phuh nasa bawk nen Kitchen chhuat a huh nasa hman viau,ka theih ang angin ka hru hula,Ramsey-an min pui  ve leh bawk.Chhuat nawhna ka tifaia,ka bulah Ramsey a ding bawk.

‘Lo va intifai la’ amah en loin ka ti satliah.

‘Aih,ka lo nghak ang che’ a ti sup.Ka thil tihlai ka chawl dat mai.Inbual dun maw? Ka ngaihtuah zawng ringawt pawn ka awmdan a danglam titih ringawt.Hahthlak hian a..Zanin hian Living roomah a riak dawn hauh lo tih ka chiang lutuk bawk.

‘Ka zo e..’ tih pahin ka inhera,a rawn hawi vut.

Min rawn en a,ka hnute zawnah a mit a fu ta chat.Ni lo..Ka kawrlum chawei dawn khan ka hlipa,a hnuaiah T-shirt ka haa,ahnuaiah Bra bak engmah ka ha tawh lo.Tui in min phuh huh takah khan ka T-shirt hak a huh veka,ka taksaah a bet thlar mai,a pan bawk nen a lang tlang titih..Ka hmai a sa nghal hat hata,ka kut ka kuangkuah ta ngawt.A nui suk ka hmuh rualin ka thiltih atthlak zia ka hrechhuak lehnghal zat lawi.

‘Thil hi ka hrerei thei lutuk…’ a thle buka,a nui suk bawk.

‘Ka’n inthlak lawk ang…’ ka tita ngawt.

‘Um…Hritlang kai a hlauhawm..Kal ila…’

‘Aih,ih..Ka sawi awmzia chu tah hian lo awm la’ ka hrawk ro lutuk tih hnawn nan chil ka lem khalh bawk.A thle buka,a hmui a petsawi zauh bawk.Tihngaihna hre lo zetin ka ban ka phar hliaia,min en reng bawk nen beidawng zetin ka dahthla leh hnak bawk.

‘Ok..Kal la,mahse i rei lutuk chuan ka lo lut ang..Vawt ka ti ve tho a’ a ti leh sup.Ka ngaihtuahnaah thildang a lo lang zawk.

‘Anih chuan lo kal la..’ ka tita sap.Engthil nge ka tih ngaihtuah ka duh rih lo..

‘Maw?”

‘Lo kal la,kan inthlak rual thei reng alawm’ ka ti leh a,pawisak nei lo hmel zetin ka dak deuh vah bawk.Mahse, ka chhungril erawh zam vangin a khur lo chauh thung.

‘I chiang em?” a ti leh sup.Ani leh ni lo ang takin a awah mahni inrintawk lohna niawm tak a hriat tel theih bawk.

‘Enge chian loh tur awm ang? A vawt si,kal ang’

Roomah kan inzui luta,ka bag awmna lam ka pana,Ramsey erawh a thawmhnaw dahna lam a pan thung.Ka bag ka hawnga,thil ka hrechhuak ta chauh.Ka kal dawn khan thawmhnaw ken ka tuma,mahse zankhat chauh anih dawn chuan tiin ka dahchhuak leh ta zawk kha ania..

‘Inthlak la…’ ka bul mai atangin a rawn ti sup.Rang zetin ka bag ka zip vat bawk.

‘I inbual dawn chuan inbual hmasa la..’

‘Um,ka lo ngaihtuaha,thawmhnaw i keng em?” a ti leh sup.Tawngkaa chhang loin ka lu ka thing ringawt.Palh pawh awm thei anih laiin engvanga ka thawmhnaw kha pakhat tal pawh keng lo nge maw ka nih reng reng ni?

‘’Ok,a pawi hleinem.Ka kawr hak tur a tam alawm..’

‘Um..Anih mai loh chuan..” ka then nak ringawt.

Inbual tura a luh veleh ka thawmhnaw ka hlip sawk sawka,a thawmhnaw bawm atangin kawrlum phiar ka lachhhuaka,ka ha nghal thak,ka tan a lian lutuk lam hret,ka mal chanve a khuh phak titih,Pyjama ka lachhuak leh a,chu pawh ka tan a lian lutuk leh bawk.Mahse, pawi ka ti lo..Tih leh mai tur hre loin ka ding ren rawn.

Ka phone a rawn ri a, ka phu nghek bawk.Ka pan phei vat,min rawn call tu ka en a,Mimi..Pick loin Living room lamah ka keng pheia,vawiin lam a kalna min hrilh a tum ngei anga,Ramsey-a a lo chhuak thut anih chuan a hre thei vek ang.

‘Mim…’ ka ti sap.Tukverh bulah ka dinga, pawnlam ka thlir vang vang bawk.

‘Inah lo ka lo kala,I lo riakchhuak daih a’ a rawn ti lang lang.Ka mit ka chhing sawk ringawt.

Ka pa hnenah khan ka pu teinah ka riak dawn tih ka sawi kha ania,fiah turin a call kher ka ring lo.Mahse, Chichi-a hnenah ka kalna tur tak hrilh loin ka pain a call palh takin tihtur pawimawh ka pa hriat chi loh a awm tih ka hrilh anih kha..

‘Um,nia…Enge vawiin I kalna lam te?” thildang min zawh hlauin ka tita zawk.

‘Chu chu nia hrilh che ka tum,awi..A nuam dawn reuh lutuk,kan Roomah chuan kan pahnih bakah midang pahnih mipa ve ve an thu ve bawk dawn a..’ a awah a phur zia a hriattheih.

‘A that nasat chu,damchuan naktukah emaw lo kal ve ka tum ang..A harsat hmel em?”

‘Ka hre lo le,kan boss tur chu maw Hnamdang ania,thlahpawlh anih ka ring.A chhe lo nasa mangkheng animai’ a nui kar kar mai.

‘Anih chuan tan viau i ngai anih chu’ ka nui ve a.

‘Naah,in la Plural thei lutuk mai,I hmuh ve hunah chuan i Ramsey kha chu a tla hneh viau ang aw’ a nui leh a.Ka ner nak mai.

‘Anih chuan Ramsey dinhmun a derthawng tihna nih chiah chu’ ka nui hak hak..Mahse, ka hnung lam atangin Ramsey-an min rawn kuaha,ka beng a fawp thawi thuak bawk.Ka ip chawih mai.

‘Nia…Dik lutuk,tak takin hnamdang,Nupui nei lai pawh a nimaithei’

‘Mim,Nakinah kan inbe leh dawn mi?’ ka tita ngawt.Ramsey-an ka nghawng hnunglam a fawp kual dun dun a,awm pangngaiin ka awm thei hlawl lo.

‘Um…I buai hmel si,nih phawt…’ ka phone ka off a,ka insangmar teuh ringawt.

‘Engvangin maw ka dinhmun a derthawn a?” a ti nghal sup bawk.Ka mit ka chhinga, ka ngheng ta nge nge.Ka khup a zawi vek,ka ngheng anih loh chuan ka tluk ka hlau a ni mah bawk.

‘Thil hrilh tur che ka nei’ ka ti sap..Tunah ka sawi ngei ngei angai.

‘Um..Mahse,mu phawt ila..’

‘Khumah i riak ve dawn em?” engvanga zawhna atthlak lutuk hi zawt ziah nge ka nih ka hre bik lo.

‘I duh loh chuan?’ a ti leh sup.

‘Aih…Ka duh maithei..Ka hre lo le’ ka ti bah nak mai.

‘Ok,anih chuan mu ang le,I vawt vek tawh ania’ a ti  dam thlup.

Khumah ka inthlawh ta kak,a rawn mut ve hmain Light a off a,a rawn lawn ve a,puan a rawn pawt kaua.Min rawn kuaha,a darah ka lu ka nghat,a awmah ka hmai ka phum kak bawk.

‘Ramsey…’ ka ti sap.

‘Um..’

‘Eng lo ania…Ih..’ ka sawi mai hreh leh ta tlat.

‘I sawi hreh chuan sawi lo mai la…’

‘Engtikah nge ka in check-up ang?” ka tita zawk.

‘Naktukah kan kal ang chu ka lo tia,tlaiah..’ a ti sup.

‘Um…’ ka ti sep ringawt.

‘Chuan,Ka pa naktukah a lo haw anga,zanah ka sawipui anga..Palai lo kal maise tha iti em?”

‘Ka hre lo,engmah ka ngaihtuah thiam lo…’

‘Hahdam rawh,Palai an lo kal anga,kan innei dawn tho anih chuan i pa pawh a thinrim lutuk lo ang’ a ti leh sup.

‘Ka ngaihtuaha,invenna kha lo hmang ila chuan tiang hi a thleng dawn lo va..Ih,ka sawi tum chu naute vangin inneih nain a phuar che angai lo anga’ ka tawng tawp lam a zuih ral titih.

A che dat,ka inlahrang nghal vat bawk.A tho a,enge a tih dawn ka hre lo.A ri khap a,a eng ta iar.A rawn kal pheia,ka thuchhuak nghal vat bawk.Khumah a rawn thu a.Min en run bawk.

‘Min en teh’ a ti sup.Thuawih zetin ka en ve mai bawk.

‘Naute hi ka tana a pawimawh zia ka sawi tawh kha,mahse chu ai chuan nanghi i pawimawh zawk..’ a ti sup.

‘Mahse,ka sawi zawk chu…Ih..’ ka sawi zawh hmain ka biang tawn tawnah a rawn vuana.

‘Naute vanga phuar nih hi pawi ka ti lo,a chhan I hria em?’ a ti leh nghut.Ka lu ka thing nak ringawt.

‘A chhan chu maw,Naute hi a lo pian hma pawn ka fa anih avangin ka hmangaih tawh.Mahse, chu aia nasa chuan ka Hmangaih che’ sawichhuah harsa a tihzia a hmelpa zetah a lang chiang ngang mai.Kei erawh mak ti lutukin ka ang pham ringawt.

‘Ka…Ka hrethiam lo…’

‘Hriatthiam angai lo,ka hmangaih che..Chu zawng chu…’ tawng tumin ka ang leh ziau,mahse a hmui chhah tapin ka hmui a rawn khar ta hmak..Ka mit ka chhinga,ka biang a lum thla pap chuan ka mittui a tla tih min hriattir thei bawk.Mahse, tun tum erawh chu hlimna vang a nit a thung.Ni e.Min Hmangaih anih chu..

Hnunglam atangin min kuaha,a mal sei thlurhin min khan bet chial bawk.Hetiang ang hlimna ka nunah ka la tawng ngai pawn ka hre lo..Ka dul a rawn chul a.

‘Naute leh nang hi khawiahmah ka kalsan ngai lo ang che u..’ a ti leh sup..Ka chhang lo..A kut ka vuana,a kutzungtang karah ka kut ka rawlha,a hum nghal vang vang bawk.

‘Mahse…Naute hian ka tihduh min tih tir thei lo rei dawn lutuk hi ka lawm vak lo’ a nui nghawr dat..

Ka thawh ve meuh chuan chhuak turin a lo insiam peih vek tawh.Kawngka bulah kan ding duna,ka ngheng ar ar bawk.

‘Dar 3 velah Zama a lo kal anga,Inah inthlak phawt i duh chuan i kalpui anga,Doctor ka lo be fel sa anga,a tha em?” a ti a.

‘Um,tha e…Mahse, helai hi nuam ka ti..’

‘Anih chuan tah hian kan cheng reng zawk mai dawn mi niang?” ka hnarah a rawn tuaia..

‘Fapa mal i ni a,hetah ka awmpui daih che chuan mo sual deuh ka ni dawn asin’ ka nui hak hak mai.

A kal hnuah eitur ka insiam chawpa,mahse engmah tihtham ka ei lo.Nizan khan ka ei tha viaua,mahse tukin chu ka luak a chhuak leh ta tlat lawi.

Ka inbuala,ka inbual zawhin ka phone ka en a,Mimi min lo call na a lo awm kalh.Ka call back nghal zat.Nizan khan engmah ka hrilh ta miah lo.Huizzz..Ka beisei loh lutuk thil thleng khan min theihnghilh tir vek.

‘Min lo call a mi?”

‘Aw,vawiinah i lo kal ngei ngei angai ania’

‘Maw?” ka ti that mai.

‘Kan boss a zin dawna,naktukah..Midang hian kan zawm vek tawha,Aizawla awm i ni tho bawka,vawiinah ngei ngei i lo kal angai an ti a’ ka thaw hak mai.

‘Ka lo be leh ang che’ ka ti a,ka off nghal sawk sawk.Ramsey ka call nghala,a pick thei lo..Ka hrilh ngei ngei angai.Kal lo tura min duh chuan ka kal lo mai ang.Buaina a awm lo.Mahse, a pick thei lo.Ka call nawn leh a,a pick ta hram.Mahse, hmeichhe aw a nit lat.

‘Tu nge aw?” ka tum aiin ka au ring lam hret.

‘Agnes-i ka nia,Ramsey hi meeting a nei mek a’ka hrethiam lo..Meeting naah pawh awm se engvangin nge Agnes-in a phone a lo pick ngawt ang?

‘Ok,a pawi lo mai.Nakinah ka lo call leh mai dawn nia’ dam thlapin ka ti ta zawk.

‘Um,…A tha lawm,..Eeeee,Zorin,ka lawmpui che aw’

‘Maw?”

‘I rai tih ka lo hriaa…’ ka ip chawih mai..Engtin nge a ni hian a lo hriat theih? Savio…mahse a hrilh lo taw pang.

‘Ngaihtuah buai suh..Ramsey nen kan plan vek tih I hriat kha,mahse i beisei ang kha a thleng dawn lo ania’ a nui a.Ka mit ka chhing sawk ringawt.