22/AUGUST- 20

Chapter- 20

Ka phone riah ka phu zawk,engchen nge ka dinna ngaiah ka din pawh ka hre lo.Ka phone ka en a.Mimi bawk.

‘Hello..’

‘I lo kal dawn tawh em?” a rawn ti a.Ka mit ka chhing a,ka tum loh tawpin ka mittui a tlaa,ka biangah a luangthlaa..Hruk ka tum buai peih lo.

‘Ka tawng i hrethei em?” amah bawkin a rawn ti leh a.

‘Um..Tikhan hrethei,ka lo kal ang.Ka insiam dawn meka’ ka mittui tla zel tur dan kir tumin chunglam ka melha,ka khap sak sak bawk.

‘Ok..Tha lutuk,I lo thlen veleh min lo call la aw’ phur zetin a rawn ti leh a.

‘Um..Call ang,ka dah phawt aw..’ pangngai thei ang berin ka ti a,min hnial lo in a aw ve mai bawk.

 Ka rilrua lo lang hmasaber ka tita phat..

‘Khawnge i awm?”Phone a pick rualin ka ti nghal zat.

‘Inah…Eng nge?” mutchhuah hmel fein a rawn ti a.

‘Min lo hruai teh,ka hmanhmawh  lutuk ania’

‘Khawiah maw?” a ti deuh hu.

‘Ramsey Farm Houseah…’ a thaw hak ri ka hrenghal zat.

‘Khawnge Mama?”

‘Ka hre lo…I lo kal dawn nge dawn lo?”

‘Kal dawn,kal turin min ko a ni lawmni?” zangkhai zetin a rawn ti a.

‘A that chu,hmanhmawh rawh aw’ ka ti leh a.

‘Ka rawn thlawk dawn nia’ a nui hak.

Ka thawmhnaw hak ka hlip sawk sawka,keima thawmhnaw pangngai ka haa,ka bagah ka Charger leh Earphone ka thun a,engmah theihnghilh nei lo turin ka en kuala,Khuma Ramsey thawmhnaw ka hak ka thehthlakah ka mit a fu chat.Ka pan pheia,ka lakanga,ka thlep sawk sawka,a dahna ngaiah ka hnawh lut a.Engmah ka sulhnu helaiah hian hnutchhiah ka tum lo bur.Engvangin nge ka kalsan tih lam chu Agnes-in a hrilhfiah mai ang.

‘I at zia i ngaihtuah ngai em? Ramsey tan Hmangaihna tih vel hian kawngro a su miah lo ania,anihna takah chuan i rai kha tihpalh thila thleng a ni a,Ramsey nen kan sawi dun hnuah thlahnih khat inneih hnua tawptir leh mai kha a finthlak kan ring a..Eee,chuan thil pakhat..Hetiang ka hrilh chhan che chu reilote atan mai a nupui nih i pumpelh nan ka sawi aw..Tuna i inven mai kha a finthlak zawka,ka  thilsawi hi i duh chuan I zawtfiah thei ania,mahse chhanna dik a pek che ring lo la aw..Mi a i nih loh kha ’a tawngkam a min hmuhsitna ka hre tel thei hial anih kha..Ka bengah a ri nawn tlut tluta,beidawng thinrim lutukin ka au chhuak ta nghek..

‘I hriatdanah thutawp siam tawh suh,I duh phawt chuan kei nen kan sawi hmasa thei vek,min ringhlel lo turin ka duh che’ Ramsey-a sawi lai ka bengah a rawn ri nawn leh a.Mahse, tun tumah chuan engmah sawifiah tur a awm lo.. Engkim mai kha Agnes-i sawi kha a dik ang tih ka ring hmiah.

Horn ri thatah ka thuchhuak vat.Ka mit ka nuai nawk nawka,ka tap tih a hriat ka duh miah lo.Ka chhuaka,Bike zawkin a lo kal a ni a,ka ip deuh zawk.Ka chuang thei angem ka hre lo..Mahse, chulam ngaihtuah hman ka ni lo..

‘Khawnge kan kal dawn?” min hmuh veleh a lo ti vat.

‘Inah…Chuan,hna zawm ngei ngei ka ngaia’

‘Naaah,nithum i ti maw tia?”

‘Ni e,mahse vawiinah zawk kal turin min ko a’ ka ti liam puat.

‘Um,engpawhnise lawn phawt mai teh’

Inah min daha,keimah inkhalh chhuah ka hreh avangin ka Car aman a khalh ta zawk.Nidang ang bawkin eng eng emaw sawiin a titi a.Mahse, ka ngaithla liam mai mai.Pawn lam ka thlira, ka rilru buai nuaih nuaih tihfim tumin ka  beia,mahse ka hlawhchham titih.

Office kawtah Mimi a lo ding vang tawh.Savio a hmuh rualin a nui var var bawk.

‘Ka lo lut ve lo mai ang,tah hian ka lo awm ang’ a ti a.

‘Lo lut ve la,a nuam asin..’ Mimi zawkin a ti a.

‘Aih,inrei viau dawn anih leh min lo hrilh la…’ a ti leh a.

‘I ning lo ang maw?” ka ti sap.

‘Hei a awm alawm’ a phone a lekkang zauh bawk.Ka hrethiam,PUBG atchilh miau hek le.

Officeah Mimi nen kan inzui luta,kan Pu tur Roomah kan lut tlang ta zel.Mimi sawi kha a dik tih kan Boss tur ka hmuh rualin ka hrenghal mai bawk.Kan interview tum khan ani hi ka hmu hauh lo tih  ka chiang,a chhan chu hmuh tawha theihnghilh leh awlsam tak Mipa a ni tlat lo.

‘I phone kha…’ tih pahin Savio-an ka phone a kawk zauh.

‘Eng nge?”

‘Eh,i pick dawn lo mi?”

‘Aih…’ ka ti nghat.Min lo call tu ka hria,nizana a sawi lawk ang kha tih tumin a Driver a rawn tir a ni ngei ang..Tenawm lutuk,engmah thleng lo ang maiin engtin nge a la khawsak ngam zawk ni a?

‘Tu nge?” Dawhkan a kik ri kauh bawk.Ka melh zawka,ka ngaihtuahna hriat tum niawm takin uluk fein min en ngar mai.

‘Mi pakhat…’

‘Mama…A dik em?” ka bu nghata,ka chil ka lem khalh bawk.

‘Eng nge ni leh ta pek?” a ti zawi sap.A rawn kun hnai nghal zat bawk.Ka hawi kuala,kan piah lam Table kilin Hmeichhe pahnih an thu duna,kan tawng an hre phak in ka ring lo.

‘Ka hre lo…’ ka ti chhuak halh ringawt.Diktak chuan sawi tan dan tur ka hre lo ti ila a dik ber ang.

‘In inhau tihna ni em?”

‘Aih…’ a hmel buai deuh nakah chuan mak a ti tih ka hria.

‘Ok..Anih chuan i phone kha pick phawt mai teh,ka u nena inhmelmak hi a nuam fahran lo teh ania’ a ti leh hmuk.

‘Ka call back mai ang,a hmanhmawhthlak loh.Tlaiah in entir tura kal kan ngaia…’ ka ti sap.

‘Um..Anih chuan engtin nge inneih lam te?”

‘Ka hre lo’ ka ti mawl leh tawp.Nizan kha chuan Palai a rawn tir anga, kan innei ang a ti kha ania,tunah chuan engmah ka hre lo takzet tawh.Bakah neih ka duh reng em ka hre hek lo.

In kan thlenin  Mama a lo thleng tawh,ka pa leh Nu hmingi an lo awm ve bawk. Min hmuh veleh a nui nghal var var mai.Nunphung pangngai takin ka nung tih a hre tawh ngei ang.Tunah chuan a zak tawh lo ang chu.A lo haw hnuhnun ber tuma keimah vanga a zah thu min sawi khum sak sak tum kha ka la hre reng.Mahse, a demawm lem lo,Phaiah a awma,fel tak anga langin a lo haw pawn Kohhran leh Khawtlangah a inhmang viau ziah.Mahse, chiang takin ka hria,a bialnu Inluahah a riak fo va,a bialnu pawh a In luahah karkhat dawn dawn te a khawsa tih ka hre ru kar thung.Mipa leh Hmeichhia,unau pawh ni lo lehnghal kha zankhuain an mu mai mai dawn lo tih ka hrethiam ve tho.An inkarah pawh Bible dah tehreng se dahsawn a harsa lo hle bawk ang.Mahse, sawichhuah tul ka ti lo va,ka sawi lo mai zawk.A mizia hrim hrim pawh Tetea aiin a danglam zawka,a nu a ang ti ila a dik ber.Mahse, an naupanlai atanga cheng ho,Pa pakhat fa kan ni a,inmil lo han tih viau tur erawh kan ni lem lo.

Khumah tih mai tur hre loin ka thu ren rawn.Sana ka thlek zauha,dar 3 a pel tawh.Ramsey ka la call back ta miah lo.Ka tlanchhia ang nge ka hmachhawn anga,tawpna ka siam zawk ang ka hrethiam lo.Reife ka in ngaihtuah hnuah ka call ta nge nge.

‘Khawnge i awm hrep a?” Hello tih pawh a awm lo.. Ka ner nak mai.

‘Inah…I lo call lai ka hre lo va’ dawt ka sawi ta ngawt.

‘Inah…Zingah khan enge ka sawi lawk kha?” a ti leh tuar.

‘Enge i sawi lawk ka hre tawh miah lo’ ngeiawm thei ang berin ka nui lui hak bawk. 

‘Zorinzual,min nawrlui miah suh..I kalchhuak duh anih pawn Savio ni loin kei min ko thei lo tihna mi?“ a aw a ring ta lo.Mahse,a thinrim tih erawh haider theih a ni lo.

‘Ka lo call che a…Mahse,Meeting i lo nei a’

‘Meeting…Lawk,vawiinah eng meeting mah ka nei miah lo’ a ti sup.

‘Ok,anih chuan i phone pick duh loin Agnes-i i pick tir tihna nih chiah chu’ ka ti hlak.Ka sawi zawh rualin anchhelawh niawm takin a phun hluk thung.

‘A pawi lo,sawifiah duh suh’ ka ti leh hmak.

‘Akima te Inneih naa mi tur annu kawr Agnes-in a siamsaka,chumi avang chuan ka kal ngei tih ka pha lo..Mahse, keimah chauh ni loin Akima leh a nupui tur bakah a nupuiin a best tur pawh a kal ve bawka..Engtik laiin nge i lo call erawh ka hre miah lo thung’ a rawn tita duah.Ka thaw hak mai.

‘Sawifiah duh suh ka tih kha,ka ngai pawimawh lo’

‘Keiin ka ngaipawimawh,chuan..Min ring thei miah lo hi engtin maw tak hrem i ngai bawk in ka hria’ a nui hawk bawk.Ka nuih a za ve miah lo..A hma anga thlem lungawi mai mai theih anga min ngai hi ka haw ngawih ngawih zawk.

‘Ka rin leh rin loh che a pawimawh hleinem,I tihtur engmah a danglam chuang lo va..’ ka ti leh nghat.

‘Ook…Engpawhnise ka lo kal ang,lo insiam rawh’ ka beisei loh lutuk a sawi takah chuan ka thaw hak mai.

‘Engti turin maw?”

‘Doctor hnenah kan kal ang ka tih kha..’

‘Aih…’

‘Inhnial lo teh ang,inhnialna Moodah ka awm bik lo ania’ ka chhan hmain a off zui nghal hmak bawk.Beidawng thinrim lutukin ka phone ka thehthlaa.Ka haw hluah hluah niberin ka hria.

‘U Zorin,U Ramsey a lo kal a’ Kawngkhara rawn dah pahin Luni’n a rawn ti a.Ka bu nghat ringawt.Ka rin aiin a lo thleng hma fe zawk.Hna atang emaw In atang pawn lo kal se minute 20 tal a mamawh hrim hrim.Mahse, minute 10 vel chiah lo kal nan a hmang thung.Kan inbiak zawh hnuah chesawn loin ka thut ngaiin ka la thu ta reng,mahse Office a ka kalna ka la inthlak lo va, insiam tehchiam ka mamawh lo hrim hrim bawk.

Muangchangin inhnuai lam ka pan a,ka pa nen an lo thu dun a,Kamiz dum leh kawrlum phiar,hmaphel a haa,a thawmhnaw rawng a thim bawk nen a tilang nelawm lo zual sauhin ka hria.Muk hmel zetin an ti ti a.Ka chhungrilah hlauhthawnna a lo lut thut.Engmah la hriattir ka duh lo.Ka pen thla ta hmawk hmawk.

‘Pa..Kan chhuak lawk dawn a..’ Ka pa hnunga din pahin ka ti a.An rawn hawi rual thawt.Ramsey ka melh zawka,min lo en ngur mai.Rang zetin ka hawisawna,ka pa lam ka en leh ta zawk.

‘Um,Ramsey hian a lo sawi a…’ a ti awlsam mai.

‘Anih chuan kal ila’ Ramsey ka en lo thei ta lo.A bu nghut,a rawn tho chhuak nghala,a thawmhnaw hak vang nge ka hre lo,a lang lian lehzual riauin ka hre mai.

‘U…Khawnge i kal dawn a?” ka pen tan tawh ka ding chat,ka hawi leta.Mama Stepah a lo ding reng tawh.

‘Kan chhuak lawk dawn a..’

‘Tu nen? Ekhai…U Ramsey’ lawm hmel zetin a ti nghal hlaui,kei erawh hamhaih zetin ka ding mawl tawp.Engtin nge an inhriat ka hre lo..Savio hi chu ka thian tha ber a ni miaua,hriat loh tur a awm lo.

‘Eheu..Zothantluang,a va mak tehhlawl ve’ Ramsey-an a ti ve a.Khawiah tak chuan lo inhria ni maw?

‘I dam tha maw? Engtik nge khulamah in lo chhuk leh ang?” ka nauin a ti a.Min rawn kal pela,Ramsey nen an inchibai nghal lawp lawp bawk.

‘Ka chhuk rih lo ang,engpawhnise Zorini hi i u a ni tih ka lo hre miah lo a’ a ti leha,min rawn melh zawk.

‘Ni e.Kan upa ber..Lawk,ka rindan hi a dik em?’ min rawn en ve a,a mitmeiin zawhna min zawta,tawngkaa chhang loin ka bu nghat ringawt.Mak ti zetin a mengphar nghal awk bawk.

‘Mambawih,inchhuak dawn em ni?” Nu Hmingi Kitchen atangin a rawn chhuak pheia.Eirawnga bawl tih hriat zetin Apron a ha bawk.

‘Aw,hei chhuah kan lo tum a..Nu Hming,kan lo let hma lo maitheia,a pawi em?” Ramsey zawkin min tihkhalh vut.Ka insangmar nghal teuh ringawt.

‘Pawi lo ve.Mahse, khawnge in kal dawn a?” dilchhut zetin a ti leh a.

‘Akima te Inneih na tur velah mawle,karleh nilai mai hi a ni tawha’ a ti leh nghut.Ka lo manghilh hmak tawh.

‘Anih chu mawle,hei Mama a lo haw a..Tlaiah chaw rawn ei ve nghal la..A pi leh Puin chaw an rawn ei dawn a’ atih zawm leh a.Ka hre lawk miah lo.

‘A lawmawm lutuk,mahse nidangah zawk nimai rawhse..Hei,Zothana lah hi Zorini nau a lo ni renga’ a ti leh a.A nelawm ngai hauh lo nangin a duhna lamah hi chuan engmah tih theih loh a nei lo niin ka hria.

‘Eeee,in lo inhria a ni maw?” phur hmel zetin a ti ve a.

‘Um…Hria e..Kan kal phawt ang..Anih phawt u’ a ti zangkhai leh vuh.Min rawn en a,Kawngkhar lamah a thle zauh bawk.

Kan tlanchhuah thlengin engmah sawi loin ka thu ngawi ngar mai,phone ka khawiha..Tumah han biak tur pawh ka hrechuang lo.

‘Phone khawih suh, I rui leh ang’ a ti nghut.Nichina mipa nelawm leh mi hip zet kha chu a bo fel leh hmiah tawh tih a aw chang zetah ka chiang mai.Khawpuia seilian,naupanlai atanga veivahna atana Motor hmang thang em em ka ni chungin ka nu ka chhuna,Motor ruih ka ching tlat lawi.Keiman ka khalh anih loh chuan ka rui awlsam em em a,Phone phei chu ka khawih tha ngam eih lo.Hei hi Ramsey hian a hrechiang lutuk tlat.Mahse, a sawi vang ngawta dah ka tum der lo.A thu thua awm tur ka ni hek lo.

‘Dah rawh…’ a ti leh nghut.Ka hre lo der hmiah..Mahse,ka inrin hmain a rawn pawt thuta,a kekawr dinglam ipteah a thun zui nghal daih bawk.

‘Enge maw i tih le?” ka ti hlak mai.

‘Ka ak mawle,I dah duh miau si lo a’ a ti awlsam et.

‘Min ngaihtuah avangin ka lawm e aw’ ngeiawm lutukin ka nui lui hak..

‘I thinrim chhan hriat ka duh ania’ a ti leh nghut.

‘Sawi kher ngai loin i hria emaw ka tia?’

‘Hria ila ka zawt hauh lo ang che’

‘Anih chuan thil ka zawt ang che.Min hmuh hian inthiam lohna i nei em?” ka ti a,min rawn en zawk.Mahse, a Motor khalh lam chauh ngaihven niawm takin hmalam a en leh nghal vut.

‘Inthiam lohna tur ka neih ka hre miah lo mai’

‘A that nasat chu,thil pakhat ngen che ka duh.Ka rai tih hi reife chu ka thup thei dawna,a lang mai lo ang ka tihna nih chu..Inneih hi hmanhmawh lo ila ka duh a’ ka tita duah.

‘I sawi awmzia ka man lo’ a ti nghut.

‘Ka sawi awmzia chu inneih hi hmanhmawh loh ka duh..I hrethiam em?” ka ti leh nghat.Ka lakah Agnes-i nen game tenawm lutuk an khela,engvangin nge keipawn ka khelh loh bik ang?Ka beisei loh lutukin kawngsir zau laiah Motor a tiding  ta zawk.Ka hawi phawk hra mai.

‘Ngatinge i din a?” ka ti hmak.

‘Savio vang a ni em?” ka beisei loh lutuk a sawi takah chuan ka thu khawng nghal lah mai.A dinchhan ka zawhna a haider hmiah bawk.Mahse, ka ngaihtuahna a vir zawk thung.

‘A ni tita ila engtin nge i tih ang?’ ka ti salh mai.

‘Thil thleng tur sawi loh ka duh zawk’ a aw a ring lo.

‘I tihnat ka phal lo ania,diktak chuan nang nen kan inkawp avangin Am-i a kawp ve angaih phaha…Diktak chuan ka laka Agnes-i nen intih ang tho kha i lakah pawh kan ti ve a’ ka tawng hnem bawk nen ka sawi zawh rualin ka thaw hak mai.

‘I sawifiah deuh thei angem?”

‘Ka sawi tum chu….Ih …Savio lak atanga min lakbo i tum lai khan nang leh Agnes-in plan in nei veka,keini pawn kan nei ve bawka..Naute hi chu kan plan tel lo..Anihna takah chuan ka duh miah lo tihna anih chu’ engtin nge ka sawi theih ka hre lo.Mahse,amah tihnat theihna tur ka mamawh.Naute hmang bakin ka tina zo dawn lo tih ka chiang.Keimah min duh tlat lo.Kan duh loh te lakah tumah kan na ngai miau lo.

‘I sawi i hrechiang em?” a ti leh hmuk.A inpet ruh fun mai bawk.

‘Um…Bakah tunah hian in check-up ka mamawh tawh lo ania,chhunah khan Savio nen kan kal tawh’ ka sawi zawh rualin min rawn hnaih nghal ruak bawk.

‘Ka fa a ni a, ka mawhphurhna a ni..Ka sawi nawn leh ang,tu mipa mahin ka fa hi an lo buaipui ve ka duh lo..Savio pawh tiamin..’ a aw hlauhawm zia chu puitak a ni ringawt.

‘Pawi ka ti..Mahse ka tana Savio pawimawh zia i hria alawm.Kan planah tel lo mahse a tuar thei viau bawka’ ka ti lui leh salh.Ka dawtsawi avanga Savio dinhmun khirh tur zia ka hmu lawk vek,mahse hei bak kawngdang a awm lo.Zanah ka ko anga,ka hrilhfiah mai ang.A thinrimna erawh tuar thei tura ka beih angai nasa khawp ang le.

‘Hmanni khan Savio chungchang ka sawi vangin i thinrim kha ania..’ min bia pawh a ang lo..

‘Duh aiin kan kal thui ve ve niin i hria em?’ ka ti leh sap.

‘Maithei…Naktukah ka zin dawna,mahse zaninah ka pa hnenah Inneih chungchang ka lo sawipui ang..A hma thei ang bera tih ka duh bawk a,min hnial loh hram ka beisei’ a ti leh duah.

‘Min hrethiam la,ka duh rih lo ka tih kha…’

‘I duh leh duh loh ka zawt lo che’

‘A neitu tur ka ni a,ka duh loh chuan ka pain min tir lui dawn miah lo..Bakah naute hi paih mai a harsa lo ania’ ka sawi zawh rualin ka ti tla ngai dawn lo tih ka chiang lutuk mah mah.

‘I ngam phawt chuan tum chhin la…’ min rawn en a,a mitmeng hlauhawm zia chu pui tak a ni ringawt.

‘Ahhh,min vau tihna a ni em?”

‘I ngaihdan dan le…Tunah chuan Chhuk phawt rawh…’

‘Maw?”

‘Kan kalna tur ber kal angaih tak loah chuan kalna tur dang ka nei..Chhuk la,Taxi i ko mai dawn nia’a ti leh hluk.

‘Mahse…Ok…’ ka ti leh ta zawk.Ka chhuk fel awrh tihin a tlanchhuak nghal chu a ni der.Hrep tak hian a..Tunah chuan a natzia a hrethiam tawh ang chu.Ka thusawi zawng zawng kha dawt nimahse ka laka a tih nen chuan a la nep lutuk tlat.

Hmangaihna a ti kha ania..Tenawm lutuk,eng Hmangaihna nge ni ngai ang? Mahse…Kei hi chuan zep rual loin ka Hmangaih chu anih si hi a..Ka mawl man ka la hmu dawn chauh chu anih hi maw..Kar pawh a liam hmain ka nun hi a va han danglam ngun si em…Nikhat chu sawi loh darkar tin ka nunah thil danglam a thleng chamchi a,thlipui na tak thawk thuta,sulhnu chhe lutuk a hnutchhiah ang mai hian ka nunah sulhnu chhe pui pui min hnutchhiaha,a tawpah chuan natna bawk a ni leh ziah.Mahse, ka tuarchhuak thei em em ang,ka rai tih hi ka pa ka sawipui angai ang.Mahse, engtin nge ka sawipui ang ka hrethiam lo..

‘Hmeli,enge i tih a?” phone ka pick rualin Savio-an a rawn ti nghek..

‘Eng nge?” ka hrethiam lo..

‘Ka hnar a thi meka,chuan kan Colony pumpui hi a buai vek lo chauh bawk’ a ti leh a.Ka khawng nghal lah mai.

‘Enge thleng a?” ka aw a khur titih.

‘I hre lo tak tak em?” a rawn ti leh nghek.

‘Aih….Hre lo,ngatinge i hnar a thi a?”

‘Enteh,thingthiin ngaihdam min dil angai hial ang.Chutichung pawn ka ngaidam dawn che em tih ka ngaihtuah tha leh maithei…I bialpa duh tak hi a vawikhat nan rui chungin a rawn haw a,chuan ka hnar ruh hnek tliah tum niawm fahranin a che bawka…’ ka thaw tha thei lo…

‘Savio…Enteh,ka hrilhfiah vek thei che ania’ ka aw a lawi rat mai.

‘Angai ngei ang,ngai tak a ni..Amah hian engmah a sawi duh bawk si lo..Tiang hi kan unau inkarah a thlen vawikhatna a ni bawk nen kan buai vek chu anih hi ‘ a rawn ti leh a.Mahse, mak takin thinrim lam aiin nuam tihna niawm tak a awah a lang thei tlat!!!

Ka phone riin min tiharh a,ka mengchhuaka..A la thim vek..Ka phone ka bana,min rawn call tu ka hmuh rualin ka harh chiang nghal kawk..Pick tur a ni em ka hre lo..Mahse, ka pick lo anih chuan a lo kal duh maithei..Ni lo,ni lul lo mai..

‘Hello…’ ka ti sap.

‘Zorinzual…’ ka mit ka chhing sawk mai.

‘Ramsey,tun hi in call hun a ni lo ania’  ka ti sap.A thaw ri hawk ka hre nghal zat bawk.

‘Min nei rawh,khawngaihin…I inpeih hun ka nghak thei ania’ ka thuchhuak ta nge nge.

‘Min hrethiam la….’ Ka ti hman chauha,min rawn tawng hnan leh hmiah..

‘Vawiina thil thleng kha avaiin theihnghilh ka duh..I sawi lo angah ka ngai ang,min nei rawh..Naute vang tal pawh khan kan inneih a tul ania’ a rum hawk bawk…