22/AUGUST - 21

Chapter- 21

‘Ramsey..’ ka ti halh ringawt.

Eng nge sawi mai tur ka hre hlawl lo.Rin ka duh ngawih ngawih laiin Agnes-i a lo lang zela,Ramsey aiin ka ring zawk tihna a ni chuang lo.Mahse, ka mit ngeiin a hmain ka hmu tawha,eng nge ka rin ang ka hrethiam lo..

‘Naktukah ka zin hmain inhmuh ka duh’ a rawn ti leh sup.

‘Ka lo tum dawn nia,mahse engmah a danglam chuang lo ang’

‘Nangmah in ngaihtuah loin i pum chhunga thang lian mek kha ngaihtuah la,I awm anga a awm ve ka phal lo’ a ti leh duah.

‘I sawi awmzia ka man lo…’

‘Nuhrawn fel vak lo neih a hrehawm ang bawk khan Pahrawn neih pawh a hrehawm ve maithei asin…’ a sawi awmzia ka hriat takah chuan ka thaw halh mai.

‘Dah tawh rawh,ka mut a chhuak’ ka ti nghat mai.

‘Good night’ min hnial buai loin a ti sup.Ka chhang let lo..

Sana ka en a,zinglam dar 3 a ri tawh.A muhil thei lo nge ni anga a harh leh veleh min lo call zawk ni ang ka hrethiam lo.Ka ngaihtuahna a buai vel vek,thudik hriat tum lo niin ka inhriaa,mahse enge ka hriat chuan ang ka hre lawi si lo.Amah zawt thin turin min ti mahse Agnes-i khan a sawi lawk vek tawha,engpawh zawt ila a pha anga.Thudik lo min hrilh ang a ti anih kha..Ka nun a chhiat vek hmaa inveng lawk turin min ti zui bawka,enge ka tih chuan ang?

Ka harh leh chuan khua a lo eng iar tawh.Tho mai loin ka khap sak saka,ka room Tukverh pawn lama Sava hram nak nak ri ka hrethei a,ka awt lek lek mai.An theih tawkin Pathian an faka,thilsual leh tha engmah an tan a awm hek lo..Mihring nih hi a hlu,mahse a chang hi chuan thilsiam dang nih mai a thlanawm tum a lo awm tak tak tih ka hrethiam tan ta chu anih hi..

Nu Hmingi leh Mama’n thingpui an lo in duna,ka pa erawh ka hmu lo thung.Dawrah a zing kal pawh a ni mahna le.Tunah chuan Mama a lo haw bawka.Ka pa leh Nu Hmingi tan kal loh zauh zauh pawh a pawi lo leh tawh.An lo haw chuan tihtur pawimawh bik an nei anih loh chuan Dawrah an awm nileng thak thak peih tlat.

Dawhkan ka kil ve a,Luni’n thingpui min rawn pe vat bawk.

‘Vawiin atangin a mi kal tak taka i kal dawn?” Nu Hming’n min ti a.Ka bu nghat ringawt.Ka chhuk hmain ka luakchhuak vangin reife Bathroomah ka inkhunga,luak tak tak thei bawk si lo nen ka chau nghulh thei.

‘Eng hna maw?” Mama’n a ti a.Ka sawia,a bu nghat ringawt.

‘I dam tha lo nge ka hmuh khat vang che,I dawldang lip lep ka ti’ a ti leh khauh.Ka thingpui in ka haka,ka khuh zui bawrh bawrh bawk.

‘Ngatinge a?” tih pahin a rawn tho a,ka hnungah a rawn chum a.Ka la khuh bawrh bawrh mai.Nu Hmingi’n tui min rawn pe a.Ka ban vat.Ka mittui a tla phang mai.

‘A zia deuh em?” a thutnaa thut leh pahin a ti a.

‘Um..Zia,ka rin aiin a saa,chuvang alawm’ ka tita ngawt.

‘Mama,I pa Tiffin tur kensak angai ania,Nimin khan kan Dawr bul Restaurant thil kha a ei ngawt maia,nizan a mu mang reng reng hleinem’ Nu Hmingi’n a ti leh a.Ka en vat.

‘Ngatinge a? a Sugar a sang leh a mi?” ka ti nghal zat bawk.

‘Sang leh e,mahse zingah kha chuan a zia ta deuh..Khawvar dawn lamah alawm a muthilh chauh ni’ a ti leh a.

‘Anih te chuan zingah kal loh mai tur alawm’Mama’n a ti nghat.Ka ngaihdan chiah,a kal loh vangin an hawng thei lo pawh a ni si lo.

‘Ka hrilh ka hrilh alawm,awih hek lo le’ a ti a, a tho nghal bawk.

‘Nichin khan min chhang ta miah lo a,I nawm loh hmel ka ti’ Nu Hmingi kalsawn veleh a ti leh ta chat.Eng chu a hria ni maw?

‘Nuam e,tunlai chu ka mu tha lo thina.Chuvang aniang..Bakah ka lang dawldang tih pawh ka lo inhre lo,tuman an sawi bawk si lo a’ ngaihsam hmel fein ka ti liam puat.

‘Inhmuh reng te chuan inhriat a har alawm..Eeee,U Ramsey kha..Ka la awih thei lo’ a ti leh halh.

‘Eng ber chu maw?” ka en duh lo lui tlat bawk.

‘Diktak chuan i kawp tur chi mipa niin ka hre lo a,chuan a pahnihnaah chuan Agnes-i nen an inthen tawh tih ka lo hre lo bawka’ a ti a.Agnes-i hming ka hriat rualin ka insangmar nghal teuh mai.

‘I kawp tur chi niin ka hre lo ka tih awmzia chu Ramsey hi chu amah tawp hi a Puitling bawk nen a hlauhawm bakah thil a duh thlap thlap ka ringa,ani ni loin Savio nen in inhmeh zawk ka lo tia’ a ti leh a.Ka thle bak ringawt.

‘Agnes-i i lo hre tho tihna mi?” a sawi dang ka haider hmiah.Ramsey nen kan inkawp vangin mak a ti nge ka nun dan ho zet khan a phu lo tih sawi a tum ka hrethiam lo.

‘Hria ti ila ka thiannu Cousin ania..’

‘Tu? Caroline-i maw?”

‘Um,a first Cousin alawm…Thla hmasaa an lo kal khan Caro-i Flatah chaw an rawn ei a, kan inhmu a’ a ti leh a.Ka beng a verh zak mai.Thla hmasa khan hna thilah a zin ngei,mahse Agnes-i a kal ve tih ka hre miah lo.

‘Thla hmasa maw?” ka ti sap.Ka insum hman lo.

‘Um..Tunthla hi Dec..Aw,anih chu..November thla tir lamah an lo kal kha,chuvang ania an inthen tawh mi ka tih’ a ti leh a.Sawi mai tur hre loin ka khap sak sak ringawt.Ka duh emaw duh lo emaw engkim mai hian Agnes-i thusawi dik zia a pho lang zel dawn niin ka hria.

‘An lo la inthen lo hi a niang e’ ka nui lui hak.A then ve sak a.Mahse, ka ngaihtuahna hriat tumin min en chik hle tih ka hre ru kar thung.

‘Ka fiamthu lo ania,an awmdanah khan inthen an ang lo’ a ti leh a,Unaua ka ngaihzawng han sawi tak chiam chu zia lo ka ti leh hnuhnawh.

‘A landan mai mai anih chu,kum chanve vel an inthen tawh lawm.Mahse, eng eng emaw an la ti dun a,an inbe chhe lem lo va’ thutak zawkin ka ti a.Ka sawi hi keipawh hian a nihdan ni se ka duh lutuk..

‘Uh..Kha lehchen lo inzui tawh mahse inthen hnu thlenga la zindun tur khawp chuan Pride an ngah tawk ang ka lo tia,an lo nibik miah lo mai a’ a ti leh a,a thaw ham ham bawk.Ka chhang lo,harsa ti ru zetin ka nui lui thei hram.

Dressing Table hmaah ka thu a,ka hmai danglap mai chu ka en a, ka nau khan a sawi dik.Tun hnaiah thil ka ei mumal lo va,ka mu tha lo bawk nen ka hmai a lang dang lutuk,ka mit hnuai a val kual deuh raih bawk.Ka tihtur ka hria,tawpna fel tak siam turin ka hmuh angai.Nizan kha chuan ka dik lo zawk emaw tiin ka inthiam lo hman kha ania,mahse tunah ka nau ngeiin a sawi ve leha,Agnes-i khan dawt min lo hrilh tehreng pawh nise ka nau hi chuan engvangmahin Dawt a sawi ngawt lo ang tih ka chiang.Min hua emaw min lawm lo pawh nise Ramsey nen kan inkar tihchhiat hi a tan awmzia a awm miah lo bawk.Ramsey hnena thudik hriat tuma zawhna siam lah mi a ber tih awm tawk lek a nita ve ang.

Ka phone ka bana,nizan khan a zin hmaa min hmuh a duh tih a sawi bawk tak e.A mize ngeng leh luhlul,tawhkhirh bawk si dahthain nei turin a ngenin min ngen kha ania,keilah ka lo lawm hman khanglang bawk.Huizz,’Mi a in an at man an chawiseng lo’ tih hi ka tana an lo phuah nimai awm a ni..

A tlang thei tlat lo,ka ti nawn leh a,a tlang chuang lo..Sana ka thleka,dar 8 a pel tawha.A zinna hmun tur ka zawt bawk si lo nen khawiah nge a kal ang ka hre lo.Lungleiah Branch thar an hawnga,kum tharah Champhai leh Serchhipah an hawng leh dawn bawk tih ka hriaa,mahse khawi berah nge a kal ang ka hre lo.Karlehah lawk Akima’n nupui a nei dawna,reitak zin thei a ni lo hrim hrim bawk.Mahse, a tih tur leh tih loh tur ka tan enge pawimawhna awm tawh ang ?vawiinah tawpna ka siam ta lo anih pawhin a lo haw hun hun kan tawp hun tur a ni tho.Kha leh chen kha miin ka chanchin tha lo lam an sawi tawha,ka rai tih an hriat huna an sawi leh anih pawhin pawi ka ti hek lo.Ka fa aia pawimawh engmah a awm lo.Mahse, chiang takin ka hria.Engvangmahin Ramsey ka nei dawn hauh lo..

Mimi nen hna kal turin kan chhuaka,mahni hna ngei han thawh ve tak tak dawn takah chuan a phurawm ve tlat.Mahse, ka chhungrilah vei lianpui ka neih vang nge ka hre lo,engkim mai hi ho hu vekin ka hre mai.

‘Miss…’ ka hawichhuak vat.Kan Boss ka Table bulah a lo ding reng tawh.

Thawhchhuah tumin ka che nghal vat,mahse zaizirin thu turin min ti a.Amah zawk ka thutna ep zawnga Chair awmah a thu ve ta zawk.File Cover pawl a rawn lachhuaka,ka Dawhkanah a daha.A tawng hun nghakin ka thu ngil at thung.

‘Miss Zorini..A dik em?” nelawm zetin a nui var var bawk.

‘Aw,Sir.Mahse, khawngaihin Zorin tiin min ko tawp rawh’

‘Ok..I rawn zawm chauha,nangmahni enkawltu tur ber a zin leh angaia.Mahse, Next Weekah a lo let lehnghal dawn a.Ka sawi tum zawk chu,naktuk tukleh hian zinchhuah ka ngaia,harsatna i neih loh chuan min zui la ka duh a’ a tita duah.Diktak chuan Request ni loin Order a ni tih ka hrethiam.

‘Ok..Sir..Ka lo inbuatsaih dawn nia’ ka ti a.Ka nui lui sak bawk.

‘Kan site thar tur Hmartlangdungah en angaia,Kan kalna tur khuaah Kuthnathawktu Pawlin Social Meeting an buatsaih dawna,tahchuan kan tel nghal bawk ang.Lo nghak deuh la,Prog ka rawn thawn dawn che nia’ a ti leh a.Ka bu nghat ringawt.

‘Enge Boss khan a rawn sawi a?” Lunch tura kan thut fel veleh Mimi’n phur zetin a ti nghal sa sa mai.

‘Zin Prog min hrilh..’ ka ti tawi tak.

‘Khawiah? Ngatinge a hrilh kher che a?” mak tih hmel zetin a mengphar ak bawk.

‘Ka zin ve dawn..’

‘I mood a van uih em em ve mawle,in inhau lehpek a mi?” a ti hlak.

‘Kan inthen zawk’ engvanga sawi nge ka nih ka inhre lo.

‘I uang a mi?” mak tih hmel lutukin a ang pham mai.

‘Uan na chi a ni mi?” ka ti hlak.

‘Aih..ni lo,mahse a mak em alawm’ a ti leh hliai.Nia,mak tak a ni..’Nang aiin thilthleng hi mak ka ti zawk’ tih khum nghek ka chak.

‘I hmui kha chip teh,mi in mi a emaw an ti ang che’ ka nui lui hak bawk.

‘I sual anih mai chu a,Lawk..Thildang sawi lo ang,ngatinge?’ a ti leh talh.

‘A tawp a hun tihna a nimaia.Abak engmah a awm lo’

‘I chiang em?”

‘Aw..’

‘Min en chungin sawi teh’ a ti leh a.Ka thaw hak mai,muangchangin ka en a,a mitah tak ka en lui ngar mai.

‘Kan inthen..Abak engmah a awm lo….tikhan i lawm tawh em?” ka thla bak bawk.

‘Aih,lawm lo…Inthen a ngaih chhan ka hre duh..’

‘A chhan sawi tur vak a awm lo,nakinah i hre mai ang…Ka ril a tam viau a ni,an rei hle mai’ ka tihzawm zat.Sawi zawm ka duh lo tih hrethiam se ka ti takzet.

‘Kei pawh a tam tawh,zingah thil ka ei tha hman lo a’ a ti ve a,ka thaw huai mai.

Kan eitur an rawn chhawpa,a rim ka hriat rualin ka uak teuh ngang mai bawk.Mahse, ka insum hman hram.Thingpui zawk ka bana,tlema ka ziawm theih takin in hmasak phawt a fuh mahna..Vanneihthlak lutukin a a zia ta hlauh,mahse eitur erawh tihtham ka ei lo..

Dar 4:30ah Office kan chhuahsana,ka nikhat kalna lek nimahse hna ka thawk hnem hman viau.Computerah entry tur tam fahran min pe a,tho chhuak mang loin ka thawk nileng ta thak.Mahse, ka lawm zawk.Thil tamtak ngaihtuahna hun nei lo khawpa buai kha a tha zawk daih..Ka buai em em lai pawh khan Atthlak zetin Ramsey hnen atangin call emaw Msg pawh dawn mai beiseiin phone ka en deuh renga,mahse engmah a rawn ti lo.A reh hmiah..Nizan khan a rui lutuk tawngvai te pawh a ni mahna le.

Chawei khamah roomah ka chho a,ka phone ka pana.Ka en a,Savio lo call na a lo awm nual.Vawiin khan ka bia ang ka tia,mahse hnaah khan ka buai ta bawk nen ka be ta miah lo.Khumah ka lawna,Savio ka call pah bawk.

‘Hello…’

‘Roomah phone ka kalsana ‘ ka ti sap.

‘Anih vel kha,vawi engzat nge ka rawn call hman che pawh ka hre lo e a’a ti leh a.Ka then nak mai.

‘Sorry,ka hmuh veleh ka lo call nghal che hi..Enge ni reng reng?”

‘Eng nge a?” a ti vak.Eng chu a hria ni maw?

‘Nge i au vak a? a chhan ka zawt mai che a’ ka ti hlak thung.

‘Min zawt ngam zawk e a..Nilengin ngaihdam dilna ka lo nghaka’ ka thaw hak mai.

‘Nia..kha kha,mahse vawiin chu ka First day nimahse ka buai nileng thaka..Ka lo bia ang che ka tih laiin tihtur a awm ziaha’ mahni inthiam tum fein ka ti a.

‘Um..A pawi lo,I bialpa sual zet pawh a zin daih thoa,naktukah kan inhmu zawk dawn nia’

‘Hun ka nei angem ka hre lo alawm,zing kar anih ngawt loh chuan..’

‘Eh,I buai ta viau maw? Mahse ka hnar ruh a tliak tepa,a chhan hi ka hriat a tul aw’ a ti leh nghauh.Ka ngaihtuahnaah thildang a lo lang nghal zawk.

‘Enteh,naktuk tlaiah min chhuahpui la..I hman angem?” ka ti a.Ka kal hmain in entir ngei ngei ka ngai.Ka taksaa thanglian mek hi thisen hlawm chauh pawh la ni mahse a that leh that loh tal ka hriat angai.Ka in check-up har hian awmzia a awm miah lo bawk.

‘Tlai tihah chuan dar engzatah nge?”

‘Ka hre mai lo,naktukah ka chhuah theih hun tur a hriat ang ka ring’

‘Ok..Kan chhuak dawn nia,chawhma lamah Am-i nen chhuah kan ngaia,mahse a rei lo ang’

Ka mit ka chhinga,Savio tana thil tha ka tih tlem zia ka ngaihtuaha,tiang khawpa thiantha ka nei hi lawm ngawih ngawih tur ka ni ringawt.Keimah vangin hun harsa lutuk a tawk meka,mahse min huat emaw min biak duh loh lam engmah a nei lo.Hun harsa ka paltlang zawng zawng kha amah hi awm lo se chuan ka theih pawh ka ring lo.Mahse, tunah chuan a nunah Hmeichhe dang an awm tawh,a hma anga engkimah pawh buai ka tum chuan buaina dang ka thlensak leh ngei ang.Chu erawh ka duh hauh lo,keimaha nun hman ka zir angai tihna animai..

Ka dul thep zaih mai ka khawiha,nakin lawkah a rawn lian anga, zep pawh tum ila a theih loh hun a thleng ngei ang.Company pawh hian min thawh zawm tir duh loh hun a la thleng mahna,mahse keimaha ka din angai anih pawhin ka bei zel mai ang chu..Ka pa ka ngaihtuaha,a zak hle emaw a thinur hle anih pawhin ka tuar mai ang..

Doctor tu nge ka pan ang ka hrethiam mai lo,tumah han zawh tur ka hre lo.Hria pawh ni ila ka zawt kher lo ang.Fbah ka luta,ka duhna group ka Search a,hmeichhe Doctor tha ho an sawina ka hmu nghal chat.An clinic number a awm nghal vek bawk.Tunah chuan call chi a ni lo,zan a ni tawha,tumah an awm tawh lo ang.Naktuk zingah ka call mai ang chu..

Vanneihthlak zetin kan zin na turah Mimi pawh kal ve turin Bossin a lo ti a,ka thaw huai mai.

‘Kal hmain ka in entir hun ania,tlaiah haw hma deuh ka dil mai dawn mawni ‘ ka ti a.Amah en loin ka hmaa Computer lam ka en thung.

‘Eng in entir maw?”

‘Ka pum lam mawle..Tlema haw hma hret a nimai,zingah ka inziah tira,ka hmaah an tam lutuk’ ngaihsam hmel fein ka ti leha.

‘Um,Boss hrilh la..’

‘Nia,mahse thil tenau deuha Boss han hmuh kher ka hreha’

‘Dik chiah mai..Mahse, tunah chuan amah bak han hrilh tur a awm hleinem,Inhnuai lam ho hrilh ngawt la awmzia a awm lo si’ a then sak bawk.A sawi dik.Keini ho hi Office building chung bera awm kan ni a,inhnuai lamah awm an awm nual nangin hna hran vek thawk kan ni a,an sawi danin kan inkalpawh lutuk dawn lo a ang.

Vanneihthlak zetin Lunch ei dawnah Boss biakna hun ka nei ta hlauh,nihnih chauh hna ka la kala,haw hma han dil ngawt kha thil nuam a ni lo.Mahse, ka dil ngei ngei angai,tim daiin haw hma ka mamawh tih ka hrilha.Ka mamawh chhan min zawta,Mimi hnena ka sawi ang bawk ka sawi leh a, a lo remti hlauh bawk.

Dar 3 leh tlemah Savio a lo thlenga,zingah tlai chhuah ka ngai tih ka hriat lawk avangin Mimi rualin ka kal kha ania.

‘Khawnge kan kal dawn?”

‘Thil ei i duh em?”

‘Aih,ka ril a tam lo….’

‘Anih chuan in entir ka duha,tah chuan min kalpui la…’

‘Kalpui tur chein ka lo kal chu anih hi’ a nui hak hak mai.

‘Um,kal ila…’ ka ti sap.

Kan kalna hmun tur kan thlenin an lo awm nual tawh,Hmelhriat hmuh ka hlau zek zek bawk.Mahse,vanneihthlak takin tumah ka hriat mi awm ka hmu lo.Ka luh a hun meuh chuan a tam zawk an haw tawh.Engkim a tha vek tih min hrilha,khawsik emaw lu na ka neih palh chuan tiin damdawi min chawha,ei leh in fimkhur tur leh Two wheeler a chuang tam lo turin min ti a.Hmun hlaa zinchhuak lo turin min ti bawk.

‘Naktukah ka zin dawna’ ka ti satliah.

‘Doctor khan zin suh a tih kha…’ a ti hluk.A phone a en daih bawk.

‘Um,mahse hna thil ania,Zankhat kan riak anga.Mimi pawh a kal dawna’ ka ti leh a,a bu nghauh mai.

‘Nizan kha…’ a phone a daha..

‘Eng lo….Ih,diktak chuan inneih a duha,mahse…’ ka ngawi leh dat.Engmah sawi loin ka tawng hun a nghak thung.

‘Tlaia Doctor hmu tur kan nia,mahse hna kha zawm turin min ko thuta,Ramsey hrilh ka tuma..Ka calla,mahse amah ni loin Agnes-in a lo picka..Ih,a sawi dan chuan Ramsey hian min neih a tum dan leh engkim an ruamhman tih vel min hrilh a…’ ka thaw hak mai.

‘Chuan….’ a ti nghat ringawt.

‘Nangmah nen kan ruamhmanna ve tho tih ka sawia,bakah inneih ka duh lo ka ti bawka,nangmah nen kan inkawp angin ka rintir anih chu…’

‘Min that lo kha ka vannei hle anih chu a’ a ti halh mai,mahse thinrimna aiin nuam tihna bawk a awah a lang leh ta tlat.

‘Pawi i ang tih ka hria,bakah Ami tan pawh ka ngeiawm viau ang…Mahse, tunbak chu ka tibuai tawh lo ang che’

‘I chiang chiah maw?” min rawn en a.

‘Ka hre lo le..Mahse, tiang ringawt chuan ka nun ka hmang thei lo alawm’

‘A pawi lo,I damchhunga min rinchhan pawh ngai se ka awm reng ang’

‘Aih,tunah phei chuan keimah vangin Ramsey nen hmelma inni tihna a nia.Tiang hi ka duhdan a ni bik lo’ ka ti leh sap.

‘Um..Nia,hmanzan kha chuan pui tak a ni..Mahse,kei pawh ni ila atih ang kha ka ti ve ang..’ a ti leh nghauh.

‘Anih chuan ka thiam lo zawk tihna a ni em?”

‘Ka hre lo,mahse Mama leh Agnes-i hi an la inkawm nasa tih ka hria,an in ngaizawng leh ka ti lo a,a kawp che pawh ka ti lo…Amah nen sawi dun ula a that ka ring’ a ti dam leh thlap.

‘Ka ngaihtuah alawm, nimin zingah biak ka tuma,ka call tlang thei lo.Mahse,ka biak loh hi a fuh zawk maithei’ ka ti leh nghat.

‘Engvangin?”

‘Agnes-i sawi kha dawt pawh a lo ni maithei,mahse ka nau hian dawt min hrilh lo ang’

‘Maw?”

‘Zonuntluanga..A lo hawa,a lo haw niin Ramsey nen an inhmu a,an lo inhriaa..Mahse,nimin zingah Mama chuan a sawi ta chauha,Ramsey leh Agnes-i November thlatir lamah an zin duna,Chaw an ei ho bawka..Ka hriat dan kha chuan Ramsey kha amahin a zin a..Kan inkawp tih a hria kha mak a ti lutuk ringawt..Mahse, ani aiin mak ka ti zawk’ ka thaw hawk ringawt.

‘A mak hle mai,mak tak a ni’ na zetin a bike seat a chum nghek bawk.Engvanga tiang khawsa nge anih ka hrethiam lo.

‘Ngatinge?”

‘Kal ang,a tlai tawh si.I chhungten an lo ngaihtuah ang che’ tehdaih chuan a..

‘Um…Mahse…’ a ban vaiin min ti tawp hmak.

‘I duh duh tirawh,I lamah ka tang ang..Min mamawh phawt chuan min lo call ang che’ nghet charhin a ti leha.Tawng tumin ka ang ziau,mahse, a insehruh fan mai ka hmuh rualin ka chip leh hmak.

Ka phone nghawr dar dar ka en a,Ramsey…Vawi thum a lo call na a ni tawh.Ka muhil tawh angin ngai se ka duh avangin ka ring ral tir zel bawk.Mahse a beidawng duh der lo.A tawpa,ka thaw hak mai,a lo call leh ringin ka phone ka melh rana,mahse msg tone a ri ta kauh zawk.Rang lutukin ka Open vat..

‘Biak che ka duh,naktuk dar 1ah…’tih zawng..

Ka hmui ka peta,a zin hma zanin zingah min be duh tih a sawia,mahse ka call tlang thei lo a,nihnih deuhthaw engmah a rawn sawi lo.A duh hun huna a biak a,a peih loh hunah a biak loh mai mai turin a chhiahhlawh ka ni lo

 Ka alarm riin min tiharha,ka thochhuak vat.Bathroomah ka luta,nizan kha ka muthilh mai ka beisei loh nen ka muhil tha ta phian lawi.Ka thawmhnaw hak tur ka dahchhuah sa ka ha sawk sawka,Dec thla tir lam a ni tawha,khua a vawt var var viau tawh.

Ka inpeih fel hnu lawkah an rawn thlenga,kan vaiin panga kan ni a,ka huphurh aiin a nuam ka tita viau,mahse ka pum no hlui leh ka luakchhuak thut thut thin vangin ka buai teuh viau zel thung.Signal a tha tehchiam lo va,kan thlen chin ka chhungte hrilh tur pawn Signal awmna zawn chawp angai deuh zel.

Ka tai na lutuk vangin ka harh hlawl,ka thlan fimin min bual huh deuh vek bawk.Ka thuchhuak dawna,ka pum a na lutuk,zun ka cheh emaw tih turin ka kekawr mawng a huh dup bawk.Thei leh thei loin ka tho chhuaka, light ka On a,ni lo…Zun ka cheh lo,ka kut ka en a.Thisen vek..

Bathroomah ka bawkvak lut titih,Bathroom chhuatah ka mu zawi der,ka thi dawn nimaiin ka hria,ka lu a hai muai muaia,ka thaw a chham titih bawk..Ni lo,Naute ka chan thei lo…Ka khawhmuh a phe vek…