22/AUGUST - 22

Chapter-22

‘I hman tawh em?” ka dawhkan hmaa rawn din pahin Ronny-an a rawn ti a.Ka bu nghat,Ka Macbook ka laa.Ka chair hnunga ka Coat ka khai ka la nghal bawk.

‘Kal ila…’ka ti zangkhai vah.

‘Um..Lawk,I samah khan thil a kai ania’ tih pahin a rawn bana,hnial loin ka dawh tha ve mai bawk.Kum khat lai kan thawk ho ta reng.A tir lam kha chuan Boss anih ang ngeiin ka zah em em a,mahse tunah chuan thiantha tak kan ni tel ta thung.Delhi chhuak a ni a.Chhungkaw pangngai taka seilian leh Smart tak a ni a.Mizo rilru a ‘Vai chhia’ tih kan ngaihtuah zawnga eng emaw awm ngei ngei  thin kha ani ah hi chuan  engmah hmuh tur a awm lo.

‘Awi…Awi,ka hah lutuk…In kal hmaa lo let hman ka duh sia’ Mimi’n a rawn ti a,a thaw hlawp hlawp bawk.Ka nuih var var mai.

‘ I va hah hmel ve’ ka ti sap.

‘Lutuk,Stepah ka rawn tlan chho alawm,he thil vang hian mawle…’ tih pahin a file ken lai  dawhkanah a rawn daha.Ka ban vat.

‘Eng nge a?” ka en hmain ka ti leh te te.

‘Sign angai,Boss in…’ ka thle bak mai.Hna kan thlen hnu lawkah Company thil eng emaw tihfel ngai a awm avangin DC offcieah a kala,a kal hmain a fel sa vek em tih a check ve thlap kha ania,mahse hetianga engemaw theihnghilh hi a inhmeh tawh hrim hrim.

Ka keua,Boss lo ding ngawi reng lamah ka nawr pheia..A then suk mai.

‘Pen ka lo hawh dawn mi?” min rawn en a.Pen Stand a mi ka la vat.Ka pe a,a sign nghal mawlh mawlh a,hmanhmawh fein Seal la turin ka phe vat thung.                                                                                                                                   

‘Vawiinah a theih chuan tihfel hman ka duh a,anih loh chuan hna an chawlh leh angai anga,a buaithlak lutuk ang’ Boss-in a ti a.Mimi a bu nghat.

A tir lam kha chuan tlemin kan hna ka man lo lek lek,Oil company nisi khan Zokhaw lama kan zin chhuah khan Social meeting naah te kan tel nawk nawka,mahse kan Boss thluak that zia ka hmu tam tial tiala,engmah chhan nei loin a ti miah lo tih ka hrethiam ta bawk.Sumdawnna line a mizo ten kan lo tluk loh zia leh an tum an chian zia pawh nitin ka hriat belh zel a ni ber.

‘Kan hmuh tur te hi i hria em?” kan tlanchhuah hnuah a ti a.

‘Aih,hre miah lo…Mi thar deuh nge?” ka ti a.Ka thil ken tur ka keng kim ngei em tih ka check nawn leh mawlh mawlh bawk.

‘Thar lo,Mizo zingah chuan sumdawnna lam bikah an tha ber hial ang’ a ti leh a.Mimal ni loin pawl anga hmu tur kan ni a.A tir phat atangin Mizo mihausa rual intelkhawm annih ka ring ve ngawt bawk.

‘Um..Anih chu mawle,Mizo hi kan thahnem ve tawha.Sumdawng mi,naupang tak tak leh tha tak tak an awm ve teuh tawh ania’ ka ti leh a.

‘A dik ang,an Smart tial tial bawk anga.Mahse, tuna kan hmuh tur zinga mi hi chu mithar a ni lo..’

‘I sawi awmzia chu pawl angin nge mimal pakhat i sawi?”

‘Pawl annih rualin an zinga pakhat ania ka sawi.Hemi Sumdawnna bikah hi chuan a thar bera,mahse amah hrim hrim hi Mithar a ni lo’

‘Anih chuan Pa upa lam tihna mi?”

‘Kan inrual vel ang,35+ anih ka ring.. Hmanni khan Motor lian hralhchhuaktu Company pakhat,Aizawla mi kha an tlachhia a,amah hian a leisak tih thawm ka hriaa’ a ti leh a.Ka rilruah lang zawk a awm.Ramsey…Ni lo,ka lu ka thing nak mai.Ani tan kan Company nen inhnimhnaih a tul hauh lo ang tih ka chiang.

Kan inthen atangin kum a liam ta hial,min rawn biak a tum lo va,ka be bik lo.Engmah tawpna siam loin kan tawp tawp a ni ber.Naute ka chana,engmah la ni lo,thisen hlawm mai pawh nise ka tuar na lo thei lo.Ramsey lahin min biak a duh ti siin engmah a rawn sawi zui hek lo..Vawi tamtak ka inhrilh nawn thina,mi te pawn an hmangaih ber an nei bik kher lo va .An inngaihzawn rei avang leh nau an pai vangin nupa an ni kher hek lo..Pawm thiam tumin ka bei nasaa,min rawn biak mai beiseina nen nitin ka nghak a,Biak hmasak erawh ka tum bik lo.Kar a liama,thla a liama,kum a tling ta hial.A number vawi engzat nge ka delete ka hreseng lo.Mahse, ka thluaka in save sa erawh Delete chi a ni ve theih a ni lo.Ka phone atangin amah ka hriatrengna thil paihchhuak vek mah ila keimaha awmsa te paih chhuah theih a ni ve chuang lo.

A chanchin hriat loh a that zawk ringin ka ngaihven lo lui ngar ngara,Savio lahin ka ngaihtuahna hrethiam niawm takin vawikhatmah a chanchin a sawi ngai lo.Mahse, atthlak taka nun hman erawh ka tum tawh lo.Vawi tamtak zu nena tala,awmze nei map lo va khawsak duhna ka nei fo.Mahse, zu nena khawvel ka hmachhawn lai khan engmah tak tak ka chingfel lo a,chinfel a hnekin a buai zual zel anih kha..Tunah chuan beiseina a bo zo tawha,Ramsey ka hmangaihna kha huatnaah a inthlak zo ta bawk.

‘Zorin…’ ka darah a rawn khawiha,ka phu nghek bawk.Huizz,thil tul lo ngaihtuah hi engtikah tak bansan ang i maw???

‘Thildang ka lo ngaihtuah pek alawm le’ inthiam lo zetin ka ti niah niah.A then sak.

‘A pawi lo’ Mizo tawng fiah zetin a ti a.Ka nui hak mai..Mizo nen kan danglamna niin ka hria,tawng hi thiam a tum em em a,Mizo hnam a ngaisang tihna ni loin a zir peih a,thiam a tum bawka,tawng tualleng eng eng emaw hi chu a hmang thei ta viau.Mizo hi chuan a nawlpuiin kan awmna ram tawngpui ber Hindi hi kan ngaisang lo va,thiam kan tum lem lo bawk.

‘Kan thleng e’ Driverin a ti a.Ka hawichhuaka,kan kalna tur Hotel kawtah kan lo awm tawh.

Ka bag ka aka,Motorah ka inphawrh leh avangin theihnghilh hlauin ka en kual leh hmasa phawt.Engmah ka theihnghilh lo.Lunch ei nghal tur kan ni a,Rza leh Boss kal tur annih laiin Rza a damloh leh si avangin keimah ka kal angaia,atir atangin engkim Rza buaipui anih avangin tukina hna ka thlen veleh engkim ka zir chawp a,mahse engkim fel thlapa a lo dah avangin a tlangpui chu ka hrethiam nghal mai thung.

Kan luh veleh Hotel khualchhawnin min lo ngaihven vat.Kan kal chhan leh kan tihtur ka hrilha,kan awmna room tur min panpui nghal vat.Mizo te lo Smart tawh zia amahah alang chiang viauin ka hria.Mahni hna pawh hrechiang mang lo,biak har tak tak an awm thina,Hotel lianah phei chuan tiang kha awm lo tawp se a tha ber.

Mipa hlir 5 an lo thu a,tumah kan hriat ngai anni lo vek.A chhan ka hriat si lohin ka thaw huai mai.Atthlak zetin Ramsey a lo awm tel ve ka hlau tih erawh ka hre ru kar lawi.An dingchhuak sap sapa,Boss an chibai min rawn chibai ve bawk.An mahni an insawi diat diat,ka bu liam vel mai mai.Meeting a zawh rualin a tu amah hi ka hre zui leh dawn lo tih ka chiang.Pa upa lam pahnih anni a,Pathum te erawh kum 35-40 inkar vel anni thung.

‘Kan Vice President hi a lo la thleng lo deuha,minute 5 velah chuan a lo thlen mai ka ring’ Pa upa hmel ber,Kuhva heh hmel zetin a ti a.Sana ka en zauh.Kan huntiam thlen nan minute 10 a la awm.

Eng eng emaw sawiin an titi mam mama,mi pangngai chunglam hlir annih hmel bawka,Tawng lamah harsatna nei an awm lo.Hindi an hmang thei vek bawk.

‘Ka tlai em lo ang chu maw?” kawngkhar lam atangin mipa awin a rawn tih rualin ka inring hman lo,ka vir nghal zawk a ni ber.Tu nge anih ka hmuh takah phei chuan ka tang nghal teuh a,ka kut ka mal chungah ka daha,nghet lutukin ka hum kawp tlat bawk.

Min rawn melh zawka,mahse min en danah min hre lo a ang zawk.Kekawr thui nalh zet a haa,Kamiz pawldal a ha bawk.A la danglam lo..Ka thawk a sak talh talh mai,a rawn kal pheia,ka ep zawnga thutthleng awl awmah a thu nghal bawk.

‘I tlai lo chiah chiah,chuan hei hi kan Mikhual te annia…’ tih pahin a upa ber bawk khan zangkhai takin a ti a.Boss a en a,a nui suk..An inchibaia,min chibai ve lo se tiin ka lo ngaihtuaha,mahse a kut ka lama a rawn phar chhuah takah chuan ka duhthusam mai mai a ni tih ka hrenghal zat.

‘Ramsey ‘ a ti sup bawk.

‘Zorini..’ ka ti ve sap mai.Tim daiin ka kut ka phar chhuaka,harsa ti lutukin ka nui lui thei hram bawk.

Ka kut a rawn vuan zawka,thil tenawm lutuk a khawih emaw tihmai turin a la sawn lehnghal vat.Mahse, ka tan chuan a rei emaw rei lo emaw ka danglam phah lo thei lo.Kan inthen atangin kum a tling tawha.Aizawla awm ve ve mah ni ila ka hmu ngai lo.Savio te inah lah ka kal ngai tawh hek lo.

Meeting kan neih chhung zawng ka tang tluanchhuak ta parh.Ramsey en loh hram hram tumin ka buaia,mahse en loh ngawt theih a ni lo.An zingah a upa ber a ni hauh lo,mahse a pawimawh zia haider theih a ni lo..An vain a thusawi an ngaichang deuh vek miau a.

Lunch ei hmain kan zo fel ta hram.Wash room lam ka pan nghal vat.Pawn ka thlen rualin ka thaw nghal haka,Boruak thianghlim khamkhawp hip tur hmu lo ang maiin duhthawh zetin ka hip nghal kawk kawk bawk.Ka hma darthlalang a ka hmai dang lap mai lo lang chu ka en vang vanga,tiang khawp hian keimahah Effect a la nei ania..Ani kha chu effect chu khawi lam, ka awm ve leh awm ve loh ngaipawimawh awmin a awm eih lo.Hmeichhe pakhat lo thu ve satliah angin min ngai niberin ka hre zawk.

Rei lutuk tawm bo ngawt theih a ni lo tih ka hria,mahse let leh chakna ka nei chuang miah lo bawk.Ka thaw leh haka,Sakeibaknei puka lut tur nit a ila ka hreh lo mah zawk maithei..Ka phone a ri a,lakchhuah tumin kal pahin ka bag ka en a,mahse ka lachhuak fel chiah tihin tuemaw ka su chawrh.Ka rak thata,ka phone ka thlauh nghal bawk.

‘I kalna en ta che’ tu nge anih ka hria.Rang lutukin ka en vat.

‘Sorry…’ ka ti hmak.Ka phone tla chhar tumin ka thuhniam nghal zat bawk.

‘Min hrethiam la..Meeting naah khan I awm ve tiraw?” a ti leh nghut.Ka tang ru nghal teuh mai.Ka insehruh a,hmusit taka min chhaih kual vel a tum anih chuan a hlawhchham chiang khawp ang.Diktak chuan ka awm ve ngeia,inhmatawnin kan thu bawk.Inhriat lohna hman a awm lo..Eng chu nge maw lantir a tum hrep ni a??

Muangchangin ka dingchhuaka,ka hawi chho a,a mitah tak ka en a.Ka chhungrila zamna lanchhuah tir ka tum eih lo.

‘Tel ve e.I hmazawnah tak khan ka thu.Chuan,hmeichhe awmchhun ka ni bawk’  ka ti dam thlap.Ka beisei aiin ka tawngchhuak a pangngai hlauh.Ka nui lui sang bawk.

‘Ok..Anih chu mawle,ka lo noticed lo che anih chu’ a ti hmuka,a hmui a petsawi zauh bawk.Ka rilruin ‘Hei pawh a la ngai reng’ ka lo ti ve thung.

‘Um..Enteh,tianga awm hi nuam i ti anih chuan i thu thu ania,mahse….’ Sawi zawm duh loin ka ngawi leh daih.

‘Maw? I sawifiah theih chuan ?” a ti sup.Ka ner lui nak.

‘Ramsey…A landan kha chuan kan inhmuh fo ala ngai dawn ania’

‘Min hrethiam la,kan inhre tawh thin ang maiin i tawng a’ a ti supa.Ngeiawm zetin a nui lui hawk bawk.Kei erawh min deng dawt thung.

‘I duh dan dan le’ ka dah vah bawk.

‘Sorry,ka hre ngai lo che anih ka ring’ a ti leh hmuk..

Ka thle bak mai.

‘Sorry,ka hai che anih chiah chu…Anih phawt le’ zangkhai zetin ka ti leh a,ka nui lui leh sang bawk.Ka ban ka vai zauha,ka kalsan nghal hmiah bawk.Min enzui em ka hre lo,a duh leh min en zui se a mit ania,a thu thu..Mahse, ka hnungzang mur ar ar erawh chuan pawnlama ka landan ang ni loin keimahah thu a neih zia a tilang chiang viau lawi.

Lunch eitur an lo chhawp chhuak tawha,mahse Ramsey erawh a rawn let ta lo.A thawventhlak hawk zawk.Min hriat loh der kha atan pawh a peihawm bik lo..Ni lo,min hre ngai lo tak tak te pawh a lo ni mahna.Ka hriat thin Ramsey nen khan an hmel leh pianzia zawng zawng a in anga,an hming nen lam a in ang vek bawk.Hmangaihna kan chen duna,inneih kan lo tum dun tawh bawk.Mahse, tun lawka ka hmaa dinga,min hre lo tih sawi tu kha chu Mipa dang hlak a ni a, khawvel dang atanga lo kal a ni mahna le.Kum khat a liam tawha,min theihnghilh tak tak anih pawn a mak lo.A nunah khan engmah Special na ka lo nei lo a,Agnes-i sawi  kha thudik a nih zia a langchhuak zel tihna a nimai.Mahse, a tum loh danin keimah zawkin tawpna ka siam avangin a induhtawkna a chhe ve te pawh a ni mahna le.Engpawhnise ka tuarchhuak tawha ka lo in ngaih kha darkar reilote chhungin ka lo tuarchhuak miah lo tih a chiang leh ta chu ania..Hahthlak zawk hian a...

Offcieah kan let leha,kan Meeting na Report tlangpui ka siam fel dawna.Ka ti hleithei lo,a dik lo ka Print out loh leh a kim loin ka Print thul.Huizz,tunah pawh a dik lo bawk a nilehpek..Ka hlawm nawk nawka,thinrim zetin Dustbinah ka vawm lut a.Paper engzat nge ka tihchhiat pawh ka hreseng tawh lo.Ngaihtuah loh ka tum pawn ka mitthlaah Ramsey hmel chang zet kha a lang zel a,ka haw hluah hluah.Kan thlen hnu lawkah Mimi a lo thleng ve a,a kalna lamah a hlawhtlin avangin a thawveng ngang mai bawk.Ka mood nen a inmil hlawl lo.

‘Engemaw dik lo a awm em?” haw tura Stepa kan chhuk thlak laiin Mimi’n a ti a.

‘Awm pawh ka hre nang.Ti nge?” ka ti satliah.

‘Ka hre chiah lo,ka rawn hawi apiang khan inngaihtuah muk hmel deuh khan i lo awm ziaha.’a ti duah.Chutianga ka awm pawh keiin ka lo hre der lo thung.

‘Chutiang engmah a awm lo..Ka lu a na deuha,chuvang niang’ ka ti a.

‘Maithei,Tarmit i vuah tha peih lo bawk si..Eeee,Meeting chu..Enge a an?” a tih zawm leh zat.Ramsey ka hmu tih ka hrilh anih chuan engvanga mood tha lo nge ka nih a hrethiam nghal vek ang.Mahse, zep kha a tulna a awm chuang lo.

‘A pangngai..’

‘Rza sawidan khan kan tihlawhlting anih chuan Deal lian leh tha ber kan siam thei ang kha a tia’

‘A sawi dik alawm’

‘Anih chuan Pawl angin an awm nge?”

‘Aw…Diktak chuan an Vice President kha Ramsey a lo nia’

‘Eng a?!!!’ a ti that.

‘Au vak kher lo teh,keipawn ka hre lawk bik hleinem’ka ti nghat.

‘Lawk,nupui a nei tawh em? Zungbun a bun em ka tihna nih chu’ a ti leh talh.

‘Ka hre lo..Ka en miah lo’ ka ti tawi tak.Ka en lo tak tak,mahse Nupui a nei anih chuan ka hriat ka ring ve tawp thung.

Kan Scooty dahna kan thleng a,chahbi zawngin ka bag ka hai nghal rak rak.Midang lo awm ve an awm avangin engmah sawi zawm na hun a awm ta lo hlauh.Diktak chuan ka lawm zawk daih,eng eng emaw sawifiah kual leh teuh angai dawn tih ka chiang.Ka hna kalna turin ka pain Scooty min leisak a.Pakhat kan nei sa tho nangin dawr lamah Thanga hian a keng chawta,thil tangkai loah a hmang lo bawk nen kan chuhpui lem lo. Traffic Jamah buai chiam angai lo bawk nen Motor aiin ka lekchhuak tam ta zawk.

In ka thlenin khua a thim titih tawh.Luni’n amahin Tv a lo en a,ka lut thawm a hriat veleh a rawn hawi vat.Helmet dahnaah Helmet ka daha,nidangah chuan ka hawin Ka pa te an lo haw hman ziah thung.

‘An lo la haw lo mi?” thuphungin ka ti a.

‘Haw lo..’

‘An haw tlai dawn tih an lo sawi em?” ka ti leh a.

‘Aih..Pi kha chuan an In entir dawn tih chu a sawi a’ a ti a.Tv lam a en leh mai.

‘Tu zawk?” step lam pan pahin ka ti a.

‘Pu aniang.Ka hre bik lo’ a ti leh mai.A fel viau thin nangin a la naupan na a lang thin a,Tv a Korean Boy Band ho zai a lan vaih chuan biak pawh hre mang loin a thlek ta mai thin a,Nu Hmingi nen lah an inhauh phah tum a tam bawk.Mahse, a hun lai ngang a ni a,a sim thei chuang lo.

Ka bag khumah ka theh thlaa,ka thawmhnaw ka hlip nghal sawk sawk.March thla chanve vel a ni tawha.Khua duhthusamin a lum tawh.Office a kan room Ac nimahse thlan ngah chi ka ni bawk nen ka ban deuh chuap tho.Ka sam ka chhipah ka bawk khawm tawp.Chawei hmain chhung inkhawm ka pain neih a duh ziah avangin an lo haw hma a inbual zawh hman angai tih ka hria.

Tui vawtin ka taksa a deh rualin ka harh sawng sawng mai.Ka mit ka chhinga, vawiina Ramsey ka hmuh hnu atang khan hahdam taka ka awm lehna hmasaber a ni hial ang.Aizawl hi a zau ve viau tawh,mahse Aizawla kan awm ve ve miau avangin engtikniah emaw chuan hmaichhanah ka la hmu leh maithei tih ka ngaihtuah fo.Mahse, vawiin ang kha chu ka lo ngaihtuah lawk ngai eih lo.A induhtawkna tichhiain keiman tawpna ka siama,mahse kum khat leka theihnghilh theih khawpa nep erawh ka niin ka inhre lo.

Naute ka chan zan a ka nunna ka chan tel teuh zia kha theihnghilh duh mah ila ka theihnghilh ka ring tawh lo..Ka pa leh Nu Hmingi Kumthar hmang tura Lunglei lama an kal hlan a ni a,khami zan khan Savio awm lo se chuan ka thi ngeiin ka ring..Savio..Ni e, ka tan chuan Vantirhkoh a ni hawt e.

‘U Zorin,I zo tep tawh em?” Bath room kawngka rawn kik pahin Luni’n a rawn ti a.Ka ngaihtuahna atangin ka harh zawk.Ka lu suk loh tumin ka sam ka zial tawm kha ania,mahse Shower off bawk si loin a hnuaiah ka ding miaua,a huh tel ta vek.

‘Zo animai..An lo haw tawh mi?” ka ti a.

‘Haw tawh e…’

‘Ka rei lo ang…’ ka ti a.Ka intleuh nghal sawk sawk.Huizzz,tiang khawp hian ka nunphung a tibuai leh ta chu ania.

Ka mu meng kar mai,Savio hnenah thil thleng kha hrilh ka chak rualin enge ka sawi ang tih ka hrethiam chuang lo.A chanchin hriat theihna chi engmah ka duh loh avangin ka ngaihven lo tawp thin kha ania,mahse tunah tak hi chuan engemaw tal hriat belh ka duh leh ta thung.IGah ka lut a,Agnes-i ka Stalk mai angai.Anih loh chuan engtiklaimahin hetiang lam hi a lawm ngai lo kha ania.A danglam ta thut te anih loh chuan Ac pawh a nei lo hial zawk ang.

Ka mit la zet thil ka hmu ta chat.Uluk zetin ka en a.Vawiin tlai lama a upload a ni a,tu emaw nen chuan an inhual ngei tih a caption leh a pic uploadah a chiang.Tu mah Mention a neih loh avangin a Pasal tur ka hre duh anih chuan Comment ka en a ngai ngei ang.An thian ten lawmpuina thu an thawn ngei anga,tah chuan hmuh tur a awm ang.Ka thaw hak mai,ka en ngam ta ngang lo.

‘Hello…’ mutchhuah hmel zetin Savio-an a rawn ti a.Sana ka en a,dar 9 chauh.

‘I mu tawh law?”

‘Chawei loin ka mu a, ka lo muhil anih hi..Eng nge?” a rawn ti duah.

‘Engmah…Ka lo call mai mai che’

‘Ka awih lo em mai a,sawi mai mai teh’ min va han hrechiang tak.

‘Aaaa,ka ti tak tak.Eee,Dika pa kha engtik maw an zai dawn?”

‘Naktukah…I kal ve hman dawn mi?” a rawn ti a.Dika pa hi karhmasa lawkah a Ril Cancer tih an hriaa,mahse a intan chauh a lo ni hlauh.

‘Ka hre lo le…Anih muhil leh rawh’

‘Hmeli,I sawi tum tak sawi mai mai teh’ a ti leh a.Ka ner nghek ringawt.

‘Vawiinah Meeting kan neia’ ka tita nge nge.

‘Chuan…?”

‘Ramsey te nen….’ Ka ti sap.Awlsam taka sawi ka tum hle nangin ka beidawng chiang viau tih ka aw lawi ratah a lang thei reng.

‘LALPA le(h)…Eng nge thleng a?”  a awah phurna niawm tak a hriat theih.

‘Engmah..Eng nge thleng se i tih a?” ka ti nghat.

‘Ka hre lo,mahse hmelhriat hlui satliah inhmu ang ngawt chu anih ka ring lo deuh a’ a nui hak.

‘I sawi dik..,Mahse, vanduaithlak ka ti dawn nge vanneihthlak takin min lo hre tawh lo a’ ka sawi zawh rualin a thaw hak ri ka hre nghal zat.

‘A va ropui tehreng em..A ropui takzet..’ uar zetin a ti chiam..

‘A ropui khawp mai…Eee,IGah khan ka hmu a,Agnes-i nen khan khawthlang ho ang maiin an inhual niawm tak ania’ ngeiawm zetin ka nui hak bawk.Ka tum vanga nui ka ni miah lo thung.

‘I hmu maw?” a ti deuh hu..

‘Um…Hmu ang chu,an nghak rei tawh bawka an lawmpuiawm ka lo tia’

‘Zorinzual…Tu nge ka nih?” teh daih chuan a…

‘I hre lo mi?” ka nui a.

‘I thianpa hian ka hrechiang lutuk che,Lemchan kher angai hleinem..’ ka nui tawp nghal hmak.Ni e, ka lawmpui hlawl lo…

‘Sorry…’ ka ti nghal sep bawk.

‘A pawi lo…Mahse, nangmah leh nangmah kha inringtawk la,engkim i paltlang tawha,hnunglam en tawh suh…A tha em?” a rawn ti leh duah.Vawi tamtak he thu hi min hrilh tawha,min ti chaktu a ni bawk.Tunah pawh he thu aia mamawh hi ka nei kher lo hial ang.

Ka harh leh chuan khua a lo eng at tawh.Ka ngaihtuahna buai nuai nuai avang khan muthilh mai ka inring lo a,mahse ka beisei loh tawpin ka mu tha ta phian..

‘Zorin.Nimina kan kalna report kha ka lo en dawn mi?” Boss-in a rawn ti a.

‘Ok..Ka lo thawn dawn che nge niang?”

‘Um,lo thawn la…’

A room lam panin a kal zui mai bawk.Vawiina tihtur duan lawk ka en zung zunga,Dar 7ah Restaurant lar zetah Dinner eina tur a awm.Kan eipui tur ka en a,Aizawla kan Companyin sumdawnna kalpui tura hma la tu pawimawh tak zinga mi a ni a,sumdawnna lam kaihhnawih an sawi tel dawn avangin ka kal ve angai lehpek.Nimin bawk ka ngaihtuah lehnghal zat.Vawiin chu engpawhnise Mimi zawk kal turin ka nawr mai angai ang.Ka mood leh vahchhuah a midang nena Dinner ei ho a lang hlawl lo.

‘Zanin hi Dinner ei na tur a awm a..’ Thil ei laiin Mimi hnenah ka ti a.Min rawn en vat.

‘Khawiah nge?”  a ti nghal a,kan kalna tur hmun  hming ka hrilh ve mai bawk.Chhunah khan Mimi zawk a kal thei angem tih Boss ka zawta,keimah kal turin min duh tlat pek.Rza dam lo pawh ka ngei lo chauh chu a ni e.

‘Boss hian a en danah che engemaw awmin i hre ve lo maw?” midang hriat hlau hmel fahrain a rawn kun hnaia.Ka melh nghek thung.

‘I thil ei lai kha ei hle hle la anih chu a’ ka ti hmak.

‘A ni tak tak alawm..Kei chu ni ila Yes nimai…’ a nui a.Tur zetin ka melh khai mai.

‘Ok..Ok..Ka fiam che anih kha,eee…Nizanah ka tum loh deuhin mi ka Stalk a…’

‘Ka hria…’ ka ti nghauh.

‘Maw?”

‘Aw, ka hria…Ramsey leh Agnes-i an inhual’ ka ti awlsam et.Engtin nge awlsam lutuka ka sawi mai theih ka hre bik lo..

‘Engtinmah i awm lo tihna mi?” a ti leh hliaia.Tawngkaa chhang loin ka bu nghat ringawt.Mahse, ka mitmengah engemaw a lanchhuah palh takin amah en loin ka thil ei lai ka ei zawm mawlh mawlh thung.

Dar 6:30ah In atangin kan kalna tur hmun ka pana,khaw lum bawk nen inchei chiam ka peih lo.Kekawr dum,thawl deuh hnaka thui ka haa,Top,zangkhai leh hmuh nuam zet ka haa,a tlang ka kekawr kawngah ka bilh luta,Belt sin te ka hreng bawk.Ka hmaiah make-up tlem ka hmang a,ka nu hnen atanga ka rochun,Gold thi sinte ka awrh bawk.

Kan kalna tur Restaurant hi dar 12 thleng an inhawnga, Khawpui pawn lama awm a ni a,pan harsa lo leh hmun nuam tak a ni bawk.Ka thlenin pawnah Bossin min lo nghak reng tawh.Min hmuh veleh a lo nui var var bawk.Ka Scooty ka hung fela,ka helmet ka phelh dawn chiah tihin hmeichhe awin Boss a ko ri ka hriaa,ka hawi let vat.Mahse, Ramsey leh Agnes-I ka hmuh takah chuan ka hawi let vat,ka helmet phelh loin thim lam ka hawi lui ta zawk.

 ‘Agnes,nang maw?” Bossin phur hmel zeta a tih ri ka hrethei.Hreptak hian…

‘Aw…I dam em?” Agnes-in a ti leh a.An inbiak danah an inhre tha thawkhat tih a chiang.

‘Kan kal mai ang,Eee…Hei hi ka pasal hual ania…Ramsey,chuan..Hei hi Delhi ka awm laia ka thiantha tak Ronny…’ a awmah nuam a tihzia hai der theih a ni lo..Kei erawh ka hmui ka pet fan fan thung.

‘Kan inhmu tawh alawm,niminah Meeting naah…Ani hnen atang pawh hian tuna i sawi ang kha kan hriat vat ka beisei’ Ramsey awin a ti vawt ruih..

‘Maw? In lo inhmu tih ka hre hleinem..Anih chuan khawnge Hmeichhia chu?” Agnes-i zawkin phur hmel zetin a ti leh a.

‘Sorry,I thianpa hian a fiam che anih kha..’Bossin nui hawk hawk chungin a ti a.

‘Teuh lo,zaninah pawh hian nghak hret ila chuan kan hmu maiin ka ring..A kalna apiangah a zui ziah alawm..Nimin pawn a lo kal ve a’ a ti vawt leh ruih..Chiang takin keimah a sawina tih ka hria…