22/AUGUST- 23

Chapter- 23

‘Sorry,Zorini anih kha..Ka staff zinga tha ber…’ Boss-in a tih thawm ka hre leh a.Ka mit ka chhing vang vanga,thawklehkhatah ka ngaihtuahna a vir zawk bawk.

Ka helmet ka khung sawk sawka,ka locked a.Ka pan phei ta zawk,engvangmahin bihruk chhan tur ka nei lo.An duh duh an sawi laia lo ngawihreng lah buaina pumpelh dan chhe ber a ni bawk.

‘Hei,a lo kal alawm’ an bul ka thlen veleh Ramsey-an a ti nghal nghut.

‘Kal ila…’ Ronny ka en a,ka nui lui sak bawk.

‘Zorin….’ Agnes-in a ti sap.Muangchangin ka en a,Ramsey erawh ka en duh lo lui tlat thung.

‘Min ko em?” ka ti zangkhai vah.

‘Aw…Ronny,hei hi…’

‘I thiante a mi?” a tawng lai mekin Ronny hnenah ka ti leh a.

Agnes-i ka en leha,Ramhuai a hmu ta emaw tih mai turin a hmai a dang lap mai.Min hmuh vangin a thawng nge ka khawsak dan pawisak nei lo lutukin a thawng zawk ka hrethiam lo.Eng zawk zawk pawh nise ka buaina a ni nek lo e.

‘Um,ka thiannu anih hi.Agnes,chuan hei hi a pasal hual Ramsey.Nimin khan meeting naah kan hmuh kha…’ Ka hriatsa vek nimahse la hre lo ang maiin ka mengphawk lui vak.

‘Oh,chutia law? Ka lo hre hleinem,in dam maw?” tih pahin chibai tumin ka kut ka pharchhuaka,mahse min chibai let tum hmel a pu lo.Ka nui lui leh saka,pawisak nei lo hmel zetin kut ka la let ta zawk.Agnes-i meng ling hlar maiah chuan mak tihna a lang chiang ngang mai bawk.Ramsey erawh engmah sawi loin a ngawi ngur a,a kekawr ipte a zen tut bawk.

‘Kan kalsan phawt ang che u.Kan inhmu leh vat dawn nia’Vanneihthlak lutukin Ronny-an a ti ta hlauh.Kan pathum boruak tang lutuk a hrethiam hauh lo tih erawh ka chiang.Engmah sawi tawh loin ka ban ka vai leh zauh bawk.Ka chungchang dik lo taka an sawi dawn anih rau rau chuan engemaw sawi belh tur pek mai kha a tha mahna..

Kan hmuh tur a lo thleng tawh,a nupui nen an lo kala,amah hi palian leh hmeltha vuah mai a ni a,a nupui pawh Mizo nuah chuan a lian pawl a ni ang,a hmelthat mai bakah a fel em em bawk. Dinner ei pahin eng eng emaw pawimawh an sawi a,a khat tawka ka tawng ve tih loh chu an sawi ka ngaithla a ni ber.Mahse,anihna takah chuan Ramsey leh Agnes-i zawk khan ka ngaihtuahna an luah tlat.Kan thil sawi laiah rilru pek hram hram tumin a beih in beih angai bawk.An hmuh lai khan hre ngai lo leh ngaipawimawh lo thei ang berin lang mah ila ka thawveng hawk chuang miah si lo.Agnes-i kutzungtanga Zungbun khan ka mit a la lo thei lo.Vawi tamtak ka ta a ni lo a,a ni ngai lo ang tih ka inhrilh nawna,ka pawm thiam tawh emaw ka tih laiin a tak taka han hmachhawn takah chuan ka lo la pawm loh zia keimah leh keimah ka inbum thei lo.

In ka thlenin dar 9 a ri tawh.Ka pain amahin Tv a lo en a,nu Hmingi ka hmu lo thung.Ka nuhrawnin ka chunga a thiltih zawng zawng kha engmah ka la theihnghilh lo.Hemi kawngah hi chuan Ramsey sawi dik zia ka nun a pangngai tial tial angin ka hmu tam tial tiala,thiam taka min nawrchhuah a tumna kha chance ka pe tlem tial tial tih ka hria.Ka awm that duh loh nasat zawh poh leh ka pa lakah ka hla a,kha tluka duh kha a lo nei miah lo tih ka chiang tawh.Thil mak tak erawh chu a hmaa a awm dan thin kha Ka pa hnenah sawi dawn ta ila han sawi fak tur ka hre miah lo.Ka nu chunga a chetdan tenawm tak lah engmah fiahna ka nei thei hek lo.Tetea bialnu nau a tihtlak sak erawh sawi dawn ila ka sawi thei ang.Mahse, ka chunga thil thleng kha ka ngaihtuah apiangin sawi lo a ngawih mai a tha zawkin ka hre ziah thung.Cheque chungchang pawh engmah ka sawi ta lo law lawa,tun thlengin Savio kutah a la awm ta reng.

‘Khawnge i awm?” phone ka pick veleh Savio-an a rawn ti lawng lawng.

‘Offcieah bak khawnge ni ang a?” ka ti hlak.Ka hmaa Computer Screen lam ka en ran bawk.

‘Ka hre chuang nang..Chawlh te pawh i lo la thei a” a nui hak hak.Ka then ve sak mai.

‘La lo nasa mai,eng nge min lo call?’

‘Amak eee,lo call tur che hian a chhan a awm ziah angai ta mai’ lungawi lo zetin a ti nang nang.

‘Chutiang a ni lo,ka buai alawm mawle’ ka ti ve thung.

‘Buai reng mai,kan inhmu khat lutuka,tlaiah chhuak ila…’ a rawn ti .A sawi dik chiah,kan inhmuh lohna kar a tling tawh.

‘Eng chhuahin maw?” ka ti a,ka thil type ka type suala,ka phun hlak mai.

‘I peih loh chuan angai lo..’

‘Amak,engmah ka sawi loh kha,ka thil type lai ka type sual alawm mawle’ ka ti leh hlar mai.

‘Ok,anih chuan Midang pawh ka lo be kual anga,zanin chu re-union nei ang’ phur zetin a ti a.Ka ner nak mai.

‘Um..I duh duh khan lo ti la,a hmun min lo hrilh mai rawh’

‘Ninawm..Dah teh a’ a ti a,ka chhan let hmain a off daih bawk.Ka nui sak ringawt,a thinrim rei leh dawn chuang lo tih ka chiang reng.Midang ni loin Savio a ni miaua.

‘A va hlimawm awm ve’ tawng thawm ka hriat rualin ka phu ngheka,ka hawi chhuak nghal vat.Ka table bulah Ronny a lo ding reng tawh chu niin..

‘Eng maw? Sorry,Mamawh i nei em?”ka ti bah nak mai.A thle buk.

‘Nei lo e..Mahse, lunch ei i tum nge tum lo?” a ti leh a,Sana ka en zauh.Dar 2 a lo hnai thuak tawh.Ka hna khawih lai ka tifel lawk thei si lo nen darzat lam ka lo ngaihtuah miah lo.

‘Ei dawn e…Mahse, Tiffin ka neia’ ka ti tha ve mai.

‘Ok,min ken kep awm si lo a,ka zuk ei ange’ a nui a.Ka nui ve hak mai.Kan Office Buildingah Staff leh Customer tan Restaurant kan neia,nimin piah atangin an thil ka  ei apiang ka pum lamin a duh loh ziah avangin vawiin atangin tiffin ka pai ta zawk.

‘Lawk…’ a kal tur a ding leh rih.Engemaw hriatchhuah thut nei a ang viau bawk.Engmah sawi loin ka bu nghat thung.

‘Agnes-i kha i la hria em? Hman zana kan hmuh kha..’ ka beisei loh lutuk a sawi chhuah takah chuan ka hrawk a ro nghal halh mai.

‘Naktuk hi a Birth day ania,zanah Party a siam dawna.Kan pahnihin min sawm a.I card tur ka Offcieah a awm’ amah bawkin a ti leh a.Ka hrawk ro lutuk tih ziaawm nan ka chil ka lem a,inngaihtuah niawm takin zahzelah ka hmui ka pet  nauh nauh bawk.

‘Naktuk zan maw?’ ka ti leh te te.Engvangin nge kei min sawm tel ka hre bau lo.

‘Um..I hman thei angem?”

‘Ka hre mai lo,midang kalpui tur i nei tho em? Ka sawi awmzia chu thian dang ka tihna ania’ nuam ti lo zetin ka nui lui var var bawk.

‘Nei lo…Mahse, I theih loh chuan a pawi lo.Amah khan kal ngei ngei turin a duh che a,chuvang mawle’

‘Ka hrethiam chiah lo…Diktak chuan i thiannu ania,hna nen a inkaihhnawih bawk si lo a’ ka ti sap.Kan inhmuh zan khan an thusawi ka hre vek tho nangin ka hre lo der tlat thung.Ramsey khan Agnes-i hnenah khan Ronny Bialnu angin min sawi a,hmeichhe a lo tak mai khan an hlim dun lai ka hmuh theih nan hun remchang a zawng vat tih a chiang reng.

‘Nia,a dik alawm..Mahse,I kal theih loh chuan pawi lo ka tih kha’ nuam tih loh hmel zetin a ti a.

‘Ka lo tum dawn nia’ ka tita sap.

Eng nge a tum hre lo mah ila tlanchhiat na tur ka nei lo.Bakah Ramsey a kal ngei anga,a rin ang ngeiin ka awm tih ka lantir dawn khawp.Ani chauh hi khawvela mipa awmchhun a ni lo a,kan inthen avangin ka khawvel a tawp lo tih pawh a hmuh angai ang chu.

Thil ka ei laiin groupah zana kan chhuahna tur Savio –an a rawn sawia.Chaw kan ei anga,chumi hnuah kan round ang..Ka then sak mai.A tel tur te lah Apuia,leh Dika,Chhuantea kan ni leh mai.Kan thianho kan kim vek dawna,anih chuan tuman an bialnu te an hruai lo ang tih ka hria.Inven leh mize thup ngai a awm hi kan nin ber a ni a,kan awmkhawm chuan mipa angin min ngai ve maia,an duh duhin an khawsa ti ila a dik ber.Kei pawn insumkarna awm miah loin ka duh duh ka ti maia.A hnua engmah sawi zui a awm ngai hek lo.

Ka pa ka calla,chaw ka eichhuak dawn tih ka hrilha,tute nen nge kan nih dawn min rawn zawt leta,kan thianho kan ni tih ka sawi tha ve mai bawk.Ka awm that duhloh lai kha chuan ka thiante ho hi tumah mil a nei lo.Mahse, tunah chuan ven ngai lo niin min hre ve tak tak tawh aniang,engmah a sawisel lo.

‘Haw ila…I la hman lo mi?” Mimi’n zik mar ar ar pahin a ti a.Tun hnai hi ka hriatthiam chiah si lohin kan inkar a hla du a,engvang nge tih erawh ka hrethiam chuang lo.

‘Hman e..Mahse…’ ka ti hman chauh.

‘A pawi lo..Kalna tur ka neia,ka lo va kal hmasa ang’ a ti nghal zat.Eng chu a hria nimaw?

‘Sawi pawh ka sawi zo hman hleinem mawle’ ka ti hlaka,ka nui hak bawk.A then ve sak,mahse a nuihzat vang a nui ni loin a nui lui nimaiin ka hre thung.

‘Sawi zawh kher angai lo,kan haw rual thei lo tih ka hrechhuak leh si nih kha’ a ti a,a bag a ban.A tho zui nghal bawk.

‘Um..Savio ten zanin chu chhuah an ti a’ ka ti leh sap.

‘Savio maw?” a hmel eng deuh sawt chu ka hmuh hmaih hauh lo.Savio a Star ti dawn ila kha lehchen kan inhre tlang vek a,chutiang lam hawiin an inkawm ka hre ngai lo.Tunah phei chuan Savio Bialnu a rai mek a ni a.An inngaizawng dawn lo chiang bal.Mahse, engvangin nge Savio hming ka sawi vangin a lo hlim ve ngawt ang? Ka hrethiam teuh nuaih lo e.

‘Aw.Savio te nen,I lo kal ve duh em?” ka ngaihtuahna tilang lo thei ang ber turin pangngai takin ka ti a.A thle bak.

‘Aih,ka lawm..Mahse,inthianho tak taka awm induh ka ring’ a nui a.Tun tum chu nuihza tak tak a ang ta.

‘Thianho tak tak tih lemah ka sualpui thin te annia..Nuam chu i ti kher lo maithei’ ka ti a.

‘Deuh kher che hian,ka sawi awmzia zawk chu anni leh kei nena kan inkawm dan hi chu tha zawk thlan tur awm loin a hran hlak a..’ a sawi dik..Tawngkaa chhang loin ka bu nghat ringawt.

‘Anih ka kal aw..’ tih pahin kawngkhar lam a pana.Ka ban ka vai zauh ringawt.

‘Zorin,lo lut lawk teh ’ Ronny-an a office kawngkhar atanga rawn dah pahin a rawn ti a.A lut lehnghal mai bawk.

‘Theinghilh ka nei leh si.Kan ti zo leh lawk,awi..Ka van haihawt tak’ ti mawlh mawlh chungin Mimi a rawn let leha,ka nui var var mai.

Ronny Office ka pana,vawiin chu chawhnu lam atang khan a mood a chhe takzet,tih thinrim loh tawp a him ber.

‘Hei min lo ken luh sak nghal mai teh’ File kawm pawl min pek pahin Mimi’n a ti a.

‘Lo kal ve mai rawh,a Mood a chhe bawk si.Mahni a luh ka chak vak lo ania’

‘Naa,a mood a chhiat te chuan….’

‘Lo kal rawh,min hauh pawn kan tuar dun mai dawn lawm’

‘Zorin…’ ring zetin a rawn ti leh nghek.Ka mengphar awk bawk.A roomah bomb an lo kamsak anga,a hrechhuak thut te pawh a ni mahna le a.

Tim daiin kawngkhar ka nem hawnga,a rawn hawichhuak vut.Ka hnungah Mimi in min zui ve bawk.Dawhkanah Paper a lo chap darh nuaiha,a ke bulah Paper hmeh hlawm tam fe a let phung bawk.Eng nge ka tih dik loh ka ngaihtuaha,ka hre mai lo..

‘Sir…’ ka ti sap.Kan inkawmngeih hle chungin Officeah hi chuan vawikhatmah a hmingin ka la ko ngai lo.

‘Enge i duh?” a ti hmuk.

‘Eng?..Keimah…’ a ban a vai kual thuak.

‘Nang ni loin Mimi zawk kha ania ka biak’ a ti leh a.Tlemin a nem ta deuh.

‘Hei hi naktuka mi tur kha ania,ka haw hmain i lo check duh takin ka tia’tih pahin dawhkanah a File ken a daha.

‘A lawmawm,ka lo check ang.A dang a la awm em?” a ti leh a.

‘Aih..awm lo e..’

‘Ok,anih chuan Zorini hi biak lawk ka duh a’ a ti leh hmuk.Mimi tan awm ve reng chi a ni lo tih a tawng danah a chiang vek.

‘Enge hei hi a awmzia?” tih pahin a Laptop ka lam hawiin a rawn daha.Ka kal hnaia,ka en a.Engmah dik lo ka hmu lo.

‘Eng ber hi nge i sawi ka man chiah lo a” ka ti sap.Chawhma lama ka hna zawh tak a ni a,a tam tham bakah a harsa deuh bawk nen vawi thum lai ka ti thaa.Ka tih zawh hnuah ka check leh vek bawk.

‘I tih dik loh lai pawh i hre lo amaw?” a thinrim tih a tawng danah a hriattheih vek.

‘Sorry..’

‘OK,a vawikhatna a ni bawka engmah ka sawi lo ang.Mahse, fimkhur tawh rawh.I careless avangin sum tamtak kan chan hman thelh a.Kan chan tur hi cheng 100 ni loin Nuaih bi zel a ni tih i hriat nawn leh a tha ang.Nidangah tiang kha a awm leh anih chuan Main Officeah i sawifiah a ngai tawh ang.I fimkhur loh vangin engmah ka chan duh hauh lo ania’ a ti leh duah.

‘Ka hrethiam e.Ka lo fimkhur tawh dawn nia’ ka ti sap.Hna uluk em em ka nih avangin duhsak ka hlawha,kan luh tirha kan hna kha khawih tawh loin ka kaisang ta reng bawk.Mahse, vawiin ang em em a Ronny thinrim hi ka la hmu ngai lo.

‘Hei hi en la…’ tih pahin a dik lo lai a rawn kawka,Lalpa le(h)..Pakhat mai pawh ni loin phek thum lai ka la tisual zui.

‘Ka lo siamtha nghal ang..A rei lo ang’ ka ti a.Chhuah tumin kawngkhar ka pana.

‘Ka lo nghak ang,I zawh veleh min rawn pe nghal dawn nia’a ti leh nghut.Ka bu nghauh ringawt.

Ka dawhkan ka pana,ka thil khawih lai ka closed a..Site lamin copy min rawn thawn,Paper a min pek ka phawrh chhuak nghal bawk.Ka tidik vek emaw ka ti asin le..A ziak a te si,a bichilh bawk si nen ka mit a vai rum rum in ka hre mai.

‘Eng nge dik lo awm a?” Mimi-in a rawn ti sa sa.A kal daih tawh emaw ka tih laiin a lo la awmreng,ka chhuah khan ka hmu miah lo.

‘Chawhma lama ka khawih kha ania’ ka thaw hak.

‘Ka lo pui dawn che mi niang?” tih pahin a rawn thu hnaia.

‘I hmanhmawh kha.Phek thum chauh ania,ka tithei ang’ ka ti sap.

‘A pawi lo,khawi..Ka lo sawi anga, lo entry la…’ a ti a.Chair a rawn pawt hnaia,ka bulah a rawn thu ve nghal bawk.

Kan zawh meuh chuan khua a thim chhulh tawh.Vawi 10 aia tam mah Savio-an min lo call tawh bawk.Mahse, call pick na hun ka nei lo.Zawh vat a pawimawh ber.Kal pahin ka call mai ang chu.

Kan ennawn leh vek a.Kan tihchhungin Ronny a rawn chhuak lo.A lo nghak ngat ngat anih hmel.Vawiin a thawn hman tur a ni a,chuvang takin nizanah inah ka hawn a.Dar 1 vel thleng ka buaipuia,vawiinah chawhma lamah ka zo fel thei ta hram kha ania..Ka mit a vai deuh mum muma,ka mit ka chhin apiangin number a lang zut zut zel bawk.Diktak chuan pali nge 5 tam pawh ka hre meuh lo zawk..He Company a hna ka zawm ve hnuah tiang em em a hahthlak hi ka la thawk pawn ka hre lo.Ronny-a ka thawn nghala. Ka thawn fel veleh ka chair hnunglam nghengin ka zi mar ar ar mai.

Room kawngkhar ri rakah ka thu mar vat.Rang zetin ka dingchhuak nghal vat bawk.Ronny-a a rawn daka.

‘A zo e..I kal thei tawh ang’ a ti hmuk a.Ka chhan hmain a lut lehnghal daih bawk.Ngam ngat ila chuan ka vawm pawp duh ngei ang.Mahse, ka Boss a ni miaua,ka ngam lo.Ka tihsual loha min hau lah a ni hek lo.

Mimi Toilet atanga a rawn let veleh ka lut ve nghal a.Sana ka en a,Dar 6 a ri tawh.Savio thinrim dan tur ka ngaihtuaha,insawifiah chhung a rei leh dawn lutuk.Parking kan pan pahin Savio ka call pah bawk.

‘Hmeli….Khawnge i awm a?” hello tih that pawh awm loin a rawn ti nghek.

Ka ner vaka,ka beng bul atangin ka phone ka lasawna,a au ring bawk nen Mimi nui hmel ka hmuh rualin a rawn au kha a hre phak tih ka hrethei.A ring ve lulai bawk em a ni.

‘Office atangin ka lo kal chhuak dawn chiah e’ tlawn titihin ka ti a.A rum nghat ri ka hrethei.

‘Call tal pick ta che,vawi engzat nge ka lo call che kha?” a ti leh a.A la lungawi chuang lo.

‘Sorry,ka lo thlen veleh ka hrilh ang che’ ka tita zawk.A rawn tawng leh hmain ka off nghal daih bawk.

‘A va sa pap pap awm ve” phone ka off veleh Mimi’in a ti a,a nui hawk hawk bawk.

‘A awm ve lawm,tiang boruak kha a awm dawn tih hre hek lo I le..Chuti ni lose ka thleng daih tawh ang chu’ ka ti a.Ka Scooty seat ka hawnga,helmet ka lachhuak nghal bawk.

‘Ka awt thin che…’

‘Maw?” ka ti vat.

‘Achang hi chuan ka awt thin che’ a ti leh a.Mak ti zetin ka en a.A hmelthaa,chhungkaw pangngai taka seilian leh kei anga hun hmalam chhe tak sawi tur nei lo a ni bawk.Mahse, min lo awt anih chu!!!

‘I ti mak em mai a’ ka ti hlak mai.

‘Mak nang,diktak chuan Savio ang thian zawng zawnga thiantha ber i nei a.Mipa a hnaihtu che apiangin an ngaina che a’ a then sak.Savio chungchang a sawi dik,ani aia thiantha hi an awm leh thei tawh lo ang.Mahse,mipain min ngaina tih erawh ka pawm lo bur.

‘Nang ka thian i ni bawka’ ka ti a.A sawi pakhat zawk erawh chhan enah ka en lo.

‘Kei te chu engmah ka ni hleinem’  a then sak.A helmet a lachhuaka.

‘I ni lutuk ringawt.Nang hi ka thian ni lo la chuan nun pangngai hi ka zawh leh kher lo ang..’

‘Ahhh,I zawh em em ang,chhunglamah khan i mizia tak tak zawk a awm alawm.Haider talh i tum mai mai anih kha’ thutak zetin a ti leh a.Thil hriatchhuah zawk ka nei.’ I chhungrilah hian i nihna diktak a awm a,chu chu ka hmu thei ania,haider tum suh’ he thu hi vawi tamtak Ramsey khan min hrilh thin anih kha…Ni lo,ani kha chuan ka chhungril a lo hre tak tak ngai lo..

‘Ka kal aw…’ a ban a rawn vai zauh.Za lo zetin ka then lui saka,ka vai ve zauh bawk.

Kan chaweina hmun tur ka thlenin an lo kim thap tawh.Kan kal fo na a ni a,Cabin kan awmna thin kan chang hlauh bawk.An dan pangngaiin PUBG an lo khela,ka lut pawh min lo ngaihven hlawm lo.

‘Puia,ngaihtuah deuh teh..Amak e..Ka thi leh tawh,min veng tha lo thin a’ Chhuantea’n a phone dah thlak thak pahin a ti bai bai.Min rawn en a,ka lei ka chhuah khum zauh ringawt.

Chaw kan eikham hnu rei vak loah kan chhuaka,kalna tur bik kan hre lo vek.Kan kalna turah kan han inhnial leh rih a.A hlimawm thin,hei hi ka thian mai bakah ka family pakhat zawkte anni ber.

‘Naktuk zanah Agnes-in a Birthday partyah min sawm a’ Savio hnenah ka ti sap.Kan hmalama Aizawl khawpui pe tuar mai chu ka thlir vang vang bawk.

‘Agnes-in maw?! Berkher a..’ a ti hluk.

‘Um..Diktak chuan hmanzanah kan Boss nen kan chhuaka,tahchuan kan inhmu a,Boss nen an lo inkawm thin a’ ka ti leh a.Ramsey ka hmu tel tih ka sawi lo.

‘Chutia law? Mahse engvangin nge a sawm kher che a?” a ti leh a.

‘Hman zana kan inhmuh chuan I u a tel ve a’

‘Eng a?!’

‘Ramsey…’ ngaihsam hmel zetin ka ti liam puat.Min rawn enreng tih ka hriat avangin hmalam ka en lui tlat bawk.

‘Eng nge thleng chiah hi?” a ti leh a.

‘Eng lem mah.Mahse, Boss nen kan inngaizawng niin a ngai’ ka nui lui hak bawk.

‘Ok…Chutianga ngaih theih tur thil chu a lo awm tihna ni em?” ka en ta nge nge.

‘Awm lo,a hma niin Sumdawnna thilah Boss meeting ka zuia,tahchuan ka hmu a.Mahse min hre tawh lo a.Ka insawi lem lo a’ ka ti leh a.

‘Mitenawmpa chu(h)’ thinur zetin a ti hmuk.

‘Dem ngawt lo la,min hriatreng na tur chhan a awm lo alawm.Kum a vei tawh ania’  pangngai thei ang berin ka ti leh a.A rum hak mai.

‘A that nasat chu,anih chuan naktuk zanah chuan min mamawh dawn em?” a ti leh daih.Ka lu ka thing nak mai.

‘Ka hre lo le,mahse hlauh chhan tur ka neih ka hre lo a.Boss nena kal dun tur kan ni a,ka inveng theiin ka ring.Mahse, I awm ve chuan nuam ka ti sawt ang tih i hria alawm’ ka tita duah.A rawn tawlh hnaia,ka darah a rawn kuaha.’Ka awm ngei ang,I tuar nawn leh tur hi ka theihtawpin ka dang ang’ nghet charhin a ti a.Ka kut a rawn hum vang vang bawk.Mipa leh hmeichhia hi Thian tha anih theih tak tak loh an ti thina,kei erawh chuan ka hnial thung.

‘Kal tawh ang u’ Chhuante-an a rawn ti lawng lawng.An inhnem hlawm viau.Kei erawh chuan farkhat te mah ka in lo thung.

‘Savio…Ka Scooty khalh teh a.I car ka lo khalh ang’ ka ti aA lamah ka Scooty chahbi ka khai kang va bawk..A thle bak,min hnial dawn emaw ka ti hman,Mahse, ngawi rengin chahbi a phawrha,min rawn pe a.Ka Scooty chahbi a la ve thung.

‘Tlan chak suh ang che’ a ti a.Ka mit ka siai zauh ringawt.Ka tlan muang lem lo tih a hrechiang lutuk tlat.

Apuia leh Dika an inphura,ka Scooty Savio-an a khalha,Chuante-an a bike a khalh bawk.

‘Tlan hmasa la…’ Motor rawn ben pahin Dika’n a rawn ti a.Ka nui sak mai.

Ka dawkchhuak nghal zawk.Thuampui lam panin ka tlan pheia,mahse,  peng ka chhuak tur chiah Car pakhat a rawn lang thut,Falklang lama peng turin a rawn tlan a,Signal a pe bawk si lo nen tlum hmawk khawpin Brake ka rapa,a ri tuar thei hial bawk.Hlauhthawnna avangin ka khur nghal dar dar mai.

Ka hawichhuaka,ka hma taka Car ding chu ka va hmu a.Tu nge mawni hrep ni? Wrong side lehnghal in khatianga chak lutuka tlan te chu thih a chak viau a ni phawt ang.Kawngkhar khar ri dawt thawm ka hriaa.

‘I tha em?” kawngkhar rawn hawn pahin Savio-an a rawn ti a.Chahbi ka phawi nghal bawk.Ka bu nghat ringawt.Ka chhuak a.Ka lam pana mipa pakhat rawn kal phei ka va hmu a,mahse a Motor head light hliah zawnga rawn kal phei anih avangin a hmel ka hmu thei lo.

‘Savio,nangmah maw?” Ramsey aw ka hriat rualin ka khawng nghal lah mai…