22/AUGUST- 25

Chapter- 25

A lo kal thawm ka hre der lo.Kamiz var,a taksa phuar deuh tang a haa,Kekawr thui nalh zet a ha zuih bawk.A lang nalh leh pek..Mahse,Party na a kal tur ni loin khawimaw laia Bussiness meeting vel a kal a ang mah zawk.

‘Min bia em?” zangkhai thei ang berin ka ti chhuak halh.Ka dak deuh vah bawk.

‘Kan pahnih chauhin kan awma,ka bia che anih hmel’ a then suk.Kan inchhang tawk tek tawk viau e.

‘Ok…Min hrethiam la,I sawi ka lo hre miah lo a’ ka ti leh a.Ka then sak bawk.

‘Ka sawi nawn leh dawn em?” a mitmeng thim deuh raih mai chuan min en run bawk.Mahse, ka hawisawn duh bik der lo.

‘Ka lawm ngawt ang’ ka ti sap.

‘I awm loh reng chuan Dami sawn tu emaw lampui saw nuam a ti hmel riau a’ a sawi zawh rualin inchhung lamah a thle zauh bawk.Ka thaw hak mai.

‘Lo lam rawh se.Engmah hlauhthawn tur a awm lo’ ka ti a.Ngaipawimawh lo hmel zetin ka nui hak bawk.

‘Anih chuan a ngaihthatthlak hle tihna a ni maw?”

‘Ni chiah e..Hmana Agnes-i a ngaih a that thin ang chiah khan…Sorry’ sawisual niawm fahranin ka hmui ka hup a,mahse  pawi tihna tak tak ka nei hauh lo thung.

‘I nun bawlhhlawh tak avang khan midang puh tum miah suh…’ a ti vawt ruih.

‘Bawlhhlawh maw? Min hrethiam la,kan inhria em?” ka ti lui leh salh bawk.Hawisawn duh loin a mitah tak ka en a,a hmel danglam zawk ka hmu hman bawk.Mahse, a rei lo lutuka,thinrimna nge thildang zawk ka hrethiam lo thung.

‘Hre ngai lo…’

‘Dik chiah..Kei pawn ka hre ngai lo che’

‘A lawmawm hle anih chu’

‘Lawmawm lutuk,Eee..Vawiin khan ka thiannu i lo bia a ni awma…’ ka ti leh nghat.

‘I thiannu….’ A ti nawn ve sup bawk.

‘Um,ka thiannu..Mimi..In lo inhria tih ka hre miah lo a’ ka nui lui leh sak bawk.

‘Hria e..Ka hmeichhe Hmangaih thin thiannu a ni a’ a thusawiin min deng dawt a ni ber.Ronny khan a sawi tawh ngei a,mahse ama sawi ngei hriat chu dang tak a ni ringawt.

‘Wow..A va ropui ve’ ka tita ngawt.A dang sawi tur ka hre hlawl lo.

‘Nia,Ropui…Hmeichhe tenawm tak a lo ni tih ka lo hre lo mai pawha’ a ti leh hmuk.

‘Aaaah,a va zia lo ve mawle..Mahse, hei Agnes-i i nei a.Engtiklaimaha phatsan lo tu che.Ka lawmpui che’ ka ti dam leh thlap.Ka ngaipawimawh lo a ni tih lantir nan ka hawi pir lui vah bawk.Mahse ka chhungril a khur a,ka mualpho hmaa kalsan turin ka hriatna thazam ten min tur nuai nuai bawk.

‘Min hrethiam la,ka luhsan mai ang che’ ka ti leh a.Ka then lui leh sak bawk.

Hall lama luh tumin ka pen a,kawngka bul maia ding anih avangin amah hel loh chuan kal ngaihna a awm lo.Ka ding leh dat,’I tawlhsawn lawk thei angem?” ka ti hmak bawk.A rum nghut ri ka hre nghal zat bawk.Mahse, a tawlhsawn chuang miah lo thung.

‘Khawngaihin….’ Ka ti hman tawk.Mahse,Enge thleng hi?? Min rawn pawt thuta,ka te thawt mai.Ka pheikhawk bun a sang bawk nen tluk hlauin ka ban ka phar kuala,mahse amah ngheng rawk khawpin min pawt bet nawka.Min kuah bet zui nghal hmak bawk.

‘Eng nge i tih a?” ka ti leh that.Talchhuah tumin ka che zui nghal phat bawk.Mahse, min kuah nghet lutuk ringawt.Ka kawngah a rawn kuaha,min pawm kang deuh dawrha.Eng nge a tih ka hriat meuh chuan Bangah min nawr net titih der.A ban veilam a la sawna,min thlah dawn emaw ka ti hman.Mahse,Switch a ri khapa.A thim ta thap.Inchhung lam lah Light an off then nuala,a thim deuh ruih bawk nen pawnlam a en pha mang lo..

‘Min thlah rawh…’ ka ti leh that.

‘Au vak vak mahla tuman an hre chuang lo ang..’a ti duh lek.

Mahse, a sawi dik tih ka hre ve tho.Music tang zet leh lam rem fahran a ri ruai ruaia,an vai mai khan an inhnem hlawm bawk nen ka awm leh awm loh tuman an ngaihven lo tawp ang tih lah ka chiang.Beidawng zetin ka thaw halh mai.

‘Min thlah phawt teh’ ka ti leh hlar mai.

‘Ka thlah che i ring em?” a ti sup.ka chhan hmain ka tukkum samah a rawn thama,min kuai dak nghal zat.

‘A na ania’ ka ti that thung.Mahse, ka sawi zawh rualin ka sawi hre lo ang hmakin ka nghawngah a hmui lum ham hamin a rawn nawr nghal zat.Ka ip chawiha,ka lo beisei lo lutuk bawk nen ka thaw a chham titih.

‘Ramsey…’ ka aw a ri chang chang.

‘Shh…’ a ti sup ringawt.Zei zetin ka khabeah a rawn fawpa,ka thaw hawk mai.Ka chalah a chalin a rawn nawr a.Kei ang bawkin a thawk dan a mumal bik hek lo..Ni lo,tiang hi a thleng ngawt thei lo.Hmeichhe sihhnip lutuk leh duh duh hunah khawih theih ang maia awm hi ka tihtur a ni lo.

Ka che phat.Ka nem sawn dawrha,Ka per sawn nghal nawlh bawk.A lo inthlahdul ve hrim hrim nge tianga ka chet thut a beisei lo zawk ka hre lo.A rum nghut mai.Min rawn man leh tumin min rawn bana,rang lutukin a kut ka bensawn lawp a.Ka tawlh hnung a,ka inkuangkuah fel nghal than bawk.

‘Zorinzual….’ A ti tham tuak ringawt.

‘Kal sawn rawh’ ka tic hang fak.

‘Inbiak kan ngai…’

‘Aih,inbiak na tur kan nei miah lo…’ ka ti leh hmak.

‘Keiin ka nei alawm’ a ti leh sup.Mahse, engvang mahni nem ka tum lo.

‘Min hrethiam la,kei hi hmana Zorini kha ka ni tawh lo.A tak,duh duha bum kual theih kha ka ni tawh lo.Ka puitling tawh…’Uar zetin ka ti leh a.A rum leh hawk.

‘Nia…A dik..I danglam tawh’

‘Ka lawm e…’ ka awah tihelna a lang chiang ngang mai bawk.

‘Thil pakhat ka hre duh…’

‘I zawhna chhang turin hun ka nei miah lo…’ ka ti leh hmak.

‘Ka lo va lut hmasa ang,midangin nang nena inzawmna nei niawm taka min hmuh ka duh lo ania’ ka ti leh salh.A thle buka,ka beisei loh zetin a tawlhsawn ve mai bawk.

Kawngkhar lam ka pana,kal pahin light ka on nghal zat bawk.Mahse, kawngkhar ka hawn hmain a thusawi vangin ka ding leh chat.Muangchangin ka hawi let leh a.A hmel tak ngul mail eh pawisak nei miah lo tih hriatreng chu ka en a.Tun lawka Ramsey kha ni loin hmana misual tak,pawisak nei lo leh min tihnat chak a tuihal hmel chiah chiah kha a ni leh ta zawk.

‘Sawi nawn leh teh’ ka ti chhuak sap bawk.

‘I hre lo tak tak nge I hre ngam lo?”

‘Mitenawmpa…’ ka aw a khur dar dar mai.

‘Ahh,kei nge tenawm nang tualthat kha?” ka dang a ro nghal halh thei..

‘Tual ka that lo…’

‘Anih chuan khawnge ka fa kha? I nawmchen duh luat avangin ka fa kha i that a ni lawmni? Enge ka fa khan tihsual a neih a?” a ti leh khur khura.A tawng a ring lo,mahse ka bengah chuan tek tla tlukin a ring tho.

‘Chutiang chuan i lo ngai tak taka maw?” ka tichhuak thei hram. A then suk.Mahse, a mitmeng vawt ruihah chuan nelawmna hmuh tur pakhatamah a awm lo.

‘Ka ngai ni loin ka hria’ a ti leh hluk.Thil tenawm zet chanchin sawi niawm fahranin a ner nawk bawk.

‘A lawmawm chu…’ ka nui chhuak hak mai.

‘I tan chuan a lawmawm ang chu.Naute kha awm se chuan i hna hi i thawk dawn tlat lo…’

‘Maw?!!!” ka tichhuak thei hram.Ka awih thei lo zawk.

‘Eng company mah khan pasal nei lo a naupai mek an chhawr dawn lo che.Mi a ka ni lo ania’ a ti leh a.A insehruh teuh bawk.

‘Naute leh ka hna hian inzawmna a nei miah lo’ ka ti chang fak.

‘Anih chuan engvangin nge i zep si? Inneih ka sawi lai pawh khan i hna hi i hmu fel vek tawh anih kha…’ min demna a mitmeng vawt ruihah chuan chiang takin a lang thei bawk.Chhan tumin ka ang hman ziau tihah kawngkhar rawn hawng thawm a awm ta tlat.Ka hmui ka chip ta zawk.

‘Hon…He lamah i lo awm daih a” Hmeichhe awin a rawn ti a.Tu nge anih hre turin en kher ka mamawh hauh lo.

‘Um..Ka hawi khawthawng lawk’ a ti supa.A rawn kal pheia,min en miah loin min kalpel zui nghal zat bawk.

‘Ok..I lo thlenna a la rei si lo a..Enteh tu nge….?” A tih mek laiin Engemaw Ramsey-an a sawi sup.A zawt zui lo,ka hnungchhawn avangin tu nge ka nih a hre lo anih hmel.

‘Tak tak maw? Ka lawm e..’ phur zetin a tih ri ka hre leh a,ka kut ka humruh tlat thung.

‘Um,chuan zanin hi khawiah zawk nge niang? Farmah nge?” Ramsey-an a ti leh sup.An induat vel thawm chuan ka luak a ti chhuak hlui thei hial mai.

‘Farmah ti ila…’ pangchang zetin a ti no nghar mai.Midang awm ve lo ang hmakin an khawsa a ni ber.Enge Farm Houseah an tih ang ka hrethiam vek.An thusawi hre thei lo tura ka beng hup san hmak ka chak,mahse engmah sawi loin hmalam ka pan ta zawk.Bang kil lam ka pan phei zela,Railling bawhin ka ding a.Hmalamah hmuhnawm a awm ta nimai awm takin ka en dauh dauh bawk.

‘Kal ila..Helaia kan dinreng chuan bawlhlawh kan kai palh hlauh ang’ Ramsey-an a ti leh hluk.

‘Bawlhhlawh maw? Ngatinge?” Agnes-in hrethiam lo zetin a ti ha mai.Min sawichhan tih ka hriat chian vei nen le(h).

‘Boruak bawhhlawh mawle…Kal ang le,enge ka Present dawn che i hriat kha…’ a ti leh sup.Ka hmui ka pet nghek mai.Tenawm lutuk…Angaihtuahna mai lo amah chawp hian tenawm hlawm a ni zawk.Chuti chung chuan kei hi tenawm min ti anih chu!!!

Engchen nge ka awm ka hre lo.Ka phone riah ka phu zawk.Ka bag atangin ka lachhuaka,Ronny a lo ni a.A lam ning tawh a ni ngei ang.

‘Hello…’ ka ti sap.

‘Khawnge i awm?” music ri bengchheng bawk nen a tawng ring ngang mai.

‘Balcony-ah..I haw duh tawh mi?” ka ti a.

‘Aw…I duh loh chuan a ngai chuang lo a…’

‘Aih, ka lo kal ang…’ka ti vat.Helai hmun chhuahsan tluk chak ka nei lo.

Room chhung ka luh rualin zu rimin ka hnar a verh nghal zak mai.A tam bawka,a luanin a luang a ni ber.Mahse, vanneihthlak zetin in ve chakna engmah ka nei miah lo.Ronny-a zawngin ka hawi kuala,nichin a hmeichhe sam buang zet nen khan an lo thu dun a,an inhnaih ngang mai bawk.Ka thaw hak mai.Ka pan pheia,an bul ka thlen hmain Ronny-an min rawn hmu a.A dingchhuak nghal vut bawk.

‘Ronny,I la awm duh chuan keimah pawn ka haw thei ania’ ka ti sap.A thutpuinu ka en a,ka nui lui sak bawk.

‘Aih,awm duh nang..Kal ila…’ a ti vut.Ka hawi kuala,kan piah lawka Ramsey leh Agnes-i thu ka va hmu a, a ngaihtuahna hriat theih miah lohin min lo melh run bawk.Ka thluak a vir zawk.

Ronny ka pan hnaia,a kawrnghawng ka siamthat saka,ka nui lui sak bawk.Ronny mengphar deuh awk chu ka hre lo der hmak thung.’Kal ila…’ ka ti sap bawk.

‘Aw..aw,tehreng mai.Kal ang’ a ti bah nawk nawk mai.Kan inngaizawng eih lo a,thian mai kan nih zia hrechiang tu chu amah a ni a.Ka khawsak dan khan a thawng lo thei lo.Diktak chuan keipawn khatianga ka che kha mak ka inti ve tho.Nakinah ka hrilhfiah mai ang chu.

‘In kal dawn mi Dear?” kan hmaah tak Agnes-i a rawn ding chat.

‘Aw,hei Boss hi a haw a hun a..” Ronny-an a ti a.Min rawn en a,ka nui lui sak ringawt.

‘Ok..Anih chuan ka dang lo ang che u..In lo kal vangin ka lawm lutuk aw’ a ri leh a.Ani pawh a mitmeng si sap danah a in nual tih ka hrethiam mai bawk.

Inah min Drop a,a tlai tawh deuh bawk nen lo lut loin a tlan let lehnghal mai.Bell ka hmet a,Luni’n phak fein min rawn hawnsaka..Midang an lo mut tawh bawk.

Room ka pan ding nghala,ka thawmhnaw ka thlak sawk sawka.Ruakin Bathroomah ka lut a.Shower ka herh haw nghala.Ka taksa a sikna zawng zawng tleuh fai tumin ka theihtawpin ka in nuaia..Mahse, awmzia engmah awmzia a awm lo..Ka sam atangin tui a far tluah tluaha,atthlak lutukin ka mittui a rawn tlaa,thinrim zetin ka hru tawk bawk.Engvangin nge ka tah ngawt ang? Ka laka ngaihtuahna thianghlim pu ngai miah lo tu khan ka mittui a phu hek lo…Ni e,a phu ngai lo ang.Vawi tamtak ka inhrilh nawn tawh bawk.Mahse, ka mittuite hian  min phatsan tum a thleng leh nge nge zel chu anih hi a!!!

Muhil thei loin ka let tawn seka,ka mit ka chhin apiangin ka mitthlaah Ramsey a lang nghal zel bawk.’ Pasal nei lo a Nau pai chungin eng Company mahin an chhawr dawn lo che,chuvangin i that’ ka bengah a rawn ri nawn leh a.Ka thuchhuak ta nge nge.

Engtin nge khatiang zawng khan a lo ngaih theih zawk? Ka mitthlaah nau ka chhiat zan a lo lang iar iara,nimin ang maiin a la chiang vek.Ka chhungril a vawt rawih rawihin ka hre bawk.Ka thih teuh zia kha…Theih se chuan ka naute humhim nan khan ka nunna pawh ka chan huam ang.Mahse, mihring la ni loin thisen hlawm mai a ni a,hnaah ka hah avang leh ka mutthat bawk si loh vangin ka chhiat niin Doctor khan a sawi a.Kha erawh kei leh Savio chauhin kan hre thung.

Ka harh lehin khua a lo eng at tawh.Puan pawh sin loin ka lo muhil anih hmel.Nizan khan khua a lum bawk nen tukverh khar loin ka mu a.Curtain ka zar thung.Thli thawin  a chhem len dar dar chu ka thlira,nizana thil thlengte kha ka ngaihtuaha,ka mumang ni se ka ti ngawih ngawih.Mahse, a ni der si lo.

‘Tetea a lo haw dawna,a damtha vak lo bawk a’ Ka pain chawei laiin a ti a.

‘A dam lo tihna mi?” ka ti satliah.

‘Aw,a kal tha lo a chhuak aniang.Naktukah i nu nen kan zuk chhuk law law anga, kei hi ka in check-up a hun tawh bawka’ a ti leh a.

‘A tha alawm’ ka ti awlsam leh mai.

‘Nia,Thanga a awm tho a,Dawr chu a lo enkawl thei vek tho.’ A ti tha ve mai.

‘Hna hi i thawk kher atin lawm le,enkawl mai la tha tur ania’ Nu Hming’n a ti a.Ka thil ei ka chawla,ka nui sak mai.A rilru ni miah lo a sawi peih hi a fakawm thlawt.

‘Ka tui zawng a ni lo..Ka hmanhmawh deuha,ka kal dawn ania’ tih pahin ka tho nghal daih bawk.

Office ka thlenin Mimi a lo thleng tawh.Min rawn hmu a,a ban a rawn vai zauh,ka vai let ve bawk.Nimin tlaia ka thawh zawh tak loh thawh tumin ka inpuahchah nghal a.Chawhnu lamah Sawrkar dept lam nen tunlai Oil vang leh mipui duhkhawp awm lo chungchang meeting kan nei dawna,mahse Rza a awm avangin Rza emaw Ronny an kal ka ring thung.Kal turin min ti se chuan nimin khan min hrilh tawh ngei ang.

Ka phone a ri kauh.Ka en a,Mimi..A thutna lam ka va hawia,a phone a kawk zauh.Ka phone ka lakanga,msg a lo awm vang.Ka open a.Ka beisei loh lutukin Ronny nen kan photo a lo ni a.Ka thaw hak mai.Nizan khan theihtawpin thlalak duh loin ka inveng kha ania.Engtiklaiin nge an lo lak hman ka hre lo.

‘Lunch ei hunah ka sawifiah dawn nia’ tih ka thawn let a.A seen nangin min reply lo thung.

‘Zorin..Ka hawichhuak vat.Rza a lo ding reng.

‘Aw..’ ka ti sap.

‘Boss hi a lo kal dawn lo a,a nuam vak lo a.Meeting kha kan pahnihin kan kal mai dawn mi niang?” a ti a.

‘A dam lo maw? Enge na a?” ka ti vat.

‘Ka hre lo,I hre zawk ang chu ka tia’ a nui a..Ka thle bak mai.

‘Sorry,ka uang anih kha…Tak takin a khua a sik aniang.Tunlai chu a leng nasa alawm’nuam lo tih hmel zetin a ti leh vat.

‘Um,anih chu..A zia lo hle mai..’

‘Nia,zia lo…I lo kal ve dawn em?” a ti leh a.

‘Enteh, I kal hreh viau loh chuan hna zawh ngei ngei ngai ka nei a..A thar tur ho Work order ania’ tih pahin ka bula Paper intiang arh ka kawk zauh.

‘Naaa,a va ho tak..Kha thil lah kha a hmanhmawhthlak si’ a ti nang nang mai.

‘Nia,Mimi sawm la…Chhuah thawven a mamawh maithei sin’ tlawn aw titihin ka ti a.A nui ta var var.

‘Tha lutuk,ka va sawm teh ang’ a ti a,Ka chhan let pawh nghak loin Mimi lam panin a kal zui chu a ni der.

Lunch ei tura Mimi-in min lo sawm hma chu ka thawk zawm ta char char.Ka tih zawh sa ka save a,Mimi nen Canteen pan turin kan inzui thlaa.Ka tiffin ka khai bawk.Nidang ang bawkin a ti ti siam siam bawk.Kan inzui luta,staff dang an lo awm nual tawh.Kan luh veleh thil dik lo awm ang maiin a reh nghal thap bawk.Kan thutna thin Dawhkan kan pan duna,kan thut hnuah an titi leh ta mam mam.

‘Ka hmaiah hian eng nge dik lo awm?” Mimi hnenah ka ti sa sa.

‘Enga? ‘ a ti hlak.

‘Ka hmai hi en la..Eng nge dik lo awm? Thil a kai ami?” ka ti nawn leh a.

‘Aih,engmah a kai lo…’ a tit ha ve mai.

‘Ka hria alawm.Mahse, kan luh veleh an reh deuh diak sia.Ka hmaiah thil a kai amawni ka ti a’ ka nui hak mai.

‘Teh nang a..I hmai lamah ni loin Photo ka lo thawn zawk che kha’ a ti leh a.Ka hrethiam ta chauh.

‘Aaah,kha thil kha a…’ ka ti sap mai.

‘Nizana kan tihtur i thulh leh chhan kha a ni em?” a ti nghauh.

‘Aw…Diktak chuan nimin piah khan min hrilh tawha,nimin khan ka lo theihnghilh daih a’ nuam ti lo ru zetin ka che sek.

‘A tha lawm..’ a ti nghauh.

‘Nia,mahse..Tu Party nge I hria em?” ka ti a.A lu a thing na na..

‘Photo kha i hmu maw ka tia?”

‘Hmu e..Mahse,engmah Captionah an ziak hleinem..’ a ti ve thung.

‘Agnes-i birthday ania..Min sawm alawm.Boss thiantha tak ania..’ ka ti a.A mengphawk ngang mai.

‘Nangmah kher ngatinge?”

‘Shh…Boss hian engmah a hre lo.Agnes-i erawh chuan enge min sawm chhan ka hre lo’ ka ti leh sap.

‘Thinrim lo la,a bialnu emaw a ti che a ni thei angem?” a ti zawi sap.

‘Maithei..Hmanzanah Restaurantah kan inhmu alawm.Pu Maduha te nupa nen kan inhmuh tum khan tihpalh thilthuin kan inhmu a.Ih…Diktak chuan Ramsey a lo awm ve a,ani khan Agnes-i hnenah Boss bialnu angin min sawia’ ka tita duah.

‘A va mak tehnuaih ve’ a ti chhuak halh mai.

‘Nia,sawifiah chiam ai chuan ni anga awm mai kha tha ka tia…’ ka thensak.

‘Um..Nia,a dik ang..Mahse, nimin bak kha Ramsey nen in inhmu tih i sawi si lo a’ a ti leh a.

‘Tihpalh thil ania,bakah min ngaihtuah ka hlau alawm’ ka ti sap..

‘Ngaihtuah ngei ang,nizan pawh khan Ramsey nen chhuna in inhmuh vanga mood thlakah che ka ngaia,chuvang ania ka zawh loh che.Mahse, tukin photo ka hmu a,engmah ka hrechiang bawk si lo a,ka sa pap pap viau ania..Mahse, lungngai suh..Ka thinrim lo ania’ ka kut rawn vawn zauh pahin a ti duah..

Dar nga velah Office ka chhuahsana,Mimi erawh haw hma a duh avangin a haw tawh thung.Scooty dahna ka pan laiin ka phone a ri a.Ka en vat.Apuia a lo ni a.Nui sak chungin ka pick nghal vat.

‘Puia,eng nge?” Hello pawh ti loin ka ti zangkhai vah.

‘Damdawiinah lo kal rawh,Savio leh Chhuantea an Accident ania’ thlaphan hmel zetin a rawn ti a.Min thawng lutuk..

‘Maw? I uang em?” ka ti that mai.

‘Uan na chi a ni mi? Ebenezerah lo kal vat rawh’ a ti leh tuar.A manganzia a awah haider theih a ni lo..

‘Lawk…An na viau em?” ka ti leh a.Ka tiril a khur titih bawk.

‘Chhuantea a chu a harh.Savio a harh lo thung a…Mahse…’ a tawng zawm mawlh mawlh,eng nge a sawi ka hre miah lo thung…

‘Ni lo,Savio…’ ka ti chhuak sap mai..