22/AUGUST- BOOK- 1

CHAPTER- 1-10

 22/AUGUST

Maengi Ralte

CHAPTER-1

‘Khawnge i kal dawn? I pain chhuak suh a tih che kha’ tawngri ka hriat rualin ka ding chat.

Muangchangin ka hawileta,nu lian leh zahawm tak,hmelthat bakah inchei fel thlap mai chu ka hmachhawn ta siah,mitah tak ka ena,a mitmeng lian leh mi melh na zetah chuan ka pa awmloh laia a lantir fo thin,min huatna chiang takin a lang theia,mahse a hmeltha takah erawh nui hmel a lang thung.A hmelthatna chanve tal hi a rilru lamah thatna han nei phei se chuan mite hian an sawi dik nimai tur.

Kohhran upa nupui tur apiang,nu fel leh zahawm tak anih mai bakah a pasal rawngbawlna a backup tha em ema,a pasal fa hmasa,hmeichhe awm duhdah leh luhlul em em mai pawh ama hrin ang maiin a enkawl theia,a fakawm takzet an ti thin tak e.Ka ngaihtuahna avangin ka inrin hmain ka nui chhuak hak mai,a then ve sak,mahse a mitmeng vawt zual sauh chu ka hmuh hmaih chuang lo.

‘Enge nuihzat tur awm a? sawi la,keipawh ka nui ve duh alawm’ a then leh sak,mahse a thinrim poh leh a hmelah nui hmel a lang nasaa,a awki a dam thlap zel bawk tih hre turin kan cheng dun rei tawk tawh.

Ka thle bak,chhang loin chahbi dahna lam ka pan ta zawk.Mahse, ka zawn ka hmu tlat lo.

‘I chahbi i zawng anih chuan i pain a keng..’ ka khawng nghal lah mai.

‘Chhuak lo la a tha zawk ang,tuntum chu i pa thinrim i tuar zo lo ang’ min ngaihtuah tak tak niawm fahranin a ti leh a.Hre thang lo tan chuan min ngaihtuah emaw tih mai tur a ni.Mahse, kei chuan a sawi paha min deusawhna ri ka hre tel thei tlat thung.

Muangchangin ka inher leha,a mitah tak ka en leh nghal ngar bawk,keiin ka huatna aia nasa zawkin min hua tih a mitmeng lian zetah ka hmu nghal leh chat.Mahse, he mimtmeng hi chu ka pa awm lohlai chauhin a nei thin tlat thung.In melh hian thih theih se chuan ka kalsawn tawh lo vang,Ni lo..Ka pa nen an inneih hnu kumkhatah khan ka thi tawh zawk ang.Melh satliaha ka thi thei lo hi vannei tak ka ni ta ve ang.

‘Vawikhat chauh chu thu awih ve teh,I pa pawh hi i khawngaih ve lo emawni?”amah bawkin a ti leh a.Ka then sak.

‘Ka hua che..’ abak engmah sawi tur ka hre lo. A hmeltha zetah nui hmel a la lang ta tho.

‘Min hua pawh nila pawi ka ti hleinem,eng ang pawn min hua la kei chuan uirein ka tlanbosan ve hleinem che..’ vawi tamtak ka nu chungchang a sawi hi hre tawh mah ila ngaiah ka nei thei chuang lo.Engpawh chu lo ti se a thih tawh hnuah lehzel nuam ti taka a sawi ziah hi ka ngaithei hek lo.

‘Ka hua che,ka haw hluah hluah che..’ ka aw a khur dar dar bawk.

‘Damdawi i duh anih chuan nitin i mamawh zat ka pe ang che,mipa i duh anih pawn ka ko mai ang,call boy ka hria ania,mahse Inah awm rawh.Nangmah vanga chhungkua kan hlim lo hi ka hne lutuk tawh’ nghet charhin a ti leh a,rapthlak ti lutukin ka melh tlawk tlawk ringawt.

‘Ka hua che…’ ka ti leh that.Min chhan let pawh nghak loin kawngkhar ka pana,ka nem hawnga,na lutukin ka khar leh thuai bawk.

Pan lam tur hre loin ka ding leh rih a,ka hawi kuala,Veranda thim lam ka pana.Khaw awmdan leh ka mood chhe lutuk a inmil lam mah mah.Ruah a sur buan  buana,a khat tawkin kawl a phe zawr zawra,khawpui a ri dur dur bawk.Ka kekawr ipte ka zena,ka phone ka lachhuaka,Battery lah chu a..20% chiah,charger lah ka kengchhuak lo zui.

‘Eng nge?” Hello pawh ti loin a rawn ti nghal thawr.

‘Min lo hruai teh’ ka ti tawi tak.

‘Khawiah? I car a chhe leh tawh mi?”

‘Aih..Lo kal phawt mai teh,ka phone a thi tep ania..’ ka ti leh nghat.

‘Ok,ok..khawiah nge ka lo hruai ang che?’  a rawn ti leh a.

‘Kan in bulah ka lo awm ang,waiting shedah khan..Chuan,charger ka mamawh ania’ ka ti a.

‘Um,ka rei lo ang’

‘Bye’

Ka kekawr ipteah ka phone ka thun leha,ka Jacket ka hlipa,ka khuma.Helaiah hian ka ding reng ngawt thei lo,Ka pa a lo haw thut thei,chumai bakah ka nuhrawn nasa zetin min hmuh ka duh bau lo.

Kan in leh Waiting shed inkar hi minute 5 kal vel lek a ni chungin ka huh nasa hman viau tho mai.Ka theih ang angin ka in hru hula,vawt tih vangin ka khur hlak hlak bawk.Current a awm loh avangin khawlai a thim thuap bawk.Mahse, pawi ka ti lo zawk.He vengah hian tuman mi pangngai enin min en lova,engpawh ti ila an sawi duh tawk a tling zel tho.Tihian tuman min hmu thei lo anga,a tha zawk.

Motor horn ri thatah ka hawichhuaka,a lo thleng der tawh.Ka Jacket ka khum leha,ka tlan phei a,ka thu lut rawk rawk mai.

‘Kha…inhru hul rawh’ tih pahin Towel zangkhai leh nem tha fe min pea,ka inhru nghal mawlh mawlh.

‘Kan kal thei em?’

‘Um…’

‘Khawiah?”

‘Ka hre lo.Tlanchhuak tawp phawt mai rawh,helai hlat thei ang berah hian awm ka duh’

‘Kan inah  kal phawt ang’

‘Aih,ka duh lo.A aia hlaah,keimah chauha ka awm theihna tur’

‘Kan inah pawh tumah an awm chuang hleinem,naktukah an lo haw dawn chauha’ a ti leh a.

‘Ka duh chuang lo…Tlanchhuak phawt mai teh’ ka ti sap.Seat hnunglam ka nghenga,ka mit ka chhing nghal hmiah bawk.

‘Enteh…’ a ti leh a.

‘Min be lo teh,I duh duhna hmunah min hruai tawp mai rawh’ ka ti nghat.

‘Um..’ lungawi vak lo ri ka hrethei,mahse ka hrechianga,a thinrim rei dawn chuang lo tih ka hria.

High School kan kal lai atangin kan inkawma,kan inkawm tan dan erawh a chhuanawm fahran lo,ka thiannu bialpa a ni a, a lo kawp a,thiante chhan tina tak ka lo ni kher bawk nen kan inhnial thinrima,insualah ka cho zui bawk..Ka ngaihtuah zawngin ka then sak..Tunah chuan ka thiantha ber leh ka engkim a ni ta thung.College kan kal duna,chhungkaw nuamsa pangngai tak atanga seilian ve ve kan ni a,sumah kan buai lo.A u hmeichhiain pasal a nei tawha,amah chauh a ni a,kei ang bawkin a khat tawka zuin mai ching ve bawk leh Kohhran ngaihsak lem lo ve tak bawk a ni a.Mahse, kei angin a chhungten hnawksak an ti ngai lo.

Vawi tamtak an inah ka riak tawha,ka chhungte nen kan in tih thinrim tum apianga ka tlan tauhna hmun a ni mah zawk.Ka nu lama ka pi leh pute in lamah ka kal tam viau,ka pa lamah erawh chuan ka nutei’n min mil thak lo.Ka kal ngai mang lo.Savio mai bakah kan thian mipa dangte nen Zan rei tak tak thleng kan chhuak ho fo va,Party lah kan kal tam na ngiang,mahse kan pahniha nuam kan tih ber zawk chu Motor chhunga thuta, Music ring taka play paha muthilh a ni daih lawi.

Lehkhathiam thei pangngai tak ka ni a, MA ka zawh hnuah engmah tih nei loin ka tei mai mai,sumdawng chhungkua kan ni a,Aizawl lunlaiah Dawr hlun leh muk tak,lian zet kan neia,ka pa leh ka nuhrawnin an nghak nitin,ka nau te pahnih phaiah an awm ve ve a,kei ang lo takin Kohhran leh khawngtlangah sawisel an kai ve lo.Mahse, keiin ka hrechiang thung,sawi vak ngai ka ti lova ka sawi lo mai zawk.An la hre ve mai ang chu.Ka pain vawi engzat nge kut min thlak ka hreseng tawh lo.Kut min thlak tum apianga min chhan tu chu ka nuhrawn a ni a,mahse ka huat ber erawh amah tho.Engvanga min hua nge tih vawi tamtak ka ngaihtuah thina,a chhanna erawh chuan ka nun a nghawnga, aniin min huat letin ka haw ve ta bawk.Tleirawl harhvang leh thian kawm nuamti tak,Sport lama tui em em bawk kha Hmeichhe awm duhdah leh nun ho lutukah ka chhuak ta hlauh bawk.

That tumna ka nei lova, ka zan lenchhuah lah sim ka tum hek lo.Inah ka leng lova,thudik inthup,ka hriattirh atanga ka theihnghilh leh ngai tak si loh vangin ka chauva,chu ai chuan pawn lama hlimna zawn nuam ka ti zawk.Beer atangin Zu pangngaiah ka kai chhoa,mahse Damdawi kher hi chu tih ka tum lo bawka,ka la ti ngai lo.Ka chanchin sawi tu te erawh chuan  ‘Drug Addict’ tiin min sawi tih ka hre ru kar.Pawi ka ti lem hlei lo a.Ngaihzawng neih tumna ka la nei ngai lo,min duhtu an awm mahna,mahse ka ngaihven lo hrim hrim,thian atan mipa deuh vek ka kawma,ka naupan lai thian hmeichhia pakhat chauh lo chu thian tak tak atan mipa vek ka nei.Savio hi ka bialpa niin an ngai vek,pawi kan ti lo ve ve,kan inzawmna hi inngaihzawnna lam thil a ni lo tih kan pahnihin kan hriaa,kan duh tawk mai.

‘Kan thleng e’ Motor a din rualin a ti chhuak nghal halh.

Ka mengchhuaka,Motor lightin a en chin bak engmah hmuh theih a ni lo.Ruah lah ban a hnekin a tam tual tual emaw tihmai tur a ni bawk.

‘Khawnge kan awm a?”thut mar pahin ka ti a.Ka ngaihtuahna kawmin ka mit ka chhing tlata,kan kalna lam reng reng ka hre lo.

‘Ka cousin Farm Houseah..’

‘Enga?” ka ti ha,ka hawi kuala,engmah ka hmu thei chuang hlei lo a.

‘I riak thei ang..Vawiinah azin chhuaka,karlehah chauh a lo haw dawn’ a ti leh a.

‘Ramsey  i tihna a ni em lo vang chu tiraw?” ka ti hmak.

‘Aahh,ni chiang..Dik lo a awm tihna mi?”

‘Aih,awm lo…mahse…’ ka ngawi leh daih.

‘A lo kal lo ang,in inngaina lem lo tih te zawng ka hre ve bawk ania,awmse hetah ka hruai nang che’ a nui hak hak.

A hmel ka mitthlaah a lo langa,Pa lian lam,ngo tehchiam lo,ngeng leh induhtawk zet a ni a,a pian a nalha,a chhuang in ka hre fo bawk.Fanu,kum 5 mi a neia,a nu ka hre lo.Savio ka zawh tumin a hriat loh thuin min chhang awlsam et.Ka zawt nawn leh ta lo.Savio nen kan inkawm rei tawha,a chhungte hriat loh ka nei mang tawh lo.An vaiin an fel em em vek ti ila Ramsey tel loin ka tihna zawk.An chhungkaw ho Colony khatah an awm vek. Ramsey-a pa hi Savio pa te unau zinga upa ber a ni a,an chhungkaw hoah dinhmun pawimawh tak an family hian an chelh bawk.Savio pa PWDah EE a ni a,a Patea Doctor a ni thung.Ramsey pa erawh Contractor a ni a,Motor company lian leh hlun tak nen inthlun zawmin Aizawl hmar lamah Showroom lian leh changtlung em em an neia,Ramsey-an a enkawl thung.An Cousin mipaah a upa ber a ni a,an Cousin ho hian sap hming Common lo zet zet an nei vek bawk,ka pa ngaihsan loh zawng tak a ni a,keipawn ka pa ngaihdan ang chiah hi ngaihdan ka nei ve tlat bawk.

Saviote unau leh a Patea fate zingah pawh Ramsey aia thunei an awm chuang lo.U nih a lo tlin viau pawh a ni mahna le.Mahse, kei hi chuan tihtakzetin ka mil lo bur thung.Vawi tamtak Savio te inah ka kal a,an chhungkaw thil tihnaah ka kal fo bawk.Chutichung chuan vawikhat bak min biak awm ka la hre lo.Chu pawh loh theih loh vangin min be tawk.Ka ngaina lo hlawm tawp.A nelawm lo em em ti dawn ila a fanu bula a awmdan erawh a dang daih thung.

‘Chhuk ila..’ a ti leh a.

Ka chhanna pawh nghak chuang loin kawngkhar a hawnga,a tlanchhuaka,ka thaw hak mai.Thlan tur dang a awm chuang lo.Hetah ka riak duh lo anih chuan Hotel khawimaw laiah ka riah tho tho angai ang,ka ATM  card lah hman theih lohin ka Pain a block tir vek zui a..Hrep tak hian a..

Kawgkhar a hawng rak rak,kei erawh vawt tiin ka inkuah khawr hlan thung.A hawnga,light a on a,a eng ta iar.Living room te fel rawn rawn chu ka en kuala,a fel fai thlap.Engemaw ti takin mi a hip riau bawk.

‘I hlau angem?” min rawn en pahin a ti a.

‘Ka ring lem lo’ ka ti sapa,a then sak thung.Min hrechiang lutuk,hlauh ka nei lo lutuk hi min hau fo zawk.

‘Ok..a tha..tak takin saw lai lawkah sawn in a awm,minute 10 vel kal aniang..Bakah In hi a him tawk viau,chuan thil i ei tawh em?” a ti leha,Chairah a thu thla hnak bawk.

‘Ei tawh..Enteh,ka thawmhnaw huh hi..Tah hian hmeichhia an kal ngai em?” ka ti a.

‘Ka hre miah lo.Diktak chuan Mama ta bik ania,tukinah chahbi kan inah a theihnghilh a,chuti ni lo se ka hruai thei teuh lo mai che’ a ti ta duah.A sawi hrethiamin ka bu nghauh.

‘Diktak chuan ka duh ka dil apiang min pe vek zela,mahse helai hmun kher hi chu a mimal pual bik ngawih ngawih ania,kal chu ka kal zauh zauh nain riah nana dil enah ka en ngai lo.Kei chauh ni lo kan vaiin’ a ti leh a.

‘Ka hrethiam alawm,khatiang Ramhuai kha tunge a phal chin bak pel duh anga?” ka ti nghat.Za lo zetin a nui then nak.

‘Fimkhur teh,I mil lo viau anih pawn ka u a ni tih hrereng la,chu pawh u zawng zawnga tha ber’

‘Sorry…’ ka ti sap.A nui hak thung.

‘Thawmhnaw thlakna tur a awm em enchhin ila…’ tih pahin a rawn tho a.A hnung lama Room kawngkhar a hawnga,ka zui lut ve a.Ka hawi kuala,Mipa room a ni tih a chiang ngawih ngawih,a neitupa ang maia cool raih niin ka hre ber.Khum lian vak lo a awma,Bed Cover hring duk zetin a inkhuh fel thlap.Thinga siam dawhkan leh Chair pakhat ve ve a awma,Lehkhabu a chhiar thin tih hriat zetin Lehkhabu chhah fe fe a inrem that bawk.Thawmhnaw dahna tur wardrobe lian vak lo a awm tela,abak bungrua engmah a awm lo.

Thawmhnaw dahna a hawnga,a rawn hawi leta.

‘Kan ring dik nge dik lo ni ang aw?’ a nui hak hak mai.

‘Eng chu maw?” ka ti ve thung.

‘Rawn en la,I hak mai theih tur chi a awm leh awm loh te…’ a chek zui tlak tlak bawk.

Ka kal hnaia,a thawmhnaw dahna ka en a,Mipa thawmhnaw a awm that.

‘Ka ha thei mai ang..Diktak chuan Hmeichhe thawmhnaw hlir a inkhai ka ring ania’ ka ti sap.

‘Kan in ang…mahse a awm lo hlauh,a bialnu a hruai ngai lo ti dawn ila ka awih chiah lo..’

‘Kei pek…’ ka ti ve leh sap.A bialnu,Mizo Designer zinga thleng sar ber tihngam leh mizoin kan  neih that ber pawl ka mitthlaah a lo langa,an inhmeh zia haider luih chi rual a ni lo.

‘Ok,anih chuan naktuk zingah ka lo kal anga,eitur vel ka rawn dah dawn nia..Chuan,living room sirah khan Kitchen a awma,he room hian kha lamah khan bathroom a nei hran bawk aw’ a ti leh a.Ka bu nghauh.Kawngkhar lamah ka zui pheia.

‘I hlau lo tak tak ang maw?” kal mai loin a ti leh rih.

‘Hlau lo ang,min ngaihtuah suh..’

‘Um,phone off suh ang che’

‘Ok..Boss..’

‘Mangtha le..’

‘Mangtha..’ ka ti sep..Awm lo se engtiang takin nge ka nun hi a buai thin ang ka ngaihtuah peih lo law law.

Ramsey thawmhnaw ka keu dan dana,ka tan chuan a lian lutuk vek,T-shirt zinga ate ber ka lachhuaka, ka inthawlha,ka mal chanve a khuh phak thelh tho.Ruah a la sur bur bura,inchung rangva a ni bawk nen a thawm a na ngang mai bawk.Ka mu ta than.Muthilh tumin ka mit ka chhinga, naktuk ngaihtuah ka peih lo.Khua a var anga ka awmdan tur a lang chawp leh mai ang.

Ka inlet mai dawna,engemaw rit zetin min delh beh avangin ka inlet mai thei lo.Ka mut ngaiin ka mu ren rawn.Ka mumang zawk nge ka hrethiam lo.Ka mengchhuaka,ka awmna ka hai thelh,mahse nizan lam thilthleng ka mitthlaah a lo lang nghal zut zut.Ruah a la sur ta cheu,nizana asur kha a la inzawm ta reng nge ka hre lo.A rik danah a tam hmel viau bawk.

Ka tho mai dawna,mahse ka kawngah tuemawin a kuaha,ka malah min khan bet tlat tak tak.Ka mumang a ni tawp lo mai.Mahse, tu nge ni ang? Nizanah khan Savio a rawn let leh tihna a ni angem?Lo let leh pawh nise ka bulah a mu ngawt lo tawp ang.Ka kawng a kuahna ban laksawn tumin ka vuan de de a.A che hrut.

‘Awm hle hle teh,ka chau hle ania’ Mipa awin a ti sup.Ni lo,Savio khan a zinchhuak a tih kha..Mahse, tunah ka bulah a mu mek lawi si,thlarau lah a ni der si lo.

‘Ramsey..’ ka aw a ri chang chang.

‘Yeap,keimah Ramsey,Savio ni loin..’ a ti thawp sut..

‘Nang…I zin a ni lawmni?” adang sawi tur ka hre lo..

‘Zin lo chu nih hi..Bakah tunah phei chuan Khum hi kalsan ka tum miah lo,nuam ka ti thar riau ania..’ a nui hawk bawk.Kei erawh ka mut ngaiin ka mu ngil at ringawt.

Chapter- 2

Ka hamhaih lutuk,mahse rei a ni lo.Ka che phat,rang lutukin a ban ka paih sawn lawpa,khum atanga chhuk tumin ka letsawn nghal vat bawk,mahse ka tlai ta tho.Khum atanga ka chhuk hmain ka kawngah a rawn mana,hneh zetin min hnuk let lawp,ka rak thawt.Mahse, ngaipawimawh lo zetin min nem beta,min rawn delh a,a mal sei thlurhin min khan bet nghal hmiah.

‘Enge i hriat a?” ka ti tuar.Hlauh lam a lang eih lo.

‘Eng lem mah,awm hle hle mai teh’ a ti hmuk.

‘I zak lo lutuk,min thlah vat rawh’ ka ti leh that,ka talh leh ngheka,mahse a hma aia nasa zawkin min rawn delha,a lian bawk si.Rit tak a ni ringawt.

‘Te chiam chiam kher angai lo ania,diktak chuan tu nge i nih ka hai lo..’a ti leh sup.

‘Mi tenawmpa,tho vat rawh..Ks emaw min ti ami?” ka ti leh nghek,a then suk duh chauh.Ka ban pahnih chung lamah a nem beta,a hmer kawp tlat.Ka mal lah a pahnihin a kherh bet tlat bawk.Chet ngaihna lam a awm lo.

‘KS a? ahh…ni nang,Savio duatlai hi engtiang taka zei nge en ka chak deuh mai mai mawle’ a mit a siai zauh bawk.Ka hriat thin Ramsey kha a ang lo,a hmel ngeng zet kha a awm tlat lo.

‘Min pawngsual i tih tum ka sawi darh chuan i chak lo khawp ang,tho vat rawh’

‘Pawngsual anih leh nih loh kan enchhin dawn em?” a ti sup.

A sawi awmzia ka hriat takah chuan hlauhna vangin ka tiril a khur ru dar dar mai.Diktak chuan engang pawn duh lo mah ila tun dinhmunah chuan han tih leh vak ngaihna a awm chuang lo.Pakhat leh pakhatah hmanraw telloin a in pawngsual ngawt theih loh tih hi ka ngaihdan a ni thina,mahse a lo theih dawn lutuk tlat.

‘Ok…ka uang anih kha,engvangin nge mipain an kawih leh mai mai nen  inzawmna ka siam ngawt duh ang?’ min thlaha,a tho chhuak nghal zat bawk.Kei erawh a thusawi khan min thawng lutuka,chet leh mai nachang hre loin ka mut ngaiin ka mu hle hle ringawt.Mi min hmuh dan leh sawi dan hi ka lo care ngai lova,mahse hmaichhanah em chuan na ka lo ti ve tih ka chiang ta viau bawk.

Room kawngkhar a khar rualin ka thuchhuaka,ka phone charge ka pan nghal rawk rawk.Savio ka calla,a la pick mai thei lo zui.Ka thinrim hlur ringawt,ka call nawn leh a.A pick ta hram.

‘Hello…’ mutchhuak aw zetin a rawn ti tham tuak.

‘Hmela..tho la,min rawn hruai vat rawh’ ka au ring ngam lo.

‘Enga? Ka la mu..Bakah ruah a sur nasat em hi..’ a rawn ti awlsam et.

‘Tho ringawt rawh,hetah Ramsey-a a awm ania’ kawngkhar lam ka en a..Ka au ngam bawk si lo nen ka ipik chuah chuah a ni ber.

‘Maw?! Mama a lo kal i ti ami?” a harhchian hmel ta viau e.Ka thaw hak,kei ang bawkin a thawng ve tho tih a chiang reng.

‘Kal..nizanah ka mut laiin a lo luta,zingah ka hre chauha’ ka ti leh hmawk hmawk.

‘Lawk,in mu dun tihna mi?”

‘Lalremkim,chu chu a pawimawh lo..’ ka tum aiin ka au ring hret,ka hmui ka hup nghal vat bawk.Mahse, ruahsur in inchung a nan rik bawrh bawrh chuan ka tawng a hre lo vang tih ka ngaihtuah chhuak leh lawi.Kawngka lam ka pan pheia,tim daiin handle ka vuana,ka pawt hawng de de a,tumah an awm lo.Ka thaw huai mai.Khum lam panin ka pheia,khum bulah ka ding leh rih.

‘Zorinzual ’

‘Aw….’ Min hretu zawng zawngin ‘Zorin’ tih emaw ‘Tete’ ti a min koh laiin ani hi chuan ka hmingpum hian min ko ziah thung.

‘Ka tawng i hre lo mi?”

‘Enge ka hriat loh anga?”

‘Eh..i ngawi daih sia…’

‘Ka ngawi lo..engmah i sawi hleinem,rawn hmanhmawh teh’ ka ti hlak.

‘Ok..ok,Mama ka lo call hmasa phawt ang…’

‘Call angai lo,lo kal la animai’

‘Ka lo kal ang,mahse lo kal hmain call angai alawm’ a ti ta tlat.Engvanga han hlau em em nge maw anih hrep le?

‘I duh duh chu ti maiteh,mahse rawn thlawkchhuak rawh,chu chu a ni tawp mai’

‘Um…’

Ka off a,thinrim lutukin khumah ka thehthla thak,ka kawng ka dawma,a zin chhung chu hetah ka cheng ang tih nak laiin ka beiseina a thamral nghal chu ania,ka thinrim ru teuha,awmzia lah a awm der lo.

‘I duh angin tih a tum meuh na nge?”ka hnunglam atangin a rawn ti thuta,ka phu nasa lutuk,ka zuang zawk lo chauh bawk.A lo kal thawm ka hre eih lo.Ruah sur thawm vang vek.

Muangchangin ka inhera,ka chhungrila nuam lo tihna thup tumin  ka inkuangkuah fel than bawk.Kawngkhar biang nghengin a dinga,uluk zetin min en run bawk,a hmelah enge a ngaihtuah ang ka hrethiam lo.A thinrim hmel lova,lawm hmel emaw nuihza hmel pawh a pu chuang lo.A kekawr ipte a kut lehlamin a zena,a kut lehlamin no a kenga,Coffee a in tih hriat zetin a rimin ka hnar a verh nghal zak,ka riltam a ti tam nghal raih raih mai.

‘I phalna la hmasa lova helaia Savio-an min riahtir vangin thupha ka chawi e.Mahse,Savio thiam loh a ni lo ania’ ka ti chhuak ta nge nge.Khatiang khawp khan Savio khan a hlaua,ka thiam loh a ni tih ka sawi a tul niin ka hriaa,ka sawi a ni ber.Diktak chuan inthiam lohna em em engmah ka nei chuang lo.

‘Chuan…?” a ti liam puat,a thle buk bawk.A ngawipawimawh lo hmel lutuk chuan min ti hrilhhai letling zawk mah.

‘Diktak chuan eng emaw Problem ka nei a…Oh…’ a thil en ka hmuh takah chuan ka ti  ta sap.

Ka kawr hak a tawi lutuk..A mit thim raihin a enna lai apiang a mur ar arin ka hre hial bawk.Tiang hian tu mipa bulah mah ka la awm ngai lo.Hreptak hian…Nichin te khan lo ngaihtuah chhuah ve awm tak..

‘I problem chu eng maw?” a then suk.

‘Min hrethiam la,ka inthlak duh a..’

‘Ka thawmhnaw dahnaah khan hak tur a awm ang,mahse a lian hret maithei..’ ka beisei loh zetin a ti tha ve mai.

‘Aih,ka thawmhnaw a awm a..’

‘Ok,a huh i hak peih dawn phawt te chuan…’ a inhera,a chhuak zui nghal vut.Ka va han ngei ngawih ngawih tak.

Ka thawmhnaw la turin Living roomah ka kal angai,anih chuan amah beiseia umzui emaw min ti maithei,min hmuh dan lah a chiang,min ngaisang lo satliah pawh ni loin hmeichhe tawp lutuk angin min hmu anih kha.Tihngaihna dang a awm chuang lo.Nizan khan zar chu ka zar pharh ve ngeia,mahse ruah sur tam lutuk vangin khua a vawta,boruak a hnawng bawk nen ro hman ngaihna a awm lo.Hreh zetin a thawmhnaw dahna lam ka pan ta nge nge.Pyjama ka lachhuaka,a sei lutuk..

Living roomah ka kal ang nge kal lo vang tih ka ngaihtuaha,Savio lo thlen hma chu rooma tawm ngat ngat ka duh zawk.Mahse, a lo lut leh thut thei reng.A ngaihtuahna tenawm zetah khan ka sawm emaw a lo tih leh vaih chuan…Ka lu ka thing nawk ringawt.

Khumah ka thu ren rawn,ka rin lawk ang ngeiin ka chhungte tuman min rawn be lo.Ka vawikhat riahchhuahna a ni lova,an demawm hek loh.Ka pa hmel ka mitthlaah fiah zetin a rawn langa,keimah vanga a rilru hah thin zia ka hai miah lo.Ka nu awm loh hnu leh ka nuhrawn nen an inneih hma kum thum lai amah chauhin min enkawla,duat lah min duat.Ka nuhrawn pawn ka pa rilru a hai lo,a awm laiin min ngaithei lo ngam hek lo.

Pawl sawmpahnih ka zir laiin Motor khalh ka thiam tawha,B.A ka zawh kumin Ka pain Car thar a leia,kan neihsa kan hralh chuang lo,ka khalh thiam tho avangin ka pualin a dah ta law law.Pawisa,thawmhnaw leh thildang pawh ka dil anih chuan min pek loh a nei ngai lo,mahse ka chhungril ruak leh sual kawng ka zawh tak chhan erawh hriat tumna a nei ngai lo hi mak ka ti a,min siamthat tumin vawi tamtak kut pawh min thlak ta.Ka chhang let ngai lo va,ka tuar mawl tawp ziah,ka rilru ka siamfel tawh miau avangin that tumna ka nei ngai miah lo thung.Engvangin nge ka nu uire miah lo kha uire anga chhuah tir anih ka ngaihtuah apiangin ka nuhrawn ka huatna leh ka pa ka huatna a inzat ziah.Ka nu thih hnu kum engemaw chen thleng khan ka nu huatna ka rilrua an lo tuh kha ka pai ta reng,mahse enge anih ka hriat tak hnuah chuan  ka nu huatna an tuh letin ka nu haw tura ka rilru min siamsaktute ka haw ta thung.

‘I tha em?” ka dara rawn khawih pahin Ramsey-an a rawn ti sup.Ka phu zawk,rang zetin ka mit ka nuai nghal vat bawk.Ka mittui a tla tih pawh ka lo hre lo.

‘Aw..aw,tha..’ ka tho nghal zat bawk.

‘A landanah chuan i that hmel chiah loh…” min en vung vung pahin a ti leh sup.

‘Ka tha..ngatinge ka that loh ang?”

‘Uh…ka hre lo le’ a dar a tichhing uk bawk.Thil ngaihtuah chhuah ka nei..

‘Savio..’ ka ti nghal sap.

‘A lo kal lo vang…’ rang lutukin ka en vat.

‘Maw?”

‘A lo kal dawn lo..’

‘Eng? Ngatinge ?” ka ti bah nak mai.

‘Aman hrilh che sela i duh zawk em?”

‘Aih,aw…ka be mai ang’ ka ti leh a,ka phone ka lakanga.Savio number ka dial nghal zat.A lo kal loh chuan engtin nge ka haw theih tehlul ang?Nilengin helaiah hian he Mihring nelawm loh lutuk nen hian kan inkhung dun anih chuan ka a thei mai ang.

A ring char char,a pick thei der lo.Ka tinawn leha,a pick chuang lo.Call leh tumin ka phone ka beng bul atangin ka la thlaa,mahse ka call leh hmain min rawn laksak ta daih.

‘Hey,enge i tih a?” ka ti that.

‘Call tawh suh,nichin lawk khan ka pu farnu a borala,chuvangin chhungkua kan buai viau ania’ a ti ta sup.Beidawng lutukin ka thaw halh ringawt.

‘I duh phawt chuan tah hian i awm thei ania’ awih lo lutukin ka en vat.Mahse, a hmel thutak zetah chuan fiamthu hmel a lang eih lo.

‘Ka duh lo…In kan nei’ ka chhang rang lam hret.A then suk thung.

‘Ok,a tha lawm..Mahse, in atangin i out niin a lang a’ a ti nghut,ka chil ka lem khalh ringawt.A sawi dik lutuk chuan sawi leh mai tur min ti hre lo a ni mah zawk.

‘Chuan….?” Amah bawkin a ti leh sup.

Chapo thei ka ni lo tawp tih ka chiang,ka pu teinah chuan ka kal thei mahna,anih loh pawn ka haw thei reng.Mahse, khawiahmah mah ka kal duh rih lo ve ve.A hmelpa leh ngeng ngulh mai chu ka en zawka,chik zetin min lo ena,ka ngaihtuahna chhungril buai nuaih nuaih a hmutlang thei in ka ring hial. Ani puih ngai nih ka duh lo bur,mahse enge ka tih chuan ang?ka haw dawn anih si loh chuan tah hian ka awm mai a tha ber.

‘Haw ka ngaia,ka ding reng hman lo ania’ a ti leh hmuka,a ner nawk bawk.

‘Ih..eng lo,Savio khan tumah hetah…’ sawi zo lovin ka ne ne ral ta vel mai mai.

‘I duh loh chuan ka tilui chuang lo chea,I awm duh anih chuan ka ti mai zawk..’bung zetin a ti leh hluk.

‘Ka….ka hre lo,awm chu ka duh maithei,mahse nang…’

‘Ka lo let dawn lo,I duh thlang la.Lawm takin ka awmtir che i ring lo ang tih ka hria’ a mithmul a ti sang uk bawk.Ka bu nghauh ringawt.Min ngaitheih loh zia ka hai lo.Chutiang bawkin ka mil loh zia ani pawh hian a hai bik lo.

‘Ka awm ang..A theih chuan karkhat vel..’ a mit a tizim suna,min hnial dawn emaw ka ti hman,mahse a but a nghut.

Living roomah ka chhuak pheia,a tlanchhuak tur ka va hmu hman tawk.Kitchen ka pan pheia,a zau hran lo.Mahse, a felfai thlap.In a mamawh tlangpui chu a awm kim ve vek.Fridge ka hawnga,artui pahnih leh Bawnghnute bur,la hawn loh pakhat bak engmah a awm lo.Ka thaw hak mai,khua a nuam lova,Savio a lo kal bawk si loh chuan tlai lamah enge ka ei tak ang?Tukverh ka pan pheia,Curtain ka pawt kaua,tlemin ruahsur a zia tawha,mahse khua a hnim ruiha,thilnung che zeuh pawh hmuh tur a awm lo.Nizan khan Savio khan thenawm hnai ber kha minute 10 kal vel a ti a,anih chuan dawr han kal mai na tur pawh a awm hnai lo tawp anih hmel.Kan thiante dang chu bia ila an lo kal mai ang,mahse tuman heta ka awm hi hre lo se ka duh lawi.

Coffee machine lian vak lo awm chu ka pan hnaia,ka on dawna,mahse a lo in On sa va.Gas dahna hnuaia Drawer ka pawt chhuaka, buhfai dahna a lo ni a, a lo awm khat titih.Ka nawr luta,a dang ka hawng kual leh dan dana,bowl leh spoon dahna mai bakah eirawngbawlna atana mamawh ho a lo awm kim deuh vek.

Chaw ka chhuma,Artui ka kanga,Bawnghnute nen ka ei a,ka ril a tam bawk aniang ka chaw chhum zawng zawng ka ei zo vek.

Tv ka ona,mahse engmah ka en duhzawng a awm lo.Phone lah ka khawih peih der lo.Thil ngaihtuah chhuah ka nei.Roomah ka lut pheia,Dawhkana lehkhabu inrem tlar that ka pan hnaia,ka en dan dana,sumdawnna lam kaihhnawih vek.Ka en zela,vanneihthlak lutukin a hnuai berah ka Novel duh em em a lo awm teh tlat.Makti zetin ka mengphar vak.Ka lakanga,ka keuva,a neitu hming ka hmuh takah chuan ka ner nak mai.Lo ngaihtuah thiam awm tak,engvangin nge hetiang Novel te Ramsey-an a chhiar tehlul ang ni a..Ho lutuk,Agnes-i ta pawh ni eng ang mahse chhiartur ka hmuh tho,a tawk reng.

Kawngkhar kik riin min tiharh zawk,thawhphan pawh nei loin ka thuchhuak hlawl bawk.Engtiklaiin nge ka lehkhabu chhiar ka mutthluksan ka hre der lo.An rawn kik leha,tu nge ni ang? Banga Sana intar ka melh zawka,dar 4 a lo ri tawh.

‘Zorin…Zorinzual…’Savio awin kik pahin a rawn ti a, ka hahdam nghal hawk thei.Ka hlauh awm ka hre miah lo thung.Mahse, ka lo tang teuh a ni mahna le.

‘Ka lo kal..’ tih pahin kawngkhar ka pana,ruah a sur tawh lo.

Kawngkhar ka hawnga,Mitthi in kal haw tih a dressah a hriat theih.Thil a khai bawr luk bawk.

‘I va rawn hawng har ve a’ lawm vak lo niawm takin a ti hlur mai.

‘Ka muhil alawm…Bakah i lo kal dawn tih pawh i sawi lova’ tih pahin a luhna turin ka kiana.Min rawn kal pela,kawngkhar ka khar hmain pawn lam ka hawi kuala,tumah hmuh tur an awm lo.Vawiin khan khua tha se chuan ka fangkual vel ang ka ti kha ania.

‘Enge i lo ken a?” Kitchen lama a kal zui pahin ka ti lawng lawng.

‘I eitur,aaa.Keipawh ka ei ve nghal dawn..’ tih pahin a thil khai Dawhkanah a nghat chawrh.

‘Enge i lo ken reng reng a?” ka ti leha,a thil rawn ken en tumin ka pan hnaia.

‘A awm nual ang,zingah enge i ei a?” a ti leh a.

‘Artui pahnih leh chaw…ka ei hnem tawp’

‘A va tha ve,chawhmeh dang pawh awm se i siam thiam leh awm chuang der si lo’a nui hak.Ka ner khum nak thung.

Mahni eitur siam thei lo khawpa tlaw ka ni hran lo,mahse ka siamtui vak ngai lo tih a hrechiang.Ka nuhrawn hi sual teh mahse inchhung enkawl a hnehsawh tih erawh ka hai thei lo.Eisiam a uluk em em a,awmpui kan nei reng chungin aman a siam a tam zawk.Min lawm lo a min ngaithei lo hle chung khan inchhung chet leh eirawngbawl tih velah engmah min tihluih tir emaw min tiduhdah ang zawngin a khawsa ngai miah lo bawk.

Eirawng kan bawl duna,ani pawh chuti taka chhuanawm a ni bik chuang lo.

‘A zin dawn kha i ti sia” thil ei pahin ka ti a.

‘Tu? Eee,Mama maw?’ a ti hu.

‘Ani lo tunge ni anga?”

‘Um,a zin dawn ati miaua,a lo haw lehchhan ka hre lo e a,bakah Inah haw loin tah daih a lo kala,a mak ve e’ a ti ta daih.

‘Chungte chu zingah khan i zawt lo mi?” ka ti hlak.

‘Zawt nang,ka riahtir chhan che ka sawia’

‘Hmela le(h)…Ka mimal thil ani kha enge hrilh kher a tulna awm a?”ka ti hlar mai.

‘Tul e,anih loh te chuan hetah i riak sia,a thinrim dawn asin…Chhan tha tawk a awm angaia..A ni lo mi?” a ti awlsam et.

‘Nih te chu ni e..Enteh,ka duh chuan ka awm thei ang a ti a’

‘Maw?!’ a thil ei a hak titih.Tawngkaa chhang loin ka bu nghat ringawt.

‘Engtikah nge a sawia?’ a khuh leh rih.

‘A chhuah hmain..’

‘A piangthar anih chiah chu…’ a nui hawk hawk mai.

‘Nia,aniang…’

‘Nizanah khawiah nge a mut a?” ka melh vak,a dar a tichhing zauh ringawt.

‘ Tak tak…?”

‘Khawiah nge mu se i tih a?”

‘Khum pakhat chiah a awma,chutah chuan i mu a…Aaaaa,I hmai a sen vek ania’tifuh inti zetin a ti leha,ka lei ka chhuahkhum vak ringawt.

‘I ninawm lutuk…Ei vat vat la, kal tawh rawh’ka ti hlak.

‘Teuh lo,eikhamah Savawm ka in leh te te dawn…’

‘Min lo ken kep em?’

‘Pali ka lo keng…Eeeeh,I nuin min rawn call tak asin,mahse ka pick lo.. ”

‘A that chu..’ ka ti sap ringawt.Min ngaihtuah tak tak vang niloin nu fing tak anih vang zawkin a tihtur a ti mai zawk tih ka chiang.

‘I awmna tal hrilh la…’

‘Nakinah..’

‘Ok..i thu thu le..Engchen nge awm i tum ang?” a ti leh a.

‘Ka hre lo,karkhat vel pawh a ni maithei..’

‘Ahhh…Mama..’ ka ban ka vai zauh.

‘Ka hrilh tawh,a remti mial bawk’ ka then sak,a bu nghauha,ngaihtuah muk hmel zetin a khabe a tuai hauh hauha,min en reng bawk.

‘Nge tikhan min en a?” ka ti hlak.

‘Eng? Aih…engtin nge ka en che a?” a ti buh nuaih..Mak ti zetin ka en a,tiang hian a awm ngai lo.

‘Mi hur angin min en…’

‘Hmeli…I chhe lutuk’ a forkin min tin uaih.Ka nui hak hak thung.

Dar 7 velah a hawa,a tlanliam hnuah lut mai loin ka ding riha,van lam ka thlir chhoa,a thiang kuk,zing lamah ruah a sur ngheng tih awih a har hial zawk.Arsi an pe tuar.Thla lah a eng nuam viau.Ka dinna piah lam ka thlira,thla engin a chhun a,a lang nalh tih piahlam anih mai bakah mak takin ka khua a har vawng vawng.Ni lo…Vawiin hi ka nu birthday a ni tak alawm..Engtin nge ka theihnghilh theih zawk?

Living roomah ka thu a,dawhkana Beer ka en vang vang.Tui ka tih vanga in ka ni ngai lova,ka hriatrengnain min tihnat thinna theihnghilh tumin k a in mai thin zawk.Mahse, ka theihnghilh lo mai pawh ni loin ka ruih poh leh na ka tizual zawk ziah.

Ka nu hmel ka mitthlaah a lo langa,nu hmeltha leh smart tak,tu te pawh kawm thei a ni a.Uire chhuaha a chhuah hnuah khan min biak a tum pawn ka be ngai lo,ka hela,ka tlanchhiatsan thin bawk anih kha.Schoolah vawi tamtak min hmuh tumin a lo kala,naupang mai ka la nichung khan ka thinlungah huatna min tuh nghehsak lutuk avangin ka zaka,ka hmuh reng pawn ka hmu lo der ziah.Mahse,a thih hnuah enge dik ka hre leh lawi si..Ka mittui a rawn tlaa.Engmah siam that theih a ni tawh lo tih ka hria,chuvang taka nazual ziah ka ni bawk.

Kawngkhar kik riah ka phu zawk.Ka mit ka nuai nawk nawk.Savio a lo let leh a ni ngei ang? Haihawt lutuk..Mahse, a Motor thawm ka hre eih lo..

‘Savio…ngatinge i lo let..’ mahse tu nge lo ding ka hmuh takah chuan ka tawng tawp ta chawt.

Chapter- 3

‘Ramsey…’ ka ti chhuak halh mai.

‘Aw…’

‘Ngatinge i lo let leh a?” ka ti leh sap.

‘Ka inah hian ka duh duh hunah ka kal thei lo tihna mi?” a thle buk.

‘Aih…Chutiangin ka sawi lo,ih..Lo let i tum tawh lo i ti sia’ ka ti leh niah niah.

‘Engpawhnise ka lo lut dawn mi niang?” a ti leh sup.Rang lutukin ka tawlhsawn nghal vat.Ka awmdan atthlak lutuk vangin ka inhau ru mawlh mawlh bawk.

Kal pahin a jacket a hlipa,thutthlengah a thehthlaa.Amah a thu thla nghal hnawk bawk.Sawi mai tur hre loin Kawngka bulah ka dinga,ka hmui ka pet nauh nauh bawk.

‘Thu rawh,ka seh dawn hleinem che’ min rawn en pahin a ti hmuk,hnunglam  a nghenga, chunglamah hmuhnawm a awm emaw tihmai turin a thlir chho vung vung bawk.

Ka hnaih ber thutthlengah ka thu thlaa,kamtu awm ang maiin ka thu bet hleithei lo,ka tang ru teuh bawk.

‘Thil i ei tawh em?” a ti leh thut.

‘Aw…’

‘Ok,enge eitur awm?” ka melh vat.Min en lo chunglam bawk a lo la melh ta reng.

‘A awm lo..’ ka ti mawl tawp.

‘Anih chuan i ei zo vek tihna mi?” min rawn en thut.Kan mit a intawng sawka,rang lutukin ka hawisawn vat thung.

‘Aih,engvakmah ka siam lo..Ih…’ka nawi kual ta mai mai.

‘Savio kha eitur keng turin ka ti sia..A keng lo tihna nge?”

‘Keng,kan eitur chiah kan siama..’ a then suk.

‘Ok,karkhat tla tur,chhe mai lo tur chi lei turin ka ti a, avaiin in ei zawh loh hram ka beisei teh ang’ a tit a duah.A tawng danah ngeiawm leh huat tur engmah a awm lo.

‘Ei zo lo..’ ka ti tha ve mai.

‘Anih chuan ka insiam ve mai angai dawn tihna nge min siamsak dawn?” a ti leh supa,a thu mar nghal bawk.

‘I ei duhzawng sawi la,ka lo siam ang..Mahse, eisiam lam hi ka thiam zawng a ni vak lo…’ ka then lui sak.

‘Mipa khawsakin i khawsa tlata…’ a ti liam puat,a sawi awmzia ka hre lo.Bakah mipa anga la khawsak ka hre hek lo.

‘Ngaihtuah vak duh suh,ka lo insiam mai ang’ amah bawkin a rawn ti leh nghuta,ka bu liam satliah ringawt.

Kitchen lama a chevel thawm ka ngaithla kar mai,siamsak tur ka nih leh nih loh ka ngaihtuaha,siamsak turin min nawr lui miah lo,min nawr a hnekin a hlau a ang,a Inah ka awma,chumai bakah a thawmhnaw ka la ha zui bawk.Ka sawithiam chiah si lohin engemaw ba nei niin ka inhre ta tlat bawk.Eitur lah Savio rawn dah ve hrim hrim emaw ka tih laiin aman dah tura a tih vang a la nita zel bawk. Enge dik lo awm ta zawk ni? Ka hriat thin Ramsey kha chu nelawm lo leh induhtawk zet,min hmuh apianga uicho tluk leka min en thintu kha a ni a, mahse tuna ka awmpui mek leh nizana khum khata ka riahpui Ramsey erawh midang daih a ni tlat lawi.

Muangchangin Kitchen lam ka pana,kawngkhar bul atangin a chevel ka thlira,min hnungchhawn zawnga a din avangin min hmu ve lo thung.A pian nalh zet ka en dan dan,a dar a hlai hlapa,a kawng a fek rat thung.A bialnu ka mitthlaah a lo lang nghal zat.Nu lian lo ve tak a ni a, Ramsey-an a zakzeh hial ta ve ang,hmeltha lutuk tihtur a ni lo,mahse a chhe lo hlawm tawp thung.Designer anih vang nge ka hre lo,ka hmuh apiangin analh thlarh ziah,chumai bakah a awm ve tawh naah chuan a langsar viau ziah bawk.

‘Dik lo a awm em?”tih pahin a rawn hawi thut,ka phu deuh zawka,zahzelah ka inkuangkuah ta than.

‘Aih…awm lo…Eng lo,puih i ngai em tih ka lo en dawna’ ka rilrua lang hmasa sa ka sawi ta ngawt.

‘Maithei,i peih chuan?” a ti tha ve mai.

Ka kal hnaia,dawhkan a kawk zauh ringawt.Chair ka pawtchhuaka,ka thu thlaa.Enge min tihtir dawn ka nghak mawl tawp.Purunsen kung niawm tak a rawn dahchhuaka,Savio khan hetiang a lo ken awm ka lo hmu lo reng reng.Chemte a rawn dah leh a.

‘Lo tifai la…’

‘Engtin?” angaihna ka hre lo.Khawi chin nge ka paih dawn ka hrethiam lo zawk,kan ei ngai ka hre tlat lo.

‘Min pui dawn emaw ka tia?” a dar a tichhing uk bawk.

‘Aw,pui dawn..Ka sawi tum zawk chu tiang hi kan ei ngai lova,khawi chin nge ka paih ang?” ka sawi zawh rualin a nui hawk mai.Angaihna hre lo lutukin ka melh ha ringawt.

‘Mipa naupang tihmawh lutuk ang mai…’a sawi zawi teh nangin ka hre phak tho.

‘Tu? Keimah maw?”

‘Yess….’

‘Mipa ka ni lo,naupang pawh ka ni tawh lo bawka’

‘Dik chiah’ a ti leh lawi.Eng chu a hria nimaw?

Ka inrin hmain a rawn kun hnai thuta,hnunglam ka ngheng deuh rawk thung,Chair ban tawn tawnah a rawn vuana,hnai zetah min rawn en bawk.A hmelpa leh nelawm loh zetah chuan a ngaihtuahna engmah a lang lo.Hawisawn ka duh,mahse mak takin ka hawisawn thei tlat lo.A mitah tak ka ena,ka thawk a sak talh talh bawk.Tiang hian mipa ka la hnaih ngai lo.Ni lo,Savio nen kan inkuah fo,mahse Mipa angin ka lo en lo mai mai zawk aniang.Hetiang hian ka awmdan a danglam ngai miah lo.

‘Ngatinge?” ka tum aiin ka aw a pangngai.

‘Ka en duh che…’ a ti sup.

A mitmeng thim raih chuan uluk zetin min en a,a enna lai apiang a sa zui ham ham bawk.Ka tawng dawna ka tawng chhuak thei mai lo.Vanneihthlak lutukin a phone a ri ta hlauh.A hmui a petsawi zauha,a dingmar a,ka thaw hawk mai.Ka lo insehruh nasat zia a kalsawn takah chuan ka hre ta chauh.Hahdam tumin ka mit ka chhing a,thawk ka la vang vang bawk.

‘Hello…’ a ti sup.Lehlam tawng ngaithlain kalsawn chuang loin Dawhkan tlang nghengin a ding run bawk.

‘A tawp tawh ka tih kha….’ A tawngkam bung vut leh nelawm lo lutuk vangin rawn call tu ka lo khawngaih ve ngawt.

Mi phone hman laia lo awm ve reng a mawi lo tih ka rilruah a lo luta,ka tho nghal phat,mahse ka kalsawn hmain ka banrekah a rawn vuan a,nghet zetin a hmer bawk.Rang lutukin ka en chho vat. Dawhkana Purunsen kung awm a melh a,a thle zauh bawk.Nidawn tak,ka kut a vawnna ka melh a,hrethiamin a thlah ve mai bawk.Tim daiin ka thu thla ta zal zal.

‘Nakinah kan inhmu dawn nia,tunah chuan ka buai lawk’ a ti leh hmuka,a phone dawhkanah a rawn dahthla nghal zat bawk.

Chemte ka bana,a tawnna ka zai chata.Ka thiam ang angin ka thian mai ang chu.

‘A zung kha paih la,chuan a hnah kha a hmawr lam paih bawk la,Purunsen i kheh ang khan a chunglam kha i paih dawn nia..’ awmpui chhaw zet thil hrilh a ang ber.Mahse, ka bu ta tho.

Ka then zawh vek hnuah a rawn en a,sil turin a laa,thu chungin a chevel ka thlir ringawt.Ka beisei dan nen a inmil lo lutuk,eirawngbawl thang lutuk niawm takin a chevel hmuh a nuam.Inah titur an tama,engmah a tih ka lo ring ngai lo.

‘I ei chhin duh em?” a rawn ti a,rang zetin ka lu ka thing vat.Mahse, a rimtui ka ti a, chaw ka ei tawh nangin ka chil a tiput lo chauh thung.

‘Tak tak? Tem chhin la…’  ti a,a then suk bawk.

‘Um,tlem aw..’ ka tita nge nge. Bowl lian vak loah a suaka,ka hmaah a rawn daha..A tak han hmuh takah phei chuan tui hmel tih piahlam a ni ringawt.

Tlem ka ina,a hmel leh a rim ang chiah..Ka mengphar ak mai.Reiloteah ka inzo nghal vek.Ka hawichhuaka,uluk zetin min lo en run.Ka zak leh hnuhnawh..Ka nui ta ngawt.

‘Enge a an?”

‘A tui…Engtin nge i siam thiam a?” ka ti chhuak halh mai.A nui leh suk.

‘I zirduh chuan ka zirtir thei reng che…’

‘Ka zawhna i chhang lo..’ ka ti ve thung.

‘Ok,thil ka zawt hmasa ang che,min chhan theih chuan a hnuah ka chhang ang che”

‘Eng?” ka ti sap ringawt.

‘Engvangin nge hetianga i nun?”

‘Maw?”

‘I nundan mawle,ka buaina tur a ni lo tih ka hria,mahse Savio vangin ka Nutei hi a mangang thei viau ania’ a ti leh duah.A sawi awmzia ka man chiah lo.

‘I sawi awmzia ka man lo..I sawifiah theih chuan?’

‘Uh..sawifiah chiam tur enge awm a? Savio hian a buaipui ber chu nangmah i ni a..Diktak chuan Nupui tha tak nei turin a nu leh pa hian an beisei ve a,an duh bawka.Mahse, tunah hi chuan chu chu a hla lam hret…’ a ner nawk bawk.Kei erawh chu a sawi awmzia ka hriat takah chuan ka thinrimna control tumin ka kut Dawhkan hnuaiah ka dahthla zal zala,ka hum ruh tlat bawk.

‘Inthen tura tih che u ka tum lo,bakah chulam chu ka sawi tur a ni lo.Ka sawi duh zawk chu nunphung pangngaiin nungla,Savio tan leh nangma tan Hmeichhe tha tak nih tum la ka duh’ amah bawkin a ti leh a,muangchangin ka ena,a mitah tak ka en luia.Ka hriatthin Ramsey kha a ni leh ta.A duh duha khawvel her danglam tum leh a unaute zawng zawngin an hlauhrawn misual tak kha a ni leh ta chiah.Mahse,hlauhna pakhatmah ka nei lo.

‘Savio hnenah hrilh zawk la..’ ka aw a ring lo.Mahse a hrephak tho tih a hmelah ka hrethei.

‘Chulam chu lo buaipui duh suh,ka nau hi ka hrechiang.Ka sawi chu a zawm ang,mahse tuna insiamthat ngai zawk chu ani ni loin nangmah zawk kha..’

‘Anih chuan keimahah hian engemaw dik lo a awm i tihna a ni em?” ka ti hmak.

‘Yeap,naupang fel..’ngeiawm zetin a ner nawk bawk.A awmdan engkim mai chu ka haw hluah hluah.

‘Naupang ka  ni lo’

‘Takzet,anih chuan Savio hian puitlingah a lo siam hman tawh che tihna ni em?”

‘Tenawm lutuk…’ ka ti chhuak sap,mahse ka thiltum hria niawm takin ka thil eina bowl a rawn la vut.Ka melh nghek ringawt.

‘Hmeichhiain kut min thlak hi ka duh bau lo…Pawisak i nei si loa,ka lasawn ta mai aw’ ngeiawm lutukin a ti a,a nui zui hawk bawk.Savio nen kan inngaizawng hauh lo.Mahse,ka ngaihtuahnaah thildang a lo lut zawk.

‘Tuna ka awmdan ang hian Savio chuan min duh tho chuan enge siamthat ka mamawh ang?” ka tita zawk.Savio bialnu angin min ngai ta sa saa,a duh duhin ngai mai tehse.

‘Anih chuan i kalsan mai angai dawn anih chu’a ti nghut.Pawisa lo hmel zetin ka ner nak.

‘Savio ka lo be dawn nia,inthen a duh phawt chuan ka tan a harsa hleinem’ ka ti zangkhai vah.A mithmul a ti sang awka,thinrimna emaw lam engmah a hmelah a lang chuang lo.

‘Ka be ngei ang,kan chhungkaw zinga tumahin Drug Addict,riahbo mai mai ching leh chhungte pawisa lo lutuk hi nupui atan an neih ka remti ngai lo ang’ a thusawi mal tin chuan min deng dat dat a ni ber.A vawikhat nan mi in min hmuhdan dik lo sawifiah ka chak ve ta hial.Mahse, he pa hnenah hian enge ka sawifiah a tulna? Ka engmah a ni lova,a engmah ka ni hek lo.

‘I duh duh tirawh..Tu nge chak zawk en ka chak khawp mai’ ka ti lui leh salh.A dar a tichhing uk.

‘Min cho tihna a ni em?”

‘I ngaihdan dan le..’

‘Ka phur zawng tak anih ka ring’

‘Anih leh In atangin min petchhuak nghal duh em?” ka ti leha.Hahdam hmel takin ka en lui tlat bawk.

‘Ka sawi tawh hi ka sut leh mai mai ngai lo,i awm thei ang ka ti a,i awm thei’

‘Ka lawm e’

‘Mahse, ka khumah sawn sual rawngbawl ka phal lo’

‘Ahh,kan lo insum dawn nia’ ka nui lui leh var var bawk.

A kal hnuah erawh chau zetin  ka thu thla ta hnawk.A kal hma zawng khan ngeiawm thei ang berin ka khawsa tluan ta parh,thil a ei laiin ka earphone vuahin ka zai lui nghek ngheka,a ei zawh hnua a rawn thut ve pawn a awm ve tih hre lo ang hmakin ka awmdan ngaiin ka awmlui char char bawk.

Ka phone nghawr dar darin min tiharha,peih lo zetin ka bana.Min rawn call tu ka ena,Ka pa..Pick mai loin ka mit ka chhing leh vang vang.

‘Hello..’ vawihnih a rawn call naah ka la ta chauh.

‘Khawnge i awm?” Ka pa awin a rawn ti damthlap.

‘Ngatinge?” ka ti halh ringawt.

‘Zan hnih i lo haw tawh lova,I nuin Savio-a call lahin a pick duh lo bawk a’ a rawn ti dam leh thlap.

Ka pa mizia ka hrechiang,ka nu awm loh hnuah phei chuan ka innghahna takmeuh a ni a,ka len ur tawh hnuah pawh ka damloh chuan min paw mai zel.Ka rilru tihnat a duh ngai lo,hmeichhe naupang fel leh harhvang tak ka ni thina,ka Pa mizia,tihtawh lam ti tlut mai ka chhun em em bawk.Mahse, huatna nen ka nun ka hman tak chinah chuan min siamthat tumin kut min thlak ta foa,pa luhlul leh tum tlang tak a ni a,ka chhuak tau anih chuan min zawng ngai lo.Ka nuhrawn zawkin ka awmna chin hre turin Savio a call mai zel zawk.Tun tumah pawh ka pa nena inhau kan ni a,mahse mak takin aman min rawn call ve ta tlat.

‘Zingah khan i pu Damdawiinah an dah luta,Dawrpui pu zawk’ ka thuchhuak vat.Dawrpui lam hi ka nu te lam anni a,ka nu nen an inthen hnuah pawh ka pute nen an intichhe lem lo.

‘Ngatinge?” ka aw a tham chal bawk.

‘Bathroomah a lo tlu an ti a,I piin a va hmua,mahse tunah chuan a harh tawh’

‘Khawi damdawiinah nge?” ka ti leha.A rawn sawia,hlauhthawnna avangin ka khur dar dar mai.Ka pa lama ka pi leh pu aiin ka ngaina zawka,ka Putea fate nen kan inpawhna pawh ka pa lama ka cousinte nen kan inpawhna aiin a thuk zawk.

Ka tho nghal a,ka inphihfai sawk sawka,ka thawmhnaw ka thlaka,Savio ka call nghal bawk.Darkar chanve a liam leh chuan Savio a lo thleng hman tawh.Thil awmdan ka hrilh nghal mawlh mawlh. Ani pawh hian ka pi leh pu a ngaina ve viau tawha,kan pahnihin kan kal fo bawka,ka pi leh ka pu pawn an ngaina ve viau bawk.

Damdawiin kan thlenin ka putea te nupa bakah kan chhungte an lo awm teuh,ka hlauthawng zual sauh bawk.Pite-in min hmuh veleh min lo be sawt sawta,ngaihtuahawm a ni lo tih a sawi sek,mahse a sawi nawn ngun lutuk chuan min ti thlabar zual mah zawk.

‘ICUah an dah ta rih mai anih kha,ama tan pawh a tha zawk mah a’ Putea’n rawn thut thlak ve pahin a ti a.Ka en vat.Pa lian lem lo tak a ni a, Mahse a vantlang chu a nit ho mai.Ka nu nen an hmel a in ang em em a,Pa tawngduh leh fiamthu thawh peih tak mai a ni a,mi ngainat a hlawh em em bawk.

‘ICU maw? A na viau tihna ni maw?” tumah biak bik pawh ka nei chuang lo.

‘A thaw a hah nasa deuha,chuvang mawle.Cabin ka biaa,kan chang thei ngut angem ka hre lo’ a ti awlsam leh mai.Mipa a ni a, hmeichhia angin a phili ruai dawn lo tih ka hria.Chumai bakah a mizia ka hriaa,thil la vung hlauh chi a ni lem lo.

‘Anih chuan ka pi a tha em?” ka ti leh a.

‘Aw,tha e.A thawng deuha,mahse a ngaihtuahawm loh a ni chu..Eh,zingah khan ka call tlang thei lo chea,i pa ka biaa..I awm lo a ti a’a tihzawm leh duah.Ka bu nghat ringawt.

‘Ka riakchhuaka…’ ka ti sap.

‘Kan Inah ni bawk si lo..Khawiah nge i riaha?” min en loin ka bula thu Savio zawk a en daih bawk.

‘Pa-a..’ Pite-in zawitein a ti sep.Midang an awm vea,keima chungchang sawi hun a ni miah lo.Bakah kan chhungkaw zingah ka nundan avangin min mil tu aiin mil lo tur an tam fe zawk bawk.

Savio-an min hawsana,kei erawh ka awm nileng ta thak.Zing atangin engmah ka la ei lova,engmah ka ei chak chuang miah lo bawk.

‘Bawihi…’ ka dara rawn khawih pahin hmeichhe awin a rawn ti a.Tu nge anih ka hria,a finzia a lang leh ta tih ka lo ngaihtuah nghal vat bawk.

‘In lo kal a ni maw? In va fel ve’ Pite-in a rawn ti nghal sawt sawt.

Muangchangin ka hawichhuaka,Ka nuhrawn ka ena,a bula Pite-i nena inbe mek ka Pa ka en leha.Engvanga lo kal nge annih ang ka hre lo.Ka pa hi chuan ka nu nen an inthen hnuah pawh ka nu chhungte tumah a be chhe lova,ka pi leh pu pawn an la ngaina reng.Ka nuhrawn erawh hmeichhe a lo tak mai a ni a, ani tan ka nu chhungte lo do ve ngawt a tul lo tih hriaiin ka nu chhungte chhiat thatah a kal taima takzet.Chuvang takin mi zawng zawng fel tih a hlawha,keiin sual nih ka hlawh thung.Vawi tamtak Putea ngei pawn min hauh phaha,engvanga awm tha duh miah lo nge ka nih min zawt fo bawk,mahse ka nui liam mai zel.A chhan diktak hria se kei aiin a che na zawk dawn tih ka hria,ka pi leh pu phei chu tar alamah lu an suna,thudik hre phei se chuan an natna a belhchhah nasa dawn lutuk.Chuvangin keimaha tuar tlawk tlawk ka thlang zawk.

‘Kan haw mai ange,chanchin thar a awm apiangin min rawn hrilh ka phut ania’ darkar chanve vel an thut hnuah ka nuhrawnin a ti a,nelawm takin a nui sang bawk.Kei erawh a nui hmelin ka luak a tichhuak hluah hluah thung.

‘Ni e, haw tawh rawh u.In fel em mai,chanchin danglam a awm phawt chuan kan lo sawi zel dawn nia’ Putean a ti ve a.Lawm tak tak hmel a pu bawk.

‘A zia ve leh mai chek ang,anih leh Mawite,Mambawihi a riah angai angem?” a ti leha,ka melh vat.

‘Zanin chu ngai lo mai ang,Ward pangngaia kan insawn hunah erawh chuan kan mamawh viau anga,tunah chuan tihtheih a tlem si,kan nupain kan riak phawt ang’ Putea bawkin a ti leha,ka nui chhuak hak ringawt.Mahse, ka nuih a za eih lo.Tihdan tur ka hriat loh vanga nui ka ni zawk.Mak tih hmel zetin Putea fapain min rawn en hau mai.Ka thle bak ringawt.

‘Anih chuan kal ang u.Zanin Inkhawm ka Thupui hawn zan a ni hlauh peka’ a ti leha.Ka ner nghek ringawt.

‘Kal ila…’ min rawn en pahin a ti leha.Ka che eih lo.

‘Lo va kal ru,nakin deuhah ka lo kal ang’ ka ti hmak.Putea mak ti hmel ka hmu ru kar,mahse ka ngaipawimawh duh lo.

‘Mambawih…’ Ka pain a ti dam thlap.

‘Pa Zual,ka rawn thlah mai ang.Kal lawkna tur kan la neia’ Ka cousin in a rawn tita hlauh.Ka thaw huai mai,ka pa ka melh zawka,a hmel buai deuh nakah chuan ka haw loh leh hlau a ang viau.Ka nuhrawn erawh ka melh duh lo lui tlat thung.

An kal hnuah Savio ka calla,Inah ka haw ang nge haw lo ang tih ka zawt a,haw turin min rawn ti nasa viau.Diktak chuan haw chakna ka nei miah lo,mahse engmah keng lova chhuak ka ni a,Ramsey inah khan ka inbual tho nangin thawmhnaw ngai ka ha leha,ka thawmhnaw thlak ngei ngei angai.

Ka cousinin min thlaha,mahse an in lamah ka pi hmu turin ka kal hmasa te te,chaw ka ei nghala,ka ril a tam bawka ka ei hnem ngang mai.Dan pangngai ang bawkin ka Piin min zilh leh kauh kauh.Ka ngaithla liam vel mai mai.

‘I lo haw alaw?” ka luh veleh kan awmpui nulain min lo ti vat. Ka bu satliah ringawt.Ka pa emaw ka nuhrawn pawh ka hmu lo ve ve.An inkhawm anih ka ring mai bawk.Room lam pan tumin Step lam ka pan ta zawk.

‘U….’ Step tawp lam ka enchho vat.Kan teber a lo ding vanga,a nui var var bawk.Nihnih vel chauh ka awm loa,a lo haw dawn tih tuman ka awm lai khan an sawi miah lo.

‘I lo haw dawn tih ka hre lo a’ kal chhoh pahin ka ti a,a thle bak.Ka nau chiah aiin ka ngaina zawka,ani pawn min ngaina ve tho bawk.

‘Ka lo haw thut alawm,inah i lo awm lo a’a ti leha,a  bulah ka dinga,kei aiin a sang zawk daiha,hmul ngah chi a ni bawk nen a kum aiin a lang upa mah zawk.

‘Nia,Savio nen kan chhuaka’ ka ti liam puat,ka room lam ka pana,a pen thawmah min zui zel tih ka hrethei bawk.

Chairah ka thu thla hnak,ka nau erawh khumah a thua,a kiuin a in nem khalh ul bawk.

‘I inbual dawn em?” min enreng chungin a ti chhuak hlawl.

‘Ngatinge?” ka nui hak bawk.

‘I balh hmel…’ a nui ve hak hak bawk.

‘Bual ang,Geyser min on sak la..I fel kha…’ a ner sak.Mahse, a kal ta tho.

A rawn let leha,khumah bawk a lawn leha,a bawp a khawkherh titih.Engemaw ngaihtuah muk tak nei a ang phian bawk.

‘Enge min lo hawna?”  ka ti a.

‘Engmah,engmah i duh ngai si lo a’a sawi dik chiah.Thawmhnaw lam phei chu tuma lei ka duh lo bur.

‘Ka inbual dawn..Lo awm rawh’ tih pahin ka tho a.

‘Um,eng lo…thil..’ a ngawi leh daih.Ka en a.Min rawn melh zawka,hmundang a en leh vat.Thil engemaw lian tham tak thup a nei anih hmel viau.

‘Enge? Sawi la…’

‘Engmah..’

‘Zothansang,ka hrechiang che em maia’ ka nui hak.

‘Naa…inbual phawt la,I zawh hunah nimai..’

‘Aih,tunah..Min ti hrechak laklawh’

‘Um..Ka bialnu a raia’

‘Enga?” ka ti vak.

‘I ninawm…’ a hmai a sen tawn tawn thei.

‘I nei dawn tihna mi? midangin an hre tawh em?”

‘Aih,hre lo…Karkhat chawlh kan neia,ka pa sawipui ka duha, chuvang ania ka lo haw thut..’ a ti leh a.Kum 22 chauh a la ni a, ka mitah phei chuan Naute a la nita reng.

Ka inbual pahin ka thil chi hrang hrang ka ngaihtuaha,ka pa in engtin nge ka nau sawnthlak a hriat hunah a tih ang tih te,ka nuhrawnin engtin nge a tih zui ang? Chawh tihna ka chhungrilah a lo lut zauh.An lo haw apiangin an fel em em ziah,mahse a ruka zu an in te keichuan ka hre vek thung.

Ka phone ngawr dar dar ka mang hriat rei ruai,zinglamah pawh tiang chiah hian ka harh tawha,ka mangphan aniang tih ka ngaihtuaha.Ka mut ngaiin ka mu tlat,mahse ka harhfim tial tiala,ka mumang a ni lo tawp.Ka bawkkhup thaka,a tawp leh mai ringin ka mit ka chhing lui tlat bawk.Ka besei ang chiahin a tawpa,mahse a rawn ri lehnghal zat.Hrep taka,tu phiangsen chu ni maw?

‘Hello…’ ka ti hmak.

‘Khawnge i awm?” Mipa awin a rawn ti a,tu nge anih ka hrechiang ngang mai bawk.

‘Ka duh duh naah…’ ka ti hlaka,ka phone ka off zui hmak bawk.

Engvangin nge ka awmna a hriat kher ang? Mai mai tak hian a..Ka duh duh na hmunah ka awm ang chu.Huizzz…Ka phone bawk..

‘Enge?” ka ti vin hlar mai.

‘Ka in chahbi ka duh..’

‘I chahbi i kawl ang chu..’

‘Vanduaithlak takin kawl lo hlauh..Inchhungah khan ka theihnghilh a..’ a nelawm lo ngang mai bawk.

‘Anih chuan lut lo mai la ti nia,ka muhil duh,mangtha phawt..’

‘Zorinzual,min nawrlui miah suh..’

‘Enge i tih theih anga?’ ngaipawimawh lo zetin ka ti ve thung.

‘Ka Inah i lut ru ka tih chuan Police lam hi an che rang ania,I nihna nen phei kha chuan an vaw chak khawp ang che’ ngeiawm lutukin a nui hawk bawk.

Chapter- 4

‘Inah haw mai rawh,tunah chuan a tlai tawh…’ ka chhuak halh mai.

‘Ahh…Tun ang hunah Inah ka haw thei nang,a tlai tawh em hi…I lo kal dawn nge Police ka call dawn?” a ti leh nghut.

Ka ngei hluah hluah.Sana ka en a,zinglam dar 1 a ri tawh.

‘Tunah engtin nge ka pek theih ang che?” ka tita nge nge.

‘Darkar chanve hun i nei…’ a ti vawt ruih.Ka thuchhuak hlawl thung.

‘Engtin maw?” ka hriat loh tak tak vanga zawt ka ni lo.

‘I lo kal dan turah buaina ka nei lo.Darkar chanve chhungin i lo thlen angai’ a ti leh hmuk.Ka rum hak mai.

‘Kawng pawh ka hrechiang loa,bakah ruah a sur hi..Tala kha chhuchhe mai la’

‘Huh..Darkar chanve chiah chiah,kawng i bo dawn anih chuan min lo call zel thei..’

‘Mahse,ruah a sura..Tunah Taxi pawh a awm tawh nang’ ka ti leh talh.

‘Dik chiah,ruahsur vangin a vawt hle a nia…Ka sawi nawn leh ang,Darkar chanve’ a off zui nghal hmiah.

Nunphung tha pangngaia nung ni ila tiang a ka buai angai miah lo ang,mahse duh duh huna riakbo thin leh Drug Addict anga khawtlangin an ngaih ka ni a, Ramsey lah hmingchhiatna nei lo leh hmelhriat tha pui pui nei a ni thunga,a sawi ang khan min Report tak tak ta se ka chan a chau hle ang..Huizzz,engvang tehhrepin nge a Inah ka lo riah ni a?

Pyjama chungah kawrlum phiar fual ka haa,ka sam ka chhipah ka bawk khawm tawp bawk.Thawm nei lo thei ang berin Stepah ka chhuk them thema,light pawh On ngam loin ka phone eng ringin ka chhuk thlaa.An Harh hmain ka let leh hman tho ang.

Chahbi khainaah ka Motor chahbi ka zawnga,a lo awm ngei.Mahse, ka start rualin an harh ngei ngei ang tih ka chiang,anih chuan Scooty zawk ken mai a fuh ang.Kan in piah deuhah ka nawr phei thei anga,a tha zawk ang.Mahse,Rain coat…Khawiah nge Rain coat a awm ang?Ka hmang khat lutuka kan la nei em pawh ka hre tawh lo. A pawi lo…duh leh huh law law mai ang.Ka let leh veleh ka inthlak nghal anga a nimai.Motor kena midang tih phawklek ai chuan a tha fe zawk.

Scooty Seat hnuaiah Ramsey In chahbi leh ka phone ka daha,ruah sur sung sung ka en a,ka chak hlawl lo.Savio ka ngaihtuah a,mahse tun ang hunah ani kaihthawh a tulna a awm bau lo.Ramsey hrep pawh hi a..In nei lo niawm takin engvangin nge Farm houseah ber kher a riah duh tlat ni??

Ka tlanchhuah rualin Ruahin ka hmai a rawn theh nghal thawt.A vawt ngang mai bawk.Duh angin a tlanchak theih bawk si loh nen ka thin a rim ngawih ngawih a ni ber.

Ka thleng ta nge nge,ka chhuk sawk sawka,mahse tumah awm lo niawm takin a thim thiap.Scooty pawh off loin ka chhuka,ka tlanpheia,ka khur hlawk hlawk bawk.

Ka hawi kuala,tumah ka hmu chuang lo.Scooty head lightin a en chinah Ramsey chu sawi loh a Motor awm pawh ka hmu lo hrim hrim.Ka phone ka hrechhuak zawk.Ka tlanphei leha,Veranda hul laiah Scooty ka nawr pheia,ka off nghal bawk,ka off rualin ka thim nghal khup.Ka phone ka phawrha.Thli thaw in hliah tumin a kil lam deuh ka pana,ka khur hlak hlak mai.Ramsey ka call a.Ka huh nasa bawk nen ka thawmhnaw atangin tui a far tluah tluah bawk.

‘Ka lo thlenga…’ a pick veleh a tawng hun pawh nghak loin ka tinghal hmak.

‘Khawiah maw?” mutchhuak aw zetin a rawn ti sup.

‘Maw? Farm Houseah anih loh ten’ ka ti chiam.

‘Sorry…I lo thleng har lutuka,ka let leh tawh…’

‘Ni lo…Ka tlai lo..’ka thin a rim satliah pawh a ni lo.Ka tah a chhuak zawk mah.

‘Minute 5 in i tlaia…’

‘Mahse,  ka lo kal tih i hrereng a…’ ka mittui a rawn tla a,duh loin ka hru tawk.Engvangin nge ka tah ngawt ang?

‘Haw leh mai rawh..I duh leh riak la..’

‘Ka haw lutuk che’  sawi tur dang ka hre hlawl lo.Mahse, ka sawi zawh rualin engahmah ngai lo zetin a nui hawk thung.Ka off hmak.

Ka hawikuala,enge tihtur ka hre hlawl lo.Ka inrin hmain ka auchhuak pawp.Ka mittui a rawn tla leha,ka hru buai peih lo.Ruah lah a hma aiin a tam tawh zawk.Ka beidawng ngawih ngawih.

Muangchangin Scooty ka pan a.Mahse,Scooty ka thlen hmain tuemawin min rawn pawt thuta,ka phu nasa lutuka,ka te chhuak nghal thawt bawk.

‘Khawnge i kal dawn?” Ramsey-a aw ka hriat rualin ka thlamuang nghal huai mai.Mahse,enge thlamuan tur awm a? min tih kual vel dan kha min hmusit lutuk ringawt.

‘Min thlah rawh..’ ka ti that,talchhuah tuamin ka nema,mahse ka kawngah nghet zetin a kuaha,a ban lehlamin a awmah ka lu a nem bet nghal hmiah bawk.Kan inhnaih lutuka a taksa lumna in min ur ham ham theia,a lungphu ri dat dat ka hrethei hial bawk.

‘I vawt vek alawm…’ a ti leh sup.

‘Chahbi…’ ka ti sap thung.

‘Angai tawh lo…’ a ti leh supa,Min pawt daka,a kut zungpuiin ka hmui a rawn khawih dun dun bawk.Ka hamhaih lutuka chet nachang hre loin ka din ngaiin ka ding khawng lah mai.

‘Lut ang…’ amah bawkin a ti leh sup.A awah chuan ka bialpa emaw ka pasal a ang mah zawk.Ni lo..Chutiang a ni hlawl lo.

‘Ka lo lut dawn lo.Chahbi ka pe ang che’ ka tal leh phat.Mahse, ka talchhuah hmain ka kawngah bawk a rawn kuah leha,amah thlawp zaihin min kuah bet leh nghal hmiah.

‘Ramsey…Min…’ ka sawi zawm hmain a hmui lum thar tharin ka hmui a rawn khar ta hmak.

Chhan let emaw talchhuah pawh a nachang ka hre lo ve ve.Ka din ngaiin ka ding mawl tawp.Dim leh dam zetin a rawn fawpa,ka nunah a vawikhat nan Mipain min fawp ve ta.Mahse, ka vawikhat tawnna chauh a ni nangin a zei zia erawh ka hrethiam ve tlat lawi.Ka hmui a rawn nawr kaua,a lei a rawn rawlh luta,ka thaw a chham lo chauh.Ka awmdan ka hrethiam lo,nawmna nge hlauhna zawkin min fan raih raiha,ka khup a zawi huai bawk.Tluk hlauin ka ngheng titiha.Tiang hian in Kiss hi a lo nuam anga min fan thei ang tih ka lo ngaihtuah phak ngai lo.Mahse…Engvangin nge ani hi ka kiss ngawt anga?

Ka thle thuta,a rum hawk thung.

’Ka…ka..kal duh..’ ka aw tehhrep pawh chu a.

‘Ka hria alawm,mahse i kal lo vang..’ nghet churhin a ti a.Min kuahna a thlah dul hek lo.

‘Min thlah teh’ ka ti leh hmak.

‘Tehreng mai…’ a ti thawp suta,mahse min thlah tum awmin a awm chuang der lo.

‘Inah ka let vat angaia..Khawngaihin..’ engvangin nge ka ngen tak ngawt ni? Mahse, ka sawi zo vek tawh.

‘I huh veka,hritlang i kai maithei bawka..’ min ngaihtuah tak tak a ang viau bawk.

‘Chuvang takin ka kal vat angaia..Kha chahbi’

Ka mamawh lo ka tih kha,ka mamawh zawk chu hei hi…’ ka biangah a rawn dawma,mak takin ka mur lehnghal ar ar thei hial bawk.

‘Min thlah phawt rawh’ ka chhungrila ka hriatthiam si loh nawmna thup tumin ka aw a chang fak thung.Ka beisei loh zetin min thlah ve mai bawk.A la mak lehzual ta cheu.Min thlah rualin ruak hawkin ka inhre leh ta tlat.Ka rui eih si lo..Tihdanglamin ka awm mawlh mawlh a ni ber.

Thim zingah kan ding rei tawha,ka hmu fiah thei tawh viau.Chahbi pek tumin ka phar chhuaka,a rawn bana,mahse ka Scooty chahbi chawpin a laa,a kekawr ipteah a thun nghal hmiah.

‘Kha chu ka Scooty chahbi..’

‘Ka hria alawm,I duh chuan i haw thei ang’ a ti dam thlup.

‘Ke in maw? Teuh lo lutuk..’

‘Anih chuan i awm thei anih chu…’ ka rum chhuak hak mai.Engvanga riak tura min duh nge anih ka hrethiam hlawl lo.Ks angin min lo ngai tak tak zawk emawni?

‘Ks ka ni lo,bakah i ngaih anga Drug addict ka….’ Ka sawi zawh hmain ka ban rekah a rawn vuana,Kawngkhar lamah min pawt kal zui nghal zat.Hnial buaiin awmzia a awm dawn chuang lo tih ka hria.Thli a rawn thawa,a vawt tih piahlam a ni ringawt.

Kawngkhar a pawt hawnga,ka zui luta,Kawgkhar bula Switch a hmet ri khap.A eng ta iar.Ka ban a vawnna a thlaha,vawt ti zetin ka inkuah khawr nghal hlan mai.Ka awmdan hrethiam niawm takin a then suk.

‘Inthlak la,chuan i mu nghal vang vang dawn nia’a ti sup.

‘Khawiah nge i mut ang?” ka rilrua lo lang hmasa ber ka sawi chhuak nghal tawp.A mit a tizim suna,nuihzatna niawm tak a hmelah a lang thei bawk.

‘I bulah anih loh chuan khawiah nge ni ang? Khum pakhat chiah a awma’ a then suk bawk.Kei erawh ka ip chawih thung.

‘Aih…Chutiang a theih loh’

‘Engvangin? Savio vangin maw?’ a hmelpa zet chu ka ena,tun lawka nelawm leh inthlahdul hmel kha a bo leh hmiah tawh.

‘Chutiang ka sawi tum a ni lo..Ih…’ sawi zawm mai tur ka hre lo.

‘Ok,tunah chuan thawmhnaw ro i hak phawt angai..Anih loh chuan i khua a sik mai ang’  tehdaih chuan a.Mahse tlem chuan a nelawm leh ta deuh.

Roomah ka zui luta,a thawmhnaw dahna lam a pana,a hawnga..Min rawn en leha.

‘I hak tur ka pe dawn che nge i thlang dawn?”

‘Ka lo thlang ang..Chuan,i lo va chhuak thei angem?” a mitah tak ka en lui ngar bawk.A hmui a petsawi zauha,amak thin.Ka awmdan a tidanglam leh ta tlat.

‘Ok…I duh dan anih chuan…’ a tita sup.Ka thaw huai mai.

A kal veleh kawngkhar ka khara,ka inhlip nghal sawk sawk.Ka Bra leh Panty nen lam a huh vek.Ka hlip tel ta nge nge.Hak luih chi ni miau hek lo le.Chhuatah ka thehthlaa,ka kalsan tawp.A thawmhnaw dahna ka pana,a awmna lai ka hre vek tawh.Nikhat thil lekah a  thlak danglam dawn lo tih pawh ka chiang.T-shirt ka phawrhchhuak,ka ha a.Pyjama ka lachhuak leha,ka ha leha.A kawng suihna nghet zetin ka suiha,atthlak lutukin ka ngaihtuahnaah thil a rawn luta,ka lu ka thing nawk ringawt.Darthlalang hmaah ka dinga,ka thawmhnaw hak a lian dun lam hret ve ve.Mahse, pawi ka ti chuang lo.

‘I zo dawn tawh em?” kawngkhar rawn kik pahin a rawn ti a.Ka insehruh lehnghal teuh ringawt.

‘Aw,zo a nimai..’

‘Um..Anih chuan i thawmhnaw huh kha i zar loh chuan…’ a rawn ti leha,a awmdan chuan mak takin nuam min tihtir veng veng thei.Hahthlak hian a..He mipa sual leh luhlul lutuk hi min kiss avang mai khan ka duh thar ta thut zawk nge mawni hrep le a..

Ka thawmhnaw ka zara,ka panty ka zar ngam ta ngang lo.

‘Khumah i mu thei ang…’ Kitchen kawngkaah a rawn daka.Blanket a keng bawk.

‘Angai lo.Nangmah mu zawk rawh..’

‘Mangtha le..’ ka sawi a haider hmiah.

Ka tawng leh tur pawh nghak chuang loin a kalsawn zui daih bawk.A mood lah a fuh tehchiam lo a ang.Minute tlemte danah a inthlak danglam thut thuta,hetiang mizia hi Savio emaw an cousin mipa ka hriat zawng zawngin an nei ve lo.Engvanga danglam em em nge anih ka hrethiam hlawl lo.

Ka mu meng kar mai.Diktak chuan ka mut a chhuak hlawl lo.Ka mit ka chhin apiangin ka mitthlaah Ramsey-a a lo lang ve nghal zat zela.A hmui lum ham hama min fawhna kha ka ngaihtuah zawng ringawt pawn ka awmdan a ti danglam titih zel bawk.Huizzz..Engvanga min fawp nge anih ang? A bialnu ang hrimin min en bawk niin ka hria.Mahse,zep rual loin nuam ka ti chu anih kha a..Infawh mai mai pawh  khatiang khawpa a zei anih chuan sex min hmanpui tum ta se..Ka ip chawih ringawt..Ka tang zo angem ka hre lo.Kan inhriattirh phat atangin kan inmil lo a,kan in ei lo tawn ve ve.Khatiang hunlai kha nireng se ka tan a tha daih zawk.Mahse, ka nunah a hmasa ber chu a nita reng reng mai.

Ka phone ka hmet enga,dar 3 a hnai thuak tawh.Ka pa,nidawn tak..A vawikhatnan ka awmna chin hria se ka duh ve ta tlat.Scooty ka kengchhuak daiha,zingah dawr hawng hmasa tura Thanga kal tur a buai vek dawna,ka ruk chhuah anga a hriat ka duh lo.Bakah Tetea sawn thlak a hre thuai dawna,buaina dang siamsak ka duh rih lo.

Call hun a ni lo tih ka hria,msgin ka pu zual thut thu leh Damdawiinah ka kal tih ka hrilha,a tlai tawh vanga kaitho lo ka ni tih ka sawi bawk.Mahse, tunah a zia leh tawha,ka riak nghal anga, zingah ka pi ka tlawh ang ka ti bawk.A awih angem ka hre lo.Mahse,a zia leh tawh ka tih avangin Damdawiiah a kal loh ka beisei ve tawp.Naktukah Putea hnenah chhuanlam dang ka siam leh mai ang.Dawt sawi hrat ka ni ngai lo,dawtsawi lo tawp ka inti thei chuang lo.Mahse, tun tumah hi chuan dawt ka sawi ngei ngei a tul tlat.

Ka thaw a chham titih,ka mengchhuak dawna.Ka mengthei miah lo.Ni lo,tiang hian ka awm fo tawh.Enge thleng zui tur pawh chiang takin ka hria.Tlanchhiat tumin ka pen dawna,ka pen thei lo..Ka mumang a ni tih ka hrereng,mahse ka che thei chuang lo..Min rawn bana,tu nge anih ka hre lo,min rawn khawih fuh titiha,ka rak tuar bawk..

‘I tha em?” ka luah a rawn sawia..Nghet zetin ka kuah nghal vat.Tu nge anih ka ngaipawimawh lo,tunah chuan tuemaw tal ka mamawh.Min rawn kuaha,ka samah a rawn fawpa,zawi tein min hnem nan a phun supa.Ka hnungah a chul hauh hauh bawk.

Engchen nge min kuah ka hre lo.Ka taksa khur hlawk hlawk a reha,mahse vawt ka tihzia chu pui tak a ni ringawt.Ka hawichhuaka,Ramsey-an min lo thlir vang vang.

‘I tha tawh em?”a ti sup bawk.Min kuahna a thlah dul chuang lo.Talchhuah pawh ka tum bik hek lo.Ka thlamuang miaua.

‘Aw..Ka tihpalh lutuk,ka tiharh che a’ ka inthiam lo tak tak.

‘A ho lutuk..Muhil rawh,ka lo veng ang che..’

‘A vawt lutuk a…’

‘I khua a sik em?”

‘Ka hre lo…’’ ka ti mawl tawp.

Ka chalah a rawn khawih dawn emaw ka ti a, a rawn kun hnaia,a hmui lum ham hamin a rawn si a,ka mit ka chhing ta ngawt.

‘I khua a sik anih hi…Damdawi ka’n la ang’ tih pahin a inlahranga,a tho zui nghal vut.Ka hawi chhuaka,khua a lo eng tan tawh.Ruah pawh a bang tawh bawk.

‘Ei rawh le…’ a rawn ti a,ka thuchhuaka,damdawi min rawn pe a.Hnial loin ka ban ve mai bawk.Ka naupan laiin khuhhip ka vei thina,a hrehawm zia ka la theihnghilh thei lo.Tlang hrileng ka man awlsam em em bawk.

‘Muhil rawh le..I harh leh chuan i zia hawk mai ang’a ti dam thlup.Ka puansin a rawn siam thaa.A ding mara,kal lo tura ngen ka chak rum rum.Mahse, nakina ka inchhir lehna tur engmah insiam ka duh lo.Tunah chuan puih ngai ka nih angin min puia,mahse nakin lawkah chuan ka hriat thin Ramsey-a kha a ni leh dawn tih ka hming ka hriatchian tluk zetin ka chiang.

Khum a che dat,rang zetin ka inleta,Ramsey-a a rawn mu fel ve chiah thung.Ka puansin a rawn pawt kaua,min rawn kuaha.A bawp sei thlurhin min rawn khan nghal bawk.

‘Ngatinge?” ka ti lawi rat mai.

‘Shh..Muhil rawh..Ka mut a chhuak ania’ a ti sup bawk.

Thuawih zetin ka ngawi ta hle hle.A dar hlai hlapah ka lu ka nghata,a  awm zawnah ka kut ka dah thung.Ka kawngah a kuaha,a muhil nghal tih a thawk danah ka hrethei.Ka mit ka chhinga,ka hrethiam lo.Tiang em em a thlamuanna hi ka nunah ka la tawng ngai lo.

Ka harh leh chuan khua a lo eng at tawh.Ka inlet a.Ramsey a lo awm tawh lo.Ka khawsik a awm tawh lo.Lukham a delh khuar deuh chu tim daiin ka kawih de de a.Nizan thil thleng kha a bul tanna a tha lo,mahse a tawpna erawh a hlimawm ka ti lo thei lo.Mahse, engvangin nge ka bialpa niawm hrima ka ngaihtuah ngawt ni a?

Khum atangin ka chhuka,ke lawngin Kawngkhar ka pana.Ka hawnga,mahse tawng thawm ka hriat rualin ka pen lai ka tawp chawt.Ka hawng zau hreta,Living room ka hmu thei.Min hnungchhawn zawngin Tukverh bulah Ramsey a dinga,Agnes-in a kawngah hnunglam atangin a kuah a,an inhmeh takzet.Mahse, ka awmdan a dik lo.Ka hriatthiam si lohin ka chhungrilah na a awm tlat bawk.Ka tawlh let hrat..

‘Zorini hi ka thik lek lek ania…’ Agnes-in a tihriah ka ding leh chawt.Ka pen hnai leha,ka dinna atangin chiang takin ka hmu thei bawk.Mi tawng ngaihthlak ruk mawi loh zia ka hria,ka ti ngai hek lo.Mahse,Engvangin nge kei min thik ngawt ang ka hre duh tlat.

‘A atthlak em mai…’ Ramsey-an a ti sup. Nia,min thik kha a atthlak takzet.Mahse, ka na tho..

‘Dik chiah,khatiang hmeichhe hurherh satliah kha ka thik te chuan a zahthlak lutuk ang.Mahse i  bulah hun a hmang tlata,kei aiin a chang tam zawk che a…’ a nui leh hak.

‘A chhan i hria alawm’ Ramsey-an a ti sup.Enge a chhan ni ang?

‘Um,chuvang takin ka tuar hram hram alawm…Mahse a tawp tep ang tiraw?” a ti leh a.Enge tawp a tawp lo tur ni ang?

‘Maithei..’

‘Ok..Sex hmanpui loh i tiam kha..Anih loh chuan Savio ang bawkin kha hmeichhe lepchiah leh hur tluk leka hniamah i in dah ang tih i hriat kha…’

Ka dinna hmunah ka kein zung a kaih ta emaw tih turin ka che thei der lo.Hmeichhe lepchiah ka ni lo..Savio nen engmah kan ti hek lo.Ka kut ka humruha,ka hmui ka pet fan fan bawk.Engtin nge a chhan ang tih thaw dep depin ka ngaichang a ni ber.

‘Kal tawh la a tha in ka hria’ Ramsey-an a tita daih.

‘Um.nia..A lo harh hunah min hmu palh ang..’ ngaihthlak nuam zetin a nui hak hak.Ka awm tih a lo hre vek,nizan thil thleng pawh kha plan lawk vek..Ka rap lutuk..

A kuahna a phelha,inhma tawnin an ding duna,a dingdihlip a.Ramsey-a nghawngah a uai titih bawk.Ka en thei thlawt lo,ka luak a chhuak ut ut bawk.

Chapter- 5

Thawm dim thei ang berin khum lam ka pana,ka a chhuih a ni ber.Savio laka min dah hrang turin tiang khawp hian a che ania.Kan inzawmna lah Mipa leh hmeichhia in ngaihzawnna ni loin thian leh nuta ang a ni zawk.A bialnu hriatpuina thlapin ka chungah tiang hian a che a.Ka ten lutuk.A duh a hmu hauh lo ang.Savio ka hrilh ngei ngei bawk anga,a u a hlau tih hre mah ila min pui tho ang tih ka chiang.

Kawngkhar a ri rak,ka insehruha,hawi let lo turin ka in thunun tlat bawk.Blanket ka thlep fela,a pen thawm ka ngaithla kar.Mahse, ka hre lo der tlat thung.

‘I harh tawh maw?” ka hnung mai atangin a rawn ti a.Min hnaih thawkhat tih ka hrethei.

‘Um..Harh chiah..’ ka awki zangkhai vah mai chu keipawn mak ka ti zawk.

‘I zia deuh tawh em?” a ti leh supa.Nichina an inbiakna kha chu hre lo ila chuan min ngaihtuah vanga min zawtah ka ngai ngei ang.Mahse,engkim ka hmu a, ka hre bawka.Ka ten hluah hluah zawk.

‘Aw..Tha lutuk…’ a hma ang bawkin ka ti zang leh vah.Ka hawi let chuang lo.Blanket ka dah pheia,Lukham ka siam tha leha,ka ding mara,ka tawlh let turin ka va ngheng titih.Rang zetin ka inhera.Mahse, ka tawlhsawn hmain ka kawngah a rawn kuaha,amah si chetin min pawt beta,a thaw ham ham bawk.

‘Min….’ ka sawi laklawh laiin vanneihthlak lutukin ka phone a ri ta hlauh.

Ka melh chho haa,ka phone lamah ka thle baka,ka nui lui sang bawk.Ani pawn ka lakah Game a khel anih chuan kei pawn eng vangin nge ka khelh ve mai loh ang?Tun hnaiah that a chhuah der thuta,a farm houseah min awm tir a phal thut bawka,midang tumah a awm tir ngai lo niin Savio khan a sawi a,ka awm a phal mak a tihzia ka hmu bawk.A lo mak reng reng lo,hla taka min dah turin a zahawmna leh a bialnu zahawmna tangkawpin kei hmeichhe luhlul satliah hi min bei ania.In nei rengin helaiah min hnaih duh niawm takin a lo kal nawn leh a…Huizzz,i sual man i hmu dawn khawp..

‘Ka’n chhang lawk ang chu…’ ka ti halh.

Anchhe lawh niawm takin a phun sup thung.Kan inhnaih hle nangin a sawi ka hrechiang thei lawi lo.A ner nawka,hreh hmel zetin min thlah ta nge nge.Hollywoodah kal se,a film hmasa berah Best Actor Award a dawng chiang khawp ang.

Ka phone ka lakanga,ka vanneihna kal tluan zia a mak zawk.Tukverh lam ka pan nghal daih,kan in din hnaih lutuk chuan Savio tawng a hre phak maithei.Zawi se se a thusawi a thiam der si lo.

‘Hey,Savio…’ ka aw a phurna lang chu ka tihluih pawh a ni lo.

‘Khawnge i awm?” a rawn ti a.

‘Khawiah nge ka awm anga? ‘ ka nui hak.Ramsey-a ka ena,hriatthiam har zetin min lo en run.A kekawr ipte a zen thun bawk.

‘Ka hre nang,Damdawiinah i kal dawn em?”a rawn ti leha.Ramsey nen kan awmdun tih hria se mak a ti nasa dawn lutuk tih ka hria.

‘Kal ang,I lo kal ve dawn mi?”

‘Aih,eng lo..I hman chuan thil min leipui la ka rawn ti dawna.Chuan tlaiah Adeline-i birthday lawmnaah i lo kal nghal bawk anga’ a ti a.Adeline-i hi a u fanu naupang zawk a ni a.Kum khat a tlinna tur a ni bawk.

‘Um,ka lo kal ang.Mahse, min rawn lam la,chuan ka pa hnenah ka kalna tur ka lo hrilh anga’ ka ti leha,Ramsey ka ena,ka nui lui leh sak bawk.A bu nghuta,a hmelah Savio nen kan inbiak vanga lawm lo hmel hmuh ka tuma, mahse chutiang engmah a lang lo.A nelawm lo hi chu a nihdan pangngai ve reng a ni a.Savio vang lam a ni lo tih ka chiang.

‘Hey…I piangthar a mi a?” a rawn ti nghek.A demawm loh,ka kalna tur min zawt anih loh chuan ka sawi khat lutuk.Ani aia hrechiang an awm lo.

‘Teh nang,ka dah aw..Bye’min chhan let hmain ka off nghal daih.Zawhna a ngah dawn lutuk,Ramsey awm laia chhan chi loh vek tur lehnghal.

‘Enteh,ka kal angaia’ Ramsey lam hawi pahin ka ti a.A bu nghut ringawt.

‘Ka thawmhnaw a huh bawk sia,I thawmhnaw hi ka ha law law thei angem?” ka ti leh a.

‘Um,nei rawh..’ a ti vawt ruih.

‘Ahh,ngatan nge ka tih anga? Natna tha lo i kai I hlau deuh ami?” pawisak nei lo hmel lutukin ka nui hak bawk.Mahse, a mitmeng dur deuh khup leh a hmela engemaw danglam zawk lang kha rei lo mahse ka hmu hman tho.

‘Nei rawh…’ a ti nawn leh hmuk.

‘I duh tawh loh chuan ka paih mai ang,ka ha zui dawn chuang lo a,a lian lutuk..’

‘I duh duhin ti la,ka ngaihven lo..’ a inhera.

‘Anih chuan ka su fai anga,ka rawn thawn let ang che’ ka tilui chak zek zek.

‘Angai lo..Ka duh lo,i sawi ang khan natna tha lo..’ a sawi zawm duh lo,a dar a ti chhing uk a,a ngawi ta daih.Mahse, a sawi tum ka hrethiam tho.

‘Um,ka hrethiam alawm,diktak chuan nizan khan ka huh nasa lutuka,Panty nen lam ka hlip veka.I tan hak nawn leh a nuam lo vang,bakah keima tan pawh a nuam bik lo a’ engvanga sawi nge ka nih ka hre lo.A mitmeng zim ta deuh sawt leh a inpetruh fun mai chu ka hmuh hmaih hauh lo. 

‘Kal tawh la a thain ka hria’ ka beisei loh lutuka min chhan takah chuan ka chil ka lem khalh mai.

‘Nia,ka pa biak ka ngai dawna.Tlaiah kan inhmu dawn nia..Anih phawt’ ka then lui sak bawk.

‘Maw? ‘a ti sup.

‘Eh,Adeline-i Birthday lawmnaah mawle..’ ka mengphar lui ak mai.

‘Um..Ka hmuh danah che hian ka sawi kha i ngaipawimawh lem lo a ang’

‘Eng ber? I sawi teuh sia’

‘Savio hi i kalsan dawn lo anih chuan nunphung pangngaiin nung rawh.Anih loh chuan…’

‘Anih loh chuan eng nge i tih ang?”

‘I ngaihtuah thiam phak bak a nasa mawle’ a then suka.Mahse, a mitmeng hlauhawm zetah chuan a nuih a za miah lo tih a lang reng thung.

‘Lawk,min hrethiam la.Puitling ve ve kan nia,keimahni kan inchingfel thei.Savio i ngaihtuah vang a ni tih ka hriaa,mahse kan inthen leh then loh chu kan thu thu.Bakah a hmain ka sawi tawh kha,tuna ka awm dan hi Savio hian vawikhatmah a la sawisel ngai lova,chuvangin siamthat tumna ka nei lo.A sawisel anih chuan thuhran…A tha em?” ka tita duah.Ka tawng hnem bawk aniang,ka sawi zawh rualin ka thaw hak mai.

‘Min vau tihna a ni em?” a ti hmuk.Hriatthiam har zetin min en ngur bawk.

‘Ahh…Vau ang zawnga kan sawi dawn chuan i awmdan hi min vau a ang zawk.Diktak chuan Savio hian kan pahnih inkarah i lo inrawlh tih a hriat i duh lo tawp ang” ka ti dam thlapa,ka nui lui leh sak bawk.

‘Duh lo maw? A hrereng alawm’  a ti a,a hmelah hmuhsitna niawm tak a lang thei bawk.Kei erawh sawi leh mai tur hre loin ka ding khawng lah ringawt.

‘A thawng deuh che law? Hemi chungchang ka sawi hmasak tum khan i biak tur thu i sawi kha,kei pawn ka bia ang ka tia.Ka be ta reng bawka..’ a hmelpa zetah chuan hnehtu intihna a lang chhuak thei hial.

‘A lawmawm hlauh chu..Engtin nge a chhan che ka hre lo nangin i tlawm mai loh danah hian min kalsan a tum lo anih ka ring ngawt a’ ka thle bak.A mithmul a ti sang uk a,a hmui hnuailam a petsawi zauh bawk.

‘Dik chiah..Mahse, a sawi dan chuan kalsan che a mamawh lo.A chhan chu thian chauh inni a ti a..Huh,a tina che em?’ a mit a de sawr sawra, nuam a tih hmel hliah hliah bawk.Chhan tumin ka ang hman ziau,mahse a phone a rik takah chuan ka chip lehnghal hmiah.

‘Hello…’ a ti sup.Lehlam tawng a ngaithla vung vung.

‘Dar 1ah lo sawn rawh,chuan chawhnu lamah engmah Programme dang ka nei thei lo.Ka mimal thilah kalchhuahna tur ka nei..A chiang em?” a ti leh nghut nghuta,a hnuaia thawk tu emaw ber a ni ang tih ka ring thiam mai.

‘Le…sawi zawm la…’ a kekawr ipte a phone thun pahin a ti hmuk.

‘Engmah sawi zawm tur ka nei lo’

‘A ni maw?” a nui leh hawk.Min rawn pan hnaia,ka tawlh hnung hrat.

‘Savio sawi dan ka hrilh che a,mahse ka pawm lem lo,ka mita ka hmuh hi ka pawm zawk’

‘Enga?” ka ti vak ringawt.

‘Eng ni lo e.Thian nihna ngawt aia thuk mawle.Ka sawisel hauh lo ania,ka sawi tum zawk chu ka Patea te nupa duh ang ngei Hmeichhia nih tum rawh’ a ti leha,a sawi ring lo.Mahse, a chiang kek kawk hle thung.

‘Ka kal phawt ang,ka Pain min nghaka’ ka tita zawk.Kan inhnialna hian awmzia pakhatmah a nei lo.Bakah Savio nen kan inzawmna lah engmah chutiang lam hawi a ni hek lo.

‘Ok..I thu thu le,mahse ka enzui reng che tih hria la’ teh talh a.A enzui ka ngai lo nasa lutuk.

‘Ka lawm e’  a langah erawh ka ti hmak.Kawngkhar lam ka pana.Nuihzat hmel zetin min thlir zui reng tih ka hriaa,ka hnungchhawn rualin ka hnungzang a mur cham cham thei bawk.

Damdawiin pan hmasak ka duh viau rualin ka thawmhnaw hakin a zir lo lulai lutuka,tihngaihna a awm thak lo.In ka thlen veleh Room lam ka pan ding nghal nalh.Kan nula Kitchen lama a zai rat rat bak thawm dang a awm lo.Ka pa leh ka nuhrawn an kal tawh ngei anga.Tetea lah dar 11 hma chuan a tul fe loah chuan a tho dawn miah lo bawk.Room kawngkhar ka hawnga,ka thawmhnaw hak lai hlih thuai thuai ka duh ber.Ka paih satliah lo ang,ka hal vek zawk ang.Kawngkhar bulah ka pa a khuh ri khauh,ka hawi pheia.A rawn lut ve chiah bawk.

‘I lo haw tawh maw? ‘ a rawn ti luta.

‘Um,haw tawh.I kal tawh dawn a mi?” ka ti satliah,a hmela mak tihna niawm tak ka hmu thei.A demawm hran lo.Tha taka ka biak tum a tam ta lo em a tin ni.

‘Aw.Thanga chauh a awma,I pu chu that lam a pan em?” a ti a.

‘A zia deuh..Ka inbual anga,ka kal lehnghal ang ka tia.Chuan,tlaiah Savio u Fanu Birthday lawmnaah ka kal duh a’

‘Kal rawh,haw tlai lo la..I nu leh Tetea an zin bawk nen In lamah awm tam a tha’ a ti a, Khumah a thu a.

‘Maw? Khawnge an zina?” ka ti ha mai.

‘Lungleiah,Tetea thianpa nu a borala,I nu khan chhungte tlawh paha kal ve a remchang atia,a kal ve anih kha’ a ti leha.Ka bu nghat,ka nuhrawn hi Lunglei khua a ni a.Mahse, Aizawlah an nulat laiin an rawn pem phei thung.Ani ka ngaihtuah peih nek lo.

‘Ih..ka ATM card hi hman ka duha..’ ka tita zawk.Min thlek vang vanga,min ringngam lo tih ka hresaa,chuvang taka Block tir pawh a ni bawka.Mahse, ka mamawh lutuk.Savio pawisa ringawt ka ring a.Thil nuam tak a ni lo.

‘I pa Rina ka lo call ange,I hmang thei mai ang’ a ti ta nge nge.

‘Ka lawm e..’ ka ti sap.Min hre ngai miah lo kan bulah awm se chuan Pa leh fa ni loin hmelhriat satliah,in pawh lo em em emaw min ti ngei ang.

‘Tha taka i awm ka duh bera,ka tan chuan a hmasa ber i ni a,I hlut zia hi suma tehkhin chi a ni lo.Chuvangin hrem che angaih hian hrehawm ka ti thin a’ a aw a dam thlap.Hmana ka pa thin kha ka hrechhuak vawng vawng.Ka awm that duh loh tak chinah hian mumal taka kan titi dun lohna a rei tawh.

‘Ka hrethiam alawm..’ a bak sawi tur ka hre lo.

‘Nuhrawn hrawn hi a nuam lo ang tih ka hria,mahse kei ka awma,I duh apiang min dil theia.Chuan,Mambawih..Hmana ka hriat thin ka fanu kha ka hmu leh duh’ a ti leh duah.Ka bu nghat ringawt.

Ka pa ka huatna aiin ka nuhrawn ka huatna sang zawk.Ka pa hi chuan ka awm that duhin min hrem thina,anih loh chuan ani aia pa tha an awm lo.Mahse, ka nu chunga thil thleng fair lo em em mai kha hriatchhuah a tum lo ni a ka hriat tlat avangin ka haw lo thei lo.Ka nuhrawn erawh chuan Hmangaih tak anga langin Ka pa lakah pawh min chhan thina,mahse a tih thin dan a sim dawn lo.Ka pa awm loh veleh engtin emaw min tawngkhum leh ngei dawna,chumi hunah chuan  thawpik vangin ka tlanchhuak leh ngei ngei dawn tih ka chiang lutuk.Ka nuhrawn a damchhung chuan hmana mi kha ka ni leh thei tawh ngai lo vang tih ka chiang.Mahse, sawichhuah ka tum chuang lo.

Car ka mamawh leh mamawh loh min zawta, ka lu ka thing leh mai.Savio a lo kal dawna,a rualin ka chhuak thei vek.Anih loh pawn Scooty a awm tho a,Thanga’n a keng lo ta sa sa.Ka hmang nileng thei ang chu.

Ka pa chhuah veleh Kawngkhar ka kalh nghala,ka thawmhnaw hak ka hlip sawk sawk.Ka hlawm nawk nawka,Bang kil lamah ka vawm phei ta daih.Ramsey  thawmhnaw ni mai loin amah ni se ka ti takzet.A tawngkam na lutuk mai bakah Agnes-i nen an thusawite kha ka bengah tun lawka mi ang maiin a ri nawn awn awn a,ka beng ka hup ta ngawt.Inah ka leng lo niin ka inhre fova,ka hrehawmna zawng zawng hrethiama min phatsan ngai lo tu chu Savio chauh a ni a.Mahse,ka neihchhun pawh min laksak an tum leha,ka inseh ruha,ka chan dawn lo bur.Eng kawng mahin ka chan dawn hauh lo.

Shower hnuaiah ka dinga,ka mit ka chhing vang vang.Mahse, ka mitthlaah Ramsey-a a lo langa,a zei zia kha.Ka hmui ka khawiha,ka awmdan a dang titih.Mi te hi kei ang bawk hian Mipa nen an in kiss hmasak berah tiang hian an ngaihtuah zawngin an danglam ve angem ka hre lo.Mahse, kei hi chu ka danglam zel chu ania.Ka kut hnunglamin ka hmui ka hru tawk.Ka nui chhuak hak mai,eng ang pawn silin hruk reh leh tum mah ila ka chhungril ami ka hru reh ngawt thei dawn lo.Darkar reilote chauh nimahse a bula ka thlamuan zia kha haider luih chi a ni lo.Engpawhnise Agnes-i kha hmeichhe vannei tak a ni tho tho mai.An inneih hunah phei chuan tihderna tel lo a Care na zawng zawng a chang vek anga.A tider mai mai mah khatiang anih chuan a tih tak tak phei chuan eng tiang taka Caring ni ang maw? Huizz..Ka nunah a vawi khat nan thil tih thulh thakin Mipa ka ngaihtuah ve ta chu ania.Chu pawh midang ni loin Ramsey ber kher..

Dar 12 hmain Savio a rawn thlenga,nidang ang bawkin a hmel a thar leh sar.A hmelchhe lova,a pian a nalh bawk.Party naa kan kal chang hian Hmeichhia in an duh thei viau.Han kawp lawp lawp pawh a nei fo.Mahse tumah thutaka kawp zui a neih pawh ka hre lo.

‘Khawiah nge kan kal hmasak ang?” ka ti a.

‘Damdawiinah chuan kal ila..Chuan,tlai lamah Birth day lawmnaah a nimai’ Bike a lawn pahin a ti a.

‘Thil min leipui rawh i ti sia’ mak ti fein ka ti a.

‘Angai leh lo.Ka nuin a lei tawh.Lawn la…’a ti a, seat hnung a beng thak.

‘Um..Mahse,ruah a sur leh maitheia,Motor i keng zawk lo a ‘ ka ti a.

‘Inah kan let leh dawn alawm.Lawn teh’

Damdawiinah kan kala,a lo harh tawh.Zing lamah biak pawh an lo be thei.Mahse,Dcotorin chim rih loh a tha zawk a tih avangin ICUah an lo la daha.Nihnih hnu velah chuan Wardah an sawn chhuah theih mai an beisei bawka.Ka thaw huai mai.

Ka hlauh ruk ang ngeiin Savio te Ina kan awm laiin ruah a tla ta nge nge.Ka pi sawi ka hrechhuak fo mai.’Hman lai chuan fur laia piangte hian mei an chhem alh thei lo kan ti thin a,nang pawh Augustah i pianga, hmalai mi chu ni la mei i chhem alh thei lo khawp ang’ a ti thina,ka nu te an nuih vak vak laiin Naupang tih takah ka huat tawk a tling viau ziah thung.Tunah chuan khang hun laite kha ngaihawm an chang ta vek chu ania.

Kan thlenin an lo awm nual tawh.Savio nen kan inkawm nasa bawka a u nen pawh kan inpawh viau.An inah kan kal fo bawk.Savio chhungte an lo awm nual tawh.Ka hawi kuala,mahse ka zawn ka hmu lo.Thawveng hawk awm tak ka nih laiin ka thawveng chuang der lo.

‘Enge dik lo awm a?” rawn thut pahin Savio an a rawn ti a.

‘Engmah..Ngatinge?” ka ti satliaha,ka hmalam kawt zawla Naupang infiam lam ka thlir dauh dauh bawk.

‘Nichin atang khan zawn nei i ang lutuka’ a ti a.

‘Teuh lo mai,chutiang a ni lo..Haw hma ka duha’

‘Ngatinge?”

‘Ka pa chiah a awma..Eee,Tetea a lo hawa’

‘I sawi awmzia ka hre lo e a.I pa amahin a awma,Tetea a lo haw a’ a nui hak.

‘Aw,haw e..Tetea leh a nu an zina..Ka pa chiah inah a awm ‘ ka then sak.’Ka nu’ tiin ka sawi ngai lo tih a hria.Mak ti hmel a pu lo.

‘A lo haw chauha,an zin leh a maw?”

‘Um..Chuan maw…aaa.Ngai leh lo mai’ ka ti leh lawi.Tetea sawn thlak sawi ka tum zeta,tul ka ti leh lo.A sawichhuah ka rin vang erawh a ni lo.

‘Savawm i duh em?” a ti leh a.Ka lu ka thing mai.

‘I va fel sawt ve..I pa amaha awm i ngaihtuah ta riau bawka..Min en teh..’ a ti a, ka en ve mai.

I khua a sik a ni lo maw?” a ti leha,a nui a.Ka then ve sak.Ka sam chhawlleng thliin a chhem len dar dar chu ka bengah a rawn zepa..A vawikhat tihna a ni lova,huat enah ka en lem lo.

‘Ka tha reng..Fel ka chak ve ta aniang’ ka then sak.A nui ve a.

‘Anih chuan ka nu tan a lawmawm hle anih chu’ ka mengphawk hra mai.

‘I hria maw?” ka ti mawl tawp.A bu nghauh.

‘Mama’n min hrilh alawm,mahse…Nang hi ka thian i ni tih ka lo sawia..A ni bawk a,tiraw?”a ti a.

‘Aw,bakah ka tan chuan unaupa tha ber i ni bawka’

‘Ka tan ve chuan maw THIANPA…’ ka ben hlauin a tawlh hla nghala,a nui hawk hawk,keipawh ka nui ve hak hak bawk.

‘I tih tum ka hria alawm.Mahse,ka bialnu anga an lo ngai che kha nuam ka ti tho mai.I chhe lem lo a’ a ti leha,min chhaih thinrim a tum tih ka hria.Ka nuia,a benga pawh tumin ka bana,a thle sawna.A nui sang bawk.

‘Kal ang,ka ril a tam lutuk..’ a ti leh a,ka dingchhuaka,ka hawi kuala.Kan piah lama Ramsey-a lo ding ka va hmu chiah.Hriatthiam har zetin min lo en run bawk.A lo thlen lai ka hre lo.Ka ip chawih mai.Rang zetin ka hawi sawn vat bawk.

Inchhungah kan inzui luta,a thenin chaw an lo ei tan tawh.Savio-a u in ei ve nghal turin min lo ti sawt sawt.Naute Birthday lawmna a ni bawka.Naupang an thahnema,nuam an ti ber in ka hre bawk.

‘Khi khi min lo lakthlak sak…’ ka kawr tlanga rawn pawh pahin hmeichhe naupang awin a rawn ti a.Amah hmuh tumin ka hawi thla vat.Ka beisei loh lutuk a Ramsey fanu,Hani ka hmuh takah chuan ka thaw hak mai.A sam dum hlap chu a dar chung hretah an tan rual hmaka,a chalsam a rual hmak bawk.A hmeltha takzet.

‘Khi khi…’ a ti leha,a kawhna lam ka en chho a.Kan dinna bul thing zarah Sava lem niawm tak a lo tang va.

‘Ok.. lo nghak lawk aw’ ka ti a.Ka bana,ka ban pha lo.

Ka hawi kuala,Plastic chairin ka mit a la chat.Ka va laa,a chungah ka dinga,ka ban leha,ka kut hmawrin a tawk pha viai viau.Ka dingdihlipa,ka ban leha.Mahse, enge thleng hi??Ka dinna chair a ri rawpa,ka eu awrh bawk.

Tla chawrh tura ka inrin laiin tu emawin min rawn pawm  kang ta nawlh zawk...Ka mengchhuak a..Hnai zetah Ramsey nen kan in en ta ran mai.

Chapter- 6

A awm hnai tih ka hre miah lo,Dinning hall lamah an awm vek khan ka hriaa.Tun lawka Chair ka lak pawh khan Puitling dang awm ve chu Nu upa lam, naupang zinga awm ve kha a nimai.Mahse,khawi atang pawn lo kal se ka him phah ta tho chu ania.

‘Fimkhur lo reuh lutuk’ a ti sup.

Min dahthlaa,ka tiril khur dar dar chu tlak ka hlauh vang nge Ramsey huhang na lutuk vang zawk ka hre lo.

‘Ka lawm e’ ka ti sap.Ka chair dinna tlu bal chu ka en a,a ke a lo tliak chu niin.Ramsey awm lo se chuan ka tla na viau maithei.

‘Enge tih i tum reng reng a?” a ti leh hmuk.Ka lawmthu sawina a haider hmiah bawk.

‘Khi khi..’ tih pahin ka kawk chho zauha.Ka hnunglam ka hawi leha,mahse Hani a lo awm tawh lo.Naupang dang ho awmna ka va hawi pheia,a lo awm ve daih tawh.

‘Sava lem khi maw? A awah nuihzatna niawm tak a hriattheih bawk.

‘Aw..Diktak chuan i fanu sawn a duha’ an awmna lamah ka thle zauh.

‘Ok…’a tita sup.

‘Engpawhnise ka lawm nawn leh e.I lo awm hnai hlauha’ ka ti leha,ka nui lui sak.Kalsawn tumin ka inhera,mahse a thilsawi vangin ka pen tur ka tawp chat.Muangchangin ka hawi let a.

‘Eng maw?” ka ti sap.

‘Nichin lawka ka hmuh kha a hmuhnawm khawp mai’a then suk.A sawi awmzia ka hre lo dawna,mahse Savio nen kan infiam lai kha a sawi tih ka hrethiam lehnghal thuai.

‘Ka lawm e ka ti leh mai ang’ ka ti salh.

‘Um,mahse Thian tih lai kha chu in kalsan hla hret chu anih kha’ a ti leh supa.Midang an awm hnai em tih ka enkual te te.Tumah kan tawng hre phak an awm lo.Ka en a,a mitmeng nelawm lo leh tur zetah ka en lui tlat.

‘I sawi dik.Mahse, ka lo ngaituaha.Savio hian nang leh Agnes-i chungchangah engmah a sawi ka ring lo.Aih,sawi ngai lo.Ka bulah takngial pawh a sawi lo.A u nimahla i mimal nun anih avangin a sawi miah lo ang.Chutih laiin a Hero nangin kan chungchang i sawi ngun ta mah mahin ka hria.Puitling kan ni a,kan inkar kan chingfel thei ka tih kha..Engmah lo sawi tawh lo la ka lawm ngawt ang’ ka tita duah.Ka aw a nemin a dam hle bawk.Kei aia upa fe zawk leh min ngaina miah lo tu nimahse ka zah tit tet nachhan tur ka hre bau lo.

‘I sawi zo tawh em?” a ti vawt ruih.Ka thilsawi vang khan a thinrim nge a nuih a za pawh engmah a hmelah a lang lo.

‘Sawi zo..Oh,thil pakhat..Tianga min vaua,min umkual sek chuan duh ai hmain in Family member zingah min lawmluh angai mai ang.Kan pahnih tan hian eng dan mah hi a hlauhawm lem lo tih i hriat ka ring’ ka ti lui leh salh.Tun tum erawh ka tum a hlawhtling tih a hmelah ka hmu ta thung.A kut a humruha,a kekawr ipte a zen ta daih pawh ka hmuh hmaih hauh lo.

‘Anih phawt..Tunah pawh min rawn zawng mek sia’ Savio rawn kal phei mek ka mitmei zauh.Ngeiawm thei ang berin ka nui lui var var bawk.

‘Ka rawn zawng che a..Kal mai i duh tawh em?” zangkhai zetin a rawn ti lawng lawng.

‘I duh chuan ka duh reng..’

‘Anih chuan kal ang.Mam,kan kal phawt dawn.Zorini hi haw hma angaia’ Ramsey en pahin a ti a.Ramsey erawh a bu satliah ringawt.

Kal pahin Hani a chhaih leh riha,Hani tih loh hi an Colonyah naupang an awm lova,tute mai pawn an atchilh em em vek.Mahse, duat rawn ni siin naupang fel leh thuawih zet a ni tlat lawi.

‘Enge Mama nen khan in sawi a?” kan tlanchhuah hnuah a ti a.Amah ang lo takin a thutak viau bawk.

‘Eng lem mah..’ ka ti nghat.Pawn lam ka thlir dauh dauh.

‘Sawi mai mai teh,in inngaina lo tih hre tu tan khatianga lo din dun kha a mak ania aw’a ti leh a.A sawi dik.

‘Enge anih chuan kan sawi i rin a?’

‘Ka hre nang,ka zawt reng che alawm’ a ti hlur mai.Ka en a,engvanga thinrim ta viau nge anih ka hrethiam der lo.

‘Enge i thinrim ngawt a?”

‘Ka thinrim lo.Ka pum a na’ a ti leh hmak.

‘Ahh,a na viau em? Eng natin nge?” ka sawi zawh rualin a nui hak.

‘Pum nat dan chi hrang hrangin a na..Sawi vat teh’ a tih zawm leha.

‘Angai bawk kha a sawi leh a..’

‘Inthen tur tih maw?”

‘Aw..Aaaa,nichiah lo.Keimah hi inchhungchaw mo niturin ka fit tawk lo a ti’ ka nui a.Mahse a nui ve miah lo.

‘Kan inthian thatna bak engmah a awm lo tih i hrilh ve bawk lo mi?”

‘Hrilh lem nang,tianga a thinrimna tura han chhaih kual vel kha a nuam ve lawm’ ka ti duh lek.A thaw hak mai.

Kawngsir zau laiah Motor a tidinga,angaihna hre lo zetin ka en hau mai.Khua a thim titih tawha.Ka pu tlawh kawi leh ka la duh bawk nen ka rilru a hmanhmawh tawh.

‘Ngatinge?” ka ti hau mai.

‘I ngaihtuah ngai em?”

‘Eng?” ka bo tulh tulh.

‘A dik em ka hre lo nangin Mama hian kei ni loin nangmah hi a buaipui che niin ka hria’

‘Maw?! Awihawm loh lutuk’ ka ban ka phar hliai bawk.Mahse, ka kut a rawn vuana.A hum vang vang.

‘Awihawm loh tak angin lang mahse a ni thei tlat.Ngaihtuah teh,hman atangin kan inkawma.Mahse i nel thei miah lo.Ani pawn a ngaina lo che,Inah i lo kal pawn a be ngai miah lo che a.Ka thian dangte hi chu a be chiam chuang lo nangin a hmuh chuan a be ve fo.Mahse, nang chu a be ngai lo tawp che.Chutichung chuan  i chanchin a hre viau lawi.Aih,min hnial suh.A ni tak tak.Vawiin khan kan pahniha kan thut dun lai khan min rawn en reng tih ka hmu ru kar alawm.Chuvang takin ka tilui ve bawka..A nelawm hran loh..’A tita duah.Sawi mai tur hre loin ka chil ka lem khalh ringawt.

‘Engvangin nge min ngaihven ang?’ kan ngawih vang vang hnuah ka tichhuak sap.

‘Ka hre lo..’ a ti hul hak.Ka kut a vawn a thlaha,Steering a kutzungtangin a tlir nghal dar dar.

‘Eh..Kan inneih a hlauh vang kha a ni ngei ang.Ka mizia hi a tha fahran lo mai bakah mi min sawi dan hi a mawi lo ve thei e.Chuvangin kan inkawp lutuk a hlau aniang’ hrechhuak tha inti fahranin ka ti chhuak hliai mai.

‘Maithei,mahse ka ring chiah lo..’

‘Enge a chhan dang ni anga? Keiin min ngaihven pawh ka hre si lo’ ka ti ve thung.

‘Hei pawh hi a ni theia,i hmel chhe lova,i pian a dik bawka.Chuan,mi pangngai tak anga lan i duh loh vang ngawt hian i chhungrila mi pangngai chunglam zia awm kha i thupbo tak tak chuang hleinem’ a tita duah.Kan inkawm tirh atangin tun hi ka landan leh ka mizia tihtakzeta Comment a pekna hmasa ber a ni a.Chu pawh awihawm loh lutukin a tha zawng a ni a, fakna angin a ngaih theih hial bawk.

Ka ban de de a,a chal ka khawih saka,a phu zawk.Tur zetin min rawn en a,kei erawh ka nui hak mai.

‘Eng nge?”

‘I dam lo anih ka ringa’

‘Engvang chuan maw?” a sawi zawh rualin a nui nghal hak mai.Ka nui ve hawk hawk bawk.

‘Thianpa,nang kher hi chuan min fak hi ka beisei lo ve tawk ania,chuvangin i dam lo anih ka ringa’ ka nui leh kar kar.

‘Hmeli..Nghal viau suh.Ka sawi kha dawt a ni hlek lo ania.Mi sawi dan che hi tlemin pawisa deuh la,nunphung pangngai tak nei bawk la chuan Mipa an rawn lang suau suau mai ang’ a ti leh hmawk hmawk.

‘Anih chuan Ramsey sawi ang khan  tuna ka zia hi i ning tihna mi?” ka ti vet hung.A rum hak mai.

‘I va han chimawm tak e aw.Kei ka sawi lo…I ninawm lutuk.Kal phawt ang,hnial hrat reuh bawk si..Mahse, theihnghilh suh.Ka unaupa,vur tlang ang vela sakhat hian a ngaihven che.A chhan erawh chu kan la hre chawp zel ang’ a ti leh duah.Chhan enah pawh ka en buai peih lo.Ka bu liam vel mai mai.

Damdawiinah kan kal hmasaa,zing lam aiin a zia leh hret tih min lo hrilha,ka thaw huai mai.ICU an awm chhung chu Mipa riah an duh avangin riah ve ka tum pawn  min hnial fithla thak.

Vawiinah Ka pu Damdawiin atangin a chhuaka,a kum tam tawh vei nen a tha chak ta viau.Mahse, kan awmrei thawkhat tho mai.Ward a an sawn chhuah hnuah ka riak ta chawt.Hmun danga riak bo ka ni lo bawka ka pa pawh a hlim viau tih a hmelah a lang theia,ka haw chang pawn Inchhung boruak a nuam ta viau bawk.

Mu chungin thil chi hrang hrang ka ngaihtuah kual a,hriatchhuah thut ka nei.Ka thuchhuak hlawl bawk.Tetea chhuk atangin kar a tling leh tawh.Mahse,a sawn thlak chungchang kha tuman an sawi lang miah lo.Nge ka awm loh laiin an sawi zawk ang? Chutiang a ni thei lo.Lo sawi pawh nise chhunah ka haw deuh ziaha hriat loh tur a awm miah lo.Thil tenau a ni lova, thup bo tum pawh nise a bialnu dul a len rualin a darh tho tho ang.Ka pa,Kohhran upa tan phei chuan mualphona tawpkhawk a tling ang,Keia vak rawlai vel ai chuan vengchhung titi a siam fe zawk bawk ang.Mahse, tuman an sawi ka hre lawi si lo.Thil mak tak a ni.

Ka mu leh a,amah Tetea khan a sawi ta lo nge ni ang tih ka ngaihtuaha,amah zawh mai a fuh ka ring ta zawk.

‘I mu tawh em?” a pick veleh ka ti thawr.

‘Teh nang,chaw pawh ka la ei lo.Nge min lo call a?” a rawn ti a.

‘Eh..Ka be duh che,I buai mi?” ka ti ve thung.

‘Buai nang,ka thianten chaw an lo ei dawna.Ka nghak meka,mahse a mak e lawm.Min lo call khat em maia’ a ti leha,ka then sak.A sawi dik.Phai an awm hnuah ka call hi kutzungtang daih pawh a la ni lo ang.

‘Eng lo mawle..Hman zana i sawi kha..Engmah sawi a awm leh si lova’ ka ti leh a.

‘Eng ber? Ka sawi hnem e’ a ti liam puat.

‘I sawi hnem pawn a pawimawh zual bik chu pakhat chiah anih kha..’

‘Eng kha?” a ti awlsam leh mai.

‘I sawn thlak kha mawle..’ ka pehhel chiam peih lo.

‘Eng maw? Chutiang ka sawi amaw?” a ti heu mai.

‘Sawi e..I uang miah lo chu anih kha…’ ka lawm chiah lo.

‘Naaa,U..Ka fiam che nih kha.Karkhat lek chawlh ka neia,Ben-a vangin ka lo haw ve mai mai alawm’ a rawn ti leh a.Ka hmui ka pet nghek.Ben-a hi a thianpa,a inluahpui thin a ni a.Mahse, tunah chuan an luah dun tawh lo.

‘Anih chu a..’ ka ti hmak.

‘Ka ti tak tak ania.Ka fiam mai mai che anih kha.Ka lo haw tuk lawkah a Nu pawh a borala,kan va kal kha’ a rawn ti leha.Nidawn tak.Ka nuhrawn nen an kal ngei tak kha mawle.

Ka muhil thei der lo.Tetea khan engvangin nge khatiang thil serious lutuk hmangin fiamthu a thawh ang? A sawi lai ka ngaihtuah leta,uang hmel a pu miah lo.Tunah a fiamthu a ti awlsam leh et a.Mak tak a ni.Nidangah thlakhat dawn an chawl anih loh chuan a lo haw mai mai ngai lo.Haw sek a ninawm a ti liam mai mai thina,Ka pain a tilui zauh zauh zawk.Tunah a thianpa nu Damloh vangin karkhat lek chawlh a nei chungin a rawn haw a.Nikumah pawh an chawlh laiin a Putea a borala,a lo haw chuang lo.Mahse, a sawi dan leh thil thlen dan a in man thlap tho bawk si.Ni lo.Engemaw dik lo a awm chiang lutuk,mahse enge dik lo ka hrechhuak thei chuang miah si lo.

Ka pu te in ka pan laiin ka phone a rawn ri a.Ka en a,number hlang ringawt.Traffic Point ka tlan pel te te a,ka pick ta chauh.

‘Hello..’ ka ti zangkhai vah.

‘U Zorin,i ni em?” Hmeichhe aw thawp lamin a rawn ti a.

‘Aw, ni e.Tu nge ka biak aw?”

‘Azawmi ka nia,Tetea thiannu..’

‘Um,enge nita?” ka rilruah hlauhthawnna a lo lut nghal zat.

‘Hun i neih chuan hmuh che ka duha’

‘Lawk,eng chungchangah nge?”

‘A pawimawh lutuk,Phone a sawi chi a ni lo..’

‘Ok,khawiah nge min rawn hmuh ang?” ka ti a.Enge min hmuh duh chhan ka hre lova,tu nge anih lah ama insawi chin bak ka hre hek lo.Mahse, ka chhungrilah hmu ila a that zawk ka ring ve tawp.

Dar 1 a min hmu turin ka ti a.Phone ka dah hnuah Sana ka en zauh,dar 11 leh a chanve a pel tawh.Ka pu hruaichhuah lawk angai dawna,Dar khat hma chuan ka hman mai turah ka beisei ve ngawt.

Inhmuhna tur hmun kan sawi ka thlenin Hmeichhe pakhat,Tetea rual vel tur,lian vak lo leh hmeltha zetin min lo au vat.Ka pan pheia,Tetea thiante hi ka hre niala,ani hi chu  ka hre ngai lo.

‘Engthil nge ni?” ka ti a.Thingpui ka tem zauh bawk.

‘Ih…’ sawi mai loin a hawi kual leh rih.Engmah sawi lovin a chezia ka en tawp.Ka hmuh tirh atang khan Hlauh nei niawm takin a ti dek a,a hawi zak zak reng bawk.

‘Tetea bialnu,Mawitei thiannu ka nia.Eng lo..Tetea hian Mawitei rai thu a hrilh tawh che u em?” min thawng dawt thei.

‘Aih,sawi miah lo…’a sawi ngei,mahse Fiamthu a ti leh tlat anih kha.Mahse, ka hmaa thu mek hmelah hian fiamthu a ni lo tih a chiang reng.Mak takin ka thawveng hawk bawk.

‘Thla hnih vel a ni tawha.Mahse…ih,ka hrilh chhan che chu Tetea hian titla turin a ti a’

‘Maw?” ka awih thei lo zawk.

‘Ti tla turin a ti a, mahse Mawitei hian a duh lova.Chuan,hmanni deuh khan i nu nen an inhmua,I pa a lo hrilh tur thu leh Palai an tir ang tih a sawia.Mahse a haw hnuah a pum a na vaka.Naute chu a chhiat ta a..’ ka thaw tha thei lo.

‘Chuan…?” ka ti chhuak thei hram.Ka bag hnuaiah ka kut ka thukrua,ka hum kawp tlat bawk.

‘Pumna satliah anga kan ngaih laiin niminah Tetea nen an inbiaa,Tetea sawi dan chuan ama duhthu a titla angin a puh daiha.Inzawmna an nei tawh lo a ti bawka..’Ka ip chawih thei.Ka nu chunga thil thleng kha ka ngaihtuaha,a uire hauh lo.Mahse, uire angin a chhuak tlat.Ka pa ka biak ngei ngei angai.A hriatpui nge hriatpui miah lo ka hre duh.A sawi dan a zirin ka nu chunga thil thleng ka sawichhuah hun a ni mahna.

In ka luh rualin thil dik lo a awm tih ka hrethiam nghal zat.Tetea chungchang an lo hre tawh nge thildang zawk ni ang?

Kan nula a ding zum zata.Ka nuhrawn mar auhina thu thung,ka Pa erawh ka thawm hriaiin a rawn hawi vut.A kut hnunglamah a suih fel at bawk.

‘Pa-a,hei a lo haw alawm’ Ka nuhrawnin a ti dam thlap.

‘Ngatinge? Thil dik lo a awm em?’ ka chahbi khai pahin ka ti satliah.Ka haw thu ka nuhrawnin ka pa a hrilh kher danah Tetea chungchang chu a ni lo phawt.

‘Thu rawh’ Ka pain a ti hmuk.

‘Maw?” mawl hmel zetin ka ti ha.Ka rilruah ka pu a lo lang vat.

‘Rawn thu la’ ka nuhrawn zawkin a rawn ti a.Ka kal pheia,a thutna lo lam zawkah ka thu fel than.

‘Khawiah nge i dah?” Ka pain min melh chhuk run mai.A sawi awmzia lah ka hre der lo.

‘Eng maw?” ka ti sap.

‘Hre lo der lo mai la,i dahna sawi la.Mamawh i neih chuan ka pe lo ngai che emni?” a ti leh khur khur.Tiang taka ka pa thinur ka la hmu ngai lo.

‘Enge pawh ka hriat si loh chuan engtin nge ka dah anga?”  ka ti ve thung.

‘Pa-a,ani a ni lo ang ka tih kha,hriat pawh a hriat loh kha’ ka nuhrawn zawkin a rawn ti leh a.Thil thlen dan ka man thiam nghal ruak.Nidangah pawh buaina kan neih chuan min chhan ziah miaua.Mahse, tun tumah chuan engmah tihsual ka neih awm ka hre miah lo.

‘Lo ngawi rih teh.I lo tan ziah maia,i tan sual zo anih hi’ ka pain a ti hlur mai.An awmdanah an thinrim tih a lang reng,mahse enge an thinrim chhan ka hre si lo.Mak takin ka nuih a za ta tlat.Mahse, nuih hun a ni lo tih ka hria,ka hmui ka pet a.Manganthlak lutukin ka insum nasat poh leh a zual ting mai thung.

‘Khawiah nge Cheque i dah?” a ti hmuka,buaina chhan ka hriat rualin ka nuihzatna zawng zawng a thlawkbo nghal vek.

‘Cheque a?Ka hre nang’

‘Dawt sawi reng reng suh.Zingah ka kal dawnin Dawhkanah ka daha.Ka theihnghilha,Nang lo tumah Inah an awm lo’ a ti leh a,kei erawh ka thin a rim phat.

‘Ka la lo…’a ri erawh chuan ka ti tawi tak.

‘I lak si loh chuan a thlawkbo tihna a mi? a kal zawk nge?” ka ngawi ran thung.Tun hnaiah Inah ka awm tama,zanah pawh ka Pu ka riahpui tih loh chu ka riakchhuak ngai lo.Mahse, inchhunga thil pawimawh ka ru tihna erawh a ni lo.

‘Tha taka ka zawh lai che hian sawi mai la..’ a ti leh a.Kei erawh ka ngawi tlat.Ka sual em em lai pawh khan thil ka ru ngai tlat lo.Mahse, engemaw hlekah ka tih anih an ring ziah a,thilbo a awm apiangin min zawt hmasa ziah.A hnuah an dahna an hre lo emaw midang zawk an lo ni leh thina,chutichung pawh chuan min rinhlelh an bang thei chuang lo.

‘Mambawih,sawi la.I lak a ni a tih bur loh chu..’

‘Ka la lo.Engmah sawi tur ka nei lo’ ka tho nghal zat bawk.

‘Thu rawh..’

‘Kha cheque kha a pawimawh ania,Luni ka zawta, engmah a hmu lo.A hmuh zawng chu i chhuah dawnin Dawhkanah thil i ei tih a hriaa,chu zawng chu..’a ti leh khur khur.

‘Dawhkana thil ka ei vangin ka la tihna a ni hleinem’ ka kawchhungah huatna a so in a so bulh bulh a ni ber.

‘A tha,tiang chuan i sawi mai dawn lo tawp.Police ko ila a tha.Fanu mi ang lo kawl hi engemaw a tangkaina le?” a ti leh tun tun.

‘U Zual,insum teh.Kal phawt ang,Naktuk zingah kan sawi tha leh dawn nia’ Ka nuhrawnin a ti leh a.Ka pa erawh a rum nghut.

‘Inkhawm pawh hi min ti chak lo,em em lutuk che hian.Inah i awm tam ve a, a lawmawm ka lo tih mek laiin i thil ruk duh chhuanlam mai mai,tun tum chu ka chhuah dawn miah lo che ania,hre rawh,Ka thawnbo ngei ngei ang che’ a ti leh khur khura,ka chhang lo.Chhang tur pawn min ti se chhanna tur ka hre lo hrim hrim.

Ka pa chhuah hnuah Roomah ka chho a,khumah ka thu thla hnawk.Enge tih leh mai tur ka hre lo.Ka tih ni miah loah min puha,chu pawh ka pa ngeiin.Nidangah chuan zu ka ruih vang emaw ka riahbo vangin min haua,kut min thlak thin.Ka thiam loh anih avangin ka tuar mai mai ziah.Mahse, tun tum kher kher hi chu thil tenau ru a inpuhna a ni lo.A fanu hian engvangin nge thil pawimawh lutuk ka ruk ang? Ka nuhrawn lah khan min chhan duh hrim hrim vang ni loin Ka pa laka mark that nan leh vantlangin fel an tih theih nana min chhan mai a ni tih ka hre kar.

Savio ka rilruah a lo lang a.Ka phone ka phawrha,ka call ang nge call lo ang tih ka ngiahtuaha,msg ka thawn ta zawk.Khawiah emaw kalchhuak ila ka zia hawk ka ring.He Inah hian ka leng hlawl lo.Ka a thei mai dawnin ka hria.

‘Khawnge i kal dawn?”Hlauthawng hmel fein Luni’n min lo ti vat.

‘Ka chhuak lawk dawn’

‘Mahse, Pu te khan chhuak lo turin an ti che a’ hlauthawng hmel a pu bawk.

‘Ka rei lo vang.E,ka pa Cheque bo kha i hmu hrim hrim em?” ka ti a. A mitah tak ka en ran bawk.

‘Aih.Hmu miah lo’

‘Um..ka kal ania,ka rei lo vang’ ka ti a.Ka pain ka kalchhuah avangin a hau ngei dawn tih ka hria.Mahse, ka thawpik lutuk.Lo hau mai mai tehse,a awm peih tawh loh leh a chhuak mai ang chu.Ka ngaihtuah peih nek lo e.

Motor Horn ri thatah ka hawichhuak vat.Savio car a lo ding reng tawh.Ruah a hmi seng seng a,khua a vawt vur bawk.Ka tlan pheia,kawngkhar ka hawnga, ka thu lut nghal zat.

‘Khawiah nge kan kal ang?” rang lutukin ka en vat.Savio a ni hauh lo.Ramsey zawk.Enge thil awmzia?

‘Nang maw?” ka ti chhuak halh.

‘Um,keimah..Savio a lo kal thei loa,a aiah ka lo kal’

‘Ni lo…’ Kawngkhar hawn tumin ka vuana,mahse a lock nghal hmak.

Chapter- 7

‘Eng nge i tih a?” ka ti that.Ka tum aiin ka au ring hret bawk.

‘Ka locked mawle,anih loh chuan i zuangthla anga,Kidnap tum tiin ka lar hluai dawn asin.Chutiang ka duh lo tawp bawka’ ngaipawimawh lo zetin a ti liam vut.Ka va han haw ber tak.Ka mood leh ani bula awm hi a inmil hawl lo.A tel lo pawh hian buaina ka ngah tawk lutuk mah mah.

‘Tenawm..’ ka ti chhuak sap.

‘Keimah nge Savio?” a ti sup.A lo hre phak tho chu niin.

‘Ka chhuk duh..’

‘Oh,teuh lo mai..’

‘Savio ka call dawn.Nang hi ka mamawh miah lo che’ tih leh ka phone phawrh ka ruala,mahse ka call hmain min rawn pawhthlaksaka,a kekawr ipteah a thun zui nghal hmak bawk.

‘Engvangin nge i lak ngawta?” ka aw a khur titih.

‘Hahdam rawh.Tunah hi chuan Savio ni loin keimah min mamawh zawk.Chuan,helaia kan din reng chuan i nuhrawn fel tak khan min hmu hlauh ange’a ti dam thlup.Motor a starta,chak zetin a tlanchhuak nghal zat bawk.

‘Khawiah nge kal i tum a?” ka ti leh that.

‘Khawiah pawh..’ a ti hmuk.

‘I ngeiawm zia hi tu emaw talin an hrilh tawh ngei che ka beisei’ a bak sawi tur hlawl ka hre lo.

‘I sawia,ka ngeiawm tih ka hre chiah..’  a ngaipawimawh lo lulai lutuk.

‘Lo hre tawh rawh,Ih..Diktak chuan ka hua che’

‘Yeap,a that hlauh chu..’ a ti awlsam leh nghut.Ka thusawi engmah thinrimah a la duh miah lo chuan min ti thinrim zual sauh bawk.

‘Enteh…’

‘Ngawi tawh teh,nang chauh hi buaina nei i ni lo ania’ ka sawi laklawh laiin a ti hmuk.A aw nghet churh maiah chuan tawng zawm loh a finthlak tih ka hrethiam mai.Ka melh zawk.Hmalam a en ngura,a Motor khalh lai bak ngaihtuah nei hmel a pu lo.A kutzungtang sei thlurhin hnehsawh zetin Steering wheel a herh kual pap pap chu mak takin hmuhnawm ka ti ru ta tlat.

Motor ding dawtah ka hawichhuak vat.Khawi lai hmun nge ka hre mai thei lo.Ramsey ka en a, Motor atanga chhuah tumin Kawngkhar a hawng a.A kalna tur ka zawh hmain a chhuak vuta,Kawngkharin a ti thinrim emaw tihmai tura Dim loin a rawn nem khar dawt bawk.Ka phu vaka,ka ip chawih bawk.Eng chu a hria ni maw??

Chhuah ve mai tumin Kawngkhar hawn ka tuma, mahse a lo la in locked ta cheu.Beidawng thinur zetin ka thutna seat hnunglam ka ngheng chawrh ringawt.A kalna lam niawma ka rin ka en a,ka hmu der lo.Kawngkhar hawn tuma ka buai chhung kha minute tlemte tak tak a ni a, engtin nge a bo thut ka hre thiam lo.Ka phone ka hrechhuaka,ka Bag ka dapa,mahse Ramsey-an a ak tih ka hrechhuak lehnghal zat.

Minute sawm hnu velah a rawn let a,khawi atanga lo lang nge pawh ka hre leh chuang lo.A lo lang deuh thut nimaiin ka hria.Seat hnunglam a hawnga, engemaw a daha.Engmah sawi loin a chevel ka en mawl tawp.A rawn thu luta,min rawn melh zawk.

‘Ka kalna i hre duh em?” a ti nghut.

‘Aih..’ ka chhang rang lutuk mah mah,a nui hawk bawk.

‘Eitur ka lei.Inah khan engmah eitur a awm lo a’ a ti leh sup.A start a,a tlanchhuak zui nghal bawk.

‘Inah khan min hruai i tum tihna ni em?’

‘Um..’

‘Savio nen chuan Motorah kan thu a,inbe miah loin khawvar thleng kan thu a.Zai kan ngaithla pah thin a’ ka ti sap.Engvanga sawi ngawt nge ka nih ka inhre lo.Pawn lam ka thlir a, ka sam chawlleng thliin a chhem leng dar dar bawk.

‘Savio ka ni lo…’ reife a ngawih hnuah a ti hmuk.

‘Ka hria..’ ka ti tawi tak ringawt.

Farm house kan thlenin a lo thim thiap.Motor head light eng bak eng dang a awm lo.

‘’Chhuk ila…’ a ti sup.

‘Aih,hetah engmah tihtur ka nei lo’ luhlul zetin  ka ti hmak thung.

‘Inah i haw duh tihna a ni em?”

‘Duh chuang lo..’

‘Anih chuan chhuk la,thil kan ei anga.Ka ril a tam ania’ a ti hmuk.

‘Ka duh lo..I duh leh chhuk la,tah hian ka lo awm ang’

‘Ok,a tha lawm..Enge i duh?”

‘Whiskey’ a nui hawk.A hmet ri khapa,a eng ta iar.Ka mit ka khap sak sak ringawt.Amah en duh loin hmalam ka en ngar bawk.

‘Whiskey…Ok,tha hle mai’ a aw pa zetah nuihzatna a lang theia,engvanga nuihza nge anih ka hre lo.

‘Savio-an amah aia kal tura a ti che anih chuan Msgah khan ka hrilh tel kha.I lo keng turah ka ngai’

‘Hrilh chiang mai.Mahse, zu i in vangin i buaina i chingfel dawn miah lo ania’ a ti leha,tlemin a aw a nelawm ta deuh bawk.

‘Ka duh ka tih chuan ka duh animai’ ka ti leh hlak ringawt.Diktak chuan a sawi dik lutuk mah mah zawk.Vawi tamtak zuin ka buaina a chhawk loh zia ka hre tawh.Mahse, enge ka tih chuan ang?

‘I haw dawn nge hetah hian i riak duh?”a ti leh daih.Ka rum hak ringawt.

‘I duh anih chuan i riak theia..Mahse, ka ngaihdan chuan buaina hi tlanchhiatsan aiin hmachhawn pawp mai a fuh maithei’ a ti leh duah.

‘Sawi ve duh suh,I hrethiam ngai lo ang.Khawi ka thil tur chu’ ka ti hmak.Mahni tawn niloah chuan duh duh sawi pawp mai a harsa lo.A tawngtu tan erawh manganna mai piah lamah tu nge kan tana tha leh tha lo pawh thliar thiam a harsa talh zawk.

‘Ka pek hma chein i Problem min share duh em?’ ka sawi a haider hmiah.

‘Duh lo..Savio i ni lo ka tih kha.Amah anga awm tum suh’ ka aw a chang fak bawk.

‘Amah anga awm ka tum hauh lo mai.Mahse, tu emaw tal hnenah kan buaina hi sawi ila kan ziaawm hawk thin ka nuin a ti a’ a aw a ring lo.A sawi danah tihelna leh ngeiawm lam a tel lo ve tlat bawk.

‘A ni maithei.Mahse, keichuan keimaha pai ka duh tawk’ engvangin nge ka awm mai mai pawh min hmusit ngawih ngawihtu bulah ka Problem ka share ang ?ka duh lo bur.

‘Ok..Nawrluih che ka tum lo’

Chhan tumin ka ang hman ziau.Mahse, ka phone ri ka hriat rualin ka sawi tur ka thulh leh hmak.Ramsey ka en a.Min en loin ka phone a kekawr ipte atangin a lo lachhuak mek thung.

‘Nu Hmingi..’ min rawn en pahin a ti sup.

‘Pick suh’ ka ti mawl tawp.

‘I nuhrawn a ni em?” a ti supa.Ka bu nghauh ringawt.

‘Ok..’

Hnunglam ka ngheng chawrha,ka mit ka chhing zui nghal hmiah bawk.Ka awm lo tih a hriat rualin min ngaihven ber anga lang turin ka awmna chin a rawn chhui leh tih ka hai lo.Peih pawh hi a peih zozai mang tak e.

‘Hello…’ ka mengchhuak nghal zawk.Ka en pheia.

‘Enge i tih a?” ka aw a ring lo.Min chhang loin ka hmuiah a kutzungtang sei thlurhin a rawn khawiha,tawng lo turin min ti tih ka hria.Thuawih awm takin ka ngawi ve mai bawk.A kut a lasawna,ka beisei loh lutukin ka kut a rawn vuana,a thlah leh mai dawn emaw ka tih laiin a hum ta zawk.Laksawn tumna pawh ka nei bik lo.

‘Aw, ni e.Ka bulah a awm’ a ngawi leh vung vung.Thaw mang loin ka en ngawt ngawt ringawt.

‘Ngaihtuah suh.Dar 10 hmain ka lo hawpui ang.Aih, Ramsey zawk.A u ka nia’ a ti leh a.Ka chhungte tan Savio mithar a ni lo.Mahse, Ramsey erawh an hria em ka hre lo.

Phone a off a,min pe dawn emaw ka tih laiin a ak leh daih.

‘I awmna a hre duha’ a ti sup.

‘Ka hria alawm’

‘Um,a landanah chuan a ngaihtuah tak tak che a ang’

‘A landan ang ngawt hi a ni ngai hleinem’ ka ti sap.

‘Ka hria alawm..’

‘Ka haw duh lo’ reife kan ngawih hnuah ka tichhuak sap.

‘Ka hria..’ a ti hmuk.

‘Ka pa Cheque a bo a…’ a thaw hawk ri ka hrethei bawk.

‘Ka la lo,ih..Diktak chuan ka hmu lo hrim hrim zawk.Bakah pawisa ka mamawh anih chuan ruk ngai loin ka Accountah a awm renga’ ka ti leh niah niah.Minute reilote liamta kha chuan a bula ka Problem sawi kha thih hrehin ka hreh kha ania.

‘Chuan…” a ti leh nghut.

‘Ka lak anih an ringa..Mahse, ka la miah lo’

‘Ok..Min en teh’ a ti sup.Ka khabeah a rawn dawma.Amah en thei turin min kuai daka,a hmelpa leh ngheng ngulh thin kha awm loin a lang dam thlup zawk.

‘Engmah ka la lo’ ka ti nawn leh sap.

‘Ka ring che,engmah sawi duh suh’ a ti sup.

‘Mahse, ka pain min ringhlel a,ka la lo ka tih pawn a awih hleinem..’ a tawp lam a zuih ral titih.Ka ngaihtuah zawng pawn ka na nawn leh vawng vawng.Tha taka awm pawh tum ila thil engemaw hlekah min ringhlel zel a,that a tulna a awm miah lo.

‘Ok..hahdam rawh..’ a ti leh a,ka biangah a rawn tuaia.Ka chil ka lem khalh mai.

‘Ka dinhmunah hian ding la i hahdam thei bik lo ang..Ka haw duh lo’ ka ti leha.

‘I haw lo ang.I haw miah lo ang’ a hmelpa leh thutak zetah chuan a ti mai mai lo tih a lang thei vek.A rawn kun hniama,ka mit ka chhing ta ngawt.A hmui lum ham hamin ka chal a rawn si a.Ka inrin hmain ka mittui a rawn tlaa,ka biangah a lum thla pap papa.Ka insut zui hraih bawk.

Min pawt hnaia,amah si chetin min kuah bet nghal a,ka sam karah a kut zungtang a rawn rawlh chhoa.‘Tap rawh..I thawl hawk mai ang’ a ti dam thlup,min duatna niawm tak ka hre tel thei.Chu chuan ka tah a ti chhuak zual sauh.A awmah ka hmai ka phum ta kak,tap ri lo turin ka theihtawpin ka in control a,mahse kha lehchen ka lo up tawh ka natna zawng zawng kha vawilehkhatah a mal malin a rawn lang dawt zut zuta.Ka insut satliah lo.Ka tapchhuak ta nge nge.Ka chip samah a rawn fawp vang vanga,ka hnungah min hnem nan a chul hauh hauh bawk.

Eng chen nge ka tah ka hre lo.Ka insut hlawp hlawp a reha,ka tahna vanga ka taksa khur dar dar pawh a reh ta bawk.Ka mipa huat leh mil loh ngawih ngawih bula khati taka ka tap kha nakinah ka zahna thlen tu a ni dawn tih ka ngaihtuaha,mahse awmzia a awm tawh lo.Ka tap zo vek tawh.Inlakhran tumin ka che a.Min thlah ve mai bawk.

‘Sorry…’ ka aw a lawi rat bawk.

‘A pawi lo..’  a ti sup.

‘Ih…diktak chuan tiang khan ka awm ngai miah lo’ ka ti leh niah niah.

‘Ka hria alawm’ a ti nghut.

‘Chhuk ila,eitur ka siam ang che’ amah bawkin a ti leha,eitur a sawi takah chuan ka riltam zia ka hrechhuak nghal zat.Chhuna Tetea bialnu thian nen thil kan ei dun bak kha engmah ka ei ta miah lo.Inah khan chawei na khua a kaw hlawl bawk si lo.

Darkar khat a liam leh meuh chuan chaw kan ei fel hman vek tawh,Ka ei hnem phian bawk.

‘I phone” min rawn en a.

‘Tu nge?”

‘Angai bawk..’ a then suk bawk.

‘Pick lo mai rawh’ ka ti leh halh.A bu nghuta,ka phone min rawn pe nghal bawk.

‘Um..Nangmahin i riak thei tak tak angem?”            min en vung vung bawk.

‘Thei ang,Kal rawh’ ngaihsam hmel fein ka ti liam puat.

A kal hnuah ka inphihfai sawk sawka,ka mu ta than.Ka muhil dawn lo tih erawh ka chiang.Thil chi hrang hrang ka ngaihtuaha,vawiinah Tetea sawn thlak thu dawt a ni lo tih ka hriaa,ka pa hrilh ka tum laiin boruak tha lo dang a lo thleng leha.Tetea chungchang sawina hun a awm map lo.Chequeah khan enge a ziah ka hre lo.Ka ngaihven lo hle nangin Bungraw lakna pawisa hi Chequein a pe thin tih erawh ka hria.Chutiang tura a ziah lawk anih leh nih loh ka hre hek lo.Police a ko ang tih a sawi nangin ka nuhrawnin an mahni mualpho theihna tur engmah a tihtir dawn lo tih ka chiang,keimah chauh mualpho tur ni ila chuan thuhran.Mahse ka pa luhlul zia ka hria,awlsam tak chuan min ngaidam kher lo ang.Huizz,engmah lah ka la eih si lo.

Ka tho leh ta nge nge.Kitchen lam ka pana,tui intur lak tumin ka fridge ka hawnga.Beer leh Vodka lo awm zawkin ka mit a la ta chat.Diktak chuan Beer ka in nasaa,engemaw chang chauhin Whiskey ka in ve zauh chauh zawk.Whiskey a awm lo.Vodka hi in nuam mahse a ruih a nat avangin ka ngaina lo.Ka en vang vanga,ka ban ta nge nge.Ka buaina min chinfel sak dawn lo mahse ka muhil thei tal ang chu.

Ka phone nghawr dar darah ka harha.Meng mang loin ka dap kual a.Ka la kanga,min rawn call tu ka en a,pick loin ka dahthla lehnghal hmak.A tawpa,a rawn ti nawn leh dawn em tih ka nghaka,msg tone a ri ta kauh zawk.

Reife hnuah ka mengchhuaka,ka lu a na lutuk.Nizan khan ka inhnem thawkhat ,khum ka pan lai pawh ka hre mumal lo hial zawk.Engpawhnise ka muhil thei ta chu ania.A tha reng reng e.Peih lo zetin ka thuchhuaka,ka phone a ri ve chiah.Teh seka..Ka en a.Savio..

‘Hello..’ ka ham bai bai bawk.

‘Khawnge i awm?”

‘I hre lo mi?” ka zawt let hlak.

‘Hre nang,nizan khan ka rui lutuka,I msg zingah ka hmu chiah lawm’ ka ang pham mai.Ramsey khan Savio kal tir niin a insawi anih kha.

‘Hello..Zo-i,ka tawng i hre thei em?”a rawn ti leh lawng lawng.

‘Aw,hre thei..A pawi lo..’ ka ti halh.

‘Tak tak? Eng nge buaina i neiha?”a rawn ti leh a.

‘Engmah,nakinah kan inhmu dawn nia..’

‘Ok..i thinrim lo tak tak tiraw?” a ti leh rih.

‘Rim lo..Dah teh,Bath roomah ka lut dawn’

Ka phone ka theh thla a.Ka mitthlaah Ramsey a lo lang nghal zat.Nizan khan Savio nen an awmdun a ni ngei ang.Kei lah khan ka chunga a rilru puthmang hre reng chungin tiang khan a bulah ka khawsa ania..Mahse, nizana ka tah lai leh a hnu zela thil awmdanah khan engmah tider hmel a pu miah lo..Ka thaw hak mai.

Msg ka opena.’I pa hi a thinur khawp maia,mahse Police lam a koh loh nan ka bengdai thei e.Lo haw rih lo la a tha ang’ ka nuhrawnin a rawn ti a.Ka nui chhuak hak mai.Ka ring dik vel vek.

Kawngkhar inhawng ri ka hriat rualin rang lutukin ka thu mar nghal auh.Dimtein ka pen phei tham thama,kawngkhar hawnna ka vuan de de a.Mahse, ka sik rualin a rawn inhawng titih.Ka phu dawrha,ka tawlh let vat bawk.Mahse, Ramsey a rawn lang ve nghal zat.Ka thaw huai mai.

‘Good Morning’ a then suk bawk.

‘Morning..’ ka ti sapa,za lo zetin ka then ve sak ringawt.Min rawn kal pel thuak,Pyjama Gray colour  leh T-shirt dum a haa,Slipper a bun bawk.

‘I lu a na em?” khuma thut pahin a ti leh sup.

‘Um…Aih…’ a nui ka hmuh takah chuan ka bu ta nge nge.

‘Ka ring..Tah sawn damdawi a awm ang,ei la..A chhawk mai ang che’ a ti leh nghut.

‘Angai lo..A reh leh mai ang’ka ti a.Ka kekawr kawng suihna ka khal niap niap bawk.

‘Teuh lo,tiang kha chuan ka awm fo alawm.Chuvangin ei rawh ka tih chuan ei mai la,anih loh chuan in belh leh animai’ a hmui a tisawi zauh bawk.Engtik laiin nge a lo kal ka hre lo.Mahse, nizana ka zuin kha a va hmu hman vek tawh tih erawh a tawng danah a chiang reng.Diktak chuan ka dahfel leh fel loh pawh ka hre lo hrim hrim.

‘I Pain a rawn bia che em?” a ti leh sup.

‘Aih,mahse..’ sawi zo loin ka ngawi leh daih.

‘Mahse…’ a mithmul a tisang zauh bawk.

‘Ih..Nu Hmingi zawkin a lo calla,ka pick lo..’ ka kut tin ka sik nauh nauh mai.

‘Ok…’

‘Msg a rawn thawna,ih…eng lo..Police lam chu ka pain a ko dawn lo a,mahse haw rih lo turin min ti a’ ka hmui ka pet a..Muangchangin a tho a,min rawn pan a.Ka din ngaiin ka ding mar auh a,a rawn kal hnai chu ka en ran bawk.

Ka hmaah tak a rawn dinga,a kekawr ipte a zen thun bawk.A mitah ka en zawka,hriatthiam har zetin min en tih ka hmuh rualin ka mit ka lasawn leh vat.

‘A ko lo vang.A thinrim ngeia,mahse chutiang khawpa pa sual a ni lo..’ a ti dam thlap.

‘Nia,a ko lo vang.Mahse, a fel vang ni loin an mahni mualpho tel theihna chi engmah ka nuhrawnin a tih tir dawn loh vang zawk…’ ka sawi zawh rualin ka nui chhuak nghal hak.Mahse, ka nuihchhan ka hre lo.Ka ban ka phar leh hliaia,beidawng zetin ka dahthla leh hnak bawk.

‘Um,ka ring..Haw lo tura a tihna che zawm nge i duh zawm loh?”

‘Ka hre lo…’ ka ti mawl tawp.

‘Ok,hetah hian i duh duh chen i awm thei..Tuman an tibuai lo ang che’ ka melh chho a,a hmelpa leh hriam hraih maiah chuan a ti mai mai lo tih a chiang vek.Mahse,engvangin nge???

‘Ngatinge tiang hian i tih?” ka ti sap.

‘Eng maw ka tih?” a mitmeng pa leh thim khap maiah chuan engemaw a lang zawk.Mahse, a bo leh rang lutuka,ka hmusual pawh a ni mahna.

‘Savio laka min dahhrang turin tiang khawpa i in phah hniam hi angai lo asin’ sawi awlsam ka tum viau,ka then lui sak bawk.Ka huaisenna zawng zawng sawmkhawmin a mitah tak ka en a,Ka thle bak,ngaihsam awm taka lan ka tum hle nangin ka hlawhchham chiang bal.

‘Ka duh ka tih hlawhtlin nan chuan engpawh ka ti thin tih i hria ang chu’ atthlak zetin ka na vawng vawng thung.

Savio-an nizan chungchang engmah a hre miah lo kha thil mak a ni lo tih ka hre nawn leh a.Mahse, na ka tihna erawh a kiam phah chuang lo.Engpawhnise hmundanga kal kual ngai loin a inah tal ka riah theih phaha,a tha tho alawm le.

Thutthlengah ka thu a,ka khupah ka khabe ka nghat bawk.Tukverh atangin pawn lama ruah sur bawrh bawrh ka hmu theia,ka mood nen a inmil lulai lutuk.Ramsey kal hnu atangin ka la chesawn leh ta miah lo.Engvanga rawn let leh nge anih ka zawt ta miah lo bawk.Nizan thil thleng bawk ka ngaihtuahnaah a lo lut leha.Amah rinchhan nuam ka tih zia kha haider luih theih a ni lo.Ka him hliah hliahin ka hre bawk.Mahse,atih chhan ka hriat sa hriat nawn tir leh ka nih rualin ka zahna leh ka rilru natna a inchen thuak thung.Mawl ka intih zia sawiin a siak lo.Savio an min ngaihven ni a a sawi avang khan min ngaihven tak tak turah ka lo ngai anih chuan ka a let tawp ngei ang.Agnes-i ka ngaihtuaha,alakah chuan hnawmhne tluk lek niin ka inhre bawk.

Ka phone riah ka phu zawk.Peih lo zetin ka en a.Chhuantea a lo ni a.Ani hi Savio ang em chuan kawmngeih lo mah ila ka kawm nasa thawkhat.

‘Hello…’ zangkhai thei ang berin ka ti a.

‘I va reh ve.Groupah khan post ka siama,han enchhin teh’a rawn ti phar phar.

‘Ka lut peih lo,net ka nei chhe lutuk.Tihian sawi mai la’ ka ti a,a mood leh ka mood inmil loh dan chu chhim leh hmar ang hlauh.

‘Zaninah kan inah Party phuahchawp ka siam dawn’ ka then nak mai.

‘Khawnge i chhungte?”

‘Ka pa hnathawhnaah an kal liam vek.Nihnih an awm dawn zui..’nuam ti zetin a ti leh ham ham.A pa hi DRDAah Officer niin Serchhip lamah a awma,a nu leh a naute pahnihin an awmpuia,Chhuantea leh a u Inah an awm thin thung.Chhuantea hi keini ang bawka tal ho ve tak a ni a,mahse a nu hi fate chhan tina leh nu thawm na zet mai a ni a,a fate chanchin miin sawi enah an en lo.

‘I Lo kal ang tiraw?” a rawn ti leh a.

‘Ka chak viau ,mahse tu tu nge kan nih dawn?”

‘Kan thianho bakah ka bialnu animai’

‘Tha lutuk’ ka ti sap.Savio leh Chhuantea bakah Apuia leh Dika an la awma,duhzawng in ang thiau kan ni bawka,midang kan mamawh khat viau.

Dar li pelh hretah ka hmelhriat two wheeler taxi nei a rawn thlenga,Inah tumah an awm dawn lo tih ka hria,kal a inthlak ka duh.Ka rin ang ngeiin kan nula chauh a lo awm.Min hmuh rualin a mengphawk vak bawk.

‘U Zorin,avan pa em em’ ka en a.A sawi ka man lo.

‘Eng maw?” ka ti hmak.Step lam ka pana.

‘I bialpa kha’’

‘Enga?” ka ding chawt,ka hawi leta,ka melh nghek bawk.

‘Nizanah a lo kala.Pu nen an inbiaa..Awi,a nuam awm’ ka bo tulh tulh.

‘I sawi awmzia ka man lo…E,an la hmu lo mi?”

‘Hmu nang.Ih..tu nge a hming kha aw..Ram-a,ni lo..Ramases..a ni chuang lo’ ka thaw a chham lo chauh..

‘Ramsey’ ka tichhuak sap.

‘Aw.aw..ni tak..Amah kha’ engmah ka hrethiam hlawl lo.

Chapter- 8

Inngaihtuah chiamna hun a awm lo.Tu emaw zawk zawk an lo haw hmaa ka chhuah leh hman ngei ngei angai.

‘Luni,ka lo haw tih lo sawi miah suh’ kal pahin ka tita zawk.

‘Maw? I chhuak leh dawn ami?” a rawn ti leh hram.

‘Aw..Ka inthlak ringawt dawn,sawi miah suh ang che’ ka ti leh hmaka.Min chhang tawh loin a bu nghauh ringawt.

Ka inthlak sawk sawka,kal leh mai ka tuma,mahse underwear leh thawmhnaw thlakna tur pahnih thum vel  ken belh thain ka hre leh ta zawk.Room ka chhuahsan hmain Savio-an min rawn calla,lam ka ngaih leh ngaih loh min rawn zawta, ‘aw’ ka ti dawn zuaua,mahse lam ka ngai lo tih leh  Chhuantea te Inah inhmu turin ka tita zawk.

Room atanga ka chhuk chu Luni’n hlauthawng hmel zetin min lo en dauh dauh.Kum 3 lai kan hnenah  a awm tawha,kan chhungkaw zia a hrechiang viau tawh.A fing lem lo nangin rilru sual a pu ngai lo a,kan tan chuan a bak a awm chuang lo.

‘Ka kal ania…’ Kawngka lam pan pahin ka ti a.

‘Thil…aaa,ngai leh lo..’ a ti leh lawi.

‘Enge? Sawi la..’ ka sana ka en zauh.

‘I sawi chhuak lo ang tiraw?” a ti leh riha,hlauh nei hmel a pu deuh bawk.

‘Sawi chhuak dawn nang,sawi la..Ka hmanhmawh ania’ ka ti hlak.

‘Pu thilbo kha a mak ka ti em a,Zingah khan thingpui in pahin a ziaka.An kal hnuah keiman ka tifai leh veka.Engmah a theihnghilh lo reng reng’ a tita duah.

‘Enge sawi i tum tak?” ka ti fan raih ringawt.

‘Inah khan a theihnghilh lo nih ka ringa,mahse Pi khan dawhkanah i kalsan a,ka rawn la ang ka tia.Ka lo theihnghilh ve leh a ti a’ ka thaw hak mai.

‘Anih chu a..Thil min tihsak la,ka awm loh chhungin i Pu bulah a thilbo chungchang i piin a sawi dan leh keima chungchang a sawi dan lo hriat tum la.Min lo call loh pawn msgin min lo hrilh la’ka ti a.Hrethiam lo hmel a pu nangin a bu ta tho.

‘Chuan maw,nizana lo kal khan Bank lamah a lo tihfel tur thu a sawia,bakah i lak anih a rin loh thu te pawh a sawi bawka,amak lutuk..Pi khan a lo be tha em em a, a hriat ngai pawh a ni si lo’ a ti leh nang nang.

‘Amak hleinem,a chhe lo e lawm tiraw?” ka nui a.

‘Dik chiah mai.Awi,a pa si’ a sawi pahin a ban a vaia,ka nui sak ringawt.Tu nge anih a engvanga min buaipui nge anih ka nuhrawnin a hriat teh chuan Lottery a man a ni ringawt ang chu.

Chhuantea te in ka thlenin an lo awm kim thap tawh.An vaiin Games an lo khela,ka lut lai pawh min ngaihsak hlawm lo.An tihdan fo a ni a.Thilmak a ni lo.

‘Eitur kha i siam turin kan dah ania’Chhuantea’n head phone lak thlak pahin a ti a.

‘Keiman maw?” ka ti ha ringawt.Ka eisiam thiam loh zia an hre vek.Chuvang takin ka siam tura an dah mak ka ti lo thei lo.

‘Aw,nangmah ..Tumah siam tur an awm hleine,kan nula a kal ve daih lawm’ a ti awlsam et.

‘Anih chuan engpawh siam ila phun hlek suh u’

‘Aw..Aw,phun dawn lo..Savio,fimkhur teh..Nangmah vang bawkin ka thi leh ngawt ania’ a tih zawm zat.Ka ner nak mai.An vaiin an khel ho vek thina,thiam lo an inti tawn vek thina,a sirah ka lo nui mai mai thin thung.

Chaw kan ei kham hnuah an hna ngai Games bawkan khel leh nghala,keini Party hi chu rik bung bung lam a ni ngai lo.An inkhelh pahin Drinks lam an ti pah char chara,an khelh peih loh tawpah hla kan ngaithla anih loh chuan kan titia.Sas rawn hruai apiangin Room an belbul..

‘I va in hnem tawh ve’ ka bula rawn thut thlak pahin Savio-an a rawn ti a.Zawi zetin a thu mu titih.

‘In tam ve tho.Mahse, Beer te chu a..’ ka ti liam puat.Ka kenlai ka thawkkhat pawp.

‘Um..Nia,Beer te chu i master na lam ania lawm’ a nui a.

‘Dik chiah..’ ka ti sap.Bur thar ka ban lehnghal zat bawk.

‘Nizan khan enge thleng a?” min rawn en a.Ka melh zawk.

‘Ka pa Cheque a bo..’

‘Wow,an puh leh ngei che anga” thil thlen dan tur a hrethiam sa vek.

‘A dik..Mahse, ka la lo’

‘I la lo tih sawi kher angai lo,ka hria..Engtin nge in Family Actress chu a chet leh vela?” a nui leh.

‘Thiam tak a ni.Niminah chhungkaw nghawr laih tur thil ka hriaa,chu thil chu ka pa hnenah ka sawi a hlau aniang.A aia Topic lian fe zawk tur a lo chhawpchhuak leh hmana’ ka ner nak.Ka beer bur ken ka hawnga,in mai loin ka thlek vang vang.

‘He nu tak hi chu aw..A phur hi a rit dawn asin,I nun a tihchhat man te..aaa,a tam lutuk’ a thaw hak.

‘Sawi lo mai teh,ka ning ania…’

‘Inah i riak tho nge i pute inah?” ka sawi a haider tlat.Hei pawh hi Ramsey nen thisen in ang tlang tih takah a luhlul ve viau tho.Ramsey a tluk lo mai pawha.

‘Ramsey inah…’ ka ti tawi tak.

‘Maw?” a ti vak.Ka melh nghek thung.Vanneithlak takin Dika leh Apuia’n an pahnih titi lai bak ngaihven awmin an awm lo.Chhuantea leh a bialnu lah room lamah an tawm bo daih bawk.

‘Diktak chuan nangmah ka ko che a,mahse amah kha a lo kala.Bakah  i Carin a lo kala,nangmah emaw ka ti a..ka luh hnuah a ni lo tih ka hre chauha’ ka in leh pawp.

‘Engmah ka hre miah lo..Mahse,i lakah engmah thil tha lo a ti lo tiraw?” hlauthawng aw a hriat theih.Ka melh zawk.

‘Ti nang,Inah khan min dah tawpa,chu zawng chu..Problem i nei a i lo kal thei lo tih a sawi bawka’ ka ti liam puat.Engvangin nge thil zawng zawng ka hrilh hreh tak tlat ka hrethiam lo.

‘A that hlauh chu,tunah tah chuan ami i haw leh ang?” a ti leh a,ka en duh lo lui tlat.

‘Aih,Ka pute Inah zawk.Mahse, tun tum chu ka haw mai lo ang,ka pu awmpui deuh reng angai tho a’ ka ti leh a,engmah la serious lo angin ka awm lui tlat bawk.

‘I pu ten in inhau leh tih an hria em?”a ti leh a.Ka lu ka thing nak ringawt.

‘Um,a tha lawm.Mahse, ka sawi kha a dik dawn chiang mai’  ti leh a.

‘Eng maw?” ka ti hmak.Ka lu a hai chhalha,muthilh vang vang ka chak bawk.

‘Mama hian a ngaihven che ka tih kha..’

‘I ninawm’

‘Ninawm lo,Haider talh tum lo la..’

‘I hre lo,I hre lo lutuk’ uar zetin ka ti chiam.

‘Enge ka hriat loh chu?” a ti leh talh.

‘A ninawm,thildang sawi ang..Ka mut a chhuak lutuk’ ka ham zui bai bai bawk.

‘Tah hian riak mai la,khatianga i haw te chuan an ngaihdan a ni lo vang’ a ti leha,a sawi dik.Ka fel lo a ka nun dan pawh an hai lo chung hian rui chungin ka pu tein ka kal ngai lo.Mahse,hetah ka riak ngawt thei lo..

‘Aih,ka harh leh mai ang.Rintea room atangin ka lut thei a’ ka ti awlsam mai.Diktak chuan khawiah nge ka riah ang pawh ka hre lo.Ramsey khan ka duh duh chen awm turin min ti mahse tun ang zanah engin nge ka kal tawh ang?zanin atan chuan Hotel pawh a pawi lo.

Haw tura kan din meuh chuan ka ding mar lui hram hram a ni ber.Can engzat nge ka in pawh ka hre lo.Ka kalsawn pahin ka pal nawk nawk bawk.

‘Zo..riak mai la,kal pawh i kal theih loh kha’Chhuantea’n min ti a.Ka ban ka vai khum ringawt.

‘Nia,riak la..’Apuia’n a ti ve a.Ka thle bak.Diktak chuan ka mut a chhuak ngawih ngawih.Ka theihtawpin ka thaw vaka.Ka mit ka nuai a,Sofa a Dika muhil chu ka hmu phe deuh ruai,an kai tho lo tawp ang le.

‘Savio…Kal ang..’ ka ti buh nak,kal tumin ka pen a,ka pai dat.Apuia’n min rawn vuan vat.Mahse, ka thing thlaa,ka nui hak hak bawk.Savio zawkin ka kiu bulah a rawn chelha,ka melh chho ha.

‘Ka…ka..ka kal thei,min vuan lo teh’

‘Ngawi mai mai rawh..’ a ti hmak.A in hnem ve viau tho tih ka hria. Mahse kei ang em chuan a rui lo.

‘Mangtha u.’ ka ti leh a.Min chhang em pawh ka hre lo.

Motorah min nawr lut titih,eng ang pawn awm ila ani hi chuan min hau dawn lo tih ka chiang ve tawk.Tun aia rui hian min buaipui ngun lutuk.

‘Kan Inah riak mai rawh’ kan tlanchhuah hnuah a ti a.Hnunglam ka nghenga,ka meng peih hlawl lo.

‘Ka duh lo,Ka pu te inah..’

‘Luhlul viau lo mai la,lamtang i neih chhun i Puteate i tih thinrim ka duh lo alawm’a ti leh a.

‘A ho lutuk,khawvelah hian tumah ka lamtang an awm lo..Aaaaa,ni leh lo.Nangmah i awm..’ ka nui hak.

‘Ka thih thlengin i lamah ka tang ang’

‘Ka thi hmasa maithei asin..Glass hi Down teh,ka thaw a chham dawn’ka ti zui zat.A down ve mai bawka,thli vawt varin ka hmai a rawn chhema,ka mengchhuak chuang lo nangin ka harh sawng sawngin ka hre tho.

Motor a ding dawt,ka mengchhuaka,Ka put e Gate bulah kan lo awm tawh.Ka zi mar ar ar.Ka bag ka laa,chhuk tumin kawngkhar hawnna ka bana.Mahse, ka hawi let leh rih.

‘Nupui nei rawh’ a mengphawk vak.

‘Eng a?!”

‘Nupui nei la,I nu ten keimah min neih an hlauhna hi a reh vek ang’ ka nui sak.

‘Ka nu a? enge awmzia?”

‘Ka fiam che anih kha,mi zawng zawngin ka bialpa emaw an ti che hi ka khawngaih che mawle.Kei lah hi tiang mi hi ka ni bawk si’

‘Thu a pui pui sawi lo teh.Zanin chu i in hnem mah mah in ka hria’ a ti hmak.

‘Dik chiah,mahse buaina zawng zawng theihnghilh a ruih mai hi a nuam alawm..E,pakhat tal i nei em?”

‘Nei lo..A hrim hrimin i inhnem lutuk tawh’

‘Beer a ruih tak tak theih loh,khawi?” alamah ka kut ka dawha.A kawl dawn tih ka hming ka hriatchian tlukin ka chiang.

‘I va han ninawm e aw’ a ti supa,seat hnunglamah a bawk chho titih.A rawn thu thla leha,Ka kutah a rawn hmehbela.

‘Zaninah chuan inbelh tawh suh.Zingah i lu a na dawn ania’ a ti ta nge nge.

‘Ok,Boss..Mangtha aw’

‘Lut phawt rawh’

‘Aih,kal phawt rawh’

A motor lan theih chhung ka thlira,a tlan liam rualin Gate bul atangin ka kalsawn ve thung.Ka harh hlawl lo.Thim laiah ka dinga, ka ding bu lak lak bawk.Ka phone ka phawrha,Hotel call ka tuma,mahse ka hmu phe vek.Ka thu sawp thla hnak.Ka thutna bul bang ka nghenga,ka lu hai lutuk tihreh tumin ka mit ka chhing vang vang bawk.Ka luak lah a chhuak em em zui.Hahthlak hian a..

Ka phone riah ka harh zawk.Ka indapa,ka dahna ka hre mai lo.Ka hmuh veleh min rawn call tu ka en a,Ramsey..Ka cut hmak.A rawn call nawn lehnghal zat.

‘Enge?” Hello pawh ka ti buai peih lo.

‘Khawnge i awm?” a rawn ti tuar.Ka beng bul atangin phone ka la sawna,ka melh vak ringawt.Engvanga min vin ve ngawt nge maw anih hrep ni a.

‘Ka duh duh naah..’

‘Zorinzual..Min nawr lui miah suh’ a ti leh ta.A hma pawh khan min ti tawh.

‘I duh dana ka awm loh vang maiin ka nawrlui che tihna a ni lo..’

‘Ok..Anih chuan khawiah nge i awm?’ tlemin a aw a nem ta deuh.

‘Ka hre lo…’ ka ti mawl tawp.A thaw hawk ri ka hrethei.

‘Maw?’  a  ti sup bawk.

‘Engatan nge min tih a? ‘

‘Ka ngaihtuah che..Khawnge i awm?” a ti leh nghut.

‘I tenawm lutuk’ ka sawi zawh rualin ka off nghal hmak.

Muangchangin ka tho chhuak taih taih,ka ruih lutuk kha chu a zia tawh,mahse ka luak a chhuak hlui thung,Kawngpui ka pan thlaa,Taxi ka hmuh mai ka ring ve tawp.

Ka beisei ang ngeiin rei ka din hmain Taxi a rawn tlan ta hlauh,ka phara.A din fel rualin ka thu lut nghal rawk rawk mai.

‘Khawi lamah nge?” zangkhai takin a ti nghal var.

‘Zu lakna tur i hria em?” ka ti ve thung.

‘Hria e.I duh mi?”

‘Aw,min kalpui la,mahse Ks ka ni lo ania’ ka ti hmak.

‘Awle,ka hrethiam alawm’ a ti tha ve mai bawk.

Lakna tur a lo hre na meuh mai,diktak chuan ka in theih pawh ka ring tawh lo.Ka luak a chhuak lutuk zawk.Motora ka lo nghah chhungin Savio Beer min pek ka hawnga.Mahse, a chanve bak ka in thei lo..Ka paih ta ngawt.A rawn leta,min rawn pe a.Ka awmdan mak a ti deuh nge ka hre lo.Uluk fein min en vang vang.

‘Khawi lamah nge kan kal leh ang?”

‘Ka hre lo..I motorah hian zanin ka riak thei angem? Aman ka pe vek ang che,nangmah i awm ve kher pawh angai lo a’ ka tita duah.

‘Min hrethiam la,hmeichhe awm khaw lo ini miah lo tih ka hrethei mai..Mahse, Motor hi ka hawn ngei angaia’ a ti dam thlap.

‘Um,nia..Anih leh Motorah hi zu in i phal em?”

‘Ka remti ngai lo a,keipawn ka in bawk lo a,Mahse, In rawh..I mamawhin ka hria’ a ti leh a.Ka thaw huai mai.Zinchhuah changa mamawh atan tiin No a lo paia,tui a pai bawk.A sawi danin zu in mi a ni lova,mahse a eizawnna hi Taxi anih avangin Zu lakna tur erawh a hre nual.Pa fel tak anih hmel viau bawk.

No hnih ka in lui thei hram.Hotel min biaksak tur a hria em tih ka zawta, a lo hre leh zel.Mahse, kan awmna atangin minute 20 vel lai kal a ni thung.

‘Ka muhil anih chuan kan thlen hunah min kaitho mai dawn nia’ ka ti niah niah.

‘Hey,Zorin,I harh em?” ka hmaia kut lum thur thurin a rawn khawih rualin ka mengchhuaka.Ramsey rawn kun hnai mek ka han hmu a,ka mumang a ni ngei ang.Ka mit ka chhing leha,mumang nuam tak chu a ni phawt ang.A takah kha chuan lemchan nan min ngaihtuaha,mahse tunah chuan a hmelah khan tider hmel a pu lo.

Ka kawr a rawn pawh rualin ka mengchhuak leha,rang zetin a kut ka man behsak nghal bawk.

‘I kawrah i luaka,chuvangin phelh phawt ang,chuan i muhil leh dawn nia’ a ti dam thlup.Ka mumang a ni miah lo.

‘Ka…ka duh lo..Min kalsan rawh’ a awmah ka nema,mahse a kalsawn chuang lo.

‘A rei lo ang..Ok,a tha em?’ a ti leh sup.Ka kawr hma kilhna a rawn phelha,dan tumin a kut ka vuana,mahse ka lu a hai lutuk..Zawi zetin ka mu thla hnak.Mahse, min pawm thoa,amah nghengin min thuttira,awlsam tein a phelha,ka kekawr a phelh leh nghal bawk.Zak tur ka ni a,mahse zak thei dinhmunah pawh ka ding lo.

‘Ngatinge ka..ka..ka bulah i awm a?” ka ti bah nak.

‘Shh..zawhna chu nakinah,tunah chuan muhil phawt rawh’ a ti leh sup.Min mutthlak tira,a tho a.Puan min rawn sin tir nghal bawk.

‘Khawnge i kal dawn?” ka ti sep.

‘I thawmhnaw hi suk turah ka dah lawk ang,ka rei lo ang..’ a then suk bawk.

Engtin nge a bulah ka awm leh daih theih ka hre lo,ngaihtuah ka tuma ka ngaihtuahna a buai vel vek.Taxi Driver hnenah khan Hotel thlen hunah min kai tho turin ka ti a, mahse tunah Ramsey Farm Houseah ka awm leh daih,chu pawh Ramsey nen..A sawi hmang khan ka luak anih hmela,mahse ka luak lai pawh ka hre chuang si lo.Hahthlak hian a.Ka harh chian hunah ka hrechhuak thei em ang chu.Mahse, Ramsey hmuhsit tur bawkin ka awm leh ta nge nge chu ania.

Kawngkhar inhawng ri ka hriat rualin ka mit ka chhing nghal hmak.Thawm dim zetin a rawn kal pheia,a rawn mut ve loh hram ka beisei takzet.Min en dan leh a thiltih chhan engkim ka hre chung hian ka hnar thei angem ka hre tlat lo.Mipa anga ka en awmchhun a ni a,ka kiss hmasak ber a ni a,SEX ka hman pui hmasak ber ni dawn se ka hnial angem ka chiang hek lo.

Khum a che dat,ka puansin a rawn pawt kaua,a rawn inthawlh ve a.Ka kawngah a rawn kuaha.Ka darah a hmai a rawn phum zui zat.Ka thaw hleithei lo.

‘Ngatinge i tih?” ka insum thei thawt lo.

‘Tih ka duh vangin..’a ti sup.

‘Savio vangin maw?’

‘Aih…’

‘Mahse…ka hrethiam lo..’

‘Muhil phawt la,zingah kan sawi dawn nia’ a ti leh sup.Ka darah a rawn fawp vang vang bawk.A chet dan engkim mai chuan min fana,ka  theihtawp pawn inveng mah ila ka mil loh na phenah hian ka duh na a awm tel tih ka chiang tawh.Mahse, game khelhna ka ni a,chuvangin tiang rilru hi ka pu thei lo.

‘Mangtha le…’ ka ti sep.

Ka harh lehin khua a lo eng at tawh,thawh mai ka tuma,mahse ka kawngah Ramsey-an a lo la kuaha,a mal sei thlurhin min khan bawk.Ka mit ka chhinga,nizan thil thleng hriatchhuah tumin ka ngaihtuaha..Ni lo…

Taxi Driver khan ka phone a chhang tih ka hre rei ruai,Ramsey khan ka kawrah ka luak a ti a,mahse amah zawk ka luak khum.LALPA..tawngkam chhe tinrengin ka ankhum bawka,seh ka tuma,ka kek bawka…Ka hmai a sa hut hut thei.

Dimtein a ban ka dahsawn sak a,ka tawlhsawna.Tui zetin a muhil a.A landan a danglam vek.Nizan khan a duh vanga min pui niin a sawia.Mahse,ka ruih vangin engmah ka hre dawn loah angia,a sawi mai mai a ni ngei ang.Hmeichhe zahawm leh mi chunga leng nen inzawmna an neih mek laiin kei ang hi a duh vanga min buaipui na tur a awm lo.

Tih harh hlau zetin khum atangin ka chhuk tham tham.Khum bul chairah ka bag a lo awm ngat bawk.Ka laa,ka rimchhe lutuk,inbual vat ka ngai.Ka lu na fuk fuk tih ziawm nan pawh a tha ngei ang.

‘Zorin..I awm em?” Bathroom kawngkhar kik pahin a rawn ti a.Ka thil tih lai ka tawp chawt.

‘Mate..I awm tiraw?” min koh dan pawh chu a..

‘Ka awm…Ka zo tep..’ zangkhai thei ang berin ka ti a.

‘Ok…Hmanhmawh suh’

Kawngkhar ka hawng dek deka,tumah an awm lo.Ka chhuak nghal vat.Ka thil tih atthlak zia ka ngaihtuaha,ka then ta sak.Nizanah a hmuh tur chu a hmu kim thawthang tawh,zankhuain a bulah ruakin ka mu bawk.Min kuaha,mahse mipa in hmeichhia a en angin min en lo tawp tih a chiang,vawikhatmah mipat hmeichhiatna lam hawiin min khawih eih lo.

Living room a lo ruak hiau,Kitchen lamah a awm anih loh chuan a kal tawh a ni ngei ang.Kitchen lam ka pan pheia,a lo awm ngei,min hnungchhawn zawngin a dinga,T-shirt hring duk a haa,kekawrbul a ha bawk.Hnunglam atang pawn a pian nalh zia hai theih a ni lo.A rawn hawi thuta,ka lo en reng bawk si nen tihngaihna hre loin ka nui ta ngawt.A then ve suk bawk.

‘Coffee i duh em?” a ti supa,Dawhkana no lamah a thle zauh bawk.

‘Aw,duh..’ka ti a, ka kal pheia,Chair ka pawtchhuaka.Ka thu nghal vat.A chhan hriat si lohin ka zam em em tawp.

Ka hmaah no a rawn hunga,ka nui lui leh sak.

‘Nizan kha…Thupha ka chawi e’ ka ti chhuak ta sap.A game khelh chu engpawhnise min buaipui tho.A thle buk.

‘Theihnghilh rawh..’a ti sup.

‘Tihbuai che ka duh lo tih i hria a,mahse….aaa,ka lawm animai’ ka ti leh niah niah.

‘Ka bulah ni lo Taxi Driver bulah khan lawmthu i la sawi zawk dawn nia’ ati a, a hmui a petsawi zauh bawk.

‘Nia,mahse…I hnenah pawh lawmthu sawi ka ba tho a.Inah pawh i riak lova,I fanu bakah i chhungte pawn an ngaithiam lo maitheia,bakah Agnes-i pawn’’ a tawp lam a zuih ral titih.

‘Ngaihtuah duh suh,ka duh ka tihna tuman an dal ngai lo..’

Ka hrethiam,ni e.An vain Savio nun atanga kalbo turin min duh vek.Ka tlawm ta ni berin ka hria.

‘Hahdam tawh rawh,Savio tan engmah i tih angai tawh lo..Ka kalsan tawh ang’ ka ti sep,ka aw a zawi lutuk.A hre phak angem pawh ka hre lo..Zahzelah ka no tlang ka huai hauh hauh ringawt.

‘Min en the..’ ka bul mai atangin a rawn ti a,ka phu nasa lutuk,a lo kal hnai thawm ka hre miah lo.Muangchangin ka en chho a,a hmelpa leh thutak chu zet ka en rei ngam lo.

‘Engmah hi Savio tana ti ka ni lo..Keima tan vek’ a ti vawt ruih.Ka melhchho lehnghal vat.A sawi awmzia ka man hlawl lo.

Chapter- 9

‘Eng….I sawi awmzia ka man lo..’ka ti bah nak mai.

‘Ka sawi awmzia chu Savio tana ti ka ni lo.A chiang em?” a ti sup.Dawhkan tlang a nghenga,a kekawr ipte a zen thun bawk.

‘Anih chuan..Aih,ka hrethiam chiah chuang lo’ ka nui lui hak bawk.

‘A awmzia chu Nupui ka la nei lova,Pasal i nei lo bawka’

‘Oh…’ ka ti halh ringawt.

‘Um..Nizan khan min zawta,ka chhang tawh chea,mahse i luak zui ta daiha’ zawi tein a nui hawk.Ka biang a sa nghal awp awp thung.

‘A pawi ka ti..Ih,diktak chuan engzat nge ka in pawh ka hre lo a’

‘A tam thawkhat ang..’ a ti ve sup.Sawi leh mai tur hre loin ka hmui ka pet nauh nauh ringawt.

‘Nizana i zawhna zawng zawng kha a mal malin tunah ka chhang thei che a..I duh chuan?” a ti leh nghuta.Ka bu ringawt,mahse enge ka zawh pawh ka hre chuang miah lo.

‘Engvanga ti nge ka nih tih kha chu Savio tan a ni lova,keima tan.. I pa bulah ka bialpa anga ka introduce na chhan chu ka la nih dawn tho avangin ka sawi sualna ka hre lo.Ngatinge Inah haw lova hetah ka riah ve kher tih kha chu..A tul vang anih leh mai..Ka chhang kim che em?” a ti ta duah.Kei erawh ngaihtuahna mumal ka pu thei lo.Engvangin nge ka bialpa nih a tum ngawt ang?

‘Agnes-i phalna thlapa ti i ni tih ka hria alawm,lemchan angai lo ania’ reife kan ngawih hnuah ka tichhuak sap.Agnes-i lo kal tum khan engkim ka hmu a, ka hre bawk anih kha.

‘Ka duh ka tihna turin tu phalna mah lak ka mamawh lo,ka la dawn anih chuan ka nu leh pa phalna animai..’

‘Mahse, hmannia Agnes-i lo kal tum khan….’Ka ngawi leh rih,mi thusawi lo ngaithla ru ka ni tih ka ti lang vek dawn.Mawl min ti lutuk palh ang.

‘Eng nge kan sawia?”

‘Ih,ngaihthlak pawh ka tum miah lo,mahse ka kalsawn thei mai lova..’ ka ti niah niah.

‘Ok,a pawi lo..I chungchang kan sawia,ngaithlak kha a dik lohna a awm hleinem.Mahse, enge kan sawi a?” a ti leh a.

‘A phalna leh hriatpuina thlapin Savio tan kei hi min hnaih i tuma,sex erawh chu….Ih..Eng lo,hmang lo turin a chah che a…’ a tawp lam a zuih ral vek.Mahse, a thaw hawk riah ka sawi a hre kim vek tih ka hrethei thung.

‘Agnes-i leh keiin inzawmna kan nei lo..’

‘Daw heh..’ ka in control hman hlawl lo.

‘Dawtsawi a tulna enge awm anga?’ a ti thawp sut.

‘Ka hre bik nang,bakah min hnaih chhan chu engpawhnise ka ngaihven lo’ ka ti nghat.Kalsawn tumin ka tho a,ka chair ka nawr hnung nghala,mahse ka kalsawn hmain ka kawngah a rawn dawma,amah si chatin min pawt bet nghal hmak thung.

‘Eng nge i hriat a?” ka ti that,a awmah ka nema,mahse min kuah nghet sauh thung.

‘Zawhna ngah reuh lutuk mai..Nizan khan muthilh harsa ka tihzia i hria em?’ a ti zawi supa,ka bengah a fawp thawi thuak bawk.Ka awmdan a dik lo nghal pang,ka lungphu a rang nghal dawt dawt bawk.

‘Ka hre lo..Ka ngaipawimawh lo..’a awmah ka nem leh a,ka eu vak bawk.Ka tukkhumah a rawn vuana..Ka kawnga a kuahna a nghet zual sauh bawk.

‘I la ngaipawimawh thuai ang,bakah nizan kha chuan min hnial miah lo kha ania..’ a then suk.A rawn kun hniama,ka hmuiah a fawp dawn emaw ka ti hman,mahse ka chalah zawk a rawn fawp zauha,ka mur ar ar mai.

‘Engmah ka hre lo..Min thlah teh’ ka theihtawpa pangngaiin ka ti leh that.Ka chhungrila danglamna awm hi ka awki chang fakin hliah khuh ngei ka duh.

‘Teuh lo..tu emaw talin mipa hip lutuk i ni tih an hriattir che angai..’a nui hawk bawk.

‘Chutiang min hrilh tur chuan nang ni loin Mipa dang ka duh..’ ka ti hmak,a rum hawk thung.

‘Min cho tihna a ni em? Nge Savio hian ka tihtur min tihkhalh zawk?’ a mit a tizima,a aw a ring hek lo,Mahse, mak takin hlauhnain min fan raih raih thung.

‘I hriat tur a awm lo..’ ka huaisenna zawng zawng sawm khawmin a mitah tak ka en ran bawk.

‘Awm tehreng mai..’ a ti nghut.A hmel thutak zetah chuan a ti mai mai lo tih a lang reng bawk.

‘Min thlah rawh…’ ka beisei loh zetin min thlah thuta,ka pai dat mai.

Kitchen chhuahsan tumin ka inher a,a bulah ka awm reng anih chuan ka ngaihtuahna ka hmang mumal thei dawn lo tih ka chiang.

‘Min nei rawh…’ ka ding dat,ka hresual emaw tiin ka en a,mahse a hmel thutak zetah chuan fiamthu emaw uang hmel a lang eih lo.

‘Maw?” ka ti chhuak halh mai.

‘Min nei rawh..’ a ti leh sup.A kekawr ipte a zen a,Dawhkan nghengin a ding run bawk.

‘Ni lo…Aih,ka duh lo’

‘I himna atan min neih a tha ber’

‘Tu lakah nge him tura inven ka mamawha? Aaa,I lakah bak inven ka mamawh hleinem’ ngeiawm thei ang berin ka nui lui hak bawk.

‘Maithei,mahse i nuhrawn hian a chhuah zalen dawn lo che ania..’a ti leh hmuk.A sawi dik.Mahse, pawisak nei awm lo zetin ka hawi sang laha,ka then lui leh sak.

‘Ka tlanchhe ngai lo..’ ka thle bak bawk.

‘Takzet..’

‘Aw..’

‘Anih chuan tunah hian engvangin nge helaiah hian i awm? Savio te ina i riah thin kha engvang nge?”

Chhan mai dan tur ka hre lo.Diktak chuan a zawhna khan min deng harh dawt zawk.Ka tlanchhe lo emaw ka tih laiin ka lo tlanchhe char chara,ka nuhrawn ka huat vanga sual ka ni lo.Ka nu laka thudik inthup kha hrereng siin ka tlanchhiatsan mai zawk a lo ni..

‘Aih…Ka duh lo..’ ka ti chhuak halh,ka lu ka thing nak bawk.A then suka,a dar a ti chhing uk a,enge a ngaihtuah ang tih a hmelah engmah a lang lo.Ka chhanna vangin a thinrim nge a ngaipawimawh lo ka hrethiam hek lo.

‘Tuman an tihnat lohna turin ka veng ang che,I tlanchhiat angai tawh lo ang’ ka hnialna a hre lo der hmiah.

‘Ngatinge? Enge hlawkna tur i neih a?”

‘Engmah…’ a ti hmuk.

‘Anih si chuan Savio nen kan inneih i duh loh vangin min neih lawp lawp pawh i hnial lo tihna mi?

‘Ka duh vang che in…A landanah hi chuan nupui atana tha tak tur i ni lo,mahse a landan phenah hian thil tamtak a awm tih ka hria.Chuvangin neih che ka duh’ a aw a ring lo.Mahse ka bengah chuan tek tla tlukin a chiang tho.

‘Mahse…Enge kei hian ka pek che anga?” ka ti lawi rat mai.

‘Nangmah kha…’

‘Maw?” ka ti sep.Enge keiah hian duh a neih ka hrethiam lo.

‘Ka duh che,chu zawng chu..Nangpawn i hria,haider tawh suh..’ a ti leh supa,a aw nghet churh chuan a ti mai mai lo tih a tilang chiang ngang mai bawk.Tihngaihna hre lo zetin ka ban ka phar hliaia,beidawng zetin ka dathla leh hnak ringawt.

Muangchangin min rawn pan hnaia,ka tawlh hnung hrat thung,mahse bangin min lo dan takah chuan ka ding khawng ta lah,ka hmaah tak a rawn dinga,kan insan hleih bawk nen min en chhuk run mai.Ka melh chho zawk,ka en rei ngam lo.

‘Min nei rawh,tunah kher ka ti lo.Mahse, nunphung pangngai pek che ka duh’ ka kut a rawn vuana,a lakanga,a fawp vang vang bawk.

A awmdan engkim mai chuan min fana,awmdan tur ka hre hlawl lo.Min mil ngai lo a,ka hmuh apiangin huatna nen min en thin bawka,mahse tunah tih takzetin nei turin min sawm leh lawia..Ani tan hian zu in thin,duh duh hunah riak bo mai mai thin hi hlutna ka nei lo anga,kan inmil lo…Nia,a nunah Agnes-i a awm…

‘Agnes-i…’ ka ti chhuak nghal sap mai.

‘Kan tawp tawh’ a ti tawi tuk.

‘Mahse…miin an nuih…’ ka sawi zawh hmain ka hmui a rawn khawiha,a rawn kun hniama,a hmui lum ham hamin a rawn si a,ka mit ka chhing ta ngawt.A dimin a dam takzet,ngenngawl zetin ka hmui hnuailam a rawn pet a,ka insum thei lo..A nghawngah ka ban pahnihin ka kuah a,ka chhang let ve ta nge nge..Ka chhan let rualin a rum chhuak hawk thung..Ka kawngah a rawn kuaha,amah si chetin min pawt hnai zui zat bawk.

A awmah ka hmai ka phuma,a kawngah ka kuah bawk.Ka awmdan kha a mak lutuk,nun hi a famkim niin ka hre ber.

‘Vawiinah ka zin angaia..’ a ti chhuak sup.

‘Khawiah?”

‘Lungleiah’

‘A rei angem?” ka hawi chhuaka.

‘Ni hnih..’

‘Um..’

‘Tah hian min lo nghak turin ka duh che’ a ti sup.A aw thawp sut chuan min fan raih raih thei hial bawk.

‘Ngatinge? Ka haw dawn lo tihna mi?”

‘Nakinah..Mahse, tunah chuan hetah hian awm rih rawh.Chhunah Scooty an rawn dah anga,chhuah i duh pawn i hmang thei ang’ a ti leh a.

‘Aih,angai lo..Chhuah na tur ka nei hleinem’

‘Ok..I thu thu le’ a ti leh sup.A rawn kun hniam leh nghal zat,ka mit ka chhinga..Ka mumang a ni anga ka harhchhuah veleh engkim a bo leh vek ang tih ka hlau ngawih ngawih.  

A kal hnuah lut mai loin ka ding vang vanga,ka hawi kuala,ka kal ngun tawh hle nangin ka la fangkual miah lo.Ka hmaa in ding lam ka thlira.A lian lo,mahse a nawm hmel ngawih ngawih thung.Ka tan phei chuan helai hmun hi a pawimawh kumkhua tawh ang tih ka chiang.Kawtzawl zau vak lo a neia,gate lian vak lo a awm bawk.Kawtzawl hrulin Thir lenin a inhung chhuak veka,luh ruk a har hmel viau.Pangpar lam engmah a awm lo a,Thingkung,tawi laih,uluk zeta cut a awm fur thung.

Inchhung ka luh rualin ka phone ri niawm tak ka hriaa,ka pan pheia.A lo ni ngei.Min rawn call tu ka ena,Savio..

‘I lo call lai ka hre lo a’ a pick veleh ka ti zangkhai vah.

‘Hmeli..I enge ka nih a?” a rawn ti nghek.Ka phu zawk thung.

‘Enge? Nge i au vak kher a?’ ka ti hlar mai.

‘Ka lawm lo,chuvangin ka au vak..’ a ti leh a.

‘Thil lianpui tisual ang maiin min lantir alawm mawle’ ka nui lui hak.

‘I tisual lo ami? ‘ a rawn ti let nghal zat.

‘Nizana ka rui hle tih bak chu engmah ka tihsual pawh ka hre lo’ ka ti ve thung.

‘A that chu.Tunah khan Chichi-a ka hmu zo chiah’

‘Maw?!”

‘Chichi-a..I putea fapa kha’

Ni lo,an Inah ka riak lo tih a hrechhuak tih ka hrethiam nghal vek.

‘A hawi buai viau nangin engmah ka sawi ta lo hlauh..Mahse, ka thin a rim ve aw’ a rawn ti leh a.Ka hrethiam takzet.Engvangin nge keipawn ka zep kher kher ni? Nidangah ani aia min pui nasa zawk an awm ngai lova,ka tihbuai nasat ber a ni ziah bawka.

‘Enteh,lo kal la..Kan sawi dun dawn nia,a tha em?”

‘Enge kan sawi dun anga?” a ti hmuk.

‘Lo kal phawt la’ ka nuih tlawn titih.A ngawi deuh vang vanga,min chhang dawn lo emaw ka ti hman,mahse a ‘aw’ leh ta hlauh.Ka thaw huai mai.

Darkar hnih dawn hnuah a Motor ri ka hre ta chauh,a rawn lut a.A hmelah a lungawi lo tih a lang reng bawk.Ka dem hauh lo.Kei ni ila ka sa nasa dawn lutuk.

‘Eitur a awm em? Ka ril a tam ania’ thut hnawk pahin a ti a.

‘Awm nang,mahse a siam theih a’

‘I ei tawh mi?” a ti leha,ka lu ka thing ringawt.Zingah khan Ramsey-an eitur a siam veka,mahse ka ei tui ta phiana,ka ei zo vek.Ka ngaihtuahna vangin ka then sak mai.

‘Enge nuih tur awm a? mi riltam lai laia’

‘Ka nui lo e a.Lo kal rawh,Artui kan tur a awma,Soup siam tur a awm bawka..’ tih pahin ka tho a.A rawn tho ve mai bawk.

‘Le…sawi la…’ a plate nawr sawn pahin a ti a,a hmui a hru pah bawk.

‘Nizan khan ka rui lutuk,ka lut leh ngam si lo a..Taxi ka phara,Hotelah min dah turin ka tia,mahse ka harh leh chuan tah hian ka lo awm.Chu zawng chu..’ awlsam zetin ka ti zangkhai vah.A mithmul a ti sang zauha,a ner nak bawk.

‘A awlsam hle maia’ min bia pawh a ang lo.

‘Eng maw i sawi?”

‘A awlsam ka ti mawle.I vannei takzet bawk,zingah Mama hetah a awm em?” a ti leh a.’Aih’ tih ka tum zeta,mahse dawtsawi kher a tulna ka hre leh ta lo.

‘Aw,awm..mahse nizan chungchang engmah ka hre loa.A sawi dan chuan chahbi ka ken avangin min rawn call a,Taxi driver zawkin a lo pick a.Min rawn hruai mai turin a lo ngen aniang.Taxi Driver hnenah khan Hotela min dah turin ka tia,mahse ka lo chatthla zui a..Ih,I u chu ka luak khum vak bawka…’ ka thaw hak mai,ka sawi zawng pawn ka biang a sa leh nghal hat hat thei.

‘Ropui lutuk…’ a kut a beng thak bawk.Ka melh nghek thung.

‘Thawnthu a ang lutuk,lawk..Hmanah tiang lam deuh chu Film tha zet ka en tawh..Enge a hming kha aw?” a ti vang vang.A ti tak tak nge min deuhsawh pawh ka hre nek lo.

‘Ngeiawm lutuk …’ ka ti hlak ringawt.Min rawn en a,tlemin a thutak ta bawk.

‘Ka ngeiawm hleinem,a fuh vel vek ka ti alawm.Tikhan i pawm tawh em? Mama hian keimah vang ni loin nangmah hi a ngaihven che ka tih kha..’ a ti a,a hmelah hnehtu inti hmel a lang thei bawk.

‘Ngaihven anih loh chu.A in chahbi ka kawl alawm mawle’ ka ti nghat.Atthlak zetin kan inzawmna kha sawi chhuah mai ka tim leh ta tlat.Eng ka ti zo ta nge mawni??

‘Anih chuan Mama hian hei bak hawna tur In a nei lo tihna mi?” a nui leh hak.

‘I ninawm,chutiang ka hre si se lo…’

‘Ahh,I hriat kha,kan Colonyah..Chu pawh kan in si chetin an In a awm kha’

‘I nghal em mai’ a nuih tak hawk hawkah chuan ka nui ve ta nge nge.Hei hi Savio-a nen kan nun dan dik tak a ni,a thinrim anih pawhin a rei ngai lo.Ka tan chuan thian mai pawh ni loin unaupa a ni a,kei ka thinrim hle tawh naah pawh ani hi chuan nuihna tur a hmu thei reng.

‘Cheque chu an hmu ta em?” Bike a lawn pahin a ti a.A awm nileng ta thak.

‘Hmu lo niang,engmah ka hre lo’ ka ti awlsam mai.

‘Um,amak ve ngawt mai.A bo tawp mai ania,Bank lamah withdraw tur pawn an kal miah lo anianga” a ti leh vang vang.

‘Dik chiah mai,a rutu hian engatan nge maw a tih ang ni?” ka ti ve a.

‘Eee,ka ngaihtuah a..I thil hriat kha nu Hmingi khawih pawi thei a ni em?”

‘Aw..Ni lutuk..’

‘I ngaihtuah ve em? A lo hria anga,engemaw harsatna a siam a ni mai lo maw?” a ti leha.Dik chiah,a hma pawh khan ka ngaihtuah tawha,mahse tunah chuan a chiang ta ni berin ka hria.

‘A ni maithei..Enteh,Tetea khan a lo haw khan a bialnu rai thu a hrilha,chuan a tukah khan Lungleiah a nu nen an kal kha I la hria em?’

‘Um..chu chu ngatinge?”

‘A bialnu a rai tih kha a sawi chianga,mahse engmah sawi a awm ta si lo a,Tetea kha ka zuk zawta,a fiamthu mai mai a lo ti a.Mahse, mak deuhin Cheque bo ni khan a bialnu thiannuin min rawn calla.Kan inhmu a..Tah chuan Nu Hmingin Tetea bialnu hnenah chuan palai an tir ang tih a lo hrilha,mahse nau a chhiat leh sia,chu chu Tetea khan a titla a tia.An inkar a lo titawp bawk tih min hrilha..Ka pa hian a hriatpui miah lo niin ka hria’ ka tita duah..

‘Thil thlen dan hi a mak a a mak miah lo bawk.Nu Hmingi hian chung vel chu a hre vek anga,I sawi loh nan thildang zawk a lo ruahman tih a chiang mai.Haw la thain ka hria’ a ti a.Ka bu nghauh,mahse..Ramsey khan hetah nghak turin min ti anih kha..

‘Enge i ngaihdan?” amah bawkin a ti leha,min en loin hmalam a en a,ka hmel en nachang a hre lo hlauh chu lawm tak ka ni ringawt.

‘Nu Hmingi khan haw rih loh a that thu min hrilha..’ ka ti sap.Ka sam thliin a chhem leng leng dar dar mai.

‘Ngati maw?”

‘Ka pa a thinrim lutuk vang mawle..’ ka nui hak.A then ve sak.Kan ngaihtuah a in ang lo anih pawhin a inhnaih viau ang tih ka chiang.

Chaw ka ei laiin ka phone a ri a,ka en vat.Ramsey..Ka biang a sa nghal hat hat mai.

‘Hello..’ ka theihtawpa pangngaiin ka ti sap.

‘Enge i tih a?” a rawn ti thawp sut.

‘Thil ka eia..In thleng tawh mi?’

‘Um,thleng tawh e.I hlau em?” a ti leh sup.

‘Aih,mahse…ka lo ngaihtuaha,haw ila a that ka ringa..’

‘Maw?”

‘Haw ila a that ka ring,I sawi ang khan ka tlanchhe nasa tawh lutukin ka hria’ ka ti a.A thaw hawk ri ka hre thei.

‘Um..Mahse,tah khan min lo nghak angem?”

‘Eng…I sawi awmzia ka man lo..’

‘I haw anih pawhin ka lo haw veleh min hmu turin tah khan i lo kal angem?”

‘I duh chuan…?”

‘Ka duh tih i hria ’ a awpa leh thawp sut chuan min duatna kha min hriat nawn tih leh lo thei lo.

‘Um..ka lo awm ang..Mahse, haw chu tha i ti em?”ka ti leh a,engvanga zawt nge ka nih ka hre lo.Mahse, darker 24 pawh a liam hmain amahah ka lo innghat tan der tawh tih erawh ka chiang.

‘I duh phawt chuan ka hnial dawn lo che.Mahse,thinrim avanga tlanchhuah emaw hmundanga riahchhuah kha awm tawh lo se..’ a ti nghet churh.

‘Um..Mahse.. a hun a lo thlen hian a harsa thin a’ diktakin ka chhang a,ka thawl hawkin ka hre bawk.

‘Ka hria alawm..Mahse, ka awm tih theihnghilh ngai suh’

Ka thil eina ka tifela,ka tihfel zawh hnuah kawngkhar leh tukverh ka check leh veka,a in kalh tha tih ka hriat hnuah khum lam ka pan ta chauh.Ka beisei loh tawpin ka mutui ta phian bawk.

‘I lo haw alaw?” min hmuh veleh Luni’n a lo ti nghal chul.

‘Um..haw,Dawrah an kal tawh mi?” ka ti a.Thutthlengah ka bag ka theh thla nghal bawk.

‘Kal tawh.I chhuak leh dawn em?” a ti leha.Ka lu ka thing ringawt.Mi tlang tak a ni a,angaihtuahnaa awm apiang a sawi phawng phawng zel bawk.

‘Thingpui i induh em?” a ti leh a.

‘Um,lo siam la.Roomah ka han chho lawk,ka rei lo ang’ ka ti a.Ka bag ka laa,Stepah ka tlanchho nghal zat bawk.Luni kha khawiah emaw ka tirhchhuah angai,ka pa te roomah ka lut duh tlat.A awm laia ka lut anih chuan engemaw danglam a hmuh veleh nu Hming’in lut an awm leh awm loh a zawt ngei ngei dawn.

‘Lun,room khi min lo tihfai sak lawk teh a,thil ka titla a palha,a hnawk nuaih mai’ ka ti a. A bu nghat,ka perfume bur pakhat ka thlauh keh luia, woolen carpet chungah a keh nawi ka ti darh nuaih bawk.A thenfai chhungin ka duh ka hmu hman lo anih pawhin engemaw tal chu ka en hman ang chu.

Lun-i ka room a a chhoh veleh ka pa te roomah ka lut ve nghal zat.Hmanhmawh zetin ka nuhrawn thawmhnaw dahna ka haia,engmah a awm lo..Drawer zawng zawng ka en veka,engmah ka hmu chuang lo.Khawiah nge a dah ang? Luni lo chhuk leh hmaa chhuah hman loh ka hlau bawk nen engmah hmu loin ka chhuak leh ta ngawt.

‘Ehe..Mambawih,I lo haw elaw?” Ka nuhrawnin min hmuh veleh a rawn ti nghal hluai.A thu loa ka haw vanga lawm lo hmel hmuh tumin ka en a.A hmeltha takah nui hmel a langa, mahse a mitmeng vawih raih mai chuan min lawm miah lo tih a tilang thung.Ka awmve hnawk min tihzia a chiang lehzual.

‘Aw…Lo haw’ ka ti nghat.Ka Tv en lai chiah ngaihtuah niawm takin Tv lam ka melh ngar bawk.

‘Chhuak suh ka tih che kha,I duh duha i khawsa dawn anih chuan hetah hian i awm thei lo ang’ ka hma takah a rawn ding nghal bawk.

‘Pa-a..A lo haw chuan a lawmawm alawm’ ka nuhrawnin nidang ang bawkin min rawn chhan leh vat.Ka nuichhuak thelh thung.

‘Hotel ang maia duh duh huna riah luha,chhuah leh ngawt ka phal lo reng reng’ a ti leh hmuk.Engtinmah ka chhang chuang lo.Pa fing tak nisi,a nupuiin duh duhin a kai kual mai mai,ka khawngaih letling zawk.

Chawei lai pawn min bia anih ngawt loh chuan engmah ka sawi lo.Ngawirengin ka ei mial miala,ka puar veleh ka tho nghal nalha,roomah ka chho nghal daih bawk.

Zinga min rawn biak bak Ramsey-an min la rawn be ta miah lo.Ka call ang nge call lo ang tih ka ngaihtuaha,ngai lutuk angah min ngaih ka hlau a,mahse..Diktak chuan ka ngai chu anih hi a..Zahthlak zawk hian a..

Laptop ka On  a,ka Movie ngainat em em ka en ta zawk.Ka en ngun tawh tehlul nen hmuhnawm ti zetin ka en leh ta tho.Ka en zawh meuh chuan dar 11 a hnai thuak tawh.Ka phone ka en a,kan thianho groupah an lo titi nasa viau,naktuk hi Apuia Birthday a ni a,thianho a dine out an lo rawt a lo ni a,ka then sak mai.Fb leh Igah ka lut leh zuaia,tihtur ka hre lem lo.Bakah ka beisei ber Ramsey msg emaw call pawh ka dawng lo a,ka hnual deuh rawih thei.A buai viau pawh a ni theia,mahse Inah ka haw tih a hriaa,engmah min zawt bawk si lo nen dik lo a lo awm palh pawh a ni maithei,ka call ta nge nge.

‘Hello’ hmeichhe awin a rawn ti a.Ka hriat hnu a ang viau.Mahse, tupawh chu nise tun ang hunah tu hmeichhia nge nita ang?

‘Ramsey ka lo be lawk thei angem?” ka ngaihtuahna tilang lo thei ang ber turin ka ti dam thlap.

‘Lawk..Toiletah a kala..Tu nge aw?” a rawn ti zangkhai leh vah..

‘Zorin-i ka nia,ka lo call tih min lo hrilhsak mai ta che’

‘Eee,nang maw? I number hi a save bawk si lo a..Agnes-i ka nia,min hria tiraw?’ a awki zangkhai zetah chuan nuam tihna a lang chiang ngang mai bawk.Kei erawh mawl ka inti ngawih ngawih,ka biak tirh atang khan engvangin nge amah a ni ang tih rin nachang ka lo hriat loh ni? Tun ang zan reiah phei chuan ani lo tu nge a bulah hmeichhia awm tur awm chuang ang??

Chapter- 10

‘Aw,hria e…Angai leh lo mai,naktuk lamah ka rawn be zawk mai ang’ ka ti a.Ka call nawn tawh dawn lo tih erawh ka chiang nghal vek thung.

Muhil thei loin ka mu meng kar mai,Ramsey ka huatna aiin keimah ka inhuatna a nasa fe zawk.Engtin nge a thusawi kha ka lo awih mai theih ka ngaihtuaha,mawl ka inti hluah hluah.Engtiang takin nge an zin kawngah ka chanchin sawiin min nuihzat ang? Ka thuchhuak hlawl mai.Tiang em em a chhaw hi engtik laiin nge ka lo nih hman? Ka tana tha ber chu Savio a ni ziah,a ni aia tha an awm ngai dawn lo tih engtin nge ka rin theih zawk? Agnes-I nen an inthen a tih vang mai khan ka lo awiha,tunah an zin dun mai pawh ni loin room an intawm bawka..Tumah dem tur an awm miah lo..Keimah chiah…Ka thinrim nge ka rilru a na ka hrethiam lo,mahse chiang taka ka hriat chu ka inzahpui ngawih ngawih.

Ka phone nghawr dar darah ka harha,ka bawkkhup thak..Ri mai mai tehse..Ka lu chungah lukham ka dah a,muthilh leh tumin ka mit ka chhing tlat bawk.Ka room kawngkhar kir riin min tiharh leh ta chauh.Muangchangin ka inleta.Sana ka en a.Dar 12 a pel tawh.

‘Lo lut rawh..’ tho chuang loin ka ti a.A rawn inhawnga, Luni a rawn dak a.

‘I thianpa a lo kala” rawn lut chuang loin a ti a.

‘Tu?” ka ti sap.Ka thuchhuaka,ka zi mar ar ar bawk.

‘U Savio…’

Zinga min lo call tu kha a ni ngei ang,nizan khan Dine out an rawta,tunah eng nge rawn tih a tum ni?

‘Lo awm lawk rawhse,ka lo chhuk ang..’ ka ti a,ka thochhuaka,Bathroom ka pan nghal a.Nizan khan ka muhil ta miah loa,khawvar hnuah ka muhil ta chauh.Ka inphihfai a,darthlalangah ka in en a.Ka hmai a dang lapa,ka mithnuai a val kual raih bawk.Ka landan maiah pawh hian ani ang mipa,Smart leh in duhtawk tak khan min duh dawn lo tih hre tur ka ni asin le.

Midang an awm lo bawka ke thluang meuhin duhdah fein a lo thu a.Ka pen thawm a hriat veleh a rawn hawichhuak vut bawk.

‘I va han nasa tak,muthlum i tum aniang ka lo ti mai asin’ a ti a, a nui var var bawk.

‘Teuh nang,nizanah ka muhil thei lo lawm.Zingah ka muhil tan chauha’ ka ti tha ve mai,Ka ham leh bai bai bawk.

‘Em em lutuk che hian,chawei vat la.Chhuak ang”

‘Khawiah?”

‘A tam mai,ei phawt rawh’ a ti awlsam mai.Engmah ei chakna ka nei miah lo.Mahse, ka ei angai..

‘Ramsey hi a lo haw tawh em?” titi pangngai sang thei berin ka ti a.

‘Aih,haw lo..Ngatinge?”

‘Ngatimah,a Inah khan ka duh chen chen awm min phalsaka,mahse engmah sawi loin ka haw ta daih a’ ka ti liam puat.

‘Ho lutuk,a duh chuan a rawn be mai ang che chu,chahbi a kawl tho lawm’

‘Nia…’ ka ti sap.

‘Khawiah maw kan kal dawn?” ka hmai chei mawlh mawlh pahin ka ti a.Dressing table darthlalang atangin ka hmu theia,ka khumah a vang zawngin a mu dar dar.

‘Form kan lachhuak ang.Hna kan dil ve ang chu’ a ti a, a rawn inbengkang titih.

‘Eng form maw?”

‘Hna kan dil ang ka tih chu,tia awm mai mai te chuan nakinah engtin nge niang?” a ti leha.Ka Lipstick ka dahthlaa.

‘I va puitling tehthut ve,I khua a sik em?” ka nui hak mai.

‘Sik mai mai lo..’ a ti hmak.

‘Anih chuan hna dil te i sawi ve a,eng thil nge thleng a?”

‘Eng thil mah,zingah ka Pain min Bonusa,pawisa lo chi ka phur zawh aia tam ka dawng alawm’ a nui a.Ka then ve sak.An fapa neichhun leh an fa naupang zawk a ni a,an duat tih piahlam a ni a,kan awm ho mai mai chung hian an hau ngai lo.

‘Ngatinge a hauh che a?” ka ti leh a.

‘Hre lo,nizanah ka Papuia nen an titi a,Mama bulah min dah an tuma.Zingah a  sawia,ka hnial khanglang alawm le’ a ti nang nang.

‘Awm mai la,nge i duh loh chhan?” ka ti sap.

‘Ka duh lo pawh ni lo,ih..Mama Strict zia i hre veka,hetia a landan mai hi a ni lo a,hnaah chuan Sakei a nimai..I hrethiam em? Sakei anih chu ka sawi’

‘Em em a che’

‘Ania lawm,a hnaah chuan tuman tik pawh an ti ngam lo hrim hrim,hna a uluka,amah pawh a thawkrim bawka..’uar fein a ti leh a.

‘Ok,anih chu..Chuvang chuan hna kan dil dawn tihna mi?”

‘Um,dil ang..Kan hmuh leh a tha,hmuh loh leh ngaiawh’ a tia,a then nak bawk.

Luni hnenah ka chhuak lawk dawn tih ka hrilha,ka haw leh dawn nge dawn lo tih min zawta,ka bu nghat ringawt.Kan hna dilna tur form kan lachhuaka,ka en vang vanga,he Deptah hian ka Pa nau chiah dinhmun sang tak chelhin a awma,ka duh chuan min pui turin ka be thei ang.Mahse,min pui angem ka hre lo le.A nupuiin min mil lo nasa lutuk ringawt.

‘In zir ve deuh chu kan ngai dawn anih hi,mahse zanin chu chhuak leh phawt ila…’ a nui hak hak.

Nia,mahse kei chu engmah ka in tawh dawn rih lo,hmanzan kha ka nawi lutuk’ ka ti a.A then nang mai.

‘Ho lutuk,i bulah ka awm dawn alawm le’ a ti awlsam et.

In thleng min thlaha,rawn lut tawh loin a tlan let lehnghal thung.Kawngkhar ka pen luh rualin ka nuhrawn inchung atanga rawn chhuk mek ka hmu nghal zat.Tun ang hunah inah a awm ngai mang lo.

‘I lo haw maw?’ min rawn ti a.Ka bu ringawt.

‘Luni,Purunsen a awm lo ania,han lei lawk rawh.Thil awm lo i sawi thin lova’ a ti zawm lehnghal zat.Luni pawisa a pe a,kei erawh room lam pan tumin Stepah ka chho vet hung.

‘Bawihi,zanin chu i Pa Rina te chhungkuain chaw an rawn ei dawna,chhuak lo la’ ka ding chat.

‘Apuia Birthday ania,Dine out turin plan kan lo siam fel vek a’ ka ti sap.

‘Anih chu mawle,I Pa i sawipui bawk si lova’ ka nuih a za zawk.

‘Min lo sawisak mai rawh’ ka ti nghat.

‘Aw,mahse a lungawi lo laklawh nasa mai si a,chhuak lo la chu a tha mange.Bakah i Pa Rina khan an Dept a hnaruak kha dil ve la a ti nghe nghe asin’ a ti leh a,a lo hre leh vek tawh tih ka ngaihtuah daih thung.

‘Ka dil dawn’ ka ti tawi tak ringawt.

‘Anih chuan zaninah ka lo sawi ang,dawr lamah i pa nen in awm dun thei bawk si lo..’ a ti leha,ka thle bak mai.Tu emaw,mihrang daih awm ve se chuan ka nu tak emaw an ti hial ta ve ang.

Ka thawmhnaw bawm ka hawnga,ka keu kual dan dana,thawmhnaw ka ngah viau,mahse a tlangpuiin Jeans leh T-shirt a ni deuh ber.Hmeichhia taka incheia,nu hnapa lan ka nei khat viau.Ka nihna leh awmdan nen hian a inmil lo bawk nen Smart taka inchei hi ka harsat a ni tawp mai.Ka keu leha,ka tawp chat.Ramsey thawmhnaw ka hak haw sak kha fel thlapin Luni’n a lo khai duna,en reng ringawt.Ka hak haw ni khan ka hlip pawpa,ka dah tawm tawp kha ania,ka lo ngaihven zui ta miah lo.

Hanger chawpin ka khaichhuaka,ka lek kanga,ka hnim vang vang.Ramsey perfume rim pa leh amah nena inhmeh ngawih ngawih rim kha hriat tumin ka mit ka chhinga, mahse engmah a nam lo.Nizan kha..A nuna Agnes-i awm reng chung siin min buma..Ka hriatchhuah rualin ka na lehnghal vawng vawng thei hial bawk.Nizan khan Agnes-i khan engmah a hrilh lo nge tun thlengin engmah call emaw msg pawh ka dawng eih lo.Ni lo,hrilh pawh nise enge ka beisei?an tan chuan nuihza siamna hmanrua lek ka ni a,ka mawl em avangin min bum mai zawk.

Ka chhuk lehin Kitchen lamah ka nuhrawn leh Luni an lo invin lawng lawng,eisiam a duh uluk thei em em a,a tlawn zawng tak chawei tur kan neih phei chuan a phili chuka,a bula awm te tan pawh ninawm khawpin a za ruai ziah bawk.

Pa Rina hi ka pa Chhang chiah niin ka pa nen an mizia a letling thawk.Zu a in nasaa,mahse khaw laia ruia ri lung lung chi a ni miah lo thung.A nelawm em em a,a tawng duha,a bula awm a nuam bawk.Mahse, a nupui erawh ka nuhrawn nen an in ang chiah thung.Pawn lama tha tak,chhunglam chhe em em,tlawn zawng tlawn na tak leh ei loh zawng ei lo na ve tak mai a ni a.Midang rilru tur dawn lek lova tawng pawp pawp a ching bawk.Kohhranah a inhmang nasaa,an rawngbawlpuite fa sual a sawi peih em em rualin a fanu sawn pai erawh a hmu mawi leh viau lawi.Vanneihthlak takin a fapa erawh tleirawl sual pawh nei lo khawpa nungchang tha a ni hlauh thung.Ka nuhrawn nen hian an in rel tawn ve ve a, kan chhungte dang lakah fel nih hlawh an duh ve ve bawk,mahse pawn lamah chuan inkawmngeih em em ang chiahin an awm leh lawi.Mi khawsa herh tak anni tawp mai.

‘Ka kal ania’ Kitchena dah pahin ka ti a.Ka tawng thawmah a rawn hawi vat.

‘Motor i keng dawn em?”a ti a,ka lu ka thing ringawt.

‘Savio a lo kal dawn em ni? Bike a chhuah te chu ruah a tla mai tur asin’ a ti leh a,nu zamtha tak a ni bawka,min biak laiin a thiltih a tawp chuang eih lo.

‘Ka keng peih lo..Ka lo haw hma loh pawn ka lo haw dawn tho ania’ ka ti nghat.Min rawn ena,a mitmeng vawt raih maiah chuan enge angaihtuah ang ka hmu thiam vek thung.

‘I pa thinrimna tur siamsak tawh rih lo phawt mai la,eng hunah pawh lo haw la,rui lo hram ang che’ a ti dam thlap.Ngaipawimawh lo hmel zetin ka ban ka vai khum zauh ringawt.

‘La kal lo lawk teh’ kawngkhar ka hawng hmana,mahse ka chhuak hman lo..Ka hawi leta,Aprona a kut hru mawlh mawlh pahin a rawn kal pheia.Ka pa nen an inneih hlima nu ka nei tur ka lawmzia leh ka beisei ang anih leh si loh dan ka ngaihtuahnaah a lo lut zawk.Ka lu ka thing nak mai.

‘Eng nge?” a langah erawh ka ti sap.

‘Hmanniah Azawmi khan a rawn hmu che a ni awma..’ tu nge a sawi ka bo thelh,Mahse Tetea bialnu thiannu kha a ni tih ka hrechhuak lehnghal vat.

‘Vawiin khan kan inhmua,Mawitei hnenah khan i pa bulah ka sawi anga, palai pawh kan tir ang ka ti kha ania,Mahse nau kha a chhiat sia..Chuvang ania engmah ka sawi leh tak loh’ a ti zawm leha,keiin thil serious lutukah ka ngaia,ani erawh hi chuan chawhmeh tui leh tui loh sawi ang vela awlsamin a sawi a ni ber..A tawng damthlap thei  reng mai pawh hi a fakawm letling zawk.

‘Chu chu ngatinge min hrilh kher a?” ka ti hmak,a mitah tak ka en ran bawk.

‘I pa bula sawi i lo duh maitheia,mahse naute ber awm ta lo chu sawi kher a tulna a awm dawn mawni ka tia’a nui sanga,mahse a mitmeng erawh a vawt raih thung.

‘A tha lawm,mahse Tetea khan a fiamthu mai mai atia,fiamthu a lo ni chiah lo chu nih hi a’ ka nui hak bawk.

‘Tetea tan chuan fiamthu te pawh a ni thei ang chu,a ma fa pawh a ni lo maitheia.Kha hmeichhia kha hmeichhe ho ve tak niin amah hrechiang tu ten an sawia’ a ti leh a.Ka ner nak mai.A duh na lamah hi chuan a hriatna hi chak tih piahlam a ni ringawt.

‘Nia,maithei..Mahse,mi sawi ang ngawt hi a ni vek bik lova.Ih..kha ka nu uire anga an ngaih ang deuh khan” ka hmui ka tisawi zauh bawk.

‘Eng maw?”

‘Eng ni love,ka lo puitling ve ta aniang,mahni nu te dikna lai han zawn vel pawh nuam ka ti tana..Ka tlai dawn tlat’ ka ti leha.

‘I nu kha ka hmelma  a ni miah lova,ka pasal nupui hmasa a nimaia,huatna ka nei lem lo.Mahse,a dikna lai han zawnchhuah tum chu a finthlak awm loh mange ka lo ti deuh mai mai’ a ti a,a thensak bawk.

‘I hlau deuh tihna mi?”

‘Ahh,enge keiin ka hlauh anga? Ka hlauh ber chu kan chhungkaw mualphona tur a thlen palh hi animai’ a ti dam leh thlap.

‘Ka hrethiam alawm,chuti ni lose Tetea fa pawh i tihtlak sak nang tiraw?” ka ti leha,a hmel danglam zawk ka hmu a,mahse a bo leh hma lutuka ka hmu sual emaw ka ti zawk.

‘Kal tawh rawh’ a ti dam thlap.

‘Kal dawn tehreng mai,chuan maw..Ka pa bulah chuan ka sawi tho ang,ka hriat tlai khan sawi nghal ka tuma,ka sawi dawn tih i hriat avangin ka pa Cheque kha i ru kual ta vela…chuan..’ka sawi zawh hmain ka  hmai a thip zawk…Ka ngawi nghal hmak bawk.

‘Hmingi,enge ni a?” ka pa awin a rawn ti nghal zat.Muangchangin ka hawi leta,ka hnungah Ka pa a lo ding reng tawh.

‘Enge i tih leh tak?” min rawn en a,nelawmna tel miah loin min melh run bawk.Ka hmaia min benna nge na ka tih a ka pain engmah ngaihtuah miah lova ka tihsual anih a ring nghal ngawt zawk chu ka hre lo.

‘Engmah a ni lo..Kal tawh rawh,lo haw tlai suh’ ka melh zawk ringawt.

‘Khawiah nge i kal leh dawn tak? I duh duh a khawsak i tum mai’ a ti leh khur khur.Chhan tumna ka nei eih lo.Tuna ka duh ber chu keimah chauha awma au vak vak ka chak ber.

‘Ramsey nen chawei na tur an lo nei anih kha,kal tawh rawh…’ ka nuhrawn bawkin a ti leha,a duh naah chuan dawtsawi hrehna pakhatmah a nei lo.

Taxi lo tlan hmasa ber ka phara,ka chuang luta,ngaihtuahna mumal ka nei thei lo.

‘Khawi lamah nge?” zangkhai zetin Taxi Driverin a ti a.Kan dine out Na tur hmun sawi ka tum zeta,ka thulh leh ta zawk.

Ka kalna duhna hmun kan thlen veleh reilote min nghak turin ka ti a,a bu nghat,ka chhuaka,kan dinna piah lam phul hmun awm phei zai mai chu ka thlira,ka pan pheia,a hmawrah ka dinga, hnuailam ka en thlaa,zuangthla ila chuan minute tam ka dam lovang,ruh bung rumin ka tla ngei ang.Mahse, thi ila an lawmna ka siam tam ting dawn tih ka hria,ka la dam ve hi an tan ka hnawk zawk tlat.

Nichin lawka thil thleng kha ka mitthlaah a lo langa,ka tawngkam kha a mawi lo tih ka hria,mahse ben hlawhna tur khawp erawh a ni lo.Kha aia tawngkam dengkhawng kha ka chhakchhuak ngun lutuk,kut min thlak phah ngai lo.Mahse, vawiin khan min beng tlat.Ka pa khan kan thusawi a hriat a hlauh avangin min tihtawp nan min beng a ni ngei ang.Sual tak anga khawsak hi nuam ka ti tak tak bik lo,chuvang takin vawi tamtak that ka lo tum tawh thina,mahse min rinna chhete mah nei lo tu bulah chuan that theih niin ka hre tawh lo.Haw tawh lo ila a tha zawk maithei.Ka fel miah lo,mahse a fanu ka ni a,tlem tal chuan min ring ve turin ka beisei lo thei bik lo.Min beng lai a hmua,min ben chhan a zawng tur anih laiin chutiang ti si loin ka tihsual vanga kut min thlakah a rawn pawm fel lehnghal hmak.

Ka auchhuak nghek,ka thawl hawkin ka hre bawk..Van lam ka ena,a thiang kuk bawk.Ka nu ka mitthlaah a lo langa,ka mit ka chhinga,ka mittui a rawn tlaa,ka hru buai peih lo.Ri loin ka nu ka biaa,a lo ngaithla em em ang tih ka chiang bawk.

Kan Dineoutna hmun tur ka thlenin an lo awm kim thap tawh,Apuia bialnu bakah Chhuantea bialnu a lo awm bawk.Mipa pakhat lo awm ve chu ka en zawka,Apuia Cousin Remfela a ni tih ka hria,kan inhmu zauh zauha,mahse Apuia ang lo takin a ruih hian a chapo ta thina,ka ngai lem lo.Biak erawh ka be chhe ngai lo thung.

Darkar hnih zen zawn kana wma,chaw ka ei mumal lo.Ruih chhum hmawk tumin ka in zawm deuh zat a ni ber.Ka bulah Savio a awma,ka chatthla tawp anih pawhin min buaipui dawn tih ka chiang.

‘I in dawn lo emaw ka tia’ ka beng bulah a rawn ti a,a nui hak hak bawk.

‘Chatthla khawpa in ka duh zawk..Khawi maw min lo ban leh lawk’ ka tia,ka thle lawk lawka,ka khawhmuh a phe ruai bawk.

‘A tawk tawh viau alawm le..Lawk aw..’ a ti a,a phone a phawrh a.Min rawn en a.

‘Mama anih hi,tehhlawla’

‘Bia la,Sakei anih te chuan a ei mai ang che’ ka nui hak bawk.

‘Lawk,a bengchheng si.Pawnah ka va be lawk ang’ a ti a,a tho zui nghal zat bawk.

Ka hawi kuala,Apuia leh a bialnu uluk zetin an lo inkuaha,Chhuantea leh Dika ka hmu lo ve ve,an kalsawn lai pawh ka hre lo.

‘Kal ang u,bill ka lo va tifel ang’ Apuia’n a tih ri ka hria,ka hawi chhuaka,Savio a lo la let ta lo cheu.Ka tho dawna,ka rin aiin ka rui zawk daih,ka tho hleithei lo.Tuemawin a kut min rawn pe a,ka vuan ve mai bawk,Min pawt tho a.Ka pai dat dat mai.

‘Khawnge Savio kha?” zawh bik pawh nei loin ka ti a.

‘Pawnah a awm,kal ang u’ Remfela’n a ti a.Ka kut a vawnna phelhsak ka tuma,mahse a vuan tlat.

‘Ka kal thei ang’ ka ti nghat.

‘A ho lutuk,thian kan nih kha’ a ti awlsam mai,ka en a.Ka lu a hai lutuk ringawt.Ka pen dawna,ka pai leh nak..Ka nui chhuak hak bawk.

Pawn kan thlen hnuah pawh Savio awm ka la hmu chuang lo..Khawiah chuan kal nimaw? Ka in hnem zia a hrerenga,engvanga kal bo daih nge maw anih hrep ni?

‘Zo..thlah i ngai em?” Apuia’n min ti a.

‘Aih,Savio a awm alawm,kal ru…’ ka ban ka vai a,ka dinna bul bang ka ngheng titih.

‘Ka drop mai ang che,ka hawna tur lam a ni tho a’ Remfela’n a ti a.

‘Ngai lo…Savio a lo kal tep ang’ ka ti leha,ka phone phawrh ka tuma,ka ti hleithei hlawl lo.

‘Call duh lo mai rawh,ka drop ang che’ ka ban rekah a rawn vuana.Ka melh chho vat.

‘Ka…ka..ka duh lo…’ka ti buh nuaih.Ka sawi ngaipawimawh lo zetin a nuia.Min pawt kal titih.

‘Min thlah rawh,I ruala haw ka duh lo’ ka ti leh that.

‘Inthlahrung suh…Ka thlah thei che lawm’ a ti leh talh.Ka thin a rim ta phat.Engvanga tilui talh nge maw anih tehchai ni?

‘Enteh,min thlah rawh.Ka ngaina lo chea,ka duh lo ka tih chuan ka duh lo animai’ ka ti hmak.Ka ding a,intihharh tumin ka mit ka khap sak sak bawk.

‘Nang…engmaw i sawi?” min rawn din hnaiha,min pawt deuh sawk bawk.

‘Thlah rawh…’ Ramsey aw nimaiin ka hria,mahse ka hresual a ni ngei ang.Tunah chuan Agnes-i bulah nuam a tawl mek ang chu.

‘Nang maw?” Remfela awah a hmelhriat a ni tih ka hrethei,aw rawn chhuahna lam ka hawia,Ramsey thim zing atanga a rawn pen chhuak mek chu ka hmusual emaw tiin ka melh reng ringawt.

‘Aw,keimah..I hruai luih mek bialpa kha ka nia..Thlah la a thain ka hria’ a ti leh nghut.A awpa zet chu a ring lo,mahse mi a let tawp tan lo chuan nawrluih chi a ni lo..