BLUE- 16

Chapter- 16

Kan dinna bula lungremah ka thu thlaa,a rawn thu ve a.Ka hmelah min thawng tih a lang em ka hre lo,Maria-in hmu lo se ka duh avangin thim lam ka hawi a.Ka mit ka chhing vang vang bawk.

‘I tha em?” min ngaihtuah hmel zetin a rawn ti a.Ka bu nghut,ka hawi leta,harsa ti lutukin ka then lui thei hram bawk.

‘I hmel a dik lo…Kan haw mai dawn mi?” a ti leh a.

‘Aih,ngai lo..Lut ang’ ka ti sup.

Ka tho a,a tho ve vat.Inchhungah kan inzui luta,Music dam raih mai a lo ri riai riaia,light dul zetin a eng hnim ruai bawk.Ka hawikuala,Stage a Tluangpuii ding ka han hmu a.A bula ding a Bandmate nen an inbiaa,a nui var var bawk.Ka mit ka lasawn thei lo.Eng rilru nge ka put erawh ka hre lo.Min bum tih amah ngeiin timna nei miah lova min hrilh lai khan mak tihna avangin ka thaw hleithei lo a,mahse tunah chuan ‘Mak’ tih hian a sawifiah zo lo.Mi danglam chu a lo ni takmeuh mai e.

‘Hey,ka zawng che u a’ ka hma a rawn din pahin Amal-in a rawn ti a.A nui var var bawk.

‘Pawnah kan chhuak lawka,in lo thlenna a rei tawh em?” ka chhan hmain Maria-i zawkin a lo ti vat.

‘Rei vak nang,pawnah ka hmu lo reng reng che u.Hawh u,lam ang u’ phur zetin a ti leh a.Zu a in ngai lo tih ka hria.Maria-i erawh chu ka hre lo thung.

‘Va lam ru..’ ka ti sup.Engtihmah ka chak lo,ka chawmawlh ti ila a dik ber ang.

‘Naaa,I tel loh chuan a dik nang..E,u Ruata khan a zawng che a’ Amal-in a ti leh a.

‘Khawnge i hmuh a?” tih pahin ka hawikuala.

‘Saw lamah sawn an awm’ tih pahin a kawk zauh.A kawhna lam ka hawipheia,Light eng dul bawk nen ka hmu mai lo.

‘Kal ang u’ phur zetin a ti leh a.Maria-in min rawn en a,a thilsawi kha a dik emaw dik lo emaw tihsual a nei lo.A hriat ang a sawi mai zawk tih ka hria.Chu vang takin a hlimna tihchhiatsak ngawt tul ka ti lo.Kal tumin ka pen tan chiah tihin Stage lamah thawm a rawn awma.Ka hawi chho vut.

Jonathan-a thianpa,Party Host tura an tih kha a lo ding vang.‘Tunah chuan lamtur ka ko chhuak dawna,tu man hnial theih loh kan ti ang’ zangkhai zetin a ti nghal zat zat.Hot leh boruak siamthiam zet a ni a.A awm tawh naah hi chuan a leng halh zel.

‘Mo leh mo neitu  lo chhuak se,chuan Sangkima leh Maria-i…’ kut an beng dar dar.Maria-in min rawn en a,a nui  var var mai.Ka then ve suk nangin ka nuih a za hauh lo.Midang pahnih a ko chhuak leha,Nidang ang bawkin boruak a siam thiam lehpek.Mahse, phurna ka nei eih lo thung.

Maria-in a kut a rawn dahchhuaka,ka vuana.Lam tualah ka kai luta,kutbeng thawm a ring zual sauh.In hmatawnin kan dinga,a kawngah ka kuaha,ka pawt hnai nghal salh.Min hnial loin min rawn ngheng nghal chiala.Ka dar lehlamah a kut a rawn daha,lehlamah a hmai a rawn phum titih.

Music lam rem leh dam raih a rawn ri a, lam hi ka ngaina lem lo,Zanin lek phei chu phurna eih a awm lo..Mahse,pawi erawh ka ti lo.A landanah chuan helaia awm zawng zawng hian Maria-i hi ka bialnu angin an ngai vek dawn tih ka hai lo,mahse enge pawi ang? Nunah hian midang kan care avangin pawitur kan ngaihtuaha,Mahse engmah hi a lo pawi lo.Mahni chauh inngaihtuahna khawvel a ni a.A nem apiang natna khawvel a ni bawk.

Music tawp rualin kut an beng dar dara,kalsawn loin ka kun hniama.Maria-i bekah ka fawp zauh,tu nge min en ka Care lo..Ni lo,engkim mai hi amah tihnatna tura ka tih ala nita cheu.Hreptak hian.

‘Maria…’ hmeichhe awin a rawn ti a.Aw lo chhuahna lam ka en vut.Hmeichhe pakhat a lo ding a,a nui var var bawk.

‘Hey…I lo haw tih ka hre lo reng reng, I dam em?” naupangchhia zetin Maria-in a ti nghal chul mai.

‘Um,dam alawm..Inneihna kha ka rawn tel hman lo va,mahse zanin chu Amal-in min phutna lutuk..Chuan,Min hmelhriattir dawn em?” min rawn melh zauh pahin a ti leha.

‘Dawn chiang,mahse nghal awih loh kan ti ang’ Maria-in hlim zetin a ti let ve nghala.Ka rin ang ngeiin a bialpaah min ngai nghal pang tih ka hre thei.

‘Nghal lo ang.Bakah nghal pawh ni ila engmah anih ka ring lo,a chiangin ka hria’ a nui leh hak hak.Min rawn en a,ka then suk.

‘Hei hi Sangkima ania,tu nge anih sawi angai loin ka hria.Chuan, ka Cousin Mary anih hi..’ min rawn en pahin a ti a.Min chibai tuma a kut rawn pharchhuah chu ka vuan ve vat.Maria-i nen an in ang lem lo.A hmai a hlai deuha, a khabe a dawh deuh bawk.Hmeltha vut tihtur a ni lo.

‘I tha maw?” pangngai thei ang berin ka ti nghut.

‘Um,tha lawm..’ a nui leh var var.Inti tatu zetin ka banah Maria-in a kuah ve thung.Nichin lawka ka khawsak dan avang khan a ngampa ta hle tih ka hai lo,mahse pawi ka ti lo.Hmeichhe pangngai leh zahpuiawm lo tak a ni a.Ka bialnu anih a pawina a awm lo.

‘Saw lamah sawn midang an awm asin…’ Phur zetin Maria-i hnenah a ti leh a.

‘Maw? Va kal ve ila..I peih em?” min rawn en a.

‘Lo kal lo ila pawi i ti angem?” ka ti sup.Midang bula awm chakna ka nei hlawl lo.

‘Ah,pawi ti lo..I nuam lo leh deuh ami?” min ngaihtuah hmel fein a ti a.

‘Aih, ka tha..Phone hman lawk ka ngaia’ ka tita ngawt.

‘Ok…Ka va kal lawk ang,ka rei lo ang’ a ti a.Ka ban a vawnna a thlaha.

‘Kei pawh ka rei lo ang’ ka ti ve sup.

An kal veleh pawn lam ka pan ve thung.Keimaha awm ka mamawh lutuk tlat.Pawnah awm an lo awm nuala.Mahse, tumah min ngaihven awm an awm lo.Ka Motor dahna ka pana,ka Phone ka phawrhchhuaka.Amal-i msg ka thawn tur ka type nghal mawlh mawlh.An rualin Maria-i lo haw mai tehse.Ka awm reng chuan ka a thei mai dawnin ka hre tlat.

‘Ka rin aiin i lo haw hma’ ka uin min hmuh veleh a lo ti a.

‘Nia,haw hma mai mai.Khawnge ka nu?” ka ti a.Ka thu thla nghal hnawk.

‘A mu tawh…I rui law? ’ a rawn thu thla ve a.

‘Aih,ka in lo…’

‘Tak tak?” chik zetin min en a.Zu ka in tih an hria,mahse thinrima min hauh ka la hre lo.

‘Tak tak,ka nu awm laia in ka duh lo..’

‘Fel lutuk..’ min rawn bana,ka thle sawn zauh.

‘Ka piai khat tawh che lawm..’

‘U..Kum engzat nge ka nih i hria em?”

‘Hria,mahse eng ang pawn upa la i kum aiin ka kum atam zel tho’ a nui hak hak.Ka then ve suk. 

‘Enteh…’ a ti leh a,min rawn thun hnaih sauh bawk.

‘Eng maw ka en ang?”

‘I ninawm,ka sawi dawn alawm le’ a ti nghauh.

Kei aiin kum 3in a upa zawka.Pasal a neih hma avangin a fapa erawh a lian uaih tawh thung.Ka nu a chhuna,nu lian tak ni lo mah se a te chhe lo.A hmeltha a,a nui peih em em bawk.A pasal boral hnuah tihtakzeta rawn ngaizawng an awm thina,mahse eng huah mah angai lo.Pasal neih leh lam hrim hrim angaihven eih lo bawk. Ka u zawk a ni nangin U angin min en mah zawk niin ka hre thin.Ka lakah a pangchang em em bawk.

‘Sawi la…’ ka ti sup.Hnunglam ka nghenga,Tv ka en vung vung bawk.

‘I rilru chu ka hre lo a,eng lo..Hmanniah ka nu nen kan sawi duna’ a ti a.A ngawi leh rih.Engmah sawi loin Tv lam ka en reng thung.

‘Nupui neih hi i hmanhmawh lo a ti a’ a ti leha.Unau inpawh tak kan ni a,mahse tiang lam hi chu fiamthua kan sawi bak kan la sawi dun ngai lo.

‘Neihtur awm hek lo’ ka ti satliah.A rum nghat.

‘Ti kual mai mai lo hian thutak ve deuh la,I naupang tawh lo ania’

‘Ka hria alawm.Mahse, hetianga awm hi nuam ka la ti rih’ ka ti leh sup.Thla tam pawh a liam hma khan ka chhungte hnenah Tluangpuii neih ka duh tih sawi ka lo tum tawh.Mahse, tunah chuan neih chu sawi loh ka hmelma lian ber a ni tawh zawk.

‘Nuam kan tih zawng apiang kan ti ngawt thei hleinem.Ka nu a upa tan tawha,Ka pa a awm tawh lo bawka,Chhungkaw din lam i ngaihtuah a hun ania’ thutak zawkin a ti leh a.

‘Nupui nei lo a ka awm hi tha i ti zawk turah ka lo ngaia’ ka ti hmuk.

‘Mahni hmasialna atang chuan tuna i awmdan hi kan nufa tan chuan a tha zawk.Mahse,ngaihtuah la ka duh chu Mipa emaw Hmeichhia pawh hi eng anga fel leh hlawhtling pawh ni ila Pathianin Kawppui nei turin min siama.Mahni chuan kan fel zo lo fova,kan mawi zo lo bawka’ a ti leh duah.

‘Eizawn naah i hlawhtling tawh a,abak hmasawn zel tur hian nangmah mai ai chuan hmeichhe fel tak,I phena nawr kaltu tur che i mamawh’ a ti leh a.A sawi dik mahna le..Mahse, tunah chuan Hmeichhia hi a huatin ka hua,ka hne ngawih ngawih bawk.

‘Anih chuan lo zawng la…’ a rilru tihhnual nana ka rilru diktak hrilh kher tul ka ti lo.

‘Tak tak maw?” phur zetin a ti hliai.

‘Um..I hmuh veleh min hrilh dawn nia’ ka nui lui suk.

‘Um…Anih chuan ka hre maithei a ni’ ngaihtuah muk hmel fein a ti leha.Min en ran bawk.

‘Eh,ava rang leh si ve’

‘Vawiin khan ka hmu alawm…’

‘Tu?” ka ti satliah.

‘Amal-i thiannu kha,I bulah pawh a awm reng kha..’

‘Tu ber kha?” ka ti leh a.Maria-i a sawina a ni tih ka hria.

‘Doctor kha…Niminah kan awm ho a,kan awm ho rei lo nangin a mizia ka hmuh chin kha ka duhzawng tak..’ a ti leh a.

‘Ok..Anih chuan lo belhchian atan a that chu’ ka ti leha.A ner nak.

‘I va han la thutak lo tak’ lungawi vak lo niawm takin a ti hlak.Sawi miah lo mah ila ka thutak lo tih hretur khawpin ka mizia a hre chiang.

‘Ka la thutak nghal ngawt thei nang,bakah amah pawn min lo ngei viau maithei asin’

‘Naaa,ka ring lo.A duh ang che tih ka chiang lutuk’ a nui a.Nichina a lawm lohna kha chu a theihnghilh fel leh der tawh tih ka hria.

‘Anih chuan unaunu i nei vat turah ngai ang’ ka nui a.Mahse, a nui ve hauh lo.

‘Ngatinge i then a?” a aw a zawi hle bawk.

‘Tu maw?” thut mar pahin ka ti a.

‘Tluangpuii kha mawle’ min deng dawt.Ka then lo va,amah zawkin min kalsana,chu pawh zahna tamtak nen..Ka ngaihtuah zawng pawn ka na ngut ngut thei.Engvanga na nge ka nih erawh ka hre lo,ka zah vang nge ni anga,ka induhtawkna a tihchhiat vek vang ka hre lo.Hriat pawh ka duh lo.

‘Ka lo kal changa ka hmuh bak ka hmu ngai lo nangin ka ngaina tho,ka nu phei chuan in ingaizawng tih a hriat khan a lo lawm tawpa’ a ti leh a.Ka chhang lo.

Kei chauh pawh ni lo,Ka nu leh ka Farnu,ka thiantha ber Ruata thlengin a mize lem khan min lo bum thlu fai vek chu ania.Hmeichhe ropui tak zawng a ni e.Ni lo,Hmeichhia anga piang,Mipa nih tum lawi si,Mahni nihna hai a ni zawk.

Ka ngaihtuaha,Eng emaw vanga Mipa aw nem tlat leh Hmeichhe aw thum tlat te,Mipa nisi pian nu tlat leh Hmeichhia, mipa pian ang maia pa tak an awm tih ka hria,ka hmu fo bawk.Vawi tamtak inhnialna a chhuak tawh.’Engvangin nge Pathian hian hetiang hian a siam? Chi kal dik lo a ni a,an awmdan kan sawisel hi an tan chuan a fair lo.Hrethiama khawngaihtur zawk kan ni’ tiin inhnialna a chhuak fo.Mahse Pathian hian hman atanga tun thlengin Mipa leh Hmeichhia chauh ala siama.Duhthlanna thiang tak hmang thei turin rilru fim min pe bawka.A bak hi  chu chhungkaw inenkawlna a pawimawh lutuk,ka Nutei hi Strict tak ni lo se chuan Jonathan-a hian Mipa ni loin Hmeichhia nih a tum ngei ang.A aw a nem a,kan naupan lai atangin mipa naupang Toys aiin Hmeichhe naupang lawmzawng,Barbie a duh zawk.Mahse,vawiinah chuan anihna tak pawmtir a ni a,Mipa niin nupui pawh a nei ta chu ania.Mahse,Tluangpuii erawh chutiang a ni lo..

Ka pa khan vawi tamtak a sawi thin.’Eng mi pawh nise hmuhsit ngawt tur anni ngai lo,Mihring annihnaah zah an phu.A siamtu Pathian a zahawm lutuk’ a ti thin.Nghet takin ka vawng renga,ka nunah hian mi han hmuhsit em em ka neih ka la hre ngai lo.Mahse, tunah hian ka nuna a vawikhat nan Tluangpuii hi ka huaa, ka hmusit bawk.Ka nunah hian a tha zawng leh a chhe zawngin hmasaber nihna a nei mawlh mawlh mai chu anih hi a..

‘Mam’ ka darah a rawn khawia.Ka en vat,ka ngaihtuahnaah ka lo cheng veng veng chu niin..

‘Um..’ ka ti hmuk.

‘Tluangpuii ka sawi kha i duh lo tihna mi?” a ti leh a.Ka ner nawk.

‘A ho lutuk…’ ka ti nghut bawk.

‘I hmelah khan a ho lo anih ka ring’ min chhaih tih ka hria.Mahse, ka nuih a za hleithei lo.

‘Kan sawi ta sa sa.Ka nu hian hmeichhe khawsak sang leh inla engemaw zet i neih a hlau thina,Tluangpuii kha chu chutiang mi a ni dawn lo tih ka chianga.Mahse, nang lah hian i lo then fel leh hman daiha’ a nui leh hak hak.

‘Ka mu dawn…’ ka tho nghal hluai.

‘Ka fiamthu anih kha,thinrim lo teh’ a ti hlak.

‘Thinrimna tur a awm pawh ka hre lo,mut ka duh vangin ka lo haw hmaa,min be reng zawk anih kha’ ka ti a.A ner leh nak.

‘A tha alawm.Eeee,Naktuk kha ka nuin Tlai lamah ai chuan dar 10 velah chhuak ila a ti a’ a ti leh a.

‘Ngatinge? Chawhma lam chu ka Nutei pawn a beisei che u ka ring a”

‘Pu Chhuma a thi tep a,ka pa thianpa kha i hria em?”

‘Um,hria..Enge na a?”

‘A Cancer alawm,ka pa nen an inkawm ve thin avang khan ka nuin a ngaipawimawh a’ a ti leh a.Chhang loin ka bu nghut ringawt.

Muhil thei loin ka let tawn sek,ka bengah Maria-i thilsawi kha a ri nawn tlut tluta,hriat loh der ka tum pawn a theih loh.Ramdinsanga tan tiang khawpin a thawka,angaizawng dawn hauh si lo.A tan a that zia a sawi ngeia,mahse kan inzui chhung reilote a ka tihsak tamzia kha a haider anih loh chuan atam lutuk,ka tihsak zat kha a tihsak ve angem?Nge a lo ti hnem lutuk zawk ang?Vawi tamtak Aruata pawh khan a sawia,Tluangpuii hian a ngaizawng ve lo a ti anih kha.Nia,A ngaizawng lo tawp ang.Mipa aiin hmeichhia a duh zawk miaua.

Mahse…Mah se a awm tlat.Kan awmdan zawng zawng ka ngaihtuah let pawh hian Lesbian ni thei turin ka ring phal lo.Sex hmanpui ka tum ngai hauh lo nangin kei ang bawkin insum harsa a ti ve thin kha ania,Lesbian ni se Mipa lakah engmah a feel tha thei kher lo ang.Mahse, ka laka a awmdan kha chu lemchan a ni thei lo.Mahse, engvang mahin Maria-i khan dawt a sawi ngawt dawn lo.

Ka tho leh ta nge nge.Ka zu dahna ka hawnga,Vodka bottle ka lachhuaka,ka hawnga,ka in nghal pawp. Ka nu lo kal laia zu nam chunga hmachhawn ka duh loh avangin a lo kal hnuah ka la in miah lo,vawiin ang hunah pawh ka in hek lo,mahse tunah chuan ka mamawh tlat.

Ka harh lehin khua a lo eng uar tawh,ka lu a na ngang mai bawk.Tho mai loin ka mu deuh vang vanga,nizan thilthleng ka ngaihtuahnaah a rawn lang lehnghal zat.Ka mit ka chhinga,rui hnepa ka in chung pawh khan engmah ka theihnghilh thei lo tih ka hria.Min bum tih ka hriatna khan min tina tawk hle chungin anihna tak ka hriatna khan min la tina zawk cheu bawk.

Ka nu te kal hnuah Showroom lamah ka kal ta chauh.Thil fel lo leh engmah dik lo a awm lo chungin nitin vawi khat tal ka tlawh ziah.Kan hawn atangin ni tam la liam lo mah se Customer kan hmu tha nghal bawk nen an buai ve thei viau.Sammy-an an Staff thenkhat chhawr zui turin min ngena,ka hnial lo.Mahse, neitu hran ka nih angin kalphung engkim ka thlak veka.Staff awmsa annih avang ngawta inthlahdah ka remti hek lo.

Hotel ka pan laiin Ruata’n min rawn call a.Nizan khan ka hmu ta miah lo kha ania.Engtak rawn sawi ang maw?

‘Hello’ ka ti nghut.

‘Hmela,enge nizan kha a awmzia?” a rawn au titih.Ka then nawk thung.

‘Vak vak che hian a..Enge?” ka ti hluk.

‘Vak vak lo,khatiang khawpa thian inthawn nat kha a lawmawm lo aw’ a rawn ti leh chiam.

‘Eng ber kha maw?” a sawi tum ka haider lui tlat.

‘Eng ber a? Maria-i nen inlam dun mai pawh ni loin i khawsak zui dan kha mawle’ a rawn ti leh a.Ka then suk

‘Kha khan a thawng che maw?” ngaihsam hmel zetin ka ti liam puat.

‘Aw, thawng tak a ni’

‘Mipa ka nia’

‘Zosangkim,khatiang kha thil mai mai a ni lo tih ka hre ve bawk aw..Lel lul mai’ a rawn ti leh hlur mai.Engvanga lo thinrim chiam nge maw anih le a?

‘Ka in report thlap thlap dawn tihna mi?” ka ti nghut.

‘In report turin ka ti che mi? hriat ve ka phu ka ti mai zawk’ a la lungawi ta chuang lo.

‘Ok.Mahse, engmah hriattur a awm hran lo.Nizan khan a intan ve chiah’

‘A va tha ve’ tiel zetin a rawn ti leh a.

‘Khawnge i awm?”

‘Ka sawi peih lo’ hmeichhe titau a ang mah zawk.Tluangpuii a ngaina tih ka hria,mahse midang ka kawp avanga chuti chiama han thinrim erawh a ho lam hret.

‘Ha,hmeichhia ang mai..Lo leng la’

‘No…Ka sil lutuk,nula ka in Massage tir dawn’

‘Khawiah maw?”

‘Sawadee bak khawiah nge ni se i tih a?..Lo kal ve zawk teh,Micky hian eng eng emaw a nei nual ania’ a rawn ti leh a.Sawadee hi kan thian pakhat Micky ta a ni a,Venglai YMA hall bul ah a awma,ka Hotel nen a inhlat viau,thla hmasa lawka a hawn a ni a,a hawnna la rei loh ngaihtuahin kan kal ngun tawh viau thung.

‘I chhun ruih pek tihna mi?” ka nui hawk.

‘Teh nang,a neitupa hi a khirhkhan lutuk,rui chunga kal chuan min vawchhuak duh ang’ a nui hak hak.A thinrim tih a theihnghilh leh der tawh anih hmel.

‘Hotelah kal zuai ka ngaia,ka rawn tlang dawn nia’ ka ti ve ta zawk.Hna hmanhmawhthlak engmah ka nei lo a,ka rit luk tih ziawm nan pawh kal ila a tha zawk ang.

Reilote Hotela ka awm hnuah Venglai lam panin ka inkhalh chhuaka,Traffic jamin a tibuai lutuk lo bawka ka thleng thuai.Kan kal ngun avangin a Staff ten min hre tha viaua,an fel hrim hrim chu thuhran nise an Boss thiante kan ni bawk nen min lo lawm viau zel bawk.

‘Motor i keng tiraw?” kan haw dawnin Ruata’n a ti a.Ka bu nghut.

‘A that chu,ka khalh peih thlawt lo va,Taxi ka hmanga’ a ti a.Ka then suk.

‘Motor khalh peih lo khawpa chau chu i ni lo mawle’ Micky-an a ti a,ka nui chhuak nghal hawk.Ruata pawh a nui ve sun sun tho bawk.

‘Nizan khan i hmu em?” kan tlanchhuah hnuah a ti a.Ka melh zawk,min en loin a phone a en thung.

‘Eng maw ka hmuh ang?” ka ti sup.

‘Tluangpuii mawle’

‘Aih,hmu nang..Ti nge?”

‘I daw peih anih mai chu a’ a ti hluk.

‘Daw nang,a hrim hrimin hmu pawh ni ila enge ni chuang?’ ngaihsam hmel zetin ka ti leha.A thaw hak ri ka hre nghal zat.

‘Nang hi i lo sual tak tak anih dawn hi a’

‘Eng maw?” ka melh leh zawk.

‘I sual ka ti mawle…’

‘Ka sualna ka hre lo.A hrim hrimin i x te zawng zawng ngai pawimawh turin ka tih ngai loh che kha ‘ bung zetin ka ti hmuk.

‘A dik alawm.Mahse,ani hi chu a danglam deuh ka lo tia’

‘Danglam lo…’ ka aw chang zetah chuan sawizui ka duh lo tih a hre ngei ang.

‘Ok..A tha alawm’ ka chhang tawh lo.Ka Motor khalh lai chauh ngaihtuah niawm takin hmalam ka en a.Mahse, ka duh loh tawpin ka mitthlaah Tluangpuii a rawn langa,a sam tawi mat kha a inhmeh phian.Mahse Lesbian a ni..Steering ka hum nghek bawk.

‘Ka haw dawnin ka hmu a,amahin pawnah a lo thu a’ kan ngawih vang vang hnuah a ti hul hak.

‘Sawi tawh lo teh,sual deuh angin ka in ngai ve dawn tlat’ ka ti nghut.Ngeiawm zetin ka nui lui hawk bawk.

‘A lo tapa..Ka be dawna,mahse an Band zinga mi khan a rawn ko a’ a ti leh a.

‘A tah a chhuak anih chu’ ka ti liam puat.

‘Ho mai mai vanga tap tur chi niin ka hre lo.I Khawsak dan vanga tap kha anih ka ringa’ a ti leha.

‘Duhtawk teh,a duh leh tap se a duh loh leh tap lo se hnaih leh tumna ka nei lo’ ka ti sup.

‘Engvang nge min hrilh teh’

‘Engmah chhan a awm lo.Ka hne tawha,ka kalsan..Chu zawng chu’

‘Ok,nia..hmanniah tiang chiah chuan ani pawn a sawi alawm’ a ti leh a.Mak ti zetin ka en vut.

‘Engmaw a sawi?”

‘I duh tawh lo va,I ring tawk lo va.Enge harsatna a neih i hriatsak lo bawka.Mahse, engahmah i ngai zui lo tih min hrilh.Ka awihsak lo,I mizia a ni lo tih ka hrilh bawka.Mahse, nizana i khawsak dan khan engkim a tichiang ta vek.Nizana a tah chhan chu a tahchhuah vang a ni tehmeuh ang,achhan erawh i khawsak dan kha a ni ang’ min demna a awah a hriat tel theih..

‘A sawi avang chuan i thiantha ber hi min ring lova,ani kha i ring tihna ami?”chang zetin ka ti hluk.

‘Ka rinna tur che engmah i sawi loh chuan ani kha ka rin angai tih i hria’

‘Engmah sawi tur a awm lo.Bakah Hmeichhia ang maia thil kal tawh sawisek hi ka ning’ ka ti hmuk.

‘Sorry..ka sawi leh tawh ngai lo vang’ A lawm lo tih ka hre thei.Engkim hi hria se chuan alamah atang hlek lo ang,mahse sawi zui ka duh lo.Chu zawng chu..

Maria-i nen kan inzui ta viau.Min tiphur hlek lo chungin thlah tumna erawh ka nei lo.Ka hmelhriat zingah kan inkawp tih hre lo an awm leh tawh lo.Atthlak zeta Tluangpuii nen ka khaikhin chang erawh a tam lutuka ka hre seng lo.A chanchin engmah hriat zui ka duh lo va,hmuh chakna ka nei hek lo.Ka ten em em ti ila a dik ber.Mahse, ten em em chung hian ka chhungril hian a mamawh tih erawh ka haider nasat zawh poh leh a chiang ting mai thung.Vawi engzat nge amah vanga ka muhil lai ka harh ka hre seng hek lo.Hetiang em em a ka laka effect ala nei hi mi danglam chu a ni chiang e.

‘Anih aw…Zanah chuan i lo leng lo ang maw?” Maria-in min ti a.A hna kal ka lama,ka thlah nghala,Motor jam avangin kan thlen meuh chuan khua a thim tawh.

‘Aw,zanin chu tihtur pawimawh,Family lam thil a awm ka tih kha…Naktukah Lunch eiturin ka lo kal ang’ ka ti a.

‘Ok,a tha lawm..Anih chuan ka kal aw’

‘Uum…’

‘Fimkhur la,I thlen veleh lo sawi la aw’

‘Ok..’ ka nui suk bawk.Atthlak zetin Tluangpuii ka hrechhuak leh zawk pek.Ka ngaihtuahna duh loin ka lu ka thing nawk bawk.

Muangchangin In lam panin ka inkhalh hawa,ruah a rawn sura.Glass ka up vat.A sur hnem ta phian bawk.Kan in lam ka pan zela,Sana ka en a.Dar 7 a pel tawh.Hmundanga chaw ei tum ka ni a, Buati ka hrilh lawka,eng emaw vangin ka thulh leh thuta,engmah Buati ka hrilh leh ta lova,a haw tawh ngei ang.A pawi ka ti chuang lo.Eisiam thiam tak ka ni lo nangin ka eitur na na na chu a tul phawt chuan ka siam thei.In ka thlenin ruah sur a zia deuh tawh,mahse tlem erawh a ni lo.Gate hmaah tak ka dinga,keimahin Gate ka inhawn chawpa.Reilote mah nise ka huh hman fe tho.

Ka tlan luta,Motor atangin ka chhuaka,Gate khar tumin Gate lamah ka tlan let leha,ka khar tur chiah pawn lam atangin an rawn vuan  chat.Ka phu zawk thei hial bawk.

‘Tu nge…?” tih pahin a rawn vaunt ka en a,ka beisei loh lutukin Tluangpuii nen kan inhmachhawn ta ran mai..

A Jacket lukhum a khum a, mahse a huh zawr hneh viau tho.A hmai a dang lap bawk.

‘Eng nge i duh?” ka ti hmuk.

‘Eng….Eng..’ min rawn bawh a,a zawi nghal hnak bawk..