BLUE- 22

Chapter- 22

‘Chhuak rawh’ a ti leh that.A mitmeng ling hlar maiah chuan engmah pawisak a nei lo tih alang chiang ngang mai bawk.

‘Anih chuan ka sawi dik lutuka,tuar a har viau tihna mi?” ka ti leh nghut.

 Ka pan pheia,a che leh phat.A dinna hnaih ber thutthlenga Throw pillow a lakanga,a rawn vawm phei leh fua,ka thle leh zauh nangin min thawi thuak tho mai.A dang a la leha,mahse ka hnaihchilh titih avangin vawm loin min rawn vuaa,ka kutin ka indang nghal vat.Min rawn vuak leh tumin a insiamrema,mahse a kut ka man behsak a.Ka pawt hnai dawrh.A rak that,A kut lehlam a rawn pharchhuaka,ka hmaiah a rawn hama.A thip nghal zawk.

‘Duhtawk rawh’ ka ti sup.A kut pahnih ka hmerkawp saka.A thil ken a thlauh tap.Hnung lamah a ban pahnih ka herhsaka,ka ban lehlamin a kawngah ka kuaha,min si chetin ka pawt bet leh hmak.A tal leh laih,a kut anat lutuk hlauin ka thlah dul deuha,ka kuahna ka ti dul deuh bawk.Mahse ka thlahdul rual deuhthawin ka ngalah a rawn pet nghal chawrh.Min tlawh leha,a mitmeng a ruai maiah chuan enge a tih mek a hria pawn a lang lo.

‘A tawk’ ka ti leh hrawk.Mahse, engmah hre lo ang hmakin talchhuah tumin a tal laih laih tho.In lenhleih viau lo ila chuan ka vuan hneh kher lo ang tih ka hria.Tha tawpa tang,pawisak nei lo a ni bawka tha a nei ngang mai.Mahse, Mipa zawk leh lian zawk na na na chu thaah min hneh ngang lo.

‘Ka haw lutuk che’ a ti zuai raih.Talchhuah pawh tum buai tawh loin a din ngaiin a ding khawng lah bawk.

‘Ka thlah dawn che ania’ ka ti sup.A mitah tak ka en a,a khap sak sak.

‘Misual….’ A ti leh sap.A aw ria huatna lang chiang lutuk chuan min deng deuh dawt.

‘Min khawih tum tawh lo la,anih loh chuan Hmeichhiain kut min thlak hi ka ngaithei lo ania’ a sawi haiderin ka ti hmuk.

A kut ka vawnna ka thlaha,ka kalsawna.Ka bula thutthlengah ka thu thla nghal a,ani erawh a dinna ngaiah a dinga,a kut ka hmerna a tuai nauh nauha,enge a ngaihtuah ang ka hre lo.

‘Thu rawh,sawi dun tur kan ngahin ka hria’ ka ti nghut.

‘Aih,kal zawk rawh’ a ti sap.Mahse, a awah a zam tih ka hre thei.Engvang nge anih erawh ka hre lo.

‘Thu rawh..’ ka ti leh hmuk.Inleng zawk ka ni tih ka hria.Mahse, engkim sawitur awm apiang sawi vek ka duh.Inveh kual den den reng hi ka hne tawh.

‘I Staff ka ni tawh lo ania,bakah kan In anih hi’ a ti leh nghauh.Ka lo ngaihtuah lai mek anih avangin ka then suk.

Engmah sawi loin thutthleng lamah ka thle buk,muangchangin a rawn pheia,ka ep zawnga thutthleng awmah a rawn thu thlaa.Tlanchhiat inpeih at niawm takin a thu ngil auh bawk.

‘Ramdinsanga nen enge in plan leh tak ka hre lo,mahse i himna ka ngaipawimawh ka tih kha’ ka ti hmuk.Min rawn melh zawka,hnuai lam a en lehnghal vat.

‘Engmah plan kan nei lo’

‘Anih chuan engvangin nge Boom-a i hmuh thina? Ani nena sumdawn intawm intum tih sawi miah suh’ ka ti leh a.A kutah hmuhnawm a awm ta emaw tihmai turin a melh ngar mai.

‘I hre duh tak tak em?” Reife angawih hnuah a tichhuak ta chauh.

‘A vaiin…’

‘Zawhna ka zawt hmasa ang che’

‘Tha i tih dan dan…’ ka ti leh hmuk.

‘Engvangin nge Maria-i hi i kawp?” zawhna ngai bawk.Ka sawi tam tawh lutuk.

‘Angai bawk maw?’

‘Ni lo,kha chhanna ni lo chhanna dang ka duh’

‘Mipa ka ni a,nupui ka nei lo bawka.Ka kawp thiang,Mahse, tunah hi chuan nangma him nan’

‘I ngaihdan diktak a ni em?”

‘Aw…’ engemaw a hriat leh tak ni.Ka zawt a,mahse amah zawk bawkin zawhna chhan tur min pe leha.

‘Then rawh….’

‘Nangma chungchang ania sawi ka duh,Maria-i ni loin’ bung zetin ka ti hluk.

‘Keima chungchangah chuan Maria-i hi a pawimawh alawm’ a ti leh nghat.Ka hre thiam eih lo thung.

‘Maw? Ani nen enge inzawmna a neiha?” ka ti hmuk.

‘A vaiin..Engvanga min rawn hnaih leh nge i nih a engvanga min umzui nge i nih te hi khawi atangin nge ka hriat i rin?” a ti leh nghat.Hnuai lam en tawh loin min rawn en a.A mitmeng lian kelkawlah chuan thinrimna niawm tak alang thei bawk.

‘Ni lo,ani nen inzawmna a nei lo.Tul miah loah hnuhluh tel tum miah suh’ ka ti hmuk.Chhan ka tum a ni lo,engmah a hre lo tih ka hriat vanga sawi ka ni zawk.

‘Ka hnuk lut tel reng reng lo.Ka hnuh luh ngai loin amah hi a telsa zawk,hei hi alawm i hmuh theih loh thin.Tu nge  i tana tha ber i hre duh lo thina’ min demna niawm tak a awah a lang thei bawk.

‘Enge sawi i tum chiah? Pehhel loin sawi rawh’

‘Nuamti taka min nuih chunga nang mah nen kan chanchin a sawi lai khan thih daih ka chak,atthlak em emin ka induhtawkna chhiat vang ni loin min hnaih i duh tak tak vangah ka lo ngai hmana,mahse a lo ni si lo..’ a ti leh duah.Thil vei lianpui tla ta huai ang maiin a thaw hak bawk.A sawi tawp lamah khan tahchhuak aw niawm tak alang theia.Kei erawh a thusawiin min thawng lutuka,sawi leh maitur hre loin ka en ngur thung.A hmeltha zetah chuan dawtsawi hmel a pu lo,na tuar hmel chiang takin alang thei zawk.Mahse, he hmel pawisawi lo lutuk hian min lo bum tawh thina,tunah min bum leh lo ang tih a hriat loh.

‘Maria-i hi keimah min hum nana kawp i ni lo,I duh em em tih ka hria.Mahse, nangmah berin Game i khel duh anih chuan ka hnaih theih nan che ka khel ve mai.Mahse, a hmuhnawm loh thin,a bikin Khumah te….’ A ban a phar hliai..

‘Ni lo…’ ka tichhuak hrawih.Ka awih thei lo….

‘Ni e,engkim mai hi ka hmu a,ka hre bawk asin.Engtik lai mahin min ring ngai lo.Achhan chu maw min duh tawk loh vang a nimai.Mahse, pawi ka ti lo.Ka lo tihtawh ngaihtuah chuan rin nih hi ka phu lo hrim hrim.Ka dem hek lo che’ a ti leh a.

‘Anih chuan khang zawng zawng ka tih kha lemchan angin i lo ngai tihna maw? Ni lo,nangin lemchanga min bum vang ngawt khan lem ka chang ve tihna a ni lo’ ka ti hmuk.A nui sak,mahse a mitmeng vawt raih maiah chuan a nuih a za miah lo tih alang thei reng thung.

‘Anih chuan Maria-i i then thei si lo hi enge?” a ti khauh.

‘Ka sawi kha,I him nan…’ a nui leh hak.

‘Sawi tawh suh,I tana Hmeichhe awmchhun a ni tih ka hria alawm.Nang ai chuan ka fing lo hle chungin ka hmuthiam ve ania’ a ti hlak.

‘Ramdinsanga tana i thawh ang bawk hi min thawhsaka,mahse ani chuan ka hmang tangkai tih a hre lo thunga. I hrethiam em”

‘Tehkhin suh,kei chu ka duh hauh loh thilah ka tal awka.Nang erawh chuan hmana ka tih ang bawk kha ani nen inti ve thunga,mahse ka lo inven theih nan Maria-in min hrilh fing ta hlauha ’ a ti leh a.

‘Eng maw a hrilh che?” ka ti hluk.

‘A vaiin..’

‘Engmah sawitur a nei lo.Ka hmang tih a hre lo ka tih kha’

‘Anih chuan engvangin nge in awmdun lai thlalak engkim ka hmuh tura a rawn thawn thin?” a ti leh khauh.Hei pawh thilthar bawk.

‘Chu zawng ka hre lo,mahse ka tihtir a ni lo’

‘Ha,ka awih i ring a mi? I thiltum engkim ka hriat hnu phei chuan i chetdan ka ngaihtuaha,a sawi dik tih ka chiang.Kei leh Ramdinsanga nen tehkhin chi a ni lo’ a ti leh hmak.

‘A hma khan Aruata bum nan khatiang ang kha in lantir i ti a,engmah tihluihna a awm lo a,I duhthu ngeia ti i ni bawka.Mahse,I sawi ang kha a lo ni na nge?” chang zetin ka ti hmuk.

‘A hriat kha a dik,mahse ka lakah i tha em em a,I chunga a chhe zawnga chet harsa ka ti tial tiala.Kha bak kha kawng ka nei lo.Chuan,I luhlul na khan thudik hmu thei lo khawpin i mit a tidela,ka sawi bakah khan enge buaina ka neih hriat i tum ngai hleinem’ a ti leh halh.A sawi dik mahna.Ngaihven lo tawp ka ni hauh lo,chhui pawh ka chhui zuitir ngei,mahse phuba lak bak ka ngaihtuah lo.

‘Awmzia a awm lo’ ka ti hmuk.A thle bak,min en ran bawk.

‘Ramdinsanga hian min hmangtangkai ngei,mahse ka hna ai chuan i himna ka ngaipawimawh zawk’

‘Wow.A va ropui leh si ve’ tiel zetin ka ti sup.

‘Nia,ropui’

‘Anih chuan kalsan ta che,enge i la hlauha?”

‘Ka kalsan tawh.Inzawmna kan nei tawh lo’ a ti leh nghauh.

‘Anih chuan Boom-a kha nangma tan liau liau i lo beisei tihna maw?” ka ti leh hmuk.

‘Boom-a ,ni dawn tak.Mahse, I rin ang a ni lo leh pek.Kan sawi ta sa sa,sawi vek ang.Boom-a ka hmuh thin chhan i hre duh maw? Boom-a te nupa tan hian fa ka lo hrinsak tawh asin.Anni hi anni tih erawh tunhnaia ka hriat chauh a ni thung.He thil avang hian Ramdinsanga khan min thunun tlat bawka.Mahse, tunah chuan ka peih tawh lo.I hriat hlau reng renga nun hman lah awmzia a awm lo tih ka chiang tawh.Vantlang laka hminghliau te pawh ka hlau tel ve bawka.Mahse, awmzia engmah a lo awm lo.Ka theihtawp ka chhuah chung pawn Miin Patil angin min ngai thei hrama,min ngaih ang ngeiin Nupui te pawh ka la nei zawk maithei’  a ti leh duah.A nui leh sak bawk.A hmaa min hrilh te khan min thawng tawk tawh hle chungin tuna mi phei chuan min thawng na tih piahlam a ni ringawt..Sawitur hre loin ka en tlawk tlawk.

‘Hmanah ka sawi tawh kha,ka chanchin i hriat belh hunah chuan min ten lutuk ang ka tih kha.Mahse, engkim hi chhan nei vek a ni thung’ a ti leh sap.

‘Ni lo…’ ka ti sup.Sawi maitur ka hre hlawl lo.

‘Kal rawh,khawngaihin.Engmah sawi duntur kan nei tawh lo.Mahse, I hriat tur chu hmana ka tih bak kha i tana chhiatna tur zawngin ke ka pen leh tawh ngai lo.Ka damchhungin ka pen nawn tawh bawk lo vang.Thu ka tiam ngai lo ka tih kha,mahse hei hi chu ka tiam ang che.Rilru nuam takin lo awm tawh rawh.Engmah i tana pawitur ka ti lo vang’ amah bawkin a ti leh duah.Tunah chuan hmeichhe puitling leh induhtawk tak ang chiahin alanga,a hmelah engmah angaihtuahna alang chhuak hek lo.Kha lehchen ka chhui a,mahse engmah ka hre si lo.Engvang nge? Fing ka lo inti thina,mahse ka fin loh zia ka hrechiang lutuk tawh.Sumdawnnaah bak ka thluak hi hman tlak a lo ni lo….

‘Tunah engvangin nge i sawi a? ahma khan engkim min hrilh thei lo tihna mi?” ka tichhuak hrawih.

‘Thei lo,mihring ka nih ve tlat avangin mualpho ka hlau ve ka tih kha.Nulat laia mi fa paisaka lo inhlawh kha thil nuam anih lohzia i hrethiam lo ang.Chuan,Aruata kha engvanga thi nge anih i rin?”

‘Aruata’ ka tinawn ve sup.

‘Inhmuh intum zan khan engkim tuna ka sawi zawng zawng hi ka hrilh vek.Thildang pawh a hre nual,chu erawh ka buaina a ni lo.Khami zan khan keimah nen kan inhmua,Diktak chuan bul kan tan leh dawn ni a ka hriat avangin engkim hrilh tur chein ka ti a.Eng lo,atthlak zetin ka lo ring hman che ka tih kha.Mahse,mahni chanchin sawi kha ka zak ve a’ a thle bak.A then leh sak bawk.

‘I hmu maw?” ka ti leh sup.

‘Aw,mahse i rin ang kha a ni lo ania.Ka that lo,kan inhmuh hnuah nangmah hmutur chein a lo kal dawn tih a sawia.Mahse, ka hriat leh hmasakber chu a ruang an chhar tih kha ania,ka ngaihtuah duh ngai lo nangin tunhnaia i chet duhdan atang hian nangmah i nih ka ring ta hial’ a ti leh sak sak.Engkim mai rilru fim taka sawi a ni tih ahmel thutak ran maiah chuan a lang reng.

‘Lawk,sawifiah ka tum lo.Mahse,ka tana Aruata tangkai zia i hria’ ka ti nghut.

‘Um,dik chiah.Mahse, nang hi chuan i tana tangkai ber i hai fo tlata’ a ti leh salh.

‘Ka hai hauh lo,ka thil duh pawh enge anih ka chiang lutuk tlat’

‘Ok,a tha alawm.Keipawn enge i duh ka hria’

‘I hre hauh lo,hria ni la chuan ka nat i duh lo ang’ ka ti leh nghut.

‘Ka tina che maw?” a mengphar deuh awk bawk.

‘Aw…Min tichhe vek bawka’ ka ti leh sup.

‘A tlai tawh,tunah chuan i nunah midang pawimawh zawk an awm tawh.A hmangaih che niin ka hria.I tana thaber a ni bawka’ a ti leh a.Pangngai taka sawi tum viau mah se a aw a khur tih ka hre thei tho.

‘A tlai lo…’ ka ti nghut.Ka thochhuak nghal bawk.

‘A tawp vek tawh,ka natna pawh tunah chuan tuar dan ka thiam tawh’ nghet charhin a ti a.A aw a dam thlap bawk.Tihluih chi a ni lo tih ka hria.

‘Tun bak hi engmah ka ngen tawh che ka ring lo.Ka hmuh leh che pawh ka beisei hek lo.Khawngaihin, chhuak rawh’ amah bawkin a ti leh nghat.

‘Ka kal ang,mahse engkim siamtha turin ka lo let leh ang’ ka ti sup.Ka tho a, Kawngkhar lam ka pana,engmah sawi loin ka chhuak lai min thlir mawl tawp thung.

Ka Phone nghawr datah ka phu nghek,ka phone ka phawrhchhuaka,ka en a.Maria-i msg a lo ni a,Open loin ka thutna piaha Thutthlengah ka thehphei nghal daih bawk.Tluangpuii sawi kha a dik anih chuan Maria-i hian engkim a lo hreru vek tihna a ni a.Mahse.Tluangpuii nen inhre awm pawn an awm ngai lawi si lo.Lesbian anih thu leh a Cousin nen an inkawp thin tih kha a sawi ngeia,sawi satliah ni loin tum nei ranin a lo sawi tihna a ni ngei ang.Mahse, engvang nge?Zawhna hlir..

Aruata kha tu thah nge a sawi lo,mahse engemaw hriat a neih vanga that anni tih chu a chiang reng tawh.Rocky khan engmah a ken an hmu lo tih sawi mah se khami zan khan ken chu a nei  tih a chiang vek.A thil hriat a sawichhuah loh nana that anni tih lah achiang vek tawh.

‘Boom-a te nupa tan fa ka hrinsak’ ka bengah a rawn ri nawn leha.Awlsam taka sawi tum mah se a sawi lai khan a hmelah sawi harsa a tihzia alang thei vek thung.Engtiang taka harsain nge nun hi a lo fight ve ka hre lo.Mahse, a thiltih ka ngaihtuah a,a kawng a awlsam bik lo tih a chiang vek.Mahse, tunah chuan engkim a theihnghilh vek nan ka theihtawp ka chhuah ang,ka pek theih zawng zawng ka pe ang.Ka Hmangaihna pawh..A pawm hma chuan a pawm ngei theih nan ka umzui dawn tih lah ka chiang em em bawk.

Sana ka en a,zing dar 3 a pel tawh.Ka mut a la chhuak eih lo thung.Ka tho a,ka Macbook ka on a.Ka thil neih leh SX bika ka sumdawnna chetkual dan ka en a.Ka bul tanna hi mitan chuan sum  thianghlim tih ahar ang,mahse ka tan chuan ka thawhrimna rahchhuah tho a ni a,ka ngaihlu lo thei lo.Hotel leh Showroom anga midangin Account an khawih chet theihin ka dah lo.Keiman ka buaipui vek.Hotel ka siam dawn khan hmunthuma thena hmun hnih ka hmanga, Loan ka puk belh bawk.Sammy hnen atanga sumdawnna ka lakchhawn dawn erawh kha chuan avaiin Loan vek a ni thung.SX sum engmah ka khawih tel lo hrim hrim.Ka nu leh ka farnu pual liau liaua ka dah a ni a.Engemaw thleng palh pawh lo awm se ka nu leh ka farnu hminga dah vek a ni a.Ka ukil bakin tuman an hre hek lo.Ka ukil nen kan sawidun reng rengin SX tih kan sawi ngai lo.A vaiin BLUE DOCUMENT tih vekin kan sawi thin bawk.

Ka mu ta miah lo,ka tihfel theih zawng zawng ka tifel vek.Ka tihtur engkim ka ruanhman felsa vek bawk.

‘Hello…’  phone a pick veleh zangkhai zetin Maria-in a rawn ti a.

‘Vawiin dar engzat thleng nge duty i neih?” ka ti nghal nghut.

‘Dar 2..Ngatinge?” a rawn ti nghal zat.

‘Hmuh che ka duh’

‘Min ngai chiang,tak takin ka lo kal ang’ a sawi zawh rualin a nui ar ar bawk.Ka ner nawk thung.

‘Ok,a tha lawm.Ka lo nghak ang che’ pangngai thei ang berin ka ti sup.Tluangpuii hnena a tih zawng zawng kha chhanna tha tawktak min pek ngei ngei angai.

Dar thum rik hma hretin a rawn thlenga,a rawn nui lut var var.

‘Thil i ei tawh em?”  ka ti a.A bu nghat.Ka tho a,a thutna bulah ka thu thla vea,min rawn ngheng deuh titih.

‘I van serious em em.A pawimawh bawk aniang maw?’ a ti a.A nui zui ar ar bawk.Za miah loin ka then ve suk.

‘Tluangpuii i hria em?” ka sawi zawh rualin rang zetin min rawn en vat.

‘Tu Tluangpuii?” a ti a.A thu mar nghal bawk.

‘I cousin nena inkawp i tih kha’

‘Eee,kha kha maw? Hria,ti’nge?”

‘Eng chen nge i hriat?” ka ti leh nghut.

‘Engti zawngin? I sawi awmzia ka man lo’ a ti leh a.Pangngai taksa sawi angin alanga,mahse a hmel buai nak kha ka hmuh hmaih hauh lo.

‘Eng zawng pawhin..’ ka ti leh hmuk.

‘I bialnu hlui a ni tih sawise min tih chuan i bialnu hlui a ni tih ka hria’ a ti hmak.

‘Anih chuan  engvangin nge i hmu tih min hrilh loh?” ka ti leh hluk.

‘Ka hmu maw? Teuh lo,chutiang khawpa mize hniam ka ni lo’ a ti nghat.

‘Phuba laknan ka kawp leh tih hrilhtur khan enge dikna i neih?” a sawi ka haider hmiah.

‘Dikna maw? I bialnu ka nih hi’

‘Nia,bialnu.Nupui ni loin,ka bialnu mai chauh i ni tih i hriat chuan khatiang thu lawilo mai mai lo hrilhtur i ni lo’ ka ti leh hluk.

‘Enge a awmzia? Enge thlenga?” mangan hmel zetin a ti hap.

‘Tluangpuii lo hmu tawh suh’ ka ti leha.Ka tho nghal vut bawk.

‘Aih,engmah thil awmzia ka hre lo.Enge ani nen inzawmna inneih a?” a ti that.

‘Ka nupui tur…’

‘Maw?” a ti leh that.

‘Nangnen kan inkar a tawp tawh’ ka ti leh hmuk.

‘Ni lo,a fair lo.Hetiang i ti thei lo’ a ti leh that.

‘Tluangpuii hnena i duh duh i sawi hma khan ngaihtuah hmasatur i nia sin’ ka ti leh a.A hmeltha zet danglap chu ka ena,khawngaihna pakhatmah ka nei lo.

‘Enge ka ngaihtuah ang? Vawi tamtak Tluangpuii hming lam chungin min kuaha,ka natzia i hria em?” a ti leh that.

‘Chutiang ka ti hauh lo’ ka ti hmuk.

‘I ti,I ruih apiangin Tluangpuii emaw min ti a,ka hne tawh lutuk’ a ti leh chiam.

‘Athat hlauh chu.Tha taka inthen ka duh,Puitling ve ve kan ni a,engkim a tawp tih kan hrethiam ang chu’ ka ti leh a.Ka aw a ring lo,ka vin hek lo.

‘Ni lo…’ a tap zui hlap hlap.Mahse, ka engahmah a thawk lo,Tluangpuii hnena thudik lo a hrilh laia Tluangpuii awmdantur ka ngaihtuaha,ka thinrim ala reh lo.

‘Ka drop ang che’ reife hnuah ka ti sup.

‘Angai lo….’ A ti hmak,Ka rinlawk anih avangin mak ka ti chuang lo.A induhtawkna vang pawn a duh dawn lo hrim hrim.

A kal hnuah Tukverh bulah ka dinga, ka hnuai lam kawng ka thlir thlaa,Motor an lo khat leh thup tawh.Hmuhnawm thar ta riauin ka hre tlat pek.Tluangpuii hmel ka mitthlaah a lo lang lehnghal zat,kan inkawp lai khan a der loin a nui thina,a rilru a hah zual changin ka bulah a tap mai zel bawk.Mahse, khang zawng zawng kha lemchan angin a lantir leha,ka huat theihna turin.A tum ang ngeiin ka haw ta ngei,mahse ka huat em em lai pawh khan ka ngaia,ka mamawh zia ka chhungril hian a hre chiang,min tihchhiat tumtu tiin ka ngaihtuah lui ngar ngar thin kha ania.Mahse,ani pawn na a lo ti ve a,ka himna turin min kalsan bawka…Tunah chuan tuman an tina leh tawh ngai lo vang.

Dar 6 velah Hotel atangin ka chhuaka,inah ka hawa,ka inbual a.Chaw ka ei leha,a hnuah Tluangpuii te ina kal turin ka inkhalh chhuak lehnghala.Lawm tak chuan min lo dawngsawng dawn hauh lo tih ka hria.Mahse, chu vang ngawtin kal loh ka tum phah chuang eih lo.

Ka kal pahin call ka tum zeta,a pick duh ka rin loh avangin ka call leh ta lo.A kalchhuak anih pawhin a haw hman tawh ka ring ve ngawt.Mahse an In ka thlenina  lo in kalh thap.Veranda thimlai deuhah ka dinga,a lo haw hun nghah mai loh chu tihtur a awm lo.

Darkar chanve vel ka nghah hnuah Step ah pen ri a rawn ri thla dat data,an thenawmte nen Step intawm annih avangin Tluangpuii nge midang zawk ka hre lo.Ka dinna ngaiah ka ding a,a lo lan hun ka nghaka,a rawn hnai zela.A rawn langa,Tluangpuii ngei a lo ni a.

Ka pen chhuaka,mahse a hnunga rawn lang ka hmuh rualin ka ding leh chawt.Ramdinsanga…Khang zawng zawng ka hriat hnuah khan chuan ka beisei loh zia chu pui tak a ni!!!