BLUE- BOOK 1

Chapter 1-10

BLUE

                                                Maengi ralte

Ka phone riin min tiharha,meng mang loin ka bana.Tun ang hunah tu tak ni ang maw?Ka mit ka nuai a,ka phone ka lek hnaia.Min rawn call tu ka en a,ka ner nawk mai.Eng chu nge maw a hriat hrep ni?!

‘Eng nge?” ka ti hmuk.

‘I la mu tihna mi?” ka tawngkam bung lutuk engahmah ngai lo tih hriat zetin a rawn ti lawng lawng.Nia,eng ang pawn tawngkam nelawm lo hman khum mahila he pa hi chuan engahmah angai ngai tlat lo.Mak lah a mak hek lo.Ka best a ni miaua.

‘Sana kha en la,mi pangngai chin chu an la mu vek ang chu’ ka ti leh hluk.A nui hawk hawk duh lek.

‘Lutuk che hian,nizan Party effect anih kha.Tho teh,mi pangngai chin chu kan tho vek tawh ania’ a ti leh a.Ka then nawk thung.

‘Sawi vat la…’

‘Vawiinah lo len ka duh’

‘Hmela,chumi sawi tur chuan maw tun ang zing karah hian i lo call a?” ka ti hmuk.Ka lawm lo,lawm lo tak ka ni..

‘Enge i thinrim vak kher a? a tlai tawh..’

‘Dah mai teh..’ ka ti hlur mai..Off tumin ka lasawn dawna,mahse a rawn au leh rih.

‘Off ngawt suh,sawi duh sawi zawh hma hma hian..’ a thutak ta deuh.

‘Ka thawh hun ni lo a ka thawh chuan ka mood engtin nge a awm i hriat kha..Uang viau lo mai teh’ ka ti a.Ka aw tlemin a nem ta deuh.

‘Ok,ka hria.Kei aia hrechiang an awm nang..Oh,ni lo..Tuna i bula mu mek khan a hrechiang zawk ang..’

‘Ruata…’

‘Sorry…Nizan khan a zui haw che maw ka tia..’

‘Khawngaihin…’ ka ti tawi tuk

‘Um..Vawiinah Offcieah lo kal ka duha..Chuan,lo kal satliah loin thil pawimawh sawipui che ka duh..’

‘Ok..I lo kal hunah kan sawi dawn nia..’

‘Lawk..Tarmit-i a awm ang tiraw?” a ti leh a.Ka rum hawk mai.

‘Ok..Ok,ka dah…’ a nui hawk hawk bawk.

Ka thian tha ber nimahse a uang reng mai hi a chang chuan ka ning thin.A tawng duh em em a,tu pawh a kawmngeih thei vek.Thian siam a awlsam em em a,mahse kei anga kawmngeih erawh a nei lem lo.Kei erawh thian siam ka harsata,ka tana tangkai tur erawh ka hlah ngai map lo thung.Ka tawng duh lo a,ka tawngkam lah a bung em em bawk.Kan mizia hi chhim leh hmar ang hlauh a ni a,mahse kan inkawmngeihna a dal eih lo thung.

Muthilh leh tumin ka mit ka chhing vang vanga, mahse ka beidawng ta thak.Ka lu nat zia lah chu a..Mahse,ngaihthat lohna tur a ni lo.Nizan Party naah khan ka inhnem lutuk tlat.Ka phone ka en a,Msg eng eng emaw a lo tlar dal.Kan thianho group erawh a la reh thap thung.

Hmanhmawh lo zetin ka inbuala.Tui vawta ka inchiah rualin ka harh sawng sawnga,ka dam huai huaiin ka hre hial bawk.Mahse, ka lu na erawh Damdawi ei loh chuan a reh dawn miah lo tih ka chiang.Damdawi ei lo a reh tir ka tum anih chuan In belh leh animai..

‘Thingpui nge eitur dang ka siam nghal zawk ang?” Buat’in a lo ti vat.

‘Thingpui kha nimai rawhse.Chuan,vawiinah inah engmah ka ei lo ang’ ka ti a.Dawhkan ka kil nghal zat.

‘Engtikah nge Pi te chu an lo kal ang?” thingpui rawn dah pahin a ti leh a.

‘Ka la chiang lo.Ka hrilh leh dawn che nia’ ka ti sup.

Buati hi a hmain ka Nu nau te hnena awm thin a ni a,Kei aiin a upa mah bawk.Mahse,ka u lem lo thung.Awmpui pangngai anga awmpui neih ka harsat avangin ka nutei hnenah langa kal tur min zawnsak turin  ka ti a.’Buati hi a fela,a rintlak bawk’ tiin ka hnenah a rawn daha,a sawi dik viau.Kum 3 lai a awm tawha.Awmpui hlawh pangngai pawh pe loin hlawh thahnem tham fe ka pe a.Inchhung mamawh leh eitur leina tur a hranin pawisa ka pe ziah bawka.In enkawl leh ka eitur thlengin angaihtuah fel thlap zel bawk.Zingah dar 6-7 inkar velah a lo thleng tlangpuia,zanah erawh chaw ka ei fel vek hnuah a haw chauh thung.Keimah chauha khawsa ka ni a,Driver lah tumah awmpui ka nei hek lo.Inchhung ka ti hnawk lem lo a,hna hahthlak lutuk engmah a awm lo.

Ka nu hi Lunglei a kan Inah ka Farnu Pasal sun tawh leh a Fapa nen an cheng a,Aizawla awm ve turin ka duh hle chungin ka Nu in a duh bau lo.Kum upa lam a ni tawha,tihluih tumna ka nei lem lo.Kha leh chen a lo chenna,a pian seileina hmun leh Ka pa thlan awmna a ni a,kalsan harsa a ti anih pawn dem tur a awm lo.Mahse, a khat tawkin an lo kal deuh renga,thla khat aia rei mah min awmpui tum a awm fo bawk.

‘Good Morning…’ Hotel ka thlen veleh Gate bula Security lo dingin a lo ti vat.Ka bu nghut ringawt.Lift a awm tho nangin ka ngaina lo.Step lam ka pana,a chung berah ka Office a awm chungin zing tin ke hlirin ka kal ziah.Hrehawm lah ka ti hek lo.

‘Morning Sir…’ nui var var chunga min titu ka en a.Ruata ka hrechhuak nghal zawk bawk.

‘Morning..vawiinah tihtur pawimawh ka nei em ka lo en ang’ ka tihzawm nghal zat bawk.A bu nghat a.Note bu,amah nena inhmeh zet a lakang nghal zat.Kum 2019 a ni tawha,tu pawh awlsam taka kan khawsak tawhna khawvelah hian he nu hi chuan Note bu a thilziah neuh neuh a bansan thei miah lo.

‘Dar 11ah MFA hruaitu te nen Meeting in nei dawna,dar 2ah….’ a sawi laklawh laiin ka ban ka vai zauh.A then saka,a tarmit a nawr chho zauh bawk.

‘Min rawn thawn mai rawh’ ka ti nghut.A bu nghauh.

‘Coffee ka rawn la angem?”

‘Aih…Ka lawm’ ka ti leh nghut.Ka office kawngkhar ka nem hawnga.Nimin khan dawhkanah eng eng emaw ka chap hnawk nuaiha, tifel loin ka kalsan tawp kha ania.Mahse tunah chuan awihawm loh khawpin a lo fel leh vek tawh.

CCTV record en tumin ka duh zat darkar ka hmetchhuaka.Chairah thatchhe zetin ka thu awn nghal duai bawk.Thil thar a awm lo..Nidang ang bawkin ka chhuahsan hnuah Tluangpuii’n a tifel nghal vek.Kum khat lai chu hetah a thawk ve ta.A lo thawhhlim atangin a hna tlin zia leh thiamzia chu puitak a ni ringawt.Engtiklai pawn nui hmel a pu deuh renga,mahse mak takin a mizia a cool raih lawi.Hna kaihhnawih thilah bak ka be ngai lo a,ka belchiang hek lo.Eng chhungkua nge annih lah ka hre hek lo.Ruata ka ngaihtuah chhuak zawk..A lo kal apiangin Tluangpuii a be tha em em ziaha,thil tul vak lo pawh a zawt peih a,min kawm tura lo kal emaw ka tih laiin Tluangpuii thutna lamah zawk a lo thu leh reng zel.Nu lian tak a ni lo a,a te chhe lem lo.Engtiklai pawn Uniform nen a awm renga.Thawmhnaw dang a ha ka la hmu lo.Christmas Party kumtin ka siam ziaha,a lo thawh atangin Christmas kan hmang tawha,Mahse Party kha hna kaihhnawih anih lem loh avangin kal loh a dila.Ka phalsak mai bawk.A sam lah a chhipah a tawn khawm renga,Tarmit a bun bawk..Huh..Eng chu a lo hmu bik ni maw? Ka then nawk mai..Engvanga han ngaihtuah chiam nge maw ka nih le a??

Ka room Kawngkhar kik thawmah ka hawichhuak vut.Sana ka en a.Dar 10 a pel tawh.Lut tura ka koh hmain a rawn inhawnga,Ruata a rawn langnghal zat bawk.Nidang ang bawkin a harhvang lehpek.Nia.Engmah vei tur a nei lo.Mi hausa fapa mal a ni a.Mizoram sawrkarin zu zawrh a phal tak hnuah Wine shop mai ni lo,a phur luttu ber a ni zuia.A sum chevel a hraw satliah lo.Mahse,tuna a eizawnna tel lo pawh hian  lungkham tur nei lo a duh duh lam hawia thle mai mai thei tur khawpa nu leh pa atanga nuamsa sa a ni ve hrim hrim.

‘I lu a na em?” ka hmaa rawn thut pahin a ti a.A nui vur vur bawk.

‘Na nang,ka in tam hleinem’ ka ti hluk.

‘Hmela..nangmahin a awm zawng zawng i in zawh vek tep kha a..’a ti bai bai.Ka then suk ringawt.Regular taka tlai tin in ka ni lo.Mahse, ka in ve vek vek chuan in tak ka ni ziah.Tui pawlh mang lo a in ka duh ziah bawk.

‘I in zat ve pawh ka in lo..’

‘A tha lawm,nakinah chuan i la thihpui vat ang’ a nuia.Ka nui ve hawk bawk.

‘In tur i duh em? ‘

‘Tunah maw? Aih..’

‘Zu lam ka sawi lo aw..’ ka ti hmuk.

‘Oh…Anih chuan Cold Drinks awm se’

‘Ok…A awm ang,Fridgeah pawh sawn a awm sa maithei’ tih pahin Fridge lian vak lo awm lamah ka thle buk.A thoa,a pan pheia..

‘Beer hlir..Ka duh chi ka hmu lo,Tluangpuii ka laktir mai teh ang’ tih leh kawngkhar lam pan a rual nghal zat.Ka then suk thung.

Ka beisei loh zetin a rawn let lehnghal mai lawi.A thutna ngaiah a rawn thu leha,chik zetin a hmel landan ka en ve bawk.Engmah han danglam pawh chu ka hmu lem hlei lo a.

‘Eng nge i sawitur chu sawi la..’ ka ti sup.

‘Maw? Ka sawitur maw?”

‘Aw,zingah khan thilpawimawh a awm i ti nilawmni?”

‘Eh…Nitak,Tluangpuii ka hmu a.Ka lo theihnghilh vek’ a nui a.Ka nuih a za miah lo thung.Ka staff pakhat,a mimal nun lah engmah ka hriat sak miah loh a ni nangin a hmeichhe chhaih kual thin anga a chhaihkual theih ka ring lo bur.

‘Tluangpuii hi enge i hmuhdan?” ka ti hluk.

‘Hmuhdan vak pawh ka nei lem lo,a chhe lo hle a.A smarta,hriatchian ka duh viau..Mahse, amah hi a inveng thiam riau’ a ti ta duah.Ka then nak mai.

‘Anih chuan hmeichhe dang a ang meuh na nge?” nuam ti ru zetin ka ti a.Engvanga nuamti viau nge ka nih ka hre miah lo thung.

‘Ang tho ang’

‘Takzet…?”

‘Aw,ka duh leh duh loh anih ka ring..’

‘Ka awih chiah lo..’

‘I chiang meuh maw? Nichin khan a indang ping thiam i ti maw ka tia?” ka nui hawk mai.

‘A landan anih kha ka sawi,lawk..Nang hian hmeichhia angin i en ngai reng reng em? Ka sawi awmzia chu khawl ang ni lo,nula angin…” a ti leh duah.Chhang loin ka dar ka tichhing uk ringawt. Diktak chuan Mipa leh Hmeichhia tih angin ka lo en ngai lo,ka hnuaia thawk,Staff rintlak em em leh tha chungchuang tih bak engmah ka lo ngaihtuah ngai lo.

‘Sangkim…’ ka hmai bulah a kut a rawn hmet ri khauh.Ka thu ngila..Tukin chu ka dik tlat lo.Tul miah lo thil ka ngaihtuah kual chiam chiam ringawt mai.

‘Um..’

‘I nuam lo deuh em?”

‘Nuam e,I lo kal chhan ka lo ngaihtuah mek..I sawi mai bawk si lo a’ ka tita daih.Ka nui lui suk bawk.

‘Nizan khan Ambie-a khan a sawia,a Cousin te sum lamah an tlachhia a ti a’

‘Chuan..’  a chawlh zawk laiin ka lo ti hmanhmawh.

‘An eizawnna tihral an duh,an duh ti ila tiral lo thei lo dinhmunah an ding’

‘Sammy te ni em i sawi?”

‘Aw..I lo hre lawk tihna nge?” mak tih hmel zetin a ti a.

‘Aih,hre lawk nang.An tlachhia i tih khan ka rilruah a lo lang a’ ngaipawimawh lo hmel zetin ka ti a.

Mahse, ni hnih liamta khan hemi chungchang hi Sammy-an min rawn sawipui tawha.Pawisa lama tanpui turin min rawn dila,mahse ka lo hnial thung.Khawi Bank mahin sum an puktir duh tawh lo tih Sumdawng lian zual chuan kan hre ru vek.Chutihlaia lo invest tum kha atna chi khat a ni tawp mai.

An tlachhia tih ka hriattirh atangin mak ka ti lo thei lo.Tunhnaiah Company chi hrang hrang an lo lut a,an len pui awk awk laiin Kum 20 chuang an lo kalpui tawh hi engtin nge an tlakchhiat pui theih ka hrethiam lo.Mizorama Motor te bika kan hmelhriat hmasak ber pawl a ni a.An hlawkna kha a nep thei lo reng reng,mahse an khawsak sang lutuk leh a Pa in enkawlna nen an che thei tawh lo a,an Showroom pawh a ruak titih tawh.Insiam that tum thin mahse an sum hman a lo na thang tawha,an in Control tak tak thei tawh si lo,mi hausa hmasa ti a an lo lar tawhna thin lah mi sawitur ti tam a ni tawh zawk.Ka tuipui zawng eizawnna ni lo mahse lak erawh ka duh.Thlah te lehzel thlenga inhlanchhawn theih eizawnna a ni tlat.An kal zui thei lo anih chuan ka la ang tiin ka rilru ka lo siamfel vek tawh zawk.

‘Eng nge maw i ngaihtuah thin le?” lawm lo hmel zeta a tih riah ka en vut.A nur nung mai bawk.

‘Engmah..Ka ngaithla reng alawm’ ka ti liam puat.

‘A tha nih chu a.Mahse, I lan danah kha chuan nupui then tur i ang.Nang hi,Zothani nen in inthen tihna zawk nge?” a ti leh duah.

‘Then lo…Anih chuan Sammy-te chu enkawlsak i tum nge?” ka ti a.

Zothani chanchin a sawi zawm loh hram ka beisei takzet.Nizan Party naa hmeichhe pakhat,kum 23 vel bawr lek ka Flirt pui avang khan nge ka hre lo,zing atangin min la be lo.Biak lah ka tum bik hlei lo a.A lungawi lo anih pawn a lungawi hunah min lo be mai ang..Kan inkawpna a rei tawha,min hretu zawng zawngin kan inzui tih an hre vek.Mahse, ka hmangaih em ka hre lo.Neih ka tum em ka hre hek lo.Ka naupang tawh hauh lo nangin anihna takah chuan Inneihna hmanga phuar nih ka la duh lo.Nun hi nuam ka ti a,zalen ka duh bawk.Bialnu nghet ka nei chungin Party ni khuaa hmeichhe dang han kawp zawk zawk lah ka tim phah eih lo..Mak takin nghet taka kawp ka nei tih hrereng chunga mitmei min hmuh hreh miah lo lah an ther fur..Hmeichhe ho hi an mak khawpin ka hria..Ka lerh avang hian a thinrim fo a,mahse amahin a lungawi leh mai zel a,min then a hlau tih ka hre ru kur bawk.Diktak chuan min duh huam huam vang nge ka hre lo,Boring tih chang ka ngah viau zawk.Then na chhan tur ka hmuh miau loh avangin then erawh tumna ka nei lo.

‘Eng nge i hriat le?” a ti thawt..Ka en vut..Ka lu ka thing nawk bawk.

‘Au vak kher lo teh,ka ngaithla…’

‘Anih chuan engtin nge ka chhan che?” a ti hlur mai..

‘Sorry….’ Ka tita nge nge.

‘A pawi lo,mahse i awmdan a danglam tlat..Sammy te enkawlsak lam ai chuan nangman i laksak duh angem ka ti zawk…’ lungawi lehnghal tih hriat zetin a ti duah.

‘Maithei..Mahse, Hetiang lam hi ka tuipui fahran lo a.Back-up tu tha tak nei lo chuan ka che buai palh ang tih ka ngaihtuaha..’ ka ti leh duah.Min chhan tumin a ang zuaua,mahse kawngkhar kik riah a ngawi leh ta zawk.

Kawngkhar a rawn inhawnga,Tluangpuii a rawn lut a.Ruata thil laktir a rawn khai lut bawk.Dawhkanah a rawn daha.Mamawh dang kan la nei em tih min zawt nghal zat bawk.

‘Aih..Ruata khan mamawh a nei te anih loh chuan..’ ka ti hmuk.A bu nghauha,a inhera.Mahse a ding leh chat.

‘Sir..Dar 11 ah MFA nen meeting inneih kha i lo theihnghilh takin…’

Shit…Ni dawn tak,Sana ka en a.Dar 10 leh a chanve a pel tawh.Ka thochhuak nghal hluai bawk.

‘Ruat,ka kal angai..Min lo nghak dawn nge i lo kal ve dawn?” ka ti a.Ka bag ka ban nghal bawk.

‘Lo kal ve a pawi loh chuan ka lo kal ve zawk ang,vawiin chu ka awl alawm’ ngaihtuah buai map loin a ti awlsam then.

Meeting na tur hmun kan thlenin dar 11 rik nan minute 5 chauh a awm tawh.Mahse,kan tlai ta lo phawt chu ania.An lo thleng kim tawh.An vaiin ka hriatsa vek anni bawk.Meeting kan zawhin dar 1 a ri tawha,ka Prog neih dan ka en a.Dar hnihah College pakhat Function ka hmanpui angai.

‘Khawnge tunah i kal leh dawn?” Ruata’n a ti a.Ka kalna tur ka hrilh ve mai.Ka buai nitin tho nangin hetianga Prog inchhawng hi chu ka nei zen zen chuang lo.

‘An va ti tlai ve..Chawhma lamah tihawm tak ania’ a ti nuah nuah.

‘Nia.Mahse, ka hman hun an ngaichang ve bawka.Tuna Meeting kha a pawimawh hmasa a’ ka ti leh a.A bu nghat.Kan kalna tur College hi ka lo kal tawh thinna a ni a.Harsatna tamtak ka paltlang na hmun leh mi Pangngai nih tuma ka beihna hmun a ni a.Ka ngaihlu a,Week anneih leh thil an tihkhawm chuan ka tel ve deuh ziah bawk.Tuna keima ke ngeia dinga Sumdawnna ka neih tak hnu hian keimah anga harsa ti em em a College kal an awm vei ngei ngei ang tih ring chungin an zir chhunga enkawl tur ka zawng thina.Tunah hian enkawl tlak,taima leh nungchang tha,sum leh paia harsatna nei mi 10 ka chawm mek a.Mahse, ka thiltih hi mi tlemte bakin min hriatpui lo a,tuma hriat ka duh hek lo.

 ‘Sir,Pu Dama’n rawn biak che a tum ngun khawp maia’ Hotel ka let leh veleh Tluangpuii’n a lo ti nghal var.

‘Min call tlang thei lo tihna mi?”

‘A sawi dan chuan Busy a ti char char a ti a.A hmanhmawhthlak hle a ti bawka’ a ti leh a.

‘Ok,ka lo call ang’ ka ti nghut.Ka Officeah ka lut zui nghal mai bawk.Chairah ka thu thla hnawka.Ka phone ka phawrha,Signal a awm miah lo.Ka phone pakhat zawk ka en leh a.Switch Off..Hreptak hian a..Heivang chiah hi anih hi nidang an lo takin call ka dawng sek lo ka lo tih ni a..

‘Hello..’ vawikhat chauh a ring hman tihin Pu Dama awin a rawn ti vau vau.Ani hi Khawchhak lama ka sumdawnpui leh ka tana kawng hawngtu pawimawh ber a ni tawp mai.Ka pa rual zet a ni chungin thian angin ka kawm ve maia.Ani pawn a fa rual  ka ni chungin Sumdawnna inkawp kan nih  angin thian angin min en ve mai zawk.

‘Min rawn biak i tum ami?” ka ti sup.

‘Aw,tum nasa..Tlang thei reng reng lo ta mai kha engtizia nge mawni?” a ti bul bul.

‘Signal ka lo nei miah lo a..Pakhat lah a lo in Switch off a..Enge nita?” ka ti leh a.

‘Sx- 2 zinga pakhat an man hlauh peka..’ ka thu mar nghal zawk mai.

‘Khawiah nge an man?” ka ti hmuk bawk.

‘Zokhawtharah..Mahse, hei kan chingfel mai dawn e..Engmah buaina tur a awm lo a.Tuman an hre lo ang..’ka thutthleng hnung ka ngheng chawrh.

‘Tu ber nge?” ka ti leh nghut.

‘Hre lo mai rawh,ka lo chingfel ang ka tih chu..’ dam duamin a rawn ti a.

‘Ok,I kutah ka dah..Mahse, an vaiin fimkhur lehzual rawhse.Anih loh chuan…’ ka ngawi leh daih.Sawi zawh kher ngai loin ka sawitur a hrethiam tih ka chiang.

‘Hahdam rawh,engkim ka lo hrilhfiah anga.Engmah buaina a awm lo ang’

Chunglam enin ka thu a,hausak tuma ka beina zawng zawng ka mitthlaah a lo lang zut zuta.Kum 8 taltawp chaw ei hunbi leh mut hunbi ka nei lo,zan hi chhun angin ka hmang fova,ka thawhrimna mai piah lamah hmuhsitna leh endawng ka tawrhna zawng zawng te kha engmah lo a chantir ka tum lo bur.Ka kawng daltu an awm anih chuan an dal zui loh nan dahthat mai ka duh fo bawka.Mahse, nunna ka ngaihlu a,a lo thlawna lak erawh ka tum hauh lo thung.Hei hi ka nun a ni a.Nuam ka tih leh tih loh lam ai chuan ka ke ka pen lut tawha,hnungtawlh ka tum lo..

Chapter- 2

‘Naktukah hun i neih chuan hmuh che ka duh a?”  Phone a pick veleh ka ti a.

‘Ka hman ang,Hotelah ka lo kal mai dawn mi niang?” Sammy-an a rawn ti let vat.Ka chhan hmain ka Beer ken ka in leh te te.Khua a lum bawk nen Beer vawt raih mai han in chuan hah a dam sawng sawngin ka hria.

‘Ok,I tih dan dan nimai’

Zothani’n a thinrim changa atih thin ang bawkin nikhat chu min be lo ta phawt.Pawi tihna ka nei chuang lem hlei lo.A hmel ka mitthlaah a lo langa,  hmeltha hle a,a nalh mai bakah a lu a zo hle bawk.Engkim,nupa tana tihtur zawng zawng kan tikim thawthang tawh.Inneih zungbun a la bun lo bak Nupa dang nen danglamna kan neih a tlem viau..Ni lo,kan la chengdun chiah lo..Chhungkaw dang hi eng nge an ngaihdan ka hre lo,mahse Zothani nu leh pa hi chuan eng ang pawn khawsakpui ila an pawisa lo niin ka hreber.Kan zin dun fo,mahse a Pa hian kan zin dun tih a hre lo niin maithei.A nu erawh chuan engkim a hre thlap zel a,min dodal zawngin a khawsa ngai lo.Makpa atan min duh viau pawh a ni mahna,ka seilenna chhungkua an hria,harsa taka tun dinhmun thleng ka nih pawh an hria.Miin ka hnunglama min sawi na hi keipawn ka hria anih chuan anni phei chuan an hre dawn lutuk..

’Damdawi kheh lar hma fe khan ani hi chuan a lo buaipui tawh,Mihring thlenga hralh pawisa lo,dan dik lo a sumdawnna kalpuitu lianber,Police zingah hmelhriat tha angah vanga man theih loh ’ tiin ka chungchang an sawi thin.Ka engahmah a thawk eih lo thung.An duh phawt chuan ‘Mi thata eizawng ‘ pawh min ti ang hmiang,ka pawisa a hek lo va,ka sumdawnna a buai loh chuan ka duhtawk reng.Ka kaw nazawng ka khing dawn anih chuan Sumdawng tlak ka ni lo tih hi ka ngaihdan a ni tawp mai.

Ka Office kawngkhar kik ri ka hriat rualin ka hawichhuak vat.Lut turin ka koa,a rawn inhawnga.Tluangpuii a lo ni a,nidanga ka la hmuh ngai loh a hmelah manganna ka hmu tel tlat.

‘Engkim a tha vek em?” thutngil pahin ka ti a.Harsa tih hmel lutukin a nui sak.A rawn kal pheia,ka Table hmaah a dinga,a kut pahnih a hum kawp tlat bawk.

‘Vawiin atan chawlh ka la thei angem?” a ti thawp sat.A rawn thawhtirh atangin chawlh min dil vawikhatna a ni hial maithei.

‘Thil dik lo a awm em?” ka ti nghut.A thle bak.

‘Kan In lamah engemaw harsatna kan nei a..A theih chuan chawlh ka duh a..’ a hmui hnuailam a pet zauh.

‘Ok..A tha lawm’ ka ti sup.

‘Ka lawm e,vawiin atana pawimawh zual chu Julie kutah ka pe tawha..’

‘Um..A tha lutuk’

‘Ka lawm e’ a ti leh sap.Ka bu nghut ringawt,a inher a,kawngkhar lam a pana,ka hriattirh atangin engtiklai pawn a cool raih renga,mahse a hmelah nui hmel alang reng thung.Vawiin erawh kha chuan chiai hmel a pu a,chanchin tha loin a deng thut te pawh a ang viau.

Ka tihtur ho ka enkual thuak thuaka,pawimawh lutuk engmah a awm hran lo.Sammy te hnen atangin an Sumdawnna ka lei fela,Company lama tihfel ngai zawng zawng ka tifel vek tawh bawk.Mahse, chak taka hmalak ngawt theih erawh a ni lo.An tlachhia tih piahlam a ni ringawt.An Staff te hlawh an pek that theih loh avangin an vaiin an mahni hlawkna turin ke an pen vek niberin a lang.Bungrua,hralh ruk theih chi zawng zawng chu an hralh ru ti ila adik ber.Building lah a tawp em em a,avaia sak that theih ni lo mahse siamthat theih lai lai siamthat hmasak phawt loh chuan bul tan ngawt chi a ni lo hulhual.

Ka phone a ri a ka en a,ka contact list a mi a ni lo..

‘Hello..’ ka ti nghut.

‘Sir,vawiin lam hi i lo kal thei dawn em?” Showroom lam hna en tura ka dah,Lalnun-a a lo ni a.A number ka nei reng emaw tia..

‘Number lah hi i ngah lutuk’ ka ti nghut.A nui hawk hawk thung,ka bulah kum 2 a thawk tawha,kan inhrechiang viau tawh.Ruata ang bawkin ani pawh hian ka tawngkam bung lutuk hi chu engahmah angai lo.

‘I lo kal theih chuan enfel ngai a awma’ a rawn ti leh a.

‘Ka lo kal ang..’

Ka dah rualin a ri lehnghal zat.Zothani..Ka ner nawk mai.Vawiina kalna tur a sawi ka theihnghilh chiang em em lutuk.

‘Yess’ ka ti zangkhai vuh.

‘I hman dawn tawh em?” a rawn ti a.Sana ka en vat.Minute 15 chiah a awm tawh.Showroom lama kal ngai bawk..

‘Hman animai’ ka tita tho.Tunkar tira a sawi lawk tawh a ni a,tihtur dang ka nei ka tih chuan a thinrim leh ngei ngei dawn.Tlai lamah hna chu ka va en mai ang chu.

An In ka thlenin horn ka hmet ri that,luh ka tum hran lo..A rawn chhuaka,nidang ang bawkin a nalh lehpek.Car chhung a rawn luh rualin a Perfume rim in ka hnar a verh nghal zak bawk.

‘I theihnghilh leh ka ring a’ a ti a,a nui hak bawk.

‘Thih ka la duh hleinem’ ka nui a,ka melh zawk.A hmaiah make-up a tam lehpek.A inhnawih nasat lutuk vang nge ka hre lo,a mawm deuh zul in ka hre bawk.Mak takin ka mitthlaah Tluangpuii a lo lang zawk.A hmai vun nalh zetah khan engtiklaimahin Make-up a hnawih tak chiam ka la hmu lo..

‘Hey…enge i ngaihtuah a?” ka kuta rawn vawn pahin a rawn ti a.Ka nui suk ringawt.

‘Nangmah bak enge ni ang a?” ka mit ka siai zauh bawk.

‘Nghal si,Eeee,Zanin kha….” A ti leh a.

‘Eng?”

‘Amak e..Remruati birthday party kha…’ nidawn tak..Remruati hi Zothani best a ni a,kan inhre tha viau.Mahse, a mizia,mi chaldelh zet hi ka ngaina ngai miah lo,ka tilang lo mai zawk.

‘Sorry…Hna lamah ka buai deuha,ka lo theihnghilh pek…’

‘I hrechhuak leh tawh tho alawm..kal ila..Kan tlai tep ania’ a ti leh a.

‘Ok…I thu vek alawm’ ka then suk bawk.Tih thinrim dan ka hriaa,tihlungawi dan tur pawh ka hria..

Motor ka Start a,nichin a ka ngaihtuah kha amah ni loin ka Staff zinga pakhat a ni tih han hre na se chuan engtin tak ngai ang maw? Ka ngaihtuahna avangin ka then leh nawk.A duhzawngah chuan zah a nei lo,ka mitmei a ven avangin a duh ang thalin a che lo mai zawk niin ka hre fo.Mahse, min hauh chu pe na tak a ni.A demawm lem loh,mipa fel tak ka ni tlat lo.

Rin aiin kan rei ta zek.An in a ka Drop leh meuh chuan dar 3 a pel va tawh.Lut turin min sawm a,mahse ka hnial thung.Showroom lam ka pan ding nghala,ka thlen veleh hna awmdan kan en a.Tihdanglam ngei ngei ngai a lo awm chu niin..Kar hmasa lama kan siam tawh vuak thiah leh angaia,Lalnuna’n ama thu a a lo tihtir ngam lo kha a ti dik.Cheng tlemte seng a siam a ni tlat lo.

Hotel lama let tawh loin In lam ka pan ding nghala,ruah tlem a tla nangin khua a lum uap churh tho.Buati hnenah chaw ka ei dawn lo tih ka hrilha,a haw hma duh chuan a haw hma thei tih ka hrilh nghal bawk.Room lam ka pan ding nghala,ka inhlip sawk sawka.Shower hnuaiah ka dinga,tui vawtin min rawn phuh hul rualin ka harh nghal sawng sawngin ka hre hial..

Rooma ka pen luh rualin ka phone ri a tawp ve chiah thung.Ka pan pheia,min rawn call tu ka en a.Pu Dama a lo ni a.Ka call back nghal zat.Thil pawimawh loah kan inbe mai mai ngai tlat lo.

‘Hello..’ a rawn ti dam thluam.

‘Ka lo inbuala..Enge nita?” ka ti sup.Ka sam ka hru pah mawlh mawlh bawk.

‘Bawlhhlawh pakhat a awma’

‘Chuan…?” ka ti a.A sawi awmzia ka hrethiam nghal vek.

‘Cut mai ila ka ti a…’

‘A tul chuan le..Mahse, chutiang kher lo a tihdan a awm thei em?” ka ti leh a.

‘Maithei,nizan khan bungraw thenkhat kan hlan thlak laiin a lo hmu a.Be tur ka tira,mahse a lo hnial fithla thaka’

‘Anih chuan midang hnenah bawlhlawh dang a thehdarh hmain amah ber chu hal mai a tha anih chu’ ka ti leh hmuk.

‘Ok..Ka ngaihdan chiah….Ka lo ti ang’

‘Ka ring che.Felfai tak khan le…’

‘Lungngai suh..Vawikhat tihna tur a ni hleinem’ a ti a,a nui huk huk bawk.

Dar 7 rik hmain In ka chhuahsana,Zothani lam turin an In lam ka pan ding nghal nalh bawk.A lo la inpeih lo a,a nu nen titi phungleng mai mai sawiin kan titi a,nidang ang bawkin a ri leh chul mai.

A hmun kan thlenin an lo awm nual tawh.Mahse, an vaiin ka hriatsa anni deuh vek.Stage lam ka hawia,mipa pahnih bakah hmeichhe pakhat min hnungchhawn zawnga ding a awma.A hmel ka hmu thei lo nangin ka hriathnu a ang ka ti ve ngawt.Mahse, tu nge anih ka hre lo.

‘Tluangpui,Bass kha a kal em check lawk teh’ tih ri ka hriat rualin ka kalsawn tur ka dingchawt,Rang lutukin Stage lam ka en lehnghala.Ka phu zawk.Ka hmusual emaw tiin ka ennawn leh a,Ka hmusual miah lo.Bakah nichina ko tu khan ‘Tluangpui’ a ti a.Hming in ang leh hmel in ang chiah chiah a awm theih loh hrim hrim.Uniform lo a hak ka vawikhat hmuhna a ni a,a landan a tidanglam chiang viau.Office a hmeichhe Smart leh induhtawk tak,cool leh nui hmel pu sang thei lawi si,hna tlin zet  ni bawk kha chu tuna a landan nen hi chuan Lei leh Van a ni tawp mai.Jeans kekawr,Mar tangin a haa,T-Shirt var lian lam a hak chu a kekawr kawngah a bilh luta,Military Boot a bun bawk.A sam pawh a phiar vek bawk.Hre sa lo ila chuan tleirawl awm duhdah tak,mahni nuam tihna lam lama thle mai mai emaw ka ti ngei ang..Huh..Engemaw ka ngaihtuah chiam kher ni a? mi zawng zawng hian hmai hnih kan nei vek a,ani pawh hian tunah hian a hmai pakhat zawk a lantir animai.Thil danglam a awm lo.Mahse,Chhunah khan Family thilah Problem an neih avangin chawlh min dil kha ania,tuna a awmdan en hi chuan eng harsatnamah nei hmel a pu lo...Nia,eng Problem nge nita ngai?

‘Dude…’ Ruata aw ka hriat rualin ka inher vut.Ka bulah a lo ding reng tawh.Min en loin Stage lam a en a,mahse a hmelah mak tihna engmah a lang lo.

‘Lawk..Enge sawtah sawn a tih a?” ka ti hluk.

‘Tu?” min rawn en a.

‘Tu nge ni se i tih a?” ka ti leh hmuk.

‘Hei zat zingah hming sawi loh chuan tu ber nge i sawi hriat a har alawm le’ ngaihsam zetin a ti liam puat.

‘Ok..Tu nge ka sawi i hria..Mahse, a hming sawi kher i duh chuan Stage a awm mek,Tluangpuii saw ania ka tih’ ka ti ta duah.

‘Aaaah,ani i sawi tih ka hre lo tak tak..’ ngeiawm zetin a nui a.Ka melh nghek ringawt.

‘Ok..Ok…I lo la hre lo anih chuan zanina Perform tura an sawmte Bandah hian Tluangpuii saw Drummer a ni a,zanin atan chauh ni lo an Bandah sawn Drummer a ni sa hrim hrim’ ka thaw hawk mai.Hmeichhe mak lutuk….Amah nen a inhmeh lo hulhual.

‘Mak ti vak suh..A chanchin hi hriatchian tum la chuan thildang pawh mak deuh deuh a la awm teuh tih i hre mai ang’ a ti leh duah.Ka thle buk.

‘Aaahhh,I kutah chulam chu awm tehse..Ka hna tha taka a thawh chuan atawk.Hna ber a thawh zawh hnu chuan a duh leh amah pawh inzuar ang hmiang.Ka pawisa lem lo’ ka then suk.A bu nghauha,a hmui a pet a.Ka mitah tak a rawn en a.

‘I sawi dik chiah.A mimal nun lehzel chu lo sawisel sak a tul miah lo mai’

‘Correct..’ ka nui hawk bawk.

‘Amah a inzuar em ka hre lo.Mahse, a kal hi chu a hralh an tih kha mawle’ a ti leh a.Ka nghing deuh lawih thei.

‘Maw?!”

‘Thil ho mai mai mawle…Bakah i ngaihven lo tih i sawi zawh chiah kha’ ngeiawm zetin a nui a..Zawh zui zel duh mah ila pawisa lo awm takin ka bu ta nghut zawk.Tawng tumin a ang leh hman zuau,mahse Zothani a rawn din ve takah chuan a chip leh ta zawk.

Zan dang ang chu nise Party nuam tak a ni ngei ang.Mahse, zanin zet chu ka awm a nuam lo,chawl mang loin music a ri a,hla chi hrang hrang an playa,an khuangpu lah a hmuhnawm nangiang..Mipa nise a pangngai viau ang,mahse Hmeichhia anih miau avangin engkim mai a hmuhnawm vek nimaiin ka hria..Ka tum loh tawpin ka lo en leh vung vung zel,min hmu awm pawn a awm lo thung.Mi 20-30 bawr vel chauh kan ni a,hmuh loh ngawt tur chu ka ni em ka hrethiam bik lo le.

Ka Office kawngkhar ri rakah ka hawichhuak vat.Tluangpuii a lo ni a,min hmuh rualin a phu zawk tih ka hrethei mai.A awm tho,nidangah tiang hunah ka kal ngai tlat lo.

‘Good Morning sir..I awm tih ka hre lo va’ a nui sak bawk.

‘Morning..Ka kal hma vangin Rooma i tihtur a buai phah tihna mi?” ka ti hmuk.A meng tal tap mai.

‘Sorry,chulam ka sawi tum a ni lo..’ a ti dam thlap.

‘Ok,a that chu..Eng nge i tih duh chu ti la’ ka ti leh sup.Engvanga ngeiawm viau nge ka nih ka inhre bik lo.Nidangah tiang hian ka be ngai miah lo tih erawh ka chiang.

‘Nimin ka kal loh vangin hna pawimawh tihtur i dah em en ka tum a’ a ti leh a.

‘Dah lo..’

‘Aw le,eitur mamawh i nei angem?” a ti leh a.

‘Nei lo..’ ka ti leh hluk.A then saka.Chhuah tumin kawngkhar lam a pana,ka rilruah nizan a lo lang zawk.

‘Nizan kha i thiam khawp mai’ ka insum hman lo.A ding chata,muangchangin a rawn hawi leta.

‘Ka lawm e’ a ti dam thlap.Mahse, a hmelah lawm hmel engmah a lang chuang lo.Tuna a landan dam leh Cool raih hi nizan khan engtin nge a dahbo theih zawk ni a??

‘Chawlh i la leh dawn anih chuan chhan tha tak nei ni tawh rawhse,khatiang mimal thil kha chu hna zawh hnuah pawh i ti theia,inbuatsaihna atan chawlh lak kha nidangah chuan rem ka ti dawn lo ania’ ka ti leh duah.A hmai dang deuh lap chu ka en a,ka tawngkam vang khan na a ti nge a hamhaih zawk ka hre lo.Min chhan tumin a ang ziaua,mahse ka ban ka vai zauh.

‘I kal thei’ ka ti hmuk bawk.A bu leh nghata,Kawngkhar hawnna a vuana,a chhuah fel veleh ka thaw hawk thung.Chawlh a la ngai pawh a ni lo a,engvanga han hau chiam nge ka nih hrep ni a?Niminah lah engmah hna hmanhmawhthlak a awm pawh a ni hek lo.

Ka Mood chhe lutuk tih ziaawm tumin Beer ka phawrhchhuaka,ka in nghal pawp pawp.Vawiinah engmah tih ngei ngei ngai ka nei hran lo.Showroom lamah hna ka enpui peih anih chuan ka kal theia,tlaiah ka nu te lama kan chhung hnai takte Fanu Man einaah ka kal angaia,abak engmah hna pawimawh ka nei lo.

Tukverh bulah ka dinga,ka hnuai lam kawngpui ka thlir thlaa,Motor an ding khupa.Office kal hun lai anih vang pawh ni loin hetianga tlan thei mang lo a Jam nilen deuh thak hi nit tin dan a ni ve hrim hrim.Hotel ka siam hma hian he Building hi Assam type a ni thina,a hmun a zau lo,Vei lam leh ding lam ram neitu te nen kan inkarah Feet tlemte bak a tla lo.mahse a Location a thaa,a man an chhiar zat hnial loin ka pe tawp.Ka sak dawn khan nakin zel atan tiin a hnuai ber Floor hi Parking turin ka siamtira,ka lo tihfuh zia ka hre nawn awn awn a ni ber.Hotel tamtak,Parking nei mumal si lo an tama,Mikhual te tan harsatna a siam nasa tih ka hria.

Ka phone nghawr dar dar ka hriat rualin ka hawilet a,ka phone Dawhkana ka dah ka ka pan pheia.Min rawn call tu ka hmuh rualin ka ner nawk mai.

‘Hello..’ ka ti sup.

‘Hotelah mi i awm?” zangkhai zetin Zothan’in a rawn ti a.

‘Aw..Ngatinge?” a lo kal loh nan tawngtai hial mai ka duh.Ka mood a chhe uluk lutuk.

‘Ka lo kal dawn mawni ka ti a,ka chhuak lawka’ ka mit ka chhing sawk.

‘Khawnge tunah i awm a?” Pangngai thei ang berin ka ti a.

‘Remruati Studioah ka awm meka..’

‘Ok..’ ka ti nghut.

‘I nuam vak lo mi?” a rawn tita chat.

‘Aih,ka tha..’

‘Um,I nawm loh hmel lutuk a..’

‘Ka buai deuha,chuvang nih chu..I hman hunah i lo kal dawn nia’ ka ti leh a.

‘Nia,ka rei lo ang..Bye’

Dawhkanah ka phone ka dah leha,Tukverh lam bawk ka pan leha,ka Mood fuh loh chhan ka ngaihtuaha,engmah a awm lo.Mahse, a fuh lo..Minute nga vel a liam leh hman chauh tihin Kawngkhar kik thawm a rawn awma.A rawn thleng der anih hmel..

‘Yess..’ ka ti hmuk.Ka inhera,mahse Zothani ni loin Tluangpuii zawk..Zothani lo thlen nan chuan a la rei lo reng a ni.

‘Sir..Hei hi i lo en duh takin ka ti a..’ tih pahin a file ken min pe a.Ka ban ve mai,ka thlek thuaka.April thla chhunga pawisa che vel a ni tih ka hria.Ni 10 hmain engkim en hman ka duh thina,a lo thawhtirh atangin ni 10 aia hmaah en theih turin a ready hman vek ziah.

‘Ka lo en ang..’ ka ti nghuta.Dawhkanah ka thehthla zui zat bawk.

‘Ok..Hriatthiam loh i neih chuan min ko mai dawn nia’ a ti leh a.

‘Um..A tha lawm’ ka ti leh a.

‘Eee,chuan,nichin khan Julie khan a rawn sawia.Chhawng hnihna a Room kil ber Toilet a tha lo a.Siamtu tur ko turin ka lo ti a..’

‘A tha,mahse nidangah chuan min hrilh hmasa tawh la a tha ang’

‘Nia,ih…Nidangah khan keima thuin ka….’ A sawi zawh hmain ka ban vaiin ka titawp hmiah.

‘Nidangah chuan i thu a titurin ka tiche a,vawiin atangin ka hre hmasa ziah duh tawh.A chiang em?”

‘Sorry..Ka hrethiam e..Mamawh i nei em?” a tihzawm zat.A cool raih nangin a hmelah nui hmel a lang thung.

‘Tunah chuan nei lo,Mahse, nakinah ka nei ang.A tul tawpkhawkah lo chuan tumah lo lut suh se’ ka ti leh duah.A bu nghat ringawt.A chhuah hnu reivak loah Zothani a rawn thlenga,tumah lut lo tura ka tih kha a hmuh rualin a hrethiam ngei ang.

‘I tha tak tak maw?” ka chala rawn khawih pahin Zothani’n a ti a.Ka bu nghut,a kut ka vawnsaka.Ka malchungah a rawn thu a.Ka nghawngah a kuah nghal chial bawk.

‘Ka tha.Ka ngai che a,chuvang mai mai’ a nui hak.. Ka darah a hmai a rawn phuma,a hmui lum ham hamin zei zetin a fawp kual nghal dan dan bawk.Ka thaw hawk mai.

‘I tawp loh chuan enge thleng dawn i hriat kha aw’ ka ti sup.

‘Thleng rawhse..’

‘I chiang chiah maw? Office ania,tupawh lo lut ta se..’

‘Lo lut lo turin i lo hrilhlawk ang chu ka ti’ a nui a.

‘Um..I lo kal laiin tumah an lo lut ngai hleinem’ ka ti sup.A lo thlen hma khan Tluangpuii hnenah tumah lo luhtir lo turin ka ti lawk vek tawh tih erawh sawi ka tum lo.

‘Nia,mahse..Kawngkhar kalh tho ila?” duh nei tih hriat lutukin a meng phi riai bawk.

‘Ahh..Thlen tir i tum tak tak em?” ka ti sup.A sam chhawlleng a bengah ka zeh saka.

‘Thleng se pawi tihna ka nei lo,bakah vawikhatna tur pawh a ni lo a’ a nui a.A sawi dik,vawikhatna a ni lo.Vawi tamtak ni sa kha vawikhatin a tam belh leh dawn tihna mai a ni zawk.

A tho a,min hmatawn zawngin ka mal chungah a rawn thu leha,ka nghawngah a rawn kuaha.Zei zetin a mawng khal nalh zet a tiche a,a tum hai theih a ni lo.Mahse…Keimahah hian dik lo a awm,nidang angin ka phur tehchiam tlat lo..Mahse,helam hi chu thil tihluih harsa lo ber a ni ve tlat,ka phur vak loh vanga duhtawk ka tum chuang lo.

‘Sorry….’ Kawngkhar lam atanga rawn tihri ka hriat rualin Zothani pawn a hreve tih a chawlh dat danah ka hrethei.Muangchangin ka hawichhuaka.Kawngkhar bula inthlahrung hmel zeta Tluangpuii lo ding ka va hmu a,kan thil lo tih mek a hmuh vang nge ka hre lo,a hmai a dang vek bawk.

‘Kawngkhar kik i thiam lo ami?” ka ti hmuk.

‘Ka kika,chhanna ka hmu lo nangin ka hmanhmawh lutuk a…’ a ti niah niah.

‘Nakinah lo kal leh mai la,I hmuh ang hian thil pawimawh kan lo ti meka…’ enge a duh zawh ka tum lai takin Zothani zawkin min rawn tawng khalh ta zawk.Ka malchung atangin chhuk tumna nei hmel pawh a pu chuang lo.

‘Pawi ka ti lutuk,Ih..Sir,ka haw angaia’ bah nakin a ti a.Ka rindan chiah,pawimawh tawpkhawkah lo chuan a lo lut hauh lo ang.

‘Eng nge dik lo awm a?” ka ti hmuk.Kan landan thlak tumna ka nei hek lo.

‘Family lam bawk..’a hmai a sen awp awp bawk.Nimin ka rilruah a lo lang zawk.

‘Nimin ang kha anih loh ka beisei’

‘Ni lo…’ a ti sapa.A kut a malah a hru a.A hmui a peta,tiang khawpa nervous hian ka la hmu ngai lo.

‘Kaltir mai teh..’Zothani’n a ti nghat.Ka melh zawka,Hna thilah a lo inrawlh ve hi ka duh lo.Chiang takin ani pawn a hria.

‘I chawlh duh chhan chiang tak ka hre lo a,mahse i hriat angin thlatir ania..’ ka ti hmuk.Thlatirah chuan engkim enfel angai thina,ni 10 thleng hi chu kan buai viau zela.Tuna chawlh min dil danah hi chuan buai lai zawng chawlh a duh tihna a ni a.A pawimawh ngang anih hmel e.

‘Ka hria alawm..Ka theih anga rangin lo let ka tum ang’ a ti leh a.

‘Ok,a tha lawm..Leave letter ziak la,Julie hnenah lo dah mai rawh’ ka ti ta sup.Achhan chiang tak ka hre lo nangin thil serious lutuk a thleng anih ka ring ve hmiah.

‘Ka lo ti ang.Ka lawm e’ a ti leh a.Ka chhanna pawh nghak loin kawngkhar a hawnga,a chhuak fel nghal chu animai.

Tiang khawpa pawimawh chu engthil tak ni ang maw?

Chapter- 3

‘Timing lo hle mai..Tumah an lo kal lo ang i ti sia’ pangchang zetin Zothani’n a ti a.Ka hmui a rawn khawih dan dana.Mahse, engmah tihzawm chakna ka nei tawh lo..

‘A pawimawh vang anih kha..’ ka ti nghut.Ka thu ngila,lungawi lo hmel zetin a rum nghal hak mai.

‘Ngatinge?” a ti nghat bawk.

‘Duhtawk phawt ang..’ ka then lui suk bawk.

Tum deuh barin a chhuka,a kalsawna,Tukverh bulah a ding ta daih.

‘Kha nu kha ka ngaina miah lo’ ati leh hmak.

‘Ngatimaw? I pawi a sawi tihna mi?”

‘Aih,a ngeng si.Ka lo kal apiangin tha taka min biak pawh a nei ngai lo’ a ti leh a.Ka awih chiah lo.Ka lo ngaihven ngai lem lo nangin tumah Tluangpui’n a biak chhiat ka la hre lo.A hna a hrechiang lutuk tlat.A hrim hrimin midang lo be tha lo ta deuh pawh nise Zothani hi chu ka bialnu a ni a,a biakchhiat ka ring lo bur.

‘Zilh deuh la a tha ang…’

‘Khawngaihin…Hna leh ka mimal thil kaihkawp ka duh lo ania’ ka ti hmuk.Min rawn en a.A meng ling hlar mai.

‘Hei lehchen kan inkawp tawha,khatiang lek sawi chu a pawi viau a mi?’ a ti leh hlar mai.Nia,a dik mahna.Mahse, ka staff te chungchang an sawi ka duh ngai lo.Kan mikhual ten an Complaint anih erawh chuan ka ngai thutaka,Manager kuta dah loin keimah ngeiin ka ko a.Ka hau mai zel a,insiamtha thei lo an awm anih chuan ban anni leh mai.

‘Ok..Ka hrethiam…Ka drop dawn che mi niang? Hnathawhna lamah kal ka duh a’ ka ti a.

‘Thlah ka ngai lo,keimah pawn ka haw thei reng..’

‘Thinrimna tur a awm pawh ka lo hre lo a’ thawh pahin ka ti  leh a.

‘Ka thinrim lo’

‘Ok,a that chu..Kal ang le’

Min zui dawn tho tih ka chiang.Bakah han inthlem chiam hi ka thiam lo tih a hriaa,min nawrluih awmzia a awm lo tih pawh.

An inah ka thlaha,lut loin hnathawhna lam ka pan tlang nghala.Diktak chuan kal ka ngai hran lo.Tlaiah haw pahin tlawh ila a tawk reng.Lalnuna a awm renga,ka awm leh awm loh danglamna chu siamthat ngai a awmin thutawp a siam thei lo a, chu zawng chu animai.Rei pawh awm loin kan chhungte in lam ka pan leha.Ka nu kal na tur awm ngawih  ngawih anih laiin Lunglei lama ka pa chhungte boral mai thei a awm avangin rawn kalsan chi a ni lo va,chuvangin keimah ka kal ta zawk.

In ka thlenin Buati a lo haw tawh.Hmundanga chaw ka ei dawn chuan min nghah kher angai lo bawka,a haw hma mai zel.Ka inbuala,ka inbual zawhin ka phone ka en a.Pu Dama msg a lo awm vang tawh.’Done’ tih zawng a ni a.A tawi tektawk viau.Mahse, a awmzia hre turin a sei tawk reng tho.

‘Morning Sir..’ Hotel ka thlen veleh Julie-in a lo ti var.

‘Morning..Tluangpuii hi ka be duha,lo call la.Min rawn call rawhse’ ka ti hmuk.

‘Maw?!” mak tih hmel zetin a ti hau mai.Eng chu nge maw a hriat ni? A beng a ngawng zawk emawni?

‘Tluangpuii ka be duh..Lo call la,min rawn call rawhse’ ka ti nawn leh a.

‘Aw..Ka lo ti ang,mahse…Ih,chawhnu lamah lo chuan a biak theih ka ring chiah lo a..’ a ti bah nawk nawk mai.

‘Maw? Engvangin nge?”

‘Nizan khan a U a borala,vawiin a vui tur ania’ ka khawng nghal luh mai.Nimina chawlh min dil laia a hmai dang lap mai leh phelhphang mai kha ka mitthlaah a lo langa,hei vang chiah hi a lo nih dawn hi.

‘Ok..A zia lo hle mai,nakinah keiman ka lo be zawk mai dawn nia’ ka tita ngawt.

Ka Office chhungah ka luta,Chairah ka thu hnawk.Nimin khan engmah a sawi lo a,karkhat chawlh a mamawh tih a sawi ringawt kha ania.Ka ngaihtuaha,an veng hming ka hriaa,abak engmah an chhungkaw chanchin ka lo hre miah lo tih ka hrechhuaka.Kum khat aia tam a thawk tawha,ka hrechiang lo leh lutuk hi ka dik lo tih ka pawm thlap.Mahse, tunah chulam a pawimawh lo,a U vuina hmunah kal ngei ngei ka duh.Ka rilruah Ruata a lo langa,a lo hresa reng maithei.Kei ai fein Tluangpuii nen an inpawh zawka.A lo la hre lo anih pawhin ka sawi chuan kal a duh tho ang.

‘Eng nge?” a pick veleh a rawn ti nghal hlur mai.

‘Khawnge i awm?” a Mood uih hmel zet ka haider hmiah.

‘Inah…Eng nge?” a ti leh a.

‘Tluangpuii u hi a borala,kal ka tuma..I kal ve hman angem?”

‘Chutia law? A va zia lo..Dar engzatah nge vui tur?” ka rin ang chiahin a rawn bawhzui tha ngang mai.An vui hun tur ka hrilh a.

‘Ka lo insiam ang,min rawn lam phei mai la’ a rawn ti leh a.Ka then suk ringawt.Tluangpuii hmina a lan tawh hi chuan awmngaihna a hre lo chu anih ber hi a.

An in awmna lai kan hre lo ve ve a,an veng kan thlen hnuah kan zawt chawpa.Mithi pahnih lai  an lo neia,Tlangval ve ve anni bawk nen Tluangpuii u hming kan hre bawk si lo, a ni lo zawkah kan kal hmasa phawt,kan thut renrawn hnuah a ni lo tih kan hre leha.Mithi a kal e ti loin nuih te lam lam a za zawk mah mai.Vui hun hma hretin kan thleng ta hram.

A pu,a nu pa te in luahin an lo khawsa a.An Building kawngpui an a ni chungin an chenna tak erawh a hnuai berah a ni thung.Mi an thahnem bawk nen thutna tur a awm mang lo a,Stepah kan thu a,nula pakhatin thutchhan atan paper a lo sem zar zar bawk.A chanchin ziahna min pek ka en a.Tluangpuii chhangtu chiah a lo ni a,nau Mipa pakhat a neia,a pa a boral tawh thung.A nu  ho in an lo khawsa a.A u hian an chhungkaw ta Sumo a khalh a, chu chu a chesual ta a lo ni.Han khawngaih viau dan tur ka hrethiam chiah lo.Mahse, Pa tel lo nun erawh a ruak tih ka chiang.Tunah a u,an chhungkaw zinga pa chanchang  a boral leha.An mangang viau ang tih ka hriatthiam pui pha viai viai.

Vui zawh hnuah haw mai tuma kan awm laiin ka beisei loh lutuk ka hmu ta tlat.Ani pawn min rawn hmu ve chiah bawk.

‘Sangkim,a va mak tehhlawl ve..’ min rawn hnaih pahin a rawn ti a.

‘Nia,nang zawk pawh chu ‘ ka ti hmuk.

‘Ka thiannu u ania’

‘Tluangpuii maw?” ka chhan hmain Ruata zawkin a rawn ti a.

‘Aw,Ruata.I dam maw?” Ruata a en a.

‘Dam alawm,kan inhmu khat hle maia’ Ruata’n a ti a.Kei erawh ka lo insehruh teuh thung.Nidang ang bawkin nuam tih hmel zetin a tawng leh zut zut.Eng eng emaw kan sawi leh luam hnuah a kalsawn ta hram.

Hotel ka let hnuah ka thu hnawk,Ramdinsanga ka hmuh vanga ka Mood inthlak hlawk ziah hi ngaiah ka nei thei lo..Ka hmuh apiangin Pangngai taka biak ka tum thin,mahse ka hmuh rual hian ka in Control na ka hlauh lek lek fo mai.Kan College kal laia min hmuhsit zia kha engmah ka la theihnghilh thei lo.Chhungkaw pangngai tak atanga seilian a ni a.Kei,Aizawl tlangval pawh ni lo.Zak zum em em mai kha Sportah min tluk miau loh avangin a theih dan danin min hmusit a ni tawp mai.Hausak tumna ka beihnaah khan min hmuhsitna tawngkam kha min nawr kaltu tha tak a ni chiang khawp.Hun a kala,tunah erawh Sumdawnna a ka elpui ber a nita.A hma ang kha chuan min hmusit thei tawh lo mahse awmkhawmna apianga a sawi nuam tih ber chu hmanlai hun kha ala nita zel.Ka huatzia ka tihlan ngai loh avangin mi tan chuan ka hmelhriat satliah a nimai.Ruata takngial pawh engmah ka hrilh ngai lo.

Tluangpuii lo kal loh atangin ni li a liam tawh.Karkhat chawlh min dil kha a ni a, chhiat an tawk ta bawk nen lo kal rih lo mahse sawisel ka tum lo.Hna erawh kan tlai phah ta deuh,nidangah chuan ni 10 hmain engkim kan enfel hman ziah.

Ka Office bula a thutna pangngaia Tluangpuii hna lo thawk mawlh mawlh ka hmuh rualin ka thaw huai mai,min hmu ve lo thung.Uluk zetin a hmaa Computer a en a.Nidang ang bawkin a lang cool leh raih tawh.

‘I chawlh i la hmang zo si lo a’ ka tawng thawm hriain a rawn hawi chhuak vat.

‘Good Morning sir…’ rang zetin a tho nghal vat bawk.

‘Morning..I lo va kal hma ve’ ka ti nawn leh a.

‘In lamah tihtur lutuk a awm tawh chuang lo a.Bakah thlathar a ni sia,chawlh rei lutuk tha ka ti lo a’ a ti a.A tarmit a nawr chho zauh bawk.

‘Boss sual deuh ka ang hle mai’ ka ti sup.

‘Aih,chutiang lam a ni lo..Diktak chuan ka chawlh reng khan engmah a danglam…’ a sawi zawh hmain ka hmelah ka fiam tih a hria a ni ngei ang.A tawp a zuih rala,a biangsum khuar kalh khawpin a nui ve ta ngawt.

‘Ka lawm e’ a tita sap. Kalsan mai tumin ka inhera,mahse ka rilruah Ramdinsanga a lo lang zawk.Ka hawilet leha.

‘Ramdinsanga nen in lo inhria a ni maw?” ka ti sup.Rangzetin min rawn en vat.

‘U Dinsanga i tihna a ni em?” min zawt let khauh.

‘Animaithei..Kei chuan ‘Ramdin’ ka ti thina” ka thle buk bawk.

‘Aw..Anih chuan hria e..Ngatinge?” zawhna bawk..

‘Eng ni lo e.I u ruang thlak ni khan  ka hmu a.Ka zawt mai mai che’ ka ti nghut.A bu nghat ringawt.

Lo kal hma ka tihthu ka hrilh nangin nilengin kan buai ta char char.April thla pawisa lut leh chhuak mai bakah Hotelin a hlawkpui em tih te engkim mai en angaia.Thla dangah pawh hei hi kan buaina a ni ziah tho.Thim thak thleng kan thawka,mahse nidang ang bawkin zawhna apiang chhanna a nei zat zat thei zel.Engmah tih hni hne a nei lo.Dar 7 pelh hnuah kan tifel thei ta chauh.

‘Kan rei hle mai’ zik mar ur ur pahin ka ti a.Dawhkana Paper awm a remtha malh malh thung.

‘Ka Print out anga,naktukah ka lo File fel dawn nia’ a ti a.Kan thut rei tehreng nen ning hmel a pu lo.

‘Ok,a that chu..’

‘Tihtur dang a awm loh chuan ka kal mai dawn asin’ a ti leh a.A Laptop a pawm a,a ding fel than bawk.

‘Aih.Vawiin atan chuan a tawk lutuk’

‘Aw le’ a ti sap.

Ka phone ka en a.Kan buai lai tak khan ka nuin min rawn call a.Ka pick ta lo kha ania.Ka call back a,reipawh a ring hmain a pick vat.

‘Hello’ a rawn ti lang lang mai.

‘Nichin kha ka buai lai ania’

‘Eee,anih ka ring reng a.I thianten min rawn tlawha’ a rawn ti a.Mak ti zetin ka mengphar awk thung.

‘Ka thiante maw? Tu nge a?” ka ti sup.

‘Ramdina a inti a.Palian pui mai ‘ a ti a.

A sawi ka hriatrualin ka khawng nghal luh thei.Eng rilru puin nge Ramdinsanga’n ka nu te a lo tlawhchhuah kher ang? Thian tha kan ni ngai lo a,engtikahmah kan ni ngai dawn hauh lo tih keiin ka hriatchian tluk zetin ani pawn a hrechiang lutuk.

‘Mama..I hrethei em?” ka nuin a rawn tih riah ka ngaihtuahna atangin ka harh zawk.

‘Aw..Hria e..Eng nge a rawn tih a?” pangngai thei ang berin ka ti a.

‘Sumdawnna thilah an lo kal atia,thiante nu tiin min rawn tlawha.A fel hmel khawp mai’ a rawn ti leh sarh sarha.Ka ner nawk thung.Eng ang mizia nge anih ka hrechiang lutuk tlat.

‘A that hlauh chu,thian tha lutuk kan ni lo a.Chuvang anih kha i hriat ve loh’ ka ti sup.

‘Nia,I u lahin a hre bawk si lo.Kan lo hawihai hman thelh a’ a ti leh a.Ka nu hian min rawn awmpui fo va.Ka thian hnai zual chu a hre kim vek in ka ring bawk.

‘Um,anih ka dah phawt ang.Ka haw dawn chiaha’ ka ti leh a.

‘I va tlai thei ve mawle.Chawei tha ang che.Chuan,lui lam sa engmah i ei thei lo tih kha theihnghilh miah suh’ a rawn ti leh a.

‘Nu…’ ka ti sup.

‘Aw le..Aw le,I theihnghilh ka hlau alawm’

‘Aih,theihnghilh lo ang..Anih Mang tha phawt’

Ka naupanlai atangin luilam sa ka ei apiangin ka thaka,ka vuala.Ka thawk dan thlengin a buai phah thina.Ei miah lo tur ka ni a,chutih laiin Chakai ka itna a reh thei lo.Nat huam pawha ei mai chak chang ka nei fo.Mahse ka tana a that loh zia ka hrechiang a.Ka ei lui ngai lo.Ka fimkhur hle chungin chawei tura kan chhuah changin khawi maw berah lui lam sa,ka hriat si loh lo tel palh a awm hian ka buai thina.Chu chu ka nu hian a hrechiang lutuk tlat.

Haw tumin inhnuai lam ka pana,Driverin Motor min rawn khalh chhuahsaka.Mahse, In lama min thlah kual lo in haw tlang  mai turin ka tita zawk.

Ka inkhalh chhuaka,Hotel ka pel fel deuh chiah tihin Tluangpuii,kawngchhak lama nghah nei niawm taka ding ka han hmu a.Kawng zau lai a ni bawka.Signal ka pe a,ka ding dawt.Kan haw tlai bawk nen hawna tur a nei lo a ni maithei.Engtin nge hna a rawn kal thin ka lo ngaihtuah ngai miah lo.

‘Ngah i nei em?” a bula din pahin ka ti a.Min rawn en vat.A phu deuh zawkin ka hre bawk.

‘Aih,Taxi ka chang a..’ a ti tha ve mai.

‘In veng lamah ka kal kual dawn alawm,lo kal la..’ ka ti nghut.Eng chu nge maw ka hriat ni? Kan veng leh an veng a inpersan lutuk.Bakah an veng lamah engmah tihtur ka nei hek lo.

‘Aih,angai lo..’ inthlahrun hmel zetin a then sak bawk.

‘Kal ila…’ a sawi ka hre lo der hmiah.Min hnial tum niawm takin a ang ziau,mahse a chip leh ta zawk.Engmah sawi loin ka inhera.Car lam ka pan zui daih bawk.

An veng kan thlen thlengin tumah mah kan tawng ta miah lo.Sawi tur hre lo niawm takin pawnlam a thlir dauh dauha.A sam chawlleng thliin a chhem leng dar dar bawk.Ka mitthlaah Party naa ka hmuh,Drummer cute leh harvang tak kha a lo langa,tuna ka bula thu mek hi chu Hmeichhe Cool leh hnathiam chungchuang,rintlak leh tihhar hmel zet a ni thung.Mipakhat ni si,tiang em em a nihna thlak danglam thei hi midang an awm ka ring lo.

An In kawtah ka dinga,muhil harh zawk ang maiin a thu ngil nghal auh bawk.Min rawn en a.

‘Ka lawm e aw..’ a ti sap.

‘A ho lutuk,ka kalna tur lam tho ania’ ka ti a.A ha var nalh zetin langin a nui leh sak.

‘Mang tha le..’ a ti a.Ka bu nghut ringawt.Kawngkhar hawnna a vuana,lut turin a der tal pawn min sawm ka ring ania.Mahse,min sawm hauh lo.

Chaw ka ei laiin Pu Dama’n min rawn call a.Ka pick dawn lo zeta,thilpawimawhah lo chuan kan inbe mang lo tih ka hria,ka pick ta zawk.

‘Hello..’ ka ti a.Ka thil ei lai ka ei zawm mawlh mawlh tho bawk.

‘I free em?” a rawn ti a.

‘Free animai.Thil ka ei meka’

‘Ok,nakinah i hman hunah min rawn be zawk mai la’ a ti leh a.A thutak ngang mai bawk.

‘Um..Ka rei lo ang’ ka ti sup.Eng nge dik lo awm ang tih lo zawh hmasak chiam ai chuan nakinah kan inbiak hunah ka hre dawn tho.

Ka eikham veleh inchung bera ka mimal room ka pan chho a,room lian tak a ni lo nangin ka mimal thil bik,sumdawnna kaihhnawih leh ka thil ngaihhlut engkim ka dahna hmun a ni thung.Inhnuai lamah hnalam thil inleng ka kawmna tur Library leh Office inkawp erawh ka nei tho.Mahse, he room bik hi chu keima pual liau liau a ni a,Midang an luh ve ka duh lo,Ka nu pawh nise ka duh chuang lo.Chahbi keimah chauhin ka kawl bawk.

Tukverh bulah Chair ka pawtpheia,Tukverh ka hawnga,hahdam thei ang bera thu chungin Cigarette ka tan a,ka hip nghal vang vang bawk.Ka zu tam lem lo a,mahse engemaw changa zuk chak riau tum ka neih thin avangin ka pai ve ziah thung.

‘Hello..’ vawikhat chauh a ring hman tihin a rawn ti vat.Min lo nghak reng tih a chiang.

‘Ka hman e..’ ka ti sup.

‘Vawiinah kan nau te zinga pakhatin a hriatruk danin khalamah khan keini aia che na an awm anih hmel a…’

‘Chuan…?” ka ti boh..

‘Tu nge anih chiah chu ka hre lo,mahse a hnawk dawn viau mai..’

‘Engti zawngin?”

‘Ka la hrethiam lo.Mahse, tihchhiat che erawh a tum anih hmel’ a ti leh a.Pa thukhuh thei tak mai a ni a,engmah hrechiang lo inti mahse Warning a ni tih hretur khawp chuan a mizia ka hrechiang tawk viau tawh.

‘Ka lo fimkhur dawn nia’

‘Nia,fimkhur tluk a awm lo..Chuan,tu nge i Accountant kha?” a ti leh a.

‘Tluangpuii i tihna a ni em?” ka ti nghut.

‘Aw.Amah kha..Enchiang deuh la ka duh ang’ a ti leh a.

‘Ani berkher pawh chu a’ ka ti hluk.

‘Sangkim,tu nge i nih theihnghilh suh.A chiang em?” nghet charhin a rawn ti leh a.Ka thaw hawk mai.

‘Ka hrereng e..’ ka ti sup.

 Ka phone ka thutna bulah ka daha,ka hma lam a khawpui eng pe tuar mai ka thlira,Pu Dama thilsawi ka ngaihtuaha,engvangin nge Tluangpuii hming kha min zawh? A hrechiang lutuk tlat.Keimah min biak theih loh pawn Tluangpuii a call fo.Vawikhat chauh lah a ni hek lo.Tun ataka min zawh chhan kha thil pakhat chiah a awm.Tluangpuii a ringhlel tihna a nimai.Mahse, engvangin?  

Chapter- 4

Dar 9ah Hotel ka thleng der tawh.CCTV record ho ka enkual zar zara,mahse enge hmuh ka beisei ka hre lo.Tluangpuii khawsak dan uluk thei ang berin ka en a.Han rinhlelh chhinna tur lam chi eih a awm lo. Mahse, Pu Dama khan engmah a sawi mai mai dawn miah lo.File pawimawh ho dahna ka enkuala.Awm tur awm lo engmah a awm lo.

Ka Office atangin ka chhuak leha,Tluangpuii thutna lam ka pana.A Computer ka on a.Ka en kual a,hna lama pawimawh bak engmah a awm lo.

Ka Chairah chunglam enin ka thu vang vang.Ka rilruah Rocky-a a rawn lang thut.Ka Phone ka bana,ka call nghal zat bawk.

‘Hello..Sangkim’ zangkhai zetin a rawn ti a.Ani hi College ka kal laia ka kawm thin a ni a,tunah chuan Detective zingah pawh a tha ber pawl a ni tawh thung.Ka tangkaipui fo tawh thina,tun tumah pawh hian ka tangkaipui leh theh beiseia Call ka ni reng bawk.

‘I buai em?” ka ti a.

‘Buai ti ila buai vak lo,enge nita?” zangkhai tak bawkin a rawn ti leh a.

‘Vawiinah Lunch ei turin i hman em?”

‘Sorry,ka hna i hria alawm’ a nui hak hak bawk.

‘Ok.A pawi lo,hun i neih hunah animai’ ka ti a.Mamawhtu zawk ka ni a, nawrchiam ka tum lem lo.Bakah mimal taka Detective chhawr ka neih tho a,ka tihtir thei.Rocky-a hi chu Sawrkar ramri kan turin ka mamawh mai zawk.

‘Dinner min treat duh chuan….’ A nui leh hak.

‘Tehreng mai,Hotelah hian nge i duh a hmundangah?”

‘Ka cousin ten nimin khan Restaurant an hawng thara.Kal ila..’

‘Ok..i tih dan dan’ ka ti a.A awmna lai a rawn sawi nghal mawlh mawlh bawk.

Kan inbiak zawh hnuah Sana ka thlek zauh.Dar 9 leh achanve a ri tawh.Nidang ang anih chuan Tluangpuii lo thlen a hun titih.CCTV lam ka thlek zauh.A thutna lan theihna Screen ka en a.A la ruak.Mahse, a lo thleng har tawh lo ang.

Aruata number ka zawnga,ka hmuh veleh ka call nghal zat.Ani hi keima mimala ka hriatduh zawng zawng deuhthaw ka hriatna tura ka chhawr a ni a.A rintlak tih piah lam a ni tawp mai.

‘Hello..Sir,enge nita?” a rawn ti vat.

‘Vawiinah hun i neih chuan ka Officeah ka hmu duh che a’ ka ti nghut.

‘Ok,ka lo kal ang..Dar engzatah nge niang? ’ awlsam zetin a rawn ti et.

‘Dar 1 hnu lamah nise..Chawhma lam hi Meeting na tur ka nei a’

‘I tihdan dan le’

‘Ok,ka lo nghak ang che’

Ka phone dahthlak pahin Banga CCTV monitor lam ka en a.Tluangpuii ka han hmu a.Ka tho nghal vut,Kawngkhar ka hawnga.Rang zetin a rawn hawi vat bawk.A rin aiin ka kal hma a ni ngei ang,a hmel a buai deuh nakin ka hre pek.

‘Morning Sir.I va hma ve’ Damthlapin a ti a.Hamhaih deuh niawm a ka hmuh kha chu ka hmusual a ni ngei ang.

‘Um..Nia,vawiin Meeting tur kha ka lo en lawk..Hun kha siamrem angai maithei’ ka ti a.

A Note bu a keu nghal a,a pen in a kawk thla zai zai bawk.Min rawn en a.’Dar 11 ah i nei a,Dar 2 ah Staff meeting.Dar 4ah i nei leha,hei hi Dinner nen a inzawm a.Engber hi nge ka siamrem ang?” a ti a.

‘Staff Meeting kha Cancel rawh.Naktukah dar 1 leh dar 2 bawrah kan nei ang’ ka ti nghut.

‘Ok,ka lo ti ang.Adang pahnih hi siamrem angai em?” a ti leh a.

‘Aih,kha chu a pawi lo..A tlai zawk Dinner neih nghal tur kha an eitur an lo thlen hunah an thlang ang’ ka ti leh a.

‘Aw le..’ a ti sap.

Room lam ka pana,hriatchhuah zawk ka nei.Rocky kha Dinner neihpui turin ka lo ti ngawt.Meeting ka nei dawn tih ka theihnghilh chiang lutuk.Ka cancel vat angai.Ka Phone ka bana,ka call nghala.A pick veleh nuam ti lo zetin tihtur hmanhmawhthlak ka neihthu sawiin Thupha ka chawi nghal luam bawk.

Dar 11ah kan Showroom awmna veng NGO hruaitu ten en Meeting nei tur kan ni a. Dar 10 leh achanveah Hotel ka chhuahsana,Meeting na hmun tur ka thlenin tan a la hun lo deuh bawka pahnih chauh an lo la awm.YMA President,viak tha zet in min lo chibaia,ani hi chu ahma in ka hmu tawha.Kei aiin a upa anih pawhin a upatna a tam kher lo ang.

An vengchhunga sumdawnna nei tur ka ni a.Motor lam sumdawnna a ni a.Parking chungchangah te Sammy-a te khan an lo palzam nasa viau tih an tawngkamah sawifak lo mahse a lang theia.A neitu kan  inthlak takah chuan ka sumdawnna lam engmah min sawiselsak an tum lo chungin an duhdan min hrilh hriaa.Harsatna ka nei anih pawhin sawi hreh lo tur leh min puih an inhuam reng thu an sawi bawk.An tihdan tha ka ti viau.

Hotelah ka let lehin Aruata’n min lo nghak reng tawh.Tluangpuii thutna bulah a lo thu ve a.An lo titi mawlh mawlh.Mimala ka rawih thin anih rualin Monthly a hlawh la a ni lo a, midang pawn an chhawr ve tho tih ka hriaa.Mahse, ka mamawh anih chuan min hnial ngai miah lo thung.

‘Min nghak rei em?” An bula din pahin ka ti a.

‘Aih,rei lo..’

‘Thil i ei tawh em?’

‘Aw,Tluangpui’n min lo hraipuar vek tawh’ a nui a.Tluangpuii ka melh zawka,a nui ve var var.

‘Ok,athat chu..Lut ila’ ka ti nghut.

‘Um..Lawk,Tluangpui.Ka sawi kha aw…’ a nui a.Nui chunga Tluangpuii bu nghauh chu ka en a.Engvangin nge Pu Dama khan a rinhlelh ang? A lan dan pahnih kha midang ve ve ang maia danglam nimahse a nui hmel pawisawi lo lutuk hi chu angai reng tih ka chiang.

Ka Officeah kan inzui lut a,duhdah zetin a thu zawi nan mai.Amah hi tlangval sang ria lam,engtiklai pawha zawi em em reng mai a ni a.Mahse, a pawn lam landan leh a chhung lam hi a hran hlak tih hretur khawpin ka hna min thawhsak tam tawk tawh.A thluak fim that zia hi awihawm loh zawk a ni.Engtiklai pawn Tarmit bial lian lam a bun renga,mahse hei hi a mit that loh vang a ni tih ka hriatna a rei tawh bawk.

‘Tunlai hna khawih lai i nei em?” ka chaira thutthlak pahin ka ti a.

‘Nei chiah lo,mahse ka nei dawnin ka hria..’ a nui hak hak.Ka nui ve hawk bawk.

‘I tidik..Hna i nei dawn’  ka mit ka siai zauh bawk.

‘Eng lam nge?”

‘Tluangpuii hi tu nge anih ka hre duh” ka ti mawl tawp.

‘Maw?” mak tih hmel zetin a ti a.A thu mar nghal bawk.

‘I hre lo tak tak nge i ring lo a min zawt?” ka then suk bawk.

‘A pahnihna zawk kha..’ a ti a.Ka sawi duh engmah pehhel kual chiam ka nei ngai lo a.Ka sawi tlang pawp thin tih a hrechiang lutuk tlat.

‘Ahmasa berah eng chhungkua nge annih ka hre duha,tu nge a kawm thin a tu nge amah hnaihtu ka hre duh bawka.A biak ngun deuh te.An chhungkaw eizawnna nen..’ ka ti duah.

‘I bulah a thawk rei tawha, chungte chu ahranpaa chhui vak ngai turah pawh ka lo dah lo a’ ati a.Ani pawh hi angaihdan tlang deuh taka sawi mai chi a ni ve tho.

‘Adik,mahse ka hriat zawng chu Hmanni deuh khan a u a borala.Anu leh a nau mipa nen an chenga,a u khan an Family ta Sumo a khalh..Hei zawng hi an Family lam kaihhnawih ka hria.A mimal nun chu amah hi ka hriaa,chu zawng chu ’ ka ti duah.

‘Abak ala awm anih pawn enge nang nen pawimawhna a neih ang?” a tarmit a nawrchho a.

‘Ka hre duh anih chuan achhan a awm ang chu..Adik em?” za lo zetin ka nui lui leh suk.

‘Ok..Ok..Sorry,ka lo en ang.Mahse, a Phone hman dan hi ka en thei angem ka hre lo,Rocky kan mamawh maithei’ a ti a.Private Detective tha ber pawl nimahse Sawrkar ramri kan theih loh chin a nei ve fo tho.Mahse, Sawrkar lam nen pawh vawi tamtak lo thawk ho thin anni a,Rocky nen pawh an inhre tha viau.

‘I thei ang tih ka chiang..’ ka then leh suk.

‘Ka tum ang..Engtikah nge hriat i duh ang?”

‘A hma thei ang berin..’

‘Um..Ni khat emaw ni hnih zawk pawh ka mamawh maithei,mahse chu aia rei chu a ni lo ang’ inrintawk hmel zetin a ti a.

‘Ka ring che..’  

 Thil eng eng emaw kan sawi dun leh a.A haw meuh chuan dar 2 a pel tawh.Meeting ka neih leh hun tur kha tlai dar 4 daih a ni a.Zinga ka lo tum lawk dan kha chuan hunawlah kan sumdawnna thar tur ka en ang ka ti kha ania,mahse ka peih tan gang lo.Chairah thatchhe zetin ka thu a,ka lu na ngut ngut tihreh tumin ka mit ka chhinga,khawlum uap churh hian ka lu a tina thina,hlauhthawn tur erawh a awm lo.Migraine ka nei tih ka inhriatna a rei tawh bawk.Hetiang khawlum,uap leh hnawng churh hi Migraine hian a duh loh ber pawl a ni a.Dan ngawt theih a ni hek lo.

Ka phone riin min tiharha,ka lo chhing sek hman.Ka pick hmain Sana ka en a.Dar 3 leh achanve..Min rawn call tu ka en ta chauh.Remruati a lo ni a,Zothani Best nimahse kan inbe zen zen lo.

‘Hello..’ ka ti sup.

‘I buai em?” zangkhai vahin a rawn ti a.

‘Buai chiah lo,Buai tep..Eng nge nita?” ka biak peih loh zia tilang lo turin ka insum nasa viau.

‘Eng nge tunlai hi i awmzia?”

‘I sawi tum ka man lo..’ ka ti hmuk.Diktak chuan a sawi tum ka hria.Zothani nen karkhat aia tam kan inbe tawh lo.

‘Naupangchhia pawh inni tawh lo a,tiang hian awm lo teh u’ a rawn ti leh a.

‘Engtin nge ka awm pawh ka va hre lo,ka awm pangngai bak chu’  ka nui lui hawk bawk.

‘Thutak teh,amak em mai.I be bawk si lo a,a lungawi lo tih i hriat chuan be hmasa ve em em la’ a rawn ti leh hlak.

‘Min hrethiam la,a lungawi lo tih ka hre lo.Bakah ka hna lamah ka buai zual deuha,hun ka nei lo ve bawka’

‘Tak tak em?”

‘Aw..Dawt ka hrilh tawh ngai che ami?” ka nui leh a.

‘Hrih ngai chuang nang,anih chuan naktukah kan lo leng dawn ania’

‘Sorry,naktuk hi ka zin dawna’ ka rilru a lo lang hmasaber ka sawi hmiah.Ka zin dawn hauh lo,mahse ka hmu chak lo.

‘Naa,a van ho.Mahse a pawi lo mai..’ a ti halh.

‘Nia,hun a la awm mai ang.Meeting naah ka kal dawna’ ka ti sup.

‘Ok..Anih phawt’

Dawhkanah phone ka daha,ka mit ka chhing lehnghal hmiah.Zothani lungawi lohna kha ka ngaihtuaha,Tluangpuii chungchang vang kha a ni tih ka hria.Mahse, chutiang taka han huat tur a awm ka hre lo.Ka hnathawk te chungchang sawi lo tura ka duh kha thilsual tiah ka inngai hek lo.Chiang takin ka hria.Zothani nen hi chuan kan inmil ngai tak tak dawn lo.Sexah chauh lo chuan thil engkimah kan duhzawng a hrang hlak.

Dar li rik hmain Meeting ka neihpui tur te an lo thleng kim hman vek.Sport lamah ka inhmang nasa em em a.Ka tuipui leh nuam ka tihber thin pakhat anih tlat avangin keiman khel thei tawh lo mah ila ka theih ang angin ka la tel zel a.MFA  nen kan inzawmna a tha em em a,mahse tunah hi chuan Badminton lam ka buaipui nasa zual bik.Thla thar lo awm tura Tournament lian tham tak,Mizoram mai ni lo.North East huap kan neih tur chungchang sawikhawm tur kan ni a.Pawl anga hmalakna tamtak awm mahse sum erawh keima mimala ka thehchhuah atam viau.

Dar 7 dawnah kan zo ta chauh.Dinner an peih fel tawh leh tawh loh Tluangpuii zawh tumin ka call a,a pick thei tlat lo.

Ka room kawngkhar ka nem hawnga,Tluangpuii dawhkan bawha lo muthlu ka va hmu nghal zat bawk.Phone ri pawn a tihharh theih lo khawpin engtin nge a mut ngheh theih zawk ni?? A ma roomah angai hmiah tih alang reng.

 Dawhkan bulah ka dinga,kaihthawh tumin ka ko dawn chiaha,a Phone a rawn ri a.A thu mar nghal zawk,mak zawk hian a..Tun lawk khan landlineah ka call a,a pick thei der si lo.A mimal Phone ri erawh a hre nghal chat tho si..Pick tumin a bana,mahse min rawn hmuh takah chuan pick lo in a ding ta vat zawk.

‘Sir,min mamawhna i nei em?” a aw a lawi rat bawk.

‘I Phone kha chhang phawt la…’ ka ti nghut.Ka kekawr ipte zen chungin ka dinga.Dawhkana lehkha inrem ho ka en daih bawk.

‘Aih,a pawimawh lo..Nakinah ka be mai ang’ a ti dam thlap.Ka hawichhuaka,a mitah tak ka en a.Min en zawka,mahse rang zetin a mit a lasawn vat thung.

‘Dinner hi an ready tawh chuan kan ei hman tawha.Lo Confirm lawk mai la’ ka ti sup.Hnathawhna hmuna lo mutthluk kha a tih loh tawp tur a ni tih ka hria,mahse a hmel landan pawisawi lo leh pawr deuh fap nen khawngaih thla a la hliah hliah zawk.

‘Aw le,ka lo ti nghal ang’ a ti a.Phone a ban nghal vat bawk.

Dawhkan nghengin ka dinga,banga thil tar ho ka thlek kual mai mai,mahse Kitchen lam duty ho a be thawm ka ngaithla ru kur thung.A awki damthlap hian mak takin mi thunun theihna a nei ka ti dawn nge ngaihthlak a nuam zawk pawh ka hre lo. Mahse, ka sawithiam si loh ‘engemaw’ amahah hian a awm tlat.Engvangin nge Pu Dama khan a rinhlelh ang?

‘Sir…’ ka hawi vut.Mak tih hmel zetin min lo en thung.

‘An peih tawh mi?” ka ti nghal vut.

‘Aw..Ih,Thil engemaw dik lo a awm em?” a sawi zawh rualin nuam ti lo hmel zetin a hmui a pet zauh bawk.

‘Aih,engmah chutiang a awm lo..Ti nge?” ka ti nghut.

‘Ni lo..Engmah..Aaaa,tunah khan vawi li vel ka sawi hmana’ a hmai a sen awp awp mai.Ka thle buk thung.Vawi li a sawi hman a,keiin engmah ka hre lo thung..

‘Sorry,ka sawi tum zawk chu…Eng lo’ a ti bah nak mai.

‘A pawi lo,ka lu a na deuha..Chuvang anih kha’ ka ti a.Ka then suk bawk.Mahse, engvanga ka Staff bula han insawifiah ngawt nge maw ka nih le a?

‘Lo siam rawh se.Ka lo kal ang’ keimah bawkin ka ti leh a.A bu nghauh,Room lam pan tumin ka inhera,mahse ka rilruah thildang a lo lang zawk.Ka hawi let leha,Phone a lo la kang ve chiah thung.

‘I biak zawhah i haw mai dawn nia’ ka ti leh hmuk.Tawngkaa min chhang loin a bu nghat thung.

In ka thlen meuh chuan dar 10 a hnai thuak tawh.Mipa awmkhawm tih takah titi a tui laklawha,thil pakhat atangin adangah kan pakai zela.Kan titi tui ta zek.Ka tum aiin ka inhnem deuh bawk nen khumah ka let tawp.

Ka harh lehin khua a lo eng uar tawh.Ka tho mai dawna,ka lu a na lutuk.Ka mu leh a,ka mit ka chhing vang vang bawk.Reife hnuah ka tho ta chauh,nizan khan ka thawmhnaw pawh thlak loin ka mu tih ka hrechhuak chiah.Inah ka inkhalh hawa,Gate pawh ka kalh ngeia,kawngkhar ka kalh fel em tih erawh ka hre lo.Mahse, In kawngkhar kalh lo pawh ni ila Gate a in locked veka,Buati tan lo chuan lo luh ngaihna a awm chuang lo.

Hotel ka thlenin dar 11 a ri tawh.Ka Room pan turin Stepah ka chho a,ka Office awmna Floor ka thleng chho trep tihin Tluangpuii hmanhmawh zetin a rawn tlan thlaa.Min rawn su deuh chawrh bawk.

‘Sorry…Ka hmanhmawh lutuk a’ a ti sap.Chhan tumin k a ang zuau hman,mahse engmah ka sawi hmain hmanhmawh zetin Stepah a tlan thla lehnghal daih bawk.Eng chu a hria ni maw?!

Ka Office kawngka bulah Julie a lo awma,ani pawh Tluangpuii ang thoin a hmel a phelhphang tho.Eng chu nge maw he Hotelah hian thleng ta ni??!!

Chapter- 5

‘Tluangpuii kha ka hmu a..’ zawt pawh ni loin ka ti a.

‘Nia..Ih.Anu a tha lo thut an ti a,lo hrilh mai tur chein min ti a..’ a ti a.Ka thaw hawk mai,a lo hmanhmawh viau kha a awm lo hran lo.

‘Engtia tha lo nge?” ka ti a.

‘A natna pangngai anih ka ring’

‘Maw? A tha lo sa tihna mi?” ka ti sup.

‘Aw,Stroke ania.Mahse, a zia viau tawha.Tun hnaiah a rilru a seng nasa deuh aniang’ a ti leh a.

‘A zia lo hle mai,Khawi Hospitalah nge an awm?” ka ti leh a.Engvanga hre duh nge ka nih erawh ka hre lo.An kalpuina Damdawiin a sawia.Ka rilruah Rinawma a lo lang zawk.Rinawmna thawhna Hospital a ni a,Medicine Doctor tha chungchuang tak leh a vanglai hmang mek a ni a. Engemaw tal a tihsak theih mahna..

Thu loin Tukverh bul ka pana,Rinawmna ka call pah bawk.

‘Yes..Dude..’ zangkhai zetin a rawn ti a.Ani hi chu englaipawhin a zangkhai hah reng hrim hrim,a rui a nawi thei deuh tih mai loh chu..

‘I kal tawh em?”

‘Kal tawha,ka haw leh chiah zawk.Eng nge nita?” a ti a.A nupui a ko ri ka hre zui zat bawk.

‘In Hospitalah khan nichin deuhah Nu Pakhat an rawn hruaia.Stroke niin ka hria…’

‘Tu nge a hming?”

‘Ka hre lo…’ ka sawi zawh rualin a nui nghek thung.Za lo zetin ka then ve suk tho.

‘Kan Staff pakhat Nu ania.A hming ka hre lo’ ka ti ro hulh.

‘Ok..Ngaihven turin min duh tihna mi?” nuihza insum aw a hriat tel theih.

‘Um,chutiang chu…’

‘Ka kal veleh ka lo ngaihven dawn nia..Lawk,nidangah tiang hi i tih ngai ka va hre lo ve’ ngeiawm zetin a nui leh kar kar.

‘Nidangah tiang an la awm lo te pawh aniang chu..’ ka nui ve hawk hawk bawk.Doctor tiin miin an zah em em thina,thianho zingah erawh a nawi ber a ni ziah thung.

 Staff Meeting neih hma chu ka awm ho ta vel mai mai.Dar hnih velah Staff Meeting kan nei a,Mahse, keini hi chu Duty lai nei reng kan nih avangin kan vaia tel theih a ni lo.Thla khatah vawikhat tal kan nei ziah hrim hrim a.Sawi thar ngai thil tamtak a awm ve ziah bawk.

Kan Manager nen kan inbiak mawlh mawlh laiin ka phone a rawn ri a,ka en a.Rinawm a lo ni a.Rang zetin ka pick vat.

‘Thiana,hei i sawi chu ka hmu aw..’ a rawn ti thawr.

‘Eng nge a an awm?”

‘A tha lem lo..Chuan,Tluangpuii nu a ni tih i sawi lo a’ a ti bai bai.Ka thian kawm thin tam zawk hi chuan Tluangpuii hre lo an awm tawh lo.

‘Min zawt hek lo che mawle..Tlaiah ka lo kal ang’

‘Ok,lo kal rawh..’

Dar li pelh hretah Damdawiin lam panin ka inkhalh chhuaka.Kum khat chuang a thawk tawha,ka lo en liam vel mai mai kha ania.Tun hnaiah hian ka ngaihven ta viau.Mahse, thildanglam engmah a awm lo.Ka Staff zinga thaber a ni a,ka ngaihven a ni mai.

Min hmuh ruala Tluangpuii hmel buai deuh nak chuan min beisei miah lo tih a tichiang ngang mai bawk.ICU ah an lo daha,engmah tihtheih a awm lem lo bawk nen Rinawma Office lamah ka awm ta zawk.

‘Thingpui nge Coffee ka laktir ang?” Rinawma’n a ti a.

‘Engpawh a pawi lo..Ka duh ve ve’ ka ti liam puat.

‘Eng nge kan damlo chu i hmuh dan?” Thingpui a chah zawh veleh ka ti a.

‘Sawi mai a harsa.Duh dan chuan Phai lamah kal thei se’ a ti a.Ka bu nghut.

‘Amah i sawipui em?” ka ti sup.

‘La sawipui chiah lo.An khawsak a harsa em?” a ti a.Ka thle buk.

‘Ka hre tam lo khawp mai,mahse a tul chuan kal se.Senso chu Keiman ka tum sak thei ang’ ka sawi zawh rualin phawk zetin min rawn en a.Ka haider hmiah thung.

‘I ti tak tak em?” mak tihna a awah a lang thei.

‘Ti tak tak lo ila ka sawi nang…’ ngaihsam hmel zetin ka ti leh a.

 ‘Ok,a tha khawp ang..Mahse, hriatthiam loh ka nei…’ uluk zeta min en chungin Rinawma’n a ti a.

‘Eng chu maw?” ka ti nghut.

‘I lo kal hma khan Ramdina a lo kal a,ani phei chu vir buai tak a ni.Tunah i lo kal leha..Tluangpuiiah hian enge dik lo awm? Nge in dik lo ve ve zawk?”

‘Akhai,ka Staff zinga pakhat a ni a.Ka ngaihven hi ka ti tha viauah ka lo ngai asin’ ka ti supa,ka then nawk bawk.Diktak chuan engvang in nge Ramdinsanga a lo vir buai chiam ka hrethiam lo.An inngaizawng ti dawn ila Ramdinsanga nen Party naah kan inhmu fo a,vawikhatmah a rawn la hruai lo.Chumai bakah Ramdinsanga hi chuan Hmeichhe ngai a kawp ngai mang lo.

‘Um..Nia,I ti tha takzet.Mahse,ni lo..Engemaw mak a awm’ a ti leh talh.

‘Enge mak a? ‘ ka ti hmuk.

‘Ka hre bik lo..Ramdinsanga han vir buai vel chu hmu la,a nupui Nu emaw i ti hial ang” a ti leh a.

‘A bialnu pawh a ni maithei a..Chu lam chu kan buaipui tur pawh a nih loh tawp chu’ ka ti leh hluk.Mahse, ka ngaihtuahnaah thildang a awm daih thung.Tih lan kher a tul lo a, ka ti lang lo mai zawk.

‘Dik chiah,mahse nang pawh hian i Staff angin i  buaipui meuh maw?” a ti leh talh.

‘I va ho e aw..Zothani chuan hria se a liak nek duh ang che’ ka mit ka siai zauh bawk.

‘Ni tak,mahse..Tunlai hi in va inzui khat ve’ a ti leh a.

‘Ka buai alawm.Nanga ngaihzawng nei anga Hmeichhia hna bera nei hman ka ni lo tih i hriatchian kha’ ka ti leh a.Za zetin a nui hawk hawk.

‘Lutuk che hian a..Nupui nei teh,ka inti lal chak ania’ a ti leh a.A nui leh hawk hawk bawk.

‘Hmanhmawhthlak loh lutuk,nupui nei tawh ho hian Tlangval leh in chak em mai’ ka ti duh lek.

‘Dik ve tho.Nupui neih hrim hrim hi a inchhirawm ni lo in Tlangval kha a lo nuam ber.Eee,khawnge Ruata hi tunlai a awm?” a ti leh duah.

‘A awm ang,kan inbe khat angreng tunlai chu..’

‘Um,ka hmuh loh chin pawh ka hre tawh lo.Kar tawp hian zankhat tal chu inhmu khawm ang u’ a ti leh a.

‘Ka peih lo,I nawi thei lutuk,a hahthlak..’

‘I va han tenawm e aw..’ a ti bai bai mai.A thinrim lo tih ka hria.

Haw dawnah Tluangpuii ka va hmu leh a,ngaihtuah muk hmel zetin amahin a lo thu a,a lang pawr fap bawk.Hmanni lawkah a u a thi a,tunah a nu boral mai thei dinhmunah a ding leha,nimin a Office a a lo muthlu pawh khan zan lamah an mut that loh vang a ni ngei ang.

‘Chawlh hi ka mamawh rei dawn lutuk a…’ inthlahrun hmel zetin a ti niah niah.

‘A pawi lo,hna lamah chuan Julie a awm.Ngaihtuah suh’ ka ti nghut.Ka tawngkam bung lutuk ka huat tum tak a ni hial ang.

‘Ka lawm lutuk,midang kuta dah turin ka ngam bawk si lo a’ a ti leh sep.

‘Hna lamah engmah ngaihtuah hah suh.I lo kal theih hun hunah i lo kal dawn nia’ ka ti leh a.A nui sak.Mahse, a mitmeng lian kel kawlah chuan a nuih a za tak tak lo tih a lang reng thung.

Kal tumin ka dingchhuaka,a ding ve vat bawk.Mahse, lu hai niawm takin  a pai data,ka che vat.A banah ka vuana,min rawn ngheng deuh rawk bawk.

‘I tha em?” ka ti sup.Kan in len hleih bawk nen min rawn en chho a.

‘Aw..Aw…Ka tha,ka lu a hai thut a’ a ti bah nak mai.A ban ka vawnna a melh zawka,ka thlah nghal vut bawk.

‘Chawlh hahdam i mamawh in ka hria’ ka ti leh sup.Min rawn en zawka,a then leh sak bawk.

‘Ka thawh thut vangin ka lu a hai mai mai anih kha’ ngaipawimawh lo hmel zetin a ti awlsam et.Mahse, a sawi awlsam dan leh a hmel landan a in mil eih lo tih a inhre miah lo zawk anih hmel.

‘Ok,I tih dan dan le..Harsatna i nei anih chuan lo sawi hreh suh.Rinawma kha a awma,I nu enkawltu Doctor a lo ni hlauh bawka.A bulah khan engpawh i sawi thei reng ania’ ka ti leh duah.Min chhang loin a bu nghat ringawt thung.

Damdawiin ka chhuahsan atangin Darkar a liam tawh.Mahse, kawng chanve pawh ka la tlan ta lo cheu.Ruah a sur mai bakah Motor tawt lutuk vangin tlan a sawt thlawt lo.Ka thinrim deuh hlur tawh bawk.

Ka phone nghawr dar dar ka en a.Zothani..Nidang aiin tun tum chu min be lo rei zawk tih ka ngaihtuah a.Ka ner nawk mai.

‘Hello…’ ka ngaihtuahna leh ka aw a in mil lo.

‘I buai em?” a aw a Cool phian.

‘Aih,Motor ka khalh mek..’

‘Ok..Anih chuan kan inbe thei tihna mi?”

‘Thei chiang…’ ka ti leh sup.

‘Engtikah nge i lo haw ang?” ka bo deuh thut,mahse nimin khan Remruati hnenah ka zin dawn ka ti ngawt pek anih tak kha a.

‘Ka zin leh lo..’

‘Maw?!’

‘Aw,hna thilah pawimawh deuh a awm leh a..’ ka ti a.Dawt pa khat thup nan dawt pa hnih ka sawi ta chu ania.

‘Engmah i sawi leh si lo a..Anih chuan zanah pawh i buai dawn tihna mi?”

‘Aih,buai lo ang..Ngatinge?”

‘Biak che ka duh a,zanah kan inhmu thei angem?” a ti leh a.

‘A rei lo ang,khawngaihin..’ ka chhan hmain amah bawkin a rawn ti leh a,nidang ang lo takin tuntum chu a awmdan a danglam daih.

‘Ok..Rei pawh nise a pawi hleinem,ka lo kal ang’ pangngai takin ka ti sup.

‘Aih,ka lo kal zawk ang…’

‘Um..I thu thu le..’ ka ti leh a.Ka hnung lama Motor Horn ri thatah ka hawi chhuaka,ka hma chiaha ding a lo tawlhsawn hman tawh chu niin..

In ka thlen meuh chuan dar 7 a pel tawh.Dar 5 velah Damdawiin ka chhuahsan kha ania,rapthlak zawk hian a..Khawpui a tawt tual tuala,In awm sa engmah tih danglam leh mai mai theih a ni tawh si lo.Kum 10 a vei leh meuh chuan tlan ngaihna awm lo khawpin khawpui chhung a tawt tawh ang.

Buati haw hnu lawkah Zothani a lo thlenga,a ni leh ni lo ang takin a inthlahrun hmel viau.

‘I la thinrim em?” ka ti sup.Za lo zetin a then nak mai.

‘Aih,ka ti dik lo in ka hria..’ min en loin hnuai lam a en a.

‘Ti dik lo chuang lo e.Mahse, ka hna chungchang hi chu midang sawi ka duh lo tih i hriaa.Nang emaw ka nu pawh nise’ ka ti nghut.

‘Nia,ka hria..Hmanni kha chu ka tihpalh tak tak,bakah Tluangpuii ka sawisel kha i duh lo emaw ka ti a…’ min rawn en a.

‘Ni lo…’ ka ti leh hmuk.

‘Anih chuan ka tihpalh nawn leh,amah kha ka haw tak tak pawh a ni lo.Ih,hmanni kha chu..eng lo,kan thil tihlai min tibuaia..’ a tawp lam a zuih ral titih.Ka mitthlaah Tluangpuii a lo langa,hmelah chuan Zothani a tha zawk maithei.Mahse, Tluangpuii hmelthat dan hi chu Make-up vang a ni lo,a danglam..Ni lo,tun hi Tluangpuii ngaihtuah hun pawh a ni lo.

Muangchangin ka tho a,ka pan hnaia.A bulah ka thu thlaa,ka Hmangaih hauh lo,mahse kha leh chen ka lo kawp tawh a ni a,ngaihdam min dil a,ka ngaidam lo anih chuan keimah zawk ka thiam lo ngei ang.

‘A pawi lo.Thleng nawn lo se a tha animai..’ ka ti sup.A kut ka laa,ka humsak vang vang bawk.Min rawn nghenga,a insut zui nghal hraih.Ka awmah a hmai a rawn phum a,a Perfume rimin ka hnar a verh nghal zar bawk.

A rawn hawi chhuaka,a mittui vangin a mit a hnawng deuh chapa,a lang tha takzet.Ka kun hniam,a hmui nel thep ka zuk si a,Duhthawh zetin min rawn chhang let nghal zat bawk.

Engtik laiin nge ka mal chungah a rawn thut hman ka hre lo,ka pawm kang nawlha,a kawr phelhsak tumin ka nawr chho a,rang zetin min rawn pui nghal vat.Mak takin hman ang bawk khan tun tum chu min tiphur leh ta tlat.Min hnial hauh lo bawk.

‘Riak mai la…’ ka ti sup.

‘Min nei angem?” tehdaih chuan a…

‘I duh nge duh lo?”

‘Tiang khawpa kan kal thui tawh anih chuan ka duh loh i ring ami?” a nui a,Zothani ngai kha a ni leh tawh tih ka hria.A samah ka kut ka rawlha,a taksa ruak kang,engmah khuhtu awm lo chu ka en a.A nalh takzet,zak deuh niawm takin min rawn kuah a,Ka nui hawk thung.Vawi tamtak ka hmu tawha,han zah thar viau na tur a awm lo.

‘I riak dawn nge dawn lo?” a zawhna chhang loin ka ti leh a.

‘I duh chuan….?”

‘Duh lo ila ka zawt nang che’ ka ti sup.Diktak chuan a vawikhat riahna tur pawh a ni lo a,duh loh na ngawt tur a awm lo.

‘Uh..Ka duh ang ka ring’ min rawn kuah leha,Zei zetin ka hnute hmur a rawn liak kual zai zai bawk.Zei hi chu a zei thlawt.Mahse, thil pakhat erawh ka chiang tial tial thung.Kan inzawmna hi Hmangaihna a ni lo a,Sex vang a ni a.Kan mamawh kan inpe tawn..Chu zawng chu.A bak engmah a awm lo.

‘Nizanah rawn biak che ka tuma,I pick thei thlawt lo…’ Phone ka pick veleh Ruata’n a rawn ti nghal chiam.

‘Ka muhil tawh niang chu mawle’ ka ti liam puat.

‘Anih tak chu a,kha zat missed call i hmuh chuan lo call back ve ta che.A pawimawh te i ring ve lo maw ni?” a ti leh nang nang.

‘Sorry…Tunah sawi la…’ ka nui a.Diktak chuan nizanah phone en hmanin ka khawsa lo hrim hrim.

‘Ka sawi peih tawh lo,khawiah nge i awm?” a ti leh hlur mai.A thinrim ve tak tak a ang.

‘Dawr thar lamah ka kal mek,In hmu ila…’

‘Ka lo chho ang, a thlang lawkah hian ka awm’ a rawn ti a.A thinrim rei dawn lo tih ka chiang.

Rei vak loah a lo thleng nghal mai,a tum deuh bur chu ka en a.Ka nuih a za lo thei lo.Sun glass dum lian zet a vuah bawk.

‘Nizan chuan enge min rawn call chhan?” ka ti a.

‘A pawimawh vak lo…’

‘I rui nawi lehpek a ni maw?” ka ti hmuk.

‘Teuh lo…’ rang zetin a ti vat.

‘I tarmit kha phelh teh’ tih pahin ka bana,mahse a thle sawn vat.

‘Angai lo..’

‘Eng nge i hriat a? I ngam loh i tawng a mi?”

‘Ngam rapthlak,mahse min khawih rawn alawm..’

‘Tu ten maw?” ka nuihzatna a bo nghal hmak.

‘J-i te veng tlangval rual mawle..Dawih hlawm lutuk’ a ti ngal ngal mai.Zawh ngai loin an insual dan a sawi zui mawlh mawlh bawk.

‘J-i bialpa tihna mi?” a sawi zawh veleh ka ti a.

‘Ka hre hrep lo,an lo ni ve thin nge ni? A hauh na mai mai khawp mai’ a ti leh hmak.

‘Kawp lawr i sim angai anih chiah chu..’ ka ti a.Lungawi lo zetin a rum hak mai.

‘Nui lo teh,ka thinrim zia chu a,An hmel ka hre veka,an chak lo viau ang’ a ti leh nang nang.Ka bu nghut ringawt.Diktak chuan hmeichhe hrang hrang a kawp kuala,Party lah a kal nasa,insual lah a hrat,huai viau e ti lo hian sual rawn a tawk thei em em thung.Mahse, amah zawk hi tawngkam mawi lo hman mai a chin bakah a ruih tawh chuan a chapo lutuk hrat thina, tan lutuk hleihtheih a ni thin lo.Amah vanga midang nen kan buai tum a awm zauh zauh tawh bawk.

Hotel ka thlen hnu lawkah Rinawma’n min rawn call a,Tluangpuii nu dinhmun a tha vak lo tih a rawn sawia.Hmanhmawh zetin Damdawiin lam ka pan nghal vat.Nimin khan engemaw tha lo a awm anih chuan min hrilh tur khan ka ti a,mahse engmah a rawn sawi chuang lo.

‘Eng nge a an?” Tluangpuii bula din pahin ka ti a,a rawn hawi chhuak vat.A mit a hnawng deuh chapa,a tap zo chiah anih hmel viau.

‘A hniam hret an ti a…’ a bula mipa,Tluangpuii nena in ang zet lo thu chuan a rawn ti a.

‘Anih chu mawle,Doctor an awm em?” ka ti a.Amah en lo in Tluangpuii ka en a,mahse hnuai lam a en daih thung.

‘Aw,a lo kal zo chiah..’ mipa zawk bawkin a ti leh a.

Ka thu thla ve a,Tluangpuii hmai dang lap mai chuan ka hriatthiam chiah si lohin min fan tlat bawk.

‘Chanchin danglam deuh a awm chuan min lo hrilh rawh ka ti che sia’ ka ti sup.Min rawn en zawka,mahse rang zetin a hawisawn lehnghal daih.

‘Nia..Mahse tihtheih vak a awm lo a’ a hmel nena inhmeh lo zetin a ti dam thlap.

‘Ni tho mai.Rinawma ka va be lawk ang,ka rawn let leh dawn nia’ ka ti sup.Min chhang loin a bu nghat thung.

Rinawma bulah reife ka thu a,a sawi dawt lo nangin a beisei lo tih ka hrethei mai thung.Ka let lehin Tluangpuii a lo awm tawh lo,an chhungte dang an lo awma.In lamah engemaw mamawh la turin a haw tih min lo hrilh a,Tluangpuii te Boss ka ni tih an lo hre vek bawk.

Motorah ka lut fel chiah tihin Aruata’n min rawn call  ve nghal chiah,Start lo in ka pick leh rih.

‘Ka nei kim thawkhat,Hotelah i awm chuan ka lo kal dawn mi?” a rawn ti zat zat.

‘Ka chhuaka,I awmna sawi la.Ka lo kal zawk ang’ ka ti a.A awmna a rawn sawia,Darkar chanve velah ka thleng hman ang tih ka hrilh a.Min lo nghah tur thu a sawi ve bawk.

‘Hei hi a call details chu ania…Mahse, a tam lutuk dawna,thla khat chiah ka laa ‘ tih pahin ka hmaah paper a rawn daha.Ka lakang nghal vat.Ka en thla zai zaia.Number biak ngun bik pakhat a nei..

‘Tu nge a biak ngun bik number neitu hi?”

‘Ramdinsanga…I hriat dan tur chuan Z&M neitupa…’ a ti a.Sawifiah kher lo mahse tu nge anih ka hrechiang lutuk tlat.Ramdinsanga nen hian eng eng emaw Groupah kan ho awm ho ngei,mahse a number ka save lo thung.

‘Mahse, thil mak deuh a awm.Khatiang khawpa inbe ngun si kha a bialpa a nih hmel loh,Tluangpuii hian a call ve ngai mang lo  tih i en chuan i hmu thei ang.Mipa kawm bik chu pakhat a neia.Sangzuala a nia,College a kal lai atangin an inkawm.A bialpa a ni maithei.Ka la chiang chiah lo,chuan a nu hi reitak a dam tha lo tawha,Hmanni a Boral ta a u kha a nu fa bik a ni a,an Sumo kha Loan-a an lak a ni bawka.A pa chhungte hian an inhmun,a pu hnen atanga an rochun an laksak avangin a nu Pa te inhnuai hi nikum hmasa atangin an luah tan.A pa kha Transport ah MR in a thawk thina,a boral hnu lawkah a nu hian a theih ang angin a chawma.Mahse,a dam tha lo zui leha,Tluangpuii hian a kal a hralha,chu ta tang chuan an chhungkua hi an zia awm ta hret.Tunah hian a nau hi M.A azir meka.Chuan,Tluangpuii hi  Band pakhatah Drummer a ni a,mahse eizawnna atana hmang tur khawp chuan a harsa ang.Tuna a thawh hlawh hi an ei hmuhna awmchhun a ni ta rih’ a tita duah..A sawi hnem bawka,a sawi zawh veleh tui a in nghal khawlh khawlh bawk.

‘I ti lawmawm lutuk,mahse hriat duh pakhat ka la nei cheu.Engvangin nge Ramdinsanga nen an inbiak thin tih ka hre duha…’  ka ti nghut.

‘Hun ka duh deuh dawn anih chu,bakah i hriat duh chhan hre ta ila a pawi em?”inthlahrun hmel zetin a ti a.

‘ Aih,chhan a awm lo..Sumdawng ka ni a,ka elpui Sumdawng ve tho leh ka Staff pa khat an inbe nasa em em hi achhan hriat ka duh mai zawk’ ka ti a.Za lo zetin ka then suk bawk.

‘Um..Nia,a dik reng,chuan nichin khan a tlangpui zawr zawr ka sawia, hetah hian a details a awm veka.I chhiar leh duh takin..’ tih pahin Envelope eng lian fe min pe leh a.In ka thlen hunah ka chhiar duh ngei ang tih ka chiang.

Thu mu chungin Aruata lehkha min pek ho ka en nawn leha,a sawi chin bak engmah danglam a awm vak lo.Mahse, engtin nge cool raih khan a lo awm reng theih tih ka ngaihtuah lo thei lo.Ka tuar hnem viau emaw ka ti a,mahse kei aiin a tuar hnem fe zawk.Hmeichhia a la ni zui.Hman deuh khan a Kal a hralh tih hi Ruata khan a sawi zauh tawha,a lo ni tak tak anih hmel..Khawngaihthlak reuh lutuk..

A Phone hman dan lanna ka en leha,Ramdinsanga call na thlakhat lek chhungin a tam lutuk tlat.Vawi thum chiah Tluangpuii’n a  call na a awm thung.An inbiak hun chhung lah minute 2 aia rei a awm miah lo,Nikhatah vawi li vawi nga lai te a call bawk.

Ka enthla zela,nizana a biak ho ka en leha,ka number ka hmuh takah chuan ka thu mar nghal zawk.Nizan dar 8 velah vawi thum lai min lo call..Mahse, ka phoneah khan Missed call pawh a awm miah si lo..

Chapter- 6

 Ka hmusual emaw tiin ka en nawn leha,mahse ka hmusual hlek lo.Minute tlemte danah vek a ni bawk.Engtin nge ka Phoneah a awm miah loh theih? Ruata min lo call kha chu ka hre lo hrim hrim a,mahse a hnuah ka hmu leh tho.Tluangpuii lo call lai erawh ka hre lo a,ka hmu hek lo.Nizanah a zual tih na a ni anga,min lo hrilh tura ka tih angin min lo hrilh a tum a ni ngei ang.Kei lah khan vawiin khan min hrilh loh vangin ka chhuahchhal titih kha ania..

‘Eng nge in an?” tih ka thawn ta ngawt.Ka rin ang chiahin Darkar a liam hnuah pawh chhanna a awm lo.

Ka harh lehin khua a lo var tan tawh.Nizan khan thil chi hrang hrang ka ngaihtuaha,ka muhil mumal lo.Peih lo zetin ka tho chhuaka,inkhelh ka ngai.Ka inkhel lo rei tawh.

‘Hey,Sangkim..I lo kal khat hle mai a’ ka beisei loh zetin Ramdinsanga’n min lo ti zut zut.

‘Nia,kal khat..I tha maw?” ka ngaihtuahna nena inmil lo zetin ka ti a.

‘Aw,tha lawm..Kan khel dawn mi?”

‘Lo khel hmasa ru.Ka lo intilum hmasa ang’ ka ti a.Diktak chuan ka khelhpui chak fahran lo.

‘Ngai lo,kan kim chiah..Dika leh Tlansanga an awm bawka’ a ti leh zel.Ka hawi kuala,Court hnih a awma,pakhat zawkah Mix in an khel meka.Kei ka tel ve in Court khat zawk ami tur kan kim chiah dawn.Ka tel duh loh chuan Single in an khelh angai.Rilru zim lutuk ka ang thei dawn tlat.

‘Ok..A tha lawm..Khel ila..’ ka ti ta nge nge.

Tlansanga hi Mizo zingah chuan a tha ber pawl a ni thina,tanpui a nuam viau ziah.Kan tang dun deuh ziah bawk.Kan intum tawk viau,mahse ka khelh khat vang nge ka hre lo,tuk dang ka ang thei lo..Ka rilruah engvangin nge Ramdinsanga hian Tluangpuii a biak reng ang tih ringawt a awm tlut tlut.Tluangpuii lah khan a call ve meuh si lo,an in ngaizawng ti dawn ila chutiang anih a rinawm si lo..Bakah Tluangpuii khan mipa kawp a nei..Sangzuala..

‘Sangkim…’ min ko thawt riah ka hawi chhuak vat,mahse ka tlai hman ta tho.Ka awm a ri dawp.Cock hi a te viau nangin Patlingin duhtawka an vuak chuan a per a na thei tek tawk viau.

‘Sorry..’ nuam lo tih hmel zetin Dika’n a ti a.Ka nui hawk thung,za zeta Ramdina lo nui ka melh zawk.

‘A pawi lo,ka khel khat lutuk atin ni..’

‘Anih kha..Duhtawk ang u’ Ramdina’n a ti a.Ka tlawmngai viau nangin inkhelh Moodah ka awm hlawl lo.Tihngaihna a awm lo.

Ramdina’n a phone a en a,a tho vut.

‘Ka kalsan mai ang che u,ka hmanhmawh riau’ a ti a.Ka rilruah Tluangpuii a lo lang zawk.Mahse, zawh ka tum lo.Ka hre duh anih chuan keimah ka kal thei a,ka call thei ve tho.

Ka inbual zo chiah tihin Rinawma’n min rawn call ve chiah,rang zetin ka pick nghal vat.

‘Khawnge i awm?”

‘Inah…A zual tihna mi?” ka tinghal tawng.

‘Yup,engtin nge i hriat a?” mak tih hmel zetin a rawn ti hu.

‘Hre nang,ka zawt che anih chu..’

‘Ok..Vawiin a daih ka ring lo,I lo kal duh anih chuan a hunlai tak..Mahse,Ramdina a awm a’ a rawn ti a.

‘Athat chu..Ka lo kal dawn nia’ ka ti hmuk.Ka rin kha a dik,hmanhmawh zeta a haw chhan kha hei ngei hi a lo nih hi a.Tluangpuii ka call ta nge nge.A pick dawn lo emaw ka tih hnuah a pick ta hram.

‘Hello…’ Mipa awin a rawn ti a.Ka phone ka melh nghek ringawt.

‘Tluangpuii ka be duha’ ka ti sup.

‘Sangkim,keimah Ramdina..Hei,an buai deuha…’ achhan ka hre lo,mahse ka thinrim..Engvangin nge ani berkherin a lo pick?

‘Ok,anih chu mawle..Hna chungchang zawh lawk tur ka nei a’ ka tita ngawt.

‘A timing lo maithei,nakinah ka lo hrilh dawn nia’ a rawn ti leh a.A nupui ang hrima a cheibawl chuan min ti lawm lo,lawm lo tak ka ni.

‘A pawi lo..Hrilh duh lo mai rawh,ka lo kal ang’ ka ti a.Min chhan leh hmain ka off zui nghal hmiah.Engvang mahin ani kha biak na tur ka nei hrep lo e.

Damdawiin ka thlenin a lo chatthla fel chiah,Tluangpuii bulah nu upa lam pakhat a lo thu a,Tluangpuii a kuah bawk.Julie ka call a,hna lamah ka kal dawn lo tih leh Tluangpuii nu a boral tih ka hrilh nghal a,Ruata ka call leh bawk.

‘Ruang phurh dan tur vel hi engtin nge niang?” Rinawma’n a ti a.

‘Ka lo ngaihtuah ang,Ambulance min pe thei em?”

‘Maithei, lo nghak lawk’ a ti a.A kalsawn nghal a,an vai maiin an phili a,engmah han ngaihtuah thei hmel an pu lo.A hma khan ka hre tawha,a nu te unau zinga mipa awmchhun a boral tawha.A nupui nen fa an nei thei lo,an inpuiah a Putea nupui leh a nu nau Nula senior leh a pi leh pu an awma,Mipa han rintlak tumah an awm lo.

Ambulance min pe thei ta hlauh,Hotel lam atangin Motor ka chah a lo thleng tawha,an veng YMA lam an rawn thawkchhuak tha viau bawk.Tluangpuii bulah Ramdina hmuh ka inbeisei laiin ka hmu hauh lo,Bill lam a buaipui emaw ka ti a, mahse chu pawh a ti chuang lo.Tluangpuii Nutei hnenah Damdawiin lama tihfel ngai chu ka tifel ang tih ka hrilha,Lawmthu min hrilh mawlh mawlh.Kan bulah Tluangpuii a awm ve tho nangin kan sawi hre hmel a pu lo,a en ngai a en ngawt ngawt ringawt.A demawm lo,a tuar nasa lutuk.

An veng YMA hruaitu ka biaa,senso ngai zawng zawng a tul apiang keima hnena sawi turin ka ti a.Tluangpuii thawhna Hotel neitu ka ni tih ka sawi lo nangin an lo hre tawh tih a tawng danah ka hrethei mai thung.

‘Lawmthu sawi tur kan ngah ngei mai,kan tibuai nasa em em lutuk che a’ Tluangpuii Puin a ti chuar chuara,zanin hi YMA hun tawp zan anih avangin Ruata nen kan kal leh a.Ban veleh haw mai kan tum laiin min chelh ta tlat.

‘Engmah lawmthu sawi na tur a awm lo,ka tihtur ka timai zawk anih kha’ ka ti a.

‘Ekhai,I tihtur bak pawh min tihsak alawm.Mampuii tan chuan a theih chhung chu a thlawn pawh nise i hnena thawh hi a ba rulh nan a tawk zo lo ang’ a ti leh a.

‘Rulh leh turin ka ti lo ka pu,ka Staff zingah pawh a thaber a ni a,ka tihtheih tawk ka tihsak mai anih kha’ ka ti leh a.

‘Ni e,rulh che pawh tum ila kan rul zo lo tawp ang che.Kan lawm tih min hriatsak mai aniang chu’ a ti leh boh.

A nu ruang awm ni atang khan an In lamah ka tal tam hle chungin a hranpa takin Tluangpuii nen inbiakna hun kan nei lem lo.Upa zawk a ni a,engkimah nu leh pa ai a awh angaia,a buai tur zia ka hrethiampui viau.Chutihrualin hmanni lawkah a u a boral a,tunah a nu a boral leha,vengchhung mi te khawngaih an hlawh takzet tih erawh ka hria.Hetiang hunah tak te hian Mizo nih lo nawmzia a chiang thin.Tlawmngaihna te hi a bo lek lek tih sawi thin mahse a bo lo tawp,a chhe lam hi sawi lar hlawh zawk anih vang mai tih te ka ngaihtuah phah rum rum bawk.

Ka phone riin min tiharha,pick loin ka mut ngaiin ka mu a,a tawp leh mai em ang chu.Ka muhil leh hman tep tihin a rawn ri leh,tu nge maw ni hrep ni? Ka inlet a,ka Phone ka en a,ka beisei loh zetin Hotel atangin a ni tlat.Ka pick hmain Dar zat ka en a,zing lam dar 3 a pel hret.Tun ang hunah Hotel atanga Call ka dawng ngai lo,thil tha lam a ni thei lo hrim hrim.

‘Hello..’  ka ti hmuk.Ka tawngkam a nelawm lo viau.

‘Sir,Hmingi ka nia.Hotelah hian kangmei a chhuaka…’ hlauhlawp aw in a rawn ti a.Ka harhchiang ngang mai.

‘Maw?! Khawi lai nge kang?” ka thuchhuak a,khum atangin ka chhuk nghal zat.

‘3^rd Floor atangin…Fire Dept ka call a,an lo thleng tep ang…’

‘Ka lo kal…’ min chhanna pawh nghak loin ka off nghal hmiah.

Inhnuaiah ka tlan thlaa.Motor Chahbi ka la a,mahse ka dah leh,Bike chahbi zawk ka la leha,ka thleng hma zawk ang.

Hotel thlen nan minute 10 bak ka hmang lo,mi muttui hun lai tak nimahse an lo pungkhawm tam viau tho.Fire Dept an lo thleng hman a,an lo thelh mit hman,a kang lam hi Kawngpui lam anih avangin duh tawkin an phuh theia,ka thaw huai mai.

Fire lam atanga lo kal ten  kangmei chhuah tan dan kan hnathawk te an zawta,sawi thei an awm lo.Alarm a rik vanga hria anni lek chauh mai.Current kalsual lah puh chi a ni lo.Engkim a felfai lutuk,Kangmei chhuah tanna Room lah mikhual thlen theihna tura buatsaih ni loin Hall ang type a cheibawl a ni a.Tun ang hunah tumah an awm dawn lo.Vanneihthlak lutukin Room dang a kang kai hman lo hlauh,mahse lawmna tur a vang lam hret chu a ni.Bungrua hmuh tlak a awm lo,a kang chhe thei chu an kangchhe deuh vek.Kangral lo ho pawh hman zui tlak engmah a awm lo.

Kan mikhual te hnenah hriatthiamna ka dil a.An hlauthawng viau hlawm.An demawm hek loh,Mikhual kan ngah loh lai a ni hlauh erawh a vanneihthlak.Kan buai zualpui a reh meuh chuan khua a var tawh.Haw loin ka Officeah ka thu a,Duty an inthlak veleh zan lam Duty zawng zawng ka hmu duh tih ka hrilh nghal bawk.

CCTV ka en kuala,engmah hmuh tur a awm lo.Room chhung engmah CCTV a Cover phalna kan nei lo.Dan in a khap tlat thil a ni a,tihluih chi a ni lo.A kan tan hma ka en a,tumah lut an awm lo.Engmah dik lo awm a lang hek lo.Mahse, ahmang hnuhnung berin zan dar 11ah an hmang zo a,an haw hnuah pawh Staff in an enfel a,an tifai nghal vek bawk ngei anga.Dik lo a awm anih chuan an hmu ngei ngei tur a ni.An hman zawh atangin darkar fe a tla hman bawk.

Ka Roomah Staff Duty an inthlak veleh an vaiin ka ko lut vek.Nizan ang bawk khan tuman engmah sawitur an hre lo.Duty tam zawk hi kumkhat chuang thawk tawh anni a.Pakhat erawh thla hmasaa lo lut a ni thung.

Hall kawngkhar bulah ka ding a,thil kang chhe nasa lutuk leh bang ut deuh thual mai ka thlira,a lo berah thlakhat chu a hman theih loh ang,Siamrem leh chhung a rei dawn.Hun engemawchen chu Mikhual kan neih tlem phah ngei bawk ang..A lungawithlak hlawl loh.

Ka Office lam ka pan chho a,Tluangpuii lo thu ka hmu nghal zat.Ka beisei aiin a rawn zawm hma.Mahse, a lawmawm lam a ni.En rengtu a nei tih hria niawm takin a rawn hawichhuaka,kan mit a in tawng sawk.Rang zetin a ding vat bawk.

‘Good Morning Sir, nizan chanchin ka lo hriaa’ a tihzawm zat.Ka bu nghut.Ka pan phei a.Diktak chuan ka thaw huai mai.Ka Staff zingah a tha ber a ni a,tun ang hunah phei chuan ka mamawh lutuk tlat.

‘Nia..A zia lo,I va rawn zawm hma zawk ve’ ka ti sup.

‘Ka chawl rei tawh em a.Eng lo,nizan chungchang engemaw tal hriattur a awm em?” a ti leh a.

‘Aih,awm lo…’ ka ti hmuk.Ka mood fuh loh zia chu pui tak a ni ringawt.

‘Amak ka ti e,ka beisei lo takzet…’

‘Kei pawh..’ ka ti hluk.

‘Nizan atangin i la awm tihna mi?” a ti leh hliai.

‘Um..’

‘Engemaw eitur ka rawn laksak dawn che mi? ‘ a ti leh a.

‘Aih,nakinah ka haw ang..’

‘Ok…Vawiin i kalna tur neih hi Cancel ngai i ti em?”

‘Aw, khawgaihin…’ ka en a.Rang zetin a hawisawna,mahse a hmela mak tihna lang kha ka hmu hman tho.

Chairah ka thu hnawk,ngaihtuah na ka hmang mumal thei lo.Tihpalh thilthu leh vanduai vang a thleng niin ka hre thei lo.Mahse, eng nge ka tih ang? Engmah han rinhlelh eih tur awm lo khawpin a felfai bawk si.

Ka Phone a ri a,ka ngaihven peih lo.Khawvar tirh atang khan ala ri zawm deuh char char,min ngaihtuah vanga ka chhungte leh ka thiante min rawn call an tam lutuk.Sawi ngai sawi nawn reng ka ning,Ka phone number nei zawng zawngin min rawn biak kim vek an tum emaw tihmai tur a ni a.Min ngaihtuah vang nimahse ka thinrim hlur tawh zawk.

Kawngkhar a ri rak,ka hawichhuaka.Tluangpuii a rawn dak ve chiah.

‘Pu Dama’n a be duh che a.Ka rawn zawm dawn em?”

‘Angai lo,ka call back ang tih hrilh la…’ ka ti hmuk.A bu nghat thung.

Ka Phone ka bana,tun lawka min lo call tu kha amah a lo ni a,ka Call back nghal a.Nizan chanchin a hre tawh a ni phawt ang.

‘Hello..’ a rawn ti dam thluam.

‘I lo call lai ka lo hre lo a…’ ka ti sup.

‘A pawi lo.Eng vanga thleng nge i hre thei tawh em?”

‘La hre rih lo’

‘Amak hle mai,ka lo ngaihtuah dan chuan thil thleng palh turah ka ruat vak lo’ a rawn ti leh a.Ka ngaihdan a ni ve chiah.

‘Maithei,mahse engvangin nge tih leh tu in nge tih lai hi a pawimawh.Ka Staff te zinga mi bak tumah an lut lo a..’ ka ti leh duah.

‘A chhe nasa viau em?” a ti leh daih.

‘Nasa lutuk lo.Hall a ni deuh mai..Mahse, thla khat vel chu kan hmang thei lo ang’

‘A zia lo hle mai.Eeee,Tluangpuii kha…’ chhang loin ka mit ka chhinga,Chair hnunglam ka ngheng a.Ka thaw hawk bawk.

‘Ka check tawh,engmah dik lo a awm lo’ ka theihtawpa pangngaiin ka ti sup.

‘I chiang chiah maw?”

‘Chiang…Engmah dik lo a awm lo’ ka ti leh a,Mahse ka chhungril hian Dik lo a awm tih a hai lo.Dik lo ber erawh enge anih ka hre lo.Ramdinsanga’n vawi tamtak a call a,eng nge an sawi ka hre lo.Mahse, kha vang khan a rinhlelhawm tihna a ni chuang lo.

‘A that hlauh chu,a nu kha a boral niawmin ka lo hriaa’ a ti leh boh.

‘Aw,Boral..Lawk,engtin nge i hriat a?”

‘I tana hlauhawm an awm anih chuan ka tan pawh a him bik chuang lo tih i hriat kha,hriatchian tumin ka bei ve bawk ang chu’ a ti leh duah.A sawi dik,kan pahnih hian engmah intawm lo mah ila kan kawng erawh a in anga,lakhhran theih a ni lo.Ka him lo anih chuan ani pawh a him bik lo,Amah a him lo anih pawhin keipawh ka him chuang lo.

Ka Office kawngkhar ka hawnga,Tluangpuii  a rawn hawi vat.

‘Coffee min rawn laksak lawk thei em?” ka ti hmuk.

‘Aw..Ka rawn la ang,thildang angai em?”

‘Ngai lo..Eeee,Pain clear engemaw ber ka duh bawka’  ka lu na ngut ngut tihreh nan ei ngei ngei ka ngai.

Rei loteah a rawn chawi lut a,Dawhkanah a daha,a kutzungtang sei sel sawl leh thianghlim zet chu nidangah ka hmu ngai lo pawh a ni lo.Mahse, ka mit a la tlat.A kut tinahEngmah hnawih loin a fai sara,a zuah sei hek lo.

‘Eng lo…Ka nu Boral avanga min buaipui na zawng zawng kha ka lawm lutuk a…’ a hmai a sen deuh tawn tawn bawk.

‘Lawmthusawi angai lo,ka tihtur ka ti zawk anih kha…’ ka ti hluk.Ka tawngkam bung lutuk hi ka lo ngaihtuah ngai lem lo,mahse tunhnaiah hian Dam deuh hleka tawng ka chak ve ta zauh zauh.

‘Aaaa,engmah i tihtur a awm hleinem.Mahse, kan lawm tak tak’  a ti leh a.

‘I hnathawh that vanga ka lawmthu sawinaah ngai mai la’ ka then suk a,a nui ve sak.A nuih zawngin a biangsum a kuar kalh a.A inhmeh lehpek..

Ruata leh Zothani an rawn thleng rual titih,Hall lamah bawk kan chhuk leha.Kan enkuala,engmah titheih a awm lo.A hnawk thianin Staff thenkhat in hna an thawka,Dawr thar tur lama hnathawktu thenkhat ka chah belh bawk.

‘Haw phawt la,nizan atangin i la awm bawk si’ Zothani’n min ti a.A sawi dik,mahse ka rilru a chawl thei tlat lo.

‘Nia,phei ang u.Hahdam phawt i mamawhin ka hria’ Ruata’n min ti ve bawk.Diktak chuan inbual a,mut hahdam vang vang ka chak takzet,mahse engvangin nge he thil hi helaiah hian a thlen hriat hmasak ngei ngei duhna in a turin min tur a,engmah ka hrechhuak thei chuang si lo hian min ti tihnrim hlur tawh bawk.Mahse, an pahnihin min tih rawna,haw tura min nawr tak ngat ngatah chuan haw mai tha zawkin ka hre ve ta nge nge.

Haw turin inhnuai lam kan pana,mahse Hallah ka peng kawi leha.Ruata leh Zothani an kal tlang thung.Tluangpuii hnenah hnathawk ho lo en turin ka ti a.Tlai lamah ka kal leh ang tih ka hrilh bawk.A bu nghat.

Room ka chhuahsan fel deuh chiah tihin ri bur leh au ri thawt ka hriaa, rang lutukin Hallah ka tlan lut lehnghal a,Chhuatah Tluangpuii a lo tlu sawp niaih mai.A bulah Light khaina bawr lian zet inchunga inkhai thin kha amah si lo chiahin a tla sawp nulh bawk.Ka thaw hawk mai.

‘I tha em?” tih pahin ka thu hniam nghala.A rawn hawichhuak a,a chal a kak.Thisen tharlam zet a hnam tiam tiam bawk.

‘Aw…Ka…Ka tha in ka hria’ a ti bah nak mai.

‘Aih,I tha lo.Lo che suh..’ ka ti hmuk.Ka bul hnai bera Staff zinga mi hlauhthawn hmel zeta lo ding hnenah Towel emaw Cotton la turin ka ti a.A tlanchhuak nghal vat.

Tluangpuii ka en leha,a chal khawih a lo tum mek.Rang zetin a kut ka man sak vat.

‘Khawih suh,a hrukna tur rawn la phawt rawhse’ ka ti sup.A hlauthawng ngang aniang a hmai a dang lap mai bawk.A demawm hauh lo,tlak fuh vaih se chuan a damchhuak anih pawhin a na hle ang tih ka chiang.

Towel te deuh kengin a rawn let leh vat,min rawn pe a.Tluangpuii chal thi tiam tiamah ka nem beta.

‘Keimahin ka ti thei ang ‘ a ti sap.

‘Ok..I tho thei em?” ka ti hluk.Towel ka nem behna ka thlaha,a nem bet ve thung.

‘Ka thei ang ka ring’ a ti leh sap.Kaihthawh tumin ka bana,tim deuh daiin min en a.Min rinchhan tum hmel a pu lo.Mahse, a banrekah ka vuana,ka kaitho nghal hmiah.

‘Driver tu nge awm?” Julie hnenah ka ti a.

‘An awm ve ve..Ka ko dawn em?”

‘Aw,Tluangpuii hi Damdawiinah i hruai dawn nia’ ka ti nghut.

‘Sir…Angai lo ang..’ Tluangpuii’n rang zetin a rawn ti nghal vat.Muangchangin ka en a.

‘Kal rawh..Achiang em?” ka tum aiin ka aw a chang lam hret.

‘Ok..Sir’ a ti sep.A tlukna lamah khan a thawmhnaw hak a bal deuha,a sam a pawr deuh phang bawk.Hmeichhe induhtawk leh cool raih thin kha ni loin Hmeichhe naupang infiam zo,hah vanga pawr deuh a ang mah zawk.

‘Eng nge thleng a?” Zothani’n a rawn ti a.Ka chhuk har an tih avangin an rawn let leh anih hmel.Min en lo in ka bula Tluangpuii ding a en thung.Ruata’n a mitmeiin zawhna min zawt ve bawk.

‘Inchung atanga thil tla in a tlak palh a…’ ka ti hmuk.

‘Eh…a va zia lo,a na viau em?” pawi tih hmel zetin Zothan’in a ti a.

‘Aih,na lo..Ka chal hi a kak deuha,chu chu nimai’ Tluangpuii’n inthlahrun hmel zetin a ti sap.

‘Damdawiin kal chi anih chu…’ Ruata’n a ti a.Tluangpuii lo thawh tirh atang khan a lo kal chuan a buaipui chung zel kha ania,mahse tunlai chu a buaipui chung kha a reh ta deuh anih hmel.

‘An kal ang..Driver ka koh tir mek’ ka ti leh nghut.

‘Ok,a that hlauh chu..A tlak na lo hlauh che a,a tihzia hle mai’ Ruata bawkin a ti leh a.

Julie leh Driver pakhat an rawn lut a,Damdawiina hruaitur leh Hotela rawn let tawh lo a In a dah tlang turin ka ti a,Zothani’n mak tih hmel zeta min en chu ka mitsirin ka hmu ru reng.Mahse, ka haider hmiah thung.

‘I free em?” Phone ka pick veleh Pu Dama’n a rawn ti a.

‘Um,free animai’ ka ti sup.Hall chhung ka enkuala.Ka beisei aiin an thawk chak zawk.Kangmei chhuah atangin kar atling dawn tawha,mahse engvang nge tih engmah ka la hrethei ta chuang lo.

‘Champhai a mi tur kha kan chang dawn lo a ang riau mai’ a rawn ti a.

‘A fel thawkhatah ka lo ngai asin’ ka ti a.Tunlai chu engmah a kal dik thei miah lo.

‘Kei pawh mawle,mahse hei tukin Ropuia zuk kal an lo chhan danah chuan hralh tawh ang lek lekin an lo sawi daih maia’

‘An hralhna an sawi em?”

‘Aih,sawi lo..I remchan chuan i lo chho lawk mai dawn mawni?” a rawn ti leh a.Ka lo tum lawk dan kha chuan tunkarah kal tum ka nia,mahse ka thei ta lo.

‘Mondayah lo chhoh ka lo tum ang.A pawimawh lutuk,ka chan thei lo ‘ ka ti leh a.

‘Ka hria alawm..Mahse, nangmah ngeiin i dawr a tha in ka ring’

‘Ok..Ka lo kal ang..’

Chhuah ka ngaih avangin inhnuai lam ka pan thlaa.Driver hruai loa kal ka duh avangin keiman Motor lakchhuah tumin Motor dahna ka pana.Motora ka lut tur chiah ka mitsirin engemaw hmuh a nei.Ka thil hmuh na lam ka hawiphei a.Ka beisei loh lutukin Tluangpuii leh Mipa pakhat,cher sang lam lo ding dun ka va hmu a.Nichin lawk kha chuan inchungah a awm reng sia..Ka thle buk..A duh duh a hmu thiang alawm le.

Motorah ka lut a,mahse Officeah ka thil ken tur ka theihngilh tih ka hrechhuak leh lawi.Tluangpuii call ka tum uk,mahse kan awmna a in ang reng..Ka chhuk leha,ka pan pheia.Min hmu hauh lo.A hmel thutak zetah chuan a Mood a tha fahran lo a ang viau bawk.

Koh tumin ka ang hman zuau,mahse a mipa zawk tawng ka hriat rualin ka chip leh hmak.Ka hnaih ber Motor phenah ka tawlh lut nghal zauh bawk.

‘Chho tawh rawh,chuan nihnih chiah hun i nei ania..Hrereng la..’ a tih thawm ka hre zawm leh zat.

‘Min nawr lutuk lo se ka duh ania’ Tluangpuii’n a ti ve thung.Eng chungchang nge an sawi ka hrethiam pha eih lo.

‘Nawr che a duh lo.Mahse, call pick loh mai mai i ching zel anih chuan enge a tih ang i hria alawm’ mipa zawkin a ti leh a. Ka hriatthiam chiah si lohin keimah nena inkungkaihna nei thil an sawi niin ka hre ta tlat.

Chapter- 7

‘Hey ,I tha em?” ka hmai bul lawka a kut rawn vai pahin Ruata’n a ti a.Ka phu deuh zawk.

‘Aw, tha…Ngatinge?” thut mar pahin ka ti a.

‘Ka be mawlh mawlh che a,hmundangah i rilru i dah tlat a’ a lungawi vak lo tih a awah a hriat theih.

‘Ka ngaithla lawm…’ ka ti liam puat.

‘Ka va han awih lo,pawi lo..Dar engzatah nge i chhuah ang?” a ti leh a.

‘Dar 9 velah aniang.I lo kal ve dawn mi?”

‘Aaaah,hman ila chuan kal ve ka duh.Mahse,i sawi chawpchilh bawk sia’

‘Um..’ ka ti sup ringawt.

‘Engemaw vei deuh nei i ang,a dik em?”  a ti leh a.Chik zetin min en bawk.

‘Aih..Nei nang’ ka then suk bawk.

‘I Staff pakhat,Tluangpuii kha i hrechiang em? A khawngaihthlak reuh khawp mai.Sumo an neia.Loan in an la a,a accident leh si,chumai bakah accidentah khan a U a thi bawka.A nu a boral leha,mahse Loan chu Loan ania…A buaipuitu hi kan Cousin pakhat ania,hman niah a sawi chhuaka,Tluangpuii an biak lahin tih vak ngaihna a hre lo niawm tak a ni ’ kan thian zinga Pakhat,Zomawia’n a ti a.A thusawi kha ka bengah a ri nawn zing ta viau chu anih hi maw..Mipa pakhat nen an sawi dun kha he thil hi a lo ni maithei.Mahse, engvanga lo ngaihtuah ve chiam chiam nge maw ka nih le a?!

Champhaiah zankhat riakin ka chho a,ka ram lei tum neitu te nen kan indawr fel thei ta hlauh.Myanmar lam panna kawnga awm a ni a,nakin zel atana Sumdawnna kawng pawimawh a la ni zel dawn tih ka hriat avangin helai hmuna Ram lo neih lawk hi ka tan a pawimawh takzet.Sumdawng ka nih tlat avangin ka huang ka zauh zel a tul em em bawk.

‘Zanin kha i hman ang tiraw?” Phone ka pick veleh Zothani’n a rawn ti a.A sawi awmzia ka bo deuh titih.

‘Eng titur in nge?”

‘Amak..Party kha’ ka hrechhuak nghal zat.Mizo hmeichhe zinga Zaithiam kan neih that ber pawl in pasal a nei dawna,Zanin hi an inneih hmaa Party neih hun tura an tih kha a ni tak.Amah hi Zothani Cousin anih mai bakah kan inhre ve hranpa hrim hrim bawk.

‘Ka fiam che anih kha,mahse ka hma vak lo maithei ania’ ka ti sup.Ka hmaa Laptop ka en vung vung bawk.

‘Va han sual tak,dar engzat velah nge i hman ang?” a ti a.A thinrim lo tih a awah ka hre thei.

‘Dar 8 velah ka lo kal thei ang ka ring.A tlai viau em?”

‘Aih,a tawk vel alawm..’

‘Ok…’

Kal hmain ka thil tih laklawh lai ka tizo te te.Naktuka thawnchhuah tur a ni a,ka peihfel hman loh chuan buaina lianpui a ni thei tlat.

‘Sangkim,in tha maw?” Party na tur hmun kan thlenin Ramdina’n a lo ti nghal lung lung.A kal ve ang tih ka hre lawk tho nangin ka hmuh hmasak ber atan chuan ka ngaihtuah hauh lo.

‘Tha lawm,nang zawk?” ka ti a.

‘Um..Tha e.Naktuk zing chu kan khel dawn mi?” a ti leh a.

‘Khel tur i awm ka va ring lo ve’ ka then lui suk.

‘Aahh,teuh lo mai.Zanin chu ka hruai hi a Strict lutuk,in tam chi pawh a ni lo ang’ a ti leh a.A nui vur vur bawk.Vawi tamtak Party naah kan inhmu tawha,hmeichhe ngai hi a rawn hruai anih pawhin a tam lo khawp ang.

‘Wow,a thar kan hmu leh dawn tihna mi?” Zothani’n phur zetin a ti a.

‘In hre mai ang..’ a hmela intithei hmel lang chu ka hmuhhmaih hauh lo.Tu tak chu ni ang maw?

Kan thanhnem phian,intur leh eitur duhthusamin a tam.Mahse, zanin chu zu chak deuh in chakna pawh ka nei lo.Beer ka in nual tawh thung.Light eng dul deuh ruihah chuan inhmuh chian viau a harsa.Music tang leh bengchheng zet a ri bur bura,a then an lama.A then muk zeta titi an awm bawk.Kan inngaihsak lo tawn vek nimaiin ka hria.

‘Ka in ve dawn aw’ rawn kun hnaih pahin Zothani’n a ti sa sa.

‘I duh chuan…’ ka ti sup.Zu tak hi a in ngai lem lo a, mahse Beer hi chu a in ve ziah thung.Sawisel tumna ka ngei ngai lo.

‘Phone ka va hmang lawk ang,ka rei lo ang’ Zothani hnenah ka ti a.A bu nghat.Diktak chuan Phone hman tulna ka nei lo hrim hrim,inchhung boruak uap leh Music ri bengchheng lutuk ka nin vangin boruak dang hip ka mamawh zawk.

Balconyah ka chhuak pheia,mahse awm an lo awm.An thil tih mek lah midang mamawh miah loh na chi a la ni zui bawk.Ka lut leha,Inchung panna Stepah ka chho ta zawk.

Inchung ka chhuak chiah tihin Mipa tawng thawm ka hre nghal a,an sawi tak erawh ka hre hman lo thung,ka ner nawk mai.Khawilai mah hmun fal a awm miah lo chu anih hi a..Let leh tumin ka inhera,mahse Hmeichhe aw fiak thak in ‘ Min khawih suh’ a tih ri ka hriat takah chuan ka ding leh chawt.

A aw kha ka hriat hnu a ni tlat.Mahse, tu nge anih ka hre mai lo thung.Remruati ka tih dawn chuan a ni si lo.Hmeichhe kal ve ho zinga tam zawk kha ka hriatsa an ni a,an zinga tu emaw ber a ni mahna.Ka inher leha,thawm nei mang loin inchung zawlah ka pen chhuak ta zawk.

Hmeichhia leh mipa an lo ding duna,Thla ral lam tawh eng dul zet bak eng dang a awm loh avangin an hmel ka hmu chiang thei lo.Ngawirengin an tawng leh hun nghakin ka ding mawl tawp.In ngaizawng inhau satliah anni em ka hre lo,Eng nge tih ka tum ka hre hek lo,mahse ka kalsan thei tlat lo.A awki ah khan chhan ngai niin ka hria pawh a ni mahna..

‘I duh emaw duh lo emaw ka ta i ni dawn tho tho.Hre reng rawh’ Mipa zawkin a ti hmuk.Ramdinsanga aw a ni tih ka hria.A hmeichhe hruai kha a chhuang viau anih tak kha..Mahse, nichina khawih lo tura hrilhtu hmeichhia kha chuan a aw kiah khan a duh ve miah lo niin a lang tlat lawi.

‘Ka ni ngai lo ang..’ Hmeichhia zawkin a ti leh hmak.Amah a ni chiang lutuk..Ni e,Tluangpuii ngei a ni..

Ka lo tel ve na tur a ni miah lo tih ka ngaihtuah naah a rawn awm nghal zawk.Eng anga nasa pawn inhau se ka buaina tur a ni lo.Hnathawhna hmunah ka Staff nimahse a mimal nunah ka tel ve na tur engmah a awm lo.

Kal sawn tumin ka inher a,mahse Tluangpuii te thawt ri ka hriat rualin ka inher nghal zawk.Engtik laiin nge an bul ka thlen phei hman pawh ka hre lo.

‘Thlah la a that ka ring’ ka ti bung vut.Min rawn en rual thawt bawk.

‘Lawk,eng maw i saw?” min tham lo hmel zetin Ramdinsanga’n a rawn ti a.Thla eng a chau viau nangin kan in hnaih ta bawka,an hmel ka hmu chiang thei ta deuh.

‘Thlah rawh…’ ka ti leh hmuk.

‘Kalsawn zawk rawh.I lo tel ve angai lo ania’ ngeiawm zetin a ti leh a.A nui zui nghek bawk.Mahse, Tluangpuii a kuahna a phelh chuang lo.

‘Ka sawi nawn leh ang,Thlah rawh’

‘Aih,I hnuaia thawk ka ni ve lo ania,bakah tunah chuan Hotel a ni lo a,I Staff pawh nise a mimal nunah inrawlh tum miah suh…’ a ti leh hmuk.A sawi dik,mahse ka kalsan dawn hauh lo.

‘A tha alawm,I thlah duh loh miau te chuan…’ ka ti a,ka kekawr ipte ka zen thun bawk.

‘Good,ka zah viau nang chein kalsawn tawh rawh,min tibuai ania’ a nui a.Tluangpuii ka en a,a hmai a dang lap a,hlauh a nei tih a hriat theih.

‘Tibuai..Dik chiah..Mahse, ka hmuh dan chuan i bialnu hian a duh ve vak lo che a ang’ ka nui hawk bawk.

‘Maw?”

‘Ka hmuh dan chuan i duh ang kha ani hian a duh ve lo..’

‘Zosangkim,I nihna hre deuh teh’

‘Tunah tak chuan nihna hai chu kei ni loin nangmah zawk kha..’ ka ti leh hmuk.

‘Aaaah,hetia i lo hausak tak thut avang hian min khing phakah i lo in ngai tihna mi?”

‘Ka sawi nawn leh ang,Tluangpuii kha thlah rawh’ ka ti leh a.

‘I zak lo hle mai…’ a ti tuar.Mahse, Tluangpuii a thlah ta thung.

‘Lo zuk kal rawh…’ Tluangpuii hnenah ka ti sup.Zanin chu a tawp thlen law law ka duh tlat.

‘I ngam anih chuan kal ta che’ hmuhsitna a awah a lang chiang viau.Tluangpuii’n min rawn en a.

‘Kal rawh,ka lo chingfel ang…’ ka ti nghut,kal duh ,kal hreh si niawm takin a tawi khawmuang a,engvanga han hlau em em nge maw anih hrep ni??

‘Kal rawh..’ ka ti nawn leh sup.Mahse, a te leh thawt,a te thawt rual deuh thawin ka bek a ri chawrha,ka lu a hai nghal mawp bawk.

Ka inher vat,min rawn hnek nawn leh tuma a rawn vai fua chu ka hmu hmana,ka thle sawn zauh,mahse min hnek thawi thuak tho.A insiamrem leh a,a ban a rawn vai leh fua,mahse ka kut a phe zawk,a khabeah tak ka hnek fuha,a pai nghal chawn bawk.Ka hnaihchilh nghala,a insiamrem hun ka nghak a,a din ngil veleh ka hnek nawn leh chawrh.Inchung tlak dal an siam a bawh phei rawk bawk.Ka hnek na thawkhat tih ka hria.

‘Ding ngil rawh,a tawp thleng law law teh ang’ ka ti a.Ka aw a ring lo,mahse a hria ang tih ka chiang.

A rawn ding ngila,hnaih tawh lo in ka dinna ngaiah ka ding thung.A che thuta,min rawn bawh titih,mahse engemaw tak a ti dawn tih ka hriat lawk avangin ka tawlh sawn zauha,a bekah ka hnek leh chawrh.Hma zawngin a tlu thlawp bawk.Ka pan hnai a,mahse ka beisei loh lutukin kan inkarah Tluangpuii  a rawn tla zepa,ka kawngah a rawn kuah a,ka awmah a hmai a phum nghal  kak bawk.Mizoah chuan Palian pawl ka ni ve a,Tluangpuii nu tawk pangngai tak a ni chungin kan in sanhleih viau tho.Kuah let ve loin ka din ngaiin ka ding ngur ringawt.A vawikhat nan ka hamhaih ve pawh a nimahna.

‘Khawih tawh suh.Khawngaihin…’ a aw a khur dar dar bawk.

‘I duhdan anih chuan….’ Ka ti sup.Dik tak chuan khawih zui tumna ka nei lo hrim hrim.

‘I that mai ang..’ a ti tham leh tiak.

‘Thih puina tham a ni lo ang’ ka ti sup.

‘Haw ka duh ’ a ti leh sep. Ramdinsanga tlu reng chu ka en a.Chuti taka na a nih ka ring lo,a tho ngam lo mai zawkah ka ngai hmiah.Hman atang khan vau pung na satliah,mahni aia hnuai hmusit thei tak leh hnung lama mi bei ngam tawk leka huaisen a ni tih ka hre daih tawh.

‘A tawp nan ka sawi leh ang,Tluangpuii bulah ka hmu leh che anih chuan a pawi khawp ang,Ka Staff anihna ang ni loin ka humhim zel tawh dawn avangin ka hrilh che anih chu’ ka ti leh a.Min chhang lo mahse a hre chiang tawk tih ka hria.

Inhnuaiah ka kaithlaa,Zothani ka zawnga.Ka hmu mai lo,Remruati ka hmuh veleh ka pan pheia.Tluangpuii kut ka chelhna ka thlah chuang lo.Zothani awmna ka zawta,a hre lo.Khawiah chuan a kal ni maw? Pawi lo,Tluangpuii ka Drop anga,ka let leh dawn tho.

Ngawirengin Motorah kan chuang duna,biak hlau niawm takin Pawn lam hawiin a thu a,a mal chungah a kut a daha,a hum kawp tlat bawk.

‘Nichin kha ka lawm lutuk aw ’ reife kan tlan hnuah a rawn tichhuak hlawl.Nichin lawka zam leh hlauhlawpa ding kha chu a ang leh tawh lo.

‘Engvangin nge a rualin i kal?” ka ti hmuk.A lawmthu sawina ka haider hmiah bawk.

‘Ka thian ania…’

‘Thian,a ropui hle mai…’ ka nui lui hawk bawk.

‘Nia,ih..Khatiang kha a ti ang tih ka hre lo a’ a ti leh a.A aw a dam thlap bawk.

‘I hre chiang viau turah ka ngai’

‘Hre chiang emaw ka inti a,ka lo hre chiang lo anih ka ring’ a ti leh sap.

‘Anih chuan ka lo tel ve kha a pawi ta viau tihna ni em?” ka ti leh hmuk.

‘Chutiang zawngin ka sawi lo,ka lawm ka tih tawh kha’ a ti leh nghat.Eng vanga vawt raih reng nge maw anih hrep ni??

‘I hnaih tur chi Mipa a ni lo’ ka ti leh hluk.

‘Ka hria alawm…’ leh lawi si chuan..

‘Anih chuan engvangin nge Party naah i zui si a?”

‘Ka thian ka tih kha…’

‘Ani kha chuan ka bulah a bialnu thar a hruai tih a sawia’

‘A dik lo chuang hleinem…’ a ti sap.Steering wheel ka hmer nghek thung.A tawng hi engmah a in mil miah lo.Amah leh amah a inhnial kual vel mai mai ni berin ka hria.Mahse, ka buaina tur a ni lo..

‘Ropui hle mai….’ Bul zetin ka ti hmuk.

‘Min hre thiam la,sawi tawh loh ka duh …’ nghet charhin a ti leh a.

‘Engvangin  maw? I duh chuan min Share vek thei a’

‘Aih,ka…ka,eng lo..Ka thian i ni lo a,ka Boss i ni a…’ a ti bah nak mai.

‘Theihnghilh teh..’ ka ti hmuk.

‘Ka theihnghilh vangin i nih loh phah chuang hleinem….’ a ti leh khauh.

‘Ok,a tha alawm…Mahse, I bulah ka hmuh tawh loh ka beisei ‘ ka ti leh a.A thaw hak mai.

‘Khawgaihin thil pakhat ka ngen duh che,ka mimal thilah hei bak lo inrawlh tawh suh’ a aw a ring lo,mahse a chiang fek fawk lutuk.

‘Lutuk…Inrawlh chakna ka nei lo.I lo ngai kawi anih ka ring.Dik tak chuan nichin ang khan tu hmeichhia pawh hmu ila ka chhan vek ang’ ka ti duah.Mahse, ka chhungril hian engvanga lo inrawlh nge ka nih a hre chiang lutuk tlat.Amah anih vang a ni tlat.Chu erawh ka induhtawkna vang tal pawh hian a hre ngai lo ang.Ka duh phawt chuan hmeichhia,min hnial ngai hauh lo tur an tam lutuk..

‘Min chhan vang khan ka lawm e ’ a ti leh nghat.Ruata thil sawi ka hre chhuak zawk.’Hmeichhe dang ang a ni lo,amah a indang ping thiam lutuk’ a ti anih kha.A sawi dik thlap. Ka Phone a ri a,min rawn call tu ka en a.Zothani..Min zawng a ni ngei ang.

‘Hello..’ zangkhai thei ang berin ka ti sup.

‘Ka hmu lo che a…’ a rawn ti lang lang,Music ri ka hre thei bawk.

‘Um,ka chhuak lawk..Ka rawn let har lo ang’

‘Maw? Pawimawh a awm tihna mi?” a rawn ti leh hliai..

‘Aih,pawimawh lo..Ka chhuak satliah,Ka rei lo ang’ ka ti leh sup.

‘Ok..Ka lo nghak ang che,Bye’

‘Bye ‘

An in kan thlen thlengin vawikhatmah kan tawng ta lo ve ve.

‘Ka lawm takzet’ an in kawt kan thlenin a ti leh sap.Chhang loin ka bu nghut thung.

A chhuk fel chiah tihin ka Start a,chak lutukin ka tlanchhuak nghal zawk bawk.Ka thinrim chhan ka hre lo,mahse ka insehruh teuh thung.A mimal thila inrawlh tawh lo turin min ngen anih kha..Lutuk hian a..Ka inrawlh hauh lo,chhan ngai ni a ka hriat avangin ka chhan mai zawk.A hrim hrimin eng hi nge maw a han chapo pui em em ni?

Ka thlen veleh Zothani ka call a, ka lut peih tawh lo.Haw a mut vang vang ka duh zawk.Reivak loah a rawn chhuaka,Beer kha a in nual a ni tih a awm danah ka hre thei.A tawng siam siama,achang leh min rawn nek leh ar ar thin bawk.A thusawi ka aw liam satliah mai mai.Ka mitthlaah Tluangpuii hmel tak ran a lo langa,Ramdinsanga khawih kha a duh miah lo.Mahse, a bialpa a ni tih a pha leh chuang si lo…Hrep tak hian…

‘Ngatinge?” ka mala rawn hmer salh pahin Zothani’n a ti a.Ka en vat.Mak tih hmel zetin min lo en ve bawk.

‘Sorry…’ ka ti sup.

‘A pawi lo,mahse..Kan In i tlanpel daih ania’ a ti a.Ka thaw hawk mai.

‘Aaah,ka Inah i lo kal zawk ang chu ka tia’ ka ti nghut.Ka nui lui hawk bawk.

‘I chiang chiah maw?”

‘Um…Ngatinge?”

‘Ka hre lo,I hmel a dik lo ka ti..’

‘Ka lu a na…’

‘Maw? Ngatinge i sawi vat loh?” a ti leh hluai.Ka nui leha,a na lem lo.Na lo pawh a ni chuang lo,ka mihring vawt raih reng mai kha a tin a vekin ka hria.

‘I rilru a nuam lo dawna..Ok,anih chuan ka Drop ang che..’ ka ti leh a.Motor ka herh kual pawp bawk.Zan reh tawh a ni a,Signal pek kual vel a ngai lem lo.

‘Mahse,I Inah ka lo kal….’

‘Ka lu a nuam loa,bakah zingah chhuah hma ka ngai dawn tih ka hre chhuak chiah…’ ka mit ka siai zauh bawk.

‘Um..Pawi lo’ a ti hmak.A lungawi lo tih ka hria.Lungawi lo mai mai tehse,zanin chu phurna ka nei lo mai pawh ni loin ka vawt vek zawk.

Mu thei loin ka let kual sek.Engvang nge ka hria,mahse hriat ka duh lo bur.Ka hnuaia thawk a nih mai bakah Ramdinsanga hmeichhe khawi lai a la ni zui..Ka dik lo hulhual,Ruata khan hmeichhia anga en chhin turin min ti kha ania.Ka en nasa ta mah mah anih hmel..Ni lo,a chanchin khawngaihthlak tak tak ka hriat avangin ka lainat zawk pawh a ni thei.Kei ang bawka nasa taka fight ve anih vang pawhin ka lainat a ni ngei ang..

Officeah a tul tawpah lo chuan Tluangpuii ka be ngai ta meuh lo.A hma ang bawk khan hna thilah bak ka be ngai lo.A tihsual sawisel tumin ka chang ran emaw tih mai turin ho te teah ka khak ngun ta viau bawk.Mahse, lungawi lo hmel a pu ngai chuang lo.Tha takin ka duhdan in a ti tha leh mai zel.Mahse, chu tak chuan min ti thinrim ve thung.Min hnial let se,inhau ila ka ti nge pawh ka hre thiam bik lo.A vawt raih reng a,hna a thlen hunah tak a lo thlenga,tlaiah haw hunah a haw leh mai.Engmah dik lo a awm lo,mahse keimah hi ka dik lo..Ka hmuh apiangin lang cool raih ziah mahse CCTV record erawh chuan thil dang daih min hmuhtir ziah thung.Hna tul lam thil en tum siin ka awm loh laia a awm dan ka en leh nge nge zel.Engmah dik lo a awm lo,keimah tih mai loh chu..

Zothani nen kan inkawp hnuah pawh hmeichhe dang ka kawp zauh zauh tho,mahse chutianga zan khat lek kawp tur atan chuan Tluangpuii hi ka duh leh miah chuang lo..Huizzz,eng ka ti zo ta nge mawni?

‘Ka hriat hi a dik em?” Zothani’n a ti a.Ka melh zawk,ka Office chhunga inleng kawmna tur thutthleng awmah thatchhe zetin a thu a.A phone a en bawk.

‘Eng nge anih ka hriat loh chuan a dik leh dik loh ka sawi thei nang’ ka nui a.

‘Hman zan Party naah khan Ramdina leh mipa pakhat an insual a..’ min en reng tih ka hria.

‘Chuan…?” ngaipawimawh lo hmel zetin ka ti liam puat.

‘A insualpui pa chu nangmah i ni a’

‘Sawi zel la…’ ka ti leh a.

‘Thu tak teh,Remruati’n msgah hian a rawn sawi ania’ a ti hmak.Muangchangin ka hawi chhuaka,ka en a.A ngaihdan a ni lo tih a hmelah a lang thei.

‘Engtia thutak turin nge min duh?” ka ti sup.

‘An sawi hi a dik em?”

‘Aw…’ a thaw hawk mai.

‘Mahse, ngatinge?’

‘A tul vang…’

‘Chu chauh chu maw?” a ti leh halh.

‘Aw..Chu zawng chu’ ka ti leh hmuk.

‘Mahse, ka hrethiam lo…Insual kher enge ngai le?” a ti leh a.Ka then suk.

‘Mipa chuan insual chang kan nei ve bawk ang chu,Hmeichhia mah an insual ania’

A la lungawi chiah lo tih a hmelah a langa,mahse ka ngaipawimawh lo.Kan insual chhan kha sawichhuah leh pawh ka duh hek lo.Atthlak lutuka mi kara tla zep ka ni a,ka ti nawn leh dawn hek lo.

Thil ei turin kan inzui chhuaka,Tluangpuii leh Julie, Coffee machine bula an lo ding dun ka va hmu a.Mahse,ka hawisawn lehnghal mai.Min hmu ve em ka hre lo.

‘Tluangpuii…’ an dinna bul kan thlenin ka ti sup.Rang lutukin a rawn inhera,amah si deuhthaw a Zothani lo ding a tauh chawrh,Zothani kawr hmaah tak a Coffee ken lai a baw nghal zawih bawk.

‘Awi…Ka tihpalh lutuk…’ inthiam lo lutukin a ti a.A aw a lawi rat mai.

‘I fimkhur thei lo tihna mi?” Zothani’n a ti that,Tluangpuii a phu zawk tih ka hmuh hmaih hauh lo.

‘Ka tihpalh lutuk..Ka lo tifai ang.’  Tih pahin a kekawr ipte atangin Hanky a phawrhchhuaka.Zothani kawr hma hruk tumin a bana,Mahse a kut a vai per sak lawp.

‘Min khawih suh,tlaw lutuk mai..’ a ti leh that.

‘Duhtawk la, a tihpalh anih kha…’ ka ti sup.An pahnihin min rawn en rual thawt.

‘Mahse…’ a ti hman a,ka hmelah sawi zui ka duh lo tih a hmu a ni ngei ang.Sawi zawm loin a ngawi ta daih.Tluangpuii ka en a,hnuai lam a bih ran mai.

‘Fimkhur tawh la a tha ang,tiang kha kan mikhual emaw kan inleng tuma chungah thleng lo se ka duh ania.A chiang em?” ka ti hmuk.

‘Ok.Sir,ka lo fimkhur tawh dawn nia.Ka tihpalh takzet’ a ti sep.A inthiam loh zia a hmel fai zetah chuan a lang chiang ngang mai bawk.Khawngaihthlak reuh hian a..

Kan kalna tur ka hrilh a,vawiinah ka let leh tawh lo ang tih ka sawi nghal bawk.Min chhang loin a bu nghat.

‘Kha nu kha ka ngai na lo,amah pawh hian min ngaina miah lo tih ka hria’ Motor chhunga kan luh veleh a ti hmak.

‘Tu? Tluangpuii maw?” ka ti nghut.

‘Aw.Ani lo tu nge ni ang? Mi fel tak niin ka hre lo reng reng’ a ti leh hmarh hmarh.

‘A hna ber a thawh that chuan a mimal nun lam chu a thu a ni ang chu’ ka ti leh a.Motor ka Start zui zat bawk.

‘Engvanga tan tlat nge i nih?” a ti leh hmak.Ka melh zawk.

‘Ka tan pawh ka lo hre hleinem’ ka ti satliah.

‘Dik lo a awm’

‘Sawi la…’

‘I hre reng..’ a ti ve thung.

‘I sawi loh chuan hre nang…’ ka nui hawk bawk.

‘Tluangpuii number kha min pe la,ka vin deuh vak bawk sia.Thupha chawi ka duh..’ awih lo lutukin ka en a,mahse a hmelah a ti tak tak tih a lang reng.

Hotel ka thlenin Tluangpuii thutna a lo ruak a,Dawhkan pawh a felfai thlap.Hnathawhna lam kaihhnawih engmah hmuhtur a awm lo.Sana ka en a,Dar 11 a ri tawh.A chawl pawh a ni maithei.Mahse, a chawl anih chuan Julie tal a thu ziah.Tu mah mah an thu lo ve ve.

Ka Officeah ka lut a.Chairah ka thu a.Computer ka On a,Tui lak tumin ka tho dawna,mahse Pen stand a Envelope niawm tak in delh bet in ka mit a la chat.Ka bana,Envelope a lo ni ngei.A chhunga awm ka lachhuaka..Ka pawtpharha,thil inziak ka chhiar takah chuan ka rum hawk mai..

Chapter- 8

Office pawnah ka chhuaka,na zetin kawngkhar ka khar bur bawk.Phawk zetin Julie a rawn hawi a.Min hmuh rualin a ding vat.

‘Khawnge Tluangpuii?” ka in Control hle chungin ka aw a chang lam mah tho.

‘Ka..Ka….’ a sawi zawh hmain ka ban ka vai kual thuak.

‘Angai lo,ka call mai ang’ ka ti leh hmuk.Ka Office ka pan leha.Dawhkana ka Phone dah ka laa,Tukverh lam ka pan pheia,ka call hmain in Control tumin thawk ka la vang vang phawt.

A ring ral thak,ka tinawn leh a.A pick chuang lo,eng chu nge maw a hriat hrep ni? A duh duh huna bang thei a ni lo tih a lo thawhtirh khan a hre chiang lutuk tlat.Julie-in engemaw tal a hriatpui ngei ang.Mahse, ani zawh a tulna a awm miah lo.Ka phili lutuk pawh hi ka in control angai.

‘Julie..’ Room kawngkhar atangin ka ti a.A rawn hawi vat.

‘Aw..Sir’

‘Tluangpuii hi ka be tlang thei lo a,lo try ve lawk mai’ pangngai thei ang berin ka ti sup.

‘Aw le,be tur chein ka ti dawn em?”

‘Aw,min lo call rawh se’ ka ti nghut.Mak takin Tluangpuii lo kal loh vanga mak ti hmel a pu miah lo.Staff zingah chuan Julie hi a kawm nasat ber a ni a,mahse engmah a hrilh chuang lo anih hmel.

Reivak lo hnuah Julie a rawn luta,a call tlang thei lo tih a rawn sawia.Ka ner nawk mai.Eng nge maw a hriat hrep ni? A ban duh chhan a ziah lah kha Family lam buaina tiin a ziaka.Engmah buaina tur an nei lo.A nu an buaipui ber thin a Boral tawha,engmah han buai chiamna tur a awm lo tawp ang.

Thu mu chungin Tv ka en a,pawn lamah ruah a sur a,thli a tleh vuk vuk bawk.Ka phone a ri a,ka en vat.Ka Contact list a mi a ni lo.

‘Hello..’ ka ti hmuk.Mahse, a reh vang vang.’Hello’ ka ti nawn leh a.Engmah chhanna a awm lo.Tu chu nge maw ni a? Ka Off a.Atthlak zetin ka ngaihtuah naah  Tluangpuii a lo lang a,vawiin khan vawi engzat nge Call ka tum ka hre seng lo, chawhma lamah kha chuan a tlang a,a pick lo.Chawhnu lamah erawh Switch Off a in tita thung.A chhan hre turin an Inah kal mai ka duh a,mahse ka chapona in a tlin ta ngang lo.Bang duh na na na chu bang mai tehse.Midang an awm lo pawh ni hlei lo.

Ka phone a ri leh a,ka en vut.Tun lawka min rawn na number bawk kha..

‘Hello…’ ka aw a nem fahran lo viau.

‘Sir…’ a aw ka hriat rualin ka thu mar nghal zawt.

‘Khaw nge i awm?” ka ti nghal vut.

‘I Gate bulah hian ka awma,ka lo lut lawk thei angem?”

‘Lo nghak rawh’ ka ti leh hmuk.Phone ka off a,hmanhmawh zetin inhnuai lam ka pan thlaa,tun ang ruahsur leh thli tleh karah hian eng nge rawn tih a tum ang ka hre thiam lo.

Gate bulah a lo dinga,nihliap a khum nangin a huh nasa hmel viau tho.Gate ka hawn saka.

‘Lo lut la’ ka ti nghut.Ngawirengin min rawn zui luta,a hmelah vei lianpui nei a ang viau.Nia,engemaw pawimawh tak lutuk thil a awm ang,chute nilo se hetah a lo kal miah lo ang.Khawiah nge Buati’n towel vel a dah ka hre lo.Mahse, ka Roomah chuan a awm nual.A inhru hul vat anih loh chuan hritlang a kai ngei ang.

‘Kha inhru hul rawh’ tih pahin Towel ka pe a.

‘Aih angai lo…’ amak talh thei teh e.

‘La rawh…’ ka ti leh hmuk.A la ta nge nge.

‘Thu la’ ka ti leh sup.

‘Aih,ka hnawng deuh chuap bawk sia’ a thensak bawk.

‘A pawi lo,thu rawh..’ ka ti leh a.Ngenna ni loin thupek a ni tih ka awah a lang chiang viau.Min hnial tum niawm takin a ang ziaua,mahse engmah sawi loin a chip leh hmak.A hnaih ber Chairah a thu thlaa,a kawr huh a hru pah niap niap bawk.

‘Eng lo,ka lo kal chhan tak chu ka Banna lehkha ka ziah kha…’ sawi zo loin a ngawi leh rih.Engmah sawi loin ka en a,a sawi leh tur ka nghak a ni mah zawk.

‘Kha kha..Ih,ka dah leh lo angah min ngaihsak thei angem?”

Ka inrin hmain ka nui chhuak hawk mai,eng hmuhin nge maw min hmuh hrep ni? A duh leh a bang anga, a duh loh leh a bang lo anga.Chu chu a sawi tumna niberin ka hria.Mi a ah min ngai nge mawni zawk ni?

‘I duh lova,I bang ni turah ka lo ngai a’ ka ti hluk.

‘Aih,ni lo…aw..’ a ti bah nak.A sawi tum ka man hlawl lo.

‘Enge sawi i tum ber?’

‘Ka bang thei lo tih ka hriaa’

‘Tunah i hre chiah tihna mi?” ka ti vawt ruih.

‘Aih,ni lo…Mahse….’ Beidawng hmel zetin a ban a phar hliai bawk.

‘Ramdinsanga vang a ni em?” ka sawi zawh rualin rang zetin min rawn en a.

‘Aih, ni lo…Ngatinge ani vang anih ang?”

‘I hre zawk ang chu,bakah i mimal thil ania,lo inrawlh na tur ka nei hleinem’ ka ti leh hmuk.

‘Ka bang thei lo…’ a ti leh tawp.

‘A pawi ka ti,I banna kha vawiinah hriatchian duhin ka rawn call che a.I pick lo,harsatna enge i neih tih hriat ka tum bawka.Mahse, I pick duh miau loh avangin engmah sawipui theih che ka nei lo.Chuvangin engmah sawitur a awm tawh lo’ ka tita duah.

‘Sir,Khawngaihin….’ A hmui a peta,tap mai tur a ang.

‘I tih hma khan enge i tih i hre chiang hmasa tur asin’ ka ti leh nghut.Ka tho a, kawngkhar lam ka pana,a chhuahna turin ka hawnsak nghal zat bawk.

‘Sir…’ a ti leh sap.Mahse, engmah sawi loin Kawngkhar lamah ka thle buk ringawt.A duh leh abanga,a duh leh a thawk anga…Teuh lo mai.Chutiang mai mai a awlsam a ni lo.A lakah that ka chhuaha, ka thatna ka lantir vangin a duh duha min hman tangkai a tum anih chuan pawi a la ti hle ang.

Ka Phone riin min tiharha,ka ban vat.Min rawn call tu ka en a,Ruata..He pa lah hi a..Zing karah lo hian min rawn Call thei lo emawni??

‘Eng nge?” ka ti hluk.

‘Ka msg en vat teh’

‘Maw?’

‘En la animai’ a ti leh a.

‘Sawi mai teh,ka lu a na lutuk’

‘Nizanah hmeichhe pakhat Motor sut niawm tak an chhara,a sutu an hre lo.Amah hi chu Tluangpuii an ti a..’

‘Maw?” ka ti tuar.Ka thuchhuak nghal zawk bawk.

‘Tluangpuii ka ti,Photo engmah a awm lo nangin a Address  velah hian amah a ni tih a chiang a.Tukin zing tawngtai inkhawm kal tur ten an hmu a.A bagah a Id a lo awm hlauha..’ a ti leh a.Ka vawt vek in ka hria..

‘Khawi damdawiinah nge an dah?” ka theihtawpa pangngaiin ka ti a.An dahna a rawn sawia,engmah thildang a hre chiang bik lo tih a sawi tel bawk.

‘Kal ang.. Lo insiam rawh’

‘Tunah maw?” mak tih hmel zetin a ti hu.

‘Aw,tunah..A nau kha a lo mangang viau maithei ania’

‘Ni tak,Ok..Min rawn lam phei la’

Darkar chanve a liam leh meuh chuan Damdawiinah kan awm hman tawh.A nau leh a Nutei an lo awma,eng nge chanchin ka zawt vat.A la harh lo,a malpui ruh a tliaka,thisen a hloh hnem avangin thisen an pe a,pek belh leh angai maithei.A kawchhung lamah dik lo a awm em tih erawh engmah an la hre thei lo.Amah ber engmah zawh theih a nih loh avangin thil thlen dan an la hre thei lo tih a sawi bawk.

‘Police lam in an hria em?” Tluangpuii nau hnenah ka ti a.

‘Aw,hria..An lo kala,mahse engmah han tih vak dan a awm lo a’ rilru hah hmel zetin a ti hap.

‘Ka kutah dah rawh,keiman ka lo enzui ang’ ka ti a.Hnem nan a darah ka beng thak thak bawk.

‘Kan tibuai thei hle mai che,mahse diktak chuan ka tlaw lutuka,ka u ah hian ka innghat nasa a..’ a lungchhe deuh tih a awah ka hre thei.A demawm loh.

In lama let tawh loin Hotelah ka kal tlang ta zawk.Ka ngaihbel nge ka hre lo,ka awm ve khan a Nutei leh a nau kha thlamuang sawt hmel an pu a,engemaw tihngai a awm pawn kei leh Ruata kan che hmasa zel bawk.Kan thlen hnu feah Ramdinsanga a rawn thleng ve a,Tluangpuii nau nen an inbiaa.An inhre tha thawkhat anih hmel.Vawikhatmah kan inbe lo thung.

Ka rilruah Rocky a lo langa,min pui thei ngei ang.Aruata pawn a thei ang,mahse Rocky a tha zawk ang tunah chuan..Ka Office tukverh bulah ka dinga,ka phone ka phawrha.Rocky ka call nghal zat.

‘Hello…’ zangkhai zetin Rocky-an a rawn ti a.

‘I buai em?”

‘Aih,buai pawh ni ila nang i nih chuan ka buai ngam nang’ a nui kar kar.Za lo zetin ka then ve suk bawk.

‘Nizanah ka Accountant Tluangpuii kha tu tih hriat lohin an su a’ ka ti tawng.

‘Eeh..Kha kha amah alaw? Kan Area a ni lova,mahse Groupah an sawi a’ a rawn ti nghal hluai.

‘Aw,amah…’ ka ti hmuk.

‘Ok..Engemaw tal hriat theih in nei em?” a rawn ti leh a.

‘Aih,amah hi a la harh lo a..Ka mamawh che ania’ ka ti leh a.

‘Um..Ka theihtawpin ka lo ngaihven dawn nia’ a rawn ti a.

Phone ka kekawr ipteah ka thuna,Kawngpui lam ka thlir thlaa,nidang ang bawkin Motor a khat vek.Eng nge ka tih leh ang ka hrethiam lo.Mahse, thil pakhat erawh ka chiang,tu tih nge ka hriat hma chuan ka awm mai mai dawn lo.Nizana ka hawtir hun kha dar 9 vel bawr a ni a,Doctor khan Accident a tawh hun erawh zing lam dar 3 vel niin a sawi thung.Hei pawh ka chiang,ama fimkur loh avanga Accident tawk a ni thei lo hrim hrim.Chutiang khawpa che fimkhur lo a ni lo.Mahse, nizan khan a awmdan a dik lo.Banna a thehluta,a bang leh duh lo tih a rawn sawi leh lawia.Engmah kha a dik miah lo….Ka Phone rik rualin rang zetin phone ka en a.Rocky emaw ka tih laiin Zothani zawk..

‘Hello..’ ka mood tilang lo turin ka insum viau.

‘Chanchin ka lo hriaa,khawiah nge i awm?” Zothani’n a rawn ti a.

‘Hotelah..’ ka ti nghut.

‘Ka lo kal dawn asin..Remruati Studioah ka awm a’ a rawn ti leh a.

‘Um,lo kal la..’ ka ti sup.Ka chhungril erawh chuan lo kal lo se a duh zawk.Mahse, tul miah lova a rilru tihnat sak kher a ngai lo.

‘Damdawiin i kal leh angem?” a rawn ti leh a.

‘Ka hre lo,lo kal phawt la..’

‘Um..Ka rei lo ang’

Ka Off chiah tihin Rocky-an min rawn call ve nghal zat.

‘Whatsappah khan video clip tawite ka rawn thawn che a.Lo en lawk teh’ a rawn ti a.Eng nge anih pawh ka zawh hmain a off lehnghal daih.

Ka Download chawpa,minute khat pawh tling mang lo niin ka play nghal a,reilote chu engmah awm loin Kawngpui ruak alanga,mahse vawilehkhatah Car pakhat chak zetin a rawn tlan puat.A awmzia ka hre bau lo.Rocky call leh ka tum lai takin amah zawkin min rawn call leh chiah.

‘I en em?” ka pick veleh a rawn ti a.

‘Um,en..Mahse, ka hrethiam chiah lo’

‘Kha Motor chiah kha Tluangpuii Accident lai vel bawra khalaia tlan tlang a ni a.Mahse,amah an chharna hmunah khan CCTV a awm lo thunga.Ani tih ngawt theih a ni lo,mahse kha Motor bak kha han rinhlelh theih a awm lo’ a rawn tita duah.

‘Ok..Anih chuan a Motor kha an zawng hmu thei ang chu’ ka ti a.

‘Um,chu chu tih hmasak ber tur thil ania.Mahse, ka rawn biak duhna che thil pakhat a awm..’ thutak zetin a ti leh a.

‘Sawi la…’

‘Fimkhur thu hlaah tiin Tluangpuii’n nizana a biak ho ka lo enkuala..’ ka hmui ka pet nghek.Nizan khan min rawn call ngei,mahse kha number kha ka nei lo.Adang chu pa hnih ka nei thung.

‘Chuan..?” ka ti sup.

‘Ka rawn thawn zawk ang che,lo en teh’ a rawn ti leh a.

A rawn thlen veleh ka opena.Ka number hriat bel lutuk ka zuk hmu chat.Nimin khan Thuphachawi a duh avangin Tluangpuii number min dil anih kha.Mahse,Thuphachawi tur ni siin dar 11 velah engvangin nge a call ang? A aia hmaah pawh a call thei reng.Ka phone a ri leh kauh.Ka en a,Rocky bawk.

‘Kha number kha a biak hnuhnun ber a ni a.A number neitu kha Zothani a ni bawka..Engtia tih nge i duh?”

Ka chhiar zawh rualin na zetin bang ka beng dawt.Engvangin nge a call ang? A mil loh zia ka hria,mahse hmeichhe thu mai mai tiin ka en liam mai mai zela.Mahse, he thil titu hi anih vaih chuan ka chhuah hauh lo ang.

‘Ka lo bia ang.Min lo nghak lawk’ tih ka thawn let a,a lo kal hunah tha takin ka zawt thei angem ka hre lo hial zawk.

Zothani lo thlen hnuah Julie ka biaa,a pawimawh tawpkhawkah lo chuan tumah luhtir lo tur leh Phone call engmah rawn kal tlang tir lo turin ka ti bawk.

‘A zia lo e..A harh tawh leh tawh loh i hria em?” Zothani’n a ti a.Min ngheng ar ar bawk.Ka ngaihbel nge ka hre lo,Pawi tihna tak tak neiin ka hmu tlat lo.

‘La harh lo.Eitur i duh em?”  ka ti a.

‘Aih,ka rawn ei tawh..I chauh hmel e.I buai a mi?” a ti leh a,fawh cho zetin min rawn en chho ha bawk.

‘Aih, buai vak lo..Thil ka ngaihtuah zawk’ ka ti sup.

‘Eng? Hna lam anih chuan ka puih che i duh leh chuang dawn si lova’ a nui ar ar.

‘Hna lam a ni lo,thil ka zawt duh che’

‘Maw? Keimah hi?”

‘Aw…’

‘Sawi la…’ pawisawi lo hmel zetin min en a.

‘Nizanah engvangin nge Tluangpuii i call?” ka in control nasa hle chungin ka aw hriat a nuam chuang miah lo.

‘Nizanah maw? Eee,ka sawi kha.Nimina ka thinrim chiam avang khan thupha ka chawi duh ka tih kha’ a nui a.

‘Dar 11 velah khan maw?” ka ti leh hmuk.

‘Aw..Ka lo thenghilh daiha,ka hrechhuak thuta’ a ti leh a.Sawi awlsam a tum viau nangin a hmel buai deuh nak ka hmu hman tho.

‘Anih chu..Ngaihdam i dil tak tak nge thildang zawk?” ka ti leh a.

‘Min ringhlel tihna mi?” a ti ram hmak.A tho nghal that bawk.

‘Rinhlelh tura i awm leh awm loh aniang chu’ ka ti nghut.

‘Ka hne tawh,ka hne tawh takzet.He nu hi kan inkarah a tlazep nasa lutuk’ a au titih.

‘I pawi a sawi ka hre miah lo’ ka ti chang fuk.

‘Maw? Nia,I hre lo ang.Ka lo kal apiangin a mitmenga min lawm lohna hi ka hmuh hmaih ngai lo reng reng,bakah nang lahin Staff anihna bakin i care a” a ti leh hmawk  hmawk.

‘Staff zinga tha ber a ni a, ka lo ngaihtuah deuh pawh a ni ang.Mahse, Staff anihna bak engmah a awm lo’

‘Anih chuan engvangin nge Ramdinsanga kha kut i thlak si?”  muangchangin ka en a.

‘A tul vang ka tih kha’ ka ti vawt ruih.

‘A va ropui ve,anih chuan an inkara i tlazep kha a tulna vang bawk maw? A bialnu a ni a, a duh chuan a khawih ang chu.I tel ve enge ngai? Ka haider hnem tawh.Ka hne lutuk’ a ti leh chiam.Eng ang pawn au se pawn lamah thawm a ri chhuak thei lo tih ka chiang.

‘Engmah tih dik loh ka nei hauh lo’ ka ti leh sup.

‘Anih chuan a nu borala i buaipui ang khan i Staff dangte chhung zinga mi an boralin i buaipui em? Aih,buaipui lo,a Loan rulhsak tuma i buaipui ang khan i Staff dangte loan rulh theih leh theih loh i buaipui em?” a ti leh nghek.

‘In sawifiah ka tum lo hlauh..’ diktak chuan sawifiah leh tur chuang a awm lo.Ni e,he hmeichhe ngeng leh induhtawk lutuk ZOTLUANGPUII hi ka Staff anih ang mai ni lo thildang vangin ka buaipui..Haider tum mah ila a theih loh..

‘Zosangkim,ka hua che…’ min rawn bawha.Tih let ka tum lo,ka dik bik tlat lo.

‘Ka haw lutuk che,hei hi hre rawh.Nizan khan ka call ngei,thuphachawi maw? A teuh lo mai.A kalsan loh che chuan ka that ang tih ka hrilh..’ a ti leh a.Min rawn ham tumin min rawn bana,a kut ka mansak a,ka kuah bet nghal bawk.

‘I tih a ni em?” ka aw a ring lo.

‘Ni lo,mahse thi se ka ti lutuk…’ ka kuahna ka thlaha,ka kekawr ipte zenin ka ding a.Ka chhungril sahal huam huam Control tumin ka kut ka humruh tlat bawk.

‘Chhuak rawh..’

‘Mahse, kan tawp ngawt thei lo…’ a tap ta hlap hlap.

‘Chhuak rawh..’ ka tinawn leh sup..

Chapter- 9

‘Min ngaidam rawh.Kha tiang sawi kha ka tum tak tak lo..Ih,ka thinrim a…’ ka kawr banah a rawn pawt a.Dimtein a kut ka dahthlak sak ve thung.

‘Ka hrethiam che,mahse kal rawh..’

‘Anih chuan kan tawp lo ang tiraw?” a ti leh a.Beisei nei zetin min melh kar bawk.

‘Thian kan la ni zel ang chu’

‘Aih,thian nih ka duh lo..

‘I thu thu le,kal tawh rawh’ ka ti leh a.Ka aw ring lo mah se min hnial loh a finthlak zia hretur khawpin kan inzui rei tawk tawh.

A chhuah veleh Chairah ka thu hnawk,engtin nge kha lehchen kha Zothani nihna ka lo hmuhhmaih theih ka hre lo.Kawng tamtakah ka dik lo ve mahna,mahse kan sawi dun thei.Tluangpuii a vau avangin eng thil tha mah a chhuak dawn lo tih ani aia hre chiang lah an awm hek lo.

Thil hriatchhuah ka nei,Nizana min rawn call na number kha tu number nge tih Rocky ka hrilh angai.Kha khan engemaw tal hre turin min hruai thei maithei.

‘Aw,Thianpa…’ Phone a pick veleh zangkhai fein a rawn ti a.

‘Number ka rawn thawn ang che.Nizana Tluangpuii min rawn call na ania’ ka ti a.

‘Ok..Eee,Zothani chu i be ta em?” inthlahrun hmel zetin a rawn ti a.Ka dem lem lo,kan inkawp rei tawh zia hre chiangtu te zinga pakhat a ni a.Ka bialnu rinhlelhawm anga lantir kha atan thil nuam a ni dawn lo.

 ‘Aw,be tawh.Mahse, a biak hun hi dar 11 vel ania.Accident a tawh hun lah dar 3 vel an ti bawk a.A in mil chiah lo maithei’ ka ti a.

‘Ka ngaihdan chiah,mahse Thianpa..I hriat kha,thil thleng thei zawng zawng kan chhui vek thin a,ani pawh kan biak a tul ngei ngei dawna’ a rawn ti leha.

‘Ok,ka hrethiam…Inthlahrung suh,kan tawp tawh’ ka ti hmuk.

‘Oh…A va pawi ve’

‘Hah..Pawi lah lo e,I duh duh titurin i zalen animai’ ka nui lui hawk.

‘Ok..Ok,tak takin tiang khawpa midang i buaipui anih chuan a tawpah ka lo ngai sa ve tawp a’

‘Detective tak hi chu a…Number chu ka rawn thawn ang che’ ka nui leh a.

‘Yes,ka lo check ang..Motor kha hriattumin an bei mek a.A rei lo ang’

‘Thnx..Ka ring tawp che’

‘Ka theihtawp ka chhuah ang tih lo hre tawp mai rawh’ a nui hak hak bawk.

Tlaiah Damdawiinah ka kal leha,engmah hmasawnna a awm lo.Phurhsawn theih se chuan Rinawma enkawl tura dah phei ka duh.Mahse, tunah chuan khawih chet ngam a ni rih lo.Hmuh pawh tum ila kan hmu thei lo hrim hrim.

‘U Sangkim,engemaw tal hriattheih a awm tawh em?” Tluangpuii nauin a ti a.

‘Hre thei chiah lo.Mahse, a rei lo ang’ ka then lui suk bawk.

‘Han hriat thut chuan min den dan a dang duh khawp mai’ a ti leh a.

‘Ka hre thiam che.I u hian hmelma a neihawm i hria em?”

‘Aih..Tumah a inhauhpui ngai pawh ka hre lo,ni lo..Vawikhat chu a insual tak e’ a nui hak..

‘Insual maw?” ka ti hu.

‘Um,kan In kan chhuahsan dawn tum hian ka Patea nupuiin ka nu kut a thlaka,chumi tum chuan a sual let a’ a ti leh a.Thil kal tawh ngaihtuah niawm takin hmalam a en vang vang bawk.

‘A tihtur tak a ti anih chu..’ ka ti sup.A mizia hi ka hriat loh lamah engtak la awm ang maw?

‘Ambie…Eng nge a an?” Hmeichhe awin a rawn ti a.Aw lo chhuahna lam kan hawi rual thawt.Hmeichhe pakhat a lo ding reng tawh,ka hmuh awm ka la hre lo.Tluangpuii nen an inrual vel hmel viau.A hmel phelh phang maiah chuan thlaphanna niawm tak a lang thei a.An Cousin a ni maithei.

‘A la ngai animai..I kal pawh ka ring lova’ Tluangpuii nauin a ti a.A dingchhuak nghal bawk.

‘Aih,ka ngaihtuah alawm…’ a ti halh.Min rawn en a,Ambie-a a en leha.A hmelah zawhn nei hmel a pu bawk.

‘U Sangkima anih hi,ka u Thawhna Hotel neitupa.Chuan,hei hi Zartei ania.Ka u Best,vawiinah a rawn hawa..’ min rawn en pahin a ti a.Hmeichhe thian pawh a lo kawm  ve ngei chu anih hi..

‘I tha maw?” dinchhuah pahin ka ti a.Chibai tumin ka kut ka pharchhuak nghal bawk.

‘Aw..Tha lawm,I lo awm hlauh chu a van lawmawm’ a ti halh.Engvanga lawmthu min hrilh nge anih ka hre lo.

‘Engmah ka ti hleinem’ ka ti sup.Ka then suk bawk.

‘Aaaa,I ti teuh ang..Sangzuala a lo kal em?” Ambie-a hnenah a tih zawm leh zat.

‘Kal nang,a zin in ka hria’ Ambie-an a ti a.Ka rilruah Tluangpuii chanchin ka chhui lai khan Sangzuala hi a bialpa animaithei tih chungchang Aruata sawi kha a lo lang zawk.Mahse,a nu boral tum pawh khan ka hmu miah lo.Ni lo,ka hre lo zawk pawh a ni thei.Mahse, Party na atanga ka hruai haw khan Ramdinsanga bialnu a ni tih a pha lo leh tlat thung.

‘Zotluangpuii chhungte in awm em?” ICU  kawngkhara rawn dak chungin hmeichhe pakhatin a rawn ti a.Ka pan phei nghal vat.

‘A harh tawh a,mahse chimbuai kan la phal lo a’ ka thaw huai mai.Engvanga lo lawm ve em em ngawt nge ka nih ka hre lo.

Awm ve reng ngawt theih a ni lo tih ka hria.Ka bialnu lah a ni hek lo,Dar 6 velah haw turin ka kalsana,Ambie-a hnenah  chanchin danglam deuh a awm phawt chuan min hrilh ngei ngei turin ka chah bawk.

In ka thlen hnu lawkah Pu Dama’n min rawn biaa.Ka pick hmain ka thil tihtur ka theihnghilh tih ka hre chhuak zat.

‘Hello…’ thatchhe zetin ka ti a.

‘I haw tawh maw?” a rawn ti dam thluam.

‘Um,Inah ka awm..A theih ta em?” ka ti a.

‘Aih,vawiinah ka try nasa khawp mai.A theih loh hlawl’ a ti bung vut.

‘Anih chuan naktukah ka lo try dawn nia.Box a kim em?”

‘Kim e.Ka check tawh.Vawiinah SX-2 leh 4 an chhuaka,naktukah 5 an chhuak leh ang.I lo tihfel theih chuan 1 leh 3 pawh an tlang thei ang’ a rawn ti duah.

‘Ok.ka lo try ang.A him leh him loh lam chu zawh che ka tum lo ania’ ka ti sup.

‘Ngaihtuah suh,I phena ka awm chhung chuan engmah him loin ka thawnchhuak ngai dawn lo tih  i hria alawm’ a rawn ti a.A awah intithei aw a hriat tel theih.

‘Chu vang takin nangmah aia thlan zawk ka nei lo reng ania’ ka nui hawk.Ani pawh a nui ve hak hak bawk.Eng nge a tih theih chin ka hre chiang a,ani pawn enge ka tih theih a hre ve tho bawk.Mahse, keiin ani ka hriatchian ang tluk erawh chuan min hre chiang ve lo tih mai chauh a ni.

‘Anih chuan naktukah an kalchhuak zo thei turah ngai ang aw…’ a rawn ti leh a..

‘Beisei ang…’ ka ti nghut.

‘Lawk,dah mai ka tum a..Tluangpuii kha Accident a tawk niawmin ka lo hriaa..’ a rawn ti leh a.

‘Nia,nizanah mi tu tih hriat lohin a su niawm tak a ni’ ka ti tha ve mai.Engtin nge a hriat ka zawt buai peih lo law law.

‘A zia lo hle mai,amah enge a an a?”

‘A la harh lo..’

‘Dik lo awmin i hria em?”

‘Engti zawngin?”

‘Envangin nge Tluangpuii kha zan dar 3 velah Accident a tawh ngawt ang tih ka ngaihtuaha,nangmah hnaih bertu a ni a,amah atang khan engemaw hriat tuma nawrna awm ta se…’ a rawn tita duah.

‘I sawi tum ka man lo..’ ka ti nghut.Dik tak chuan ka man lutuk zawk,keimah nen a inzawm ngei ang.Mahse, hna kaihhnawih erawh a ni lo.Anihna takah chuan Zothani a tel ve ang nge Ramdinsanga zawkin a khawih ang ka hre lo.Khawihna tur chhan an nei ve ve tlat.

‘Ka sawi tum chu engkim hre tura ngaiin CHOP  ho khan an khawih pawh a ni thei..’ a aw a zawi hle bawk.

‘Ka ring chiah lo,bakah CHOP lam Boss hi Ramdinsanga Cousin ania.Chuan,Ramdinsanga hi Tluangpuii  thian hnai tak a ni thunga,ka sawi awmzia chu a bialpa’ atthlak lutukin ka sawi zawh rualin ka insehruh nghek bawk.

‘Ok..Anih chuan anni chu an tel lo turah ngai ang,mahse fimkhur zual teh.A hma pawh khan Tluangpuii hi i tan a hlauhawm ka tih kha’ a ti leh a.

‘Ramdinsanga bialnu anih vangin maw?”

‘Aw…’

‘A hlauhawm lo turah ngai ang.Hna leh mimal thil chu a hrang alawm’ ka ti a.A rilru tihnawm nan ka  nui lui hawk bawk.

‘Ok..Ka ring che,I tana tha hre tur khawpin i puitling alawm’ a ti leh a.

‘Min ringsual lo ang…’

Muhil lo in ka let tawn sek.Zothani thusawi kha ka bengah a ri nawn tlut tlut bawk.Engtiklai atang khan nge ka ngaihtuah tak chiam ka hre lo,mahse he tiang khawpa ngaihtuah hi ka nu leh ka farnu bak ka nunah ka la nei ngai lo.A dinhmun khirh lutuk vangin ka khawngaiha,chuvanga thil tihsak chu ka ni tiin keimah leh keimah inbum tum mah ila chu aia thuk zawk thildang a awm tih hre chiang bertu chu keimah bawk.

Ka tho leh ta nge nge.Aruata min pek,Tluangpuii chanchin tlangpui a ziahna leh a Phone hman dan ho ziahna ka phawrh chhuak a.Engemaw hmuh hmaih ka nei maithei.Ka hriat bak hi thil tamtak a awm niin a lang tlat.

A bul atangin ka entha leh veka,mahse engmah dik lo ka hmu chuang lo.Sangzuala a tih hi engtiang chiaha kawmngeih nge anih ka hriat angai.Aruata kha Ramdinsanga nen an inzawmna kha min hriatsak turin ka ti a.Mahse, engmah ala rawn sawi lo.Vawiina ka hmuh,Tluangpuii best kha..Tu nge a hming kha? Zartei..Ni dawn tak,a best anih chuan thil tamtak a hre ngei ang.Ani pawh ka zawh chian angai.Mahse, zawt ngawt turin dikna ka nei lo.

Ka phone riin min tiharha,thawhphan pawh awm loin ka thuhhuak nghal vut.Ka phone ka lakanga,min rawn Call tu ka en a.Rocky,tun ang huna in call chu a pawimawh hle tih a chiang.

‘Hello…’ ka ti sup.

‘A hun lo viau nangin i hriat ngai thil a awm..’ inthlahrung aw a hriat tel theih.

‘A pawi lo,eng thil nge?” ka ti a.

‘Motor Accident a awma.Vanduaithlak kan ti dawn nge vanneihthlak ka hre bik lo,a hmunah Motor khalhtu hi a boral nghala’ a rawn ti duah.Eng nge sawi a tum ka man eih lo.

‘Chuan..?” ka ti sup.

‘Lo nghak la,ka la sawi dawn alawm..’a nui leh rih.

‘A landan chuan Motor hi  Tluangpuii Accident lai bawra kan hmuh kha anih hmela.A neitu hi kan hriat dan chuan tuna thi hi a ni lo,mahse a neitu hi kar hmasa khan a zin a.Tunah pawh a lo la haw lo,tuna thi thianpa hi a ni a.An inkawm nasa viau niin an sawi bawka’  ka thaw hawk mai.

‘Nizanah amah tho khan Motor a lachhuak em tih hriat angai tihna ni maw?’ pangngai thei ang berin ka ti a.

‘Nia, chu tak chu..Amah hi Party na leh hlimhlawp bawl ngaina zet mai niin an sawia.Ruih tur anih phawt chuan vuak luhai pawh a duh ang tihtur khawpa rui chhe thei a ni bawk a’ a rawn ti leh duah.

‘A chhungte hnen atangin engemaw hriat tur a awm em?”

‘Awm lo,ti ila amah hi Bairabi lam mi ania.Achhungte chu mifel tak annih hmel,Amah hi awm tha duh lo tak niin  Aizawlah hian a chhungte tel loin in a luaha,a chang leh Damdawi a vawrha,man pawh a tawk zauh zauh.Kei tak hi chuan ka lo hre fuh chiah lo a.A chhungte beidawngin Addict centreah an daha.Mahse, a tlanchhuaka,a tlanchhuah hun hi nimin zingah niin an sawia’ a ti leh a.

Achang hi chuan Police tawngkam hi ka ning thut thin.An hriatchian tawh pawh hi ‘ niin a lang’ tih a ni ziah.Mahse, kan India hian dan engkim mai a siam fel thlip thlepa,midang chungchang fiahna tel lova lo sawi chiam te hi dan hnuaiah chuan thu tling a ni zel a.Mi nawlpui hi kan fin tawk loh avangin kan sawi mai mai a,anni hi chuan engkim an hre chianga.Midang chungchang an sawi pawhin fimkhur takin an sawi zel tih erawh ka hria.Dan an hriatchian lutuk vang a ni ve bawk.

‘Niminah a tlanchhuak anih chuan amah nihna chance chu a awm tho mai’ ka ti sup.

‘Um,awm e..Motor neitu pa hi kan biaa.Naktuk lamah chuan a chiang vek turah ngai ang’ a ti leh a.

‘Ok,ka lawm hle mai..’ ka ti sup.Mahse, ka lawm tak tak em ka hre lo.Tluangpuii thih na ko tlanga dak tura nawr tu anih vangin keimah ngeiin khawih ka chak zek zek zawk.

‘Lawmthu hi sawi thin lo teh,min tihsak zawng zawng ngaihtuah hian ka zak thin ania’ a rawn ti boh.

‘Engmah ka tihsak lo che.Sawi ziah lo teh’

‘Kha kha  nimai.Lawmthu sawi hi a nuam lo ania’ a ti leh a.Ka hrethiam.

‘Anih Mangtha phawt..’ amah bawkin a rawn ti leha,Off ka tum laiin ka rilruah thildang a lo lang zawk.

‘Number kha i lo en thei ta em?” ka ti nghal vut.

‘Aih,ka la check hman ta lo.Naktukah hna hmasa berah ka lo nei dawn nia’ a rawn ti a.An buai theih zia ka hriatpui ve a.Ka thinrim lem lo.

Sana ka en a.Dar 5 a ri tep.Mu tawh loin ka tho ta zawk,Inhnuaiah ka chhuka,inkhelh ka duh viau nangin Inah tih mai ka duh ta zawk.Hman mai theih turin Inah Gym lian vak lo ka neia.Achang chuan Ruata leh Zothani khan an rawn hmang ve zauh zauha,Buati hian a hmang ve bawk.A lian lem lo nangin ka mamawh chu a awmkim vek tho.

Ka inbual zo chiah tihin Ambie-an a rawn calla,ka pick vat.Tluangpuii an zai dawn a lo ni a,hmanhmawh zetin ka inha sawk sawka.Tlanchhuah pahin Ruata ka call nghal bawk.Ka duhzawng neitur hian zamna ka nei ngai lo,mahse tun tum chu mahnia kal ka hreh ve ta tlat !!!

Ka thlenin an lo nawr lut tawh.Ka thlen hnu rei vak loah Ruata a rawn thleng ve a,a hnuah Ramdinsanga leh mipa pakhat,la upat hmel loh tak an rawn thleng veleh bawk.Thilmak em em chu a nu boral khan a Pa chhungte tumah an lo kal lo tih an sawia,tun tumah pawh hian Apa chhungte an lo lang chuang lo.Eng ang Mihring nge annih ang tih ka ngaihtuah lo thei lo.

An zai rei viau,a nau leh a nutei mai bakah a thiannu Zartei an mangang tih an hmelah a lang thei a,sawitur ber hre loin en ngai enin an thu tlawk tlawk bawk.

‘In be lawk ang’ ka bula rawn din pahin Ramdinsanga’n a rawn ti a.Muangchangin ka en a.Eng nge a sawi duh ang ka hre lo.Ka be chak hek lo.Mahse, midang an awm ve a.Lo biak peih loh ngawtna hun a ni lo.

‘Sawi la…’ ka ti nghut.

‘Helamah hian…’ tih pahin kan piah,midang awm lohna lam a kawk zauh.A kal zui nghal a.Ka tho a,ka zui phei ve bawk.

‘Nizan hmasaah Tluangpuii nen in inhmu niin ka lo hriaa’ thutak zetin a ti a.

‘Chuan…’ ngaihsam hmel zetin ka ti liam puat.

‘Engthil sawi turin nge a lo kal?”

‘Kan pa hnih inkar’ ka ti hmuk.

‘Sorry,ka hrethiam..Ka sawi tum zawk chu hna atangin a bang dawn tih min hrilha,mahse engvanga rawn hmu che nge anih ka hre duh a’ ani leh ni lo angin inthlahrung hmel a pu ve tlat.

‘A bang dawn tih a sawi ka hre hleinem’ ka ti sup.

‘A la hrilh lo che maw?” inthup a tum hle chugin a awah mak a ti tih a hriat tel theih.

‘La hrilh lo.Diktak chuan hna chungchang kan sawi a’ ka ti lui leh sak.

‘Anih chu mawle’ awlsam taka sawi tum mahse a harsa a ti tih ka hre thiam tlat.

Engvanga Tluangpuii hna bansan chungchang lo buaipui nge anih ka hre lo.Zothani zawk khan a vau ngeia,mahse chu pawh a Accident zanah a be chauh.Zothani kha chuan a ban leh ban loh a hre miah lo tihna a ni phawt.Min kalsan tura a tihthu kha chu a pha lo.Mahse, a hun a inmil tlat lo.

Darkar hnih dawn an zai hnuah an zo thei ta hram.A zaitu Doctor ka biaa.An zai hlawhtlinga a hriatthu a sawia,Ka thaw huai mai.Nia,thawk huaina tham a nitlat.A thi thei lo bur,a dam hi a tul takzet.Bakah ka chhungrilin ti tura min duh zawng zawng ka tih theihnan hian a dam ngei ngei angai a ni tawp.Cabin ka Book saka,Ruata Patea,Doctor Senior tak a lo ni tawh bawka,Tluangpuii enkawltu a ni lo nangin Ruata’n a biaa.Vanneihthlak zetin kan chang thei ta hlauh bawk.

‘Nang hi i dik chiah loin i hre ve lo maw?” Ruata’n min ti a.Ka melh zawk,chik zetin min lo en reng chu niin.Eng chu a hria ni maw?

‘Engtia dik loh in maw?” ka ti satliah.Ka eitur ka ei zawm mawlh mawlh bawk.

‘Zothani i bia em?” a ti leh daih.

‘Be lo…Ti nge?”

‘Ka zawt mai mai che’ a ti leh a.Ka Plate ka nawrsawna.Ka en a.Thil ei thulh meuhin min lo la en ta cheu.

‘I sawi duh chu sawi mai teh,i ninawm aw’ ka ti hmuk.

‘Zothani nen kan inbiaa…’ a ti boh.

‘Kan tawp tawh tih a hrilh che em?” ka hmui hruk pahin ka ti nghut.

‘Aih,a tap nasa viau.Chu zawng chu’ ka rindan vel chiah.

‘Anih chu,kan tawp tawh’ ka ti leh a.

‘I va ngai awlsam angreng ve mawle.Dik lo niin inhre ve lo mi?” a ti leh hmak.

‘Dik lo a? engvangin maw?” ka nui a.Mahse, a nui ve hauh lo.

‘Tluangpuii i buaipui zia hi kei chauh lo pawn an hria.Mahse,kha lehchen i lo kawp tawh then phah nan i hmang hi a fair lo i ti ve em?” a ti leh duah.

‘Aih…Nun chu tiang vek hi alawm’ ka ti awlsam leh mai.A rum hak ri ka hre thei.

‘Zosangkim,ka thianpa kha i la ni em tih ka ngaihtuah rum rum mai’a ti leh nghauh.

‘Ni,enteh.Tu emaw tihtak zeta ka buaipui hi sual a ni lo.A dik em?”

‘Dik…Mahse, Zothani tan hian a fair lo ka ti mai zawk’

‘Fair leh Fair lo chu keiman ka hria.Zothani mizia i hai palh hlauh ange’ ka ti leh nghut.

‘Hai lo,a rawn tah tak chiamah khan…’a sawi laklawh laiin ka Chair ka nawr sawn,ka tho zui nghal bawk..

‘Hmeichhia te hmanraw thaber i hria em? Mittui..’ ka mit ka siai zauh bawk.

Diktak chuan Tluangpuii vanga Zothani hi kalsan ka ni ngei,mahse chu pawh a thiam loh hmasak vang liau liau a ni thung.Tluangpuii erawh chuan ka lakah ka rilru put ang hi a pu hauh lo ang.Mahse, ka veng ang.Amah tihnat tum apiang ka bei zel ang.A tuar nasa tawk tawh.

‘Phone number kha ka lo en a.Pitar pakhat hminga Book ania,Ani Pitar lah chu nikum khan  a boral tawh a’ Rocky-an a rawn ti a.Ka thaw hawk mai.

‘Anih chuan ava mak awm tehnuaih ve.Tunah a hmangtu a hriat theih em?” ka ti leh a.

‘Aih,a rawn call bak che kha chu kha Sim kha an la hmang nawn leh lo hrim hrim’ ta deuh deuh chuan.Sim card Book nana an hman lah kha Thingtlang lam mi ala ni zui bawk.Tluangpuii nen an inzawmna tur hriatthiam a har viau.

Tluangpuii Damdawiin a awm atangin kar khat a liam tawh.A malpui ruh tliah bak kha pem tenau deuh tih loh chu a kawchhung lamah engmah tha lo a awm lo hlauh.Nitin vawikhat tal ka tlawh ziaha,a harh hnua min hmuh khan min be lo.Mahse ka kal nitin takah chuan kan inkar a danglam hret hret tih erawh ka chiang.

Rocky-an nen kan inbe pawp renga,a chhuitu team lamah Rocky hmelhriat tha tak a lo awm lehzel bawk.Mahse, an chhui viau hnuah pawh Car Accidenta boral kha a sutu a ni ngei em tih an la fiah thei chuang lo.A thianpa an biak lah khan a zin lai anih avangin engmah a lo hre lo.A tawp titih chu a ni der.

‘I lo kal alaw?” min hmuh veleh Tluangpuii Nutei’n a lo ti a.Ka bu nghut.Tluangpuii ka en a,khum lu lamah a lo inkam kanga,min rawn en a,a then sak.

‘In buai em?” A nutei bawkin min ti leh a.

‘Aih,buai lo..A pangngai a ni mai’ ka ti sup.

‘I awmrei hman em? ’ a ti leh a.Tluangpuii ka en vut,a Nutei tur zetin a lo en a.Ka nui chhuak teuh ngang mai.

‘Hman e,haw bak chu ka free tawh a’ ngaihsam hmel fein ka ti liam puat.

‘Athat hlauh chu,Ambie-a hi zanin a rawn tlai deuh dawna,Kei lah inkhawm ngei ngei ka duha’ lawm hmel zetin a ti a.

‘Ka hman alawm,kal rawh..’ ka ti a.Ka kal ngun bawk nen engtin nge min hmuh chu ka hre lo nangin min ringngam tan tih erawh achiang.

‘Enteh…’

‘Ka lo …’

Kan tawng rual thawt,kan in en a.Za zetin a nui a,kei pawh ka nui ve lo thei lo.

‘Sawi hmasa rawh’ a nui khur dar dar.

‘Aih,sawi rawh..’

‘Ka lo ngaihtuaha,I lo kal ziah chuan Zothani a lo buai viau thei a” a tawp lam a zuih ral titih.Engmah sawi loin khum lam ka pan pheia.Khumah ka thu thlaa,a vawikhat nan Hmeichhe hmaah ka zam ve ta tlat.

‘Kan tawp tawh…’ ka ti sup.

‘Maw?” mak a tihzia a awah a lang thei hial bawk.

‘Kan tawp tawh’ ka tinawn leh sup.

‘Mahse…Ngatinge?” a ti leh hliai.

‘Engvangin nge a vau che tih i sawi loh?” ka ti hmuk.A mitah tak ka en a,min rawn melh zawka.A kut zungtangah hmuhnawm a awm ta emaw tih mai turin a kut a en leh daih.

‘Mimal thil ania..Ih..keimah vang anih chuan pawi ka ti lutuk’ a ti leh sep.

‘Nangmah vang a ni lo,tupawh nangmah tihnat tum chu keimah min bei anni zel tawh ang’ ka ti leh sup.Min rawn en vat.

‘Mahse..Sir…’

‘Ka hmingin min ko rawh..I duh leh min u la…’ ka then suk..

‘Mahse….’ a ti leh a.

‘Ka duh che tih sawichhuak tur hian min nawr nawn tawh suh,vawikhat bak sawi ka tum lo ania’ ka ti leh sup.Ka tawlhhnaia,ani erawh ka chet dan tur anghak tawp tih a hmelah a lang thei thung.

A khabeah ka dawma,ka kuaidaka,a biangah a mittui a luang thlaa,Light engah a de deuh sar bawk.A hmelthat zia hi tuman an la hrilh ngai lo anih chuan amah hnaihtu te an a let tawp a ni ngei ang..

Ka kun hniama,a mit a chhing ve thung.A hmui nem thepah dimtein ka zuk si a,min chhang lo..A hmui ka nawr kaua,ka incontrol na a bo lo chauh tawh bawk.

Ka Phone ri avangin ka thlah ta hram,mahse hawi sawn mai loin a samah ka fawp vang vang..

‘Pick la…’ a ti sep.A aw a lawi deuh rat bawk.

Ka tho a,ka Phone ka phawrha,Rocky-a a lo ni a.Kan inhriat hnuah ka huat ber tum a la ni hial ang.

‘Hello…’

‘Khawnge i awm?” a rawn ti lang lang.

‘Damdawiiah…Eng nge nita?” ka ti sup.

‘A that hlauh chu,thil pawimawh lutuk a awm’ a thutak ta viau.

‘Sawi la…’

‘Ka la confirm lo,mahse i fimkur nan..Tluangpuii hian hmelma a nei.Motor khan a su palh lo a,thah tumin an bei zawk..’

Muangchangin ka hawileta.Tluangpuiin min lo en ve ran bawk.A mitmeng lian leh nalh zet chuan ka ngaihtuahna zawng zawng a hmu tlang vek nimaiin ka hre bawk.A hmeltha satliah lo,a hmeltha takzet..A thianghlim ngawih ngawih bawk.Mahse,Tiang khawpa pawisawi lo hmelpu hian engvangin nge Hmelma a neih ang?

 Chapter- 10

‘Ila awm em?” a rawn ti leh a.

‘Aw,sawi zawm rawh’ ka ti nghut.

‘Accident a tawh zana a rawn biakna che number kha vawiinah a in On chiaha,kan hmuhchhuah chu kha Phone kha an lo paiha,a landanah chuan nizan vela paih anih hmel..’ a rawn ti leh a.

‘Chuan…?” ka ti sup.

‘Tluangpuii’n a rawn call che bak kha vawikhatmah hman a ni lo hrim hrim’ a ti leh a.A la mak ta zel.

‘Amah khan he thil hi a hre turah ka ngai.Sawipui la a tha maithei’ amah bawkin  rawn ti leh a.Amak zual ta deuh deuh..

‘Ok,ka lo ti dawn nia..Ka dah phawt’ ka ti leh sup.

Ka Phone ka ak a,engtin nge tihtur ka ngaihtuaha,ka hre lo.Sumdawnna kawnga indawrtur nita zawk ila a zia mahna.Mahse, chutiang a ni lo..

‘Thil dik lo a awm em?” Tluangpuii’n a ti sep.

‘Aih,a tha vek..’ ka nui lui suk bawk.

‘Um..’ a ti leh sap.Khumah ka thu thla ve leha.A kut pa hnih ka vuana,ka lakanga,ka fawp nghal vang vang bawk.

‘Thil zawh duh che ka nei…’ ka ti sup.Tawngkaa min chhang loin a bu nghat.

‘I accident dawn zana min rawn biakna number kha tu number nge?” ka ti leh sup.A hmelah engemaw danglam a awm em tih uluk zetin ka en a.Mahse, engmah a awm lo.

‘Kha number kha maw? Ka Taxi hman Driver ta ania’

‘Maw?”

‘Aw,Driver ta.Ka lo kala,mahse ka Phone battery a low lutuka,a phone ka hmansaka.Ngatinge?” a ti a.

‘Eng ni lo e.I Accident dan kha an la chhui zela,kha Phone kha miin an chhara’

‘Mahse, kei nen inzawmna a nei si lo..’ mak tih hmel zetin a ti leh sap.

‘Um,ka hria alawm.Accident i tawh zana thilthleng kha min hrilh i duh em?” ka ti leh nghut.

‘Eng lai ber? Police ka hrilh bak kha engmah sawitur pawh a awm chuang lova’ a ti leh sap.

‘Police i hrilh kha mawle..’

‘Khami zan khan Party naah kan Bandin kan Perform a,ka sawi awmzia chu i in a ka lo kal khan kan thian pakhatin min chhawk lawk lai ania..Ka haw hnu khan ka let lehnghala.Party kha dar 1 velah a zova,kan haw dawn khan min thlahtu ber tur kha a rui lutuka,Taxi nghah ka tum laiin Party naa kal ve pakhat kha kan veng lama tlan tlang tur a lo nia.Taxi koh mai tur a vang bawk nen an rualin ka haw ve a,a bialnu niawm tak a chuang ve,kan veng lam kan pan laiin an rui bawk nen khan ke a kal mai tumin ka chhuksana..Thui pawh ka kal hmain  Motor tlanri ka hriaa,kawngsir lam ka pana,mahse min rawn pana,min rawn su a..Chu zawng chu…’ a thaw halh bawk..

Ka tawlhhnaia,ka kuaha.Ka awmah a hmai a phum kak bawk.A sawi zawng zawng hi Police lam ho hnena a sawi nen engmah danglam a awm lo.Mahse, Rocky sawi hmang khan Hmelma a nei tih amah pawh hian a inhriaa,chu chu tu nge anih ang?Engmah neih a nei lova,midang tana pawitur engmah a tih ka ring hek lo.Zothani ka ngaihtuaha,kan inthen avangin Tluangpuii a haw hle ang,mahse mi pawh an inthen fova,tualthahna thleng tur khawp niin ka hre lo.

‘Tu emaw nangmah tihnat tum che an awm i ring em?” kan ngawih vang vang hnuah ka tichhuak sup.

‘Ka hre lo…’

‘Hmelma i nei em?” ka sawi zawh rualin min thlaha,ka mitah tak a rawn en a.Mak takin ka zam titih.

‘Hmelma ka neih ka hre lo,mahse ka pa chhungte nen hi chuan kan inmil ngai lo.Mahse, min that emaw min tina tur khawpin an rilru a sual lo ’ a ti a.A aw a dam thlap bawk.

‘Um…Ramdinsanga hi enge i tan a nih?” ka ti hluk.Tha deuh pawn sawi tum ila he pa kher hi chu ka sawi thei lo ziah.

‘Engmah…’

‘Lawk…Ahma khan i bialpa a ni tih kha i pha lova’

‘Kan tawp tawh…’ a ti nghat.A hmui a pet zauh bawk.

‘A tha,bakah tawp lo mah ula keiman ka titawp dawn tho che u’ ka ti leh hmuk.A hmeltha zetah engemaw a lang zawk.Mahse, a rei lo lutuk,enge anih ka hre lo..

‘Thil pakhat ka ngen duh che…’ a ti sap.Ka ngaihbel nge ka hre lo,a aw a khur tlat.

‘Sawi la…’ ka then suk.

‘Min.Eng lo,min duh tak tak anih chuan….’ A sawi zawh hmain a hmuiah ka kut ka daha.

‘Fiah turin min duh em?” ka ti sup..Ka kun hniam zui zat bawk.

‘Ni lo,chutiang ka sawi tum a ni lo..Ka…ka,eng lo..Ka sawi tum zawk chu kan nunhlui in zawt lo ve ve ang’ ka mitah tak min en ran bawk.

‘Ok..A tha alawm,ka zawt ngai lovang che.Mahse, vawiin atang chuan eng nge i tih te,engkim nangmah nena inzawmna nei zawng zawng hriat vek ka duh..A chiang tiraw?’ ka ti leh sup.

‘Aw…A tha alawm,mahse miin engtin nge an sawi ang che? I Staff ka ni a..’ a sawi laklawh laiin Ka pawt hnaia,ka kuah a.A chhip samah ka fawp nghal vang vang bawk.Tu pawn engpawh sawi rawhse,ka duh chu ka chianga,a tawk.Mi sawi zawng zawng ka ngaipawimawh dawn anih chuan tuna ka dinhmun pawh hi ka thleng hauh lo ang.

Tluangpuii’n Damdawiin a chhuahsan tawh.Mahse, hna rawn kal tur erawh chuan a la thei lo.Thei pawh nise ka remti rih chuang lo.Nitin ka tlawh ziaha,hunawl ka neih apiangin ka be bawk.Msg type neuh neuh hi ka thil peih loh zawng tak a ni a,Call mai zel hi ka duh thina,mahse tunah chuan chu pawh a danglam ta hret hret tih ka hria.Rinawma nupui neih hmaa kan fiam thin dan ka hre chhuak zing ta viau.A lo demawm lo tih pawh ka ngaihtuah tel ziah bawk.

‘I hman dawn tawh em?” Phone ka pick veleh Ruata’n a rawn ti a.

‘Hman tep.Lo insiam la,nghah i ngai leh ange” ka ti sup.Ka hmaa Computer lam ka en reng bawk.

‘Ka hman tawh,keimahin ka lo va kal zawk mai dawn mawni ka ti a’ a rawn ti leh a.

‘Aaah,ti nge?”

‘Kal kawi lawkna tur ka neia.A hmunah inhmu mai ila’

‘Ok..A tha lawm’

Ka chhuah hmain hna ka khawih laklawh ka khawih leha,ka tih zawh veleh ka thawn chhuak nghala,naktukah chuan kan bungraw tang ho a chhuak thei ang.

Ka kalna tur thlen nan Darkar khat lawih ka hmang ta thung,Motor tawt lutuk tih ziaawm nan hian engthil  nge maw tih ngai dawn ni? Ruahsur zauh zauh a chin avangin Bike lekchhuah a peihawm der si lo.

Hall kawtah Ruata a lo awma,min nghak rei tawh tih a Mood uih hmel zetah a lang thei.

‘I thlenna a rei tawh em?”a bula din pahin ka ti a.Min rawn en vut.

‘Rei tawh,ngati em em nge?’

‘Traffic jamah darkar khat deuhthaw ka tang..Lut ila..’

‘An tan tawha,kan thutna tur lah a hma si’ a ti nang nang.

Usher-in kan thutna tur min lo kawhhmuh vat,Ruata sawi ang tak takin a lo hma viau.Prog an lo tan hman tawha,a chanve bak kan nang hman ta lo.Mahse, kal loh ai chuan a tha tho mai.

‘Sangkim…’

Min ko ri ka hriatna lam ka hawi vut.Ka tum loh lutukin Remruati leh Anne ka hmu nghal chat.Anne hi Zothani Cousin a ni a,mahse Zothani nen an mizia lei leh van ang velin a danglam thung.Zothani nen kan inthen hnuah amah emaw a thiante hrim hrim pawh tun hi ka hmuh vawikhatna anni bawk. Zothani erawh chuan vawi tam min rawn biak a tuma,ka pick ngai lo.Msg a rawn thawn chamchi bawka,mahse ka reply chuang lo.Beiseitur awm lova beiseina siamsak a tulna ka hre miau lo.

‘Inhmuh a va khat ve..I dam tha maw?’ amah bawkin a ti leh a,Ka bu nghut.

‘Tha lawm,nangni zawk?” ka ti nghut.

‘Aw.Tha e’ a ti a,Anne zawk erawh engmah sawi loin a lo nui ve var var ringawt.

‘Kan hmanhmawh deuha,kan kalsan mai ang che u’ ka ti leh sup.

‘Kal ila…’ Ruata hnenah ka tih zawm zat bawk.

‘Motor i keng em?” Remruati zawkin min rawn ti leh a.

‘Um..’

‘I ruala lo haw ve mai ka va duh,a pawi em?”

‘Ah,pawi nang..Studioah i let leh dawn nge?” pangngai thei ang berin ka ti a.

‘Aw,ka kal dawn khan ruah a tla deuh bawk nen Taxi ka hmanga’ a ti leh a.

‘Kan haw rual anga nimai lawm.Anne,nang khawi lamah nge?” ka ti leh vut.

‘Kei chu ka haw tlang ang..Scooty ka kenga’ a nui var var bawk.

‘Kei hi tihfel ngai ka la neia,ka kalsan mai ang che u’ Ruata’n a ti ve bawk.Tawngkaa chhang loin ka bu nghut.

Kan vaiin Motor dahna lam kan panthlaa.Puitling vek kan ni bawka,kan chhungrila kan vei ti lang loin kan inkawm a,diktak chuan Zothani best a ni a,kan inthen tih a hre vek ang tih ka chiang,min hmuh  a chak loh tur zia ka hai hauh lo.

Motor dahna kan thleng thlaa,Remruati phone a ri a.Min rawn en a.

‘Kan chhang lawk ang’ tih pahin a phone a lek kang zauh.Ruata nen kan ding duna,Anne erawh a kaltlang thung.

‘Sangkim….’ Mangan hmel zetin Remruati’n a rawn ti a.Ka en vut.

‘Kan kal thei mi?”

‘Aw..Eng lo,Zothani Damdawiin an panpui meka’ a ti khur dar dar mai.

‘Maw? Ngatinge?” ka chhan hmain Ruata’n a ti vat.

‘Ka hre lo,a nu ania min lo be tu kha.Nikhaw hreloin an hmu a’ a ti leh a.

‘Kal ang…’ ka ti hmuk.

Damdawiin kan thlenin an lo awm nual.An lo en meka,Doctor sawi hmangin tlei hret ta se an chhan hman a rinawmlo.Ka thaw huai mai,kha lehchen ka lo kawp tawh a ni a,achunga tiang thil a thlen takah chuan ngaihtuah loh tawp a harsa.

Damdawiin atanga ka tlanchhuah leh meuh chuan dar 5 a ri tawh.Ka Phone ka ena.Tluangpuii missed call a lo awm.Ni lo,ni lo..Vawiin hi Tluangpuii Doctor hmuh huntur kha a ni tak.Zingah khan ka hruai hmang ang tih ka sawi vek tawh.Ka call back nghala,a pick thei lo.Ka ti nawn leha,a pick chuang lo.Ambie-a ka call leha,a pick ta hlauh.

‘Hello,U Sangkim..’ a rawn ti a.

‘I u hi biak ka tuma,phone a pick thei lo a’ ka ti sup.

‘Eee,u Zartei nen Doctor hmu turin an chhuaka,u Zartei be chhin la’

‘Ok..Ka’n bia ang’ ka ti a.Zartei ka call nghal a,a pick lo..

‘Hello…’ a pick dawn lo leh dawn emaw ka tih hnuah Zartei’n a rawn ti ta hram.

‘Tluangpuii nen in la awm dun em?” ka ti nghal tawng.

‘Aw,I be duh mi?” a rawn ti nghal zat.

‘Um,ka lo be lawk..’ ka ti nghut.A ri deuh rak raka,Tluangpuii hnenah be duh an awm tih a hrilh ri ka hre thei.Tu nge ka nih a rawn zawt let a,keimah ka nih tih Zartei’n a hrilh a.

‘Nakinah ka lo be mai ang,ka laklawh lawk..’ ka thaw hawk mai.Zingah kan sawi lawk veka,mahse ka kal lo.Chawpchilh lutukin Zartei a hruai a ni ngei ang.

‘Hello…Sangkim’ Zartei’n a rawn ti a.A sawitur ka hre lawk vek.

‘Um…’ ka ti hmuk.

‘Kan laklawh lutuka,nakinah a lo bia ang che aw’ a rawn ti a.

‘Ok,tunah khawnge in awm?”

‘Doctor kan nghak meka’

‘Lo awm ru,ka lo kal ang’ ka ti nghal vut.Min chhan let pawh nghak loin ka off nghal daih bawk.

A kalna tur Doctor Clinic ka hre sa a,zawh kher angai lo.Motor ka turna,an awmna lam panin ka tlana,mahse tlai lam Office ban hun lai vel bawr a ni a,Motor tawt tak a ni..MC ah Motor ka dah leh te te.Hetah ka dah anih loh chuan dahna tur a awm lo hrim hrim.

An lo awm deuh thap,ka hawikuala,Zartei amahin hnung lamah alo thu a,phone a en avangin ka lut min hmu lo.Ka pan pheia,a bula thutna awlah ka thu thlaa,a rawn hawi chhuak vat.

‘Ehe! I va lo thleng hma ve,a tawt vak lo mi?”a ti nghal hliai.

‘Tawt tho mai.Khawnge?” ka ti a.

‘A lut mek,a rawn chhuak tep ang ka ring’ a titha leh mai.Min ngei hmel emaw lawm lo hmel pawh a pu lo.

Minute 10 vel ka thut hnuah a rawn chhuaka,ka kal dawn tih Zarte’in a hrilh lawk nge ka hre lo.Min hmuh vanga mak ti emaw lawm hmel engmah a lang lo.

‘Kan kal thei mi?” Zartei’n a ti a.

‘Um,thei..Kal ang u’ zangkhai zetin a ti a.Min biak tum hmel a pu chuang lo.

Inhnuai lamah kan inzui thlaa,Doctor nen an inbiakna Zartei a hrilh malh malh,kei erawh ka ngawi ngur thung.Ka rilru a nuam hlawl lo,thinrim hmel a pu lo.Mahse, engmah sawi loin ka kal lo a.Call ka pick lo bawka.Thinrim se nuam ka ti zawk ang.

‘Sangkima a lo kal thoa,Ka ni te inah chuan ka kal tlang mai dawn mawni?” Zartei’n Tluangpuii hnenah a ti a.Ka en vat.A meng tal tap ka hmu hman.

‘Min Drop phawt dawn maw ka tia..’ a ti nghat.

‘Naaa,Sangkima a lo kal tho a.Ka Pa khan kal turin min duh sia’ a ti leh a.

‘Kal rawh,a pawi lo’ Tluangpuii tawng leh hmain ka ti sup.

‘Nia,ka kal mai ang.Bakah sawi fel tur in neih kha..’ Tluangpuii a melh zawk.Tluangpuii a ner nak thung.

Motor dahna lam kan pan duna,a kal bai deuh saih saih nangin min rinchhan a duh dawn lo tih ka hria.Kaih emaw kuah ka tum buai lo law law,mahse a tluk palh thut loh nan ka en uluk viau.Motor ka lachhuaka,kan tlanchhuah hnuah pawh engmah a la sawi ta chuang lo.

‘Sorry…’ ka ti sup.

‘Ngatinge?” min en chuang lo.Pawn lam a thlir dauh dauh.

‘I hria…’ ka ti nghut.

‘Eng chu maw ka hriat?” a ti leh nghauh.

‘A hunah ka lo thleng lova,call ka pick lo bawka’ ka ti leh sup.

‘Eee,kha kha maw? A ho lutuk.I buai aniang chu’ min chhang rang lutuk mah mah.Ka melh zawka,mahse pawn lam bawk a la en ta fo.A hmel ka hmu thei tlat lova,eng nge a ngaihtuah ang ka hre lo.

‘Ka tihpalh tak tak.I thinrim tih ka hriaa’ ka ti leh a.

‘Thinrim nang.Pawi ka ti lo’

‘Tak tak?”

‘Aw,bakah kei aiin i buaipui kha a pawimawh zawk’ a ti leh nghauh.A aw a dam thlap nangin engemaw dik lo a awm tih ka hre thei tho.

‘Nang aia pawimawh engmah a awm lo’ ka ti sup.

‘A va lawmawm ve’ min chhang rang leh mah mah.Bakah a awah khan lawmna aiin tih el na a lang tam zawk.

‘Min en teh’ ka ti sup.

‘Lawk,ka rui tep..Ka hawisawn ngam lo’ a nui hak…A awmdan a dik miah lo,Zothani ka tlawh kha a hria tih sawi lo mah se a hre vek tih ka chiang.Ka ngaihtuahnaah thildang a lo lang a.An veng panna kawng ka tlan pela,kan veng lam ka pan ta zawk.

‘Khawnge kan kal dawn?” a ti that.Ka melh zawka,mahse engmah sawi loin ka hawi leta,hma lam ka en lehnghal mai bawk.

‘Ding rawh,I duh duha i tihkual tur ka ni lo ania’ a ti leh that.Ka chhang chuang lo,inhauh chiam na Moodah ka awm hek lo.Inah ka hrilhfiah mai ang.A che nghal phat,mahse Kawngkhar ka lock avangin a hawng thei lo,thinrim beidawng tih hriat zetin a rum hak ri ka hre nghal zat bawk.

Gate bulah ka dinga,Horn ka hmet ri a.Kawngkhar a rawn inhawnga,Buati hmanhmawh zetin a rawn tlanchhuak dar dar.Kan tlan luta,ka hun fel veleh ka chhuka,Tluangpuii thutna lamah ka kal kuala,pawn lam atangin ka hawn saka,mahse chhuk tum hmel a pu lo.

‘Chhuk la…’ ka ti sup.

‘Aih…Ka haw duh’ a ti hlak.Luhlul zetin a thu a, a inkuangkuah fel than bawk.

‘Ok,a pawi lo.Ka pawm chhuak che nga nimai lawm’ ka ti sup.

‘Maw?” a ti that.Min rawn en a,a mitmeng lian leh nalh zetah chuan thinrimna a lang chiang viau.

‘I chhuk dawn nge ka pawmchhuak dawn che?” ka ti leh sup.A meng tal tap.

‘Ka lo kal ang’ a tita nge nge.

Ka tawlhsawna,a chhuk hun ka nghaka,muangchangin a rawn chhuka,a ke leh lamin lei a rawn rapa,a na lam a rawn dahthla leha,a rap tur chiah a rap suala,a te that.Rang zetin a kawngah ka vuana,ka pawm kang nawlh.Ka nghawngah a rawn kuaha,a khur dar dar mai.

‘Ka tha…ka kal thei ang’ a ti sap.Mahse, ka hre lo der hmiah.In lam panin ka kalpui zui nghal zat bawk.

Buati ‘n kawngka min lo hawnsaka,mak a ti anih pawhin a hmelah engmah a tilang lo.Zothani kha vawi tamtak a lo kal a,Buati nen pawh an inhre tha viau.Mahse,Tluangpuii erawh hi chu a vawikhat hmuhna a ni thung.Tluangpuii dimtein ka nghata.Min hnaih ber thutthlengah a thu nghal vat.

‘Eitur hi ka lo siam nghal dawn em?” Buati’n a ti a.

‘Aih,angai lo..I duh chuan i haw thei ang’ ka ti hmuk.

‘Aw le..’ a ti a.A nui var var bawk.

Buati kal hnuah amah ep zawngin ka thu thlaa,Tluangpuii thu ngil auh chu ka en a,a thinrim poh leh a hmeltha ting maiin ka hria.

‘Sawi la…’ ka ti nghut.

‘Ka haw duh” a ti hmak.

‘I thinrim reh hma chuan  i haw dawn lo tih i hria alawm’ ka ti sup.

‘I sual lutuk’ a ti that.Ka then suk thung.

‘Vawiin khan dar thumah ka kalna tur ka hrilh lawkah che khan ka kala,ka haw lamah Remruati ka rualin a hawa’ ka ti sup.Engmah sawi loin a inkuangkuah fel thana,min en loin bang lam a en ngar bawk.

‘Remruati an rawn calla,Zothani nikhawhre loin a awm an rawn ti a.Damdawiinah ka dropa’

‘Engvangin nge chu chu min hrilh kher a?” a ti hmak.

‘I thinrim chuan a chhanna tur ka pe thei zel ang che,I nat ka duh lo…’ ka ti leh sup.A thaw hak mai,muangchangin min rawn en ta nge nge.

‘I thiam loh a ni lo ka tih kha’ a ti dam thlap.

‘I thinrim tih ka hria,engvang nge tih ka hre lo.Mahse, ka lo kal tlai chhan leh i call ka pick loh chhan kha i hriat ka duh’ ka ti leh sup.

‘In then ka duh…’ a ti dam thlap.

‘A theih loh…’

‘Aih,inthen ka duh..’ a ti nawn leh a,a aw a dam thlap bawk.

Muangchangin ka tho a,ka pan hnaia.Chhuatah ka thu hniama.A kut ka laksak a,ka fawp nghal vang vang bawk.

‘Ka tihpalh tak tak,khatiang kha a thleng nawn leh tawh ngai lo vang.Ka tiam che’ ka ti sup.Tu hmeichhia mah hi ngaihdam ka la dil ngai lo,min then an duh ngai hek lo.Keimah zawkin ka then hmasa ziah,mahse Tluangpuii erawh adanglam..Ka tih tura ka lo dah ngai loh kha ani bulah hi chuan ka tita fo.Mahse, pawi tihna ka nei lo.

‘Ngaihdam min dil tawh suh..’ a insut hraih.

‘Anih chuan i thinrim tawh dawn lo tihna ni em?” ka ti leh sup.

‘Ka thinrim lo,mahse keimah vanga midangin nunna an chan ka duh lo’ a aw a ring lo,mahse ka hre chiang lutuk.

‘Tu man nunna an chan lo vang’ nghet churhin ka ti a.Mahse, a lu a thing nak.

‘Zothani kha a rilru nat vangin intihhlum a tum a,engtin nge ka tih ang? A thi anih chuan ka inngaidam thei ngai lo ang’ a aw a khur dar dar mai.Hei vang chiah hi anih hi a awmdan a lo dik loh ni?Mahse, tuin nge hrilh ang? Ruata..Ani chu a ni thei lo..

‘Chutiang ngaihtuah tawh miah suh.Nangmah ka duh tih ka hrilh hma chein ani nen kan tawp tawh..Chuan,tupawn engpawh sawi se ka sawi anih loh chuan ngaipawimawh ngai suh ang che,a tha em?” a mitah tak ka en a.A mit hnawng deuh chap chuan a tilang duhawm zual hluah hluah.

‘Ka ring thei che angem?’ a ti sep.

‘Aw…I duh phawt chuan…?”

‘Ka….Ka,ka duh ang ka ring…’ a then sak.Ka tho a,a khabeah ka dawm kanga,ka kun hniama.A hmui nem leh fawh nuam zet ka zuk si a.A mit a chhing chial thung.

Ambie-a hnenah kan Inah a u in chaw a ei dawn tih ka hrilha,a lo aw ve mai bawk.Buati’n eitur a lo siam sa tawh tho nangin ka siam belha,min puih a tum hle chungin ka phal lo.

‘Khawnge i awm?” Phone ka pick veleh Pu Dama’n a rawn ti a.A aw a dam hle chungin dik lo a awm tih ka hre thei.

‘Ka haw chiah,eng nge nita?” ka ti a.Ka kamiz kilhna ka phelh pah mawlh mawlh bawk.

‘I mail kha check vat rawh,thil thleng hi a tha lo hle ania’ a rawn ti leh a.Tun tum phei chu mangang thinrim aw a hriat tel theih.

Phone ka off a,Bag atangin MacBook ka phawrha,ka on nghal bawk.Ka mail ka Open rualin a rawn langa,ka phu zawk..

Ni lo,ni lo..A thleng tur a ni lo..He thil hi ka tan a pawimawh lutuk ringawt.

‘I hmu em?” Hello pawh ti loin Pu Dama’n a rawn ti vak.

‘Aw,mahse hei hi engtia thleng nge ka hre lo..’

‘I hre lo ang,ka hrilh lawk che kha..Tluangpuii Id atanga thawnchhuah anih kha…’

‘Ni lo..’ ka ti tuar..

‘Sangkim,he thil hi chingfel tur chuan kha nu kha i thehchhuah angai..Anih loh chuan ala ti chhe vek ang che’

Ka pai deuh nawk thei.Tluangpuii’n hna a rawn zawm atangin ni hnih chauh ala liama,bakah hetiang thil a ti thei lo..