BLUE- BOOK 2

Chapter- 11- 15

Chapter- 11

‘A ni thei lo’ ka ti chhuak hrawih.

‘Aih,a ni thei.Ani chiah kha regular taka i Office a lut thin a ni a.Midang an ni thei lo,ring lo turin ka tih che kha’ a ti leh hmawk hmawk.A sawi dik maithei,Tluangpuii lo ka Officea lut an awm anih pawhin inleng anni deuh tlangpuia,Staff dang an lo lut zen zen lo.Mahse,ani chuan a ti lo tawp ang.Ka ngaihtuahnaah thildang a rawn lang zawk.

‘Tu hnen atangin nge hemi chungchang hi i hriat?” ka ti nghal sup.

‘Chu pawh i la hre lo amaw?” mak tih hmel zetin a rawn ti leh a.

‘Hre lo,I sawi hma khan engmah ka hre lo’ ka ti mawl tawp.

‘SX zinga pakhatin min rawn thawna,zanin khan Champhai lamah an tifela.Sawrkar lam leh khawtlang hruaitu tam vak lo an tel bawka’

‘Tu ten maw tifel a?” ka dawhtheihnain a tlin lo achha chu a ni e.

‘Tu nge nise i tih a? CHOP bak min bei char char tu dang tu nge awm ang?”a ti ram hmak.Ni dawn tak,mahse engtin nge Drawing kha lo nei pawh nise thla khat aia tam mah ka nghah,Sawrkar lam atanga phalna kha an neih theih?

Khumah a vang zawngin ka mu a,inchung ka en renga,engmah ka hmu pawn ka hre chuang lo.Ka ngaihtuahnaah Tluangpuii a lo langa,Engvangin nge a tih?eng ang pawn phat mar tum mahse ama Id atanga thawnchhuah a ni a,Phat ngaihna awm lo khawpin a chiang.Mahse…Ama tih a ni thei lo.

Ka Phone ka lakanga,call tumin ka tin ren rawn,ni lo.Ka call anih pawhin a pha ang tih a chiang.Ka thuchhuaka.Amah ni thei lo hrim hrim tih ka ngaihtuaha,mahse awmzia a awm lo.Zawt pawh ni ila a hre lo vang.Bakah ka tana a pawimawh zia chu kei leh amah chauhin kan hria.He thil avanga pawisa ka chan hnemtur zia pawh a ni aia hre chiang chu keimah chiah.Chutichung chuan engvang mahin midang a thawnchhuak lo ang.

Office ka thlenin Duty pawh an lo la inthlak lo.Tluangpuii Computer ka On nghala,a thil thawnchhuah leh msg dawn ho ka enkual a..Mahse, kan duhber kha a awm tlat lo.A thawnchhuahna a delete anih hmel.Ni lo,kei ang bawkin engkim ka check let vek thei tih hrechiangtu chu amah tho.Engvangin nge atthlak lutuka a chet ngawt ang?

Ka room kawngkhar an rawn kika,ka hawichhuak vut.Tluangpuii a rawn daka.A nui var var bawk.

‘Good Morning..I va hma ve’ rawn luh pahin a rawn ti a.A hmelah engemaw hmuh tumin ka en a.Engmah nidang nen danglamna a awm lo.Nidang ang bawkin a thianghlim sara,a hmaiah Make-up hnuhma a awm mang lo.

‘Morning…’’ ka ti sup.Muangchangin ka thochhuaka,ka dawhkan ka kal huala.Dawhkan rinchhan titihin ka thu nghal bawk.

‘Dik lo a awm em?” ngaihthat loh hmel zetin a ti sap.Min rawn pan hnai nghal bawk.

‘Aih…’ ka lu ka thing nawk bawk.A banrekah ka vuana.Ka hnuk hnaia,ka kapkarah ka dintira.A kawngah ka kuah zui zat.Ka ngai hluah hluah.Ka nghawngah a rawn kuah ve a.Mahse, chik zetin min en ran thung.

‘Sawi la…’ a ti leh sap.Ka nghawng a hmet niap niap bawk.

‘Buaina chhete ka nei’

‘Ka hria alawm’

‘Tak tak?” ka nui suk bawk.

‘Um,enge anih chiah ka hre lo,mahse ka hmuh che kha dik lo engemaw a awm tih ka hria ‘ a ti leh sap.A sam chhawlleng a bengah ka zeh saka,ka kutzungpuiin a hmui ka tuai zauh bawk.

‘Drawing kan siam fel chiah kha a bo ’ ka ti mawl tawp.A hmelah danglam a awm leh awm loh ka en ngur bawk.Mahse, engmah danglam a awm lo.Ni lo,mak tihna bak engmah a lang lo zawk.

‘Thil theih a ni lo..Print out pawh a la ni lo va.Lawk,khawi atanga bo nge?” a ti hap.

‘Pawi ka ti..Ka hrilh thei lo che’

‘Ok..Anih leh i Officeah tuemaw an lut ru a ni thei em? Anih loh chuan ka Computerah engmah kan dah lo.Bakah ka Computer atangin i Mail i log-in ngai bawk si lo..’

Ka harh hawk,a sawi dik..A ti lo ang tih ka chiang,a Computer atanga thawnchhuah pawh nise a tih a ni thei lo.He thil hi kei leh Drawing siamtu chauhin kan nei.A siamtuin niminah ka hmuh lai ngeiin Pu Dama a thawna,chubak engmah thawnchhuah a la awm lo.

‘Zo….’ A ti sap.Min hretu zawng zawng ten ‘Sangkim’ ti a min koh laiin ani hi chuan ‘Zo-a’ tiin min ko tlat.Pawi ka ti miah lo thung.Ka biang tawn tawnah a rawn vuana..A mitmeng lian kel kawl leh pawisawi lo zet chuan ka chhungril a hmu tlang vek nimaiin ka hre leh tawh.

‘Tu hnenah nge an thawn?”

‘Sorry,chu pawh ka sawi thei lekpek lo..’ ka ti leh sup.

‘Ahh,pawi ti suh.Ka hriat ve a tul rih lo tihna animai.Mahse, a theih anga ranga tihdanglam anih loh chuan kan buai thui viau thei ania’ a sawi dik leh ta.

‘Min fawp phawt la…’ a beisei loh lam ka sawi tih a ner nak danah a lang thei.Mahse,a thinrim lo tih ka hria..

‘Tul lo thei em mai a’ a ti nghat.

‘Ka nghak ania…’ ka mit ka siai zauh.

A rawn kun a,ka hmui a rawn si de de.A biang sen deuh tan chuan a tilang duhawm lehzual sauh bawk.

Diktak chuan a lo kal hma khan tihber tur hre loin ka lo hawi mawl mai maia,ka ringhlel phal lo a,mahse ama tih anga a lan miau avangin ka buaia.A lo langa,minute tlem chauh ala ral a,tunah chuan ka enge ka tihtur ka chiang leh vek tawh.Min thlakdanglam tumin a bei chiam chiam lo,min Control tum angin a awm ngai lo va.Ka awmdan a sawisel vak ngai hek lo.Mahse,zawi zawiin min thlak danglam hret hret a,a tel lo a nun hman harsa khawpin min thunun hneh ta thung.

Pu Dama ka call hmain kan thilthar tura engkim buaipui tura ka rawih,Sangtea ka call hmasa a.Office a kal turin ka ko nghal bawk.Ani hi  Hotel ka siam dawn pawha ka biakrawn leh ram leitur thlenga min kawhhmuhtu a ni a,thian tha tak tihtur ni lo mah ila kan inpawh thawkhat viau.Mi tamtakin an ruaia,rinawm lo mai mai tur chi niin ka hre hek lo.

Reivakloah a rawn thlenga.Ama puala Office nei a ni chungin tun tum thil hi chu keima Officeah sawi ka duh zawk.Bakah he thil bo chungchang hi amah nena sawi dun ngei ngei ngai thil a ni bawk.

‘Intur i duh em?” a thut fel veleh ka ti sup.

‘Engemaw tal chu awmse a pawi lo khawp ang’ a nui hak hak bawk.

‘Engthil nge le?” Coffee rawn dahtu chhuah veleh zangkhai zetin a ti a.

‘Kan Drawing thar chungchang kha…’

‘Um..Tha tawk lo lai a awm nge?’

‘Aih,khatiang chiah kha midang siamsak i nei em?” ka ti nghut.

‘Midang a? ngatinge a?”

‘Kan Design sa leh kan plan sa ang chiah kha nizanah tlangzarh a ni a’ ka tum aiin ka aw a chang hret.

‘Maw? I sawi awmzia ka hre map lo mai’ a no dahthlak pahin a ti a.A mengphawk deuh hra bawk.

‘Nizanah Champhai lamah Sumdawng pakhatin a tlangzarha,min thawng takzet.Niminah kei niin kan hmu ve chauh a.Anni lam erawh chuan an tlangzarh thunga’ ka ti leh nghut.

‘Lawk,kha thil kha nangmahni pual liau liaua ka siam a ni a.Nang pawn i hria.Ram awmdan leh hmunhma azira buatsaih a ni bawka.Midang tan chuan hman ve a rem lo bur’ mahni inringtawk zetin a ti khauh far mai.

‘Ka ring che,mahse an hmang a.Chu pawh hmundang ni loin Location in ang,ka ram nena insi chiah a ni zui bawk’ ka ti leh sup.A ngaihna hre lo niawm takin a chal a tichuar a.A landan maiah chuan  engmah a hre lo tak tak a ang.Mahse, tu nge ni ang?

‘Ka hrethiam lo..Ka hrethiam lo tak tak,niminah ka rawn daha,Keimah bak tumah nei an awm lo.Anih chuan engtin nge an lo neih daih theih?” uar zetin a ti leh chiam.

‘Ka lo beisei dan chuan naktuk hian Champhaiah ka chho anga,kan tumdan leh kan thiltih tur engkim hi ka han tifel ang ka ti a.Mahse, tunah chuan kan tlai ta hret.Mi pakhat tan chauha siam theih thil a ni a.Ka chan dawn a ang ta’ ka ti sup.Ka hloh tur zat ka ngaihtuah peih rih lo law law.

‘Ni lo,I chan ngawt thei lo,he thil hi khawi atanga chhuak nge kan en angai’ a ti a.

‘I Staff te zingah rinawm lo deuh an awm angem?” ka ti nghut.Tluangpuii hnen atanga chhuak a ni tih hrilh ka tum lo.Tul ka ti lo bur.

‘Ka hre lo,mahse mi a let tawp lo chuan an tih ngam ka ring lo’

‘Um,hriatthiam a harsa..Engpawhnise tunah chuan theihnghilh mai a tha rih zawk in ka hria’ ka ti leh nghut.

Tih leh mai tur hre loin ka thu vang vang,engtin nge Tluangpuii ID hmanga an thawnchhuah ang? Ka rilruah Rocky-a a lo langa,kei aiin a thiam fe zawka.Ka theih ang angin ka inzir ve chungin a hna a ni bawka.Rocky tan engmah harsa a awm lo.

Ka call a,mahse vawi thum lai ka call hnuah pawh a pick thei tlat lo.Hna a ngah thei bawk nen tihbuai loh a tha zawk mahna.Call nawn tawh loin Aruata ka call ta zawk.

‘Hello..’ a rawn ti a.A mut a chhuah hmel viau bawk.

‘I buai em?”

‘Aih..Ka tho chiah..’a nui hak.Sana ka en a,dar 12 a ri tep tawh.

‘Eheu..Delhhlum sa ei i tum tihna mi?” ka nui ve hawk.

‘Tum deuh mai e…Tak takin nizanah ka chhuaka…Eng nge nita?” a rawn ti a.Hna dang a nei tih ka hre thiam mai.

‘Ka mamawh lehpek che..Dar engzatah nge kan inhmuh theih ang?” ka ti a.

‘Ka inbual zuai anga,ka hman animai.Hotelah mi ka lo kal ang?” a rawn ti a.Mamawhtu zawk ka ni chungin ka pan thei tlat lo.

‘Aw, Hotelah..Ka lo nghak ang che,hmanhmawh suh’ ka ti sup.

Ka dah chiah tihin Pu Dama’n min rawn call ve thung.

‘I tifel thei em?” nizan ai chuan a aw hriat a nuam ta deuh.

‘Aih,ka en mek…’

‘En mek tur enge la awm a?” a lawm chiah lo tih a awah a hriat theih.

‘Nimina Drawing ka rawn thawn che kha,keimah chiahin ka neia.Tluangpuii aiin Office ka chhuahsan har zawk bawka’ ka ti nghut.

‘Anih chuan amah a ni lo tih i tum tihna mi?”

‘Tum hran lo.Mahse, engtin nge Tluangpuii thawnchhuah tih i hriat?”

‘Ka thil hriatna hi a daw ngai lo..’

‘Um..’ ka ti hmuk.

‘Ani ai khan min ring lo ta te pawh a ang alawm le’ a ti nghauh.

‘Aih,chutiang ka sawi tum a ni lo.Mahse,Tluangpuii pekchhuak anih  ka ring lo..’ ka sawi zawh rualin thinur thawm niawm tak ka hre nghal zat.Ka dem lo.Keiin ka pawisa ka chan ang bawk hian ani pawn a chan teuh dawn.Ka tana a pawi tluk zetin atan pawh a pawi ve tho.

‘A tha e’ a ti hmak.

‘Ka en meka,a titu tak ka hre maiin ka ring.Mahse, neih let leh dan a awm ta lo niin a lang’ ka ti nghut.

‘Nia,thilmak a thleng anih ngawt loh chuan kan chan ang’ a ti bung leh vut.

Sawrkar lam nen kan indawrna a tluang em em a,neih ka duh tlat avangin sum pawh ka seng hnem tawh.Mahse, kan puitlin veleh thlakhat pawh tling loah ka senral chanve hi chu ka hmu let leh vek dawn tih ka chiang.Mahse,ka hriat miah lohin ka sirah lo bei ve ngar ngar an awma.Mi pakhat tan chauha neih theih thil leh titawh an awm chuan midang tan chance a awm lo tih an hre chianga.Min tihkhalh ta chat.Ramdinsanga nen inzawmna nei anni nge CHOP in a mala an neih tih ka hre lo.Sumdawnnaah chuan hlawk chang leh hloh chang a awm thin.Ka chiang,mahse tun tum zet chu min Shock tih piahlam a ni.

‘I khua a sik anih hi…’ Tluangpuii’n a ti sap.Ka chalah a kut nel thepin a rawn khawih vang vang bawk.A lo luh lai ka hre lo.

‘Ka tha..’ ka ti nghut.A kut ka laksawn sak nghal bawk.

‘Ka ngaihtuah deuh che a..Engmah hriatchhuah tur a la awm lo mi?”

‘Awm lo,mak a ber chu i Id atanga chhuak anih na lai hi…’ ka ti bung vut.

‘Maw?” ka tawngsual tih ka hre nghal a,Mahse awmzia a awm tawh lo.

‘Aw, I ID atanga chhuak ania.Mahse tu nge i thawn engmah a lang lo’

‘Ni lo…Engmah ka ti lo’ mangan hmel zetin a ban a phar hliai bawk.

‘Meeting kha dar 3ah ka neiin ka hriaa.I lo cancel dawn nia’ ka ti lehnghut.

‘Ok..Ka lo ti ang.Mahse, engmah ka ti lo tak tak..’

‘Ka hria..Min hrethiam la,mahnia awm lawk ka duh a’ ka ti leh a.Ka then lui suk bawk.

Engemaw sawi tumin a ang ziaua,mahse a chip leh hmak.A bu nghauha.Kawngkhar lam a pan ta zawk.Hnung lam atangin ka thlira,ama ID atanga thawnchhuah a ni tih ka sawi ruala a hmai dang nghal sawp sawp kha ka mitthlaah a lo lang nghal zat,a thawng tih a chiang.A lo kal tirh khan engtin nge midangin an neih theih tih kha min zawta,ka hrilh lo.Mahse tunah ka sawi leh lawia.Ka ringhlel hauh lo nangin ka ringhlel emaw a ti ngei ang.Pawi lo,nakinah ka hrilhfiah mai ang.Tunah chuan mahni a awm ka duh rih tlat.

Aruata a lo thlen veleh thil awmzia tlangpui ka hrilh zawr zawra,mutchhuah hmel fein a ngaithlaa.Ka sawi chhung zawng engmah min zawt lo.Ka ngaihtuah naah Sherlock Holmes nena thilsawi dun kan ang riauin ka hre pek.

‘Tluangpuii Computer en hmasak a ngai tihna nih chu’ a ti nghauh.

‘Um,ka ngaihdan chiah.Zingah ka en tawha.Engmah ka hmu lo..’

‘A delete tihna nimaia’ a ti leh a.Ka bu ringawt.Engtin nge Pu Dama khan Tluangpuii atanga chhuak tih kha huai taka a sawi theih ka hre lo.

Tluangpuii Computer a thutchilha,hnehsawh zetin a khawih kual zung zung.A bulah engmah sawi loin ka thu ngawi ngur ringawt.Zing atangin engmah ka la ei lo,mahse ei chakna ka nei eih lo thung.

 ‘Engmah a awm lo…’ a ti nghauh.

‘Anih chuan Tluangpuii hnen atanga chhuak chu a ni lo tihna nih chu’ ka ti a.Ka thawl deuh hawk bawk.

‘Ka ngaihdan chuan he thil hi nangmah atanga chhuak zawk anih ka ring’

‘Maw?”

‘Ka sawi awmzia chu nangmah atangin an la emaw an thawnchhuak tihna a ni ang’

‘Tumah ka Officeah an lut ngai lo’ ka ti nghut.

‘CCTV i check tawh em?”

‘Check nel nual..Tumah lut an awm lo,bakah ka locked vek zela’ ka ti leh sup.Tluangpuii a lut ve thei tih sawi kher tul ka ti lo.

 ‘Anih chuan ka ngaihdan ka’n sawi ange.He thil titu hian he ta tanga atih a ni lo.Tluangpuii hming lo lang hi chu thilmak tak a ni’ a ti charh.

‘Um..Amak hle mai’ ka ti hluk.

Aruata kal hnuah ka ngaihtuahna kawmin ka thu deuh vang vang.Pu Dama ka rilruah a lo langa,engvangin nge Tluangpuii tih anga a sawi ka hre thiam lo.A lo ti anih chuan Aruata khan a hmu ngei ngei tur a ni.Mahse, engmah a hmu lo mai pawh ni loin rinhlelh eih tur a awm lo.Pu Dama hian engvangin nge tiang a sawi? Kan inhriat tan tirh atangin vawikhatmah thil dik lo leh dawt min hrilh ka la hre hek lo.A thudawn na hian a hrilhsual anih ka ring ta ber.Mahse, chutiang lam chu tunah sawipui loh a fuh ber tih ka chiang.Zing atang khan engmah hmasawnna a la awm lo.Ka thinrim nge ka rilru a buai zawk pawh ka hre hrang nek lo..

Ka phone riin ka ngaihtuahna a lapeng ta hlauh,min rawn call tu ka en a.Rocky..Missed call a hmu a ni ngei ang.

‘Hello..’ ka ti sup.

‘I lo call lai ka lo hre miah lo.Engthil nge nita?” nidang ang bawka zangkhaiin a rawn ti a.

‘Inhmu turin hun i nei em?”

‘Yeah…Nei chiang.Dinner min treat dawn te chuan…’ a nui nghal hak hak bawk.

‘I duh phawt chuan,a hmuntur thlang la..’ ka ti ve nghal zat.

‘Hmana ka hrilh che ka Cousin te ta kha.Intur an pe chhuak bawka’

‘Ok..A tha ngawt ang.Dar engzatah nge niang?”

‘Dar 7 ti ila…’

‘Ok..I hman hun hun nimai’

Sana ka en a.Dar 5:30 a pel tawh.Computer ka Off a,vawiin chu engmah ka thawk ta miah lo.Mahse, ka chau hluah hluah thung.Ka rit luk in ka hre bawk.

Room kawngkhar ka hawnga, Tluangpuii thutna lam ka hawia,a lo awm tawh lo.Kan inzui hnuah a haw dawnin min hrilh lo ngai lo,Staff dangten kan inzui tih an hriat a duh loh avangin kan haw rual ngai meuh lo thung.Engvanga midang hriat duh lo nge anih ka hre lo chungin ka nawrlui ngai lo thung.

Dar 7 rik hma hretin Rocky nen kan inhmuhna tur hmun ka thlenga,Rocky a lo awm vang tawh.Cabin a lo book a.Ka hawikuala,a zau lua lo nangin a nuam reuh viau mai.

‘Inbuai em?” a ti a.Ka lu ka thing mai.Ka intur thlitsa ka thawkkhap pawp bawk.

‘Biak duhna che ka nei a’

‘Sawi la…’ a ti awlsam mai.Thil thlen dan tlangpui ka hrilh a,uluk zetin a ngaithla kar.

‘Ka sawi kha i la hria em?” ka sawi zawh hnuah a ti a.A sawi awmzia ka man lo.

‘Eng ber?” ka dar ka ti chhing uk bawk.

‘Tluangpuii chungchang mawle..’a ti leh a.Ka lu ka thing nawk thung.

‘A accident hlim a kan chhui zui lai khan tu emaw hmelma a nei tih ka sawi kha…’ min en lo in a no a en daih bawk.

‘Hmelma…’ ka tinawn ve sup.

‘Um,Hmelma a nei niin ka hria.Tun tumah pawh hian ama tih anih ka ring lo.Amah tihchhiat tuma bei ngar ngar an awm niin ka hria’ a ti leh duah.

‘Ka hrethiam lo…’ ka ti chhuak hrawih.

‘Hmelma a neih chungchang hi chu amah sawipui turin ka hrilh che kha,amah pawh hian engkim a hria.Achhanchu kan chhui zui na kha amah hian a blocked zat zat niin a lang tlata’ a ti leh a.Ka hrawk a ro hulhin ka hria.Wine bottle ka bana,ka noah ka thli a,engmah sawi loin ka thawkkhat leh pawp.

‘Amah sawipui hi sawtna a awm lo maithei,a pha ang tih ka ring..’ nuam lo tih hmel fein amah bawkin a ti leh a.

‘Maithei..Mahse, engvangin nge Hmelma a neih ang ka hrethiam lo’ ka ti nghut.

‘Sawi mai a harsa.Mahse, amah sutu kan zawn lai khan thudik chiah lo sawi a neia,chumai bakah amah khawihtu te kha a hriaa.Hum a tum niin a lang ta tlat bawka.Chuvangin chhuizui chiam ai chuan khatianga ngawihsan mai kha tha zawkin ka hria.Chuan,hmeichhe dang ni loin i bialnu a ni a… I duh phawt chuan i chhuizui thei a,I hriat duhzawng dal tur engmah a awm thei lo tih ka chiang..’ a ti leh duah.

A sawi dik,ka hna kaihhnawihah vawi tamtak ka tibuai tawh thina,engtin nge chet ka lak thin tih hi ka Best Ruata ai pawn ani hian a hre chiang zawk.Mahse, tuna kan sawi mek hi hna lam thil ni loin Tluangpuii chungchang a ni a…Hriatchhuah ka tum tawk lo tih ka inpawm thlap.Bakah Tluangpuii khan chiang takin a sawia,a nunhlui zawh a duh lo..Mahse, hei chu kan inzui hnu a thleng a ni a.Ka duh chuan a chungchang hre turin dikna ka nei.Mahse, engmah ka hre lo.Achhan chu hriatchhuah ka duh lo a ni tawp mai.

In ka thlenin dar 11 a ri tawh.Tluangpuii hnen atangin call emaw msg pawh engmah ka dawng lo.Ka buai zia a hria.Mahse, min ngaihven tur pawn vawikhat pawh min call lo..Hrep tak hian..Amah hum tura ka beihna hi engahmah a ngai miah lo zawk nge mawni?

Ka  thawmhnaw pawh hlip loin khumah ka let tawp.Ka phone ka phawrha,a tlai tawh tih hre mah ila biak ka duh.Engvangin nge ka l akah zep a neih ka hre duh tlat.Reife a ring hnuah a pick ta hram.

‘Hello…’ mipa awin a rawn ti a.Ka call sual emaw tiin ka phone ka en a.Ka call sual hauh lo..

‘Tu nge i nih?’ ka ti tuar.Ambie-a aw a ni tlat lo.

‘Eh…Ka awah min hria ang chu ka lo tia..Sangkim,keimah..Ramdinsanga…’ ka tek chhawk niberin ka hria..Engtin nge tun ang hunah Ramdinsanga hian Tluangpuii call a pick theih? Chhan pakhat chiah a awm…Chuan,kei hi mi a ka lo ni..

Chapter- 12

‘I be duh em?”

A rawn tawngri ka hriat rualin ka ngaihtuahna atangin ka harhchhuak zawk.Ka a emaw engpawh nirawhse,Ramdinsanga bulah at so a tulna a awm eih lo.

‘Ka biak duh vangin ka lo call chu anih hi’ pangngai thei ang berin ka ti sup.

‘Ok,lo nghak lawk teh’ a ti leh ham ham.

Tluangpuii a ko thawm leh ka be duh tih a hrilh ri ka hre thei vek.Mahse, Tluangpuii rawn chhan letna erawh engmah ka hre thei lo thung.

‘Sangkim,Sorry..,abuai lawka’ ngeiawm thei ang berin a nui huk bawk.Sorry tih sawi mah se pawi atih loh zia,a nuih danah a lang vek.Hreptak hian a….

Ka mut ngaiin ka mu a,ka ipik chuah chuah niberin ka hria.Ka tho a,Wine dahna atangin Bottle khat ka lachhuaka,no pawh la loin ka in nghal pawp.A hma khan ka in nual tawh tho nangin ka rui hran lo.Ka in leha,ka hrawk a sa ham hama,a thlen chin a hriat vang vang bawk.Engtiklai mahin buaina hi ka tlanchhiatsan ngai lo.Hmeichhia leh lek phei chu buaina tlingah ka ngai ngai lo zawk.Mahse,tuna ka buaina hi ka hna kaihhnawih anihna awm mah se avaiin Tluangpuii vang a tih theih ang.Hmeichhia vanga buaina..Ani ka tawn hnu atang hian ka tihngailoh ka ti hnem ta lutuk,zanin thil thleng kha sawifiahna tha tawk a nei ngei ngei tur a ni.Mahse,tunah hi chuan engkim theihnghilh tura ruihchhum hmawk bak duh ka nei lo.

Engzat nge ka in ka ngaihtuah lo,ka lu a haia,ka ngaihtuahna a tawi tak thlengin ka in zel.Ka thawmhnaw ka phelh lai leh Khum ka pan lai ka mang hriat rei ruai chauh.

Ka Room kawngkhar kik thawmah ka harha,ka mengchhuaka.Mahse,ka lu na lutuk vangin ka mit ka chhing lehnghal hmiah.Nizan khan ka inhnem lulai bawk a ni.Inbual zawh veleh Damdawi ka ei emaw ka inbelh anih ngawt  loh chuan a reh dawn lo.A rawn kik leha,Buati a ni ngei ang.Eng chu a hria ni maw?

‘Lo lut rawh’ ka ti a.Ka tho chuang lo,ka bawkkhupa,ka tukkhumah Lukham ka daha,ka vuan bet tlat bawk.

Room kawngkhar inhawng ri rak thawm ka hriaa,pen thawm ka hre leh.Tlem chuan mak ka ti deuh.Buati hian min kaitho ngai lo tluk a ni a.Ka awm laiin Roomah a lo kal anih pawhin lo lut loin Kawngkhar bul atangin a sawi duh a sawi mai zel.

Pen thawm lo hnai zel ka ngaithlaa,Khum bulah Pen thawm a tawp chat.Buati a ni lo tawp.Anih chuan Ruata a ni ngei ang.Hun lo lutuk..

‘Ka lu a na ania…’ ka ti hmuk.Chhanna a awm lo..Eng thil ngeiawm nge tih leh a tum tak hrep ni??!!!

‘Eng nge a? Tun ang zing karah i lo kal a?” ka ti leh hluk.Ka inlet nghal thuk bawk.Mahse, ka beisei loh lutuk ka hmuh takah chuan ka phu nghek.Ka mumang anih ringin ka mit ka chhing a,mahse ka men rualin a thutna ngaiah a lo la thu ta reng.Ni dang ang bawkin a lang thar sara, a biangsum khuar kek langin a nui var var bawk.

‘Ka tiharh che a..Mahse, zing ni loin tlai a ni tawha” a ti sap.

‘Eng nge i duh?” ka tawngkam a chang lam hret.Pawi ka ti chuang lo.Thawhchhuah tumna pawh ka nei eih lo.Bakah zing ni loin Tlai a lo ni tawh tak tak em ka hre lo,hriat pawh ka peih lo.

‘I lu a na i tih kha..’ ka zawhna nen inpersan lutukin a ti sap.

‘Eng nge i duh?” ka zawhna ngai bawk ka sawi nawn leh nghut.

‘Hna i lo kal lo va,Phone i  bawka’

‘Anih chuan hna kal turin min nawrluih i tum tihna ni em?”

‘Aih,chutiang ka ti thei lo tih i hria alawm’ a ti dam leh thlap.Ka biak danah leh min chhan danah inngaizawng kan nihna pa khat mah a lang eih lo.Kei chauh ni loin a mah pawh hian kan boruak dik lo hi a hai hauh lo tih erawh ka chiang.Mahse, ni dang ang bawkin a lang cool raiha,kan awmdanah thil danglam thleng lo ang hmiahin a awm thei tlat.

‘Anih chuan i kal thei,ka duh hun hunah hna ka kal theia..Hna chuan min lo nghak rawhse.Chuan,I lo luhna Kawngkhar kha chhuahna tho ania’ ngeiawm zetin ka lui hawk bawk.A awm lohna lam hawiin ka let zui nghal zat.

‘Ka bialpa hi zing atangin  ka hmu lo va,a awmpui nulain a la tho chhuak miah lo tih a sawi bawka,ngaihtuah turin ka kal thei lo tihna mi?” a ti a.A aw a ring lo,a damin a cool hle bawk.

A sawi dik,mahse min ngaihtuah hauh lo.Nizanah pawh Ramdinsanga nen an riak dun maithei.Ka insehruh nghek.Che miah loin ka mu a,mahse a chhuak thawm hriat tumin ka beng ka chhi kar thung.Nizan thilthleng khan mi a ang maiin keimah leh keimah min inngaihtira.Ka induhtawkna a tichhe vek bawk.A sawifiahna ngaihthlaksak turin dikna a nei tih ka hre reng chungin ka ngaithla duh lo.Mahse, sawifiah turin ka duh lawi..Huizzz,he nu hi mi danglam a ni..Ni lo,keima tan a danglam…

Khum a che data,ka beisei loh lutukin ka hnunglam atangin ka kawngah a rawn kuaha,ka hnungah a hmai a rawn phum kak bawk.

‘Sorry…’ a ti lawi rat.A chezia chuan ka chhungril thlengin a fan rawih rawih thei!!!

Kan inngaihzawn tirh atangin keiman ka kuah emaw ka kiss hmasa anih loh chuan vawikhatmah amah zawkin a tan ngai lo.Mahse,insum harsa ka tih ang bawkin harsa a ti ve thin tho tih ka hre thung.Ti lui ila chuan min hnial kher lo maithei.Mahse, tihluih emaw a duh bak kalpui tumna ka nei ngai lo.Hei pawh hi thilthar a ni leh fo.

‘Ngaihdam dil leh ngai tur chu ti lo tur i ni sin?” ka chhungril nen tan mek ti lang lo thei ang berin ka ti sup.Ka mut ngaiin ka mu lui tlat thung.

‘Tihsual ka nei lo,mahse i thin ka tihrim vangin hrehawm ka ti alawm’ a tawp lamah tahchhuak insum ri a hriat tel theih.Engvanga tahchhuak ngawt nge ka hre lo,mahse a tah hian ka chhungril a fan thina.Keimah vanga tahtir phei chu kan inngaihzawn tirh atangin ka thil tum loh tawp a ni bawk.

Ka kawng a kuahna ka laksawn saka,ka inlet a.Amah en thei zawngin ka mu a,ka awmah a hmai a rawn phum lehnghal zat.Ka kuah let lo thei thlawt lo.A chhip samah ka fawp vang vang bawk.

‘Engmah ka ti lo…’ reife kan ngawih hnuah a tichhuak leh sap.

‘Ka hria alawm…’ a

‘Mahse, nimin khan keimah ka nih i ring a,bakah min be miah lo bawka’ a ti leh sep.

‘Ka be lo che maw?”

‘Aw…Nizanah ka nghak che a.Ka tih a ni lo tih hrilh nawn che ka duh a,mahse min be miah lo a.Hna ka kal veleh ka bia ang che ka ti leh a.I lo kal leh bawk si lo ’ a sawi zawh rualin a thaw hak. Ka thinrim chhan a hre fuh lo nge a haider ka hre lo.Kha thil kha a tih ni anga alan lai pawh khan ‘a ti lo ang’ tiin ka rilru ka siamfel hmiaha.A lakah thinrimna ka nei lo.Nizan a Ramdinsanga nen an awm dun vanga thinrim ka ni tih a haider tlat anih chuan hrilh mai a tha.

‘Nizanah ka lo call che a’

‘Maw?!’ min rawn en chho vat..A mit hnawng deuh chap chuan a tilang duhawm zual sauh bawk.

‘Nizanah kan Band kan chhuaka,kan kalna hi Designer lar pangngai tak birthday party a ni a.I hre maithei.Ih,Remruati thiannu ania.Tluangpuii pawh a lo kal ve a..Ka phone ka bagah ka daha.Ka hman veleh ka check nghala.Engmah i lo callna a awm lo’ amah bawkin a ti leh a.A mitmeng lian kel kawlah chuan a thutak tih a lang thei hial.Lemchan thiam tak tan lo chuan tiang hian awm theih a ni lo.

‘Ramdinsanga’n a lo pick a’ ka ti hmuk.Pangngai taka sawichhuah pawh tum ila ka thei lo bur.

‘Ramdinsanga..Ni lo..’ rang lutukin a ti vat.

‘Aw,amah khan a lo pick a.A rawn ko nghe nghe che a’ ka ti leh hluk.Ka kuahna ka phelha,ka inla hrang nghal daih.Lukham nghengin ka thu mu titih.

‘Aih, a theih loh…’

‘Anih chuan amah kan zawt dawn mi?” ka ti leh hmuk.A mitmeng lian kelkawlah chuan thinrimna niawm tak a lang zauh.Mahse, a rei lo ngang mai thung.

‘A tha ngawt ang…Ka’n bia ange’ a ti nghauh.A tho chhuaka,khum atangin a chhuk nghal zat.Tukverh lam a pana,a kekawr ipte atangin aphone a phawrh nghal bawk.

Engmah sawi loin a che zia ka thlir mawl tawp thung.A fiah duh anih chuan fiah mai rawhse.Mahse,kei hi ka danglam nasa tawh tih ka ngaihtuah lo thei lo.Engtiang taka nasain nge min Control erawh hriat ka duh lo.Hmeichhe dang nise tiang hian chance ka pe angem? Teuh lo.Ka chaponain a tlin dawn lo nasa lutuk tlat.

‘A pick thei lo’ rawn hawilet pahin a ti a.Beidawn hmel zetin a thaw hak bawk.

‘Ka hria’ ka ti nghut.

‘Eng maw i hriat?”

‘A pick dawn lo tih kha mawle’

‘Ni lo,ka call ngei..Ok,A awmna tur ka hria,ka va kal mai ang’ a ti leh.Ka chhan hmain Chaira a bag dah lak tumin Chair lam a pan nghal zat bawk.Ka thluak a vir zawk a ni ber.Ka thinrim ngei,mahse kaltir ka phal lo,awmturin ka duh.

Kawngkhar kan thleng rual titih,tlemin ka hma hret.Ka locked nghal a,ka ngheng zui hmiah bawk.

‘Ka lo chhuak dawn mi?” a ti hmak.Ka mitah tak min melh ngar bawk.Nichin lawka hmeichhe derdep leh tihnat awlsam tak anga lang  kha tunah chuan  hmeichhe tihmawh leh ngeng zet a nita thung.

‘Ramdinsanga hi i eng nge?” ka ti hluk.A sawi ka haider lui hmiah bawk.Ka lu na ngut ngut tih ziawm tumin ka lu ka thing leh nawk.

‘Ka thian ka tih kha..’

‘Dik taka min chhan ka duh ania,ka bialnu hi tu man min tawm ka duh lo.Midang chu engpawh nise Ramdinsanga nen lek phei chuan ka duh lo lehzual…’ ka sawi zawh rualin ka nui lui hawk bawk.

‘Ka lo chhuak ang’ a ti dam leh thlap.

‘Tum chhin la…’ ka dar ka ti chhing uk bawk.Beidawn hmel zetin a thaw hak mai.

‘Eng nge i hriat duh?” a ti hul hak.

‘Ka zawhna kha chhanna ka duh,Ramdinsanga hi i eng nge?”

‘Ka sawi tawh kha ’

‘Ahhh,I thian anih chuan nizanah in riak dun em lo ang chu maw?” ka sawi zawh rualin a kut a rawn phe chhuak vuaia,ka biang dinglam a ri pawpa,a thip zui nghal vang vang bawk.

‘Kut min thlak maw?” ka ti sup.

Min chhang loin a tawlhhnung hrat,a hmel buai nak mai chuan a thinrimna thunun thei loin a che tih a ti langa,tap maitur a ang bawk.Ka ti mah mah tih ka hai lo,mahse eng nge ka tih chuan ang?Thah mai duh khawpin mi tenawm Ramdinsanga kha ka thik miau alawm…

‘Ih..Ka..Ni lo,tiang kha ka tum dan pawh a ni lo..’ a ti bah nak.A aw a lawi rat bawk.Chhang loin ka pan hnaia,a tawlh hnung lehnghal zat.Khumin a lo dan takah chuan tihngaihna hre lo tih hriat zetin a ding a.A phar hliaia,beidawn hmel lutukin a dahthla leh hnak.

‘Hmeichhe kutthawh hmang hi ka ngaina lo ania’ ka ti hmuk.Kan insanhleih deuh bawk nen ka en chhuk run bawk.

‘Ka..ka,ka tum dan a ni lo…’ a ti nawi leh nak.

‘A tawp na ni rawhse,chuan ka zawt nawn leh ang che,Ramdinsanga nen enge inzawmna inneih?” ka aw a ring lo nangin a hria tih ka hre tho.

‘Engmah…’

‘Fiahna ka duh..’ ka ti leh hluk.Angaihna hre lo niawm takin min rawn en a,a ang pham bawk.

‘Engtin nge ka tih ang?”

‘I duh dan danin…’

‘Mahse….’ A ban a phar leh hliai.

‘Ka bialnu i ni a,midang nen intawm che ka duh lo.A chiang em?”

‘Tu mah an awm lo…’

‘Zan dar 11 velah ka phone hi Zothani’n lo pick se la eng nge i ngaihtuah ang?” ka ti leh a.Min chhang loin a hmui a pet fan thung.

‘I ngaihtuah ang chiah kha tunah hian ka ngaihtuah.Nizan khan engvangin nge a lo pick tih lam ai chuan kha tiang zan reiah enge a bulah i tih? Ka ngaihtuah ang hi i ngaihtuah ve ang tih ka chiang.A dik em?” ka ti leh duah.

‘Ka..Mahse, I lo call lai ka hre lo,bakah ka phoneah pawh engmah chu tiang a awm lo…’ a sawi zawh rualin a thaw leh hak.

‘Ka hria. I sawi tawh,Hei hre reng rawh.Tunah chuan i sawi ka awih ang,mahse i bulah ka hmu emaw amah nen inzawmna innei anih phawt chuan a pawi viau ang’ ka ti leh nghut.

‘Min that dawn tihna mi?” min en kal mai.

‘Maithei…’

‘Ni lo,chutiang sawi suh…’ lehlawi si chuan..

‘Ahhh,mi tu emaw talin hetiang dinhmun ka thlen theih nan mi thah emaw rukbo pawh ka pawisa lo tih an sawi i hre tawh em?” ka sawi zawh rualin ka hmui a rawn hup chat.A chet dan tehthut chuan min ti hamhaih titih.

‘Eng….?? ’ A kut laksawn sak tumin ka vuana.Mahse, a kut lehlamin ka kut a rawn vuan leh chat.Ka mitah tak a en a,a mithmul sei er nalh sang hnuaia a mitmu lian nalh zet chuan ka chhungril ngaihtuahna thlengin a hmu tlang vek nimaiin ka hria. 

‘Sawi tawh suh,tu mah pawisa vang emaw dinhmun chungnung duh vang mai maiin i that dawn lo tih ka hria,sawi tawh miah suh’ a mittui a tling piau bawk.Ka ding khawng luh ringawt.

A sawi danah khan ka chungchang mi dang sawi thin dan a hria tih a chiang,mahse an sawi kha ka tih a ring lo..Zothani pawh khan mi min sawina a ngaipawimawh lo.Mahse,kan inthen hnuah a Nu nen ka chungchang an sawi dan mawi loh zia ka hria.Min lo ring ngai miah lo va,mahse ka hausakna erawh an duh.Tluangpuii erawh chuan an sawi ang kha engmah ka ti lo ang tih a sawi a,chu pawh ka hmaichhanah ngei..

‘Mi sawi engmah ka ngai pawimawh lo..Khatiang kha ka hriat laiin sawi tawh miah suh..Um..’

Ka biang tawn tawnah a rawn vuana,ka harh zawk.A kawngah ka kuaha,min si chetin ka pawt hnaia,ka kuah bet zui nghal hmak.A dingdihlip a,Ka dar a fawp vang vang.Boxer nen chauha awm ka ni a,a hnutein ka awm a neka,a thawk zawnga a awm che dat dat ka hre thei hial bawk.Ka awmdan a dik lo,ka mipatna tho nghal tawlh tawlh chu ani pawn a hre ngei ang.Mahse, tawlhsawn loin ka nghawngah a kuah chial thung.

‘Min nei rawh..’ ka ti sup.

‘Maw?”

A rawn hawichhuaka,a hmelah mak tihna leh awih lohna a lan pawlh vek.Nia,kei ngei pawn engvanga sawi nge ka nih ka inhre bik lo.Nupui neih hi ka ngaihtuah ngai lo,anihna takah chuan ka naupang tawh hauh lo chungin nupui neiha,Hmeichhe pakhat tana ka nun pum hlan hi ka lo la ngaihtuah tak tak ngai lo.Mahse, tunah chuan neih ka duh.Abak engmah sawifiah dan tur a awm lo.

‘Min nei turin ka duh che..’ ka ti nawn leh a.Ka kut lehlamin a khabeah ka dawm a,a hamhaih hmel,buai deuh nak chuan a ti lang duhawm letling phian bawk.

‘Ni lo,I harh chiang em?” a ti sap.

‘Lutuk,min hnial miah suh’

‘Inbual phawt la..’ tehdaih chuan a..

‘Ka zawhna i la chhang lo..’

‘Inbual phawt la,nakinah kan sawi dawn nia’

‘Ka fiamthu lo ania’ ka ti leh hluk.A then sak.

‘Kei pawh ka fiamthu hleinem,bakah zing atangin engmah ka ei lo a,ka ril a tam tawh.Eitur ka lo zuk siam ang’ a nui leh var var.

‘Buati’n a siam thei…’

‘Ih..Diktak chuan ka lo thlen khan Buati a haw nghala’ a hmai a sen tan tan bawk.

‘Um..A tha lawm,anih chuan ka inbual laiin i lo haw lo ang tih tiam phawt la..’ ka ti leh sup.A sam chhawlleng a bengah ka zeh saka.Ka kutzungpuiin a beng ka tuai kual dun dun bawk.Min rawn nghenga,a thaw deuh halh.

‘Ka haw lo ang,mahse engmah ka tiam ngai lo..’ a mit a de sawr sawrah chuan luhlulna a lang theia. Tihluih awmzia a awm dawn lo tih ka chiang ngang mai bawk.

‘Ok..Sual reuh lutuk..’ ka kun hniama,mahse a thle sawn nghal vat.Lungawi lo zetin ka rum nghal hawk bawk.

‘Nakinah zawk,tunah chuan nizan rim i nam…’ ngaihthlak nuam zetin a nui hak haka.Insum hman loin ka nuichhuak ve hawk tho bawk.

‘Min kuahna hi i thlah loh chuan enge thleng dawn i hria em?” ka ti leh sup.Rang lutukin min kuahna a thlaha,inlak hran tumin a che nghal phat.A biang sen tawn tawn chuan a zak a ni tih a tilanga,mahse ka mitah chuan Hmeichhe Special ber a nithung.Nia,hetiang hunah pawh tilui lo va ka insum theihna hi amah anih  vang a la nita cheu.

Chaw kan ei fel meuh chuan khua a thim tawh.Eirawngbawl a thiam tih a lang theia,a thilsiam engkim mai a tui vel vek.Ei leh in lamah ka khirh hran lo,hna ka thawh laiin vai zingah ka awm nasaa,pawisa ka neih loh chu thuhran nise thiante Duty ai Duty sak chang ka ngah avangin ni khatah chaw ei miah loh tum ka nei ngah lutuk,ka hre seng lo zawk.Tuna ka hlawhtlin tak hnu hian hnamdang thian ka nei thluaha,India ram mai ni lo Foreign  ka thleng fo va.Eng chaw pawh ka ei thei.Mahse,ka duh ber chu Mizo chaw leh chawhmeh a ni reng tho.

‘Lawk,I lu kha a la na em?” Motor kawngkhar hawn a tum hawng loin min rawn ti a.

‘A reh tawh’ ka thle buk.

‘Um,khatiang a lu na khawpa in kha chu sim a tha ‘ a then sak.

‘Anih chuan min vau tihna mi?”

‘Nope..I duh chuan i in theia,mahse a nuam tawk a awm ve lawm’ zu in hrat zet niawm takin a ti leh a.Ka nui hawk mai.

‘Ka lo hre reng ang aw..’

‘Yes,I fel e..Bye..’ kawngkhar hawnna a vuana,mahse a hawn hmain ka pawt let leh rih.

‘Eng nge?” a ti sap.Engmah sawi loin ka kun hniam nghal zat.

‘Mi in min hmu ange..’ a hawi kuala,thla mang lai a ni a,Current a awm loh avangin khawlai a thim thuap.Chhang loin ka kun hniam leha,min hnial ta lo..A hmui nem leh fawh nuam zet ka fawp nghal vang vang bawk.

‘Mi hmuh i hlauh chuan min neih kha hmanhmawh ta la…’ ka thlah veleh ka ti sup.

‘Ka lo ngaihtuah ang,hun min pe la..’

‘Ok..Mahse, min nghah reitir suh..’ ka ti leh sup..

Ka Rooma ka hmuhtirh kha chuan huatna leh thinrimna bak engmah ka pai lo,mahse Darkar a liam leh meuh chuan min nei turin ka sawm ta zawk.

‘Hello’ ka ti sup.Mahse, ka hmaa Computer Monitor lam bak ka rilruah a awm lo.

‘Sangkim,Aizawl ka lo kala’ Pu Dama’n a rawn ti a.Ka mengphar awk.

‘Chutia law? In lam i pan hmasa dawn nge?”

‘Aih,ka let leh mek zawk.Chhungkaw thil hmanhmawhthlak ania,ka rawn tibuai ta lo mai che nih kha’ a ti leh a.Kar khat aia tam kan inbe tawh lo.

‘Um,anih chu mawle.I tifel thei maw?’ ka ti leh nghut.

‘Fel thuak,Nimin khan tlai lamah CHOP lama mi pakhat nen kan inhmu a,CHOP lam ti ila an zinga SX mi kan dah kha..’

‘Chuan…?” ka ti sup.

‘Hman ni a kan thil buaipui,anni lamin an neih tak kha CHOP hming angin kal mah se Ramdinsanga mimal ta tur a lo ni a’ a rawn ti a.Ka hriat tawh sa anih avangin min thawng hran lo.Mahse, ka hria tih erawh a hre lo.

‘Chutia law? ‘ mak tih hmel fein ka ti a.

‘Um..Kan nau khan ala hrilh lo che tihna mi?”  a rawn ti leh a.Dik tak chuan Tluangpuii puhchhiat theihna a zawng ni a ka hriat tlat avangin he mi chungchang bik hi Aruata kutah ka daha.Pu Dama engmah ka hrilh lo va,SX mi kan dah ruk pawh ka zawt eih lo.Ka hriat duh erawh ka la hre vek lo nangin ka lakhawm tam thawkhat tawh.

‘Aih,hrilh miah lo..’ ka ti leh nghut.

‘Aw le,engpawhnise ama mimal tana CHOP lam hian an pek phal ka ring lo.Mahse, ama hming anih avangin an buai ngei dawn niin a langa,an hmuhnawm viauin ka ring’ nuam tih hmel zetin a rawn ti leh a.Ka then suk,ka hmel a hmu phak lo a.Hmu phak vaih se chuan Pa fing leh chekngel tak anih tlat avangin engkim ka hresa vek tih a hre ngei ang.

Kawngkhar inhawng thawmah ka hawichhuak vut.Tluangpuii a rawn luta,amah nena inhmeh zet a Note bu a keng bawk.

‘Dar 2 tan ania,I tlai ka hlau a…’ Dawhkan bula rawn din pahin a ti a.

‘Ka hman tep.Ka tlai lo ang ’ ka thiltih lai ka tihzawm leh a.Ka melh zawk,nidang ang bawkin Uniform a haa,a Kamiz vak thianghlim zet chu a Kekawr kawngah a beng luta,a sam a chhipah a tawn tawm tho vek bawk.Mahse, engemaw dik lo a awm..A hmelah vei nei a ang.

‘Sawi la…’ ka ti sup.

‘Eng? ‘ a hmui a ti sawi zauh.

‘I awm ti nuam lo tu kha mawle,nge ka hriat ve chi loh thil a awm zawk?” amah en loin ka ti leh nghut.

‘Aih,chutiang a ni lo.Eng lo ania,Tlai kha kal lo ila a pawi viau angem?” nuam lo tih hmel zetin a ti ta nge nge.

‘Maw?’ ka ti sup.A sawi ka hriatchian loh vanga zawt ka ni hek lo.Ka en chho a.Kan thian pa khat,Ruata te nena kan kawm thin a lo hawa,Dinner eichhuah an rawta.Tluangpuii hmuh ve a duha,Ka hruai ang tih ka lo hrilh vek tawha.Amah Tluangpuii pawh ka hrilh tawh bawk.

‘Eng lo,vawiin khan ka Patea,ka pa Cousin in min rawn biaa.Ka pa inhmun chungchang velah inhmuh a duha..’

‘I Patea maw?” ka ti leh a.A Pa chhungte nen an inpawh miah lo tih ka hria.

‘Aw,I la hre lo maithei.Kan inhmu khat lutuka,mahse amah hi kan unau lama tawng awmchhun ania’ a ti leh halh.

‘Um..Anih chuan ka lo kal ve zawk dawn mi?” ka ti leh sup.

‘Aih, ngai lo.. kan Unauin kan kal dawna,bakah kei ka kal loh vanga i thiante i hmuh loh a dik nang’ a ti leh sap.Ka bu nghut.Thawveng huai niawm takin a thaw hak thung.

Ka tho a,ka bag ka laa.Ka kalna tur thlen nan darkar khat vel lai ka la nei.

‘I kal hmain thil i ei hmasa duh em?” zangkhai zetin a ti leh a.

‘Ka duh ang’

‘Enge ka siamtir ang?” a ti leh a.Chhang loin ka pawt hnai thut,a te that bawk.

‘Ngatinge?”

‘Thil ka ei duh mawle..Hei hi..’ a hmuihnuai lam ka kutzungpuiin ka tuaia,a thaw hak mai.

‘Min ti hlau dawn alawm..’ a ti hlak..

‘Ka bulah i awm anih chuan engmah hlauh tur a awm lo..’ min chhan tumin a ang ziau a,mahse ka kharsak ta zawk..A ngik deuh faiha,min rawn nghenga,ka kawngah a kuah nghal chial bawk.

In ka thlenin dar 6 a pel tawh,Buati hnenah chaw ka ei chhuak dawn tih ka sawi lawk tawha,ani pawh a lo haw hman tawh.Muangchangin ka inbuala,chhun lamah ruah a tla seng seng nangin khaw lum a zia phah chuang lo.Ka chhuah hmain Ruata’n min rawn call a,kan kal tumna hmun an thlak tih min rawn hrilh a.Ka thaw huai.Diktak chuan Andy-an a thlang a,Ruata nen kan Restaurant ngainat loh ber a ni a.Kan sawisel lo ve ve chungin kan phur lem lo.Mahse, an sawn takah chuan ka thei ta hlauh.

Ka chhuah pahin Tluangpuii ka call a,a reject a,Msg a rawn thawn nghal zat.’Battery low over a.Ka haw veleh ka lo bia ang che’ ka then suk..

‘He lamah hian min lo zui thei em?” Nula ria lamin min ti a.Ka bu nghut,a hnungah ka zui a,Cabin lam min panpui a.Ka thiante an lo awm kim thap tawh.Ruata hmeichhe kawp thar ber,Dingpui’n min lo nuih var var bawk.A vawikhatnan Ruata pawh a serious ve ta.Hmeichhe tha tak a ni phawt ang.

Andy nen kan inchibaia,reitak a lo kawp tawh Abuati a rawn hruai bawk.

‘Khawnge a changtunu?” kan thut fel veleh Andy-an a ti a.

‘An Family thilah kal ngei ngei ngai a neia.Naktukah lo leng la,I hmu thei ang chu’ ka ti a.A bu nghat.

‘Ruata hian Angel ang velin a sawia’ Ruata en a.

‘Ania lawm.Zanin kan Dinner hi a zawh hunah engtiang taka nasain nge kan Misual hi a lo thlak danglam i hmu mai ang’ a ti zat zat.A nui kawr kawr bawk.

Darkar hnih chhung atan an lo book a.Kan hmanhmawh lem lo.

‘Tui pawlh lo a in hi kan Angel chuan a thlakdanglam loh zinga pa khat a ni em?” tih pahin Andy-a a rawn kun hnaia,ka no a melh zauh bawk.

‘Aaah,Ruata uang thilsawi mai mai anih kha’ nui chungin ka ti a.

‘Heh..Tak takin naktukah ka lo kal ang,ka hmu chak hle ania’ a nui leh a.

‘Um,lo kal rawh’ ka ti awlsam leh mai.Ka phone a rawn ri a,ka no dawhkanah ka daha.Ka phone ka phawrhchhuaka,ka nu a lo ni a.

‘Kan chhang lawk ang..’ tih pahin ka tho a,Cabin pawn lam ka pana,ka luh lai khan Hall a Table ho a ruak veka,tunah chuan an lo kil vek. Ka kalpel pheia,thlang lam Balcony ka pan ta zawk.

‘Aw,Nu…’ ka ti sup.

‘In lo thawn ta em?” thildang sawi loin a rawn ti lang lang.

‘Thawn turah ka ngaia,Lawk..Nu,kan Confirm lawk anga,ka lo be leh ang che’ ka ti a.Zingah khan Tluangpuii hnenah ka nu thil rawn sawi thawn ngai ka hrilha,a thawn ta em tih ka zawt leh miah lo.

Tluangpuii ka call dawn a,mahse nichin khan a Battery a low tih a sawia,tunah a la haw loh phei chuan a phone a thi tawh maithei.Sana ka en a.Dar 8 a pel tawh.Ambie nen an kal dawn tih a sawi tak kha..Ambie ka call nghal zat.

‘Hello..’ zangkhai zetin a rawn ti a.

‘I u hi ka be lawk duha’

‘Ka u maw? A Phoneah i be thei lo mi?” mak tih hmel zetin a rawn ti a.

‘Aw,I bulah a awm tho ka ringa’ ka ti leh nghut.

‘Aih,awm lo..Kei chu tukinah Thenzawl ka kala,ka la haw lo…’

‘Maw?” ka ti sup..

Vawiin khan Tluangpuii khan a Patea hmutur khan an unauin an kal dawn tih a sawi chiang lutuk.Zingah a nau a zin anih chuan engvangin nge an kal dun ang tih a sawi?!!

Chapter- 13

‘U Sangkim..’ a rawn ti a.Ka inthingharh vat.

‘Ok,a pawi lo mai,in lo awmdun takin ka ti a’ ka ti sup.

Thlang lam hawiin ka ding a,engvanga Dawt chiang lutuk min hrilh nge anih ang ka hre thiam lo.Engpawh ti dawn se ka dang dawn lo.Chu chu ani pawn chiang takin a hria.Mahse, dawt min hrilh tho.Chhan pakhat chiah a awm thei.Nia,Ramdinsanga vang anih loh chuan Dawtsawi chhan tur a nei lo.Ka Phone a rawn ri a,ka en vat,ka nu bawk a lo ni a.Ka pick hmain ka mit ka chhing leh rih.

‘Aw..Nu,ka la call tlang thei mai lo a.Nakinah ka biak theih veleh ka rawn hrilh ang che’ pangngai thei ang berin ka ti sup.

‘Angai lo,hei a lo thleng leh si e.Eng mah in lo sawi loh vangin ka rawn phili atin nih kha’ lawm hmel zetin a rawn ti lang lang.Ka thaw hawk.

‘A lo thlen chuan a that chu,engtikah nge in lo phei dawn?” ka ti leh a.

‘Ka hre lo,karthar lamah chuan ka lo phei thei maithei,min ngai deuh tihna mi?” a nui hak hak.Ka nu a ni nangin ka chhuang thin,nu hlim thei leh fiamthu duhtak a ni a.Ka pa,pa zawnga zawnga tawngduh lo leh tawngkam chhuak bung em em mai pawh kha a chhaiha,a nuihpui nghek nghek thin a.A thinrim em em tum a thlen pawh ka la hre lo.Ka pa awm loh hnuah a nun a nguai ve ta deuh tih erawh a tilang lo hle chungin ka hmu thiam tho thung.

‘Ngai maithei,tak takin ilo kal theih chuan thil pawimawh sawipui duh che ka neia’ Pangngai thei ang berin ka ti a.Ka rilruah erawh thildang a awm daih thung.

‘Eheu,nupui neih lam a ni thei dawn em?” min rawn chhaih leh a.

‘Maithei..Tak takin,Andy-a a lo hawa.Hei kan chhuaka..’

‘Aw le,zu in tam suh..’ a rawn ti leh a.Ka then suk.

Lut leh mai loin ka dinna ngaiah ka ding vung vunga,ka nu lo kal huna sawipui atan tiin Tluangpuii neih ka duh tih pawh ka chhungte ka la hrilh lo.Mahse, zanin hian enge thleng zui ang? Ka nu khan min rawn be lo se chuan Dawt min hrilh tih ka hre dawn hauh lo.Ramdinsanga nen annih vaih chuan ka induhtawkna hian a tlin tawh kher lo ang.Bakah a tawp thlen law law ka duh ang tih ka chiang.

‘Khawi lam atangin nge i haw dawn?”Ruata’n min ti a.

‘Tluangpuii ka hmu lawk dawna,ngatinge?” Motor kawngkhar ka hawng nghal zat.

‘Ahh,engmah ni lo e..Kan inzui mai ang chu ka lo tia’ a ti awlsam leh puat.

‘Dingpuii i drop dawn lo mi?”

‘Dawn e,mahse kan kal kawng vek a ni tho a..Ok,kal phawt teh,kan Angel hmu lo chuan kan hlim kim lo anih hi a’ a nui hawk hawk,za lo zetin ka then ve suk bawk.

Tluangpuii te In kawtah Motor ka daha,an In ka pan thlaa.Mahse, a lo in kalh bam.Ka ner nawk mai,sana ka en a.Dar 10 a ri tawh.Tun ang hunah pawh a la haw lo anih chuan chu chen chen Patea te nen titi dun tur a vang khawp ang le.Veranda a lo nghah tur nge Motorah lo nghah mai tha ang tih ka ngaihtuaha,an Building bul chiah a mi te nen Step an intawma,tu pawh lo kal thla thei reng anni,Motorah nghak ila a tha zawk ang.Ka kal fo avangin ka bialnu a ni tih an hre maithei,tun ang hunah min hmu anih chuan engmah hre chiang si lo in an sawi chiam theia,thil ho te vanga mualphona thlensak ka duh lo.

A lo haw huna ka Car a hmuh mai loh nan an inchhak thim laiah ka hung thaa,ka chhuk leha.An inbul chiah a Building awm ka pana,Veranda thimchinah ka dinga.Chiang takin Tluangpuii te kawt a lang theia,mahse ka awmna lai erawh a thim avangin an rawn hmu thei kherin ka ring lo.Mahse, an In pan turin ka dinna kal pelh ngei ngei angai thung.

Darkar chanve vel lai ka awm tawh,Motor a khat tawka an tlan leh zauh thin tih loh chu mi veivak hmuhtur an awm lo.Ka Phone ka phawrhchhuaka,mahse ka en hmain Tluangpuii te kawta Bike rawn dingin ka mit a la ta chat.Chhak lam hawia ding nimahse hmeichhia zawk chu Tluangpuii a ni tih ka hre thei tho.Bike atangin a chhuka,a rawn thlahtu hmel ka hmu thei lo,a tlan leh mai dawn emaw ka tih laiin a chhuk ve ta zawk.A helmet a phelh rualin Tluangpuii thiantha tak Sangzuala a ni tih ka hre thei,ka thaw hawk.Atthlak zetin Ramdinsanga a ni lo tih ka hriat takah chuan ka thawveng nghal huai.Reilote an ding duna,eng nge an sawi ka hre phak lo thung.Inah an inzui thla dawn emaw ka tih laiin Bikeah a lawna,a Start zui lehnghal a. A ban a vai zauha,Tluangpui’n a vai let ve bawk.

A inchei danah mi pawimawh deuh leh muk taka titi pui tur nena inhmu tur aiin lengchhuak satliah a ang zawk.Jeans kekawr tight tangin a haa,a mal mum nalh zet a tilangsar zual sauh,T-shirt var lian lam a ha bawk.Khiangkawi ipte,hmeichhe ah tur bika an siam,lian vak lo,a sen a ak a,a hrui a suihchhing lang bawk.A sam a chhipah a zial tawma,Tarmit a vuah lo thung.

Ka awmna lamah a rawn chhukthlaa,Inah a chhuk dawn tih hrilh kher ngai loin ka hre thiam.Muangchangin a kala,ka awmna a rawn thlenga,ngaihthat lohna engmah nei loin min kal pela,zawn nei niawm takin a bag a hai rak rak bawk.

Min pel fel ta maw tihah ka penchhuaka,thawm nei mang loin a hnungah ka zui thla ve nghal zat.An in awmna Floor kan thleng tep tihin zuitu a nei tih hria niawm takin a ding chawta,a rawn hawi let nghal zat bawk.A hnunga lo ding min hmuh takah chuan a tum loh lutuk min hmu tih hriat zetin a phu zawk a,a tawlh deuh dawrh bawk.

‘Nang maw?” a tichhuak  nghal halh bawk.

‘Aw,kei mah…’ ka ti bung vut.

‘I lo kal tih ka hre lo..’

‘Ka sawi loh chuan i hre nang’ za miah loin ka thenlui suk.

‘Um,nia…Mahse, a tlai tawh sia..Ti nge?” a hmelah ngaihthat lohna niawm tak a lang zawk.

‘Ka lo kal..Biak che ka duh’ ka ti leh nghut.

‘Mahse, Phone pawn i sawi theia’

‘Battery low i tih kha…’ ka ti leh sup.A bag hrui nghet zetin a vuan nghal vat chu ka hmu ru reng bawk.

‘Um…Lut ila…’ a ti leh sap.A inhera,a kal zui chu a nimai.

Ka zui luta,Light a On nghala,a eng ta iar.An in hi a zau over lo a,mahse engtiklai pawn a felfai thlap reng thung.An furniture ka hmuh theih ho hi  hmanlai chhuak kan tih ang chi kha a tam zawka,diktak chuan a hlutna zawng zawng belhkhawm pawh ni ila ka in a Living Room chhung a thil awm aiin a man a tlem zawk hial ang.Mahse, an Furniture engkim mai an enkawl uluk tih hriat takin a tliang hnum hlarh reng thung.

‘Thu la…’ a ti leh sap.Ka awmna ep zawnga thutthleng awmah a thu thla hnaka,a ipte a thutna bulah a dahthla nghal bawk.

‘Khawnge i nau?” thutthlak pahin ka ti hmuk.

‘A lo la haw lo’ a ti nghauh,engvanga dawtsawi tang tang nge anih ka hre nek lo.Chumai bakah a awm danah dawtsawi angin a lang der lo bawk.

‘In kal dun emaw ka tia’ a mitah tak ka en run bawk.Mahse, a mit a khap saka,a hawisawn ta daih.

‘Kal dun leh lo,eng nge i lo kal chhan? A tlai tawh si’ dam thlapin a ti leha,mutchhuak niawm takin a ham zui bai bai bawk.

‘Hriat duh ka nei..’

‘Sawi chhin la…’ a nui sak.

‘Engvangin nge Dawt min hrilh ?” ka ti vawt ruih.A mengphar deuh awka,mahse a insiamtha lehnghal vat.

‘Dawt maw? Eng thilah?” a ti satliah,mahse ngaipawimawh lo leh pawisak nei awm lo taka a lan nasat zawh poh leh ka rinlohna a zual ting mai thung.

‘Ambie-a zingah zin turin a chhuaka,a dik em?” ka ti sup.

‘Um..Ih,diktak chuan tihbuai che ka duh lo a..’

‘Min tihbuai i duh lo tak tak nge ka thiante kha i hmu duh lo zawk?’

‘Aih, tihbuai che ka duh lo.Ambie-a a awm lo tih i hriat chuan lo kal ve i duh ngei ngei dawna’ nuam lo tih hmel zetin a che sek bawk.

‘I eng nge ka nih?”

‘Zo….’ A ti nghal hap..

‘Ka hre duh..’

‘I hria..’

‘Ka hria emaw ka ti a, mahse hetiang a Dawt awlsam lutuka min hrilh takah chuan ka chiang ta lo.Bakah i Patea kha Sangzuala a ni tih ka lo hre hleinem’ ka ti leh hmuk.Diktak chuan Sangzuala nen khan midang an va hmu dun em ka hre lo hrim hrim.

‘Ni lo,Sangzuala kha chuan min rawn thlah ringawt..’ a ti leh a.Chhang loin ka tho a,ka pan pheia,a tho ve nghal phat.Mahse, ka hnaih nghal ruak.Ka melhchhuk run bawk.

‘Khawiah nge i phone?”

‘Maw?” a ti sap.Ka sawi a hriat loh vanga min zawt a ni lo tih ka hria.

‘I Phone..” ka kut ka dawh nghal zat.A chil a lem khalha,tih leh maitur hre lo niawm takin a ding zum zat bawk.

 Ka chet rualin ka tihtum hria tih hriat zetin a che ve nghal zat,mahse ka kuna,a ipte thutthlenga a dah ka lak khalh hma ta tho.Min chhuhsak tumin a che zawm lehnghal phat,mahse ka inhera,a bag ka zena,a phone ka dap fuha,ka phawrhchhuak nghal a.A Ipte thutthlengah ka theh thla leha.A Phone min chhuhsak tumin a rawn phar leha,mahse a kut ka vaiper lawp.

A Power Button ka hmeta,a eng ta pap.Battery ka en a,Full….

‘A Low emaw ka tia’  tih pahin a en theih turin ka lek lang nghal vu bawk.A thaw hak ri ka hre thei.

Ka hawng dawna,mahse a in lock.Vawikhatmah ka check sak ngai lo,Phone kher hi chu mimal zalenna ah ka ngaia,ka phone min khawihsak ka duh loh ang bawkin ka bialnu nimahse a phone ka khawihsak ngai lo.Mahse, zanin chu ka en duh,abak a awm lo.

A inrin hmain a banrekah ka vuan a,ka pawt kang thuta,finger lock awma laiah a kutzungpui ka nembet hmiah.A inhawng ve mai bawk.

‘Eng nge tih i tum a?” a ti that.

‘Ka check dawn…’ ka ti hmuk.Ka thutna lam ka pan nghal daih bawk.

‘Ni lo,I thei lo…’ min rawn bawh rawh,mahse engtin emaw tak a chet ka rin sa anih avangin awlsam zetin ka kuah bet nghal hmak.

‘Awm mai mai rawh,I Bialpa ka nih hi..Ka msg sexy deuh a lo awm anih pawhin keima thawn tho che ania,a pawi lo…’ ngeiawm zetin ka ti hluk.

Ka kut lehlamin ka kuaha,lehlamin a phone ka kenga,a lak phak loh turin ka ban ka ti kang daih bawk.Whatssappah ka lut nghala,ka en thla zar zara,engmah huattur a awm lo.Ti ila ka zawn ber a awm lo.Call list ka en leha,engmah a awm chuang lo.Mahse, engemaw dik lo a awm ka la ring ta tho.Whatsappah bawk ka lut leha,ka en thla leh a,’D’ tih a a save nen an inbiakna in ka mit a la chat.Ka Open a,ka chhiar a,titi satliah bak engmah an sawi lo.Mipa nge hmeichhia anih hriattheihna turin DPah engmah lo.An inbiakna lah titi satliah a ni a,Mipa nge anih hmeichhia hriat theihna tur a awm chuang lo.Ramdinsanga a ni thut thei tih ka ngaihtuahnaah a lo lut zawk.A number ka view nghala,ka phone ka phawrha,Ramdinsanga number ka en a.A ni lo..Engmah ngaihthat lohna tur awm si loin engvangin nge ka en a hlauh em em si ang? Dik lo chu a awm.

Ka kuahna ka thlaha,rang zetin a inlahrang nghal vat thung.A inkuangkuah fel nghal thana,min rawn en a.A hmelah hlauhthawnna engmah a lang tawh lo.A lang dam thlap.Nichin lawk kha chuan ka en hlauin a mangang kha ania,minute reilote chhungin a inthlak danglam leh hman tawh.

‘I en zo em?” a ti nghat.Engmah sawi loin pek tumin a lamah ka lek hnaia,mahse Call  a rawn kal chiah.Ka la let nghal vat.Ka en a,’D’ tih a inziak kalh.Tun ang hunah enge rawn sawi a tum ang?

‘Ka lo pick lawk dawn mi?” a ti leh nghauh.

‘Aaah,keiman ka pick ang…’

‘Tu nge?”

‘D’ ka ti tawi tuk..

‘Pick suh…’ min rawn din hnaih leh rawk.A ban a rawn phara,mahse awlsam zetin a banrekah ka man beta,ka pawt thuta,min rawn ngheng rawk.Ka kuahbet lehnghal hmiah.

‘Pick suh…’ a ti nawn leha,mangang aw a hriat tel theih.Chhang loin ka pick nghal hmak.Loudspeaker ka on nghal zat bawk.

 ‘I thleng tawh em?” Mipa aw in a rawn ti a.Tu nge anih ka hria.Tluangpuii ka en a,Ramhuai a hmu ta emaw tihturin a hmai a dang vek.Ka ringsual hauh lo,Ramdinsanga number dang ngei a lo ni.

‘Tluangpui,ka tawng i hre thei em? Zanin kha i che tha takzet ania’ a rawn ti leh a.Hei vang chiah hi a lo nih hi..Tluangpuii ka en leha,a mit a chhing tlat.

A rawn sawi lehtur engmah hriat chakna ka nei lo.Ka kuahna ka thlaha,a phone ka pe a.Engmah sawi loin Kawngkhar lam ka pan ta zawk.Hmeichhe danglam bik niin ka lo ngai thin,ka nunah thil tamtak a thlakthlenga,min Control bawk.Ani ang hian tu hmeichhia mahin min la Control ngai lo..Mahse, ani pawh hi Hmeichhe dang ang bawk a lo ni.

‘Khaw nge i kal dawn?’ kawngkhar ka thlen hmain a ti sap.A aw a lawi rat bawk.

Ka ding chut, muangchangin ka hawi leta,nunna nei lo niawm takin a dang var pap.Chak lo leh puih ngai ngawih ngawih niin a lang.Mahse,pawisawi lo hmel taka a lanna phenah hian Hmeichhe dang ang bawka rul ang maia tur hlauhawm a pai ve tho.

‘Hna thilah bak chuan kan inhmuh tawh loh ka beisei’ ka ti fan ruih.Ka nui chhuak hawk bawk.Mahse, engvanga nui nge ka nih ka inhre lo.Keimah leh keimah ka innuihzat pawh a ni mahna le.

‘Khawngaihin,hetiang hi chuan ti suh..’ a in sut hraiha,a kut hnunglamin a mit a hru zauh bawk.

‘Ka bia che anih loh chuan min be tawh ngai suh ang che’ ka ti leh nghut.Ka inhera,Kawngkhar kalhna hawn tumin ka bana,mahse a rawn tawng leh chuan min ti tawp leh chawt.

‘I hriat ang kha engmah a ni lo..’ a sawi nawn leha,a hma aiin a aw khur a zia ta deuh.Mahse, ka hawilet chuang lo.

‘A vaiin ka sawifiah thei kher lo ang,mahse min sawifiah tir rawh..Khawngaihin..’ a ti leh sap.Ka inher leh a,a mit hnawng chap chuan a tap tih a tilang a,mahse Awle mittui nen ka tehkhin tlat tawh.

‘A vaia i sawifiah theih hunah min hrilh dawn nia,mahse ka hre chak lem lo’ za miah loin ka then leh suk.Engemaw sawi tumin a ang ziaua,mahse ka hmelah engmah sawizui ka duh lo tih a hmuthiam a ni ngei ang.Engmah sawi loin a chip ta zawk.

Tluangpuii nen kan inthen atangin thla a tling tawh,Ka mimal thil nena kaihkawp ka duh loh avangin hna atanga ban tumna ka nei lo.Bakah tihtum ka nei,Ramdinsanga nen aruka an thil tih ka hriatchhuah hma chuan thehchhuah tumna ka nei lo.Staff zinga pa khat angin ka en a,hna thilah bak ka be ngai hek lo.Ka rin ang chiahin insawifiah turin vawi khat te pawh min rawn be eih lo,ka beisei lawk dan anih avangin mak ka ti hek lo.

‘Hey…enge i ngaihtuah leh tak le?” ka hmai bula kut rawn vai pahin Ruata’n a ti bai bai.Ka melh zawka,lungawi lo zeta nur nung chungin min lo melh reng.

‘Hei hi mawle’ tih pahin ka hmaa Laptop ka kawk zauh.

‘Huh,a tha lawm.Dar engzatah nge kan kal dawn? Biak pawh chhan letna chang hre reng reng lo mai’ a ti leh bal bal.

‘Ka zo animai..Hnathawh buai lai laiin min lo be sek lo teh’ ka ti leh hmuk.Engahmah ngai lo zetin a nui hawk hawk duh lek.

Ruata nen kan inzui chhuaka,kan thawm hriaiin Tluangpuii a rawn hawichhuak vat.

‘Ka chhuak dawna,vawiiah chuan ka rawn let tawh lo vang’ chang zetin ka ti nghut.Min chhang loin a bu nghat thung.

‘Ngatinge i ban mai loh?” kan tlanchhuah hnuah Ruata’n a ti boh.

‘Tu maw?” ka ti liam puat.

‘Tu nge nise i tih a?”

‘Ka hre lo a,ka zawt reng che alawm mawle’ ngaihsam hmel zetin ka ti liam leh puat.

‘Ok,Tluangpuii ka sawi tih i hria,mahse i haider miau chuan a tha alawm’ hul zetin a ti leh a.

Ka chhang lo.Ka thiantha ber nimahse ka mimal chanchin,Tluangpuii tel vena leh lek phei chu tu mah sawipui ka duh eih lo.A vai khan theihnghilh vek ka duh zawk,mahse ka thei lo.Ka hriatchhuah apianga keimah leh keimah ka indem thar zel pawh ka sim thei chuang hek lo.Sumdawnna kawngah hian miin min bum theih ka ring ngai lo,mahse Tluangpuii lakah erawh chuan ka tlawm takzet.Pawisa emaw ka thil neih dang engmah ka chan lo,mahse Mipa dang nena kawp ka ni tih hre miah lo va ka nun ka lo hmang kha tlawm ka inti hluah hluah.

‘Awih har ka la ti  cheu mai’ amah bawkin a ti leh a.

‘Duhtawk teh’ ka ti hluk.

‘Sorry..Mahse, mak tih loh a har ve alawm.I duh zia ka hmu thei tlata’ a ti leh talh.

‘Khawngaihin…’

‘Ok..Ka tihpalh..’ nuam ti lo hmel zetin a ti tha ve mai bawk.

Kan kalna tur kan thlenin an lo awm kim deuh thap tawh.A then Poolah an lo awma,a then Pool sira thut mut theihna thinga siamah an awma.A then lo in mawlh mawlh tawk an awm bawk.

‘In lo thleng thei maw?”  Zomawia’n a lo ti a.Ani hi Bank Manger a ni a,Pa lian vak lo,sa tha lam a ni a,Nupui neih lam a ngaihtuah der lo.

‘Um,kan tlai hret anih hmel’ Rinawma te awmna lamah ka bu zauh.A in nasa leh tawh tih hriat zetin a tawng leh lung lung tawh.

‘Tlai nang,saw pa saw enge a hriat ni? A lo thlen tirh pawn a rui tawh’ a ti nang nang.

‘Hrethiam teh..A buai thei em a,chawlh a neihchhun a chen nasaah ngai ang’ ka nui hawk.A nui ve hak hak bawk.

‘Ka sawitur a ni em ka hre lo a,mahse Tluangpuii chungchang sawipui che ka duha..’ zawi deuhin a ti a.Ka en zawk,Swimming Pool lam ka hawisan leh nghal mai.

‘Sawi duh suh…’ ngaihsam hmel zetin ka ti awlsam et bawk.

Ka thiante ho zingah kan inkawp tawh lo tih hre tu chu amah leh Ruata bakah Rinawma a ni mai.Vawiina Ruata’n min zawh bak kha tu man kan inthen chhan min zawt lo.An vaiin an hria,ka mimal thil ka sawi mai mai ngai lo va,chutiang bawkin an mimal nunah ka inrawlh ngai lo va,ka sawisel ngai hek lo.Anni pawh anni ve vek.

‘Niminah a lo kala.Loan a puk duha…’  a ti leh a.Ka chhang lo.

‘A hma khan a loan kha nangman i vawmhlum sak kha ania,tunah Loan bawk a rawn dil leha,a sawi dan chuan an Inhmun lei let a duh a’ a ti leh duah.

‘I Customer thuruk i sawi ngawt thiang lo ania’ ka ti nghut,Ka nui lui hawk bawk.

‘Adik alawm,mahse Tluangpuii hi ka hrethiam chiah lo.A nun hi a harsa niin a lang tlat’ a ti leh a.Ka ngaipawimawh lo tih ka tilang chung pawhin a sawi zawm zel tho.

‘A nun ania,ama tihfel tur alawm..Adik em?”

‘Aw,dik..’

‘Anih chuan ngaihven suh.I duh leh Loan chu pe la,I duh loh leh pe lo la,ka ngaihven lo’ ka mit ka siai zauh.Min sawipui a sawt lo tih a hria a ni ngei ang,beidawn hmel zetin a thaw hak thung.

Tui ka chen zawh veleh ka inbuala,ka inbual zawh hnuah midang ka zawm ve ta chauh.Ruata pawh a tawng danah a in hnem lehpek tawh.Rinawmna nen tu nge rui zawk ang hriatthiam har tak a ni.Midang nen an insual loh chuan a tawk reng.

Kan titi mawlh mawlh maiin ka phone a rawn ri a,ka en a.Aruata a lo ni a,ka pick angai.Ka kalsawna, mi dang awm lohna lai ka pan nghal zat bawk.

‘Hello..’ ka ti sup.

‘Inhmu turin hun i nei em?” a rawn ti a.

‘Tunah chuan khaw pawnah ka awm a.Zanah a pawi em?”

‘Aih, pawi lo..Dar engzatah nge niang?” a rawn ti leh a.

‘Ka lo haw veleh ka rawn bia ang che,ka lo kal ang’ ka ti a.A aw ve mai bawk.

 Chaw kan eikham veleh ka haw nghala,Ruata ka hawsan thung.Ka rin aiin a rui nawi ta lo hlauh.Zomawia hnenah en uluk turin ka chah ta tho.A ruih tawh chuan a chapo hret thina,insual mai a awlsam em em ziah bawk.

Aruata nen kan inhmuhna tur hmun ka pan nghala,thing hnuaia thutna an siamah meizu chungin a lo thu a.Min hmuh veleh a meizial leiah a paiha,a rap hrual nghal zat.Motorah a rawn thu lut a,nidang ang bawkin a thu zawi nghal nan mai.Han en mai hi chuan engmah thiam nei hmel hi a pu hlawl lo.Mahse, Mizo zingah ani aia Hnuchhui tura tha an awm lo vang tihtur khawpin a thluak a tha thung.

‘Hetah hian ka dah veka’ tih pahin a kekawr ipte a zena.Pendrive a phawrhchhuaka.Min rawn pe a,engmah sawi loin ka la a.Ka ak nghal hmak.

‘CHOP leh Tluangpuii inzawmna  lai tak ka la chhui fuh lo ti ila an inzawm lo maithei’ a ti leh nghauh..

‘Anih chuan a hmaa ka thil chan takah khan a tel lo tihna a ni em?” ka ti hmuk.

‘Tel ka ring lo,anihna takah chuan Tluangpuii hi nangmah do zawnga che turin a pen ka ring lo’ a ti leh a.

‘Ok..A lawmawm,Chuan,naktukah nge tunah Pawisa hi ka transfer ang?”

‘I duh hun hunah nimai..Eee,ka la sawi zo lo..’ a ti leh a.

‘Sawi la…’ ka ti sup.

‘CHOP tan Tluangpuii hi a thawk ngai lo ang. Ramdinsanga zawk hian Tluangpuii tana thil pawimawh lutuk a kawla,a Blackmail thin niin alang’ a sawi zawi hle nangin ka bengah chuan tek tlukin a ring thung.

Chapter- 14

‘Maw?” ka ti sup..Ka hriatchian loh vanga zawt ka ni hauh lo.

‘Tluangpuii hi a duh loh zawnga nung tura nawrluih a ni fo niin ka hria’ a ti nawn leh a.Ka thaw hawk.

‘Anih chuan ka tana a pawi thei em?” ka ngaihtuahna nen inrem lo zetin ka ti leh a.

‘Ka hre lo,CHOP hi Ramdinsanga Cousin te nimahse CHOP tan chuan a thawk lo ang,Ramdinsanga mimal tan a thawk anih loh chuan CHOP hian an mamawh lo.Ka sawi awmzia chu CHOP nen hian el chu in in el ngeia,mahse hei hi chu Sumdawnnaa thil thleng ve pangngai mai a ni a.Ramdinsanga hi a phenah a awm em ka hre lo’ a ti leh duah.Ka bu nghut,a sawi dik tlat.

Sumdawnnaah chuan tute pawh kan in el vek,kan inhre pawh veka,kan inhmuh pawn kan titi bawrh bawrha,mahse anni aia sang nih tumin kan in el ru tham vek.Ka zuankhum theihna anih phawt chuan thiang lo leh dik lo a awm hek lo.CHOP hi chu mihlun chhungkua atanga zi chhuak anni a,an hming pawh hi an thlahtute hming atanga phuah niin an sawi thin.Mahse engkim a bulpui chu keimah ang rual vel,an tupa a ni a.Ramdinsanga ni Fapa a ni bawk.

‘Ka tana pawitur anih loh chuan a tha.Mahse, ka lo en zui dawnnia’ ka ti leh sup.

In ka thlen veleh ka inthlaka,khuma thu chungin Laptop ka inchhawpa.Aruata Pendrive min pek ka en a.Ka tana pawimawh em em vek ti ila ka sawisual kher lo vang.Ramdinsanga khan engtin nge ka thil ruahmansa kha a lo neih theih tih pawh a chiang ta vek.Mahse, mak takin Tluangpuii tel vena engmah hmuhtur a awm tlat lo.

Ka muhil thei lo.Ka bengah Aruata thusawi a ri nawn tlut tluta,ngaipawimawh lo ang tak khan ka awm nangin ka ngaihtuahna a luh ngut ngut thung.Engthil hmangin nge Ramdinsanga hian a thunun ang? An inngaizawng lo anih si chuan engthil mahin a Control thei lo.Mahse, Aruata hian thil a hre sual mai mai ngai lo tih ka chiang.A sawichhuak anih chuan hriatchian tumin a bei mek emaw a hrechiang titih tawh a ni deuh ziah bawk.

Hotel kal hmasa loin Showroom lamah ka kal hmasaa,thla thar mai hawn hun a ni tawha.Buaina neuh neuh kan nei nangin hnathawh tibuai khawp a ni ngai lo hlauh thung.Lalnuna nen chawhnu dar 1 atanga Interview kan neihna tur kan sawi dun a,hawn hmain engkim felfai thei ang ber ka duh a ni tawp mai.Ruata nu te chhung hnai,Motor sumdawnna lama rintlak leh thiamna nei tha zet maiin min rawn pui thei dawn hlauha.A thawhna hmasa ten an ui teh chungin hlawh ka Offer that zawk tlat avangin a rawn insawn duh a.Bakah thil thar hmachhawn hi chonaah angai tih a sawi tel a,kan innel lutuk lo nangin ka pawm zawng tak a ni bawk.

Hotel ka thlenin Tluangpuii thutna a lo ruak a.Mahse, Dawhkana Paper vel let ram chuan hna a kal tih a tilang thung.Ka Officeah ka lut tlanga,mahse ka beisei loh zetin Tluangpuii a lo awma.Dawhkan a ka file dah zinga Pa khat a lo kenga,min hmuh rualin Dawhkanah a dahthla nghal vat.

‘Eng nge i tih a?” ka ti hmuk.

‘Pu Dama’n min rawn biaa.File min zawntir a’ a ti dam thlap.Ka hmui ka tisawi nawk,min rawn be hauh lo.

‘Keimah min rawn zawt hmasatur i ni em?” bung zetin ka ti leh hmuk.Tukverh lam ka pana,ka nawr hawng nghal zat.

‘Aw,eng lo ania..Amah khan a be tawh che a ti a’ a ti sap.Ka inhera,min rawn en zawka,rang zetin a hawisawn lehnghal vat.

‘Nidangah chuan ka awm loh laiin ka Officeah lut tawh suh ang che’  ka ti leh hluk.

‘Ok..Sir,ka lo hre reng tawh ang’

‘Kal tawh rawh,keiman ka lo bia ang’ ka ti leh hmuk.A bu nghata,kawngkhar lam a pan nghal chu ka thlira,nu lian ti a sawitur a ni lo.Mahse, apian a tawk ngang mai thung.A mawng a poh deuh laha,a kawng a fek leh rat thung.Ka ngaihtuahna duh loin ka lu ka thing nawk.

‘Lawk,Interview natur thil kha i peih fel tawh em?” a chhuah hmain ka ti leh a.A ding chata,a rawn hawi leta.

‘Julie kuta awm ania,ka lo zawt ang’

‘Lo dah lut rawhse,nangmah zawk ka rualin i kal ang.Lo in ready rawh’ ka ti leh hmuk.

‘Keimah maw?” a ti ha mai.Nimin thleng kha chuan Julie engkim tihtir tum kha ka ni a, mahse ka rilru ka thlak leh ta zawk.Ka bulah awm se la,engvangin nge Ramdinsanga’n a duh lo chung a thunun ka hrethei maithei.Ka tana pawi thei anih loh chuan ngaihven a tul lo tih hre reng mah ila ka hre duh tlat.

‘Aw,I beng a ngawng loin ka hria’ ka ti leh hmuk.A hmai sen tawn tawn chu a zah vang ni loin a thinrim vang anih ka ring ngawt bawk.

A chhuaka,reivakloah Julie-in Interviewna tur thil a buatsaih ho a rawn dah luta,ka enkual thuak thuaka.A tha thawkhat.Kei leh Ruata bakah a Cousin a thu tel ve dawna.Accountant erawh chu Tluangpuii kutah ka dah mai ang chu.

Dawhkana Intercom a rawn ri a, ka ban vat.

‘Hello..’ ka ti sup.

‘Sir,Pu Dama’n a be duh che a’ Tluangpuii awin a rawn ti a.Kan inzui lai pawh khan mi an awm lai chuan ‘Sir’ ti hlirin min ko thina,mi dang an awm loh chuan ka hmingin min ko thung.Tunah chuan ahma ang bawk khan,mi an awm emaw awm lo emaw ‘Sir’ tih a hmang leh ta thung.

‘Rawn zawm rawh’ ka ti bung vut.Tha taka biak hi tlawmna chi khatah ka ngai nge ka hre lo.Kan inthen hnuah vawikhatmah tha taka ka biak ka la hre lo.Ka pa ka chhun avangin ka tawng duh lo va,ka tawngkam chhuak lah englaimahin a nem ngai hek lo.Mahse, Tluangpuii ka biak thin dan erawh ka nih dan pangngai baka nelawm lo a ni tih ka hre ru kur thung.

‘Sangkim,I phoneah ka call tlang thei miah lo che.Engtizia nge?” a rawn zawm veleh Pu Dama’n a rawn ti nghal lung lung.

‘Mi dang chuan min call tlang thei vek a..’ ka ti sup.Ka awm loh laiin ka Officeah Tluangpuii a lo tir luta,ka ngaihdan a ni lo bur.

‘Ka try nasa lutuk,Tluangpuii kha ka tir ta ngawt anih kha.A sawi em?” a rawn ti leh a,Sumdawnna kawnga kan thawh dun hnuah a hmasaber nan ka rin lohna tur thil a ti ta tlat tih ka lo ngaihtuah daih thung.

‘Sangkim…I hre thei em?” ka chhan lawk loh vangin a rawn ti leh a.

‘Aw,ti khan ka hria..’

‘Tluangpuii chuan a sawi em? Ka tirhna lah engmah a rawn sawi lo va’ a rawn ti leh a.

‘Ka hria e.Engthil nge i mamawha?” Pangngai thei ang berin ka ti leh sup.

‘SX-2 file mawle…’ ka insehruh nghek.

‘A hmu lo vang’ ka ti hmuk.

‘Aaaah,hlauthawng suh.A hriatthiam turin ka sawi lo ania’ a rawn ti leh a.

Ka mit ka chhing sawk thung.Hotel a ka sumdawnna bik pawisa che vel engkim hi Tluangpuii hriat loh a awm mang lo,mahse SX hminga sumdawnna hrim hrim hi chu tuman min khawihpui lo.Kei mah chauhin ka khawih thina,chu pawh he Officeah hian ni loin ka In a ka mimal Roomah a ni bawk.

‘Eng ber nge i hriat duh?” ka ti leh a.

‘Nimina Bungrua an rawn ken kha,List hi kha ka deleted palh hlauh peka.I lo Print out tawh takin ka ti mawle ’ ngaihsam hmel fein a rawn ti leh a.

‘Ka rawn thawn ang che’ ka ti nghut.

‘Ok,a lawmawm viau ang’

Chhang loin phone ka off a.Ka Macbook ka phawrha,a thil mamawh rawn sawi ka en a.Mailin ka thawn nghal  bawk.Diktak chuan kan bungraw ken hi bungraw satliah a ni ngai lo va,List lah tihbo mai mai theih a ni hek lo.Mahse, amah zawkin ‘ka deleted’ a tih miau chuan pek mai a tha.List ka dawn veleh ka print out nghal veka,ka dahtha thlap zel a,ka hnathawhna Computer Office a mi hi awm mahse ka Macbook ang em chuan ka tana thilpawimawh a kim lo thung.Ka fimkhur dan hi achang chuan Over lam rawng a kai lek lek.Mahse, hei aia fimkhur dan hi la awm se chuan ka la mamawh cheu zawk ang tih ka chiang. Ka file pawimawh thenkhat hi mi dangin hmu se chuan keimah mai ni lo,ram hruaitu thenkhat tan pawh tal buai laih theihna a ni tlat.

Dar 12 pelh hretah Hotel kan chhuahsana,mahnia inkhalh kual hi nuam ka ti zawk thin a,mahse nimin zing ka inkhelhna lamah ka Dar ka ti naa,khalh chu ka khalh lui thei tho nangin Driver ka hruai ta zawk..A hnungah Tluangpuii a thu ngawi ngar bawk.Driver a titi suam suama,a khat tawkin ka zawm ve zauh zauh.Kum 3 lai kan inchhawr tawha,kei aiin a upa zawk bawk.Mahse, pa kawm nuam leh titi thiam zet mai a ni a,ka Driver te zingah ka hruai tam ber leh ka rinber a ni bawk.

Interview kan zawh meuh chuan khua a thim tawh.Mi 15 lak turah mi 30 chuang an rawn interviewa,an vaiin an Smart  em em vek.Thenkhat phei chu an zir chhuahna School pawh a tha hlawma,Mizoram ni lo,phai lam School thaa kal te an ni nawk mai.Mahse, ka rilruah thildang a lo awm daih pek.Hnathawktu tur ka mamawh lo ni loin,an Pay tur hre sa thlapin thalai Smart leh lehkhathiam rual hei zat hian hna an rawn dil a.Engvangin nge keimah ang khan hmun hla zawkah an vahchhuah mai loh? kei pawn ka tih theih chuan an tan hian a harsa dawn lo lutuk.Ramchhungah an awm dul dula,inchhung lum atangin hna an zawnga,hlawh aia tam inchei nan an hmang zo va.Hnathawk hmingpu siin chhungte tan chhawrna tur an awm leh lawi si lo..Changkan hi chu kan hnam hian kan la hlat deuh niin ka hre rum rum.

‘Ka thlah ang che’ midang kal hnuah Tluangpuii hnenah ka ti hmuk.Phawk zetin min rawn en vat.

‘Ngai lo,ka haw thei alawm’ a ti nghal zat bawk.

‘Biak duhna che ka nei’ ka ti leh tawp.Min hnial leh tum niawm takin a ang leh ziaua,mahse engmah sawi loin a chip leha,a bu ta nghauh.

Driver ka thlah hmasaa.Tluangpuii thlah leh tumin an veng lam pan turin  ka tlana,mahse ka rilru ka thlak leh ta zawk.An veng pan thlakna peng ka tlanpel a,engmah sawi loin a thut ngaiin a thu a,hma lam a en ngar bawk.

Traffic jam tih hriat zetin an lo in line thap.Ka phun hluk bawk,sana ka en a.Dar 7 a pel tawh.Traffic jam kher hi chu ka nuna ka thil hne ber a ni ve chiang khawp.

‘Khawnge min hruai dawna?” a rawn tichhuak thut.Muhil harhchhuak thut a ang phian bawk.

‘I hre mai ang’ ka ti sup.Thinrim niawm takin a thaw nghal hak.

‘Tah hian ka lo chhuk ang’ tih leh Motor kawngkhar hawnna vawn a ruala,mahse ka locked vek.

‘Thu mai mai teh’ ka ti leh sup.

‘Aih,tunah chuan hnathawh hun a ni tawh lo.Ka duh duh ti turin ka zalen’ a ti leh hmak.A sawi dik.Mahse, ka che chuang lo.

‘Biak che ka duh’ ka ti leh hmuk.Amah en loin hmalam ka en a,ngaihsam hmel zetin Steering wheel ka kut zungtangin ka tlir dar dar bawk.

‘Hna anih chuan naktukah kan sawi thei a’ luhlul hmel zetin a ti leh nghat.

‘Hna a ni lo’

‘Anih chuan engmah sawi duntur kan nei lo’ a ti leh nghauh.

‘Keiin ka nei.A tha em?”

‘Aih,tha lo..’

‘A va pawi ve,tha i ti emaw ti lo emaw ka sawitur i ngaithla dawn tho tih i hria’ ka ti leh nghut.

‘Mahni hmasial.Thu duh’ a sawi zawi hle nangin ka hre phak tho.

‘A dang leh…’ ka ti liam puat,a duh duhin min ko pawh ni se ka sawitur ka sawi loh phah dawn chuang lo.

Kan In kan thlen meuh chuan dar 8 a pel tawh.Buati a rawn tlanchhuaka,Tluangpuii  a hmuh veleh a nui nghal var var.Kan inthen tih a hria em ka hre lo.Mahse, kan inkawp chhung khan Tluangpuii angaina hman hle tih erawh ka hria.

‘I intifai phawt dawn nge ka lo siam ang?” Buati’n a ti a.

‘Ka inthlak lawk ang..I riltam tawh em?” Tluangpuii hnenah ka ti sup.Bet lo zetin a thu a, tlanchhuah a inring reng nimaiin a lang.

‘Aw…aih,tam lo…’ a ti bahnak.Ka then suk thung.Inchung lam ka pan sana,Showerin ka intleuh zuai bawk.Ka chhuk leh in Tluangpuii leh Buati an lo titi duna,ka chhuk thawm hriaiin an rawn hawi dun vat.

‘Ka siam nghal dawn mi?” thawhchhuah pahin Buati’n a ti nghal zat.

‘A pawi lo..’

Kitchen lam pana Buati kaltur chiah chu ngaihtuahna dang ka nei thut.

‘Buati,nang i ei tawh em?”ka ti a.Min rawn en a,a bu nghat.

‘Anih chuan min hawsan mai la,kan lo tithei ang’ ka ti leha,min hnial deuh nangin kal turin ka ti ta zawk.

A siam zawh veleh min haw sana,Tluangpuii insangmar teuh reng chu ka hmu ru reng nangin ka haider lui tlat.In a hruai kher lo hian Motorah khan ka sawi duh ka sawi thei reng.Mahse, hruai ka duh tlat.Mak takin a nun hi a awlsam lo tih min hrilh vang khan nge ka hre lo,ka bulah awmse ka duh tlat.A harsatna hriatchhuaha,tihsak theih ka neih chuan tihsak ka duh bawk.

‘Ei ila…’ ka ti sup.Min chhan pawh nghak loin Dinning Room lam pan tumin ka inher nghal vut,mahse a thil rawn sawi chuan min ti ding leh chawt.Muangchangin ka inher a,ngil auhin a dinga,a mitmeng ling hlar maiah chuan min huatna a lang chiang ngang mai bawk.

‘Eng maw i sawi kha?” ka ti sup.Ka kekawr ipte ka zen thun bawk.

‘Ka ei duh lo…’ a ti nawn leh hmak.

‘Naupangchhia lutuka khawsak kha bansan teh,I laka thatchhuah hi ka chak fahran bik lo ania’ ka ti hluk.

‘Anih chuan min kaltir rawh.I hna ka thawh avangin chhiahlawh ka ni lo ania’ a ti leh a.A mitmeng de sawr sawrah chuan hlauh a nei hauh lo tih a lang reng.

‘Ka duh ka hmuh hma chuan i kal dawn lo ka tih kha’

‘Anih chuan tunah sawi rawh’

‘Aaahh,nilengin engmah ka ei lo va,ka ril a tam.Kan ei phawt anga, kan eikhamah ka sawi ang’ ngaihsam hmel zetin ka ti leh sup.

‘Ka ei duh lo’

‘A neitupain ka ei laia inleng riltam deuha dah chu a mawi nang’ ka then lui leh suk.

‘Tur i telh em tih pawh ka hre hleinem’ a ti chang leh fak.Ka kut ka humruh tlat thung.

‘Ok,a tha alawm.I ei duh loh chuan tikhan min lo nghak mai rawh’ ka ti nghut.Ka inhera,ka kalzui nghal daih bawk.Tihmawh leh lutuk,enge maw ni a a inhriat hrep ni??!!

Ka hmanhmawh lo lui tlat.Ka eikham hnuah muangchangin Living room lam ka pan ta chauh.Ka pen thawm hriain a rawn hawichhuak vat.A ding nghal phat bawk.Mahse, ka ngaipawimawh duh chuang lo,amah ep zawnga Sofa awmah ka thu thlaa.Cigarette ka phawrha,ka tan a.Ka hip zui vang vang bawk.

‘I chet dan hi a mawi lo takzet ania’ a tichhuak that.Ka Cigarette ashtrayah ka nawrhlum a,muangchangin ka en ta chauh.

‘A va pawi ve…’ ka ti sup.

‘I sawi duh sawi rawh’

‘Tehreng mai….Mahse,i haw duh viau chuan ka thlah hmasa zawk dawn che mi?”

‘Thlah ka ngai lo…’

‘Oh..Ni tak,nang te chuan Body guard rorum tawk i nei tak…’ ngeiawm zetin ka nui chhuak hawk bawk.

‘Khatiang zawngin a chungchang sawi hlek suh…’ a ti that.

‘Ngatinge?”

‘Nang aiin a let tamtakin a tha zawk’ a ti leh hmak.Ka tho a,a thutna lam ka pana,a che nghal phat.Mahse, a tlai hret,a kawngah ka kuaha,min si chetin ka pawt bet nghal rawk bawk.

‘Kei aia a that zawkna ka hre duh’ ka ti hmuka,ka melh chhuk run bawk.

‘Min thlah rawh…’ ka zawhna a haider hmiah.Thlah mai a tha tih ka hria,ka kuahna ka thlaha,a inlahrang nghal vat,mahse ka kalsawn chuang lo.

‘Nang ai hi chuan mi zawng zawng hi an tha zawk vek,I sual zia hi i hre lo.I tenawm,tu pawh i tana hlawkna turin i hmang tangkai thei vek.Kei thlengin…’ a sawi pawh a ni lo,a au in a au a ni mah zawk.A thusawi mal tin chuan min deng dawt dawt a ni ber.Mi tha ka ni lo,midang ka hlawkna turin ka hmang tangkai  maithei,mahse ani kher hi chu a ni lo.Khang thla kalta zawng zawng khan hman tangkai chu sawi loh ngaihtuah pawh ka ngaihtuah ngai lo.Mahse, tunah min ngaihdan diktak a sawichhuak ta chu ania.

‘Ka hmang tangkai che a maw?” ka ti sup.

‘Aw,nang misual,tualthah pawh hreh lo…’ a aw a khur  titih.Engmah sawi loin ka ding khawng luh ringawt.Zothani ang tho kha a lo ni..Ka lakah hetiang tho hi a rilru a lo ni.Danglam bikah ka lo ngai kha ania!!

‘Min hmuhdan chiang taka i sawi avangin ka lawm e’ ka ti hmuk.

‘Ka hua che’ a ti leh that.

‘Ka hria..’

‘I hriat chuan engvangin nge he laiah hian min hruaia?”

‘Hriat duh ka neih vang mawle…’

‘Engmah hrilhtur che ka nei lo.Min en la,I Staff pa khat,nu leh pa pawh nei lo..Dam khawchhuah tuma bei mek ka nih hi’ a tawp lamah tahchhuah aw niawm tak a hriat tel theih.Ka chhungril a na nghal zawk bawk.Hahthlak hian a..Tiang khawp hian keimahah nghawng a la nei ania.

‘Engvangin nge Ramdinsanga tan i thawh a tul?”

‘Maw?” a ti sap.

‘Ramdinsanga hi i bialpa a ni lo tih ka hria.Mahse, engvangin nge atan i thawh?”

‘Aih,ka thawk lo.Ka bialpa hlui a ni a,min pui nasa em em bawk’ a ti dam thlap.

‘Ka lo hriat dan chuan Ramdinsanga hian a blackmail thin che a..A dik em?”

‘Aih..’ min chhang rang lutuk chuan Dawt a sawi tih a tichiang ngang mai thung.

‘Engthil nge nangmah vauna tur a neih?” ka ti leh hmuk.

‘Engmah…’

‘Sawi rawh,venhim che ka duh…’ ka tita thlawt.A mit a khap sak saka,a hmui a pet fan bawk.Muangchangin ka pan hnaia,a biang tawn tawnah ka dawma.Min en thei turin ka kuai dak nghal bawk.A mittui a biangah a rawn luang thlaa,a insut nghal hraih,a awmdan chuan min fan rawih rawih a ni ber.Ka kuna,a mitah ka fawp nghal vang vang.Ka insum thei thlawt lo.Tlawm taka min siamtu leh min hnawltu hmeichhia nimahse ka duhna hi ka haider thei lo.

‘Hlau suh,ka awm reng..’ ka tinawn leh sup.

Ka kut a rawn vuana,chiang zetin ka mitah tak a en kal bawk.

‘Min venhim i duh maw?” a ti sap.Chhang loin ka bu nghut thung.Ka kut a la sawna,a inlahrang nghal zat.A kut hnunglamin a mit a hru leh zauh bawk.

‘Min venhim i duh takzet anih chuan min hnaih ngai tawh lo la ka him ang’ a thilsawi ka hre sual emaw tiin ka en a.Mahse, a hmel thutak lutukah chuan ka hre sual hauh lo tih a chiang.

Chapter- 15  

‘Ka bula i awm chhung chuan ka him ngai lo vang..’ a ti nawn leh sap.Sawi maitur hre loin ka ding khawng luh ringawt.

‘Hna bakah chuan thian nih pawh ka duh lo…’ amah bawkin a ti leha,a thusawi awmzia pakhatmah ka hre eih lo thung.

‘Tu lakah nge?” reife kan ngawih hnuah ka tichhuak sup.

‘Maw?”

‘Tu lakah nge i him loh?”

‘Sawi mah ila i hrethiam ngai lo vang’

‘Aih,sawi rawh…’

‘I hre duh tak tak em?” ka mitah a en kal mai.

‘Ka hre duh,ka humhim zel dawn che tih i hriat kha’ ka ti leh sup.Kuah tumin ka ban ka pharchhuaka,mahse ‘Ti suh..’ a ti that.A tawlhhnung nghal dawrh bawk.A mitmeng ling hlar maiah chuan dik lo a awm.Mahse,enge anih ka hre thei der lo thung.

‘Nangmah leh nangmah i inbei lo vang’ a aw a dam thlap.

‘I sawi awmzia ka man lo….’

‘Ka tana hlauhawm ber chu nangmah…Engkim i hriatchhuah hunah min thah i duh dawn miau a’

‘Aih, ni lo….’ Ka lu ka thing nawk..Engtiklai mahin ka tina thei ngai dawn lo tih a hre chiang lutuk tlat.Bakah enge hriatchhuah tur awm ka hre lo.

‘Pawi ka ti,avai khan lemchan mai a nih kha.Tu lakah mah humhim ka mamawh reng reng lo’ a ti leh a.Thawveng huai niawm takin a thaw halh bawk.

‘Lemchan…’ ka ti nawn ve sup.

‘Aw,I hna thawk tura min lak ni atang khan lemchanna tualah kan lut duna,hmeichhia anga min en atang khan bul ka tana,min rinngam miau avangin ka tan engkim a awlsam ta vek’ ka kut ka humruh tlat.

‘Ka sawi zel dawn em?” a awah hnehtu inti aw a hriat tel theih bawk.Tawngkaa chhang loin ka bu nghut.

‘Vawi tamtak min chhui a,min hriatchian tumin i beia.Nia,thil thenkhat chu i hre thei mahna.Mahse, I hriat ngai miah loh chu CHOP ho zinga i nau i dah ang chiah hian kei pawh hi i hnenah dah luh ka ni ve..Min chhui tura i tih Aruata kha hruaikawi nan eng eng emaw chu kan hmuhtira,mahse ahmuh ang khan Ramdina lakah hian humhim ngai ka ni lo..Aaaaah,I ngaihdan ang kha chu a ni lo..Spy nihte chu ka thiamna nen a inmil lo..’ ka ngaihtuahna hre thei niawm takin a ti leh duah.Nuam tih hmel zetin a nui sang bawk.Thin nawk nawk aia chak ka nei lo.

‘Eng nge i duh?” ka ti chhuak hmuk.A dang sawitur eih ka hre lo.

‘Kei chuan engmah duh nang,Ramdina zawkin a duh a’ a thle bak.

Ka mumang nise tiin ka mit ka chhing sawk,mahse ka men rualin ka hmaa ding Tluangpuii hmel ka en a.Hmuhsitna chiang tak a lang reng bawk.Engmah pawisak nei hmel a pu hek lo.Pawisak neih a hnekin nuamti hmel a pu mah zawk.

‘Engchen nge Ramdinsanga hnenah i pek tawh?”

‘Ka sawi chuan i hre dawn asin,tak takin kan chhungkaw tan i tha em em a,I chhiat vekna tur thil ka ti thei bik lo.Mahse, engkima ka tana tha ber chu Ramdina a ni a,Min hmangaih bawka’ ka tek chhawk thei.

‘Kangmei tichhuaktu kha ka ni lo..Mahse, thildang erawh keima tih a ni thung.Anihna takah chuan engmah hi thleng palh a awm lo’ amah bawkin a ti leha.Thinrimna avangin ka insangmar tawlh tawlh thei.

‘Thil dang..’ ka ti chhuak sup.

‘Aw,CHOP hoin an laksak tak che kha,mahse kha kha CHOP tan a ni lo.Ramdina tan a ni,min manchhuak tep anih kha’ a ti leh a.

‘Chhuak rawh…’

‘Lutuk,chuan hna hi ka bansan dawn bawka.Naktukah ka bungrua ka rawn la ang’ a ti leh a.Chhang loin kawngkhar lam ka kawk mawl tawp.Ka hriat thin,hmeichhe cool leh induhtawk tak,luhlul leh nawrluih theih miah loh kha a la ni reng,Mahse,ka tan chuan mithi nen danglamna an nei lo.

A chhuak thawm ka ngaithla a,a ke pen thawm zawi tial tial rualin ka nuna thil pawimawh pakhat a kalbo ve ang mai niin ka hre ber.Ka thu thla hnawk,tlawm intih na leh huatna avangin ka thawk a sak vek.Hetiang khawpa bum hi ka ni chungin ka hre lo ania.Hmeichhia vangin ka mit a dela,ka neih zawng zawng laksak ka ni dawn em pawh ka hre lo.Mahse,midang min hriatpui loh sumdawnna, SX erawh engmah a hmu lo tih ka chiang.

Sumdawnnah chuan in elna leh hmasawn duhna avangin midang nen kan buai tum a awm fo.Mahse, tiang em em a inbeih hi chu thilmak a ni tawp mai.Film velah chuan thleng fo thin mah se Mizo zingah chuan thleng thei tur pawhin ka lo ngai lo.Mahse, a thleng tlat,chu pawh midang chungah ni loin keima chungah…Ramdinsanga hnena ka thil pawimawh thawntu kha midang niin Aruata khan a sawia,Tluangpui’n min ti chhe tur zawngin ke a pen thei lo tih a sawi bawk.Mahse Tluangpuii puihna vek a lo ni zawk tih a sawi danah khan a hriat theih,mi dang sawi ni loin amah Tluangpuii ngeiin a sawi,chu pawh ka mita en chung leh timna nei eih lo chungin!!! Engzat fakau nge ka chan pawh ani aia hre chiang an awm lo hial ang.Mahse, a ti tlat.Pu Dama hian engmah a hre sual ngai lo va,tun tumah pawh amah ka ringhlel titih nangin amah zawk bawk a dik leh ta..

Ka thutna bula ka Phone nghawr dar dar ka en a,Ka nu a lo ni a.Ban mai loin ka mit kham thum tihreh tumin ka mit ka chhing vang vang.Tluangpuii kal hnuah inchunga ka hnathawhna Roomah ka luta,Tukverh bulah ka thu tlaivar ta thak.Ka mut a chhuak chhin lo hrim hrim.

‘Aw, nu..’ ka ti sup.

‘Ka rawn tiharh che em?” zangkhai zetin a rawn ti lang lang.Ka then suk.Sana ka en a,dar 6 a lo pel tawh.

‘Ka tho tawh lawm,mahse i va lo call hma ve’ ka ti a.

‘Nia,I nutei pasal ICUah a awm meka,nizanah an dah luta..’

‘Min lo call miah lo’ ka ti leh sup.Stroke vanga che hlei thei lo a ni a,Damdawiin an lut reng reng bawk.

‘An Call tlang thei lo che an ti a..’ a rawn ti leha.Ni dawn tak,nizanah dar 10 hnu lamah ka Phone ka off a.Nichin lawkah ka On leh chauh.

‘Ka Battery a lo low a.Khawi Hospitalah nge an kalpui?” ka ti leh a.A rawn sawia,chhun lamah anni pawh rawn phei an tum tih a sawi nghal bawk.Tunkar tawpa lo kal tum sa hrim hrim anni a,mahse Patea a that loh zual leh tak avangin vawiinah lo kal an tum ta zawk tih a sawi zui mawlh mawlh.

Ka phone ka dahthlaa..Ka thutna bul turkverh atangin ka hma lama Aizawl khawpui then khat lang ut chu ka thlira,ka rilruah nizan atanga ka ngaihtuah ngai bawk a rawn lang a.Ka nunah a vawi khat nan Hmeichhiain min buma,chu pawh Nupui atana neih tuma ka rilru ka pek awmchhun a la ni zui…Ramdinsanga nen engtin chiah nge ka hnung lamah min nuihsawh ang?Ka lu ka thing nawk,engmah tihtur a awm lo.Hun kal tawh chu hun kal tawh a ni,ka tihsual atanga inzir lova ka inbawhbehtir tlat emaw hma lam ka pan thei lo anih chuan Mi pangngai ka ni nang..

Inhnuaiah ka chhuk thlaa,Kitchenah ka luta,  Buati’n thil a lo sila,min hnungchhawn zawnga ding a nih vangin min hmu lo.A zai rat rat bawk.

‘Eitur min lo siamsak la..’ Fridge hawn pahin ka ti a.A rawn hawi vat.

‘Awi,ka phu nasa lutuk..I lo lut thawm ka hre lo reng reng’ a ti a.A nui a,za miah loin ka then ve suk.Tunah rih hi chuan Khawvelah hian nuihchhan tur awmin ka hre lo hrim hrim.

‘Eng nge ka siam ang?” amah bawkin a ti leh a.

‘A pangngai animai..I hmanhmawh deuh dawn nia’ ka ti leh sup.Tui Bottle ka lachhuaka,ka in nghal khawlh khawlh bawk.

‘Nizanah Gate i kalh lo nge zingah i hawng tawh zawk?” a ti leh a.Nizan khan Tluangpuii chhuah hnuah ka chhuak miah lo.

‘Zingah ka hawng anih kha’ ka tita ngawt.

‘Ka hlauthawng hman alawm’ a nui a.

‘Vawiinah ka nu leh Zara an lo phei dawna,tlaiah eitur i lo siam kep dawn nia’ ka ti a.Hlim zetin a khek raih.Ka nu nen an in nel em em a.Ka nu a lo phei chuan an nui nileng titih ziaha,a hlim viau pawh a demawm lem lo.Ka Nutei pasal dam loh thu ka hrilh leha,a hmel a nguai nghal rawih.An inhrawn rei bawka,ka hriatthiampui viau.          

Shower hnuaiah ka dinga,ka chau hluah hluah.Nizan khan a bang dawn tih a sawia,hnialna ka nei eih lo.Ka hmuh phak loah awm se ka duh ber.Amah ka hmuh apianga ka atzia leh bum ka nih tih ka hre chhuak ziahtur pawh ka duh hek lo.

Damdawiinah ka kal hmasaa,ka Nutei leh a fanu,kei aia kum 5 a naupang,Amal-i an lo awma.An meng phelh dun phang mai.A awmdan tlangpui ka zawta,nizanan lam aiin a lo zia tawha.Amah pawh a harh tha tih an sawia.Ka thaw deuh huai,an eizawnna hi Dawr niin Patea tel lo pawn Amal-i leh Jonathana’n an enkawl thei vek.Mahse,Pa chu Pa a ni.Engmah tithei lo emaw rui thle mai mai pawh nise an hlu lutuk.

Jonathan-a hi kei aiin kum khatin a upaa.Amal-i nen an inkara mi hi a tleirawl laiin a boral tawh thung.Jonathan-a nupui neihna tur an tifel thawkhat tawha,inbuatsaihna a kal mek lai a ni a.A pa damdawiin a luh leh takah chuan buai erawh a buaithlak deuh maithei,mahse an inneih nan thla khat zen zawn a la awm a,Damdawiinah a awm rei lo ve thei tho bawk.

Showroom lamah ka kal hmasaa,nimin a Interview kan neih ho kan enfela.Kan laktur ho kan thlang fel nghal vek.Tlai lamah Hotelah ka kal ta chauh.Diktak chuan Tluangpuii hmuh ka duh loh vanga Showroomah khawmuang lui ka ni tih ka inhria.

Ka Office awmna Floor ka pan chho a,ka thlengchho tep tihin Stepah Julie a rawn chhuka.A hnungah Tluangpuii,Percel lian vak lo pawmin a ding bawk.A bungrua ho a thiarchhuak tih sawi kher ngai loin ka hria.Ka melh zawka,min en  loin hnuai lam a bih ngar thung.Hrep tak hian a..A duhthu ngeia bang a ni a.Tunah zak awm taka han awm leh vel hi a tul lo ber.Aaaah,lemchan thiam tak ania lawm.Julie hmuh lai tala hrehawm ti anga a lan ve pawh a tha hrim hrim.Ka ten hluah hluah.

‘Good Evening Sir…’ Julie-in a ti a.A nui var var bawk.Ka bu nghut.Ka kalpela,mahse ka ngaihtuah naah engemaw a rawn lang zawk.Ka dinga,ka hawilet nghal vut.

‘Julie…’ ka ti hmuk.Rang zetin a rawn hawi nghal vat.

‘Aw,Sir…’

‘Accountant thar naktukah a rawn kal dawna.I lo puih angai ang’ ka ti hmuk.

‘Mahse,Sir…’

‘Eng nge? ‘ chang zetin ka ti leh hmuk.

‘Aih,engmah…Ka lo buaipui dawn nia’ atia.A then leh sak.Ka inhera, ka Room lam ka pana.Diktak chuan khawi atangin nge Accountant thar a lo kal dawn ka hre lo.Tu mah biak ka la nei lo.

Ka Office ka luh rualin ka dawhkana Envelope lo awm ka hmu nghal a.Enge anih ka rin hriat thei nghal mai.Thu loin ka lakanga,achhunga awm ka lachhuaka.Ka rin ang ngeiin Tluangpuii banna lehkha a lo ni a.Atir lam bak ka chhiar lo,ka hmet hlawma.Dustbinah ka vawmlut nghal daih.

Tukverh bulah ka dinga, hnuai lam ka thlir thlaa.Nidang ang bawkin Motor a khat put.Ka ngaihtuah naah Ruata a lo langa.Ka phone ka phawrha,ka Call nghal zat.

‘Yes,Dude…’ thawveng zetin a rawn ti a.Ka mood nen a inmil lo vel vek.

‘Khawiah nge i awm?” ka ti sup.

‘Inah..Zanin chu…” a rawn ti leh a.A sawi awmzia ka man mai lo.

‘Eng nge zanin?”

‘Ekhai…I va theihnghilh hma si ve…Rinawma ka hrilh dawn ania’ a rawn ti leh a.Ka hre chhuak zawk.

‘Ka hman lo maithei,ka nu a lo kal a’ ka ti a.

‘Eh..Vawiinah mi?”

‘Um…’

‘A haw lehnghal dawn em?’

‘Haw nghal lo ang’

‘Anih chuan thulh lo teh,Rinawma tan a pawimawh a.Kim sak ve hram a tha.Naktukah Andy-a a chhuk leh tawh dawn bawk si’ a rawn ti leh duah.

‘Ka lo tum dawn nia..Lawk,hmanni khan hna lam kha i rawn sawi tiraw?”

‘Eng hna?’ bo hmel zetin a rawn ti hu.

‘In chhungte,Thingtlang lam mi i tih kha…’

‘Eeee,kha kha maw? Ngatinge?” a rawn ti leha.

‘Accountant ka mamawh…’

‘Maw? Showroom lamah kha chuan Tluangpuii a awm ang i ti maw ka ti a’

‘Nia,mahse tunah ka mamawh.Naktuka zawm theitur..’

‘Hmanhmawhthlak thei bawk si.An khuaah a chho maithei,ka hre lo’ a rawn ti leh a.

‘Lo be teh,ka duh hmanhmawh ania’ ka ti leh a.

‘Showroom Open hun kha thlatharah a ni lawmni?”

‘Aw,mahse ani chu Hotelah zawk a awm ang’ ka ti hmuk.

‘Anih chuan ani kha Showroomah zawk i dah dawn tihna mi?” a rawn ti leha,a hming sawi lo mahse Tluangpuii a sawina a ni tih ka hria.

‘A awm tawh lo…’ ka sawi zawh rualin mak tih hmel zeta a thaw hak ri ka hre nghal zat.

‘Lawk…’

‘Eng nge?” bung zetin ka ti leh hmuk.

‘A bang tihna nge i ban?”

‘A bang….’ Ka ti mawl leh tawp.

‘Um..I tha em?”

‘Engvangin nge ka that loh ang?”

‘Aaaa,ka hre lo..Eng lo…’ a tawng laklawh laiin ka titawp hmiah.

‘In nau chu i lo be dawn nge dawn lo?” ka ti hmuk.Tluangpuii chungchang sawi zawm ka duh lo tih ka ti lang chiang viau.

‘Ok..Ok,ka lo bia ang.Zanin chu aw..’ inthlahrun hmel zetin a rawn ti a.Tluangpuii kha a ngaina tih ka hria,kan that leh mai pawh a beisei tih ka hai hek lo.Mahse,kan tha leh tawh ngai dawn lo tih kei hian ka chiang.Ka tih ngai loh tamtak min tihtir theitu leh min thlakdanglam theitu anihna aiin min ‘Bumtu’ tiin ka damchhungin ka hre reng tawh zawk dawn tih pawh ka chiang.

‘Nizanah i lo kal dawn maw ka ti a?” Ka Nutei te In ka luh rualin Amal-in min lo ti vat.

‘Ka buai leh deuh thut a..’ ka ti a.Ka thensuk bawk.

‘Ka ring reng a..Mahse,tunah i lo kal tho a…’ a ti leh a.Ka nu leh Nutei bakah kan chhungte an lo titi mam mam.Nutei Pasal niminah Damdawiin atangin a chhuak thei ta hlauha.Karleh mai hi Joanthan-a nupui neih hun a ni tawha,nidanga Damdawiin a chhuahsan aiin chhungkaw tan chuan a lawmawm zual bik lo thei lo. 

‘Mam,hei hi ka thiannu,Maria-i” Amal-i’n a rawn ti a.Ka en chho vut.Amal-i leh Hmeichhe Pakhat,amah ang rual vel tur an lo ding duna.A hmeltha hrep zui bawk.A sam,a dar chen vel niin a kir deuh a,a hmai tung lam deuh nen chuan a inhmeh viau bawk.A ngo paw deuh phaka,hmuh a nuam viau.Ka hmuh tawh hnu niin ka hriaa,mahse ka hmuhna ka hre chhuak mai thei lo.

‘Ka hmuh hnu a ang hle mai’ ka ti sup.

‘Damdawiinah khan i hmu ang.Doctor ania,tuna ka Pa awm pawh kha amah vekin alawm min buaipui’ a ti leh a.Ka bu nghut.

‘I tha maw?” ka ti a,ka then suk bawk.

‘Um,tha lawm…’ a nuih zawngin a ha var nalh zet a langa,ka mitthlaah tul lo zetin Tluangpuii a rawn lang nghal zawk.

‘Thiannu,lo thu ve la..Ka nu ka va be lawk ang’ Amal-in a ti leh a.Chhang loin a bu nghat.Reivak loah Amal-i a rawn leta,a rawn thu thla ve nghala.An thian dunin eng eng emaw sawiin an titi a.Kei erawh chu ka rilru hmundangah a awm daih thung.

‘Mam…’ ka hmai bula kut vai pahin Amal-in a rawn ti a,Ka phu deuh zawk.

‘Um..’ ka ti nghal sup bawk.

‘Biak i va hre thei lo tak..’ a ti nghat.Tihngaihna hre lo zetin ka nui ta ngawt.Maria-i ka melh zawka,min lo en reng chu niin.Ka en ve takah chuan zak niawm takin a hawisawn nghal vat thung.

‘Hei hi en la…’ tih pahin a Phone a rawn lek hnaia.Ka en ve mai bawk,inneih zan Party na tur thil vel a lo ni a.Ka enthla dan dana.Tluangpuii te Band hming ka hmu takah chuan ka insehruh nghal teuh.Jonathan-a hian Tluangpuii nen kan inthen tawh tih a hria.Mahse, engvanga ti nge anih si?

‘Hei Tluangpuii te Band tiraw?” tih pahin min rawn en a.Kan tawng midangin an hriat leh hriat loh en niawm takin a hawi kual zak zak bawk.Kei erawh chu ka hrawk ro lutuk tihreh nan ka chil ka lem te te.Min rawn en a.Ka chhanna a nghak tih ka hria.

‘Um,nih kha…’ Pangngai thei ang berin ka ti sup.

‘Pawi i ti lo tiraw?”  a ti leh sap.

‘Aaahh,ti nang..Ti nge?” ka nui a.

‘Eng lo…’ sawi zawm loin a ngawi leh daih,a hmui a pet fan bawk.

‘A ho lutuk,thil hlui anih kha..’ a rilru tihnawm nan ka nuih leh suk.Za lo zetin a then ve sak.

‘Nia,ka u khan tih loh a tuma,mahse an Band ami kha ka u thianpa nau ania.Bakah anni aia Live a zai tura tha an awm chuang lova’ a ti leh a.A sawi dik,ka mitthlaah Tluangpuii a lo langa,Drummer a ni tih ka hriat hmasak ber zan ka ngaihtuah naah a lo lang leha,mak ka tih zia leh a thiam si zia kha nimin ang maiin a la chiang.Mahse,ani khan min bum anih kha….

‘A pawi lo ka tih kha,bakah ka x te zawng zawng i ngaihpawimawh dawn chuan i dam khawchhuak zo nang’ ka mit ka siai zauh.A ner nghal nak thung.

‘Tenawm lo teh,I lerh si..’ a ti leh a.A sawi dik lehpek.Tluangpui’n min bum tih ka hriat hnu khan theihnghilh tumin  zantin deuhthaw ka chhuaka,hmeichhia lah karkhat emaw bak ka kawp ngai lo.Ka serious loh zia an hre reng chung pawn ka duh duha ka khawih theih anni ziah,mahse tumah Sex ka hmanpui lo.Chakna ka nei lo ni loin min ti phur zo lo.Amali tum deuh bar chu ka en a,Ka chhaih chak thut,a beng bulah ka kun hniama.

‘Anih chuan chance min pe nghal la..’  ama hriat tawk lekin ka ti a.Maria-i ka mitmei zauh bawk.

‘Tak tak em?” phur zetin a ti nghal zat.Ka lerh vangin min hau zo chiaha,tunah lem a phur leh mah mah lawia.Hmeichhe ho tak hi chu a.

‘Pawi ka tih ka ring chiah lo ‘ ka mit ka siai leh zauh.

‘Yesss…Enteh,a Star nasa mangkheng che ania’  a ti leh a.

‘Ka hria lawm’ ka nui a.

‘Hm,nichin khan tu nge anih i hre ve chiah anih kha a,ani te chuan hmanni atang khan a lo vei ngat ngat che’ a ti leh a.Maria-i ka melh zawk,a bula thu nen an titi a,a chet zawngin a sam kir deuh chu a che tel ve zela,a ring sang lam leh no nalh zet nen chuan a hmuh a hrehawm lem lo viau.

‘A number ka pe ang che aw’ a rawn ti leh sa sa.Ka bu nghut ringawt.In ka thlen hnuah a number min rawn thawn ka hmu ta chauh.

Maria-i nen kan inhmu fuh thei ta viau,Nutei te In lamah ka kal tama.Nitin ka nu a phei ziah bawk.Ka u leh a fapa an rawn phei veleh ta bawk nen ka In reh ruih thin pawh tunah chuan nui thawmin a khat leh tawh.

Jonathan-a te inneih ni a ni a,mi an tam viau.Khawtlangah a inhmang nasa a.Mi hriat a hlawh em em bawk nen lawmpuitu angah pawh a mak hran lo.Maria-i nen kan thu duna,a nalh lehpek.Ka hmuh tirh atang khan Make-up a hman viau ka la hre miah lo.A number ka nei reng chungin ka la be ta chuang lo cheu.Amah hi Thingtlang lamah an lo post a,Patea Damdawiin luh hma khan Aizawlah an lo sawn lut ve chiah tih Amal-in min hrilha.Tluangpuii nen in anna an nei miah lo chungin ka hmuh apiangin Tluangpuii ka hre chhuak ziah thung.Tluangpuii nen kan inkawp tawh tih a hria em ka hre lo.Min hretu tam zawk hian Tluangpuii nen kan inzui aiin Zothani nen kan inzui kha an hre lar zawk.Diktak chuan Tluangpuii khan kan inkawp tih kha mi hriat a hlau miaua.Tenawm hian a…..

‘Zanin chu aw…’ ka ti sup.Min rawn en nghal vat.

‘Party naah ania ka tih’ ka ti nawn leh sup.

‘Ka hre lo,kalpui tur pawh ka hre mai lo’

‘Kalpuitur dang i duh tihna mi?”

‘Aa,adang tihtur pawn tumah kalpuitur ka nei lo zawk.Amal-i lah a buai si’ a ti leh a.

‘Anih chuan ka rualin i kal duh em?” ka nui leh suk.

‘Min sawm tak tak chuan….’

‘Ka tih tak tak loh hi chu ka sawi khat viau ania’

‘Um..A tha lawm’ ngaihtuah muk hmel zetin a ti sap.

Hmeichhe ho tak hi chu a.An beisei sa reng thil han sawi ila, an han hre lo der kuala,hahthlak hlawm lutuk.Eng pawh nise kal ngei ngei ka duh tlat,ka duh chhan erawh amah bawk kha..

Partyna tur hmun kan thlenin an lo awm nual tawh.Zawn ka nei,ka awmdan lah a dik hek lo.Ka ni deuh hu niberin ka hria.Ka hawi kual leha,ka hmu lo.Stage lam ka en a,ka hmu chuang lo.A bansan tawh zawk nge ni??

‘I tha maw?” ka hnung lam atangin hmeichhe awin a rawn ti a.Ka inher vat.Ka zawn ngei kha a lo ding reng tawh,mahse a landan engkim a danglam vek.Ka hriatthin Tluangpuii kha a ni tawh lo emaw ka ti hial.A sam a tawi mata,a incheina lah Mipa incheina nen a danglam hek lo.Ka ngaihtuahna a vir zawk.

‘Min bia em?” ka ti nghal nghut.

‘Aw..I dam maw?” a ti nawn leh a.

‘Ka tha…’ ka ti hmuk.Ka hawileta,ka bula ding ,Maria-i kawngah ka kuah nghal zat.Phawk zetin min rawn en nghal vat bawk.Ka chet dan tehthut khan a thawng tih a chiang.Mahse, a hamhaih rei lo,min rawn ngheng titih.

‘Kan chhuak dawn mi?” ka ti nghal sup bawk.

‘I thu vek alawm..’ a nui var var.

Ka inhera,Maria-i ka kaia,ka hnunga Tluangpuii lo ding reng chu pawisak nei lo hmel zetin ka nuih lui suk bawk.Eng nge lantir ka tum ka hre lo.Mahse, amah lo pawh Hmeichhe dang tamtak ka hmu tih hria se ka duh,min tina miah lo tih hria se ka duh bawk.

Pawn kan thlen veleh Maria-i ka thlaha,Boruak thianghlim tlachham niawm takin ka hip nghek bawk.

‘I nuam lo deuh em?” min ngaihtuah hmel zetin a rawn ti a.

‘Aih,ka tha..Boruak a uap lutuk kha ka buai deuh a…’ ka rilru a lo lang hmasa ber ka sawi nghal pawp.

‘Nia,a uap khawp mai.Kan haw mai dawn mi?” a ti leh halh.

‘Ni lo.Party naa kaltur kan nia lawm.Rei vak lo Pawnah hian awm ila kan lut leh dawn nia,a tha em?” ka ti sup.

‘Um..I thu vek ka tih kha..’ min rawn nek a…Ka bialnu anga awm a tum tih ka man thiam nghal vek.Mahse, pawi ka ti eih lo.A nalha,anihna nen hmeichhe zahpuiawm lo tak a ni bawk.

‘Nichina be tu che kha zanin a Live Band an sawm a an Drummer kha tiraw?” a ti chhuk thut.

‘Tu kha maw?” ka hre lo der hmiah.

‘Kan hnungah khan a dinga,a sam mipa sam anga cut kha..’

‘Ka hre lo..’ ka ti leh sup.

‘Um..A hmelthat nen lesbian atan chuan a uiawm ka ti’ a ti leh a.

‘Maw?” ka ti thawt.Ka tum aiin ka au ring hret bawk.

‘Ngatinge? Dik lo a awm ami?’

‘Aih,enge i sawi kha?”

‘Eng ber kha? lesbian ka tih kha mi?”

 ‘Aw,tu maw Lesbian?” ka aw a khur lo chauh bawk.

‘Tluangpuii kha,ka hre vak lo nangin ka Cousin nen an inkawp ve zuai tawha.Bakah a inthup nasa ve a.Kan Society hian hetiang lam hi a pawm loh lutuk vang pawh aniang.Mahse, tunah chuan a inthup ta lo law law an ti a.A hmeltha sia,a uiawm ka ti’ a ti leh a.

Ka vawt nghal rawih rawih thei.Mak ka tihzia leh min den nat zia sawifiah ngaihna a awm lo.Mipa hi Mipa ni loin,Hmeichhia inti Mipa chawp ka nita zawk niin ka hre ber!!!!