One Night @ LACHEN

ONE NIGHT @ Lachen

Maengi Ralte

Ka alarm rik rualin ka inperh tho nghal zat. Ka phone ka bana,Sana ka en a. Dar 4:30 chiah. Inngaihtuah buai map loin khum atangin ka chhuka,Bathroomah ka tlan lut nghala. Ka inhlip sawk sawka,Shower hnuaiah ka dinga. Ka on a,Tuiin ka taksa a rawn sik rualin ka thaw hak.Nizanah Geyser ka on lawk vek chungin khawvawh lam tehnaa 4 vela hniam anih avangin a vawt tha ver vawr viau tho. Mahse, vawiin lam ka kalna tur erawh chu ai mah chuan ala vawt cheu dawn. Vur in a khat luk tih an sawia. Vur tlak ve mai mai ngai lohna Mizorama piang leh seilian tan chuan a phurawm dan a dangdai takzet.

Ka inbual zawh hnu lawkah Thingpui min rawn pe a. Insiam pahin ka in a. Ka tum lawk ang thlapin dar 5ah chuan ka inpeih at tawh.

‘Zin bo la,hun nuam tak hmang la. I rawn let leh hunah chuan mithar var ni ang che’ tiin min duhsak em emtu,ka peng pawimawh ti hiala ka sawi thin ka thian pakhatin min ti a. Ka hel zak zak hnuah ka ngaihtuah vang vanga,ka indaidanna pindan thiat turin ka huaisen tawk nia ngaiin Sikkim zin turin ka inbuatsaiha. Ka tum lawk dan chuan karkhat chiah chiah Sikkimah ka awm anga, ka kalni leh haw ni nen a vaiin ni 9ah ka inkhung leng ang. Ka hnaah Pawh chuti takin buaina tur a awm lo turah ka ngaia. Kalpui pawh nei loin keimahin ka theih ang angin ka inzir chawpa. Ka chhuak ve mawp maia.Ka nuin min ngaihtuaha,mahse ka pa erawh chuan naupang ka  ni tawh lo a,ka mizia ahriatchian avangin ka inenkawl thei tawk ang tih a ring ve thung.Vanneihthlak takin ka tum lawkna chunglamin mal min sawm a,ka ruahmanna ka la rap dik ta zel.

Kan kalna tur hi N.Sikkim a ni a. Gangtok atangin 200km vel a ni a, mahse  a kal zawng zawng te lo tihtawh thin danin Gangtok atanga 125km a hla LACHENah kan riak thung anga.Naktuk zing dar 5ah bawk kan kal tumna GURUDONGMAR panin kan chhuak leh ang. Ka lo rinlawk anga kal duh na hmun a mahni thu a kal pawp pawp theih emaw ka lo tih kha ni loin Pass a lo ngaia,ka thlenna Hotel ten min buaipui veka. ‘Tourist tam vanglai anih tawh avangin Pass hi i hmu ngei ang kan ti ngam lo a,Mahse, kan theihtawp kan chhuah ang’ tiin min chhanga. Ka nghah chhungin nikhat Gangtok khawchhunga tlawh tur awm ang ang ka tlawh kuala. Hetah pawh hian Hotel lam bawkin Motor min pe leha, Driver hi Guide anni nghal veka,Nilengin hmun nuam leh tlawh manhla tak takah min kalpuia,an eizawnna ber anih avangin an polite a, an bula awm a hahdamthlak takzet.An smart em em lehzel bawk.

Keimah a kal aiin midang nen inkal tawm ila ka tan a nawm zawk dawn thu min hrilha, a hmun a hla deuh bawk nen ka hnial lem lo. Hindi hi thiam lutuk ka ni lo nangin ka hmang theia, ka kalpui tur family te lahin Hindi aiin English an hmang tam zawk maha,ka tan tawng lamah harsatna a awm lo.Ka thlenna Hotela thleng ve tho,Delhi lam mi anni a. An nupa bakah an fanu,kei aia nau hret tur a awma.An fapa hmundanga thlengin min rawn zawm ve dawn bawk.An fapa hi ka la hmu lo a, kal an tum laia kal ve hman lo tura inngai,mahse hun nei leh ta si anih thu an sawia. Kan thlenna Hotel hi Online a booking an lo tihsa  anih avangin an han book belh leh dawn khan a lo full vek tawha.Chuvangin Hotel dangah amahin a thleng tih an sawi bawk.Mizoin ‘Vai changkang’ kan tih ang hi niin an vun a ngo a. An lian a,an zahawm khup bawk.

Kan kal dantur hi ‘One night Packages’  niin kan va thlenna tur Hotel an tifel sa a. Dinner,Breakfast,lunch vawikhat theuh a tel bawk. Thawmhnaw ken chiam a tul lem lo a,zankhat atana mamawh zual ken a tawk der. Kan Motor hman hi Innova niin alaiah pathum thutna a awma. A hnungah pahnih thutna a awm bawk. A laiah an nupain an thu a. A hmaah an fanu a thu a, keimahin a hnung berah ka thu ve thung.

‘Ding lawk la,khilaia mi khi ka fapa ania’ annu berin a ti a. A kawhna lam ka hawichho ve a. Pa lian zet lo ding chu ka han hmu a. Ka tihdan ngai te tein a langthei chin chu ka hmu kim lehnghal vek. Bomber jacket dum a haa. Lukhum phiar a khuma,Millitary Boot a bun bawk.Mask a hman avangin a hmel erawh ka hmu chiang thei lo.

‘A hmaah hian i thu duh em? Tah khan ka u nen kan lo thu anga’ an fanuin a rawn ti .

‘Aih,ngai chuang lo e’ zangkhai takin ka ti a.

‘A pawi lo tak tak ang maw?” a nu zawkin a ti leh a. Ka lu ka thing mai. Tu pawh thutpui ila buaina ka nei lo tih hria se chuan min zawt lek lo ang, Ka kalsan tak Mipa bak khan keimahah Effect an nei mai mai lo ang.

A rawn thu lut ve a,a palian bawk nen kei hahdam taka ka thut dar dar theihna kha atan chuan a tawt lam hret.

‘Hi..’ a rawn ti satliah.

‘Hi..’ ka ti let ve a. Ka hnar hmawr hit lutuk ka tuai pah zauh.

‘Zopui,ka fapa Rohan anih hi,Bawiha Zopuii hi kan hotelah tho khan a thleng ve a.Amaha kal ai chuan kan rualin kal se azia deuh takin kan ti a.Aman a lo hnial lo bawka’ a nuin a ti leh a,a bu nghut, min chibai tumna pawh a nei chuang lo a, keipawn ka tum bik hlei lo a.Ka rilruah kan kaldan tur a hmain an lo hrilhfiah lo emawni tih ka ngaihtuah daih.

An titi luama,an fapa erawh a khat tawka a tawng bak chu a Phone a en deuh chawt.Kan kalna tur a hla tham deuh bawka muthilh a nawm ka ringa.Ka thlentirh atangin engkim mai timing nei anih avangin ka vir chau deuh bawk nen ka earphone ka phawrha,ka beng ka hnawha.Hahdam deuhin ka thu a, muthilh tumin ka chhing ta hmiah.

Motor ding datah ka harha,ka hawichhuaka. LALPA le(h)..Rohana nghengin ka lo muhil pek.Ka thu mar vata. Inthiam lo zetin ka en a. Mahse, ani pawh a lo muhil hlauh. Ka thawhuai mai. ‘Helai hi Seven sisters  waterfall a ni a.In enduh em? Thil eitur a awm bawka’ Driverin a ti a. An en duha, kei chu chhuk turin Rohana achhuk angai.Ka kaitho ngam der lo. Pawn lam ka en a.Motor an lo intlar put.

‘Bawiha, I chhuk ve duh em?” tiin a nuin a kaitho ta hlauh. Engmah sawi loin a chhuka, ka chhuk ve a. Pawn a thlen rualin a zi mar nghal a. Ka thensak.Atan chuan Motor chhung kha a tawt lulai lutuka,zik mar ngaihna a awm aih lo.

Ka hawikuala,khualzin engemawzat an lo awm a. Hmalamah tlem kan pheia,an tui khawhthla chhuan tak mai ka hmuh rualin ka tum loh deuhin ka nui hak. A ho lutuk,Rv kawnga tui khawhthla pawh a tluk lo…

’Tunah chuan tui a tlema,hmuhnawm tur a awm vak lo.Tui atam hunah chuan hei aia mawi a awm lo ang’ chhuang takin Driverin a ti a.Ka bu nghat.

Tourist awm ho chu ka en a, Thla an laa,an ri chelchul. Keini tlangrama seilian tan chuan eng tehchiam anih loh laiin anni phaizawl bak hmu ngai lo tan chuan a hlu ang tih ka hrethiam. Ka rilruah thildang a rawn luta,Mizoramah tui khawhthla nalh tak tak atam em em a,mahse engmah chei hnum a ni lo.Mipui nawlpui kalphak chin phei chu a tawp em em vek zawk. Anni hi chu chutiang anni ve lo. Helaia tuikhawhthla hmuhnawm lem loh tak pawh enna hmun nuam tak an siama,an cheia.Thut hahchawlhna nuam tak a awm bawka.Khawchhunga an hmun tlawhtur neih pawh Mizorama kan kalpelh mai mai ang kha atama,mahse an chei hnum avang leh an duat avangin tlawh tham a ni thei tho.Nimina ka kalna ang bawkin kan rama kan thilneih te chei hnum ka duhna a zual lehpek ta..Ka thu lohzia lah chu a,ka ngaihtuahna avangin ka then leh sak.

Motor dahna lam ka pan pheia,Motor nghengin Rohan-a a lo dinga,a mask a phelh tawha, a phone bawk a lo en leh tawh.Sir zawnga ding anih avangin a hmel ka la hmu chiang ta chuang lo,a khabe hmul erawh a langsar ngar ngar teh e. Kal tawh loin ka dinga, ka thlir vang vang, a hnarsang tha vehvawh tak mai chu hmelthatpui tham khawpa nalh a ni tlat.Bakah,A nu leh pa leh a farnu atang pawn hmelchhetur a ni lo hrim hrim.

‘Miss,thil i ei duh angem?” Driverin min rawn ti a.Ka phu zawk. Driver lam ka hawia,ka lu ka thing a,nelawm takin a nui var var.

‘Ka ei lo mai ang,Motorah ka lo thu leh tawh zawk ang’ ka ti a. A bu nghat. Ka hawileta,Rohan-a ka en a. Min lo en reng chu niin.Ka beisei aiin ala chhe lo ta zawk cheu!! Ka awmdan ka sawithiam lo, kan mit a intawn rual khan ka tek sawk ni berin ka hria. Harsa ti ru zetin ka thensaka,a nui ve suk.Awi,a ha lah chu a. A nalh fahran lutuk. Enge maw ka awmzia tehnek hi le a?? Nula naupang tawh lo leh mahni induhtawk tak nih ve nak laia han zam leh vel chu a!!!

Motorah ka thu luta,ka rin loh deuhin a rawn thu lut ve nghala. Ka awmdan adik lo reng reng. ‘Love at first sight’ an tih hi ka awmdan nen hian a in ang hial emawni ka ti rum rum.Chu lah thawnthu a thleng tawk lek a ni a. Kei lah mipa vanga rilru na tlanchhia leh nun bultan that tum ka la ni chhap zui.

‘Mizoram atangin maw ilo kal ?” a ti sup. A aw lah a nalh thar ta sawt emawni!!

A mithmul a tisang uka, zawhna ka chhan loh vangin a mitmeiin min zawt nawn leha.

’Aw..Nia,Mizoram atangin’ ka ti nawk nawk. Ka awmdan naupangchhia lutuk chu ka inten zawk.

‘Christian ram a ni em kha(h)?” a ti leh a. Ka bu nghat.

‘Ka pa hi ka pian hmain Aizawlah khan reivak lo a rawn awma,Sorry,ka pa hi IPS retired ania’ ati leha.

‘Aw,anih chu le..’ ka ti ringawt.Han sawi zui vak ngaihna ka hre lo. Vanneihthlak lutukin a nu te an lo let ta hlauh.Ka thawhuai mai.

Dar 2 pelh hretah Lunch kan eina hmuntur kan thlenga,Hotel lian tak a ni a.Gangtok hotel te ang bawkin a fai lehpek. Eitur keimahni vekin kan inlaka,kan thleng pawh a silna tur hmunah kan thlen phei thlap. Kan tlanchhuah leh hnuah kan titi luama,Rohan-a pawh a tawng ve luam. An sawi hmangin Rohan-a hian MBA a zawh hnuah sumdawnna a beia, ramdang nena insumdawn tawnna kalpuiin a tluang hle a. Kum thar lamah nupui neitur a ni bawk.A nupui tur erawh Doctor a ni thung.Mahse…kei hi,zuk han na zawk peka!!! Ka past life chhe lutuk vang in midang hlim hmel hian min tina zo vek zel chu anih hi maw!!

Dar 4 velah check Point pakhat kan thlenga,kan Driver sawi lawk ang ngeiin Bottle( One time use) kan ken leh ken loh an lo checka, man palh chuan 5000/- fine a ni a,a namai lo khawp. Tumah Tourist zingah tilui duh an awm lo ang. Mahni pawn pass hi buaipui theih a ni a,mahse Driver te hi Guide tha lutuk annih tlat avangin Hotel kal tlanga buaipui a hahdam ber. Phal chin leh phal loh chin,eitur awmna leh inthiarna thlengin an sawi chat chat thei vek.Kan pass ami nen kan inmil em tih uluk takin an check leh thlap hnuah kan kal leha.Motor in line a tam tham avangin hmanhmawh taka kal zung zung theih a ni hlawm lo. N.Sikkim khawpui ,CHUNGTHANG kan pelh hnu lawkah LACHUNG kawng apenga,helam pawh hi entham khawpa nalh a ni tho.Mahse, GURUDONGMAR ang em chuan mi a hip lo deuh niin an sawi.

Sipai hmunpui kan tlantlang apiangin Phone min off tir vek thina,BORDER anih avangin an fimkhur dan a turu viau. Sipai ka ngaihsanna a zual viau lawi. A thlawna thawk ni lo mah se an awmna hmun nawm loh zia leh khawro zia khan a nuam dawn lo tih a tichiang vek. Kawng lah duhthusamin a chhiaa, metal chu sawi loh laihzawl mawp,khawkrawk bawk si a ni a.Tha taka thut theih a ni hlawl lo. Ka duh emaw duh lo emaw Rohan-a ka ngheng leh rawk rawk thina,kan nui tawp zel. Asang zawng hlirin kan tlana,thim thet thetah kan riahna tur  LACHEN kan thleng ta hram.

Ka room tur ka pana,a vawh zia lah sawiin a siak lo.Sawi loh law law tha zawk mah ang.Ka phone ka en a,khawvawh lam inziahnaah – 2 a lo inziak va..Vawt tur a ni.

‘Geyser On sa in kan daha,Tuilum intur kan rawn dah ang.Mamawh ineih chuan min rawn hrilh mai dawn nia, Inhnuaiah khuan kan awm ang.Dinner hi a team zelin kan pe a. In thlen hmaa thleng ten an ei zawh hunah kan rawn ko ang che u’ Hotel neitu,Pa upa lamin a ti a.Chinese a ni a.Amah ang deuh deuh Aizawlah an tam…

 Room lian lo leh felfai thak mai a ni a. Zankhat atan chauha mikhual riahna thin a ni a. Gangtok lama hotel nen a in ang lo.Thawmhnaw dahna engmah a awm lo.Khum pakhat leh Dawhkan leh Plastic chair zawng a awm. Khumah ka thua,ka tho leh zawk.Lumna nei eih loin a vawt thlura, a hit ti ila a dik mah zawk ang.Mut a huphurhawm hial zawk. Ac lah a awm hek lo.

Ka Jacket ka phelha,ka sam ka zial tawma. Ka hmai tal phih tumin Bathroomah ka luta, Wash Basin tlanga tui ho a lo khal tiar mai.

Ka nu nen kan inbiaa,naktuk lam kan kalna turah signal a awm dawn lo tih ka hrilha.A vawhzia erawh ka sawi tel lo.Midang chhungkua nen kan kal tih ka hrilha,min ngaihtuah lutuk loh hram ka beisei bawk.

‘Miss, hall lamah khuan i duh chuan intihhlimna hmun a awma.Hotela thleng ho inhmelhriatna atana buatsaih thin ania.Dinner ei nan darkar hnih dawn ala awma,ikal duh chuan ?’ an tirhkah hmeichhe tleirawl thau tha zetin tuilum rawn dah pahin a ti a. Ka ngaihtuaha,room vawt lutuka tawm sen reng ai chuan a nuam zawk ang ,ka bu nghat.

Ka room awmna hnuai hnuai lehah Hall a lo awma. Tim deuh daiin ka luta,hmeichhia an awm ve pawh ka rin loh laiin an lo awm ve teuh. Ka hawi kuala,meichhemna thuk sen huam mai chuan boruak ati luma,ka awmna room nen kha chuan a boruak a in ang lo.Dawhkan kilin an lo thu far hlawma,mipa hoin zu an dawm deuh vek.A vawt em maia,a nuam zawk phian ang.Zu lah khuahkhirh a ni ve der si lo.Thutna awl awm lam ka pana,keimahin ka thu a. Dawhkana tuilum in mai theiha an dah chu ka thli a. Taksa a lum deuh takin tihthuah ka in pawpa,ka hrawk a sa a. Ka kawchhung a sa thla ham ham mai.

‘Ka lo thu ve ang aw’ Mipa awin a rawn ti a, ka hawi vat. Rohan-a a lo ding run tawh,naaahhh…Ka awmdan a danglam leh ringawt tawh,ka a deuh emawni le a??!!

‘Thu la…’ tih pahin ka tawlhsawn deuha. Thutthleng hi mipahnih leng zel anih avangin ka bulah a rawn thu thlaa,ka tang teuh ringawt!!

‘Kan titi dawn mi niang?” ati leh a. En loin ka nui hak,ka no tlang ka tuai hauh hauh ringawt. Ka mizia hi midang pawh harsa ti tak leh mahni a khawsak nuamti chi ka ni a. Mahse, thianho zingah chuan zu in ngai hawt si lo a rui ber ziah ka ni thung.

‘Enge kan sawi ang?” ka tita tho.

‘I duh duh’

‘Duh em em pawh ka nei lo’ ka ti leh a. Ring vak loin a nui hawk.

‘Ania lawm…’ amah en chungin ka ti a. Uluk zetin min lo en reng.A mitmeng hriam hraih leh pa zetah chuan ka duhthusam zawng zawng hi a kim vekin ka hre zuk nia le!!

‘Achang hi chuan hetianga vei nei miah lo a han vahbo vang vang hi a hlimawm ve alawm tiraw” a ti daih.Ka bu nghat. Nia,mi zawng zawng hian kan sual zawh tawk harsatna kan sual vek miaua.

‘Personal life lam in share ta ila..’ a ti leh boh. Ka tim sawk.

‘Ok,I duh loh chuan ngai lo ania’ amah bawkin a ti leh a. Ka lu ka thing vat.

‘A pawi lo.Sawi hmasa la’ zangkhai thei ang berin ka ti a. Ka hnar tihlum tumin ka hmui leh hnar ka hup zui zat.

‘Min zawt la…Lawk,I duh ve em?” tih pahin a no a lekkang zauh.

‘Aih, ka in ngai lo..’

‘Ok,Christian ini tak..Mahse, keipawh Hindu ka nia. Kan sakhua hian Zu in chu a support chuang miah lo ania’ a ti a. A then suk.

‘Adik alawm’ ka ti sap.

‘Thinrim lo la.Mizo pakhat thian ka neia. Ani chuan a in thina’ ati leh a.

‘Um,in an awm teuh alawm’ ka ti leh mai. Dawt lah ni hek lo le. A no a chawikanga,a lem zauh.

Eng eng emaw kan sawia,kan titi tui ta phian.Keimah chauha engvanga kal nge ka nih min zawta,ka pha nalh viau.Mipa vangin ka tlanchhia tih hrilh ka tum lo. Mipa tawng zawt zawt erawh a ni hauh lo.Zawhna min zawta,keiin ka zawt ve bawk,reitak lo inkawm tawh ang maiin kan titi kan inpawh ta thuai bawk.

‘Thil pakhat ka zawt leh ang che’ kan ngawih deuh ren rawn hnuah a ti sup.

‘Um,min zawt la..’

‘Min hmuh khan nangmahah engemaw danglam a awm em? Ka sawi awmzia chu ka awmdan hi a danglam ka tihna’ a thle buk. Kei erawh ka thaw tha ngam lo.Ni lo,ka thaw mang lo zawk.

‘Engtia danglam nge?” ka nui lui thei hram.

‘Ka hre lo.Hmeichhia hi tamtak ka kawm ve tawha.Ka  nupui tur pawh hi kum hnih kan inzui tawh,mahse Hmangaihna tih vel hian ka nunah thu a nei vak lo’ a ti leh a. Ka chil ka lem ringawt.

‘Chuan…?” ka ti sep.

‘Ka hmuh veleh che khan reitak ka lo hriat tawh,ka bula hun hmang thin,tu emaw ka hnaih tak angin ka ngai che’ a ti leh a.

‘Oh,a va mak ve’ ka ti hap ringawt.

‘Nia,amak khawp mai. Ka pian hmasak zawkin ka tana mi pawimawh tak ini tawh aniang’ a ti leh a. Piannawn lehna ringtu anih tlat avangin a rindan ka dem lem lo.

‘A vawt lutuk tih ziawm nan Couple in lamna hun kan buatsaih ang, lam ang u le’ ring leng lawngin pakhatin a rawn ti a. An phu nghal suau.

‘Wow,a va tha ve’ a ti sup. A dingchhuak nghala,ka melh reng ringawt.Nichin atang khan kan piah lawka thu vai hmeichhe hmeltha zetin vawitam a rawn melh tawha.Lampui a tum a ni ngei ang.

‘Le….’ A kut rawn pharchhuah pahin a rawn ti a.Ka melh chho ha,  light in a chhun danin a zir nge ka hre lo.Ka hmu tha lehzual.

‘Ka lam ngai lo…’ ka ti hap.

‘Oaa,kan zir mai ang chu. Come on’ a nui a. A nui hmel chuan min ti tuiral lo chauh.

‘Come…’ ati leh a. Nia,zanin bak kan inhmu tawh lo ang.Zankhat atan chauha inhria kan ni a.Naktuk maiah Gangtok kan thleng leh anga. Hriat ngai loh leh hmuh ngai loh a nileh tawh ang. Damchhunga hriatreng atan pawh atha ang chu.

Tim daiin ka kut ka pharchhuaka, a rawn vuan nghal chat.Min pawt tho nghala.Lamtual tura an dahawl lamah min kai pheia.Ka zui ve dat dat. In hmatawnin kan dinga,ka kawngah a rawn kuaha. Engmah sawi loin ka kut a darah min dahtira,ka kut lehlam a rawn vuan thung. Amah hnaih thei ang berin min pawt hnai leha,ka awmdan a dik lo. Nula fel leh thianghlim ber ang ziazangin ka tiril a khura, tleirawl ngaihzawng nei ang mai ka ni.

Music damraih remin min chetpuia,a taksa lian puiah ka bet deuh thlar bawk. Ka tlansan tak mipa avang khan nun pawh thlahlel lo khawpin nun ka hmanga, mipa hi ka ring leh angem ka hre ngam lo hial kha ania. Mahse, kha mi tenawm khan kum 7 tehmeuh ka nunah thu a neia,ka engkim emaw tih tur khawpin amahah ka innghata. Mahse, ni khat em pawh ka la hriat loh ka lampui mek,Rohan-a bula ka thlamuanna ang hi vawikhatmah ama hnen atang khan ka nei ngai lo tih erawh ka chiang.

Kut an beng dar dar chuan ka mumang ram atangin min kaiharh ta chauh. Nghet zetin ka kawngah akuaha,a awmah ka hmai ka phum kak thung. A va mak tehlul em!!! Hetiang hi thil tak tak a ni thei dawn em ni??? Nikhat em pawh ka la hriat ngai loh mipa zunah hian ka uai takmeuh nge hnemtu mamawh lutuk ka nih avangin amahah hian ka hahchawl zawk?

‘I hmuhnawm….’ A ti sup. Lai zetin ka dinga, ka zam leh titih tawh.

‘Kalsawn ila,midang pawh an kalsawna’ sawitur dang ka hre lo.

‘Tehreng…’ a ti nghut. Min kalsawn puia,ka kawngah kuah tawh loin ka kut a rawn hum ta thung. Kan awmdan engkim mai chu nupa tuakthar,in hmangaih em em kan ang berin ka hria. Ka ngaihtuahna vangin ka nek ru nak. Mawlthlak lutuk,tleirawl dawntawi zet ngaihtuahna awm lek a ni.

‘Thianpa,In hmuhnawm hle mai.Honeymoon hmang inni ang tiraw?” Pa tawi lam,mithmul buk zetin a rawn ti a. Ani pawh hian nupa angah min ngai ve tho mai. Chhan tumin ka ang ziau hman,mahse Rohan-a atawng takah chuan ka chip leh daih. Achhanna vangin ka melh chho vata,ani erawh min en lo in kan hmaa ding lam a en a,Nghet zetin ka kut a hum bawk.

‘Aih,kan inhual meka..’ ati nia!!!!

‘Wow,anih chu. Hlim taka in hun hmang turin ka duhsak che u’ ati leh hluai.Min rawn en a,a bu nghat. Ka then sak ringawt.

Room lam kan pana, ka kut a vawnna ka talpit a. Min hnial lo.

‘Khatia chhan kher ava tul lo tak’ ka ti hap.

‘Eng chu?”

‘Tun lawka mi kha. Nupa kan ni lo a,kan inhual bawk si lo a’ ka ti leh a. Ka nui zui hak.

‘Ok,nia..Adik alawm.Mahse,enge pawi? A hre zui dawn pawh ni hlei lo’ ati awlsam then. A sawi dik reng mai.

‘Nia…’ ka ti nghauh.

Dinner ei turin a nu leh pain min lo nghak tawh. Ka inthlahrung viau,mahse Rohan-an kan kalna a sawi mawlh mawlha,an sawisel lo. Chaw kan ei lai pawhin ka bulah a thu a, ka ni deuh chhu a.Ruih nei ang maiin ka vaia,ka nuam veng veng a ni ber.

Kan eikham hnuah room lam kan pana,a nu leh pa an kal hmasaa. Ka room hi a tawp berah a awma.A nu leh pa Room leh  a nau room hi a in ep chiahin a awma.A dawtah ama room a ni a,kei achhak ber kilah. Kan room ep chiahin Room a awm ve ve bawk. A nu leh pa leh a nau ka mangthaa. Zingah dar 5 a chhuak leh tur kan nih avangin muhil thuai turin min chaha, an changkanga,inti changkang anni lo.An bula awm a hahdama,ral atanga vai chhungkaw Strict em em tura kan lo ngai vek mai hi a lo dik vek lo tih hi ala rei lo chungin ka hre hman tlat.

‘Good night’ ka ti zangkhai vah. A room kawngka bulah kan ding duna.

‘I room thleng ka thlah ang che’ a ti sup.

‘Aaa,ahnai em mai. Ta tang hian min lo en mai la’ ka nui hak. A chek tluk.

‘No..Kal rawh’ a ti awlsam mai. Diktak chuan a awmdan chuan minti lawm leh tlat tawh.Ka inhera,ka room lam ka pana,ka hnunga a rawn kal thawm chu ka ngaithla ru kar.

Ka chahbi ka phawrha,ka inrin hmain rang zetin min rawn phihthlak saka. Ka ang hau mai.Engmah sawi loin kawngkhar a hawnga,a hawikuala. Ka tum loh lutukin amah a lut a,min pawt lut nghal zat.

‘Hey,enge a?” ka hmui a rawn hup hmak.

‘Shh..bengchheng lo la,anih loh chuan ka nu ten an ngai dik lo mai ang che’ a mit a siai zauh. Thuawih fahranin ka bu nghat. A kut ala thlaa. Kawngkhar chhunglamah a kalh zui hmiah.

Khumah a thu a. A bula thu turin zaizirin min huia,ka tawi hrat.

‘Kal zawk teh.Zingah kan chuak hma dawn si’ ka zamna tilang lo turin ka ti a. A thle buk.

‘Dawih reuh lutuk,engtinmah ka ti dawn lo che. Aaaah,nungchang mawi hre lo deuh ka ang zawk nge?” a ti leh duah.

‘Teuh lo.Chutiang lam ka sawi lo,diktak chuan vawiin atang chauhin..’

‘Ok,ka hrethiam. Adik alawm.Nikhat em pawh kan la inhre lo a.Mahse,kum tamtak ka hriat tawh ang mai ini ka tih kha’ a ti leh a. Ka chil ka lem khalh,a sawi ang hi keipawh ka ni ve tho. A bulah ka thlamuanga, reitak ka hriat tawh ang maiin ka ringngam tlat bawk. Tihlan erawh ka duh lo. Hnamdang lehnghal lakah zahawmlo taka khawsak ka tum lo.

A rawn tho a.Min rawn pan pheia,ka che lo. Ka hmaah tak a rawn dinga, ka melh chho a. Light awmna hliah zawngin a dinga,a hmai a thim mak.

‘Thil pakhat chiah min tihsak thei em?” ka beisei loh lutukin a ti dam thluam.

‘Eng?” ka ti mawl tawp.

‘Ka kuah thei che angem?” ka ip chawih.

‘Aaaah,ni lo e..’Ka sawi zawh hmain ka kawngah a rawn kuah thuta.Min pawt hnai nghal rawk. Min kuah bet zui nghal hmiah.

‘Hey, engvangin nge hetiang itih a? min thlah vat rawh’ ka ti that.

‘Aih,keimah ang chiah hian nangpawn i ngaihtuah tih ka hria. Kuah che bak engmah ka ti lo ang.I bialpa emaw ka nupui hual pawh theihnghilhin reilote chauh..Khawngaihin’ ngenngawl lutukin a ti sup. Che loin ka ding khawng laha, Engkim hi mumang ang ruai mai a ni a.Ka mit ka chhing vang vang. A hmui lum ham hamin ka chal a rawn si a. Ka kut ka humruh tlat.

‘Good night’ a ti sup. Min thlaha,kawngkhar dimtein a hawnga. A chhuak thawm ka ngaithla kar.

Ka alarm rik thlengin vawikhatmah ka muhil chhin lo. Kawngchhe lutuk vang khan chau hluah hluah awm ka nih laiin Rohan-a ringawtin ka rilru a luaha,ka tal tlaivar ta thak. Ka zuamawm lutuk vanga khatiang kha thleng niin ka hre lo. A sawi ang chiah khan keipawn ka ngaihtuah ve tho. Reitak ka lo hriat tawh,ka nuna mi pawimawh em em ang mai a ni. Room kawngkhar an rawn kika, ka va hawnga. Hotel tirhkah a lo ni a. Thingpui leh tuilum min rawn pe a. Minute 10 hnuah kalchhuak turin inpeih turin min rawn ti a. Ka bu nghat.

Motorah ka chhuk thlaa.  Khawlaiah pawh vur a lo awm nual. Tukin hi khawvawh lam – 4 a ni a, hnar a thip tun bawk.Driver chauh a lo la awma. Min lo be sawk sawka,ka thutna ngaiah ka thu luta. Khawvawt vin tuk leh ka mood a inmil lo let tawp. Rohan-a hmuh chak,hmu hreh,lai deuh hu in ka awma.Ka inthlahdul thei der bawk si lo.

Rei pawh ka thut hmain Rohan-a nu te an rawn kal ve nghal mai. Mahse, ka zawn ka hmu tlat lo.

‘Bawiha kha nizanah a thiante an lo thlenga, Bike-in an kal dawn ta anih kha’ a nuin a rawn tinghal mawlh mawlh. Ka nghilh deuh dup. Vawiin tal chu abulah ka la awm ang tiin ka lo ngaihtuah kha ania. Mahse, min lo play tih achiang. Nula zuamawm lem lo tak,vawt raih reng mai ka nih laiin Nizan khan ka nihdan phung kalpel thakin ka zuamawm aniang. Mizo ka timualpho niin ka inhriaa. Hrehawm ka ti zui a,ka inchhir nghal vawng vawng bawk.

Nimin lam aimaha kawng chhe zawkah kan kal leh tan a. Muthilh tum mah ila a theih loh,min sawh kang leh dawrh thina,motor chung ka  tauh thuak thuak reng bawk. Dar 11 velah kan kal tumna GURUDONGMAR LAKE kan thlenga,a hmun mawina leh engkim mai chuan Pathian ropui zia min ngaihtuahtir lo thei lo.

Tlangchhip sang laiah ka dinga, ka mit ka chhinga. He hmunah ngei hian ka nunhluia ka natna zawng zawng kha ka hnutchhiah anga. Ka natna la let lehtur chuan helaiah hian ka kal nawn leh tawh hek lo ang. Kha mi tenawm,ka rinawmna hmachhuana min bumtu vang khan ka na nawn leh tawh ngai lo anga,atel loin ka tha tawk tih ka entir ang. Chuan,Rohan…ka nunah zankhat atan chauh ilo luta,vawiin hian helai hmunah ngei hian ka thlah che a.Mahse,zan khat khawhar leh mal taka ka hmangtur,hlimna nen min hmanpui tih erawh ka hrereng tawh ang.

EPILOGUE

‘Mampui,i phone a ri char char ania’ ka nuin Bathroom kawngka bul atangin a rawn ti lawng lawng.

‘Ka zo, ka call back mai ang’ ka ti let ve a. Zingkar inbual hi ka ti laklawha,ka hna kal hmain ka inbual ngei ngei.

Ka lu ka tuama,Bathrobe lianpui ka ha hlun bawk. Thlasik a liama,tunah chuan nipui khawlum huam huam leh ruahsur ninawm  a liam tawha. Favang hun nuam tak kan hmang tan leh tawh.Hun aliam ang zelin ka nunah thil thar tamtak a lo lut ve zela,nui thei lo kha ka nui leh tan ta bawk.

Ka phone ka en a.Number ka hriat ngai loh atangin vawi 5 ngawt min lo call. A pawimawh ringin ka call back nghal zat.

‘Hello…’ a reh vang vang si avangin ka ti a. A la reh ta veng veng,a hrethei lo zawk nge ni anga ka hrethei lo zawk ni ang? Tunlai chu tawng hriat theih loh a tam riau.

‘Tu chu ni maw?” ka ti hlak. Ka Off a, khumah ka thehthlaa,mahse ka thehthlak rual deuhthawin a rawn ri leh nghal.

‘Hello…’ zangkhai zetin ka ti leh a. A reh leh ta tlat.

‘Hello… I hrethei em?” ka tinawn leh a.

‘Zopui,keimah Rohan…I aw ngaithlak ala nuam reng mai’ Rohan-a aw pa leh thawp sutin a rawn ti a. Ka khur nghal dar dar mai….

🍀🍀🍀🍀🍀🍀🍀🍀🍀🍀🍀🍀🍀🍀🍀🍀


Note: Reh veng veng dalah Short Story ka rawn dah a,in rilrem zawng tak a ni lo anih pawhin lo en Liam mai teh u'n

Chuan,a title hi ka Writer Ngaihsan Chetan Bhagat Story Title kan risk zuai nih hi😉