SWEET DECEMBER BOOK 1 (Chapter 1- 10)

         SWEET DECEMBER

            Maengi Ralte

Chapter- 1

Ka hnar hmawr ka tuaia,a vawt var mai. Ka piahlam kawng thla in a chhun en ruai mai chu ka thlir pheia, tumah awm loin a reh ruih. A khat tawkin Motor a rawn tlan zauh zauha,kawnga kal phei chu ka thut tirh atangin an la awm eih lo. Engemaw kawnga ngaihtuah chuan a rapthlak lam lek lek .Mahse, Pathian zarah hlauh hi ka nei khat viau tlat. Rul leh Thla tih loh chu..Heh..

Ka dinga, ka khup ruh a ri thawt,ka then nak mai. Khup chhiat nak laiin ka thu rei fahran em a ni. Ka phun hlak.Ka nghak tih hrereng siin engvanga muang em em nge maw annih le? Helai hmun   reh lutuk berkher lehnghala lo nghah hi atangkaina reng reng ka hre lo.Ka thaw hak,eng ang pawn ngei ila awmzia a nei lo tih hrechiangtu ber chu keimah tho. Ka thian tha ber a ni a.Unau pianpui ka nei lo bawka,Laizawn ang maiin ka en a.A bialpa nen inruk an tuma,helaiah hian a thawmhnaw nen lo nghah angai a….Blah,blah…Awm ze nei loin ka nui hak.Ka tihsak aiin min tihsak a tam tawh zawk. Ka ngaihtuah naah thil hlui a lo lang iar iar.

B.com result ka nghah laiin ka pa nat lawk awm loin a boral thuta,ka tuar dan a rapthlak lutuk ringawt. Chuta karah ka nu in kum pawh a liam hmain pasal a nei leha,ka pa fanu mal,a duat   ngawih ngawih ka ni a.Ka nuin pasal a nei leh hrim hrim ka duh loh vang ni loin a rei lo leh lutuk zawkin min ti naa. Ka pahrawn lah ka mil bau lo.Kum chanve kan chenho hnuah ka chhuak hmiah.

Ka pa chhungte hi Thingtlang lamah an awma, tlawh turin kan kal ka hre ngai lo. Anni pawh an lo kal ngai mang lo. Ka nu sawi dan chuan ka pi leh pu an suala,an inmil thei lo a, ka pa hian ka nu a chhuahpui a ti. Ka awih mai zela,ka pa chhungte ka ngaihven ngai bik lo.

Mahse, hun akala, a pasal thar ka nu chhungte zawng zawngin mak khawpin an tlawn huama,mualpho leh zah pawh an dawn lo a, Ka mil theih loh vangin kei erawh misual hmuhin min han hmu ta tlata, ka pa  mize tha lo ka chhun tih an sawi chamchi bawk nen,ka pa chhungte an lo kal ngai mang lo kha ka nu that loh vang a ni tih ka hrethiam ta vek. Ka nu chauh ni loin achhungte pawh an dik lo vek, sum bak duh an nei lo. Ka pa pawh hemi kawngah kher hi chuan a fail ve tih ka pawm thlap. Mahni chhungte thlauhthla vek khawpa nupui thuawih kha a dik miau lo.

Ka chhuah hmain ka thiannu Machhuani hi engkim ka hrilh veka, kan chhungte tumah belh ka tum lo, bakah mi chuangtlai ka ni tih ka hrethiam tawh. Kut leh ke ka neia, Pathian zarah ka hrisel tha bawka.Ka nghei lo ang ka ti a,ka insehruh a. Ka tum lawk ang ngeiin mi inhnuai tereuhte ka luaha,ka pa dam laia lehkhazir bak engmah tingai lo kha ka dinhmun in a zir lo bawka, mi dawra ka inhlawh pawh hrehawm ka ti chhin lo. Inluah man ka pek theiha,  eitur ka neih bawk chuan ka duhtawk mai. Mamawh ngah loh ka zira,ka thei ngang mai bawk. Mahse, tuna ka hna hi Machhuani’n min sawi hmuha, Khawvela Motor Company lian leh inzar pharh zau tak niin Aizawlah an rawn inkhuar tan a. Vanneihthlak takin Accountant hna ka hmu ta hlauh.In tha leh pangngai zawkah ka insawn tawha, keima tawkah ka muk ve am tawh.

Kan pu ber,Palian leh zaidam duam mai hian min duhsak em em a,fa en in min en niin ka hria. Thla khat liamtaah khan Pumpui Cancer a ni tih an hriaa. Min shock takzet. A nupui erawh chu ka nel lo.Sual erawh a sual lo,a tawng nem diaia,a mitmeng erawh a vawt raih reng. Ka thawh hmain Machhuani’n min hrilh lawka,a nupui athlaka,thlak satliah ni loin tuna a nupui hi an nu te chhung a ni a,Lehkhazir in an bulah a awm thina. An inlan nalh viau niin a sawi. Chuvang pawh chu a ni mahna,ka rap a,ka  ei lo ru a. Ka ten deuh bawk. Ka rilru a hre dawn miah lo nangin, ani pawh hian min ngaina bik lo ni in ka hre ru ve deuh bawk.Pu hian Fapa a nei lo a. A fanu pakhat hian Hnamdang pasalah a neia. A pasal hi Doctor a ni a, ka thawh chinah a lo la kal miah lo. Mizoramah an awm loh vang pawh a ni ang. A fanu pakhat erawh Drug addict a ni a,an buaipui viau. A nupui hnuhnung nen fanu pakhat an neia. Phaiah lehkhazirin a awm mek.

Sana ka en a, Dar 8 a kawk va tawh.Tun ang thlasikah phei chuan zan a rei hma si,vawt bawk nen ka thinrima.Ka ngei hluah hluah bawk. Ka Phone ka phawrha, call tumin a number ka zawnga.Mahse, ka call hmain Remruata’n min rawn call a. Ka ner nak. Ka thianpa leh ka thawhpui a ni a. Machhuani tih lohah chuan ka kawm tam ber a ni bawk. Kan thawhna te hi a nu unaupa te anni a. A pa hi SDO niin an harsa lem lo.Mak takin ka thawhhlim atangin kan inkawmngeih nghal chat. Kan inngaizawng anga ngai an awm fura,sawifiah chiam ka peih lo.Kei ang bawkin ani pawh a ni ve tho.

‘Eng nge? ’ zangkhai fahranin ka ti a.

‘Khawnge i awm a?” a rawn ti lar lar.

‘Hetah,ka awmnaah ..’ ka nui a.

‘Ha,lutuk che hian..Ka nghak che ania,I lo haw dawn tawh em?” a rawn ti leh a.

‘Dawn lo, a hrim hrimin ilo kal dawn chuan min hrilh ta che’  

‘Ehe!! Ka sawi hmasak zel angai tawh dawn tihna mi?” lawm lo aw zetin a rawn ti a.

‘Ni nang,Chhur-a le(h)..Min hrilh lawk chuan ka awm leh awm loh i hria anga. Tikhan khawvawtah i ding reng lo ang’ ka nui a. A nui ve huk.

‘A ni viau mai a. Aaaa, I nghah chi nge chi loh?” a rawn ti leh a.

‘Chi loh..Ka lo haw huntur ka hre lo’ ka ti nghauh.

‘A va han ho si ve..I thiltur ka rawn keng asin le. Pawi lo’ a ti a.

‘Eng? Ei chi a ni em? ” ka nui a.

‘Yup, kaikuang lian ka nuin a chaha..’Ka chil a put dawnin ka hria.

‘Awi…Ka duh,engzat tur nge? Ka ei chak over lutuk’ ka ti nghal a.

‘Man a nei lo..Heh,tak takin naktukah ka lo keng mai ang.Mahse, a thang ve reng.’

Chhan ka tum laiin ka bulah Bike a rawn ding dawt. Ka en vata,Machhuani te an lo thleng chiah.

‘Ka dah aw,ka buai lawk’ min chhan pawh nghak loin ka off nghala.Machhuani leh a bialpa Andy-a lam ka hawia. Ka theih anga rumin ka melh nghek.

‘Min hau miah suh,kan buai zia chu a…’ ka tawng hmain min tihkhalh a. Ka thaw hak,hei hi thil nih dan fo a ni ve hrim hrim.Ka hnial hneh ngai lo ve hranpa.

‘Ka hau peih lo che u, hei i thawmhnaw” ka ti a. Bag lian vak lo ka ken ka pe a.

‘Thnx..Kan kal nghal mai dawn.Ih,ka nu ten an lo call che chuan ka hre lo ti tawp mai rawh.Naktuk zingah ka u msg in ka hrilh ang’ a ti leh a. Ka then nak.Kum 26 kan ni ve tawha. Pasal nei rual kan ni ve tawh, rai lo mah se Biakin hawng turin an tlin lo tih an chianga.An inla hmiah..A nu a sa khawp ang,englai mahin Andy a duh ngai tlat lo.

‘Kan tibuai khawp mai che…’ Inthlahrung awin Andy-an a ti ve a.

‘A pawi lo..Ka inruktir ve hunah thlasik vang laiin reitawk in nupain helaiah hian min nghak ve thung anga. Kan inrul a nimai’ ka nui a. An nui dun ve hak hak.

An tlan liam hnuah ka Scooty ka pana, ka kut vawt lutuk tihlum tumin ka nuai nawk nawk. Glove Officeah ka theihnghilh daih bawk si,ka la tlan thaw dawn zuia,a vawt tha khawp ang. Haihawt hi sual chu nise misual ber ka ni hial ang.

Scootyah ka lawna,ka Start dawna.A ri phurha,a ngawi leh daih.Ka tinawn leha,a hma ang bawkin a ri phurha,a thi leh hmiah. Hrep tak hian..Scooty thar ka mamawh lutuk. Loan in kum thar lamah chuan lak ve mai a tul dawn anih hi a. Ka chhuka,ka main Stand a. Ka kick a, A ri leh phurha,a thi leh daih.

Thlansa phunga ka kick hnuah pawh nun tum awmin a awm ta lo. A reh duka,Motor tlan pawh an vang pharh tawh. Beidawng fein ka thlek vang vang. Min tihbuai zia hre loin a din ngaiin a ding reng ringawt. Tlawh thluk pawp ka chak thut,ka nuia. Ka lu ka thing nak. Ka pa khan vawitam a sawi tawh. ‘Nunna pawh nei lo,min ti let thei pawh ni lo bungraw chunga thinrim hrikthlak ching te hi mi dawihzep leh rilru chhe berte  anni’ a ti thin.

Remruata call mai angai dawn. Ka phone ka hawrha,ka call nghala, mahse vawikhat chauh a ring hman tihin ka phone a thi hmuk..Ka hmet eng dawna,a eng thei lo. Baterry low….Ka va han che fuh lo kual vel tak. Helai atang hian ka in thleng turin minute 15 lai tlan angai a,Ke phei chuan ka ngaihtuah peih lo law law.

‘Puih i ngai em?” mipa awin a rawn ti a. Ka phu nghek,thla chu nei ila ka thlawk hla khawp ang.Ka inhera,ka bul lawkah a lo ding reng tawh. A lo kal lai ka hre eih lo. A dum vekin a inthuama, thla eng bak eng dang a awm loh avangin ka hmu chiang thei lo. Bakah,mask a vuaha,eng pawh nise a hmel ka hmuthei chuang lo.

‘Ka tiphu che a ni maw?” amah bawkin a ti leh a. Mipa aw ka hriat tawhah chuan nalh pawl tak a ni. A thum deuha, a dam thlup bawk.

‘Aw..Aih, nia..Ka phu nasa lutuk’ ka ti bah nawk nawk.

‘Sorry…Puih i ngai niin ka hria a’ a ti leh a. Ka scooty lamah a thle zauh.

‘Aw, nia.Hei a nuar tlat anih hi’ ka ti tha ve mai. Tu nge anih pawh ka hriat loh hnenah puih ka ngai tih sawi hi a finthlak miah loh tih ka hria. Mahse, enge ka tih chuan ang?

‘Ka lo enchhin dawn mi?” tih pahin a rawn kal hnaia,ka per sawn deuh dawrh. Ka rilruah hlauhna a rawn lut thuta,tun laiah chuan inrawk leh pawngsual hi thil thar a ni tawh lo. He pa pawh hi chutiang ching tak mipa chu a lo ni thei.. Ka hawi kuala,a lo kalna lirthei engmah a awm lo. Helai hi Aizawl dai a ni a. Engvangin nge ke in a rawn kal ngawt ang ? Thawklehkhatah hlauhna in min rawn tuam nghal hlup. Ka tum loh tawpin ka khur zui nghal dar dar mai.

Ka ke bula mau bung tla chuan ka mit a la chat.Chhar tumin ka kun hniam nghal zat.

‘Saw lai deuhah sawn Chartin bung a awm. Kha kha chuan min vaw na zo kher lo ang’ nghet churhin a ti a. Ka che zawm ngam lo. Min hnungchhawn zawnga ding nisi in engtin nge ka tihtum a hriat ka hre lo. Ka awm a tinuam lo zual sauh.

‘Ih..Diktak chuan ka…Ka lo ngaihdan che chuan..’ awm ze nei lo zetin ka ti a.Sawi tur hre loin ka ne ne kual ta mai mai.

‘Ka pawngsual che i hlau’ a ti leh a. A nui zui hawk. Ka hmui ka pet nghek ringawt.

‘Phone light in min lo en la. Kan check ange’ a ti leha. Ka thaw hak.

‘Ka phone a thi’ ka ti tawi tak mai.

‘Ok,ka Phone hian en mai rawh. Plug a mawm pawh a lo ni maitheia’ a ti leh a. A tawngkam a nem hran lo a,a vin chuang bawk lo a. Mahse, thupe thang tak ang maiin a tawngchhuak a nghet charh tih ka hai lo.

Darkar chanve aia tam mah a beih hnuah a siam tha thei ta hlauh.

‘A tha ta e’ a ti nghut.

‘Ka va lawm tak, I lo awm hlauh chu a’ ka ti a. Mahse, ka sawi zawh rualin a lo kal tirha thil thleng ka ngaihtuah chhuak nghal zat. Ka inthlahrung tha leh vang vang.

‘Ka lawm,lo kal lo la chuan ka buai viau dawn anih hi’ nuam ti chiah loin ka tinawn leh a.

‘Uhh, nichin khan min vawthlu ta la chuan …’ sawi zawm loin a ngawi daih. Ka hmui ka peta, sawi mai tur ka hre lo. Mahse, ring vak loin a nui a. Ka thaw nghal huai mai.

‘Fiamthu anih kha..A nawrh leh hmain kal la a tha ang’ a ti leh a. Ka nui ru sak.

‘Ka lawm tak tak..’

‘A ho lutuk..Kal tawh rawh’ a ti leh a. Scootyah ka lawna,mahse ngaihtuah chhuah zawk ka nei.

‘Ka thlah nghal ang che’ ka ti leh rih.

‘Aih, ka thiante an lo thleng tep ang’ a ti leh a. A phone a khawiha,a hmel chiang takin ka hmu thei chuang lo. Mask phelh miau hek lo le.

‘Ok..Ih,Ka ngaihtuaha, i hmel ka hmu si lo a,nakinah engtin nge ka hriat ang che?” ka ti leh a.

‘Keiman ka hria che alawm..A tha em?” awlsam zetin a ti liam puat.Ka ner nak.

‘Chutiang ngawt te chu a..I hming tal min hrilh la’

‘A let leh beiseiin ka pui hleinem che. Kan intawng fuh palh a,a lawmawm a nimaia. Kal tawh rawh’ a ti leh a. Tihluih awmzia a awm dawn chuang lo tih ka ngaihtuaha.Lawmthu ka sawi leh a. A thle zauh.

In ka thlen veleh ka phone ka charge a,ka intifai sawk sawka.Engmah ei loin ka mu ta than. Muthilh tumin ka mit ka chhinga, mahse min rawn puitu kha ka mitthlaah a lo lang zawk. A mit naute awmna lai uk deuh khak leh,a mithmul chhah leh kual nalh zet bak kha engmah hmuh ka nei lo.A hmeltha em pawh ka hre lo. A lian hle a,a kutzungtang a sei thlurh bawk. A Perfume rim mawlh kha. Perfume rim hian ka lu a tihnat ziah avangin ka hmang meuh lo.Mahse, kha pa Perfume rim kha chu rimtui ka ti. Kan inhnaih em vanga hre chauh ka nih ka ring. A rim kha a na tlat lo..

Tiharh tu awm ang hrimin ka harh zawk.Khua a lo eng tawh. Ka thuchhuaka,ka Mutna bula ka phone awm ka bana. Mu chunga charge mai awlsam ka tih thin avangin khumah Extension nen ka mu mai zel.

Ka On hnu lawkah msg a rawn lut nghal pawp pawp. Machhuani u msg ka en a. Ka rin ang ngeiin Machhuani awmna min rawn zawta,ka seen mai si loh vang aniang msg ka hmuh veleh call turin min rawn ti leh bawk. Remruata msg a awm tela. Ka then sak, mipa ang hian ka en meuh pawn ka hre lo. Ka nui leh hak,ka ngaihtuah dan hi hria se chuan a lawm lo ve khawp ang. A intih pa ve nak laiin…

‘Aw, Mam..’ Phone a pick veleh Machhuani u in  a rawn ti a.

‘Nizan kha ka phone Battery low veka…’ Dawt muhlum ni lo mah se nuam ka ti chiah lo.

‘Um,anih chu…A pawi lo,ka biak duh chhan che chu hei ka hre tawha’ ati nghauh.Machhuani nen kum zawna piang anni a. Thian ang thoin ka kawm a. Machhuani ang emin ka kawmngeih lo tih mai chauh a ni. Ka pawh thawkhat.

‘Um…’ ka ti sap ringawt.

‘Nizanah a hrilh che em?” a ti leh a.

‘Aw…Mahse…  ‘ ka tih laiin min rawn tawng khalha.

‘Ka ring sa tho a. Hrechiang tura rawn biak che ka tuma,mahse ka call tlang thei ta si lo che a.Ka nu te bulah pawh chiang fakin ka sawi ngam lo a.Be thei che ila chuan ka confirm thei anga. I call tlang theih ta si lo a.Mahse ka ngaihtuaha, be thei che pawh ni ila i sawi awm lo’ a nui hak.A nuih zat vang erawh a ni lo tih a hmel hmu thei lo mah ila ka hre thei.

‘Ka Battery low tak tak ania..’

‘Ka ringhlel hleinem che’

‘Anih leh i nu a thinrim em?” tim deuhin ka ti a.

‘Rim ve bawk e. I hria alawm.Mahse, ka pa in engmah a sawi lo a. Ka pa zawk a thinrim loh chuan engmah a ni lo’ a ti awlsam then. Nia,a nu aiin a pa a lal zawk zia ka hre ve tlat.

Office ka thlenin dar 9 a pel hret. Nitin dar 9:30  hmain ka thleng ngei ngei. Ka thawhhlim atangin ka tlai hi  vawi 5 pawh ala ni kher lo ang.

‘Mam, I hre tawh em?” ka hmaa rawn thut pahin Angela-in a rawn ti a.

‘Eng chu maw?” ka ti satliah. Kei aiin a rawn thawk tlai hreta. Nuih duh leh vei nei lo tak mai, engkim ti thei zel ang chi hi a ni a. Eng eng emaw a hrethei fal nalh bawk.

‘Vawiin atangin Boss thar kan nei dawna’ a ti leh a.

‘Chutia law?” ka ti leh mai. Ka hriatsa a ni a. Boss thar han tihchiam tur ni loin kan Pi ber nau a ni a. Kan pu damlohna avangin reitak a chawlh angai maitheia.Chuvangin a rawn enkawl rih dawn a. Pu awm loh chhung atan chauh anih avangin Boss thar  tur niin ka hre lo. Diktak chuan engkim hna hrechiang sa Remruata awm ve reng laia a nupui nau enkawl tura a ti kher hi ka ngei tawk a tling zawk.

‘I van ngai ho.I hre sa chiang lutuk’ a ti hlak. Ka melh zawka,ka ngaihtuahna hriat tum niawm takin chik fein min lo en ngar. Ka nui lui sak.

‘Hre sa nang,Bakah boss chu tu pawh nise kan hna angai renga. A ni lo mi?” thutak zawkin ka ti ve ta hram.

‘Um,nia..Chutiang zawng chuan a dik renga.Mahse,a chapo lutuk an ti’ a ti leh a. Ka thle bak.

‘Chapo pawh nise hnaah hian a  chapona lantir a tul kher nang.Hahdam teh’ ka tia, ka tum loh deuhin ka nui hak.

‘Nge nuih tur awm a?’ lungawi vak lo hian a ti hmak.

‘Sorry,thildang daih mawle ka nuih’ nuam ti vak loin ka ti a. A bu nghat.

‘Diktak chuan Pi hian a ngaina lo che si, anih chuan a nau phei chuan angainat che ka ring miah lo’ a ti leh a. Ka chil ka lem a,chhan mai dan tur ka hre lo. Vawikhatmah Pi nen kan la inkhak miah lo. Engtin nge ani hian chiang takin Piin min mil lo tih a sawi theih ka hre lo.

‘Ih, ka sawi tum zawk chu eng lo ania, a mil lo che tih lemah…’ a ne ne ral ta daih.

‘A ho lutuk..Ka hrethiam alawm’ ka ti ve ngawt. Ani hi ri phawng phawng leh midang bula duh duh sawi mai mai thin a ni a, ahriat dan tunah pawh a sawi pawp maia, lak thutak tur a ni em ka hre chiah lo. Mahse,midang pawh hian angaihdan kha an lo ngaihtuah dan a ni ve tho maithei.

Tawng tumin ka ang hman ziau tihin Remruata a rawn lut ta hlauh.

‘Mami,I buai em?” a rawn ti nghala. Ka lu ka thing nak.

‘A tha lutuk,hei..’ tih pahin a hawi leta,ka en ve vat. Mipa pakhat a rawn lut a. Min rawn en a,kan mit a intawng sak. Rang zetin ka mit ka lasawn vat.

‘U Hriatpuia anih hi. Ka Pu khan a hrilh tawh che in ka hria. Pi Mathani nau ania. Vawiin atangin a rawn thu tan dawna’ a ti nghal zung zung.Ka dinga, Angela-i ka melh zawk. Min en loin Remruata bula ding a en daih.

‘Mami maw? ‘ a ti sup. Ka en vat.A aw hi ka hre tawh tlat in ka hria. A mitah tak ka en leha. A mitmu dum tha zet chu a melh a na mah mah. Nizana min puitu kha emaw ka ti hmana.Mahse, nizana min puitu kha chu a mitmu dum lo in uk anih kha. Ka thle bak,aw in ang deuh te chu tamtak an awm alawm le a.

Chapter- 2

‘Hey,enge i ngaihtuah a?” ka hmai bulah a kut a rawn vaia. Mawl hmel fein ka phu deuh zawk.

‘Aaa,Sorry..’ ka ti hap. Min chibai tuma a kut rawn pharchhuah ka dawm vat. Nghet zetin a rawn vuana. A kut zungtang sei leh fai nalh zet chuan ka kut a ti lang te zo vek. Nizan ami kha a ni em tih enin ka thlek zauh. Ka hre chiang ngam tawh lo.

Nileng deuhthawin a roomah kan inkhung a ni ber. Keimah chauh chu ni ila ka ning ngawt ang. Mahse, Remruata a awm ve a. An lo innel tawh sa bawka,ka tawng ve chiam ngai loin atam zawk Remruata’n a hrilhfiaha. Kei chuan Pawisa chevel chauh ka entir thung. Mahse, a khat tawka zawhna a neih reng avangin kalsawn mai theih a ni der lo thung.

‘Ka na vekin ka hria’ tih pahin ka zi mar ar ar. Railling bawhin ka bulah Remruata a dinga, thlanglam a thlir vang vang thung.

‘Attention deuha awm hi ka tlin lo’ ka ti leh a. Ka Phone ka phawrha, Machhuani msg 4 lai a lo awm. Miss Call a awm bawk. Kan hna atih buai ka hlauh vangin ka silent daih tak e.

‘Nia,I harh ve zawk zawk sia.E,Kaikuang kha a rim a na tepa. Zingah ka nuin a siam leh daih’ a tih zawm zat.

‘Naaa,ka va ui. Mahse, pawi lo. Kan venga mi ka chaha,kar tawpah a lo dah maithei’ ka ti a. Min chhan letna pawh ngaihtuah loin ka Phone ka en zawm leh a. Machhuani ka call dawna. A theih loh,Airtel zet hi chu aw. Call chiah tihin Call end a inti nghal ziah. Thla khat aiin a tam tawh.

‘Khawi i Phone ka lo hawh,ka hmang leh thei tawh lo.Jio lah a lo thi daiha’ ka ti a. Engmah sawi loin min pe ve mai,.

‘Machhuani mi?” ka off veleh a ti a. Ka bu nghat.

‘Khawnge a awm a? ‘ a ti leh a.

‘Ka hre mai lo..’ ka sawi zawh hmain a lo ner nghek ka hmu a, ka ngawi a. Lei ka chhuah khum zauh.

‘Khawiah pawh awm se ka tan a pawimawh lo ve em mai. Enge zep kher a tulna?” a ti leh a.

‘I sual sia maw.Amah ka hrilh ang,thiante khatia han tih’ ka ti hlak. A nui huk.

‘An inru tih i han zep vel kha ka ei lo che’

‘Maw? Engtik in nge i hriat a?” ka ti halh mai. Machhuani’n a hrilh ka ring lo ve tawp.

‘Nizanah ka hre tawh. A u in min rawn biaa. A be thei lo che a,chuan ka ngaihtuaha.2 leh 2 ka belha, ka belhchhuak mai’  intithei fein a mit a siai a. Ka ner khum nghek thung.

‘Remruat, min lo pui leh lawk dawn mi?” kan hnung am atangin Hriatpuia awin a rawn ti thut. Kan hawi rual thawt bawk.

‘Aw,aw..Ka lo kal ang’ Remruata’n a ti nghal a. Min rawn en a,a then suk. Ka nui ve tawp. Atthlak em em in nizana min puitu kha ang ka la tita cheu. An san zawng a inchen maithei tih loh chu engmah han ngaihpawlh natur chi a awm der si lo.

Hriatpuia’n hna a rawn kal ve atangin kar a liam tawha,ka rin ang ngawt a ni dawn lo tih ni hnihna atangin ka hrethiam nghal ruak. Angela-i sawi anga Chapo kha a nih leh nih loh ka hre lo.Mahse, a tawhkhirh a,hna a duh uluk lam hret.Min la hau miah lo nangin hrawn nuam zawk zawk a ni hauh lo.A officeah a awm deuh chawta.Lunch eiturin a chhuak ngai lo.A chah mai zela, Account engkim a check veka,hmuhhmaih neih a tum lo em em ti ila a dik ber ang. Vanneihthlak takin ka lo enkawl fel ve em zawka,min chhaih buaina tur a nei lo niin ka hria.

Machhuani te an rawn haw tawha,a nu in duh lo eng ang mah se an inruk tawh miau avangin inneih tir mai loh chu tihtheih a awm lo. Bakah,a Pa in thutawp a sawi anih chuan a nu tan lo hnial chi a ni lo ve hranpa hrim hrim.

‘I lo thleng hma thei angem?” Phone ka pick veleh Machhuani’n a rawn ti a.

‘Ka tum chu ania.Mahse, ka thei lo maithei’ ka ti a.

‘Ninawm e..In Boss thar chu over khawpin a Strict tihna mi?” a rawn ti hmarh hmarh.

‘Aih, chutiang lam pawh a ni lo..’ ka ti liam puat. Diktak chuan kei emaw Staff dang pawh a hauh ka la hre lo. Hnaah a active lutuka,kan inthlahdah thei lo a. Amah a haw hmaa lo haw ngawt a nuam lo,min uap run ka ti mai.

‘Haw hma dil ve em em la.. ’ a ti leh hlar mai.

‘Nia,ka lo dil ang. Mahse, enge hmanhmawhthlak em em a?” ka ti a. Vawiin hi a piancham a ni a.Chaw kan eichhuak dawna,chumi zawhah Movie en turin kan kal leh dawn bawk.

‘Dinner kha dar 7 ania. Movie en hun 8:30 a ni bawka.A hrim hrimin Timing nei reng si hi timing nei miah lo ang mai hian in khawsa ziaha ’ a ti leh hlawk hlawka. Ka thaw hak, a sawi dik vek. Kan timing hi Dar 9:30 leh tlai lam dar 5:30 thleng a ni a. Nipui laiin ban hun hi dar 6 a ni thung. Mahse, haw hun hi chu kan vawng dik meuh lo. Kan laklawh dan azir a ni ber.Tlai over tum pawh kan nei zauh zauh. Private a thawk tan thil mak leh sawi hluai tur a ni lem lo.Nidang ang anih chuan vawiin pawh hi a tlai berah Hriatpuia hian dar 5:30 -6 inkarah hna a kalsan anga. A haw veleh ka chhuak ve nghal thei ang.Kan office atangin kan Dine-out natur hi minute 15 kal pawh a tling lo.

‘Hey,Mam..I la ngaithla em?” ka ngawih tak reng avangin a rawn au a.

‘Aw,ngaithla….Ka lo tlai lo ang,dar 6..Lawk,ka rawn be leh ang che” ka Room lam pana Hriatpuia rawn kal ka hmuh takah chuan ka ti a.Min chhan pawh nghak loin ka off nghal daih. Hriatpuia a rawn thleng chawpchilh chu a ni der bawk.

‘Ka lo lut lawk thei em?” Kawngka bula tangin a rawn ti a. Ka bu nghat.Din ka tum chu angai lo tih nan a kutin min zapa.A rawn luta, ka hmaa Chairah a rawn thu thla ve nghal zat. Thatchhe hmel fein hnunglam angheng nghal ur ur mai.

‘Enge mamawh i neih ang?” zangkhai takin ka ti a.

‘Zanin hian ka u te hnenah hna lam sawipui turin kal ka tum a’ a ti dam thlup. Angaihna hre loin ka en ringawt.

‘Amah nena sawi ngai Account lamah hian a awma. Min puih ka ngai dawnin ka hria’ ka rin loh lutukin a tih zawma. An lo haw tih ka hre miah lo.

‘Niminah an lo haw a’ ka ngaihtuahna hria niawm takin a ti leh sup.

‘Oh..Eng lo..’ sawi zawm loin ka ngawi leh daih.Tihtur duan lawk ka nei vek tawh si,mahse hna anih chuan engtin nge ka tih chuan ang? Machhuani’n min that duh ngei ngei ang.

‘Tihtur i neih chuan naktuk zanah pawh kan ti thei a. Mahse, muangchang lo ila.Tun karah tihfel ka duh ‘ a ti leh a. Min en hian ka ngaihtuah a hrethei vek emawni zawk ni?

‘A theih chuan naktuk zan nise..Zanin chu tihtur ruahmansa ka lo neia’ nuam ti chiah loin ka ti a.

‘Ok..A tha alawm,Office hna mah nise Working Hour a ni tawh lo a. Anihna takah chuan Request ania.I theih hun kha a tha mai ang’ a ti leh a.A dingchhuak zui nghal zat.Min nawrlui miah lo, a sawi ang khan Request a ni. Mahse hnial lo turin a tawngkam engemawber khan min thunun tlat in ka hria!!

‘Naktuk zanah chuan ka thei ang. Lo inbuatsaih lawk ngai a ni em?” ka ti a.

‘Aih,I neihsa hi a tawk reng. A tha tawk lutuk zawk..Anih le’ tih pahin a ban a vai zauha.Kawngkhar lam a pana, mak takin min puitu nen khan  an in ang ka ti leh thut. Ka lu ka thinga,ka then sak…Ngaihtuahna atthlak lutuk,karkhat chuang kan thawk ho tawha,amah kha nise chuan ka hrechhuak tawh ngei ngei ang.

‘Hey…Ti nge mahni in i nuih vur vur a?” rawn luh pahin Remruata’n a rawn ti a. Ka chip nghal hmiah.

‘Engmah…’ ka ti hmak.Chairah a thu thla hnawk.Computer lam ka en a,ka khawih laklawh lai ,Hriatpuia lo luh vanga ka chawlh lailawk kha ka khawih zawm nghal mawlh mawlh thung.

‘I la kal dawn lo mi?”

‘Khawiah?” ka hawichhuak chuang lo.

‘Lunch…I mood lah chu a,ka lo luh lai khan a fuh hmel ver ver nen,tunah chuan duhloh rai ang maiin i tum leh vuaua. Monitor kha i chum ngawt ange” a ti zui duah.

‘Zet zut che hian a…’

‘Enge? Ania lawm..Kal ang,ka ril atam ania’ a ti leh a.

‘Lo zuk kal rawh,ka zo lawk dawn’

‘Haaa,nang hi chu aw..I pasal ka ni lo tur hi ka lawm thin,harsa nging ngeng reuh lutuk mai’ a ti leh zek.

‘Nang aiin ka lawm,mipa ve si tawngthei zet zut lutuk’ ka ti ve salh. Ngaipawimawh lo zetin a nui huk.

‘Ka tawngtheih loh chuan  hrehawm iti ber ang.Kal ang,a ninawm’ a ti leh a. A tho a, min nghak tho dawn tih ka hriatchian avangin ka khawih lai zo loin ka kalsan leh ta nge nge.

Remruata thil lei turin a kal tlanga, kei mahin Restaurant chhungah ka luta,min lo be vat.Ka chawlh fo na hmun anih avangin ka eiduh zawng siamdan an hre tawha.Hrilhfiah chiam an ngai lem lo.

‘Ka lo thu ve thei em?” ka hawichhuak vat. Ka thutna bulah Hriatpuia a lo ding reng tawh. Chhan mai nachang hre loin ka en a. A mitmeiin min zawt nawn leh a.

‘Aw.Lo thu la’ ka ti vat. Tul miah loin ka chair nen ka tawlhsawn hrat. Ka bula Chairah a rawn thu ve a. Remruata lo let tawhse ka ti ngang mai. Engvanga rei em em nge maw anih le? Tul miah loin an dawr nghak nula Senior kha a zuk chhaih leh chiam pek aniang chu.

‘Khawnge Remruata?” a ti a. Min en loin a Phone a khawih a.

‘Thil a lei lawk,a lo let tep ang’ ka ti tha ve mai.Dawra thawk,nula ria din denin a ei duh a rawn zawta,min rawn en a.’A chah ang hi animai’ a ti awlsam then.A then suka,ka then ve sak ringawt.

‘Ehe!!! I rawn chhuak ve law?” Remruata’n a rawn ti hluai.Ka thawveng nghal hawk mai. Hriatpuia nen chauh thut dun hi nuam ka ti hlawl lo. Thian anga tlangnel taka kawm dawnin Pu zawk a nihna laiah ka nel mai lo. Reitak lo thawk ho tawh chu ni ila a zia anga, ala rei bawk si lo.Bakah,Pa ni se chuan a zia maithei.Tlangval a lo la ni kher bawk nen hian han kawm bawrh bawrh min titim lo thei lo. Staff dang mitmei erawh ven ngai a ni lo, Remruata hi chu kan inzui nasa bawka kan inkawp angin an ngai fel veka.Mahse, ani hi chu adanglam.Tuman Staff ngaizawng turin an ring lo ang. Kei pawn ka ring bik lo.

‘Nia, rawn chhuak ve’ a ti sup.

An tawng leh hmain eitur an rawn dah ta hlauh. Ka ei zui nghal mial mial. Remruata thil ei pahin atiti luam a,a khat tawkin Hriatpuia’n a chhang ve zauh zauha.Min be lo bawka ka tawng ve lo. Hna chungchang engmah an sawi lo a. Titi satliah a ni ber.

Dar 5:30 velah Hriatpuia a haw a. A haw hnu lawkah ka chhuak ve nghal nalh. Motor thleng tur engmah a awm lo a. Midang aiin kal hma hret pawh ni ila a pawi loh tlai a ni ve hranpa.

In ka thlen leh meuh chuan dar 11 a pel va tawh. Kan Movie en lah ka lo mutthluk san daih bawk. Manhla lo thei bawk si. Kan en zawh hnuah khawpui chhung chei en pahin kan tlan kual leha. Zan rei tawh lam a ni chungin mi veivak an la tam viau tho.

Hna ka thawh mawlh mawlh laiin ka Phoneah Msg a rawn luta, ka en lawk lo. Lunch ei tura ka kal dawnah ka en ta chauh.’Zanin kha ka ring che ania’ tih ringawt.Min rawn thawntu ka en a. Number ka save loh atangin a ni a. A dp ka checka, Husky hmeltha zet thlalak a hmanga. Tu nge anih ka hre lo.

‘Mami…’ ka chhuaktur chiah Hriatpuia’n min rawn ko a. Ka hawi let vat.

‘Um,enge nita?” ka ti a. Min rawn pan hnai chu ka en a. Ka dinna piaha Angela-i thu ka melh zawk. Nghal zetin min lo en kawr chu niin,ka hawi let vat. Hriatpuia a star tih hi a zep lo bawka Staff zinga hmeichhe hoin kan hre kim vek tawh. Ka bulah Hriatpuia a rawn dinga. Jumper leh Jogger pant a haa,Running shoe a bun bawk.  A inhmeh lehpek.

‘Msg i reply lo a..Zanin kha’ a tih zawm a. Number hriat loh atanga msg ka dawn kha amah hi a lo ni tihna nia.

‘Eh, nia..’ ka ti ringawt.

‘Ka ring ngawt che a’ a ti leh a. A tawngchhuak hi a dam thlup ziaha,mahse a nelawm chuang miah lo.A mak ve ngawt mai.

‘Aw,ka thei alawm.Dar engzatah nge niang?” ka ti a.

‘Office ban veleh nimai. Chuan,ka u te inah chaw kan ei nghal anga’  a ti leh a. Ka beisei loh lam a sawi takah chuan ka tum loh tawpin ka thaw hak.

‘Harsatna a awm loh hram ka beisei ania’ a ti leh a. Ka bu ta ngawt.

Lunch ka ei zawh hnuah Officeah ka let leh a. Toiletah ka kal tlanga, ka chhuah hnuah Remruata ka call leh a.Vawiin hi a thianpa nupui neihna lamah a kal avangin a lo kal lo a. Ka number kha Hriatpuia a pe em tih ka zawt duh tlat.

‘Enge?” a rawn ti thawr.

‘Ka number tu nge i pek?” ka ti ve tawp. Han inbiak thluaithlum chiam a awm lo.

‘Tumah..Ka thu loin tlangvalin an lo bia che tihna mi?” ngeiawm zetin a nui zui kawr kawr.

‘I chhe lutuk,nawi chiam lo la..Ka dah’ min rawn chhan leh hmain ka off nghal daih. Ka lu ka thinga,he pa nen hi chuan kan inpawh dan hi sawi maia fiah chi a ni lo.A thuka,a ril vel vek. Ka inhera,mahse ka hnung chiaha lo ding ka hmuh rualin ka phu zawk.A nui suk thung.

‘I awm tih ka hre lo a’ ka ti ringawt.

‘Sorry,tih phut che ka tum lo ania’ a then leha.A ha var rual nalh zet a lang that bawk.

‘A pawi lo..I lo kal lai ka hre lo hrim hrim a,enge nita?”

‘Ka chhuah angaia,ka rawn let hman tawh lo maithei bawka.Nangmahin i rawn kal thei angem?” a ti a.

‘Aw,aw..thei lutuk.Ka lo kal ang’ ka ti nghal a. Ka chhang rang lutuk em ka hre lo.Diktak chuan a ruala kala,loh theih lohna avanga min thlah leh angaih tluka duh loh ka nei lo. Engvanga han duh lo viau nge ka nih pawh chu ka hre chuang hlei lo a.

‘Ka sual viau em?”

‘Maw?” ka ti vat. A sawi awmzia ka hre lo mai pawh ni loin eng hawi zawngin nge min zawh ka hre lo.

‘Ka sawi awmzia chu kei hi ka sual em ka tihna?” a mithmul a ti sang zauh bawk.

‘Ah,aih..Engmah chutiang ka hre lo,ih..Diktak chuan i sual leh sual loh sawi turin ka hrechiang lo che ka tihna’ ka ban ka phar kuala. A nui ka hmuh rualin ka dahthla leh hnak.Ka va han mawl chiam chiam thin tak.

‘A tawk e..Ka sual lo i tih naah ka ngai mai ang.A tha em?” a mitmeng fiah zetah chuan nuihzatna chiang takin a lang thei. Ka hmui ka peta,ka bu nghat ringawt.  

Pu te in ka thlenin Hriatpuia a lo la thleng lo. Ka ngei ngawt pek.Pu in min lo lawm hluta,a that leh that loh ka zawta,a zia thu a sawia.Hna lam min zawt zui leha. Pi erawh chuan min biak loh aiah takmeuh min be hram. A aia tha zawk ka beisei lo hrim hrim.

‘Min lo nghak rei em?” ka bula rawn thut pahin Hriapuia’n a rawn ti a.

‘Aih, ka thlenna ala rei lo’ ka ti tha ve mai.

‘Ka tum aiin ka reia,Sorry lutuk’ a ti leh a. Engvanga min Care ta viau nge anih ka hre lo. Reitak inzui tawh ang maiin a khawsa in ka hria. Mahse,pawi ka ti chuang eih lo.A nuam phian zawk.

Hriatpuia lo thlen hnu lawkah hna kan sawi dawn emaw ka tih laiin chaw kan ei leh ta rih. Ka ei puar leh puar loh pawh ka hre lo. Hriatpuia mitmeng fing leh fiah zet in min kalsan mang lo chuan min ti awm nuam lo.Chaw kan ei kham hnuah pawh ka rin ang engmah a thleng chuang lo.Hna lam engmah sawi loin kan thu khawma, titi satliah tho a ni leh. Ka bulah Hriatpuia a thu char chara,ka duh aiin kan inhnaih bawk si.

‘Mami,ka nau chu enge i hmuh dan?” Pi in min ti thut.Phawk zetin ka hawichhuak vat.

‘Eng,eng maw?” ka ti halh. Nghet zetin ka bag  ka hum bawk.

‘Mama hi mawle.Thawhpui a nuam em?” a ti leha. A hmelah nui hmel a langa,mahse a mitmeng a vawt raih. Hriatpuia nen unau si in anna pakhatmah an nei lo.Ni lo,an mitmeng nelawm lo hi an in ang leh si.

‘Aw, nuam e…Nuam lutuk’ ka then sak.

‘A lawmawm chu,a tawngduh loh bakah hna a duh uluka,a bula awm a nuam lo intih chuan sawi hreh suh u’ a ti leh a. Ka bu nghat,mahse mak ka ti deuh.Hetiang hian hna lam min la sawipui ngai lo a, chumai bakah a nau chanchin phei chu min sawipui ka lo beisei eih lo.

‘Pawn lam landan hi ka ngaipawimawh lo tih ihria alawm.Chutiang chiah chu Mami pawh hi a ni ve’ Hriatpuia’n a ti nghut.

‘Nia, mahse insiamthat hret chu i mamawh tho a’ a ti leh talh.

‘Thiani,duhtawk teh. Chutiang ngaipawimawh nise zanin hian hetah an lo kal nang’ Pu in a lo ti ve a. A sawi awmzia ka hre lo.

‘Ka hriat ve loh thil thleng a awm em?’ Pi in a ti hmak.

‘Ehe!!,I hre sa emaw ka tia..Zanin chu Hriatpuia hian Mami hi Staff ang ni loin hetah hian a rawn hruaia.A awmzia chu Nakin lawka kan Family Member nimai tur’ a nui a. Ka hamhaih lutuk.

‘Maw?” ka ti sep. Ka kutah Hriatpuia’n a rawn vuana, ka en vat.. A  mit a siai zauh.Ka kut a hum nghet leh salh. Pi lam ka hawia,a mit meng tur lutukah chuan  min huatna chiang takin ka hmu theia,Hriatpuia ka en leha, engvanga ti nge anih ka hre lo.

‘Ka u hi engmah ka la hrilh lo a. Surprise hi a ngainat zawng niin ka hria..’ Hriatpuia’n nghet churh in a ti leh a,tawng tuma ka ang ziau tawh ka chip leh hmak. Eng infiamna nge kan khelh mek hi ka hre lo.Mahse, Game nuam erawh a ni dawn lo tih ka chiang….

‘A va rang ve…’ Pi in a tichang fak.A aw ri chuan min ti vawt raih raih thei.

‘Rang maithei,mahse ka duhzawng nghah hi ka tih dan a ni  lo’ Hriatpuia bawkin a ti leh a. Sawi tur ka hre lo.

‘Diktak chuan zan reh laiah,kawng fal bawk siah amah haw tuin tul miah loah a Scooty tihchhiatsak leh ta tlat se min mamawh leh dawna’ ka phu zawk. Ka en vata, a mitah tak ka en a. A ni,amah ngei hi..A nui zui suk.

Chapter- 3

Thil thlen zui dan lam aiin ka rilruah khami zana mi kha a lo ni tih lam chiah a awm. Mahse, an mitmu rawng in ang si lo hi enge a awmzia ni ang ka hrethiam lo.

‘Kan kal mai ang’ thawh pahin Hriatpuia’n a ti a. Ka tho ve nghal vat.

‘Nia,kal rawh u.Khua a nuam lo riau,Pawldelh ruah hi a sur dawn anih ka ring’ Pu in a ti chuar chuara. Pi erawh a ngawi ngal mai.

Scooty dahn lam ka pana,mahse ka hnungah pen thawm a awm avangin ka ding dat.Ka hawi leta,Hriatpuia ka en a.

‘Min thawng hle a ni’ ka ti halh. Ka thinrim em pawh ka hre lo a, ka lawm em pawh ka hre chuang lo.

‘Shh,nakinah kan sawi dawn nia’ a ti sup. Ka melh nghek, mahse ngaipawimawh lo hmel fahranin min kal pela,ka Scooty bulaha dinga.

‘Chahbi’ tih pahin a kut a rawn dawh zui zat.

‘Eng maw? ‘ ka ti hmak. Ka hriat loh vanga zawt pawh ka ni chuang lo.

‘Chahbi,a nung thei em ka en dawn’ a ti a,a then suk. Ka thaw halh ringawt.

‘Ngai lo,keiman ka ti mai ang..’

‘Min pe rawh’ khauh zetin a ti hmuk. Nidang ang a nita lo tawp.Hnial tumin ka ang leh ziaua,mahse ka chip leh ta daih.Chahbi ka phawrha,ka pe ta zawk. A start dawna,a ri phurha..A thih leh mai ka lo hlau zek zek,mahse a nung zui ta hlauh.Ka thaw huai mai.

Scootyah ka lawna,mahse ka tlanchhuah na dal takin a ding tlat.

‘Naktukah kan sawi dawn nge zaninah hian kan sawi zawk ang?” a ti leh a.

‘Eng maw?”

‘Aaah, nichin lawka thil thleng kha mawle.A thawng che tih ka hria alawm’ a ti a. Ka thaw halh. Nia,min thawng nasa lutuk tlat.

‘Thawng satliah lo,thawng lutuk zawk. Mahse, I hrihfiah leh mai turah ka ngaia,ka lo ngaihtuah zui miah lo a’ ka ngaihtuahna nen inmil lo zetin ka ti daih. A ner nawk.

‘Chuan nangin sawifiah ngai iti lo a’ min zawt pawh ni loin a ti sup. A aw a ring lo nangin a fiah kek kawk viau tho.

‘Um ti lo..Engmah a awm chuang lo a’ ka ti nghauh.

‘Nia,awm lo.Mahse, thian nih zui ka duh’

‘Maw?” ka ti halh. Ka thian nih a duh chhan tur ka hre miah lo mai.

‘Thian nih ka duh..Chuan,lawmthusawina lam hi’ a dar a ti chhing uk.

‘Eng lawmthu maw ka sawi ang?” ka ti nghauh.

‘I Scooty ka siamthat sak vang che khan mawle..’

‘Oh…’ ka ti sap ringawt.

‘Mahni leh mahni lawmthusawi turin ka infak chawp a ang hle mai’ a ti hul huk.

‘I ni tih ka hre lo a, bakah i hmel pawh ka hmu lo a’ ka ti ringawt.

‘Um.Tunah i hre tawh a’

‘Nia,ka lawm lutuk. I lo kal hlauh avang khan ka haw thei hram kha ania’ ka ti a. Khami zan khan lawmthu ka sawi ngei tih ka hria.Mahse, tu nge anih hriat hnua lawmthusawi chu a nuam zawk fe mai.

‘Ka pawm e,mahse phut ka nei’ a ti leh a. Ka ner nak.

‘Eng nge?” ka ti tawi tak ringawt.

‘Lunch min treat ang’

‘Aih, zanina min bum vang hian kan inrul vek tawh’ tifuh inti fe in ka ti a. Ka hawisang deuh vah bawk.

‘Ok..Anih chuan ka ba zawk anih chu,I hman hun hun nise’

‘Ka duh lo..

‘Ka lo ngaichang ang che. Mangtha phawt,eee..I thlen hunah min hrilh thei angem?” a ti leha.Ngei lutukin ka melh nghek.Ngaipawimawh lo zetin a nui hawk thung.

Thil a thleng ta vut vut niin ka hre ber.Nitin Hriatpuia’n Lunch a eichhuak ve ta ziaha. Kan ruala a kal tum a awma,amaha kan kal hnua lo kal tum a nei zauh zauh bawk. Remruata a tel ve ziah avangin ahranpa taka nuam lo tihna tur a awm lo.Bakah,Staff dang ho pawn sawi sep sep an nei lem lo. Pu leh Pi pawh kha a hrilhfiah leh tawh ka ring mai,engmah sawi zui a awm lo.Bakah,Pun en hna chungchanga kan inbe zeuh zeuh tih loh chu hnaah alo la let leh ta miah lo a. Kan inbiak tum pawn Hriatpuia nena kan chungchang emaw ka mimal nun lam min sawipui ngai lo.

Motor lo thleng a awm avangin dar 7 pelh hretah ka haw a, eitur ka siam hmain ka inbual hmasaa. Thil ka ei ta chauh,ka ei zawh hnu lawkah kawngkhar an rawn kika,Sana ka en zauh. Dar 9 a hnai tawh,tun ang hunah chuan midang an ni thei lo. Ka rum hak,ka chau bawk nen lo kal lo se ka ti zawk.

Kawngkhar ka hawnga, mahse ka beisei loh lutuka Hriatpuia lo ding ka hmuh rualin ka phu zawk.

‘Nang maw?!” ka ti chhuak halh mai.

‘Aw, keimah.Ka lo lut thei em?” a nui suk.

‘Aw.Aw,lo lut rawh’ ka ti a. A luh nan ka tawlhsawna,engtin nge ka in luah a hriat ka hre lo.Min rawn kal pela,Living room a pan pheia. A thu a, hahdam hmel fein a thlek kual a. Ka awm a nuam lo ve ringawt.A ep zawnga thutthleng awmah ka thu a. Ka Living room a lian lo bawk nen a tawt zual ta vekin ka hria.Nitin hna lamah inhmu in inbe bawrh bawrh mah ila thian han tihtur em kan la ni  lo a.Kan pahnih chauha awm nuam ka ti lo.

‘Phone i pick lo a’ a ti sup.

‘Maw? Eh,min lo call tih ka hre miah lo a’ ka ti tha ve mai. Ka zam tih hmuhtir kher ka duh bau lo.

‘Vawihnih..Zawn hmuh lah i harsa’ a ti leh nghut.

‘Pawimawh a awm chuan naktukah pawh kan sawi theia’ ka ti liam puat.

‘Nia, mahse a pawimawh chiah lo’ a ti leh lawi.

‘Anih chuan enge ilo kal chhan?” ka sawi zawh rualin a then suk.

‘Nula inah Tlangval a leng anih chuan chhan a nei ve ang chu’

‘Eee,nia…Mahse, a tlai tawha’ sawitur dang hre loin ka ti niah niah.

‘Remruata a lo kal dawn em?” a ti leh thut.

‘Ka hre lo,tinge?”

‘A lo kal huna min hmuh i hlau anih ka ringa,ka sawi awmzia chu i zam lutuk kha ania.Chuan,min hmuh khan kei lo beisei nei i ang bawka’ a ti leh a. Ka awmdan engkim mai a man hma lutuk thin hi ka ngei deuh hlur tawh.Staff hmeichhe hoin chhe lo an tih em em laiin chutiang lam ka ngaihven lem lo.Chhia ka ti lo a, an Star angin ka Star vul ve chuk lo ti ila a dik mah ang.

‘Aih,beisei pawh ka hre lo.Bakah,zamna chhantur ka neih ka hre lo’ ka ti hmak.

‘Ah,ka hresual anih chiah chu’ a ti duh lek.

‘Thingpui i duh em?”

‘Aih,ka lawm..I in a nuam hle mai’ a ti leh a.

‘I ti lawmawm’

‘Min nin hmain ka kal mai a thain ka hria’ a ti leh a. A tho zui nghal zat.

‘I nghal sia’ ka ti hlak ringawt. A nui hawk.

‘Ka ti tak tak alawm,ka lo kal leh fo duh dawn sia vawikhatnaa ka len rei lutuk chuan min hne palh ang’ a ti leh a. Lehlam hawiin lei ka chhuah zauh.

A chhuah fel veleh kawngkhar ka khar nghala.Kal sawn loin kawngkhar nghengin ka dinga,Boruak tlachham ang maiin duhthawh fein ka hip vang vang. Engvanga lo kal nge anih ang? A sawi ang tak tak khan nula rim kal in a lo kal nge ni ang? Atthlak zetin ka hmai ka dap dan dan. Ka hmeltha  lem loa, ka chhe chuang lo bawka.Nula pangngai ve mai ka ni a,mi aia chungchuanna ka nei lo. Ka englaimah hi han duh chhan tur khawpa thabik ka nei lo..Mahse, nichina lo kal kha Thla a ni tlat lo.

Christmas thlen nan kar khat chauh a awm tawh.Hna erawh ni 23 thleng kan kal dawn thung. Duh aiin Hriatpuia nen kan inhnaih ta mah mah. Tul lutuk loah pawh ka roomah a rawn kal fo a,thil ho te te tihpui turin min ko deuh reng bawk. Ka inah erawh a lo kal leh ta lo. Lo kal lehse ka tihna leh kal lo se ka tihna a in zat reng.

‘I buai em?” Remruata’n rawn luh pahin a rawn ti a.

‘Aih,buai em em lo. Inhnuai lam hi an thawl deuh tawh em?” ka ti a.

‘Teh nang,an tam reng mai. Mahse, ka hawsan dawn,tihtur ka nei’ a ti leh a. Zarda a phawrha,a hmawm zui zat.

‘I va han heh tak,ei tlem teh.I pum a chhe si’ ka ti hlak.

‘Ka insum lutuk,nikhatah 100  man pawh ka ei tawh lo’ a ti awlsam mai. Kuhva pangngai hi a ei mang lo. Mahse, Zarda kher hi chu Pum hian a haw zual bik in ka hre ve tlat.Vanneihthlak takin ka ei duh lo hlauh.

Ka tawng leh hmain ka phone a rawn ri a,ka en a. Ka thaw hak.

‘Tu nge a?” a lo ti ve vut.

‘Boss…’

‘Tu,ka pu maw?”

‘Aih, Hriatpuia..Kan pick lawk ang’ ka ti a. A mithmul a tisang awk ringawt.

‘Hello’ ka ti zui nghal zat.

‘Dar 2ah ka Officeah lo kal la,inleng ka nei dawna’

‘Ok..’

Thildang sawi loin a off nghal a. Ka Phone ka dahthlaa,sana ka thlek zauh.Dar 1 a pel hret.

‘Enge a sawia?” Remruata’n a ti a.

‘Dar 2ah inleng a nei dawna,min mamawh anih chu’ ka en a.Min la hmu ngai lo niawm takin min lo melh reng.

‘Eng nge? Ka hmaiah thil kai a awm em?” tih pahin ka hmai ka tuaia.

‘Aih, engmah a awm lo’

‘Anih chuan tinge min melh renga?” ka ti leh a.Za vak loin a nui a.

‘U Hriatpuia hi enge i ngaihdan?”

‘Ka rin aiin a fel’

‘Chu zawng chu?” a ti leh a.

‘Aw, ngatinge?”

‘Midang hian an sawi sep sep che u a…’

‘Eng vangin maw?’ mak ti deuhin ka ti a. Ka en ran bawk.

‘In inzui nasa an ti’

‘Ahhh,hna thil bak engmah a awm lo.A hrim hrimin thilsawi an peih e ka ti’ ka ti nghauh.

‘Nia, sawi peih,Hmeichhia an tam em anih hi..Mahse..’ sawi zo loin angawi daih.

‘Enge Mahse?” ka ti hlar mai.

‘A lo awm hnu hian min hlat sawt in ka lo hria’ sawi hreh niawm takin a ti a. Ka melh vak.

‘Nang lehzel chuan chutiang sawi lo mai teh’

‘Sorry,mahse i bula ka awm hi a duh lo emaw ka ti ru deuh thin,nangmah lam chu ka sawi lo ania’ a ti leh talh.

‘A ninawm,thildang sawi ang’

‘Ok..Mahse, ilo ngaihtuah em? Nangpawh khan Hriatpuia tiin awlsam deuhin i ko a….”

‘A ninawm em mai’ ka ti leh hmak.Ka awki ah sawi zui ka duh lo tih alangchiang vek. A bu nghat.

‘Ok,ka sawi tawh lo ang.Ka zuk chhuk ange.Ka hne hle mai’ tih pahin a tho a,a zi mar ar ar.

‘Zanin chu chhuak ila…’ kawngkhar bul atangin a rawn ti leh rih.

‘Khawlai chei vel chu maw? Nia, kal ang’ phur fahranin ka ti a.A bu nghauh.

Remruata kal hnuah a thilsawi ka ngaihtuah ta chauh.Kan inzui nasa tih ka pawm thlap,mahse han sawi zawm viau tur engmah a awm ka hre lo.Mahse, Remruata sawi kha a dik.Nia,hmeichhia kan thahnem, chuta karah Angela-i mipa duhzawng a lo la ni chhap zui.Min sawi lo emaw ka lo ti kha ka lo ngaihtuah loh vang mai mai a ni tih ka hrethiam ta chauh.

Dar 2 rik hma hretin Hriatpuia Roomah ka lut pheia,a inleng tur a lo thleng tawh. Keimah ang rual vel mipa pakhat a lo awma,Hriatpuia nen an lo titi mek.

‘I kutah a awm dawna, sawipui la ka duha’ Hriatpuia’n min ti a. Keimah zawk nena indawr turin min ti a. Oil chungchang a lo ni a, kan intodelh miau loh avangin Pump a lo biaa.A thianpa Pumpah Coupon a lo dila,chu mi chungchang chu a lo ni a. Ka hriatthiam theih turin a sawifiah zar zara,a hna a hnehsawh hle mai tih ka ngaihtuah a. Engmah sawisual a nei lo hialin ka ring.

‘Mami,ka be leh lawk duh che a’ Kan inleng kal hnuah Hriatpuia’n a ti a. Ka bu nghat. A officeah ka zui lut a.

‘Thu la…’ a ti a. Amah a thu nghal bawk. Bet lo zetin ka thu mar auh. Remruata thilsawi vel vang khan ka awm a nuam hlawl lo. Nidangah pawh a Roomah hnathil sawiin kan awm dun fo,mahse vawiin chu ka dik tlat lo.

‘Zaninah tihtur inei em?” a ti sup.

‘Aih,aw nei tho mai.Mahse, hna thil anih chuan ka thulh thei tho mai’ ka ti zangkhai vah. Ka chhungril leh ka awki inmil lo lutuk chu ka then zui sak. Hahdam hmel fein a thutthleng nghenchhan a nghenga, ka melh zawk. Dawnkan chunga thilawm ka en leh vat.

‘Ka haw hma dawna, chaweikhawm ni mah ila hna thilah ka u te nen kan inbe dawna,ka mamawh  thut maithei che a.Chuvang ania’ a ti leh a.

‘A tha alawm,ka lo inring dawn nia’ngaihsam hmel zetin ka ti nghauh.

‘Ok,a tha alawm.Chu zawng chu animai’

‘Dar engzatah nge i kal ang?” ka sawi zawh rualin ka inchhir lehnghal zat. Eng hunah pawh kal se ka ngaihven angai miah lo.

‘Ka kal deuh mai ang,ti nge?” a ti sup. A mitthim raihin chik zetin min en a. Ka melh zawka,ka en rei ngam lo. Ka mit ka la vat,mahse a then suk ka thu hman tho.

‘Aih, engmah..Ka zawt mai mai che’ ka nui lui sak.

‘Um,ka rawn bia ang che’ a ti a. Ka bu leh nghat,ka tho a. Kawngkhar lam ka pana,min enzui em ka hre lo.Mahse, ka hnung a mur ar ar thei. Ka Office ka pana,ka awmdan inthlak danglam leh ka zam lutuk  ka inzahpui a,ka in haw hlur bawk.

Remruata’n kan chhuahtur a rawn Cancel leha,Hriatpuia lahin min rawn be ta lo. Inah ka awm ta vel mai mai. Chairah Blanket nen ka thu a,Tv ka en a. Chocolate lum ka inchhawp bawk.Hmuhnawm ti fahranin ka Movie ngainat em em ka en dauh dauh. Ka Phone riin Movie chhunga ka cheng veng veng min kaitho a.Ka bana,min rawn calltu ka en a. Ka thaw hak.

‘Hello’ zangkhai theiang berin ka ti a.

‘Ka rawn tibuai che em?” Pi aw vawt raihin a rawn ti a. Ka ner nghek.

‘Aih,tibuai lo e..Enge nita?” pangngai takin ka ti leh a.

‘Naktukah ka hmu duh che a, hun ineih chuan? Ka sawi awmzia chu kanpa nen kan hmu duh che a’ nidang ang bawka inringtawk lutukin a rawn ti a. Pu nen anih chuan hna chungchang a ni ang tih ka hrethiam.

‘Hnaah ka awm dawna…Ih,chhuah ngai chi anih chuan…’

‘Ka nau ka lo bia ang.A tha em?”

‘Ok,a tha alawm’ ka ti sap.

‘ A hun ka rawn hrilh leh ang che’ a ti vawt leh raih.

‘Aw le’

Ka Phone ka thehthlaa. He mihring mize vawt leh nelawmna nei miah lo hi engtin nge Pu hian a neih duh ka hrethiam lo. A hmeltha a,mahse engtiklai mahin nui hmel a pu lo tluk a ni a. A tawng dam thlap chungin a nelawm chuang der si lo. A nupui hmasa hmelthat zia leh fel zia Machhuani khan a sawi zauh tawh bawk si. Nupui thlak nana pi berkher a hmang hi a mak thlawt. Sangha ang maia vawt,nelawm lo si. Hriatpuia ka mitthlaah a lo langa,ani pawh hi a u ang bawka nui khat tak a ni a,a tawng duh lem lo,mahse ka lo rinlawk ang aiin a nelawm tlat lawi.  Angela-i khan a Chapo tih a sawia,thla khat dawn kan awm ho tawh chungin a chapo em em awm ka la hre miah lo. A  la rei lo lutuk pawh a ni maithei,mahse a u nen an in ang lo tih erawh ka pawm thlap hman tawh tho. Pi kha chu ka hmuhtirh atangin ka ngaina thei lo tawpa, kei ang bawkin midang pawn an nel hlawl lo vek.

Vawitam Hriatpuia Room lam ka thlek tawh,Sana ka en a.Dar 12 a pwl tawh, a lo kal hnu lawkah hmeichhe pakhat, hmeltha leh nalh fahran a lo kala. Roomah an la awm ta char char. Tu nge anih ka hre lo a, engvanga chu chen chen inkhung nge annih phei chu ka hre lo lehzual. Atthlak hian a..Engvanga lo buai ve em em nge maw ka nih hrep ni??

Ka Phone riah ka phu nghek. Rang zetin ka bana,Pi a lo ni a. Ka pick chak lo.Mahse, ka pick ngei angai tih kei aia hrechiang an awm lo hial ang.’Mami, Lunch ei turin kan lo nghak ang che. Dar 2 velah lo thleng thei la. Mama ka hrilh tawha, amah biak kher angai lo ang’ a rawn ti dam thliam. A tha khawp ang chu,tunah kher chuan a room va luh ka chak miah lo.

Ka Room bul chiaha thu hnenah ka kalna tur ka hrilha,ka let leh har deuh maithei tih ka hrilh bawk. Ka tlan lohni anih avangin Taxi ka ko a.Pawnah min lo nghak reng tawh. Traffic Jam a nasat avangin kan tlan sawt lo ngang mai bawk. Pu te in leh kan Office inkar hi tlan pangngaiin Darkar chanve vel tlan a ni a. Mahse, vawiin chu darkar khat dawn kan kal thung.

Ka chhuk fel deuh chiah tihin tu emawin min rawn pawt sawn lawpa, kan tlu nghal thuai bawk. Enge thleng ka hre lo. A bul hnaia ding te rak tuar tuar thawm chuan min ti hlaua. Min rawn kuah sawntu awmah ka hmai ka phuma,ka khur dar dar bawk.

‘I tha em?” Hriatpuia aw ka hriat rualin ka hawichhuak vat. Min kuahtu kha amah a lo ni a ,ka tluk nat loh nan amah zawk a hnuai lamah awmin min veng tih ka hrethiam nghal vek.

Chapter- 4

 ‘Aih,aw…Ka tha in ka hria.I tha zawk em?” ka ti bah nawk nawk.A then suk.

‘Ka tha ang ka ring’ a ti sup. Mi an rawn kal khawma,min kai tho a. Ka hlauthawng lutuk ka la dik hleithei lo.Hriatpuia an kai tho a,lehlam hawia a then nawk ka hmu zauh.

‘Tu nge maw ni le? Khatiang em em a chaka tlan mai.Nula,I tha em?” Pa upa lamin min ti a. Ka bu nghauh. Midang lo kal hnai ho pawn ka that leh that loh min zawt sap sap.

‘Ani hi a lo awm hlauha,I him niin ka hria. I tha em?” Hriatpuia hnenah a ti veleha,Hriatpuia’n a that thu a sawi a. Mahse, a hmel a dik tlat lo,nichina na nei anga a then nawk ka hmuh vang khan ka ngahbel mai mai zawk nge ka hre lo.

Chak lutuka Motor rawn tlan thlain min su hlum lo chauh a lo ni,tuman a Motor tihdin lam an lo ngaihven hman lo tih an sawi nak nak. Ka thih teuh zia ka ngaihtuaha,Engtik niah emaw chuan ka la thi dawn tih ka hria,mahse tun ang em a thihna nen kan inhnaih tum hi ka la hre ngai lo.Hlauhna avangin ka tha khur tha leh dar dar.

‘In tha tak tak maw?” nichina min zawt tu bawk khan a ti leh a.

‘Aw, kei chu ka tha..Ani hi a tha lo maitheia’ tih pahin Hriatpuia ka en a.

‘Ka tha e,ka tlu na lo’ a ti dam thlup.

‘Anih chuan alawmawm chu..Khatiang mi fimkhur lo kha chu khawih deuh tlak anni asin mawle’ a ti leh nuah nuah.

‘Lo lut ula, hahdam deuh phawt ula in that leh that loh chu a hriat mai ang’ ding ve zinga nu te lam hian min ti a. Kan dinna bula eichawp dawr lam a kawk zauh bawk.

‘Aih, heta kal tur hi kan nia’ Hriatpuia’n a ti a. Pu te in lam a kawka.

‘Eeee,nidawn tak e. I niin ka hre reng ani. Pi Mathani nau kha ini tak’ hrechhuak tha inti fein a ti a. A nui zui hak hak bawk.

An kal darh hnuah Hriatpuia’n min rawn en a. Engtin nge hetah a lo awm thut ka hrethiam lo.Ka chhuah dawn khan Officeah a awm reng si.Ka lu ka thing nak,engpawhnise min chhanhima,a tawk rih mai.

‘Khawiah nge kal i tum?” Midang kal darh veleh Hriatpuia’n a ti sup.

‘Pi in min hmu duha’ ka ti sap. Nichin khan Pu te in a kal tur ang khan a insawia,tunah min zawt leh lawia.A hran ve ve in min ko zawk nge maw ni?

‘Taxi’ tih pahin kawngpui lamah a phar zauh. A awmdan tehthut chuan min ti hamhaih lutuk.Kan bulah Taxi pakhat a rawn dinga. Engmah sawi loin a hnung kawngkhar Hriatpuia’n a hawnga. Lut turin mitmeiin min hrilh zauh.

‘Ka sawi kha,Pi in min hmuh duh vanga kal ka nia’

‘Ka hria,mahse tunah ni lo.Nakinah’ khauh furin a ti hmuk.

‘Mahse…’

‘Khawngaihin kal rawh..Ka hnung ana viau ania’ a ti leh sup. ‘Khawngaih’ tih tawngkam hmang mah se a awkiah ngenna a awm lo.

‘Lut rawh’ a ti leh sup. Hnial leh tumin ka ang ziaua,mahse na tuar niawm taka a then leh nawk ka hmuh rualin ka lut nghal rawk rawk. Midang bulah khan ‘na lo’ ti mah se na a nei chiang lutuk tlat.

‘A na viau em?” ka ti sap.

‘Khawi lai?”

‘Ah,ka hre lo..Mahse, na i nei tih ka hriaa’ nuam ti vak lo in ka ti a.A then suk.

‘Ka hnung hi tlemin a nuam vak lo,chu zawng chu animai’  a sawi dawn lo emaw ka tih hnuah a ti ve ta hram.

‘Anih chuan Damdawiinah kal ila,x-ray te la ila…’

‘Angai lo ang,a zia leh mai ang.Min delhtu a rit vak lo em mai’ a nui a. Min chhaih tih ka hria,mahse ka hmai a sa nghal hat hat tho.

‘Eng lo,engtin nge kha laiah khan ilo awm hman daiha? Ka chhuah dawn khan officeah ila awm si.Piin a ko tel ve zawk che mi?” alo awm ve ngawt kha ka ngaihtuah chhuak zawk.

‘Ko e. Kan kal rual ang chu ka tih laiin ilo chhuak hman tawha’ awlsam zetin a ti sup.

‘Ok..Ka lo hre lo a’

‘Nia,I hre lo..Nidangah chuan ka u te nupa in an hmu duh che anih chuan min hrilh hmasa tawh la a tha ang’ nelawmna tel lo zetin a ti hmuk. Ka melh zawk,a hmel thutak ngul maiah chuan thinrimna niawm tak a lang thei a. Engvanga thinrim nge anih ka hre lo. A thu lo a ka kalchhuah a hua ti dawn ila min kotu te Pi leh Pu anni a,ani lo huat ngawt tur a awm lo.Chu chu kei chauh ni lo,amah pawn a hrechiang lutuk tlat. Tunah kan pu ber angin awm rih mah se,anihna takah chuan a neitu chu midang anni tho.

‘Ka lo hre tawh dawn nia’ ka ti nghauh. Min chhang lo.

Tukverh lam ka hawia, Office lam kan pan lo tih ka hmu ta chauh. Kan luh tirh khan Office lama kal tur khan a ti ngei a,mahse a kal tlat lo.

‘Khawnge kan kal dawn?” ka ti a.

‘Ka kawng hi a nuam chiah si lo a, In lamah chawlh hahdam lawk ka duha.Inah min Drop se,Office lam chu ka be mai ang’ a ti dam thlup. A mood inthlak thut thut reng hi ka hrethiam chiah lo. Hnathawhna lamah chuan Mood Swing nei ve lo nimai awm in engtiklai pawn biak a nuam renga,a nelawm em em lo chungin Sumdawnna lam chu hrehneh tak a ni. A rawn awm ve hnuah pawh hmuh theih khawpin a danglam tawh!!!

Ka Phone a ri a, ka bag atangin ka lachhuaka.Min lo call tu ka hmuh rualin ka thaw hak.

‘Tu nge a?” Hriatpuia’n a ti sup.

‘Pi…’

‘Pick angai lo’ phawk zetin ka en vat. Chik zetin min lo en reng tawh.

‘Eng…ngatinge?” ka ti bak nak.

‘Engmah…’ a sawi zawh rualin min rawn pawhthlaksak thuta.A off a,a kekawr ipteah a thun zui daih bawk.

A awmdan chuan min ti hamhaih lutuka, lo dawnsawn dan tur pawh ka hre lo. Pasal thikthu chhe em em ang maiin a che niin ka hre ber..Ka hawisawna,ka  ner nak,mawl lutuk. A u aman biak a duh vang bak a ni lo tawp ang. Kan accident thelh avang khan a ngaihtuah lutuk a hlau pawh a ni maithei.

‘Khawnge midang?” ka ti a. An inah amahin a chhuk dawn emaw ka ti a. Mahse, a tum dan thlakin kan pahnihin kan chhuk ta zawk.

‘Tumah an awm lo’

‘Maw?” ka ti vat. Engtia khawsa nge ka hre lo a. Chhungkuaa cheng nimai turah ka lo ngai ve tawp kha ania.

‘Keimahin ka awm..Anihna takah chuan min awmpuitu tlangval an khaw lamah chawlh hmangin a haw a’ a ti leh a.  Ka bu nghauh ringawt. Nu leh pa chu a nei ngei ang,mahse Aizawlah an cheng ho vek turah ka lo ngai a,tuman an sawi ngai bawk si lo.Ni lo,ngaihven nachhan tur ka nei lo a ni zawk.

Ngawirengin ka Phone min rawn pe a. Ka thutna piahah a thu thla hnawk.

‘Damdawiin kal chu tul lo i ti tak tak em?” ka ti chhuak phawng. A awm danah na nei a ni tih a chiang tlat.

‘Aih, ka inbual anga.Reivak lo ka hahdam hnuah a zia mai ang..Eitur i duh em?” a tih zawm daih.

‘Aih, duh lo.Office kan thlen hunah ka ei mai ang’ ka ti a.Eitur a sawi takah chuan ka ril a tam nghal rawih rawih in ka hre nghal tlat pek bawk.

‘Pi kha…’ ka ti lehnghal phat. Engmah sawi lo a ngawihreng a dik lo. Phone ka pick bawk si lo nen Office lam a lo va zawt anih chuan tul miah loah ka mualpho nek thei tlat.

‘Ka bia ang..Hlauthawng duh suh’ a ti liam puat.

‘Min lo nghak reng dawn a’ tim deuhin ka ti leh talh. Ning niawm takin a thaw hawk.

‘Ka inbual hmain ka bia ang. Ka inbual lawk ang,ka rei lo ang’ a ti a. A tho a, ka bu nghauh. Inchung panna step,hnum nalh leh felfai nalhah a chho a,a kalsawn hnuah ka hawikual nghal vat vat. A landan maiah chuan in Lian tihtur a ni lo. Chhawng chung lam Room atan a hmang anih hmel. Living room nalh leh Cool zet a ni a,rawng an thlang thiam takzet. A luahtu pa nen a inhmeh vel vek.

Bangah felfai takin tarmawi common lo zet zet a intlar thapa. Bang kilah Pangpar khawina,Hluma siam hnum nalh em em a inkhawia.Pangpar siamchawp leh thingtang nalh fahran a inkhawi pawlh a. Hmeichhe kuthnu a ni ang tih a chiang.

Ka Phone riah ka kang dawrh,ka phu nasa tih piah lam a ni. Min rawn call tu ka en a. Remruata a lo ni a. Hriatpuia nen kan chungchang a ngaihdan ka hrechhuak zawk.

‘Hello..’ pangngai takin ka ti a.

‘Khawnge ikal daiha?’ a rawn ti nghal lawng lawng.

‘Pi in min ko a..Ti nge?”

‘Eh! A ko che maw?” mak tih hmel zetin a rawn ti hu.

‘Aw, ko..Enge?” ka ti hlak.

‘Tunah ka Pu te In ah  chuan ka awm sia,I awm pawh chu a ni si lo a’ a rawn ti leh a. Ka hmui ka pet nghek.

‘Ka kal leh daih tawh.Enge itih a?” ngaihsam hmel fein ka ti a.

‘Ka kal lawk. U Hriatpuia nen inkal rual em?” a rawn ti leh a.

‘Aih,mahse kan haw rual’ ka ti nghauh.

‘Ka lo be lawk ang,ka call a. A busy deuh renga’ a rawn ti leh zat. ‘A inbual ‘ tih ka tum zeta,mahse ngaihdan atthlak zet a neih belh leh na tura thil atthlak lutuk sawi ka peih lo.

‘Lo nghal lawk aw,mi a be lawka.Ka lo call tir dawn che nge?” ka rilrua lo lang hmasaber ka sawi ta ngawt.

‘Aah,tihian ka lo nghak mai ang.Ka hmanhmawh’ a tita tlat. Engvangin nge kan haw rual tih ka lo sawi kher kher ni a?!

Ka hnung lamah pen thawm a rawn awma,ka inher vat. Hriatpuia lo kal hnai mek ka hmuh rualin ka thaw huai.

‘Remruata’n a be duh che a’ ka ti nghal vat.

‘Tunah maw?” a ti a. Min en lo in a kamiz ban a kilh tha mawlh mawlh.

‘Aw, I phoneah a lo calla,Busy a ti a. A hmanhmawh aniang’ ka ti a. Ka Phone ka pe a. A rawn kal hnaia,a Perfume rim tak leh pa zet chuan ka hnar a verh a. Amah nen a inhmeh ka ti leh ta ngawt pek e.

‘Hello, Rema’ a ti zangkhai vuh. Remruata tawng ngaithla in a ngawi deuh vung vung.

‘Ok,ka u ka be zo chiaha..Um,kan rawn thleng har lo ang. Kan sawi dawn nia’ a ti leh a. Kalsawn lo in ka dinna ngaiah ka dinga,min hnungchhawn zawnga hriatpuia ding chu ka en a. Kamiz thui nalh zet, tight lam lek lek a haa. Jeans kekawr a ha a, Loafers a bun bawk. A pian inkhaithli tha zet chu mipa nazawng neih theih a ni tlat lo. A dar a hlaia,a kawng a fek leh tho bawk si..Mipa ho awh ngawih ngawih tur pian a nei ka ti mai. A hmeltha lem lo nangin a chhe hauh lo,mi a hip hle hi a vanneihna ala nita cheu. A englai hian nge mi hip pawh chu ka hre leh lawi si lo.

A rawn inher thut,ka lo enreng bawk si nen kan mit a intawng sawka,rang lutukin a awm zawn ka en vat.

‘Kha le’ a ti sup.Ka Phone a rawn lek hnaia,tim daiin ka bana.Ka awmdan dik lo thlazen hi ka ngei lutuk,ka lo star ve reng anga,ka inhre lo mai mai zawk nge mawni?

‘Kan kal dawn mi?” a ti leh a.

‘Um…Nia,mahse..’ ka ngawi leh daih.

‘Mahse…’ a ti nawn ve sup. Ka lu ka thing nak.Ka sawi tum tak chu nichin khan reilote chawlh hahdam a tum thu kha a sawi a,tunah a inbual zoa,kal a rawt lehngal a.Chu chu sawi tum ka ni a. Mahse, amah nena awmfal na chance zawngah min ngaih ka duh lo..huizz,engvanga mi in ngaihdan tur dawn kual ta sek nge maw ka nih chiah le??

‘Ok,ka Jacket ka han la lawk..’

‘Aih…aw.aw,kal  ila…’ ka ti bah nak. Uluk zetin min en a, ka melh zawk.Ka hawisawn leh vat.

‘Dik lo a awm em?” a ti sup.

‘Aih, awm lo’ ka ti vat. Ka chhang buh teh nuai em bawk atin ni.

Office kan let veleh Remruata leh Hriatpuia an inbe nghala.Eng chungchang nge an sawi ka hre lo. Hna ka khawih theih ang ang ka khawih zawm a. Ka sawt hlawl lo thung.

‘Hello’

‘Zanin chu chhuak ila..’Machhuani’n a rawn ti lawr lawr.

‘Aaa,ka theih pawh ka ring chiah lo. Enteh,inchhuah chuan lo lut kawi ula’

‘Hmm,chhe vel em mai.Khawlai chei vel en kual ve ka chak a,Andy nen tlawng kan nia’ a ti leh a.

‘Ani nena chhuah bak bak enge ni chuang? Bakah,hman zan khan kan en tawh tho sia,ka duhtawk rih mai ang.Chuan, Min lo tlawhkawi ru.Thil zawh che ka duh ania’ tlawn pah titihin ka nui a.

‘Ka hre lo le,kan chhuah chuan lo kal kan tum ang’ a ti nghauh.

Ka haw dawnin Hriatpuia a awm tawh lo. Ka thil mamawh lei ngai ka neih avangin haw tlang loin St Martah ka kal kuala,ka tum aia tam ka lei leh ta nge nge.

In ka thlen veleh eitur ka siama,Geyser ka on nghal bawk. Vawiin thil thleng ka ngaihtuah leta, Pi kha Hriatpuia khan a be felta a ni ngei ang. Min rawn call ta miah lo.

Ka inbual zawhah thil ka ei ta chauh. Muangchangin ka ei a. Ka eikham hnuah Christmas tree cheitur ka dahchhuaka, vawiin tlaiah a cheina tura ka mamawh ka leikim vek bawka.Zaninah chei vek ka duh. Nikum kha chuan November thla tawpah ka hungchhuak hman vek kha ania.  Kumin chu kan buai kual vel lutuka,ka khawih ang ka tih pawhin ka khawih hman lo leh thina,nikum lama ka cheina thlakin kumin chu ahran ka duh bawk si nen ka khawih hman lawk lo a ni ber.

‘Khawnge in pa chu a kal leh dawna?” ka ti a. Machhuani amah chauha a lo kal avangin ka ti a.

‘A thianpa te a tlawh lawk dawna.Naktukah an haw dawna’ a ti a. Andy thianpa te hi kan inchhak lawkah in luah ve thoin an awm a. Andy leh Machhuani inchhar tanna anni nghe nghe.

‘I va han peih mai mai tak.Midangin an hmu dawn pawh ni hlei lo.Mahni hian i tlei lutuk.I tar em mai’ ka thil tihlai en pahin a ti deuh chiam.

‘A ho em mai,keiman nuam ka tih chuan atawk mai’ ka ti ve thung.

‘Nia,nia..A dik alawm.Nang hi nangmahin i awmthei lutuk dawn.I in tiat lek rilru ineih hmain pasal neih angai’ a ti leh chiam. Ka ner khum nghek.

‘I pasal neih dawn vang maiin chutiangin min ti lo mai teh a’ ka ti a. A nui hak hak.

‘Tak takin enge min sawipui i duh a?” a ti a. Ka thil cheina bungrua ka dahhnawk nuaih a ke in a thai sawn deuha.Chhuatah a rawn thu sawp ve nghal sawt sawt.

‘Kan Pi te chhungkua hi engtia khawsa nge annih?” ka ti mawl tawp.

‘Tu in pi? Eee, Pi Mathani maw?” a ti leh a. Tawngkaa chhang loin ka bu nghauh.

‘Ka va hrechiang bik lo tak. Champhai khua annia.Chuan,a nau mipa hi Aizawla an Inah a awm.Mahse, ka la hmu lo.A chhe lo an ti’ a nui pawt pawt.

‘Anih chu,Thingpui ka lum dawn nge i lum dawn?” ka ti a.

‘Duh lo..Enge min sawipui tur chu?’ a ti leh ha.

‘Ka sawi zo tawh’

‘Eh, eng kha? In pi te chungchang kha maw?!” mak tih hmel zetin a ti leh ha.

‘Aw…Vawiinah an Inah min ko a. Mahse, ka thlen khan Motorin min su tepa.Pi nau in min pawtsawn hman hlauha’  titi satliah sawi ang maia awlsamin ka ti a.

‘Pi nau..A awmzia chu ihmu tawh tihna” inti fing zetin min en anga,ka hmelah engemaw hriat tumin min melhkual leh vel dawn tih ka chiang.Ka en duh der lo.

‘Pu damlohna vangin thla khat dawn a rawn kal tawh’

‘Um…Anih chu,ka hre hleinem.Anih chuan a chanchin ingaihven ta vela’ a nui kawr kawr.

‘Vawiinah chuan an Inah ka kal ve a.Tumah ka hmu bawk si lo a, chuvangin ka zawt mai mai che mawle’ ka ti liam leh puat.A chek tlak.

‘A tha alawm’ a ti nghauh.

‘Ka ngaih vang che in lo kal la ka ti bawka’ ka ti leh a.

‘Chhe vel em maia’ a ti hlak.

‘Ania lawm,Pasal min neihsan daih dawn bawk si’ ka ti leh a.Ka ti tak tak.

‘Kan la inhmu reng thei dawn alawm. Engkimah ka pur buai leh reng dawn bawk che a’ a ti a. Ka Mood a inthlak vek. Mal ka inti thar ta riau niin ka hre ber.

Ka mu meng kar,ka mitthlaah Hriatpuia a lo langa,ka haw dawn khan ka hmu ta lo a. Enge a an pawh ka zawt ta lo. A number ka en a. Ka zawh angai.

‘Enge i an?” ka rilru ka thlak leh hmain ka send nghal vat. A seen mai lo.Delete leh mai a tha zawk ang,mahse a atthlak. Engmah zahtur a awm lo.Keimah vanga tlu a ni a. Zawh hi ka tihtur a ni. Msg tone a ri kauh. Ka en a. Amah a lo ni a.

‘Ka nghak rei hle mai che’ tih zawng. A awmzia ka hre lo.A ri leh kauh.

‘Ka tha e..Mahse, haider tawh lo la’

‘Eng nge a awmzia?” tih ka type a,mahse ka thawn hmain a rawn call leh thut. Ka zam nghal titih.

‘Hello..’ zangkhai thei ang berin ka ti a.

‘I zawhna chhanna ka pe dawn che.Thian nihna bak thildang hi ka tilang tam tawk tawhin ka hria.Haider tawh lo teh’ nghet churhin a rawn ti a. Ka thaw hak mai..

Chapter- 5

 ‘Eng? Aih, ni lo.I sawi tum ka man lo’

‘Takzet?” a ti sup.

‘Aw..’

‘Min nei teh’ a sawi zawh rualin insum hman loin ka nui hak. A rum deuh hawk ri ka hre zui zat.

‘Nupui leh Pasal ni tur hian inngaihzawn hmasak angai tih i hria em?” ka awah nuihzatna leh tihelna a lang kawp ve ve.

‘Ka hria…’ a ti cool ruih.

‘Anih si chuan kan inngaizawng lo..’ ka ti hmak.

‘Ka nei duh che.Inngaihzawn hmasak kher i duh anih chuan kan inngaizawng thei’ Ka mit ka chhinga, ka hmui ka pet tlat. A sawi dan tehbawl chu lawmtur nge thinrim tur ka hre lo. Han inlem mawi vel lah a awm hek lo.

‘Enteh…’

‘I haider tlat chuan bul kan tan thei dawn lo a’ ka tawnglai a rawn pawtchat leh hmiah.

‘Ka..Ka..Inkawp tur chi kan ni lo’ ka ti bah nak.

‘Engvangin?”

‘Ka hre lo’ ka ti leh lawi.

‘Ok..Anih chuan tun atangin kan try nghal thei tihna anih chiah chu. Inngaihzawn avanga danglam deuh hu kher tul ka ti lo. Thian kan ni anga.Ka sawi awmzia chu Remruata ni loin keimah hi thian ka ni ang’ a ti leh duah.

‘Remruata…’ ka ti nawn ve sap ringawt.

‘Aw,Remruata kha. I mamawh thin kha amah ni loin keimah nih ka duh tawh.A chiang em?” a ti leha. Mipa leh hmeichhe inlem dan tur a ni em ka hre lo. Han induata,tawngkam danglam bik hman pawh a awm hek lo. Mahse, ti deuh hluam hluam se ka ngei dawn zia ka hre chiang. Ka inrin hmain ka nui chhuak hawk.

‘A nuihzatthlak tihna maw?” a ti leh hluk.

‘Aih,ni lo..Thildang’

‘Ok,anih chuan YES kan ti tihna a ni em?” a ti leh a. Tlemin a aw a dam ta deuh.

‘Kan inmil ka va ring lo tak’ ka ti leh hram.

‘Kan tum chhin phawt ang chu.Mangtha phawt’ a tih zawm zat.Ka chhan let pawh nghak loin a off  zui daih bawk.

Ka mut dan ngaiin ka mu a,thil kal tawh ka ngaihtuah leta. Ka tleirawl lai atangin ngaihzawng tih hmingpu hi chu ka nei ve zul tawh. Mahse, han lak serious tur erawh an awm lo. Mahni tawka Rilru chapo leh induhtawk zet mai ka nih avangin engemaw dik lo deuh a awm ni a ka hriat hlek chuan keiman ka then nghal vat zela. Ka duh viau emaw lam ni loin min then zawk chuan ka induhtawkna a chhe dawna,chu chu ka duh ngai lo. Ka bialpa hnuhnung ber nen kan inthen atangin kum 3 a liam tawha. Ka la single ta ngar ngar. Hrehawm ka tih pawh ka hre lo a. Ka khua a har pawh ka hre chuang lo..Mahse, tunah Hriatpuia a lo langa. Mipa dang ka namnul kual mai mai ang kha chuan ka namnul dawn miah lo tih ka chiang ve tawp bawk. Amah ka hmuh apianga danglam leh min ngaihsak ni a ka hriat avanga nuam veng veng thin hi ka la nei ngai lo.

Ka alarm riah ka harh a. Ka let thak. Ka tho peih lo takzet,Nizan kha thil eng eng emaw ngaihtuah mai maiin ka meng renga.Ka muthilh dawn meuh kha chuan zing lam a ni der tawh. Data ka on a. Ka on fel deuh chauh tihin msg a rawn luta. Hriatpuia min rawn wishna ka hmuh veleh mak deuhin nuam ka ti lehnghal veng veng pek.Ka phur nge pawh ka hre lo. Tleirawl ngaihzawng nei ka inthekhin ber.

‘Morning…’ min hmuh veleh inhnuai lama thu zinga Senior staff pakhatin a lo ti var.Zangkhai zetin ka chhang let a.

‘I hmanhmawh em?” a ti leha. Ka lu ka thing nak.

‘Anih chuan thil ka zawt duh che a.In zawh chi a ni em pawh ka hre lo a’ nuam ti vak lo hmel a pu a. Enge min zawh a tum ang ka hre lo.

‘Sawi la…’ ka ti zangkhai leh vah.

‘Eng lo ania. Tunlai hian sawi sep sep atam riaua. Kan hna hi kan Pu hlui kut atangin kan Pi nau hian a la nghet dawn tih vel hi. Chanchin ka hre chiang chak mai mai’ a ti a. Ka lo la hre ve hauh lo.

‘Ka hre miah lo mai, chutiang sawi a lo awm a ni tih i sawia ka hre chiah’ ka ti a. Ka then sak. A bu nghauh.

‘Anih chuan sawi mai mai anih dawn chu a’ a ti a. Hahdam huai hmel a pu bawk.

Ka kalsana,inchung lam ka pana. Ni sa tang et awtin min rawn chhun a. Van lam ka hawi chho a.Chhum awm loin a thiang kuka,a nalh takzet.

Ka kutkawr ka hlipa.Ka Jacket fual hak ka phelh leha, Computer ka on a. Coffee la turin ka chhuahsan leh rih. Sales Manager zinga pakhat Peki nen Coffee in pahin kan titia. Ka mitsirin kawngkaa lo lut ka va hmu a. Ka hawidan ka thlak vat. Atthlak fahranin ka zam lutuk tlat. Nizana mi kha a ti tak tak anih chuan kan inngaizawng dawn tihna ania. Staff tam zawkin an hriat hunah engtin nge an ngaih ang? Midang chu engpawh ni se Remruata hriat hun ka huphurh ber.

‘Hey…Enge i tih a?” Remruata a rawn lut a.

‘I hmuh ang hian hna ka thawk meka’ ka nui hak. A nui ve huk huk bawk.

‘Christmas hun atan Plan i nei em?” thut pahin a ti a.

‘Plan vak angai mi? ka inkhawm anga,ka inkhawm peih loh leh Movie en tur ka ngaha..’

‘Anih chuan kan chhuak dawn mi? Movie nen ngawta hun hman ai chuan…Eee,Coffee ka lak theihnghilh,I duh ve em?” a tih zawm duah.

‘Duh ve tho.I lak dawn tho chuan..’ ka ti a. Ka thil tihlai ka tihzawm mawlh mawlh.

‘Nope, la tur an tam em mai’ a ti awlsam et. Ka ner nak.Ka theih chinah ka intur na na na hi chu keiman lak hram hram ka duh thina. A tul tawp loah chuan mi tirh thlazen hi ka duh bau lo bawk.

‘Ok,ka va la ang.Min sawisel i chak tih i hmelah khan a lang reng ania’ a ti bul deuh hmak. Ka en a,Kawngkhar lam a lo pan hman tawh. Kan naupanlai atanga inkawm kan ni hauh lo chungin kan inkawmngeiha,kan inhre chiang em em bawk. Mahse, kan mizia thenkhat a inletling thawk. Naupan lai atanga midang ring thang a ni a. Ama tih theih reng thilah pawh midang tirh a hrat em em a. A bul lawka mi la tur pawn a tir fo,ka sawisel zauh zauha. Eng huah angai lem lo. A sual tihna lam a ni hek lo a, Staff tam zawk pawn an ngainat em em a ni tho.

‘Kha le, Boss…’ Dawhkanah ka ta tur a rawn daha.

‘Fel thei,nula ho hian an hre fuh lo deuh che a ni’ ka ti a.A nui huk.

‘Hre fuh maithei sin,mahse pawi lo.Nangman i hre tho’ a ti a. Ka ner khum nak.A nui leh huk huk.

‘Eee, I pu hian engtik nge a lo zawm leh dawn hriat a harsa sia..Eng lo,kan kal dan hian kan kal reng mai dawn tihna mi?” ka ti a. Tul lo em emin Hriatpuia hming ka sawi zak tlat pek.

‘Animai ang chu. Boss ber a damloh miau chuan’ a ti a.

‘Tawngthu chhe loah lo thi ta se kan buai rap dawn a ang ka ti’ ka ti leh a. A hmel a danglam zawk.

‘Buaina tur a awm hleinem.A nupui a la dam te chuan..Engtin nge Christmas hman chhuah chu?” a ti leh daih.

‘Khawiah nge kal intum reng reng a?’ ka ti a.

‘Ka cousin London a awm kha a lo haw dawna. Urlawk zanah chhuak ila, Ni 28 velah let leh ila kan tia’

‘Khawiah ka tia lawm mawle’ ka ti hlak.

‘Sialsuk lamah. Hmuifang velah riahna tur a awm kan ringa’ a ti leh a.

‘Naa,khawvawt nen,mahni inlum bak a nuam a awm dawn lo.Ka peih lo ni mai tehse’ ka ti a.

‘Hmm,a tha lawm..I kal ve peih takin ka ti mai mai’ a ti leh a.

‘A nuam viau ang,mahse Family innia. Kei ka hrang bik dawna.Ka phur vak lo.Bakah,Christmas te chu inkhawm ka duh’ ka ti leh a. A bu nghat.

‘A tha lawm..Machhuani te inneih kha engtik nge nita?’ a ti leh a. A hun ka hrilha,Biak in hawng lo tur annih avangin tihchiam an tum loh thu ka sawi tel bawk.

‘Tih chiam hi inneih hlenna pawh a ni hleinem. E,niminah in Accident a mi?”

‘Accident tih lemah Motorin min su tepa.Chu zawng chu nimai’ ka ti a.

‘I sawi awlsam sia maw..Pi khan a lo sawia,min hrilh bawk si lo a. Ka lawm lo tep a ni’ a ti leh hmuk.

‘Naaa,ka na bawk si lo a. Han au pui chiam te chu a’

‘A tha alawm’a ti a. A dingchhuaka,a zi mar ar ar.

A chhuah hnu lawkah Hriatpuia’n min rawn call a. Pick mai loin midang an awm hnaih leh hnaih loh ka enkual te te. Hlauh tur an awm pawh ni si lo hi ka dawih thar ta ni berin ka hria.

‘Hello..’ ka theih anga pangngaiin ka ti a.

‘I lo phei lawk hman em?” a rawn ti dam thlup.

‘Aw, ka lo kal ang’

‘Ok..’ a off nghal a. Ka phone ka melh vak, ka nui zui leh hak. Enge ka beisei chiah pawh ka hre lo e a.

‘Mam, enteh..’Hriatpuia room ka luh dawn tepin Angela-in a rawn ti a. Ka ding dat. He nu hian a hriat ka duh lo bur.A hriat rual rualin Office pumpuiin an hre vek tihna nimai.

‘Kya?” ka nui a.

‘I laklawh mi?”

‘Laklawh chiah lo.Boss in min ko a’ tih pahin ka thle bak.

‘Eh,Ok..Nakinah nimai’

‘Sawi la..A pawimawh hmel sia’

‘A ho tawp..Mimal thil mawle’ a nui var var.

‘Ok, nakinah kan sawi dawn nia’ ka ti a. Mahse, ka ngaihtuah naah thildang a awm daih thung. Kan inkawmngeih hran miah lo a,ka ngaina lo chuang lo nangin thian atan ka duh chi erawh a ni lo tih ka chiang. Ani pawn min kawmngeih bik lua lo.Chutichungin mimal thil min sawipui a duh a,tlemin mak ka ti deuh. Tih lan kher erawh tul ka ti lem lo.

Kawngkhar bulah ka ding leh dat.Ka zam lutuka ka kut a thlan dap dap thei!

‘I lut dawn mi?” Remruata a rawn ding hnai nghala.Ka thaw huai mai. A lo kal hnaih lai ka hre lo.

‘Ka lo tum meka..Nang zawk?” ka ti vat.

‘Aw,ka be lawk dawn.Lut ila..’ tih pahin kawngkhar tlema inhawng sa a nawr hawng zau nghala.Lawm zetin a hnungah ka zui nghal vat. Mahse, Hriatpuia leh Hmeichhe pakhat inhnaih lam maha an lo thu dun ka hmuh takah chuan ka ding data. Ka chhungrilah thikna mak lutukin a rawn piang a. Ka lum nghal pup thei.

‘Ehe!! Rosy…’ Remruata’n a ti nghal hluai. Tih mai tur hre loin ka dinna ngaiah ka ding a. Ka kut hma lamah ka suih fel at bawk.

‘Kan va inhmu khat ve’ Hmeichhe lo thu in phur hmel fe in a ti ve vat. Hriatpuia ka melh zawka. Hriatthiam har zetin min lo en a. Rang lutukin ka hawisawn nghal vat.

‘Aw,dam alawm..Engtik nge ilo haw a?” a ti leh a.

‘Niminah ka lo thleng a..Helam ilo pui ve tih ka hre lo a’ a ti leh a. An inhre tha hle tih an inbiak danah a lang reng. Tu nge anih ka hre ngai lo a, ka hmuh ka la hre hek lo.A hmeltha han tih vut tur a ni lo a, a inchei dan eng mah Over awm lo mah se a kan Class a in ang lo tih ka hmu thiam nghal vek tho.

‘Nia,a rei ve tawh. Kan inhmuh lohna a rei tawh em alawm’  a ti leha. Eng eng emaw an sawi zui leh a. Min kotu ber lahin engmah a sawi si lo,ka lut laklawh tawha,Han chhuah leh ngawt chi a ni tawh bawk si lo. Ka hnaih bera Chair awmah ka thu thla zal zal.

‘U Hriatpui, inhnuai lam Stock kha ka check dawna.Ka log-in thei tlat lo a’ Remruata’n Hriatpuia hnenah a ti a.

‘Chutia law? Mami,nang i lut thei em?” min rawn en a. Ka thu mar auh.

‘Aw,thei e’ ka ti zangkhai vah.

‘Ok,a that chu. Angela-i a awm chuan lo en dun ula’ Remruata hnenah a ti a. Remruata a bu nghauh. A chhuak zui nghal a. Min nghak rih tura ngen tak ka napa,mahse ka ti ta em lo.

‘Kan Load lo chhuak hnuhnung ber hi enge Status?” min rawn en a.

‘Vawiin tlaiah Silchar atangin an rawn chhuak dawna.Naktuk chawhma lamah chuan an lo thlen hman ka ring’

‘Good..Anih chuan Office khar hmain kan tifel hman dawn anih chu’ a ti sup.

‘Nia,Ka beisei..Thildang ala awm em?” ka ti a. Ka huaisenna zawng zawng sawmkhawmin a mitah tak ka en ngar bawk.

‘Awm lo..’ a ti nghut.

‘Ok..’ ka ti a. Ka tho a, Kawngkhar lam ka pan nghal zat.

‘Lunch ei turin Kimkimi ten min nghah kha aw’ Hmeichhia in a tihri ka hriat rualin ka inseh ruh nghal nghek.Hrep tak hian a.

Keimahin thil ei  turin ka kala. Ka eitur tui leh tui loh pawh ka hre lo. Ka ei liam vel mai mai. Nizana a thusawi leh tuna a awmdan kha a danglam em em lutuk.Mahse, hna ania. Midang awm laia inkawp viau anga lan kha a Professional chuang miah lo. Bakah,Hmeichhia kha  tu nge anih pawh ka hre lo a. An Cousin pawh a lo ni theia. Remruata pawn a hriat that danah khan an chhung hnai tu emaw ber a ni thei. Mahse, an inthut hnaih lutuk.Lunch ei tura chhuah an la tum zui bawk si..Huizz,hetiang em em hian ka thikthu a chhia tih pawh ka lo hre ngai nek lo.

Office a ka let lehin ka rin ang ngeiin Hriatpuia te an lo awm tawh lo. Pawi tawp lo.Kal daih rawhse. Min fiamkual vel mai mai a tum nih vaih chuan a chak lo khawp ang.

‘I la buai em?” Angela-i a rawn lut a. Ka be chak hlawl lo.Mahnia awm mai mai ka chak.Mahse, ka bu ta tho. A rawn luta,ka hmazawnah a thu thla nghal zat.

‘Han sawi la…’ ka phur loh zia ka awah tihlan loh hram tumin ka fimkhur viau angai hial.

‘Awi,ka rilru hah..’ a ti halh. Ani leh ni lo ang takin a hmel a thutak a.Midang an awm hnai em tih en in a hawi kual vat vat bawk.

‘Min share chi a ni em pawh ka hre chiah lo a…Engpawhnise pawi ka ti ‘ ka ti hap.Ka dar ka ti sang ak bawk.

‘Ka…Eng lo,Mam..Ka rai in ka hria’ ka ip chawih.

‘Maw?” ka ti sap. Ka hriat loh vanga zawt pawh ka ni chuang lo. Engvanga kei min Share tlat nge anih phei chu ka hre lo lehzual.

‘Dik tak chuan ka hrilh chhan che chu..Ih, eng lo ania. Remruata’ ka pen ka thlauh tawp.  

‘Ni lo…Oh, Sorry..Remruata fa maw?” ka awah mak ka tihzia a lang thei. Mak tih loh ngaihna pawh a awm hek lo.Eng lai mah in an in ngaizawng ngai tlat lo.

‘Um..’ a ti tawi tak. Min rawn en zawka, a hawisawn leh vat. Angela-i ka hriat thin,nula thawveng leh vei nei lo em em kha ni loin hmeichhe mangang puih ngai a ni.

‘Aman a hria em?” ka ti sep.

‘Aih, ka la hrilh lo. Eng lo ania. Khami zan khan kan kai ve ve a. Tihpalh thil a thleng ania. A hnuah pawh engmah inzawmna kan nei lo a’ a ti zuai leh raih. Kei erawh chuan  chutiang mai maia awlsama Sex an hmang mak ka lo ti ru vawng vawng thung. Mahse, tunah ka rilru lo tihlan a tul lo a. A buaina belhchhah tura a khawsak dan zahawm loh zia lo hrilh lah ka tihtur a ni hek lo. A khawsak dan atthlak zia sawia zilhtu ni loin Ngaihthlak sak tu a mamawh zawk.

‘Enge ka tihsak ang che?” ka ti dam thlap.

‘Ka hre lo..Ih,ka lo ngaihdan chuan i bialpa…’ a sawi zawh hmain ka lu ka thinga,sawi zo loin a tawp ve mai bawk.

‘Kan inngaizawng lo..Biaksak  i mamawh chuan ka lo bia ang’ ka ti a.A rilru tih nawm nan ka nui lui var var bawk.

‘Ka lawm ngawt ang.Mahse, ih…Mam,ka hlauthawnga,a pawm duh ka ring lo’

‘Ka lo be phawt ang. A rang thei ang berin’ ka ti nghauh.

In ka thlen hnu lawkah Remruata ka call a. A pick lo.Call nawn leh ka tum lai takin Door Bell a rawn ri a. Ka phun hlak. Vawiin thilthleng in ang lo lutuk khan min ti chau hluah hluaha,Inleng neih ka peih hlawl lo.

Kawngkhar ka hawnga. Ka beisei loh lutukin Remruata alo ni a. Ka thaw hak,ka rilru hre lo em em in hlim zeta nui chungin min kal pela. Ka thilsawi tur ka sawi hun chuan a nui lo khawp ang le.

‘Enge min lo call a?” a phone en nuap nuap chungin a ti a. Chauh hmel fahranin a thu thla hnawka.A mu zui zat.

‘Biak che ka duh mawle aw..Enteh,…’

‘Lawk…’a phone a kawk zauh.A pick zui nghal a. Tu nge rawn call tu ka hre lo nangin hna chungchang tih an tawng danah ka hre thei.

‘Hneawm ve le..Let lehnghal ka ngai’ a ti hmuk. A tho zui nghal zat.

‘Enge a?”

‘I nau duhtak,Mechanic tha chungchuang Deepak-a a che uih anih chu’ a ban a vaia. Ka nui chhuak hak thung.

‘A va pawi tak,zan lam hi chu a paltlang zo thin lo anih hi a..Lawk,I kal hmain thil sawipui che ka duha’ ka ti a. A thle bak.

‘Nakinah sawi mai ang, kan Boss Zaidam em emin a hriat hmain chinfel angai’ a mit a siai zauh.Thil ka hre chhuak ve zawk thung. Kha hmeichhia kha tu nge anih?

‘Vawiina lo awm kha tu nge?”

‘Khawia lo awm maw?” a ti hu.

‘Rosy tih emawni kha mawle..Ka hriat hnu a ang tawpa’ chhuanlam tur ka hriat ka sawi nghal pawp.

‘Eee,amah kha maw? I hre maithei. U Hriatpuia longtime Partner anih kha’

‘Business?” ka ti sap.

‘Nope…Personal,nupui nihna la nei rih lo ang hi.Nupui tihtur erawh ti vek si..Hrethiam em?” a nui a. Kei erawh ka inring lo lai vuak sawk ka inchan ber.

Chapter- 6

‘Anih chu…Ka hriathnu ang lutuka’ ka theihtawpa pangngaiin ka ti halh.

‘Um,khawiah emaw i hmu tawh ni maithei sin. .Chuan,engvanga i ngainat lutuk hlau nge ka nih i  hrethiam mai em? ‘ a ti leh a. Ka lu ka thing nak.   

‘A nunah hian Rosy hi a lian lutuk.Amaha tel ve pakhat a ni tawp mai. Inthen,then lo anni renga.Chuvangin i natna tura ani i hnaih ka remti lo bur’ a tita duah. Ka chil ka lem khalh. Anih si chuan engvangin nge nizanah khan khatiang a sawi? Ni lo,midang aia that bikna nei ka ni lo a. Min duh chhan tur engmah thil hlu danglam bik ka kawl hek lo. Anih chuan min fiam kual tihna a nih chiah chu.Hreptak hian a..

‘Ka kal…’ a ti leha. Ka ban ka vai zauh.

Door Bell riah ka harh a. Ka thuchhuak vat. Ka phone ka hmet enga,Dar 11:30 a pel tawh. Door Bell a rawn ri leh a. Ka che chuang lo.Tun ang hunah tunge ni ang? Thil han hlauh em em ka nei khat viaua,mahse zan reia Kawngkhar kik ri hi chu ngaiah ka nei thei hlawl lo.  Ka phone a rawn ri thuta, ka zuang zawk a ni ber. Tim daiin ka bana. Min rawn call tu ka hmuh takah chuan ka thaw nghal huai.

‘Enge?” ka ti bak hlar mai.

‘Kawngkhar rawn hawng teh’Remruata’n pawr fahranin a rawn ti a. Ka ngei hluah hluah.Tun ang tlai tawh lutukah hian engvanga rawn kal nge maw anih tehlul ni?

Kawngkhar ka hawngfel awrh tihin a rawn inzep lut nghal a. A zu in rimin ka hnar a verh nghal zak bawk. Sofaah a thu thla chawrha,tur zetin kawngkhar bul atangin ka melh reng thung.

‘Tun ang tlai tawh lutukah tinge Door bell i hmeh nghek ngheka?” ka ti bak leh hlak. Thut pawh thu loin ka ding ngar ringawt.

‘Enge i phone i pick theih loh tehreng’ a ti liam puat.

‘A hrim hrimin a tlai tawh a.Enge ilo kal reng reng a?”

‘Ka buai..Ka Bike a chhiaa. Chuan, ka sawi peih lo’ a ti hmuk. Thil ka hre chhuak zawk.Ka pan pheia,a bulah ka thu thla hnawk.

‘Angela-i a raia’ ka ti chhuak sap. Min rawn en zawka, chung lam a melh lehnghal daih.

‘Ti nge chu chu min hrilha?”

‘I fa anih theihna chance a awm niin ka hria’

‘Ha…I mawl ami?” a nui nghek. Ka phu zawk thung.

‘Mawl lem nang. I pawm dawn lo tih ka hre sa a. Mak ka ti vak hleinem’ ka ti lui salh. Min rawn en leh a. A hmel a thutak ta deuh.

‘A ni lo ang. Ka chiang’ thutak zawkin a ti hmuk.

‘Ka hre thiam lo..Enteh,mipa ka ngaihnep em em ang hi nih tum miah suh.Ka hmu peih tawh lo chatuan dawn che tih i hriat kha’ ka ti hap. Ka ti mai mai hauh lo, an Bialnu emaw bialnu lo pawh sex an hmanpuia,an lo rai anih chuan neih hi Mipa tihturah ka ngai bur. Hmeichhe thenkhatin an mahni Hmeichhe lam dem zawnga ‘engvangin nge a mutpui ngawt? Mutpui lo se a rai nang’ tih tawngkam an hmang fo mai pawh hi ka ngaithei lo. Sex hman ka hmuh mawina a ni lo,awlsam lutuka hman hi kei pawhin mak ka ti ve tho.Mahse, pakhat zawk chauh dem hi ka ti ngai lo.Amah chauhin a rai thei lo,tisualtu pahnih an awm angai. Tisualtu ve ve chu dem bik awm lo in dem ve ve tur.Mipa mahni mawhphurhna hlen ngam lo a tlanchhia tluka ka ngaihnep an awm ngai lo. Mi Pasal tih hre reng chunga ngaizawng hreh lo Hmeichhia nen ka ei loh dan a in ang reng.

‘In venna ka hmang’ a tawngri in ka ngaihtuahna atangin min tiharh zawk.

‘Maw?!”

‘Invenna ka hmang,ka sawi awmzia chu ka fa anihna chance a awm lo.A chiang em?” mahni inringtawk fahranin a ti a. Ka chil ka lem khalh.

‘Palh a awm aniang’  ka ti talh.

‘Nang tereuh hi.Sex la hmang hawt si lo hian i duh duh sawi lo teh’

‘Hmang kher lo pawn hriattheihna tur mithiam thuziak a awm teuh. Naktuk zanah hetah Angela-i ka lo hruai anga. Inbia ula’ luhlul chhuahin ka ti leh nghauh.

‘Lalrinawm, min nawrlui ziah lo teh’ nin hmel zetin a ti a. A thutna nghenchhan a ngheng chawrh.

‘Ka lo hruai ang, a chiang em?” a mitah tak ka en a. Min en ve bawk. A nui chhuak leh thut. Eng hi nge maw a nuih ziah fahran ni?!!

‘Eng nge nuih tur awm ziaha?”

‘I luhlul lutuk hi mawle..Ok,naktukah Angela-i ka bia ang.A tha em?”

Kut ka beng thak, hei ngei hi ka thianpa Remruata tihtur a ni.A fa anih a ring emaw ring lo emaw hmeichhia zawkin a puh anih chuan tlanchhe loin a hmachhawn ngei ngei ang. Ka lo beisei dan chiah a ni bawk.

‘ Ka Scooty hawn mai la”

‘Tunah ka inkhalhchhuak peih teuh lo maia’

‘Riah i tum chu a ni lo ang chu maw?”

‘Min drop peih leh peih loh animai’ a ti liam leh puat. Sana ka en zawk, a tlai tawh si. Kan veng leh Remruata te veng lah a inhlat bawk si. Mahse, a riak anih chuan mahni chauha inluah,nula lehnghal bawk si chu mualpho a awl dawn lutuk. Kan inkawmngeih em avangin ka tan chuan mipa a ni satliah ve maia. Mahse, mi ngaihdan erawh a danglam daih dawn. Zan tlai tawh lama lo kal thut thut hi chu thil thar a ni miah lo. Mahse, riah erawh chu a dang daih.

‘Hey, ngaihtuah buai vak lo teh,I Scooty ka hawn ang.Ka uang mai mai anih kha’ thawh pahin a ti a. Ka thaw nghal huai.

Ka insiam mawlh mawlh laiin Remruata’n min rawn call a.

‘Ka rawn lam kual mai ang che’ a rawn ti a.

‘Ngai lo..Lo kal duh suh. I bike khawiah nge a chhiat?” ka ti a. Nizan khan a chhia a tia. Ka inbul hnai nimai turah ka lo ngai ngawt kha ania.

‘I in piah lawkah khan,hna ka thlen hunah ka chhuak leh mai ang. Ka rawn lam loh che chuan kalna tur inei si nang’ a ti a.

‘Ngai lo, a harsa lo’

‘Ok..Ka inthlahrung miah chuang lo ania aw’ a ti a,a nui zui kur kur.

Hna ka thlen hnu lawkah ka Roomah Angela-i a rawn lut nghal vat. Zan lam a mu tha lo tih hriat takin a hmel a nguai ,a mit hnuai a val kalh bawk. A rilru tur ka ngaihtuaha, han mut that viau a harsa ang tih ka hria. Pasal nei lo a naupai pawh a rilru hahthlak dawn nak laiin ani phei chu a bialpa pawh a ni si lo.

‘Zingah min rawn call a’ a ti sap. Dawih hmel deuhin a hawi zak zak.

‘Chuan…?” ka ti dam thlap.

‘A thinrim em pawh ka hre lo a,aaaa..Ka hlauthawng’ a ti hap.

‘Hlauthawng suh,ka hre chiang alawm.Thil tha zawk a thleng vat ang’ ka ti a. Ka nuih var var.

Motor a rawn thlenga, Showroom a rawn tlan thlen theih loh avangin a turin Staff mipa tamzawk ka kaltir a. Inleng kan ngah bawk nen thut mai maina hun a awm ta meuh lo. Inhnuai leh chung ka kartawn seka,ka chawn a kham thum thei.

‘Mami,Officeah min rawn lawk ta che’ ka hnung lam atangin Hriatpuia aw in a rawn ti a. Ka inher vat. Ka hnungah kekawr ipte zen chungin a lo ding run tawh. Kawrlum phiar, a nghawng V pawl tak zet a haa. A nghawngah a hnuaia a kamiz var hak nghawng a lang bawk. A kawrlum ban a pawtchhing deuha,a inhmeh em em tih hian a sawifiah berin ka ring. Vawiinah mumalin inbiakna hun kan la nei lo. Load lo thleng ka buaipui bakah Customer lo biak an ngaia.Ani lah inleng a neih deuh reng avangin a Officeah a tawm deuh chawt thung.

‘OK..Ka lo kal ang’ ka ti a. A bu nghut.A inhera,a office lam panin a kal zui nghala. A pian nalh zet chu a kawrlum phiar hak chuan khuhbo zo loin a ti lang nalh zual zawk mah. A bawp sei zeta a pen pawk pawk chu a hnungah ka zui dat dat. Ka ngaihtuah naah Rosy a lo lang a. Ka lum lehnghal pup.Nizan khan vawikhat pawh min rawn be miah lo a, ka be bik hek lo.Huh,eng nge ka beisei a? tuemaw a kawp a,a thlah thei lo tih hre reng chungin a duh duha a tihkual turin ka lo awm anga maw? Hnai lo mai..’Kan inkawp ang ‘ tih vel kha chu mumang pakhat mai a ni a. Ka thanharhsan leh daih tawh tih pawm ila ka hahdam animai.

‘Thu la…’ a ti hmuk.

‘Min hre thiam la,Motor ho an lo thleng dawn hnaia. Ka lo ngaihven angaia.’ Ka sawi zawh rualin ka thle bak.

‘Ka hria..Thu rawh’ ngenna ni loin thupe aw tih ka hria.

‘Mahse,Ok..’ ka ti leh ta zawk.Za miah loin ka nui lui saka,Ka bul lawka Chairah ka thu thla nghal zat. Hna chungchangah bak engmah inbiakna tur kan nei lo a. Mimal thil deuh sawi tur ang maia lo Nervous kual vel ka mamawh lo.

‘Lunch i ei em?” a ti hmuk.  Ka beisei loh lutuk min zawh takah chuan phawk zetin ka en vat.Chik fahranin min lo en run. Hawisawn duh loin a mitah tak ka en ve a.

‘Aw’ ka ti tawi tak.

‘A tha, engvangin nge i scooty kha Rema khan a kawl a?” a ti leh a. Ka lungphu rang dawt dawt chu a hriat ka hlau rum rum. Dawhkan hnuaia ka kut dah ka hum kawp tlat.

‘Ka mimal thil sawi tur kan ni loin ka hria’  ka ti dam thlapa,ka then lui leh sak bawk.Ka aw a mahni inrintawkna lang chu keipawn ka awih lo rum rum zawk. A mithmul a tikang awk.

‘Anih chuan hlat deuh la a tha anih chu’

‘Min hre thiam teh’ ka ti a. Ka tho nghal phat.

‘Thu rawh’ a aw a ring lo. Mahse, a chiang. Huatna nen ka en a,Mipa zak lo hi ka lo hmu tawh thin,mahse ani aia zak lo tih zawk hi ka la nei pawn ka hre lo.

‘Khawngaihin ka mimal thil min sawipui tur i ni lo tih i hriat ka duha,ka tan chuan Boss ini  a. Mahse, chuvang ngawtin ka mimal thilah inrawlh theihna i nei lo. A lungawithlak loh takzet,thleng nawn lo se ka lawm ngawt ang. Anih phawt, Motor a lo thleng tanin ka hria’ tih pahin CCTV Monitor lamah ka phar zauh. Ka nui lui leh saka,engmah sawi loin Kawngkhar lam ka pan zui nghal hmiah. Ka tawngkam nelawm lo leh kha fak mai kha min chhang let tura min chelh emaw min dan tumna nei hmel a pu bik hek lo. A hmel nelawmna tel miah loah khan enge a ngaihtuah ka hre thiam lo a. A thinrim nge a Shock zawk ka hre hek lo.

Pawn lam ka pan nghala, CCTV cover phak loh chin ka pan ding zela. Ka thlen veleh thlang lam hawiin ka dinga, ka mit ka chhinga. Duhthawh zetin Boruak ka hip lut kawk kawk bawk. A bula ka awm lai kha chuan vawt raih leh mahni inringtawk tak ang khan ka lang theia,tunah chuan ka khur a. Ka lungphu lah a phu rang em em bawk.

‘Mam…’ ka dara rawn khawih pahin Remruata awin a rawn ti a. Ka phu zawk.

‘Aw…Enge?” zangkhai thei ang berin ka ti a.

‘Hey, enge dik lo? I dang vek’ ngaihthat loh hmel zetin ka dar tawn tawnah a rawn vuana. Chik zetin min en bawk.

‘Ka tha…’

‘Dawheh..’ a ti bul hmak. Nia, kan inhriatna a rei tawh,kan inhnaih em em bawka. Ka mood awmdan engkim a hai ngai tawh lo ang bawkin kei pawhin ka hai mai mai tawh bik lo.

‘Ka pum a nuam lo pek alawm le,ka luak thei mang bawk si lo a.Min hnawh tlata’ ka rilrua lo lang hmasa ber ka sawi pawp. Ka pum ulcer neih hi kan hre ve ve a. Chhuanlam tha tak a ni ve hrim hrim.

‘Ulgel i kawl lo mi? in uluk ta che mawle’ a ti a. Ka nui lui sak.

‘Ka zia viau,inchhung boruak up deuh nen ka zo lo pah bawka’ ka ti a.

‘Um,engpawhnise in enkawl uluk rawh,a hlauhawm ania’ a ti leh a.

‘Nia,nang ang hian lut thei zawng zawng lut phei se chuan ka thi tawh ang’ ka nui a. A ner nang,mahse a nui ve ta hak hak tho.

In ka thlen meuh chuan chau tak ka ni ringawt. Motor lo thleng zawng zawng kan tihfel vek hnuah ka thu hman ta chauha,mahse Hriatpuia ngaihtuahna hun ka nei lo a. Ka lawm mah zawk.Customer pakhat nen kan inbiak laiin a chhuak dawn tih kan Manager Lalrina hnena a sawi lai ka hriaa. Mahse, ngaihven angin ka awm duh bau lo,ka haw dawn thlengin a lo let leh ta miah lo. A bialnu duhtak nen an lengkual nge a in reh ruihah khan Khumah an tal kual vel dawn pawh ka hre nek lo e. A duh duh tise enge ka tan pawi??!!

Thu mu chungin Movie ka en a, ka rin aiin ka entui ta phian..Door bell riah ka hawi phawk nghal hra,ka Phone ka ban vata.Remruata min lo call ka hre lo lehpek nge ni? Mahse min lo call miah lo a,msg pawh engmah a awm lo. Sana ka en a,dar 9 a pel hret. Remruata bak tumah lo kal tur an awm lo,Angela-i nena inhmuh tum kha annia.Chanchin min rawn hrilh dawn a ni ngei ang.Peih lo zetin ka tho a, ka phun hlak.Naktukah pawh min hrilh thei renga,zan tlai tawha lo kal ziah mai.Khawvawt nen a ninawm tlat.

‘I tlai thei…’ Kawngkhar hawn pahin ka ti a. Mahse, kawngka bula lo ding ka hmuh takah chuan ka tawp chawt. Engmah ka ngaihtuah hman tawh lo,ka rilrua lang hmasaber angin ka che nghal pawp.Rang lutukin kawngkhar pawh khar lehnghal ka tuma,mahse a rawn vuana.Hneh zetin a pawt kaua. A rawn lui zui nghal hmiah. Ka thaw hawk,Living room lam pana a kal chu ngei lutukin ka en a. Enge tun ang hunah lo kal a tulna? Mahse, ka awmdan naupangchhia lutuk kha..Khatianga chiai lutuk lo khan hahdam tak leh nelawm miah si loin lo dawngsawng zawk ila tha tur.

‘Ka be duh che ania’ min rawn en chungin a ti hmuk. Thu loin a ding ngil ut a, a hmel nelawm lo zet chu khawvawt vin tuk nen a inrem phian.

‘Hna chungchang chu Officeah kan sawi theia’ ka ti nghauh. Kawngkhar nghengin ka dinga, ka inkuangkuah fel than bawk.

‘Hna chungchang sawi ka tum tih ka sawi ka va hre lo ve’ a ti duh lek. Ka awmdan ngeng zet pawh a haider hmiah.

‘Anih chuan sawi duntur kan va nei si lo ve. Mut ka lo tum tawha’ ka ti leh hmak. Ka thian emaw ka bialpa pawh a ni lo a. Hnathawhna lama ka Boss ai awhtu pakhat ve mai a ni a. Inleng dang anga Polite taka lo hmachhawn vel a tulna ka hre leh tawh lo. Bakah,ka laka Game tenawm zet play a tum miau avangin ka tan chuan Hmelma pakhat a ni tawh zawk.

‘Remruata a lo kal dawn anih chuan…’

‘Kal ang,I hnawk chiah chiah’ ka tilui salh. A kekawr ipte a zen a, tawng miah loin min rawn pan pheia,ka ding mar nghal auh. A chet dan chu ka beisei loh lutuk avangin ka insangmar nghal teuh bawk.

Ka hmaah tak a rawn dinga, a perfume rim in ka hnar a verh nghal zat. Cho zetin ka en chho ha a. Hnathawhna hmun ni loin ka in a ni a. Hlauh chhantur ka nei reng reng lo.

‘Ka kal ang maw?” a ti hmuk.

‘Yes,I kal mai loh chuan,a lo thlen hunah nuam itih ka ring chiah lo..Bakah,nula mahni a awm ka nia,Tlangval pahnih tun ang huna an  insual palh chuan ka lar dawn em mai’ ngeiawm thei ang berin ka nui lui hak. Mahse, ka rin loh lutuka a chet takah chuan ka te thawt.

Min rawn hnaih rawka, min pawm kang nghal nawlh. Tal thlak ka tuma,mahse ka kaihzaah a vuana.A darah min pu zui nghal hmiah.

‘Min thlah rawh,I va zak lo ve’ ka ti that,a samah tham ka tuma,a thle sawna,a dara innemkan tumin ka bei leha,ka hlawhchham leh thak. Rihna nei lo ang maiin min kalpuia. Ka tal laih laih chu hre awm pawhin a awm duh lo.

Khumah min thehthla hnawk.Rang lutukin chhuk tumin ka per sawn nghala,mahse min rawn man hman leh ta tho. Min delhbet zui nghala,tlawh tumin ka ke ka titawm.Ka tihmar hmain a rawn khan bet leh hmiah.

‘Mipa i mamawh bawka,ka entir ang che’ a ti hul hak.

‘Nang….’ Ka ti hmana,mahse ka tawng zawm tur a hmui chhah tapin ka hmui a rawn sik rualin a titawp nghal hmiah.

Chapter- 7

Ka hamhaih luat vangin ka mu khawng at. Dim leh dam lutukin ka hmui hnuai lam a rawn fawpa, ka awmdan danglam nghal huih chu rapthlak ka ti lutuk.Ka kawr a rawn zen rualin ka tal leh phat. Ka thlesawn nghal lawp bawka,a thaw hawk thung.

‘Mi tenawmpa..’ ka tichhuak thawt. Ka theih ang angin talchhuah tumin ka bei leha,mahse kan inlenhleih lutuka,tihngaihna a awm ngang lo.Ka beidawng duh chuang lo.

‘I tenawm lutuk,hmeichhe chak lo zawk i tilui ania’ ka ti leha. Ka talchhuah theih si loh avangin tawngkam bak hmanrua ka nei lo. Mahse, ka beidawng tih hmuhtir ka tum miah lo.

‘Duhtawk teh’

‘Enga?! Min thlah rawh’ ka ti leh that.

‘Hahdam rawh’ a ti leh sup. A aw a dam hle bawk. Ka nghawngah a hmai a rawn phuma,a thaw lum ham ham chuan ka sawithiam chiah si loh nawmna min pe a,min fan raih raih. Ni lo,engtin nge hahdam tura min beisei theih zawk?

‘Kal sawn rawh’ ka ti leh a. Ka au ring tawh lo, ala khur deuh zui bawk.

‘Aih’ a ti tawi tuk. Min kuahbet a. Thildang engmah tih tum awmin a awm tawh lo thung.

‘K.S ka ni lo.. ‘ ka ti leh talh.

‘Ok..Ka hria e,mahse ka thlah rual che a thlengtur ka hriaa. Inthlahdul phawt la ka thlah ang che’ a ti dam leh thlup.

‘Sorry’ a ti leh sup. Ka chhang lo. Che loin kan mut ngaiin kan mu deuh vang vang. A lungphu nghawr dat dat ka hre thei bawk. A taksa lum thur thur chuan min ur ham hamin ka hre hial bawk. Ka awmdan hi ka duh hauh lo.Ka normal lo,ka thinrim vang a ni tawh lo tih lah ka chiang.

Nemsawn tumin ka nema,a che hruta, ka chung atangin a letthlaa. Ka tawlhsawn nghal vat. Khum kil lamah ka let pheia,bang nghengin ka thu fel nghal than. Ani erawh tho ve loin a mut ngaiin a mu a,a banin a mit a hliah tlat bawk. Sawi mai tur ka hre lo a,hria pawh ni ila ka tawng pawh ka ring chuang lo.

A rawn tho a, min en loin khum atangin a chhuka.Khum tlangah a thu a, a lu a dawm vang vang bawk.

‘Sorry…’ a ti zawi leh sup.

‘Chhuak rawh’ ka ti chang fak.

‘Ok…’

A tho a, hawi let miah loin Kawngkhar lam a pana, a pen thawm zawi tial tial ka ngaithla kar. A thawm a reh veleh ke lawngin Living room ka pan pheia. Kawngkhar ka kalh nghal sawk sawk.Roomah ka let phei lehnghala, ka mu nghala.Ka inlukhup nghal hmak.

‘Hello…’ phone a pick veleh Remruata’n a rawn ti a. Ka mood nena inmil lo em em in a aw a zangkhai leh vah tawh.

‘In chhuahna tur kha ka lo kal veleh si dawn mawni ka tia’ ka theihtawpa pangngaiin ka ti a.

‘Wow…Ropui lutuk’ ka thusawi nena inzawmna nei miah loin a ti a. Ka ner nak.

‘A remchiah loh pawn a pawi chuang lo a’ ka ti leha.

‘Hey,rem loh pawh ka sawi ami? Zung zung che hian’ a rawn ti leh chiam. He pa tak hi chu aw.

‘Anih chuan ka lo kal thei tihna mi?”

‘Lutuk tlat.Ka Partner i ni mai dawna,a nuam viau ang’ a ti a. Kan kal dantur leh kentur atana tha a rawn sawi zui nghal mawlh mawlh.

Hmuifang vela riah tum kha a remchan zawk avangin Thenzawlah kan tlang a,kan riak ta zawk..Inchung zawl,thla engin a chhun en deuh ruaiah ka dinga, van lam ka thlira.Arsi an lang pe tuara, ka lung a leng vawng vawng. Hnuai lam ka en thlaa. Kan riahna Lodge kawt zawlah mei an chhema.An thut hual laih.Pakhatin Guitar a perh a,hlim zetin an zai rual dal dal bawk. Mal ngawih ngawiha inhriatna in min rawn fana. Khawvelah hian keimah chauh ka nih zia ka ngaihtuaha,ka nu la damin ka pa chhungte pawh awm mah se ka tan chuan mihrang vek anni tawha. Keimah chauha Christmas ka hmanna pawh a rei ve ta.Ka biang a lum thla nghal papa,ka insut zui nghal hraih bawk.Mahni inkhawngaihna avanga tah hi ka duh loh thin nen,zanin zet chu harsa ka ti ve thlawt.

‘Ka lo zawng dawn mek che a’ an thutna bul ka thlen veleh Remruata’n a lo ti nghal vat.Chhan tumin ka ang hman ziau tawh tihah Remruata cousin Hmeichhe pakhat a rik tak chul avangin ka chip leh ta zawk. An hawina lam muangchangin ka hawi ve a. Ka tum loh lutuka Hriatpuia ka hmuh rualin ka ding khawng nghal lah.

‘Eheu!!! Tu nge lo kal hi?” Remruata Putea fanu in a ti nghal hluai. Mak takin Remruata te Cousin ho hian Hriatpuia hi an ngaina em em vek.Kei ni ila ka lawm huam angem ka hre lo. Ka Pu nupui lan tu unau a ni a. Lawm huam chi niin ka hre miah lo.

‘Ka tibuai che u em?” a ti zangkhai vuh. Ka bula Remruata ding ka hnaih hrat ringawt.

‘Tibuai maw? Teh nang…I lo kal thei dawn lo tih Mahruaii hian a sawia,kan lo lawm lo lutuk zawk.Tunah chuan Materini chiah a awm ta lo.Abak chu kan kim e’ a ti leh a. A awah a phurzia a lang thei a,kei erawh ka mit ka chhing sawk. An Cousin ho hi an tam lem lo a. Kawm lah an inkawmngeih.

A rawn kal pheia,min rawn melh zawk.Kan mit a intawng siah, a then suka.Rang lutukin ka hawisawn nghal vat thung.

‘A lo kal ve dawn tih ka hre lo a’ Remruata hnenah satliah thei ang berin ka ti a.

‘Nia,a pha veka. Mahse, a lo kal leh thut si anih kha’ a ti liam puat.Dawhkana Chips an dah a hmawm zauh.

‘A tibuai deuh che tihna mi?” a ti leh thut.

‘Teuh nang..Ngatinge min tihbuai anga?” rang lutukin ka ti vat.

‘Eeee,tikhan a tibuai che tih a chiang chiah’ ngeiawm zetin a nuia.

‘Tibuai hran lo e. Mak ka lo ti zawka’

‘Eng chu maw?” a ti liam puat. A thil in lai a lem zauha,a ner zui nak.

‘Diktak chuan a U in i Pu nupui alana,Er…Eng lo,kei ni ila chuan amah pawh hi ka biak that peih ka ring lo’

‘U Hriatpuia hi kan Cousin tho a ni tih i hria em?” a ti a. A hmel a thutak ta sawt.

‘Sorry, in Family thilah sawi vetur ka nei miah lo a…’

‘A va ho e aw..I sawi lohin thian kan ni nang.Kei pawn ka duh duh i chungchang ka sawi alawm. A ni lo mi?” a ti a.

‘Nia,a dik alawm’ ka ti nghauh. Tun tum chauh hi chhungkaw lam thil sawia kan titi tum a ni lo. Vawi tamtak ka nu nena kan chungchang kan sawi dun tawha.Ka nu anih anga hnaih leh turin min sawipui fo bawk. Midang sawi chu nise ka hua ang tih ka hria.Mahse, ani leh Machhuani hi chuan engpawh sawi se ka tana tha tur an ngaihtuah tih ka hriaa.Ka thinrim ngai lo.

‘Hey,thutak viau suh.I ninawm,ka sawi tum zawk chu u Hriatpuia hi chu kan tan chuan Putea tur mah zawk a ni a.Kan kum a inthlau lo a, Cousin angin kan ngaia, kan unau ho in kan ngainat rawn a ni bawka. U angin kan en vek.Pite-i thiltih vang mai maia ani kan ngainat loh chhan tur a awm lo’ a tita duah.Ka bu nghat.  Hna chungchanga Pu in Remruata awmreng laia Hriatpuia a rawn dah tum khan ka lungawi loh pui deuh kha ania.Remruata’n engahmah a lo ngai lo kha ka hrethiamta kuar. An ngainaa,thikna engmah an nei lo a lo ni.

‘In ve la…’ amah bawkin a ti leh a.Ka thle bak. Zu hi ka hmu sual em em hran lo a. Mahse, ka ngaina lo a. Ka intur chi niin ka hre lo a,ka in lo ve tawp. Ka ngaihtuahnaah thildang a lo lut zawk.

‘Eee,engtin nge itih tak?” ka ti hliai.

‘Eng chu maw?”

‘Angela’

‘Ahhh,duhtawk ang. Hlimna hunah thildang lo sawi chhuak suh.A ninawm’ a ti hlur mai.

‘Ok,mahse..thil tul lo ti suh’

‘Khawngaihin…’ a ban a phar a. Ka nui hak.A duh aia thui ka nawr tum leh min hnial hneh loh apiangin a ban a phar kual chiam thin.

‘Ok..Ok..Ka sawi nawn tawh lo ang’ ka nui leh hak hak. Min enrengtu awma ka hriat avangin Kawngkhar lam ka thlek a. Ka thu mar nghal auh. Kawngkhar biang nghenga inkuangkuah chungin Hriatpuia a lo ding reng tawh. A lo kal thawm engmah ka hre miah lo.

Remruata ka en a, ka en na lam a en ve vat.

‘Ehe,ilo kal lai ka hre miah lo a’ phur zetin a ti nghal vat.

‘Adik ang’ a ti dul ruih.

‘Lo lut la..Thil ei hmain tizuai ila..’ a no a lekkang zauh.

‘Zanin chu ka ti lo mai teh ang. Eitur an ready tawh ania’ a tih zawm a.

‘Ok..A va tha ve,ka riltam zia chu a’ a ti a. A thochhuak nghala.Ka ding ve vat. Hriatpuia lam en loh hram hram ka tuma,mahse Kawngkaa chhuak turin a kalsawn anih loh chuan kalpelh ngei ngei angai.

Remruata hnungah ka zui a, Hriatpuia lam ka hawia.Ka nui lui sak,a nui ve hauh lo thung. Ka hnungah min rawn zui ve nghal tih a pen thawm atangin ka hriaa. Ka hnung a za nghal mar mar mai.Ka ngaihtuah leta,ka hmuh thut khan mak ka tih viau laiin ani khan makti hmel apu miah lo thunga. Ka kal ve tih a hre sa nge ka hre lo. An cousin mipa dang pawhin an bialnu te hruai an awm ve a. Kei leh Remruata erawh thian kan nih zia an hre deuh fur..Hnathawhna lam ang lo takin kan inngaizawng anga ngai an awm lem lo.

Pawn kan thlen veleh thli vawtin min rawn chhema,a vawh dana thip nghal var thei.Thenzawl hi chu Mizoramah pawh thlasik tuarna ber pawl anni ziah tih mi sawi ka hre tawha. Kan tlang dawn tih ka hriat khan Thawmhnaw pawh a lum thei ang ber tur ka keng sa hrim hrim.Dinning Hall hi Building hran a ni a. Kan awmna Building atanga kal turin pawnah chhuah angai a. Sawrkar enkawlna hnuaia awm thin kha tunah chuan Mimalin an enkawl ta a. A hmun a faia,Khawpui chhung Hotel te tluk vek lo mah se a nuam thawkhat viau.

‘Lo va kal ru. Phone ka theihnghilh’ Remruata’n a ti a. Kan chhan let pawh nghak loin a let lehnghal chu a nimai. Ka ngei ber tum hi a thleng fo tawha.Tun tum pawh hi a ni leh ta.Mahse, enge ka hlauh ang? Tihsual pawh ka nei hleinem.

‘I tha maw?” ka awki a inrintawkna lang chu keimah pawn ka awih lo titih.

‘Tha lawm,nang zawk?” a ti tha ve mai.

‘Kan tha..’ Remruata kalna lama thlek zauh pahin ka ti lui salh. Engvanga Remruata nen inkawp anga lan duh tlat nge ka nih ka inhre lo.Min chhaih kual ni a ka hriat vanga tihnat let theih ka inbeisei anih chuan ka a hle ang.

‘Ka ring…In that hmel khawp mai’ a ti a. A awah hmuhsitna niawm tak a hriat tel theih. Mahse, ngaipawimawh angin ka awm duh lo a ni tawp mai.Min chhaihbuai pha lo a, thilthleng tawh khan min tibuai lo tih lantir ka tum a ni tawp mai.

‘I lo kal sia,Rosy hmuh ka lo inbeiseia’ ka nui a. Mahse, ka nuih a za eih lo.

‘Rosy…I beisei tih ka lo hre hleinem’ a ti hmuk. Ka melh zawka,Chik zetin min lo en reng chu niin.

‘Ouch..Ka hmuh che chuan a telve turah ka lo ngai sa tawpa’ ka ti leh a.

‘A va tha ve..’ a ti awlsam mai. A awkiah tha ti tak tak pawh chu a ang leh miah si lo.

‘Nia,tha..In inhmeh hle bawka..’ ka ti leh a.Mahse, ka sawi zawh rualin ka inchhir nghal zat. A chanchin hriat tuma chhui kual ka ang lutuk, engvanga insum hram lo nge maw ka nih hrep le a..

‘A lawmawm hle mai ka ti mai teh ang.Mahse, lawk..Ka chanchin hi ilo ngaihven reng tihna animai em?” a tita chiah. Ka thaw deuh hak. Ka Jacket ipte ka zen a. Ka kut ka humruh tlat bawk.

‘Ngaihven hran lo…’

‘Takzet..?”

‘Um..’

‘Anih chuan Sava te pakhatin a hrilh che tihna mi?” ring vak loin a nui hawk.

‘Ha..Ni mai. Officeah te chuan Hmeichhe hoin i chanchin sawinuam an ti alawm,Hriat loh tum pawn hriat loh theih loh’ ka ti nghat.

‘Uh,ropui ve..Hmeichhe ho chuan hmanlai thil chiah an hria ti ta ila…’

‘Ka ngaipawimawh lo…’ ka ti chang fak.

Thildang kan sawi leh hmain Remruata a rawn thlenga, engmah sawi zawm lehna hun a awm ta lo hlauh. Ka thawveng deuh huai bawk. Mahse, ka bengah ‘thil hlui’ tih kha a ri ring lutuk hret. Ani in hlui ti mah se Remruata khan a ti ve tlat lo. An pahnihah  hian rin zawk tur thlang dawn ila Remruata ka ring fe zawk ang tih ka chiang. Dawt min hrilh mai mai ngai tlat lo.

Kan chawei boruak erawh a hadamthlak takzet. Mi Smart em em vek anni a. An bula chet tlat a hrehawm hauh lo. Mihrang anga min en loin min kawm bawrh bawrh veka. An Hmeichhia te pawh kan hriatthiam ve loh tur thil sawia nuih vak vak emaw thuruk sawi ang hrima phun se se lah an nei hek lo. Ka sawi thiam dan ber chuan,an nui anih chuan Midang rilru hneh nana pawn lama nui hmel lantir ni loin an nui tak tak.Rilru verther an nei lo.

Khum a ka mut fel meuh chuan dar 12 a ri titih. Ka awmna room hi Single a ni lo a. Mahse, room kan indaih vek tho avangin midang Share loin mahni in ka awm a. Pawi ka ti lem lo.Remruata’n min khawngaiha,min awmpui a tum zeta. Ka duh lo bur. Thil tha lo a thlen hlauh vang lam ni loin mahni a riah theih chuan riah ka duh zawk.

Hmeichhe au ri niawm takin ka mutui lai min ti harh a,ka thuchhuak nghal zawk. Thawhphan pawh engmah a awm lo.Ka harhchiang kek kawk lutuk. Mahse, ka lu na leh hai bur avangin ka then sawk thei.Che loin ka thu a,thawm lo chhuahna lam hriat tumin ka beng ka chhi a.Ka hre sual emaw tih mai turin a reh hmiah thung.Thawklehkhatah hlauhna in min rawn tuam a, ka tum loh tawpin ka tirilah min mana.Ka khur nghal dar dar mai.Ka lu ka thinga,engvanga nideuh chhu nge ka nih ka hre lo.

Ka room chhung ka en kuala,engmah thil danglam thleng a awm lo. Kawngka lam ka hawia,a in kalh thlap. Ka bengchhe ri emaw Zawhte hram ka hre sual a ni ngei ang. Ka intihuaisen luia. Engahmah ngai lo niawm takin ka mut tha leh ta than.Mahse, ka chhungrila hlauhna awm chuan thil dik lo awm tlatin min hriattir lawi.

Ka muhil dawn chiah tihin angai ang bawka te riin min tiharh leh nghal zawk. Tun tum chu hriatsual a ni tawh lo.Ka phone ka bana,khur hlawk hlawk chungin Remruata call ka tuma. Ka hmanhmawh mai bakah ka mit phe deuh ruaiin min tibuaia,ka phone pawh ka khawih dik hleithei lo. A au ri ka hriat leh rualin khum atangin ka zuangthlaa. Pai deuh nawk nawk chungin Kawngkhar lam ka pana,engmah ngaihtuah fim hman loin ka hawnga. Ka room bula Hall zau vak loah ka tlanchhuak mawl tawp.Remruata awmna room kha inchungah nge inhnuai tih ka ngaihtuah chhuak zo miah lo zui!! Mak takin tumah thawm hriaa rawn ngaihven an awm miah lo!!!

Thawm dim taka pen thawm niawm tak ka hriaa. Tih leh mai tur hre loin ka dinna ngaiah ka ding khawng lah,che sawn dawn pawh ni ila ka theih ka ring lo chuang lo.Ka khup a zawi huai tlat thung!!

A lo hnai zela,ka mit ka chhing ta ngawt.Pen thawm ka ngaithla kara,a lo hnai zual zela.Mahse, a reh leh ta daih. Ngam leh ngam loin ka mengchhuaka,ka hawi kuala,tumah an awm miah lo. Ka tlan lehnghal phat,inchung panna kailawnah ka tlanchho a. Ke lawnga tlan ka nih avangin thawm a ring lo.Tluk hlauin a vawn ban ka vuan pah zel bawk.Room hmasaber ka pel fel chiah tihin tu emawin ka kawngah a rawn kuaha,ka au tur chiah ka ka a hup nghal hmiah.

‘Shh..’ Hriatpuia aw ki hniam leh pa zet ka hriat rualin ka inthlahdul nghala.Ka tluk loh nan ka ngheng a,ka mit ka chhing nghal daih bawk.

Min pawm kang nawlh.Tlak hlauin a nghawngah ka kuaha,a darah ka hmai ka phum zui kak bawk. Tunah chuan tu nge ka bula awm tih lam a pawimawh lo,hlauhlawpa ka awm miau avangin tu emaw tal bula awm ka mamawh a ni tawp mai.

Khumah min nghata,puan min sin tira. A kalsawn tur a kutah ka man nghal chat. Ka zak leh dawn anih pawhin nakin atan a ni.Tunah chuan ka mamawh.

‘Kal suh…’ ka aw a zawi lutuk.Mahse, a hria tih ka hria.

‘Kawngkhar ka va kalh lawk ang,ka rei lo ang..A tha em?” a ti dam thlup. Ka bu nghata,a kut ka vawnna ka thlaha. Kawngkhar a kalh a,a rawn let lehnghala.Khumah a rawn lawna.A rawn mu ve a,Min pawt hnaia.A darah ka lu ka nghata,a awmah ka hmai ka phum lehnghal kak.Min pawt hnai leh salha, ataksa rem thlapin min kuah bet zui nghal chial bawk.

Chapter- 8

‘I hre ve em?” kan ngawih vang vang hnuah ka tichhuak sep.

‘Muthilh tum rawh..Zingah kan sawi dawn nia’

‘Hmeichhe au ri ka hriaa’

‘Shhh…I hre sual aniang,Muhil rawh’ a ti dam leh thlup. Ka samah a kut zungtang a rawn rawlh luta,ka chhip samah a rawn fawp zui nghal vang vang. Nawmna danglam leh thlamuanna mak takin min fan chiai chiaia.Ka mit ka chhinga,a lungphu ri dat dat ka ngaithla a.Nichin lawka ka thlaphanna kha chu a thlawkbo  zo vek tawh. Mahse, a bulah riah ka duh.Keimaha awm ka duh lo a ni tawp mai.

‘Merry Christmas’ a ti leh sup. Ka thaw hak,ka hriattheih china Christmas urlawk zan ka hman mak ber tum a ni.

Ka mengchhuaka, ka awmna ka hai thelh. Ka mit ka chhing leha,nizan thil thleng ka ngaihtuahnaah a rawn lang nghal zat. Ka khur zui lehnghal titih ringawt. Nizan khan zah pawh dawn zo loin Hriatpuia bulah ka mu ta kha ania,ka ngaihtuah zawng pawn ka hmai a sa nghal hat hat. Engtin nge min ngaih ang ka ngaihtuah duh lo law law rih.A tho tawh nge ka bulah hian ala mu pawh ka hre lo a,en tura inleh ka ngam chuang der lo bawk. Ka ngaihtuah naah ka thil hlauh em em kha a lo lang leh thut.Tuman an hre ve lo tak tak nge ka mangchhia ka hlau zawk ni ang? Bakah, Hriatpuia roomah khan ka lo riak tak tak lo thei bawk.Ka lu hai leh ka mit vai ruai mai khan ka hriatna a tibuai pawh a ni maithei…

Ka thuchhuak nghal a, mahse Khum bul Chaira Hriatpuia lo thu ka hmuh rualin ka tim leh chawih. A bawp sei thlurh a khawkherha,ngaihtuah muk hmel zetin min lo en reng chu niin..Ka landan nalh lem loh tur zia ka ngaihtuaha,make-up hmang nasa tak ni lo mah ila tunah tak phei chuan ka hmel a da dawn lutuk. Ka sam ka tuai zauh ringawt,awmzia phei chu a nei miah lo tih ka hre tho.

‘Morning..’a ti sup. A ha rual leh var nalh zet langin a then suk bawk.

‘Morning..Ih,eng lo…A zia lo’  tihngaihna hre loin ka kut ka lekkang zauha.A nuih leh tak sukah chuan beidawng ru zetin ka dahthla leh hnak.

‘Ka bialnu nena room intawm hi pawi ka ti lo viaua’ a sawi sual emaw tiin ka melh vat.A hmelpa leh thutak fahranah chuan thu ho mai mai sawi a ni lo tih a lang reng.

‘Enteh..’

‘Sawifiah duh suh..Ka hria’

‘Maw? I hre ve maw?!” ka ti halh.

 ‘Um..Hria,mahse  a tha vek e’ a ti leh sup.

‘Thil tha lo thleng a awm em? Diktak chuan ka hlau…’

‘Ka hria,kalsan miah lo tur che ka nia’ thutak lutukin a ti leh a. Ka mengphak awk. Kha thil khan kei nen enge inzawmna a neih ang ka hre miah lo.

‘Midang tuman an hre ve lo kha mak ka ti..Bakah,nizan khan ka lu a hai veka.Engmah Drinks lam ka ti si lo’ ka ti a.

‘I ril a tam em?” ka thilsawi nen a inpersan lulai lutuk, mahse a hmelpa leh ngeng fahranah chuan sawi zawm a duh lo tih ka ringthiam ve tawp. Mahse, engvangin nge a duh loh ngawt ang?

Ka tho chhuak duh,mahse nizan khan engmah bun lo a tlanchhuak ka ni a. Tunah hian ke lawnga inhnuai ka pan thla anih chuan tu emaw tal pawn min hmu se zawhna chhan tur ka insiam nghal dawn tih ka hria.Mahse, enge ka tih chuan ang?

‘I slipper ka hawh thei angem?” hreh zetin ka tita nge nge.

‘Aih…’ a ti bul hmuk. A va han uikawm mai mai tak.

‘Diktak chuan midang hian ngaihdan dik lo an neih ka duh lo a’

‘Ka hria..’ a ti awlsam leh mai. A mood cool ruih reng hi thilthar a ni lo. Hna kan thawk ho a, kan inhmu nitin bawka,mah se ka la hre thiam thei chuang reng reng lo.

‘Anih chuan enge i phal si loh a? a uikawm thlak em mai’ ka ngaihtuahna nena inpersan zetin ka ti hlak. Ka puansin ka thehhlim a. Khum atangin ka chhuka,ka beisei loh lutukin khum bulah ka Slipper a lo awm reng!!

‘I lo zuk la maw?” ka ti halh. Min chhang loin a thle buk ringawt.

Ka bun nghal sawk sawka,rang fahranin Kawngkhar lam ka pana. Hawng mai loin thawm ngaithlain ka dinga.Kawngkharah ka beng ka ti si a. Thawm engmah awm loin a reh thap. Dimtein ka hawng de de a. Ka dakchhuaka,mahse ka inrin hmain ka hnunglam atangin ka kawngah a rawn kuah thuta. Min pawt let nghala. Kawngkhar a pawtkhara,a kalh zui nghal hmak.

‘Eng? Ngatinge?” ka ti bah nak. Nizan kha chuan hlauh vang leh mangan vangin keimah zawkin ka pan kha ania. Tunah chuan khatiang titurin ka huaisen tawk tawh lo a. Thil tihchi anih loh zia ka hming ka hriatchian tlukin ka hre chiang.

Engmah sawi loin amah en thei turin min kuai hera. Hnial nachang hre loin min kawihher ang angin thuawih fahranin ka inher ve mai bawk. A kutzung tang sei thlurhin ka biang tawn tawnah a rawn vuana.Amah en thei turin min kuaidak nghal a. A mitmeng vawt leh chiang zetah ka en siah. Hawisawn mai lo turin ka infuih ru mawlh mawlh.

‘Min nei rawh…’ a ti sup. Kei erawh angaihna hre lo zetin ka dinga, ka hrawk ro halh ti hnawng turin ka chil ka lem a. Ka chiai lohna turin ka infuih pah mawlh mawlh bawk.

‘Khawngaihin…’ ni lo…Ngenna aw a ni. Mahse, Rosy…Ka hriatchhuah rualin ka tal nghal laih. Min thlah ve mai bawk.Mahse, kalsawn chuang loin a dinna ngaiah a dinga,min en chhuk run bawk.

‘Min fiamkual hi i duhtawk thei em?” ka tichang fak.

‘Ka fiamkual che angah ilo ngai amaw?” a ti hluk.

‘Aw, eng angin nge min ngaih chu ka hre lo.Mahse, min fiamkual nana hun i khawhral hi a tul lo ania’ ka ti leh nghauh. A mitah tak ka en a. Ka nui lui sak.

‘Anih phawt.Nizan vang khan thupha ka chawia.Chuan,ka lawm bawk’ ka ti zangkhai leh vah. Ka inher nghala.Kawngkhar hawnna tur ka vuan nghal chat. Mahse, ka duh loh dan bawkin a thleng leh ta tlat. Ka hnunglam atangin ka kawngah a rawn kuaha.Ka darah a hmai a rawn phum zui nghal zat. A awmdan engkim mai chuan min fan rawih rawiha. Ka induhtawkna che laih mah se amah duhna vanga che a ni ta tlat a.Hei pawh ka duhdan a ni leh ta hauh lo.

‘Kal suh..Rosy vanga buaina ineih chuan ka nunhlui ami a ni ka tih kha’ a aw a hniam sat. Ka beng bul a thawkkhum zawnga lum ham ham chuan min fana. Ka inpetruh tlat bawk.  Ka nunah Mipa tamtak an lo awm ve tawha,mahse tumah ka hnaih tak tak ngai lo..Tuna ka awmdan leh Hriatpuia ka hnaih apianga keimaha danglamna thleng hi Mipa hi ka la hnaih tam loh vanga thleng a ni lo tih erawh ka chiang. Ka tan a danglam,ka pawm angai.

‘I sawi apiang ka awih anga? Uite angin maw?” ka chhungril nem leh tuiral mek thup nan ka aw a hriam hraih.

‘Aih,Mipa leh Hmeichhia,induhtawnna vang zawka thleng tur hi. Min nei la,venhim che ka duh’

‘Aih, tu lakah mah ven ka mamawh lo’

‘Ka duh che a..’ a ti leh hmiah.

Ka mit ka chhinga, kei hian ka duh tih ka pawm angai. Ka hriattheih chinah ka chhungril zawng zawng atanga ka duh awmchhun mipa tih hi ka pawm anga,a sawmna ka pawm ang nge ka hnar ang? Ka hnar anih chuan ka damchhungin ka nei tawh kher lo ang…

‘Rosy….’ Ka ti leh halh. Ka aw erawh ahma ang tawh loin a khur lek lek.

‘Ka nunhlui ami a ni ka tih kha..Nangpawn nunhlui inei ang bawkin ka nei ve a’ a ti leh sup. Ka pawm thlap.

‘Min thlah phawt rawh’ ka ti leh sap. Diktak chuan talchhuah tum ila chuan ka talchhuak thei reng ang. Mahse, nuam ka ti tlat.

‘Min nei dawn em?” a ti leh nghut. Namnul mai mai chi a ni hauh lo.

‘Ka hre lo…’

‘Anih chuan min neih hma chuan ka tibuai dawn che tih i hria a’ a ti leh hmuk.

‘Nang misual…’ ka nghawng a hmui lum thar thara a rawn fawh takah chuan ka tawp chawp. Ka tum loh tawpin ka ngheng nghal rawk.

Kawngkhar kik thawmah ka harh zawk. Ka kawnga min kuahna ka phelhsaka.Ka inlahrang nghal vat.Mahse,a hmel ka en ngam lo.A hmel en thei lo zawngin ka dinga,Ka hmai sa hat hatah hian a sen nasa dawn lutuk tih ka chiang vek.

‘U Hriatpui,Remruata ka nia’ pawn lam atangin Remruata awin a rawn ti a. Ka insehruh nghal nghek.Tun ang hunah hetah min hmu anih chuan engtin nge angaih ang?

‘Hawng rih suh’ Hriatpuia kawngka hawn tum mek hnenah ka ti sep. A ding chuta, min rawn en a. A mitmeng fiah zetah chuan ka ngaihtuahna a hmutlang vek nimaiin ka hria. A mitah tak ka en a, mahse ka enrei ngam lo.

‘I ngaih ang kha kan inkarah engmah a awm lo.Ih,ka sawi tum chu Remruata nen thian bak inzawmna kan nei lo a…Mahse,engtin nge min hmuh ang ka hre lo a…’ ka ti halh.  Engvanga insawifiah ngawt nge ka nih ka hre lo. A then suk ka hmuh rualin atthlak lutukin ka thawveng hawk zui.

Min rawn hnaih leh a,ka insangmar lehnghal teuh ringawt. A rawn kun hniama,tihngaihna hre loin ka mit ka chhing nghal vat.A hmui lum thar tharin ka chal a rawn si a.Rei erawh a ni lo.

‘Hlauthawng suh,I inpeih hma chuan tumah ka hriattir lo ang’ a ti sup.A tawngkam chhuak nghet churh maiah chuan rinngam a ni ang tih ka chiang ve tawp.

‘Khumah sawn lo va thu la..’ tih pahin khum lamah a thle zauha,engmah sawi loin ka bu nghata.Thuawih zetin khum lam ka pan nghal vat bawk.

‘Ka rawn tiharh che em? Mahse, a pawimawh..Ehe!! Mami,nang hetah maw?!”min rawn en chungin a tihzawm zat.A awah leh a hmelah mak tihna a lang kawp ve ve.A demawm miah lo tih ka lo ngaihtuah daih thung.

‘Ka ko a..Thu la’ danglamna awm map loin Hriatpuia’n a ti sup. Remruata a rawn kal pheia, ka hmelah engemaw hriat tumin min en uluk ngang mai.Mahse, ka then lui sak.

‘I mu thei maw?” zangkhai vahin ka ti a. Keimah pawn ka tawngkam zangkhai lutuk chu ka awih lo rum rum.

‘Um,tha..Nang?” rawn thutthlak pahin a ti a. Ka bu nghauh.

‘Sawi la…’ Hriatpuia’n a ti leh nghut. Chairah a thu ve thung. Room neitu zawk ang maia khuma kan thu chu a mawi lo tih ka ngaihtuaha,mahse tihvak ngaihna a awm chuang lo.

‘Eng lo ania, Nizanah kan Hnathawk thenkhatin buaina an tawka’ a ti a. Ka hawiphawk nghal hra mai.Kan Showroom Building chhawng hnuai ber hi Staff Quarter a ni a. Abik takin mizo aiin hnamdang awm an tam zawk.

‘Chuan..?” a ti nghut.

‘Mizo thenkhat,Urlawk zan hmang na fal deuh te nen an intibuai a.An veng YMA president nen kan inbe tawha.An fel viaua,an mahni zawkin min rawn biaa. Hliam na lutuk tuar an awm lo a, Ajit-a bungrua an suamsam deuh niawm a ni’ a ti duah.

‘An vengchhung mi te anni em?” a ti vawt ruih.

‘Ni lo an ti,An vengchhung tlangval lo awmhnai zual khan an zuk chhan zawka..Police lamah FIR pawh an thehlut nghala’ a ti leh a.

‘Anih chu,Khawi PS huamchhungah nge an awm?” a ti leh hmuk. Remruata’n a sawia. Hriatpuia a bu nghuta,a phone a phawrha.Police zingah hmelhriat a nei anih ka ring ve tawp.

‘Kan chhuk dawn mi? nge in la sawi zo lo zawk?” Remruata’n min rawn en pahin a ti a. Ka chil ka lem a,engtin nge ka chhan dawn ka hre lo.

‘Lo zuk chhuk ru.Mami,Nakinah kan sawi zawm dawn nia’ Hriatpuia’n a rawn tita hlauh.

‘Nia..Chhuk ila,thil ei zawhah chhuah nghal an ti in ka hria’ a ti leh a. A ding nghal hluai.Hriatpuia ka melh zawka,min lo en run. Ka ngaihbel nge ka hre lo,a hmelah thinrimna niawm tak alanga,mahse engvanga thinrim nge anih ka hre lo. Remruata thil rawn sawi lah hmanhmawhthlak leh chinfel theih loh khawp engmah a awm si lo.

Stepah kan inzui thlaa. Nidang ang bawkin a tawng leh mawlh mawlh,nizan lama thil thleng kha engmah a sawi bik miah lo.Hriatpuia kha ka sawipui dawn pawh khan a haider tlat kha ania. An lo hre lo vek tak tak nge keimah kha ka dik lo zawk ni ta ang?!  Mahse, ka hriat kha a chiang lutuk,vawikhat mai pawh a ni hek lo.

‘Kan intifai lawk ang’ ka room awmna Floor kan thlen veleh ka ti a.

‘Um,lawk..Intifai hman lo khawpin maw a koh chhoh che?”

‘Aw..Min rawn call harh chawpa’ dawtchiang lutuk ka sawi ta ngawt.

‘Em em bawka,I Roomah lo kal mai tur lawm’ a ti hmuk.

‘Naaa,Boss zawk ania.Lo zuk kal la,kan intifai lawk ang.Ka rei lo ang’ ka ti leh a. Ka ban ka vai zauha,Ka then lui sak bawk. Hmanhmawh zetin ka kalsana,Zawhna dang chhan leh ka peih tawh lo.Dawtbak engmah sawitur dang ka hre dawn chuang si lo.

‘Merry Christmas’ min hmuh veleh an lo ti sap sap. Dinning Table lianpui kilin an lo thu thap tawh. Ka wish let ve nghala, Remruata bula thutna awl ka pana. Midang erawh an titi ngaiin an titi zawm leh mam mam tawh.

‘Christmas pawh a ang lo’ Remruata’n a ti satliah.Ka pawm thlap,ka pa damlai leh keimaha ka awm hnuah pawh Christmas ni kher hi chu inkhawm ka thulh ngai lo. Vawiin erawh chu ka thulh a,kei chauh ni loin kan vai maiin tuman inkhawm lam ngaihven kan awm lo.

‘In va inpeih tawh awm ve’ Hriatpuia awin a rawn ti a. Ka en vat,kan kalsan laia a hmelchang zet kha ni tawh loin a lang dam thlup. A rawn kal pheia,ka bulah a rawn thu thla ve a. Ka awm a nuam lo leh ringawt tawh.Hahthlak, hetianga ka awm zel chuan engtin nge kan inkawp tak tak hunah ka awm ang ni?

‘Nizan kha, ka mumang nge pawh ka hre lo.Au vak ri ka hriaa’ an Cousin zinga nu te fel rawn rawn Zampuii’n a tithut.Ka thil ei lai ka hak titih.

‘I mangchhia anih chu a’ Pakhatin a ti a, an nui zui dar dar. Ka nuih a za ve miah lo.

‘Nia,ka mangchhia anih ka ring.Mahse, achiang asin aw,atak ang mai a ni’ a ti leh niah niah. Ka mal chungah Hriatpuia’n a kut a rawn daha,ka kut lehlam ka mal chunga ka dah a hum zui leh nghal chat. Ka en vata,a then suk. A mitmeng thim raih leh fing zetah chuan enge a ngaihtuah ka hre thei lo. Mahse, thil pakhat erawh ka hre thei tlat.Ka thil hriat kha dawt ni loin atak a ni.

Thil kan ei zo fel vel deuh chiah tihin Police pahnih Dinning Roomah an rawn luta, ka thaw hak.Midang pawh an ngawi nghal thap bawk. Hriatpuia ka en vat..

‘Nizan kha..’ ka ti sep.

‘A tha vek ang..Min ring la’ a ti supa.Ka kut a hum nghet salh.Enge tha leh tur ka hre lo.Mahse, nizana Hmeichhe aw kha mangang au aw a ni. Hriatpuia hian a hre chiang lutuk tlat.

‘I tha em?” rawn kal phei pahin a rawn ti a. Ka bula thu Hriatpuia a en bawk. Ka lo hlauthawng zual sauh.

‘Tha alawm..Helamah ilo awm reng animaw?” dinchhuah  vut pahin a ti ve a.

‘Nia,Aug thla khan ka pheia. .Helamah daih daihte enge i rawn tih?” a ti leha.

‘Kan unau hoin Christmas kan rawn hmanga’ a ti a. An ding duna,Hriatpuia ai chuan a tawi hret zawka,an kum erawh an inrual tlang hmel viau.

‘Kal dawn ang u.Ka bag lak leh ka la ngai’ Remruata’n a ti a. Midang pawh an tho nghal sang sang,ka tho ve a. Hriatpuia te lam ka en zauh. Kan piah deuha Tukverh lian leh sang zet bulah an ding duna, An tawng ka hre phak lo. Mahse,nizana ka hriat kha mangchhia ni loin atak a ni ngei ang tih ka rinnghet zual sauh bawk.

‘U Hriatpuia Motorah inhnawh ila,Adin-a Motor leh Remruata Motor a awm bawk chuan a tawk reng ang’ an Zampuii’n a ti a. Zampuii hi a upa lam ni a. A thu hi an Cousin ho zingah chuan a tlang angreng viau . Ngeiawm khawpa inti thu erawh a ni miah lo thung.

‘Zorama khan khalh se,ka khalh peih lo ‘ Remruata’n a ti a.

‘Amak thei. Anih chuan Zo-a khalh mai rawh,I u hi nizan a thle deuh aniang’ a ti a. An nui dar dar.Za lo zetin Remruata pawh a nui ve thu.

‘Boss, I Motor kan ring ania’ ka hnung lam en chungin a ti leh lar lar. Ka hnungah tu nge ding en kher ngai loin ka rin hriat thei mai.

‘Ok,Boss berin i tih tlat chuan ka keng mai ang chu.Lo thu ula,Roomah ka han let leh lawk ang’ pangngai takin Hriatpuia’n a ti a. Min rawn kal pela. Kan riahna Building lam pana a kal chu ka en a. Jacket a mal thleng vela sei a haa. Cargo,a dum a hak chu a boot bun chhungah a tlang a ti lut bawka.A inchei lo va, ramvahna tur chi inbel ni mah se a lang nalh zuih tho.Ka rin loh lutukin a ding chuta, a rawn hawilet vut,ka lo enreng min rawn hmu nghal a.Kan mit a intawng siah.A then suka,tihngaihna hre loin ka nui ve ta ngawt.

‘Zampui,Mami kha ka Motorah kal se..Hna thilah biak lawk duhna ka neia’ ngenna a ni lo.Thupe aw a ni,mahse ka haw miah lo.Nuam ka titlat zawk.

Hriatpuia leh keimah bakah mipa tleirawl lam pahnih an chuang ve a. A motor an keng tho nangin kan bulah Remruata a lo chuang tel ve bawk. A ruala kal ka nih avangin a mawhphurhna angin min ngai tih ka hria. Hna chungchang kan sawi ta luam,mahse thil thar leh pawimawh ,sawi ngei ngei ngai erawh a ni lo. A bula kal turin min duha,chhuanlam atan hna a hmang angin ka ngaihtuaha,atthlak lutukin ka chhungril a hlim veng veng!!

Kan kalna hmun a nuam takzet.Mahse, Hriatpuia mitmeng hriam hraih in min enzui reng tih ka hriat avangin ka inthlahdul tak tak thei lo. Dar 3 pelh hretah kan riahna hmunah kan let leha. Ka ril a tam rawih rawih thei. Ka beisei loh zetin zing lama ka hmuh te bawk kha an lo awm leha, lo kal satliah mai zawng anni thei tawh lo.

Kan intihfai hmain chaw kan ei a. Chaweikhamah erawh intifai turin mahni room theuh kan pan ta dial. Khumah ka thu a, ka awm a nuam lo.Enge ka hlauh ka hre lo.Mahse, zana mahni chauha riah ka huphurh ngawih ngawih. Remruata riak ve turin sawm ta ila Hriatpuia ngaihdan a ni miah lo ang tih ka chiang. Mahse, engtin nge ka tih chuan ang? Kan riahna hmuna hnathawktu ka hmuh ho kha chik takin ka en zela,nizan khan thil tha lo thleng se chuan an hmelah engemaw tal dik lo a awm ang.Mahse, chutiang hmel tuman an pu si lo.

Hallah kan thukhawma..An titi mam mama,a thenin Card an deng bawk. Mikhual thleng ve dang an awm pawh ka hre lo.Hunpui lai a ni a,a mak lem lo. Nizana ka thil hriat bawk ka rilruah a lo langa,kan zinga hmeichhia tumah na nei hmel pu an awm lo. Awm chu sawi loh ka thilhriat kha hre ve awmchhun pawhin a mangchhia emaw a ti mai mai.

‘Dik lo a awm em?’ ka beng bulah Hriatpuia’n a rawn ti sup. Ka thu mar zawt thung.Engtik laiin nge a rawn thut ve ka hre miah lo.

‘Aw..Aih,engmah chutiang a awm lo’ ka ti bah nawk. A then suka,mahse a mitmeng vawt ruih leh fing zet chuan ka ngaihtuahna hriat tum niawm takin min en chik lam hret.

Tihpalh niawm takin a rawn kun zawka,a hmui chhah tapin ka beng a fawp thawi thuak.’ Ka ngai tawh che’ a ti sup.Mahse, midang tan pawha mak tih hman loh khawpa rangin a thu tha leh vut.

A awmdan tehthut chuan min ti hamhaih lutuka,chhan mai dan tur hre loin ka thu ngil auh ringawt.Thatchhe zetin a thu awna, ka Shawl lianpui a rawn zena,ka kawngah a rawn kuah nghal zat. Ka en vata,a mit a siai zauha. A then zui suk bawk. Kei erawh ka insangmar nghal teuh thung. Insiamrem niawm takin a thu thaa,min rawn hnaih lehzual ta zawk. Min rawn en a,’Hahdam rawh’ nghal zetin a ti leh a. Min chhaih tih ka hria.Mahse, ka inthlahdul phah chuang eih lo..Tihngaihna hre loin ka ner khum nak.. Zawitein a nui hawk thung.

Ka mu fel deuh chiah tihin ka phone a rawn ri a. Ka en vat,Hriatpuia..

‘Hello..’

‘I hlau em?”a rawn ti mawl tawp.

‘Aih..’

‘I duh chuan ka lo riak thei a…’

‘Ka hlau lo..’

‘Midangin an hre lo ang’ ka sawi a haider hmiah.

‘Angai lo..Ka tha’ ka ti nghauh. Ka rilru erawh chuan ‘ ka hlau’ ka ti ve thung. Mahse, ka induhtawkna hian dawihzep tak angin min lantir thei lo.

‘Takzet?”

‘Um…’

‘Engemaw dik lo a awm emaw i hlau anih chuan min rawn call vat la..’ a ti leh sup.

‘Um…’ ka ti tawi leh tak.

‘Good night’ a ti dam leh thlupa,ka mangtha ve a. Ka chhungril erawh chuan abula riah a duh ngawih ngawih thung.

Chiang lutukin ka harh a. Ka thuchhuak vat,ka awmna room chhung ka enkuala. Engmah dik lo a awm lo. Ka phone ka bana,sana ka en a. Dar 1 a pel tawh. Thawm engmah awm loin a reh vawng vawng. Mahse, a reh lutuk chuan ka awm a tinuam lo zual sauh thung. Remruata riahpui atana ka sawm lo ka inchhir tha leh vang vang. Mahse, Hriatpuia hnenah khan ka hlau lo ka ti khanglanga.Remruata lo riahpui ngawt turin eng chhuanlam mah a awm si lo.

Ri rek ka hriat rualin ka hriatna lam ka hawi nghal vat. Muangchanga Kawngkhar herhna che tial tial ka va hmu a, tu emaw chuan Pawnlam atangin hawn an tum tih achiang.Ka hrawk a ro nghal vek..

Chapter- 9

Ka hamhaih chhung a rei lo. Ka bengah Hriatpuia thil min hrilh a rawn lang nghala. Ngaihtuah buai hauh loin ka call nghal zat..Vawi khat chauh a ring hman tihin a pick nghal hlauh.

‘Mate…’ a aw pa zetin a rawn ti sup. Ka chhang dawna,ka tawngri zo lo. Ka room kawngkhar hawnna che tial tial bawk chu ka en leha. Ka lock miau avangin a hawng thei lo.Mahse, hetianga a chet reng chuan hawn hun a nei ngei ngei dawn tih ka chiang ve tawp.

‘Mate..I tha em?” a rawn ti leh a. Ka la tawng ta chuang.Tawng a hnekin ka off ta zawk.

Khum atangin ka chhuk tham thama, engmah bun loin ka Bag dahna lam ka pan pheia. Ka Boot rit lelh lawlh bak hmanraw dang a awm lo.Dimtein ka lachhuaka, Kawngkhar lam ka pan phei tham tham. Kawngkhar a rawn hawn ruala hlap mai thei turin kawngkhar sir deuhah ka ding a.Ka pheikhawk ka lekkang sa bawk.

Handle che tial tial reng chu mitkhap mang loin ka en a. Vawilehkhatah a tawp thut.Pawn lama engemaw ri deuh dawt thawm ka hriaa. Ka ip chawih thei.. Kawngkhar si chetin ka beng ka dawha,ri deuh pawp leh rum thawm niawm tak ka hre leha. A reh zui leh ta hmiah. Enge thleng en turin ka ngam lo hrim hrim. Ka din ngaiin ka ding deuh vang vanga,a reh tlawk tlawk.

Khum lam ka pan pheia,mu lo in ka thu fel than. He hmun hi a hrang nge ni anga Misual vakvel thawm ka hre zawk ni ang?

Ka Phone a rawn nghawr thuta, ka phu nasa lutuka ka pheikhawk ka paih dawrh. Ka keng tih pawh ka inhre tawh lo. Ka Phone ka en a,Hriatpuia..Ka ban vat.

‘Aw…’ Ka ti sep.

‘Lo hawng la,pawnah ka ding e’ a rawn ti dam thlup. Ka thaw nghal huai. Phone Off chuang loin Kawngkhar lam ka pana. A kalhna ka hawnga, min bum dawn lo tih ka hriatchian avangin ka hawng nghala. Ka rin ang ngeiin Kawngkhar bulah a lo ding a. A bulah midang hmuh beiseiin ka en kuala. Tumah an awm lo.

A rawn luta,Kawngkhar a khara. A kalh zui nghala, ka lo ding zum reng chu min rawn bana.Amah si chetin min pawta,min kuahbet nghal hmak.

‘Tumah an awm lo,hlauh tur an awm lo ania..’  a ti supa.Ka samah a fawp nghal vang vang.

‘Kawngkhar hawn an tuma..Chuan,thawm ka hre leh bawka’ ka ti halh. Kuah let ve loin ka ding mar at.

‘Ka hria e..Pawnah khan Remruata zu rui a lo dinga, he pa hi chu a rui buai ziah a’ a ti hmuk. Mak ti zetin ka en chho vat. A hmelpa leh luhlul zetah chuan engemaw danglam zawk ka hmu a.Mahse, a rei lo.Ka ngaihbel zawk pawh animaithei.

‘Remruata maw? Ngatinge?” ka ti lawi rat mai. Kan inhriatna a rei tawha,vawitam a zu in ka hmu tawh a. Mahse, mahni nihna hloh khawpa a ruih buai ka la hre ngai miah lo.

‘Um…Angai deuh che niang’ a nui a. Ka nuih a za ve hauh lo.

‘A va mak,a duh chuan min ko thei renga. Thil tha lo tih tum ang maiin a rawn che a’ ka ti hmak. Ka hlauhthawn zia ka ngaihtuaha,ka thinrim teuh bawk.

‘Aaaahh, theihnghilh daih rawh. Tunah chuan mu leh tawh zawk la..’ a ti a. Ka che lo,Remruata ti mah se ka chhungril hian a awih lo hulhual. Dik lo a awm chiang lutuk tlat.

‘Mu rawh le..Engmah hlauhthawn tur a awm lo’ a ti dam leh thlup. Mahse, ka che sawn chuang lo.

‘Ka kal i duh chuan ka kal ang” a ti leh a. Ka beng kawm hnunglam a kut zungpuiin a tuaia. Ka thaw halh. Kal se ka duh chiah em ka hre lo. Engkim a tha vek ti mah se ka thlamuang chuang eih lo tih ka chiang.

‘Ka kal dawn em?” a ti leh sup.

‘Aw..Ka..Ka hre lo’

‘Ok..Ka awm ang. Chuan,naktukah kan haw ang.A tha em?” a ti leh a,a awah min duatna a lang chiang lutuka,atthlak zetin ka mittui a hnam sawk.Kan tum lawk dan kha chuan ni 28 a haw tur kan ni a, mahse tunah chuan haw ka duh ber tawh,helaiah hian awmreng ka duh tawh lo. Thil tha lo engemaw tak thleng mai tur awma ka hriatna hian nuam takin hun min hmantir dawn miah lo tih pawh ka hria.

A ban ka khama,hnunglam atangin min kuah thung. A thawk danah a muhil bik lo tih ka hria. Ka ngaihtuah naah nichin lawka thil thleng kha a awm a. Remruata anih ka ring lo tual tual bawk. Mahse, zawt mah ila min chhan dan ngai bak in min chhang dawn lo tih ka hriaa. Zawh nawn leh tumna ka nei lo.An chhungkuaah hian enge dik lo awm ang? Nge he hmunah hian dik lo awm zawk ka hre thiam lo.

Ka harh lehin khua a lo eng uar tawh. Ka inlet a,keimah chauhin ka lo mu tawha.Room chhung ka enkuala. Engmah danglam a awm lo. Hriapuia lukham delh khuar deuh dak chu ka khawih a. Ka hmai ka phum nghal zat.

Ka inphihfai hnuah ka thawmhnaw ka khung fel leh veka, nizana a sawi ang kha anih chuan kan haw dawna. Kal dawna buai chuk ka duh lo. Mahse, midangin haw an la tum si loh chuan engtin nge kan haw ngawt theih ang? Ka ngaihtuah naah Remruata a lo lang nghal vat.

‘I mu tui maw?” Adin-an min hmuh veleh a lo ti a. Dinning Table an lo kil thap. Mahse, Hriatpuia a awm ve lo thung.

Ka thu thla ve a. Midang an titi zawm leh bawrh bawrha.Rei pawh ka thut hma in Hriatpuia alo lut ve a.Ka bula thutna awl awmah a rawn thu thla ve nghala. Min rawn en a,a nui suk.Ka then ve sak bawk. Zan 2 ngawt a bulah ka riak tih hria se midang hian engtin tak ngai ang maw?? Remruata ka en a. A hmaiah khem emaw pem pawh engmah a awm lo. Nidang ang bawkin vei nei lo fein a titi bawrh bawrh.

‘Vawiin hi kan haw angai dawna’ Hriatpuia’n a ti a.An ngawi nghal thap.

‘Ngatinge?” Mahruaii’n a ti ban chat.

‘Hna mawle,Mami pawh ka rualin i kal ve angai dawna,Pawi iti em lo ang chu’ a ti leh a.

‘Aih, pawi lo ang.Oh,pawi lo’ ka ti nawi nak. Ka hre lawk reng chungin mahni inringtawk taka sawi mai ka harsat tlat.Mahse, amak lo.Hetiang hunah tak hian ka buai leh tlat thin.Ka inrin hmain dawhkan hnuaia ka kut dah a rawn vuana.Ka kutzungtang karah a kut zungtang sei thlurh a rawn rawlha.A pawt pheia,a mal chungah a daha.A hum zui nghal vang vang. Mak takin ka thlamuang leh ngawih ngawih tawh.

‘Maw?! Mami pawh maw? Anih chuan keipawh ka lo kal ang’ Remruata’n a rawn ti nghala. Ka en a,a hmelah lawm lohna chiang takin alang thei. Hei tak hi Hriatpuia nen an in an lohna langsar ber a ni a. Hriatpuia hi chu a hmelah engmah angaihtuahna a hriat theih ngai miah lo.

‘Aih,angai lo..Zanin chauh a ni tawha.Awm rawh,kan lo tifel thei ang’ a ti dam leh thlup. A sawi dan tluangtlam hle mah se hnial luih loh a finthlak zawk tih haider theih a ni hauh lo. Remruata ang zuau leh chip leh hmak chu ka nuih lui thei hram.

‘Awm tluan law law ula tha tur ania.A va pawi tak,heta tanga tihfel theih miah loh tihna mi?” Mahruaii’n a ti leh a.

‘Um..Kan Boruak ka tihchhiat loh hram ka beisei ania’ ati a. A nui a.

‘Aaaah, tichhe hran lo e.Engtik nge inchhuah ang?” a tih zawm leha.

‘Kan eizawh hian kan chhuak mai ang. Mami,lo han insiam la’ min rawn en a. Tawngkaa chhang loin ka bu nghat. Ka kut a thlaha,ka dingchhuak nghala. Ka room lam ka pan nghal a. Ka insiam vek tawh tih kha sawi lan kher a tu lo,anih loh chuan haw kan tum sa tih ka inpuang mai mai.

Ka Bag ka khaia,theihnghilh ka nei em tih ka enkuala. Kawngkhar nghenga Remruata lo ding reng ka hmuh rualin ka phu nghek.Ka lungphu a thlawkchhuak lo chauh bawk. Engemaw tal chu min zawt dawn tih ka hre lawka.Mahse, tun tut tutah chuan a lo kal ka lo beisei lem lo.

‘Min tiphu alawm le’ ka ti hmak.

‘Ka hlauhawm vak amawni le?” a ti ve hluk.Ngei zetin ka melha, a nui hak.

‘Ngatinge?” amah bawkin a ti leh a. A sawi awmzia hre loin ka dar ka tichhing ak.

‘Ngatinge?” a tinawn leh a.

‘Eng chu maw?” ngaihsam hmel fein ka ti a.

‘Kal angai thuta, chu pawh ka tel loin’

‘Oooo, Boss khan a sawichian nen.Hna…’ ka ti liam puat. Khuma ka phone dah ka laa. Ka kekawr ipteah ka hnawh lut nghal zat.

‘Tunah hian eng hna hmanhmawhthlak mah a awm dawn lo. Thil dang dik lo a awm’ a ti leh ta tlat.

‘Maw? Enge ni ang? Ka hriat zawng chu hna a nimaia’ ka ti leha.

‘Kan hna ni loin in pahnih hian hnadang in khawih em?” a ti leh talh.

‘Nope..Enge thawk dun tura min beiseia?” ka ti let ve thung.

‘Ka hre chiah lo..Mahse, dik lo a awm’

‘Nia,awm e.Chuvang alawm kan haw dawn’ ka nui lui sak.

‘Min bum tum suh,diktak chuan tukin khan i Room atanga u Hriatpuia chhuak lai ka hmu a’ ka khawng nghal lah.

‘Nimin zingah nang u Hriatpuia Roomah ka hmu thung che a, ka ngaihtuaha.Thil pangngai a ni lo’ ati leha. Zahzelah ka thle bak.

‘Chuan,I duh duh ilo ngaihtuah ta a…’ ngaihpawimawh lo em em ang maiin ka ti zangkhai vah.

‘Ka warning che kha..Rosy a nunah a awm reng,a awmreng dawn’ uar zetin a ti chiam.

‘Ka lo hre reng dawn nia’

‘Hriat reng ngawt kha a ni lo. Hlat rawh’ a ban a vai kuala.

‘Nizanah ka Room kawngka bulah khan enge i rawn tiha?”

‘Maw?!” a ti vak. Kan thilsawi lai nen a inpersan lulai bawk atin ni.

‘Ka Room kawngkhar hawn i tum a..’ ka ti leh fak.A mitah tak ka en bawk.

‘I mawl ami? Engvangin nge chutiang ka tih ang?” a ti leh vak. ‘Mi a’ tih melhin min melh reng bawk.

‘I ti tlat sia lawm’ ka ti nghauh.

‘Ka …’ a ti hmana,mahse Room Kawngkhar kik ri avangin a tawp leh chawt. Eng emaw sawiin a phun hlak.Kawngkhar a hawnga, Hriatpuia a rawn lang a. Ka thawhuai. Keimah chauha Remruata hmachhawn zel ka chak lo,Rosy pawimawhna leh a hriat dan kha chu engpawh ni se,tunah chuan a vawikhat nan Remruata ni loin Hriatpuia rin ve ka duh ta tlat bawk.

‘I inpeih tawh em?” rawn luh pahin a ti a,Ka bu nghat.Remruata lo awm ve chu ngaipawimawh ang pawn a awm lo. Zo fahranin ka bag a rawn khai kanga.

‘Ka lo keng mai ang..’ ka ti a. Hre lo ang maiin a kal nghal vut.

‘Eng nge a duh a?” kan tlanchhuah hnuah a ti sup.

‘Tu?” ka ti a. Mahse, ka tawng zawh rualin tu nge a sawi ka hrechhuak leh hman tho.

‘Tu nge ni chuang ang?” a ti hmuk. Nizana min Duat em em tu  leh ka thlamuanpui ngawih ngawih Mipa kha ni loin ka Hmelhriat ngai loh a ang ka ti zawk.

‘Engmah duh a neih pawh ka hre lo’ ka ti a.Hmuhnawm tihmel fahranin hmalam ka en ngar bawk.

‘A tha alawm. Mahse, ka thilneih tawmpui ka duh lo ania’ a ti leh hmuk.

‘Bungrua ka ni lo’ ka ti hlak. Mihring ang ni lo a Bungrua ang maia min sawi chu ka duh lo bur.

‘I ni ka tih pawh ka hre lo’ a ti leh sup. A awah nuihzatna alang tel theia.Mahse, ka nuih a za ve miah lo thung.

‘Nizan kha…’

‘I zawt a,ka ni lo a ti ngei bawk anga’ ka sawi laklawh laiin min sawi khalha.Sawi leh mai tur hre loin ka thaw hak.

‘Ka hre lawk..I zawt ngei dawna,ani pawn a pha ngei bawk ang. A chhan chu ka sawi aiin a sawi i awih a..Kei aiin i ring zawka’ a tawp lamah thinrim aw a hriat tel theih.

‘Chutiang a ni lo’ ka ti nghauh.

‘A tha alawm’ a ti leh hluk.

‘Rosy…’ ka ti a. Ka ngawi leh daih.

‘Rosy’ a ti nawn ve a. Ngeiawm zetin a nui zui hawk.

‘Ka….’

‘Muhil rawh,nizanah i mu tha lo lutuk’ a ti leh daih..Nidang ang bawkin a Mood a inthlak danglam leh vek tawh tih ka hria. Hnial loin muthilh tum zawk ila a tha tih ka hre bawka. Muthilh tumin ka thutna hnung lam ka nghenga.Ka mit ka chhing nghal hmak.

Motor ding datah ka harha. Ka thu ngil nghal vat. Ka hawikuala,Aizawl kan lo lut tan der tawh.

‘Ka va mu nasa ve’ ka ti a. A then suk.

‘Ka ring,I hnar nasa em mai’

‘Maw? Ka hnar ngai miah lo’ a nui leh a. Min fiam tih ka hre thiam nghal mai. Ka nui ve hak.

‘I ril a tam em?” a ti leh a.

‘Aih,tam pawh ka hre lo. In thlen vata, inbual ka chak’ ka zi mar ar ar.

‘Mi hmuhtir duh che ka neia’

‘Tu?”

‘I hmuh hunah i hre mai ang’ a ti awlsam et.

‘Tunah kher maw?” ka ti leh ha.

‘Tunah kher chuan ni lo e.Kan thleng phawt anga, zanah kan mu anga.Naktukah kan hmu ang’ a nui leh a. A mood tha lutuk chu ka awih lo rum rum zawk.

‘Tak takin naktuk tlaiah le..Tunah chuan hahdam vang vang phawt la..Kei pawh hahdam ka mamawh’ a ti leh a. Ka bu nghauh.

Inah min Drop a, lo lut loin a haw tlang nghala. Ka in luah chhung te fel rawn leh felfai thlap chu ka enkuala,ka hahdam sawng sawng. Mi in luah mai chauh pawh ni ila hei bak hi In tihtur ka nei lo a,ka tan chuan a hlu ngawih ngawih.

Eitur ka siam a,ka siam zawh veleh ka ei a. Muangchangin ka inbual leha,ka inbual zawh hnuah thatchhe zetin Sofaah ka thu a. Tv ka thlir dauh dauh.

Motorah khan ka mut hnem nen mutchhuak in min rawn zem leh chiai chiaia. Sana ka en a, Dar 7 chauh..Mut nan chuan ala hma viau,mahse zan hnih ngawt muhil mumal lo leh awm nuam lo a hun ka hman vang kha aniang ka mut a chhuak ngawih ngawih.Ka Phone nghawr dat dat ka lakanga,min rawn call tu ka en a. Ka then sak.

‘Hello..’

‘Hmeli,I lo haw mi?” thawveng lutukin Machhuani’n a rawn ti lang lang.

‘Um,haw..I hmang nuam em?”

‘Awi,min va han zawt tlai si tak. I va awmchhungin min theihnghilha,tunah min hre chhuak chauha’ a ti bai bai.

‘Nangpawn min be bik lo a..Kan in draw’ ka nui a. A nui ve hak.

‘Nia,nia..I tih chuan animai.Rema khan in Boss nen in lo haw a ti a ‘ a rawn ti leh a, ka ner nak.

‘A dik alawm’ ka ti ban chat.

‘Hey,ka hriat ve loh thil a awm chiang lutuk.Nang hi ka hriat lohin Bialpa i nei ‘ a rawn ti leh a.

‘Naaa,chutiang lam a ni lo..Naktukah lo leng ula’ thildang sawipui tumin ka ti a.

‘Ka peih lo.Lo leng zawk rawh,inneih thil vel pawh buaipui ngai a awm tan ania’ a rawn ti leh a.

‘Um…Khua te han var phawt se’

‘I zep thei miah lo ang aw.Ka hre ve duh vek,a bul atangin’ a rawn ti leh zat zat. He nu tak hi chu a,engthil chiah nge Remruata’n a lo hrilh ni? Kan awm danah khan engmah rinhlelh tur a awm miah si lo.

Ka mu tha takzet.Ka harh lehin khua a lo var tawha,ka mutna bul Tukverh niin a rawn chhun eng iar bawk. Tho mai loin ka mut ngaiin ka mu deuh vang vang..Hriatpuia ka mitthlaah a lo langa,a pian nalh leh infit zet bakah a hmelpa leh tihhar hmel fahran te leh a hawiher induhtawk lutuk te hian Hmeichhia a hip lo thei lo ang. Hmeltha leh mi aia chungchuanna bik nei ni lo mah se khawiahmah zahpuiawm lo a ni lehzel te hi a mak thlawt. Amahah hian thuneihna leh mi thunnun theihna mak tak ala awm tel cheu..Engtin nge kei hmeichhe satliah ve tak hi min duh tlat  ka hre thiam lo..Mahse,min duh miau a.Achhan lam a pawimawh lo.

Thil ka tih mawlh mawlh laiin min rawn calla,ka pick vat.

‘Lo insiam la..’a rawn ti deuh tlawng.

‘Khawia kal turin?”

‘Niminah ka hrilh che kha,hmuhtir tur che ka nei’ a titha ve mai.Ka lo hre leh tawh pek lo.

‘Eeee,nitak..Mahse…’

‘Dilchhut reuh si,zawhna chu nakinah zawk aw,lo insiam la..Ka lo thleng har lo ang’ a ti leh hmiah.

Tu nge kan hmuh dawn ka hre si lo.Engtianga inchei tur nge pawh ka hre lo.Ka thawmhnaw ka thlek kual fe hnuah Leather Boot,ka khup aia hnuai hret leh kekawr zangkhai tak,tight tha zet ka thlangchhuaka.Kawrlum phiar chungah Jacket  fual ka ha leha. Wool atanga siam,muffler tial zangkhai deuh ka nghawngah ka bat a.Ka sam ka thlah mawl tawp thung.

A rawn thlen veleh engmah sawi loin amah si chetin min pawt beta,ka samah a hmai a phum nghal vang vang. A awmdan chuan min fan rawih rawiha,tawngkam thlum taka sawi tlawr duah ka mamawh lo. ‘Ka ngai hman hle mai che ’ a ti sup. Engmah sawi ve loin a kawngah ka kuah ve a,a lungphu ri dat dat ka ngaithlaa.Ka tel ve niin ka inhriaa.Tunah rih hi chuan khawvel dang ka mamawh lo.

‘An lo thleng e’ kan luh rualin Mipa pakhatin a tih ri ka hriaa. Dawhkan sei leh nalh zet kila lo thu mi 10 rual lai an rawn hawi nghal thap.Tu te nge annih ka enkuala,tumah ka hre ngai lo.In tita tu zetin ka kawngah a rawn kuaha,amah hnaih deuhin ka dinga. Ka biang a sa nghal hat hat mai.

‘Surprise..Ka thiante hian hmuh che an chaka’ ka beng bulah a ti sup. Ka bu nghauh ringawt.

Min chibai sap sap hlawm. An hming Hriatpuia’n a sawi zel nangin tumah hriatzui pawh ka nei chuang lo..An fel em em veka,reipawh ka awm ve hmain ka tlangnel titih chu a ni der. Hriatpuia lahin min duatna a tilang zui mawlh mawlh bawk.An titi dan leh an thil han sawikhawm reng rengah an vaiin Hriatpuia an ngaichang deuh vek tih ka man thiam nghal thuaia.Hnaah chauh pawh ni lo,athiante zingah pawh hmun pawimawh tak a luah tih ka hre thiam thei mai bawk.

‘Mate,mi kan be lawk ang. Ka rei lo ang’ rawn kun hnaih pahin a ti a. Ka thle bak..

‘Eheu…Ka awm loh pawn in lo va hlim ve’ Hmeichhe aw tliang nalh zetin a rawn ti a. Kan reh nghal thap.Aw lo chhuahna lam muangchangin ka hawia. Rosy lo ding ka va hmu a, kan mit a  intawng chat. Hriatpuia thiante zingah hian Rosy a tel ve tih reng reng ka lo hre lo.

‘Ehhh…Kan kim ta,lo kal rawh..Thil ropui deuh a awm ania’ kan luh tirha min lo be hmasaber tu,Pa thau tawi lamin a ti hluai. A rawn kal pheia,ka hmuh hmasak tum ang bawk khan simple em em siin a nalh lehpek, ka in khaikhin zauha,ka inhmu te chem chem mai.

Ka thutna lo lama thutna awlah a thu a,midang nen an infiam nghal bawrh bawrh.’Khawnge kan Boss hi?” tih pahin a hawikuala.

‘A awm reng kha.Mami,khawiah nge a lo kal hman?” pakhatin min rawn zawta.Rosy-in min rawn en ta chat. Min hre awm hmel a pu lo.Keiin ka hriatchian tehreng nen hian a…

‘Phone a hmang lawka,a lo let tep ang’ ka ngaihtuahna ang lo takin ka ti zangkhai vah.Rosy-in chik lutuka min en chu hawisawn duh loin ka en ve rana..Ka nui lui sang bawk.

‘Min hre thiam la,ka hmu tawh che em?” nui chungin a ti a.

‘Hmu tawh e..Ka Office a ilo kal tum khan ka hmuhtir tawh che kha..’ ka hnung mai atangin Hriatpuia aw vawt ruihin a rawn ti a.Ka hawi nghal vat.A lo let lai ka hre miah lo..

Chapter- 10

Ka hnungah a rawn dinga,a rawn kun hniama.Ka dar tawn tawnah a rawn vuan zui leh zat. Enge tih a tum ka hre lo.Mahse, Rosy meng tal tap chuan min ti lawm tawk viau. Engtin nge Hriatpuia thil sawi a chhan let ang tih ka ngaihtuaha,a hmeltha takah chuan nui hmel lang mah se a mitmeng nalh leh thip ram chuan a nuihzat loh zia a ti lang chiang vek lawi.

‘Eh..Ni tak,In Accountant kha a ni dawn tak e’ a awha min tham loh zia a langa.Ngeiawm lutuka nui sawngin min en bawk, kei erawh ka chhungrilah thinrimna a inchhem alh ve chiah thung.

Midang zawng zawng zingah hian Hriatpuia hnuaia thawk,Staff pakhat anga min lantir a tum chiang khawp. Hreptak hian..Ani chauh hian nge min tihzah tuma Hriatpuia pawh hi a tel ve ka hre thuai ang chu..Ka induhtawkna in min tihtir fo tawh angin ka dak vaha,ka nui lui sang bawk.

‘Um,adik alawm..Mahse, khami tum khan tu nge anih ka hrilh tawh che kha,chuvang ania zanin hian hetah ka rawn hruai’ a ti hriam leh hruih. Eng chungchang nge an lo inhrilh ka hre lo. Ka rin dan ang ni loin Hriatpuia hi chuan min tihzah tumna nei hmel a pu lo.Diktak chuan ka awm ve miah lo ang maia ka chungchang an sawi chu ka haw hlur tawh. Lo tawng ve ngawt turin min be lo va,ka tel ve na tur engmah a awm miau si lo.

‘Ka hria…’ a ti a,a thle bak. A mitmeng lian leh melhna zet chuan min melh hlum thei se ka thi chiang tawh ngawt ang tih ka hria.

A ding mara,ka bulah a rawn thu thla ve a. Dawhkan hnuaia ka kut dah a rawn hum zui nghal chat. Laksawn sak pawh ka tum bik chuang lo. Engtin chiah nge ka chungchang a lo sawipui tawh ka hre lo. A bialnu angin nge Game khelhna hmanraw chi khat tiin min sawi zawk ka hre lo. Mahse, Rosy ka bei duh anih chuan helai ka awmchhunga ka tihtur ka hria..Ka ti ta reng bawka.

Kan thil ei a tui hlawm viau chungin engmah ei chakna ka nei lo a. A hming lekin ka ei ve a ni chauh. Hriatpuia thiante an fel em em veka,Rosy nen an chanchin hretu vek annih hmel chungin tuman ka tana nuam lo tur thil an ti lo. An titi bawrh bawrha,an infiam danah an inpawh em em vek tih lah a chiang. Rosy pawn engmah ka tana nuam lo tur a ti bik lo a. Mipa dang ang bawkin Hriatpuia a be ve a.Hriatpuia pawn thiantha biak dantur pangngai tho in a be ve mai. Mahse, ka awm erawh a nuam lo,kha lehchen lo inkawp tawh leh thian la ni zel thei chu thil pangngai a ni miah lo. Chumai bakah min en apianga a mit a min huatna lang chu ka hmuhhmaih hauh lo bawk.

‘Enge ka tihsual leh tak?” kan tlanchhuah hnuah a ti sup. Ka melh zawka,min en lo in hmalam a en thung.

‘Eng mah i tihsual pawh ka hre lo’ ka ti sap.

‘Anih chuan nui la…’ a ti leh a.

‘A za si lo a,chhan awm lo a nuih ngawt te chu a’

‘Dik chiah..Chhan awm lo a mood inthlak ta thut pawh kha…’ a sawi zawh rualin nghal zetin a nui zui huk.

‘Sawi lo mai teh’ nui ve duh loin ka ti hmak.

‘Ahh…Anih chuan ka thiam loh anih chiah chu’ a ti leh a. Min chhaih nuam a ti laklawh dawn tih ka chiang.

‘Mood inthlak thut thut tih kha chu nang mah atanga ka zir anih ka ring’ ka ti nghauh.

‘Ok..Ka pawm thlap,ka ngaihtuaha..Kan fate chu an hmuhnawm ngawt ang’ a ti leh daih. ‘Fa’ tih chu ka bengah a ri ring bik in ka la hre zui. Tawng loin pawn lam kan ka thlira, eng mah pawh ka hmu tak tak chuang lo. Ka bula thu mek hi ka duh aia nasain ka buaipui dawn tih ka inhmu lawk veka, amah ka hlau nge keimah ka inhlauhpui zawk ka hre hek lo.

‘I lo lut dawn em?” ka in kawt kan thlen in ka ti a.

‘I duh chuan…?” a ti tha ve mai.

‘I thu thu’

‘Ka lo kal chuan ka riak nghal duh ang..A pawi em?” chhuk tuma Kawngkhar hawnna ka vuan tawh ka tawp chawta. Rang lutukin ka hawi let nghal vat. Mahse, a lo nui ka hmuh rualin min la fiam zui ta zel tih ka hmu thiam nghal vat. Tihngaihna hre loin lei ka chhuahkhum zauh ringawt. A nui nasa zual sauh thung.

Kawngkhar ka hawnga, ka hnungah min rawn zui luta. Aman kawngkhar a khara,a kal zui nghala.Pawi ka ti hran lem lo. Keimaha ka awm reng rengin kawngkhar hi chhung lamah ka kalh deuh tlangpui hrim hrim.

‘Lo thu la..Ka inthlak lawk ang,ka rei lo ang’ ka ti a. A bu nghut.

Ka let lehin thu loin Tukverh bulah a lo dinga, pawn lam a lo thlir vung vung. Ka thawm hriain a rawn hawi nghal vut bawk.

‘Thingpui i duh em?” sawi tur dang hre loin ka ti a.

‘Pawi miah lo,Remruata hnen atangin Thingpui hang siam i thiam zia ka hre hne hlui tawh’  a ti a,za miah loin a then zui suk. A mood a lo inthlak leh vek tawh tih ka hre theia..Nichin khan min han fiam ve ngei chu ania,Lutuk hian a..

Gas bulah ka dinga, ka hriatthiam si loha ka awm tinuam lo tu tihbo tumin ka mit ka chhinga, thawk ka la vang vang.

‘Sorry…’ ka  beisei loh lutukin ka kawngah a rawn kuaha,ka darah a hmai a rawn phum nghal zat. A lo kal hnaih lai ka hre miah lo. Ka hamhaih lutuk,eng vanga ngaihdam min dil ngawt nge anih ka hre hek lo.

‘Ti nge?” ka ti thei hram. Ka hrawkah hnawhtu a awm avangin ka aw ka thian zui khauh.

‘Ka hre lo’

‘Anih chuan tinge ngaihdam min dil si?”

‘I Mood dik lo kha keimah vang anih ka ringa..’ a ti leh a. Ka nghawng hnung lam a hmui chhah tapin a fawp zui nghal dun dun. Insum hman lo in ka thaw nghal hak thung. Amah en thei turin min kuai hera,ka biang tawn tawnah a vuana,amah en thei turin min kuaidak nghal zat.Light hliah zawnga ding anih avangin a hmai a thim deuha,a hmel landan ka hmu chiang thei lo thung.A rawn kun hniam rualin ka mit ka chhing nghal hmak.

Ka hmui a rawn si a,dim leh dam lutukin a rawn nawr kaua. A lei a rawn rawlh luta,zei lutuka a chet kual tir rualin ka khup a zawi nghal huai. Tluk hlauin a kawngah ka kuaha,ka thiam ang angin ka chhang let ve a. Ka chhan let rualin a rum hawk. Ka kawr chhanah ka hnute  a rawn thama,ka mar nghal awt. A hmaa dimna tel map lo va min khawih nen kha chuan lei leh van a ni ringawt.

‘Min ti a zo vek tawh’ a tih ri chu hla tak atanga rawn ri angin ka hre vuai vuai chauh. Ka kawr a pawt hlim chho a, ka taksa khuhtu a awm loh rualin a vawt nghal vara,ka harh deuh kawk bawk. Mahse, a kut lum thur thurin ka hnute a khawih rualin ka chik that.Ka hriatna a mang lehnghal mup. Dik tak chuan ani aiin ka a nasa zawk fe.

A kun hniama,enge thleng dawn ka ngaihtuah hmain ka hnute hmur a hmuam ta chat. A samah ka tham nghek thung,nawmna mak lutukin ka taksa pumin min fana,ka mur nghal chuai ti ila a dik ber ang. Ka chhungril atangin aw zwitein tawp turin min rawn hrilha,mahse aw pakhat zawk in a aia ringin kal zel turin min nawr thung.

Dimtein a liak kuala,a samah ka tham a,te chhuak lo turin ka hmui ka pet fan fan bawk. Ka vai ruaia,engpawh thleng se pawi tihna ka nei lo. Nawmna avangin ka beng a ngawng mum mum a,ka thisen kal vel an chawl thuap niin ka hre bawk.

A rawn ding mara,ka inrin hmain min pawm kang nawlha,tlak hlauin a nghawngah ka kuah nghal chial..A hmel ka en ngam loh avangin a darah ka hmai ka phuma,engkim mai ka mumang ang ruai a ni ber.Hetiang hi thleng thei turah ka lo ngai ngai lo.Mi pangngai ka nih miau avangin chakna nei lo ka ni bik lo a, mahse sex lam hawiin tumah ka la awmpui ngai lo va,hriat ka nei tlem lutuk.Tuna ka awmdan ang hi mi awm thin dan vek a ni angem ka hre lo..Ka tan chuan thil thar dik tak a ni a, ka rin phakbakin a phurawm bawk.

Khumah min nghata,min rawn delhbet zui nghal a. Ka hnute a hmuam zui lehnghal chat..Ka kut leh lamin a samah ka thama,lehlamin a darah ka nem ve thung..A insiamrema,ka kekawr kawng a rawn zen a..Ka harh nghal kawk..Thawklehkhatah ka rilru a fim nghal kawk..Mahse ka taksaa nawmna thleng mek erawh haider rual a ni chuang lo..Nawmna nasa lutuk chu ka rap lek lek zawk hial….

‘Tawp ang…’ ka ti sep. Ka aw a zawi lutuka kei pawn ka hre chang chang,ani tan phei chuan hriat ngaihna a awm miah lo ang. Ka hmui ka pet leha,zei lutuka a che vel hi ka titawp vat anih loh chuan ka ngaihtuahna fim mek hi a fim rei dawn lo tih ka chiang.

‘Tawp rawh’ ka beisei aia tha in ka ti chhuak thei ta hlauh. Ka sawi a hre ngei tih a tawp chut danah ka hre theia. Ka taksain a mamawh zia ka ngaihtuah zawngin ka ui nghal vawng vawng thei!!

‘Ok…’ a ti sup. A in bengkanga,ka sirah a let thlaa. Ka kawr min hak that tira,a dar ka khama,Eng mah sawi loin min kuah bet nghal hlu hlu.

‘A va harsa dawn ve…’ reife eng mah sawi lo a kan mut hnuah a tichhuak sup. Eng mah ka sawi lo,a awm zawnah ka kut ka daha,a lungphu ri dat dat ka ngaithla a. Kei pawn harsa ka tihzia ka ngaihtuaha,ani Mipa zawk tan phei chuan a harsa dawn lutuk.

‘Ka lawm e aw’ ka ti sep.

‘Ahh, engvangin maw?” a ti dam thlupa,a awah min duatna niawm tak ka hre thei.

‘Ka…Min tilui lo a’ ka sawi zawh rualin ka hmai a sa nghal hat hat.

‘Ka tilui ngai lo ang che..Engtikah mah….Mahse, chuvang ngawt chuan min zuam lo la,a harsa ka tih kha’ zawitein a nui zui hawk..Ka sam karah a kut a rawn rawlha,ka chipah a fawp leh vang vang.Ka va han duh ngawih ngawih tak.Mipaah hian mipa diktak ka zawng dawn anih chuan ani hi a ni ngei ang.

A haw hnuah Machhuani’n min rawn calla,min rawn hau nghal hlak hlak.

‘Eng mah i rawn sawi leh bawk si lo,nang hi i awmdan a mak riau mai’ a ti hmak hmak.

‘Sorry…Tihtur ka neia,ka lo theihnghilh alawm’ tlawn pahin ka ti a.

‘Min ngai lo sawt lutuk,in Boss nen in inkawp tak tak aniang’ a ti leh hmaka.

‘Pasal nei maitur ngaih viau che awmzia a awm lo alawm’ thil dang sawi tumin ka ti a. Ka hmel hmu phaka a awm lo ka lawmzia chu pui tak a ni. Thil dang eng eng emaw kan sawi kual leh teuha,ka beisei ang ngeiin Hriatpuia chungchang kan sawi zui ta lo hlauh.

Ka nun mal leh mahni chauh ni a inngai thin kha ka mal ta lo a. Ka hun tam zawk Hriatpuia nen kan hmang a ni ta ngawt bawk. A chang chuan ka mumang anih hlauin ka awm a nuam lo thin. Mahse, amah ka hmuh rualin a reh leh mai zela.A hun neih zawng zawng ka bulah a hmanga, a lo kal hman loh pawn hunawl a neih veleh min rawn biaa. Msg type neuh neuh erawh a peih zawng a ni lo tih ka hre tawha.Beisei pawh ka beisei lem lo.

‘Hey…I hmang nuam maw?” ka hmaa rawn din pahin Angela-in a rawn ti chul. Ka en a, ka hmuh hnuhnun ber lai ang kha ni loin a hmel a hlim sarh.

‘Nuam animai..Nang zawk?” ka ti let ve a. Ka ngaihtuahna tih lan hun a ni lo tih ka hria.

‘Um,nuam lutuk..Awi, ka theihnghilh chiang lutuk’ tih hluai pahin a thil ken a lekkang zauh. Ka nuih sak,a mawng lian tha zet sawi lawh lawh paha a kal sawn chu ka en a. A chungah engthil tak thleng ni maw?

Ka roomah ka lut a, ka kutkawr ka hlipa.Ka jacket ka khai nghal bawk. Coffee lak leh tumin ka chhuaka,kawngkaa Remruata lo lut mek ka va hmu a. Min rawn hmu ve nghal a,a ban a rawn vai zauh. Thenzawl atanga kan hawsan hnu khan kan inhmu mumal leh ta miah lo. Kan haw san kha angai haw viau em ka hre lo a, hna thil ti a Hriatpuia’n a sawi miau avangin a awih ve ta zawk nge pawh ka hre lo.

Ka thu fel chiah tihin ka phoneah msg a rawn lut a,ka ban vat.

‘I Jacket ha rawh..I hritlan em kha’

Ka chhiar zawh rualin ka hawichhuak nghala,a thutna lam ka va en a. A room bangah Darthlalang chhah chi an hman avangin ka hmu thei lo..

‘A va lawmawm awm vur vur ve’ Remruata’n a rawn ti thut. Ka phu nghek bawk. Ka room kawngka biang nghengin a lo ding reng tawh chu niin…

‘Lo lut mai mai teha’ ka ti hmak. A rawn lut a,ka hmaah a rawn thu thla a. Coffee a tem pah zauh bawk.Thil hriatchhuah ka nei ve chiah.

‘Enteh…’ ka ti a,pawnah kan tawng hre phak an awm leh awm loh ka thlek hmasa leh te te.

‘Eng nge ka en anga?” a ti liam puat.

‘Ka sawi dawn alawm le’

‘I sawi chu maw ka en ang? Ka ngaithla zawk dawn lo mi?” ngeiawm fahranin a ti leha.Ka ner khum vak. Engahmah ngai loin za zetin a nui huk huk duh lek.

‘Angela-i ka hmu a…’

‘Chuan..?” ngaihsam em em bawkin a ti leh a.

‘Engtin nge itih tak?” zawite in ka ti leh a.

‘A harsa lo lutuk…’

‘Hey, nang hi thil tha lo ti turin ilo nawrlui te anih vaih chuan ka ngei ngawt ang che’ ka ti hmak.Ka ngaihdan a ni bau lo.

‘Ka nawrlui lo..A ninawm,a fel vek ka tih chuan ngaihtha tak khan awm tawp mai rawh’ a ti awlsam leh mai.

‘Ka hre thiam lo che’

‘Min hrethiam ngai reng reng hleinem’ a ti leha. Ka melh vak.

‘Ka ring ngam lo che e a’

‘A ninawm ka tih kha, ka chhuk dawn..Hna kan ngah lutuk’ a ti a. A ding chhuaka,ka tawng leh hun pawh nghak loin a chhuak zui nghal daih bawk. Awm ze nei lo zetin a kal ka en zui reng ringawt.Angela-i lah kha a hlim em em mai bawk si nen,eng mah ka hre thiam bau lo.Inneih an tum zawk nge mawni le? Ka lu ka thing nak..Ka lo buaina tur a awm lo.

Machhuani dar 2 velah a lo thlenga, inneihna thil vel enkual kan ngaih avangin tlai lam chhuah ka lo dil lawk tawha. Hriatpuia bula dil tur ni mah se ka mimal thil leh hna a hran daih anih avangin dilna pangngai ka siam thlap.Ka bialpa anihna hmachhuana ka pal zam fo anih chuan amah ka ti zahawm lo mai pawh ni loin keimah ka inti zahawm lo tel bawk dawna. Mimal nun leh Hna dah hran hi ka tum em em ve tawp.Hriatpuia phei chuan ka duh aiin a thliar hrang thiam mah mah zawk…

Kan chhuak turin Hriatpuia kawngka bulah kan tawka. ‘I kal tawh dawn mi?” satliah takin min ti a.Midang tana ngaihbel tur eng mah a awm danah a awm lo.

‘Aw, eeee…Hei ka thiannu chu ania. Machhuani…Chuan,thiannu hei hi kan…’

‘Hriatpuia…’ ka sawi laklawh laiin Hriatpuia’n min tihkhalha. Lai zetin ka nui ta ngawt.

‘Ka thiannu hi ka tibuai lo thei si lo a..Min lo hre thiam hram hram aniang chu’ Machhuani’n a ti a.

‘Um..Inneihnaah min sawm ve lo beisei ngawt phawt ila..’ amah ang lo tawpa nelawm in a ti a. A nui suk bawk.

‘Tehreng,ka sawm nghal che animai..’ Machhuani’n tlangnel takin a ti let ve a. Min rawn en zawka,a nui leh suk.

‘A va han chhe lo fahran tak’ kan chhuah veleh a ti chiam.

‘Tu?” a sawi ka haider ve hmiah thung. Ngeiawm zetin a hmui a ti sawi a.

‘A en dan che kha ka hai miah lo aw..In thup tum khanglang lo mai teh u’ inla fing mangkhengin a ti leh a. A tihfo danin a hnar a ti vanga, a nui zui hak hak. Chhan mai dan tur ka hre lo..Ka hawi buai deuh chu hnehtu inti em em in min nuih zui leh nghek nghek.

‘Ok…Ka pawm e, mahse,I hmui kha chip tlat ang che’ ka ti ta nge nge.

‘Khawiah nge sawi se min tih vaka?” lungawi vak loin a ti nghauh.

‘Remruata…’ ka ti vat. A meng buai deuh naka,mahse a insiamtha leh vat.Eng emaw sawi tumin a ang ziaua,mahse rilru thlak leh niawm takin a chip leh hmaka. A bu ta nghauh.

Kawr kan en kuala,kan buai ta viau. Chaw ei nghal turin min ti a, mahse ka hnial a. In ka thlen meuh chuan dar 6 a hnai thuak tawh. Thlasik vanglai a ni bawk nen Scooty han khalh leh chu ka khawng lo chauh.

Hriatpuia nen kan inzui atangin  kar a kal ve ta nual,a intiam ang ngeiin tu man kan inkawp an la hre ta lo. Remruata pawn eng mah a sawi nawn leh ta lo a. Min warning emaw kan pahnih chungchang hrim hrim a sawi nawn lo tawp. A hre ve tu awmchhun Machhuani lah kan thawhpui a ni lo a. Ni pawh ni se a sawichhuak dawn lo tih ka chiang. A chang chuan a mimal nun leh hna a dahhrang thiam lutuk hi ka haw ru deuh hial thina.Ka duhthlanna ni mah se ka la confi tawk lo bawk nen min fiam kual mai mai anih ka la hlau foa,mahse kan pahnih chauha kan awm erawh chuan rinhlelh rual lohin min duhna a ti lang ziah thunga.Ka hlauhthawnna a thlawkbo lehnghal vek zel.

Naktuk hi Machhuani te man hlanni a ni a. Hnaah ka buai avangin an in lamah pawh duh angin ka kal tam thei lo. Hriatpuia room ka pana,kawngkhar a inhawn sa avangin a chhung ka hmu theia. Tu mah awm loin a ruak hiau..‘Khawnge Boss hi?” Angte-i,Hriatpuia room luhna tur bul hnai bera thu thin, keimah ang rual vel hnenah ka ti a.

‘Balcony lamah sawn a awm in ka hria…’ a ti a. Ka nuih sak,ka kalsana.Balcony lam ka pana. Ka thil sign tir tur ka keng va bawk.

Kawngkhar ka nem hawnga, ka beisei ang ngeiin a lo ding ka va hmu a. Blazer Grey rawng a hak chuan a pian nalh zet a tilang nalh lehzual sauh. Ka pan pheia,ka thawm a hre lo a ni ngei ang. A  din ngaiin a kekawr ipte zenin a dinga,koh mai ka tum laiin a Phone a ri ta hlauh. Ka ding chawta,kal mai loin ka nghak ta zawk.

‘Hello’ a ti dam thlup..

‘Hlauhthawn tur a awm lo..Lo nghak tawp mai rawh’ a ti leh a. Eng chungchang nge an sawi ka hre lo..Tu nge abiak ka hre hek lo.

Ka awmdan mawi loh zia ka ngaihtuah chhuak zawk..Ka inher a, Kawngkhar lam ka pan zal zal.

‘Mami…Ani chu Sawi tel suh ka tih kha’ ka hming a lam ri ka hriat rualin ka pen lai ka tawp chawt. Ka inhera, engvangin nge ka hming an sawi ngawt ang ka hre thiam lo. Enge a sawi leh ang tih thaw dep depin ka nghak mawl tawp. Mahse, a thilsawi ka hriat leh chuan a hma aia nasa zawkin min thawng leh ta cheu.

‘Khawih miah suh..Anih loh chuan tu nge ka nih theihnghilhin ka dah tha duh mai ang..Eng hna nge ka thawh thin i hriat kha’ a aw ri chu dam em em mah se vauna a ni tih haider chi a ni lo..