SWEET DECEMBER BOOK 2 (Chapter 11- 20)

Chapter- 11

Thawm nei lo thei ang berin ka tawlh let zal zal.

‘Mam, kal ila’ Mahruaii’n min hmuh veleh a lo ti a.

‘Khawiah?” ka ti thei hram.

‘Lunch,lawk..I tha em?” phawk deuh hrain min en a.

‘Um,tha..Ka lu a hai deuha.Nakinah ka lo kal mai ang’ ka nui lui thei hram.

Min biak leh hlauin hmanhmawh lutukin ka office ka pana. Chairah ka thu thla hnawk.Thawk ka la vaka, ka zia deuh huaiin ka hre ve ngawt. Engthil nge anih chu ka hre lo,mahse khatiang taka vauna kha engvanga hman tul nge anih ang? Bakah,tun lawka tawngri ka hriat kha chu Hriatpuia ka hriat thin kha a ni lo. A hlauhawm em em a ni tawp mai. Mami kha,nia kha kha  keimah nge Mami dang zawk? Zawhna hlir…

‘Min zawng em?” aw ka hriat rualin ka hawichhuak nghal zawk. Kawngka bulah a lo ding run tawh. A hmelpa zetah chuan dik lo eng mah a lang lo a. Nidang nen danglamna engmah a awm lo.Ngaihbel tur takngial pawh a awm lo.

‘Aw…Eng lo,ka…’ ka aw a khur zui.Ka in ngei hluah hluah. Engvanga lo nervous a lo in control thei lo em em ngawt nge maw ka nih hrep le?

A mit a tizima, ka landan atangin ka ngaihtuahna hriat a tum tih ka hria. Ka hmelah ka zam tih alan loh ka beisei takzet. A rawn luta, ka hmaa thutna awmah a thu thlaa,a bawp sei thlurh a khawkherh nghal a. A rawn luh chhung leh a thut fel thlengin amit fing lutukin min kalsan miah lo tluk a ni.

‘Enge dik lo awm?” a ti nghut.

‘Eng mah…Hetah hian i sign ka mamawha’ ka ti a. Paper ka nawr pheia. A che chuang eih lo. Ka melh zawka,chik lutuka min lo en reng avangin rang zetin ka mit ka la nghal vat.

‘Sawi la…’ a ti leh sup.

‘Kha…Sign angaia,Coupon tihfel angai dawna’

‘Mate…’ ka sawi a haider hmiah. Beidawng ru zetin ka thaw hak ringawt.

‘Ka lu a hai’  Mahruaii bula ka sawi ang bawk ka sawi leh ta ngawt.

‘Oh…Ti nge i sawi loh?” a ti nghal vut. A tho a, ka inrin hmain ka chal a rawn khawiha. Tihngaihna hre loin ka thu mar at ringawt. Ka dawhkan a rawn kal huala,ka bulah a rawn dinga,dawhkanah a in nem khalha. Min en chhuk run bawk.

‘Mi dangin min hmu ange?” ka ti sep. Pawn lam ka thleka,Lunch ei tura an kal tan tawh avangin Security pahnih bak ka hmu lo.

‘Ti nge ahmain engmah i sawi loh a?” ka sawi haiderin a ti leh hmuk. A aw pa zetah min ngaihtuahna a lang theia.

‘Ka tha reng ka tih chu…Sign lawk la…Ka kal vat loh chuan Pump Manager khan min nghaka’ ka ti a.

‘Shhh…..Theihnghilh rawh’ a ti hluk.

‘Ni lo,vawiinah kan kal angai’

‘A tawk..I hriselna aia pawimawh enge awm a?” chang zetin a ti leh hmuk. Hnial tumin ka ang ziaua,mahse ka chip leh hmak.

‘Hna zawng zawng Close la, naktukah i lo kal thei anih chuan i khawih zawm dawn nia’ thupe aw zetin a ti leh a.

‘Ka lu a hai satliah ringawt alawm..Bakah,naktuk chu ka hman loh kha…Tak takin ka tha tawh’ ka ti a. Tim daiin a kutah ka vuana. Eng mah sawi loin min en vung vung.

‘Ok…Mahse, nextah chuan zep miah suh.Anih loh chuan hna i thawh ka phal lo mai ang’ thutak zetin a ti leh nghut.

‘Naahhhh…Ka thawh loh ten’

‘Nupui hnial hrat hi chu an mawngah beng ila a zia an ti ania’ a sawi zawh rualin insum hman loin ka nui hak..A then ve suk.A rawn kun hniama,a tihtum ka hria. ‘Ni lo…’ ka sawi zawh rualin ka chalah a hmui lum thar tharin a rawn si nghal zat. A ding mar zui lehnghal daih bawk.

‘Min hnial leh vaih chuan Office luhna turah tak lianpuiin ka bialnu ini tih ka tar ngei ngei ang’

‘Maw?” ka ti that. Ka tum aiin ka au ring hret bawk nen rang lutukin ka hawikual nghal vat. Vanneihthlak takin tumah an lo la awm hnai chuang lo hlauh.

‘Dawih reuh si’ nuihza aw ka hre thei. Tihngaihn a hre loin ka ner khum nak. A nui hawk hawk thung.

Ka thil dah a signa,a che vel uluk zetin ka thlira,ka hmuh tirh kha chuan a nui thei lo emaw tih mai tur khan a hmel a thutaka. Mahse, ka hriatchian takah chuan a lo nui ve thin tho a.Nui hawk hawk leh ri hluah chi a ni lo mai zawk. A pawn lam atang ringawt chuan induhtawk leh nelawmna nei lo lutuk a ni a. A mize vawt ruih reng mai hi thenkhat tan chuan ngeiawm lamah a kal thei hial ang. Mahse, hei tak hi mi dang hneh theihna leh mi dang hip tu a ni lawi si.A pawn lam atang ngawta a mizia tur lo hmehbel chawt a chi lem lo tih ka chiang tawha.Hei hi chu amah chauh ni loin midangah pawh a ni vek. A lo awm tirh khan a Chapo an tih avangin kan huphurh deuh thum kha ania.Mahse, tun thlengin a chapo viau tak pawh ka la hre lo va. Mi be bawrh bawrh chi a ni hauh lo nangin Staff tam zawk in an ngaina ta viau lawi bawk.

A rawn hawichhuak thuta, ka lo en reng bawk si nen tihngaihna hre loin ka nui ta ngawt.

‘Achang chuan ka zak ve thei ania,a bikin nula tereuhte,hmeltha zet in min en reng hian a ni duh bika’  a mit thim raih maiah chuan min chhaih tih ka hria, min duatna chiang takin a lang thei bawk. Kei erawh ka biang a sa nghal hat hat thung. Inhmu thei ngat ila chuan ka biang a sen nasa hle ang tih ka chiang.

‘Naktuk kha ka chawlh leh angai dawna’

‘Yes Boss..Nichinah min hrilh tawh kha’ a then suk.

‘I ninawm’ ka ti hlak. A then leh suk.

‘Zanin kal i ngai angem?”

‘Ka ring..’

‘Ka u te nen tihtur kan lo nei a..Ok, ka u ka be tha leh ang’ a ti a. Min hruai a tum tih ka hria.

‘Angai lo..Ti phawt la,zanin chu tihtur vak a awm lo ang’ ka ti vat.

‘Um…I thinrim dawn loh chuan?” a ti leh a. Ka lu ka thing vat.

Office atangin Machhuani te inah ka kal tlang nghala.Chhun lamah siam ngai zawng zawng an lo siam fel titih tawha. Mahse, tihtur awm lo erawh a ni lo.Remruata a rawn kal ve a.Kan hlim ta viau,kan ri le lu a.Kan tihfo danin kan duhdan in an loh vangin kan inhnial leh phat thin bawk. Kan thin erawh a rim lem hlei lo a.

Man hlanna hi hmeichhe lam tana inhmuhkhawm ve na hun ber anih avangin tihchiam an tum lo hle chungin an chhungte an lo kal thahnem a. Man eitu lah an tam bawk.An chhungkua an hunga,an zahawm tham bawk nen,Machhuani nu in Andy-a a lo duh lo kha a awm te ka ti leh hnuhnawh. Mahse, Andy te chhungkua hi mi inngaitlawm leh nun tluang em em anni a. Ka thiannu,thawm na leh ho ve tak tan hi chuan anni tluk an awm chuang lo ka ti ve tlat.

Chawei kham hnuah thawmhnaw khung fel theih theih kan khungfel pui a, in ka thlen meuh chuan dar 11 a hnai thuak tawh.Ka Scooty tlan lohni anih avangin Remruata’n min rawn sawma.Thian man eitu anih ve avangin chawlh ala ve tho a.A awm tluan ve ta parh. Min thlah leh a,Lo lut kawi lo in a haw tlang nghal thung.

Mu chungin ka Phone ka khawiha,Zinga min rawn call bak kha Hriatpuia’n min la rawn be leh ta miah lo. A buai dawn tih a sawi lawka,kei ka buai dawn bawk nen rilru nawm loh phah nana hmantur a ni lo tih ka hria. Call ka tum thut thuta,a tlai deuh tawh avangin call loin msg ka thawn ta zawk. A seen nghala,mahse a reply miah lo..Ka nghah deuh vang vang hnuah pawh a rawn reply chuang lo.A offline nge online  ka check a,a lo la Online reng tho. Eng chu nge maw a tih ni?

Ka harh veleh phone ka ban nghal vat,ka beisei tak msg eng mah a awm lo.Msg read lo chu ni se a muhil tawh pawh a ni theia.Mahse, a seen veka,a reply lo tawp ringawta..

‘Hey, koh i va hre thei lo ve’ka dara min rawn khawih zauh pahin Hmingsanga’n a rawn ti a.

‘Sorry, min ko tih pawh ka lo hre lo alawm.Nge?” nui chungin ka ti a.

‘Boss a awm bawk si lo a,sign ngai a tam si. Engtin nge niang?” a ti a.

‘A lo thleng dawn tawh ang chu.Nghak ila’

‘A zin alawm le…’

‘Maw?” ka ti vak. Ka au ring deuh aniang kan dinna bula thu ho an rawn hawi nghal thap.

‘I hre lo mi a?” makti hmel fein a ti a. Ka lu ka thinga, tihngaihna hre loin ka nui ringawt.

‘Nimin tlaiah hmanhmawh deuhin a zin alawm..E,I kal lo tak tiraw?” a ti leh a. Ka bu nghata,thildang a sawi zawm leh mawlh mawlh chu ka ngaithla liam vel mai mai.

Roomah ka bag ka daha,ka chhuak leha. Balcony lam ka pana..Midang lo kal thut pawha hmu nghal thei turin kawngkhar lam hawiin ka dinga, Hriatpuia ka call a. Thinrim lo turin ka insum nasat angai viau.

‘Aw,Mate..’ vawi 2 ngawt ka call hnuah a rawn ti ta hram. A aw pa leh dam thlup ka hriat rualin ka hmui ka pet nghek. A zin tih min hrilh miah lo chungin engtin nge khatiang khan min koh ngam zawk ni? Pangngai turin min beisei ngam ania..Mahse, thinrim chiam hun a ni miah lo.

‘Nizanah ka msg i reply miah lo a’ ka ti deuh tawng.

‘Oh..Nia,sorry..Ka chau lutuka.Ka muhil zui daiha’ pawi ti tak tak miah lo tih hriat takin a ti a. Ka insehruh nasa zual sauh.

‘Ok,a tha lawm..I lo thleng dawn tawh em?” ka ngaihtuahna nena inmil lo leh theihtawpa pangngaiin ka ti a.

‘Khawiah?” a ti sup.

‘Officeah anih loh chuan khawiah nge ni ang?” ka ti hmak. Ka thinrimna ka ti lang teuh ngang mai.

‘Ka zin’ teh tawpa.

‘Oh…’ ka ti ve halh. Ka hre sa reng tho nangin eng mah min hrilh lo leh pawimawh lo nia ka inhriatna avangin ka chhungril a na vawng vawng.

‘Khawiah nge i zin ka zawt thei che em?” ka mit ka chhing sawk. Mahse, ka thinrim laia ka tihfo tawh angin awihawm loh khawpin ka aw a dam thlap.

‘Kolasib..’

‘Engmah i sawi lo a?” ka ti a. Ka hmui ka pet a.

‘I Phone midangin an lo pick miau chuan sawi a harsa khawp ang’ a ti hmuk.

‘Maw?” hre thiam lo zetin ka ti ha mai.

‘Nimin tlaiah ka lo call che a..’ a ti a. Sawi zawm loin a ngawi leh daih. Ka ngaihtuaha,min lo call lai ka hre lo..Ni lo,min lo call lo hrim hrim.

‘Aih, ka hre lo…Bakah,call listah pawh ka hmu lo che’

‘Midangin an pick ka tih kha. Amah bawk khan a Delete te pawh a nimahna’ chang zetin a ti leh hmuk.

‘Ni lo…ka Phone ka keng reng sia’ ka ti leh niah niah, Ka thinrim a kiang deuh duak bawk.

‘Anih chuan dawt ka sawi angah i ngai deuh tihna mi?’ a ti leha,a aw ngaihthlak a nuam lem lo viau.

‘Aih..Ka, chutiang lam ka sawi lo..’ ka ti buai nak mai. Tu nge ka phone lo pick ang ka ngaihtuaha,ka hre lo.Ka keng reng a, ka kalsan lai ka hre bawk si lo.

‘Ka buai lawka,ka dah phawt..Nakinah ka lo bia ang che’ a ti leh sup.Tlemin a aw a nem ta deuh.

‘Ok…’ ka ti a. Min chhang tawh loin a off nghal a. Tihngaihna hre lo zetin thlang lam ka hawia,ka mit ka chhing vang vang. Engti turin nge a kala,engtikah nge a lo haw dawn pawh ka zawt ta lo.Chu ai chuan tu nge ka phone lo pick ang? Hriatpuia lah khan a picktu a hre lo nge a sawi bawk si lo.

 ‘Mam, I lo lut hman em?” Angela-in kawngkaa rawn dah pahin a rawn ti a.

‘Um,hman e..Ka lo kal ang’ ka ti a. Ka beisei aiin ka aw a pangngai phian.

Officeah ka luta, mahse Pu lo lut mek ka hmuh rualin ka ding chawt. Angela-i ka en a, Pu lamah a thle baka.A nui nghal var var mai. Pu lo kal vangin min ko tih ka hre thiam nghal chiah bawk.

Pu lam ka hawia, pa lian leh inzo tak thin kha tlemin akal kun ta deuh.Kumthar hlimah in Check-up turin an kala. An lo haw tawh tih ka hre miah lo a. Ka hmuh hnuhnun ber ka ngaihtuaha, rei over ala ni lo,mahse a lang upa lehzual ta viau tih ka hmu theia. Sum an nei em a, an in enkawl nasa a. Rin ai tak chuan a bawksawp har zawk. Mahse, hna lo kal thei tur em chuan ka lo beisei miah lo.Thil ka hre chhuak lehnghal zawk. Hriatpuia awm loh vanga lo kal a ni ngei ang.

Ka Pan pheia,min hmuh veleh a nui nghal vur vur.

‘I dam maw?” min lo ti nghala.

‘Ka tha, I lo kal ka beisei lo a’ tih pahin a kut rawn pharchhuah ka vuan nghal vat.

‘In ngaihawm tawh alawm le..Bakah,in a tawm ngawt ngawt chu khawvel a zim em mai’ a ti leh a.A that lai ang tho khan ala nelawm renga,a ngainatawm dan pawh ala ngai reng.

Officeah kan inzui luta, Hriatpuia ka mitthlaah a lo lang nghal zat. Ka lu ka thing nawk,Pu hi a that hun hunah Hriatpuia hun a tawp mai dawn,helai hi chu Pu pual bik a ni tih ka hriat angai.

‘Coffee em ni ka rawn lak ang?” Angela-in a ti a.

‘Akhai, ka duhzawng chu Mami hian a hria alawm.Tiraw Mami?” nui chungin min rawn en a, ka bu nghat. Thingpui hang duh em em a ni a, a lo kal regular lai kha chuan nitin kan Office bula mi te kan siamtir thin.An no hman thin te a ti a.An tih thin dan pel in ama pual liau liauin dawr neitu ten No lian tha zet an lei phah ve tawp bawk.

Thingpui nena ka let lehin Remruata a lo awm tel ve tawha. Hriatpuia thil sawi ka hre chhuak nghal zawk. Mahse, eng nge ka zawh chuan ang?

‘Sale hi enge a an?” Pu in a lo ti a. Sale leh Booking awm mek dan ka hrilhfiaha,a bu nghut nghut.

‘Hriatpuia chu ka beisei a pha hle mai..Sale a up bakah inhnuai lam pawh a kang deuh awk in ka hria’ a ti chuar chuara. Remruata’n inhnuai lam hna kal dan a sawipui zui mawlh mawlh.

‘Naktuk lam ilo kal leh peih angem?” ka ti a.

‘Peih mai angai..A lo haw lawk hmel si loh a.Achang hi chuan a thu a duh lutuk hi a buaithlak thin’ a ti dam thluam.

‘Lo kal peih ziah la,I awm hian a nuam alawm’ ka ti a. Ka ti tak tak.

‘I chiang meuh maw? Ka lo kal ziah chuan min be tha peih meuh lo anga’ a ti a. A nui huk huk..

‘Peih lutuk tlat. I titi ngaihthlak te pawh a chakawm leh tawha’ nui chungin ka ti let ve a. Chik zetin min en a.

‘A enkawl tha meuh che maw? Ani hi chu hriatthiam a harsa ania.Mahse, fel leh rintlak em em tihah hian ka chianga’ a ti zui leh a.Eng mah sawi loin ka bu nghauh ringawt. An in kan kal dun tuma a Bialnu anga min lantir atang khan Pu hian kan inkawp angah angai hmiah tih ka hre theia..Tunah phei chuan dawt pawh a ni tawh hek lo.

Hna chungchang a en peih pawh ka rin loh laiin engkim a hmuh theih chin chu en a duh vek. A khat tawka pawimawh ti a ka chhuak zeuh anih loh chuan ka thu ta ngar ngar. Haw tura a thawhchhuah meuh chuan dar 3 a hnai thuak tawh.

‘Naktuk hi ka chawl dawna’ a muffler pek pahin ka ti a.

‘Eng chawlh tur nge?” a ti boh.

Machhuani pasal neihtur chungchang ka hrilha, a bu nghauh nghauh.Chawlh dilna ka siam sa vek tawha. Hriatpuia bulah ka hrilh tho nangin hnathawh dan kalphung ka zawm a tul tih ka hria.

‘Nizanah ka phone call pick i nei mial em?’ ka dawhkan hmaa thu Remruata hnenah satliah thei ang berin ka ti a.

‘Keiman maw? ‘ a ti hu. Ka thle bak.

‘Kan pahnih chauhin kana wm meka,tu nge ka biak anga?” ka ti hmak. Ngaihtuah muk hmel fein a chal a  dawma.Thil hrechhuak niawm takin a thaw huai.

‘Ni dawn tak,U Hriatpuia’n a lo call che a. Ka theihnghilh chiang lutuk’

‘Engtikah nge a lo call a?”

‘Toilet i awm lai khan mawle..Call back tur che in a ti chea,ka hre chhuak chiah.Mahse, in inbe tho ang chu ka tia’ a tih zawm leha,thawveng hmel zetin a nui vur vur bawk. A vawikhat nan ka ngei hlauh hluah thung.

‘Be nang,I van tiho tak..Hna pawimawh pawh a ni theia’ alangah erawh ka ti dam thlap.

‘Hey, I va thinrim hmel ve a’ a ti a. Kan inkawm rei tawh bawka,zep tum viau pawn kan Mood hi kan inhre chiang tawn lutuk.

‘Rim tho mai,a pawimawh viau theia’ ka tum aia chang lam mahin ka ti hmak.

‘Ni lo ang,ni lo ang..Nang hi,zep eng ang mah la ka hre vek’ a ti zui chiam.

‘Eng?” ka tawp leh daih.

‘I thian hi ka lo ni tak tak lo aniang, I han zep vel hi ka beng chak che ania’ a ti leh ta cheu.

‘Eng nge ka zep pawh ka hre lo e a’ ka ti nghat. Computer lam ka melh lui tlat bawk.

‘Ha,a tha alawm.Min hrilh loh kha nuam iti anih phawt te chuan.Diktak chuan ka warning chhan che chu ka thian satliah ni lo a ka ngaih vang che ania. I duh loh chuan sawitur ka nei lo,sawi hi ka hna ania. Abak chu i thu alawm’ a ti ta duah.  Ka melh zawka,A hmela lawm lohna lang chungin nur nungin min lo melh reng.

‘Chutiang lam pawh a ni lo’ sawi mai tur hre loin ka ti sap.

‘Ok,ok..Sawifiah duh suh..Zanin chu Machhuani te in lamah i riak dawn em?” a ti leh a. Tun lawka a lawm lo hmel kha chu a bo leh daih tawh.

‘Riak maithei,thawmhnaw pack leh te angai dawna.Chawei turin ka kal ang’ ka ti a. Diktak chuan vawiin pawh an in lama awmtur ka ni a. Mahse, mi hnuaia thawkah pawh Private kan nih avangin chawlh mai mai theih a ni lo.

‘Kal rual ila,nge i Scooty i keng dawn?” a ti leh a.

‘Keimahin ka kal mai ang.Zana ka awmdan tur achiang lo em mai’ ka ti a. A bu nghut.

‘Ka zuk chhuk ange, hna lah a tam si. Zohminga hi rintlak deuh se ka ti ngawt mai’ a ti zui nang nang. Zohminga hi inhnuai lam Staff zingah chuan Remruata hnuai chiaha mi a ni a. A fel viau nangin duh aiin a ngaih asam deuha, thil tihsual awm loh deuh tihsual a nei leh zauh thina. Remruata’n a ring chawt ngam lo pawh a awm viau.

Remruata chhuah veleh ka phone ka lakanga,ka call log ka hawnga,Hriatpuia min lo callna ka hmu lo. Nizan pawh khan ka hmu tawh lo hrim hrima,fiah nan ka en nawn mai zawk. A lo picktu Remruata a ni a, min hrilh theihnghilh tih a pawm ngeia,mahse engvangin nge a delete kher ang? Hriatpuia lah khan a lo pick tu a hre reng chungin a sawi duh  der si lo.Hriatpuia msg tur ka type nghala. Mahse, thawn loin ka en vang vanga.Ka delete leh ta zawk.

Machhuani te inah chawei kham atangin kan buai ta char char.Remruata a lo kal ve bawka,mahse ka be tui thlawt lo. Engvangin nge a Delete kher ang? Kan inkawp tih a hriat ruk vangin a lawm lo lutukin a lo delete nge ni ang? Chu erawh ka ring lo.

‘Hey, I Mood a off e..Ti nge?” Machhuani’n a rawn ti sa sa.

‘Off nang,enteh..Ka riak lo mai ang, zing karah ka lo phei zawk anga’ ka ti a. A nur nang.

‘Ok,a tha alawm..E,in pa chu?” chimawm zetin a nui a, ka nuih a za ve miah lo. Mahse, ka then lui sak.

‘A zina,hna thilah urgent deuh a awm a’

‘Ha..Nang hi hei vang hian ni maw i mood a lo uih vel a’ a nui zui ar ar. Chhang lo in ka ner khum nghek thung.

Ka mu meng kar mai..Sana ka en a, dar 9:30 a pel tawha,Hriatpuia call emaw msg pawh eng mah ka la dawng leh miah lo. Ka thinrim chiam kha ka inthiam lo leh tan tawha.Mahse, enge ka sawi ang? Ngaihdam dil ngawt lah ni chiahin ka hre si lo.

Ka Phone riah ka phu zawk,ka en vat a. Min rawn call tu ka hmuh rualin lawm vangin ka nui chhuak nghal hak bawk.

‘Hello’

‘I mu tawh mi?’ a rawn ti a.

‘Mu chiah,in a buai em?” ka ti let ve vat.

‘Aih, buai tawh lo e..Naktuk hi ka rawn tel ve hman dawn si lo a,Machhuani hnenah khan min lo phatsak la’ a rawn ti a.

‘Um,min zawta.Ka hrilh tawh a’

‘Fel reuh lutuk…Lawk aw’ a ti a.. Tue maw a be ri ka hriaa,enge an sawi erawh ka hre thei lo.

Door Bell a rawn ri thut,ka phu nghek..

‘Mate….’

‘Door bell a ri a..’

‘Maw? Ni lo, hawng miah suh ang che..I hria tiraw Mate,Hawng miah suh’ a rawn ti tuar.

Chapter- 12

 ‘Eng..Ti nge?” ka ti sep. A awmdan chuan min ti hamhaih veka,tihmai tur hre loin ka awm ngaiin ka awm mawl tawp bawk.

Door Bell a rawn ri leh a, ka che lo. Hlauhna in min rawn tuama,ka khur zui nghal dar dar mai. Thenzawl kan riah laia thilthleng kha…

‘Mate…’ Hriatpuia’n a rawn tih leha. A aw a dam ta deuh.

‘Aw…’ ka ti ve tawp.

‘Hawng lo la, nakin deuhah Ramsanga a lo thleng mai ang.Ka sawi i hria tiraw?” a rawn ti leh a.

‘Eng nge tunah Ramsanga’n a lo tih dawn a?” angaihna hre lo zetin ka ti a.

‘A rawn enfiah dawn che’ teh tawpa..

‘Lo kal angai lo,a tul chuan in neitu te ka call mai ang.Lo kal tir suh’

‘Inhnial hun a ni lo..’ a ti bung leh vut.

‘Enteh,thil pawimawh a awm pawh a ni theia..’ ka tih laiin min rawn tawng khalh lehnghal hmiah.

‘Ok..Ok,ka hria alawm. Mahse, ka sawi angin awm phawt rawh..’ a ti leh a. Ngenna ni loin thupek a ang mah zawk.Engmah ka hre thiam lo. Engvangin nge ka Door bell a rik vang maiin Ramsanga a lo kal ngawt ang?

‘Thil dik lo awm ang maiin i tawnga” ka ti leh talh.

‘Ni lo,nang mah chauhin i awm a. Ka ngaihtuah che a’ a ti hriam hruih.

‘Dah la,Ramsanga ka call lawk ang’ amah bawkin a ti leh a.Ka off a,che miah loin ka awm ngaiin ka awm a. Door Bell ri a awm tawh loh avangin thawm eng mah a awm lo. A reh in a reh vung vunga. Nichin khan ka hlau a,Tunah chuan ka pangngai leh thlap tawh.Thenzawl ni loin ka in luah a ni a, helaiah hian rei tak ka awm tawha.Thil dik lo leh hlauhawm a thleng ngawt lo tawp ang. Mahse,a reh leh lutuk hret chu a ni.

Ka Phone rik rualin ka phu leh vak. Ka en vata,Hriatpuia bawk..

‘Hello…’

‘Pawnah Ramsanga a awm..’ a rawn ti leh tawp.

‘Ka luhtir dawn tihna mi?” ka ti ha, Ka thuchhuak nghala.

‘Um…I tha tih ka hre duh alawm’ a ti leh nghut.

‘Naa,ka tha reng a. Eng mah that lohna ka nei lo..’ ka ti a. Min ngaihtuah tih ka hriatna erawh  chuan min ti nui var var thung.

‘Ok..I sawi dan chuan i tha ziah,hmanni pawh khan i tha miah lo chungin i that reng kha…Luhlul si..Hawnsak phawt la’ a ti leh duah a. A aw a min duatna chuan min nuihtir leh sak. He pa hi ka duh satliah lo,ka HMANGAIH hial niin ka hria..Huizz,eng hi nge HMANGAIHna ka tih chhan ngawt pawh chu  ka hre lawi si lo.

Kawngka ka hawnga,Ramsanga a lo ding a,vawt tihhmel fein a kut a lo chhem lum hauh hauh. Hriatpuia thian tamtak zinga a thiantha ber a ni a. Champhai khua bawk niin ani pawh hian sumdawnna lam bawk a buaipuia.Aizawla Sport Goods zawrhna dawr, changtlung leh lar tan mek neitu a ni a. An khaw lamah pakhat a nei bawk.

‘Lo lut la…’ ka ti a. Mi dang an awm leh awm loh ka en kual vat vat. Tu mah an awm lo.

‘A va vawt ve’ nelawm taka nui chungin a ti a. Ka nuih let ve sak.

Min rawn zui luta,chik zetin inchhung a thlek kual a. A che vel chu angaihna hre loin ka lo thlir mawl ve tawp thung.

‘Thu la,thingpui i in duh em?” ka ti leh a.

‘Pawi miah lo,kutkawr ka theihnghilh a..Aaaa,ka theihnghilh chiah pawh a ni lo. Tu emaw Order hmuh hi chuan kan thlawk lawng lawng chu anih hi a’ nui kur kur chungin a ti a. Ka then ve sak.

 ‘Lo kal kher angai lo sin le’ nuam ti vak loin ka ti a.

‘Ngai atih chuan angai animai.I hnial ziah chuan a Inah a khung bet tlat mai ang che’ a nui zui huk huk.

‘Chutiang chuan ti lo hram tehse’ nui chungin ka ti let ve a.

‘Nia,a tih ngai lo tehse’ a ti tha ve mai bawk.

Thingpui kan in duna,thil eng eng emaw a sawi a. Mak takin Hriatpuia nen an mizia a inletling thawk. Kei leh Remruata inkawm,mize in ang si lo hi ka tehkhin ber. Ramsanga atawng duh em em a,a nui deuh reng bawk. Hriatpuia erawh a nui ngai lo ni loin a nui khat a. A nelawm  tehchiam lo bawk. Mahse, an inkawmngeih satliah lo a,Best an ni. Ramsanga hi ka hmu zen zen lo nangin ka hmuh hmasak ber atangin ka ngainat tur chi a nih ka ring ve tawp.

‘Ka kal phawt ange’ a ti a,A tho nghal hluai. Ka tho ve nghal vat bawk.

‘Zan zanah kei mah vangin i buai ta hrep anih hi’ ka ti a.

‘A ho em mai..’ a ti liam puat.

‘Dik tak chuan hawng lo turin min ti bawk sia,ka mangang tep a’ ka ti leh a. A ding chuta,a rawn hawi leta.

‘Thil tamtak hi ka sawi loh tur chi a awm.Mahse, thil pakhat erawh ka sawi ang.Ka thianpa hi ka hre chiang a,eng mah hi chhan nei loin a ti mai mai ngai lo a.Zanin ka lo kal pawh hi a tul hle ang tih lo chiang ve tawp mai rawh’ ati ta duah.

‘ Ka hre thiam e,mahse i lo thlen khan tumah i hmu lo tiraw?” ka ti a.

‘Hmu lo..Mahse, lo kal hi a tha.Bakah,thil pakhat leh chiah. Ani Bialnu nih hi chuan Body guard neih a tul ve hrim hrim’ a ti a. A nui zui hawk hawk.. A fiamthu tih ka hre tho nangin a mitmeng thutak zetah chuan thil inthup awmin ka hre tlat thung. Tih lan erawh ka tilang lo thung.

Ka alarm riin min tiharha,thawhphan pawh nei loin ka thuchhuak nghal hlawl. Ka inbual sawk sawka, Ka inbual zawh veleh Machhuani te inah ka phei nghala. Anni chhungkua pawh an lo tho kim vek tawh.

‘I phone hi ka lo pick dawn mi?” ka hmai an chei mawlh mawlh laiin Machhuani’n a ti a.

‘Tu nge?”

‘Achangtupa’ nuam ti zetin a nui hawr hawr.

‘Lo pick mai rawh.Kan laklawh em hi’ ka ti a. Hlim zetin a kut raih,eng chu a hria ni maw?

‘Hey,chhuah kher angai lo..’ ka au zuia,Room kawngka bul atangin lei min rawn chhuahkhum zauh.He nu nghal zia tak hi chu a.

‘Kha le..’ ka phone min rawn pek pahin a rawn ti a.

‘Eng nge a sawi a?” ka ti a.

‘Eng vak mah’ ngeiawm zetin a nui pawt pawt.

‘A tha lawm,nakinah ka be ve mai ang’ ka ti nghauh.

‘A ngai che anih kha, thildang vak a awm lo’

‘Chu te chu chiang sa’ ka nui hak..A nui ve hawk hawka, min cheitu pawh eng mah awmze hre loin a bengngawng nuih ve ngawt bawk.

Chau zetin ka thu zawi hnak, Machhuani te Room turah kan thu a, Machhuani Cousin hmeichhe pahnih an awm ve a, Remruata a awm bawk. Mal ka intih rukna bawk in min rawn fan leha,nitin Machhuani nen kan inkawm chuang hauh lo nangin Pasal a neih dawn takah chuan a hrang ta du in ka hriaa. Ka ngai lawk a ni ber. Ka neihchhun a ni takmeuh a,ka nu la dam eng ang mah se ka tan mihrang anih tlat tawh avangin Machhuani hi ka tan a pawimawh lehzual. Remruata awm mah se mipa a ni a. Machhuani ang em em in ka pawh dan a ril thei lo. Mahse,hlimni a ni a. Ka mood lo tihlana,midang hlimna lo tihchhiat ka duh lo bur. Ka phone ka phawrha, Msg eng eng emaw a lo awm nial,ka reply hlawma. Eng mah pawimawh,hmanhmawhthlak a awm lo.Inneih inkhawm zawhah Join reception a awm leha, chawei leh nen..Kan lawi leh a,kan lawi zawh hnuah keini ho in kan ei ta chauh.

Hriatpuia ka call a, a tlang thei der lo. Ka buai dawn tih a hriaa, inkhawm kal hmaa min lo biak bak min biak ala rawn tum leh lo a ni ngei ang. Msg emaw min lo callna pawh eng mah a awm lo.

Thil tihtur tul ang ang kan tihfel vek hnuah kan hawsan ta chauh. Naktuk lam shooting neih leh ala ngaia,nizan ka mut that loh bakah vawiin ka in khengkhawng nileng lutuka,ka chau hluah hluah.

Ka mut hmain Hriatpuia ka call leha,a pick lo..Ka ti nawn leha,a pick chuang lo. Ka intifai sawk sawka, Khumah ka lawn nghal than. Khawvawt vin tuk bakah ka chau bawk nen mut ka thlahlel ngawih ngawih.

Ka harh veleh tho mai loin ka Phone ka en a, Hriatpuia call emaw Msg pawh a awm chuang lo cheu. Achhan ber sawi tur awm si loin ka thinrim deuh ngawt,mahse ka ngaihtuah a.Nizana ka call khan a hma vak tawh lo a, a muhil tawh pawh ni maithei.

Dar 11 velah Shooting kan neihna tur kan thlenga, hmundanga kal ngai loin Photographer Studioah kan ti thei hlauh. Ka thawmhnaw ka thlaka,ka thlak zawh hnuah ka hma darthlalanga ka hmel lo lang ka en a. Tunhnai ka virbuai deuh vang nge ka hre lo,ka hmai a dang deuh a.Ka mit hnuai a val kual deuh raih bawk..Mahse, Make-up chhah zet in a khuh avangin chik deuh taka en loh chuan a lang lem lo.

‘Surprise….’ Ka chhuah veleh Machhuani’n a lo ti nghal a. Awmze hre lo zetin a kawhna lam ka en a, Hriatpuia lo thu reng ka hmuh takah chuan ka thaw hak mai.

‘Nangni hi…Ti nge?” sawitur dang hre loin ka tita ngawt.

‘Surprise ka tih kha….’ Nui thaw chungin Machhuani’n a ti leh a, midang awm ve ho an nui vek bawk. Hreptak hian…Min biak miah loh avangin ka titau mek asin le.

‘Tak takin ka idea a ni miah lo ania’ nui hak hak chungin Machhuani’n a ti leh a. Ka melh vak,nghal lutukin a lei min chhuah khum zauha,kan thian dang awm ve te an nui dar dar.

Hriatpuia thutna ka pan pheia,a bulah ka thu thlaa. Chik zetin min en a,a nui ta suk. A zin na lamah enge a tiha a buai viau em ka hre lo. A hmelpa zetah chuan engmah chau hmel hmuhtur a awm tlat lo.

‘Ka thiam loh a ni miah lo ania’ rawn kun hnaih pahin a ti supa. Ka thle bak,ka sam chhawl leng ka bengah a rawn zepa,ka beng a kutzungpuiin a tuai zauh bawk.

‘Engtikah nge ilo thlen?” ka ti a.

‘Chhunah..’ a ti tawi tuk..Ka kut a rawn hum a,a pawt pheia.A Jacket ipte min zenpui nghal daih bawk.

‘Hey…Induat vel kha duhtawk ru.Kan awm ve reng hi’ Machhuani’n a ti lang lang. Ka en a, ngei zetin ka ner khum nak.Ngaipawimawh lo em em in a nui ar ar duh chauh. He nu hi chu ka hriattirh atangin a nghal em em a, ka thin a tihrim tum lah a tam,mahse ka tana tha ber leh englaimaha min kalsan ngai lo tu a ni tih ka chianga.A chungah rilru chhia leh huatna ka nei ngai lo.   

Hriatpuia Motorah keimah bakah Machhuani te nupa kan chuanga,Andy Best Sangtea Motorah kan thian dang te 3 an chuang thung.‘Khawnge kan kal dawn?” kan tlanchhuah hnuah ka ti ha. Kan kalna hi Andy te in kawng a ni tlat lo. Kan tum lawk dan kha chuan kan vaiin Andy te inah tlaichaw kan ei ang kan ti kha ania. Mahse, tunah kawng dangah kan tlan daih lawi.

‘Chaw kan ei dawn’ Machhuani’n a ti liam puat. Andy hnenah thildang a sawi zawm lehnghal barh barh.

‘Ka hria, Mahse, Andy te in kawng anih loh hi’ ka ti hlar mai.

‘Blehh,ngawireng khan chuang teh’ a ti duh lek, vawiin zet chu ka ngei hluah hluah a ni ber.

‘Surprise leh bawk a mi?” ka ti hmak. Hriatpuia ka en a, min rawn en zawka. Eng mah sawi loin a then suk.

‘Nimai..Kan thleng anga i hre nghal mai ang’ nuam ti lutuk mah mahin a ti ham ham. Chhan pawh chhang buai peih tawh loin ka thu awna,pawn lam ka thlirsan ta zawk. Ka chhan tam poh leh nuam a ti ting mai dawn tih ka hria.

 ‘Kan thleng e’ Hriatpuia’n a ti sup. Ka hawichhuak nghal vata, La Ruby Restaurant kawtah kan lo ding reng tawh.

‘Hetah hian maw kan ei dawn?” ka ti a.

‘Um..A tha em?” a ti leh nghut.

‘Tha ang..Ka hre lo,ka la kal lo a’ ka ti a.Ka dar ka tichhing ak bawk.

‘Hey,Tereuhte..Kan inneih ni a awm hman loh vanga thuphachawina anih hi’ Machhuani’n a rawn ti a.

‘Oh…’ sawitur dang hre loin ka ti halh. Hriatpuia ka en a, eng mah sawi loin a thle buka,a nui zui leh suk bawk. Vawiin chu engkim mai hian min tiphu zawk zawk mai chu anih hi maw.

Dar 7 velah kan haw a. Machhuani te kan thlah kuala,Machhuani nen Roomah eng eng emaw kan ti fel leha.Kan kawr hawh vel keima kutah an dah avangin pek dan tur vel kan sawi leh bawk.

Kan kawr hawh ka dah that mawlh mawlh laiin ‘Mam,a nuam em?” a rawn ti thut. Angaihna hre loin ka thlek ha mai.

‘Eng chu maw?” ka ti liam puat.

‘I vanneih zia hi mawle,hlim em em la ka duh’ a ti leh a. Ka en a, thutak zetin min lo en reng.

‘Eng? Ka hlim lo ami?” ka nui a.Mahse, a in la thutak tlat.

‘Hriatpuia inei hi mawle..Hetiang khawpa Hmangaihtu che hi chhuah miah suh’

‘Aaahhh….’ Ka ti halh ringawt.

‘A Hmangaih che.. a ti leh tawng. Ka thle bak.

‘Ka hre lo..’ ka ti sep.

‘Keiman ka hria alawm.A hmangaih lo che anih pawhin a atchilh tal che.Min ring rawh’ mahni inringtawk zetin a ti leh a.

‘I confi sia maw..’ ka ti a.Ka nui lui hak.

‘Nang pawn i duh alawm,haider miah suh.Chuan,inneih a sawi chuan Yes nghal ang che. I mal lutuk’ a ti leh a. Ka thil tihlai ka chawl a,ka chhungrilah Machhuani pasal neihni ang bawk khan mal ka intihna in min fan leh rawih rawih.

‘Ka hria alawm.Mahse, ala rei lo lutuka,ka la hre chiang lo a’ ka ti sap.

‘Kei chu a en danah che hian ka hmu thei vek asin. Ka tan chuan thian mai pawh ni loin ka unaunu ini a. I hria alawm,I hlim ka duh lutuka.I mal ka tihchhan chu pasal ka nei tawha,a hma ang reng khan kan la awm dawn tho nangin tlema danglam a awm dawna.. Tu emaw rintlak tak nei la ka duh.Ani hi a rintlak em em ang tih ka chiang,a damchhung chuan a kalsan miah lo ang che.Chuan maw,nang mi tha lutuk hian hetianga Hmangaih hi i phu ve reng ka ti a’ a ti leh duah. A sawi dan chuan min fana,ka mittui a rawn hnaia. Khap kir tumin ka khap lui sak sak bawk.

Min rawn kuaha,’Tikhan awm lo teh’ a ti sapa. Mahse, amah zawk pawh a insut ve ta tho.

‘I tha em?” kan tlanchhuah hnuah Hriatpuia’n min ti a. Ka kut a rawn vuan a,a lakanga,a fawp zauh.

‘Um..Tha..’

‘I cry a….’ a ti leh sup.

‘Aih..Aw,nia..Eng lo..’ a lo nui ka hmuh takah chuan ka ti nawi nak.

‘Min ring em?”

‘Engti zawngin?”

‘Eng zawng pawhin..’

‘Ka hre lo’

Kawngsirah Motor a tidinga, ka kut pahnih a vuana. A mitah tak ka en a, a hmel tihhar leh induhtawk zet thin kha ni loin a lang dam thlup.

‘Min ring la ka duh,engzawng pawhin..’nghet churhin a ti a. Ka chhang mai dawna,ka aw a richhuak zo lo.Ka bu ta nghat. Min pawt hnaia,a awmah ka hmai ka phum nghal kak. Ka biangah a kut zungpuiin a rawn tuaia,ka chhip samah a fawp zui nghal vang vang bawk.

Machhuani te inneih atangin thla a liam leh tawh. Hna a kal ngaiin a kal mawp mawpa,engemaw changa han buai phat nei thin mah ila chinfel theih loh khawpa harsa a ni ngai lo. Hriatpuia nen kan inzui rei tawlh tawlha,a rintlak zia ka hmu tam tial tial bawk.

Saturday tlai Office ban hnuah mamawh ka neih nual avangin Vishalah ka bazara.Hriatpuia erawh mi hmuhtur pawimawh a neih avangin dar khat velah Office a chhuahsana,ka chhuah dawn thlengin a lo let ta lo.Ka beisei loh zetin Ramsanga nen kan inhmu hlawl.

‘Kan va inhmu khat ve’ a rawn ti a. Nidang ang bawkin a hmel a nelawm leh sarh tawh.

‘Nia,I vang em a’ ka ti let ve a.

‘Min hmu chak vak dawn lo a,chuvangin ka vang mai mai anih kha. Tu emaw chu a vang lo tawp ang’ a ti leh a.A nui huk huka,ka nui ve hak bawk.

‘I sual sia maw..Enge itih a?’ ka ti leta.

‘Ka thianpa dawrah ka kal zuaia. Scooty i keng ami? Ken loh chuan Motor ka keng a.Ka lo drop dawn che mi?” a ti a.

‘Aw, keng e..Ka lawm’ ka ti a. Ka Scooty dahna lamah ka thle zauh.

‘A hrim hrimin khawnge a awm a?” a ti leh a. A hming sawi lo mah se tu nge a sawi ka hria.

‘Ka hre nang’ ka nui a.

‘Lutuk che hian..A ven that viau loh che chuan ka ruksak daih ang. Ka la hrilh ang’ a ti leh a. A nui huk huk.

‘I hlau lo mi?’ ka ti let ve a.

‘Hlau lutuk,a sual si..Tak takin ka uang anih kha,Ka kalsan dawn che’ a ti a. Ka bu nghauh.

Ka tlanchhuak tur chiahin Vishal Opposite a dawr thar,Dominos Pizza Dawr atanga Hriatpuia leh Rosy rawn inzui chhuak chiah ka va hmu a. Scooty ka off lehnghal hmak. Min hmuh hlauin ka helmet ka pawt hniama,theihnghilh nei niawm takin ka chhuka.Lehlam ka hawi nghal daih bawk. Ka thluak a vir zawk,ka phone ka phawrh a,ngaihtuah buai miah lo in ka call nghal pawp.

‘Mate..Ka buai lawka.Ka rawn call back ang che’ a rawn ti sup. Hrep tak hian..Eng mah sawi loin ka off nghal hmak. Ka khur nasa lutuk tihreh nan thawk ka la nghek bawk.

Ka hawileta, Bike a an tlanchhuak tur ka va hmu hman leh chiah. Ka awmdan a dik lo,thinrimna leh natna in min fan nghal rawih rawih thei. Mi pawimawh hmuhtur a neih chu Rosy maw lo ni?? Min be hman lo khawpin a buai zui bawka!!

Chapter- 13

Ka mu meng kar, ka mutna a rei tawh lutuk.Mahse, ka mut a chhuak eih lo,muthilh pawh ka tumbuai peih rih lo law law zawk.Diktak chuan engmah ka ngaihtuah tak tak thei lo. Ka phone ka lakanga,dar 11 a pel tawh. Tun thlengin min la rawn call ta lo cheu. Nia, min rawn call lo tawp ang.A buai em atin nih kha..Hreptak hian a…Dawt min hrilh loin Rosy nen an chhuak dawn tih sawi mai se a nunhlui ami anih avangin ka na lo zawk ang. Mahse, dawt a sawi kher khan nunhlui ni loin tuna thleng mek angin min ngaihtir lo thei lo.Ka mit ka chhin apiang lahin Rosy nen an tlanchhuak tur ka hmu nghal zat zel bawk.

‘Hey, kawngkhar lo hawng teh’ Thawveng zetin Remruata’n a rawn ti a. Ka ner nak,ka mood atang hi chuan inleng neih ka mamawh hlawl lo. Nizan ka mu tha bawk si lo nen ka mit a kham thuma,ka lu a na bur bawk.

‘A va han nuam lo chep chuap tak..’ rawn luh pahin a ti bai bai. Khua a duaia,a uap deuh churh lawi bawk si nen,vawiin zet chu a nuam lo famkim ti ila a dik ber ang.

‘Khawnge i kala?” ka ti satliah.

‘Ka rawn kal’

‘I inkhawm ve ngei tihna mi?” ka ti leha. A jacket hak a phelha.Sofaah a thehthla a,amah pawh a thu thla nghal bawk.

‘Inkhawm nang..Nang hi,tinge ila insiam miah loha?” ka thawmhnaw hak en chungin a ti a. A sawi awmzia ka man lo.

‘Enge insiam ngai?”

‘Hmeli le(h)..Damlo kan turin kan kal dawn maw ka tia’ nur nung chungin a ti a. Ka hre chhuak chiah. Kan thawhpui zinga Pakhat,rannung seh vangin a damlo a,a tha vak lo an ti a. Sundaya tlawh turin Remruata nen kan ti tak. Hriatpuia vangin ka mood a fuh lo kual vel lutuka,ka mangnghilh chiang lutuk.

‘Ekhai,ka theihnghilh’ ka ti nghal halh mai.

‘Hahthlak thei, insiam rawh..A tlai mai dawn asin,in kan hun chhunga luh angaia’ a ti a.

‘Inbual hmasak te te ka duh,aaa…Hmanhmawh lo law law mai ang’ tlawn pah deuhin ka ti a.

‘Tlaiah tihtur ka nei asin le..Uh,pawi lo mai. Chhun lam intlawh hun hi a lai lutuka,tlaiah law law kal turin muangchangin insiam mai rawh’ a tita duah.

‘A tha ang chu chu,ka inbual dawn.I duh duh lo timai rawh’ ka ti a.

‘Ka lo inkhel ang.Eeee,eitur enge i neih ?” a ti leh rih.

‘A awm nual ang,ka inbual zawhah kan siam dawn nia’

‘Um..Mahse,nang hi…I tha em?” chik zetin min en a.

‘Tha..’

‘Dawheh..’

‘Enge? Khawilai nge tha lo a?” ka ban ka phar a. Ka nui lui sang bawk.

‘I tha lo ka tih chuan itha lo nimai,khawilai nge pawh ka hre chuang nang’

‘Nizanah ka muhil thei lo,ka tlaiver tep’

‘Awww,chu ngei chu nih chu.I hmel a chawhnu lutuk’ ngei zetin ka melh a,a nui huk huk thung.

Ka inbuala,ka inbual zawh hnuah  eitur ka siam a,luh theih hun dar 3 daih anih avangin muangchangin kan ei zawh hnuah ka insiam ta chauh.

‘Khawi laiah nge an awm le?” Damdawiin kan thlen hnuah ka ti a.

‘Ka hre mai lo,call la..’ a ti a, Ka bag ka zena.Ka phone a awm lo,ka kekawr ipte ka zen leha,a awmchuang lo.

‘Ka Phone ka keng lo’

‘Haihawt thei,pawimawh pawh a awm thut thei asin’ a ti hluk.

‘Ka thlauh zawk nge niang le?” ka ti leh rih.Mahse, ka kenchhuah awm ka hre miah lo thung.

‘Ka’n call chhin ang.I keng pawn ka hre lo’ a ti a. A phone a phawrha,a call a. .Min rawn en a.

‘A ring reng,inah aniang..Hlauthawng lo phawt teh’ a ti a. Ka bu nghat. Kan thawhpuipa a call leha,Midangin an lo picka,ICUah a lo awm tawha. A tha lo satliah ni loin a tha lo viau tih achiang.

Kan awm ta deuh reng,kan thawhpui dangte an lo awm ve nuala,an chhungte an lo in ko khawm deuh bawk nen kan thanhnem phian..Dar 5 velah tihtheih vak a awm chuan loh avangin kan haw san ta chauh.

‘I lo chawl dawn em?” ka ti a.

‘Aih,zanah tihtur ka neia.Ka tlang mai ang. Bakah,kan damlo kha a tha lo hmel riaua,inrin reng a tul dawn tlat’ a ti a.

‘Nia, ka rin aiin a tha lo..’

‘Vawiin angah te chuan u Hriatpuia pawh lo kal ve tur ania,A hre reng reng em?” a ti leha.

‘Ka hre lo,hria ang..’

‘In inhau ami?” a ti leh a.Ka lu ka thing vat. A nui a,ka nui ve tawp. Ka hmelah eng mah a lan loh hram ka beisei viau.

Inchhung ka luh veleh ka phone ka zawng nghala, khumah ka lo kalsan chu niin..Ka lakang chiah tihin  Door bell a ri ve chiah bawk. Remruata a lo let leh si a ni ngei ang.

Kawngkhar ka hawnga,mahse ka rin loh lutukin Hriatpuia a lo ding run. A hmel nelawm lo zetah chuan kei mah ang bawkin a mood a fuh bik chiam lo a ang.Eng mah sawi loin min rawn kalpela,a perfume rimin ka hnar a rawn verh nghal zak.

Kawngkhar ka khara, ka inher a.Mahse, ka hnunga a lo ding reng ka hmuh rualin ka tim nghal chawih.

‘Thu la..’ ka ti sap.

‘Khawiah nge i Phone?” ka sawi hre lo ang maiin a ti hmuk.

‘Hei…’ ka lek kang zauh.

‘Engvangin nge i pick si loh a?” a ti hriam leh hruih. Ka sa nghal zak thung,a duh hun hunah min bia anga,keiin chhiahhlawh tha tak ang maiin ka lo pick zat zat anga. Ka biak duh ve hunah chuan chhuanlam a nei fo thung anga..Hnai lo mai.

‘Ka hman lo a…’ ngaipawimawh lo thei ang ber in ka ti a. Ka aw a ngeiawm zia kei pawn ka hre thei hial bawk.

‘I hman lo maw?” a aw ring lo mah se nekluih chiam chi a ni lo tih ka hre chiang lutuk.Mahse, eng nge ni vak chuang?

‘Aw, hman lo..’ ka ti liam leh puat. Kalsawn tumin ka pena,mahse ka banrekah a rawn mana.A hmer na lam hret bawk.

‘Khawiah nge i kal?” a ti chang fuk.

‘Ka duh duh naah…Min thlah teh’ ka ti hlak. Ka banrek a vawnna phelsak tumin ka kut leh lamin ka zuk vuana,mahse ka banrek lehlamah a rawn vuan leh a. Hnehsawh lutukin a hmer kawp zui nghal zat bawk.

‘Enge a? I hmer na ania’ ka ti leh that.

‘Khawiah nge i kal?” a ti leh hmuk.

‘Ka duh duh naah ka kal ka tih kha,nge ka kal thei lo tihna mi?’ ka ban rek a hmer nat zual sauh avangin ka ner nawk. Ka ruh hmer tliah vek a tum zawk nge mawni?

‘I duh duh naah i kal thei lo..A chiang em?”

‘Ka thei…A na ania’ ka ti nawn leh that.

‘I thei lo,ka thu lo chuan i thei lo’

‘Mi tenawm..’

‘Oh, ka tenawm maw?” a ti nghut. A hmelpa zet leh ngeng ngulh maiah chuan pawisak a nei tlem tawh viau tih hrilh nawn ngai loin ka hmu thei.Nawr lutuk loh a him zawk ang tih pawh ka hria.

‘Min thlah rawh’

‘Tehreng mai’

Min thlah a,mahse ka inrin hmain min pawt hnai thuta,min pawm kang zui nawlh.Ka rak thawt thung.

‘Min dahthla nghal rawh,zak lo lutuk mai’ ka ti vak. Engahmah a ngai lo. Sofaah a thu thlaa,min thlah dul zawk chhung remchangah lain ka tal nghal phat,mahse hneh zetin ka kawngah a rawn mana.A malchungah min pawtthu lehnghal hmiah. Talchhuah tumin ka tal nghal laih laiha,mahse min kuahna a nghet ting mai thung. A samah tham ka tuma,ka tum hre lawk niawm takin a thle sawn zela,ka man fuh hleithei lo..

‘Nasa reuh lutuk,awm mai mai teh’ a ti hluk.

‘Misual…Tenawm’ ka aw a khura,ka duh ang pawh ka sawi tha hleithei lo.

Ka tal peih lo thlengin min kuahbet ta tlat. Ka ban ka vai kual tur lah min kuah bet tlat avangin ka duh angin ka vai kual thei hek lo.

‘Sawi rawh le…’ a ti nghut.

‘Eng…Eng maw ka sawi anga?” ka ti vak.

‘Shhh….Ka beng a ngawng lo ania’

‘A ngawng aniang,ka sawi eng mah i hre thei lo’ ka ti leh that.

‘Ka hriat duh tak i sawi lo aniang…’ a ti leh vut.

‘Enge i hriat duh?’

‘I thinrim chhan sawi phawt teh’

‘Ka thinrim lo,engvangin nge ka thinrim ngawt ang?” ka ti leh chiam.

‘Dawtsawi i thiam lo tih i hria em?” a ti leh daih. Nichin lawka hlauhawm em em Mipa kha a ni leh tawh lo emaw tihmai turin a Mood a inthlakdanglam leh vek tawh.

‘I hmeltha zetah hian dawt i sawi chuan alang vek zel ania’ amah bawkin a ti leh a, Sawi maitur ka hre lo.

‘Sawi la…’ a thle buk.

‘Min kalsawn tir phawt rawh’

‘Aaaah,ni lo e..I sawi duh loh leh tihian kan muhil mai ang chu’ a ti duh lek. Beidawng zetin ka thaw halh thung. A mitmeiin sawi turin min ti leh a, ka hmui ka pet nghek..Sawi mai loh chu duhthlan tur a awm lo. Anih loh chuan a sawi ang khan a ti duh tak tak ang tih ka chiang.

‘Niminah tinge dawt min hrilh?” ka tita nge nge.

‘Dawt…’ a ti nawn ve sup.

‘Aw…Dawt,Mi pawimawh kha ka hmu.A lo pawimawh em anih kha,ka phone pawh i pick lo a,ka hmu che kha pawh kha,I bulah kha Ramhuainu kha a awm vangin i pick thei lo..’ a tawp lamah ka au a ni ber.

‘Shhh…Hahdam rawh..’ a ti sup.

‘Ka hahdam ang maw? Kei ni ila engtin nge itih ang? Ni lo,ka hria..Eng mah iti lo ang.Ka pawimawh lo…Ka….’ Ka tawng zawm tur a hmuiin a rawn khar hmiah,a chet dan tehthut chuan min ti hamhaih lutuka,tih mai tur hre loin ka thu khawng lah..Mahse, rei a ni lo,ka harhchhuah rualin ka tal nghal phat..Min tilui bik lo…Mahse, kalsawn ka tum erawh min kuahbet tlat.

‘Ka sawifiah thei…’ a ti sup.A awah ngenna ri a hriat tel theih!!

‘Dawt sawifiah tur chuan dawt dang animai’ ka ti hmak.

‘Aih, ni lo..Mahse, rilru fima i ngaihthlak theih hun ka nghak ang’ a ti leh a. Ka thaw hak mai.He Mihring hian min hre chiang lutuk mah mah tawh,ka thinrim te,pawisak nei miah lo khawpa ka ngaihtuahna fim lo te pawh ka sawi kher ngai loin ka awmdanah a hre thiam vek tawh.

‘Engtin nge thudik min hrilh tih ka hriat chuan ang?’ ka ti zuai raih.

‘Ka nun pumah hian thudik chauh hrilh tur thlang dawn ila nangmah hi ini ang’ a ti sup.

‘Anih si chuan ti nge…?” ka sawi laklawh laiin ka hmuiah a kut zungtang a rawn ti si a. Ka ngawi ve mai bawk.

‘Nimin khan eng dawt mah ka hrilh lo che, ka u te nupa nen sumdawnna lam thilah mi kan hmu a,chumi hnuah Bawngkawnah thildang pawimawh sawipui turin ka kal leha.Tah chuan Rosy kha ka hmu a. Min rawn call lai khan Rosy pa Stroke a a tluk avangin hmanhmawha kal angaia…Ka sawi awmzia chu Rosy khan a Car a siamtir a..Khatiang thilah chuan nghak turin ka ti ngawt thei lo a…Mahse, lo ti ila a tha zawk dawn anih hi’ a ti zui sup. Awih tur nge awih loh tur hre loin ka mit ka khap sak saka,ka nem lehnghal ngawt chuan nakin zelah min la zuam mai mai thei.Bakah,hlau lutuk nih ka duh lo.

‘Fiah turin ka call angai anih chuan ka call ang’ a ti leh sup. Ka mit ka khap sak saka, chutianga tih kher tul ka ti lo..

‘Nizanah pawh min be lo a…’ ka tita zawk,ka chhungril nem tan mek hliah nan ka ti chang fak.

‘Sorry,nizan khan ka u te in lamah dar 10 vel thleng ka buai zui leha..I mut tawh ka rin vangin ka rawn be ta lo che a. Vawiinah lo kal ka tum tho vangin ka rawn be hmasa duh lo che a. Diktak chuan Surprise na tur che ka neia’ a ti dam thlup. Engthilah nge min Surprise a tum ka hre lo.

‘Eng Surprise mah ka duh lo,ka chau tawh’ luhlul zetin ka ti hlak.

‘I hmelthat zia hi i hria em?” a ti leh daih,a mit thim raihin chik zetin min en a.Kan inhnaih bawk si nen ka hmai a sa nghal hat hat thung. Sawi mai tur hre loin ka chil ka lem a,a mitah ka en rei ngam lo.

‘Min ngaidam tawh la…’ a ti leh sup..Ka huaisenna sawmkhawmin ka en a, a hmelpa leh mi hip zetah chuan inthiam lohna niawm tak alanga,a mitmeng thim raih maiah chuan ngenna alang chiang em em bawk. Nizan leh vawiina ka natna zawng zawng kha lak ang huai in a bo leh duak tawh..Ni e,ka duh em atin ni….

‘Rosy nen ka hmuh dun leh che u chuan…’ sawi zo loin ka ngawi leh daih..

‘Remruata nen ka hriat loha in chhuak dun leh anih chuan…’ ani pawn a sawi zo duh bik lo. Kan chhuak dun tih a hria tih ka hre chiah,engtin nge a hriat erawh zawh ka tum lo.

‘Remruata te chu a…’ ka ti nghat.

‘Ka duh lo…’ a ti hmuk.

‘Kei pawn Rosy ka duh bik lo’

‘Min nei tawh mai teh’ a ti leh daih..Ka sam chhawlleng ka bengah a rawn zepa,dimtein ka beng a tuai zui hauh hauh..A hmel en ngam loin a awm zawn ka en daih thung.

‘Vawiin ang khan awm tawh lo la,min ti mangang a’ a ti leh sup.

‘Damdawiinah kan kala,phone ka keng lo a’

‘In kal tih ka hria alawm..Chuan,min neih hi atul..I awmna apiang ka hre duha,enge i tih ka hre duha. Tu nen nge inchhuah pawh ka hre duh vek’ a ti leh duah.

‘Chutiang khawpa min veng dawn anih chuan ka nei duh lo che’

‘Shhh….Min neih hma chuan ka tibuai dawn tho che tih theihnghilh miah suh’ a ti leh sup. Min kuah hnaia,hnial loin a darah ka hmai ka phum nghal kak mai.

‘Kal ang le..’ a ti leh thut.

‘Khawiah maw? Tunah chuan a tlai tawh si’

‘Surprise ka tih kha…’ a mit a siai zauh. A malchung atangin ka chhuka,a rawn dingchhuak ve nghal bawk.

‘I ril atam tawh em?” kan tlanchhuah hnuah a ti a.

‘Aih…’ ka sawi zawh rualin ka pum a ri nghal raih raih. A hriat hlau lutukin ka pum ka dawm a,ka melh nghal vat bawk. Mahse, a lo nui ka hmuh takah chuan ka nui ve ta ngawt.

‘Dawtsawi i thiam lo ka tih kha…’ a ti dam thlup.

‘Khawiah nge kan kal dawn?”

‘Kan thlen hunah i hre mai ang.A rei lo ang’ a ti awlsam mai.Ka zawtchhuak dawn chuang lo tih ka hriaa,ngawirengin kan tlanpelh lam thlirin ka thu ta zawk.

‘Chhuk ila…’ a tih riah ka hawichhuak vat. A in kawtah kan lo awm reng tawh.

‘Hetah maw?” ka ti ha mai.

‘Yeap…Mi tu emawin a nghak che a’

‘Maw?” ka hriat loh vanga zawt ka ni lo.

‘Kal ila..Inngah rei tir lutuk chuan a fuh lo ang’ a ti a. Hnial ka tum zuaua,mahse ka bu ta zawk. Tu nge min nghak ang? Ngaihtuah dan ka thiam hlawl lo.

Kawngka a hawnga, inchhung a eng iar mai. Ka hawikuala,nidang ang bawkin tu mah an awm lo. Mahse, thawm a rawn awm a. Thawm awmna lam ka hawi nghal vat.Ka beisei loh lutuk ka hmuh takah chuan ka thaw nghal halh mai.Nu upa lam a ni a, a te chhe lo viau..A hmel a zahawm bakah a hmeltha hle bawk.

‘Mambawih,in lo thleng maw?” a rawn ti nghal a. Hriatpuia en loin keimah min en thung.A mitmeng lian leh zahawm zet bakah,a hmui bawr velah chuan hai rual lohin Hriatpuia nu a ni ang tih ka ringthiam nghal tawp. Hriatpuia a rawn kun hnaia,’Surprise’ a ti supa. Kan hma ading  lam a hawi lehnghal daih.

‘Aw..Kan lo thleng e’ a ti zui zat.

‘Mami chu em ni?” a ti leha. Ka hming a lo hria anih chu!!

‘Aw…Mami,hei hi ka nu anih hi.Nizanah alo thlenga’ a ti dam leh thlup..A nu anih ka ring sat ho nangin ka hamhaih lutuka,enge ka sawi ang ka hre thiam lo. A rawn kal hnaia,a kut a rawn pharchhuaka.Ka vuan vat.

Nu ngainatawm em em a ni tih rei pawh a bula ka awm hmain ka rin hriat thei ruak mai. A mizia ka hre sual anih pawhin ka hre sual tam in ka ring hek lo.Min ti hluak si loin min ti tlangnel thiam ka ti mai.Ka rilru a ngam sarh thei tlat. A fapa bialnu ka ni tih a hriaa,mahse chutiang lam hawi engmah min sawipui lo a,han inlawm emaw that chhuah chiam a awm pawh a ni chuang si lo, mahse mi pawimawh tak angin min lantir tlat lawi…Chaw ka ei nghala,engkim ruahman lawk vek a ni tih achiang..Hriatpuia nu tawng siam siam chu ka en a,engtin nge hetiang nu hian fanu vawt raih reng mai a hrin theih zawk ni? Mahse Hriatpuia pawh a mizia a nelawm chuang lo a,a nu lamah ni loin apa lamah an kal zawk a ni ngei ang.

‘Awm rei deuh la chuan ka nu khan Mo neih a duh thu a hrilh che ka ring’ ka In lam pana kan tlan laiin a ti a. A nui zui hawk..

‘Min hrilh lawk tur che ania’ ka ti nghauh,ka titau chak thut.

‘Ha,hrilh lawk che ila i kal duh nang..’

‘Engvangin maw? Hre lawk ila chuan khatiang lutuk khan ka hawibo lo tur ania’ ka ti leh hlak.

‘Nang tereuh hian min ti thinrim tih hria la,khatianga tih kha i phu ve hrim hrim’ a nui leh suka,Mahse a hmel tak ngul maiah chuan a nuih a za tak tak lo tih alang reng.

‘Ka thinrim daih zawk…’ ka ti hlak.

‘Ka hria,mahse nidangah chuan min runluih nan Mipa dang hmang miah suh.Anih loh chuan…’ a ngawi leh daih.

‘I that dawn tihna mi?”  ka nui hak…

‘Maithei…Ka ta hi tuman an khawih ka phal lo ka tih kha’ a ti vawt ruih,ka melh zawka.Min en loin hmalam a en ngur thung. Ka hriatthiam chiah loh thilin min rawn fan a, Office Balcony a phone atanga tu emaw a vau lai kha ka hre chhuak nghal vang vang bawk.

Motor a ti ding a,ka hawichhuak vat. Kan dinna piah deuhah mi an lo dingkhawm laih ka va hmu a, Motor dang kan hmaah ding an awm ve bawk. A dakchhuaka,min rawn en a.

‘Accident anih hmel,ka va enchiang ange’ a ti a. Ka bu nghat.

A chhuk hnu lawkah a phone a rawn ri a,a kalsan tih ka hre lo..Ka lakanga,a rawn calltu ka en a. Ramsanga a lo ni a. Pawn lam ka thleka,Hriatpuia ka hmu mai lo..Amah ka hre tho bawka,a pawimawh takin ka pick ta zawk.

‘Boss,hman zana mi kha kan ring dik..Mami inbula mi kan nau khan a lo hmu thawi hlauha,mahse kan dahtha e…’ a rawn ti nghal mawlh mawlh..Kei erawh ka thu khawng nghal lah mai…

Chapter- 14

Eng thil nge rin dik tur awm? Ka inbulah an eng nau nge awm ang? Kei nen inzawmna enge a neih?  Zawhna hlir….

‘Hey, Dude…I ngaithla em?” a rawn ti leh lawng lawng thawmah ka harhchhuak zawk a,mahse ka muhil miah lo tih ka chiang. ‘Boss…I hre thei em?” a rawn ti nawn leha, eng mah sawi loin ka off ta hmak.

Hriatpuia’n a hma khan ‘Mami’ tih a sawi tawha,abiak mek hnenah khan khawih lo turin a vau bawka.Kha ‘Mami’ kha ka ni tihna a ni tak tak em? Mahse, eng nge kei nen inzawmna tur awm ang? Mi awh ngawih ngawihtur Rohlu ka nei loa,ka neihchhun chu ka nitin hna hi a ni deuh mai.. Chu lah nikhat thilthu a tawp mai thei reng a ni. Ka chhungte vang ti dawn ila chhungte pawh ka nei lo tluk a ni a,ka pa thihsan tak in lah kha ka hming ni loin ka nu hming a ni a.Tunah phei chuan ka tan hriat loh chenna In a ni tawh zawk.Ka thawhpuite zingah hmelma ka neih ka hre lo a,ka hriat loh laia an rilru tihnat sak ka nei anih chuan thuhran..Mahse, ka thawhpuite nen buaina nei pawh ni ila engvangin nge Hriatpuia leh Ramsanga hian an lo ngaihven ve ang?

Motor kawngkhar inhawng thawmah ka hawichhuak vat,Hriatpuia a rawn thu luta, ‘Bike leh Car an insu a,Bike achuang te saw an na deuha’ a ti a. Ka bu liam satliah ringawt. Tun lawka Ramsanga thilsawi bak khan ka rilru a luah lo.Hriatpuia hi zawt ila min hrilh angem? Mahse,zawt dawn pawh ni ila eng tin nge ka zawh ang?

Reivak lo kan din leh hnuah kan tlan thei ta hram..Ka ngaihtuahna buai nuai nuai tihfim tumin pawn lam ka thlir a,thli thawin ka sam a chhem leng dar dar bawk.

‘Eng nge?” a ti dut,ka en vat. Mahse, min en loin hma lam a en thung.

‘Eng maw?”

‘I ngawi reng a’

‘Sawitur avang e’ ka nui lui hak…

‘Ka nu khan a awmchhungin hmuh leh che a duh ka ringa’

‘Um…’ ka ti ringawt.

‘I lo lut dawn em?” ka Inluah bulah kan dinga. Kan dinna bul kawnga Inkhawm bang kal dal dal ka thlir dauh dauh bawk.

‘Lo lut lo ila i thin a rim angem?” min zawt let sup.

‘Aih’ ka chhang rang lam hret.

‘Lawk, min ngai lo nge dik lo a awm zawk?” a ti leh nghut. Ka melh zawka,chik zetin min lo en reng tawh.Ka hawisawn lehnghal vat, ka rilru abuai em em tih hi hmuhtir kher ka duh lo.

‘Diktak chuan…Ih,ka chau deuha..’ ka tita ngawt.

‘Um,anih chuan lo lut lo ila atha anih chu’ a ti sup.

‘Naktukah kan inhmu dawn nia..Mangtha’ ka ti a. Ka nui lui sak bawk.

‘Mangtha…’ a ti dam thlup..

Ka chhuka, a tlan hun nghakin ka ding leh rih. A rawn daka,’ Kal rawh,ka lo thlir ang che’ a nui suk.

‘Aih, kal zawk la…’

‘Mate…’

‘Ok..Ka kal,mangtha’ ka ti nawn leha,min chhang loin a bu nghut. Ka inher a,Stepa chhuk thlak ka tum a,mahse ka ngaihtuahnaah thildang a lo lang leh zawk. Ka dinga ,ka hawilet leh rih…

‘Nichin khan Ramsanga’n a lo calla,ka lo picka..Mahse,a sawi ka hre thei lo a’ ka theihtawpa pangngaiin ka ti a.

‘Ok..Nakinah ka call back mai ang…Kal la’ a thle buk. Call ka lo pick tih sawi lo mah ila Ramsanga khan a call nawn leh anih chuan a zawt anga, ka lo pick tih Hriatpuia’n a hre dawn tho tho. Eng mah hre lo anga insawi mai kha a finthlak zawk daih..Mahse, eng thil nge ni ang? Ka thaw halha, he thil inthup,kei mah nena inzawmna nei anga lang si hi ka zawnchhuah ngei ngei angai..

‘Good Morning’ min hmuh veleh Angela-in a lo ti a. Ka chhang let ve sap. Eng eng emaw a sawi zui leh siam siama,ka ngaihtuah naah erawh thildang a awm daih thung. Naute kha engtin nge an tihtak ang? An titla anih loh chuan chinfel thut ngaihna a awm miah lo.

Ka thutna ka pana, nizan leh zan hmasa ka mut mumal loh lutuk vangin ka rit luka,ka mit a thial urh bawk.Chairah ka thu thla hnak,hnung lam ka nghenga,ka mit kham lutuk tihreh tumin ka mit ka chhing vang vang bawk.

‘Hey…’

Ka hawichhuak vat,Remruata rawn lut mek ka hmu nghal chiah bawk. Ka thut dan siam tha chuang loin ka Chair ka ti hera,ka mit ka chhing leh rih.

‘I va nawm loh hmel ve’ a tia, Muangchangin ka mengchhuaka. Chhang loin ka thle baka,ka lu ka kawk zauh bawk.

‘I mit vang a ni lo maw? Lu na hi i sawi ve ta deuh reng mai’ a ti a.

‘Ka hre lo,nimaithei’ ka ti zuai raih.Ani bulah hi chuan ka nihna lo anga lan a tul lem lo tih ka hria.

‘Angela-i ka hmu a…’ ka thilsawi vangin a hmelah danglam a awm leh awm loh chik zetin ka en a, eng mah ngaihbel tur takngial pawh a awm lo.

‘Kei pawh ka rawn hmu a’ a ti liam puat.

‘Enteh,diktak chuan…’

‘I sawi tum ka hria,a rai lo…’ ka thu mar nghal zawk.

‘Maw?” midang hriat hlau bawk siin ka ti a.

‘A rai lo,a hre sual..A tha em?’ a ti leh hluk.  Mak ti zetin ka melh vak,ani erawh chuan ngaipawimawh lo leh tifuh inti hmel zetin a dar a tisang zauh thung. Khati khawpa mangang khan eng tin nge a hriatsual theih ang le? Amah maia hria pawh a ni lo a, kei a kawm ngeih em em pawh nisi lo min share phah hial bawk si…

‘A nih chu..’ ka ngaihtuahna tilang loin ka tita sap.

‘Hey,I ngaihtuah ka hria aw,I rin anga sual leh tenawm ka ni lo bawka’

‘Eng mah chutiang ka ngaihtuah lo e a. Bakah,ka buaina pawh a ni lo bawka’ ka ti hmak.

‘Uhhh,achang hi chuan i ngeiawm ve thei sia’ nui chungin a ti leha,enge nuihzat tur ka hre lo a. Ka ngeiawmna lai lah ka hre hek lo.

‘Hmmm…Ka ngeiawmna ka hre lo’ ka ti hmak. Min chang lo in a tho a. Dawhkan tlang a vuana,chik fahranin min en bawk.

‘I mood uih zia lah chu rapthlak khawp anih kha,ka chhuk dawn..’ a ding mara,a ban a vai zauha.Ka chhan pawh nghak loin Kawngkhar lam a pana,ka enzui a.. Mahruaii a chhaih pheia,a dawhkan tlangah a thu a,an sawi chiah ka hre thei lo..Mahse, an hmelah nui hmel alanga,fiamthu eng eng emaw a thawh leh tih ka rin hriat thei mai,tute pawh hian an nelin an ngaina vek chu anih hi a..

Kan Motor lo thlengtur Traffic policein an lo mana,ka virbuai ta zak zak.Thil dang ngaihtuah hun vak pawh a awm ta lo hlauh,ka buai ta deuh nen ka nuam lo tih pawh ka lo theihnghilh titiha,Hriatpuia nen pawh ahranpa a han inbiakna hun a awm lem lo. Motor lo thleng tur nghaka Staff dang nen kan thut hahdam takah chuan ka lu na ka hre chawpchilh lehnghal zat..

‘Mam,a lo thleng dawn tawh em?” Hmingsanga’n rawn thut pahin a ti a.Ka Coffee tur ka hmaah a rawn hung nghal bawk. Sana ka en zauha.Dar 6 a hnai tawh,kan Motor hi a tluan chuan darkar khat velah a lo thlen tawh ka beiseia,unload leh chinfel chhung nen chuan dar 9ah kan haw hman mahna le.

‘A tluan chuan darkar khat atanga darkar hnih vel anih ka ring, khawchhung jam nasat dan azir a ni bawka’ ka ti a.

‘Lo thleng vat se, lo thleng leh tur zanin ami lo a awm hnai em?” a ti leha.

‘Kal mek chu a awma,mahse ka chiang lo..Driver kha chuan naktuk zan te atia’ ka ti a.Ka pen ken lai ka tuai vir pah a.

‘Hetianga indawt lutuk hi chuan lo thleng lo thinse,a ninawm tlat’ Angela-in a ti nang nang. Zing lama Remruata nen kan inbiakna ka hre chhuak zawk. Mahse, kha thil kha chu mimal thil a ni a. Bakah,min hrilh chin bak chu lo ka buaina tur a ni lo.

‘Um…Kawngchhia vang kha mawle.Tuna lo thleng tur hi karhmasa kha a lo thlen hun ania,an innghahkhawm phah veka’ ka ti ve a.

‘Kan kawng te lah hi a…Tha tak hian an siam thei lo,ka ning tlat.Zanin chu inkhawmnaah chanvo ka nei a’ Mahruaii’n a ti ve hlak hlak.

‘I hmanhmawh chuan kal rawh,kan lo timai dawn alawm’ ka ti vat.

‘Aaaa,a nuam lo…Bakah,a tlai tawha’a ti leh niah niah.

‘A ho lutuk,inkhawm phawt rawh.Nextah midang hi awl pawh kan ngai ve leh maithei a’ ka ti leha.A rilru tihnawm nan ka nuih var var bawk.

‘Um,ka tlang nghal mai ang, Kan tlai deuh ka rin vangin Puan te ka keng lawka..Mahse Boss hi…’ a ti leh a. Hriatpuia room lam a melh zauh..

‘A pawi lo,ka lo bia ang.Kan awm dawna,mipa ho an awm vek dawn bawka.Buaina a awm lo ang’ ka ti leh a. Lawm zetin a tho nghal tharh.Hriatpuia nen kan inzui hi Staff zingah thilthar a ni tawh lo a.Kan sawi miah lo chungin zep harsa chi a ni aniang.An hre deuh vek tawh.Mahse, midangin an hriat tak vang maia ka nihna hloh erawh ka duh lo bur.

Mahruaii kal hnuah reife kan la titi khawma, Angela-i leh Hmingsanga infiam ka nuihpui ka nuihpuia.An inhnehsawh dun mai bawk si nen,a hlimawm lehpek viau.

‘I Phone i keng lo mi?” Remruata’n rawn thut ve pahin a rawn ti a. Angela-i ka melh zawka, eng mah dang lam a awm lo.

‘Keng lo..Ti nge?” Remruata ka en a.

‘Adama a zual deuh a,kan kal lawk mai dawn mi?’ a ti a. Kan hawiphawk nghal hra mai.

‘Chutia law? Tu nge rawn hrilh che a?” ka ti vat.

‘An nuin min rawn calla,kal lawk ang..Motor hi chu alo la thleng ta anih pawhin midang an awm tho’ a ti leh a. Ka tho a, mahse Hriatpuia rawn chhuak chiah ka va hmu a. A office kawngka bulah a dinga. A Kamiz hak,tlema tight lam deuhin a pian nalh zet a phuar deuh tanga. Sana,Gold rawng lawk lenglawng a bun bawka,A incheina a inhmeh takzet…

‘Mami,i lo lut lawk hman em?” a rawn ti a.

‘Aw…hman e’ ka ti a. Mahse, Remruata ka en leh rih.

‘Kal phawt rawh,I hrilh nghal dawn nia’ a ti a, a sawi danah ngeiawm a awm lem lo..Kan inkawp tih hre mah se Office a min ko lut anih chuan mimal thil a ni dawn lo tih kei ang bawkin a hria.

‘Enge nita?” ka luh veleh ka ti nghala.

‘Hei hi dik lo a awm nuala,siam tha ula,nidangah chuan fimkhur turin hrilh la…’ tih pahin File a rawn nawrpheia. Ka lakang vat.Ka keua,Angela-i file a ni tih ka hre thei nghal mai bawk.

‘Ok..Ka lo hrilh dawn nia..Tunah ka siamthat tir nghal dawn em?” ka ti a.

‘Naktukah ka en leh ang’ a ti leh nghut. A awki nghet leh khauh zetah chuan tihsual nawn loh a tul tih ka hre thiama..Diktak chuan eng lai mahin a tawngkam hi a nelawm chiam lo ve hrim hrim,hlauhawm ni si loin thupe thang tih a hriat theiha,mi chaldelh emaw ngainep taka tawng erawh a ni miah lo thung.

‘Ka lo tih thattir dawn nia.Thil dang ala awm em?’ awki pangngai takin ka ti a.

‘Thu la…’ a ti nghut. Ka bula Chairah ka thu thlaa,ani erawh a thochhuak ve thung. Dawhkan a rawn kal huala,ka thutna bulah a rawn dinga,Dawhkan tlangah a thu nghal zat.

‘Midang hi fimkhur turin hrilh nawn nasa la ka duh,tul miah loah hauh che ka duh lo ania’ a ti leh sup. Tlemin a aw a dam ta deuh.

‘Um..Ka lo hrilh nawn leh ang’ ka ti let ve sap. Hnaah reng reng chuan a tisualtu aiin chung lam ami in hauh an tuar nasa zawk thin tih ka hria.Sales Manager in an tihsual chuan anni ni loin keiin hauh ka tuar tlangpuia,a neitu ka ni lo nangin ka mawhphurhna a awm annih vang a ni a. Ngaihthiam lohtur a awm lem lo.

‘Eng nge in sawi khawma?” a ti leh daih.

‘Khawiah?” ka ti vat.

‘Saw laiah sawn mawle,I nui nasa bawka’ a ti leh nghut. A Office atangin kan thutna alang thei tih ka hria. Mahse, min lo thlir reng tih ka hre miah lo.

‘Hmingsanga leh Angela-i mawle’ ka ti a.

‘Um..I hmuhnawm’ a ti leh sup. Atthlak zetin ka hmai a sa nghal hat hat thung.

‘Ka nuin engtikah nge a hmuh leh dawn che a hre duh a” inpersan zetin a ti leh daih.

‘Min hmu duh maw? Ti nge?” rang zetin ka ti vat.

‘Angai che aniang’ a nui zui hawk..A nui ri hriat a nuam takzet.

‘Tak takin Fridayah a haw dawna. Chumi hma chuan hmuh che a duha’ amah bawkin a ti leha.

‘Hnaah kan buai dan a zir animai..’

‘Ok…Hna hi chu kan siamrem thei alawm’ a ti vut.

‘Um,nia…Eee,kan chhuak lawk dawn mawni kan tia’ Remruata thil sawi ka hriat chhuah takah chuan ka tih zawm zat.

‘Khawiah?” a ti tha ve mai.

‘Adama a zual an ti a. Inhnuai lama Remruata nau kha. Remruata nen kal kan lo tuma’ ka ti leha.

‘Ok..Mahse, lo awm la ka duh..Ka han kal ang’  a ti vut.A tho nghal a,Ka tho ve vat bawk.

Hriatpuia leh Remruata Damdawiin lamah an kala,an kal hnuah Angela-i file ka pe leta,a tihsual lai ka hrilh ta chauh.Midang awm laia a tihsual hrilh ka duh lo..Thupha a chawi niah niah. Vei nei lo leh thawveng tak a ni hi a thatna lai a awm nangin hnaah chuan thil tha tak a ni lem lo.

Dar 7 pelh hretah Motor a lo thleng  ta hram. A chang hi chuan khawchhungah tlan luh a harsat thin avangin Staff hoin Truck Terminal atanga an zuk khalhchhuah tum a awm thina, mahse zanin chu a lo tlan lut thei hlauh.

Kan intihfel meuh chuan dar 10 a pel tawh. Dar 9ah haw hman ka inbeisei kha ania,a teuh ta lo viau. Pawi erawh ka ti lem lo.

‘Kal ila…’ Hmingsanga’n a ti a.

‘Min kalsan mai rawh..’ ka thensak.Ka tlan lohni a ni a, a hma khan Hmingsanga ruala haw ka lo tum lawk tawh a,mahse Hriatpuia’n nghak tura min rawn tih avangin ka haw ngawt thei lo.

‘Boss a lo let leh dawn mi?” hre thiam zetin a ti a,a nui vur vur bawk. Tawngkaa chhang loin ka bu nghat.

Rei pawh ka nghah hmain a lo leta, Remruata erawh a tel tawh lo thung.’Enge a an a?” ka ti a.

‘A zia hret..Sammy a lo duty hlauha.Eng eng emaw ka zawt theia’ a ti a. ‘Sammy’ ka ti nawn sap.Tu ber nge ka hre chhuak zo mai lo.’Kan thianho zinga mi kha..’ a ti a, an thiante nena chaw kan ei khawm tuma nuih tiza zet,pa tawi thau lam kha a ni tih a sawi hmangin ka hre theia.Doctor a ni tih ka hre lo.

Ka inbul kawngpui chhak lam sirah kan dinga,ka chhuk tur min pawt leta, min kuahbeta,a awmah ka hmai ka phum kak. Ka sam karah a kut a rawn rawlha,ka biang a kutzungpuiin a tuai hauh hauh bawk.

‘Kal tawh rawh’ ka ti sap.

‘Um..’ a ti supa.Min thlah chuang lo..Inlakhran tumin ka che a,a rum hawk ri ka hre thei.Mahse, min thlah ta tho.

‘Ka ning tawh’ a ti nghut.

‘Eng?” ka ti ha ringawt.

‘I taksa si lo a mut ngai ziah hi mawle’ a ti sup. Rang zetin ka ena, thatchhiat hmel zeta a mit tizim chungin min lo en reng..Tihngaihna hre loin ka nui ta ngawt.A rawn kun hnaia,a kutzungtang sei thlurhin ka biangah a rawn dawma..’Ni lo…’ ka ti sep. Mi an lo kal thut theia,helaia lo in fawh ngawt a dik lo…

‘Ninawm…Hlauh ngah si’ a ti nghut. Mahse,min thlah ta tho..

Hriatpuia lan theih chhung ka thlira,a tlan liam hnuah chau zetin kawng ka kan phei hnak hnak..Mahse, ka hnungah pen thawm niawm tak ka hriaa, ka hawi let nghal vat. Tu mah an awm lo,ka hawikuala, che zeuh pawh hmuhtur a awm lo..A rehin a reh tlawk tlawk..Ka lu ka thing naka,ka hre sual a ni ngei ang.

Muangchangin ka kal leha,Step ka thleng hman thelh,mahse ka pen rual deuhthawa hnung lama pen thawm awm ve lehnghal zat chuan ka beng a verh zak mai..Rang lutukin ka hawileta, far buk tawi laih bula phe zawk ka hmu hmana,mahse mihring nge ui ka hre lo..Thawklehkhatah hlauhnain min rawn tuam hlupa..In control hman miah lo khawpin ka khur nghal hlawk hlawk bawk.

‘Tu nge?” ka huaisenna zawng zawng sawmkhawmin ka ti thei hram. Chhanna a awm lo,a reh tlawk tlawk.

Ka khur nasa lutuk tih ziaawm tumin thawk ka la vak,tlem chuan ka zia ta deuh. Khur dar dar chungin ka bag ka zena,ka Phone ka phawrhchhuaka..Mahse, thawm a rawn awm leh nghal zat. Phe zawk ka hmuhna lam bawk ka en nghal vata. Ui dum lian zet a rawn chhuaka,ka ip chawiha.Mahse,ka thawveng nghal hawk..

‘Chhe lutuk,min ti hlau alawm le’ ka tichhuak nghal sap. Ka phone ka kekawr ipteah ka thuna,ka inher nghal zat.

Sin fiak raiha Faifuk ri niawm tak ka hriat rualin ka ding leh chawt..A ri leh raiha,a tawp fel chiah tihin Current a thim nghal hmuk a….Ka tum loh tawpin ka rakchhuak nghal thawt bawk.

Chapter- 15

Ka hawikuala,a thim mup. Eng mah ka hmu thei lo,ka phone ka phawrha,Light ka on dawna,ka tifuh hleithei lo..Eng emawin min rawn thawi thuaka,ka zuang sawn nghal dawrha,ka Phone ka thlauh nghal daih bawk.Ka tlan dawna,khawi lamah nge ka tlan dawn ka hre thiam lo.Bakah,ka ke a khur nasa lutuka,ka che sawn thei angem ka hre lo. Mi in min kalpel thuak ang maiin a rawn thaw leh fuaa,ka au dawna.Ka aw a chhuak zo lo,ka dinna ngaiah ka dinga, ka mit ka chhinga,ka beng ka hup ta ngawt….

Tu emaw ka bul hnaiah hian an awm chiang lutuk.Hmu thei lo mah ila ka hriatna thazam hian a hre thei tlat.Ka meng ngam hlawl lo,ka men rualin tu emawin ka hmai bulah min lo en reng ta se ka damchhuak zo kher lo ang. Ka bula awm ni a ka hriat hi Thla nge Mihring anih erawh ka hre lo…Ka dinna lei hian min dawlhbo daih se ka ti ber.

Motor rawn tlan ri ka hria a. Ngam leh ngam loin ka mengchhuaka,Current a lo eng leh vek tawh tih ka hre chiah. Motor ri zawi tial tial chu ka ngaithla kara,ti dakin ka hawikuala,tumah an awm lo..Zan lama hram chi rannung hram chiah chiah thawm bak thawm a awm hek lo. Ka dinna piah deuhah ka Phone a lo tla bal bawk.

Inchhungah ka tlan lut rawk rawka,kawngkhar ka kalh sawk sawka.Che sawn loin Kawngkhar nghengin ka ding a, ka lungphu ri dut dut tihreh tumin thawk ka la vang vang bawk.Chhuatah ka thusawp thlaa,ka phone ka phawrha.Tunah chuan tihtur pakhat chauh ka hria.

‘Aw, Hon…’ a aw dam thlap ka hriat rualin ka tum loh tawpin ka insut nghal hraih mai.

‘Mate…I tha em?” min ngaihtuah tih a awah ka hre theia,ka tah a chhuak zual sauh bawk.

‘Aih, ka..Tha lo,ni lo..Eng emaw ka hriaa,mahse ka hre lo’ ka ti nawi niai mai. Ka in control thei thlawt lo.

‘Ok..Ok,Inah i awm tawh tiraw?” a rawn ti leha.

‘Aw,ka awm’

‘Ka lo ka nghal.Ka lo thlen hmain kawngkhar lo hawng miah suh.I hria tiraw?” a rawn ti lehnghal mawlh mawlh.

‘Um..’ ka ti zuai raih.

A lo thlenin min rawn phone a, ka thut ngaiin ka la thu ta reng. Kawngkhar ka hawnsaka,min hmuh veleh min rawn kuahbet nghal a,ka chhip samah a fawp zui nghal vang vang. Ka la khur hlak hlak nangin keimaha awm ngawt ai chuan ka thlamuang ta zawk.

‘A tha vek e,ka lo thleng a..Eng mah hlauhtur a awm lo’ zawi supin a ti a. Min hnem nan ka hnunah a chul zui leh hauh hauh bawk.

A malchungah ka thua,a darah ka lu ka nghata. Eng mah sawi loin kan thu ngawi tlawk tlawk,ka pangngai hun a nghak tih ka hria. Diktak chuan zanin emaw naktukah pawh ka pangngai angem ka hre ngam lo.Thil thleng kha ka ngaihtuah chhuah zawng ringawt pawn ka tirilah min mana, faifuk ri kha ka bengah a rawn ri nawn leha,theihnghilh tumin ka beng ka hup nghal phat..’A tha vek ka tih kha’ a ti supa. Min kuah nghet zual sauh bawk.

Hriatpuia lungphu ngawr dat dat ka ngaithlaa, mutchhuakin min rawn zem chiai chiaia,ka insiamrem sat sat..

‘Ni lo…Mate, thil i ei phawt angai’ ka thiltum hriain a ti dam thlup.

‘Aih,ka ril a tam lo..’ ka ti ve sep.

‘I chau lutuk ang..’

‘Min kalsan suh aw’ a sawi ngaipawimawh loin ka ti sep.

‘Ka kalsan dawn lo che,engtikah mah’ nghet churhin a ti a,ka nui sak..A awmah ka kut ka daha,a lakanga,a fawp vang vang..Chiang lo ruaiin min pawm kan lai ka hriaa,khuma min nghah lai ka hre tawh lo…

Phone nghawr dar darah ka harh zawk,thutchhuah mai ka tuma,ka kawngah min kuahtu an awm tih ka hriat rualin ka mut ngaiin ka mu leh ta zawk. A thawri ka ngaithlaa,a mut tui hmel takzet. Phone ngawr dat dat a tawpa, che loin ka mu zui ta vang vang. Nizan khan ka Phone kha khawiah nge ka dah tak pawh ka hre lo,tuna ri kha ka phone nge Hriatpuia phone zawk ka hre hek lo..Ka ban ka lekkanga,sana ka lo la bun..Zantin mut dawnah sana ka phelh ngei ngei thina,nizan kha chu chutiang lam a lang lo hrim hrim. Dar zat ka en a, dar 5 a pel hret chauh.Mahse,thawhchhuah ka duh.Tihharh hlauin dimtein ka kawnga a kuahna ka laksawn saka..Ka tawlhsawna,a rawn che a,a harh dawn emaw ka ti hman..Mahse, a inleta,a bawkkhup zawngin a muhil zui leh ta hlauh.

Lukham bulah ka phone a lo awm bal.Ka lakang deuh chiah tihin phone call a lo luta,min rawn call tu ka en a. Ka contact list ami a ni lo..Ka reject a,ka phone ka switch off ta daih. Lukham bulah ka dah leh a,Hriatpuia muhil hmel ka thlir ta vang vang.

A bek leh a khabe kual lian lam,nalh zetah hmul a to siar siara,a hnar tlema lian lam lek lek leh sang nalh vah bakah,a mithmul kual leh dum tha zet chuan Mizo ni loin hnamdang a ti ang lek lek. A hahdam hmel chuan a tilang naupang deuh sawt thei!! Ka kun hniama,ka la hmuh ngai loh a beng hnuaiah ser lian vak lo a alo awm thla raih.

Ka ban de de a, mahse ka khawih hmain a rawn inlet thuta, ka kut a rawn mana. Min pawt thuta, rang lutukin min bawhbet nghal hmiah. Hnai zetah min rawn en a, a mitmeng thim leh hlauhawm lutuk chu rap zetin ka en a,hetiang hian ka la hmu ngai lo.A hmelpa leh rum ul maiah chuan pawisak a nei lo tih a chiang em em bawk.

‘Ngatinge?” ka ti tham tiak…

A mit a tizima,in control tum niawm takin a mit achhinga,a thaw hawk..Ka awmah a hmai a rawn phuma,a che zui lo..A awmdan ka hre thiam hlawl lo.

Reife hnuah a rawn hawichhuaka,nichina a hmel awmdan ang kha ni loin alang dam leh thlup tawh.Ka sirah a letthlaa..Min pawt hnaia,a darah ka lu ka nghata,a awm zawnah kut ka dah bawk.

‘Sorry….’ A ti sup.

‘I tha em?” ka ti ve thung.

‘Um, ka tha..Nang zawk?” a ti a. Ka sam karah a kut zungtang a rawn rawlh chho a. Dimtein ka lu a hmet pah a.

‘Ka mu thain  ka hria…’

‘Good,Nizan thil thleng kha min hrilh tawh la…’ a ti leh a. Ka mit ka chhinga, nizana thilthleng kha ka ngaihtuah leta,ka tirilah min rawn thama,ka khur lehnghal dar dar mai.

‘Sawi a harsat chuan sawi kher angai lo ania’ amah bawkin a ti leh a.

‘I kal hnu khan ka chhukthlaa,Ka hnungah pen thawm ka hriaa….’ ka chawl leh dat.

‘Chuan…” a ti leh supa.Ka hnungah a chul leh hauh hauh..Ka aw ka thiana,ka hrawk ro halh tihnawng turin ka chil ka lem te te..

‘Tu mah ka hmu lo a, ka kal leha,thawm a awm leha. Ka hawileta,ui ka hmu a..A hnuah current a rawn thima,eng lo…..Ih,mi an awm ve tih ka hre thei a..Faifuk ri niawm tak ka hre leh bawka….’

Nghet zetin a kawngah ka kherh beta,ka khur zui hlak hlak,a hun lai ang tho khan ka feel leh a,ka rap ngawih ngawih. ‘A tha vek e..Hlau tawh suh…’ dam thlupin a ti a. A chungah min pawt kaia,nghet zetin min kuah zui hlu hlu bawk.In Control tumin thawk ka la vang vang mai. Tlem chuan ka zia ta deuh.

‘Thil ka zawt duh che’ kan ngawih deuh ren rawn hnuah ka ti leh sep.

‘Min zawt la…’

‘Ti nge zana Door bell a rik khan kawngka hawn i phal loh?’

‘La hma deuh se chuan a pawi hran lo a, mahse khatiang hun a ri kha chu thil pangngai a ni lo.Nang mahin i awm bawka ’ a ti nghut. A awah eng mah thil dik lo ngaihbel tur a awm lo.Ka hawichhuaka,a awmah ka ban ka daha,ka banah ka khabe ka nghata. A mitah tak ka en bawk.

‘Diktak chuan ka hlau vek tawh, Thenzawla thil thleng te..Ih,ka hriat ve loh tur,keimah nena inzawmna nei si zep i nei em?” ka ti leh a.

‘Thenzawl,nia..Mahse,inzawmna a neih ka va ring lo ve’ a mithmul a tisang zauh. Ngaihbel luih dawn pawn eng mah a hmelah hmuhtur dang lam a la awm chuang lo.

‘Ka ngaihtuah hian thil pangngai a ni si lo alawm..’ ka ti leha.Ka sawi laklawh tawha,ka rilrua awm sawi vek law law ka duh.

‘Eng ber nge pangngai lo? Sawi la…’ a ti awlsam leh mai.

‘A hmain hetiang hi ka hre ngai lo a, Thenzawla thil thlengte,nizana thleng leh te..Aaaa,avai hian a pangngai lo,mahse,hmelma ka neih ka hre si lo’ ka ti leh halh.

‘Ngaihtuah hah vak duh suh,nizanah khan thilhriat sual palh pawh a awm theia’

‘Aih,awm lo..Eng mah ka hre sual lo’ rang zetin ka ti vat.Ka inbengkanga,mahse ka chhuk hmain ka kawngah a kuahbet leh hman ta tho.

‘Ok…OK, I hre sual lo ang. Nakinah inchungte bakah thenawmte zawt la…Eng emaw tal chu hriat an nei ve ang chu’ a ti dam thlup. Nia,zawt ila a tha tak ang.Zanrei lutuk pawh a ni loa,current awm loh hunlai vel kha ania..Tu emaw tal chuan an hre tur a ni.Mahse, nizana ka thil tawn lai vel khan thawm awm loin mak khawpin a reh thuap tih ka ngaihtuah chhuak lehnghala.Kha pawh kha thilmak tak tho a ni. Ka hlau lutuk khan anihna ai baka nasain thilthleng kha ka hria nge ni ka ti rum rum. Ka thle baka,mahse ka ngaihtuahnaah thil a rawn lang leh zawk.

‘Ka tel vena,keimah nena inzawm ka tihna zawk,chutiang thil chu zep i nei em?” ka ti leh a.

‘Neih pawh ka va hre lo ve’ a ti a. Ngaihsam hmel fein a hmui a petsawi zui zauh bawk. Zawh luih awmzia a awm lo tih ka chiang.Thil eng emaw sawi tumin ka ang leh ziaua,mahse ka hmui a kut zungtangin a rawn ti si a.A then suk..

‘Nizanah nula tereuhte hi a hnar ring lutuka,ka muhil thei lo a..Reilote ka muhil leh lawk thei angem?” a nui a. Ka hmai a sa nghal hat hat mai.

Ka let thlaa,amah en lo zawngin ka mu a. Ka saisira,ka hnung lam atangin min rawn kuah thung. Ka ngaihtuah naah thil chi hrang hrang alang zut zuta, Thenzawla thil thleng mai bakah nizana thil thleng kha,mak takin Thenzawlah pawh khan tu man an hre ve miah lo.A hre ve teuh ber pawh khan a mumang emaw a ti mai mai leka.Keiin ka hriat lah kha achiang em em lawi si. Ramsanga lo kal zana Door bell ri kha thil pangngai tak nita se engvangin nge Hriatpuia a rawn call khan khatiang a sawi si ang? Mahse,ka ngaihtuah let pawn khami zan khan eng mah danglam leh dik lo ka hre lo a, ka hmu miah bawk lo.Mutchhuakin min rawn zema, muthilh leh ka tum ta zawk.

Ka harh leh chuan room chhung niin a rawn chhun eng iar tawh.Dimtein khum atangin chhuk ka tuma, mahse Hriatpuia’n ka hnung lam atang bawkin min rawn kuah leh a, Ka en vat.

‘Ka tiharh che law?” nuam ti lo zetin ka ti a.A then suk.

‘A pawi lo,a tlai tawh ang’ a ti tha ve mai.Ka samah a hmai a rawn phum vang vang bawk.

‘Chaw ei nghal la…’ ka ti a. Ka hlauhna a kiam deuh tawha,ka awmdan nep leh puih ngai zet avang khan ka zak leh titih tawh zawk.

‘Um…Inbual ka mamawh zawk tunah chuan’ mutchhuak aw zein a ti sup.

‘Inbual la,mahse i thawmhnaw hak tawk avang awm’  ka ti a. Khum atangin ka chhuka,ka thawmhnaw zingah a haktur a lo awm mial takin en tumin ka thawmhnaw dahna ka pan phei nghala.Ka thawmhnaw dahna bawm ka hawng nghal a, a hak tawk tur ka enkual nghal dan dan.

‘I kawr lian deuh ka ha mai ang chu’ a ti awlsam leh mai, Ka then sak.

‘Tak takin ka kal ang..Nang chu chawl la’ a ti leh nghut. A rawn tho a, a zi mar nghal ur ur bawk. Ka thawmhnaw dahna lam bawk ka en leh a.

‘Chawlh ngawt chi a ni lo,tihtur ka ngah lutuk’ ka ti nghauh.

‘Tu nge Boss zawk?” ka hawilet vata, min lo en reng chu niin..

‘Chutiang lam pawh a ni lo…’ ka then sak.

‘Anih chuan keihi Boss ka nia’ a dar a tisang zauh.

‘Mahse….’

‘Ok..Anih chuan keipawh ka chawl mai ang’ a ti hmuk. Tihngaihna hre lo in ka ban ka phara,ka dahthla leh hnak..A rawn tho a, min rawn pan pheia.Ka din ngaiin ka dinga,ka bulah a rawn dinga. Kan insan hleih bawk nen ka en chho ha mai.

‘Chawlh ngawt ka thei lo a….’ sawitur dang hre loin ka ti leh niah niah.

‘Ok…Keimah ka kal anga,nang i chawl ang.Ni khat lek i kal loh vangin kan buai anih pawhin kan buai lutuk lo ang.A tha em?’ a ti leh a. Ka duhdan min zawt mah se thurawn ni loin a thupek zawmtur min hrilhfiah tih a sawi danah a chiang reng. Hnial tumin ka ang ziaua,mahse ka chip leh hmaka,ka bu ta nghat zawk.

‘Chaw chu ka ei lo mai ang’ kalsawn pahin a ti a. Sana ka thlek zauha,dar 9 a hnai tawh.

‘Eng emaw tal ei la,ala tlai lutuk chuang lo a’ ka ti a.

‘Aih, siam buai duh lo mai rawh..Mahse, banah ka rawn kal ang’ a ti leh a.Khuma a Jacket awm a laa,a ha zui nghal mawlh mawlh.

‘Tah chuan ei nghal la’

‘Aw,ei ang..Mahse,eng mah lo siam duh suh..Ka lo thlen hunah kan siam dawn nia’

‘Naaa,ka siam thei veka’ ka ti hlak.

‘Ka hria alawm,hahdam la ka duh..Lawk,nangmahin i awm thei angem?”a ti leh rih.

‘Aw…’ ka ti a. Mahse, ka chhungrilah chuan ‘aih’ ka ti ve thung,mahse min ngaihtuah tih ka hriat avanga tihbuai zui zel ka duh lo. Hna kal lo turin min ti a, ka awm ngam lo ka tih vaih chuan ani pawh a kal lo mai dawn a,chutiang thlenga tihbuai ka duh lo bur.

Min rawn din hnaih leha,ka biang tawn tawnah a rawn vuana.Min kuai daka,a mitah tak ka en a. A rawn kun hnaia,a hmui lum ham hamin ka hmui a rawn si a,nghawngah ka kuaha,ka dingdihlip ak ak bawk. Ka hmui hnuai lam zei lutukin a rawn fawpa..Ka thiam ang angin ka chhang let ve nghal zela,nawmna mak takin min fan chiai chiai bawk..Mahse, amah zawk a inla hrang ta hlauh.

‘Min thlem miah suh,anih loh chuan thil thleng tur i hriat kha’ ka bekbulah a ti sup. Ka bengkawm a fawp zui leh zauh bawk. Eng mah sawi loin ka nghenga,ka ni deuh huih bawk.

‘Kal tawh rawh’ ka ti sapa.Ka ding mar nghal bawk.

‘Um..Ka fel sawt zia hi aw,I bulah zankhua in ka mu a, eng mah ti loin…’ a mit a siai zauha,a nui zui leh hawk bawk. Lai zetin ka nui ve ngawt bawk.

Hriatpuia kal hnuah Mahruaii ka calla,ka nawm loh vanga chawlh la ka ni tih ka hrilha. Chawlh min lo ziahsak turin ka ti nghal bawka.’Awi,nia..Chawl rawh,nimin pawh khan i nawm loh hmel tawh lutuk.Lo dam tha var phawt rawh’ a rawn ti mawlh mawlh.

Muangchangin eitur ka siama,ka ei zawh hnuah ka inbual ta chauh,ka harh vawkin ka hria.

‘Mami,vawiin chu i chhuak lo ve tlat alaw?” verandaa ka din laiin ka inluahna te Monu in min rawn ti a.

‘Aw, ka chawl ve ngial anih hi’ ka ti  leta. A rawn kal thlaa,a naute pawm ka laksak vat. Kei aiin kum 3 velin a upaa,mo fel leh tha tak niin ka hria.A lawina te chhungin an zir tel lehzel niin ka hre bawk. Hriatpuia’n nizana thil thleng zawt tura min tih kha ka hre chhuak zawk.

‘Nizan kha dar 10 velah ka lo hawa..’ka ti a. Min chhang loin naute chilthli tla a hru a.

‘Current thim lai vel khan Stepah hian rawn chhuk ka tuma,mak deuh hian min zuitu awm tlatin ka hriaa..Ka hlauh khat nen ka hlau tawp’ sawi satliah niawm takin ka ti a.

‘Current a thim ami? Ka menrei nen ka hre lo reng reng’ a ti liam puat.

‘Dar 11 ala ri lo deuh ang,kawta ka kal lai hian a thim alawm..Ui lian deuh ka hmu lehnghala,ka hlauh zia chu a’ ka ti leh a.

‘Ka hre lo reng reng,dar 11 vel chuan naute hnute ka pe ngei maia.Inverter hi on sa hian kan daha,chuvang chuan ka hre lo pawh aniang.Zingah kha chuan ka nu khan zanlaiah faifuk ri ahriat thu a sawia,a ri a fiak tha lutuk a ti maia’ a ti leha, ka phawk nghal hra mai.

‘Kei pawh Stepa ka kal lai chuan ka hria alawm,zan reh lai chuan hriat a nuam fahran lo’ ka ti a. Ka nau pawm ka pawm thaa.

‘A nuam duh lo ngawt ang,mahse ui i hmuh chu a neituin faifukin a ko aniang.Awi,hlauh han neih vel hi i inhmeh lo sia’ a nui zui hawk hawk. Za vak loin ka nui ve a.Ka thil hriat kha ui kohna a ni tak tak angem tih ka ngaihtuah daih thung. Ka lu ka thing nak,chutiang mai mai ni se ka hlau chiam lo tawp ang.

Nilengin ka awm ta vel mai mai,Remruata’n min rawn calla.Ka kal loh chhan min rawn zawta,ka lu a nat thu ka lo sawi leh hmiah.A awih ve mai bawk,ani pawn in enkawl uluk turin min rawn ti ve a. Ka mit vang anih arin thu bawk uar zetin a rawn sawi leh chiam.

Hriatpuia dar 6 velah a lo thleng ta chauh. Min rawn kuaha,dim leh dam takin min fawp vang vang,tisa chakna lam tihchhuah tumna a awm lo.

Kan pahnihin ei kan siam duna,keiin Chaw ka chhuma,Soup ka siam bawka. Ani in arsa a siam thung. Ka rin phak bakin a zei vel vek.Chawei chungin hna chungchang kan sawi duna,kan boruak a nuamin a hahdam takzet.

‘Lo thu la…’tih pahin a thutna bul a beng thuk.A kamiz kilhna chunglam pahnih a phelh thawla.A ban a thlep chhing bawk.Pheikhawk bun loin Mawza nen a awma,tawk lo zetin ka chapal a bun bawk.A chapal bun ka en a,ka nui sak. Thatchhe hmel deuhin a thu awn deuha,a ban thutthleng hnung lamah a phar duai bawk.

A bulah ka thu thlaa,ka ke ka hlangkanga,ka khup chungah ka khabe ka nghat bawk.

‘Ka nu i hmuh hun tur kha naktuk tlai ti ila a pawi em?” min en loin a ti a. Remote a huma,en tur zawngin a hmet kual dun dun bawk.

‘Ti nge? A haw hun a sawn dawn tihna mi?” ka ti a.

‘Aih, diktak chuan a awm laia tihfel theih theih tihfel a duha’

‘Eng thil nge a?” hre thiam loin ka ti leh ha.

‘A mo tur chungchang mawle..Ka sawi tum chu kan inneih a duha’ min rawn en a, ka tim chawih.

‘Aaa…’ ka ti fan raih ringawt.

‘Ka nu hi ka chungchangah a inrawlh khat viaua,mahse a hmuh hnu che kha chuan a inrawlh chak ta tlata.Keimaha ka awm hi min ngaihtuah thar lehzuala,a awmzia chu nupui ka neih a duha’ a ti leh duah,a nui zui suk bawk.

‘Ih….Diktak chuan,min hre chiang lo a..Kei pawn ka hre chiang lo che a’ ka ti zawi sap.

‘Anih chuan chu chu ka nu bulah i sawi mai dawn em ni?” a ti leh a. Angaihna hre loin ka dar ka ti sang zauh ringawt.

‘Aih…’

‘Ok,eng nge I hriat duh min zawt la” a ti leha. Ka hmui ka peta, enge ka zawh ang ka hre lo.

‘Ka nu leh pa hi kan khua Champhaiah an awma,kan chhungkaw ta,Hardware dawr an enkawla..ka u chu i hriat kha.Chuan,keimah hian ka u te hna ka enkawlsak bakah hian keima pualin sumdawnna dang ka neia,lian lutuk tihtur a ni lo..Eng nge adang?” chiang zetin min en a. Ka thle bak ringawt. Han zawh belh chiamtur ka hre lo.

‘Ka pa a boral tawha,ih..Ka buaina chu khawiah nge Palai in tirh ang ka hre lo a, chuan,kei anga chhungte nei mumal lo hi i nu khan hre chiang se min pawm kher lo ang.An fapa tana an beisei ang inneihna pawh ka neihpui thei lo ang…Ka hre lo,ih..ka mal’ ka thaw halh mai.

‘Min en teh’ thupe aw zetin a ti nghut.Muangchangin ka en a,a rawn kun hnaia.

‘I Chhungte ka nei dawn lo a, nang mah ka nei dawn che. Chuan,ka nu emaw ka pa pawn hetiang thil hi buaina an nei lo.An fapa hian ka duh anih phawt chuan min dal lo ang.A chiang em?” a ti leh sup.

‘Ka pa awm loh hnuah keimah chauh ka ni a, ka nu chu la dam mah se kan inzawmna a tawp daih tawha…’ ka ti leh sap.

‘Ka awm a,midang i mamawh hleinem,I duh phawt chuan Courtah pawh kan innei thei a..’

‘I tan a mualphothlak dawn lo em ni?”

‘Mualpho ai chuan chan che ka hlau zawk,neih che ka duh.Ka nei ngei ngei bawk ang che,eng kawng pawhin’ nghet churhin a ti leh a.A ti mai mai lo tih a chiang vek bawk.Ka tum loh tawpin ka mittui a rawn hnama,ka biangah a luangthlaa,a lum thla nghal pap.

‘Shh..Tah loh tur’ a ti sup.A rawn kun a,ka mitah a rawn fawp nghal dun dun bawk.

‘Ngatinge min neih i duh?” ka ti sep.Ka tahna avangin ka aw a lawi rat bawk.

‘Venhim che ka duh,mal i intihna hi tihbosak vek che pawh ka duha.Ka pek theih zawng zawng pek che ka duh bawka’ a ti nghet churh.Ka hriat duh em em erawh a sawi tel loa,a sawi ka ring hek lo.Min duh tih ka hriaa,abak a awm ka ring lo.Mahse, ka duh mai piah lamah ka HMANGAIH  tih ka inhre chiang em em thung.

‘Kal tawh la..’ ka ti sep.

‘Kal pawh ka tum lo’ ati awlsam mai.

‘Min ngaihtuah suh,ka tha reng alawm’ ka ti a.A mit a tizim a,ka ti tak tak em tih ka hmelah hriat a tum tih ka hria.

‘Ok…Mahse…’

‘Ka lo call ang che, dik lo a awm chuan’ ka tihkhalha.A nui suk.

‘Nizan thilthleng chu thenawm te i zawt em?”a ti leh a. Ka bu nghat.

‘Engtin nge an tiha?” a ti leha.

‘An mu tawha’ kan inbiakna hrilh loin ka tita zawk.’Ka hresual aniang,ka mut that loh vang khan ka chau ve lutuka’ ka tihzawm leha. A bu nghut.In a thlen hnuah min rawn be leha,an chhungte boral avangin zinga a nu hawtur thu a rawn sawia, ka thaw huai.Tunah chuan inneih sawiturin ka la inpeih hlawl lo.

‘Mami…’ min kotu lam ka hawi vat. Ka hnungah Rosy a lo ding reng tawh.Nidang ang bawkin a nalh lehpek.

‘Aw,nang maw?” zangkhai takin ka ti let ve a. Hriatpuia nen kan hmuh dun bak kha ka la hmu leh lo.

‘Um,kan va inhmu khat ve’ a ti a. A nuia,mahse a mitmeng vawt raih maiah chuan nuihzat vanga nui a ni lo tih ka hmu thiam vek tho.

‘Nia…’ ka ti tawi tak.

‘Hriatpuia hi a awm tiraw?” a ti leh a, Hriatpuia Office lam a thlek zauh.

‘Aw, awm e..Inleng  a neia’ ka ti dam thlap.

‘Um,ka hria alawm.Kan Meeting dawna’

‘Oh..’ ka ti halh ringawt. Meeting a nei dawn tih ka hriaa,mahse Rosy a tel ve tih reng reng ka hre lo.

‘Ka va lut ange’ a ti leh a, a hmela deusawhna lang chu ka hmuhhmaih eih lo. Mahse, chhaih thinrim nih ka duh lo bur.Ka dak deuh vaha,ka nui lui sak bawk.

Hna ka khawih mawlh mawlh laiin ka phoneah Msg a rawn luta, ngaihtuah mang loin ka open a. Chhiar loin ka thil khawih lai ka khawi leh rih.Ka tihzawh hnuah ka phone ka bana,Lock ka hawnga, msg open sa ka hmu nghal zat. Nichin khan ka chhiar ta lo tih ka hre chhuak leh chauh.

‘I Mail check rawh’ tih zawng.A number lah ka save hek lo.Ka mail ka open nghala,kan thawhpuite zinga tu emaw ber anih ringin msg min rawn thawntu ka call pah bawk.

‘Zanin chu i lo haw hunah ui nen ni lo,Cake nen ka lo hmuak tawh ang che,Hman zan anga thimzinga infiam leh kha ka chak tawh khawp mai’

Ka phone ka thlauh bawla, ka khur nghal hlawk hlawk bawk.

Chapter- 16

Tu emaw chuan game tenawm lutuk a khel tih achiang.Min tihhlauh a,mangang taka min siam a tum tih achiang reng bawk.Mahse, tu nge ni ang? Ka mit ka chhinga, boruak tlachham ang maiin duhthawh em em in ka hip kawk kawka,tlem chuan ka zia ta deuh.

Khur dar darin ka phone ka chhara,msg min rawn thawntu number ka call leha.Switch Off..Mail rawn thawntu ka en a, X tih ringawt a ni a,abak eng mah hriattheihna tur a dah lo hrim hrim zawk.

Ka tho chhuaka,ka khup sai dar dar avangin ka kal tha thei lo,dawhkan nemin ka ding leh deuh vang vanga. Ka zia deuh hnuah ka Office atangin ka chhuak ta chauh.

‘Mami, awi..Ti nge? I tha em?” Mahruaii’n min lo ti nghal chul.

‘Aw..Aw,ka tha..Boss hi Meeting an nei zo tawh em?” ka ti a. Thup tum teh mahila ka aw a khur dar dar tho mai.

‘Zo tawh maithei,Mipa kha chu a lo chhuak deuh chiaha..I tha tak tak em? I dang vek ania’ a ti leh a.

‘Um,tha…Ka lu a hai lehpek alawm le’ ka ti a. Ka nuih lui sak bawk. Ka thusawi ring chiah lo niawm takin a chal a tichuar nanga,chik fein min en ran bawk.

‘Ka tha ka tih kha,min ngaihtuah suh’ ka tinawn leh sap. Min ring chiah lo hmel a pu nangin a bu ta tho.

‘Chawlh rih deuh i mamawh anih ka ring,I lo kal leh hma lutuk a’ a ti a. Nimina ka chawlh kha damlohna vang ka ti a. Ka nuam lo viauah angai anih hmel.

‘Ka tha alawm.Tunah khan ka tho thuta, thawhthut luhai ang kha..’satliah thei ang berin ka ti awlsam leh mai.

‘Boss hi biak lawk ka ngaia’ tih pahin Hriatpuia Office lamah ka bu zauh.

‘Hmeichhe lo kal kha tu nge?’ rawn kun hnaih pahin a ti sa sa.

‘A thiannu anih kha,an inkawmngeih angreng’ ka ti a. Ka nui lui leh sak.’Ka’n kal ange’ ka ti nawn leha,Hriatpuia office lam ka pana,Rosy awmlaia sawi chi ni miah lo mah se an meeting tawh lo anih chuan ka be duh tih ka hrilh mai ang. Hna thil nen inzawmna nei lo ni mah se tunah chuan ahriat ngei ngei ka duh bur.Kawngkhar bulah ka dinga,ka kik nghal zat.

‘Lo lut rawh’ Hriatpuia aw pa zetin a rawn ti a. Ka hawnga,Inleng te thutna tur Chairah Rosy a lo thua,abulah dawhkan tlang rinchhanin Hriatpuia a lo thu ve bawk. Ka tim zawka,mahse ka incontrol leh vat. Hriatpuia a rawn dingchhuak  nghala,min rawn pan nghal vut bawk.

‘Lo lut rawh…’ a ti dam thlup.Ka pen luta, Rosy-in thip zeta min en chu ka mit sirin hmu mahila ka hmu lo der hmiah.

‘Ka lo tibuai lawk mai che u..Eng lo..’ ka sawi lak lawh laiin a ban vaiin Hriatpuia’n min titawp a.

‘Min tibuai lo, Rosy,min  lo hre thiam la…’Rosy hnenah a tinghal nghut.Mi a lo tan chuan kal turin Polite takin a ti tih a hriat thiam theih vek.

‘Ok,ok..Kal ahun tawh hrim hrima’ tih pahin a rawn dingchhuaka,min rawn en a. Ka then lui sak.Meeting ber a zawh tawh chuan a kal mai reng ang chu. Eng mah tih reng tur a nei lo.

‘I  tha em?” ka biangah a rawn khawiha. Kei erawh chu kan bul hnaiah awm an awm leh awm loh ka en zak zak.Mahse, Hriatpuia kutzungtang sei thlurhin ka biang tawn tawnah a rawn vuana,amah en thei turin min kuai dak zui nghal zat bawk.

‘I tha em?” a ti nawn leh sup.

‘Ka tha lo…Ni lo,thil thleng a awm’ ka ban ka phar hliaia,ka dahthla leh hnak.

‘Ok..Sawi la?” a ti dam leh thlupa.Ka beng bulah a vuana,ka beng a tuai pah hauh hauh bawk.

‘Ih…A tha lo lutuk ‘

‘Shh…Hahdam phawt la’ a ti a. Ka kut a rawn vuana,inlengte thutna tur,Leather Sofa,lian vak lo min panpuia,a thu thlaa. Min pawt thu ve a,a hmui lum thur thurin ka kut a fawp zauh.

‘Min hrilh rawh le’ a ti leh sup. Ka melh zawka,a mit dum fiah zeta min en reng chu en rei ngam loin hmundang ka melh vat.

‘Mail ka dawnga..Msg pawh’

‘Mail..’ a ti nawn sup.

‘Aw..Min rawn vaua’

‘Maw?” a awkiah thinrimna a lang thei.Ka en a, a lo inseuhruh teuh.

‘Ka en duh,tunah..’ a ti leh nghuta. A tho a,ka tho ve vat…A chairah a thu thlaa,ka mail ah a login a.. A chhiar nghala,a thaw hawk.

 ‘Hrep tak hian…’ zawi tein a ti hluk.

‘Tikhan hman zana thil thleng kha ka hmusual miah lo tih achiang tawh em?” ka ti nghauh.

‘Um,achiang…Msg rawn thawntu che kha a number ka duh’

‘Ka call backa,a tlang thei lo a..’

‘Ok,min pe phawt rawh’ ti leh hluk,Ka pe a. A phoneah a save nghal a. A phone a dahthlaa,Mail bawk a en leh nghal a.

‘Engtin nge ka tih ang?” ka ti chhuak leh halh.

‘Hahdam rawh,keiman ka buaipui ang.Mahse, Inah i haw tawh dawn lo’ khauh zetin a ti leh hmuk.

‘Maw? Ti nge ka haw loh ang?” ka ti vat.

‘Nangmaha awm ila tum tihna maw? A viau lo mai teh’ a ti leh hmuk. A sawi tum ka hre thiam,diktak chuan mahni a awm ka ngaihtuah ngam tawh lo zawk. Mail min rawn thawntu khan tu nge ka nih a hre chiang lutuk,Thenzawla thilthleng nen khan inzawm vek turah ka ngai nghet hmiah tawh.

Thenzawla kal ho zawng zawng ka ngaihtuah kual zung zunga,an vaiin chhungkhat deuh vek anni a.Mi hrang kal ve lah kha hmeichhia pathum kan ni mai bawka. Anni khan khatiang thil an tih ka ring lo. Mahse, thil chiang em em chu he thil titu hian hlauhlawpa ka awm a duh.Mahse, engvang nge? Ka ngaihtuah ngial pawn inhauhpui leh hmelma ka neih ka hre chhuak zo lo.

‘Ka hre thiam lo,hetiang hi engvanga ti nge anih ang?” ka ti leh halh.

‘Ka buaipui ang..’ a ti leh hluk. A inpet ruh fun mai chu ka en zak zak.Eng vanga thinrim em em nge anih ka hre lo.

‘Tinge i thinrim a?” angaihna hre loin ka ti sap. Min rawn ena,min chhang dawn emaw ka tih laiin a rawn tho a.A kut a humruh a,ka inrin hmain Dawhkan a beng dawta. Ka phu zawk.

‘Ti nge ka thinrim maw? Ti nge ni ang?” ngeiawm zetin a nui zui hawk,a aw a ring lo. Kei erawh a awmdan chuan min thawng lutuka,ka din ngaiin ka ding khawng lah thung.

‘Ka bialnu,ka bula a awm reng laia an vau ngam hi thinrim tur ka ni lo tihna a ni em?” hnai zetah min rawn en a.A mitmeng thim leh ril zetah chuan thinrimna chiang takin alang theia,pawisak a nei tlem hle ang tih a lang chiang reng bawk.Hetiang chiah hian nimin zing khan ka hmu tawha, nekluih chu mi a let tawp tan bak tum chhin chi a ni lo..Ka ban bul tawn tawnah nghet zetin a rawn vuan bawk. Chhan mai dan tur hre loin ka mit ka khap sak sak ringawt.

‘Ok,.Ok..A tha vek e,ngaihtuah suh.Ka buaipui vek ang’ a ti leh supa. A thaw nghal hawk bawk.Tun lawka thinrim lutuk kha a ni tih awih harsa khawpin a hmel alang dam leh vek tawh.Min pawt hnaia,min kuah bet nghal hlu hlua,ka nghawng sir lam a hmui lum thur thurin a rawn ti si a. Ka hnungah a chul hauh hauh bawk.   

Kawngkhar hawn pahin ‘U Hriatpui,hei hi…’ Remruata’n a rawn ti a. Mahse, kan lo awmdan a hmuh rualin a tawp lehnghal chawt. Hriatpuia’n min kuahna a thlaha,ka kalsawn nghal vat bawk. Kan inkawp tih hre mah se Office a khatianga min hmuh kha nuam ka ti lo.Mahse, midang ni loin Remruata a ni hlauh zawka.Tlem chuan a zia.

‘Ka lo kal leh mai ang…’ inthlahrun hmel zetin a ti a. Ngei zetin ka melh vak.Mahse, min en lo hlauh.

‘A ngai lo,eng thil nge?” Hriatpuia’n a ti chang fuk.

‘Ka lo va chhuak ang’ ka ti a. Min chhan let pawh nghak loin Kawngkhar lam ka pana,ka chhuak nghal vat bawk.

Ka Officeah ka luta, ka kalsan dan ngai ngaiin a lo la awm thap. Ka mail pawh ka hawnsa avangin angaiin a lo la awma, hahdam tumin thawk ka la halh. A thil min rawn thawn ka chhiar nawna,ka chhiar nawn tam zawh poh leh angaihna ka hre lo tam ting mai zawk.

Ka mitthlaah ka nu a lo lang thut,ka nu Pasal a lo lang leha, ka lu ka thing nawk. Ka hmuh lohna a rei tawh.Aizawlah ve ve cheng mahila veng khat kan ni lo a, hmuh loh ka tum em avangin ka hel nasa bawka.Ka hmu lo thei ngang mai bawk. Ani pawn ka chhuahsan tirh lama min ngaihven bak kha min ngaihven zui bik lo.Ngaituah takngial pawh ka peih lo a, ka ngaihtuah lo tawp ni loin ka ngaihtuahna an luah mang mang lo. Ka awmloh hnua ka chungchang hre chiang si lo va an sawi zui duh dan mawi lo tak tak avangin ka cousinte tumah ka hnaih zui peih lo a. Pathian zarah ka mamawh lem lo hlauh bawk.

‘A pa fanu duat sual,awmngaihna hre lo anih hi.A pa Thlarau hian a kawchhungah a luhkhunga,mi dang tihnat bak thiam a nei lo ’ ka nu in ka Pi hnena a tih sak sak lai kha ka ngaihtuah chhuah apiangin nimin ang mai niin ka hre thina, ka na a thar ziaha,ka Pa thlarau zahna nei miah lo tu ka nu ka huatna a zual sauh zel bawk.

Thil ka hre chhuak thut,Calendar ka en vata.Ka thaw nghal hawk mai,vawiin hi ka Pa thihcham a ni a,engtin nge maw ka theihnghilh theih zawk ni? Vawikhatmah ka la theihnghilh ngai lo asin le..Kuminah thlan ka la tlawh miah lo a,kal ngei ngei ka duh. Mahse,keimahin kal ta ila eng emaw dik lo a awm maithei..Huizz,ka hriat si loh min tibuaitu hian ka nun a tichep takzet..Engtia inven tur nge ka hre si lo…Hriatpuia’n a buaipui dawn thu sawi mah se engtin eng chen nge adaih dawn ka hre lo. A hriatchhuah hmain thil tha lo pawh a lo thleng palh theia…

Ri deuh rapah ka kut ka en vat. Ka pencil ken ka lo hmet tliak chu niin..Rapthlak ti zetin ka la ken zawk ka paih thla vat..Hetiang ngawt chuan ka awm thei lo,eng emaw tal ka tih angai,bakah vawiin hi ni Pangngai ni loin ka Pa boral cham a ni a,ka kal ngei ngei a tul.

‘Tlaiah ka haw hma thei angem?” tih msg Hriatpuia ka thawna.A office a va kala,biak ka duh a.Mahse, Remruata achhuak tawh em ka hre tlat lo.

Min rawn chhan hun ka nghaka,a seen ngeia. Mahse, a rawn chhang lo. Remruata ala awm a ni ngei ang. Ka Coat khai ka haa,Mahse rawn pen lut thawm ka hriaa,ka inher vat.Hriatpuia a rawn lut ve chiah.

‘Khawiah nge kal i tum a?” a rawn ti a. Ka hawibuai deuh nak,mahse a phone a lek kang tak zauhah chuan ka msg thawn kha tunah min rawn chhang tih ka hre thiam.

‘Eeee,ka Pa thlan tlawh ka duha…Vawiin a thihcham ania’ ka tih zawm a.

‘Um,anih chuan kal ila…’

‘Aih, keimahin ka kal thei alawm’ ka chhungril duhdan ni lo mah se midang hmuh atan inzui chhuah sek hi a mawi lem lo tih ka hriat vang zawkin ka ti a.

‘I luhlul lutuk hi chu ka la thing ang che’ a ti hluk.

‘Aih, midang lakah i zahawm lo lutuk ang’ rang zetin ka ti a.  A ner nawk thung.

‘A ho thin’ a ti leh hmuk.

‘A ho miah lo,kei pawh ni ila ka ngaihdan a pel ve ngawt ang’ thiamchan tum zetin ka ti leh a.

‘Anih chuan naktuk atangin bang mai rawh,a buaithlak’

‘Maw? A teuh lo’ ka tum aiin ka tawng ring a, ka tawng hre phakah an awm em tih ka en kual nghal vat a,vanneihthlak zetin tumah an lo awm hnai lo hlauh.

‘Anih si chuan midang ngaihdan pawisak viau kha a tul ber lem hleinem..Kal ang le’ a ti zui leh hmiah. Hnial tumin ka ang ziaua,mahse a hmel tihhar zetah chuan hnial loh a tha zawk tih ka hmu thei a,Kawngkhar lamah a thle zauh bawk. Tihtur a awm lo,Naupang thuawih deuh ang maiin ka bag ka la ta zawk.

Mahruaii hnenah kalna tur pawimawh kan nei tih a hrilha, Mahruaii hmelah mak tihna a awm lo.Nia,kan inkawp hma pawn hna thilah kan inzui chhuak fo va, thil thar a ni lo.

Ka pa thlan chul rap mai chungah ka dinga, ka piah thlan chungah thlan lung nghengin Hriatpuia a ding thung.Ni dang ang lo takin ka tah a chhuak eih lo. Hnahthel ro tla hnawk deuh chu ka kutin ka huikianga, Thir asiam,Kross awm chu ka chul a,a rei ve tawh bawka a ziak a khawk deuh niana. A rawng var pawh a eng lek lek tawh.Ni tla turin a rawn chhun eng deuh raiha,ka lung a leng vawng vawng.Ka naupanlai hun leh ka pa nena kan hun hman dun lai te ka mitthlaah a lang zut zut bawk.

Van lam ka hawia,chhum tlem tlem a awm tih loh chu a lang thiang kuka,ka lunglenna min hriatpui niawm takin khawvel hi a reh thuapin ka hre hial bawk.

‘I tha em?” ka dara rawn kuah pahin Hriatpuia’n a rawn ti a. Ka bekah a fawp nghal zauh bawk.

‘Ka hre lo..’ ka nui hak,ka ngheng a,a kawngah ka kuah nghal bawk.

‘I pa hi thil ka hrilh duh…’

‘Maw?” a a ta emaw tiin ka melh chho nghal vat. Mahse,a hmel thutak zetah chuan a thilsawi a ti mai mai lo tih a chiang.

‘Ka be duh ka ti’ a ti leh a. Min rawn en a, a nui suk. Mak ti lutukin ka ang pham mai.A aw a thian khurha,min kuah nghet zual sauh bawk.

‘Ka pu, I fanu hi ka nei duha,I remtihna ka mamawh..Ka tina ngai lo anga,ka pek theih zawng zawng hlimna ka pe vek ang tih ka chiam che’

A aw pa leh nghet churh mai chuan min fan raih raiha,ka inrin hman hmain ka biangah ka mittui a rawn luanga, ka insutzui hraih bawk.

‘Angaithla ang’ ka ti chhuak sep.

‘Ni e,a ngaithla ang’ a ti ve sup bawk. A rawn kuna,ka bekah a rawn fawp leh vang vang. Min hmutu an awm em ka hre lo,min lo hmu pawh nise ka pawi ti hek lo.

 Ka inah kan kal dawn emaw ka ti a, mahse ka in lamah kan kal tlat lo.

‘Khawnge kan kal dawn?” ka ti ha….

‘Ka inah..’ a ti tawi tuk.

‘Aaaa, haw a hun tawh tho asin,en laia haw ka duh zawka’ ka ti leh a. Ni a tla titih tawha,Rei a eng tawh dawn lo.

 ‘I haw dawn lo..’ a ti leh hmuk.

‘Mahse….’

‘Nangmahin i awm dawn tawh lo ka tih kha’ a ti leh hmuk. Ka ang ziaua,ka chip lehnghal daih. Diktak chuan keimaha awm leh tur chuan thih hrehin ka hreh tawh.

A inah kan thlenga, a lo reh thap. A awmpui thin Tlangval a lo la let lo a, langa in tifai tur a chhawr thina, chaw erawh amahin a insiam vek thung.

‘Lo kal la,I thawmhnaw thlak phawt rawh’ a ti a. Ka chhan hmain ka banrekah a rawn vuana.In chung lamah min kai chho zui chu animai.Step tawpah inleng kawmna lian lo te a lo awm leha. A bul chiahah Room kawngkhar a awma,min panpui zela. A herh hawnga,min kai luta. A room chhungah ka ding ta ran mai.

Khum lian leh nalh zet a awma,fel thlapin a insiam vek. Khum atanga ding lamah Kawngkhar a awm leha, Bathroom anih ka ring ve ngawt. Bangah Tv lian tha zet a awma. Dressing table lian leh simple tak, mipa hman chi ngawih ngawih a awm bawk. Inhnuai lam ang bawkin chei mawi chiam a awm lo a, Mipa room a ni tih a hriat hliah hliah.

‘Lo inthlak la,nge ka thlak zawk dawn che?” a mit a siai zauh.

‘Aaa,tihian a pawi lo…’

‘Pawi..Khatiang chung kha chuan ka inleng i ang lutuk ang’ a ti awlsam leh mai. Thawmhnaw dahna a hawnga,a enkual nghal dun duna. A rawn hawilet leha,’ lo en rawh. Inhnuaiah ka lo zuk chhuk ang’ a ti sup.

Room a chhuahsan fel hnuah thawmhnaw dahna lam ka pan ta chauh,a hawn sa ka en hmasa bera,T-shirt a lo inkhai tlar dul. Ka enkual dan dana,a te deuh ber tur ka lachhuaka. T-shirt inkhaina chunga kekawr niawm tak inrem that ka en leha. Pyjama zangkhai deuh ka lachhuaka.

Khumah ka thil lak ka daha,kawngkhar ka kalh leh rih. Ka inhlip sawk sawka,T-shirt ka haa,ka mal chanve a khuh thla hnak. Kekawr pawh a lian lutuk hrat tho. Mahse, a tlang ka thlep chhinga,a kawngah suihna a awm bawka.A hak theih mai.Slipper bun tur ka zawng leha, a pheikhawk bawm ka hawnga. Pheikhawk a lo awm that. Ka chhiar hram pek,a ngah thawhkhat. A pheikhawk zinga chanve hmawk Loafers nih avangin angaina hle tih a hriat theih mai bawk.

Inhnuaiah ka chhuk thlaa,thawm awm loin a reh thap. Ka hawikuala,Hriatpuia ka hmu lo.Kitchenah ka lut pheia,a awm chuang lo..Kawngkapui lam ka pana,pawnah ka chhuaka. Motor nghenga in lam hnungchhawn zawnga a lo ding ka va hmu a. Ka then sak. Ka pan pheia,mahse a thilsawi vangin ka ding leh dat.

‘Hetah a awm,a tha vek a.A hlauthawng deuha’ a ti a. Ka chungchang a sawi tih ka hria. Mahse, tu nge abiak ang ka hre thiam lo.Lehlam tawng ngaithlain a ngawi leh vung vung. Kal sawn loin ka dinna ngaiah ka dinga, enge a sawi zawm leh tur ka hre duh tlat.

‘An address min lo thawn la,naktukah ka hmu ang’ a ti leh daih. Kei nen inzawmna nei thil a nih hmel tawh loh. Ka inhera,inchhung lam pan tumin ka pen a.

‘Min zawng ami?” Hriatpuia awin a rawn ti a. Ka ding leh chata,muangchangin ka hawileta. A kekawr ipte zenin a lo ding a,min lo en run..

‘Aw, ka…Eng lo,inchhungah ka hmu mai lo che a’ ka ti bah nak.Ka beisei loh zetin a nui ta suk.Tu nge a biak zawh ka tum thuta, mahse a tawng ka ngaithla ru angah angaih ka hlaua,ka zawt leh ta lo.

Eirawng kan bawl duna, ka tih ve aiin aman a tih a tam zawk. ‘Room chuang i nei ang tiraw?” ka thil ei lai en ran chungin ka ti a.

‘Aih…Nei lo hlauh mai’ awlsam zetin a ti liam puat.

‘Enteh,engtin nge i ngaih chu ka hre lo a. Mahse,…’ a hmel thutak leh a mitmeng thim deuh raih ka en a, ka thilsawi lai sawi zo loin ka tawp leh daih.

‘Kan riahdun vawikhatna a ni lo a.Chuan,ka tilui dawn lo che ka tih kha’ khauh zetin a ti nghut.A sawi danah a thinrim nge rim lo ka hre thiam lo.

‘Nia..Ka hriaa’ ka ti tawi tak.

‘Mi ngaihdanah buai suh. I hah lutuk ang’ a ti leh hluk. A sawi dik tih ka hria,mahse buai loh ngawt hi a harsa lai tak chu a ni lawi si.

‘Ka tunhma nun miin an hrilh tawh che em?” a ti leh daih. Tawngkaa chhang loin ka thle bak ringawt.

‘Mi thata eizawng,anihna takah chuan Contract killer’ a thle buk..Ka thil ei ka hak a,ka khuh zui bawrh bawrh mai.

Tui a rawn nawr pheia,ka laa.Ka in nghal pawp,mahse ka khuh erawh a tawp maithei lo..Hriatpuia ka en a,ahmaa ahmela lang chhuak,pawisak nei lo hmel kha a pu leh ta chiah. A mitmeng a inthlak dang lam veka,a hmelpa zet rum ul mai chu tualthat hreh lo hmel chiah chiah a ni a. Min en danah pawh min hre ngai lo ang maiin min en bawk.

Chapter- 17

Tui ka in leha, ka khuhna avanga ka mittui tla ka kut hnung lamin ka hru zauh bawk. Hriatpuia ka melh leh zawka,a hmel landan a lo thlak danglam leh vek tawh.Mahse, ka mitthlaah a hmel awmdan kha a cham tlat. Ka khuh leh khauha,a rawn tho a, ka hnungah dimtein a rawn chum dat dat.

‘I tha em?” a ti nghut.

‘Aw..Tha,a zia lo ka ti’ ka ti a. Ka khuh zui leh kharh.A thutna ngaiah a thu leh a,ei tawh loin a plate a nawr sawna, Hriatthiam har zetin min en run  bawk.

‘Ka hre thiam che alawm’ reife kan ngawih hnuah a tichhuak hmuk.

‘Min hre thiam maw? Englai nge hriat thiam tur?” Angaihna hre lo zetin ka ti a. Ka kut hnung lamin ka mittui ka hru pah leh zauh bawk.

‘Ka nihna kha….’ A ti vawt leh ruih.

‘I ni lo ang’ ka ti chhuak halh.Nia,a ni lo tawp ang.

‘Nia,ka ni lo.Mi min sawi dan anih kha,diktak chuan kha aia nasa pawh khan min sawi zauh zauh’ awlsam zetin a ti leh a.

‘I nih leh nih loh nangman i hre chiang anih chuan a tha mai alawm’ ka ti sap. Ka hrawk ka thian leh kharh.

‘A dik,chu chiah chu sawi ka tum. I inah ka lo riak tawha,eng mah a thleng lo tih kan pahnihin kan hre ve ve. Mahse, I inluahna te khan an hria anih chuan ngaihdan an siam fel nghal vek ang. Zanin pawh hi hetah i awm tih an hriat rualin ngaihdan an siam fel vek anga.An duh duh an sawi ang. Mi sawi i ngaipawimawh dawn anih chuan hma lam i pan thei dawn lo. Kei hian ka hnung lama min sawina hi inhnehtir ila chuan tunah hian hetiang dinhmun ka thleng lo ang’ a tita duah. A sawi awmzia chiang takin ka hria,sawi ve tur hre loin ka mit ka khap sak sak ringawt.

A tho a. A thil eina plate a keng nghal bawk. Ka tho ve vat,ka thil ei chakna a bo vek tawh.Dawhkan  ka sengfela,min pui leh vek. Thleng ka sil laiin Ramsanga’n a rawn call a, a kalsawn avangin eng nge an sawi ka hre thei lo.

‘Mate,Sorry lutuk..Chhuah lawk ka ngaia,loh theih loh..’ Kitchena lo luh leh pahin a rawn ti a. Nichin lawka nelawmna nei lo leh vur ang maia vawt ruih Mipa kha chu midang anni emaw tih mai turin a bo chiang leh tawh lutuk.

‘Khawiah?” ka en zawka,ka thlengsil lai lam bawk ka en san leh mai.

‘Ben-a pa a zual deuh anih hmel..Ramsanga nen kan va kal ve lawk ang’ a ti leh a.

‘A tha alawm’ ka ti nghauh. Ka tum loh tawpin ka aw a chang lam hret bawk.

‘I duh chuan ilo kal ve thei ania’ a ti dam leh thlup.

‘Aih, ka duh lo. Keimahin ka lo awm ang’ ka ti leh hlak. Keimaha awm ka hreh zia ka ti lang lui ve salh.

‘Nangmaha awm ai chuan lo kal ve la..’ ka thilsawi a man thiam tih ka hria.

‘Aih,angai lo..Ka inah ka awm chuang hleinem’ ka ti leh lawi. Hlau em em mahila puih ngai leh buaipui ngai lutuk nih ka duh leh bau lo. Ka sawi ang tak tak khan ka inah ka awm lo a, hetah chuan ka him ang. Ka thil sil lai ka sil zawm mawlh mawlh.

Ka rin loh lutukin ka hnung lam atangin ka kawngah a rawn kuah thuta,ka darah a fawp nghal zauh. A lo kal hnaih lai ka hre miah lo.

‘Enge? Ka ti laklawh ania’ ka ti hlak.

‘Thinrim lo la,a pawimawh lutuka’ a aw pa zetah chuan ngenna niawm tak a hriat theih bawk. Thil ho te pawh nise min ngenna aw hi hriat nuam ka ti lo thei thin lo.

‘Ka thinrim lo…A pawimawh te chu ka hre ve a’ ka chhungrila hlimna awm thup turin ka ti leh hmak.. Ka thlengsil sa a dahna bawmah dah ka tuma, mahse kalsawn thei loin min kuah bet ta tlat. Dimtein ka beng kawm hnuaiah a rawn fawp a, ka inring hman lo,ka thaw nghal hawka,ka thil ken ka thlauh thelh bawk.

‘Dah teh’ a ti hluk.

‘Ka kalsawn thei hleinem’

‘Ok…’ a ti a. Ka thil ken lai min laksaka,aman a daha. Ka apron hak ka phelh sawk sawka,ka khai fel nghal a. Tap a tui tlem leak ka herhphuia,ka kalsawn leh tur chiah ka hnung lam atang bawkin min rawn kuah lehnghal a. Ka darah a hmai a rawn phum nghal zat bawk.

‘Ka kal lo mai dawn mi?” a ti sup. Amah si chetin min pawt hnaia,a mipatnain min rawn si a.Ka mur nghal ar ara,ka awmdan a danglam nghal vek.Ani pawh a pangngai bik lo tih ka hria.

‘Kal rawh…’ ka aw a khur hrep pawh chu a.

‘Takzet maw?” a nui a. A nui riin min fan raih raih mai. Chhan tumin ka ang ziaua, mahse Zei zetin ka bengkawm a rawn liak zai zaia, ka khur dar dara, ka khup a zawi vek. Ka ang pham mai.Ka kawr a rawn zen chho a, ka ip chawih.Nawmnain min rawn tuam hlupa. Ka ngheng a, ka mit ka chhing tlat bawk.Phone riin ka chen mekna khawvel siamchawp atangin min hruaichhuaka. Nawmnain min fan dan la ngai reng mah se ka rilru a la peng tlat.

‘I Phone…’ ka ti sap.

‘Ri rawhse’ a ti hriam hruih.A thawk dan mumal lo zet chu ka hre theia,kan taksa awmdan a danglam lo tih ka hria.Mahse, a phone a ri a tawpa,a rawn ri lehnghal zat.Lungawi lo tih hriat zetin a rum nghal hawk bawk. Ka bekah a fawp leh zauha, min kuahna a thlaha.A kalsawna,kei erawh ka din ngaiin ka dinga, ka awmdan pangngaia awm tumin thawk ka la nghek bawk.

Ka inhera, kal sawn loin ka dinna ngaiah ka dinga, ka kuttin ka kheuh nauh nauh.Hriatpuia min hnungchhawn zawnga ding chu ka en ran bawk. A kekawr ipte atangin phone a phawrhchhuaka. A en zawka,a pick nghal zat.

‘Aw..’Hello pawh ti loin a ti hmuk.A aw nelawm lo zet chu hre thang lo tu tan chuan biak chakawm tak a ni lo ve chiang.Lehlam tawng a ngaithla a..A pian nalh zet,a kawr hak laiin a phuar deuh chu hmuhnawm ti deuhin ka thlir dauh dauh.A dar a hlai hlapa,a pian hi  phiar tung si loin a inrem dik thlup. Mipa pawh hi taksa sawizawi that mai piah lamah pian nalh chi hrim hrim an lo awm chiang khawp mai.A rawn inhera, ka kut tin ka en vat thung.

‘Aw, a that chu. Ka lo kal’ a ti leh nghuta. Ramsanga anih ka ring,mahse a tawng lo ngaihven ve anga lan ka duh lo.

‘I hlau lo tak tak tiraw?” a rawn ti sup. Ka hawichhuak vata.A mitt him raihin min chik zetin min lo en reng tawh.

‘Aih, hlau lo ang. Mahse,ih…Lo haw hma thei la’ ka ti sap. Tun lawka thil thleng vang khan ngai ka la awh lo.Ani erawh a hmelah danglam a awm lo.

‘Ok,ka tum ang.Tu emaw awmpui tur che i duh em?”a ti leh a.

‘Min ngaihtuah suh.Ka tha lutuk ang.Gate leh kawngkhar pawn lam atangin kalh la,tu mah an lo lut thei lo ang’ ka ti vat. Ka nui lui sak bawk.Hriatthiam har zetin min en a, hawi sawn loin ka en ve ngar bawk. A thaw leh hawka.‘Ok..A tha alawm’ a ti khawng luh.

A inhera, mahse a rawn hawi let leh vut.’Ka roomah riak la,inhnuai room ka hmang dawn nia’ dam thlupin a ti leh sup. ‘Ka…Ih,room khatah kan awm thei angem?” ka tichhuak sapa. A mit thim raihin chik zeta min en chu en rei ngam loin hnuai lam ka melh vata,mahse hmel dangam zawk ka hmu hman thoa, a rei lo leh lutuka lawmna nge thinrimna ka hre lo.

‘I chiang em?” a ti thawp sut. Tawngkaa chhang loin ka bu nghat.Nichin lawka thil thleng atang ringawt pawh khan kan mu dun anih chuan enge thleng dawn hai rual a ni lo. Mahse, engpawh thleng se pawi tihna ka nei rih lo. Ka duh thlamuang taka abula muthilh a nimai.

‘Ok..Lo mu la,lo let leh vat ka tum ang,chuan dik lo awma i hriat chuan chi ai loin min lo call nghal dawn nia’ a ti dam leh thlup.

A kal hnuah inchungah ka chho nghala,Roomah ka luta. Tv ka ona,khumah thu mu chungin ka awm nghal than. Inchhung lo enkual vel na hun tha tak ni mah se chutiang Moodah ka cheng lo.Thil chi hrang hrang ka ngaihtuah kuala,ngaihtuah chhuah erawh ka nei lawi lo. Mak takin tunah  hi chuan hlauhna eng mah ka nei lo.

Ka Phone nghawr thutah ka phu zawk,ka en vata.Min rawn call tu ka hmuh rualin ka nui nghal sak thung.

‘Hello,Thiannu…’ ka ti zangkhai vah.

‘Msg te en ve la,em em a’ a rawn ti nghal hlak hlak. Ka phone ka beng bul atangin ka la sawna,msg min lo thawn ka en a. Ka lo hmu miah lo.

‘Phone ka kalsan alawm’ ka ti a, ka nui a. A tih fo danin a chek tlak.

‘Anih chu a,khawnge i awm?” a rawn ti leh a.

‘Ka chhuaka…Ti nge?”

‘In vengah kan lo kala,lo kal kawi zuai ka tuma,I lo awm si lo a’

‘Um,anih chu…A va pawi tak,Enteh..’ ka ti hman,mahse sawi zawm loin ka ngawi leh daih. Ka thil sawi tum kha Phone a sawi chi niin ka hre leh lo.

‘Eng maw ka en ang?” ka ngawih lai chuhin nghal zetin a rawn ti a, Ka ner nak.

‘Naktukah inhmu ang..I hman angem?” ka ti ta daih.

‘Sawi zawm lo thei mai sia,Inah lo kal la,anih loh chuan tunlai chu ka chhuak thei lo a’ a rawn ti leh lang lang.

‘Hna ka kal dawna,ka lo be tha leh ang che’ ka ti a.

‘Um…In tha zel em?” thuruk sawi ang hrimin a aw a ti zawi vei ngial.

‘Tha…Hmuh che ka duh lutuk ania’ ka ti leh a. Ka awm mekna hrilh mai ka chak zek zek,mahse ka awmna ka hrilh anih chuan ka thil tawn zawng zawng abul atangin hrilh vek angai dawna,anih loh chuan a fiah zo lo ang.Hmaichhan ngeiah engkim hi hrilh ka duh tlat.

‘Lo kal la animai. Ka nu leh ka pa naktukah an zin dawna,eee…Chaw lo ei ula’ phur zetin a ti zawm nghal hliai. A hming sawi ri lo mah se Hriatpuia a sawi tel tih ka hria.

‘Aaa,khua var phawt se..Bakah,keimah chauhin alawm ka lo kal dawn’ ka ti hlak.

‘Lo hruai rawh,ka hmu chak alawm.Kan inneih lah khan thil min tihsak nasa si’ a rawn ti leh zat zat.

‘A hman lo ang,keimahin ka lo kal ang.Bakah,nangmah chauha biak che ka duh’ thutak zawkin ka ti leh a.

‘Ok…OK,kan inbe tha leh dawn nia.Ka dah phawt.Mangtha’ a rawn ti a. Ka mangtha leta, kan inbe zo chauh nangin ka ngai nghal vawng vawng.

Khum che datah ka harha.Ka chet hmain hmui lum thar tharin ka chal a rawn si a. Tu nge anih ka hria.Ka mengchhuaka,inbengkang chungin min lo en reng tawh.

‘Ka tiharh che a’ a ti sup. Light a Off then avangin a hmai zawn alang thim deuha.Ka hmu chiang thei lo.

‘I lo haw chiah mi?” ka ti sap.

‘Um,muhil leh la’ a ti dam leh thlup.A rawn mu thla ve a,ka puansin a rawn pawt kaua. A rawn inthawlha.Min rawn kuah a,a dar hlai hlapah ka lu ka nghata,a bawp sei thlurhin min rawn khan ,a awmah ka kut ka daha,kan inhnaih bawka a taksa lumna in min ur ham ham thei.

‘Enge a an a?” ka ti sap.

‘Angai…Hmasawnna pawh awm chuang lo’ a ti sup.

‘A zia lo e..An mangang ngawt ang’ ka ti leh sap.

‘Um,nia.Muhil leh tawh la’

‘Nang pawh…’ ka ti let sap. Ka samah a kut zungtang a rawn rawlh chho a, dimtein ka lu a tuai hauh hauh. Mutchhuakin min zem lehnghal chiai chiai a. Kan awmdan nuam leh hahdam lutuk ka ngaihtuaha,ka  then sak. Sex lam hawi eng mah a lang lo. Ka thlamuang ngawih ngawih a ni ber.  

Ka phone nghawr dar darah ka harha. Ka tho mai dawna, Hriatpuia’n ka hnung lam atangin min lo la kuaha. Tihharh hlauin ka lukham bula ka Phone ka bana. Min rawn call tu ka en a,number ka save lo. Ka pick hmain dar engzat nge ka en hmasaa. Zing lam dar 3 a pel hret.Tun ang hunah tu nge ni ang?

‘Hello..’ ka ti zawi sap. Mahse, chhanna a awm lo. A reh tlawk tlawk,’Hello’ka ti nawn leh a.

‘I tawmbo daiha’ Mipa aw thum zetin a rawn ti dut. Ni lo, amah kha a ni. Min chhaihbuai nuam ti em em tu misual kha….

‘Nang,nang…’ ka ti chhuak sep..Au dawn pawh ni ila ka au thei kher lo ang.

‘Keimah ngei kha mawle,Ka lo nghak che asin le’ a ti leh duta.

‘Min hre chak em? Tihtur ka hrilh ang che. Naktukah Police satationah kal la,ka number hi chhuitir mai la..A tha em?” A nui zui huah huaha,a nui ri chuan min rap lutuka,ka kawchhung a fana ka khur zui nghal hlawk hlawk. Ka phone ka beng bul atangin ka lasawna,ka paih sawn nghal vat.

‘Mate….’ Hriatpuia’n ka darah a rawn khawiha,Ka te thawt.

‘Shh.Keimah..Eng nge dik lo ?” min rawn kuah hnai a.

‘Ka…Ka,ka phone kha…’ ka ti bak nawk nawk.

‘Ok,ok..A tha vek e..Hlau suh,I bulah ka awm ania’a ti leh a.Min hnem tumin ka samah a Chula,ka nghawngah a fawp nghal vang vang bawk.

‘Engtin nge ka tih ang?” ka aw a khur hlak hlak mai, Ka in control thei hlawl lo. Hetah ka awm chung pawh hian ka him chuang lo tih achiang vek.

‘Ka buaipui vek ang’

‘I buaipui chhungin thil tha lo thleng palh se…’

Min chhang loin min kuai daka,a thim avangin a hmel ka hmu chiang thei lo.Ka khap sak saka, tlem chuan a zia ta deuh.

‘Min ring em?” a ti nghut.

‘Ka  hre lo…Mahse, rin che ka duh’ ka ti mawl tawp. Nia,ka ring em ka hre rih lo.

‘Min ring turin ka tilui thei lo che,mahse min ring emaw ring lo emaw i buaina hi keima buaina a ni a. Ka buaipui ang.A vaiin’ a tawp lamah thinrimna niawm tak a hriat tel theih.

Muhil thei tawh loin ka mu mengkar mai. Hriatpuia thaw ri sak sakah chuan a muhil leh tawh tih ka hre theia. A lungphu nghawr dat dat ri ka hre theia. Tihharh hlauin ka che ngam lo.Ka chet ngam loh avangin ka taksa a kham thum tawh bawk.

Thil chi hrang hrang ka ngaihtuaha,mahse ngaihtuah fel chu khawi lamah.Ka ngaihtuahna a buai zual ting mai thung. Engkim mai hi a mak hu vek a ni ber.Thla rei lo teah thil a inthlakdanglam thuta,Hriatpuia vanga mal ka intihna zawng zawng a bo a. Mahse, ka nun hahdam leh muang raih thin kha hlauhna leh mangan nain a thlak ve ta thung.  Khapa sawi ang khan Police hnenah report ta ila.Huizzz,a cho lutuk kha ka hlau zawk,bakah Hriatpuia kutah ka dah phawt a tha zawk ang.

Ka mengchhuaka,a kiu a inbengkang chungin Hriatpuia’n min lo thlir vung vung tawh.

‘Good Morning’ a ti sup

‘Morning…I harhna a rei tawh em?” ka ti let ve a.

‘Um,I hnar ring em a’ a nui a. Ka hmai a sa nghal ap ap.

‘Hmuhnawm reuh lutuk mai’ a ti leh sup.A rawn kun hniam,ka mit ka chhing nghal vat. A hmui chhah deuh leh hnawng chapin ka hmui a rawn si a, zei zetin a rawn nawr kau nghal zat. Ka chhang let ve nghal thuai bawk.

Min rawn delha,ka kawr a rawn zen nghal zat bawk. Ka bra a nawr kaua. Ka hnute lawng a rawn khawiha,ka mar nghal awk. A tawlhhniama,puan a pawtchho a.A inkhuh zui nghal hmiah. Enge thleng dawn ka ngaihtuah hmain a lei lum ham hamin ka hnute hmur a rawn liaka. Ka tek chhuak nghal vek a ni ber.

Dimtein a liak kuala,a kut leh lamin ka hnute lehlam a huma,a hmur a kut zungtangin a chep hruala..Nawmna nasa lutuk vangin te chhuak lo turin ka insum tang tang thung. A rawn dakchhuaka,a mit thim raih maiah chuan chakna alang chiang lutuk.Thup tum awm pawn a awm hek lo.

‘Min tawptir teh’ harsa tih hmel lutukin a ti chhuak hrawih. Kei erawh ka mit ka khap sak saka,ka taksaa nawmna nasa lutuk thleng mek avangin ka vai deuh ruai bawk.Ka kut ka lekchhuaka,a biang tawn tawnah ka vuana,dimtein a hmui ka khawih dan dana.A rum hawka,a inpetruh nghal teuh bawk. A mipatna che tawlh tawlh ka hre theia. Ka kalzel dawn anih loh chuan tun hi tawp hun a ni.

‘Mate…’ a ti leh hrawih.

‘Tawp suh, khawngaihin….’

A thaw hawka,kum tamtak hmeichhe mutpui lo niawm takin a che zui nghal buan buan. Kei pawh ka dang bik lo,engmah dim leh muangchangin kan ti thei lo.Kan inmamawh tawnna nasa lutuk phuhruk turin kan che dun nghal pawp pawp a ni ber.

A kawr a hlipa,a kekawr phelhtur ka lo pui ve bawk. Ka kekawr kawng a rawn pawta,a suihna awlsam tein a pawtphelha. Ka panty nen a pawtthla nghal vek.Ka mal karah a rawn tla zepa.A mipatna ruh tulin ka Point a rawn sik rualin ka la hriat ngai loh nawmna mak lutukin min rawn fan chhuak nghal vek.Ka kawngah a rawn chawi kanga,lukham a rawn rawlh luta. A kut lehlamin ka point dimtein a khawiha,a darah ka tham ngawt ngawt ringawt.

‘Min en teh’ a titham tuak.Thuawih zetin a mitah ka en a,a thaw hawka,a rawn kun hniam nghal zat.Ka hmui a rawn nawr kaua,zei lutukin a lei a ti che kuala,ka mal kara a kut che a chawl eih lo.

Dimtein min rawn zawma,a na zawk a,ka thaw tawp chawt, ka ang pham bawk.Che zui loin a chawla,ka khabeah a rawn dawma.Amah en thei turin min kuai dak nghal bawk.

‘Ka tawp dawn em?” amah ang lo takin a aw a khur ve dur dur.Ka chhang lo,a kawngah ka mal pahnihin ka kherh beta.A rum hawk…Dim leh dam takin a che zui a,na zawk zawk kha nawmnain a rawn thlak tana.A tawp ka thlen meuh chuan nawmna rapthlak lutuk avangin ka te chhuak that thei hial..

A awmah ka hmai ka phum kaka,ka taksa ruak kang khuh tumin puan ka pawtchho a. Mahse, a rawn thehhlim lehnghal vek.

‘Ka en duh’ a ti sup. Ka hawichhuak ngam lo.

‘I tha em?” a ti leh sup, Ka hnungah a kut zungtangin a rin kual pah zai zai bawk.

‘Um…Tha..’ ka hawichhuak ngam chuang lo.Ka la Virgin tih kha ka sawi hauh lo chungin a hria tih ka hria.

‘Kei chu ka tha lo’

‘Maw?” ka ti vat. Ka chawichhuak nghal bawk.

‘Zawhte ang maia tin hriam i neia..Ka pilh phungin ka hria’ ka hmai a sa nghal awp awp. Ani erawh a nui zui hawk thung.

‘Inbual ang…’ a ti leh vut.Ka inlahrang nghal vat.Mahse, min rawn man bet leha. A chungah min pawt kaia,tal thlak ka tuma. A then suk.’I zang em mai’ a ti hluk. Ka nui hak mai.

Bathroomah min pawt luta,Shower hnuaiah min nawr pheia,Shower a on a, tuiin min rawn phuh rualin ka te that mai.Nui hawk hawk chungin a rawn ding lut ve a, ka en chho a. A mitmengah a tihtum ka hria,ka hnute a rawn huma,ka nui tawp chawt..Ka rin ang ngeiin a thleng leh ta ngei bawk.

‘Vawiinah i banna tur ka rawn tifel ang.Nang chu kal angai tawh lo’ a ti a. Phawk hrain ka en a.Min en ve loin Dressing table hmaah a dinga, a kamiz a kilh pah mawlh mawlh bawk.

‘Eng? Aih,ban ka duh hleinem’

‘Mate,I thawh loh pawn buaina a awm lo’ a ti leh hmuk.

‘Aih,kan innei pawh ala ni lo a..Ih,diktak chuan hna bansan ngawt thei ka ni lo’ ka ti leh a.A rawn inhera,min rawn en a. A hmelpa zetah chuan enge a ngaihtuah ang ka hre lo.

‘Zaninah i nu hnenah Palai an kal ang’ a ti vawt ruih.

‘Ka nu maw?!” awih lohna leh mak tihna nen ka en a. A thilsawi ka hre sual nge pawh ka hre lo.

‘Aw,I nu…A fanu inih tlat avangin a hnena dil che hi ka tih makmawh a ni.I man a dawng duh emaw dawng duh lo emaw ka buaina a ni lo.Dil chauh hi ka tihtur a  ni a,  dan pangngai hi hlenchhuah ngei ka duh bawk’ inringtawk lutukin a ti leh nghut. Ka lu ka thing nawk,ka hrawk ro halh ti hnawng turin ka chil ka lem a.Engtin nge ka nu a lo zawnchhuah ka hre lo. Bakah,a lo pawm kher in ka ring hek lo.

‘Enteh..’ ka ban ka phar hliaia.Beidawng zetin ka dah thla leh hnak.Min rawn pan pheia,khumah a rawn thu thla ve a.Ka kut a rawn laa,a hmui bulah a pawthnai chho nghal zat.

‘Min ring rawh ka tih kha,neih che ka duha, Nangpawn i duh bawka. Tun hi ahun tak a ni bawka’ a ti leh sup.A aw a dam ta deuh.

Door Bell riah ka hawichhuak nghal vat. Hriatpuia kal hnuah ka thut ngaiin ka la thu ta reng.Diktak chuan enge tihtur ka hre lo.Ka chawmawlh vek rih,engkim mai hi a thleng chak lutuk mah mah a,lawm tur nge hlauh tur ka hrethiam tlat lo.Door bell a rawn ri nawn leha,tu nge maw ni tehreng ni?

Kawngkhar ka hawnga,ka tum loh lutukin Hriatpuia u nen kan inhmachhawn ta ran mai.

‘Ka lo lut dawn mi niang?” a tichang fak. Rang lutukin ka tawlhsawn nghal a,a hmel nelawm lo leh tum hmak maiah chuan min hmuh vanga mak ti hmel engmah alang lo.

Inhmatawnin kan thu a, mahni invawng tihhriat zetin a thu ngil auh. Bungraw zawrh lai ang maiin uluk lutukin min thlek kual dan dana.A khawsak dan ngeiawm lutuk chu thinrim lam aiin hlauhna ka nei tlat zawk.

‘Ka lawm hle mai’ a ti muang ban charh. Kei erawh angaihna hre loin ka mengphar awk thung.

‘Eng…Ka hre thiam lo’ ka lu ka thing nak bawk.

‘I hre thiam lo tih ka hria alawm..Tihian ka sawi ang,kan duh kan tih theihna turin kan dahsawn che a tul..Dahsawn tih lemah nangmah hian kan thil duh i kawla,chuti anih chuan kan chhungkaw zinga lakluh mai che a tha.Kan la lut dawn ta che reng che a..Ni lo,ka sawi tum chu ka nau nen hian Plan kan neia,nang tereuh hian pawimawhna i neia,min dal tlat bawk alawm le’ a ti leh fak fak. A hmel a hnehtu intihna leh nuam tihna lang chhuak chu rapthlak ti lutukin ka en tlawk tlawk thung.

Chapter- 18

‘Sorry,ka lo kal chhan ni lo ka sawi kual daih maia’ a nui zui sanga. A nau ang bawkin a hmelah enge a ngaihtuah a hriat theih eih lo.Kei erawh nuihna chhan tur pakhatmah ka hre lo. Diktak chuan a thilsawi zawh chiah khan ka ngaihtuahna a luah ngut nguta,Hriatpuia lakah ka thinrim nge ka rilru ana zawk ka la hre thiam lo. Mahse, an thil planah ka hriat miah lohin ka tel ve renga,an duh an tih theih nan min dahsawna,min neih a tuma….Ka lu ka thing nak,min thawng tih hian a sawifiah zo eih lo.

‘Hriatpuia hmuh i duh chuan hnaah a awm ka ring’ ka ti sap. Ka rin aiin ka aw a pangngai phian bawk.

‘Aih, hmu duh nang. Nangmah zawk ka hmu duh che a’ a ti leh charh.

‘Um…’ ka ti ringawt. Sawi tur thlawt ka hre lo.

‘Hetah i awm tih Mama’n nizanah min rawn hrilha, Palai kal vel dan tur chungchang min sawipui bawka’a ti leh a. Sawi ve tur hre loin ka bu satliah ringawt.

‘I nu hnenah zaninah Palai kan tir dawna. Diktak chuan biak che ka duh chhan chu i nu va biak kher tul i ti em tih ka hre duha’ a thle bak. A kutzungtang sei sel sawlin a sam kir chiat a khawih nauh nauha,Ka chhanna nghakin chik fahranin min en ran bawk. Ka ngaihtuah naah thil a lo lut zawk,Hriatpuia hian ka nu nen kan inkar fuh lem lo tak hi alo hrilh nge ni ang?

‘Min hre thiam la,I sawi awmzia ka man chiah lo’ ka theihtawpa pangngaiin ka ti a.A thle bak.

‘I nu nen in inpawh lem lo tih ka lo hriaa,hetiang innih tak avanga i nu va biak kher kha i duh loh chuan tihdan kan zawng thei renga’ mahni inringtawk takin a ti leh nghat. A tawng danah kan inru tih sawi dawt lo mah se inru angin min ngai tih mi a lo tan chuan a hriat thiam theih vek tho.

‘Ka..Ih,ngaihtuah dan ka thiam chiah lo’ ka ti buai nak. Naupangchhia ang maia ka zam leh ka hlauthawng hi ka inngei hluah hluah.

‘Inru han tih hian a dik em ka hre lo va.Mama tan chuan abialnu te han riahpui zawk zawk hi thildanglam bik pawh a ni chiah lo.Ahhh, Mipa tan chuana in ang vek ang.Mahni a awm tan chuan a awlsam lehzuala’ a ti leh a. A nui zui leh sanga,a nui hmel huatthlala lutuk chuan min rap ngawih ngawih.Chu mai bakah a thusawi khan vuak chawrh ang maiin min deng chawrh a ni ber.

‘Ok,ngaihtuah chiam lo ang, Mama hian a mamawh che a, a nei dawn che..Amah nen…’ a sawi laklawh laiin Kawngkhar a rawn inhawng thuta, kan hawirual thawt. Hriatpuia a rawn pen luta,Motor thawm engmah ka hre lo. Kei chauh ni loin Pi pawn ahriat ka ring bik lo.A rawn kal pheia,a hmel tak ngul maiah chuan thinrimna niawm tak alang theia. Min en loin a u a en ding ngur bawk.

Ka bulah a rawn thu thlaa,ka kut a rawn vuan zui zat.A hum zui nghal vang vang bawk.Kei erawh chuan a u thilsawi vang khan ka haw hlura,min duh vang leh keimah ka nihna vanga min nei duh ni lo,a plan atana mamawh ka nihna avanga min neih a tumna chuan min ti thinrim ngawih ngawih. Ka kut la let lo turin ka insum tang tang bawk.

‘Hetah i lo awm a’ a u en chungin a ti hmuk.

‘Um,nia..Mami hi titi pui lawk ka tuma. I lo va haw lai ve’ pangngai takin a ti let  ve a. An unau hian an vawt dun raih tih loh chu in anna an nei tlem viau.

‘Mate,pawi itih loh chuan ka u hi biak lawk ka duha’ a ti dam thlup. Ka melh zawka,a lo luh laia a thinrim hmel kha a bo leh vek tawh. A then suk,a thle zui leh buk. Ka riluah ‘tenawm’ tih a lo lut zawk.

‘Aw…Aw,Inchungah ka han chho ang’ ka ti a. Ka tho nghal vat.

Hmanhmawh zetin inchung lam ka pan chho a, Roomah ka lut a. Kawngkhar ka khara, kalsawn loin Kawngkhar nghengin ka dinga, ka thaw ham ham mai. Ka ngaihtuahna buai nuai nuai tihfim tumin ka mit ka chhinga, mahse awmzia a awm lo. Pi thusawi zawng zawng khan ka beng a luah khat vek,ka mittui a rawn tlaa,thinrim zetin ka hru tawk. Ka insehruha,an duh duh chuan min ti hauh lo ang.

‘Hello’ Phone a pick veleh Machhuani’n a rawn ti zangkhai vah.

‘I buai em?” ka ti a, ka awah ka mood a hriat loh nan ka fimkhur viau.

‘Buai vak nang,ilo la thleng dawn lo mi?” a rawn ti leh a.

‘Aih,ka lo kal lo maithei.Ih,ka lo kal dawn pawn tlai lamah aniang’ ka ti a.

‘Um,a pawi lo.I lo kal hman hun hun nimai’

‘Ka chiang lo ka tih kha aw’ ka ti leh a.

‘Ok,enteh…’ a ti hlaia, a ngawi leh daih.

‘Ka dah phawt ang’ ka ti a.

‘Lawk,Hnaah i kal em?” a rawn ti leh daih.

‘Aw’ ka ti tawi tak. Dawtsawi mai loh chuan chhan mai dantur a awm lo. Ka thlen hunah engkim ka hrilh vek dawn tho a. Tuna dawt ho te lo hrilh chu thilpawi takah ngai lo mai ang.

‘Anih chu..Awi, ka thil chhuan a liam.Ka dah aw’ a rawn ti bawrh bawrh.

Tukverh sang zet bulah ka dinga, ka nawr tawlha. Balcony tereuhte a lo awma. Ka chhuaka,ka nem khar lehnghala.Chhuatah ka thu thla nghala,ka khup ka tawma. Ka awmna ep lam building intlar put ka thlir vang vang.

Ka phoneah msg a rawn lut a, phur lo zetin ka hawnga. ‘Ka thil hriat hi adik em?” tih ringawt Remruata’n a rawn thawna. Ka thaw hawk. Kan inru angin an chhungkaw zingah a thang vek tawh a ni phawt ang. Anih chuan hnaah pawh an hre darh vat ngei ang.Reply loin ka phone ka switch off ta daih.

‘Mate…’  Hriatpuia min ko ri ka hriat rualin ka hawichhuak nghal vat. Tho chuang loin Room lam ka hawi leta, Hriatpuia min zawnga a hawikual mek ka va hmu theia. Tukverh Darthlalang ka kik ri kauh kauha. A rawn hawi vuta,min hmuh rualin hahdam huai hmel a pu bawk.

A rawn chhuak ve a, tukverh a nem khar leha,ka tho nghal vat. Ka bengah a u thilsawi kha a lo lang nawn lehnghal zat. Duh leh hmangaih vang ni lo,mamawhna avanga neih tum mai mai ka ni tak tak angem?

‘A kal tawh’ a ti nghut. Ka bu liam satliah ringawt. Railling bawhin ka dinga, ka hmalam ka thlir vang vang.

‘I nu ka be tawha,engkim aman buaipui vek a duha.Zaninah Palai an kal anga’ a ti leh a. Ka khawng nghal lah mai.

‘Inneih kher pawh angai ka lo ti hleinem’ ka tum aiin ka aw a chang lam mah.Ka sawi zawh rualin a thaw hawk thung.

‘Enge dik lo awm a?” a ti hmuk. Ka en lo nangin min en reng tih ka hre thei tho.

‘Engmah…’ ka nui zui hak,ka nuih chhan erawh ka hre miah lo thung.

‘Sawi rawh’ luhlul zetin a ti leh nghut.

‘Eng mah a awm lo..Dik tak chuan zankhat i inah ka lo riak animaia. Thil danglam vak pawh a ni lo a’ ka ti leha, ka inringtawk hmel lutuk chu keimah pawn ka awih lo zawk.

‘Ka u khan enge a sawi?” a ti vawt ruih. Muangchangin ka inhera, ka huaisenna zawng zawng sawmkhawmin ka dak deuh vaha. A mitah tak ka en ngar bawk.

‘Eng vakmah a sawi lo..’ ka thle zui bak.

‘Engvangin nge hetiang hian i awm a?’ a ti leh hmuk.A aw a chang tha beng bawng viau. Mahse, ngaipawimawh anga lan ka tum lo.

‘Engtin nge ka awm vak a?”

‘Mate…’

‘Mami zawk, thil ka zawt ang che. Diktaka min chhan ka duh bawka’ ka ti nghauh. Min chhang lo,ka aw ka thian leh rih.

‘Engvangin nge min neih i duh?” ka ti chang fak. A hmel danglam zawk chu rei ni lo mah se ka hmu hman tho,a kekawr ipte zenin adinga, a inpet ruh fun bawk.

‘Ka duh che a, tuman an tihnat loh nana venhim che ka duh bawka.A chiang em?” a ti hriam hruih. Kei erawh vei nei lo hmel zetin ka then lui sak.

‘Tu lakah nge venhim ka ngaiha?” ka ti lui salh.A u sawi hmang kha chuan amah hi ka hlauh ber tur a ni tlat.

‘I hria…’ a ti tawi tuk.

‘Aw,nia.Ka hria…’ uar zetin ka ban ka vai nghek. A mit a tizima,a hmel chang zetah chuan ning hmel niawm tak alang zawk. A rei lo lehpek viau.

‘Ka duh che a, ka mamawh che a. Venhim che leh chhungkua pek che ka duh bawk’ a ti leh nghut.

‘Chu zawng chu maw?” ka aw ki ngeiawm zia kei pawn ka hre thei hial..Min chhang dawn emaw ka tih laiin a kekawr ipte atangin Phone a phawrhchhuaka,angaihna ka hre lo. A khawih mawlh mawlha, a beng bulah a dah chho a.A hmel hlauhawm zia chu to haw tur,chhum leh thlipui thawk tur intham,dur khup ka tehkhin deuh ber. Ka tiril a khur dar dara,ka ti lutuk mah mah niin ka hre bawk. Mahse, let leh turin ka tlai tawha,bakah an unau infiamna hmanrua nih ka duh hek lo.

‘Mami hnenah enge i sawi ka hre duh’ a u a bia tih ka hre thiam nghal mai. A aw vawt ruih leh thupe aw lutuk chu u te biakna tur tawngkam a ni hlawl lo. Chiang zetin min en a, hawisawn duh loin ka melh lui ve ngar bawk. Lehlam tawng ngaithlain a ngawi deuh vung vunga,a hmui a petsawi zauh.

‘Ka hrilh nawn leh ang che,kei leh Mami inkarah hian pen khat pawh inrawlh tum miah suh. Anih loh chuan engtin nge ka chet dawn tih i hriat kha’ a aw hniam leh thawp sutah chuan hlauhawmna riau a awm tlat. Thil ka hre chhuak zawk,hman deuha Office Balcony-a a lo biak laia a tawngdan nen khan danglamna a awm miah lo!! Anih chuan khami tuma a vau kha a u bawk hi a ni thei angem? Mami pawh kha midang ni loin keimah hi ka ni tihna a ni em? Mahse, engvangin nge kei vang tehlulin an unau an inhauh ang?

Phone a off a, a kekawr ipteah a thun zui nghala,a din ngaiin a ding khawng luha,a hmel hriatthiam har leh tihmawh hmel zetah chuan thinrimna emaw lawmna zawk pawh eng mah hmuh tur a awm lo.

‘Ka u nen hian kan pa a in anga,kan nu erawh ahrang a ni a.I lo hre tawh em ka hre lo’ min bia pawh a ang lo. Kei erawh ka thaw hak thung. Hriatpuia nu nen in anna reng reng an nei lo kha ka hre thiam ta chiah.

‘Kan thil sawi lai nen inzawmna a neih pawh ka hre lo’ ka ti hmak.

‘Um,nia.Nei lo,mahse i hriat atana ka duh chu ka u hi ka u ni mah se ka tana tha tur a ngaihtuah khat viau ania.A awmzia chu i thinrimna tur a sawi anih chuan ka hriatpui lo’ a aw ngaihthlak a nuam lo. Ngaipawimawh lo hmel zetin ka thle bak,diktak chuan ka ngaipawimawh reng. Mahse, keia lo buai ve angai lo.Inngeih lo phat thin mah se unau chu unau anni tho tho.Ka inhera,Tukverh ka nawr tawlha,Room chhungah ka pen lut nghal vat. Ka thawmhnaw ka laa,inthlak a haw ka duh.

‘Enge i tih a?” ka hnung mai atangin a rawn ti sup. Min zui zel tih ka hre lo.

‘Ka haw dawn mawle’

‘I haw tawh dawn lo’ a aw ring lo mah se a chiang kek kawk viau tho.

‘Aih, ka haw duh tlat.Min dang thei lo bawk ang.Bakah,inneih aia pawimawh chu tunah hian min chhaihbuai tu hi hriat ka duh’ luhlul zetin ka ti a.

‘Ok,ka buaipui mek,an hre chhuak thuai ang. Chuan, i nu in a hmu duh che a’

‘Ka hmu duh lo’ ka ti that.Ka inhera,a mitah tak ka en a, ‘Inneih pawh ka duh lo,nanga hmanrua mai mai nih ka duh lo’ ka ti leh hmak.

‘Hmanrua maw? Eng hmanrua nge?” a dar a ti sang uk bawk. A awmdan chu ka ngei hluah hluah a ni ber.

‘I planah pawimawhna ka neih vangin min neih hi a tul a’ ka nui zui hak. Ka nuihzat loh zia erawh ka nui ri hul hak maiah chuan alang reng thung.

‘Min en teh’ a ti sup. Ka hre lo der hmiah. Kawngkhar lam pan tumin ka pen zui nghal zat bawk.Mahse, pen khat chauh ka pen hman tihin ka hnung lam atangin ka kawngah a rawn kuaha,amah si chetin min pawt bet zui nghal hmiah.

‘Min thlah rawh’ tih pahin ka tal phat.Mahse, min kuahna a nghet sauh thung.

‘Ka u thilsawi ka hre lo,mahse min ring rawh. I telve ngai plan ka neih chu kan inneihna leh kan chhungkaw din tur chauh a ni a. Abak engmah thil tenawm ruahmanna ka nei lo’ a aw pa zet leh nghet churh chuan dawt a sawi lo ang tih min rin tir lehnghal hmiah thei!! Mahse, tlawm mai mai ka tum lo.

‘Ka ring lo che’ ka chhungril nem tan mek khuh nan ka awchhuak erawh alang ram hmak.

‘Ka sawi tawh kha,min ring turin ka tilui thei lo che.Mahse, min ring emaw ring lo emaw ka pek theih zawng zawng pek che ka duh’ a ti leh hrawk.

‘Engvangin nge i u khan in planah pawimawhna ka neih thu a sawi si? ‘ ka ti leh hlak.

‘Ka u mizia ka hrilh che kha,ka tana tha tur angaihtuah khat lutuk’

‘Mahse….’

‘Kal suh,ka Hmangaih che a. Ka bulah awm rawh’ ka khawng nghal lah mai.

‘Maw?!” ka ti sep.

‘Ka hmangaih che,tinge sawi kher angaiha?” a ti leh sup. Ka mit ka chhinga, ka mittui a rawn tlaa.Ka biangah a lum thla nghal pap bawk.Min Hmangaih…Min hmangaih…

Amah en thei turin min kuai hera,min kuai dak zui nghal zat. A mit sen deuh leh thim raih maiah chuan chiang takin ka duh ka hmu thei.Ka mittui rawn hnam leh tur dan kir tumin ka khap sak saka. A rawn kun hniama,ka mit ka chhing nghal chial thung. Ka biangah ka mittui a rawn luang leha,hruk pawh ka tum buai peih lo. A hmui lum ham hamin ka biangah a rawn fawpa,ka mitah a fawp leh dun dun bawk.

‘A la hma lutuk maitheia,mahse ka Hmangaih che’ a ti nawn leh sup.

‘Kei pawh…’ Ka tah nuih titiha,ka mengchhuaka.Ka biang tawn tawnah dimtein a kutzungpuiin a tuaia. A kawngah ka kuah ve thung.

‘Sual reuh lutuk’ a ti hluk.

‘Ka sual maw?”

‘Um,sawi kher ngai lo pawh hi sawi turin min nawr chep ziaha..’ ka hnar kawnah a rawn fawp leh zauh.Hlimna hi ka ta a ni. Darkar tam pawh a liam hmain ka rilru hi a inthlakthleng hneh lutuk ringawt.

‘A nuam emaw a hrehawmah pawh ka nupui tak ni turin ka nei che ‘ Hriatpuia awki hniam leh thawp sutin a tih laiin ka tahchhuah mai loh nan ka insum tang tang angai ve thung.

Kan inneih atangin thla a liam tawha,ka nuin ka man a dawng ta ngeia, Duh lo eng ang mah ila chhungte dang ka man dawngtu tur takngial pawh ka nei tlat lo. Ka nu chhungte lam vek anni a, Ka nu thu lo chuan ka man an dawng dawn lo tih ka hming ka hriat chian tlukin ka chiang. Bakah,ka nuin Hriatpuia a duh viau .Nia,sum a nei tlata. Mawi leh mawi lo pawh thlu loin a za kual leh viau bawk. Hriatpuia min ngen lawk angin rei a ni lo bawka ka nu nena intihbuai ka tum ta bik lo. Nu anih angin ka man adawnga,a tawk viau e. Remruata pawh atir lamah thil ka hrilh mumal loh avangin a titau deuh bur bura,mahse kan inthian dan hi a satliah lo lutuka,chutiang mai maia tawp chi a ni lo. Kan inneih meuh kha chuan a phur ber ber a ni leh tawh.

Hriatpuia nen Aizawlah  kan let leh tawha, awm ve deuh ka tum nangin ka chhuk leh ta zawk. Fapa mal nupui ka ni a, a nu leh pa bulah ka pasal tel lo pawn cheng ila a dik lohna a awm lem lo.Karkhat vel kan awma,an chhungkaw awmdan tlangpui a hriattheih ruak. A pa,palian dam thlup mai a ni a. A tawng duh vak lo,a nu erawh nu nih tlin leh Pasal fanau ngaihven em em mai a ni a.A mizia a tlang em em bawk. Hriatpuia u pawh a fahrawn ang pawn a en lem lo. Mahse,kei erawh chuan a u kher hi chu engtikahmah ka mil ngai dawn lo tih ka chiang vek tawh thung.

‘Machhuani i be lawk tawh em?” insiam mawlh mawlh pahin Hriatpuia’n min ti a. Khumah bawpkhawkherhin ka thu fel at.Hriatpuia nen kan sawidun fe hnuah hna ka bansan ta nge nge a. Mahse, In lam atangin Hriatpuia sumdawnna,ama mimal ta ka buaipui thung dawna. Ka phut miau avangin hlawh ka nei dawn bawk.

‘Aw, dar 2 velah ka kal ang’

‘Um,tlaiah Zama a lo thlen ka ring’ a ti leh a. Zama hi a sumdawnna enkawltu,a manager a ni a. A ring em em tih la rei lo mah se ka hre tawha.Manipur lam mi niin hna a thiam a,Hindi a thiam em em bawk. Hriatpuia pawh hian Hindi a thiam viau tho chungin Zama chu la tluk lo tak a ni.

‘Ka let har lo ang ka ring’ ka ti a.

‘Ok, Eeee,niminah Rosanga’n min rawn biaa. I mail leh rawn be tu che kha an la hre fuh mai thei lo a. A rin aiin a harsa a ti a. Mahse, an la bei meka’ a ti leh a. Ka bu nghauh. Hlauhlawpa min siamtu kha tun thlengin hriatchhuah ala nita miah lo a. Hriatpuia thianpa Rosanga hi CID lama an chhuanvawr tak pakhat a ni a, ani pawn harsa atih chuan a harsa viau anih ka ring ve tawp. Mak takin Hriatpuia in a ka riah hmasakber zan bak kha chu min rawn be leh ta lo a, a reh rei tak deuh bakah kan inneih boruak vel nen khan ka phi buai ve a, kei pawn ka ngaihtuah chhuak ta meuh lo. A reh hlen dawn pawh a ni mahna le.

‘Ngaihtuah hah suh, a reh hlen tawhin ka ring’ ka lu a rawn vuana,ka samah a rawn fawp zauh.

‘Nia..’ ka ti halh.

‘Ka kal aw..Lo haw hma ka tum ang’ a ti leh a,ka thle bak.

Dar 2 rik hma hretin in ka chhuahsana, Machhuani te in lam ka pana. A lo insiam peih thlap tawh.

 ‘ Ka rilru hah lutuk tawp,Andy pawh ka la hrilh ngam lo’ Doctor kan nghah laiin a ti sap. Nau achhiata,chhiat satliah emaw a intih laiin chhul Cancer na chance sang zet mai a lo nei zawka. Andy-a ,hnathar zawm tura khawdanga a kal hnu lawk a ni bawk nen,a buai chiai viau.

‘Eng em a ni lo ang. Hrilh lo phawt rawh. Hlauthawng  lutuk lo phawt la,Pathian a awm alawm’ ka ti a. A rilru tihnawm nan ka nuih var var bawk. Mahse, kei pawh ni ila ani ai mah hian ka hlauthawng dawn tih ka hria.

‘Nia,ral atang chuan inngaihtuah ana bawk nen .Bakah,ka nu leh pa pawh ka la hrilh chuang lo. Awi, ka chau ngawih ngawih animai’ a ti leh hap.

‘I tha em em ang’ ka ti leh a. A bu nghauh.

Test eng eng emaw kan nei kual leh teuh,atuk lamah Test report entir tura kal leh ala ngaia.Amaha kal angam lo a, bakah keipawn buaipui hi ka tihtur rengah ka dah ve hrim hrim.Haw hma ka inrin nen kan buai nek nek chhungin ni a tla fel der. In lam pana ka tlan meuh chuan khua a thim thut thut tawh.

Kan veng panna,in awm lohna fal laiah muangchangin ka tlana. Kawngkawi ka chhuak chiah erawh ka rin loh lutukin khawi atanga lo chhuak nge pawh ka hriat loh khawpa rangin Hmeichhe pakhatin min rawn su a, ka theih tawpin Brake ka hmet nghek. Ka inrahkhalh nghala,mahse ka ding zo lo,ka vir deuh nawka. Ka tleng zui nghal a,mahse kawngphei anih avangin thui erawh ka tleng lo.

Khur zawihzawihin ka mutna ngaiah ka mu a,hlauhthawnna avanga ka lungphu rang lutuk ri dut dut bak thawm eng mah a awm lo. Ka tho a,ka din zawngin ka khup a na nghal zawk. Ka thu leha,ka khup ka en dawna..Ni lo,min rawn su tu kha.

Ka hawikual nghala,ka piah lawka mihring tlu reng ka va hmu a. Ka luak a chhuak nghal ut ut. Min su zawk pawh nise mihring anih miau avangin ka thiam lo. Ka pan phei a,ka rilruin ‘thi suh,thi suh’ ka ti mawlh mawlh. Tim deuh daiin ka zuk khawiha,a thim avangin a hmel ka hmu chiang thei lo.

‘Thiannu,I tha em?” ka ti a. A rum tiah tiah ringawt. Ka phone ka phawrha,light ka on a. A hmel chiang takin ka hmu thei,thiin ahmai a bual sen nuau a..Rap zetin ka tawlhhnung dawrh thung.Khur zawih zawih chungin ka pan hnai leha,che loin a mut ngaiin a mu a. Ka kawchhung a fan vek. Ka luak a rawn chhuak leh thuta, ka tlansawn vata. Mittui tla phung khawpin ka uak zui chiam.

Ka luakchhuak zualpui a reha,ka ding mara. Motor lo kal an awm mai ka beisei laiin a reh tlawk tlawk. A reh dan em em chu a rapthlak thei lek lek zawk. Ka rilru ka tihfim angai,min tanpuitu tur ka koh angai bawk. Ka phone ka dapa,ka lo thlauh lo hlauh.Hriatpuia ka call nghala.A pick lo,ka call nawn leh dawn chiah tihin a rawn call back ve chiah.

‘Mate,I lo thleng dawn tawh em?” a rawn ti nghal a. A aw a min duatna ri chuan ka tah a tichhuak nghal phat.Insum ka tum hle chungin ka mittui a rawn tla a.Ka insut zui nghal hraih.

‘I tha em? Khawnge i awm?” amah bawkin min ngaihtuah tih hriat zetin a rawn ti leh a.

‘Enteh,eng lo….Ka tha lo,mi ka su..Ni lo,min su’ ka insut leh hraih.

‘Ok..Hahdam la,khawiah nge i awm min hrilh rawh le’ naupang bia ang maiin min rawn bia a.In control tumin ka thaw hak, ka awmna ka hrilh a. A lo kal nghal tih a sawia,che sawn miah lo turin min ti bawk.

Ka bula tlu reng chu ka melh leh zawka, a hmel ka en tha ngam tawh lo.Mahse, thil pakhat ka tih angai..Khur zawih zawih chungin ka thuhniama,a hnar bulah ka kut ka zuk daha,a thaw tih ka hriat rualin ka thaw huai. Ka ding mar leha,tu eawm tal lo kal se ka ti ngawih ngawih.Mahse, mak takin Motor lo kal reng reng an la awm chuang lo…

Scooty lam ka pan pheia,ka khup na avangin ka ner sawk. Harsa ti zetin ka Scooty ka tung a, kawngsirah ka hung thaa. Ka mi sut lam ka pan phei leha..Mahse, ka ding chawt.

Ni lo,tumah an awm lo…Ka hawi kuala,ka hmuh phak chinah mihring chu sawi loh Ui takngial pawh an awm lo!!!

Chapter- 19

A ni thei lo,harh pawh a harh miah loh laiin engtin nge tunah a awm loh thut theih ang? A kal sawn thei miah lo ang. Bakah, kalsawn thei pawh ni se ka ding renga, a thawm ka hria ang. A tlukna lai ni a ka hriat ka en a, thisen far eih pawh a awm lo. Ka Scooty tawlhna hnu erawh chiang takin a lang raih thung si.

Kawngkawiah Motor a rawn langa, kawngsirah ka ding vat. An rawn inzui teuha,a hnung berah Hriatpuia a rawn thleng a, ka dinna sirah Motor a rawn tiding. Hmanhmawh zetin a rawn pen pawk pawka,min rawn kuaha,kuah let ve loin ka din ngaiin ka ding khawng lah thung.An lo thlen hma zawnga Motor kal miah si lo kha tunah lem Motor an rawn tlan dawt zut!!

‘I tha em? Pengah tak Motor a lo chhiaa,ka rei phah veka” a ti nghal sup. Chuvang chiah chu anih chu tunah khan Motor an rawn tlan ni? Mahse, tunah a pawimawh tawh lo. Ka bulah Hriatpuia a awm tawha,a tawk mai.

‘Mate…Khawi lai nge na?” a ti nawn leh a.

‘Kei chu ka tha in ka hria.Mahse,ih…a awm tawh lo’ ka aw a lawi vek. Thup tum teh mah ila ka zamzia ka awah alang vek tho.

‘Tu maw? ” a ti a. A hawikual nghal a.

‘Helai ka thleng chiah hi a lo lang thuta, min rawn su a. Ih,sawtah sawn a mu a.Mahse, Scooty ka hun sawn chhungin a bo daiha’ ka ban ka vaia.

‘Ok..Ok, a na vak lo anga. A harh thut anga,a kalbo aniang’

‘Aih, chutianga kalbo mai tur chi a ni lo. A harh miah lo’ ka ti leh chiam.

‘Na i nei em?”

‘Kei ni loin ani zawk kha ngaihven rawh’ ka ti that.

‘Awle,ka’n enkual ang. Hahdam rawh, Motorah min lo nghak la..’ a ti dam thlup. Motor lam min panpuia,kawngkhar min hawnsaka. Mahse, a kalsawn tur a kawrah ka pawt tlat.

‘A tha vek ang,hlauh tur a awm lo. Ka enkual lawk anga, ka rei lo ang’ a ti dam leh thlup.  

Motor chhungah keimahin ka thu a, Hriatpuia teikual vel ka en kar. Ka ngaihtuahna so bulh bulh chuan min ti vai deuh ruaia,ka luak a chhuak em em bawk. Ka mumang nihram se ka ti lutuk,Mahse,a ni der si lo. Na tuara let reng,ka koh laia rum tiah tiah kha ka mit leh bengah a cham tlata,rapna hlirin ka khata. Ka thaw tha hleithei hek lo.

A rawn let pheia,Motorah a rawn thu lut ve nghala.

‘I hmu em?” ka ti khur dar dar.

‘Aih,hmu lo..’

‘Engtin nge kan tih ang? Khatianga bo thut chu thil pangngai a ni lo a’ ka tah achhuak ngawih ngawih.Min rawn bana,amah si chetin min pawm beta,ka hnungah a chul hauh hauh bawk.

Kan dinna bulah Motor a rawn ding dawta, ka phu zawka. Ka thu mar nghal awk bawk.Motor kawngkhar inkhar ri dawt ka hre leha, ka zuang lo chauh.

‘Shh,Rosanga te an lo thleng anih saw’ a ti dam leh thlup. Rosanga a rawn dak zui ve nghal zat bawk. Min kuahna a thlaha,Rosanga lam a hawi a.

‘Ka tum aiin ka rei alawm le,Bus a lo inturn sual peka,thlang lam a hawi vung mai..Mami,nang mah i tha em?” a rawn ti nghal bawrh bawrha. Ka bu nghauh ringawt. Min en deuh vang vanga, Hriatpuia a en leh a. Kei erawh chu ka chiai lutuka,ka khur a reh hleithei lo.

‘Min kalsan ula,thil dang chu ka lo buaipui mai ang.Mami hi Damdawiin lamah kalpui a that ka ring’ a ti leh nghal a.

‘Aih, ka tha…Ka tha veka’ ka ti nghal thuai.

‘Lawk,thianpa..Inbe lawk ang’ Hriatpuia’n a ti sup. Ka hawi leta, Rosanga rawn kalpui, Police uniform ha ka va hmu a. Ka tlukna lai vel a phone lightin a en kual a. Ka khur nasa zual sauh. Hriatpuia Motor atanga chhuah atum mek chu rang lutukin a kawrah ka pawt nghal vat.Min rawn en nghal vut.

‘Mate, a rei lo ang. Hlauthawng suh’  a mitah ka en a. Rin mai ka ngai.

Pawnah a chhuaka, Rosanga nen an ding duna, enge an sawi ka hre lo. Reivak loah a lo let leha,min rawn en a.

‘A tha vek,a lo chingfel ang’ a ti nghet churh. Ka mi sut,bo ta daih si kha ahrilh angem ka hre lo. ‘Ka hrilha,mah se amah chauhin a hria ang’ ka ngaihtuahna hria niawm takin a ti leh sup. Min rawn bana,ka biangah a rawn khawiha. Dimtein a chul zui hauh hauh bawk.

‘Scooty hi chu nakinah Ramthanga ten an va la mai ang’ a ti leh a. Ramthanga hi Pu te Driver zinga pakhat a ni a. Mahse, Hriatpuia bulah a awm tam mah zawk.

‘A khup hi a pilh nasaa. A na deuhin ka ring.Mahse, ruh lam chu a khawih lo.A ban hi kan thui anga,hei pawh hi a thuk vak lo a.A dam har lo ang.Naktuk lamah chuan a sil viau bawkin ka ring’ Doctorin Hriatpuia hnenah ka hliam awmdan a hrilh mawlh mawlh. Ka khup na zawk zawk chauh emaw ka tih kha a pilh duaia,ka ban vei lam a kak thla bawk.

Roomah ka dinga, ka thawmhnaw hlih ka tuma,mahse rang zetin Hriatpuia’n min rawn dang vat.

‘Ti suh, keiman ka lo ti ang’ a ti nghal sup. Hnial pawh ka hnial buai peih lo. Min dah ang angin ka awm mawl tawp.

‘I ril atam em?” a ti a.

‘Aih..’

‘Tlem tal ei la a tha,eitur ka zuk la ang’ tih leh thawh a ruala.Mahse, rang lutukin ka thuchhuaka,a kawngah ka kuah vat. Ka chet zawnga ka ban na zawk leh ka luhai vangin ka then nawk..

‘Kal suh…Keimahin ka awm duh lo’ ka aw a ri chang chang.

‘Um,ka kal lo ang..’

A rawn mu ve a, a kawngah ka kuaha,a dar ka kham bawk. Ani erawh chuan ka hnungah a chul hauh hauh thung.’ Muhil rawh le’ a ti sup.

Ka mit ka chhinga, mahse ka mit ka chhin rual rualin ka mi sut,hmai thi hnuanga let reng kha a lo lang nghal zat. Ka rak chhuak nghal thawt bawk.

‘Shhh..A tha vek ania’ Hriatpuia’n a ti dam thlup. Ka thlamuang deuh huaia,mahse ka khur zawih zawih erawh a reh chuang lo.

‘A hmai kha thi hlirin a khat vek a’ ka ti tham tiak.

‘Mate, sawi angai lo…’

‘Khawi maw laiah a lo thi reng theia’ ka aw a khur nasa lutuk.

‘A thi lo ang.A kalsawn thei anih chuan a tha tawk tihna animai’ a ti sup.

‘Aih,harh pawh a harh miah lo a.Ih,Rosanga te khan min man angem?”

‘Engvangin nge an man ang che? Engmah iti sual lo’ a aw pa zetah chuan inrintawkna chiang takin alanga, mahse tunah tak hi chuan ka ring zo lo.Na tuara let reng kha a hmu ve tlat lo.Engpawhnise min hnem a duh tih ka hria.

Muhil loin ka mu meng kara,ka mit a kham thum a.Ka taksa pem lai a na ut ut bawk. Hriatpuia tihharh hlauin dimtein ka thuchhuaka. Bang nghengin ka thu a,ka khup ka tun ngam lo. Hriatpuia ka en a, a muthilhna ala rei bik lo. A saisir zawngin a mu a, a thaw sak sak bawk.

Room kawngkhar inhawng thawm niawm takah  ka harh zawk. Ka thuchhuak mai dawna, ka khup leh ka ban na vin thak mai ka hriat rualin ka mu thla lehnghal vat. Thil thleng ka ngaihtuah chhuak nghal zat bawk. Beidawng zetin ka thaw hawk mai. Nizan khan ka tlaivar ta thaka,khawvar tantirhah ka chau tawngkhawng lutuk ka muhil ta chauh kha ania….Ka lukham bula ka phone let ngat ka bana,sana ka en a. Dar 11 a pel va tawh.Ka beisei loh tawpin ka lo mu tha zek anih hmel e. Mumang lam thlenga min tihbuai hlau em em khan ka awma,mahse mumang ka neih awm pawh ka hre miah lo.

Kawngkhar inhawng thawm ka hre leha, ka inleta,Hriatpuia lo lut mek ka va hmu a. Tunah dar 11 a pel tawha, hna a kal lo tih achiang.

‘I harh tawh maw? I tha em?” Khumah a rawn thu thla nghala,ka chhan hmain a rawn kuna,ka chalah a rawn fawp zauh.

‘Aw, ka tha..Ti nge i kal loh a?” ka ti sap.

‘I damloh hi’ a ti awlsam mai.

‘Aaa, chutianga tha lo pawh ka ni lo a’ ka ti nghauh. Thawh ka tuma, min rawn pui vat. Damlo na lutuk ang maia min treat chu ka duh chiah lo. Mahse, ka khup na chu thuhran,ka ban a na tel ve miaua,mahni maia thawh chhuah ka harsat viau ang tih amah ka rinchhan nasat danah ka hre thiam nghal thuai thung.

‘Luhlul lo mai teh’ a ti nghut. Mahse, a thinrim lo tih ka hria,a tawngkam bung leh no lo zet hi chu a pianpui tih ka hre tawha,ngaiah ka nei titih tawh.

Khum atanga chhuk ka tum min pui leha,ka khup lehlam ka ring ngam lo.Inphihfai  ka duh avangin Bathroomah min luhpuia. Kal thei lo khawp ka ni lo nangin ke lehlam chauh chuan a nuam viau lo. Bakah,ka taksa a na vel vek. Ka sil thum a ni ber zawk. Mahse, nizana Doctor khan a sawi lawka,Accident chu a tirah ai chuan a tuk lamah a na duh zawk tih a sawi tel bawka. Ka taksa na leh sil thum hi chu mak ka ti lem lo.

‘I chhuak dawn lo mi?” ka ti hlak.

‘Dawn nang’ awlsam zetin a ti vut.

‘Kal rawh…’ ka ti leh hmak. A thle buka,kal tum awm pawn a awm chuang lo.

‘A zahthlak loh em mai’ a ti leh mai.

‘Aih, chutiang a ni lo. Kal rawh’ ka ti leh a.

‘Mate…’

‘Aih,ka ti thei vek’ ka ti leh hlar mai. A ner deuh nawka,min ringngam lo niawm takin min en deuh vung vunga, hreh hmel zetin a bu ta nghut.

Muangchangin ka inphihfaia,Darthlalanga ka hmel lo lang chu ka en a. Ka hmai a dang deuh lapa,ka mit hnuai a val kual raih bawk. Thawklehkhatah Darthlalanga ka hmel lo lang chu keimah ni loin ka mi sut hmai thi hnuang hmel khan a rawn inthlak thuta. Ka let dawrha,Tap hnuaia bucket awm ka nawr per lawpa,ka khup a na zawka.  Chhuatah ka thu sawp thla nghal hnawk. Ka khup na ut ut ai chuan ka thil hmuh khan ka ngaihtuahna a luah zawk.

‘Mate….’ Kawngkhar bul atangin Hriatpuia’n a rawn ti nghal vat. Kawngkhar a rawn beng zui dawt dawt bawk.

Ka thaw kawk kawka,Bahtroom chhung ka en kuala, Keimah lo chu tumah an awm lo. Nia,an awm lo ang. Ka hlauthawng lutukin ka hmusual tih ka hria. Muangchangin ka tho chhuaka. Kawngkhar ka hawnga,ka hawn rual rualin Hriatpuia a rawn inzep lut nghal a. A hmela hlauthawng hmel lang chu amah ka hriat hnuah a vawikhatna a ni.

‘I tha em?” a ti nghal vat.

‘Aw, aw…ka tawlhthlu tep a’ ka ti a. A rilru tihnawm nan ka then lui sak bawk. Min chhang loin min thlek kual dun duna,a thaw deuh hawk.

‘I ban kha a thi leh anih kha’ a ti hmuk. Ka en vata,a tuamna puan vara thisen tharlam zet rawn tlang chu ka hmu ve nghal zat. Ka tluk zawng khan engtin emaw ka ti palh leh a ni ngei ang. Darthalang lam ka melh zawka,keimah ka inhmu a. Thil danglam a awm lo.

Nilengin khum ka chhuahsan lo tluk a ni. Hriatpuia erawh room chhungah hna a thawka,a khat tawkin Ramsanga nen an inbiaa,Zama nen an inbe zauh zauh bawk. Rosanga erawh vawikhatmah a biak ka hre lo.

Ka ngaihtuah naah thil thleng kha a mal malin alang zut zut renga, zan lam ka mut that loh avangin ka mut a chhuaka,mahse ka muhil thei chuang lo..Thil mak tak a ni.A thleng thuta, a reh leh duka. Police lam lah khan eng mah sawi zui an nei si lo. Hriatpuia khan Rosanga kha mi ka su tih a hrilh ngei anih si chuan engvangin nge tun thlenga chanchin eng mah kan la hriat si loh? Min zawt fiah tur tal pawn lo kal tur anni a. Tu mah an lo kal si lo…Thil dang ala awm cheu,engvangin nge ka Accident lai velah kher khan kan veng panna kawng kha a tawn tawnin Motor tlan tlang theih loh anih kher le??

Machhuani nen chhuah dun kan ngai tih ka hre chhuaka,ka biaa.Ka rin ang ngeiin min lo nghak reng tawh. Ka accident tih ka hrilha,mangang zetin ka that leh that loh min rawn zawt nghal chul. A rilru tih hah belh ka duh loa.Ka thil tawn zawng zawng pawh ka hrilh ta lo. Remruata ka ngaihtuaha, hrilh ila a tha maithei..Mahse, Phone atanga sawi tur chuan ka duh lo bur thung.

Ka accident atangin kar a liam tawh. Harsatna em em ka nei tawh loa,ka hlauhthawnna pawh a ni telin a reh tial tial bawk. Ka accident tirh khan tul ka ti lo chungin Hriatpuia’n a u te awmpui nula,Cachar lam mi Sanjana-i kan hnena awm turin a ko pheia. Mahse, Hriatpuia leh a u an lo inbiaa. Kan hnena awm nghet turin an lo ti a. Amah Sanjana-i lahin a lo chak phian zui bawk. Mahnia nitin awm ai chuan kei pawn ka duh zawk.

‘Ka lo ngaihtuaha, Rosanga khan engmah a sawi ta lo mi?” Hriatpuia hnenah chaw kan ei laiin ka ti a.

‘Eng ber?” a ti a. A thil ei lai a ei zawm mawlh mawlh bawk.

‘Ka accident kha…’ ka ti sap.

‘Sawi tur a awm hleinem” a ti awlsam mai.

‘Eng lo…’ ka ti hman chauha.Min rawn en a, a hmel landan avangin ka tawp leh chawt.

‘Nakinah kan sawi dawn mi? tunah chuan chaw ei phawt la’ a ti sup. A tawng ring lo nangin sawi zawm a duh lo tih ka hre thei tho.Ngawirengin ka thil ei lai ka ei zawma.Mahse, tihtham ka ei lo.Ka thil ei chakna a bo vek tawh.

Khumah ka thu a,Hriatpuia a rawn thu thla ve a. Remote a kenga, en tur zawngin a hmet kual dun duna,kei erawh Tv lam ka en reng nangin ka ngaihtuahna hmun dangah a awm daih thung.

‘Sawi la….’ A ti sup. Ka en nghal vat bawk. Lukhamin a inkam kanga, min en loin Tv lam a thlir vung vung bawk.

‘Eng nge ka sawi ang?” ka ti nghauh.

‘Nichina i sawi tum kha mawle,Tunah pawh ila ngaihtuah reng tho a’  a ti leh nghut.

‘Nia…Eng lo,ka mi sut kha eng mah chanchin sawi zui tur a awm miah lo hi mak ka ti a’ ka ti sap.

‘Min en teh’ a ti vawt ruih. Angaihna hre lo zetin ka en a, a rawn thu chhuaka. Ka khabeah a rawn dawma,a mit  fiah zetin ka mitah tak a en a. Ka ngaihtuahnaa awm zawng zawng a hmu tlang vek in ka ring hial.

‘I accident khan tumah i su lo..’ a ti vawt ruih. Kei erawh ka ip chawih thung.

‘Maw?” ka tichhuak nghal halh.

‘Tu mah i su lo..’

‘Aih, ka su…’

‘I su lo…I hmusual palh a ni maithei,I lo hmusual lo anih pawhin amah zawkin a sut che avangin a harh rual rualin a kalbo tihna animai.Ngaihtuah tawh suh’ nghet churhin a ti leh a. Hnial tumin ka ang ziaua,mahse a kut zungtangin ka hmui a rawn ti a. A mitmeng thim raih maiah chuan enge a duh ka hria. A thil sawi zawh chiah kha pawm turin min duh..Nia,ka pawm emaw pawm lo emaw enge awmzia awm chuang ang? Ka pawm lo anih pawhin tihtheih ka nei chuang hek lo..Ka bu ta nge nge.

‘Hlim la ka duh ber,thil tul lo buaipui loin hmalam hun zawk ngaihtuah la..’ a ti leh sup.

‘Um…A harsa ve a,mahse ka tum dawn nia’ ka ti sap. Ka ti tak tak bawk.

‘Fel reuh si, ka hmangaih che tih hrereng la..I hlim loh chuan ka hlim lo tihte pawh’

‘Kei pawh ka hmangaih che’ ka ti ve sep.

A rawn kun hniama,dimtein min rawn fawpa. Ka hmui a rawn nawr kaua,ngenngawl zetin ka hmui hnuai lam a rawn fawp leha. Ka chhang let ve nghal zat, Ka chhan let rualin a rum deuh hawka. Duhthawh zetin min rawn fawp zui nghal a..

Ka kawr a rawn zena,ka hnute a hum nghal chat. Ka thaw halh thung,ka accident hnuah sex kan la hmang dun leh ta miah lo. Ka kekawr phelh tumin a rawn pawt a, ka lo pui vat,ka panty nen a pawt thla nghala,ramsa koham lutuk ang maiin a che zui buan buan..A che buan buan chu pawi tih a hnekin nuam ti zetin ka chhang let ve nghal zel bawk…

Ka mal karah a rawn tla zepa,dim lo zetin min rawn zawm zui nghal zat. Ka thaw halh mai,che zui loin a chawl leh riha,min rawn en a. A hmelpa zet chu a phelh deuh phunga.A mitmeng tisa chaknaa khat chu hmuhnawm ti zetin ka thlira,ka insiamrem a.A kawngah ka mal pahnihin ka kherh bet nghal chial.A thaw hawka,a duh hmu tura a chet zui takah chuan nawmna nasa zawkin min rawn fana,eng mah ka ngaihtuah zui thei lo.Kan inmamawh tawnna sang lutuk chu a rapthlak thei lek lek zawk…

‘I ban kha ka tina leh em?” a ti sup.

‘Aih,na lo..’ ka ti a. A hnute hmur tereuhte ka hmet niap niap bawk. Kan inmamawh tawnna sang lutuk avang khan muang leh dam deuh zawk pawn kan che thei lo. Nawmna nasa lutuk khan vawi engzat nge a tawp pawh min thlen ka hre mai thei tawh lo.

‘I kut che vel kha a tawp loh chuan bul kan tan leh angai dawn ania’ a ti sup. Ka kut che a tawp nghal hmak bawk.

‘Ka thlan vek,I nasa reuh lutuka’ a nui zui hawk..

‘I sual e a’ ka ti hmak thung. Ngaipawimawh lo zetin a nui leh huk huka,ka nui ve ta nge nge. Hriatpuia ka tawn hnu hian ka nunah hian hlimna chauh thleng lo mah se achang hi chuan Khawvela mihlim ber niin ka inhre thin.

Ka insiam malh malh laiin Machhuani’n min rawn calla, ka pick veleh ka hman tawh em tih min rawn zawt a. ‘Hman tep, ka lo kal har lo ang’ ka ti a. Machhuani nen kan chhuak dun dawna,amah in check-up pahin ka in check-up ve nghal dawna. Scooty khalh leh tura ka rilru ala inpeih miau loh mai bakah Hriatpuia’n khalh a phal tawh lo bur.Phal pawh nise ka khalh ka ring tawh rih lo. Taxi a kal mai ka tum laiin  Hriatpuia’n Ramthanga min hruai turin a ti a. Ka hnial dawn uka,mahse Taxi lak kual leh ai chuan kan kalna turah Motor dahna a remchang tho a, ka hnial leh duh ta lo.

Machhuani kan lam kuala, ka Accident dawna kan chhuah dun bak kha kan la inhmu leh ta miah lo a, a inthup hle chungin a natna eng mah tihchian ala awm loh avangin a nun anguai em em tih ka hmuh rualin ka hre thei tho. A mu tha lo tih hriat takin a mit hnuai a val kual raih bawk.

‘Lut ila’ a ti a. Ka bu nghauh,Ramthanga Motor hung tha ka en leh riha,ka hawikual deuha. Ramthanga Motor hunna piah Café atanga hmeichhe Pakhat lo chhuak chuan ka mit a la nghal chat. A dinga, min rawn en a.A nui sak.Ka hmu tawh tih ka hria,khawiah nge ka hmuh ka ngaihtuaha…

Aw,amah kha…Min rawn su tu hmeichhia,hmai thi hnuanga let reng leh mak lutuka Bo ta thut si ngei kha a ni…

Chapter- 20

‘Hey,lut ang’ tih pahin Machhuani’n ka banah a rawn vuana, ka phu zawka,ka en nghal vat. Mak tih hmel zetin min lo melh reng chu niin.Diktak chuan kalpui ka nei tih ka hre chhuak leh chiah.

‘Lo han lut lawk la,Ramthanga saw ka’n be lawk ang’ ka nui lui saka. Min chhan let hmain ka mi hmuhna lam ka hawi lehnghala. A kalsawn tur chiah ka va hmu a. Ka rilru a hmanhmawh ru zek zek. Mahse, kawngngil phei thui lai tak anih avangin thui tak a lang phei a, mi kawmkarah a pilbo anih loh chuan hmuh loh zui mai tur a ni lo.

‘Um,rei lo la’ a ti a. Ka bu liam satliah ringawt. Inchhung lam pana a kal rual rualin kawng kan tumin ka che ve nghal phat. Kawng ka kan chho a,Ramthanga min tawk zawnga lo kal chu ka hmu a. ‘Chabi min lo pe,Motorah thil ka thlauha’ ka rilrua chhuanlam tur lo lang hmasaber ka sawi nghal pawp.

‘Ka lo la mai dawn mi?” ka rilru hre lo lutukin a ti vat.

‘Aih, keiman ka lo la mai ang. Machhuani a lut tawha, duh leh lo han lut ve la..Buaipui angaih takin’ ka ti leh mawlh mawlh. Min hnial loin Chabi min pe a. Ka laksak vat. Motor bul ka thlenga, ka hawileta.Ramthanga lut chiah ka va hmu a. Ka inher nghal phat,ka mi hmuh kawngpheia a kal zel chu ka va hmu a. Chak zetin ka pen nghal hlawk hlawk.Um phak ngei ngei ka duh,zawhna tamtak zawh tur ka nei tlat.

Ka kalchak bawka,ka hnaih sawt viau. Kal pangngai takin muangmarin a kala,Bag emaw thildang pawh eng mah ken a nei lo. ‘Ekhai..Mami,fimkhur ta che’ ka hmaah tak Pa upa lam pakhat adinga, ka mi um mek lam ngawt ka ngaihtuah avangin min tawk zawnga lo kal mek ka lo hmu miah lo!!

‘Sorry…Ka hmanhmawh lutuka’ ka ti nghal vat.

‘Hmanhmawh chuan niminah kal tur che alawm..Tak takin a pawi lo,keipawn kawng ka lo en bik lo va’ dam thluamin a ti a. A nui vur vur bawk. Ka nui ve saka,thupha ka chawi leh a. Mahse, ka rilru erawh kawngkawia kal liam lek lek tawh Hmeichhe pakhat hnenah a awm daih thung.

Ka tlan titih,kawngkawi ka chhuak chiaha. .Ka hmu ta miah lo,ka hawikual a..Ka kal tawhna lamah ka let leha,a awm lo. Khawiahmah a awm lo. Mi ka biak lai kha rei a ni lo a. Amah pawh ka hmu pha reng kha ania…..

‘I va rei ve…’ Machhuani’n min hmuh veleh min lo ti vat. A sirah ka thu thla ve a, ka ngaihtuah naah thildang aleng lo.

‘Hey…I va dang ve,I tha em?” a ti leh a. Chik zetin min en kar bawk.

‘Aw..Aw,tha..Ka hmelhriat hmuh ka neia,ka be lawka’ ka ti a. A rilru tihnawm nan ka then lui sak.

Machhuani Doctor hmuh hlanin keimahin ka thu a, ka ngaihtuah naah thildang alang thei hlawl lo. Ka mi hmuh kha ka hmusual lo tih ka chiang lutuk,amah pawh khan min hria niawm takin min nuih ve kha ania..Ni lo,kha thil thlen zan khan a mit a meng miah lo a, kan awmdun chhung kha a bawk si lo,min hriat chhan tur a awm miah lo. Nichin khan ka zui tih kha ahriat ka ring miah lo,ka zui chhung khan a lo hawilet loh mai bakah kan inhlat lutuk..Mahse,ka zui tih hria ang hrim khan a bo leh daih lawi si…

Machhuani incheck-up zawh veleh ka Doctor hnen kan pan leha.Ka accidentnaa ka hliam an thui leh ka khup ruh na leh zauh thin ka entir a, x-ray min tihtir a, min ensak lehnghal vek. Ka khup ruhno tlem a lo pem deuh a.Mahse, ka dim deuh chuan reiloteah a dam mai tur thu a sawia,ka hahdam hawk.

Khumah ka thu a, ka mitthlaah vawiin ka thil tawn a lo lang lehnghal zat. Ka hlau em ka hre lo,mahse ka awm a nuam miah lo tih erawh ka chiang.Min hriat leh hriat loh ai chuan amak lutuk na khan min tihah zawk daih. Hriatpuia ka ngaituaha,sawi mah ila awmzia a neih ka ring lo. Mi ka su lo tih min rintir a tum a,hahdam taka ka awm theih nan a theihtawp achhuah tih ka hriaa. Kha thil khan min tibuai tawh lo angin keipawn hria se ka duh miau avangin ka sawichhuak zen zen hek lo. Rosanga emaw Police dang hnenah sawi ta ila.Aih, thil tul lo tak a ni zawk ang. Remruata…Ni e,ani bulah tal hian sawi ila tihtheih a awm maithei..Midang ni lo,ka thian leh unaupa ang chiaha ka ngaih leh min ngaitu a ni a. Min tanpui thei em em ang.

‘Aw…’ phone a pick veleh Remruata’n a rawn ti zangkhai hah..

‘I buai nge buai lo?” ka ti tawng.

‘I pasal sual zet hian hna min pe ngheka.Zankhua pawn thawhtur ka nei ang’ nghal zetin a nui zui kur kur.

‘Chhe lutuk,naktukah inhmu dawn ila i hman angem?’

‘Chawei turin min sawm la,I bai ka ei chak’ a rawn ti nghal zat.

‘Tehreng,lo ei rawh. Mahse,nidangah..Naktukah chuan ni lo’

‘Hey, I tha em? I thutak riaua ka hriat le” a rawn ti leh a.

‘Tha lutuk,Doctor vawiinah ka hmu a. Ka tha vek’

‘A tha lutuk,lo dam zel teh. I damloh chuan kan Boss nuhah hi a che rapthlak thei lutuk ania’ a nui leh huk huk.Ka ner nghek thung. Ka mood leh a mood a inmil lo thak.

‘Nuhah nachhan pawh awm hawt lo a’ ka ti hlak.

‘Hah,I damloh lai khan a den thei lutuka, Mahruaii’n tereuhte i pai anih aringa’ a ti leh a. Ngeiawm zetin a nui leh a. Za lo zetin ka nui ve hak.

‘I ninawm…Naktuk chu’  ka ti nghauh.

‘Hman ka lo tum ang.Mahse, ka chiang lo.Tunlai chu tihtur tam Heavy a. Mizorama kan company Motor zawng zawng hi siam an ngai ta vek emawni tihmai tur a nia’ uar zetin a ti leh chiam .Ka then sak,hmui thei ila chuan a ban a vai kual chiam ang tih ka chiang.

Sanjana-i nen eirawng kan bawla,Mizo tawng a thiam nel nuala,keiin Hindi ka thiam mumal lo. Mahse, han chen dun takah chuan a lo tih theih ve viau tho. Kan han nui dun leh rih thin bawk.

‘Didi,kei chu Pasal ka hmu lo ang,ka pa pawn Ramhuai ang maia hmelchhia min ti a’ pai zetin a ti a. A sawidan a dik chiah lo nangin a sawi tum ka hre thei tho.

‘Aaaa,chutiang ini lo..Bakah,hmeichhia chu hmel a pawimawh lo,kan rilru a that chuan chu aia tha a awm lo’ ka ti vat. A hre thiam em pawh chu ka hre hlei law..Mahse, a bu vei nghat.

Fridge sira Stool sang zetah ka thu a, ka khupah ka khabe ka nghata,Sanjana-i phe dar dar chu ka en a. Ka khawngaih thut.Kum 19 vel a ni a,cher ria thel thawl leh duhthusama ngo lo a ni a. A sam lah  chu Steelwool hraw chi ang maia kir buk chhup ala ni zuia. A Pain chhia a ti leh pasal hmuzo lo tur anga angai pawh a awm lo hran lo. An hnam,hmeltha leh hausa ngaisang em em tan chuan a harsa ve dawn lutuk tlat.A hmeltha lo va,an hausa hek lo. Mizo a ka lo piang vannei ka inti thar vang vang mai.

‘Ka u a lo haw ‘ ka thilchhuan ka chawh hauh hauh laiin Sanjana-in a ti a. Ka Accident hnu atang khan eisiam leh insuk tih vel zawng zawng eng mah tih a phal lo bura. Mahse, eisiam nuamti em em ka nih avang leh ka accident na avanga che thei lo tawp ka nih loh avangin tunah chuan Kitchen lamah ka awm leh tlaitin tawh. Mahse,eng mah tih a phal loh avangin a lo haw hun dawn hnaiah Kitchenah ka awm anih chuan alo haw leh haw loh Sanjana-i ka entir ziah.

‘Motor atangin a lo chhuk dawn chiah’ a ti leh a. Kitchen kawngkhar bula Tukverh atangin pawn lam a bik zui leh dak dak. Motor kawngkhar inkhar thawm ka hriaa, rang zetin ka Apron ka hlip sawk sawka,ka khai fel hman awrh tihin Kitchenah Hriatpuia a rawn lut ve chiah thung.

‘I lo haw maw?” ka hriatsa reng nimahse ka ti a. A thle buk.

‘Enge itih a?” a ti nghut.

‘Sanjana-i thilsiam ka lo enpui a…I chau em?”

‘Aih,Doctor i hmu ta em?’ a ti leh sup.

‘Um…Ka tha vek ati a.Inthlak la’ ka tihzawm leh a.

‘Inbual ka duh,ka lu a na bawka’ a ti hluka. Ka chhan hmain a inher vut,rang zetin Kitchen a chhuahsan mek chu ka zui ve vat. Kal pahin Sanjana-i ka en a, a ha var lutuk tak mai langin a lo nui then tha,ka nuih let ve sak bawk.

Inchungah ka zui chho a, roomah ka zui luta,Chairah a bag a thehthlaa,khum a pan pheia,a vang zawngin a mu thla zui ve nghala. A pheikhawk a tlawhphelh zui nghal zat bawk.

‘Inbual la,thilei zawh veleh Damdawi i ei anga’ ka ti a. Thu ve loin khum bulah ka dinga, ka melh chhuk ran bawk.

‘Lo mu teh’ a lu rawn tihkan zauh pahin ati a, Ka thle bak.

‘I thawmhnaw hi hlip phawt teh’ ka ti ve thung. Mahse, ka sawi hre lo ang maiin a inlet a,a bawkkhup zui nghal daih bawk.

Thawm nei mang loin ka pan hnaia,dimtein khumah ka lawna,a chungah ka thu nghal zat.Ka bawha,a zakah ka zena.A rawn inlet thuta,ka kawngah a rawn mana.Ka inrin hmain min lehthal a.Min delhbet zui nghal zat bawk.Ka te that thung. Ka darah a hmai a rawn phuma,a thaw lum ham ham chuan min fan raih raih mai.

‘Naktukah ka zin angaia’  a ti a. A rawn hawichhuaka.

‘Maw? Khawiah?” ka ti vat.

‘Silcharah..Zankhat chauh’ a ti leha.

‘Um…Nangmahin maw?”

‘Aih, kalpui ka nei ang. Mahse, tu ber nge ala chiang lo’ a ti leh sup. Hnathil hi ka khawih tur chin bak chu hriat tumin ka zawt ngai lem lo.

‘Min ngai em?” a ti leh daih.. Ka en chho a,ka ner khum nak. Ka nui zui leh hak bawk.

‘Takzet?”

‘Um,ka ngai lo che…’ ka sawi zawh rualin ka kawr a rawn zena,ka te leh that. Mahse, ngaipawimawh lo zetin ka kawrhnuai a rawn nawr tawm chhoa,ka hnute a hum zui nghal a. A hmur a hmet hrual zui zat a. Ka thaw halh mai.Ka taksa a khawih hi ngaiah ka la nei thei ta miah lo,ka taksaa nawmna thleng thin hi atir atangin ala ngai ta reng.

‘Min ngai lo chiah maw?” a ti leh a,a awpa leh sexy zet chu hriat a nuam takzet.

‘Um,ngai lo tak tak…’ ka taksaa nawmna thleng tan mek chuan ka ngaihtuahna aluah khat vel vek.

‘Anih chuan min ngaih ngei ngei nan thil ka tih angai anih chu’

‘Inbual phawt rawh, damdawi ei pawh i ngaih kha’ ka ti ve thung. Mahse, ka sawi zawh rual deuhthawin ka hnute hmur a kut zungtangin a chep hrual leha,ka thaw leh halh. A kut ala chhuaka,hnai zetah min rawn en a,a mit thim raih maiah chuan angaihtuah ka hre thei.

‘Damdawi dang ka mamawh lo…Hei hi tunah chuan ka mamawh’ ka kekawr kawng a rawn zen a,a mal sei thlurhin min kherh bet a. A mipatna in min rawn si a..A inpeih thlap tih ka hria..

A rawn kun hniama,mahse kawngkhar kik ri a awm takah chuan a tawp chawta,lawm lo tih hriat zetin a phun zui hluk bawk. Kei erawh ka nui hak thung.

‘Nui lo mai teha’ a ti hluk. A tho zui nghala,ka tho chhuak ve vat bawk. Khum atangin ka chhuka,a pheikhawk ka khaia. Pheikhawk dahna lam ka pan phei nghal a. Hriatpuia erawh Kawngkhar lam a pan ve thung.

‘Aw, Sanjana’ Hriatpuia’n a ti hluk.

‘Inleng an lo kala…’

‘Ka lo chhuk ang,thingpui lo pe la’ a ti leh nghut. Hindi hi ka hmangthiam ve lo nangin an sawi hi a then then chu ka hre ve thung.

Kawngkhar a khar leha,ka hawi pheia. A kawr phelh tumin a kilhna a phelh nghal mawlh mawlh.A hmelpa leh induhtawk zetah chuan tun lawka thilthleng zo chiah kha ngaihbel tur eih pawh eng mah a lang leh tawh lo.

‘Ka intleuh zuai ang..’ a ti a. A kawr a phelha,khumah a thehthla a. A kekawr a phelh zui leh zat.

‘Inlengte pawh chu an hmanhmawh maitheia’ ka ti satliah.

‘A ho lutuk,Ramsanga alawm’ a ti liam puat.A lo kal dawn tih a hre sa anih hmel.

‘Um,anih chuan ka lo zuk chhuk ang..’ ka ti a. Khumah a kawr haktur ka dahsaka.

Kawngkhar lam ka pana,mahse ka kal laklawh laiin ka khup a na zawk. Inring hman loin ka rak nghal thawt bawk.

‘I tha em? ‘ ka bulah Hriatpuia a rawn thleng phei hman der.

‘Aw…Ka khup a na thut a’ ka ti a. Ka dingmara, awihawm loh khawpin a na a reh fel lehnghal hmiah.Tihfuh palh riau a awm anih hmel viau.

‘Doctor khan i tha vek a ti emaw ka tia?” a ti nghut.

‘Aw…Ti e,ka khup ruh hi a ruhno a pem hlek a ti a. A dam har lo ang a ti bawka.A serious lo em a ka hrilh lo che anih kha’ ka ti duah. Min chhang dawn emaw ka tih laiin ka chalah na vak loin a rawn pena,ka phu zawk.’Sual reuh lutuk..Awlsam hmel deuhin i sawia,keiin ka awih ngawt anga maw? Kitchenah khan enge i tih ka hria ania..Eisiam tura i lut leh anih chuan a pawi viau ang’ khauh zetin a ti nghut. Hnial chiam a sawt lo tih ka hria,naupang thuawih deuh ang maiin ka bu ta nghauh.

‘Kitchen luh khap ni loin eisiam tura luh zawk ka remti rih lo,I damfel hunah i duhtawkin i siam leh dawn nia. Tunah chuan enpui la,hrilh la a tawk’ a ti leh nghut. Ka bu leh nghata,ka nuia,lei ka chhuahkhum zauh.

‘Chiawm lutuk’ a ti supa. Mahse, a nui ve suk tho.

Ramsanga’n min hmuh veleh min lo be nghala,Hriatpuia thiante zingah chuan ani hi ka hriat hmasak leh ka nel ber a ni a. A best anih vang pawh ni loin ka ngaina fal nalh. Eng eng emaw sawiin kan ti ti luama,Hriatpuia lo chhuk hnuah erawh ka kalsawn a. Kitchen lamah ka awm ta zawk.

‘Ka kal aw…’ ka beng bula Hriatpuia’n a tih sup ri chu ka manghriat rei ruai chauh. Ka inleta,ka muhil zui lehnghal daih. Kawngkhar kik riah ka harh leh ta chauh,thawhphan pawh nei loin ka thuchhuak nghal zat. Mahse, thawmhnaw eng mah ka inbel lo. Khum atangin rang zetin ka chhuka,Sofaa ka thawmhnaw awm ka laa,ka ha nghal mawlh mawlh.Kawngkhar ka hawnga, Sanjana-i a lo ding al.

‘U,ka piin a be duh che a’ min hmuh veleh a ti nghal a.

‘Tu ka pi?”

‘Ka hre lo,inhnuaiah khuan a awma’ a ti awlsam leh mai.

‘Aw,ka lo kal ang, min lo nghak lawk mai rawhse’ ka ti leh a. A bu nghat,tu nge anih ang ka ngaihtuah thiam mai lo..Ka nu ka rilruah a lo lang zawka,mahse anih ka ring lo. Kan inneih hnuah han intihthat zui chiam tul ka ti lem lo bawka,min bia anih loh chuan ka be hmasa ngai lo. Inah rawn kal chhan tur a nei lo.

Ka inphihfai sawk sawka, inhnuai lam ka pan thla a. Living roomah kan thenawm nu a lo thu vang. Kum 60 vel bawr a ni a. Nu lian leh dam thluam mai a ni a, kan inbul nepnawi dawrah kan inhmu zauh zauh.Han innel viau tih tur erawh kan ni lo..Anihna takah chuan thenawmte nen hian inhnaih te te nisiin tumah ka la hre chiang lo,Hriatpuia amah chauha awm thin a lo ni a, inah a awm khat bawk nen hriat a nei mang lo. Kei ka awmna ala rei loh bakah ka chhuak mang lo a,keimaha ka awm lai atang tawhin thenawmte Ina len duk duk hi ka tihngai loh tak thil a ni ve hranpa hrim hrim bawk. Hriatpuia thenawm velah pawh hian Gate bul lawka nepnawi dawr nghaktu bak hi hminga koh theih ka la nei lo.

‘Engeni ta?” thutthlak ve pahin ka ti a. Sanjana-i thingpui chawiin a rawn lut ve chiah bawk.

‘Aa,engni lo e. A remchang em a ka lo lut ve zawk mawle’ a ti a.

‘Um,keini lah hi thenawmte han tlawh pawh hi nachang kan hre lo lutuka’ ka ti ve a. Thingpui ka tem hlak.

‘Niang chu,in inkhung ngar ngar ringawt maia,Inpa pawh hi a awm leh awm loh pawh kan hre ngai mang hleinem,tunah chuan i awm ve ta bawka,In velah kan hmu ngun ta deuh a.Tak takin han len chhuah hi hnaite pawh nise thil harsa tak hi a ni ve a’ a ti leh duah. Ka bu nghat ringawt.

‘Eng lo mawle,nizanah kan tlangval  leng lo hawin in Banga mi pakhat lawn lai a hmu a,tukverh bulah a inhamtang a ti maia,ka au a hmanhmawh deuhin a chhuk leha,a tlan vak a ti a.Mak a ti khawpa.Thil dik lo eng emaw thleng te a awm takin ka ti a’ amah bawkin a ti leh duah. Kei erawh ka hawi phawk hra mai.

Nizan khan Ramsanga khan chaw a ei ve nghala,Hriatpuia nen hna chungchang an sawi zawm leha. An rei dawn atih avangin ka mutsana,Hriatpuia lo mut lai pawh ka hre lo kha ania..

‘Chutiang ka hre miah lo,dar 10 velah ka mu a. Kan pa a mengrei deuh thunga,eng mah phei chu a sawi lo a’ ka ti a.

‘Dar 11 velah a ti anih kha mawle,Akhai,eng em a thlen loh chuan a that chu’ a ti leh a.

‘Um..Nia,thil danglam thleng a awm pawh ka hre mai lo’ ka ti a. Ka ngaihtuah naah erawh chuan thildang a awm daih thung.Dar 11 vel anih chuan ka mut pawh khan dar 10 a ri tawha,Hriatpuia te an mengreia, engmah thawm a hre lo nge min hrilh lo zawk ni??

‘A that chu a, tunlai chu misual vak vel hi an tam khawpa,ka lo hlauthawng deuh a.Hrilh hrim hrim che u ka duh mawle,khawnge in pa hi?” a ti leh a.

‘A zina,tukinah…’

‘A zin ve deuh reng chu anih hi maw..Aaa,kei hi ka thurei leh ta,Naupang School kal a hun dawna,chawei an duh taw hang.Ka va hawng ange’ a ti a. A dingchhuak nghala,ka tho ve vat.

Pawnah ka zui chhuaka,a ti ti zui mawlh mawlh. Kawt sira Pangpar dahna tur ka siamtir a en kual leh a..Ka pangpar lei thar, la pot chhuah loh ho tihdan tur min hrilh leh luam. Gate pawn thleng ka kal ve a, min kalsan hnuah dawr lam ka pan ve thung.

‘I va zia tawh hmel ve’ Noel-i, eichawp dawr nghaktu,nula senior fel zetin min lo ti nghal vat.

‘Nia,ka tha tawh lutuk’ ka ti ve a. Ka thil duh an neih leh neih loh ka zawta,an lo kawl hlauh.

‘Nakinah ka lo kal leh mai ang,Pawisa ka ak lo a’ ka ti a.

‘Awi,a ho em mai,I duh kha la la.Nakinah min pe mai dawn alawm, I inthlahrung anih kha’ nui chungin a ti a.

‘Aaaa…A hla chuang lo a’

‘Chuvang tak chuan la mai rawh,a ho em mai. Min pek har viau chuan in kawngkhar ka lo kik vak vak mai ang’ a ti leh a. A nui zui leh ar ar a. Ka nui ve hak bawk.

Ka thil mamawh ho ka lakhawma, mi dang an lo lut ve nak nak renga.Mahse, tu amah ka hre hlawm lo.Ka hmu tawh tih ka hriatte pawh an hming ka hre hlawm chuang lo.

‘Mam,lo la ding teh’ ka chhuah tum tawh min ti a. Ka hawileta,customer dang min biaksan leh riha,an chhuah veleh a bula thu turin min huia,angaihna ka hre lo.Mahse, ka thu ta tho.

‘Midang awm laia sawi ka duh chiah lo a,nimin piah atang khan sawlaiah sawn Mi pakhat a awm renga. In in lam a hawi a,atir chuan ka lo ngaihven vak lo a. Mahse, a tei kual sek renga. Ni hnih lai a ni tawha.Mak ka ti deuha’ a ti ta duah. Ka phawk nghal hra mai.Tun lawkah khan kan thenawmnuin nizana kan banga lawn an hmu tih a sawia.Tunah kan in enthla niawm tak an hmuh thu a sawi leh ta chiaha,thil pangngai leh thleng palh anih hmel ta hauh lo. Nizana banga lawn chu kan in enthla tu chu a ni tho angem? Huizzz,Hriatpuia a awm lo chiah bawk si…