SWEET DECEMBER BOOK 3 (Chapter 21- 26)

Chapter- 21

‘Anih chu a.. Enge maw a duh ni le? a lo kal leh hunah thla min lo lak ruksak thei angem?” ka ngaihtuahna tilang loin pangngai takin ka ti a.

‘Thei e,ka thutna atang hian alang thei alawm.Mahse, lukhum hmathlawk a khum ziaha,a hnar hnuai lam zawng a khuhna a hmang bawk sia, A hmel ka hmu chiang thei lo a’ a ti leh a. Ka ngaih a tha lo zual sauh.

‘A lo kal leh hunah lak ka lo tum hrim hrim ang,chuan lo call bawk che ila tiraw?” a ti leh a.Ka bu nghauh,ka number a neih loh avangin ka number ka hrilha.Midang an lo lut veleh ta bawk nen ka chhuahsana,In lam ka pana. Lut mai loin in lam ka thlir vang vang. Thenawmnuin a lawnna Tukverh atih chu Room ruak a ni a,thutkhawmna hmun zimte kan room nen a inkarah a awma. Room ruak tih takah ka tifai anih loh chuan ka lut ngai meuh lo.

Chaw ka ei kham hnu lawkah Hriatpuia’n min rawn calla,an thlen chin min rawn hrilha. Ka that leh that loh min rawn zawt tel bawk.

‘Enteh..Nizanah..aaa,angai leh lo’ ka ti leh lawi. Nizan thli thleng awm leh awm loh a kal hmain eng mah a sawi lo va,Room ruak lah ka check veka,thildanglam eng mah a awm lo. Zin lai laia a rilru nawm lohna tur lo hrilh ka duh leh lo.

‘Sawi la..’ a ti zangkhai vuh.

‘Aih,angai leh lo..I lo haw hunah animai. A hmanhmawhthlak loh’

‘Ok…Atha alawm.Hei kan kal leh dawn chiaha’ a ti a.

‘Um…I thlen hunah min lo hrilh la’ ka ti ve a.

‘Yes,Boss..’ a nui a..Ka nui ve hak. Tukina zin chauh nimahse ka ngai nghal vang vang tho.

Remruata’n min rawn calla, chhunah achhuah hman a rin loh thu a rawn sawi a. Ka down rawih thei.

‘Ka hma lo viau anga, mahse chaw ei tura min sawm chuan ka hman tho ania’ a ti leh a. Ka ngaihtuaha, hmundanga chhuah ai chuan a tha ngawt zawk tak ang.

‘Tha lutuk,lo ei rawh.Mahse, kan pa a awm lo ania’ ka ti nghat.

‘Ka hria,ka hria…A awm loh vang alawm nilenga ka chhuah hman loh” a rawn ti hlur. Ka ner nak mai.

Ramthanga nen leitha kan leia,kan haw leh hnuah Pangpar buaipuiin ka buai nileng ta thak. Leitha ka leina nuin Pangpar a lo ngah ngang maia,a zuar tlawm viau bawk nen ka lei ta teuh. Ka tihzawh meuh chuan khua a tlai ruih tawh. Ka chet paha engtin emaw ka tihfuh zawngin ka khup ana leh zawk thina,mahse chawplehchilhin a dam leh nghal zel lawi..Ka pangpar ho ka thlir kuala,kan area ruak huai kha tunah chuan a mawi ta viau,an par vek hunah phei chuan a nalh tham khawp ang.

Ka phone ka en a,thenawm dawr atanga min lo call mai ka beisei ru renga,mahse a lo call ta miah lo. A lo kal ta lo a ni ngei ang.

Remruata lo thlenin dar 7 a pel tawh,ka thawh ve chhung khan hun pangngaiah kan bang khat lutuk.Tlai hi thilthar a ni hek lo,mahse Hriatpuia awm hnuah erawh hunbi an vawng tha ta deuh a. Tul tawpah lo chuan hmeichhia phei chu kan tlai Over ngai lo…

‘Ka va puar ve’ thut hnawk pahin a ti a. Ka ner khum nak thung.

‘Ka thilsiam i ei khat lutuka,ei chin tawk i hre lo atin nih kha’ ka ti a.

‘I siam tui vang pawh ni loin ka riltam ve hranpa zawk alawm’ ngeiawm zetin a nui a. Ka melh vak,ngaipawimawh lo zetin a nui huk huk duh chauh.

‘Inpa chu engtik maw a lo haw dawn?” a ti leh a.

‘Naktukah aniang.Mahse,ala chiang lo’ ka ti a.A thle buk,thatchhe zetin hnunglam a ngheng a, a zi mar ur ur bawk.

‘Lo haw vat se,a awm loh chuan a buaithlak over a. Nang lah i thawk duh tawh mang si lo’ a tih zawm leh a.

‘Ka inti lal dawn lutuka,ka thawk zui lo hi lawm zawk rawh. Min rel nasat dawn tehreng nen’ ka ti a. A hmui a tisawi nghek..Ka nui hak hak thung.

‘Khawiah mah nang kha i sual viau lo ange a..E,Machhuani chu enge a an zel? Ka be khat lutuka’

‘Cancer theihna chance kha a sang angrenga, chhul paih mai angaih an ringa. Mahse, nimin kha chuan paih loa enkawl dan a awm an beisei leha. An refer maithei’ ka ti a. Ka ngaihtuah naah nimina ka mi hmuh leh Accident ka tawh zana hmai thi hnuanga let reng hmeichhia kha a lo lang zawk. A landan inang lo eltiang mah se Mi pakhat anni tih ka chiang lutuk tlat.

‘Hey….enge a?” ka hmai bulah a kut a rawn vaia. Ka phu deuh zawk,ka en a. Tihngaihna hre lo zetin ka nuih sak ringawt.

‘Hmm,I ngaihtuahna a nang mah chauha chen veng veng kha ila sim ta chuang lo cheu anih kha’ a ti leh a. Min hre chiang lutuk tlat,awm khawmna hmunah pawh ka ngaihtuahnaa lo chen veng veng avanga miin min biak pawh hriat loh chang ka ngah lutuk tlat.

‘Nia,sim a har ve a’ ka ti nghauh.

‘Anih chuan thil vei lianpui,mi dang share harsa si a awm tihna anih chu..A ni em?” a ti leh a. Ka mitah tak a en a,za lo zetin ka then sak. Kan inkawmngeih em em a,mahse hetiang khawp hian min hre chiang tih ka lo hre lo.

‘Aih, chutiang lam pawh a ni lo,tak takin aw nia,a dik alawm’ a chal ti chuar chunga  a nur nung ka hmuh takah chuan ka ti nawi nak mai. Hnial chiam a sawt lo tih ka hre thiam miaua. Bakah,ka share duh vanga hmu duh ka ni reng bawka. Han zep chiam a tulna a awm hek lo.

‘Sawi chi nge chi loh?” a ti dam thlap.

‘Ka hre lo…’ ka ti halh thung.

‘Ok,min share duh chuan ka awm renga. I thawl phah hawk theia’ a ti leh a. Ka thle bak ringawt, Share ka duh ngei. Mahse, Hriatpuia’n a hriatchhuah chuan a lawm viau lo ang tih ka chiang.

‘Eng lo,ih…Enteh,Share che ka duh.Mahse, tu hi nge rin a rin loh tur ka hre lo’ beidawng zetin ka ti leh halh. A lungawi loh tum apianga a tih thin danin a chal a ti chuara,a ner deuh nawk.

‘Kan pahnih chauha kan hriat tur thil anih chuan min ring thei tih chu ka sawi chiam pawh angai lo a,mahse i thu thu le’ a ti hmuk.

‘Aaaa,chutiang lam ka sawi lo. Ih,diktak chuan ka hlauthawnga,keimah leh keimah hi ka inring zo lo a’ ka ti sap. Min chhang loin a rawn tho a, ka thutna sirah a rawn thu thlaa. Ka darah a kuaha,min hnem nan a beng zui thak thak bawk.

‘ka accident kha accident pangngai a ni lo a’ ka ti chhuak leh sap.

‘Chuan…’ a ti dam thlap.

‘Mi pakhat ka su a,ni lo..Min su zawk,a lo lang thuta,chuan ka buaipuia. Mahse, ka kalsawn lawk hlanin a bo daiha’ ka aw a khur dar dar mai.

‘A na vak lo aniang’ Hriatpuia ngaihdan ang chiah.

‘Aih,a harh lo hrim hrim.A hmai kha thi hlir animai…Ih,ih,Scooty ka hun that chhungin a lo bo daiha..Police an lo thlen khan eng mah a awm lo va, bakah Hriatpuia’n ka hmusual anih aring tlata..Mi ka su a,ka hmusual thei dawn mi? a ni em?” beidawng zetin ka en a. Min chhang mai loin a thaw hak.

‘Amak hle maia,thinrim lo la…I accident lai khan i rui em?” a tita daih. Ka thinrim nghal phat thung.

‘Ka rui ngai ami?” lungawi lo zetin ka ti hmak. Hei pawh hian Hriatpuia ang tho khan ka hmusualah angai dawn a ni ngei ang.

‘Sorry, amak em a. Chutianga bo thut chu..Thawnthu vela mi niawm tak ania..’

‘Nia…’ ka ti leh hmak.

‘Police an lo kal em i accident khan?” a ti leh a.

‘Kal ka tih kha,Hriatpuia ka call nghala. Mi ka su ka ti a,an lo kala. Mahse,tu mah an hmu si lo a. Bakah,Police ho kha keiman ka be lo a’ ka ti leh halh. Hriatpuia leh Rosanga an inbiaa,Hriatpuia khan a hrilh ngei a. Mahse, eng mah sawi zui a awm lo.Chu erawh midang hming lang ve tur anih avangin Remruata hrilh tel tul ka ti lo.

‘Um,anih chuan amak hle maia..Mahse, eng mah sawi zui a awm loh chuan a tha lamah ngai la,lo na viau se chuan a kalsawn miah nang’  a ti a. Ka mit ka khap sak sak.

‘Hahdam rawh,I ngaihtuah vak chuan nangma tan a hrehawm mai mai’ amah bawkin a ti leh a.

‘Um,nia ka zia tawh lutuka. Atir lam kha chuan ka muhil thei lo va,mahse tunah chuan ka zia tawha’ ka ti nghat.Nia,nimina ka hmuh leh hma kha chuan ka tha vek tawh.

‘A tha..Ngaihtuah hah suh’ a ti leh a.

‘Ngaihtuah hah loh chu ka duh alawm.Ka duh satliah lo,ka duh lutuk mah mah zawk. Mahse,niminah ka hmu leh thut a’ ka aw a zuih ral titih.

‘Maw?” phawk zetin min en a.

‘Aw,amah kha ka hmu.Machhuani nen Doctor hmu tura kan kal khan ka hmu a,na nei hmel a pu lo hrim hrim. Ka biak duh vangin ka um a,mahse ka um pha lo nge a bo leh daiha’ ka ti hap.

‘Amah a ni ngei tih i chiang em?”

‘Aw,a landan in ang lo mah se amah ngei a ni tih ka chiang lutuk’ inringtawk zetin ka ti hmak.

‘U Hriatpuia i hrilh em?”

‘Aih’ ka chhang rang viau.

‘Hrilh a tha lo maw?” a ti leh a.

‘Tha maithei,mahse maw..Ka ngaihtuah tawh loh a duh a,ka hlim theih nan a bei nasaa.Ani hnena sawi leh ka duh tawh lo.Ka sawi anih chuan ka rilru a nuam lo tih ahriat rualin min ngaihtuah leh nasa dawn lutuka.Hnaah buaina angah lutuka,keimah vanga a rilru a buai belhchhah ka duh lo.Enteh,Police hnenah ka kal tawp mai dawn mi?” ka ti leh a.

‘Aih,Kal suh. Mi a emaw an ti mai ang che. Chutiang awmze nei lo lutuk chu sawi miah suh’ uar zetin a ti chiam.

‘Awmze nei lo a ni lo’ ka ti hmak.

‘Sorry…Ka sawi awmzia chu chutiang thilah Police pun suh ka tihna zawk. Police hoin an hriat chuan tum loh tawpin nang mah i tal buai chiam theia.Tumah hrilh miah lo la ka duh zawk..A hmel awmdan min hrilh teh,keiman ka lo buaipui ang.Ka hriatchhuah theih chuan Police chu kan la hrilh chauh dawn nia’ a ti leh mawlh mawlh. Ka thaw hak,ka mit ka chhinga. A hmel landan ka ngaihtuaha, ka mitthlaah chiang zetin a rawn lang nghal zat. Meng chuang loin Remruata hnenah a hmel awmdan ka thiam ang angin ka sawia.Ka thaw hak, ka mengchhuaka,uluk lutukin ka thusawi a lo ngaithla kar.

‘Ngaihtuah buai miah suh,engkim a tha leh vek ang’ a ti dam leh thlap. Ka bu nghauha.Mahse,sawi vang ringawta tha leh thei a ni lo tih ka chiang lutuk. Thil ka hre chhuak leh zawk bawk.

‘Thenzawla kan zin tum khan zanhnih ngawt kha thawm ka hriaa,chuan kan haw hnuah pawh thil dik zat lo a awm leha.Vauna ka dawnga..Mahse, tunah chuan a reh tawh’ ka ti chhuak leh a.

‘Uh,ka ring dik chiah mai. Khami tum khan dik lo awmin ka hre reng a ni. Mahse, I mizia ka hriaa,ka zawt lui duh lo che a..Anih leh tu nge vautu che chu?” dilchhut fein a ti leh a.

‘Ka hre lo…Rosanga ten an buaipuia,an chhui renga. A harsa viau aniang. Bakah,tunah chuan a reh tawha’ ka ti leh a.

‘Um,ani pawn a hriat mai theih loh chuan a harsa ve ang. Mahse, a reh tawh iti tiraw?” a ti a. Tawngkaa chhang loin ka bu nghat.

‘A reh tawh chuan a that chu,ka ngaihtuaha..Thil min lo hrilh lo nasa hle mai’ lungawi chiah lo tih a sawi danah ka hre thei.

‘Ni lo,han sawi mai dantur ka hre lo alawm. Bakah,Angela-i nen Probem inneih lai kha ania..’ ka then sak.

‘He nu sek hi a…’ ei lo hmel zetin a ti hluk.

‘Thil dang ala awm..Nizan khan kan in bangah hian kan thenawmten mi lawn an hmu a, mahse thawm eng mah ka hre miah lo. Inah pawh thildanglam thleng a awm lo a. Chuan,dawr nghaktu sawn kan in bulah mi pakhat kan in lam hawia nihnih lai a thut tawh thu a sawi bawka…Engkim hi a buai nuai nuai animai’ beidawng zetin ka ti halh.

‘U Hriatpuia i hrilh tawh em?” thildang sawi loin a ti a.

‘Aih…Lo haw phawt se ka tia’

‘Um,tha lutuk..Zin laia zuk hrilh kha chu a awmzia vak lo ang. Bakah,a lo haw hma chu ka lo riak mai ang’ ati leh a. Rang zetin ka lu ka thing vat. Ka thianpa ngawih ngawih nimahse Hriatpuia’n a lawm viau lo tih ka hre ru kar.

‘Angai lo ang. Sanjana-i a awm alawm,hlauhtur a awm lo’ zangkhai thei ang berin ka ti a. Lungawi vak lo niawm takin a hmui a pet sawi zauh.

‘Ok..A tha lawm.Mahse, min lo call vat dawn nia’ a ti leh talh. A rilru tihnawm nan ka bu nghal nghauh.

‘Engkim mai hi keimah vanga thleng niin ka hria,ka mi sut khan phuba lak a tum anih te ka ringa. Mahse, ka buaipui duh lo a ni miah lo va’ ka ti leh niah niah.

‘Hey,a viau suh. Nang mah vang a ni dawn lo lutuk..Diktak chuan inpa hi hetiang dinhmun thleng tur hian a bei nasa ve ania. Hmelma tamtak a neih loh pawn pahnih khat tal chu a nei maithei a’ a ti a, a thle zui bak.Ka chhang lo, Hriatpuia’n amah an sawina chungchang a sawi kha ka hre chhuak zawk a,ka hmui ka pet nauh nauh mai.

‘Anih chuan ka kal mai dawn,a tlai dawn tlat.Lo hahdam ang che..Ka buaipui vek ang’dinchhuah pahin a ti a. kawngka lamah ka zui pheia,Kawngka bulah kan ding duna,Ka kut a vuana,a hum vang vang. Min hnem a tum tih ka hriaa, laksawn pawh ka tum bik lo.Diktak chuan keimah chauha ka lo hahpui em em ka sawichhuaka,ka thawveng deuh hawk.

Ka mu meng kara,ka ngaihtuah naah eng emaw thleng mai tur ang maiin ka awma. Ka awm a nuam thei lo,Hriatpuia ka ngai vawng vawng. Awm se chuan eng mah sawi lo pawhin min kuah chungin ka mu anga. Ka hahdam dawn tih ka chiang.

Ka Phone a nghawr dar dara, ka ban a. Hriatpuia a lo ni a. Ka pick nghal vat.

‘Hello…’ ka ti a. Ka chhungril nuam lo leh ka mood tihlan hlauin ka fimkhur viau.

‘I muhil tawh mi?” a awpa zetin a rawn ti dam thlup.

‘Muhil tep..Hotelah in lut fel tawh em?” ka ti a.

‘Um,fel tawh e.Meeting kha a rei ta zeka..Enge i an?” a rawn ti leh sup.

‘Ka tha reng..Naktukah ilo haw dawn ta em?” ka ti leh a.

‘Ka la hre mai lo.Meeting kan zo fel thei lo va,ka kal leh angai ang..Chuan,Min ngai nghal tihna mi?” zawitein a nui zui hawk. A awah chuan Duatna ri alang chiang viau bawk.

‘Um..Ka ngai chein ka hria’ ka ti sep. Ka mittui rawn hnai kuar chu duh loin ka hru vat.

‘Keipawh ka ngai che.I taksa si lo a muthilh a har dawn khawp mai ‘ a ti thawp sut.

‘I lo haw vat dawn nia,muhil tawh la..I chau lutuk ang’ ka ti a. A zin hian Driver hruai mah se aman a khalh tho thin a. Driver hi chu a hmingin a hruai a ni lek zel.

‘Um,nia kawng a chhe lutuka. Tlemin ka chau ve deuh..Mangtha aw’ a tih zawm leh daih.

‘Mangtha le’

‘Ka hmangaih che’ a ti leh sup.

‘Keipawh…’

Ka beisei loh zetin ka mutui ta phian. Ka harhin khua a lo eng iar tawh. Ka tho chhuak nghala.Inhnuaiah chhuk thlaa. Sanjana-i kitchenah a ri rak rak. Lut phei loin pawnah ka chhuaka, ka pangpar phun ho ka enkuala. Nung tha sa leh liansa vek anni bawka.Pot thlak danglam pawh an vuai phah lem lo.

Gate ka hawnga, ka chhuaka,ka hawikuala. Kan in bul chiahte Gate bula Lukhum khum,pa lian vak lo ding ka va hmu a. Ka mit ala nghal chat. Noel-i te dawr lam ka hawi pheia. A rawn dak chhuaka,a mitmeiin min rawn biaa. Saw pa ngei saw kan in enkual tu chu a ni tih achiang.Ka lam a rawn hawi zawka,a lukhum hmathlawk a pawt hniama,a inher a. A kal zui nghal daih bawk.Noel-i sawi ang chiah khan lukhum mai bakah hmai khuhna a hman avangin a hmel landan tur ka ngaihtuah thiam lo.

‘Nimin nilengin ka hmu miah lo va,tunah khan ka va hmu leh chiaha. Rawn hrilh che ka tum lai takin ilo chhuak hlauha’ Noel-in a lo ti sar sar.

‘Enge maw a duh le? Keini ni loin midang hi a lo en zawk nge ni?” pangngai takin ka ti a.

‘Ka ring lo,a lo kal tirh atangin in inlam hlir alawm a thlir. Rukru emawni ka ti,report mai chi niin ka hria’ a ti leh a. Ka ngaihdan chiah.Hriatpuia lo haw hunah hrilh ila,Police hnenah report ngei ngei angai.

‘Mami…’ min ko ri ka hriatna lam ka hawi vat. Min kotu ka hmuh rualin ka thaw hak thung. Rosy lo kal hnai mek chu ka en a, nidang ang bawkin alang thar leh sar tawh.

‘I zia deuh tawh em?” min ti a. A sawi awmzia ka man lo.

‘Eh,ka sawi tum chu i accidentna kha ania ka tih’ a ti leh vat.

‘Ka tha tawh e..I dam maw?” zangkhai vahin ka ti let ve nghala. Ka nuihza miah lo mah se ka then lui sak. He nu ka hmuh apianga ngai ka awh lo ziah hi ka hre thiam bau lo. Hriatpuia’n min Hmangaih tih hre reng chunga a bialnu hlui lo thik hi awmzia a awm lo hlawl,mahse ngai ka awh thei ngai chuang miah lo.

‘Um,dam alawm..Hriatpuia hi vawiinah maw a lo let dawn?” a ti leh a. Min fan zawk,a zin tih a hriaa,a haw leh hun tur nen lam alo hre bawka. Ka lawm lo tawp,mahse mawl taka chet hun a ni miah lo tih ka chiang.

‘Let maithei,ala chiang chiah lo a’ ka ti a. Ka sawi zo chiah tihin Rosy phone a ri a. A en a,min rawn en leh a.

‘A damrei dawn aniang’  tih pahin ka hmuh theih turin a rawn calltu a ti langa. Ka na zawk thei. Ka chhuah hmaa kan inbiak khan Meeting a neih dawn thu leh pawimawh a awm pawn msg thawn turin min ti a. Min la rawn be ta miah lo a, mahse Rosy erawh a be thei tho. A lo call chhan ka hre lo,mahse ka na vawng vawng tho.

‘Hello..’ zangkhai lutuka Rosy-in a tih ri chuan ka kawchhung thlengin a fan raih raih thei hial.Kalsawn mai ka duh ut ut,mahse ka kalsawn ta em lo. Hriatpuia tawng ngaithlaa Rosy nuisanga a ding chu nui chungin ka en ta zawk.

Chapter- 22

‘Um,anih chu..I lo let theih dawn chuan a zia hlauh. Naktukah Danny-a a lo thleng dawn sia,a awmrei hman dawn si lo va.Hmuh che a duh ngei ngei dawn’ zangkhai fahranin a tih zawm leh a. Danny-an tih chu ka hre ngai lo. Bakah,tunah chuan hriat ka mamawh lo. A nupui aia a bialnu hluiin a haw hun tur a lo hre hmasa hi a dik lo a ni tawp mai. Mahse, Rosy hmuh laia mawl taka chet ka tum miah lo thung.

Hmeichhe pakhat a rawn kal hnaia,Rosy bulah a rawn dinga. Hairual lohin Rosy nen unau anni tih ahriat theih mai.Thip fein min melh a, a mitmeng a thip ve reng nge min ngei zawk pawh ka hre nek lo ve.Rosy-in a phone a off a, min rawn en a. A hmela hnehtu intihna lang chhuak chu ka hmuh hmaih hauh lo.

‘Kan kal phawt mai ang,kal kualna tur kan la ngah lutuka’ zangkhai zetin a ti a. Nui chungin ka bu nghauh.An kalsawn hnuah erawh ka lo insehruh nasat zia ka hre chhuak ve chiah thung. Hreptak hian a…

In ka thlen thlengin Hriatpuia’n a haw tur chungchang min la rawn hrilh ta lo cheu.Ka thinrim hluah hluaha,tlawm ka inti ngawih ngawih bawk. Bathrooma ka awm laiin ka Phone a ri a. Hmanhmawh zetin ka chhuak a,ka phone ka en a. Min rawn call tu ka hmuh rualin ka ner nak.

‘Aw…’ ka ti nghauh.

‘I buai nge buai lo?” ka mood hre lo fahranin Machhuani’n a rawn ti zangkhai vah. Eng chu nge maw ahriata a thawven viau ni?!

‘Inbual ka lo tum chiaha,sawi la” ka ti a.

‘Good news ka neia’ hlim zetin a ti a.

‘Maw? Engthil?” phurna tak tak nei miah loin ka ti hliai.

‘Refer ka ngai dawn lo va,chuan maw ka tha zui thei mai turah an ngaia’ hlim em emin a rawn ti a,ka then sak.

‘A va lawmawm si tak…Tunah chuan i hahdam thei tawh anih chu’ ka ti a. Ka thinlung tak takin ka lawmpui.

‘Nia,ka hahdam tawp..Hrilh vat che ka chak lutuka’ a rawn ti leh siam siam.

‘A lawmawm em alawm..’

‘Nia, lawmawm lutuk..Eeee…Ti nge min wish miah lo va?” a ti leh daih. Rang zetin khum bula Calendar inhnung ka en vat. LALPA le(h)..Vawiin a birthday a ni tak.Engtin nge maw ka theihnghilh theih zawk ni?!

‘Sorry…Sorry takzet…Enge ka pek ang che?” inthlahrung daiin ka ti a.

‘Eng mah ka duh lo,mahse chhuak ila’ a ti leh nghat. Ka ngaihtuaha,Hriatpuia a lo haw maithei..Huh,a lo haw anih chuan a lo haw animai.Min hrilh miau loh chuan ka thiam loh a awm miah lo.

‘Khawiah? I chhuak thei dawn mi?” ka ngaihtuahna tilang loin ka ti a.

‘Chhuak thei, kan kalna tur kha chu inngaihtuah ve bawk ang chu,in ninawm’ a ti leh hmak. Ka then sak thung.

‘Ok,ok…Kan lo ngaihtuah ang. Kan chhuak khawp ang’ ka nui a…

‘Ka ring dawn che u ania,ka rethei teh ania’ a ti leh hlak hlak.

‘Inpa a lo haw ta nge haw lo?” ka ti leh rih.

‘Haw leh rih lo,Mondayah a lo haw dawna’ a ti leh a.

‘Um,Remruata ka’n bia ange. Ka lo hrilh leh dawn che nia’ ka ti a. Min ring tih a rawn sawi nawn leh hram.

 Remruata ka calla,a pick thei lo. Ka tihnawn leh pawn a pick chuang lo.A la buai anih ringin inbual tumin Bathroom ka pansan ta zawk.

Shower hnuaiah ka dinga, ka ngaihtuahnaah thil chi hrang hrang alang zut zut.Keimah chauh pawha buaina tawk ka hmuh em em laiin Hriatpuia leh Rosy vangin ka mood a off belhchhah leha,ka thinrim hlur mai. Machhuani Good News pawn min ti danglam zo meuh lo.Hmm,tunah chuan Machhuani chauh ngaihtuah ka tum phawt aniang chu…

Room chhung ka lut chiah tihin ka Phone a ri ve chiah, Remruata’n min rawn call back anih ka ringa,ka pan hnaia. Ka ring dik chiah bawk.

‘Hello..’

‘Ka buai lutuka,I lo call lai ka hre lo a’ a rawn ti nghal mawlh mawlh.

‘Pawi lo’

‘Enge a? thil thleng a awm em?” a aw a ti zawia.

‘Aih,awm lo..Machhuani zawk ania’ ka ti leh a.

‘Machhuani maw? Enge a?” a ti vat.

‘Vawiin hi a Birthday ania,ka lo theihnghilha..Nang i wish em?”

‘Het,ka va theihnghilh chiang ve le..Ka’n wish nghal lawk’ a ti a.

 ‘Lawk,a rilru dam nan kan treat a phuta,dine out a phut ’ ka nui hak.

‘Ha,he nu tak hi chu..Mahse, pawi pawh ka ti vak lo.Zanin chu ka free lutuk’ a rawn ti a.

‘Anih chuan khawiah nge kan kal ang?’

‘Ka lo ngaihtuah dawn mi? ‘

‘Nia,lo ngaihtuah la..Min lo hrilh leh mai la,Machhuani pawh hrilh nghal ta la..’

‘Nia…Ka rawn lam dawn che nge?” a ti leh a.

‘A hmun kha fel phawt se,Taxi a lo kal pawh a harsa chuang lo va,mahse haw lam chu thlah ka ngaih ka ring’

‘Ok,ok…Lalchhuani pawh chu thlah angai ang.Motor keng law law mai ang’

Inhnuaiah ka chhuk thlaa, Sanjana-i hnenah chaw ka eichhuak dawn tih ka hrilha.’Ka u a lo haw dawn em?” pai zetin a ti a.

‘Haw maithei..Mahse,Eng mah siam kep duh suh.A lo haw dawn anih pawhin kawngah a ei ang’ ka ti a. Tunah dar 3 a pel tawha, eng mah ala rawn sawi chuang lo fo.Ka zawt dawn bik lo a ni tawp mai.

Kan chaweina tur hmun Remruata’n a thlang fela,a hun atang dar 7 a ti bawka. A tawk vel viau mai.Room bul Balcony-ah ka chhuaka, railing bawhin ka zi mar ar ar. Ni tla tur in ka dinna ep a chhun en ruai mai chu hmuhnawm ti zetin ka thlir kuala. A nalh takzet..

Hnuai lam ka thlir thlaa,kan compound hungna bul chiaha hmeichhe pakhat min hnungchhawn zawnga ding ka zuk hmu a. Ka hawikual deuha,kan building en fiah niawm tak kha a awm leh awm loh ka en a, ka hmu lo. Tukina ka hmuh laia a kalsawn kha a lo la let leh miah lo nge ni ang? A lo kal leh anih vaih chuan Hriatpuia lo haw hma pawh nise police hnena report pek tawp mai a fuh ber tawh ang.Mahse, enge a duh ang? Remruata sawi ang khan Hriatpuia hmelma lo nita se ka lo report ngawt chuan a fuh ber angem? Ka lu ka thing nak.

Inhnuai lam ka hawithla leha, mahse min hnungchhawn zawnga hmeichhe ding kha a hmel ka zuk hmuh takah chuan ka phu vak. Min rawn thlir chho ve vang vang zui bawk.

Ka che nghal phat,inhnuai panna Stepah ka tlan thla,ka khup na zawk zawk pawh ka ngaipawimawh zo tawh lo. Pawnah ka tlanchhuaka,Gateah ka tlanchhuak rawk rawk. Chak zetin kan insir lamah ka kal pheia,mahse tu mah an awm miah lo!!

A dinna lai ni a ka hriatah ka dinga, kan in lam ka hawi chho a, Balcony chiang takin alanga, ka zuk hmuh laia a dinnaah tak khan ka ding tih ka hria. Mahse, a awm miau si lo. Beidawng thinrim lutukin ka thaw hawk.

‘I va hmanhmawh dawr dawr ve’ ka let leh lam Noel-in min lo au a. Gate lam pan loin Noel-i dawr lam ka pan ta zawk.

‘Thil tha lo deuh thleng a awm emawni ka lo ti hman a,I hmanhmawh hmel lutuka’ a lo ti leh mawlh mawlh. Thutthlengah ka thu thla hnak.

‘Nia,hmanhmawh lutuk..Saw laia hmeichhe ding kha rawn biak ka tuma,chu vang mawle’ tih pahin ka hmuh laia a dinna lam ka kawk zauh.

‘Awi, ka lo hmu miah lo. Kan Thianpa kha a lo kal leh em tih ka lo thlek deuh renga, mahse hmeichhia chu ka lo hmu lo reng reng’ a tita daih.

‘I hmu lo maw? A va mak’ mak ka tih zia ka thup hleithei lo.

‘Hmu nang,aaaa..Mipa ngawt ka lo melha,chuvangin Hmeichhia chu hmu pawh ni ila ka hmu lo ang’ a ti leha,ka ngaihtuahna hre lo lutukin a nui zui hak hak. Za lo zetin ka then ve sak ringawt.Thil dang sawiin a titi leh luama,ka ngaithla liam vel mai mai. Ka rilruah tun lawka ka thil hmuh,bo ta daih si bak kha a awm lo.

Khumah ka thu a, fim taka ngaihtuah tumin ka mit ka chhing vang vang. Hlauh tur nge hlauh loh tur pawh ka hre thiam tawh lo. Nichina min rawn en chho kha,min en dan kha min hria niawm takin alang bawk. Police hnenah sawi mai chi nge ni ang? Mahse, Remruata sawi kha a dik tho..Han sawi dan tur pawh ka hre lo va,amah kha ka report dawn nge kei mah ka in report zawk dawn? Huizz,Police hnena kal ngawt pawh he thilah hi chuan awmzia a awm chiam lo. Tul lo zetah ka inti mualpho chiam ang tih a hlauhawm fe zawk. Mahse, engvangin nge ka hmuh tura a inlan sek si? Min bia a ni lo va, ka sut vang khan min vau han ti dawn ila chutiang eng mah a awm miah bawk si lo..A lo lang thuta, a bo leh thut zel bawka. Thil pangngai niin ka hre tawh lo.

Phur lo zetin ka insiama,vawiin chu ka awmdan a nuam lo takzet. Chhunah min tina vawng vawng thil ka tawnga, tunah lah ka mangan belhchhah tur thil ka hmu leh a. Ka ipik chuah chuah a ni ber.

Kan chaweina tur hmun ka thlenga, Remruata leh Machhuani an lo awm vang tawh. Ka chhungril nuam lo ngawih ngawih tihlan ka hlau a, ka mimal buaina avanga Machhuani hlimna laksak ka duh hek lo.

‘Tlaiah khan ka hmu asin’ Machhuani kan thlah fel kan tlanchhuah leh veleh ka ti chhuak ta halh. Ka ipik lutuka,ka sawi chhuak anih loh chuan ka puakkeh thei maiin ka ring hial.

‘Khawiah?’ ngaihven zetin a ti vat.

‘Kan in bulah..Kan compound hungna pawnah a dinga’

‘I bia em?” a ti leh vat.

‘Aih, ka zuk chhuka. Mahse, a lo bo leh hmana’ beidawng lutukin ka ti halh.

‘Maw? A va mak thei ve.Ti nge a bo leh daih kher zel le?” min zawt pawh ni loin a ti nuah nuah.

‘Hrehawm ka ti lutuk’ ka ti sap. Ka mittui a hnai kuar,ka mangang lutuk hi ka hah ngawih ngawih a ni tawp mai.

‘A hrehawm ngawt ang..Enge tih i duh?” a ti leh a.

‘Ka hre lo..’

‘Um..A mak ka la ti,Accident khan i buaipui ngei a,buaipui duh lo a kalsan chu ni la a hran daih ania. Mahse, I buaipui ngeia,mahse a bo daiha. Tunah lem a lo in lan leh sek lawia.Lawk,engemaw tal dil che pawh a nei lo maw?” a ti leh duah.

‘Aih,dil lo..Dil chu sawi loh biak pawh ka be ngai lo,a bo zel a’ ka ti leh nghauh.

‘OK..Anih chuan enge maw a duh le?” mak tih hmel fein a ti ve leh a.

‘Ka hre lo…Ka hre lo,min tih hlauh ngawih ngawih a duh aniang’ beidawng zetin ka ti hap.

‘Um,mahse chutianga tih ngawtna chhan tur che a nei hleinem’ a ti leh a,ka chhang lo. Nia,min tihhrehawma hlau hlawpa min siam a tulna a awm miah lo.

In a lo lut tawh loin Remruata a haw tlanga, Sanjana-in hmuhnawm ti zetin Tv a lo en a,ka lut thawm pawh a hre lo.

‘Sanjana’ ka ti a. A phu vak,min rawn en a. ‘Awi, ka hlau che’ a ti nghal chiam pek.

‘I va ho tak’ ka ti a. A ha var lutuk tak mai langin a nui thaw.

‘I lo haw chiah em ni?” a ti leh a. Ka bu satliah ringawt.

‘Roomah ka chho dawn ania,Tukverh i check tawh em?” ka ti leh a.

‘Aw..Check vek,a tha’ a ti leha. Tv lam bawk a melh leh hman tawh. Tvah engpawh lang se hmuhnawm a ti em em vek mai hi a manganthlak lam mah chu a ni.

Ka inthlaka,ka inthlak zawh hnuah Room ruak lam ka pana,ka hawnga. Eng mah danglam a awm lo. Tukverh ka checka,a inkhar tha vek.

Roomah ka let leha,khumah ka lawna.Thu mu chunga Tv en ka tuma,mahse ka On deuh chiah tihin Hriatpuia’n min rawn call a. Ka pick ang nge pick lo ang tih ngaihtuahin ka en deuh vang vang. A tawpa, ka thaw hak.Mahse, a rawn call nawn lehnghal zat.

‘Hello…’ ka ti vawt raih.

‘Khawiah nge i awm?” a ni pawh a mood a fuh hmel viau bik lo.

‘Inah,khawiah nge ka awm chuan anga?” ka ti hlak.

‘I thianpa Remruata nen khan nuam inti viau ang chu ka ti’ a ti hmuk. Engtin nge kan chhuak tih a hriat ka hre lo. Loud speaker ka on a, whatsappah ka luta, Remruata status ka en a. Eng mah a dah lo..Machhuani pawn a dah chuang lo.Ka chil ka lem a, ka ngawi deuh ren rawn.

‘Ka lo haw dawn,ka lo chhuak chiah’ amah bawkin a rawn ti leh hmuk.

‘A that chu’ ka ti chang leh fak.

‘Nia,tha’ ka chhan let pawh nghak loin a off zui nghal hmak. Hrep tak hian a,thinrim em em tur zawk ka nih laiin Remruata nen kan chhuah dun vangin a rawn thinrim nghal ngawta.Engvanga chhuak dun nge kan nih pawh a hre lo va,tihsual lianpui nei ang maiin min biaa..Rosy hnenah a inreport thlap tih kha ka hre lo emaw atih avangin tihsual nei lo ang maiin a tawng chu ania..Mipa tak hi chu a.

Thawm eng emawin min tiharh hlawl. Ka mut dawn khan Light ka off veka, mahse tunah chuan pakhat a lo eng a. Mahse, a eng dul ber anih avangin a en dan a dul raih.Hriatpuia a lo thleng tawh anih ringin ka inlet a,mahse a mutna a lo la ruak vek.

Ka phone ka bana,ka lakanga. Dar 11 ala ri lo deuh. Hriatpuia lo call hun ka en leha, lo thlen a hun dawn tawh. Thil ka ngaihtuah chhuak zawk,ka mut dawnah Light ka Off veka,tunah engtin nge a lo in On ngawt theih?

Ti dekin ka hawkuala, eng mah dik lo a awm lo..Khum atangin ka chhuka, ka chhuk fel deuh chiah tihin inhnuai lama thil tla ri deuh bawl ka hre nghal zat. Ka phu zui nghek bawk. Thawm awm leh hun ka ngaichanga,mahse a reh zui vang vang.

Ka inngaihtuaha,awmze nei lo ka hlau mai mai a ni theia. Kawngkhar kan kalh tha veka, tumah an lo lut lo tawp ang. Ka inti huai luia, Room kawngkhar lam ka pana. Ka hawnga, chhuak loin thutkhawmna lian lote awm lam ka hawi pheia,min hnungchhawn zawnga hmeichhe pakhat thu ka va hmu a. Ka zuang dawrh lo chauh.. A thu ngil auha,a pian hmangah Sanjana-i a ni lo tih ka hre chiang em em bawk…..

Chapter- 23

Tu nge ni ang? Ka hmusual zawk emaw tiin ka mit ka nuaia, mahse ala awm ta cheu. Misual nge ni anga thla zawk? Thawklehkhatah hlauhnain min rawn tuam nghal hlupa,ka chhungril atangin ka khur nghal hlawk hlawk bawk.

Kawngkhar khara,roomah inkalh khung tlat tur nge enchian tur ka ngaihtuah thiam lo,diktak chuan kawngkhar khar tur pawn ka che ngam tawh lo hrim hrim. A che deuh hrut ka hmuh rualin ka harh deuh zawk. Hei hi ka in a ni tawha, achhungah hian thil thleng a awm anih chuan hriatfiah hi ka tihtur a ni.Mahse, hlauhna vangin ka tawngchhuak thei angem ka hre lo. Va pan hnaih phei chu hla tak a ni ringawt.

Ka theihtawpin thawk ka laa,mahse a sak talh talh tho mai. Ka huaisenna neih chhun ka sawm khawma,Handle ka vawn lai ka hum nghet sauh bawk. Ka thaw leh halh.

‘Tu…Tu nge i nih?” ka ti chhuak thei hram. Mahse, a zawi lutuk.A hre pha kher lo vang.Kei erawh chu ka tawngchhuah takah chuan ka hlauh lutukna kha tlem a kiang ta tlat thung.

‘Tu nge i nih?” ka au chhuak ta thawt. Mahse, che eih lo thung. Kawngkhar ka hawng zaua,ka penchhuak zui nghal zat. Ka pen leh chiah tihin a chet thuta, ka ding leh chat. Ka din rualin a thut ngaiin a thu leh nghala,chet tum awmin a awm leh ta chuang lo cheu.A hma ang bawk khan hlauhnain min rawn tuam leh nghal hlupa,mahse ka in control thei ta tlat thung..Ka hawikuala,ka dinna bula mau hmanga siam pangparkhawina awmah ka mit a fu chat. Pangpar siamchawp,kuang sei reng rawng inkhawi ka pawtchhuak a,a khawina rit lelh lawlh ka hum nghal chat bawk.Engpawh tihtum se ka theihtawpa nain ka hlap dawn a ni tawp mai.

Ka pen leh chiah tihin a dingchhuak thut.Ka tim leh chawiha, muangchangin a rawn inhera,light eng dul deuh ruai hnuaia a hmai thisenin a bual sen nuau ka hmuh rualin ka rak nghal thaw..Amah kha a ni!!!  Ring ruh tliak niawm takin a thle bura,a meng kuau bawk.A che hruta,min rawn ban nghal du a,ka rak tuara,a thim zui mup.

Kawngkhar inkhar ri niawm takah ka harh zawk, ka thuchhuak nghal zat bawk.Khua a lo eng vek tawha, Tukverh inhawng atangin thli a rawn thaw luta, curtain a chhem leng dar dar. Room chhung ka hawi kuala,tumah an awm lo..Nizan kha,tunah khumah ka lo awm leh daih bawka..Ka mitthlaah ka thil hmuh a rawn lang nghal zawk,hlau hlawpin khum kil lamah ka per phei dawrha, beng hup chungin ka thu a, mahse ka mit ka chhing ngam eih lo..

Bathroom kawngkhar a ri raka, tim daiin ka en a,Hriatpuia Towel chauh veng chungin a rawn chhuaka,a lu a hru pah mawlh mawlh bawk. Khum lam a rawn hawi pheia,min rawn hmuh a,A lu a hruk lai a tawp chawt.

‘I tha em?’ a ti dam thlup. A hmelpa zetah chuan thinrimna emaw lawmna pawh eng mah alang lo.Nizana kan inbiak kha chuan a Mood a tha miah lo kha ania..Chuan,a lo thlen lai pawh ka hre miah lo.. Ni lo,ka thil hmuh ka ngaihtuah chhuak lehnghal zat.

‘Min kuah thei angem?” ka ti chhuak sep.Engvanga thildang sawi lo nge ka nih ka hre lo. Rosy vanga ka thinrimna lam pawh ka ngaihtuah thei rih lo.Tunah chuan khawi emaw himna hmun ka mamawh a ni tawp mai. A hmelpa leh hriam hraih maiah chuan mak tihna niawm tak alang zawka, mahse a reh lehnghal vat. A towel ken Sofaah a theh thlaa, Khumah a rawn lawna. Min rawn bana,min pawt hnaia.A taksa si chetin min kuah bet nghal a. Ka kuah let ve a, ka tah a chhuak nghal up up bawk.

‘Eng thil nge thleng?” reife tawng lo va kan awm hnuah a ti dam thlup. Chhan mai ka tuma, mahse ka chip leh ta zawk.

‘Ka tha…’ ka ti sap.

‘Sanjana-in i au thawm a hriaa,ka lo thlen laiin tihharh che a lo tum meka’ a ti leh a. Ka ngaihtuah zawng pawn ka khur lehnghal titih,ka khap sak sak bawk.

‘I lo thlen lai ka hre miah lo va’

‘Ka zawhna i chhang lo ania’ a ti leh sup. Ka chil ka lem a,min kuahna atangin inlakhran ka tuma,Mahse min kuah nghet sauh thung.

‘I kal hnu khan pawnah khuan Mi pakhat kan in enthla niawm taka ding a awm thina,chuan i kal hma zan khan kan bangah hian mi pakhat lawn a awm bawka’

‘Chuan…’ a ti nghut.

‘Amah chu palian vak lo ania. Mask a hmang a,lukhum a khum bawk sia, a hmel ka hre thei lo va.Amah chu banga lawn tho kha a ni em ka hre lo va.Ih,ka ngaihtuaha,eng mah hi a dik miah lo’ ka sawi zawh rualin ka thaw halh.

‘Nizanah enge i hmuh a?” a ti leh daih. Ka hawichhuaka,ka en chho a.Hriat thiam har zetin min en ve bawk.

‘Kan room light hi ka mut dawnah ka off veka,mahse ka harh khan a lo eng a..I lo thleng tawh emaw ka tia,ih…Thawm ka hriaa’ ka tita daih.

‘Light chu i hre sual anih ka ring’ a ti a.

‘Aih, hre sual miah lo…’

‘Anih chuan tu nge lo On ang?’

‘Ka….Ka hre lo’ ka khur lehnghal dar dar.

‘Ok…Engpawhnise tunah chuan theihnghilh la..’

‘Mi ka sut kha…’

‘Aih, tumah i su lo.Chuan,kha thil kha theihnghilh tawh rawh ka tih kha’ a ti nghut, A awkiah sawi zui a duh lo tih chiang takin ka hre thei.

 ‘Um…Mahse, ka hlau ‘ ka ti sep. Nimin chhuna kan insira ka hmuh leh nizana ka hmuh kha ka hmasual lo tih ka chiang,mahse sawi mah ila min awihsak dawn chuang lo tih ka chhungril hian a hre ve tawp.

‘Aah,eng mah hlauh tur a awm lo..’ a ti dam leh thlup.

‘Eng mah hi a dik miah lo,nizana thil thleng te,kan In banga mi lo lawn te..’ mangang ru zetin ka ti leh halh.

‘Kan banga lo lawn chu ka zin hma zan a ni em?”

‘Aw…Eng mah i hre lo vetho ami? Dar 11 velah an ti a’ ka ti leh a.

‘Aih, hre miah lo..Nizana thawm chu eng thawm nge? Pen thawm nge kawngkhar kik ri?” a ti leh a.

‘Ka chiang lo…Kawngkhar kik pawh a ni lo a,Ih…Pawn lam pawh a ni maitheia’ ka ti leh a. Ka thilhmuh kha hrilh ka duh a,mahse ka thei lo tih keimah hian ka chiang lutuk.

‘Ok,tunah chuan ka lo thleng tawha, eng mah hlauh tur a awm lo ka tih kha’ a ti leh nghut. Dimtein ka sam a hui kianga, ka bengah a zepa..Ka bengkawm akutzungpuiin dimtein a tuai a..

‘Pawna kan in en ziahtu kha engtin nge niang? A lo kal leh anih chuan report atha ka ti’ ka ti leh a.

‘Um’

‘Ka awm a tinuam lo,ih..Ka hlau vek tawh’ ka ti leh sap.

‘I awm a nawm loh vang ami ka awm loh ruala Remruata a lo kal nghal?” a tichang fuk. Remruata hming a sawi zawnga thinrimna niawm tak a aw a lang chu ka hriat hmaih lo. Rosy ka hre chhuak ve lehnghal zat.

Min kuahna atangin ka inlahrang nghal a,min kuah luih pawh a tum bik chuang lo. Khum atangin ka chhuka,Sofaah ka thu nghal daih bawk.

‘Rosy ilo biak lai khan a bulah ka awm a” ka ti hmak. A hmelah danglam a awm leh awm loh chik lutukin ka en rana,mahse eng mah danglam a awm lo.

‘Remruata chungchang ania ka zawh che,Rosy nen inzawmna a nei miah lo’ a ti hluk. Khum atangin a chhuk a, a thawmhnaw dahna lam a pan a. A hawnga,a thawmhnaw haktur a lachhuaka. A pian nalh zet khuhtu awm lo chu ka en a, amah pawh hian a nalh zia hi a hai hauhin ka ring lo.

‘Danny-a hmu turin nge hna i kal zawk dawn?” ka ti leh nghat. A thil tih lai a tawp chawt. Muangchangin a rawn inhera,min rawn en a. Hawisawn duh loin ka en ve ngar bawk.

‘Danny chu tu nge?” a ti vawt ruih. Ka beisei loh lutuka min zawh let takah chuan ka hamhaih thuta,mahse rei a ni lo.

‘Rosy khan a hrilh che sia,inthian intawm anih ka ringa’ za miah loin ka then sak. A mit a tizima,a hmelah thinrimna niawm tak alang zawk.

‘I duh duh sawi lo teh’ a ti hmuk.

‘Ka duh duh ka sawi lo’ ka ti nghauh. Ka tho va,Bathroom lam ka pan nghal daih bawk.

‘Remruata…’ a sawi laklawh laiin ka ding chata,ka inher nghal vat.

‘Aw, Remruata..Enge ani chu? ’ ka au titih. Ka hun tawn hahthlak lutuk hian min ti ipik hluah hluaha,dam raiha khawsak reng harsa ka ti lutuk.

‘Ka duh lo’ a ti hmuk.

‘Ha,ka thianpa ania. Lo duh lo buai lo mai teh’ ngeiawm zetin ka nui lui hak.

‘Hnaih suh..Chuan,Min tilui miah suh,ka nau a ni tih ka theihnghilh mai ang’

‘Eng mah tihsual anei lo’ ka ti leh hmak.

‘A tihsual chu keiman ka hria’ chang zetin a ti nghut. Ka thaw hak mai,ani hian thil tenawm tak atih laiin mifel ber angin a awma. Remruata a ngaithei lo ta vel a!!!

‘Rosy hi engtin nge?” mak takin ka aw a dam thlap.

‘Rosy,eng mah a ni lo’ a dar a ti sang uk bawk. Ka thin a rim nghal phat.

‘A ni ’ ka ti leh vak.

‘Aw,ka bialnu hlui a ni.Enge ni vak a?”

‘Hnaih tawh suh’

‘Aaaa,bialnu hlui tih vel a lo buai’ a ner zui nawk.

‘Anih si chuan engvangin nge i biak a? I lo haw dawn tihte i report thlapa’ ka ti leh vak.

‘Aih,chutiang ka ti lo’ a ti thawt. Tur zetin min melh khui bawk.

‘Daw heh lutuk’ ka ti leh that.

Min chhang dawn emaw ka tih laiin a ban a phar hluaia,eng mah sawi loin a dahthla leh hnawk. Na zetin a thawmhnaw dahna a khar thuai a. Ka phu zawk thung. A thawmhnaw a ha sawk sawka, kawngkhar lam a pana. Na lutukin kawngkhar a rawn nem khar leh thuai a, ka phu leh nghek..A pen thawm zawi tial tial ka ngaithla kara.Thawm awm loin a reh ta thap.A thawmna lutuk kha Sanjana-in ahria angem ka hre lo..

Ka thu thla hnawk,ka thawpik zual sauh..Engkim a buai nuai nuai anih ber hi a…Reivakloah Motor tlanchhuak thawm ka hriaa, ‘kal suh’ ka ti sep. Inhau zo chauh mahila ka mamawh ngawih ngawih. Ka mittui a rawn tlaa,ka thawpik em em rualin ka nun aruak vel vek.

‘Aaaa, ilo tho maw?” Sanjana-in min hmuh veleh a lo ti sawt sawt. Tawng loin ka bu nghauh a, Dinning chair ka pawtchhuaka, ka thu thla nghal hnak.

‘Eitur ka lo siam dawn che mi? thingpui nge chaw i duh?” a ti leh thuai thuai. Eng mah ka ei chak hlawl lo.

‘Thingpui animai..’ ka ti a. Ka ngaihtuahnaah ka cheng zui lehnghal daih. Nizan khan engtin chiah nge ka awm Sanjana-i hian a hre ngei ngei ang.

‘Nizan khan i au nasa sia,ka hlau lutuka’ zawh pawh ngai loin amah zawkin a ti a. Thingpui leh hmeh tur a rawn chhawp a.

‘Engtin chiah nge ka awm pawh ka hre lo,thil ka hmu sual aniang’ ka ti sap.

‘I au vak kha ka hriaa,ka hlau lutuka. I au leh khan ka lo tlanchho a, chhuatah khan ilo mu reng a’ a ti leh a.

‘Tumah ihmu lo mi?” Pangngai thei ang berin ka ti a.

‘Hmu nang,hmuh tur an awm ami?” a ti a. Hlau hmel deuhin min en hra bawk.

‘Aih,awm lo e..Thawm ka hriaa,chu chu nia ka au’ a rilru tihnawm tumin ka then sak.

‘I lo tlu a, eng mah i hre bawk si lo va, ka hlauthawng lutuka. Mahse,ka u kha a lo haw ta a’ a ti leh siam siam.

‘Ka lu a hai thut alawm…’ ka ti fan leh raih.

‘Ka hlau asin aw,kan in hi a hrang aniang ka ti hmana’ a ti leh a. Ka melh vak,min en loin Gas dahna lai vel a hru fai mawlh mawlh. Chhan enah pawh ka en lo,diktak chuan nizana khatiang a thlen takah kha chuan hlauhna namen loin min chenchilh tlata. Hriatpuia nena kan inhauh lai khan ka thinrim vangin ka lo theihnghilh maithei tih loh chu hlauhna hian ka chhungril ala chhuahsan tak tak hauh lo.

‘Ka u kha eng mah pawh a ei ta lo va’ a ti leh a. Ka rindan chiah.

‘Pawn lamah a ei mai ang,a hmanhmawh anih kha’ pangngai thei ang berin ka ti a.

‘Nia,a hmanhmawh lutuk aniang. Min vin vak alawm’ a nui tha..Ka then lui ve sak ringawt.

Ka inbuala,ka inbual chhung pawn ka thlamuang tak tak thei chuang lo. Ka ti dak renga, ri hlekah ka hawi phawk nghal hraa,eng emaw hmuh mai inbeiseiin ka mit ka lenkual deuh reng bawk.

‘Aw’ phone a pick rualin thawveng fein Remruata’n a rawn ti a.

‘Inbuai em?” ka ti zuai raih.

‘Aih,buai lo..Tinge?”

‘Ka va hmu duh tak che’ ka ti halh.

‘Tunah nge nakin deuhah?” min hnial buai loin a rawn ti nghal vat.

‘I hman hun hun animai’

‘Ok,Lunch ei hunah reivak lo chu ka free ang,zanin hi kan rei hmel lutuka. Kan hna chu i hriat kha’ a rawn ti leh mawlh mawlh.Nia,ka hria..Lunch time bak chu free tak tak hun a awm lo.Hnathawka vir buai reng ni lo mah ila englai pawha inring renga hun hmang kan ni a. Inhnuai lamah hotu ber nimahse Remruata pawh hi leng kual mai mai tur chuan hun a nei bik lo. Pu farnu fa nimahse Staff dangte nen Danglamna a nei tlem viau.

Sanjana-i hnenah Machhuani ka hmu lawk dawn tih ka hrilha,diktak chuan hmuh ka tum miah lo.Ka awm loh laia Hriatpuia a lo haw palh takin tih thuah chhuanlam atan Machhuani ka hmang mai zawk.

‘Min nghak rei em?” a lo thlen veleh a rawn ti a. Ka lu ka thing mai. A rawn thu thla ve a,eitur ka chah tawh em tih min zawt a,ka lu ka thing leh nak.

‘Enge i ei ang? ‘ a ti a.

‘I ei ang apiang animai. Ka ril atam lo lutuk’ ka ti awlsam mai.

‘Ka let leh vat angai,in pa alo haw tawh sia. Tihtur atam zar zar lutuk’ a ti nung nung. Za lo zetin ka then leh sak.

‘Enge thleng a?” a rawn kun hnaia. A hmel a thutak ta viau bawk. Ka thaw halh thung,han sawi tan mai dantur ka hre lo.Pasal nei reng siin Pasal ni lo bulah thuruk han sawi ngawt zel hi nuam ka ti hek lo. Mahse, enge ka tih chuan ang? Ka pasalin ka harsatna a hre thiam lo anih chuan tihngaihna a awm hleinem.Ka hawi kuala,kan bul hnaiah kan tawng hre phak an awm em tih ka en kual leh rih.

‘Nizanah ka hmu leha,kan Inah..Kan room bula thutkhawmnaah khan ania’ ka ti sap. A meng zau kawk.

‘I chiang em?”

‘Aw,accident laia ka hmuh ang chiah khan animai..Ka lo thidang a’ ka ti zawi sep.

‘Wow..’ a ti ro halh. Ka kut a rawn vuana,nghet zetin a huma. Laksawn pawh ka tum lem lo.

‘Engtin nge ka tih ang ka hre thiam tawh lo.  Tunah chuan kan inchhung thlengin min rawn umzui tawh ania..Chuan,ka au ri kha Sanjana-in a lo hriaa,mahse tumah a hmu ve chuang bawk si lo.Ih..Diktak chuan kalbona hman a awm lo ang.Tukverh atangin a zuangthla anih ngawt loh chuan…’ mangang lutukin ka ti chhuak leh halh.

‘Okk..U Hriatpuia i hrilh em?” a ti leha.Ka mitah tak a en ran bawk. Tawng loin ka lu ka thinga,a thaw leh hak.

‘Hrilh ila a tha angem?”

‘Aih..’ rang zetin ka ti vat. Min hnial tum niawm takin a ang zuaua,mahse a chip leh hmak.

‘A tha alawm,enge titura min duh?” a ti a. Ngainatawm takin a nui a,Ka hriatthin ka thianpa Remruata dik tak kha ka hmu thei.

‘Ka hre lo’ ka ti mawl tawp.

‘Doctor hmuh i duh em?” a ti leh daih. Angaihna hre lo lutukin ka en a,ani pawh hian min ring lo a ni ngei ang. Ka kut ka lasawna, ka thaw hak.

‘Ka thil hrilh che kha i awih miah lo tiraw?” ka tita nghat.

‘Aih,chutiang a ni lo..Ka sawi tum zawk chu Doctor ka ni lo va,I rilru hahna hi kei aiin Doctorin a hre thiam zawk dawn che a’ inthiam lo hmel zetin a ti vat.

‘Ka duh lo.Doctor chuan eng mah tihtheih a nei chuang lo vang. Kha nu kha chhuichhuaktu tur ka mamawh.Engvangin nge hetiang hi a tih? A la dam nge a thi tihte pawh’ ka tita duah.

‘Awle,In inah CCTV dah turin u Hriatpuia ka lo sawipui anga. Lut leh chhuak zawng zawng a hmuh vek theih anga’ a ti a. Ka thle bak,ngaihdan tha tak chu a ni tehmeuh mai. Mahse, ani hian Hriatpuia hnenah hna thil ni lo sawipui mah se sawtna a awm hauh lo vang tih ka chiang.

‘Keiman ka lo sawipui dawn nia’ ka ti sap.

‘Um,nia..Sawipui la,I duh apiang chu a tihsak ang che tih ka chiang. A duh zia che kan hria alawm’ a nui a.. Ka nui ve sak,mahse ka nuih a za hlawl lo thung. Min duh mai ni loin min Hmangaih tih hi ka ringhlel ngai lo.Mahse,tunah kher chuan kan Boruak a chhe lulai lutuk tlat.

Min thlah haw a tuma, mahse ka hnial thung. Muangchangin kein ka kala,ka ngaihtuahna pik chuah chuah hian ka lu a tina bura,khawi hmunah mah hian ka thlamuang hek lo.

In ka thlen hnu lawkah Hriatpuia a lo hawnga,Ramsanga leh Mipa pakhat,ka la hmuh ngai loh an lo kal tel ve bawk.

‘I tha maw?” Ramsanga’n min rawn ti nghal bawrh bawrh.Ka that thu ka hrilha,Hriatpuia ka melh zawka. Zinga a mood fuh lo kha ala kal tluang zel tih hriat takin a hmel a nelawm lo ngang mai thung.

‘Sanjana,thingpui min lo siam la,Inchungah kan awm ang’ a ti bung vut. Room ruak zawk hi hnathawhna room atan ahmang zauh zauha,tah chuan an awm dawn tih ka hria.

‘Chho ila..’ Ramsanga te hnenah a ti leh a. An inzui chho chu ka en mawl tawp.

Sanjana-in thingpui a siam a,inchung lamah pek tumin Tray nen a rawn kal pheia.Ka tho vat,’Khawi ka han pe ang..’ ka ti a. Min hnial loin min pe ve mai bawk.

Tihbuak hlaua fimkhur zetin Stepah ka inchawi chho a, Room ruak lam ka pana..Kawngkhar tlemin a kau sa deuha, Kik tumin ka ban ka lakanga,mahse ka kik hmain Ramsanga ‘n ka hming a sawi rik ka hriat takah chuan ka tawp leh chawt. Mahse, ka hming a sawi chhan ka hre lo..Kawngkhar si deuh thawin ka ding hnaia,ka awmdan mawi loh zia hre mah ila ka hming an lam rik tlat avangin an sawi leh tur ka hre duh tlat.

‘Mami hian eng mah ala hre lo tihna mi?” a ti nawn leha .Ka thaw deuh hak..

‘Hre rih lo..Bakah,hei chu ahriat leh hriat loh vangin eng mah danglam tur a awm lo.Hna chu hna a ni tih kan hriat kha’ Hriatpuia’n a ti vawt ruih.

‘Ok,mahse i nupui ania. Bakah,hetiang thil lian tham..’ Ramsanga’n a tih ka hre leh a.

‘Ka nupui anih hmain he thil hi plan lawk vek anih kha’ Hriatpuia’n khauh zetin a ti leh hmuk…Kan inneih hmaa Hriatpuia u thilsawi ka hre chhuak zawk.

Hna,nupui,Inneihna…Eng mah ka hre thiam lo…..

Chapter-  24

An sawi zawm leh tur ka ngaithla a,mahse thildang an sawi ta daih. An thilsawi kha a awmzia hre lo mah ila thil tha lam anih ka ring lo ve tawp. Pi Mathani khan an unaua Plan an neih vanga kei min nei tih kha a sawi ngeia,mahse Hriatpuia khan a u in thiltha a duhpui lo tih a sawi mai bakah min Hmangaih vangin min neih a duh tih a sawi ve thung kha ania. Kan inneihna la rei lo hle mah se a U nen an inmil lem lohzia atak ngeia ka hriat zui tak avangin Hriatpuia zawk ka ring fel ta thlapa. Mahse, tuna an sawi dan hmang kha chuan eng thil nge an Plan hre lo mahila Hriatpuia aiin a U sawi kha a dik anih hmel ta tlat.

Thawk ka la vang vang,Kawngkhar ka kik zui nghala. Hriatpuia’n lut turin min rawn au a. Ka hawng zaua,min lo en thap.Ramsanga hmelah chuan hlauhthawnna niawm tak alanga, mahse a incontrol leh vat.Ka rilruah an thilsawi kha thil tha a ni lo ang tih ka ring nghet zual sauh.

Verandaah ka thu a, Pangpar ka hun tlar ho thliin a chhem zawnga phe hlap hlap chu ka en a,mahse ka ngaihtuah naah thildang a awm daih thung.Kan inneih hnuah Hriatpuia mimal sumdawnna ka khawih a,ka hmuh theih chinah dik lo leh thil tenawm a awm ka la hre lo. Engkim felfai thlapa duh chi a ni a, hnaah chuan hmuhhmaih pakhatmah a nei lo emaw tih mai turin a uluka,sumdawng thei tura Sawrkarin dan zam leh a phut zawng zawng a nei fel vek. Chuvangin dan kalha sumdawnna a ni lo tih lah ka chiang. Mahse,Ramsanga tel vena tur ka hre lo. A hna pakhatah erawh Partner anni tih ka hriaa,Account ka khawih tel tho avangin tah pawh khan dik lo a awm ka hre ngai miah lo. Han rinhlelh thei tur ang chi pawh a awm miah lo tih ka chiang. A chhan hriat si loha pawisa lo lut thut ang chi emaw hmelhriat loh pawisa tamtham tak thawn chhuah tih vel eng mah a awm ngai lo.

Pen thawm ka hriat rualin ka hawi nghal vat,Sanjana-i ka bul lawkah a lo ding reng tawh.Min en zawka, hnuai lam a en lehnghal daih. Ani leh ni lo ang takin hlauh nei niawm takin a ti dak bawk.

‘Enge a?” ka ti a.

‘Ih,ih…’ a ti a,a sawi mai thei lo. Eng chu a hre reuh nimaw?

‘I tha em Sanjana?’ ka ti a. Ka tho chhuak nghala,mahse a tawlh hnung leh hrat. A awmdan chuan eng emawti takin min tham a,ka awm a tinuam lo nge pawh ka hre lo.

‘Ka u thiante khi eitur ka siam kep dawn em?” a ti zuai raih.

‘Ka hre lo,hmanhmawh suh. Nakinah kan siam dawn nia’ ka ti a. Ka thle baka,ka nuih lui sak bawk. Min chhang loin a bu nghata,kun deuh chal chungin a kalsawna. Eng chu a hria ni maw? A awmdanah kha chuan naktuka thi tur ang mai a ni.

Inchhunga ka luh hmain Hriatpuiate pathum an lo chhuaka.Min rawn pan pheia,’Ka chhuak dawna,pawn lamah chaw ka ei ang. Min lo nghak lo mai rawh,kan rei ka ring’ chang zetin a ti nghut. A hmel nelawm lo zetah chuan enge angaihtuah ka hre thei lo. Ka bengah nichina an thil sawi kha a rawn ri nawn a, ngaihtuah duh rih loin ka lu ka thing nak.

‘Um..’ ka ti sap ringawt.

‘I thilsiam ei ka chak nen.Zanin chu hmundanga ei kan ngai khanglanga’ Ramsanga’n zangkhai takin a ti a. Nichina a hmel landan leh tuna a landan adang leh daih tawh.

‘I lo kal leh hunah chawei turin lo kal la,I duh duh kan siam dawn nia’ ka ti let ve a, ka nui lui sak bawk..Nuih tak taka nui lo va tihluihna a nuih ngai nun hi ka ning takzet.

Sanjana-i Kitchenah a lo awm a, ka lut thawm pawh hre loin a en ngai a lo en veng veng.

‘Sanjana’ ka ti thuta. A phu nasa ngang mai,thla chu nei se an khua a thlawk thei nghal hialin ka ring.

‘Aw..Ka u,enge ni?” a ti a.

‘Enge thleng sawi la’ dam thlapin ka ti a. Stool sang tha zet awmah ka lawn nghala,ka khup ka tawm chho a, ka khupah ka khabe ka nghat bawk.

‘Eng mah a ni lo’

‘Aaaa,sawi la..I u ka nih hi’ ka ti leh a.

‘Ka nu a dam tha vak lo va..’ a sawi dan dik chiah lo mah se ka remkhawm thiam vek tawh tho.  

‘Ehe!! Enge na a?” ka ti leh vat.

‘Ka hre chiang lo’ a ti tawi leh tak.

‘I haw duh chuan i haw thei reng ania’ ka ti leh a. A lu a thing mat mat thung.

‘Enge i ei duh?” ka ti a. Mak tih hmel deuhin a mengphar darh.

‘Ti nge?” a ti ha mai.

‘I ei duh zawng kan siam ang chu ka ti. I u a lo haw har dawna,kan eisan daih anga’ ka ti a. A hmel tlema hlim ta deuh chu ka en a. Ka nui leh sak.

Living Roomah Tv ka en a, Sanjana-i muthlu deuh lap lap reng chu ka khawngaih viau nangin keimah chauha awm ka chak hlawl lo. A muthlu chung pawh ka thlamuanpui tawk viau tho. Sana ka melha,dar 11 a hnai tawh. Hriatpuia a lo la haw ta lo cheu. Sanjana-i ka en leh a,keimah vanga a mutchhuak chung chung men luih tir talh nuam ka ti lo.Ka thaw deuh hak.

‘Sanjana,va mu la..A tlai tawh’ ka ti a. A zi mar ian ian.

‘Ka u a lo la haw lo ami?” tih pahin a hawikuala.

‘A lo thleng tep ang,mu la.Kei pawh ka han mu ange’ ka ti a. Ka tho nghala, Tukverh ho ka check kual leh dan dana. Hreh chung chungin room lam ka pan chho tham tham.Ti dakin ka hawi kuala,enge hmuh ka tum ka hria,mahse hmuh tak tak ka chak miah lo tih pawh ka hria.

Roomah ka lut a, kawngkhar bula ding chungin ka en kual a.Engkim angai vek.. Ka hmai ka phiha,ka phih zawh hnuah ka thawmhnaw ka thlak leha,khumah ka inthawlh nghal than. Ka mu fel deuh chiah tihin Hriatpuia Motor rawn tlan lut thawm ka hriaa,ka thawveng nghal hawk thei.

Room kawngkhar inhawng thawm ka hriat rualin ka mit ka chhing nghal hmiah,muhil tawh angin min ngai se ka duh avangin ka che ngam lo.A pen thawm ka ngaithla kara, khum bulah a tawp chat. Thawm awm zui loin a reh vang vanga,thawklehkhatah hlauhnain min rawn man thuta, ka khur zui nghal dar dar mai.Hriatpuia lo ni lo ta se…Ngam leh ngam loin ka mengchhuaka,khum bula Hriatpuia lo ding ka hmuh takah chuan ka thawveng nghal hawk.

‘I lo hawna a rei tawh em?” ka ti a. Ka thuchhuak nghal bawk.

‘Vawiinah khawiah nge i kal?”ka zawhna chhang loin a ti vawt ruih.Ka ip deuh chawih thung.

‘Ka chhuak lawka,Machhuani ka va hmu a’

‘Takzet?” a ti hluk.

‘Aw…’ ka ti leh sap.

‘Machhuani hi engtiklaiin nge Remruata a lo nih tak thut a?” nelawmna tel miah loin a ti leh hmuk. A hria tih ka hriatna chuan min thawng nghal zawka,ka thu khawng lah mai.

‘Ka…Ih,I rindan ang kha a ni lo’ ka ti bah nak.Diktak chuan ka chau tawh,dawtsawi zui zel chakna pawh ka nei tawh lo.

‘Ah,rindan pawh ka nei lo’ ngeiawm zetin a ti leh a. Sawi mai tur hre loin ka khap sak sak ringawt.

‘I pasal ka awm reng lai hian engvangin nge ani kha hmuh angaih chhan?” a ti thawt. Ka phu zawk thung.

‘Ni lo,chutiang a ni lo’

‘Enge anih? Enge keipawh ka nih?’ na zetin khum a beng dawta, ka phu leh vak.

‘I hre thiam lo ang’ ka ti zuai raih. Khumah a rawn lawna,zu rimin ka hnar a verh nghal zak.

‘Huh,ka hre thiam lo ang maw? Anih chuan i best duhtak khan a hre thiam bik maw?” a nui zui nghek bawk.

‘Aw…I hre thiam lo ang,achhan chu hriat thiam i tum dawn loh vangin’ ka au titih.

‘Tum pawh tum chhin miah lo khan ka awmdan tur sawi miah suh’ a ti leh hmuk. Min rawn hnaiha,ka ban tawn tawnah a rawn vuan thuta,min thing zui nghal nawka,ka te that thung.

‘Min thlah rawh’

‘Tehreng mai,mahse thil pakhat,Remruata nen ka hriat loha inchhuak dun leh anih chuan a pawi ang’ khauh zetin a ti leh hluka, Min thlah zui nghal bawk.

‘Min vau tihna mi?” ka ti dam thlap. Engtin nge dam thlapa ka tawngchhuah theih pawh ka hre bik lo.

‘I ngaihdan dan animai’ a ti leh hmuk. Khum atangin a chhuka,a thawmhnaw a hlip zui nghal mawlh mawlh.Ka che nghal phat,Lukham ka laa,min hnungchhawn zawnga ading chu ka vawm nghal pawp.

A rum hawka,a rawn inhera,a hmel hlauhawm lutuk chu ka hmuh takah chuan ka ip chawiha,khum kil lamah ka tawlhphei zui nghal zat.Khumah a rawn lawn ve a, khum mawng lamah chhuk tumin ka let phei a,mahse min rawn man hman ta tho.

Ka kawngah a rawn kuaha,hneh zetin min phih leta,min pawm kang zui nawlha,min bawhbet zui nghal hmiah. Ka theih tawpin ka ban ka vaia,a thle zel.Mahse ham tumin ka theih ang angin ka bei zui zela,a rawn kun hniam deuh lai chuhin a hmaiah ka hama.A rum nghut,ka ban pahnih a rawn mana,chung lamah a nem bet chho a. Ka ke ka leng kual vel pawh a mal sei thlurhin a kherh bet leh hmiah.

‘Duhtawk rawh,kutthlak che ka duh lo ania’ a ti hriam hruih.

‘I duh duh tirawh,Pawi ka ti lo’ ka ti that,ka aw khur hrep pawh chu a.

‘Keiin pawi ka ti thung alawm’ a ti hmuk.

‘I ti lo…I ti miah lo,nang hian ka harsatna min hriatsak ang maw? Aih,teuh lo. Ka hnung lamah plan i nei zawk,I tenawm’ ka ti leh nghek..Talchhuah tumin ka tal leh laih,mahse kan inlenhleih lutuka,awmzia a awm lo.

‘I duh duh sawi suh ka tih che kha’ a ti chang fuk.

‘Ka hre vek.Pha duh suh’

‘Eng maw i hriat?” a ti nghut.

‘Kei aiin i hre zawk ang’

‘Hre lo..’

‘Ramsanga nen insawi kha,ka hriat leh hriat loh vanga danglam lo Plan pawimawh kha..’ ka ti leh that.

‘I hriat duh loh vanga hnunglama plan siam ka ni lo.I hriat avangin a danglam phah lo ka ti mai zawk anih kha’ a ti chhuak hrawih.

‘Anih chuan Rosy-in a hre vek zawk anga’ tih elna ka awah chiang takin alanga, ngeiawm thei ang berin ka nui lui leh hak. Ka che thei miau lo va, tawngkam na tak tak ka hman hi ka tihtheih tawk a ni rih tlat.

‘Ka eng mah a ni lo tih ka sawi tawh kha.Sawi nawn tawh suh’ chang zetin a ti hmuk.

‘A va ropui ve,va nei nghal teh a’ ka awah thil tenawm deuh chanchin sawi ang maiin tenna chiang takin alang thei.Pawi ka ti eih lo.

‘Min tihnat hi a nuam em?” a ti sup. A aw pa zetah chuan na tuar aw chiang takin alang thei bawk. A awmdan tehthut chu ka beisei loh lam anih avangin chhan mai dan tur hre loin ka ngawi ren rawn.

‘Ka tina lo che,min tina zawk’ ka ti chang fak.Ka aw chhuak chang fak mah se ka chhungril hian a natna ka tawmpui thei tlat lawi. Nia,amak lo..Ka pasal a ni tlata,ka hmangaih ang bawkin ani pawn min hmangaih ve miau a.

‘Tih nat che ka duh lo’  a ti hluk.

‘Inthen mai ang,kan pahnih tan a tha zawk ang’ ka ti leh nghat.

‘A theih loh..’ nghet churhin a ti hmuk.A mit thim raih mai ka en a,chiang takin natna ka hmu thei.

‘Ti nge min neih?’

‘I hria…a ti nghut,min thlaha.A thuchhuak zui nghal a,khum tlangah min hnungchhawn zawngin a thu a, a lu a dawm vang vang bawk.Ka tho ve a, khum kil lamah ka tawlhpheia,bang nghengin ka thu fel than.

‘Ka hria,nia..Ka hria,mahse nupa kan ni chunga zep tamtak neih chu enge sawt a?” ka ti leh hmak.

‘Kei nge zep nang zawk?” a ti hmuk. Chhan mai dan tur ka hre lo,diktak chuan amah ka dem em em rualin kei ngei pawh hian zep ka nei ve tho.Mahse, a awih ka rin loh vanga hrilh lo ka ni a,ani nen kan in ang thei lo.

‘Min chhang duh suh;duhtawk ang,Ka chau tawh. Khatiang kha a thleng nawn tawh lo vang. Mamawh i neih chuan min hrilh dawn nia.Mahse, inthen kha chu ngaihtuah pawh ngaihtuah suh’ nghet churhin a ti leh a. Ka chhan pawh nghak loin a tho a, chhuata lukham tla a chhar.Kawngkhar lam a pana,a chhuak a. Dimtein kawngkhar a rawn nem khara..Ka biang a rawn lum thla papa,ka mittui a tla tih ka hre chiah.Hruk pawh ka hru buai peih lo..

Tun lawka thilthleng kha ka ngaihtuaha,Hriatpuia’n min Hmangaih atih kha ka ringhlel lo.Mahse, englai atang khan nge dik lo tan ka ngaihtuah chhuak zo chuang si lo,a tel lo va nun hmang tura ka inngaihtuah zawng ringawt pawn ka na vawng vawng thei. Ka mamawha,ka buaina zawng zawng hi amah nena fight ka duh.Mahse,mahse a awm tlat..

Ka thu tlaivar ta thak,Hriatpuia lah a lo let ta miah lo,diktak chuan a lo let ka ring lo saa,mak ka ti lem lo. Thil tamtak ka ngaihtuaha,mahse thil tangkai leh tha ka ngaihtuah chhuak chuang eih lo.Ngaihtuah chhuah ahnekin ka buai zual ting mai zawk.Ipik em em siin ka ruak vel vek. Keimaha awm ka hlauhna zawng zawng a bo veka. Khawvelah hian keimah chauha awm ang maiin niin ka inhriaa. Inchhungah hian Hriatpuia a awm ve tih hre mah ila kan inkar erawh mel tamtak ang maia hla niin ka hre thung..Ka pa ka ngai vawng vawng.

Ka inphih harha,ka mit kham leh thial urh erawh a reh phah chuang lo. Bathroom chhunga dahthalangah ka in en vang vang. Ka lang pawr fapa,ka mit hnuai a val kual raih bawk.

Room atangin ka chhuaka,room pakhat zawk lam ka en vang vang. Ka pan phei ta nge nge. Kawngka bulah ka ding ren rawna,dimtein  ka herh chhina,a inkalh lo hlauh. Thawm nei lo thei ang berin ka nawr hawnga,thutthlenga Hriatpuia mu ka va hmu a, mutbu dahna atangin puan a la tih ka hre thei. Ka inring hman lo, ka mittui a rawn hnam nghal sawk..Mak takin keimahah inthiam lohna a rawn lut a,engvang nge hre lo mah ila ka thiam loh lianpui awm niin ka hriaa, rem lo leh tawt zeta a mu chu en reng ngam loin ka pawt khar ta zawk.

 Inhnuaiah ka chhuk thlaa,thawm awm loin a reh thiap. Sanjana-i ala tho lo a ni ngei ang. Thingpui ka chhuanga. Ka chhuan chhungin pawnah ka chhuaka,Pangpar ka en kuala. An hring hlep hlepa,zing ni chhuak tan tirin a rawn chhun a, An lang nalh takzet.

Thingpui ka in laiin Sanjana-i a rawn luta,min hmuh rualin a mengphawk vak. A demawm lem lo, ka accident hnuah ka tho hma ta meuh lo a,ani lah ka accident hnua lo awm ve chauh a ni bawk si.

‘I va tho hma ve’ mak tih hmel deuhin a ti a. Sana a en a,’ thawh ka hai zawk aniang’ a ti leh a. A awmdan chuan ka nuih a ti zaa,ka nui hak hak mai. Tun hnaiah a der ni lo va ka nuih awmchhun a ni hial ang.

‘I nu enge a an?” ka ti a. Mak deuhin a meng buai deuh nak mai!!

‘A dam lo i tih kha’ ka tinawn leh a,hre chhuak thut niawm takin a insiam tha vat. Mak ka ti lehpek..

‘Aw,aw..Nizanah chuan tha deuhin a muhil an ti a’ a ti a. Ka bu nghat; mahse,a awmdan mak lutuk kha ka ngaihtuah daih thung. A nu damlo kha a theihnghilh tihna nge ni??!!

Sanjana-i nen eirawng kan bawl laiin Hriatpuia Kitchenah a rawn luta, ka chemte ken lai ka dahthla vat. Mahse, min sawisel tum hmel a pu lo. Sawisel chu sawi loh min en lo hrim hrim zawk. A hma khan eirawngbawl tura luh a phal lo tih a sawi kha ania,mahse kan inkar boruak a chhiat tak viau avangin ka awmdan eng mah min sawisel a tum ta lo pawh a ni mahna le.

A thawmhnaw hak  ka en a,achhuak dawn tih ka hre thiam nghal mai. A tlangpuiin dar 9 leh dar 10 inkarah a kalchhuak tlangpuia,vawiin chu thil hmanhmawhthlak a awm a ni ngei ang.Kan inneih hnuah ka hman phawt chuan a insiam laiin Roomah ka awm deuh ziaha,ka dahchhuah ang ang sawisel loin a ha ve tawp zela,tukin erawh hman loh vang niloin thil a danglam ta vek. Cotton Jeans dum dak tha zet a haa,aCollar T-shirt a haa,a kekawr kawngah a bilh luta, Loafers a bun bawk. A thawmhnaw hak chuan a tilang lian zual sawt emaw tih mai tur a ni a, sawiselna lai tur a awm lo ang tih tur khawpin a inhmeh takzet bawk.A bag Chair pakhatah a daha,Chair dang a pawtchhuaka,a thu thla nghala. Dawhkana Chanchinbu ala,a lo luh tirh atangin min la en lo hrim hrim.

‘Thingpui nge thildang ka siam dawn?” zangkhai thei ang berin ka ti a. Sanjana-i a awm ve avangin kan boruak rit lutuk tihlan loh hram hram ka duh.Nizan lama kan inhau thawm pawh kha a hriat loh ka beisei takzet.

‘Thingpui leh Artui animai’ bung zetin a ti a. Ka siamsak sawk sawka,ka chhawp saka.Ngawirengin a ei nghal mawlh mawlh.

‘Kolasibah ka kal dawna,zanah ka rawn let ang. Ka lo let hman lo maithei bawka’ a plate nawrsawn pahin a ti a.

‘Um…’ ka ti sap ringawt.

‘Roomah i thil tur ka dah a,I lo check dawn nia’ a ti leh a. Ka chhanna pawh nghak loin a tho a, a chhuak zui nghal chu a ni der.Ka thluak a vir zawk, eng ang pawn kan inkar tha lo mah se a zin chhuak dawna,tha taka thlah liam ka duh.

Pawnah ka zui chhuaka,Motor a hawnga. A bag a theh luta,a thu lut zui nghal a. Ka zui chhuak tih hre hmel a pu lo. Sanjana-i Gate hawng turin hmanhmawh zetin a tlan dar dara. Motor lam pana kal ka tum zeta, mahse inchhung lama ka phone ri ral ral vangin inchhung lam ka pan ta zawk.

Ka phone ka lakanga, min rawn call tu ka en a, Ka thensak.

‘Hello, Mahruai…’ ka ti zui nghal zat.

‘Awi,I reh zia hi’ hlim zetin a rawn ti nghal chul.

‘Reh vang vang hi a tha,tak takin nang pawh i reh ve tho a..I dam maw?” ka ti leh duah.

‘Um,dam alawm..Officeah lo leng la,Boss chiah kan hmu reng mai’ a ti a. A nui leh hak hak.

‘Nakinah ka lo leng dawn nia,in Boss chu a sual thin em?” ka ti let ve a.

‘A mood a off viau chuan i dam tha lo a lo ni thina..Tak takin ani te chu Sumdawng mi diktak a ni tih i hriat kha,Mood Swing a nei ve lo aniang kan ti thin alawm’ a ti leh mawlh mawlh. Ka hriasa mah nise Hriatpuia fakna ri chuan min ti nui var var tho mai.

‘Ka lo call chhan che chu maw,Pasal ka nei dawna..Man eitir che ka tuma’ amah bawkin a ti leh a,a nui zui hak hak.

‘Awi,a va nuam tak..Ka hriat kha aniang tiraw?” ka nui a. A nih thu a rawn sawi ve nghal vat,a bialpa nen hian an inzui rei ve tawha,kan thawhho lai pawh khan a rawn kal zauh zauha,innel tak kan ni lo nangin kan inhre tha ve pangngai viau. An inneih hun tur leh thildang dang kan sawi leh teuha. Ka dah hnuah pawh ka la nui var var mai. Ka mood chhe lutuk min rawn thlakdanglamsak a ni ringawt.

Pawn lam ka pana,Hriatpuia tlanchhuak tur chiah ka va hmu a, Mahruaii nen khan kan inbe rei phian sia,a kal daih tawh turah ka ngaia.Mahse, tunah a kal chauh a….Hmm,Phone ka hman lai khan Motor tlanchhuak ri ka hre miah lo tak..

Roomah ka thil tur adah tih a sawi ka hre chhuak zawk,hmanhmawh fein room lam ka pan chho a. Roomah ka lut nghala,khumah File a lo awm a. Enge hmuh ka tum chiah ka hre lo nangin hna chungchang a ni tih File ka hmuh rualin ka hre theia,atthlak zetin ka Down deuh rawih thei.

Khumah ka thu a, File ka lakanga. Ka keua,mahse ka hmuh tum ka hmu ta miah lo,mak ti zetin ka en a..Thil inziak ka chhiara,ka meng zau kawk kawk mai. Lehkha inzep zawng zawng ka enkual zar zara,a tawp berah Paper pangngai inthlepin a lo inzep tela..Ka pawtchhuaka, Ka tipharha..

‘Ramsanga nena kan thilsawi chu hei hi a ni a,Plan tha lo erawh a ni lo. Hriat duh dang ila nei anih chuan min lo call thei ang’ a ziaktu Hriatpuia a ni tih ka hria.

Che loin ka thu a,ka file ken lai ka zuk en leh a. Kha lehchen hna ka lo thawhna,Pu damlohna avanga Hriatpuia’n a rawn pui emaw ka tihna hmun kha, kan pu ta ni loin a neitu chu Hriatpuia a lo ni reng a!!! chu pawh tunhnai mai ni loin kum khat hma lamah daih tawh lehnghal….

Chapter- 25

Hriatpuia hmel ka mitthlaah a lo lang nghal a, nizan khan ka tawngkam a mawi lo a. Na a ti ngei bawka,kei pawn na ka ti ve tho..Ka hriat loh tura min phiarru ang mai khan ka ngaia,mahse ka tum anga inphiarrukna lam reng reng a lo ni si lo..  Ka lu ka thing nawk,engvangin nge he thil hi ka hriat loh tura zep angaih? Nupa kan ni chung pawha hetiang thil lian tham zep chu inrintawk lohna lianpui angah ka ngai nghet hmiah. Mahse, min bum nia ka hriatna erawh vawmbo ang duak a ni tawh thung.

Ka phone ka phawrhchhuaka,Hriatpuia ka call nghala,mahse a pick hmain ka off leh daih. Ka awm ka dawma,ka thaw halh mai,enge ka sawi chuan ang?

Inhnuaiah ka chhuk thlaa,a lo reh thap. Sanjana-i ka ko va,chhanna a awm lo.Pawnah a awm anih ringin ka chhuaka,Gate a rawn hawng ve chiah. Bawlhhlawh bawm a khaia,a kalna zawh kher ngai loin ka hre thei mai.

Thil kan ei duna,a tawng siam siama,nimin lama a mood nen chuan lei leh van a ni ringawt. Ka thil ei lai ka ngaihtuah hleithei lo,ka rilruah Hriatpuia file lo dah ringawt kha a cham tlata,ngaihtuah loh ka tum pawn ka thei lo. Neitu anih si chuan engvangin nge nikum chhung khan Puin a enkawl tho si? Bakah,sum lamah an tlakchhiat awm ka hre bawk si lo.Dik lo taka tiin an laksak anga,kan pu khan a hre lo a ni thei angem? Ni lo,chutiang a ni ngawt thei lo..A neitu hmasa hriatpuina tel lo chuan hralhchhawn theih a ni dawn lo hulhual….Hriatpuia u thusawi ka ngaihtuah chhuak a,an unaua plan an neih kha hei hi a ni mai angem? Thiam takin a pasal a bum anga,an laksak tihna ni ta se……

‘U…I tha em?” Sanjana-in min tih riah ka ngaihtuahna atangin ka harhchhuak zawk.Ka thleng ka en a,ei mumal loin ka lo thai kawi kual vel mai mai chu niin.Sanjana-i ka en leha,a mitmu var chiang zetin maktih hmel fein min lo melh ra mai.

‘Um,tha e..Ka ril atam vak lo anih hi a’ ka ti a,za lo zetin ka nui lui sak. Ka tho zui nghala,mumalin eng mah ka ei ta miah lo. Ei leh chakna pawh ka nei lo hrim hrim bawk.

Room ka lut chiah tihin ka phone a ri ve chiah bawk. Ka ak emaw tiin ka kekawr ipte ka dapa,mahse a awm lo. Ka hawikuala,khumah ka lo kalsan tih ka hre chiah. Ka pan pheia,ka lakang nghala,min rawn calltu ka en a.Hriatpuia a lo ni a, nichina ka call vang khan a rawn call back a ni ngei ang.

‘Hello..’ ka mood nena inmil lo khawpa zangkhaiin ka ti a.

‘I lo call a…’ a ti nghut.

‘Aw,mahse angai leh lo mai’ ka ti dam leh thlap. Khumah ka thu a, file ka keu leh a,Ka chhungrila zawhna awm tun hi chu a lo haw hun atan nimai teh se.

‘Sawi la,min lo call dawn tih ka hre lawk tho a’ a ti leh a.

‘Aih…Hriat belh duh ka neih hi chuan ilo haw hun anghak thei’ ka tum aiin ka aw a chang hret..Ka pum rawn na deuh thut ka dawma, ulcer ka neih avangin pumna hi chu ka tan thil thar a ni lem lo,mahse tun tuma a nat dan erawh hi chu ka tai bawr chung vel atangin a ni a, min pawt deuh tlat bawk.

‘A tha alawm,thil pakhat..Kha thil kha khawiahmah achhuak tur a ni lo’ a ti leh hmuk.Ngenna ni loin thupek a ni tih a sawi danah a chiang reng. Mahse, ka pumna lutuk avangin ka ngaihtuah hleithei lo..Ka lu a haia,ka luak achhuak nghal hluia,insum hman loin ka uak vak..

‘I tha em?” a rawn tih ri chu ral hla tak atanga rawn au ang maiin chiang lo ruaiin ka hriaa,ka khawhmuh a fiah lo nghal vek bawk.Ka kekawr kap ka khawiha,ka kut ka en leh a,thisen thar lam zet chu ka hmu phe ruai…Thla hmasa khan thla tirah ka Perioda,a insawn avangin thla tawp dawn a ni chungin tun thla ka la Period lo a,mahse Period thut vanga hetianga awm hi ka la nei ngai lo.Ka pum a rawn na leh vaka,ka thlan fim a tla zui nghal bawrh bawrh mai..

‘Mate,engtin nge i awm?” Hriatpuia rawn au leh tuar chuan tlemin min tiharh deuha,ka ngaihtuahna buai vek tihfim tumin ka lu ka thing a,awmzia a awm pawn ka hre lo.

‘Ka….Ka pum ana lutuk’ ka tichhuak thei hram,chhuatah ka thingthi thla hnawka.Phone ka thlauh a, na ti lutukin a saizir zawngin ka mu a. Ka phone tla bal chu harsa ti chung chungin ka bana,mahse ke a rawn lang thuta.Ka phone a thaisawn nghal daih bawk.

Thei leh thei loin tu nge anih ka enchho a,thle bur chunga ka mi sut nu lo ding chu phe ruaiin ka han hmu a.A nui zui vun vun chu rapthlak ti lutukin ka en a..’ Min tina suh’ ka ti chhuak sep..Ka pum a rawn na zual leh vaka,a thim mupa,ka ral ta riai riaiin ka hriaa,engkim a tawp ta vek.

Ka harh deuh kawka,che loin chung lam ka en a, a var vek tawp. Thawm eng mah awm loin a reh vung vung bawk.Ka awmdan ka ngaihtuaha,Hriatpuia nen kan inbiak laiin ka pumna vang khan ka tlu tih ka hre chhuak nghal a. Ka tluk lai khan kha nu kha ka hmu bawka..Ka pumna kha ana lutuka,na ka tih lutuk vang khan ka hriatna a buai vek anga,hmu angin ka inngai mai mai zawk nge ni ang ? Nge kei hi tunah hian ka thi tawh zawk?

Kawngkhar inhawng thawm niawm tak ka hriaa,ka hriatna lamah ka thle vat. Hriatpuia rawn lut mek ka va hmu a, ka mitvai mai mai a ni em ka hre lo. Zingah khan Kolasib kal turin a chhuak kha a ni a, tunah engtin nge hetah a awm daih theih ang? Aaa,ka thi reng pawh chu aniang a.Ka mit ka chhinga, ka mut ngaiin ka mu leh ta zawk.

Ka mutna hniam deuh sat ka hriaa,ka chalah hmui lum thar tharin a rawn si zui zat. Hriatpuia ngei a ni tih ka hria.

‘Mate,harh tawh teh’ a aw pa zetin a ti sup.Khum a che leh data,a tho tih ka hretheia,mahse  ka puansin a rawn zena,ka kut a rawn khawiha,ka kut zungtang karah a kut a rawn rawlha. A hum zui nghal vang vang.

Muangchangin ka mengchhuaka,plastic chairah a lo thu a, a mit achhing tlat bawk. Tho chuang loin room chhung ka hmuh theih chin ka thlek kuala,Damdawiinah ka awm tih ka hre theia,ka rin aiin ka na phian a ni ngei ang..Aaaa,ka pumna kha a natdan a rapthlak lutuk zawk.

‘I lo haw leh maw?” ka ti sep. Ka aw a zawi lutuk,mahse a rawn menchhuah nghal danah ka tawng a hre thei tih ka hre mai. A rawn tho nghal a,khumah a rawn thu ve a..Ka biang tawn tawnah a rawn vuana,a rawn kuna.Ka biangah a mittui a rawn fara !! Tap thei tur pawha ka ngaih loh leh Mittui a nei ve pawha ka rin loh hi ka harh leh tih a hriat vangin a miitui a tla anih chu!!A awmdan chuan min fan chhuak vek thei..Zawitein ka nui chhuak haka,mahse ka nui ka ti ngawt nangin ka tap ve zawk nge pawh ka hre hrang lo.

‘I mittui a tla a’ ka ti leh sep. Min chhang loin ka chalah a rawn fawp a,a insut zui hrawih..Ka mit ka chhinga, ka nui leh sak.

‘Min ti hlauthawng lutuk,I hria em?” harsa tih hmel zetin a ti sup.

‘Ka duh vang a ni lo a’ ka ti fan raih. A tho kanga,ka mitah tak chiang zetin min en a,ka biang tawn tawnah a kut zungpuiin dimtein a tuai hauh hauh.A tawng dawn emaw ka tih laiin a rawn kun hniama,a hmui chhah tapin ka hmui a rawn si a,dim leh dam lutukin min rawn fawpa. Ka mit ka chhing nghal chial thung.

‘Doctor ka va ko ange’ inlakhran pahin a ti a. A dingmar zui nghal zat.A chhuah hnuah thutchhuah ka tuma,mahse ka tai na zawk avangin ka mu lehnghal a. Na zawk chauh a ni nangin a nat dan kha a fiak thak ka ti mai. Min ti zawi nghal rawih thei hial bawk!!

Kawngkhar inhawng thawm ka hriat veleh ka thle phei nghal a, Hmeichhe pakhat leh Hriatpuia an rawn inzui luta,a hnung berah Sammy-a a lo kal tel ve bawk.Sammy-a thawhna Hospitalah ka awm tihna a ni ngei ang.

‘I tha em?” Hmeichhe lo kal ve chuan zaidam takin min ti a. Ka that thu ka hrilha,ka then zui sak bawk.

‘Hriatpui,khum hi tikang teh a.Tho kang rih lo se ka duha’ Hriatpuia hnenah a ti a. Hriatpuia a biak danah an inhre tha sa anih ka ring ve tawp.

Hriatpuia’n khum a tikanga,thu mu ang deuhin ka awm thei ta a.Mut mar ngawt ai kha chuan a zia ta deuh..

‘Thil tuiril lam ei se,chuan che tam lo se ka duh ania. Inzai hi chu indim tluk a awm lo’ a ti leh a. Ka mengphar awk thung. Hriatpuia lam ka en vata,ani erawh eng mah sawi loin a bu nghut ringawt.

Doctorin Hriatpuia hnenah eng eng emaw a hrilh leh teuh.Kei erawh chu engvangin nge min zai tih ringawt ka lo ngaihtuah ve daih thung. Ka pumna kha rilphir vang a lo ni reng tihna nge ni? Anih ngawt loh chuan zai ngawt chhan tur ka awm miah lo…

‘Tunah chuan i nui thei tawh ang chu,hei a harh tha tawha. Hlauhthawn tur a awm tawh lo hmel bawka.Mami han damlo zet chu Hospital pumpui hi kan buai vek lo chauh a ni. Tiraw Ashley ’ Hriatpuia en chungin Sammy-an a ti a. A nui zui kur kur bawk. ‘Ashley ‘atih chu Doctor chu a ni tih ka hre thiam.

‘Nia,kan Hospital hian thilpek tamtak kan dawn beisei phawt ang. Thianho zawng zawng zinga  boss ber nupui kan chhanhim hlauh bawka’ a ti ve a. A nuia,Sammy- a pawh nuam ti zetin a nui leh huk huk. Hriatpuia ka en a,min en loin Sammy lam a hawia.A nui ve tho bawk. Engtin chiah nge a mangan hre lo mah ila a phi buai nasa a ni ngei ang. Kan thawh ho lai pawh khan hnaah thil liantham tak tak tihsual tum a awm ve fo va, mahse vawikhatmah a phili buai ka hre ngai lo.

Sammy leh Doctor chhuah hnuah Hriatpuia a rawn thu hnai leh a.Ka kut a rawn hum lehnghal chat bawk.

‘I ril a tam em?” a ti sup.

‘Aih, mahse tui ka induh’ ka ti a. A che nghal vut,no a rawn lek hnaia.

‘Ka in thei renga,ka nat hmel em mai’ ka ti sap. Mahse, ka sawi hre lo ang hmiahin no ka hmui bulah a rawn lek hnaia. Hnial a sawt dawn lo tih ka hria.

‘I la in duh em?” a ti leh a. Tawng loin ka lu ka thing nak.

‘Thil ei la a thain ka hria’ a ti leh a.

‘Nakinah,ka ril atam lo alawm’ ka ti ve thung.

‘Luhlul si’ a ti hmuka,mahse a thinrim lo tih ka hria.

‘Ti nge min zai? Ka pum ana ringawt a’ ka ti chhuak sap. Min chhang loin min en vung vunga,a hmai a tuai puata,a thaw hawk bawk.

‘That lohna ka nei em? Nge ka tha lo viau zawk?” hlauthawng zetin ka ti leh a, A thle buk.

‘I pumna kha pumna satliah a ni lo va.. ‘ a ngawi leh daih. Thawk pawh thaw tha ngam loin ka en kar ringawt.

‘I chi kawngah nau ilo paia….’ A ti fan ruih,kei erawh ka thawkna dawt hnawhtu awm ang maiin ka thawk a sak nghal tawlh tawlh mai.

Ka puansin a rawn keu a, ka kawr a pawthlim chho a, ka kut a rawn laa,ka lai hnuai deuha an zaina niawm tak an tuam min khawih tira,ka thaw hak mai. Min lo zai ngei mai,ka harh tirh khan engtin nge ka hriat loh theih ni?!Hriatpuia ka en a, a hmelpa zet chu a lang dam thlup.Khumah a rawn thu kai ve a, rem lo zetin asir zawngin a mu ve a.Min rawn kuaha,ka sam a chul zui hauh hauh bawk.

 ‘Nau ka pai tihna maw?” reife kan ngawih hnuah ka tichhuak thei hram.

‘Um…I hre lo tak tak em?”’ a ti sup.

‘Aw,hre miah lo..Ih,diktak chuan ka period hun a insawn ringawt emaw ka ti a,keimahah naupai angin ka awm lo hrim hrim a…’ ka ti leh sep. Tunthla Period lo tlang ta ila chuan ka in check ngei ang tih ka hria.Mahse, tun thla ala zo lo va, bakah rai awmdan tur anga ka ngaih eng mah keimahah a awm tlat loh avangin ka rai ang tih ngaihtuah ngaihna ka hre lo hrim hrim.

‘A pawi lo,a tha vek tawh e’ a ti leh sup. Min ringhlel awmin a awm lo.

‘Ka chi kawng a puak tihna mi?” ka ti leh a.

‘Aih, puak hman lo deuh.Tlai hret ila chuan a pawi maithei.Mahse, hei kan tlai ta lo alawm’ a ti dam leh thlup.

‘Naute…’ ka ti zuai raih.

‘Kan nei leh mai ang. Ashley khan thla thum hnuah kan try leh thei a ti a’

‘Angai ang bawkin awm leh ta ila..’

‘I awm lo ang.Mahse, naupai tura i nunna dahkham angai dawn anih chuan i pai lo mai ang.Fa tamtak aiin i pawimawh zawk’  nghet churhin a ti leh a. Ka chhang lo,ka pum nat thut dan kha ka ngaihtuaha,anat dank ha mak ka ti lo thei lo. A hmain ka tai bawrah ana ngai miah lo tih ka chianga,khatiang khawpa rang khan engtin nge ka nat vak theih? Machhuani Cousin pawh khan hman deuhah a chi kawngah a pai tawha,ani pawh kha a nau neih thi a rin avangin arai tih a inhre lawk bik lo va, mahse a pum na ngun lutuk avangin a in entira,tah chuan an lo hre chhuak kha ania. Kei kha chu nat lawk awm miah lo a ni a,chu pawh a lo puakkeh hman tep bawka!!!

‘Engtikah nge ilo let a?” ka ngaihtuahna nena inmil lo zetin ka tita zawk. Ka ngaihtuahna avang mai maia tihbuai nawn leh ka duh tawh lo.

‘Ka rawn call che khan Officeah ka la awma’

‘Maw? Zingah i chhuak sia’ ka ti ha.

‘Officeah thil pawimawh tih hmasak angaia.Ka lo kal hman lo kha a tha zawk’ a ti leh a.

‘Um,nia..A nat dan kha amak lutuka’

‘Kan inbiak laia i awmdan kha thil pangngai a ni lo tih ka hriaa,ka rawn tlan haw nghal a. Sanjana-in tap chungin min lo call bawka,Ka lo thlen lai chuan Noel-i te an lo awma..’ a tita duah. Ka ngaihtuah leta, kan inbiak laia tlu kha ka ni a, ka hriatna a mang vek tih leh ka hmuh hnuhnung ber kha chiang lo ruaiin ka hriaa…Ka khur nghal chu a ni leh der.

‘Shh, A tha vek tawha.Thil pawi a thleng lo hlauh bawka’ a ti leh a. Ka khurh chhan diktak a hre lo tih ka hria,sawichhuah ka duha, mahse bul tan dan tur ka hre lo.

‘I hlauthawng ang tiraw?” ka ti ta zawk.

‘Hre lo zawk rawh..’ ka nui hak,ani erawh a rum nghut thung.

‘Thil ei tawh la’ a ti leh daih.

‘Aih,ka mut achhuak’ ka ham zui leh bai bai.

‘Mut duh lutuk,Nileng deuhthaw i muhil tawha’ a nui a. Ka hnar hmawr a rawn tuaia.A insiamrema,a darah ka lu ka nghata..A kawngah ka kuah bawk.

‘I thin a rim tawh lo tiraw?” ka ti leh sep.

‘Nangmah i nih chhung chuan ka thinrim rei thei ngai lo ang tih i hria alawm’ a ti nghet churh.

‘Mahse…Kei chu ala rim reng.Ih,Rosy kha ilo call lai ka hre tak tak,tinge a bulah khan i haw tur kha i hrilh kher?” ka ti leh a. Ka awah ka lungawi lo tih ahriat theiha,thup pawh ka tum buai peih lo.

‘Ka ning tawh kha thil kha’ a ti hluk.

‘I bialnu hlui a ni a, chu pawh mi zawng zawng hriatpui lehnghal. Ka en liam mai mai thei lo’ ka ti hlak. Ka mut dan siamthat ka tuma, mahse ka tai a na leh zawk.

‘Engtikah nge ka call le?” a ti hmuk.

‘I lo haw dawn ni kha,Rosy nen kan inhmu a,kan inbiak laiin ilo call a’ ka sawi zawh rualin tawngkam mawi lo zet a phuhchhuak hluk.

‘Enge?” ka ti hmak.

‘Amah hi ka call anga, sawifiah se a tha ang chu’ a ti a. A phone locker chunga a dah a bana.

‘Enge sawifiah tur awm a?” ka ti ve thung.

‘Lo nghak rawh,ka call anga.I hre thei ang chu’ a ti leh hluk. Ka ngaihtuaha,Rosy sawi ngaihthlak kher ka peih lo.

‘Dah teh’ ka ti leh hlak.

‘I hre duh leh si lo tihna mi?” a ti ve hluk.

‘Nang man sawifiah mai la,ani biak kher kher’

‘Ok..Ka lo call ngeia,mahse ka haw hun tur ka hrilh hauh lo mai. A-pa damdawi pakhat min chaha,chu chu ahming ka zawta, msg a min rawn thawn mai turin ka ti a. Chu zawng chu,biak lah ka be rei hek lo’ a tita duah. Mak ti zetin ka thaw hak thung.Ka ngaihtuah leta, Hriatpuia dah hnuah a duh duh sawiin a tider tihna maw? Ka awih thei lo zawk.Mahse, a hlawhtling chiang bal.Nia,min tina a,Hriatpuia ka rinna ka hloh then bawk.

‘A be zui teuh che a, I lo haw dawn tih i rawn hrilh ang chiahin a tawnga, inthianpa’ Danny’ tih kha hmuh inngai tih vel a sawi leh a….’ ka ti niah niah.

‘Rosy a ni miaua’ a ti liam vut. Thilsawi tumin ka ang ziaua,mahse ka ngawi leh ta zawk. A sawi awmzia ka hre thiam ta kuar. Awih harsa ka tih kha ka awih angai.Min tihnat a tuma,a hlawhtling. Ka inthiam lo ru vang vang mai.

‘Ih maw…’

‘Shh,a tawk rih..Zawhna lam hi chu nakinah hun kan la ngah dawn lutuk’

‘Um..’

‘Ka hmangaih che’ a aw pa zetin a ti leh sup.

‘Kei pawh…’

Ni 4 hnuah Damdawiin ka chhuahsana,ka awm chhung zawng Hriatpuia a awm ve chawt. Sawithiam phak bakin kan inkar a tha zui ta bawk. Awmpui ka ngai lo ka tih pawhin a nui mai mai zela,thil pawimawh lei ngai lei tura a kalchhuak zawk tih loh chu min kalsan ngai meuh lo.Kan inkara inhriatthiam loh tawnna kha a bo ta vek a ni ber.Min duat lutuka awmngaihna hriat loh palh ka hlau a,keimah leh keimah awmdan tawk thiam turin ka inhrilh fo angai hial!!

Machhuani a lo kal deuh renga, Remruata vawihnih a lo kal bawk. Hriatpuia pawn tha takin a lo dawngsawng ve a,ka thawveng hawk thei.Ka thiantha ber a ni a, ka thuruk kawltu a ni bawka. Ka tan a hlu a,Hriatpuia nen an inkar buai lo se ka duh ber.Hriatpuia ka tan a hlutzia ka sawifiah zo lo a,mahse Remruata pawh chan ka duh chuang lo tih ka chiang.Ka beisei miah lo chungin Hriatpuia u a lo kal ve mial bawk. Hriatpuia nuin nitin min lo call ziaha.Min ngaihtuah em em tih ka hriaa,kan chengdun tlem hle chungin ka nu ang tak takin ka ngai tan der tawh.Damdawiina thawkte lah an fel em em a,Sammy-a thawhna hmun anih mai bakah min enkawltu Doctor Ashley,Hriatpuia te nena inhre tha tak mai an lo ni lehzel bawk nen,ka vannei lehzual.

‘Mate,ka kal aw’ Hriatpuia’n Bathroom a ka awm laiin Kawngkhar pawn atangin a rawn ti a. Kawngkhar ka hawnga,a lo insiam peih vek tawh.

‘I lo haw har angem?” ka ti a. Ka hmai ka hru paha.

‘Ka rei deuh maithei,mahse lo haw hma ka tum anga’ a ti leh a. Min rawn pan hnaia,a rawn kuna,ka chhipsamah a rawn fawp nghal zauh.

‘Nimin ang khan chet kual vel lo tum tawh miah suh,mamawh ineih pawn Sanjana-i ko la,inhnuaiah chhuk kher angai lo ania’ a ti leh a. Ka ner khum zauh.

‘Ka nat hmel em mai,engkima Sanjana-i koh buai reng chu a zia lo a,bakah ka that tawh em hi’ ka ti a,ka thle bak.Damdawiin ka chhuahsan atangin ni 3 lai a liam tawha,bakah na chhia leh buaipui ngai ka ni tawh lo hrim hrim.

‘Aw tih mai hi a harsa thin tiraw?” a ti dam thlup. Ka ang ziaua,mahse a kut in ka hmui a rawn khawiha.

‘A tawk,thu lo awih la..’a then suk,ka nui ve ta nge nge.

Muangchangin ka inbuala,tuilum pep pepah ka inchiah vang vang. Ka nuam sawng sawngin ka hre hial bawk. Min zaina lai ka khawiha, a tuamna an phelh tawh a,septic pawh a hlauhawm tawh lo.Ka mit ka chhing vang vanga, thawklehkhatah karkhat zet ka hriat tawh loh hlauhnain min rawn tuam thuta,ka meng nghal kawk. Rang lutukin Bathroom chhung ka en kual nghala,keimah chauhin ka awm tih ka hriat rualin ka thaw nghal huai. Damdawiin ka awm chhung khan ka ngaihtuah naah alang pha meuh lo a,ka na leh nau ka lo pai khan ka rilru a luah hneh lutuk zawk. In ka awm hnuah pawh ka ngaihtuah zui hauh lo,mahse tun lawk khan chiang lutukin hlauhnain min rawn fan thuta,ka chiai nghal titih. Ka sawithiam dan ber chuan Boruak thianghlim duhtawka hip laia Boruak rimchhe lutuk hip lut thut ka intehkhin ber.

Ka theih anga rangin ka intleuh sawk sawka,ka chhuak ta vat. Room chhung ka en kual a,eng mah dik lo a awm lo. Khuma thu chungin thawk ka la vang vanga,Hriatpuia hnenah ka hrilh mai a tul dawn tih ka ngaihtuaha. Mahse,ka ngaihtuah zawng pawn a hma ang bawk khan sawi tan dan tur ka bo leh tlat tawh.

Muangchangin inhnuai lam panin Stepah ka chhuk thlaa,thawm awm loin a lo reh thap. Sanjana-i inchhung a tifai vel anih ka ringa, Pawnah ka chhuak tlanga. Kan Compound chhung ka thlir kuala,Pangpar ho pawh ka hun dan ngai ngaiin an lo la inhung tlar thapa. Thliin a chhem zawngin an che dar dar bawk.

Inchhungah ka lut leha, Sanjana-i Balbawm nen Bathroom atangin a lo chhuak ve chiah thung.Min rawn hmu thuta, a phu leh zawk pek.

‘I lo chhuk lai ka hre lo a,ka u khan inhnuaiah chhuk suh se a ti si’ a ti nghal a.

‘Inchung ringawt chu a ninawm alawm,I insu zo tawh mi?” ka ti let ve a.

‘Aw,insu zo tawh. Ka zar dawna,thingpui i in duh em?” a ti leh rih,ka lu ka thing nghal vat.Tawng leh a tum lai takin Door Bell a rawn ri ral ral. Rang zetin Sanjana-in min rawn kal pela,kawngkhar a va hawng a.

‘Enge ni?” a ti nghal a.

‘Mami a awm em? A nu ka nia’ a tih ri ka hriat rualin ka inher vat. Pawn lama ding anih avangin ka hmu thei lo va,mahse Tu nge anih sawi kher lo pawhin a aw ah khan tu nge anih ka hre nghal thei tho. Eng vangin nge a lo kal ang? Ka damloh lai pawh khan a lo kal chuang si lo..

Ka awm thu Sanjana-in a hrilha, ka hnaih ber Chairah ka thu thla nghal vat thung. Mahni nu nisi in engtia lo hmachhawn tur nge ka hre lo,ka tang teuh a ni ber.Kan inneih khan ama kut atanga nei angin kal mah ila,kan inti tha zui tlat si lo..A rawn lut thawm ka ngaithla kar,a rawn pen hnai zel chu ka hriaa. Ka hawichhuak ta nge nge. Min rawn en a, a nui a. Mahse, nui let ve loin ka en mawl tawp. Ka ep zawnga Chair awmah a thu thlaa,kan awmdan chu Sanjana-i tan mak loh tih a harsa dawn lutuk tih ka hria. Mahse,hei aia tha a lo lawm dan ka hre chuang lo.

‘Ka u,thingpui ka siam dawn em?” Sanjana-in min rawn biaa.

‘Insuk kha zar phawt la,nakinah i siam mai dawn nia’ ka ti let vat. Ka nui lui sak bawk.

Sanjana-i chhuah hnuah hreh zetin ka nu lam ka hawi leh ta chauh,chik zetin min en a.A hmelah chuan kei ang bawkin sawi mai tur hre lo a ang ve tho.

‘Enge i an a? ‘ a ti nghat.

‘Ka tha,enge ilo tih dawn?” ka ti let ve nghauh.

‘Ka fanu hi a dam lo va,hriat pawh ka hre miah lo a.Aa,damdawiin a chhuahsan hnuah ka hre chauh ka tihna’ lawm lo hmel fein a ti a. A tider peih mai mai tih ka ngaihtuah ve daih thung.

‘Ka tha reng.A hrim hrimin min ngaihtuah anga lan kher angai lo’ ka ti nghat. Ka la hua em ka hre lo,mahse ka thinlung hian a pawh tak tak thei tawh lo tih ka chiang.

‘Min hua tih ka hria alawm,tilang nawn kher duh suh.Mahse, I tana pawimawh hriat tul a awma’ a tawng laiin ka ban ka pharchhuak a.

‘Engmah pek tur che ka nei lo’

‘Akhai,eng mah ka dil dawn reng reng lo che. I hriat tur tul a awm ka tih kha’ chang zetin a ti ve hmak.Ka ti lutuk deuh niin ka inhriaa, chhang let loin a tawng hun ka nghak ta zawk. A aw a thian te te a, chiang zetin ka mitah tak a en bawk.

‘Nimin khan in pa u te nen Restaurantah kan chawl ho a, min hmu ve lo va. Aaa,min hmu pawh nise min hre lo maithei bawk. Kan inchhun dan hi kan inchhung lo em a’ a ti deuh salh. Tawng loin ka bu liam satliah ringawt. A sawi duh sawi se,kal thuai se ka duh zawk.Diktak chuan Hriatpuia u te lam daih a sawi chu angaihna ka hre eih lo.

‘A thutpui pa nen khan muk deuh maiin thil an sawia, hriat pawh ka hre phak lem lo a.Mahse,Toilet a ka awm laiin lehlam Toilet chhunga phone hmang thawm ka hriaa. A biak hnena a sawi dan chuan hmeichhe pakhat ei turah tur an pawlh niawm tak a ni.A thilsawi kha mak ka tih deuh avangin Toilet pawna Wash room bulah amah hriat tumin ka lo chang a.Mak deuh maiin Hriatpuia U a lo ni a.I lo dam lo ve chiah bawk si nen ka ngaihtuah a,I dinhmun a him lo niin ka hria’ a tita duah..

Mak ti lutukin ka ang pham mai….Ka pumna kha ka ngaihtuah let nghal zat,nia..Pumna satliah a ni lo.

Chapter- 26

 Ka nu tawng zawm mawlh mawlh chu ka en a, a sawi eng mah ka hre lo. Ka bengah ‘tur an pawlhsak’ tih lai bak kha eng mah ri dang a awm thei rih lo. A rawn tho a, ka bulah a rawn thu a. A che vel ka melh reng ringawt.Hriatpuia’n vawitamtak a sawi tawh,a u in a tana tha tur angaihtuah ngai lo tih kha. Chumai bakah an eizawnna,an sumdawnna lianber Hriatpuia ta alo ni reng bawka…Sanjana,ani pawh Hriatpuia u te hnen atanga lo phei a ni a. Ka pum nat thut ni khan inah midang tumah an awm ve miah lo tih ka chiang,ni lo..Ka mi sut,duh duh huna lo langa, bo leh  thin kha chu ka na tuar mitvai khan ka hmusual pawh a ni thei..Ni lo,Sanjana…Ni lo..

‘I chi kawngah nau i pai tak tak em?”  ka nuin min biakna chu hla deuh atanga rawn ri ang maiin ka hre hla du mai.

‘Maw?” ka ti sap ringawt.

‘Nau kha i pai reng reng em?” a ti nawn leh a.

‘Ka hre lo..Aw,pai e’ ka ti nawi nak mai. Eng mah chianna pawh awm lo leh a rinthu chauh sawi a ni a. Chuvangin ka rilru a awm ang ang lo sawi ngawt ka duh leh lo. Bakah,Doctor thiam leh lar takin min zaia,rinthu mai mai chuan min zai dawn lo.

Thildang a sawi zawm leh teuha,ka thu ngawi reng chungin eng mah a sawi ka hre chuang miah lo. Ka beng lehlamah a luta, lehlamah a chhuak tlang lehnghal zel a ni ber.

‘Ka u,I tha em?” ka darah Sanjana-in a rawn khawiha,tui tla,invaichhuah ngaihna hre lo invai chhuak thut ang maiin ka ngaihtuahna atangin ka harhchhuak hlawl,ka thaw zui nghal kawk kawk bawk. A lo luh lai ka hre eih lo.Ka melh chho a,a hmelah chuan chiang takin mak tihna alang thei a. Thlaphang hmel a pu bawk.

‘Ka tha..Ka tha,enge?” ka ti nghal sawk sawk.

‘Ka bia che a, I hre miah lo a..Thingpui chu ka siam dawn em?” a ti a. Thawveng ta hawk ang maiin a thaw deuh huai mai.

‘Aw,lo siam la..Kei chu min siamkep suh aw’ ka ti a. Harsa ti ru lutukin ka nui lui sak. Rang fein a kalsawna, ka nu lam ka hawia. Min en loin Sanjana-i Kitchen lam pana a kal chu a en a, a mit pawh a khap eih lo.

‘Kha kha engtik atangin nge hetah a awm?” min rawn en pahin a ti a.

‘Sanjana,a hming anih chu..’ ka ti hmak.

‘Aw,eng pawh chu a hming lo ni se engtik atangin nge hetah a awm a?” a ti leh a. Sanjana-i lo kal leh mai hlau niawm takin a melh deuh sek.

‘A la rei lo’ ka ti tawi tak.

‘Khawi atangin nge a lo awm a?” a ti leh a.

‘Hriatpuia u te awmpui ania.Hetah ka accident atang khan a lo awm pheia,min awmpui tawh dawna’ pangngai takin ka ti a. Ka ngaihtuah naah Sanjana-in min tihnat tumin min bei thei tih awm mah se dahbo hram hram ka duh.

‘Awi,ka hlauh ang ngei ngei a ni. Ani hi an thunun tlat a ni mai ang a’ zawi deuhin a ti leh hliai. Ka ngaihtuah mek thil a rawn sawichhuak ve ta chiah.

Thingpui chawiin Sanjana-i a lo lut a, a daha. A kal leh mai,a kal hnuah thingpui ngawi rengin ka nuin a in a. Sawi tur hlawl ka hre lo.

‘Ka kal teh ang. Ka hre sual maithei bawka,mahse lo fimkhur teh’ a ti a. Ka bu ringawt. A tho a, a kal mai dawn emaw ka tih laiin a rawn thu leh a.

‘Min hua tih ka hriaa,mahse i nu ka nih tlat avangin ka haw ve lo che ania. Kan inmil lo satliah ang chauhin ka ngaia. Tun tuma ka thilhriat pawh hi ka hre sual maithei ka tih kha, mahse ilo dam lo ve chiah bawk nen..Sawm pawh sawm loh leh lawm hlawh lo tur tih inhre sain ka lo kala. Min haw hle mahla nu tan chuan fanu i nih tho avangin fimkhur tura chah che hi ka tihtur a ni a. Chuan,Min mamawh thut anih pawhin  min be hreh suh’ a ti leh a.

‘Ka mamawh lo vang che,mahse ka tana tha tur ilo la ngaihtuah ve avangin ka lawm e’ ka ti chang fak. Za lo zetin a then saka, a dak deuh vah. Ka hriat thin,nu induh leh mahni tana tha turah chuan tihhreh nei lo hmel chiah chiah kha a ni leh tawh.Nu luhlul leh tih tawh lam chu ti tlat chi a ni a, ka mize induhtawk leh luhlul ve tak hi ka nu hnen atanga ka chhawm a ni tih ka tleirawl lai atangin ka hre daih tawh bawk.

Balcony-ah ka thu a, thli fim rawn thawin ka sam a chhem leng dar dara. Hmu miah loin ka hma lam ka thlir a, ka ngaihtuahna pik mup mup tihreh tumin ka mit ka chhing leh rih,awmzia erawh a awm chuang lo. Ka nu sawi kha tak tak lo nita se,engvangin nge kei min thah an tum ang? Keiman eng mah ka nei lo a,engkim neitu zawk chu Hriatpuia a ni a. Amah an bei mai tur anih laiin kei min bei tihna maw? Enge hlawkna tur chuang awm ang? Kan innneih hma atang tawhin keimaha thil mak pui pui thleng te kha tum lawk reng vanga thleng a ni angem? Ka thaw hawk mai,thil pakhat chiah tihtur a awm. Hriatpuia ka biak angai.Hna a thawh laia biak buai ka duh lo thina, mahse vawiin chu ka thil hriat nen ka pik lutuka,ka ngai bawka…

‘Aw, Mate…’ phone a pick veleh a rawn ti dam thlup. Ka ngai zual vawng vawng.

‘I la buai em?” ka ti sap.

‘Aih,buai nang..I tha em? Enge i an?”

‘Ka tha reng. I lo haw hma dawn em?” ka ti leh a.

‘Ka tum,min ngai tihna mi?” a sawi zawh rualin a nuia.

‘Min ngai zawk anih kha’ nui chungin ka ti let ve a. A nui leh hawk hawk.

‘Ngai chiang..’

‘Lunch i ei tawh em?” ka ti leh a.

‘Um,ei zo chiah..Mate,inleng ka nei lawk dawna’

‘Aw…Ka dah’ rang zetin ka ti a. Min rawn chhan let pawh nghak loin ka off nghal vat.

 Remruata ka ngaihtuaha, hrilh tur chi a ni angem ka hre lo. Ka thuruk engkim hre tu nimahse tun tum thil hi chu Hriatpuia leh a u inkar a ni a, Hriatpuia zawkin a hriat a ngai. Remruata chu atul ta anih leh ka la hrilh leh mai ang.

Inhnuaiah ka chhuk thlaa, Sanjana-in Tv a lo en a, nuam ti em emin a lo zaipuia. Ka chhuk pawh min hmu lo.Ka en deuh vang vanga, ka nu sawi ang khan ka eiturah tur lo telh tak tak ta se Sanjana-i bak tihtir tur an nei miah lo. Khami hma ni khan a awmdan a dik lo va,mahse a nu damloh vang a ti a. Ngaihbel luih ka tum vang a ni angem? Min thah tum tak tak nise Damdawiin atanga ka chhuah hnuah pawh an tum nawn leh thei renga, mahse chutiang eng mah an ti si lo. Nge a la hlimchhawn lutuk zawk ni ang? Mahse, thil pakhat chiang reng chu ka nu khan dawtsawi tur ngawt chuan min rawn kal chilh miah lo ang.

Hriatpuia lo haw laiin pawnah ka lo awm a, Pangpar tui Sanjana-in a pe a, pangpar hnah ro leh tlema eng deuh ka paih ve bawk. Min rawn pan pheia,lei hawlh phutna tur Suhdur tereuhte ka keng chu a en a, a ner suk.

‘Enge i tih a?” a ti fan ruih.

‘Pangparka lo en kual mai mai..’ ka ti vat.

‘En kual mai mai nge thildang?” a hmui a tisawi zauh. Ka thil ken ka dahthlaa,ka kut pahnih ka tilang zauha,ka nui zui hak. A ner leh nawka,mahse a nui ve ta suk.

Inchhungah kan inzui luta.’Thingpui i duh em?” ka ti a. Min rawn en a,’Duh lo..Lo kal phawt teh’ tih pahin inchung lamah a thle zauh.

Stepah kan inzui chho a, ka hnungah a kala, ka kawngah arawn dawma. A kut dahthlaksak ka tuma. A ngaipawimawh lo ngang mai thung. Roomah kan inzui luta,a bag Sofaah a thehthlaa. Ka kalsawn tur min pawt leta,min kuah nghal hlu hlu. Ka thlamuang nghal ngawih ngawih thei!!

‘Hriat..’ ka ti sep.

‘Um…’

‘Ih…Vawiinah…’ ka ti hman chauh tihin ka hmui a rawn khawiha, Ka en vat.

‘I nu a lo lenga..A dik em?” a ti sup. Mak ti zetin ka mengphar awk thung. Hriatpuia a be hmasa nge ni ang? Min hrilh ang kha a hrilh angem? Hre reng chungin Hriatpuia hian a lo haider tihna zawk nge ni ang? Ka rilruah zawhna alo lut nghal tuk tuk.

‘Min rawn biaa..A fanu dam lo tlawh a duha,I phalna ka la hmasa ta lo mai anih kha.Min hau lo la’ Amah bawkin a tih zawm leh duah. Ka nu chuan a lo kal chhan tak a lo hrilh lo phawt chu anih hmel e.

‘Um,nia…Ka lo beisei chiah lo a’ ka ti ban chat.

‘Eng pawh lo thleng tawh se i nu a ni tho a..’ a ti leh a. A awah min thlem lungawi tum a ang viau bawk. Ka chhang dawn uka,mahse ka but a nghauh zawk.

‘Eng lo..’ ka ti hman uk a,mahse ka ngawi leh daih. Tunah chuan ni lo,nakinah zawk le.

‘Sawi la…’ a ti mar ut.

‘Aih, ngai leh lo. Nakinah animai’ ka ti a,ka nui sak bawk.

‘Ok,anih chuan ka’n inbual ange..’ min kuahna thlah pahin a ti a. Kalsawn pahin a kawr hak a hlipa.Balbawm lamah a vawm pheia,ka chek tlak.Min rawn en vata,tur deuhin ka en a. Balbawm sira a kawr tla ka melha.

‘Mate…’ a ti nghal hluk. Eng mah sawi loin Balbawm lamah ka thle leh zauha,a ban a phar hluaia.A dahthla leh hnawk,peih lo hmel zetin a pan pheia. A kawr tla a chhara, balbawmah a dah luta, ka kut ka beng thak.Min rawn en a,’sual reuh lutuk’ a ti hmuk. Ka lei ka chhuahkhum zauh a,ka nui zui hak..A nui ve nghal hawk bawk.

Boxer nen Bathroomah a lut pheia, a luh hnuah a Bathrobe Balconyah ka pho tih ka hre chhuak a. Nidangah chuan chhunah ni sa ka hmuh tira,tlaiah Bathroomah ka khai leh ziaha.Ani pawn a awm turah angai tih achiang.

Bathrobe ka la luta,tlemin khua a vawt deuh bawk nen ka thawmhnaw hak lai chungah ka ha ta than.Towel ka kenga,Sofaah thu chungin phone ka khawiha. Mahse, ka rilruah thil dang a awm tak tak thei lo. Ka nu thilsawi kha engtin nge ka sawi tan ang? Eng ang pawn inhua se unau anni tho a,chiang taka sawifak si lo va,rinthu deuh mai anih bawk si avangin a awih lo maithei..Ka thaw halh mai.

Bathroom kawngkhar a ri raka,ka hawi phei vat. Hriatpuia a rawn dak ve chiah bawk.

‘Enge i tih a?” a rawn ti vak. Angaihna hre loin ka en ha. A thaw deuh huai thung.

‘Eng nge ka tih a?” awlsam zetin ka ti liam puat.

‘Bathroomah hian eng mah a awm hleinem..Awmngaihna a awm lo,i lo ha daih a’ amah leh amah a inchhang hmuk. A bathrobe ka ha tih ka hre chhuak leh chiah.

‘Ka pho a, ka lo theihnghilh a’ ka ti a. Ka dingchhuaka,ka hlip a.

‘Pho kher angai hleinem’ a ti leh hlur mai. Engvanga han thinrim viau nge maw anih le? Ka tum tel nawk nawka,ka vawm phei pawp.

‘Enge a?” a ti leh vak.

‘Eng mah’ ka ti let ve that bawk.

Bathrobe kawngka bula tla a chhara,na zetin Bathroom kawngkhar a rawn khar thuai. Thinrim zetin ka melh ngheka,kan inhnialna awmze nei lo lutuk kha ka ngaihtuaha,ka nuichhuak hak mai.Hetiang tum hi a awm leh zauh thina, kan inneih hlim pawn khan a inbual zawhin Towel a hmu mai si lo va,ka Bathrobe tawk lo zetin a ha tawha. Khami tum pawh khan a thinrim a,kei ka nuih a za si.A tawpah kha chuan a nui ve ta ngawt kha ania..

A thawmhnaw haktur lakchhuah tumin ka en dan dana, a T-shirt ka lachhuak tur chiah hnung lam atangin min rawn kuah thut.A lo chhuah lai ka hre si lo va,ka phu zawk. Ka darah a hmaiin a rawn nawra,ka nghawng sir lam a fawp nghal dun dun bawk.

‘Min tiphu alawm mawle’ ka ti hmak.

‘I thinrim peih lutuk anih kha’ a ti daih.

‘Nang pawh i thinchhe lutuk,khatiang mai maia mipa thinrim’ ka ti leh hlak.

‘Sorry…’ a ti sup.

Ka beng kawm a rawn fawpa,Ka kawr a rawn zena,ka Bra chhanah ka hnute a rawn khawiha..Ka ngheng titih. Mahse, amah zawk a inlahrang zui nghal daih. Ka din ngaiin ka dinga, ka ngaihtuah leta,damdawiin luh hma khan a zina,a zin lo haw hnuah pawh kan inhau buai leha.Damdawiin ka lut leh bawk nen,hmangaihna kan chen dun lo rei tawh,ka inhera.Hriatpuia min hnungchhawn zawnga lu hru mawlh mawlh chunga ading chu ka en a, ka khawngaih thut.Ka ngaihtuah naah vawiina ka nu thilsawi bawk kha a lo lang leh a,ka hrawk a ro nghal halh. Mahse, tunah tak hi chuan kha lam kha chu a pawimawh rih lo..Ka hriat hnuah a lo haw hun thleng sawi loin ka la nghak thei anih chuan darkar reilote nghah leh chu thil harsa a ni tawh lo.

Ka pan pheia,hnung lam atangin a kawngah ka kuaha,a thil tih lai a tawp chut.A hnungah ka hmai ka phum kak.

‘Tihpalh’ ka ti sep.

‘Hey,enga?” a ti ve sup. Ka kut a rawn vuana,a phelha. A rawn inhera,ka en chho nghal vat. Ka biang tawn tawnah a rawn vuana.A mitmeiin zawhna min zawt nawn leh a,tul lo zetin ka insut hraih mai.

‘Ka tibuai nasa lutuk che a’ ka ti lawi rat mai.

‘Ah,min tibuai lo..’ a ti nghal nghut.

‘Naute kha…’

‘Theihnghilh tawh la,thla thum chauh alawm kan nghah dawn’ a ti dam leh thlup. Ka chhang lo,ka khap sak saka.Ka ngaihtuahnaa awm mek zuiin a bathrobe suihna ka vuana, Mahse, a rawn vuan ve nghal vut.

‘Mate, ti suh..Anih loh chuan ka tawp thei dawn lo ania’ a ti sup. A aw a khur ve deuh tih ka hria. A sawi hre lo ang hmakin a kut ka laksawn saka,ka pawhphelh saka. A  Bathrobe ka phelhsaka,a pian nalh zet,khuhtu awm lo chu ka en kual dan dana.Ka pan hnai hrata,a taksa si chetin ka kuaha,a hnute hmur tereuhte ka fawpa.A thaw hawka,a insangmar nghal teuh.A mipatna rawn tho tawlh tawlh chu ka hre theia,harsa ka ti deuh anih pawhin tawp ka tum lo. Ani pawn min ngaihtuah vanga a insum thei anih chuan kei pawhin aduh pek hi ka thei tur a ni tawp mai.

‘Mate…’ a ti tham leh tuak. Ka hawichhuaka,a mit thim khap mai,chaknaa khat chu ka en a. Ka nui sak.

‘Invenna tur i kawl em?” ka ti sap. A nei angem ka hre lo.Nupa kan nih avangin invenna hman kan mamawh lo thin miaua.

‘Aih, kawl miah  lo…’ a ti sup. A thaw zui leh hawk bawk. Engtin nge niang? Mahse, ka ngaihtuah buai rei lo. Ka thle baka,ka nui zui leh hak…

A dar khamin ka mu a, nawmna vanga taksa lianpui khur dur dur rehfel thleng che loin ka mut ngaiin ka mu a, ka kuah chial bawk. Ka sam karah a kut a rawn rawlh chho a, ka luah a rawn fawp vang vang.

‘Ka lawm e aw’ a ti sup bawk.

‘Ti nge?”

‘Min hriat thiam vang khan mawle’ a ti leh sup. Ka thensak,nia..Ka pasal hian mamawh a nei a,a nupuiin ka damlohna chauh ngaihtuaha ka haider luihsak anih chuan, duh reng vang ni lo thil hi a thleng palh theia. Harsa deuh mah se tihdan kawng zawn mai kha ka tihturah ka ngai hmiah. Ka tita ngei bawka, ka tan awmzia thui tak awm ve lo mah se ka pasalin nuam a ti a,a hlim chuan ka hlim tawk reng.

Chaw kan ei lai pawhin kan boruak nuam leh dam raih kha reh mai loin ala awm zui ta reng. Sanjan-i ka en  apianga ka ngaihtuahna danglam ziah erawh thup fe ka ngai thung. Ka ngaihtuahna hre lo em emin chaw a ei mial miala,a hmel pawh nidang ang bawkin a hlim sarh a. A che lah a zangkhai dan angai reng bawk.

‘Chaw kha i ei mumal miah lo va’ Rooma kan awm hnuah a ti satliah.

‘Ah,ka ei alawm..Nia,ka ril atam lo lutuka’ a lo ner ka hmuh avangin ka tihzawm zat.

‘Enge? Sawi la..’ a ti leh daih. Min en loin thu mu chungin Tv lam a hawia,en tur zawngin a hmet kual dun dun bawk.

‘Eng maw ka sawi ang?” ka ti nghauh. Ka hmaiah Night cream ka tat pah mawlh mawlh.

‘Lo mu phawt la’

‘Aaa,enteh…’ ka inhera, alam hawi zawngin ka thu a, Dressing table tlangah ka kiu ka nghat bawk.

‘Eng maw ka en dawn? Nang mah maw?” a nui zui suk.

‘Aih, ih…Thil ka sawi anga, i thinrim lo ang tiraw?” ka ti leh rih.

‘Bialpa i nei tih i sawi loh chuan thinrim lo tawp ang’ min la chhaih ta cheu.

‘Uang lo teh’ ka ti hmak.

‘Aah,ka uang hleinem..Lo mu phawt la,min sawisa chau ania’ a nui leh a. A nui hmel sexy lutuk ka en a,a mit meng thuk leh ril raih maiah chuan min Duatna chiang takin alang thei!!

Khum lam ka pan ta nge nge, ka lawna. A ban a rawn daha,a dar ka khama,a kawngah ka kuah nghal chial.

‘Um,tihian a tha. Sawi tawh rawh le’ a ti leh nghut.

‘Vawiinah khan ka nu khan thil mak deuh min hrilha..’ ka ti a, ka ngawi leh rih.

‘Chuan..” ati sup.

‘I u te nen niminah Restaurantah an chawl ho a, I u phone hmang thawm a hriaa. .Ih,a sawi dan chuan hmeichhe pakhat eiturah tur an pawlh tir a ti a..Thinrim suh,ka puh chhe miah lo ania. Ka nu pawh chuan a hre sual maithei’ mangang ru zetin ka ti a.

‘Han sawi nawn leh lawk teh’ a ti hmuk. A thu a, ka tho ve vat. A mitah tak ka en a, ka nu min hrilh ang ang ka hrilh chhawng a,a hmelpa leh chang zetah chuan engtin nge ka thilsawi mek a dawnsawn ka hre thiam lo.

‘I pum nat chhan kha chi kawnga naupai vang a ni a’ a ti dam thlup.

‘Um,nia ka hriaa…’

‘I taksaah khan tur hnuhma chu hmu se ka hria ang. I Doctor kha ka thiantha tak a ni a, Sammy ala awm cheu bawka’ a ti leh a. Ka rin ang ngeiin ka thilsawi a awih miah lo tih ka hrethei nghal mai.

‘Mahse, eng lo…Thil thleng thei a ni ve tho a. I u khan nangma tan thil tha angaihtuah lo iti a’ ka ti leh a.

‘A dik,ka u hian min mil lem lo,mahse mi nunna la tur khawp chuan ka u hi a nunrawng lo tih pawh ka chiang tho’ a ti leh hmuk. A aw a nelawm lo viau bawk.

‘Ka nu khan a hre sual pawh a ni thei tho a,ka lo dam lo bawk nen a hlauthawng a..’ ka ti leh sap.

‘Nia,a hre sual pawh a ni thei. Ka lo ngaihven dawn nia. Tunah chuan muthilh tum tawh la..Men rei viau i mamawh lo ania’ a tih zawm leh daih. A tho a, Tv a off a,Light a off nghal vek bawk. Khumah a rawn lawn leha,min rawn pawta, ka mu thla ve a. Ka kawngah a bawp sei thlurhin min rawn khana,ka samah a hmai a phum a. A che zui lo..

Ka mu meng kar mai,Hriatpuia thaw sak sakah chuan a muhil tih ka hre theia,kei erawh ka ngaihtuahna a vak kual nasa lutuk. Ka thilsawi kha ngaihven tum mah se min ring zo lo tih ka chiang reng. Nia,unau hi chu inrin zawh a harsa ve em bawk a ni. Tunah tak chuan Remruata bawk ka mamawh leh ta.

Ka tuihal lutuk ka harh hlawl..Ka tho mai dawna,hnung lam atangin Hriatpuia’n min lo la kuah ta reng. Tihharh hlauin dimtein a ban ka dahsawn saka. Ka tawlhsawna,ka tho tham tham. Light off vek mah se Curtain thuahna zawk kan zar loh avangin pawn lam engin a rawn chhuntlanga,thim chhe lutuk a ni lo.

Kawngkhar ka hawnga, inhnuai panna step lam ka pana. Step bula Switch awm tlar that ka hmeta,a eng nghal pap. Mahse, ka mitsirin kan room piaha room ruak lama phe zawk niawm tak ka hmu a, rang lutukin ka hawi phei nghal vat.Tumah an awm lo…

Stepa chung ber ka rapa. Ka rah rual deuhthawin Room ruak lamah bawk thawm a rawn awm lehnghala,ka ding chawta,ka hawiphei nghal vat..Tumah ka hmu chuang lo,mahse muangchangin Room kawngkhar a rawn che tial tiala.Thawklehkhatah hlauhna nasa lutukin min rawn mana,ka taksa pumin ka khur ta hlawk hlawk..