SWEET DECEMBER BOOK 4 (Chapter 27- 30)

Chapter- 27

Ka au chhuak dawna,mahse ka aw a chhuak thei lo. Hlau chung chungin kawngkhar lam ka en a. Enge thleng zel tur ka nghak tawp.Kawngkhar che tial tial a tawp thuta, ka tim ve chawih thung. A chet leh mai ringin ka nghaka,mahse a reh vung vung lawi..Va kal hnaiha,va enfiah ka duh a, mahse ka ngam hlawl lo. Khur deuh hlak hlak chungin Room lamah ka tawlhlet ta zawk. Mahse,ka tawlhlet rualin tuemaw ka su chawrha,insum hman loin ka rak nghal thawta,ka petek deuh dawrh bawk.

‘Sorry,keimah alawm’ Hriapuia aw ka hriat rualin ka thawveng nghal hawk. Ka inher nghal vata,ka hnungah a lo ding reng tawh chu niin.Slipper pawh a bun lo.

‘I lo awm si lo va,ka rawn zawng dawn che a’ amah bawkin a ti leh sup. Ka tawngchhuah hmain ka hrawk ro lutuk tihhnawn nan chil ka lem te te.

‘Tuiin ka tuma..Mahse, mahse…’ ka sawi zawm hleithei lo.

‘I tha em?” ka bulah a rawn ding hnai nghala. Kei erawh chuan chhang loin Room ruak lam ka kawk a,ka kawhna lam a hawi pheia,angaihna hre lo hmel zetin min rawn en a. A hmelah zawhna alang thei bawk.Duhthawh zetin boruak ka hip lut kawk kawka, ka khur dar dar pawh a zia ta viau.Ka tuihal erawh mak khawpin a rehfel hmiah !!!

‘Mi an awm,tah sawn’ zawi tein ka ti a, a mitko a tisang awk.

‘Tu maw?”

‘Kawngkhar saw a rawn che a, tu nge ka hre lo’ hmui phunin ka ti leh a. Zaizirin ka awmna ngaia awm turin min ti a. Thawm dim lutukin Room ruak lam a pan phei nghala,ka dinnna ngaiah ka dinga,thawk pawh thaw tha ngam mang loin Hriatpuia kal phei chu ka en ran mai.

Kawngkhar a thleng phei hman tep tihin a rawn inhawng leh tial tiala,ka au chhuak thelh. Mahse,Hriatpuia a thleng phei nghal rawp. Kawngkhar a nem hawng nghal pawpa,ka beisei loh lutukin Zawhte a ngiau nghal vaka,Kawngkaah a rawn tlanchhuak nghal zawka,Inhnuai lamah hlauh nei niawm takin a zuangthla zui nghal daih bawk. Ka hamhaih lutuka,chet mai nachang hre loin ka din ngaiin ka ding khawng lah ringawt.

‘Zawhte..’ Hriatpuia’n min rawn en pahin a ti sup. A dar a tisang uka,a awah nuihzatna alang thei bawk. Za lo zetin ka then ve saka,mahse ka chhungrila hlauhna a reh tak tak thei chuang lo.Room chhungah Hriatpuia a lut zui a,kei erawh ka dinna ngaiah ka la ding ta reng.

Zawhte…Nia,Zawhte anih kha..Hriatpuia’n Zawhte a ti a, kei pawn ka hmu ngei bawka. Thil danglam han puh talh harsa khawpin achiang.Ran ngaina tak ka ni ngai lo,mahse  Zawhte ka hlau ngai lo hrim hrim,  Hriatpuia nen kan inneih hnuah kan inah hian Zawhte kan nei lo tih ka chianga. Mahse, Thenawmte zawhte a lo lut palh anih pawhin thil pangngai lo pawh a ni chuang lo. Mahse, buaina pakhat a awm. Engtin nge Room kawngkhar kha mihring khawihtu awm ang maia khatianga achet theih tih khan ka ngaihtuahna a luah khat vek zawk.

Hriatpuia a rawn chhuak leha,min rawn pan pheia.’ A tha vek e, Tukverh a lo inhawnga. Thli rawn thawin kawngkhar kha a chhem che anih kha,mu ila..’ a ti a. Ka bu satliah ringawt. Han sawizui viau pawh duh ila eng nge ka sawizui ang ka hre tlat lo.

Damdawiin kan chhuahsan atangin thla aliam leh tawh,ka inzaina pawh a dam fel tawha,insawiselna ka nei zui lo.Hriatpuia nen ka nu thilsawi chungchang engmah sawizui kan nei lo a,Sanjana-i pawh han rinhlelh luih ngial ka tum pawn ngaihbel tur eih pawh a awm lo. Hriatpuia a hnaah a buai em em a. Zankhat riak emaw lang zawk zawkin a zinchhuak awl lo bawk. A u te hna enkawlsak ni a ka lo hriat thin kha,enkawlsak ni loin ama ta enkawl a ni tih ka hre tawha,District danga Customer te awlsam zawk nana District lian zual deuha Dawr hawn belh tura hma alak mek,engkim a buaipui pawh mak ka tita hek lo. Midang hriat a duh loh thu a sawi kha ka hre chianga,khawiahmah sawi ka tum lo. ‘ Ka u leh a pasal bakah nang leh Kei,Ramsanga leh kan zawmpui Company ten an hriaa, midangin an hriat ka duh lo’ a ti kha ania. Sawizui viau emaw ata a ni tih ka hriat tak avanga lo inrawlh ve sek tumna ka nei lo.

Ka taksa dam tial tial mah se ka chhungril erawh a buai ru tual tual thung. Ka ipik churh renga, ka mu that theih loh avangin ka chau a, chaw ei chakna ka nei hek lo. Mahse, Hriatpuia tan buaipuiawm nih ka duh loh avangin ka insum hram hram a ni ber. Thil ho te teah ka phu vak vaka, ka hlauh ber hre si loin ka chhungrilah ka thlamuang thei hek lo. Scooty a ka sut kha hmuh leh mai inring rengin ka awma,mahse a reh ta vung vung. Achang chuan ka hmu tak tak lo va,ka lo hmusual mai mai zawk emawni ka ti rum rum thin. Hriatpuia ahnaah abuai em avangin ka awmdan dik lo hi min chik lutuk lo hlauh zawka,ka vannei letling phian. Diktak chuan ka chhungril buai nuaih mai hi achhan pawh min zawt se sawitur ka hre dawn miah lo tih ka chiang reng.

Room pawn atangin Sanjana-in min rawn au lawng lawng. Peih lo zetin ka tho taih taih mai. Kawngkhar ka hawnga,kawngka bulah a lo ding al.

‘Enge?” ka ti hul hak.

‘U Remruata a lo kala’ a ti a. Tun ang hunah enge lo tih a tumni?!

‘Ka lo chhuk ang’ ka ngaihtuahna sawi loin ka ti a. Room atangin ka chhuaka,inhnuai lamah kan inzui thlaa. Living Roomah Remruata a lo thu vang.

‘Hey,kan va inhmu khat em em si ve’ a lo ti nghal hluai bawk. A hmel hlim sarh mai chu ka melh zawka, Sanjana-i lam ka ensan lehnghal mai.

‘Thingpui lo siam la’ ka ti a,a bu nghat. Remruata ep zawnga thutthleng awmah ka thu thla hnak. Ka chau ngawih ngawih.

‘I va nawm loh hmel ve a’ a ti a ,ka melh zawka.Chik zetin min lo en reng.

‘Ka lo muhil a,enge tun ang hunah ilo tih dawn?” ka ti a. Mak tih hmel zetin a mengphar deuh awk.

‘Min lo call a,thil pawimawh a awm iti sia’

‘Eng maw? Ka lo call che maw?” ka ti ha mai.

‘Aw,zingah min lo call kha,Pi berin min ko sia tiin hman lo chung chungin chhun chawlh lai chuhin ka lo kal hram hrama’ a ti nung nung. Ka ngaihtuah let a,ka call lai ka hre eih lo.

‘Aaa,Hriatpuia zintur vang khan ka buai lutuka,ka lo hre leh tawh lo niang’ ka tita ngawt.

‘Inpa a zin maw?” a ti leh hu. Eng chu nge maw ahriat ni? Hnaah pawh a hmu lo anga, bakah azin chuan engkim a kutah a awm ziaha,hre tur ber nisi engvanga min zawt let hu nge maw anih le a?

‘Aw,zin..Naktukah a lo let ang’ ka ti nghauh. Eng emaw sawi tumin a ang zuaua,mahse a chip leh ta daih. Sanjana-i thingpui chawiin a lo lut a,adaha. Kitchen lamah a let lehnghal a. Thingpui ka bana,tlem ka in a..Ka dahlet lehnghal mai. Ka inchak hlawl lo.

‘Sanjana’ ka ti a. Rang zetin a rawn daka.’Aw,ka u’ a rawn ti vat.

‘Chini bawm lo la rawh, kan inleng hian Thingpui hang a in ngai lo’ ka ti a. Remruata ka en a, mit khap eih loin min lo en reng.

‘Enge?” ka ti nghat.

‘I tha em?” teh daih chuan a…

‘Tha…In la Doctor viau thin lo teh’ za lo chungin ka then lui sak.

‘Um..Tak takin enge min koh chhan?” a ti leh a. Ka ngaihtuaha,enge ka koh chhan? Ka thle bak,nizanah kha chuan Remruata hmuh ka duh ngei tih ka hria. Achhan pawh ka awmdan nuam lo em em mai hi Doctor ka mamawh tih ka ngaihtuaha,Hriatpuia tibuai loin Doctor ka hmu mai ang ka ti kha ania..Chu chu sawipui ka tum aniang.. Tawng tumin ka ang ziau hmana,mahse Hmanhmawh zeta Sanjana-i rawn tlan lut chuan min tawptir leh chawt.

‘U,thil kang rim chu i hria em?” a rawn ti nghal a. Ka hnar ka lena,a ping vek. Hmanni lawk atang khan ka hnar a chawmawlh tlata, ka rim hriatna achak thin nen tunah chuan rim ka hre mumal lo.

‘Aih,hre miah lo..A nam ami?” Remruata hnenah ka ti a. A hnar a lena,a tho nghal thut.

‘A nam lutuk zawk,engtin nge ka hriat loh theih ni? Sanjana pawn lam va en rawh,inchung ka han en ang.Mam,lo awm la..Ka che rang zawk ang’ a ti nghal zung zunga, chhan pawh ka chhan hmain hmanhmawh zetin inchung panna stepah atlan chho a,Sanjana-i pawn lamah a tlanchhuak ve thung. Living room chhung ka en kuala,engmah kang a awm lo. Sanjana-i room lam ka pana,mahse Remruata au thawmah ka ding leh chawt.Inchung lamah ka tlanchho ve a,kan room kawngka a lo inhawng saa. Ka lut a,Remruata Istiri nen a lo dinga,Puanin Istiri hun chhan a lo vaw pawp pawp bawk. Ka ding chawiha,ka thaw a tawp lo chauh. Istiri On sain ka dah tih ka hre miah lo.

‘Hei hi anih hi..Mahse, akang nasa lo hlauh e ‘Remruata’n min rawn en chungin a ti a. Ka bu nghat ringawt. Sanjana-i a rawn lut ve a,a ‘Awi’ nghal hluai mai. Min rawn en a, tihngaihna hre loin ka lu ka thing ringawt.

‘Sanjana,thil dang akang hman lo..An pahnih hi chu paih mai angai thung anga’ tih pahin Innawh chhan(Ironing Board) kang pawp lek lek leh Hriatpuia Kamiz chhuata tla a kawk zauh.

‘A va tihzia em,ka u chu i haihawt em mai’ min ti a. Za lo zetin ka nui ringawt.

‘A kan nasat loh kha,chhuk ila’ a ti a. Min rawn pan pheia,ka awm a nuam lo ru leh teuh tawh.

Inhnuaiah kan inzui thlaa,Sanjana-i erawh kan Roomah ala awm thung. Ka thutna ngaiah ka thu hnawk. Ka bulah a rawn thu thla veleha.

‘Ka On tih ka hre lo reng reng’ ka ti chhuak sap.

‘Haihawt hi chu i tihloh dan pawh a ni hleinem’ a nui a. Mahse, ka nuih a za ve miah lo.

‘Hmanniah pawh ka On sa tawha,mahse akang nasa lo hlauh a. Enteh, engmah ka hre rei thei lo. Ih,diktak chuan ka lo call che tih pawh ka hre tawh lo’ beidawng zetin ka ti leh halh.

‘Naute i chan hian a nghawng lutuk che aniang..’ a ti a, ka bu nghat.

‘Ih…Diktak chuan ka tha lo’ ka ti mawl leh tawp.

‘Ka hmu alawm’ a ti awlsam mai..

‘Sawi la…’amah bawkin a ti leh a. Ka thaw halh mai.Ka hawikuala,Sanjana-i awm hnaih leh hnaih loh ka en a,a awm hnai lo. Remruata lam ka en leha,zaidamnaa khatin min lo en thung.

‘Sawi tan dan tur ka hre chiah lo e a..Ih,ka  ipik churh reng ka ti maia, ka awmdan hi amak tawp. Thi mai tur ang te hian ka inngaia,bakah ahma kha chuan Scooty-a ka sut kha ka sut laia a awm ang deuh khan ahmaia thisen kai chungin ka hmu thina,mahse chu pawh chu ka hmu ngai tawh miah lo.Amah kha ka hlau thina,mahse tunah ka hmu ngai tawh lo va,Enge ka hlauh pawh ka hre lo. Mahse ,ka hlau tho a. Aaaa,sawifiah dan ka thiam lo.Ka muhil thei bawk si lo.Eng mah ka hre rei thei lo bawk ka tih kha’ atawp lam a zuih ral titih.

‘In pa i sawipui em?” a ti ban chat.

‘Aih,ih..A buai lutuka,lo tihbuai ka duh lo a.Bakah,enge ka sawi ang ka hre lo’

‘Um,mahse sawipui la chu ava tha tak..Ka buaipui duh lo che a ni lo ania’ nuam ti lo hmel deuhin a ti a,a sawi tum ka hre thiam. Mahse, Hriatpuia tihbuai ka duh lo tih pawh ka hre chiang tho. Ka accident chungchang bakah ahnua ka thil hmuh leh te,ka nu thilsawi chungchangte,ka sawipui apiang kha ka rilru nawm nan nge ka hre lo,a lap zawng zelin ala..Sawipui zui ngaihna awm miah loin a tawp tawp zela,chuvangin tunah pawh sawi ila awmzia a awm chuangin ka ring lo a,chuvangin ka sawipui lo tawp.

‘Doctor ka mamawh’ ka ti mawl leh tawp.

‘Um,duhzawng i nei em?” min hnial ka ring lo sa kha ania,ka ring sual lo.

‘Aih, nei lo.Kei aiin i hre zawk ang’ ka ti leh halh.

‘Ka lo bia ang..Lo hahdam hram hram tum phawt la,arang thei ang bera hmuh kan tum anga’ a ti leha, chhang loin ka bu ringawt.

‘Ka kal phawt ang. Inngaihtuah ngut ngut lo la’ a ti leh a. A tho a, ka tho ve nghala,kawngkhar lamah ka zui pheia. Pawnah ka zui chhuak ve a, nisain min rawn chhuna,ka harh sawng sawngin ka hria. Tun hnaiah pawn lamah hun ka hmang mang lo va,ka hun tam zawk Roomah ka hmang a ni bera, ka ngaihtuahna pawh a zau viau lo, kan room aia zim zawkah a bial vel mai mai emaw tihtur a ni.

Kawngkhar inkhar deuh pawp thawmah ka harh zawk,bang nghengin ka thu a, ka lo muthlu chu niin…Rang zetin ka hawichhuaka. Hriatpuia a rawn kal pheia,ka mengphawk nghal hra mai. Zingah khan zin turin achhuak sia,a thulh leh tih eng mah min rawn hrilh bawk si lo.

‘I zin leh lo maw?” ka ti a.

‘Aw..Zin lo’ a ti bung vut. Sofaah a bag a thehthlaa,chau hmel zetin a thu thla ve nghal hnawk.Khum atangin ka chhuka,ka zi mar ar ar.

‘Ti nge i kal leh loh a? ‘ Bathroom lam pan pahin ka ti a.

‘I hre lo maw?” a ti hmuk. Ka en vat,a hmel tak ngul maiah chuan eng emaw dik lo a awm tih ka hre thiam chiah.

‘Aih, hre lo..Thil dik lo a awm em?” ka ti a. Bathroom lam pan zui loin ka let leha,a bulah ka thu thla ta zawk. Min chhang loin ahmai a tuai pawka,thinrim insum niawm takin a thaw leh hawk bawk. Vawiina Remruata lo kal kha a duh lo a ni mai angem? Mahse khatiang vang mai maia zin thulh ngawt chu a ni thei lo.Istiri kha… Nilo,Remruata lo kal kha chhunah daih ania,Istiri ka off loh pawh kha Remruata lo kal hnuah bawk a ni a,a zin tur kha chu Zingah a chhuak bawk si.A ni thei lo tawp ang.

 ‘Zama bill rawn dah kha,nangma lo buaipui a ni em?” a ti leh daih.

‘Eng ber kha?” zawtbuai loin ka ti ve vat.

‘A hnuhnung ber..’

‘Karhmasa ami kha maw?”

‘Aw…’

‘Kha kha anih chuan min pe,ka siamfel veka. Zama leh nangmah ka lo thawn che u kha’ ka ti a. Min rawn en a, eng mah sawi loin a thaw hak.

‘Tihdik loh ka nei em?” ka ti a.

‘Aw,mahse,a pawi tawh lo’ thinrim insum ri a hriat theih. Hlauhthawnna ka nei thuta,ka pasal bula thu niloin ka hnathawhna a ka Boss bula awm angin ka inngai thut. Rang zetin ka tho a, kalsawn loin ka ding zum zat mai. Mak tih hmel lutukin ka che zia a en a. A rum chhuak hawk mai.

‘Enge a?” nin hmel zetin a ti leh hmuk.

‘Ka tihpalh lutuk,ka tisual tih pawh ka lo hre lo va’ ka ti sap.

‘Duhtawk teh’ a ti leh thawt. Ka phu nghek thung.

‘Ka tihpalh tak tak,ka lo fimkhur tawh ang’

Ka sawi zawh veleh a rawn dingchhuaka,ka ban tawn tawnah a rawn vuana,hnai zetah min rawn en a. A mitah en ngam loin a awm zawnah ka en a. Eng mah sawi loin min thing deuh nawk,min thlah leh thuta,tluk hlauin ka pai dat mai. A kut pahnihin a hmai a hup vang vanga,a thaw leh hawk. Min rawn en a,eng emaw sawi tumin a ang zuaua,mahse a lu a thing nawka, min kalpel ta zawk.

‘Khawiah nge i kal dawn?” kawngkhar lam pana a kal mek a ding chut. A rawn hawi leta.

‘Inhnuaiah…Enge?” a ti vawt ruih.

‘Ka tibuai che a, mahse nidangah chuan a thleng tawh lo vang. Min ban lo hram rawh’ ka ban ka phar hlaia,ka dahthla leh hnak. Engvanga ban lo tura ngen ngawt nge ka nih pawh ka inhre bik lo. Mahse, ka chhungril atang hian hna chan mai hlauhnain ka khat tlat.

‘Khawngaihin duhtawk tawh teh,min ti a zo takngial dawn.I ngaihtuahna khawvel atang khan lo chhuak rawh,Khawngaihin’ a ti leh hrawk.A hmelpa leh ngeng zetah chuan thinrim insum tum a ni tih a hriat ngawih ngawih.

Kawngkhar a rawn nem khar dawta,ka phu leh vak. Chet mai nachang hre loin ka din ngaiin ka ding khawng lah. Enge ka tihsual ni ang? Ka thawn tirh khan sawise chuan ka siamtha leh vek tur ania. Mahse, eng mah an sawi lo va,tunah lem khatiang khawp khan a thinrim leh lawia!!

Zama ka calla,ka call pahin Laptop ka on nghal bawka. Hriatpuia hnenah ka tihsual zawhchhuah tum ai chuan Zama zawt mai ila a awlsam zawk daih.

‘Hello’ Zama’n a rawn ti lauh lauh.

‘I buai lai a ni em?” ka ti ve a.

‘Aih,buai lo ve. Enge nita?” zangkhai tak bawkin a rawn ti leh a.

‘Hmannia Bill ka chinfelna leh kal lehna tur ka rawn thawn che kha’

‘E,aw…Kha kha ka lo check mai lo va,tihsual a awm nuala’ a rawn ti leh a.

‘Ka tisual tih ka lo hre miah lo va,a zia lo tak tak a ni’ nuam ti lo zetin ka ti a. Ka duh file ka clicka,ka enkual nghal dan dana..Ka awih thei lo zawk,en mai pawhin a dik lo lai ahmuh theihnghal vek!!

‘Nia,ka lo check mai lo ve bawka.Ka tidik lo a,mahse a tha vek tawh.Vawiinah Boss nen kan buaipuia’ a ti leha,ka thaw deuh huai. Thil pawitak a thleng hman em lo chu a ni phawt ang.

‘Pi,thil pakhat..A hnuhnungber dawttu pawh kha dik lo a tam lutuk tho a.Khatah pawh khan ka buai teuh lutuka’ inthlahrung aw daiin a ti a. Kei erawh mak ti em emin ka ang pham mai thung. Ka enkual nghal zung zunga,a dik lo satliah pawh a ni lo. A dik lo vel vek.

‘Min hrilh la tha tur ania,ka damloh vel vang hian ka ngaihtuahna a mang lutuka’ ka ti halh.

‘Nia,hrilh che ka tuma. Mahse, Bossin a phal lo alawm.Chawlhhahdam i mamawh anih kha’ a rawn ti leh a.

Ka phone ka off a,khumah ka thu thla hnawk.Ka mit ka chhinga, Hriatpuia ngei pawn chawl rih turin min ti a, mahse a hna lamah a buai vang leh thil harsa lo lutuk,thu chunga khawih fel theih vek anih avangin ka tilui kha ania..Mahse, ka hna thiam em em leh vawikhat ka tihna pawh ni lo kha engkim a dik lo vel vek!! Hriatpuia thinrim kha a lo awm takzet tih ka ngaihtuaha..’I ngaihtuahna khawvel atang khan lo chhuak teh,Khawngaihin’ atih kha ka bengah a rawn ri nawn leh a.Ni e,ka inthlakdanglam angai. Ka awmdan ka ngaihtuah leta, eng mah ka hre rei thei lo te, ka hlauhber hre si lo va ka hlauthawng reng mai te hi thil pangngai a ni lo. Pawm lo eng ang pawh ni ila Hriatpuia sawi kha a dikna chen a awm tih kha phat rual a ni lo.

Chapter- 28

Ka inhlip sawk sawka, Bathroomah ka lut a,Ka Bathrobe ka phelha. Shower hnuaiah ka dinga,tuiin min rawn phuh a,che loin ka din ngaiin ka ding a. Ka ngaihtuahna pik churh reng mai tihfim tumin ka mit ka chhinga,ka pik churh reng hi zing karah ka zia huai thin tih ka hriaa. Zan lamah erawh ka pik zual ziah.A hnaah a buaia,mahse Inah a awm phawt chuan ka bulah hun a hmang deuh ziah thunga. Mahse keimah zawkin ngai em em chung siin ka hnaih hreh tlat zel a,ka ngaihtuaha,karkhat aia tam mah sik pawh kan insi ngai meuh tawh lo.

Bathroom atangin ka chhuaka,ka beisei loh deuhin Hriatpuia kawngkhar bulah a lo dinga,ka phu zawk.Min rawn hnaiha,ka ding ngaiin ka dil mar at thung. Dimtein ka biangah a rawn tuaia,tawlhsawn lo turin ka insehruh nghal vak ringawt..

‘Ka tihpalh lutuk..Khatianga titur che kha ka ni miah lo’ a ti sup. A awah chuan inthiam lo tak tak a ni tih hairual a ni lo.

‘A pawi lo..’

‘Hre thiam tur che ka ni a, a pawi ka ti’ a ti nawn leha. Ka bu nghauh,kalsawn tumin ka inher zui nghal zat. Mahse, ka kalsawn hmain ka kawngah a rawn kuaha. Ka inher vat,Amah si chetin min pawt hnai nghal zat thung. Ka darah a hmai a rawn phum nghal vang vanga,kuah let ve loin ka din ngaiin ka dinga, mak takin ka tang teuha,ka hah nghal hluah hluah bawk.

A rawn hawi chhuaka,ka khabeah a rawn khawiha,amah en thei turin min kuaidak nghal zat. A mitmeng dul ruih mai chu ka en a,chau hmel ka hmu theia. Ka lo chik ngai miah lo nge hetiang hmel hi ka hmuh laiin ala lantir ngai lo nge ka hre lo.

‘I bulah hun ka hmang tam tawk lo va..Min mamawh laiin ka awm lo maithei bawka,mahse khatiang khan engtin nge ka tih theih che ka hre lo,ka tum reng vang a ni lo.Engtin nge ka tih theih ka hre lo tak tak’ hrehawm a tih zia haider rual loin a awah a lang thei vek. Ka thiltihsual kha a nep lo,ngaihdam min dil tur a ni miah lo. Hetiang khawp hian hrehawm a ti a, ngaidam tur ka ni lo em ni?

Tawngkaa chhang loin ka kut ka lek kang de de a,abiangah ka khawiha,hmul tawite to siar siar  chu ka khawih leh dan dana.A mit a chhinga,a thaw nghal hawk bawk. Ka mit ka chhing ve a, mahse a hmaia ka kut che kual dan dan erawh a tawp chuang lo.A rawn kuna,a chalin ka chal a rawn tisi a.Amah hnaih lehzual turin min kuah hnai nghal a. Hnial loin a nghawngah ka kuah ve a,zawi zawiin ka inthlahdul tial tial tih ka hre thei.

‘Khatiang kha a thleng leh tawh ngai lo ang,ka tiam che’ a ti leh sup.

‘A pawi lo ka tih kha, ka thinrim hleinem,ka tihsual kha a…’Ka sawi zawh hmain ka hmui a rawn khawiha,a kut a laksawn rualin a hmui lum thar tharin a rawn si ve nghal chat thung. Ka thaw a tawp deuh chawta,dim leh duat taka min fawhna chuan hmana ka thil tihbo tawh,nei let leh ang maiin ka chhungrilah hlimna mak deuh a rawn thlen a,chhang let turin min tur tu a awm tlat bawk.Zei zetin a rawn nawr kaua,a lei a rawn rawlh luta,harhchhuak thut ang maiin ka chhang let nghal thut. Ka chhan let rualin a rum deuh hawka. Min pawm kang nawlh,a kawngah ka kherh beta,tlak hlauin a nghawngah ka ban pahnih ka suih kawp bawka,ka uai titih..

Bangah min nawr beta,hmanhmawh em emin a kawr ka pawt nawk nawk,ka bathrobe kawng suihna a rawn pawtphelha,ka darah a tuai liam nghala..A kekawr kawng ka zuk khawiha,min rawn pui vat. Vawikhatmah a hmui a lasawn chuang eih lo.Tawp chin nei lo tur ang maia duhthawhin min fawpa,ka chhanglet ve mawlh mawlh a ni ber. Kan inmamawh tawnna sang lutuk leh kan chet dan engkim mai hi Nupa kara thleng tur ni lo ta se thil uchuak a ni hial ang!! Mahse, nupa kan ni a, kan tan thiang lo a awm ve lo..

Min chawi kang deuha,ka hnute khuhtu awm lo a lang vek chu a rawn hmuam chata,a kut in ka panty a rawn pawt kaua,dimna tel miah loin min rawn zawm pawp.Ka eu deuh awrha,mahse min dim se ka tichuang miah lo..Ka hnute hmur a rawn hmuam leha,atawp thleng turin a che zui nghal a, kan pahnih a kan siam chawp khawvel bak eng mah ka ngaihtuah thei lo,A tawp kan thlen meuh chuan insum thei loin ka te chhuak that mai,ani pawh a rum ve hawk hawk tho bawk.

Dimtein ka samah a chul hauh hauh,thlamuang ngawih ngawihin a dar ka nghenga,tun lawka thilthleng kha ka ngaihtuah leta,ka then sak.Kan inhaua,thinrim em emin min kalsana,mahse darkar em pawh aliam hmain khatiang kha a thleng leh lawia..Mahse, amak miah lo.Nupa inzawmna hi sawi maia fiah thei a ni lo ti ila achiang ber ang.Sex hi nupa tan pawimawh ber ni lo mah se Nupa inzawmna atana pawimawh em em pakhat a ni tih erawh ka chiang.Mahse,ka lo mangnghilh hman teuh zia ka ngaihtuaha.Naktukah Doctor ka hmuh theih chuan ka hmu anga,that ka tum anga,hma lam ka pan ngei ngei ang.

Zanah Remruata’n msg min rawn thawna, Doctor a biakfel thu leh naktukah kan hmu thei ang tih min rawn hrilha,ka thaw huai mai.Hriatpuia muhil hmel ka thlir vang vanga, tunah engkim ka hrilh anih chuan azin tur a thulh anga, min ngaihtuah vangin a phi buai vek ngei ang tih ka chiang. A pawi lo,naktukah Doctor ka hmu phawt anga. Engvanga hetianga awm thin nge ka nih ka hriat theih chuan ka la sawipui zawk ang.

‘I lo let hun tur a hriat theih em?” Hriatpuia insiam mawlh mawlh en chungin ka ti a. Khumah ka thu mu a, ka taksa ruak vek hliah nan ka inkhuh than bawk.

‘Aih,mahse lo let hma chu ka tum’ a ti a, min en loin a kamiz a kilh mawlh mawlh.

‘Um,nia..Lo let hma la ka ti’

‘Min ngai nghal ngawt tihna mi?” hriat nuam lutukin a nui zui hawk.

‘Ngai lo…’ ka ti nghat..A rawn hawia,a hmelpa zetah nuihzatna alang theia,a thle buk. Khum a rawn pan hnaia,a rawn lawna.Ka puansin a rawn pawt kaua,ka hnute a rawn hum nghal chat,ka te that thung.

‘Min ngai lo chiah maw?” a ti leh sup. Min en chhuk run bawk. A kut zungtang sei thlurh zei zeta a chet tir rualin ka thaw hap,ka en chho a,a mitmeng thim khap maiah chuan thleng thei reng thil a awm tih ka hria,mahse a hun tawh lo..A zin dawna,niminah keimah vangin a kal tawh lo a. Chelh khawtlai ka duh lo.

‘I hriat kha, mahse tunah chuan a hun lo…’ pangngai taka tawngchhuak turin incontrol ka ngai nasa viau! A mit a tizima,min hnial dawn emaw ka ti hman. Mahse,a thaw hawka,a rawn kun hniama,ka chalah a rawn fawp zauha,a  tho zui ta zawk.

Ka mutna sira ka thawmhnaw ka ban a,ka ha sat sat. Ka tho chhuak ve a, a kaltur thlahliam ka duh.Tun hnaiah ka mumal loh lutuk avangin azin chhuak tur thlah mumal loh ka ngah lutuk tlat.Zan lam ka muttheih loh vanga zingah a kal lai hre lo khawpa muthilh lah ka ngah.

‘Ni 6 hmain ilo let theih hram chuan lo let la’ a bag Motora a dah luh laiin ka ti a.

‘Um.Lawk,ni 6ah tihtur kan nei em?” min rawn en a.

‘Tihtur tih lemah,ka thiannu te Prog tel ve ngai kan neih kha’ ka ti a. Hrechhuak mai lo niawm takin a chal a ti chuar a.A demawm lo,ka sawina a rei deuh tawh bakah hnaah a buaia,keiin buaina ka lo thlen ve sek bawk si.

‘Bon Appetiteah Party a awm dawn kha,DJ an nei tha dawn viau bawk a,a vawikhatna tur a ni bawk sia,kal ngei ngei ka duh’ ka ti a, ka thle zui bak mai.

‘Oh,Ka hre leh si e.Lo thlen hman ka tum ang,khatiang thil nuam deuh turte chu ka hmaih phal si nang..Eee,Ramsanga pawh a kal ve duh bawka’ phur hmel zetin a ti zangkhai vuh,a nui zui suka, ka nui ve hak hak mai.Ka ngaihtuaha,tleirawl ang maiin ka phur ru nghal ngawt pek,ka nulat lai khan Party tihvel hian ka nun an nghawng viau lo,mahse tun tum erawh ka thiannu te buatsaih a ni dawna,DJ tha tak bakah Party changkang lo leh host ningnel leh phur satliah ni loin an tihtur engkim a hliawm dawn lutuka,kal ngei ngei ka duh tlat.

Hriatpuia thawmhnaw dahna ka tihfai mawlh mawlh laiin Remruata’n min rawn calla, tlai lama kan Doctor hmuhtur min rawn hrilh nawn leha,ka ngaihtuaha.Tuna ka awmdanah hi chuan Doctor ka mamawh pawn ka hre lo. Nizan pawh khan ka taksa kham leh za ang deuha a awm avangin ka muhil thei lawk lo a.Mahse, mut hun pangngai erawh ka pel tam lo. Ka muhil  tha viau tlat.Zing lamah min tiharh hma mai pawha….

Door Bell ri ral ral ka hriaa,Sanjana-in a ngaihven mai tura ka ngaih laiin a ri ta reng. Ka thil tihlai ka kalsana,Inhnuai lam ka pan thlaa.Thawm awm loin a reh thap mai. Sanjana-i pawh chu khawiah chuan a awm ni maw?

Kawngkhar ka hawnga, kawngka bulah mipa pakhat a lo ding reng.

‘Enge nita?” ka ti a.

‘Hei hi inta tur ania..’ tih pahin Pizza Box min pe a. Ka mengphar ak mai.

‘Ka chah ka va hre lo ve’ ka ti a. 

‘Lawk aw’ a ti a. A phone a phawrha,a khawih nauh nauh a,tu emaw acall tih hriat takin a beng bulah a dah chho a.ka phone a ri ve chiah. Mak ti zetin ka en a, Hriatpuia..Ka bula ding mek hian min call emaw ka ti hman pek.

‘Hello..’ zangkhai zetin ka ti a.

‘Ka hrilh theihnghilh daih che. Pizza an rawn dah dawna’ a rawn ti a. Mak ti fahranin ka thaw halh.

‘Angela-i Cousin ten an siama,an fak lutuka.I ei duh ka ringa ka Order a’ a rawn ti leh a. Ka thensak mai.Pizza ka duh zia a hre miau a.

‘Hei an rawn dah dawna,ka lo hawi bo lutuka’ ka ti a. A order anih thu a rawn sawi nawn leha.

‘Pu Hriatpuia Order a  ni awm e’ Phone ka dah rualin Delivery Boy-in a lo ti vat.

‘Aw,hei min rawn hrilh chiaha,a lo theihnghilh alawm le..Engzat tur nge?” ka ti ve vat.

‘Aman a pe tawha..Dah tawp theih ania’ a ti lehzel..

‘Ok,ka lawm lutuk’ ka ti a.

Inchhungah ka keng luta, Dinning tableah ka daha,ka hawng zui nghal zat.Ka chil a put lo chauh a ni ber,ka ril atam miah lo chungin ka ei chak lutuk,ka insum thei lo. Inchung lam ka pan leha,Sanjana-i a rawn lut ve chiah.

‘I awm amaw ka tia’ ka ti a.

‘Dawrah ka kala.U,Surf leh Chi kan nei tam tawh lo a’ a tih zawma. Surf,sahbawn,chi,chini,dal tih vel ho hi thlatirah ka lei lawk vek thina,tunthla ka la bazar lo.

‘Tlaiah ka chhuak dawna,ka lei hman chuan ka rawn leikual ang’ ka ti awlsam mai.Ka thil ei lai ka eizawm leh a.

‘Ei ve rawh,Dawhkanah ka dah kha’ ka ti a. A bu nghat.

Room lam ka pana,ka kut ka sila,ka thil tih lai ka tihzawm leh a. Ka tihzawh meuh chuan khua a tlai lam tawh.Sana ka en a, dar 4 vela kal tur kan ni a, Remruata lo kal hmain darkar khat vel hun ka la nei.

Ka lu tihuh lo turin ka sam ka tawn tawm chho a,Bath tubah ka inchiah vang vang. Kawngkhar inkhar ri deuh dawt thawmah ka phu zawk. Room kawngkhar kha chhung lamah ka khar tha veka,Tukverh inhawng atangin thli thaw lut pawh nise chhem hawn ngawt theih tur chi a ni lo.

Ka intleuh sawk sawka,ka inhru hula. Kawngkhar ka hawnga,chhuak loin kan Room kawngkhar lam ka hawia,a lo inkhar tha thlap. Ka thaw deuh huai. Ka chhuaka,Room chhung ka kalsan dan ngai ngaiin a lo la awm vek.

Remruata lo thlenin ka lo insiam peih vek tawh. A rawn nui var vara, ka that leh that loh min zawt nghal var bawk. Ka that thu ka hrilha,ring zo lo niawm takin min en deuh vang vanga. A bu ta nghat.

Kan kalna tur hmun kan thlenga,Doctor thiam leh lar tak a ni a,hmuh mai mai a harsat viau ka rin laiin kan thlen veleh kan lut nghal a. Kan luhna lah kawngka pangngai ni loin,kawngkhar ruk niawm tak,emergency thila luhna tur niawm tak a ni bawk.Doctor leh Remruata an inbiak danah a hma atanga inhre tha sa an nih hmel viau.Pa upa lam a ni a,a hmel en ringawt pawn a zaidam ang tih a hriat theiha,pa hmai tluak tha tak a ni a, a tlangval lai chuan a langsar ve viau ang.Pa invawng fel thlap ni tura ka beisei erawh ka beisei sual duai tih a Kamiz kilh sawi leh Chapal nen chauha a Damlo te a hmachhawn danah ka hre thei mai thung. Mahse,a rintlak em em ang tih ka ring ve tawp thung.

‘Pawnah ka lo va awm ang. Min mamawhna i neih chuan min lo ko la’ Remruata’n a ti a.Ka bu nghat.

‘Mami maw inih kha?” a ti a,Ka bu nghat.

‘Pasal  i nei tawha’ min zawt pawh ni chiah loin a ti leh a, Ka bu leh nghat.Inah tu tu nge ka chenpui min zawt leha,ka sawi leh mai bawk.Titi satliah ang maiin min kawma,kan chhungkaw chungchang leh eng eng emaw min sawipuia,tha takin ka chhang ve zel bawk.

‘Engtin nge i awm le?’ a ti dam leh thluam. Hahdam hmel deuhin a chair hnunglam a nghenga,a tarmit vuah lah chu a mit hnuaiah daih a awm bawk.Eng ber nge ka sawi ang tih ka ngaihtuaha,ka thaw halh. Tunah lah awihawm loh khawpin ka tha vek a.Ka thawpik hluah hluah thin kha a bo hneh lutuka,ngaihtuah let ngaihna pawh ka hre chiah lo zawk.

‘I duh duh lai atangin sawi tan pawp la,ka remkhawm leh mai ang’ ati leha,a nui sun sun,Ka then ve sak. Nia,eng emaw ber chu ka sawi angai ang. Vawiin ang reng hi ka ni dawn em pawh hriat a ni si lo.

‘Ka sawithiam lo,ka pik chum chum a.Bakah,engmah ka hre rei thei lo a’ ka ti mawl deuh tawp.

‘Tunah khan engtin nge i awm? I pik churh tihna nge?” a ti a.

‘Aih, tunah chuan ka tha vek..Vawiin ang  hian tun hnaiah ka awm ngai miah lo va’ ka ti a.

‘I muhil thei em?” a ti leh a.

‘Aih,muhil thei vak lo..Muhil lo tawp chu ka ni lo va’ ka ti sap.

‘Chaw lam hi,I ei tha em?” a ti leh a.  Ka lu ka thing nak ringawt.

‘I pasal nen in inpawhna a tha em?” a ti leh a.

‘Um,tha…’

‘A tha,mahse tuna ilo kal tur hi a hriatpui lo che tihna tiraw?” a ti leh a. Phawk zetin ka en vat,Remruata’n a lo hrilh nge mawni?

‘Hlauthawng suh,I thianpa khan eng mah a sawi lo ania..’ ka ngaihtuahna hria ni awm takin a ti a.

‘Anih si chuan…’ ka ngawi leh daih.

‘Hlauthawng suh ka tih kha,Ka hna anih angin thil ka chik kual ve satliah mai maia,ka risk dik anih kha’ a ti awlsam leh mai. Sawitur hre loin ka bu nghat ringawt.

‘Mmmm, tihian sawi ang aw.I awmdan hi thil pangngai lo a ni chuang lo va,dik lo lutukah pawh inngai suh,mahse engkim min hrilh la chu kan awlsam sawt ang..’ a nui a. A sawi awmzia ka man lo.

‘Damdawi ei lai i nei em?” amah bawkin a ti leh a. Ka lu ka thing leh mai,Damdawiin ka chhuahsan hnu khan Damdawi leh vitamin eng eng emaw chu ka ei zui ngeia,mahse tunah chuan ka ei tur hun atan an tih a tawp tawha.Eng damdawi mah ei lai ka nei lo.

‘Miin an hrilh tawh che em? mahni Doctor leh mahni Ukil rawih hnenah chuan dawtsawi miah loh tur..A awmzia chu kan ring zo lo va,harsatna min sutkianpui tak tak thei lo vang tihna a ni awm e.. Chuti anih chuan i chhungrila hlauh emaw vei i neihte,na i tih ruk ngawih ngawih thilte,hman atanga ilo khawlkhawm tawh thil,nangmah chauhin i hriat,I Pasal pawhin a hriatpui miah loh che thil emaw midang hrim hrim hriat ve i duh loh thil eng pawh.A te emaw a lian pawh,a vaiin min hrilh vek i duh chuan hma kan sawn chak zawk ang tihna anih chu’ a tita duah.. A sawi tum ka hre thiam nghal kuar bawk. Ka melh zawka,chik zetin min lo en ve reng. Ka mit ka la sawn leh vat,vawiin hi vawikhat ka hmuhna a ni a, Doctor lar leh mi pan nasat em em ni mah se ka ringngam angem ka hre thiam rih tlat lo.

‘A la harsa deuh maithei e,damdawi ka pe che anga. I muthilh theih loh zanah i ei dawn nia,mahse i muthilh theih loh satliah ni loin,I hre thiam ang tiraw?’ a ti leha,ka bu nghat. Lehkhaah a ziak zui mawlh mawlh.

‘I ipik zual emaw,manganna i nei anih phawt chuan min rawn call dawn nia.A pawimawh ber chu mahni a awm tam loh a ni a,Dik lo dawna i inhriat chuan Bible chhiar vat thin ang che.Chu aia damdawi tha zawk a awm lo hial ang. Chuan,min lo call kha Inthlahrung miah suh ang che’ a ti dam leh duama,ka bu leh nghat ringawt.

Remruata hnaah let leh angaia, min hnial deuh nangin Hospital roadah min Drop turin ka tita zawk.Mamawh eng eng emaw lei kual tur ka neih bakah vawiin chu ka zangkhai lutuka,Boruak dang han dawn vel ka chak tlat.

‘I ngaihtuahawm loh ang maw?” ka chhuk tur min ti leh riha.

‘Ngaihtuahawm lo ang.Ka tha lutuk vawiin chu’ ka ti a, ka nui var var bawk.

‘Ok,a tha alawm..Harsatna i neih leh min lo call la’ a ti a. Ka thle bak ringawt.

Ka Damdawi tura Doctorin min ziahsak ka hre chhuaka,Damdawi dawr ka pan a,ka lehkha ka entira.Chhiar pawh ka chhiar theih mang loh kha dawr nghaktu erawh chuan awlsam tein a en a, a kalsawna. Damdawi a rawn la nghal thei mai.

‘Mami,I ni em?” min rawn betu lam ka hawi vat.Ka la hriat ngai loh Mipa lo ding reng chu ka en a,

‘Min bia em?” ka ti ha mai.

‘Aw,lawk..Min hrethiam la,min hre loin ka hria’a nui a.

‘Aw,pawi ka ti lutuk..Ka hre mai lo che’ nuam ti lo zetin ka ti a.

‘Peka ka nia,Hriatpuia Cousin..Inpa Cousin ka tihna’

‘Oh,Sorry’ ka ti halh mai. Ka ngaihtuah leta,Peka tih an sawi chu ka hre fo va, mahse amah ka hmuhawm ka la hre miah lo.

‘A pawi lo.Kan inhmu mumal lo em alawm..Khawiah nge i kala?” a ti leh a.

‘Ka thiannu ka tlawh lawka,thil pawimawh leitur ka neia. Ka kal kual vel anih hi,nang zawk?” ka ti ve a.

‘Ka pa Damdawi ka lei lawk mawle,I haw tawh dawn nge?’ a ti leh a.

‘Aih, ka la rei deuh ang’ ka titha ve mai.

‘Tunlai U Hriatpuia enge a tih a? a buai em?” a ti leh a.

‘A buai pangngai viau e’ ka nui a. A nui ve var var mai.

‘Ka kalsan phawt ang che’ a ti a. Ka ban ka vai zauh.

A kalsawn hnuah MC lam pan tumin kawng kan ka tuma,mahse Hriatpuia thianpa Sammy-an kawng a rawn kan mek ka han hmu a. Min rawn hmu ve a, min rawn hui lauh lauh mai.Kawng kan ta loin ka lo nghak leh rih.

‘Kan va inhmu khat ve’ ka bula rawn din pahin a rawn ti a.

‘Nia,I dam maw?” ka ti vat.

‘Dam alawm,I tha chiang tawh maw?” a ti leh a.

‘Um,chiang tawh ang chuan ka awm chu ania..In buai em tunlai?” ka ti leha.’A pangngai reng animai.Inpa chu a zin maw?” a ti leha.

‘Um,zin leh tawh’ ka then leh sak.

‘A buai ve bawk a ni,I hmeithai deuh reng mai dawn anih chu..Eee,nichin khan tunge i biaka?” a ti leh a.

‘Peka,Hriatpuia Cousin kha…Ka lo hai deuh lehnghala’ ka ti a.

‘Peka a?!!!” mak tih hmel deuhin a ti vak.

‘Aw…Tinge?”

‘Aih, eng mah ni lo e’ a ti leh lawi..

In ka thlenin khua a thim titih tawh,inchhungah inkhai bawr teuh chungin ka lut a, Sanjana-in min hmuh veleh min rawn khai sak nghal vat.Room lam ka pan chho a, khumah ka bag ka thehthlaa,ka mu thla ve nghal zat.Ka Phone a rawn ri a,ka bag atangin ka phawrha.Min rawn calltu ka en a, Hriatpuia a ni tih ka hmuh rualin ka then nghal sak.

‘Hello…’

‘Enge i tiha?” a rawn ti a.

‘Ka chhuaka,ka chau lutuka.Hei ka mu hle hle mai’ ka nui a.

‘Aaah,ka awm loh rualin nuam ti deuhin ilo chhuak vel tihna mi?” a rawn ti leha.

‘Ni deuh mai,tak takin in thleng tawh mi?”

‘Um,Lawk aw Mate..Peka nen kan inhmu dawna,a lo thlengin ka hria’ a rawn ti a. Thil ka hre chhuak zawk.

‘Peka maw? Tu Peka nge?” ka ti vat.

‘Ka Cousin mawle..’ awlsam zetin a rawn ti a,mahse kei erawh chu mak ti lutukin ka ang pham mai.Tlaia ka hmuh Peka kha tu nge nita ang?

‘Khatah khan a awm tihna maw?” ka ti fan leh raih.

‘Um,awm e…A post alawm.Ka dah phawt ang aw,ka lo be leh ang che’ a rawn ti leh a.

Chung lam enin che loin ka mu a,ka ngaihtuahna a buai miah lo tih ka chiang, vawiin khan Peka inti kha ka hmu ngei tih ka chiang lutuk tlat bawk. Mahse, engtin nge Hriatpuia bulah a awm daih theih si?

Remruata ka calla,a pick lo.Ka ti nawn leh dawn chiaha,a rawn call let ve thung.

‘Enge?” a rawn ti nghal tawng.

‘I buai ami?” ka ti ve thung.

‘Buai ve tho,sawi la..I hawna a rei tawh em?” a tihzawm leha.

‘I cousin Peka kha khawiah nge tunlai a awm?” ka ti mawl deuh tawp.

‘A postah a awm ang chu,tinge?” a rawn ti deuh hu.

‘Aaa,ka zawt mai mai che.Anih phawt’ ka ti a.

Ka tho a,inhnuai lamah ka chhuk thlaa. Kitchen lama Sanjana-in tu emaw a be thawm ka hriaa,thawm nei mang loin ka pan pheia, mahse ka hming sawi niawm tak ka hriat rualin ka ding chat.

‘Ka hlauthawng,ka u in a hriat chuan min that mai ang. U Mami aia buaina a nei si lo a’ hlauthawng awin a ti leh a. Ka thaw deuh halh mai..Engvangin nge ka chungchang a sawi ngawt? Mak deuhin ka harh hawkin ka hria..Nia,tu emaw chuan Sanjana-i kaltlang hian ka lakah Game an khel chiang lutuk tlat…

Chapter- 29

Kalsawn loin ka dinna ngaiah ka dinga,a sawi leh tur ka ngaithlaa. Thawk pawh ka thaw tha ngam lo.

‘Aih,ka thei lo ang.Ka u ka hlau’ a tih ri ka hre leha. Ka dinna atangin ka va bih dak daka. A Phone a lo dah tawh. Rilru hah hmel deuhin a chal a dawma.Ka lut phei a,ka pen thawm hriain a rawn hawia. Thlahrang a hmu ta emaw tihmai turin a mengphar nghal awn awn mai. A awmdan chuan amah ka rinhlelhna a tizual ve chiah thung. Zawh nghal chung chung tur nge ka enthla zui zawk ang tih ka ngaihtuah zawka,hmanhmawh rum ruma tih chi niin ka hre lo.

‘Chaw i ei tawh em?” kal pelh pahin ka ti a. A phu zawk,mahse ka hmu lo der tlat thung.

‘Chaw ei a hun tawh viau mai’ ka ti leha.

‘Aw..Aw,ka lo siam ang’ a ti nghal sawk sawk.

‘Siam duh suh, ka lo haw dawnin thil ka ei a..Ka la puar lutuk’

‘Chhuna mi kha ala awma,Ovenah ka daha’ a ti a. Pizza ei chakna pawh ka nei rih lo.

‘Um,mahse ka ril atam rih lo.Lo ei phawt rawh’

‘Ka u hi a lo haw dawn em?” a ti leh a, A pangngai ta deuh tih a awkiah ka hre thei.

‘Haw lovang.Nang mah khan lo ei mai rawh.Ka riltam tak leh nakinah ka ei mai ang’ pangngai takin ka ti leha. Dawhkana thei dahna Basketa Apple awm ka laa,ka silfiaia,ka keih nghal mawlh mawlh. Kal pahin Grape dahna Bawm ka la leha,room lam ka pan chho a,ka chevel kha chik em emin min enzui kar tih ka hre ru reng bawk.

Sofaah ka thu a,Grape ka ei paha. Tunah hian ka rilru a fim kar tih ka inhria..Fim taka thil ngaihtuah tur pawn harsatna ka nei lo.

Tu nge Sanjana-i kha rawn bia ang? Keima chunga eng emaw titurin a nawr niin alanga, mahse Sanjana-i khan a hnial niin alang bawk. Zawhna chhan theih si loh ka ngaihtuah chhuak nghal tup tup.Ka awmdan ipik leh thil ka hre rei thei miah lo thin kha thil pangngai a ni angem? Nge mi tamtak buaipui em em Depression vang zawk?  Depression neih dawn hian achhan a awm kher a tul lo va, rilru lam natna a ni tih ka hria..Mahse,inchhunga thilthleng,ka thil hmuh te kha..Khang kha chu thil pangngai piah lam a ni. Khang thil vang khan ka manganga,ka chiai tih ka chiang. Khatiang thil thleng tur khan Sanjana-i hian inrawlhna a nei angem?  Khawi atanga lo kal nge tih hriat miah loha lo lang thut,bo leh daih angah te khan ngaihbel dawn chuan Sanjana-i tel ve theihna thil vek a ni tlat. Sanjana-i khan a rawn betu tihtir tum kha hnial niin lang mah se tun tum lo kha ka chungah thil tih a lo nei reng tawh thei.Min hmuh ruala a hmela hlauhna lang leh ka awm chhunga a ti dak mai kha a mize pangngai a ni lo.Huizzz,Hriatpuia tal awm se..Ka that chian hun nghah ai chuan a lo haw hunah engkim sawipui ila a tha zawk ang.A ngaithla duh lo anih pawhin angaihthlak duh nan eng emaw ka tih angai tihna animai.

Thu mu chungin Tv ka en a,ka ngaihtuahna erawh hmun dangah a awm daih thung. Ka Phone riin ka ngaihtuahna ala peng a,ka Phone ka en a. Hriatpuia bawk.

‘Hello..’ ka ti sap.

‘I mu tawh em?” a rawn ti zangkhai vuh.

‘Aih,Tv ka en..I buai tawh lo mi?” ka ti a.

‘Buai zo deuh chiah,mahse chaw ka la ei lo’ a rawn ti leh a.

‘Ti nge? I va ei har ve’

‘Peka nen kan ei dawna,a lo thlenga. Mahse, hei a chhuak leh rih a’ a ti leh a. Ka ngaihtuahna a vir leh zawk a niber.

‘Peka,enteh…Aaaa,ngai leh lo mai’ ka ti nawi deuh nak.

‘A va mak nawk nawk ve,sawi la’ a ti dam thlup.

‘Aih ,angai lo..Mahse, lo haw vat la ka ti’ ka ti sap. Diktak chuan vawiin thilthleng kha amak ru riau. ‘Peka’ inti ka biak kha tu nge ni ang?

‘Naktukah ka lo haw ang..Chuan,ka ngai che a’ a ti leh sup.

‘Kei pawh…’

Phone ka dahthlaa,vawiin thilthleng ka ngaihtuah leta,Hriatpuia cousin te zingah Peka Pahnih an lo awm reng anga, ka hre lo zawk nge ni ang? Peka tih hi chu an sawi ngum em avangin ka hre lar ve tawpa. Mahse, vawiina min rawn biak hma kha chuan amah ka hmuhawm ka la hre miah lo.Kan inneihni kha hna pawimawh a neih avanga a rawn tel ve bawk si lo.Ka Phone ka ban leha,Remruata msg ka thawna. Minute khal vel lekah a rawn reply nghala,ka Open vat. Mipa hmel lo lang chu ka en vang vanga, vawiina ka hmuh nen khan an in ang viau,mahse mi hrang ve ve anni tih erawh ka chiang bal thung. Zawhna ngai bawk, vawiina mi kha tu nge ni ang?

Tuiin tumin ka bana,mahse ka kengchho lo tih ka hre chhuak zawk. Inhnuaiah ka chhukthlaa, light a lo in Off thap tawh. Ka On chawpa,Sana ka en a. Dar 9 a pel hret,Sanjana-in Tv a en peih vei nen.Tunah phei chuan a Serial ngainat lutuk a chhuak mek lehnghala,mahse a en tlat lo.

Kitchenah ka luta,Apple leh grape ka ei nual nangin ka pum ruak a ri raih raih mai. Chaw ei turin ka peih tingtang tawh lo a,Thingpui ka chhuang ta zawk. Oven ka hawnga,Sanjana-i sawi ang ngeiin Pizza a lo awma. Ka on a, thingpui chhuan chhungin alum hman vek ang tih ka hria. Chair ka pawtchhuaka,Phoneah Game ka khela, zawitea pen thwm ri deuh thlap thlap ka hriaa,ka hawi chhuak vat. Sanjana-i hlau hmel deuhin a rawn dak dek deka.Mahse,min rawn hmuh takah chuan thawveng huai hmel a pu a. A rawn lut ve a.

‘Thil ei i tum em ni?” min rawn ti a.

‘Aih, Thingpui ka inchaka.Pizza ka tilum bawka’

‘Ka lo siam ang’ thingpui siam tuma ka tho tur a ti vat. Ka thu leha, Game ka khelh lai ka khel zawm lehnghal mai.

Ka hmaah Thingpui leh Pizza a rawn chhawpa,’ Chaw chu i ei duh lo tak tak ami?’ a ti leha.

‘Aih, ka eitur hi a tawk lutuk..’ en loin ka ti liam leh puat.

‘Anih chuan ka mu leh mai dawn asin’ a ti leh a.

‘Um,mu rawh..’ ka ti a. A kalsawn chu ka en a, ka rilruah thil a lo lang zawk.

‘Sanjana…’ ka ti a. A rawn hawi vat

‘Angai leh lo mai,naktukah animai’ ka rilru ka thlak leh hman tawh. A bu nghata,a kalsawna.Phona ka daha,thingpui tui hmel zet chu ka en a, Pizza ka lachhuaka,ei mai theiha a awm takah chuan ka riltam zual sawtin ka hre hial!!!

Ka hrawk ro huam huamin min tiharh hlawl. Ka thuchhuak nghala,khua a lo eng vek tawh. Khum bula tui ka chhawp ka bana,no pawh hmang loin ka innghal khawlh khawlh. Ka phone ka bana,sana ka en a. Dar 2 !!!

Ka phone sana a in set sual anih ringin khum bul Cabineta Sana inhung ka en leh vat.Mahse, dar 2 tho!! Nizana ka mu kha tunah ka harh chauh tihna ania..A theih loh,chutiang chen chen ka muhil ngawt lo tawp ang.Ka Phone ka en leha,Hriatpuia’n vawi hnih min lo call a.Remruata leh Machhuani’n vawi khat ve ve min lo call bawk.

Inphihfai pawh inphihfai loin inhnuaiah ka chhuka,Sanjana-in insuk a lo thlep fel mawlh mawlh.Banga Sana lian inkhai ka en a, hetah pawh dar 2 tho..

‘Sanjana,tinge min kaihthawh loh a?” ka ti a. Phawk zetin min rawn en a,nizan ang bawk khan Thlahrang a hmu aniang tihmai turin a awm leh tawh. Ka lu rit luk tih ziawm tumin ka thing naka,ka dawm zui  vang vang mai.

‘I tha em ka u?” ka zawhna chhang loin min ti a. Ka tawt deuh up up bawk nen ka zawhna ni lo lutuka min bia chu ka thinrim thut.

‘Ti nge min kaihthawh loh ka tia lawm?” ka ti that.

‘Ih, kaitho tur chein min ti si lo alawm’ tim daiin min en a. Ka thaw hak mai.A lo awm tirh atangin tawngkam vinin ka la be lo tluk a ni a. A hlauthawng viau pawh a demawm lo,mahse ka tawp up upa,ka hahdam lo,achhan awm si loin ka tang em em ti ila a dik ber ang.Puakkeh vek ta ila ka zia zawk mah maithei.

‘Tunah dar 2 a ri tawha,hetiang chen chen ka mu ngai lo tih i hria.I hriat reng chuan min kaitho ta che’ ka ti leh chiam..Engvanga au vak vak nge ka nih ka inhre bik lo.Mahse, ka incontrol thei miah lo. Phawk em emin min en ve thung.

‘Enge min en renga?” ka ti leh hlar mai.

‘Zingah khan ilo tho si alawm.Tunah i mu leh tih pawh ka hre lova’ a aw a khur dar dar mai. Kei erawh a thusawi chuan min deng dawt a ni ber.

‘Ka lo tho maw?!!’ awih lo lutukin ka ti leh that. Hlauh hmel em emin min en a, a thu tawm chaih bawk.

‘Aw,zingah khan thingpui pawh kan in duna.Chaw pawh i ei a’ a tap mai dawn emaw tih turin a men tuau mai.Ka tawlhhnung hrat,Sanjana-i hmelah chuan dawtsawi hmel alang eih lo. Hlauhna bak eng mah a lang lo hrim hrim.Ka inher thuta, chak zetin inchungah ka tlanchho a, Roomah ka tlan luta,ka inkalh khum nghal hmak.

Kawngkhar nghengin ka thu hnawk,zingah ka tho a,ka hre lo maw? Thingpui pawh ka ina,chaw pawh ka ei bawk maw? A ni thei lo,thil theih loh tawp a ni.Ka tho leh thuta, Bathroom ka pana,vawiin atan Bathroom chu hman tawh tih hriat takin Chhuat a lo huh a,Toothbrush ka laa,ka Toothbrush a huh vek bawk. Nizana ka mut dawn khan ka ha ka nawt ngeia, mahse tun thleng thlenga huh chhan tur a awm lo. Harhchhuak thut niawm takin Bathrobe khaina ka en a, a awm lo ve ve. Towel dahna ka hawnga, a kawngkhara Face towel ka khai thin,zing tina ka phochhuah thin a awm lo.

Ka tlanchhuak leha,Balcony lam ka hawia. Ka thaw a tawp deuh chawt..Nidanga ka tihfo dan ang chiahin Bathrobe pahnih a inkhaia,Towel a inzar bawk!!

Khumah ka thu thla hnawk.Thil thleng hi ka bo satliah lo,ka a lo chauh a ni zawk.Ka ngaihtuahna tihfim tumin ka thaw vak,mahse awmzia a awm lo. Nizan khan Thingpui ka inzawh hnuah ka mu nghal mai kha a ni a, abak eng mah ka hre zui lo. Ka hriat leh chu tun lawka ka harh kha a nimai.Ka lu ka thing leh vak.Zing kara thil thleng hriatchhuah ka tuma, mahse ka lu a keh dawnin ka hria..

Nimin leh vawiin ka awmdan inpersan zia hi a rapthlak lutuk. Nimin kha chuan harsatna eng mah ka nei lo.Ka tha veka, Doctor ka pan pawh kha tul lo ang maiin ka ngai hial anih kha.Mahse, tunah hian ka awmdan hi nidanga ka awmdan nen ai pawh khan a hrehawm zawk.Ka thawpik satliah lo,ka tawt vek. Nimin leh tun hi chu lei leh hremhmun a ni tawp mai. Ka chhungril atangin mahni intihnat chaknain min tur ut ut bawk.

Ka phone a rawn ri a, ka en a. Hriatpuia a lo ni a, pick loin ka en ngawt ngawt ringawt. Pick ta ila enge ka sawi ang ka ngaihtuaha,sawi mai tur ka hre miah lo.A rawn call leha,ka chil ka lem a. Khur hlak hlak chungin ka bana,ka picka.Tawng loin ka beng bulah ka dah mawl tawp.

‘Mate…Hello,I hre thei em?” Hriatpuia aw pa zetin zangkhai vuha a rawn tih chu ka ngaithla a. Awmze nei miah loin ka mittui a rawn tla ringawt.

‘Mate….’ A rawn tinawn leha.

‘Ka hre thei’ ka ti chhuak thei hram.

‘Ok..Ka lo haw dawna,ka lo chhuak tep animai.Thil pakhat tih fel ngai ka la neia,ka lo chhuak har tawh lo vang’ a rawn ti leh a. Dan rual lohin ka mittui a rawn tla leha. Ka kut hnung lamin ka hru zauh.

‘I lo chhuah dawnah lo sawi la’ ka ti leh thei hram.

‘Ok..Ka dah phawt aw’ zangkhai zet bawkin a rawn ti leha. Chhang loin ka off a, khumah ka thehthla nghala.Ka kawchhung atanga min turtu nasa lutuk avangin ka ban ka seh nghal chat mai.Mahse, aw zawite hian ti lo turin min rawn hrilh nimaiin ka hria. Ka ban ka lek sawna, khum atangin ka chhuka. Dressing Table bulah ka pheia. Dressing Table leh Thawmhnaw bawm inkar awlah bang nghengin ka thu a, ka khupah ka lu ka nghata,ka mit ka chhing nghal hmiah bawk.

Kan Room kawngkhar inhawng thawmah ka hawichhuaka,ka beisei loh lutukin Hriatpuia u a rawn luta, ka thaw hak mai.Min zawng niawm takin a hawikuala,min rawn hmu a, Ka thaw hak mai.

‘Mami,khatah khan enge i tih a?” mak ti awin a ti nghal hluai, Ka chhang lo..Min rawn pan pheia,ka thutna bulah a rawn dinga, a hmeltha takah chuan mak tihna alang chiang em em bawk.

‘I tha em?” a ti leha. Ka lu ka thing ringawt. Ka inrin hmain ka mittui a rawn tla leha. Ka kut hnung lamin ka hru leh tawk.

‘Lo kal rawh,eng mah hlauh tur a awm lo’ amah bawkin a ti leh a,a kut a rawn pharchhuaka.Che loin ka en mawl tawp ringawt. Beidawn hmel zetin a thaw leh halh mai.

Tawng leh tumin a ang ziaua,mahse a phone a rawn ri a. A phone a ken lai a en vat. Min rawn en leha,’ ka lo let lehnghal ang’ a ti a. Ka hriat hnua a vawikhat nan ngainatawm takin a nui var var bawk.

A kalsawna,Room kawngkhar a hawnga. A chhuaka,a chhuak fel chiah tihin ka tho ve vat. Tu nge abiak ka hre duh tlat.Kawngkhar lam ka pan pheia, ke lawnga kal  ka ni bawka. Thawm a awm mang lo.Mahse, ka taksa awmdan mak lutuk vangin thawm dim taka chet pawh a harsa lam lek lek.Dimtein kawngkhar ka hawnga. Ka dak chhuak dek deka, Tukverh bulah min hnungchhawn zawngin a dinga. A phone a beng bulah a daha,lehlam tawng a ngaithla tih ka hre thiam.

Chhuah ka tuma,mahse a tawng ri ka hriat rualin ka ding chawt.

‘Mama,ngaithla phawt rawh...I hmangaih lutuk vangin i hmufiah thei lo anih kha,ka ti tak tak.Mami hi a tha lo..A hma aia khan a nasa tawh zawk,A a vek tawh’ zawi sapa a tihri chuan min deng dawt a ni ber.

Ka a ang maw? Teuh lo,engvangin nge ka at ngawt ang?

Chapter- 30

Ka a lo…Ka a miah lo ka rilruin ka ti mawlh mawlh. Hriatpuia u lam ka hawia,Hriatpuia nen an la inbe ta zel,mahse eng mah a sawi zawmna hriat zui ka nei lo. Tun lawka a thilsawi kha ka bengah a khat vek.

Roomah ka tawlh leta, Sofaah ka thu thla hnawk. A sawi danah khan Hriatpuia hian ka awmdan mak pui pui hi a hre sa vek a ang. Mahse, a haider a…A hria anih chuan engvangin nge ahaider ang?

Thawklehkhatah ‘Mami hi a a vek tawh,I hmangaih vangin i hmu fiah thei lo’ a tih kha aw tam takin min hrilh nuai nuai ang maiin ka bengah a ri nuai nuaia,sawi that pawha sawi loin an au vak vak nimaiin ka hria. Ka hawikuala,tumah an awm lawi si lo.Ka beng ka hup ta ngawt.

‘I tha em?” ka bulah rawn ding an awm,ka hawichhuaka.. Hriatpuia u a lo ding leh tawh. A hmelah chuan manganna nasa tak nei a ang. Ka lu bura aw tamtak ri nuai nuai vangin ka lu a keh dawn takngial…Ka mit ka chhinga, ka au chhuak zui nghek. Ka mengchhuaka,mahse a thim zui mup.

Kham sang tak bulah ka lo dinga,tu emawin min lo nam thuta, mangang lutukin ka lo tla thla a,a tawp ka zuk thleng tur chiah ka phu zawka, ka mengchhuaka, ka mumang a ni tih ka hriat rualin ka thaw nghal huai huai mai. Ka hrawk a ro halha,mumang mah nise ka mangang bawk aniang ka thlan deuh hluam bawk. Tho chuang loin ka hawikuala,Room chhung eng dul raih maiah chuan zan a ni tih ka hre thei mai bawk. Thawm awm loin a reh thap mai.Thawhchhuah ka tum a,mahse Room kawngkhar pawna pen thawm ka hriaa,ka mu tha leh vat.Kawngkhar inhawng thawm ka hre zui nghal zat bawk.Tu nge lo lut pawh ngaihtuah loin ka mit ka chhing lehnghal hmak.Tunah chuan tumah ka hmachhawn peih rih lo.

Pen thawm lo hnai zel ka ngaithla kara, pakhat pen thawm ni loin mi pahnih pen thawm a ni. Mahse, pakhat chauh kal ri a lo hnai zela, khum bulah a tawp ta chat. Enge thleng dawn ka nghak mawl tawp,mahse a kalsawn thawm ka hre leh ta zawk. Chet mai ka tuma,mahse zawitea tawng ri avangin ka thulh lehnghal.

‘Hlauthawng suh,a taksaa muthilhna damdawi tam lutuk kha a zo lo a.Bakah,a taksa a chak tawk lo viau bawka.Mahse, damdawi kha a thahna kan kap luta,a zia zui mai ang’ Mipa awin a ti a, a aw atangin tunge anih ka hre mai lo. Ka ngaihtuaha,mutna damdawi ka ei lai ka hre lo.Doctor khan min pe ngeia.Mahse,nizanah kha chuan mamawhna ka neih loh avangin ka ei lo tih ka chiang lutuk.

‘Muthilhna damdawi a mamawh aia tam a ei tihna a ni em?” Hriatpuia aw pa zetin vawt ruiha a tih ri ka hre leha.

‘Um,anih hmel viau. Hei hi en la,a lei lai i hria em?” a ti leha. Eng nge a entir ka hre lo. Ni lo,nimin lawka damdawi ka lei kha an hmu tihna a ni angem?Hriatpuia tawng leh hun thaw dep depin ka nghak mawl tawp.

‘Ka hre miah lo,muthilh a harsat tih chu ka hre ngeia,mahse Damdawi a ei tih ka hre lo.Ka hre lo takzet’ beidawng lutuk awin Hriatpuia’n a tichhuak hrawih. Ka mittui a rawn tlaa,ka bekah a rawn luangthla a. Tap chhuak lo turin ka insum tang tang bawk.

‘Doctor lehkha ka hmuh danah hi chuan nimin lawka mi anih hmela,engpawhnise tunah chuan atha vek ang.Lawk,a Doctor hi i hmuhpui em?” a ti leha.

‘Aw,min rawn calla. Ka hmelhriat sa a ni a’ Hriatpuia’n a ti a. Ka inhumruh nghek.Aruka hmu emaw ka intih laiin an lo inhrilh hre thlip thlepa,Doctor lah khan ka pasal nen an inhre sa tih eng mah ka bulah a tilang miah lo zui. Remruata hian engchen nge min zep sak ang? Ani pawh ka ring zui zel ngam tawh kher angem? zawhna hlir…

‘Enge a sawi?” dilchhut fahranin a ti leha.

‘Ka haw veleh amah hmu turin min ti a.Naktukah ka hmu ang,tuna thil thleng hi ka hrilhtawh bawka’ a ti leh a. Ka lungphu a rang nghal dawt dawt thei.

‘Ok,a tha alawm.Hmu phawt la,hmalak dan a awm thei mai ang’ a ti leha.Tu nge anih ang ka la hre thei ta chuang miah lo..A thiante zingah chuan Sammy-a Doctor a ni ngeia,mahse a awah Sammy-a a ni lo tih erawh ka chiang.

‘A awmdan danglam deuh hi kan nula chuan min hrilh ngam loin ka u a lo hrilh tawha,ka u pawh chuan min hrilh ngeia..A awmdan danglam han tih lemah hman deuh khan a accidenta, I hriat kha..Khata tang khan thil mak pui pui angaihtuaha,a Accident khan ataksa ni loin a rilru lam a shock nasaa. Thil tul lo leh mak pui pui a ngaihtuaha,a ngaihtuah hah lutuk ka duh loh avangin khami lam hawi khan titi pawh ka titi pui duh ngai lo. A theihnghilh chho ve zel ang chu ka ti a. Nau achhiat avangin zai a tawk leh bawka.Mahse, ka beisei phak piah lam a lo thleng ta chu anih hi’ a ti zuai leh ruih...Sanjana…Hriatpuia u a lo hrilh a,ani pawn Hriatpuiaa lo hrilh chhawng leha,mahse ka theihnghilh aduh avangin engtinmah ka awmdan danglam kha hria angin a awm lo.Mahse, a lo hre daih tawh tih erawh achiang ta vek.A haider ngei tih pawh achiang.Chuan,vawiina a u lo kal kha tihpalh thil ni loin Sanjana-in a ko tih achiang reng bawk.

‘Hun kal tawh chu kan thlak danglam thei lo tih i hria alawm. I la tlai chhe lo vang.Lawk,mahni intihnat atum tawh em?” a ti leha. Vawiinah khan keimah intihnat chaknain ka khat veka,ka ban pawh ka seh pem hman thelh anih kha.

‘Amah hi chu a intihnat ka la hre lo’Hriatpuia’n beidawn hmel zetin a ti hul leh huk.

‘A that hlauh chu, Depression nei nasa lutuk hi chu mahni intihnat mai pawh pawi an ti lo thina,mahse chutiang a thlen loh nan hma kan la anga.Doctor pawh chu be phawt la,mahse muangchang lo la ka duha,thlahfal lo la ka duh bawk.Amahin awm tam lo se’ a ti leha.

‘Engpawh tih ngai se ka ti ang. Chan ka duh lo..Mahse, ka nupui hetiang anih thu hi tuman an hriat ka duh lo bawk,ka chhungte anni emaw tumah ka duh lo’ Hriatpuia’n nghet churhin a ti a.Ka kut ka humruh  leh vak ringawt.

‘Ka hre thiam che,I chan lo ang.Kan theihtawp kan chhuah ang.Ka kalsan phawt ang cheu,harsatna a awm chuan min rawn ko thei reng aw’ pakhat zawkin a ti leh a..Pen thawm chu kawngkhar inhawng thawmin a zuia,pen thawm zawi tial tial chu ka ngaithla kar.

Ka mengchhuaka,chung lam hmu miah loin ka thlira, tunah chuan na ka neih ka hre lo,fim takin ka awmdan ka ngaihtuah leta,ka ipik lutuk leh ka benga mi tamtak au ri vang khan nikhaw hre loin ka awm a ni ngei ang. Ka thle pheia, khum bula sana inhung ka en a. Dar 8 a pel hret,ka awmdan ka hriat hnuhnun ber kha tlai lam a ni tawha,anih chuan nikhua ka hriat loh chhung a rei ve thawkhat tho mai.

Ka tho a, lukhamin ka inkam kanga,thu mu titihin ka awm a. Vawiin lama thilthleng ka ngaihtuah let lehnghala,’zingah ilo tho a,thingpui i in a,chaw i ei bawka’ Sanjana-in a tih kha ka ngaihtuaha..Ka ring lo bur,ka taksaah mutna damdawi tamtak an hmu anih chuan ka tho hlek lo vang.Anih chuan tunhnaia thil thleng tam zawk kha tum reng vanga thleng,ka tih anga lang si a ni angem? Ka thaw haka,ka lu ka dawm vang vang. Ka mit chhing chungin ka inngaihtuaha,ka tluk hma a ipik leh puakkeh chak ngawih ngawih ang kha chu ka ni tawh miah lo tih ka hre theia,awihawm loh khawpin na ka neih awm ka hre lo hrim hrim zawk.

Vawilehkhatah ka harh deuh kawk,ka mengchhuak nghal a..Ka sawithiam dan ber chuan ka hnar leh ka thaw tha thei loin min lo hupbeh saka,thawklehkhatah an hupna an la kiang thuta,duhtawkin boruak hip ila chutiang chu ka awmdan nen hian a inang ber awm e. Ka mit ka chhing leha, thil awihawm loh em em nimahse ka awih angai. Ka Depress nasa lutuk kha thil thleng tak tak a ni a, abak thil erawh chu tum reng vanga thleng a ni. Ka that tawk lohna denchhenin tuemaw chuan ka lakah tum nei ranin chet ala..Mahse, tu nge ni ang? Ka mitthlaah Hriatpuia u a lo langa.Ni e,ani lo chu midang anni thei lo vang. Mahse, Hriatpuia erawh chuan a pawm thei ngai lo vang. A u a ni miaua.

Khum atangin ka chhuka,ka lu hai deuh thut avangin ka pai dat mai. Mahse, ka zia zui lehnghal mai thung. Bathroom ka pana,ka lut a. Darthlalanga ka thla lo lang ka en a,ka hmai a dang lapa. Ka sam hnawk deuh niaih chuan min ti lang pawr lehzual.

Muangchangin inhnuai panna stepah ka chhuk thlaa,ka tha khur dar dar mai. Ka hawi kuala,tumah ka hmu lo.Thawm eng mah awm loin a reh thap bawk. Sanjana-i a mu tawh a ni ngei ang. Living room ka thleng thla chiah tihin Hriatpuia a rawn lut ve chiah thung.Min rawn hmu nghal a,ahmelah mak tihna niawm tak alang zawk. Harh chhuak zawk niawm takin min rawn hnaih nghal ruaka,ka bul a lo thleng chu a ni chawpchilh nghal mai.

‘I lo thi maw? I tha em?” a ti nghal sup. Ka en chho a,ka then sak mai. A thaw deuh huai ka hre zawm zat.

‘Ka tha..Tlemin ka lu a hai deuha’ ka ti sap. Ka bula thutthlengah ka thu thla dawna,rang lutukin min rawn vuan vat. Ka thu thlaa,ka bulah a rawn thu ve nghala. Ka kut a laa,a hum zui nghal vang vang.

‘Sanjana-i hi khawnge?”  ka ti leh sap.

‘A awm lo, zanin chu ka u te bulah a riak phei a.Naktukah a lo haw ang’ a ti dam thlup. Keiin ka rinhlelh angin a ringhlel ve lem lo a ni ngei ang. A tihsual lai chiang taka sawi tur ka hre rih lo,mahse ka la hre chhuak em em ang. Chumi tur atan chuan hetah a awm rih a pawimawh em em bawk.

‘I ril a tam em?” a ti leh sup.

Ka chhan hmain ka ngaihtuaha,nimin tlaiah chaw ka ei tawh lo. Vawiin nilengin ka ei miah lo bawka,ka pum a ruak lutuk ringawt. Mahse, eng mah ei chakna ka nei lo. Sanjana-i siamsa leh phei chu ei loh ka duh zawk. Ka accident tirh leh Damdawiin ka chhuahsan hlim khan a kutah eisiam pawh ka dah lo thei lo va, mahse ahnuah erawh ka chhuak  anih loh chuan keiman ka siam vek thina.Ka siam laia a awm ve anih pawhin tihtur ka tih chin bak chu ka khawih tir ngai lo. Chuvangin ka eiturah thildang pawlh pawh nise regular chuan a ni lo vang.

‘Ka ei lo mai ang.Siam a buaithlak mai mai’ ka ngaihtuahna nen inmil lo zetin ka ti a. Bakah,Sanjana-i siamsa ei ka duh lo tih sawi kher ka duh hek lo.

‘I nu a lo kala,a siam alawm’ ka rin loh lutukin a ti sup.

‘Ka nu maw?” ka ti zawi raih mai.

‘Aw,ka u in min rawn call khan a mangang bawk nen,ka lo la thleng mai dawn bawk si lo va,ka ko a..Hriatthiam tum rawh,khawngaihin’ thuphachawi aw deuh in a ti dam thlup.Chhang loin ka khap sak sak mai. Ka nu nimahse inzawmna samzai tiat lek pawh kan nei zo lo maithei.Mahse, atawpkhawkah chuan ka nu a lo ni leh tho pawh a nimahna.

‘Thil ei loin ka mu leh zawk mai ang..’ ka tita zawk. A hmel danglam deuhah chuan min hnial dawn emaw ka ti hmana,mahse tawng loin a bu ta nghut.

Khumah ka lawna,puan min rawn sintira.Light a off hnuah khumah a rawn lawn ve a,min rawn kuaha, A dar ka khama.A awm zawnah ka kut ka daha,a lungphu ri dat dat ka hre thei.

‘I muhil tawh em?” kan ngawih vang vang hnuah ka ti sep.

‘Aih…’

‘Ka tha lo viau em?” ka ti sap.

‘Ah,tha lo viau lo e..’pangngai takin a ti dam thlup. Nichina mangang leh beidawng taka tawng kha a ang leh tawh lo. A inringtawk leh em em tawh.

‘Min then angem?” ka ti leh a. A thaw nghal hawk.

‘Ka thi anih loh chuan ka then ngai lo vang che. Ka Hmangaih che tih hre reng la’ a ti leh a.

‘Ka a dawn anih iring em?” a thusawi sawi zawm duh loin ka ti leh a.

‘Ring lo,I tha leh vat ang’

‘Ka eng ber hi nge dik lo?” ka ti leh a.

‘I accident hnu khan i depress nasaa,chu chuan tlemin buaina a thlen deuh che a.Chuvang mai mai mawle,I tha leh vat ang’ a ti dam leh thlup. Nia,ka hria.Ka tha leh vat maithei,tur min pe a ka thi anih loh chuan ka ti rilru a. Midang hriat a hlau em em mai kha min ngaihtuah vang nge ni anga thildang vang zawk? Atih theih zawng zawng tih a tum tih sawi mah se a u humhim a duh vang pawh a ni thei tho.

Sanjana-i a lo let ta lo. Hriatpuia hnaah a kal hek lo.Amah vekin eitur a siama, nimin nileng thil ei miah lo ka ni chungin eng mah ei chakna erawh ka la nei miah lo thung. Ka taksa achau deuh tih mai loh chu harsatna ka neih ka hre lova, mahse eng thilah mah phurna ka nei lo nimaiin ka inhre thung. Ka zawi ngawih ngawiha,mut hle hle ka chak ber. Ka ngaihtuahna erawh a fim tha veka,pik leh buai eng mah a awm lo.

Door Bell a rawn ri a, Hriatpuia’n ava hawnga. Tu nge lo kal pawh ka en peih lo.Tv hmu miah loin ka en a,ka ngaihtuahnaah ‘ engvangin nge ka chungah hetiang a thlen tir?” tih bak a awm lo.

‘Surprise…’ Machhuani aw ka hriaa. Ka hawichhuak vat. Hlim hmel zetin min rawn pan pheia,za lo zetin ka nui lui ve sak thung.A lo kal dawn tih min hrilh lawk miah lova, engvanga lo kal thut chu ni maw?

‘I tha em?” tih pahin ka bulah a rawn thu thlaa.

‘Um, kan inhmu khat tiraw?” ka ti zawi raih.

‘Nia,min ngai lo em alawm..Tak takin vawiin chu hun ka ngah lutuk,tlaiah chaw ka ei nghal dawn..Tiraw?” Hriatpuia lam hawi chungin a ti a. A mize thawveng hah mai chu ka lo awt ru ngawih ngawih thung.

‘Nia, eirawng inlo bawl anga. Mahse, siam teuh lo ula.Chawhmeh ka rawn lei haw ang. Ramsanga leh Sammy-an an lo ei ve nghal dawn bawka’ Hriatpuia’n a ti a. Min rawn en a,a nui suk.

‘Remruata pawh..’ a ti leh sup. Ka ngaihtuahna hriat tum niawm takin chiang zetin min en a. Ka thle bak. Tunah tak hi chuan Remruata a ni emaw ni lo emaw tu mah ka hmu peih lo tawp. Engvanga nguai em em nge ka nih erawh ka inhre thiam bik lo.

‘Thingpui…’ Hriatpuia’n Machhuani hnenah a ti leh a.

‘Angai lo,kal tawh zawk rawh. I tlai lutuk ang’ Machhuani’n a ti a. Khawiah nge kal a tum pawh ka hre lo.

‘Hnaah chhuah lawk ka ngaia, Machhuani a lo thleng tawh tho bawka..Ka lo let har lo vang’ ka ngaihtuahna hria niawm takin Hriatpuia’n a ti a. Ka bu liam satliah ringawt. Thil pakhat hriatchhuah ka nei ta thlat.Nizana ka harh lo emaw atih lai khan ka Doctor kha hmuh a tum tih a sawia,a va hmu dawn anih ka ring leh lawi..A rawn kal hnaia,a rawn thu hniama.Ka kut a rawn vuana,Machhuani a awm reng chungin ka chalah a rawn fawp zauh.

Hriatpuia chhuah hnuah Choka lamah kan inzui pheia.thingpui a siama, kan induna.Tlem bak ka in thei lo. A tihfo danin chhum lo chat loin a titi a, ka chhan leh chhan loh pawh angaihven chuang lo. Andy hna chungchang leh Aizawlah an transfer dawn tih a sawia, a uin pasal a nei dawn a,mahse an la tifel chiah lo tih a sawi leh a,thildang dang a sawi kai leh teuh. Ka ngaithla liam deuh vel mai mai thung.

‘Eng mah min zawt dawn lo mi?” ka tichhuak thut. A no si lai a tawp deuh chata,mahse a incontrol leh vat niawm takin a silzui leh mai.

‘Eng maw ka zawh ang che?” zangkhai tak bawkin a ti a.

‘Ka a mek tih hi mawle..Hre lo der duh suh’ ka ti deuh tawng. A thilsil lai a dahfela,muangchangin a rawn inhera,a hmelah uang hmel a lang lo.

‘I a hleinem’ a ti chhuak halh.

‘Ka rilru nawmna turin eng mah sawi duh suh.Ka awmdan hi ka inhria alawm.I lo kal chhan pawh a ni tih ka hriaa ‘ ka ti leh a. A hmui a pet zauh.

‘Mi tamtak neih thin natna i nei ve animaia. Thil serious lutukah ka ngai lo.Mahse, engmah min hrilh lo erawh ka vui ve deuha,chu zawng chu. Ka tan chuan LALRINAWMI kha ila nireng.A tha em?” a ti a, a nui zui var var.Ka thle deuh baka,ka hmaa ding ka thiantha ber chu ka en a. Ka nuna thil danglam thleng engkim mai hi hmaih nei miah lo a atir atanga engkim hrilh vek ka duh ta tlat.

Ka bula thu turin ka huia,a rawn thu phei nghal vat. Thil danglam ka hriattirh phat atanga tun thlenga ka nuna thilthleng ka hrilh ta mial mial. Achang leh ka sawi tawh lamah ka let leh thul,ka kut a vuana,dawhthei takin ka thilsawi angaithla a..Ka sawi buai deuh lai leh harsa ka tihlai deuhah pawh min tur loin min nghaka. Ka sawi zawh meuh chuan a mittui a parawl teuh mai!!

‘A va harsa dawn tak’ tawh aw teuhin a ti a. Ka mittui rawn hnam tur duh loin ka khap sak sak thung.

‘Min pui rawh, tu ber hi nge ka rin ang ka hre thiam lo’ ka ti zuai leh raih mai.

‘I pasal hian a Hmangaih takzet che tih ka hria,ani hi chu ringhlel suh’

‘Ka ringhlel lo,mahse engkim hi amah ka hriat hnua thleng tan a ni a. Ka nun thlamuang deuh kha min tibuai ta vek niin ka hria a.Tuna ka awm mek dan pawh hi midang hriat ala hlau cheu asin’ ka ti leh duah.

‘Um..Nia,ka lo ngaihtuah ve tho mai. Mahse, ani hi chu anih ka ring chuang lo.A u hi anih ka ring ber.Chuan,nula awmpui tur chu ka lo ngaihtuahsak dawn che nia.Sanjana-i chu an control thei tlata’ a ti a.

‘Nia,lo ngaihven la..Mahse,a u anih tlat avangin a hmu chhe tak tak thei lova,bakah avai hian ka natna vanga thlengah angai deuh tlat ania’  ka ti leh halh. A hmui a pet a,a inngaihtuah nasa hmel viau bawk.

‘Engvangin nge keimah min beih tlat ang le?’ ka ti leh halh.

‘I hre lo maw?” a ti deuh ha.

‘Eng maw? Enge ka hriat ang? Hriatpuia leh a u buainaah keimah zawk min bei ta se enge hlawkna an neih ang?” ka ti leh a.

‘A reuh lutuk,Hriatpuia hi ka hriat ve chinah mipa diktak,Strong bawk si a ni a.Mahse, mihring anih ve tlat avangin Chak lohna pakhat a nei ve ngei ang.Chu chu nangmah hi…’ a nui a, kei erawh ka nuih a za ve lo. Min hmangaiha,mahse achak lohna ka ni tih ka lo hre lo..

‘Ka nu a lo kal a’ ka ti leh halh. A mengphawk vak thung.

‘Maw? Enge a lo tih a?” a ti nghal hliai.Ani tluka ka nu nena kan boruak hre chiang an awm lo.

‘Nimin tlaia ka buai lai khan Hriatpuia’n a lo calla” a ti leh a.

‘Anih chu mawle…’ a ti fan raih ringawt. Kan sawi zui ta lo,han sawizui viau chakna pawh ka nei lo hrim hrim bawk.

Remruata a lo thlenga,a lo thlen hnu lawkah Hriatpuia leh Ramsanga an lo thleng veleha,Sammy-a a hnuhnung berah a lo thleng ve thung. Machhuani hnena engkim ka hrilh vang kha nge ka hre lo,ka mood a danglam ta deuh dawrh thung. Midang bula awm chak lo leh zawi ngawih ngawih kha ka awm thei ta viau. Remruata ka en apiangin ka rilrua zawhna awm angai reng. Machhuani ka en a,Remruata ka en leha,hrethiam niawm takin a bu nghat.Nia,ka ngaihdan ang chiah tho ngaihdan a nei ve miau alawm. .

Engkima ka rin leh ka pan ber a ni a. Ka thianpa aiin unaupa angin ka en zawk. Min bum ka la hre hek lo,mahse ka ko tih sawia a lo kal ni khan ka ngaihtuah let viau pawhin ka call ka hre lo tlat. A hunlai khan ka mumal loh em avangin ka ngaihtuah zui lova,mahse ka theihnghilh anga min rintir tam zawk hi phuahchawp ni a ka hriat tlat tawh avangin kha thil thleng kha ka ringhlel lo thei tawh lo.

Chaw kan eikham hnu lawkah Remruata leh Machhuani an hawa,Sammy-a amahin a haw ve bawk. Hriatpuia leh Ramsanga erawh thil pawimawh tihtur an neih avangin Living Roomah an thu duna,hna chungchang an sawi dun mawlh mawlh.

Roomah ka chho a,ka lut deuh chiah tihin Hriatpuia nuin min rawn biaa.Ka dam that leh that loh min rawn zawt chul.Ka awmdan hi eng mah an hre lo tih ka hria. Ka nu pawh khan lohtheihlohna vanga hria chauh a ni bawk a.’Mama ka be thei miah loa,ka be duh mang e’ a ti a.

‘Ka zuk pe lawk ang’ ka ti a. Room atangin ka chhuaka, Hriatpuia ka pe a ‘Ka nu..’ ka ti sap. A laa,a tho nghal vut.Ka kalsan a,room lam pan leh loin Kitchen lamah ka lut phei ta zawk. Fridge ka hawnga, tui bottle ka lachhuaka,ka khar leh a.Mahse, fridge kawngkhar phena Ramsanga lo ding reng ka hmuh rualin ka phu ngheka,ka tui bottle ken ka thlauh nghal pawp bawk.

‘Sorry..Sorry’ inthiam lo hmel zetin a ti a. Ka tui Bottle thlauh a chhara,min rawn pe a.

‘Ka lo kal tih i hria emaw ka tia lawm..’ a ti a, inthiam lo hmel a pu a. Za lo zetin ka nui sak.

‘A pawi lo..Inla rei hmel si,ka mutsan dawn che u ania’ ka ti a.

‘Nia,rei deuh maithei..Zama’n thil a tibuai kual deuha’ a ti liam puat. Ka bu leh nghauha,ka kalsana. Hriatpuia pawn atangin a rawn lut ve chiaha,ka phone min rawn pe a.

‘Ka mutsan mai dawn che u sin’ ka ti a.

‘Um,lo mu rawh..Lawk,ka lo chho ve ang’ a ti leh lawi. Angaihna hre lo zetin ka en a.Ramsanga a rawn kal pheia.

‘Lo thu lawk,Roomah ka han chho lawk ang’ Hriatpuia’n a ti zangkhai vuh.

Roomah kan inzui luta. A bag a hawnga, Damdawi bur a rawn phawrhchhuaka.Ka kutah a rawn hmehbela.Ka kut a vuana,amah si chetin min pawt hnai zui nghal zat.Kuah let ve loin ka din ngaiin ka ding khawng lah thung.

‘Tlaiah khan i Dcotor hmu turin ka chhuaka,Damdawi hi ei turin a ti che a. Chuan,naktukah kan hmu leh dawn nia’ a ti sup.

‘Eng damdawi nge?” ka ti sap.

‘I taksa chak lo tan khan ania. Mut i harsat a,thil i ei mumal lo bawka’ a ti leh a. Ka chhip samah a fawp zui leh vang vang.

A kal hnuah Damdawi bur ka en vang vanga, mum khat ka lachhuaka,ka ei a. Ka mu ta than. Machhuani nen whatsappah kan inbiaa,mahse mutchhuak lutukin min rawn zema. Hriatpuia lo mut lai pawh hre lo leh mumang bo thak khawpin ka mu a. Ka harh leh meuh chuan khua a lo eng vek tawh.

Hriatpuia nena Doctor hmu tura tlai lama kal tum kan ni a, mahse amah zawkin chawei paha lo kal a tum tih Hriatpuia a rawn hrilh a. Kalchhuah ka chak lem lo bawk nen ka thaw deuh huai thei.

A lo thlen laiin Hriatpuia a  inbual meka,keimahin Living Roomah ka lo awma,a Motor lo tlan lut thawm ka hriat veleh ka dinga, kawngkhar ka hawng nghal a,Motor atangin a lo chhuk a,’Enge i an a?” min rawn ti nghala, ngainatawm takin a nui vur vur bawk.

‘Ka tha e..Lo lut rawh’ ka ti a. A luhna turin ka tawlhsawna,min rawn kal pela. Thutthlengah a bag a daha.Thu loin min rawn en a.

‘Vawikhat ka lo kal tawha,peng in ang a lo awm bawk nen ka bo teuh viau maia’ a ti a. A nui leh vur vur.

‘Toilet a kal ka mamawh riau mai’ amah bawkin a ti leha.

‘He lamah hian’ ka ti a. Toilet lam ka pana. Vawikhat a lo kal tawh chuan a awmna lam chu a hre mahna,mahse ka hruai ta tho. Min zui ve mai bawk.A luh veleh Living room lamah ka let leha. Living room ka lut chiah tihin Phone ri a awma. Ka phone a ni lo. A tawp leh mai ka rin laiin a ri ta reng.

Phone ri a tawpa,a rawn ri leh a. A lo chhuak mai dawn emaw ka tih laiin a lo chhuak ta mai bawk si lo.Pawimawh a lo nih takin tiin a bag atangin Phone ka lachhuaka,R-a tiin a save a. Doctor a ni a, thil hmanhmawhthlak pawh a lo ni thei..Ka pick a,mahse Hello pawh ka tih hmain min rawn tawngkhalh nghal zat.

‘I thlen hunah fimkhur ang che. Mami khan a hriatna eng mah a hloh lo tih hre reng la.Damdawi kha a Dose let 3 pe ang che.A at hma poh leh Hriatpuia kawng a ping hma animai.Thah erawh a hmanhmawhthlak loh’ Ramsanga awin a rawn ti a. Ka thisen kal lai a chawl thuap thei.Hriatpuia Best,engkima a rin leh keipawhin ka rin em em kha a ni a, enge thleng ta hi?!!

‘Boss..Ka sawi i hre thei em?” a rawn ti leh a, ka beng bul atangin ka lathlaa,ka Off nghal hmak.

‘Enge ilo tih a?” ka hnung lam atangin a rawn ti a, ka inher zawk. Eng mah ka sawi thei lo..Ka ngaihtuahna a nu buta,ka thisen kal vel chawl thuap kha a rawn pangngai a,luan pangngaia luang loin chak lutukin a luang nimaiin ka hria.

Eng mah sawi loin ka zuan nghal pawpa,a samah ka thama,a darah ka seh nghal chat. A rak tuar a,min nemsawn a tum a. Mahse, ka thlah duh lo.

‘Mate,enge thleng?” Hriatpuia’n min rawn ti a,hla tak atanga ri ang maiin ka hriatna a tawi tup.Min pawmsawn a tuma,mahse ka chelh lai ka thlah duh lo. Hneh zetin ka kawngah a rawn vuana,min pawhsawn a tum leha,Doctor che buan buan chu vuan reng thei loin ka thlah ta nge nge.Ka thlah rualin a tlansawna, tihnat leh tumin ka ban a,ka ke ka leng kual vak vak bawk. A rawn pheia,a kutah Syringe a kenga, min rawn hnaiha,ka thle sawn vak. Mahse, Hriatpuia’n min vuan bet hneh lutuk tlat. Ka nghawng a thip zawka,ka zawi nghal hnawk..

‘Mi a anih hi,a buai dan hi a nasa tawh lutuk..Amaha khung hran angai’ a tih chu chiang lo ruaiin ka hre theia.

‘KA A LO…’ ka ti sep. Ka aw a ri chhuak em ka hre tawh lo..