ANNEM - 1

                        ANNEM

                       Maengi Ralte

Chapter- 1

‘Rawn hawng teh’ ka inbual laklawh laiin ka nuin a rawn ti a, sawi mai duhtawk loin a rawn chum zui leh nghal dawt dawt.

‘Ka zo tep,enge?” ka ti let ve thung. Ka inbual tih a hre renga,ninawm thei lutuk.

‘A va mak,hmanhmawh rawh. I u a Accident ania’ a rawn ti leh vak. Ka sam ka tuai laklawh lai ka tawp chawt. Ka ding mara,ka mit athip loh nan ka mit ka kut hnunglamin ka nuai hul a.

‘Maw?” ka ti let nghal vak. Mahse, chhanna engmah a awm lo. Ka lu ka tleuh thuaka,ka inhru hul sawk sawka. Ka chhuak nghal vat,mahse ka nu a lo awm tawh lo. Bathrobe nen ka chhuaka,inhnuai panna stepah ka tlan thlaa. Common Room Sofa chunga ka nuin ka u hmaia thisen kai a lo hrufai mawlh mawlh ka hmuh rualin ka ding nghal chawt. Ka thaw nghal halh bawk.

Ka nuin min rawn en zawka,ka u lam a hawi lehnghal mai. Che sawn loin ka dinna ngaiah ka dinga,ka nuin ka u a buaipui vel chu ngaipawimawh lo zet leh puih pawh tum loin ka thlir satliah ringawt.

‘Zonunmawii han mak zia hi chu,khatah khan enge i din ngawt? Tui rawn la rawh,tun ang hunah pawh tangkai reng reng lo ziah mai’ ka nuin  bak zetin min rawn en chungin a ti hlawk hlawk.Ka thle baka,kal mai loin ka u ka en a, ngei hmel zetin min rawn melh raw. Min melh dan chu ka tan thil thar ni mawlh hek lo,eng huahmah ka ngai chuang lo.

‘Ala ding ka ti,Dingi,tui min rawn pe teh.Vatin…’ dawhthei lo em emin ka nuin a ti leh a. Dingi hi kan bula khawsa,zing lama class kal thin a ni a. Ka nu hian a vin phar nileng thin a nimai.

Ngawirengin tui la turin Choka lam ka pana,Dingi tui nen a rawn pheia,ka laksaka.Ka nuih lui var var,a Piin a vin phar nasa leh tawh tih hriat takin a thlan leh hlap tawh. Tui nen ka let pheia,ka nu ka pe a. Kalsawn loin ka dinga,ka u en loin ka nu  ka en a, a fapa rangkachak a lo accident palh leh hlauha,nidang ang bawkin a thi dawn emaw tih mai turin a hmaia pem tereuhte avangin a phili leh chung tawh. Ka nek nawk mai. Nu Over ve tak hi chu a ni chiang alawm.

‘Enge thildang la ngai?” ka ti a.

‘Engmah,kalsawn rawh. I tangkai lo thei lutuk hi engtia han tih chi nge maw inih ni?’ ka nuin a ti zui leh chiam .Chhan enah pawh ka en lo,min hauh loh ni a nei khat lutuka,ngaiah ka nei tawh. Ka u ka melh leh zawka,ka nuin a hmai pem lai a hruk zawngin tlaw em emin a ner nung. Pawn lamah a inlak pa theih theih nen,Zawhte serh tiat pawh ni lo pem a neia,thi a chhuah vang maiin na tiin a tap lo chauh chu ania..

Dressing table hmaah ka thu a, Lotion ka inhnawih mawlh mawlha. Ka inhnawih zawh veleh ka sam ka chhem ro leha,ka sam hi a chhah lutuk avangin tlai lama ka inbual chuan chhemro mai ka duh ziah. Hritlang ka kai awlsam lutuk vang a ni pakhat bawk…

Darthlalanga ka hmel lang chu ngun takin ka en a,ka hmai a tung lam mah mah a,ka mitmeng lian lam chu ka hmai nen a inrem lo.Ka sam bu chhah zet chu thuhran,ala kir deuh zui.Mahse, ka best friend in a awt ve tlat. Ka hmeltha em em lo va, ka hmelchhe chuang pawn ka hre lo. Ka vun ngo leh nung sar reng bak chu han chhuan viau tur ka neih pawh ka hre lo. Ka lian lem lo viau lehzel bawk nen.

Ka pa hi Hmeichhe lam Doctor a ni a,ka nu erawh kan upa ber a pai veleh a lo thawh ve thin Zirtirtu hna bansanin in lam a enkawl ta chawt..Kan in bul chiah hi ka Pate inpui a ni a. Ka patea te chhungkua bakah ka Pi leh pu an awma,ka Patea te hian Fanu pathum an neia,ka pu eizawnna, Hardware dawr changtlung pangngai tak ka Patean a enkawl zuia, Ka nutei hi Social Welfareah a thawk thung.

Unau pathum zinga naupang ber ka ni a, kan upa ber hi Thisen Cancerin a boral tawh,amah kha hmeichhe nunnem leh nu zem mai a ni a, tupawn an duat leh ngainat rawn a ni a.Abik takin ka pa bakah ka pi leh puin an duat lehzual. A boral pawh ka nu aiin ka pain a tuar zawk daih. Kan milai mipa a ni a, amah chauh mipa anih vang nge ka hre lo. Ka nu tan chuan fapa niloin Khawvela thil hlu ber,engmah tisual thei lo a ni. Ka pa erawh chuan chuti chiamin a duat hran lo va. Kei hi ka u hmeichhia nen kan hmel tih loh chu a in ang lo fai vek. Ka nu lem lo va,mahse ka pa chuang lo. Ka naupanlai atangin ka luhlul a,ka Pain min thin zawi nawk chang a nei zauh zauh.

Ka nu hian min duat ve hluak loh vangin min tiduhdah tihna erawh a ni lo,tihsual in ang rau rauah ka u te pahnih aiin ka tihsual a nasa bik zel ti ila a dik ang. Ka pa lahin kan upa ber a duat em em a, ngaihsak hlawh ve lo,mi chuang niin ka inhre fo. Ka u te ang thoin lehkha ka thiam theia,mahse ka u te result tha tak an hmuh a an lawmna ang kha keima chungah a thleng ve ngai lo. ‘A tha,tang lehzual rawh’ tih zawng ka hlawh thin. Ka u Boral hnuah keimah chauh hmeichhia ka nih tawh avangin an danglam deuh ka ringa,mahse ka ringsual der. Tunah chuan  ka nu leh pa duatna dawn tumna ka nei tawh lo. Mahni inbuaipui nasa leh luhlul ngang ka ni bawka,ka lehkhazirna kawngah pawh ka Pain Doctor zir thei tura tan la turin min duh tih sawi mah se ka hnial fithla thak.

M.com ka zawh hnuah Aizawla inkhuar,Company pakhatah ka luta,ka mamawh ka intum theia,ka hlawh an mamawh lova,keimah ka inbuaipui theih chuan an duhtawk tih ka hriaa. Inchhungah tangkai viau tumna ka nei lem lo. Kohhran ka bel chiam lova, Sunday chawhma ka inkhawm bak ka inkhawm ngai mang lo, Ka nu leh ka pa pawn an bel tehchiam chuang lo. Mahse, ka pa hi midang tanpui peih em em a ni a, a damlo enkawl zinga harsa deuhte a ngaihtuah peiha.Kan vengchhunga mi harsa zawk tanpui leh kohhrana thawhlawm chi hrang hrang thawh a ngai pawimawh em em thung.Kan chhungkua kan inhau buai ngai lo va,kan nitin nun danah harsatna em em kan nei ngai lo. Hei hi kan chhungkaw nun chu a ni.

‘Zanin chu aw..’ ka dawhkan hmaa rawn din pahin kan thawhpui zinga mi,nula cher leh ria thel thawl,kawm nuam em em Thantei’n a rawn ti a.

‘Nia, thle chiam ila nimai ’ ka ti let ve vat. Kan Boss nupui Piancham lawmna Party kan Bossin a siamsak dawna.Thla kalta lawka innei niin tun hi Mizoram a lo kal hmasak berna a ni bawk.

‘Lutuk che hian,I inhmeh lo aw’ a nui hak hak.

‘Enge? Ka inhmeh lohna bik a awm lo’ ka nui ve a. Ka mizia hi harhvang leh nui duh tak ka ni a, mahni inveng thei tawk tura fitness ngaipawimawh leh Mipa ngaihsak tehchiam lo ka ni lehzel bawk. Ka hnung lamah fiamthu titak deuha Lesbian min ti an awm thin,ka nil loh miau avangin ka ngaipawimawh chiam lo thung. Hetiang mizia hi nei mah ila Party leh lam hlimna lampang hi nuam ka tih zawng a ni lo va.Chu chu Thantei hian chiang takin a hria.

Hna ka thawh mawlh mawlh laiin ka nuin min rawn calla,ka laklawh lutuk avangin ka pick lo.Mahse, a rawn ti nawn lehnghal zat.

‘Aw…’ ka ti mawl tawp.

‘Lo haw rawh,tunah’ a rawn au a ni ber.

‘Eng maw? Tinge a?” ka ti a. Thil eng engmaw hleka phili vak chi a ni a, Mama  chungchang anih phei chuan ho teah pawh a phili Over thin a, ngaiah ka nei tawh.

‘I pa…’ ka tum loh lam a ni.

‘Maw? Enge ka pa chu?”

‘Lo haw rawh,tunah….’ A tap zui a..Ka awmdan a danglam nghal vek. Ka nu hi mi Phili buai chi chu a ni meuh mai,mahse ka u Boral tum bak kha a tah ka la hre tlat lo.

‘Anun,I Patea ka nia..Lo haw thuai teh’ Ka Patea awin a rawn tita thung.

‘Pate,enge thil awmzia?” ka hrawk ro lutuk tihhnawn tumin chil ka lem a.

‘I pa hi a tha vak lo a, engpawhnise hlauthawng lo la,lo haw phawt mai rawh’ a rawn ti dam leh thluam.

Ka thil khawih laklawh lai pawh close loin ka thawhsan tawp,Boss Roomah ka tlan luta, In lamah thil thleng a awm thu leh haw ka mamawh tih ka hrilha.Eng mah min zawt buai loin min kal tir nghal hmak. Nia,ka hmelah zawhna zawh chi ka ni lo tih alang reng ang chu.

In ka thlenin mi an lo awm luai luaia,ka hamhaih lutuk. Ka nu te room lam panin ka tlan rawk rawka,ka hnungah ka Patea fanuin min zui ve bawk. Kawngkhar ka nek hawng rawka,mahse tumah an lo awm lo.

‘Khawiah nge? Tu mah an awm lo’ ka Patea fanu en chungin ka ti a.

‘Ih..Ih, ka …Eng lo’ awmze nei miah loin a ti a. Ka thaw vak.

Kawngkhar lam pan tumin ka inhera,Ka Pi a rawn lut ve chiah,min rawn kuah nghal thlawp. ‘Bawihte, ipa a awm ta lo’ a tap zui rawih rawiha. Ka hre sual miah lo tih ka Pi awmdanah chuan ka chiang lutuk. Ka Patea fanu hmai hup chunga tap te,room pawn lama thawm awm nuai nuai te chuan Ka pi thusawi dik zia an nemnghet vel vek.

‘Ti nge? Khawiah nge a kal a?” mak khawpa pangngaiin ka ti chhuak sap. Mittui nen ka piin min rawn en a.

‘Stroke a ni.Aw, a va pawi em’ a ti leh a. Muangchangin ka tawlh leta, khumah ka thu thla hnawk,tah nachang ka hre lo. Tukinah hna ka kal dawnin ka nu nen thingpui hang an in duna, engmah that lohna a nei lo. Nidang ang bawkin an titi anih kha.

Engkim a thleng vut vuta, chiang taka hriat erawh ka nei meuh lo. Ka vai ruaia,ka nu lah a laktlak hlawl lo. Ka Patea a puitling em zawka,kawng engkimah kan mawi hram hram ti ila a dik ang. Min duatin min ti hliau hliau ngai lo a, ka u a duat chanve pawhin min duat ngai lo.Mahse, mi pa ni loin ka pa a ni a. Ka tuar dan hi sawi maia fiah chi a ni lo. Doctor thiam leh lar pangngai tak a ni a, Pa inuluk leh chengvawng tak,taksa hriselna ngaipawimawh em em mai a ni a. Bp sang leh Sugar tih vel a nei hek lo. Mahse, thihna hian tumah a kal pel ngai lo va, kan thihchhan tur lah kan duhthlan theih a ni hek lo.

‘Nu,vawiin chu hna ka va kal dawn mawni ka tia’ chawei laiin ka ti a. Ka Pa Boral atangin karkhat leh nikhat chiah a ni a. Ka Pa boral hnu a kan chhungkuaa dawhkan kila chaw kan ei leh hmasak ber a ni bawk.

‘Kal rawh,karkhat a liam tawha. Chawlh reng pawh a tha lo’ pangngai takin a ti ve mai. Mumal nei lo tawpa a khawsa kha tunah chuan a pangngai leh ta viaua.Mama pawh fapa awmchhun leh ka Pa ai awhtu tur a nita bawka,mak khawpin a inthlakdanglam vek.

Ka pa Boral atangin thla thum lai a liam ta reng. Ka ngaihtuahnaah erawh chuan nimin ang maiin ala ngairenga.Hna ka thawh mawlh mawlh lai pawhin ka mittui a rawn tla leh mai thin. Na ka ti em em a, vawikhatmah ka buaipui  loh leh enkawl hlawh miah lo va a kal hi ka la hrethiam hleithei lo. A hmun ruak a zau lutuka,tumah hian an hnawhkhat leh thei tawh dawn hek lo.Mahse, kan chhungkuaah thil thar a thleng ve tih erawh ka haider thei lo. Ka pa sum lo awmsa hmangin Mama’n sumdawnna a kalpui a. Ka pa damlaia tihbik nei lo va tikual dum,eng mah tirei peih si lo kha ni tawh loin,theihtawpin sumdawnna a beia. A rilru zawng zawng a pe bawka,ngaihtuah lem nei lo va nuam tih ang anga a teihawi thin kha a bansan chiang takzet. Thil lawmawm lo em em kan chhungkaw zinga lo thleng hian thil tha pakhat chu a thlen tel a.Ka pa,a damlaia midang te enkawl leh mi harsa zawk pui peih em em khan a thih hnuah pawh malsawmna tho min lo la hnutchhiah cheu tih ka ngaihtuah thin.

Hna lamah closing kan neih lai anih avangin Officeah chaw kan ei nghala,in ka thlen meuh chuan dar 11 a ri thuak tawh. Chau zetin inchhungah ka luta, ka nu leh Mama inhmatawnin an lo thu duna,ka lut thawm hriain min rawn en vat. Ka ngaihbel nge ka hre lo,an hmel a dik lo tlatin ka hria.

‘In la mu dawn na nge?” satliah takin ka ti a. Min chhan let pawh nghak chuang loin Choka lam ka pan zui nghal mai. Fridge atangin tui ka lachhuaka,ka in nghal khawlh khawlha,Living room lamah ka phei leha,ka nuin a room a lo pan ve mek. Ka u pawh be leh chuang loin Room lam ka panchho nghala,ka room ka thlen veleh ka inhlip nghal sawk sawka,ka intleuh zuaia.Khumah ka bawkthlawpa,hriat zui ka nei lo.

Ka Phone riin min tiharha,peih lo zetin ka bana.Min rawn calltu ka en a, ka Best, Lawmi a lo ni a. Ka rum hak mai.

‘Enge?” mutchhuak aw zetin ka ti a, ka ham zui nghal bai bai bawk.

‘I la tho nange? Em em che hian..’ a rawn ti awt awt,ka then nak mai. Ani tluk tho thei lo nula hi an vang ngawt ang. A duhthusamah chuan zan hnih tal inzawm se tih kha a ni hial ania!!

‘Lutuk che hian…Engvangin nge tunah min rawn call a? ka mut ala chhuah tehreng nen’ ka ti hlak.

‘Sorry, Darling..Zanin inbang hma thei dawn em?” inthiam lo tak tak miah lo hian a rawn ti leh a. Ka ngei hlur thung. Zawhna ho leh lutuk zawt tura zing hma tawka rawn call reng reng maia.

‘I sawi ho sia maw..’ ka ti hmak.

‘Ho lo em maia,Zohmingthangi te hi,zaninah i ban hma chuan va kal ve ang tih ka tum alawm.I ban hma dawn loh chuan keipawh zan lamah Prog dang ka lo siam ve duha’ a rawn ti let hlar mai.Zohmingthangi hi kan thianho zing ami a ni a, ani lo hi Rasky ala awm bawk. Zohmingthangi nu hi thin tha lo a ni a, phai lamah an kalpuia, a lo nasat tawh avangin beidawngin an lo hawtir leh tawp.Chhung leh khat leh thenawm hnai ten an menpui thina,ka hna lamah ka buai avangin ka la lang ve hman ta lo.

‘Hey,ila ngaithla em? ‘Lawmi’n a rawn ti vau vau.

‘Aw,aw,ngaithla..’

‘Anih chuan i bang hma dawm em? ‘

‘Ka la hre lo,closing lai hi chu i hriat kha’ ka ti sap.

‘Ok,anih chuan zanin chu kal lo phawt mai ang. Mahse, ila lang ve miah si lo a.A thih hman vaih chuan a pawi ang aw’ a ti leha. Chhang loin ka hnar ka tum dat ringawt.

Tho chhuak mai loin ka mut ngaiin ka mu deuh vang vang. Ka pa ka ngaihtuah chhuak nghal zat bawk. Zohmingthangi te vanneihzia ka ngaihtuaha,anni chuan tha thei ang bera annu enkawlna hun an nei theia,ka awt lo thei lo. Ka inlet thaka,ka khum bul Cabinet chunga ka Pa thlalak ka hun chu ka en a, a boral atangin thla 9 a liam ta. Mahse, ala rei lo em em in ka hre tlat tho. Ka hna ka ban te hian Living roomah Tv en paha a duh em em thingpui hang in chunga a lo thut ka la ring thut thina,a awm ve ta lo hi ngaiah ka la nei thei hlawl lo.

Ka nuin eirawng a lo bawla,kan naupan lai atangin awmpui kan nei ngai lo. Kan naupan zual lai,kan buai em em lai pawhin ka pain awmpui la maiturin a ti thina, ka nu zah zawng tak a ni tlat. Kan neih ve ber pawh lehkhazir emaw puanthui zir,an zirna kan tumsak zawk anni thin.Ka nu hian engkim a ti vek zela. Nu taima tak anih avangin awm mai mai a ngaithei lo. Tuna kan chenpui mek,Dingi pawh hi ka pa te chhung hla deuh tawh,tlema khawsak harsa ve deuh anni a. Zingah Openah a kala,chhun lamah erawh ka nu a pui a,ka nu hian a kawk kual nileng a ni deuh ber. A hau bawrh bawrha,mahse mi hnung lama sawizui hi ka nu tihdan a ni ngai lo. Dingi pawh hi a hauh nasat thin tehlul nen hian mak takin kan chhungkaw zingah ka nu a ngaina ber tlat tho.

‘Zanin itlai leh dawn em?” min rawn en pahin a ti a. A chawhmeh chan lai a chan zawm mawlh mawlh.

‘Ka hre lo,tlai maithei’ ka ti satliah. Tui lum intur ka thlia,sertui tlem ka pawlh nghal bawk. Kum 3 vel lai chu zingah thingpui in loin tuilum leh sertui chawhpawlh hi ka in taa,atir lama tui lo ka tih nen tunah chuan a tui lohna pawh ka hre tawh lo.

Eng eng emaw a sawi zawm teuh,a sawi tamber chu ka u Dawr thar tur chungchang a ni a,ka hriat hnu vek anih avangin a sawi leh tur pawh ka lo rinhriat thei titih. Nia,a fapa hi a inthlakdanglam nasa tawha,a chhuan sa nak laiin a chhuang zual a. A titi tui ber a ni tlat.

Office ka thlen hnu lawkah Boss a lo thlenga, chhunchawlh hun hma chuan vawikhatmah ka Chair ka thawhsan leh ta pek lo.

Thantei nen thilei turin kan chhuaka,nidang anga muangmara ei chi anih loh avangin kan thil chah lo thlen veleh inbe mang loin kan ei dun nghal mial mial. Officeah kan let leha,ka thutna leh kan Boss thutna room hi a inhnaih ber a. Kal pahin Boss room lam ka thleka,inleng a nei mek tih ka hre thei mai.

Hna ka khawih leh mawlh mawlh laiin Bossin min rawn ko a,ka tho nghal vat. Kawngkhar a inhawng saa,ka lut a,kawngkhar hnungchhawn zawngin a inleng a thu a, ka lut thawm hriain a rawn hawi nghal vut. Ka melh zawka, ka hriat mi a ni lo. Boss lam ka ensan lehnghal mai.

‘Guwahati ah naktukah ka kal angai thuta,Closing laklawh lai nimahse khulamin min ko a.Hei hi ilo khawih fel hmasa lawk thei em?” tih pahin dawhkanah Electric Bill niawm tak a rawn dahchhuaka. Ka ban nghal vat. Ka en thuaka, Account tamtak zinga pawimawhber a ni tih ka hrethiam nghal mai.

‘Ka lo ti dawn nia. Dar engzatah nge i mamawh ang?”

‘Tlai dar 6 hmaa i zawh theih chuan ka lawm viau ang’ min tlawn tih hriat takin a nui a. Ka bu nghat,ka nui lui leh saka. Diktak chuan ka ngei hlur zawk.He thil kher kher hi chu ama khawihtur liau liau a ni a, mahse thlatin keimah hlirin ka khawiha,hna hi a thiam lo lutuk ti dawn ila hetiang Company liana Boss nitur chuan a thiam lutuk ang tih achiang si. Mahse, amah hnaih bertu ka nih angin a hnathawh dan ka hre chiang bera, a sulhnu pawr lutuk chhui hi a rapthlak thei takzet.

Ka thutnaah ka thu fel chauh tihin Boss leh a inleng an rawn inzui chhuaka,ka en lem lo. A hna min pek hi chawl miah lo va ka khawih char char anih loh chuan keima hna chanpual bik hi tlaivar pawn thawk ila ka zo kher lo vang.

Chawl miah loin ka thawk nghal char chara,ka zawh veleh Sana ka en a. Dar ruk rik nan minute 2 bak a awm tawh lo. Zawi zetin ka thu a, ka tang nasa bawk ania,ka hahdam rualin ka chau hnawk thei.

‘Haw hma mai rawh,Closing kha chu ka lo let veleh kan tan leh mai dawn nia’ a haw dawnin a ti a.Lawm zetin ka bu nghat mai.

Ka nu leh Dingi nen kan pathumin chaw kan ei a, ka u erawh a bungraw chah ho a lo thlen dawn avangin a lo la haw lo thung.

‘Tu Phone nge ri chu? Nangma phone em ni?” Ka nuin min ti a. Ka kekawr ipte ka dapa,ka lo ak lo.

‘Living roomah ka dah daih,a pawi lo…Ka puar tep’ ka ti liam puat. Ka sawi zo deuh chiah tihin ka nu phone a rawn ri veleh nghal zat. Dinning Table chunga dah a ni bawka,a pick nghal vat.

 ‘Hello,aw …Ni e..Eng maw?” awmze nei lo zetin a ti nghal vak.

‘Ni lo…Ni lo…’ a phone a thlauh nghal bawl. A awmdan chuan min thawng deuh dawta, chet mai dantur ka hre lo.Mahse, rei erawh ka hamhaih lo.

Ka ding nghal vata,ka nu lam ka pan nghal rawk rawka,a Phone chhuata tla chu ka chhara, ka nu khur hlawk hlawk chunga rawn dinchhuah tum chu ka kuah a,Dingi’n a rawn kuah ve bawk.

‘Hello…’ ka ti a..Ka aw a khur dar dar mai.Diktak chuan ka Pa boral dan khan min thawng em em a,rik thut hi kan zo hlawl lo.

‘Anun,indawr a kanga,achhungah hian i u ala awm bawka…’ ka u thianpa, Malsawma’n a rawn ti a..Ka khawng nghal vek..

Ka nu mumal nei loa sahal chu ka en a, Dingi hnenah ka Patea ko turin ka ti a..Tha tak pawn engmah ka sawi thei lo.Ka au tuar tuar a ni ber..Rei loteah ka Patea te an rawn tlan luta, ka nutei leh ka Piin ka nu an buaipuia,ka Cousin in min kuah thung.

‘A tha leh vek ang,hlauthawng suh u’ ka Patea’n a ti a. Mahse, ka chhungrilah hian engmah a tha leh dawn lo tih ka chiang em em thung. Ka pa pawh kha hetiang bawk hian a kal tawha, tunah ka u…Tunah chuan ka nu nen chauh kan ni ta.

Tukverh bulah ka dinga, pawn lam hmu miah loin ka thlira,ka hmuh phak chin khawvel hi a chuai vek. Ka u kan vui liam atangin thla a kal leh tawha, mahse eng anga thla tam pawh ral mah se kei leh ka nu tan chuan kan chenna khawvel leh in hi aruak mai a ni. Kei chu zia tak ka la ni zawk,ka nu tan chuan kumkhat chhungin Pasal leh fapa neihchhun a sun ania..Biak tlak miah loh khawpa a talbuai kha ka dem lo va, engtikahmah ka dem ngai hek lo ang. Min hnem nana ‘mi chungah pawh a thleng ve tho a,keini chauh kan ni lo ania’ tih tawngkam hmangtu apiang kha ‘ ngawirengin thu ula min hnem zawk’ tih khum mai ka chak thin. Kan tawrhna min sawinep sak an tum niberin ka hre thin hial.

Muangchangin ka inhera, Room atangin ka chhuaka,tunah chuan inleng pawh kan nei ngai tawh lo. Kan inchhung a reh tlawk tlawk a. Ka nu,nu tawngduh leh ri lawng lawng reng pawh a thawm hriattur awm mang loin a hun tam zawk chu ka u Roomah leh an Roomah a hmang ta zawk.Ka u thiante kha a boral hnu khan an lo lang chamchi a, mahse tunah chuan thla hial a liam tawha,Mi buai tak tak vek annih ve avangin Malsawma lo kal zeuh bak chu an lo lang ngai ta lo, a khat tawkin ka pi leh pu bakah,ka Patea te an lo lut thin hlauh zawka.Chuti ni lo se chuan luahtu awm lo emaw tihmai tur a ni hial ang.

Tihmai tur hre loin ka ding ren rawna,ka hawi kuala.Ka pa lehkhabu dahna leh Office angreng deuh chuan ka mit ala ta chat. Ka pan phei nghala,kawngkhar ka nawr hawnga. Ka pa Boral hnuah ka luh lehna hmasakber a ni a. Tih em em tur a awm hran lo a, lehkhabu awm tlar thut lah chu ka chhiar deuh vek tawh bawk..Hmm,diktak chuan ka lut hreh lutuk tih hi haider lo mai ila ka hahdam zawk ang tih ka chiang.

Dawhkan lian vak lo leh Chair vir thei,ka pa thutna bik chu ka en a, ka mittui a hnai nghal kuar thei. Mahse, tah ka tum lo bur tawp. Dawhkan ka kal huala,Tim daiin Chairah ka thu thlaa,ka mit ka chhing nghal vang vang.

Ka Phone a rawnri thuta, ka phu vak..Ka kekawr ipte ka zena,ka lachhuaka. Ka u thianpa Malsawma a lo ni a..Eng chu ni maw?

‘Hello..’

‘Anun,I buai em?” zangkhai zetin a rawn ti a.

‘Aih, buai lo..Enge nita?”

‘Thil eng emawah biak duhna che ka neia.Mahse, vawiinah ni lo’

‘Eng chungchang nge? Tihian sawi mai la..’ ka ti a.

‘Aih, Phone a sawi ka duh lo’ a ti leh ta tlat. Engthil chu ni maw?

‘Ok..I lo kal theih chuan lo kal mai la’

‘Um,thei e..Ka lo thleng har lo vang,in vengah ka awm’ zangkhai tak bawkin a rawn ti leh lawi,vawiinah ni lo kha a ti zo chauh si...

‘A tha alawm’ ka ti sap.

Malsawma lo thlen laiin ka pi a lo awm ve a, thil sawi dun lawk tur kan neih thu sawiin inchung lamah ka chho a, kan inchung ber hi ka nu pangpar dahna leh inleng kawmna lian vak lo awmna a ni a. A zau viau lo nangin a nuam thawkhat..

‘Thingpui i duh em?” kan thut fel hnuah ka ti leh hnuhnawh.A chek tlaka,a mit a siai zauh. Ka u nen an inkawm nasa em em a, kan vengah an awm thina,mahse tunah chuan kan veng bul chiahah an insawn tawh thung. Pa lian lam,hmel pawh chhe lo tak a ni a. Ka u thianpa ber anih avangin u angin ka en ve mai.

‘Ka thilsawi tur hian a thawng deuh maithei che a’ thutak zetin a ti a. Ka bu nghauh ringawt.Thil rapthlak kan nunah inhnaih tak takin a thlenga, eng hi nge rapthlak leh chuang tur pawh ka hre lo ve.

A tawng zawm leh dawn emaw ka tih laiin a Jacket ipte a zena,Envelope a rawn phawrh chhuaka.Dawhkanah a rawn daha,che loin ka en mawl tawp.

‘I u khan a sumdawnnaah hmelma a nei a’ zawi tein a ti a,Ka ip chawih mai.

‘Eng? Hmelma maw? Ka hre thiam lo’ ka ti nawi nak.

‘Um,hmelma..A sumdawnna anga sumdawnna kalpuitu’

‘Tu nge chu chu?” ka aw khur thup hram hram ka duh. Ka u kha vanduai vang niloin thah a ni tih a sawi loh nan tawngtai mai ka duh rum rum.

‘Hei hi en la..’ tih pahin Dawhkana a envelope dah a lakanga. A chhung atangin thlalak niawm tak a rawn phawrha,min rawn pe a..Ka ban vat,ka rin ang ngeiin Mipa thlalak a lo ni a..Khawiah emaw ka hmu tawh tih ka hre nghal chat.

‘Tu nge anih?” ka ti chang fak.

‘ROSANGKIMA anih kha…’ a ti hul hak..

🦋🦋🦋🦋🦋🦋🦋🦋🦋🦋🦋

Note: Tan chawt phawt ila,Mahse Monday zan lam atangin Chapter 2 ka rawn dah tan ang aw..In ngaihnawm tihzawng a ni lo maitheia,inbeisei ang Story pawh a ni lo maithei ania.Ingaihzawnna leh a kaihhnawih hi ka hne deuh aniang,tharum thawhna lam ka rilruah a lang lian rih tlat a.

Chuan,kumkhat chhunga ka hun ngaipawimawh em em,Good Friday leh Easter Sunday anih dawn avangin ka chawl lailawk leh zawk ang.Abak chu keimah nena inhmeh lo khawpin regular ka tum ang🤣🤗