ANNEM - 10

Chapter- 10

 Chet lak mai dantur hre loin ka dinna ngaiah ka ding deuh ren rawna. Kaltir ka duhna leh awmrihse ka duhna a inchen reng bawk. Engvanga awm tura duh nge ka nih ka inhre lo,mahse kalturin ka duh lo tih ka chiang em em tawp.

‘Mambawih..’ Ka Patea’n kawngkhar rawn rik pahin a rawn ti a, ka phu leh vak. Zanin zet chu lung natna neisa lo ni ila chuan ka phu nasa thei lutuk hi ka damchhuak zo pawn ka ring lo.

Sangkima’n min rawn hnaih thuta,’khawiah nge i room?” zawi fiah zetin a ti sup. Ṭawng loin inchung lam ka kawk ringawt. Ka inrin hmain ka biang tawn tawnah a rawn vuana,min kuai daka.

‘Engmah tisuh,kei pawh tina tur che a lo kal ka ni lo ka tih kha’ a ti leh a. A rawn kun thuta,ka chalah a rawn fawp a. Min thlaha,thawm nei miah loin inchung panna Stepah a chho zui nghal daih.Thil thleng kha a rang lutuka,hnialna hun a awm lo hrim hrim.

‘Anun..’ ka Patea’n a rawn ti leh a. Rang zetin kawngkhar lam ka pana,mahse ka hawn hmain thawk ka la leh rih.

‘Ka lo hawng dawn e’ tih pahin Kawngkhar kalhna ka hawnga. Kawngkhar bulah Patea a lo dinga,a mengphelh deuh phung bawk.

‘Enge ni?” ka ti a, mutchhuah hmel zetin ka ham bai bai bawk.

‘I ṭha em?” a ti vut. A rawn luta, Light ka On belha..Inchhung a en kual nghal vut vut.

‘Ṭha e,tinge? Thil dik lo a awm em ni?” ka ti a. Inchungah a chho ang tih ka hlau zek zek.

‘Aw,aih..Awm lo ve,I Nutei’n Darthlalang keh ri niawm tak ka hria e atia.Chuvang mawle. Ka rawn phone che a, I chhang thei mang bawk si lova, ka ngaihtuah che a’ a ti leh duah. Ka Nutei pawhin a lo hre ve ngei anih chu a.

‘Library tukverh invaw ri kha a lo hre ve nih chu. A invaw riah ka harha,Khawiber nge ka hre si lo va,Tukverh ho ka check kuala,ka Phone ka kalsan daih alawm’ ka ti a, dawt ka sawi ngawt mai chuan ka awm a tinuam lo.Mahse, inchungah Sangkima ala awm miaua,dawt sawi mai loh chu tihtheih ka nei tlat lo a.

‘I khar tawh em ni? Keh te a awm em? “a ti leh a.

‘Khar tawh e,pakhat a keha,chu zawng chu nimai.Bar a awm vek tho a, naktukah thlakna tur ka chah ang che ka lo tia’ An dawr bulah Darthlalang zawrhna dawr a awm tih ka ngaihtuah chhuah rualin ka sawi zawm zat.

‘A ṭhat chu. Zingah kan en dawn nia.I nu pawh ka hrilh tawh tak asin le.A lo haw hunah Inhnuai lam Tukverh ho hi thlak vek tur’ a ti leh mawlh mawlh.Inchung lam zawng hi tukverh frame alluminium vek a ni a.Inhnuai erawh thing a ni thung.

‘I ngaihtuahawm lo ang maw?” a ti leh vut.

‘Aw,ngaihtuahawm loh e.Ka ṭha alawm’ nui chungin ka ti a. Min chhang loin a thlek kual leh duk duka,a ngaiṭha ta aniang. A bu nghuta, min mangṭha hnuah a chhuak zui nghala,ka thaw huai mai.

Kawngkhar ka kalha..Light ka off a, inchung lama chho loin ka awm ngaiin ka awm vang vang.Engthil nge maw ka tihhrep le? Ka hmelma lianber hum turin zaninah hian dawt ka sawi ta chu ania!!!

Ka Pa Library lam ka en a, ka pan phei nghal vat. Ka luta,Light ka on nghal bawk. Tukverh lo inkalh thlap leh Darthlalang pakhat lo keh ka hmuh chuan ka dawtsawi nen a inmil leh lutuka,ka nuichhuak hak mai. Ka tumdan takah chuan zingah ka tikeh chawp ang ka ti kha ania. Thil lawmawm lam ni lo mah se atthlak zeta ka chet nawn angaih loh avangin ka lawm tho mai.

Tukverh ka pan pheia,engtin nge a lo luh theih ka ngaihtuaha,Bar ka pawt a. A nghet vek bawk si. Bar lah thir inphan vek a ni a, Sangkima anga lian tan akara inrawlh tum chu Hriau benga luh tlang tum nen a in ang reng ang.Kei pawh ka lian lo teh nangin ka leng dawn lo hrim hrim.

Tim daiin ka Room kawngkhar ka hawnga, Khumah a bawkkhup zawngin a lo mu a.Ka ngaihtuah leta, kan inbiak lai khan ruih nei hmel a pu lo tih ka chiang. Mahse, kan Inah a lo kala,ka khumah a mu hi ka hmu thei reng chungin ka la ringhlel rum rum. A mu ta sa sa a,ka nu leh Dingi awm loh lai a ni bawka,a muhil thei anih phawt chuan muhil mai mai tehse. Ka nu Roomah ka riak mai ang chu.

Ka kal pheia, khum bulah ka dinga, a awmdanah chuan muhil a ang viau.’Sangkim..’ ka ti sap. Min chhang loin a mut ngaiin a mu a,a bawkkhup bakah banglam a hawi avangin a hmel ka hmu thei lo bawk.

Kalsawn mai ka tuma,mahse puan a sin loh avangin Dimtein ka sintira,a mutna sira ka Phone let bal chu ka bana,ka lachiah tihin ka banrekah a rawn man thut.Min phih nawka,bang kil lamah min nawr phei nawka,bang ka tauh dawt rualin ka ṭe chhuak nghal ṭhawt bawk.

‘Sorry…Enge maw ka tih le?” manganna niawm tak a awah a hriat theiha. Bang ka tauhna lai ka lu a na vang vang thei.

‘I ṭha em? Khawilai nge na?” a ti leh a. A hmelpa zet chu a lang dam thlup bawk.

‘Ka ṭha..’ ka tum aia bung mahin ka ti hlak. Khum aṭanga chhuk tumin khum mawng lamah ka tawlhthlaa,mahse a ṭawngri chuan min ti ding leh chawt.

‘Maw?” ka hawileta.

‘Hetah hian ibulah ka mu thei angem?” a ti nawn leha.

‘Aih..’ ka ti tawi tak.

‘Ka sawi tawh kha,I bulah hian ka hahdam ka tih kha..I hriatthiam ka ring’ a ti leh sup.

‘Ni lo…’ ka ti leh halh.

‘Khawngaihin…’

‘Eng harsatna nge i neih? ‘

‘Ka chaua, ngaihtuah nei miah lo va muhthilh vang vang ka mamawh’ ka zawhna achhang miah lo. Ṭawng leh tumin ka ang ziaua,mahse a hmela chau hmel ka hmuh takah chuan ka chip leh ta zawk.

Lukhamin ka inkam kanga, ṭhu mu deuhin ka awma, Sangkima thaw ri sak sak chu ka ngaithla kar. Thil thleng mek hi ngaihtuah loh hram hram tumin thildang dang ka ngaihtuah kuala,mahse awmzia a nei lo. Ka kawnga kuah chunga tui taka muhil hmel chu ka en a. A kut zungṭang sei thlurh chu ka kut zungṭang tereuhte karah a rawn rawlh luta,nghet zetin a hum bawk.Hepa hi mi danglam a ni tihbak ka ngaihtuah thei lo,midang tan chuan mi satliah pawh a ni thei,mahse ka tan chuan a danglam a ni..Ni e, a danglam.Ka u vanga phuba lak duhna kha inbeihna dang a chhuah zel avangin ka mimal thilah pawh a kangkai ta hiala,mahse intihnat hi kan tum tawn reng em? Tunah pawh hian ka u chungchang leh buaina min siamsak te,keiin tihchhiat tuma ka beihna te pawh engmah kan sawi ri lo ve ve a. Hmelma kan ni tih hrereng chungin ka bula hahdam tumin a lo kala,chu pawh zan laiah lehnghal,kei pawhin Hmelma tih hrereng chungin ka khumah ngei ka muthilh tir bawka. Atthlak em em mah se kan chhungrilah hian kan invengthawn tawn nimaiin ka hre tlat bawk!!

Door Bell riah ka harh zawk. Ka ṭhuchhuak nghala,keimah chauhin ka lo awm tawh. Sana ka en vata, dar 7 a pel hret. Englaiin nge a chhuah ka hre miah lo.Khawvar dawn thleng kha chuan ka la meng kha ania.Door Bell a rawn ri leh a. Ka chhuk vata,kawngkhar lam ka pana.Mahse, ka ngaihtuah naah thildang a lo lang zawka,ka tlan let leha; Bathroom ka hawnga,a lo ruak veka,Ka thaw huaia.

Ka pi a lo ding al tawh. Englaimaha tho tlai ngai lo leh zing ṭawngtai inkhawm kal ziah a ni a, Ṭawngtai a taima em em bawk.Ka pu erawh ka pa ang tho a ni a, Kohhran a bel tehchiam lo va, a sawisel ngai lo thung. Mi harsa zawk ṭanpui turin a inpeih renga,ṭanpui pawh a ṭanpui nasa ngiang mai.

‘I mu thei maw?” lo luh pahin a ti a.

‘Mu thei e.Biakin i kal tawh mi?” ka ti ve a.

‘Aw, ka lo haw a. I Pi Biaki te inah te ka lut kawia. I nu te chu an rawn be leh tawh che em?” a ti leh a.

‘Be rih lo.Nakin deuhah ka bia ang,Thingpui i induh em?”  

‘Duh tehreng e.Han lum teh,I nu khan Thingpuife tui kha ala nei em?” a ti leha.

‘Eng thingpuife tui maw? ‘ ka ti ha mai.

‘Aww,kan Mizo thingpuife mawle. Ka duh ber tih ila hre ve na nge? I nu in a hriatchian vei nen.Vai thingpuife tui an tih ve mai mai hian a tluk hleinem’ nui chungin a ti a.

‘Eeee,nitak..Pi,Thingpui hi enge a tuina?”

‘A tui animai.Han sawifiah pawh ka thiam lo e’ a ti awlsam then.Nui hawk hawk chungin Thingpui ka chhuan saka,englai pawha thingpui in peih reng mai a ni a, kan naupanlai atang tawhin an In luh veleh ‘Thingpui i duh em?” a lo tinghal ziaha. Thingpui induh vanga an in a luhin,ka pi a awm phawt chuan luhsual a awm ngai lo.

Ka Patea a rawn lut veleha,Darthlalang keh a va en a, a tehnghal bawka. Ka Nutei hi thinlung zawng zawngin pawh thei lo thin mah ila ka Patea hi chu englaimahin sawiselna tur ka hre ngai lo. Ka Pa awmloh hnuah phei chuan kawng engkimah pa chan achanga,min ngaihven em em reng a,chhungkaw thil pawimawh awm se ka pu nen engkim min rel felsak thina.Ka nu an dah lal thiam em em thung.

An in lama chawei mai turin ka Pi nen min ti a, mahse ka hnial thung. Ka pi leh Patea chhuah hnuah Ruatsak ka call nghala, Sangkima’n vawiin lamah enge a tih ka hre duh tlat.Nidangah chuan a chet vel dan tlangpui ka zawt mai ṭhina,mahse tunah chuan enge atiha,khawiah nge a awm ka hre duh vek.

‘Zingah ilo kal dawn maw ka lo tia’ Min hmuh veleh Ampuia’n nui chungin min lo ti vat.

‘Thawh ka hai..’ ka nui a.A nui huk huk.

‘A ṭha alawm,zinga kal loh pawhin tlaiah tal ilo kal a.I nu chu engtik nge alo haw dawn?” a tih zawma.

‘Ka la hre maithei lo. Vawiin lamah Doctor an hmu phawt anga’ ka ti a.

‘Riak tura min sawm ka lo ringa’ zawitein a ti a. A fiamthu a ni tih ka hre tho nangin ka melh vak.A nui leh hawk hawk.

‘I hlauh hmel sia(h)..Tleirawl pawh i nih tawh loh kha.Mahnia artalh pap pap ngam khawpa chal inih kha’ a ti leh a. Nula Senior tak tihtur ni lo mah ila naupangchhia erawh ka ni tawh lo.Ampuia lam ka hawia,lei ka chhuahkhum zauh.Ka ngaihtuah naah erawh nizana ka riahpui kha ka hre rauh rauh.Zingah khan a riak ve tih pawh hriat miah loh khawpin sulhnu a nei lo. Ka Phone a msg a lo awm tih mai loh chu..Nia,kha msg kha vawiin hian vawi engzat nge ka chhiar nawn tawh pawh ka hre seng lo.

Ka duhtawka ka chetkual hnuah ka chawl ta chauh. Ka thlanin min tihnawng chuapa, chau zetin bang nghengin chhuatah ka ṭhu sawpa.Gym chhunga awm ve ho ka melhkuala,a kil bera Mipa,Dumb-bell chawi mek chuan ka mit ala ta chat. Ka en nawn leha,a sir zawnga hmu ka nih avangin ka chiang ngam lo. A dumb-bell adaha,a rawn hawi a. A mitmeng khur thuk dek dawk leh hnar kawm van mai ka hmuhchian takah chuan ka thaw hak. Hetiang khawpa mihring hmel ka huat hi ka la hre ngai miah lo.

‘Sawlaia mi saw mi thar alaw?” Ampuia hnenah satliah thei ang berin ka ti a.

‘Tu ber maw?” a ti deuh hu. Sangkima nau awmna lamah ka thle zauha.A hawi nghal vut bawk.

‘Eee,saw saw maw? Mithar tih lemah nikum lamah a rawn kal reng tawha.Ilo kal hma khan,a ke ruh a tliaka,a chawl ta char chara,tunah a rawn zawm leh chiaha’ a ti  duah.

‘Anih chu mawle,ka la hmu ngai lo em a.Mi thar nihmiang ka lo ti maia’ ngaipawimawh lo hmel zetin ka ti leh a.

‘A thar chu animai ang chu.Eee,Sangkima nau anih saw’

‘Tu Sangkima maw?” ka ti liam puat.

‘Oooo,kan Rosangkima mawle aw. An in ang lo teh ngai ania’a ti leh a.

‘Anih hmel,an hmel pawh a in ang lem lo’ la hre ngai miah lo niawm takin ka ti leha.

‘Sangkima nu leh pain fa atana an lak ania. Mahse, an mizia chu chengdun reng annih vang aniang a in hlat vak lo’ ka rilru hre lo zetin a ti leh a.

‘Ka kal mai dawn mawni’ zik mar ar ar pahin ka tita daih.

‘Scooty i keng ami?” a ti a.

‘Um..Tinge?”

‘Ka Bike ka siamtira,min thlah kual la,sawlai deuhah sawn ania’ a ti a.

‘Ka phur peih lo che,hnung lam atangin ilo inrahkhalh ziaha,ka ning tlat’ nui chungin ka ti a.

‘Ka khalh mai ang chu.Sual thei reuh lutuk’ nui chung bawkin a ti veleha.

‘I let leh dawn nge? “ ka ti a. Ka Jacket ka ha pah a.

‘Aih,let tawh lo ang. An lo la siam zawh loh phei chuan nghah law law ka duha’ a ti a, Gymah hian Instructor angin awm mah se midang a chhawr tel tho a,nuam a tih em avang leh a tuichilh ber anih avang hian a awm ve chawta. Anihna takah chuan Timing neiin a chhawrte pathum hi an inkalchhawka, a kal hman loh pawhin buaina a awm tehchiam lo.

 In ka thleng a, inchhung ka la luh hma siin Ruatsaka’n min rawn call a.

‘Tunah hian a bialnu nen an awmdun meka,vawiin hi a bialnu piancham a ni a’ a rawn ti a.Ka inpetruh nghek.

‘Khawiah nge?” ka ti sap. An awm mekna hmun a rawn sawia.

‘Ok,a ṭhat chu. I tilawmawm lutuk aw’ ka ti a.

‘Lawmthusawi angai hleinem. Zan lamah ka en zui ala ngai em?” a rawn ti leh a.

‘Aih, vawiin atan chuan ngai lo e’

‘Anih chuan zanin chu ka Party chiam thei’ phur sarhin a rawn ti a. Ka nui hak mai. Hnaah chuan mi rintlak leh rilru fim lutuk a ni a, mahse hunawlah erawh chuan lu lam leh mawng lam hre lo khawpin a che nawi leh tlat lawi.

Ka inbuala,ka inbual zawhah Patea nen Darthlalang kan vuah leha. Ka nu nen kan inbe leh bawk. Eitur ka siam nangin ei chakna ka nei hlawl lo a, ka ei ta lo. Ka mood a off em em a, ka thinrim bawk.Mahse,ka thinrim chhan erawh awmze nei lo lutuk anih avangin ka theihnghilh a tha.Nia, nizanah ka bulah a rawn riah avangin ka bialpa a ni tihna a ni lo va, ka hmelma ala ni reng.A bialnu piancham lawma an chhuak chu keia lo huat tur leh thinrimpui tur a ni lul lo e. Mahse, ka inhrilh nawn nasat poh leh ka thinrim ting mai thung!! Eng chu nge maw ka hriat tak ni? Bialnu nghet nei leh ka Hmelma nisi hi ka lo ngaizawng ngawt thei lo tawp!! theihnghilh tumin chhuat ka nawt ta nghek. Tlem chuan ka zia ta deuh.

Zanah Malsawma a rawn kal a. Ampuia erawh a ṭhiante nen tihtur an neih avangin a lo kal lo thung. Diktak chuan amahah hian engmah danglamna ka nei lo leh lutuk hi ka inthlahrung ṭhin. A niin ngaihzawng ang chiahin min treata,mahse ka mitmei a hmuh loh miau avangin min khawih emaw min kiss pawh a tum ngai lo. Kuah erawh min kuah fo a, hei em em hi chu ka hnial bik lo. Sangkima’n ka ngaihtuahna a luah viau hma kha chuan mipa tak tak anga ka ngaih awmchhun kha a ni hial ṭhina,mahse Sangkima’n keimaha danglamna a thlen nen hi chuan khaikhin pawh ka tum buai peih lo law law.

‘Hey…’ ka hmai bulah Malsawma’n a kut a rawn vaia,ka phu deuh zawk.

‘Enge?”  lai huin ka ti a.

‘Engmah..I ngaihtuah muk veng veng em a”  a ti a. Chik zetin min en a,ka hmelah ka ngaihtuahna hriat a tum tih ka hai lo. Za miah lo mah se ka nui lui sak.

‘Ka ngaihtuah teuh mai..’ ka ti zangkhai vah.

‘Ka lo ngaihtuahpui ang che,han sawi la’ nui chungin a ti a, ka nui hak. Tun tum erawh tihluihna a tel lo.A sawi dan khan ka nuih a ti za lo thei lo.

‘Engtikah nge nupui i neih ang?” ka tichhuak thut. A then nghal suka,a mithmul a tisang zauh bawk.

‘Engtikah nge niang?” awlsam zetin a ti a.

‘Ka zawt reng che a,I hun ve tawh reng ania’ thutak zawkin ka ti leh a. Ka u nen khan an inrual a, kuminah hian kum 32 a tling tawh dawn. Kan inkarah kum 5 lai a tlaa, piang tawh lo tur piang ka nih thu fiamthuin an sawi thin. Ka u kha puitling lo chi anih avangin Ka pa damlai zawng kha chuan eizawnna kawng a ngaihtuah tak tak ngai lo va,thil a ti zula,tihrei peih a nei lo bawka.Malsawma erawh hi chu chutiang a ni ve lo. Ka u ang tho khan Party leh huau huau chu a lawm ve tho a.Mahse, a puitlinga, a Pa pawhin a ring em em a, hnathawh tur anei anih chuan thla khat aia tam mah Ramhnuaia buk sual chawp mai maiah pawh a awmbo vang vang thei tlat zel.

‘Nei tura min duh chuan ka nei anga nimai lawm’ a tih riin ka ngaihtuahna kual vel mek min tihtawpsak a.

‘Mo inla nei bawk si lova,I nu leh pa an khawngaihthlak ve alawm’ inti putling zetin ka ti leh ngial.

‘Adik alawm.Mahse, Tlangval rih ka la duh’ a ti leh a.

‘I va han thutak lo tak’ ka ti hmak.

‘Min nei mai dawn mi niang?” a ti thut. Hamhaih zetin ka ena,Lawmi ṭawngri ka bengah a rawn ri nawn nghal zat bawk.

‘I ti awihawm loh em mai’ nui lui chungin ka ti a.

‘Nupui nei turin min duh sia,neih mai tur an awm bawk si lo va,min neih duh chuan zawn chawp ka ngai dawn lo a’ nui chungin a ti a. Ka thaw hak. Tlangval luck pangngai tak a ni tih ka hai lo. Ka u nen an inkawm nasa bawka,kan inah pawh a bialnu te a rawn hruai fo a, angai reng hi a rawn hruai khat viau. Tun hnaiah erawh ngaihzawng a neihawm ka hre ta miah lo a. Ka ngaihven loh vang pawh a ni mahna.

‘I single ve ngei tihna mi?”

‘Anih hi..A hahdamthlak zawk’ a ti awlsam ve mai.Thil ka ngaihtuah chhuak thut.

‘Enteh,ka u leh Becky kha engvanga inṭhen nge annih i hria em?” ngaihtuah kual loin ka ti nghal pawp. A hmelah chuan eng emaw alang zawka,mahse a in-control lehnghal vat.

‘Ka chiang chiah lo. An sawi duh lo ve ve’ a ti sup.

‘Um,an induh viau in ka hria’ ka ti leh a.

‘Nia,an induh viau mai. Mahse,a rem lo anih kha’ a ti leh a.

‘Engmah i hre lo tak tak em?” ringhlel zetin ka ti leh hap.

‘Hre lo tak tak maithei…’

‘Khawngaihin…an mahni awm tawh lo mah se ka hre chak’ ka ti leh ṭalh. Min chhang dawn lo emaw tih mai turin a ngawi vung vunga. Thil kal tawh angaihtuah anih hmel viau.

‘Nau a paia,a chhiata..Chu chu buaina bul. A duh reng vanga achhiat luih emaw tiin i u khan a huaa,hmeichhe dang a kawp nghal hmiaha.Becky lahin khatianga be duh lo tawp ringawt  leh hmeichhe dang nena inzui ta si kha a lo tuarthei lo ve bawka. An inkar kha a fel mawh a ni e’ a tita duah. A thusawi chuan min thawng ngang mai. Becky khan an inthen chhan kha ‘thil pakhat lek’ tiin holam tak ang khan a sawi a,a lo ho miah si lo.

‘Aizawla an intawn leh takah khan dan ngaihna awm lo khawpin an inzui leha,inmil si lo,induh bawk si anni ber. I u Boral hnu khan Becky hian min rawn biaa,I u kha an kuta thi anih a ring a.Diktak chuan Sangkima te hian a hmaa arai khan nau an lo tihtlak sak tawha’ ka vawt nghal rawih rawih thei..

‘Engatinge? ‘ awmzei nei lo zetin ka tichhuak sep. Ka hrawk ro nghal halh chu tihhnawn tumin ka chil ka lem a.

‘Ka hre chiah lo le. Ala naupan vang anih ka ring. I u hnenah khan Becky hian a hrilh ta nghe nghe a,chu vanga Sangkima nen pawh intibuai ta kha annia. Sumdawnna chu engpawhnise,an buaina kha mimal thil a ni mah zawka. I u kha an tihtawp mai loh chuan i u khan phuba lak a tum ruh tlata. Anni lah sum leh hmingthanna bak ngaihtuah nei lo anni si a’ a ti leh a. Zawhna ka zawta, achhanna erawh chuan min tikhehsawm ta vek.

Muhil thei loin ka let tawn sek,Malsawma thilsawi kha ka bengah a cham renga, ka u leh Becky ka khawngaih chu thuhran nise,Sangkima’n nau a tihtlaksak kha ka pai dam thei ngang lo. Engvangin nge mi fa chu a lo tihtlaksak ngawt? An naupan vang mai mai lehnghalin…Chu aia ka tuar theih loh zawk ala awm cheu. .Ka intena,ka inzahpui bawk.

Ka Phone ka hmet enga, Sangkima msg min rawn thawn ka chhiar nawn leha..’ Hahdam taka min muttir avang leh khawvela hmeichhe Special ber muhil lai min thlir tir avang khan ka lawm e aw’

Special bik angin min inngaihtira,kei lah chuan lawm em emin ka lo pawm ve ngawta. A tho a, a bialnu piancham lawm turin achhuahpui leh a..A thiltih tenawm em em ka hre leha. Ka en vang vanga, ka Delete a..Ka phone ka dahthlaa,ka mittui a rawn luang a,engvanga ṭap nge nge ka nih ka hre bik lo. Hriat pawh ka duh hek lo.

Zingah ka nu min rawn call avangin ka harha,’ Rin aiin kan awmrei dawn tlat mai. Karleh tir lamah hian an zai theih ka ringa, a result a zirin kan rawn haw hun tur achiang chauh ang’ a rawn ti mawlh mawlh.

‘Zai tlak ala ni mi? a tar tawh sia,a khawngaihthlak e’ ka ti ve a.

‘Zai chu la zai tlak e, I Putea nen hi chuan zai  kan duh vak lo a, mahse amah hian a inbeisei tlat a,nakina inchhir leh ai chuan a duhdan puitlinsak ṭha kan tita mai’ a rawn ti leh duah.

‘A ṭha alawm,ama duhdan a pawimawha.Amah enge a an a?’

‘A ṭha rih viau,Dawr lamah buaina a awm em?” a rawn ti leh a.

‘Aih,awm nang..Kan pangngai viau e,Customer pawh an awm leh ṭan tawh’ ka ti a.

‘A that chu. E,nang hi ngahnge nangmaha i riah a? I ti awm ang lo leh lutuk mai’ a rawn ti bak hlak hlak.

‘Lawmi a hman leh lo a, bakah mahnia awm nuam ka ti zawk’ ka ti awlsam mai.

‘Mai maia,nula mahnia awm a him lo leh lutuk. Malsawma’n a ngaihtuah deuh che a’ ka ner vak.

‘Ka ngaihtuahawm loh,puitling ka nih tawh hi’ ka ti nghat.

‘Nu tan chuan fate hi inpuitiling tak tak ṭhin lo.Engpawhnise fimkhur tak khan lo awm la,Malsawma pawh chu duh leh ngaihven deuh tur chein ka lo ti anga’ a rawn ti leh a. Ka pu te nen insi lo chauhin kan awma,engvanga Malsawma pawh chu sawisek nge maw anih le a??

Rit deuh lukin ka tho a, nizana awmze nei lo lutuka ka ṭah chiam avang khan ka mit a bui deuh lak bawk.Dar 11 velah Dawr ka thlenga, dawr ka thlen hnu lawkah Malsawma’n min rawn call a.

‘Min bazarpui lawk hman em? Ka nu birthday ania,thil pek tur lei ka duha,lei ngaihna ka hre lo’ a rawn ti a. Ka ngaihtuahna pik lutuk a zia-awm beiseiin hnial eih loin ka lo ‘aw’ hmak.

‘Eng ber hi nge kan lak ang?” Bag awm tlar dul en chungin Malsawma’n a ti a.

‘Ka hre mai lo,enteh..Hei hi aṭhat hmel tawp’ tih pahin Bag dum,Stone a chei khah vek,mahse nibuai si lo leh zahawm ru zet chu ka kawka.

‘Ṭha itih ang ang kha nimai,Idea ka nei lo’ a ti awlsam et. Ṭhutna awlah a ṭhu zui nghal daih bawk.

Dawrnghaktu mawngzang zet chuan min lakthlaksaka,han belhchian phei chuan a nalh lehzual. Aman erawh a tlawm dawn lo hrim hrim tih alang reng.Aman ka zawta, ka rin ang ngeiin a tlawm lem lo. Malsawma ka en a,’ Ṭha itih phawt chuan a tawk reng. I ta tur thlang tel la’ a ti a.

‘Ngai lo..’ ka ti vat. A rawn kalpheia. A chung bera an dah,kan luhtirh phat atanga ka mit la chat tu chu a en vung vung. Nu upa lam tan chuan a Young deuh mah mah avangin nalh mah se a ngainat ka ring lo a,chuvangin a nu tan khan ka thlang lo mai chauh kha ania. ‘Hei hi enge a an ang?” a ti a.

‘Angai lo ka tih kha..’ka ti leh a, mahse a mitmeng buang thak maiah chuan inhnial buai loh a finthlak tih ka hmu nghal zat.’A ṭha alawm,mahse a to ka ringa’ ka ne ne kual ta mai mai.

Malsawma’n pawisa a pek fel mek laiin Hmeichhe aw hian ‘tah hian lut lawk ang’ atih ri ka hriaa. Ka en satliaha,mahse  ka beisei loh lutukin keimah ang rual vel tur Hmeichhe hmeltha zet leh Sangkima an rawn inzui lut a. Ka insangmar nghal ṭeuh ringawt. Sangkima’n min rawn en a,  kan mit a intawng sawka, theihtawpa pangngai tumin ka infuih ru mawlh mawlh. Ka thaw deuh huaia,dak deuh vah chungin ka en leha,Hmelhriat ngai loh ang hmiahin ngaipawimawh lo hmel zetin ka hawisawn lehnghal  daih bawk.

‘Naute…ka hman aw’ ka bulah Malsawma a rawn dinga,ka en chho vata. Ka nui lui sang mai.

‘Kal ila…’ Zangkhai vahin ka ti a, a banah ka vuana..Malsawma mitmeng danglam zawkah chuan ka awmdan mak a ti tih ka hai lo..Mahse, Sangkima mitmeng thim leh hlauhawm zetah chuan thinrimna ka hmuh tlat avangin Malsawma ka bialpa anga lantir chu nuam ka ti miaua...

Note: Min ngaidam teh u,Ka mit hian ka luak a tichhuaka,ka lu a hai leh ṭhin bawka.En nawn pawh ka ennawn zo thei ta ngang lo.A hrehawm thei mang tak e...