ANNEM - 11

Chapter- 11

‘Rosangkima kha ihria tiraw?” kan chhuah hnuah a ti a. Motor dahna lam pana kan kal lai pawhin a ban ka vawna ka thlah duh lo. Atthlak zetin min lo enzui palh ka hlau ve tawp.

‘Hria e..’ ngaihsam hmel zetin ka ti liam puat.

‘A kalpui kha a Cousin anih kha,vawikhat chu kan ck zuai tawha’ a nui a. Ka nui ve hak hak mai.

‘A hmelthat em kha..Khangte kha neihtur che alawm’

‘Hmeltha,an thahho hi hmelchhia an awm pawn ka hre lo’ a titha ve mai.

Dawra let leh tawh loin Malsawma te Inah kan kal tlang nghala, Malsawma u te ho an lo awm vek. An pasal fanaute nen anni bawka,an thawm a tha ngang mai. Tumah hriat loh ka nei lo va, an makpa te thlengin ka hre veka,anni pawn min hre ve tho bawk. Min lo be luam hlawma,ka nu te chanchin anu in min zawt tel bawk. Azin tih a lo hriaa,mak ka ti lem lo.Malsawma’n a hrilh tihna animaia. Ka u kha an fapa ang maia an en a ni ve a, keipawh min en hrang bik lem lo. Kan venga an awm lai phei chuan inluh pawh reng kan ni a,an insawn hnuah pawh ka u leh Malsawma an inthlah tak tak chuang lo va,chhungkaw chhiat thatah kan la intawiawm veka.A khat tawkin an lo leng a,ka nu a leng phei fo bawk.

‘Anun,Hmanni a ka lo kalin ipi khan Kurtai min chaha,ka leikepa; I hawn nghal dawn nia aw.Pawisa lah min thawn suh tih pawn min thawn lui tlata’ a nuin a ti a.

‘Um,a chah maksak thei bawk che sia. Ka lo la nghal mai dawn mi? kal mai ka duha’ ka ti a, ka ding nghal a.

‘Enga? Chaw i ei nghal ang chu’

‘Aih, ei lo ang.Dawrah let leh ka ngaia,Scooty pawh Dawrah a awm daiha’ ka ti a.

‘Mama,Anuni hi chawei nghal turin lo kal se ka ti sia,I hrilh lo em ni?” Malsawma lo lut mek hnenah a ti a.

‘Hrilh ngaiah pawh ka lo dah lo va,a lo kal chuan eitur chiang sa animaia’ awlsam zetin a ti a. Min rawn en a, ka lo ner khum vak.

‘Mipa tak hi chu aw. Aaaa,a awm ve tho alawm,Ani pawh a duh hun hunah a rawn ei a’ nui hak hak chungin a nuin a ti a. A sawi dik lo hran lo,mahse kei hi a chintawk ka hriat angai dawn viauin ka hre leh hnuhnawha. Lawmi’n vawikhat mai ni lo Malsawma min endan min hrilh tawha, kei ngei pawh hian haider tum lui tlat mah ila min en dan hi nau ang a ni vek lo tih ka hai miah lo.Vawiina Sangkima runluih nia ka inhriat ve ngawt dan lah kha Malsawma tan ngampatna tham a ni hial maitheia.A tul ka ti lo leh tlai khawnu a,awmzia a awm tawh der si lo.Sangkima lah ka bialpa pawh a ni lo va, ka lo runluih ve chiam ringawta..

Dawr lam ka Phone a, chahbi ka dah tho avangin lo dahfel mai turin ka ti a, vawiin atan ka let tawh rih dawn lo tih ka hrilh nghal bawk. Dar 8 velah Malsawma’n min thlah a. Kal lehnghal mai loin Inah a rawn lut leha.

‘I nu khan min lo biaa,angaihtuah deuh che a’ phone en chungin a ti a.

‘Nia,a hmingin nula te ka ni ve sia,min ngaihtuah ve bawk ang chu’ ka ti liam puat.

‘Ka riak thei reng ania’

‘Ngai thak nang…’ duh ai chuan ka chhang rang mah chu a ni e. Min rawn en a, za lo zetin a nui a.

‘Min hlau niin ka hria’ a ti dam thlup.

‘Teh nang,engvangin nge ka hlauh ngawt ang che?” ka ti leh vata,nuam ti lo zetin ka che deuh sek bawk.

‘Ka hre chiah lo,mahse min hlau i ang thei viau ania’ a ti leh a.

‘I ngaihdan mai mai anih chu,hlauhawm deuha i awm te anih loh chuan hlauhna chhantur che ka nei hleinem’ uar fein ka ti leh a.

‘Nia,a dik alawm. Tak takin ka va haw ange.Min mamawh chuan eng hunah pawh min lo be thei reng ka tih fo kha aw’ a ti leh a, a tho a. Kawngkhar lam pana a kal chu ka zuia. Gate thleng ka thlaha, Gate pawn hi Kawngpui ninghal mah se a zau lai tak anih avangin Motor dah mai nan a awlsama, kan inleng te hian helaiah rawn tlan lut kher loin Motor an dah mai zela,Kawng a tihchep phah tehvak lem lo bawka,a remchang phian.

‘Eee,I nu  thil tur kan buaipui kha March thla tirah chuan a fel maitheia’ Motor a lut mai loin a ti leh riha.

‘Eh!! A fel leh thei si law?”  

‘Um,thei leh dawn si’

‘Ka nuin a hre tawh em?”

‘’Aih, hre lo.Naktuk lamah ka hrilh mai ang ka lo tia’ a ti awlsam leh mai. Ka bu nghauha,Drug Lisence kha ka duh lem miah lo. Mahse ka nuin vei berah a neia,a buaipui em em si avangin a hmu thei tur chuan minti lawm ve lo thei lo.

‘A van lawmawm tak’ ka ti halh.

‘Nia,lawmawm viau mai. Naktukah i nuin hre phawt se, kan sawi leh dawn nia’ a ti a.

‘Um,a tha alawm..E,Bag vang khan ka lawm e aw’ ka ti leh hnuhnawha. Chiang zetin min rawn en a, danglamna ka neih miau loh avangin nui chungin ka en ve bawk.

‘Min hnial loh vang khan ka lawm ve tho ania.I harsa nging ngeng reuh sia,min hnial hrep lo kha ka vannei’ min chhaih pahin a ti a,ka nui ve hak hak mai.Min Mangthaa,Motorah a luta, a tlanliam hnuah Inah ka let pheia,ka pi te an la menga,Kurtai ka va pe leha,Ka pi a lo lawm ngang mai. ‘Malsawma nu kurtai chah thin hi a tui bik tlat a.Ei zawha thlum zui vang vang thei a ni zel’ a ti siam siam. Nidang ang bawkin ka Pu a lo mu leh tawha,ani hi chu zan mengrei ngai lo tak,zing erawh tho tlai ngai reng reng lo a ni a. Pa tawngmawh em em mai anih avang hian kal pawhin min lo be tehhlut ngai meuh lo.

Kawngkhar ka kalha, tukverh ka check leh vek. Nizan hmasa ang kha a thlen nawn leh ka duh tawh lo bur. Kan in a te lem lo a,a reh deuh ruih bawk nen a khawharthlak vung vung thei. Mahse, mahnia awm nuam tichi ngang ka nih avangin a reuh ruih chu hrehawm tihphah nan ka hmang lem lo.

Mu chungin phone ka khawiha,Corona chungchanga thuthar awm an gang ka chhiara, khawvel pum huap aiin India ramchhunga a darh chak dan ka ngaihven deuh ber thung. Rinai takin kai an la tam lo a,ram fai lem lo leh mihring bit em em kan nih avangin a darh huk mai ka lo hlauthawng a,mahse rin aiin a la zia ta.Mahse, phai lama awm tan chuan thlamuang taka khawsak a harsa deuh tawh maithei. Ka nu te kalnaah Positive an la hmuhchhuah loh avangin ka nu te ka ngaihtuah dan erawh a nep deuh thung. Kan inbiak apiang erawh chuan fimkhur turin kan inchah deuh ziah thung.

Kan thianho Groupah reivaklo ka luta, Lawmi nen PUBG kan khel leha,ka mut meuh chuan dar 12 a ri tawh. PUBG hi mi tamtak tan chuan buaina a ni maitheia,ka tan erawh buaina a tling lem lo. Hunawlah chauh ka khel tihtheih a ni a, hnathulh nan ka hman ka la hre miah lo.

Ka harhin khua a lo eng tawha,Ka beisei loh zetin mumang bo thak khawpin ka muhil tehtlat. Tho mai loin ka zi mar ar ara,ka lukham bula ka Phone dah ka laa, dar 6 ala ri lo deuh. February thla tawp a ni tawha,karthar tawp lamah thla a thar tawh dawna,mahse zing karah phei chuan  ala vawt viau tho. Khawvawt hi sexy ka tih tlat avangin vawt reng mah se pawi ka ti ngai lo hrim hrim.

Min enreng tu awmin ka hre thut,ka thuchhuak nghal vata, kawngkhar bula thutthlengah Sangkima a lo thu reng. Ka phu nasa tih piahlam a ni.

‘Nang..Nang kha..’ awmze nei miah loin ka ti nawk nawk mai. Za lo hmel zetin a then suk.A thut ngaiin a thu a, chetsawn tum hmel a pu lo.

Engmah sawi tawh loin ka en mawl tawp. Hahdam hmel takin a bawp a khawkherha,a jacket lukhum a khuma,thutthleng banah a ban lehlam dahin a bek a dawm bawk. Ka phu nasa lutuk tih hria niawm takin tawng loin a kutin hahdam turin min rawn signala,ka thaw hawk mai.Nizan ka mut dawn khan tukverh ka check veka,engmah inkalh lo a awm lo. Ni lo,a lo kal hmasak zawk pawh khan thilmak a thleng tawh.Darthlalang kha keh mah se Barah a lo lut tlang thei lo tih ka chiang lutuk. Mahse, engtin emaw a lo lut thei tlat tih ka mit ngeiin ka hmu tawha,tunah pawh ka Roomah ngawirengin a lo thu leh a,engtiklaia lo kal nge tih lah ka hre eih lo. Hepa hian a duh phawt chuan ngawirengin min dahtha thei tih ka ngaihtuaha,ka khur zui nghal dar dar mai.

‘Enge i duh?” ka huaisenna zawng zawng sawmkhawmin ka ti ram hmak.

‘I muhil lai ka en duh’ a ti sup. Ka insehruha,he mihring ngei hian ka u leh Becky fa a paihsak a,mi hipna mak tak a neih hmang hian inhip nawn tir ka tum tur a ni lo.

‘Chhuak rawh.Nang nen hian inzawmna kan nei lo’ ka ti chang leh fak. A rawn tho a, khum atangin ka chhuk ve nghal vata. Khum lam pana a rawn kal mek chu ka en a, ka thluak a vir zawk.

Khumah ka tlan lawna,a din lohna lamah ka chhuk lehnghala,Kawngkhar lam panin ka tlan a.Mahse, kawngkhar ka thleng  chiah tihin min rawn nangching hman ta tho.Min pawt let nawka, ka rak thawt thung. Ka inrin hmain min pu kang nawlha,tal thlak ka tum ve thung.Mahse,engahmah ngai loin min kalpuia,khum bulah a ding chut; ka tal nasa bawk nen Khumah kan tlu thla duna,min rawn bawhbet titih.

‘Thlawkbo rawh,Mitenawmpa’ ka ti tuar. Ka tal leh vaka,mahse ka talchhuah hmain awlsam zetin min kherhbet zui nghal hmak.

‘A tawk,atawk..’ ka beng bulah a rawn nawra. Ka che thuta,a kawrah ka inpawt kanga,a chalah tak ka tauh nghal pawp. Ka chal a hit chhuai thei,ani pawh a rum ve nghut.

Min nam bet chawta, ka inpawtkang leh tur tak ka hmuiah tak a rawn fawp nghal hmiah,ka rin loh dan lutuka a chetna chuan min ti hamhaih lutuka, che loin ka mu khawng at. Engtia lo dawnsawn tur nge ka hre lo,diktak chuan nula senior lam hnaih tawh ka ni chungin ka mipa fawh hmasak ber a ni tlat. Picnic naa kan kal tum khan chiang takin ka taksa a hmu vek tawha,mahse min kiss lo,khawih erawh min khawih ngei a. Tuna ka taksaa thleng mek ang tho nawmna khan min fan a..Ka hmui a rawn nawr kaua,a lei a rawn rawlh luta,ka vai deuh ruai chu ka harh deuh kawk nimaiin ka hria. Ka thle sawka,mahse a kutzungtang sei thlurh chuan ka bekah a rawn vuana,ka mal pahnih a kherhbet a,ka ban lah a kut lehlamin chunglamah a nawrtawm chho daih bawk. Chet lak ngaihna a awm lo,hawisawn dawn pawn ka thei chuang lo.

Min rawn fawp leha,a dimin a dam hle bawk.Chhan let ve mai ka chak et et.Mahse, tihvak dan tur pawh ka hre chuang miah lo thung. Maimitchhing loin ka meng kara,a hmelpa zet chu ka enkar ringawt.

A hmui a phawi thuta,ka hawihai letling!! Ka bekah a rawn fawp zui leh dun duna,ka duh loh dan berin a chet vel dan chuan ka chhungril a fan a, ka la hriat ngai loh tawpin ka kap a fan thleng vek.

‘Ka thlah dawn che aw’ a ti sup. Chhang loin ka hmui ka pet a, ka taksaa nawmna mak danglam lutuk thleng mek chu hlauhthawnna nen a reh hun ka nghak vang vang ringawt.

A inlahranga, ka sirah amu a, che ngam loin ka mut ngaiin ka mu a, ka khur dar dar mai. Ka inzahpui lutuk leh inten lutuk chuan min ti chau deuh nghulh thei.Mahni u thattu leh fa paihsak tu lakah khan ka tlawm chu a ni ber a.

A rawn tawlhhnaia..Khum kil lamah ka tawlhphei ve nghal vat. Rang zetin ka tho a, khum atangin ka chhuk a. Tukverh bulah ka va dinga, Curtain ka keua,pawn lam ka thlira, a rukin thawk ka la vang vang.

‘Anun..’a awpa zetin a ti sup.

‘Kal rawh. Sawi dun tur kan nei lo va, tu nge inih ka hria che a, nangpawn min hria. Hmelma kan ni. Lo kal nawn leh tawh ngai suh ang che’ ka ti nghet charh.

‘Ka lo kal chhan chu hahdam taka awm ka duh ka tih kha’

‘I hmelma bulah i hahdam ang maw? Ha..Thildang awihawm deuh sawi rawh’

‘Ka hahdam ka tih kha..’ a ti leh sup.

‘Enteh,I luck viau emaw i hausa viau pawh a ni ang.,Mahse, khavang ngawt khan hmeichhia zawng zawngin an duh che tihna a ni lo. Chuan,tuna i awmdanah hi chuan Amber-i hi a khawngaihthlak ka lo tia’ ka ti leh salh.

‘Anih chuan Amber-i i thik tihna a ni em?”

‘Aih, ka khawngaih.A bialpain hmeichhe dang bulah a hahdam thu a sawi miaua’ ka ti leh salh.

‘Ka bulah chuan tupawh an awm thei,I bulah pawh midang an langsar zawk thei. Mahse, nang pawn ihria.Kan chhungril hi kan bum thei ngai lo ania’ a ti leh a. A thilsawi chuan min deng deuh dawta,ka mit ka chhing vang vang. Thawk ka la leh halh.

‘Chhuak rawh’ ka chhungril nena inmil miah lo khawpa chang fakin ka ti tawi tak.

Hawilet chuang loin ka awm ngaiin ka awma.Diktak chuan  Inhnuai lam kawngkhar pawh engmah ka la hawng lo va, mahse ka kalh vek chungin a lo lut thei tho anih chuan a lo luhnaah bawk achhuak leh mai ang chu.

Ka Phone a ri thuta, ka phu deuh zawk. Ka hawileta,ka rin loh tawpin ka hnung chiahah a lo ding reng. A lo kal hnai thawm ka hre lo hrim hrim.

‘Kawngkhar chu helamah ni loin saw lamah aw’ tih pahin kawngkhar lamah ka thle zauh. A hmelpa leh chang zetah chuan mak takin nui hmel alang a,ka sawi hre lo ang hmiahin a kut hnung suihin a dinga,min en run bawk.

Khum lam ka pan pheia,kan inchai velna vanga khum hnawk nuaih mai chu ka en a, ka ner nak ringawt. Lukham ka keua,ka Phone ka laa.Min rawn calltu ka hmuh takah chuan ka thaw hak mai.

‘Aw, Mala..’ ka theihtawpa pangngaiin ka ti a.Engvangin nge a hming ka lamrik kher ka inhre bik lo.

‘Good Morning,ka rawn tiharh che em?”

‘Morning..Tiharh hran lo e. Enge nita?” ka ti a. Ka mit sirin Sangkima thutthleng lam pana a kal chu ka hmu ru kar.Mahse, ka hawi duh lo lui tlat.

‘I tho tawh tak tak maw?” a rawn ti leh a.

‘Tho tawh e..Enge?” ka ti leh nghauh.

‘Ok,anih chuan kawngkhar lo hawng la,pawnah ka awm meka’

LALPA ..Sangkima lam ka hawia, ka mangan zia hre lo lutukin thatchhe zetin a thu thluang duaia,inchung lam a melh vung vung bawk.

‘Ih,eng lo..Lawk aw’ ka ti bah nawk nawk mai. Sangkima a hmu anih teh chuan a pawi satliah pawh a ni dawn lo.A rapthlak zawk hial ang.

‘I tha em? I va mangan hmel ve’ ka tawng danah mi a lo tih takah a lo man thiam leh ta chat.

‘Aw..Ih,diktak chuan ka la tho chiah lo a’ za miah loin ka nui lui a.

‘Ok..Ok,ka lo nghak ang che. Hmanhmawh suh,I pi te ka lo tlawh ang’ a rawn ti zangkhai vuh. Engvangin nge zingah a lo kal kher kher ni a?

‘Awle,ka rei lo vang’ ka ti a. Min chhan let pawh nghak loin ka off nghal vat.

Sangkima thutna bulah ka dinga, insiamtha chuang loin min rawn en chho a,a mitah tak ka en ngar bawk.

‘I kal angai’ ka ti mawl tawp. Ka chhungrila manganna tilang lo turin theihtawp takmeuh ka chhuah angai hial.

‘Kal duh lo ta ila..’ pawisak nei lo lutukin a ti sup duh lek.

‘Ni lo,I kal duh angai.Tunah,vat vatin’ ka ti leh a.A thu thaa,ka ngaihtuahna hriat tum niawm takin a mitmu dum fiah zet chuan chik lutukin min en a, ka tim deuh chawih thei.

‘Ka kal dawn lo’ luhlul zetin a ti leh hmuk. Ka thaw nghal hawk thung.

‘Kal rawh,khawngaihin…’

‘Enge dik lo awm?”

‘Engmah,engmah..Kal phawt rawh,anih loh pawn Bathroomah tal lo awm rawh’ ka ti leh a.A rawn tho a.Kan inhnaih ta lutuk mah mah,ka tawlhhnung deuh hrat mai.

‘Engatinge i va mangan hmel ve? ’ a ti leh a. Min chhaih kual vel nuam ti hmel ala pu zui. Ka hlauhthawnna leh a awmdan a inmil lo lulai lutuk. Sawi leh mai tur hre loin ka ban ka phar hluaia,beidawng zetin ka dahthla leh hnak ringawt.

‘Sawi la…’ a ti leh sup.Min rawn din hnaiha,tawlhsawn lo turin ka insum tang tanga. Kan insanhleih bawk si nen ka en chho ha mai.

‘Inleng ka nei dawn..Pawnah min nghak’ ka tichhuak ta nge nge.. Kan inbiakna kha a hre lo der anih loh chuan Malsawma’n pawn lamah min nghak tih a hrechiang lutuk ang.Mahse, a awmdanah hi chuan engmah hre lo ang hmak a ni thung.

‘Tu nge? Mala maw?” kan inbiakna chu alo hre ngei mai.

‘Aw..’

‘Ngatinge i hlauh viaua? I tan enge anih a?” a ti leh hmuk.

‘Enteh,sawifiahna hun ka nei lo.Bakah,I hnenah ka mimal thil sawifiahna chhan tur ka nei lo hrim hrim bawk. Uluk deuhin lo ngaithla teh, inleng ka neih chhungin thawm nei miah loin ilo awm angaia.Tuman min rinhlelh ka duh miah lo ania.A tha em?” ka ti leh duah. Awihawm lo khawpin ka inrintawk hmel ta bawk.

Ngawirengin min en vung vunga, min hnial lehpek dawn anih hi ka ti hman,mahse ka chal si deuhthawin a rawn kun hnai thuta. ‘Thupek hi ka ngaina tehchiam lo thina,mahse tuna thu min pe zet zet tu kha midang ni loin nangmah ini a, I Special leh ta chiah.Kal rawh, thuawih thei ang berin ka lo awm ang’ a sawi zawhah a ha var rual that langin a then suka,a ding mar zui nghal zat.

A kalsawna, kei erawh ngai ka awh lehpek tawh lo.Huiham..Ka awmdan danglam nghal zel mai hian min ti mangang ta viau chu anih hi a. Tu nge anih leh enge atih ka hrereng chung hian amahah hian ka ral riai riai chu a ni zel mai sia!!!

Kawngkapui ka hawnga, Ka pi te verandaa Malsawma leh ka Patea thudun ka va hmu a. Ko loin thawk ka la leh te te. Sangkima ka ngaihtuah leh riha,a tawngdan khan ka nuih a tiza thuta, insum hman loin ka nui chhuak hak mai.

Malsawma a rawn hawi pheia, min rawn hmu a. Ka ban ka vai nghal zauha,a bu nghut. Inchhung lam ka pansan lehnghal mai.Thingpui ka chhuang nghala,a rawn lut thawm ka hre chhawm nghal mai. Choka lamah a rawn lut phei ve a. Thu tura tih ngai loin Dinning Chair a pawtchhuaka,a thu thla nghal a.

‘I va hma ve’ ka ti satliah.

‘Nia, ka rit lutuk dawnin ka hriaa,ka inkhel leh tana’ a ti a. Ka u ka hre chhuak zawk.

‘A tha alawm’ ka ti sap ringawt.

‘Nia, ka tlanchhe reng thei dawn chuang lo a’ a ti ve sup. A sawi tum ka hre thiam,ka u damlai khan Badminton an khel dun thina,nuam an ti em em a. An pahniha tang dunin Tournament ah te an chhuak dun fo a, thiam lar tak tihtur ni lo mah se an khel thei viau thung.

‘Um…Khelh ve ka duh deuh,mahse ka thiam lo dawn hian ka hria’ Boruak tih zangkhai tumin ka ti a.

‘Lo khel ve la,karthar atangin ka rawn sawm ang che’

‘Aaah,ka bo lutuk,Point chhiar dan leh Service dan pawh ka man vak lo’ ka ti leh a. Hmeichhe harhvang leh inti nu lem lo tak ka nih thin avangin infiamna hi tihtheih loh ka nei vak lo. Thiam filawr ka ni ngai lo va, mahse ka tikual dum vek. Badminton erawh High School kan kal laia vawihnih ka khelh bak kha ka khel nawn leh ta miah lo thung.

‘Lungngai suh,ka tihpui ang che’ a ti leh a.

‘I mut that leh that loh zawh che ka tuma,ka zawt leh lo mai ang che’ nui chungin a ti leh a.

‘Mu tha,mumang bo vekin ka mu’

‘I nuin angaihtuah tehreng che nen,I tlei mai sia’ ati leh a.

‘Ha, Puitling ka nih ve tawh hi’ ka ti leh hlak. Naupangchhia deuha min en hi ka ngaithei vak lo.

Thingpui kan in duna, ka nu thil buaipui chungchang a sawi leha, dawr luah tur pawh biak lawk an lo nei tawha. Malsawma nite in a ni a, Wholesale dawr lian pangngai tak atan an hmang thina,mahse an siamthat dawn avangin loh theih lohin an dawr luahtu te an insawnchhuaka,chu chu remchangah lain Malsawma’n a lo be fel titih tawh a lo ni a. Ka nu a thinrim em em kha a demawm lem lo tih ka ngaihtuaha,mahse a fanu nisiin Malsawma aiin hriat ka nei tlem zawk lawi!! Ka nu tak hi chu a..

Malsawma kal veleh kawngkhar ka kalh leha,inchungah ka chho nghala. Room ka hawnga, a lo ruak hiau mai. Ka hawihai titih.Bathroom lam ka pana,Kawngka bulah ka dinga, tim deuh daiin ka kik a. Chhanna a awm lo. Ka nema,a inhawng ve mai. Mahse, Bathroom pawh a ruak leh ta tho.

Angaihna hre lo zetin ka roomah ka dinga, inchhung zawng zawng ka enkual vek tawha. Khawiahmah Sangkima a awm lo.Inhnuaiah a rawn chhuk lo tih ka chiang a,anih si chuan engtin nge a awm loh daih theih si?!

Sangkima number ka en vang vanga, call mai ka duh ut ut.Mahse, ka zam deuh tlat lawi. Ka inrin loh laiin amah zawkin a rawn call a,ka phu nasa lutuka Phone ka thlauh thelh.

‘Khawiah nge i awm a?” Hello pawh ti loin ka ti nghal tawng.

‘In ka thleng chiah’

‘E…’ ka ti hmak.

‘Ka lo kalna leh chhuah lehna i ngaihtuah tiraw?” a rawn ti leh sup.

‘Ngaihtuah lo..’

‘Dawheh reuh lutuk.Mahse, ka hrilh dawn lo che,I hriat chuan ka lo kal loh nan ilo siam danglam vek dawn tlata.Chuan,kha Malsawma kha ka duh lo aw’ thupe awin a rawn ti a. Ka then nak ringawt. A ta ang maia min sawi chu thinrim tur ka nih laiin ka lawm lehpek tawh.

‘I thu lo e a’ tihngaihna hre loin ka ti hlak ringawt.

‘Ka la thu viau ka ring’  ngeiawm zetin a rawn ti leh a.

‘Ka sawi kha hrereng rawh. Langsar takin tupawh ka bulah awm se chhungril chu a hran daih a ni ang’ nghet churhin a rawn ti leh a. Tihngaihna hre loin ka phone ka off ta ngawt. Mahse,msg a rawn thleng lehnghal zat.

‘ Ka sawi kha hrereng la,haider suh’ ka chhiar zawh rualin ka thaw hawk mai. Ni e, mi tan chuan Ampuia bialnu ka ni a, Sangkima pawh Amber-i bialpa a ni bawka.Mahse,kan awmdanah hian hmelma ni loin inngaizawng ang maiin kan awma,thikthu kan tichhe ve ve bawk.

Dawrah nilengin ka awma, dar 7 velah ka haw a,in ka thleng deuh chiah tihin Ampuia’n min rawn call a.’Hello’ ka ti zangkhai vah.

‘I hre tawh em?” a rawn ti deuh tawng.

‘Eng chu maw? Ka hre lo anianga” ka nui a.

‘Sangkima Fapa a bo a’

‘Maw?” ka ti vak..

‘Vawiinah School atangin an va hruai dawna,a lo awm lo a. An miss-in hmeichhe pakhatin a hruai tawh thu a lo hrilh a.Mahse, tumah in atangin an kal si lo a.Tunah an la hmu lo a’ a rawn ti leh mawlh mawlh. Kum 10 lai a ni tawha,mahse a School kalna hi an veng atangin a hlat tham deuh avang leh naupang hrisel lem lo tak anih avangin an duat em em a, an thlaha,an hruai leh zat zat thin tih a sawi leh duah.

Ka thutna ngaiah ka thua,ka ngaihtuahnaah Sangkima bak a leng lo. Ka be ngawt ngam chuang der si lo. Engtin nge a fapa a bo ngawt theih ang? A nu lah tha taka Pasal nei leh a ni a, buaina enge an neih ang ni? Ampuia chanchin zawh tumin ka Phone ka bana,ka beisei loh zetin Sangkima’n min rawn call tlat.

‘Hello..’

‘Khawiah nge ka fapa?” Sangkima aw pa leh hriam hruih mai ka hriat rualin ka vawt nghal rawih rawih mai. Tihchhiat tumin ka bei nasa tawha, tunah a fapa a bo avangin min rawn ringhlel ta chat..

NOTE : Mood lo nasa pariat.. Zanin zet chu huiham a ni deuh tawp mai.Edit pawh ka edit lehpek tawh lo aw. Chuan, a thei tan click na hun hawn leh a ni e.