ANNEM - 2

Chapter -2

(Note: Caption eng eng emaw ka daha,inchhiar vek lo maithei e.Mahse,Story tawpna,a mawng lamah Note pawimawh ka dah a.Chu pawh chhiar Chiang peih lo in awm leh thin avangin a tirah dah ila a Chiang ang🤭..Dah dawn loh zan leh zawm leh hun tur nen lam theih chin chinah kan han sawi lawk ve a,chutichung chunga "Ti nge engmah sawi lo va a reh daih le? Zawm tawh em em teh" tih Inbox,Comment a awm hian,min ngaihhlut sak tih ka hriaa,ka lawm thin,chutihrual chuan lo sawi lawk ve dim diam chuan Comments,inbox kan lo check lo va,ngaihtha tak ten kan lo awm ve a.Induh te kan han ni leh rih daih a..Note a awm em tih hi lo en uluk hram hram ang aw.Tihian na takin ka rawn hau che u a.Na lo ti hle ang che u😝😝)

‘Rosangkima…’ ka tinawn ve sap. Thlalak a hmel lang chu uluk zawkin ka thlek leh vang vanga,ka hmuh tawhna ka ngaihtuaha,ka hre chhuak zo lo.

‘I u Sumdawnna kalpui tum ang kha hun rei tak a lo kalpui tawha…I u khan a rawn kalpui ve tur kha a duh lo nimaiin ka ngai. A hmain an lo inhmuthiam lo zauh tawh bawka’ Malsawma’n a ti leh a.

‘Sumdawnna chu tupawn kan kalpui thiang vek lo ami? Chuvang ngawta a nunna laksak anih ka ring lo. An inhmuhthiam lohna lam zawk chu eng thil nge?” ka ti a. Ka ngaihdan diktak pehhel loin ka sawi a,A thaw halh mai.

‘Mipa buaina satliah mawle..Nia,inthah kher nan chuan thil ho tak a ni..’ a ti leh lawi.

‘Anih chuan engvangin nge i rinhlelh si?” ka ti leh khauh.

‘Aaaa,khatianga kangmei chhuak thut leh amah insaseng hman lo khawpa a awm kha ka ngaihtuah hian ka la awih thei lo. Thil chi hrang hrang ka ngaihtuah kuala,he pa hian ka mit a la ta tlat.Diktak chuan ama pual liau liau tur kha midangin a hlawkna an lo pawtpeng tur a duh lo hle tihnaah ka ngai hmiah mai.Vanduai vanga thleng niin ka ngai thei lo’ a ti ta duah. Sawi mai tur hre loin ka hmui ka pet nauh nauha, diktak chuan keipawn ka u awmdan kha mak ka ti ve tho. Bungraw lo thlen hun a nghaka,zanrei lam pawh a ni lo va, lo muhil tur pawn a ni thei lo. Zu a rui hle han ti ngawt dawn ila thil ni thei a ni miah bawk si lo. Mahse, ka ngaihtuahna hi awmze nei lo ni a ka hriat avangin vawikhatmah ka la sawichhuak miah lo thung.

‘Ka u nen he pa hi an inhriat dan a tha nge tha lem lo?” ka ti sap.

‘Inhre satliah anni mai. Kei pawn ka hre tho va, mahse thian han tihtur erawh kan ni lo’

‘Anih chuan ka u thattu ti a rinhlelh ngawt ngaihna a awm chuang lo tihna a ni maw?” ka ti leh a.

‘Awm lo,mahse amah hi ka ringhlel. Ka sawi tawh kha,amah anga sumdawnna kalpui tur a duh lo. Tun chauh hi a ni lo va, a hma pawhin hetiang bawk hian a sumdawnna ang kalpui tum mek pakhat chu nat lawk awm loin a thi thuta,ala rei lo. Kumtir lam maiah khan ania.Ka ngaihtuah hian thilthleng palh niin ka hre thei lo’ a ti leh duah.

‘Ani pawn a nei thei anih chuan engvangin nge midangin an neih theih loh ang?” ka tum aia chang mah in ka ti hmak.

‘Nia, a dik reng. Mahse, I hriat kha. Mizoramah hian phalna nei thlapa zu inna hmun siam hi kum hei leh chenah hian Rosangkima bak tu nge awm?”

Ka chhang lo, a sawi dik tlat. Ka u pawh khan ka Pa vanga hmelhriat tha kan neih leh ka pa a boral vanga mi khawngaih a dawn vang liau liaua kalpui tura hmala thei a ni tlat.

‘That kher lo pawhin a tichhe thei tho ang. Ih,diktak chuan mi kut tuara thi tur ang chuan ngaihtuah loh ka duh’ mahni inringtawk lo zetin ka ti a.

‘Sorry,lo hrilh miah lo che ila tha tur ania..Thil tul lo tak ka sawiin ka hria’ nuam tih loh hmel fein a ti boh.

‘Aih, chutiang lam sawi ka tum lo..Diktak chuan pawisa vang mai maia mi nunna laksak chu ka tihturah ka daha,a harsa dawn hian ka hre lutuk’ pangngai zawkin ka ti leh a. A rilru tihnawm nan ka nui lui sak bawk.

‘Adik alawm,rukru pawh ni si lo lehnghal phei chu.Mahse, I u kha khatiang mai maia vanduai tur chuan a mawl lo’ a ti leh hmuk. An inkawm nasa em em a, thianah pawh thian tak tak anni a, kan tuar ang em chuan a tuar lo pawh a ni ang,mahse na a ti em em tih ka hria.

‘Ka u kha sawipui a tum hrim hrim em? I hriatpui em?” ka ti leh a.

‘Aih, sawipui lem lo.Atir phat atangin a hlawhtlin loh nan a tlankual zar zar tih erawh ka hria’ inringtawk takin a ti a. Ka bu nghat ringawt. Ka nu pangpar tlar dul mai chu ka thlir deuh vang vanga, ka ngaihtuah naah erawh chuan thil chi hrang hrang a lang dawt zut zut thung.

‘Amah hi enge a nih? Ka sawi awmzia chu Rosangkima hi…” ka ngaihtuahna ti lang loin ka ti a. Dawhkanah a thlalak ka thehthla thak.

‘A Pu hi Ex- Minister a ni a, tun thlenga Party thluak bawm ala ni. Mahse, Rosangkima kha chuan Party lam a buaipui lo.An harsa lem lo,Rambuai hma atang tawha sumdawng hlun chhungkua anni a. Mizo sumdawng hmasa zinga daihrei ber ti ila kan sawisual lo ang. A pu Minister nihna khan nasa takin a ti hausa belh anga. Amah Rosangkima hi MCS a inziak tlinga, mahse kumkhat hnuah a bansan leh a. An chhungkaw sumdawnna lam a buaipuia,huang a zauh zel a nimai. A farnu hian an School a enkawl’ a tita duah. An School hming a sawi leha,ka thaw halh mai. Mizorama School tha ber pawl leh englaipawha Zirlai ngah em em reng anni a. Ka naupanlai khan ka pain min kaltir a tuma,mahse ka nu khan ‘an deldul em mai ‘ tiin min kaltir ta lo. Tu nge a neitu tih lam ka lo ngaihven ngai lo hrim hrim.

‘Chhui chian deuh ka lo tum ange’ ka ti fan raih.

‘Engtizawngin maw?’ bo hmel deuhin a ti hu.

‘Amah kha mawle,ka u nen inzawmna an nei reng em tihte pawh’ ka ti a. Min chhang loin a bu nghuta,a hmai a hup zui leh vang vang.

‘Thil pakhat ka ngen duh che a..Ka nu hnenah engmah sawi lo turin ka duh che,chiang taka kan hria anih loh chuan ana a belhchhah mai mai ang’ ka ti leh sap.  Min hnial tum niawm takin a ang zuaua,a chip zui leh daiha,a bu nghut.

Ka nuin hna bansan turin min duha,hnial duh loin ka bansan ve ta zawk. Ka u tumna ang kha kalpui zui zel duh mah ila ka nuin a duh lo fithla hmak. Sum nei lo kan ni lo bawka ka nuamtih zawng tak ti turin hma ka la zui ta zawka. Ni e, ka naupanlai atangin Restaurant changkang tak neih alawm ka suangtuah thin le..

‘Hey,Zohmingthangi nu a chatthla chiah aw’ Lawmi’n phone ka pick veleh thildang sawi loin a rawn ti nghal lawng lawng.

‘Ehe!!,ava zia lo tak.An inah mi i awm?” ka ti let ve a.

‘Aih, in ka thleng chiaha. Khawiah nge i awm?” a rawn ti leh a.

‘Hnathawk ho ka va enpui ang ka lo tia,mahse ka kal leh rih lo mai ang. Ka lo phei ang,lo insiam la’ ka ti nghal a.

‘Um,ka inpeih reng.Lo kal rawh’

Inhnuaiah ka chhuk thlaa,Ka nuin inchhunga Plant kan dah a lo hrufai hauh hauh. Ka thawm hriain a rawn hawi zawka,a thil tihlai a chhunzawm leh mai.

‘Ka kal leh rih dawn lo aw.Zohmingi nu a chatthla chiah a’ ka ti nghal bawrh bawrh. Rang zetin min rawn en a. Mak ti hmel erawh a pu lo.Diktak chuan kan beisei aiin a daihrei zawka,a na a natzia hmuh phei chuan kal tawh mai se tih mai a awl a.A kalta hi a hahdamthlak letling hial ang.Mahse,thihna hi atuartu chhungkua tan chuan hun a awm lo tih erawh ka chiang em em thung.

‘A va zia lo ve mawle.Mahse, u Khumi chu a hahdam tawh zawk ang.Ka lo kal ve nghal dawn nge ni?” a ti a. A puanchhe ken lai a daha.

‘Lawmi’n min nghak alawm,naktukah kal mai rawh.Zanah ka tlaivar bawk anga’ ka ti a. Chabi khaina atangin Scooty chabi ka laa.

‘Nia,a pawi lo ang.La kal tehsuh,puan keng rawh’ a ti a. Chhan pawh ka chan hmain Roomah a lut a,reiloteah a rawn chhuak leha, chanchinbu hluiin a puan ken a tuam nghal mawlh mawlh bawk.

Lawmi ka sawm pheia,kan In leh an in hi a inhlat angrenga, keini vengchung lamah kan awm laiin anni erawh chu kan veng thenawmte nena kan inrina bul lawkah an awm thung.

Mi an lo awm nual tawha, Zohmingi thutpuiin ruang bulah kan thu ve a, Zohmingi tap fap fap mai chu hmuh hrehawm ka ti takzet. Ka chhungril ber atangin ka lo feel pui thei hial bawk. An chhungte vengdang dang atangin an lo thleng zela,an mahni hi chhungkaw hung pangngai tak anni a, a ute mipa 3 in nupui an nei vek tawh zui bawk.Chawei turin kan hawsana,kan in lamah emaw Lawmi te inah chawei tura hruai mai kan duha,mahse inhnuaiah eirawng an lo bawl avangin min hniala. Kan tilui duh lem lo.

Dar 8 velah kan kal leha, Rasky a Duty loh zan a lo ni hlauh bawka,kan Pathumin kan thu a.Ruang lam chu chhungkaw chan anih tawh avangin kan thut hnaih tawh lem lo.An in a len tehreng nen kan thu khat vek tho. Vengchhung mihlun tak annih bakah a Pa hi YMA president lo ni reng tawh a ni a, mi an lawm zo bawka,ngaihpawimawh an hlawh tih alang reng.

Kan hma zawna thu te an chhuaka,rei pawh a awl hmain midangin an rawn hnawhkhat lehnghala,a rawn thu zingah asir bera mi ka hmuh rualin ka tang nghal teuh. Amah kha a ni,Rosangkima kha. Zohmingi te nen an inchhun awm reng reng ka hre si lo. Atakah ka la hmuh loh vangin ka hai palh takin tiin ka va melh leh a,min lo melh reng chu niin.Rang zetin ka hawisawna,a thensuk ka hmu hman tho.

‘Chhuak ila,ka mawng a kham lutuk’ Lawmi’n a rawn ti sa sa. Lawm zetin ka bu nghal nghat bawk. Kan thianhoin kan inzui chhuaka,pawnah pawh an lo awm teuh.

Rasky te in leh Zohmingi te in hi a inhnaih a,Rasky te in lamah kan chhuk thlaa. Lumenna lama eitur siam ei lo law law mai ang kan ti a, Eitur kan siamchawpa.Thingpui kan lum a,muangmarin kan ei leh te te.

‘Kan hmaa rawn thu kha Sangkima a ni tiraw?” Rasky-in a ti thut.Ka en nghal vata,mahse min en loin a thil ei lai lam a lo en a.

‘Nih kha,ngatinge a lo kal ve ringawt le?” Lawmi zawkin a ti ve a.Englaimahin kha mihring hming kha kan thianho zingah sawichhuah ala ni ngai miah lo.

‘Tu nge chu chu?” bo hmel thei ang berin ka ti ha.

‘Kan hmaa rawn thu kha,Palian deuh,chhe lo mangkheng kha’ nui kar kar chungin Rasky-in a ti a, ka then ve sak.

‘Chutiang pawh ka lo hmu lo. Ka phek en veka’ ka ti satliah.

‘Nang hi chuan i phek en vek ziah alawm.Ni leh lo,George-a chiah i hmu chiang thei’ Lawmi’n a ti a, a nui zui hak hak.Ngei zetin ka en a, ka ner khum vak.An pahnihin za zetin an nui zui hawk hawk. George-a hi kan venga mi niin min bem nasa thei zet mai a ni a, a hmelchhia pawh a ni lo. Ka duhzawng a ni lo ve tawp maia.Ka thian kawm vel mai mai bak chu eng hmuh mahin ka hmu lem lo.

‘In va han nasa dun tak’ tihvak ngaihna hre loin ka ti hlak.

‘Nasat vang pawh a ni lo,kan thianho zinga Single ngar ngar awmchhun ini hi inchhuanna chi pawh a ni lo va..Eeee, Ampuia hi i engmah a ni lo tak tak em?” Rasky-in a tihzawm leh zat. Ka thle bak,han sawifiah chiam dan tur ka hre tlat lo.

‘Tak takin Sangkima kan tih chu i hre lo tihna mi?” Rasky bawkin thutak zawkin min ti a. Ka bu liam satliah ringawt. Ka chhungril erawh chuan hriatchian a duh zek zek.Ka u chunga thilthleng thei,Malsawma sawi atang khan tihvakngaihna ka hre lo chungin ka ngaihtuahna hi a luah leh veng veng thin miau a.

‘Pathlawi ania. A fapa hi tunah kum 10 vel aniang,a ni vel ang tiraw?” Rasky-in Lawmi  a zawt leh rih. Malsawma khan a chanchin tlangpui chu min hrilh tawh ngeia,mahse fa a neih thu a sawi lo.

‘Kum 30 vel anih ka ring,a fa neihna hi chuan pasal a nei leh daih tawha. Chuan,bialnu nghet pangngai tak a nei.Tin,an nei ve tawka..Sawi hmaih chi miah loh chu,I hmuh ang khan a chhe lo uluk hle bawk’ Lawmi zawkin nui chungin a tia. Ka then ve sak,nia..Ka hmu alawm. A palian hle a, a hmeltha over lo nangin alangsar lerh lawrh lutuk. A hang lek leka,a mitmeng mawlh kha, a melh na ka ti dawn nge en rei a harsa ka ti zawk dawn ka hre thiam chiah lo. Ani aia hmeltha zawk kha Mizoah an tam dawn lutuk,mahse amahah kha chuan danglam a awm tlat in ka hriaa. Ka u chungchang avang khan  danglam niin ka ngaihbel nge ka hre bik lo.

‘Hey…Nang hian ilo ngaihven ve tihna a ni mai em?” ka hmai bulah a kut a rawn vaia,ka phu zawk. Awmze nei lo zeta nui chungin ka en a.Ka chhaw hmel dawn hian ka hre lutuk.

‘Ngaihven maithei’ ka ti tawi tak.

‘Wow…A tawp atawpah chuan kan vur nula hian mipa a ngaihven ve anih chu.Ropui lutuk’ a ti leh hluai,ngei zetin ka melh a. Engahmah a ngai lo. Nghal zetin an inmelh dun a. Diktak chuan anni pahnih pawh hian miin ka hnunglama min sawina ‘Lesbian’ tih tawngkam hi an hre lo a ni bik lo. Mahse, anni hi chuan min ringhlel ve ngai lo thung.

‘Zohmingthangi han pangngai deuh phawt se hma kan la ang’

‘In va han Over tak,ka duh anih chuan keiman chet ka la mai ang’

‘I hmelchhe sia maw..Nang khan khawiahmah hma ila lul lo vang,kan awm hi,lungngai suh’ a ti leh zat zat. Pakhat zawk chauh pawh hnial hneh an har nak laiin an pahnih phei chuan ka hnial peih ta lo law law. Bakah,hma la turin anni pahnih hian an hmelhriat hnai a ni lo tih ka chiang tawka,hlauhthawn tur a awm lo.

Kan let lehin a lo awm tawh lo. Atthlak zetin ka thawveng nghal huai ringawt. Diktak chuan ka u chunga thilthleng ka hre chiang miah lo chungin amah ka hmuh rual khan ka u ka hre chhuak tlata. Ngai ka awh tlat lo.

Zohmingi nu vuini leh a tukah ka kal leha,abak chu ka kal ta rih lo. Dawr kan khawih laklawh avangin enpui ka duha,ka duhdan lo a an siam ka hlauh vang a ni bawk. Ka cousin in achhung lam design zawng zawng a khawih dawna,Dawr zau tak ka mamawh lo va, changkang leh khawthlirna hmun tha ka mamawha,ka mamawh ang ngeiin ka Pa chhungte In luah tur ka hmu hlauha.Ka duh ang anga ka khawih danglam an phal thlap bawk. Kumhnih atan inremna kan siam a,chhungkhat kan ni chungin inremna mumal tak ziak lo va indawr ka duh lo bur.

Ka u roomah ka luta,zawn bik pawh nei chuang loin ka teikual a. A awm loh hnuah engmah khawih danglam loin kan dah tawp. Ka nuin a kalsan ang anga dah a duh a,kei pawn ka duh ve bawk. Khumah ka thu thlaa,avang zawngin ka mu nghala.Chunglam ka melh vang vang. Ka mit ka chhinga, kan naupanlai kha chuan duat hlawh ve lo bik ka nih avangin nasa takin ka thik thina,a Cycle ke ka hawlhthep sak loh leh a Game khelhna te ka lo tichhiaa..Min velh tum lah a tam nangiang. Kan len hnuah erawh inhauh chang nei mah ila kan inhau zen zen ta lo. Ka nu duatbik anih avangin a no em em a,ka ei loh zia a hriaa,min runluih chamchi..Mahse,tunah chuan inhauhpui tur leh min runluih tur tal pawhin a awm ta lo va,keimah chauhin mal taka awm turin min kalsan ta veka, ka mit ka chhinga, ka bekah ka mittui a luangthlaa,hruk pawh ka hru peih lo. Diktak chuan inngeih lem lo mah ila ka u hmeichhia zawk boral aiin ka tuar na zawk tih ka inpawm thlap.

Ka Phone nghawr dat datin ka ngaihtuahna ala peng a, tho chuang loin ka ipte ka zena,ka phone ka lachhuaka.Min rawn calltu ka en a, Malsawma.

‘Hello..’ ka theihtawpa pangngaiin ka ti zangkhai vah.

‘I buai em?”

‘Aih, eng nge nita?’

‘Inah i awm em?” a rawn ti leh a.

‘Um,awm e…’

‘Anih chuan i u Roomah khan thil min lo zawnsak lawk hman em? Ka inthlahrung viau nangin’ a rawn ti a.

‘Aw,thei lutuk…Engthil nge?”

‘Pendrive ania..8GB aniang.A dum leh sen inpawlh ang kha’ a rawn ti leh a.

‘Ok,ka lo zawng ang.Ka lo hrilh leh dawn che nia’ ka titha ve mai.

‘Um.’

‘Lawk,engthil nge a?” ka ti leh rih.

‘Ho iti dawn lutuk,I u computer kan siamthat tum khan a thilpawimawh ho dah nan kan hmanga, ka hawn theihnghilha,ka zawng nasa lutuka. Ka hrechhuak chiaha’ a rawn ti leh mawlh mawlh.

‘Ok..Ok,ka lo zawng ang’ ka ti a. Phone ka off a, khum atangin ka tho a, ka u Computer table lam ka pan pheia…Ka thlek kual dan dana,Pendrive hmel ka hmu lo. Drawer ka pawtchhuaka,cable leh Disc a lo awm nual.Tihchhiat palh hlau takin ka hai kual dan dana,ka zawn ka hmu chuang lo. Drawer awm zawng ka en hnuah pawh ka hmu lo. Ka ding deuh vang vanga, hriatchhuah ka nei. Keyboard dahna ka pawtchhuak nghala,Keyboard sirah Pendrive a lo awm bala. Ka thaw halh mai.Lawm zetin ka laa,mahse Pendrive sira thil awm chuan ka mit ala leh chat. Keyboardin a hliah deuh avangin ka nawrsawn hreta,thira siam,phek thlir thler nimaiin ka hria.

Ka laa,ka hmuhchian takah chuan recorder tih ka hre thei a. Ka u ta a ni ngei ang. A sira hmehna awm ka hmet a, ri engmah a awm lo. Achhia emaw Battery a zo pawh a ni thei. A charge nalai tur ka thlek kual a. A sir veilamah a lo awma,Phone charger pawha charge theih mai tur a ni a. Dah leh mai ka tuma,mahse ka thluakah thil eng emaw a lo lang zawk.

Roomah ka phei nghal a,ka charger ka vit luta, nghak hle hle thei loin ka teikual sek. Ka Phone riah Malsawma ka hre chhuak leh chiah.

‘Aw, ka hmu…’ ka ti nghal tawng.

‘A that hlauh chu,ka thil pawimawh pakhat a awm tel alawm le. Naktukah ka rawn lam mai ang’ lawm zetin a rawn ti a.

Khumah phone ka thehthlaa..Ka thil charge lam ka melh ngat ngat,melh avanga charge kalchak sawt thei nise chuan a full nghal pap thei ang.Sana ka en a, minute 10 ka charge tawh. On tumin ka pan pheia,ka hmet nghal chat..Kawngkhar lam ka hawia,ka kalh lo tih ka va hmu a, hmanhmawh zetin ka kalh leh sawk sawka, engvanga phili em em nge ka nih ka ngaihtuaha, Malsawma sawi ang khan thil lo thleng tak tak turin ka duh nge thildang ho mai mai hriat ka duh zawk pawh ka hre hrang thei lo.

Ka hmet deuh vang vanga, a rawn eng ta pap. Earphone ka vuah sawk sawka, che miah loin ka thu a. Play na lai ka khawiha. Ka u khurh kharh thawm ka hre nghal zat.

‘In vau zawng chuan ti lo teh ang’ ka u aw a ni. A ri deuh tuk tuka. Ka thaw tha ngam lo.

‘Ka vau lo che.I bansan atha ka timai anih kha’ ka beisei loh lutukin Hmeichhe awin a ti a.

‘Anih si chuan engvangin nge ka bansan ang? Bakah ka hlau hleinem’ ka u bawkin a ti leh a.

‘Min Hmangaih chuan bansan rawh,I thi lai hmuh ka duh lo’

‘Engvangin nge ka thih ngawt ang?”

‘I elpui hi midang niloin Rosangkima anih hi..Kan chhungkaw zinga mi a ni a,nang aiin ka hre chiang zawk’hmeichhe aw bawkin a ti leh a…A ri tawk tawka,a tawp ta daih.Awmzia ka hre miah lo.Tu nge kha hmeichhia kha nita ang? Ka u bialnu ka hriaa,Rosangkima te nen inzawmna an neih ka hre lo hrim hrim.Bakah a aw kha ka u Bialnu,Sini aw a ni hek lo.

Light On loin ka room tukverh bulah ka thu a, ka khup chungah ka khabe ka nghata,vawitamtak ka u leh hmeichhe inbiakna ka ngaithla tawh. Ka pawm emaw pawm lo emaw Rosangkima a tel ve tih hai rual a ni lo.

Rit burin ka tho a, zanah ka mut that loh lutuk avangin ka lu a na deuh bur bawk. Mahse, nilengin hnathawhna lamah ka awm ta tho. Thla tharah hawn hman ngei ngei ka duha,ka rilru a hmanhmawh tawh. Mahse, ka ngaihtuahnaah ka u leh hmeichhe inbiakna bak kha alang hleithei lo. Malsawma ka ngaihtuaha, hrilhtur a ni nge ni lo ka hre thiam rih lo. Bakah,enge ka tih ang ka hre thiam rih hek lo.

‘Khawnge ka nu?” Dingi amaha Tv lo en hnenah ka ti a.

‘Inchungah a awm. I lo va haw hma ve’ min ti a.

‘Nia,haw hma deuh.Hna kan zo lailawka’ ka ti tha ve mai. Ka room lam ka pan chho a, kal pahin Lawmi Msg ka reply pah bawk.

Ka darin ka room kawngkhar ka nek hawnga, mahse ka tum loh lutuka ka nu ka hmuh takah chuan ka ding chawt. Khumah fel auhin a lo thu a, a kutah ka u Recorder a keng va bawk. Hreptak hian..Ka kalchhuah dawn khan ka dahtha ngei khan ka hre si.

‘Inchungah i awm emaw ka tia’ pangngai thei ang berin ka ti a. Ka bag ka daha,ka Jacket hak ka hlip nghal bawk.

‘Hei hi enge?” ka zawhna hre lo ang hmiahin a ti dam thlap.

‘Eng? Eh…Kha kha maw?” sawi zawm leh mai tur ka hre lo.

‘Rosangkima hi tu nge ?” thluk nei lo zetin a ti mar leh pat.

‘Ih,nu…’

‘I u kha a lo vau tihna a ni a, Malsawma ka be tawh bawka.Engkim ka hria ania’ khauh zetin a ti leh a. Kan naupan laia ka hlauh em em thin ka nu,nu Strict leh inkhengkhawng tak chiah chiah kha ka hmu leh ta tlat.

‘Engmah fiahna ala awm lo a. Diktak chuan Police hnenah pawh report dawn ila…’ sawizawm loin ka ban ka phar hliai ringawt.

‘Fiahna i mamawh chuan i zawn angai animai’

‘Enge ka tih ang?”

‘I u phuba la rawh. Ka fapa anih ang bawkin i u a ni ve a. I u Phuba ilak angai’

‘Nu…’

‘Min hnial suh,ka hre duh miah lo ania.Ka pum chhunga thla 9 ka lo pai leh ka enkawl seilen inih takzet chuan min hnial suh.I ti lo anih chuan keiman ka ti mai ang’ fiah fai lutukin a ti leh a.

Hetianga a tawng hi ka hre fo tawha, hnial lo a ‘aw’ tihmai a that zia ka hre chiang em em tawh bawk. Ka ngaihtuaha,Rinhlelh vang ringawta thubuai ziah luh ka duh bau lo. Chung lam kut nghak ta ila..Phuba reng reng lak loh tur tih hi vawitamtak ka pa khan a sawi thina,mahse ka pa a awm tawh lo va, tunah ka nuin khauh takin thu min pe a..Tihtheih dang ka nei lo. Ka u chungah thil dik lo a ti ngei em tih ka hre duh anih chuan ka zawnchhuah angai tihna a ni mai.

Ka bu nghata, ‘A tha alawm’ ka tita sap.