ANNEM - 4

Chapter- 4

Ka inngaihtuahharh thuta,ka inlahrang nghal a. Min dan tumna pawh a nei bik lo.

‘I na em?” a ti sup.

‘Aih, ka bilh hman chiah lo’ ka ti tha ve mai.

‘Helamah law ilo awm daih? Ehe,Boss..Nangpawh chu’ Ampuia’n rawn chhuah ve pahin a rawn ti nghal mawlh mawlh.

‘In la sawi tui hmel sia,ka lo lut rih lo a’ ka ti vat.

‘A pawimawh hleinem..Sangkim,khawnge?” a ti a. Ka bulah a rawn ding hnaia.

‘Zanin chu keimahin ka lo kal’Sangkima’n a ti nghut.

‘Aah,ava ring ta si che ve’ a nui huk. A bialnu hi a takah ka la hmu lo,mahse Ampuia’n a fiam fo danah hian a duh strict ve viau anih hmel. Nia, angai ve ang. A chhe lem si loa,tu hmeichhe tan pawh han kawp a iaiawm tlat lo va.

‘Lut ila, I ril atam tawh em?” min rawn en a. Ka lu ka thing nak ringawt.

Kan pathumin kan inzui luta, kan awmchhung zawng chu kan awm ho ta zel. Eng eng emaw sawiin an titi a, mahse ka beisei ang Sangkima eizawnna lam thil engmah an sawi tel eih lo.

Ka ke ka bilhna kha atirah anat pawh ka hre lo kha ania,mahse zing ka tho a,Gym kal turin ka insiama,a nuam ta lo viau. A vung deuh al bawk nen ka kal ta lo ringawt.  Ka lo muhil leha,ka harh leh chuan Ampuia msg a lo awm vang tawh. Ka kal loh chhan min rawn zawta, thawh ka hai thu ka thawn let ve mai. Tho mai loin ka inngaihtuah vang vanga, nizan khan an pahnih khan an in hnem dun malh malh viau kha ania, Ampuia chu a kal ngeia, Rosangkima kha chuan kal a tum loh thu a sawi ngei kha chu ania.

Ka inphihfaia,Bathroom atanga ka chhuak chiah tihin Rasky-in min rawn call ve chiah.

‘Hello’

‘Hey, Hmeli..’Rasky-in a rawn ti vak. Ka phone ka beng bul atangin ka lasawna,ka melh vak ringawt. Che loin ka dinga, muangchangin phone ka beng bulah ka dah hnai leha.

‘Enge? Ka beng a ngawng lo ania’ ka ti hlak.

‘Ka hria,awi…Enge thleng mek hi? Hmangaihna a fawn vel tihna ami?” a rawn ti leh zat zata.A sawi awmzia reng reng ka hre lo.

‘Enge sawi i tum ber?”

‘Nizan lama in chet velna hi a hmuhnawm ta tawp a.Beisei let thak khawpin in inhmeh bawka’ phur em emin a rawn ti leh a. Ka harhchhuak nghal zawk.Nizan khan Thlalakna tur hmun an siamah khan thla kan la nual tak alawm le.Mahse, tu nge upload ta ang? Ampuia...

‘Ehe!! An lo upload alaw?” ka tinghal hluai.

‘Upload  chiang,chuan i thiante hi kan vui hle bawka’ a rawn ti leha.

‘Hmm,vuina tur a awm eih lo aw..A cousin Birthdayah kalpui atan min sawma,chu zawng chu animaia ‘ ka ti hlak.

‘Chu zawng chu…Eh,Hmeli,zep lo mai teh, in inhmeh rapthlak si’ a rawn ti leh chiam.

‘Huizz,ka sawifiah peih lo e a’

‘Nia,sawifiah duh lo mai rawh. Ka rilru ithlak chuang lo vang,Caption lah kha..Awi,Lawmi kan be leh lawk’ nuam a ti lutuk chu ka ngei zawk.

A off nghala,IG lamah ka lut ve nghal thung,a hma atangin Ampuia hi chu ka follow sa hrim hrim. Ka rin ang ngeiin kan pahniha kan lak a lo upload a, min mention a,Rosangkima te nena kan lak a dah tel bawk. Rosangkima a mention leh mention loh ka en nghal vat,a mention ngei.Phur lutukin Rosangkima Stalk tumin ka lut kual nghala,mahse a en theih loh. Request ka thawn ang nge thawn lo vang tih ka ngaihtuaha,ka thawn ta lo.

Ka ke a nawm theih loh avangin ka in entir ta nge nge. A ruhno a lo kaka,serious lutuk chu a ni lo a. Mahse, thlakhat tal chu indim tur leh pheikhawk pawh a sang lam bun lo turin min ti a. Gym pawh kal rih lo turin min ti bawk. Dawr lam erawh ka kal nitina,hna tamzawk kan zo va. Hawn hun chiah kan nghak tawh. Ampuia a lo kal deuh zuta,ka thiante pathum lahin kan inzui tak takah ngaiin an lo lawm ve tumhrang. Diktak chuan min ngaihven dan hi thian satliah inngaihvenna a ni lo tih ka hai tawh bik lo. Mahse, tu mah mahin engmah kan sawi lo. Kan inhmu tama,kan inbe tam ta sawt a,Ka bialpa tur angin ka lo la ngaihtuah chhin ngai lo va,tuna kan inhnaih zual tak hnuah pawh hian ka la ngaihtuah chuang lo.

Ka inbuala,ka inbual zo deuh chiah tihin ka Phoneah Msg a rawn lut a, ka bana. ‘I va reh’ tih zawng. Number ka save loh avangin tu nge anih ka hre lo. A Dp ka check nghala, Mipa pian nalh zet a hmanga,a hmel lang loin a nghawng atanga a dul thleng alang. Ka thle baka,tu nge anih pawh hriat loh chu reply ngawt ka tum lo.

Ka dahthla chiah tihin msg dang a rawn lut leha,ka la kang lehnghal vat.Number ngai bawk atang khan a ni a, ka Open vat ‘Sangkima..’ tih zawng a lo ni a, ka thaw hak mai.

‘Reh satliah,I tha maw?” tih ka thawn let nghala.

‘Tha animai..I ke chu enge a an?”

Huizz,ka ke a na tih a lo hria..Ampuia’n a hrilh a ni ngei ang. Karkhat aia tam ka kal tawh lo va, atir phat atangin Ampuia chuan ka kal loh chhan a hre nghal vek.

‘A zia tawh lutuk’

‘Good,inhmuh vat ka beisei ania’

‘??? “ tih ringawt ka thawn let a, a seen nghal a. Ka thaw dep dep mai.

‘Nothing…’ tih zawng..

Ka reply tawh lo,mahse ka nui var vara, keimahah danglam eng emaw tak chu a thlen lehnghal pang mai. Ka hma darthlalanga ka hmel lo lang chu ka en a, ka innuih sak. Rosangkima hian min fiamkual atum anih chuan a tifuh lo khawp ang,mahse ka tan chuan infiamna nuam tak erawh a ni thung ang. Keiin ka chhui kual ang hian min chhui kual lo pawh nise tu nge ka nih erawh a hriat thuai ka ring tlat bawk.

Naktuk maia dawr hawn kan tum avangin Dawr lamah kan buai nileng ta thak. Tlai chaw pawh hmundanga mi eitur kan chaha,Cook a awma, eitur engkim siam mai theih a ni nangin hawn hmaa lo siam ka duh tlat lo. Vanneihthlak lutukin kan hawn ni tur kan Page a kan sawi atangin Booking ti an awm nghal nual!!  Kan dawr hminga IG lama Page kan siam hi karkhat erh awrh chauh ala ni a, ka rin phakbakin Follow tu an pung chak bawk. Sea Food lam kan khawih tel dawn vang pawh ni fahmiang.

‘I Phone kha…’ ka Cousin-in min rawn nghawk pahin a ti a. Ka Phone dahna lam ka en vat. Ka silent tih pawh ka lo hre pek lo. Ka bana,min rawn call tu ka en a. Malsawma..

‘Hello..’ zangkhai takin ka ti a.

‘I buai em?”a rawn ti mar ut a.

‘Buai ve reng,mahse tunah tak chuan thil kan ei dawn meka..Enge nita?”

‘Dawr hawn hun kha naktuk a ni tak tiraw?” a rawn ti a.

‘Um..Kan inbuatsaih ve chiam chu ania’ ka nui a. A nui ve huk huk.

‘Ka lo kal ang,in la haw dawn loh chuan..?”

‘Haw dawn lo deuh ang.Pawimawh a awm em? “

‘Aaah, I dawr chei dan vel ka en duh..’

‘Um,Lo kal la’ ka titha ve mai. Dawr enduh vang a ni tak tak angem ka hre lo.A lo kal fo hrim hrima,mahse tunhnaiah erawh a lo kal khat.. Diktak chuan ka u thihnaah khan Rosangkima ringhlel hmasa bertu a ni a, mahse Rosangkima ka hnaih hret hret tih erawh ka sawi miah lo va. Ka chhui zui tih pawh ka hrilh hek lo.

Darkar chanve hnu velah a rawn thlenga, thil kan lo ei zo fel deuh chiah thung. Kan dawr chhung chei vel a thlek kual dun duna,ka u thianpa ber leh unau ang maia inpawh anni a, ka Dawr pawh hi a tir phat atangin min buaipui nasa a,ka bungraw mamawh,tihngaihna ka hriat mai si loh pawh amah hian min chahsak a. Mistiri thlengin min zawnsak vek.

‘Enge a an?” ka ti a.

‘A tha,ka beisei aiin thluak i nei tha bawka’ nuichungin a ti a, Ka nui ve hak hak.

‘Dawr chei dan en tur a lo kal ini tak tak em?” ka ti a. Balconyah kan thu duna, Balcony chunga Light rawng hrang hrang kan dah kual ho chu an phe tiar a, Arsi te pawh an ang lek lek.

‘I nu nen kan inbiaa..’ ka phu deuh zawk.Thil zep lo thin tak leh tlang taka thilsawi chi a ni a, A pa hi 1^st class Contractor a ni a, a upat deuh tawh avangin amah hian a enkawl tam ta zawka. Ka u nen an inkawmngeih em em chung khan an mizia erawh a in ang lo lutuk tlat.

‘Maw? Engtikah?” ka ti a.Ka zawt rang mah mah tih ka hria.

‘Vawiinah..’

‘Eng chungchang nge?” ka ti a, ka nu nen an inbiak avanga min rawn hmu duh anih chuan  chhandang a awm thei lo hrim hrim,mahse hriat loh der ka duh rih zawk.

‘I hriat kha,I u chungchang..’ ka thu mara, ka thaw deuh ham ham mai. Ka nuin aduh ang ka tih mai loh avangin Malsawma hi a pun tih achiang vek.

‘Chuan…’ ka ti fan raih.

‘A biak kha ka hriaa.Ka sawi awmzia chu kha hmeichhia kha ka hria ka tihna anih chu’ a ti leh a, ka lo mangnghilh daih. A pawimawh ber zinga mi a ni asin le.Rosangkima lam ngawt ka ngaihtuah vang vek.

‘Tu nge? Sin-i a ni lo tih a awah khan ka hriaa’ ka ti a.

‘Rosangkima Cousin anih kha. Bekcy….’ Ka thaw atawp lo chauh.

‘Becky maw?!’ mak ka tihzia ka thup hleithei lo.

‘Um,Becky..I hriat zawng a ni em?”

‘Aih..Aw,maithei…’ ka ti bah nawk nawk mai. Ampuia Bialnu hlui kha Becky chu a ni ngeia,mahse engtin nge ka u nen an lo inzawm ngawt theih ang?an hming a in ang palh mai mai zawk a ni ngei ang.

‘Rosangkima second Cousin ania.Rosangkima hnenah a thawk mek bawka. I u kha a duh em em a, vawitamtak ani hnen atang khan i u pawhin Rosangkima chet dan a hriat phah ve bawka’ a ti leh duah.

‘A thlalak i kawl em?” ka  ti a, a mitko a san awk. Ka insum thei lo.

‘Nei lo. Lawk..’ a ti a, a Phone aphawrhchhuaka,a khawih nghal mawlh mawlha.Ka hmai bulah a rawn lek hnai nghal vut.

‘Hei hi..I hriat nen a inang em?” a ti a. A phone ka en a, ka hrawk ro halh tih ziaawm nan ka chil ka lem a. Malsawma Phone a hmeichhe lo lang chu hman zana ka hmuh,Ampuia X ngei kha a ni. Anih chuan Ampuia hian enge ka tum a hria angem? Rosangkima hi chuan ka u chungchang ka hriat a ring hauh lo anga. Ka u kha ka u a ni tih a hriat tawh chuan keimahah Game khel niin a inhre zawk hial maithei.

‘Ni lo….’ Ka ti sap. Engvanga dawtsawi ngawt nge ka nih ka inhre lo.

‘Ok..A tha alawm,mahse ka biakduh chhan tak zawk che chu min mamawh anih phawt chuan…’

‘Aih, keimahin ka ti thei ang’ a sawi laklawh lai ka pawtchat nghal hmiah.

‘Anun….’

‘Khawngaihin…Kan chhungkaw thil a ni a, midang tel tir ve ka duh lo. Bakah,engmah fiahna awm lo a ni a, fiahna ka duh a. Chu chu ka hmu phawt ang. Midang puihna ka mamawh anih phawt chuan ka lo be ngei ngei ang che’ ka ti leh duah. A mit a tizima,angaihtuahna hriat mai theih pawh a ni lo.

‘Ok..A tha alawm.Ka lo nghak ang che.Min mamawh hun apiang kha,eng hun pawh nise laklawh a awm lo vang.Min lo call thei reng’ a ti leh a. Ka bu nghat,ka duhdan min zahsak avangin ka lawm takzet bawk.

In ka thlen veleh ka inbuala, ka sam ka chhemro leh hnuah khumah ka inthlawlh nghal kak. Ka ngaihtuah naah Ampuia leh Becky bak an lang lo. Ampuia zawhfiah mai ka duh thut thuta, mahse tul loah ka inhambuai ka hlau lawi bawk..Khawvar dawn lamah ka muhil ta chauh.

Dawr hawnna hunserh tawite kan neia,Customer te dawr theih turin kan inhawng zui nghala, nikhatna chauh a ni chungin beisei aia tam an rawn kal a. Nuam ka ti takzet.Ka pa leh ka u boral hnua ka hlim ve ber tum a ni hial ang. Ka nu pawh a der ni hauh loin a nui ve hawk hawka,hetianga a nui hmel hi ka hmuh lohna a rei lutuk tawha,ka mittui a hnai kuar mai.

December thla kan chuangkai a,khua a vawt var tawh. China ram lama natna hlauhawm tak leng chanchin in khawvela news channel lian zawng zawng aluah khat a, Mizo zingah erawh chuti taka ngaihven hlawh ala ni lem lo.

Gym ka kal leh tan tawha, Sangkima nen kan inhmu tuktin leh ta. Thian han tihtur em chu kan ni lo nangin kan inpawh ta deuh a. A mizia pawh ka hrechiang thei ta deuh.Mahni induhtawk leh ngeng ngulh mai a ni a, chutih rualin awih harsa khawpin midang thusawi angaithla peiha, tute pawh a kawm thei vek tlat lawi. Ka workout min pui nasa em em a,pawi tihna ka nei lo. Mak takin Gymah mai ni lo,zan lamah pawh kan inbe ta fo. Ka be hmasa ngai miah lo thung.Kan inbiak apiangin msg tawite te bak a type ngai meuh lo va,kan mimal nun ve ve kan inzawt ngai miah lo bawk.

Dawr atanga ka haw hnu lawkah ka phone a rawn ri a.‘Pawimawh a awm’ ka michhawr pain a rawn ti mawl tawp. Sangkima chungchang hriat chian tuma ka beihna a sawt mawh lutuk avangin a rukin achhuitu tur ka ruai ta ngawt.

‘Eng thil nge?”

‘Ka lo kal meka,ka lo thleng har lo vang’ a rawn ti a.

‘Angai lo,Inah ka awm lo.I awmna sawi la ka rawn kal zawk ang’ ka ti vat.Ka nu hian min mitmei reng tih ka hriaa,Malsawma min puih tumna ka lo hnawl bawk si nen khan tunhnai phei chu kan inmil tehchiam lo. Chuvang takin inah lo kal lo se ka duh zawk.

A awmna a rawn sawia, a bul lawk Restaurant a min lo nghak turin ka ti a. Insiam pawh insiam lem loin ka thawmhnaw hak lai nen ka chhuak nghal vat.

A kil lam deuha Dawhkan pakhat kilin alo thu ran a. Vawt tihhmel fahranin a Jacket lukhum a khum bawk.‘Sawi la…’ ka ti sap. Sawi mai loin a hawikuala,Kum 26 mi vel a ni a, a fimkhur vel dan hi ka lawm riau zel. Diktak chuan alandan felfai lo thei lutuk chuan michhui tura rawih thin aiin Drug Addict a ang daih zawk.

‘Hei hi en la…’ tih pahin Dawhkanah thlalak a rawn dahchhuaka,ka la vat. Pathum a ni a, pakhat chu Sangkima a ni a, pakhat chu kum 30 vel bawr hmelpu,mitmeng thip rem rawm leh hnar zum vat mai a ni a. A dang la awm ka en leha,kum 60 vel bawr a ni thung.

‘Sangkima thurualpuite…A pa leh a unaupa’ a ti a. A pa atih chu ka en nawn leh ngat. Sangkima mitmeng leh a mitmeng nelawm lo zet chu a in ang lutuk, a sam dum hlap mai chu pial fahranin a khuiha, Pa ti mai mai lo tak a ni dawn tih achiang.A nau atih thung erawh chu Sangkima nen  in anna  pakhatmah an nei lo.

‘Sangkima nau hi a nau tak tak a ni em?” ka ti nghat.

‘Aih, a naupanlai atanga an hnena awm anih kha. Sangkima chhang chiah hmeichhia nen an inrual vel ang. Chuan,an naupang ber hmeichhia,Sangkima’n a duat lutuk a awma. Chu pawh chu an lak tho.Tunah College a kal mek’ a ti leh a.

‘Ka lawm e. Anih chuan tunhnaiah khawiah nge Sangkima a chet tlat deuh?”

‘Zan hnih chu a bialnu te inah a kala,abak chu zanah a chhuak lo. Zing lamah chuan Hotelah a awm tam bera,Dar thum vel atangin Bar lamah a kal leha. Dar 5 leh dar 6 inkarah a haw ziah thung’ a ti leh a. Keimaha hriat ka tum ve ngawt ai kha chuan zia tak a ni.

‘A pa kha pa hlauhawm lutuk anih kha,a duh tawhah chuan tualthah pawh hreh lo a ni a, Stroke a nei a,a kalchhuak ngai lo tluk a ni. Chuan,mi thusawi a ngai pawimawh tehchiam lo aniang,min hrilhtu hian Sangkima thubak ngaihpawimawh a nei lo a ti deuh tawp.. Sangkim hi chu sawi ngai loin a mizia tlangpui chu i hriat ka ring. A nau erawh kha chu phakar leh inlek zet mai a ni a. Bar hi a kutah Sangkima’n a daha, an Cousin pakhat, Becky nen an enkawl. Min hrilhtu sawi danin Chance a hmu anih chuan Sangkima hi a tichhe hreh lem lo turah ka ngai.Mahse, ani pawh khan Sangkima a hlau viau thunga’ a tih zawm leh a.Hreptak hian a..An chhungkuaah chuan a Lal hle chu a ni phawt anga, An chhungkuaa a lalna duhtawk loin amah anga Sumdawnna kalpuitu tur apiang a dahtha zat zat bawk a..Ka tum loh lutukin ka tiril a khur dar dar mai. A nau atih chu ka thlek vang vanga,a mitkhur thuk leh hnar kawm vat mai chu ka huatzawng hi a ni nghal ngawih ngawih.

In ka thlen hnu lawkah Ampuia’n min rawn call a. Ka mood nena inmil lo lutukin a mood a rawn tha.

‘Naktuk i buai dawn em?” a rawn ti zangkhai vuh.

‘Ka hre lo.Ti nge?” ka ti tha ve mai.

‘Picnic kan lo rawta, I hman ve angem?”

‘Aaaa,a va chawpchilh ve..’

‘Nia,mahse a nuam viau ang’ a rawn ti leh dut dut.

‘Tu te nen nge innih dawna?” ka ti a.

‘Andy,Puia, Sangkima…’ abak a sawi zawm nual nangin hriatbelh ka mamawh lo. Ka kal dawn tih ka chiang nghal vek tawh.

Chaw kan ei laiin ka nu hnenah Ampuia te nen kan picnic dawn tih ka hrilha,min hnial lo. Midang kal ve tur te tu nge annih min zawt hek lo.

Rooma ka awm laiin ka michhawr, Ruatsaka( Ruatsaka ti hlirin ka sawi tawh ang aw) hnen atangin Mail ka dawnga. Ka hawnga,tlaia min pek pathum bakah an farnu te pahnih,a nu leh a fapa bakah Sangkima Bialnu te piankum leh chanchin tlangpui min rawn thawn a. Uluk lutukin ka chhiar thla dan dan. Lawmi leh Rasky khan kum 30 vel bawr anih an ring kha ania, a lo ni lo deuh. Kum 34 na a hmang meka,a nau hmeichhia kum 30 a ni a, Mipa hmel ngeiawm em em kha kum 31 a ni thung. A fapa hmel ka thlek vang vanga, mipa naupang ria thel thawl leh ha tihrualna vuah a ni a, apa ang lo takin tihnat awlsam tak hmel a pu thung.Sangkima Bialnu erawh ahranpaa hriatchian viau ka mamawh lem lo. Ka lo hriat tawhsa bak thil thar a awm lo. Kan inruala,Designer a ni a, a kutchhuak thawmhnaw pawh ka Wardrobe luahtu zingah a tel ve.

Ka mu deuh chiah tihin Sangkima’n min rawn call a. Ka lungphu a rang nghal zaih zaih mai.

‘Hello’ alangah erawh chuan ka tizangkhai vah.

‘Naktuk Picnic naah ikal dawn a” min zawt pawh a ni lo.

‘Um..Ti nge?”

‘Min hrilh miah lo va’ a ti leh hmuk.

‘Nngmah maw? Ti nge?” a awmzia hre loin ka ti deuh ha.

‘Aih, engmah…Mangtha phawt’ a rawn ti leh daih. Chhan pawh ka chhan let hmain a off zui nghal daih bawk.Angaihna hre lo zetin ka phone ka en a, ka nui chhuak nghal hak ringawt.

Dar 10ah Ampuia’n min rawn lama,kan rualin an thian zinga mi pahnih an kal ve a, ka la hre ngai lo. Mahse, thui pawh kan chuan ho hmain ka nel nghal der. An tawng duh dun em em a, an bula awm a hahdamthlak tih piahlam a ni.

Kan  picnic na hmun tur kan thlenin Sangkima te an lo thleng tawha,Ampuia nen an inbe nghal hlut. A bula hmeichhe nalh zet lo thu chu tunge anih hrilh ka ngai lo. Thlalakah vawitam ka hmu tawha,tun hi a taka ka hmuhna hmasaber a ni a, chhe lo tak a ni ringawt. Sangkima’n min be lo va, ka be bik hek lo. Nimin zinga innel taka inkawm kha tunah chuan kan inkar a hla deuh duin ka hriaa.Nizana min rawn call lah khan a sawi awmzia ka hre miah lo bawka. Tunah lah min biak tum hmel a pu hek lo.A bialnu a hlau viau tak tak pawh a ni mahna le.

‘Engtin nge eitur vel hi?” Ampuia’n a ti a.

‘Zothana te an lo tlai deuh dawna,Hotelah ka siamtira, an rawn keng nghal  ang’ Sangkima a ti liam puat.

‘Tha lutuk,anih chuan tuiah inchiah phawt ang’ awlsam zetin Ampuia’n a ti leh a. Inthlak turin inah kan inzui chho a, an thian ho hrim hrim hian Ampuia nen kan inkawp angin an ngai vek tih ka hriaa. Pawi tihna ka nei lo.Vawiin atan phei chuan pawi ka ti lo lehzual.

Kekawr bul tawite ka haa,T-shirt thawl hnekhnawk ka haa,a tlang ka suihbawka.Ka chet zawngin ka dul a lang thei titih. Ka sam ka chhipah ka bawkkhawm a. Towel ka keng bawk. Ampuia nen kan inzui thlaa, ka mitsirin Pool sira thut mutna a Sangkima leh a bialnu Amber-i inkuah deuh chiala an thu chu ka hmu a.Mahse, ka hmu lo der hmiah. Diktak chuan ka awm a tinuam tlat lo.

‘Ka la lut peih rih lo,ka inpho lawk dawn’ ka ti a,Min hnial loin a Towel min pe ve mai.Tuiah a zuanglut nghala,pool tlangah a then an thu a, a then tui an chenga, a tam zawkin Wine an dawm far mai.

Kan Picnic na hmun hi Sangkima te huan a lo ni a, hmanhawh tura siam ni loin an chhungkaw pual a ni a, Swimming Pool zau tha hem hawm a awma, naupang chenna tur a hran deuhin a awm bawka. Pool sira thuin ka hawikual vela,Pool awmna bawr vel tak chu uluk taka duan niin,pangpar nalh zet zet a awm tlar puta. Thingkung tawite te nalh tak taka cut a awm thluah bawk. Thlang lam ka hawi thlaa,Lui lian vak lo a luang kawi ngiaia.Ke pawn kal thla ila a hla vak lo maithei. Chhak lam leh a piah mual mit tlin chin zawng zawng erawh chu Serthlum kungin a khat vek. A hmin eng tuar a,a it awm lam ai chuan a nalh lamah a kal mah zawk.

Ka inrin hmain tu emawin ka hnung lam atangin min rawn pawm kang lawpa, enge tih a tum pawh ka hriat hmain tuiah kan tla nghal bawrh. Rang lutukin ka invai chhuaka,ka hmai ka tuaia. Ka hawi kuala,an nui tha hlawm.Sangkima te thutna lam ka hawi chho a, amah chauhin a lo thu a, a mitmeng hriam hruih mai chu ka en rei ngam lo. Ka inrin hmain hnung lam atang bawkin min rawn kuah leh thuta, ka phu zawk.

‘Sorry..Kan ko che a, I hre thei lo lutuk a’ Ampuia’n a rawn ti sup. Ka kawng a kuahna ka phelhsaka,ka inhera.A hmelah inthiam lo hmel alang thei. Engmah sawi loin a bengah ka pawt a, midang ho kut lo beng dar dar ri chuan min ti nui ve ta nge nge.

Minute 10 vel chu ka inchiah ve ta law law. Inchiah rei erawh ka duh lem lo. Hritlang ka kai awlsam lutuk avangin rei lutuk awm chi ka ni lo,chumai bakah Sangkima mitmeng nelawm lo zetin min en zui zel tih ka hriat avangin ka inthlahdul thei tlat lo.

‘Ka lo han intifai ang aw’Ampuia hnenah ka ti a.

‘Min lo nghak la…’

‘Ngai lo,la cheng rawh. Hritlan ka hlauh vang mai mai ania’ ka ti a.

‘A pawi lo maw?”

‘Um,pawi lo.Mahse, tuia i awm laiin engmah in suh,haw lamah pawh Motor i khalh leh dawn kha hrereng la..’

‘Ok,Boss..Ka in lo vang’ a nui a. Ka nui ve var var.

In lam ka pana,tumah an lo awm lo. Ka bag khai chungin Bathroomah ka lut a, Bathroom chhung ka en kuala,a zau that bakah a thianghlim sar mai.

Ka t-shirt ka hlipa,ka kekawrbul ka hlip leha. Ka bra kilhna ka phelh dawn chiah tihin Kawngkhar a rawn inhawng thuta,ka inher zawk. Rosangkima rawn lut mek ka hmuh rualin ka lungphu a rang nghal dawt dawta,bang kil lamah ka tawlh let rawk bawk.

Note: Min lo click sak leh ula aw...In fel kha☺️.Ka sawi nawn leh ang,Tunlai khawvel buai em em a Story ziah chu ziaktu nih pawh a inthlahrunawm lek lek mai.Fimkhur zual zel ang aw.