ANNEM - 5

Chapter- 5

‘Nang? Chhuak rawh’ ka ti thawt. Ka sawi hre lo ang hmiahin kawngkhar chhung lamah a kalha,thawmhnaw engmah ka inbel lo tih pawh ka hre chang tawh lo.

A rawn inhera, min rawn pan pheia. Ka harhchhuak thut. Chhuata ka thawmhnaw tla chu chhar tumin ka che phat,mahse kei aiin a che rang hret.A kein chhuata ka thawmhnaw awm chu a thaisawn nghal daih. Min rawn hnaih leh sauha,Tap awm zawng zawng a On nghal veka.Tuiin min rawn phuh rualin ka inkuangkuah nghal vat.

‘Enge i duh?” ka ti leh a, ka aw a khur dar dar chu ka ngei lutuk.

Min chhang loin a then suka,min rawn hnaihchilh lehnghal rawk. Ka kawngah a rawn kuaha,amah si chetin min pawtbet nghal hmak. Tuiin min phuhphak loh lamah min pawt pheia, bangah min nawr beta. Ka samah a rawn thama,min kuaidak zui nghal zat,a hmui lum ham ham leh chhah deuh tapin ka nghawng a rawn sik rualin ka ip nghal chawih thei.

‘Ni lo…’ ka ti leh sep. Mahse, ka taksain ala hriat ngai loh nawmna maksak lutuk chuan min fanchhuak vek.

‘Shh…Awm hle hle rawh’ a ti leh sup. Ani pawh a pangngai bik miah lo.Ka bra kilhna awlsam zetin a rawn phelha,ka darah a nem liama,ka hnute kawh lah a rawn tham nghal zat.  A mipatna khauh leh ruh tulin min rawn si a, ka harh deuh thut. Ka talnghal phat mai.

‘Khawngaihin tal suh..Engmah a thleng lo ang’ ngenna a ni..A kut chevel a tawpa,a awmah min kuah beta,a lungphu ri dat dat ka hre thei. Min tihluih tumna nei hmel a pu lo.Dimtein min kuai daka,tim daiin a mit thim raih mai chu ka en a, ka inhrechhuak nghal thut. Hmeichhe hurhherh ber zinga chhiartlak alawm le ka nih le..Atthlak lutuk.

Talchhuah tumin ka tal nghal laiha,mahse min kuahbet nghet sauh.

‘Che suh, hahdam ka mamawh’ a tichhuak hrawih. Hetianga thawmhnaw pawh inbel bawk si lo a awm hian engtin nge ka hahdam theih tehlul ang ni!!

‘Hahdam maw?” ka sawi zawh rualin ka hmuiah a kutzungtangin a rawn ti si a. Ka ngawi zui ve hmiah.

Ka inrin hmain min pawm kang nawlha,tlak hlauin a nghawngah ka kuah ve nghal zat bawk. Chhuatah a thu sawp thlaa, bang nghengin a thu a,a mal chungah amah lam hawi zawngin min thuttira,a kawngah ka kherha,a darah ka hmai ka phum nghal kak mai.Thil thlen dan engmah ka hre thiam lo. Engvanga hetianga awm hi nge ka nih pawh ka inhre hek lo.

Engchen nge kan thut ka hre lo. Kawngkhar kik thawmah ka harh deuh zawk. Mipa aw hian ‘Tu nge awm?” a rawn ti lawng lawng.Tu ber nge ka hre lo thung.

‘Keimah..Ka zo tep’ ka au let ve nghal thawr.

‘Sorry..Hmanhmawh suh,lehlam ka hmang thei chiah e’ a rawn ti leh a.Ka chhang tawh lo.

Sangkima ka en a, a meng lo. Muhil a ang viau zui bawk.Dimtein min kuahna ka laksawn saka,thawh ka tum a. Mahse, min rawn kuah lehnghal a,ka darah a hmai a rawn phum zui zat.

‘Kal rih suh..’ a ti nghal sup.

‘Ni lo,pawnah awm an awma’ ka ti ve thung.Anchhe lawh niawm takin a phun hluk.Kan inhnaih tehreng nen a sawi erawh ka hre chiang chuang miah lo. Min kuahna a thlah rualin ka tho nghal vat. Ka inhera, ka thawmhnaw chhuata tla chu ka chhara, ka awmah ka pawmbet nghal vata,ka inkuah nghal than bawk.

‘Ka lawm e’ ka hnung mai atangin a rawn ti sup. A rawn kal hnaih lai pawh ka hre lo.Hawilet chuang loin ka bu nghat.Engvanga lawmthu min hrilh nge anih ka hre lo a,zawh kher tumna pawh ka nei hek lo. Diktak chuan ka zak veng veng zawk.

Kawngkhar inhawng ri leh inkhar leh khap thawm chu ka ngaithla kara, rang lutukin ka inhera. Ka va kalha,che sawn mai loin ka thaw ham ham mai. Ka luhtirh pawh khan ka kalh ngeiin ka hriaa,mahse ka lo kalh lo tawp tih achiang. Engvangin nge a lo luh ngawt? A awmdan lah kha ka beisei loh dan lutuk a ni bawk. Atir kha chuan sex lam hawiin min rawn nawrlui dawn emaw ka ti hmana,mahse a nita miah lo. A malchunga ka thut lai khan hahdam takin a thu a, a hmel nelawm lo lutuk pawh kha a bo vek tih ka hmu thei tlat.Eng buaina nge a neih ang?!

Ka inbual zawh hnu lawkah Ampuia te an rawn chho ve a, a inbual ve nghala. Sangkima erawh Swimming pool piaha thingkunga inte an sakah Amber-i nen an lo thu dun leh hman daih tawh. Nichin lawka ka bula awm kha chu a ang leh tawh miah lo.

‘Hey,I tha em?” ka hmai bulah Nuna’n a kut rawn vai pahin a ti a. Ka phu zawk.

‘Aw,aw..Tha,thildang daih ka lo ngaihtuah alawm’ inthiam lo fein ka ti a. Nelawm takin a nui var var.

‘I that loh hmel em a chuvang mawle..’ a ti a, Ka bulah a rawn thu thla ve nghala. Ani hi Ampuia nena inzui nasa tak anni a, an thianho zingah rau rau pawh an inkawmbik tih ka hre tawh.

‘Tha e..I cheng peih tawh bik lo mi?” ka ti a.

‘Peih tawh lo,tuia awm chuan a vawt lo va, mahse chhuah hnuah a vawt em mai’ a titha ve mai.Ka ngaihtuah naah Becky a lo lut zawk.Ani hian eng emaw chen chu hriat a nei ngei ngei ang.

‘Ih,Becky…Ampuia x kha i hria em?” nuam ti vak loin ka ti a. Min rawn en a, a mitmenga mak tihna lang  deuh zawk chu ka hmu a. Ani pawh hian Ampuia nen kan inkawp angin angai ve tho a. Ampuia x ka sawichhuah vangin mak a ti deuh tih ka hai lo.

‘Um..Hria e..Ti nge?”

‘Eng ni lo e..’ ka ti leh a, han zawh tan mai dantur ka hre lo.

‘Buaina a thlen che em?”

‘Teuh lo mai,ani nen buaina tur kan nei hleinem’ nui chungin ka ti a, a nui ve hak.

‘Nia,a dik..A hlui chu a hlui animai’ a ti liam puat.

‘Ngatinge an inthen?” ka ti leh sap.’ Ka sawi awmzia chu an induh viau emaw ka lo ti a..’ ka ti leh vat.

‘Chhan tamtak a awm thei ang chu, min hrethiam la,amah nen sawidun zawk ula’ a ti a. Nuam ti lo zetin ka nui lui sak. Mipa pangngai tak bula hmeichhe dang,chu pawh thiante x chungchang lo zawh kha ka mawl ka inti leh hnuhnawh lutuk.  Angaihdanah phei chuan ka bialpa ni mek ala ni zuia.Ka cheap hmel ngawih ngawih.

Hall-ah an rawn lutkhawma, ka bulah Ampuia a rawn thu thlaa,a inbelh leh tih ka hria. Sawisel tumna ka nei lem lo. Sangkima leh Amber-i lam melh loh hram hram ka tuma,diktak chuan ka inzahpui deuh tlat. Ka nu leh Malsawma chuan ka awmdan kha min hmu se min that duh hial ta ve ang.

Christmas thlen nan karhnih chauh a awm tawh,khua a vawt viau tawha, Dawr lam erawh duhthusamin a lun thung. Zing karah khua a vawh tak deuh avangin tlai lamah Gym ka kala,Sangkima nen kan inhmu ngai ta lo. Kan picnic hnuah khan biak pawh kan inbe leh ta miah lo bawka. Min lo biak loh chuan biak tumna ka nei bik lo va, sawi tur em em lah ka hre hek lo. Mahse, a awmdan mak em em mai kha ka ngaihtuah chhuak zing em em thung.

‘Becky…I ni tiraw?” ka hmaa hmeichhe ding en chungin ka ti a. Diktak chuan a awm tih ka hriat vanga helai hmun hi kal ka ni thung.

‘Aw, ni e..Anun,I ni tiraw?” nuisang chungin a ti a.

‘Ni chiang ee.I tha em?” zangkhai tak bawkin ka ti leh a.

‘Um,tha alawm. I bazar ve dawn ami?” a ti leh a.

‘Aw, thil hote ka lei lawka..Min hrethiam la,kan inhmuh takah chuan biak che ka van duh’ ka tih zawm zat.

‘Engtizawngin nge?” a ti a. Hrethiam chiah lo hmel a pu.

‘Sawi mai a harsa deuha’ ka ti a, ka thle bak. Inngaihtuah buai deuh hmel a pu zawka,mahse a reh lehnghal vat.

‘A tha alawm.Ka la inlei zo lo deuha’ a ti a.

‘Ka hmanhmawh lo..’ka ti vat.

‘Um,anih chuan min lo nghak lawk mai aw. Hei hi ka en leh lawk anga’ a ti a. Ka bu nghat.A thil lei tur a lei zawh hnuah Floor chungbera Restaurant lar pangngai tak kan pan chho duna,ka kal fona a ni bawka min hmuh veleh tlangnel takin min lo be nghal luam.

Tukverh bula thutna awl lam kan pan pheia,ka kal hian helai hmun hi a awl phawt chuan ka pan ziah hrim hrim. Eitur a duh ka zawta, Menu a enkual dan dan.A duh a thlan fel veleh ka chah nghala,eitur an lo dah hma chu thil ho mai mai sawiin kan ti ti hlut. Tawngduh leh lu zo veh vawh tak mai a ni a, ka hmuh duhchhan pawh hi hre lo angin lang mah se a ruk tak chuan Mama nau ka ni tih a hai hauhin ka ring lo.

‘Ampuia nen intha zel em?” nui deuh sak chungin a ti a, kan ni lo tih sawi ka tum zeta, ka rilru ka thlak lehnghal vat.

‘Tha animai..’ ka ti sap.

‘A fel ve ania aw’ a ti leh a, a mitmeng nung sar maiah chuan a ti tak tak ang tih ka lo ring ve hmiah.

‘Ani chungchang sawipui che ka tum lo ania’ nui chungin ka ti a.

‘Um,anih chuan eng chungchang nge min sawipui i duh?” a titha ve mai.

‘I hre maitheia…’ ka ti a, ka ngawi leh a.Kan bul hnaiah kan tawng hrephak an awm leh awm loh ka enkual leh rih te te.

‘Mama..Ka sawi tum chu Lalrinawm kha ka u a ni a’ ka ti ta sap. A hmel landanah danglam engmah a awm lo,ka lo rinlawk kha a dik dawn a ni tih ka pawm fel nghal hmak.

‘Chuan..’ a ti fan raih.

Chhang loin ka bag ka zena, ka u Recorder tereuhte ka phawrhchhuaka,earphone ka vit luta, alamah ka nawrpheia,a mitmeiin zawhna min zawt a.Tawng loin ka beng ka khawih zauh. Ka sawi tum hrethiamin a lakanga, a bengah earphone a hnawha,a On na a hmet a. Ngaihtuah muk hmel zetin a ngaithla a. A hmai dang nghal lawp lawp chu hawisawn loin ka melh kar thung. Earphone a lathlaa,min rawn en a, a mitmeng sen ram maiah chuan ka en a. A thawng thawkhat tih a hriattheih.

‘Min hrethiam rawh’ tih pahin a tho thuta, hmanhmawh zetin Toilet lam a pan nghal rawk rawk. Tho ve chuang loin ka thut ngaiin ka thu a, ava tap dawn emaw thawk lak a mamawh nimaiah ka ngai. Malsawma sawi ang tak tak khan ka u a lo hmangaih viau anih chuan ka u nen an inbiakna khan a ti na thar leh pawh a nimahna.

‘A pawi ka ti’ rawn thut pahin a ti a. A mitmeng phelhphang maiah chuan a va luak chiam anih loh chuan a tap vak a ni tih achiang.

‘A ho lutuk’ ka ti sap. Hnem tumin ka nuih lui var var bawk.

‘Ih,diktak chuan min thawng lutuka’ a ti leh sap. Za miah loin a nui lui hak.

‘Thil hi a lo mak dawn khawp anih hi’ ka ti deuh tawng.

‘Nia,amak ..A lo record tih ka hre lo a. Bakah,a aw hriat thut kha min den dan a dang bawka’ a ti leh niah niah.

‘Um…’ ka ti ringawt.

‘Enge ka tihsak theih ang che?” a ti zawi sap.

‘Ka hre lo,mahse ka u nen hian engtin nge in inhriat erawh ka hre duha’ ka ti dam thlap. A hmui a peta, a khap sak sak mai.

‘A thui lutuk,thawnthu seitak a ni’ a ti hul hak.

‘Ka hre thiam e’ ka ti ve ngawt.A then leh saka,ka mitah tak min en a.

‘I hre thiam lo vang, kan inzawmna kha a derthawng em em angin lang mah se  a chak lutuk thunga. A nun chhan nan khan ka nunna pawh ka hlan phala,ani pawhin a phal bawka..A hlan ta renga’ a aw a lawi lehnghal vek.Kei erawh angaihna hre lo lutukin ka ang pham mai.

‘Phaia kan awm laiin Party naah kan intawnga, kan inhmuh hmasak ber tum atangin kan inhip tlata, mahse thil pakhat lek vangin kan inhmuthiam lo va, kan inthen phah ta a. Kan inhmuh leh hmasakber chu Nikumah a ni a, chuan kei leh Ampuia hi kan inzui meka,chuan ani pawh Sin-i nen..Kan inzui leh miah lo,mahse kan inhmuh chuan kan inhip lehnghal chata’ a ti leh duah. Ngaihnawm ti em em leh mak ti bawk siin ka lo ngaithla kar thung.

‘Keimah vangin Mama nen,Oh,Mama ka tih chu Sangkima ania.An pahnih hian an inhmuthiam lo a, Mama hian a vau bawka. Mahse, I u kha mi luhlul ania..I pa Boral hnu khan Mama tih ang bawk a rawn ti veleh ta chata’ a ti leh a. Ka thaw hak mai,ka hriat duh ka hre dawn ta chiah.

‘Ka u thihnaah hian enge Sangkima hian tel vena a neih?” ka tum aiin ka aw chang lam hret. Ka beisei loh lutukin a then sak.

‘I hmanhmawh lutuk,thil tamtak a awm. Tunah hian Sangkima hian min ring leh tan meka,min rinna hi hloh ka tum lo bur ania’ a ti leh daih.

‘Ka u hi thah a ni tak tak em?”

‘Aw…’ a ti tawi tak. Ka kawchhung a ni nghal deuh nghulha,ka luak a chhuak nghal up up bawk. Diktak chuan kha lehchen kha hriat tumin ka chhui tawha,mahse thah a ni ngei tih ka hriat rualin ka natdan erawh sawifiah thiam phak bak a ni ta tho mai.

Ka mu meng kar mai,ka mit ka chhin apiangin ka mitthlaah Sangkima leh ka u hmel a inlanchhawk nghal zela,ka thawpik ngawih ngawih. Engvangin nge a thah kher? Sum hi mihring nunna aiin alo ngaihlu tak tak tihna ania.Pawm erawh harsa ka ti cheu tho.

Chriatmas leh kumthar kan hmangliama, nitin apangngai rengin hun a kal bek beka,Becky nen kan inkawmngeih sawt viau bawk.Thil tamtak ka lo hriat ngai loh ka hre chho zela, mahse ka thilhriat apiangin Sangkima sual zia a tilang tam ting mai thung.

‘I puihna ka mamawh’ Becky hnenah ka va ti deuh tawng.

‘Eng thilah nge?” a lo titha ve mai bawk.

‘Barah khan buaina chhete thlen ka duh’ ka sawi zawh rualin a thaw hak mai. Diktak chuan amah tel lo a tih theih nise chuan ka ti ngei ang. Mahse, amah kaltlang lo chuan a tihtheih tlat si loh.

‘Phone a sawi loh ka duha,inhmu dawn ila i thei angem?” ka ti leh a.A ngawi deuh vang vang.

‘Khawiah nge niang?” a rawn ti a. Kan inhmuhna hmun tur kan sawi dun hnuah Phone ka Off nghala, ka intleuh zuaia,ka insiam sawk sawka. Ka nu hnenah chaw ka eichhuak dawn tih ka hrilha.Ding takin Becky nen kan inhmuhna tur lam ka pan nghal nal nal.

Darkar khat zen zawn kan inhmua,thil tamtak kan sawi dun bawk. Kan inhmuh atanga karkhatna chiahah News liantham zet mai a lo awma. A ri ta hluaia,kei leh Becky erawh kan nui dun var var mai.

‘I tih a ni em?” ka nuin min ti a. Ka thle bak ringawt.Aw pawh ka ti lo va,Aih pawh ka ti chuang hek lo. Ka hmaa chanchinbu let reng chu ka lakanga..

‘Mizorama sawrkar phalnaa zu inna hmun awmchhun leh changtlung takah zu chhia an in avangin mi pakhat a thi a, pahnih Damdawiinah dahluh anni bawk. Damdawiin a awm mekte hi an serious hle a. He chhiatna thleng avang hian Bar neitu Rosangkima thuzawhfiah turin Police lamin tukin khan an la bawk’

 Ka theh thlaa,ka then leh sak..Ani chauh hian midang tahna a siamsak tur a ni bik hleinem. Ani pawhin a thiam anih chuan kei pawhin ka thiam ve bawk alawm…Mithi an awm avangin ka ti lutuk hauh chuang lo a.Diktak chuan thi  anga lang kha anihna takah chuan a thi hauh lo va,mithi anga alan avang khan sum tamtak a dawnga,a nau lehkhazirna tur atan a lo suangtuah phak ngai loh khawpa tam pawisa a thawkchhuak zawk.Mahse, tuman amah kha an hre tawh ngai lo vanga,a hming thar nen hmun dangah a khawsa tawh zawk ang tih tuman an hre lo hek lo.Kei leh mi 2 chauh lo chuan kan hre ngai lo vang.Sawi nawn pawh a ni leh tawh hek lo vang.

Dawrah Malsawma a rawn lang hlawl.Jacket fual a haa,amah a palian bawka a nalhpui viau zel.Bakah,inchei a thiam ve hrim hrim. Dawra thawk nula hoin an stara,a lo kal tawh hi chuan an phur viau zel a.

Ka thutna bulah a rawn thu thla ve a.‘I lo hria em?” a ti nghal a.

‘Eng?” ka ti ha.A sawi tum erawh ka chiang lutuk tlat.

‘News ka lo en a…Ka naute hi alo duai lo khawp mai tih ka lo ngaihtuaha’ a nui hawk..

‘Eng news maw? Ka hrethiam miah lo ania’ ka ti leh tlat.

‘Midang chu i bum thei maitheia,mahse kei chu a theih loh’ thutak zawkin a ti leh nghut.

‘Engmah ka ti hleinem..’ ka tita nge nge.

‘Takzet?” min rawn en a, a mitmeng fim leh fiah lutukah chuan bum mai mai chi a ni lo tih alang reng.

‘Um,ka ti lo tak tak. Bakah,khatiang zawnga chet lak kha ka tum lo hrim hrim a’ ka ti leh a.

‘Ok..Anih chuan atha alawm..Becky nen inla inhmu ngai em?” a ti leh thut.Ka phu deuh zawka,mahse chik takin ka awmdan a en thla reng tih ka hriat avangin ka in control tlat thung.

‘Hmu ngai vak lo.A hma deuh khan ka u nen an chungchang velah ka biaa..’ ka ti a.

‘Um..Nia,amah khan min rawn hrilha’ a ti leh a.

‘Lunch i ei tawh em?” thildang sawi tumin ka ti a.

‘Aih,mahse angai lo.Biak che ka duh vangin ka lo kal zuai ringawt’

‘Min biak reng hi,thil ei pawh a theih reng tho a’ ka nui a.

‘Aaah, ka ei lo mai ang..Mahse, thil pakhatah biak che ka la duha.Eng lo,hna pakhatah kan thawkdun thei angem ka ti deuha” a ti a.

‘Eng hna maw?” ka ti vat.

‘Damdawi…’

‘No…Dan phal loh thil ka ti dawn lo ‘ ka tinghal hmiah.A nui suk duh chauh.Ka hnial dawn tih a hre lawk nge pawh ka hre lo.

‘Sangkima ruala ke pen kan duh chuan tuna thleng mek ang ni lo,thil tha zawk dang kan zawn ala ngaia.Chu zawng chu’ ka beisei loh lam asawi ta daih.

‘Ani nen inzawmna enge a neih a?” ka ti nghauh.

‘Sangkima hian thil pakhatah chauh ei a zawng lo tih hria la..Hotel a neia. Damdawi dawr satliah nei ni loin an semchhuak nasa em em bawka. Damdawi zawrh phalna Lisence neih dan lo ngaihtuah la.I pa thiante tamtak an awma,I pa vang pawhin an hnial che ka ring lo’ a ti leh duah. Ka khap fak fak mai,Sangkima te hian District dang thlengin Damdawi an pe chhuak tih ka hria,Pharmacy lian tak an nei a. Hei erawh tunhnaia ka hriatchhuah chauh a ni thung. Anni tluk pha tur chuan kan sum neihin a tlin dawn lo.Bakah,an lian lutuk tawh.

‘Pawisa lam chu ngaihtuah suh. Ka lo invest ang,I mamawh ang ang chu min hrilh tawp mai rawh. Kei pawn ka theih ang angin ka lo be kual ve bawk anga’ a ti leh a.

‘Ka lo ngaihtuah ang’ ka ti sap. Ka kut a rawn vuana,rang zetin ka en vat.

‘I nu lo sawipui bawk la aw..Chuan,I lamah ka tang reng ania’ a ti leh a. Chhang loin ka kut a vawnna ka melh zawka,a then suka.A la sawn ve mai bawk.

Chawei laiin ka nu hnenah Malsawma thil sawi chungchang ka sawia,Malsawma min sawipui a ni tih erawh ka sawi lo thung.Ka rin loh takin a lo phur ngang mai.’Ka kalpui ang che, I pa zarah an Director nen pawh kan inhre tha lutuk alawm. Chutiang lam reng reng ngaihtuah nachang ka  hleinem’ a ti nghal mawlh mawlh mai.

Ka Phone nghawr dar darin min ti harha,peih lo zetin ka bana..Min rawn call tu ka en a, Malsawma..Pick loin sana ka en hmasa te te.Dar 6 chauh,huizz…Mahse, pawimawh a awm anih loh chuan Malsawma hian min be mai mai ngai tlat lo.

‘Hello’ ka ti sap.

‘Ka rawn tiharh che em?” inthlahrung aw deuhin a rawn ti a.

‘Um,mahse a pawi lo’ ka nui a. A thaw hak ri ka hre thei.

‘A pawimawh lutuka..’

‘Engthil nge?”

‘Pakhatnaah chuan Sangkima kha Police-in an kawl tawh lo va, kha chu thuzawhfiah atan chauh ania.Reitak kawltur anni lem lo hrim hrima. Pahnih naah chuan Becky a thi’ ka thuchhuak nghal zawk.

‘Eng…Engtin maw itih?” ka ti nghal nawk nawk mai.

‘Nizanah a haw lo va, tukinah a ruang an chhara, Accident anih hmel’ a ti leha. Ka thaw hleithei lo…