ANNEM- 7

Chapter- 7

Thawk pawh thaw tha ngam loin ka awm naah ka thuhniama, ka Scooty bula mi pahnih ding chu ka en kar mai.

‘A kal hlat ka ring lo..E,awle’ Phone kengtu zawkin a ti leh a.Pakhat zawkin a Phone lightin ka awmna lam a rawn chhuna,mahse ka awmna hi hruizam chi a ni a, Japan hlo kan tih ang chi khan a zam hnan luk bawk nen hmuh mai theih a ni lo.

‘Kal ang..’ a ti a.

‘Maw? Sawlai saw ka va enlawk ang’ tih pahin ka awmna lamah a rawn pen pheia,zun ka cheh mai dawnin ka hria. Ka lungphu ri te chu ring em em hian ka hre bawk. Thlasik vanglai a ni chungin ka chalah thlanfim a bawl tawk tawka,ka sahal up up bawk.

‘Kal ang.. Boss-in kalsan turin min ti alawm,Hmanzanah pawh Becky kan kalsan dawn khan thu i awih loh vanga kan chet buai teuh zia kha ngaihtuah ta che’ bak deuh hlukin a ti leh a. Ka kutin ka hmui ka hup vat,ka chet zawngin ka tum loh lutukin hnim a che nghal laih bawk. Ka mit ka chhinga,thawk pawh thaw tha ngam loin thil thleng zui tur ka nghak ta ngawt.

‘Kal ang ka tih chu,mi an lo kal in ka hria ania’ zawifiah angreng taka tih thawm ka hre leh a. Kalsawn thawm ka hriat rualin ka mengchhuak vat,Light de zauh zauh hla tial tial chu ka en a. Ka thawchhuak nghal hawk mai.

Tho chhuak mai ngam loin ka thutna ngaiah ka thu deuh ren rawna,an lo la kal hlat loh chuan ka chhuak min hmuh rualin min lo khawih ka hlau a ni ber. Ka kal dawna ka chemte ka dah ta kher kher kha ka inchhir vawng vawng. Mi nunna lak hi ka ngam ngaiin ka ring lo va, mahse mahni invenna tur atan a tul em em tlat.

Motor thawm ka hriaa,reiloteah a rawng eng phei pup pupa, min tlanpela..Motor light engah khan ka lo hawikual chiam hmana,mihring ruangam awm ka hmu lo.

Ka dingchhuaka,ka lo thuttawm rei bakah hlauhlawpa tawm ka nih avang khan ka lo tang nasa lutuk a ni ngei ang. Ka hah vek thei hial. Ka kut khur deuh dar dar chu ka kekawrah ka tat nawk nawka,Scooty lam ka pen pheia..Hmanhmawh lutukin start ka tuma,ka hmanhmawh leh lutuk leh ka kut khur avangin chahbi ka la vuah lawk thei lo zui. Ka Start theih veleh chak zetin ka tlanchhuak nghal zawk. Ka duh ber chu in thlen vat a nimai.

Kulikawn ka pel tep tihin Car pakhat nen kan intlan pela,min ko ri niawm tak ka hre zui a,mahse ka ngaihven hman tawh lo. Bakah,hmelhriat satliah bak annih ka ring lo hrim hrim.

‘Chaw i ei tawh em?” min hmuh veleh ka nuin a lo ti nghal a.

‘Aw..aih, ka ril a tam rih lo’ ka ti buai nak.

‘Ngawt zel che hian,tlem tal ei rawh’ a ti leh a.

‘Ka lu ana,ka inbual anga ka mu nghal dawn ania’ tih pahin ka room lam panin ka chho nghala,ka nuin min ko zui nangin ka ngaihven lo. Roomah ka luta, kawngkhar ka kalha..Kawngkhar nghengin chhuatah ka thu thla hnawka,ka hmai hupin ka tap ta hlawp hlawp. Engvanga tap nge ka nih ka inhre lo va, mahse ka tah a chhuak em em a ni tawp mai.

Ka phone a rawn ri a, ka mit ka nuai chat chat. Eng chen nge chhuatah ka thut ngaiin ka thut ka hre lo. Ka thutna bul chhuat a ka bag dah ka laa,ka phone ka phawrha. Min rawn calltu ka hmuh rualin ka sa nghal phat mai.Ka thi nge ka la dam a hre duh bak va ni suh.

Ka reject hmak mai,biak nachhan tur pakhatmah ka nei lo hrim hrim. Mahse, a rawn call lehnghala..Thinrim lutukin ka reject leh hmaka,ka Switch off zui nghal hmak.  Bagah phone ka hnawh lut leha, tho mai loin ka hawikuala,Light ka la on loh avangn kan inpiaha High - Mast light engin a rawn chhun en deuh bak engdang awm loin a thim veka. Thim chhe lutuk erawh a ni lo thung. Ka thaw haka,ka hmai ka tuai lehnghal puat.

Ka duh emaw duh lo emaw tawpsan thei ka ni dawn ta miah lo a, khawiah pawh kal ila ka inven reng a tul tawh dawn bawk. Engberah nge bul ka tan ang ka hre thiam mai lo. Malsawma leh ka nu ka ngaihtuaha,engmah tih tawh loh ka duh tih ka sawi avangin tawpsan pawi an tih loh thu nimin lawkah min hrilha..Tuna ka thil tawn hi hrilh vaih ila chuan ka sawi ngai miah loin an tan leh phat dawn tih ka hai miah lo. Ka lu ka thing nak,ka hrilh ang nge hrilh lo ang tih ka ngaihtuaha,ka hre thiam lo..Min khawih nat hun ka nghak law law dawn nge Malsawma puihna ka dil mai dawn? Ni lo,kawng eng emaw tal chu ka nei ang. Ka thi dawn anih pawhin vawikhat tal chu an chhiatna tur thil ka tih leh ngei ngei angai. Hmingchhe taka ka siam ve ka tumna lah khan engmah min thlen zui ta bawk si lo. An dawr an kharsak lo va, Customer dawr theih loh tura nikhat lek an inkhar bak engmah tih zui a awm lo. Thiam takin thupha chawina an tichhuaka, khatiang thil thleng kha pawi an tih thu leh a thlen dan chhuizui an tiama..A zo leh vek!!!

‘Hmeli,ka ngei lutuk che’ Lawmi’n rawn thut hnaih pahin a rawn ti hlak hlak.

‘Enge?” ka ti liam puat. Dawra kan thil mamawh ho leitur ziahna list ka en san daih bawk.

‘Nizan khan Malsawma nen tum loh lutukin kan inhmu a,ka che buai tep alawm’ a ti leh a.

‘Malsawma maw? Tinge?”

‘Anun-i nen inchhuak lo em ni? Khawiah nge? Atia,ka buai hman zia chu. I haw tawh em ka hre bawk si lo’ a ti leh hmarh hmarh.

‘A ho em maia,ani lo buaina tur a awm lo..’ ngaihtuah vak loin ka ti leh mai.

‘Lawk,engtin nge nangmah nen kan chhuak tih a hriat si? I hrilh ami?” a ti leh hluai.

‘Hrilh nang,Inah a lo kal anga,ka awm loh vangin ka nu a zawt tihna animai alawm’ ka ti leh mai.

‘Nia,dik chiah…Ka lo ngaihtuaha,ih…Malsawma..’ a ngawi leh daih.

‘Eng maw i ngaihtuah?”

‘Ih,diktak chuan angaizawng che in ka hria’ a sawi zawh rualin ka nuichhuak nghal hak mai. Lungawi lo zetin a tum vei hmak thung. Ka thiante hian eng hi nge maw an hriat tehreng ni? Ampuia nen lah khan min hmu inngaizawng ngawt tawha,tunah Malsawma a ni leha. Em em lutuka,an mipa sawite lah an chhe zawk zawk lo ve ve a, nula lama luck pangngai tak anni ve ve bawka. A awm lo ve lulai lutuk.

‘Malsawma leh ka u inkawmngeih zia i hriat kha,min endan chu nau ang animai..Hria maw?” nui chungin ka ti a, a ner deuh nak.

‘Nia,a tha alawm.Anih leh Ampuia nen in inthen tawh mi?”

‘Ninawm e… ‘ ka ti hlak.Ka ning tak tak.

‘Sorry…Enteh,Gym hi kal ve ka duh e. Ka gain nasa lutuka,in kalna hi a tawt em?” inpersan zetin a ti leh a.

‘Tawt vak lo vang,ka lo kal ve rawh’

‘Kal thar an awm em? Fit loh pui tur’

‘Nimin piah lawkah pawh mithar chu an awm. Lungngai suh,keipawh hi engteh ual ka la ni lo’ ka ti a.

‘Ampuia min lo biaksak nghal teh,naktuk atangin kal ka duh tut tut ania’ a ti leha. Kan naupan lai atang tawhin hei hi chu azia ve reng anih avangin mak ka ti lem lo.

Ampuia ka calla, ka be fel nghal veka. ‘A duh phawt chuan tlai atang pawhin a kal thei ang ‘a rawn ti a. Mahse, keimah zawkin kal ka tum loh avangin naktuk tlai atanga tan turin kan ti a,ka biak fel hnuah phur zetin a sawi zui nghal siam siama. Dar 3 velah dawr kan chhuahsana,Dawra kan thil mamawh ho lei tul thenkhat lei turin inchhung bungraw zawrhna dawrah min kalpuia. Eisiamna tur lam thil pawimawh hi chu Manager leh Cook kutah ka dah deuh tawp avangin ka inrawlh ve ngai tehchiam lo thung.

‘Enteh..Lo lut chiah saw Sangkima a ni chiang lutuk’ rawn kun hnaih pahin Lawmi’n a rawn ti sa sa. Zing lamah a kal thin avangin tlaiah chuan hmuh ka lo inbeisei lem lo.

‘A kal ve thin a,mahse zing lamah ania.A tho hma peih lo aniang’ nui chungin ka ti a. Ngaipawimawh lo hmel thei ang bera lan ka tum a, ka hlawhtling thawkhat viau bawk.

‘Awi, ka beisei aiin nuam ka ti dawn tlat. An chhe lo hlawm fua fua lutuk’ nui kar kar chungin a ti leh a. Ka ner khum nak ringawt.

A awm ve tih hre lo ang hmakin ka tihtur ka tizui nghal mial mial.Lawmi tihpui angai leh zauh thina,mahse Instructor a awm a, Ampuia a awm bawka. Min tibuai lutuk lem lo.

In ka thlenin Malsawma a lo awm a,ka nu nen an lo titi dun mawlh mawlh.

‘I lo kal alaw?” satliah deuhin ka ti a.

‘Um,lo kal zuai..’

‘Lo thu teh,hei vawiinah Mala hian min va kalpuia,kan beisei aiin kan hmu hma dawn tlat mai’ ka nuin phur fahranin ati a, a sawi awmzia ka man lo.

‘Eng thil maw?” ka ti a. Ka thlan vangin ka ban deuh chuap bawk nen,inbual ka chak ngang mai.

‘Ava mak e aw..Drug Lisence kha mawle. Kan duh ang thlap kha anih hmel lehnghala,kan vannei khawp mai’ ka nuin a ti leh a. Ka lo manghilh daih chu niin.

‘Anih chu..Ka han inbual lawk ang,ka thlan nasa lutuka’ ka ti a.

‘Hmanhmawh suh,I nuin chawei turin min sawma, ka chhungte an awm bawk si lo va, lo kal zuai chauh tum khan ka hnial loh lam anih avangin ka hmanhmawh lo’ nui chungin Malsawma’n a ti a, tawngkaa chhang loin ka bu nghauh. Ka u damlai khan sawilawk lem lo pawhin chaw chu a rawn ei reng renga, ka u pawh an inlamah sawm lohin a ei tawp tawp fo bawka.Zanah lah Game an khelh laklawh chuan an khelhna hmun kha an in a ni emaw kan in pawh nise an riak nghal fo bawk. Kan inah hian englaimahin Mikhual a ni ngai lo va, ka nu leh pa tan chuan fapa pakhat zawk ang mai a ni thina, ka u thih hnuah phei chuan kan tan a hlu lehzual sawt zawk.

Ka inbuala, ka inbual laklawh laiin ka mitthlaah Sangkima a lo lang zawk. Thinrim zetin ka lu ka thing nghal nawk thung. Ruatsaka hnen atangin a chetvel dan ka dawng zat zata, ka tana tangkai tur thil danglam bik erawh a awm rih lo. Bakah,phuba lak ka tum tih a hria a,a fimkhur hle reng tawh ang. A pawi tawp lo,ani pawn min thah tumin min veh ve reng tho.

Ka nu leh Malsawma’n chawei laiin tunlaia khawvel tibuai mektu Hripui leng mek chanchin an sawia, ka sawi ve lem lo. Mahse,Corona chungchang News  erawh ka chhiar hmaih mang loa,ka ngaihven  ru viau thung. Indiaah kai an awm tawha, mahse mizo mipui erawh kan la ngaihtha viau rih. Mizoram hi lo thleng ve ta thut mai se kan nasa lo viauin ka ring. Tihkhawm neuh neuh kan ngah avangin a darh hluai thei a. Damdawi lama in enkawlna lah kan pachhe em em bawk sia.Fiamthu pui nana hmang tawk lah an bo lo.February thla chanve kan thleng tep tawha, khua erawh ala lum hran lo.’Khawlumah he natna hrik hi a dam thei lo,hlauh vak tur a ni lo.Mizo chu insawithaih kan ching’ ti zawnga thu la tlat tawk lah an tam. Khawvel ram ropui China pawhin a buan hneh mang loh kha Mizo zingah chuan fiamthu thawhna pakhat lek ala ni rih mek chu ania.

Ka mut hnuah kan thianho Groupah kan nawi hlut,Lawmi gym rawn kal vein chhe lo an tamzia a sawia. Kan phul zui chiam. Hmeichhe pali lek kan ni chungin midang kan ngai lo lehviau tawh. Groupa kan thilsawi hi chu engmah hi chhuak leh turah kan ngai lo hrim hrim a. Sawi hreh leh tim deuh pawh kan nei meuh thin lo.

Karkhat lai Lawmi pawh a rawn kal ve tawha, a tlangnel ta deuh bawka,nuam a ti ve tawh viau mai. Ampuia nen pawh College kan kal laia lo inhre tawhsa annih avangin an inkawm thei zui nghal mai.

‘Ka kalpui lo mai ang che aw..Ka nu lam kual ka ngai sia’ a ti a.

‘Um,a pawi lo..’Jacket hak mawlh mawlh pahin ka ti a. Sangkima rawn lut mek ka va hmu a, ka hawisawn lehnghal mai. Tlai tin a lo kal ve ziah avangin mak tihchiamna tur a awm miau lo va.

Lawmi nen kan inzui chhuaka,Ampuia’n min rawn zui ve vut bawk. Gym kal ve dang pawh hian kan inngaizawng angin an hre vek tawha. Ka ni awm zui ta vel mai mai zel chu ania.Mahse, Ampuia lakah erawh ka inthiam chiah lo thin,amah pawh hian min ngaihzawng chei tih ka hriaa,mahse anihna takah chuan nula tlangval awmdan tur hian kan la awm chhin lo tihtheih a ni. A khat tawka inkuah satliah tihmai loh chu..

Lawmi a nu lam turin a kala,kei erawh MC piah deuha ka nu thiannu dawr lam ka pan ve thung. A zin a rawn hawa,ka nu thil tur a rawn hawnsaka,ka nu hmuchak phengin lam turin min tur tet tet. Thil ropui deuh emaw a lo hawnsak ka tih laiin Pangpar chi lek chu niin.Pangpar hi mawi lo ka ti pawh ni loin ka buaipui ngai lo ve hrim hrim.’Thu rih la,thingpui te in ang’ ka nu thiannu,nu thau no suah maiin a ti a, ka hnial a. Khua a thim dawn ruai tawh.

An dawr hi zingkar dar 6 atangin an hawng a,eichawp dawr lian zet mai a ni a, zan lamah pawh  dar 8 thleng an hawng tlangpui. An hnathawkte pawh shift hnihin an thenhranga, zing kal leh tlai kal an awm hrang vek. Ka dawr pawh chuti tho chu a ni a. Staff an rim lutuk lo va,an mimal thil an ti hman thin bawka,a neitu leh chhawrtu kan lawm tawn ve ve a, a tha phian.

MC Parkingah Scooty ka daha, ka pan pheia,Mipui zi nuai nuai karah ka inzep phei tawlh tawlh.Ka Scooty dahna ka pan pheia,an lo nawrsawn daih chu niin.Two wheeler intlar dul chu ka enphei dan dana, thlanglam bang kil lam ka thleng tep tihah ka hmaah tak Sangkima a rawn ding thut. Ka beisei lo lutuka,inring hman loin ka phu nghek. Gym atanga kan haw dawn khan a lo thleng ve chauh kha ania,tunah darkar em pawh ala liam si lo a,engtin nge hetah a lo awm daih theih ni?!

Ka harhchhuak thuta, engmah sawi loin a sirah ka kalpela,athlang kil bera ka Scooty lo awm chu ka zuk hmu a. Light awmna a hlat deuh avangin alang thim deuh khup a.A nuam tehchiam lo viau.Mahse, ka bul hnai maiah Sangkima a awm tih ka taksa peng zawng zawngin min hriattir sup sup a,ka bag ka zena.Chemte kawihthleh tereuhte ka dah chu ka zuk dap fuha.Ka hum nghal chat.A rawn kal hnai anih vaih chuan ka vit chiang khawp ang,helai hmunah hi chuan min that tura chetlak a tum ka ring hauh lo nangin a rilru chhe lutuk hian plan dang a nei lo ang tih ahriat tlat loha,fimkhur tluk a awm thei lo.

Ka Scooty leh abul chiaha Bullet Bike ding chu a insi deuhthawa,a thlanglama ding pawh chuti bawk.Engtin nge maw hetiang khawpa tawt leh fel thlap si hian an dahthiam thin zawk ni?Bike chu ka en a,ka tisawn zo dawn lo chiang khawp.Beidawng ru zetin ka thaw hak mai. Helaia hnathawk zing ami tu emaw ber min pui tura ka sawm mai angai dawn anih hi a..

Ka inhera,ka hnungah Sangkima a lo ding leh hman tawh. Ka su lo chauh bawk. Eng chu nge maw a hriat hrep ni? Kal pel tur pawhin angaihna a awm lo.A din dan chuan min dal hneh lutuk.

‘Ka lo kal lawk thei em?” ka ti chang fak.

‘Ka be duh che a..’

‘Kalsawn rawh,tunah…’ ka ti leh hmak.Ka aw a ring hran lo nangin mi pangngai tan chuan din luih chi a ni lo ang. Ka aw chhuak kha ngaihno a bei lo fahran lutuk.

‘Ka be duh che’ ka sawi hre lo ang hmakin a ti leh sup. Ani pawh a aw a ring bik lo.

‘Tu nge awm hnai che u.Puih ka ngaia’ amah en ran chungin ka ti nghal vak. A mit a tizima,a hmelpa leh ngeng zetah chuan ka hriatthiam chiah si loh thil alang zawka.Mahse, a reh lehnghal vata.Ka rin loh lutukin a nui ta suk. Chu aia mak lehzual ala thleng ta cheu,min rawn hnaihchilh lehzual thuta, ka inrin hmain ka kawngah a rawn kuaha,min pawthnai nghal rawka.A taksa lian leh infit zetah chuan ka bet ta ran mai.

‘Min hnial hlek suh’ rawn kun hnaih pahin a ti nghal sup. A awki,chiang leh thupe aw lutukah  chuan thihna tur khawpa dengkhawng thupek a ri tel nimaiin ka hria!!

‘Tu nge au kha? Nawrchhuahsak inngai em?” Mipa aw hian a rawn ti a. Au mai ka tuma,mahse Sangkima’n na zetin min rawn melh hrawk.Ka ip chawih a,ka ngawi ta hle hle.

‘Kan tithei dawn e..’ zangkhai vuhin a au let nghal a.

‘A that hlauh chu’ Mipa rawn au bawk khan a rawn ti let a,Sangkima’n min hliah hneh lutuka,a phenah ding ka awm tih pawh a hriat ka ring lo.Kei pawn ka hmu thei lo hrim hrim.

Min kuahna a thlah rualin ka bag ka zena,Chemte ka zuk huma. Mahse, ka thiltum hre lawk ang maiin ka banrekah a rawn hmer leh ta chat.

‘Ti duh suh..A tul lo’ a ti bung vut.

‘Min thlah rawh,Mi tenawmpa’ ka thinrim lutuk vangin ka aw a khur a.

‘I nu in a fanu Jail tang lai hi hmuhnawm atih ka ring lo. I ring em?” a ti leh hmuk. Ka chhang eih lo.Mahse, ka bula ding mek hian engthil nge a tihtheih ka hre chiang viau tawha. Tun lawka a sawi pawh kha dawt a ni lo tih ka hria.

‘Min thlah rawh’ ka ti dam sapa. Kan awmnain a zir miau loh avangin au chiam chiam theih a ni lo.

‘ Ka ringngam dawn che em sawi phawt rawh’ luhlul leh mahni inringtawk zetin a ti leh nghut. Tihtheih ka nei lo tih ka hria,bakah ani hian min tihnat tum ni loin min biak a duh tak tak niin ka hre ta bawk.

‘I kut tenawm kha lasawn rawh’

‘Ok..Ka lasawn ang.Ka thlah che a,a tha em?” a tihzawm zat. Ka banrek a hmerna kha a hmer nghet bawka,a thlah hnuah pawh ana vang vang.

‘Pangngai taka biak che ka duh a.Tharum a tel lo’ a ti bung vut. Ka ner nawk thung.A chet tawh dan kha ka hre lo emaw a ti anih hmel e.

‘Pangngai taka inbe turin inzawmna kan neih ka hre lo. Tin, min sik emaw tumna inei leh anih chuan a pawi ang’ ka ti leh hmak.

‘Ok.Ka call i pick duh lo va, inhmuh kan tumna lah ilo kal lo bawka. Gymah min hel zar zara..’

‘I naute khan an hrilh che emaw ka tia. Ka lo biru hlauha,chuti ni lose chuan ka ruang an chhar daih tawh ang chu’ huatna akhatin ka ti tawk.

‘Ka naute…Lawk,ka hrethiam chiah lo.Sawifiah deuh mai teh’ a ti leh a.Min en chhuk run bawk.

‘Ngaizelah khan i mi tirhte nen ininbiak lai khan an bul lawkah ka dinga.Chuan..’

‘Tumah ka tir lo..’ ka sawi zawh hmain a lo ti hmiah.

‘I tir,mahse min that ta lo hlauha.Ka ngaihtuaha,mahni farnu pawh that duhtu chuan kei chu min that hreh dawn lo lutuk tih hre tur ka nih laia,I sawmna ka lo pawm kha ka at vang tih bak hriat ka nei lo’ ka ti leh duah.

‘I thilsawi kha ka hre loah ka ngai ang’ chang zetin a ti hluk.

‘Hriat loh der a tul lem hleinem,Becky khan min pui tih ihriat avangin i that anih kha’ ka aw a khura, Becky ka khawngaih luat avanga ka mittui rawn tla chu ka kut hnunglamin thinrim zetin ka hru tawk bawk.

‘Ngawi hmak rawh’

‘Ka ngawih avangin alo tho leh dawn em ni? Hmingthatna leh sum aiin a nunna kha a hlu zawk asin’ ka ti leh fak fak.

‘Ka farnu ania sin..’ a aw pa zetah chuan na tuar ala ang phian zui. Mahse, engkim mai hi lemchan anih tlat avangin Best Actor Award hlan hial tlak zuk ni a..

‘Kalbo rawh.Ka hua che’ ka ti leh tawk. A thaw hawka,a kut hnung suihin a ding a, hriatthiam har lutukin min melh reng.

‘Enge i duh?” ka beisei loh lutukin ati chhuak sup.

‘Thi suh,achhan chu ka kut ngei hian thah che ka duh.A chiang em?” ka ti dam thlap. Engtin nge damthlapa ka sawi theih pawh ka hre nek lo ve.

‘Ka pawm e. .A hlimawm ngawt ang.Lawk,thil pakhat leh chiah..Ampuia hian i play mai mai tih a hria em?” a ti leh daih.

‘Lo buai duh suh.Ka play leh play loh chu amah nen kan hre chiang a. A tawk mai’inringtawk zetin ka ti hmak.

‘Engvangin nge min beih?” a ti leh hmuk.

‘I hria..Chuan,min hrethiam la.Haw ka duh tawha,I kalsawn theih chuan min puitu tur ka va ko ange’ dak deuh vahin ka ti leh hmak.

‘Midang koh angai lo vang, Keiman ka lo ti ang. Leh lawk’ a ti liam leh vuta, ka inrin hmain min rawn si deuhthawin a rawn ding hnaia,a kut hnung suih a phelh chuang lo. A rawn kun hniama, a mitthim khap leh dum fiah zet lawi si chuan hnai set sawtah min en a..’Hmeichhe tamtak te nena danglamna i neia,I hmeltha bawk..Chuan,I mitmeng lian leh zahawm zet bakah i hmui kha Mipa te chawkphur tur liau liau a siam a ang,midang te nangmahah an hahdam ngawih ngawih thei a ni tih Ampuia chuan a hrilh tawh che em?...Aaah,hrilh tur chein a hre chiang tlat lo che a” a ti leh sup. A dingmar zui nghal daih bawk.Ka beisei loh lutuk a sawi chuan min thawng deuh dawta. Fakna nge tihelna ka hre thiam lo.Chhan mai dan tur pawh  ka hre chiah lo.

A thle deuh buka,a then zui leh suk bawk. Hmeichhe hmeltha ka nih ka hre lo va, mipa tana phurna kei hian ka thlen ka hre ngai hek lo.Hahdam phei chu khawi lamah,ka nu leh pa pawhin ka unau te aiin min duat lo bik a,ngainat hlawh lo ngawih ngawih ka ni tih hi ka inpawmdan diktak a ni bawk.Chu aia mak lehzual chu tlang taka ka nihdan min hrilhfiah tumtu hi midang ni loin ka hmelma,Rosangkima a ni tlat!!

In ka thlen veleh ka nu hnenah a pangpar chi tur ka pe a. Room lam ka pan ding nghal nalh. Ka inhlip sawk sawka, ruakin Darthlalang hmaah ka dinga, a sawi ang kha ka ni reng em tih ka in en a. Hmeichhe dang te aia ka danglamna reng reng ka hmu lova, ka hmel lah a that ka hre hek lo.Awmze nei lo lutukin ka nuichhuak nghek. Atthlak lutuk, a tawngkam phenah khan thil tamtak pawh a awm theia.Engvangin nge a sawi ka awih ngawt ang ??

Bath roomah ka lut a.. Shower hnuaiah ka ding a, ka banrek a khawihna laiah sahbawn ka hnawiha,ka nuai chiam. Awmzia a awm lo lutuk chu mi a ang maiin ka nui leh hawk ringawt.. Bang nghengin ka dinga,ka mit ka chhing vang vang mai. Rosangkima nena kan inbiakna kha tun lawka thleng ang maiin a in dawtin ka bengah a rawn ri nawn a. Becky chungah kut a lek lo tih a sawi kha chu fiahna ka neih a beitham lutuka engtia ngaih tur nge ka hre lo. Mahse, min thah tumin min veh tih a pha kha chu ka ring chhete lo. A hmelpa leh induhtawk zet ka mitthlaah a rawn lang zui leh zat. Ka Scooty bula Bullet bike kha ama ta a lo ni a, Scooty min nawrchhuah sak a. Lawmthu pawh sawi loin ka tlansan hmak.Mahse,MC atanga ka tlanchhuah khan ka hnungah a rawn tlan ve a. Kan veng lam penga ka tlan hnuah pawh a rawn tlan ve zela. Kan in a ka tlan luh dawn khan kan inpiahah ding chungin min thlir tih ka va hmu thei bawka.Eng chu nge maw a hriat hrep ni?!

Rosangkima nen kan inhmuh atangin nihnih a liam leh tawh. Gym ka kal leh ta rih lo bawk. Ka nun a nguaia,bakah ka hmu hreh tih ka hai miah lo bawk. Engvanga hmu hreh nge ka nih erawh ka inhre lo. Kan inbiakna kha vawi tamtak ka ngaihtuah nawn tawha, atthlak ti em em siin a tawpah chuan tlang taka ka chungchanga sawina bawkah khan ka duhtawk leh nge nge thin.

‘Zanin atan kan inpeih e’ Ruatsaka’n a rawn ti a. Ka then sak mai.

‘Ok,fimkhur theihtawpin aw. Tihsual a awm tur a ni lo’ ka ti sap.

Ka Phone riin min tiharha, min rawn call tu ka en a. Malsawma.

‘Hello..’

‘I tih a ni tiraw?” a rawn ti dam thlup.

‘Eng chu?”

‘Tunah hian Rosangkima Hotel chungber,Restaurant awmna kha akang meka. A hmuhnawm khawp mai’ a rawn ti fan ruih.

Ka Phone ka lasawna, muangchangin thawk ka la raih raiha..Ri miah loin thim zingah ka nui ta var var.

Note: Inthlahrung Hauh loin click thei tan hun ka hawng leh e🤭...Chuan,Tun tum ka Story hi M&B in lo beisei chuan M&B a ni chiah lo tih ka lo sawi lawk aw.