ANNEM- 8

Chapter- 8

Ka harh veleh ka phone ka en nghala,Ruatsaka Msg a lo awm vang

‘Done’

News group lamah ka lut kuala,khawi Groupah pawh Sangkima Hotela kangmei chhuak chungchang hmuhtur a awm vek. Current line kalsual vanga thleng angin an ziak hlawma.Ka thaw leh sang sanga,kangmei chhuak avangin nunna chan an awm lo va, mahse bungraw kang chhe ho hlut zawng erawh a tlem lem lo.

‘I insiam tawh em?” Phone ka pick veleh Ampuia’n a rawn ti a. Vawiin hi a Cousin nupui neihni a ni a, kal ve turin min sawma,hnial loin ka lo aw ve mai.

‘Insiam mek…I lo kal tawh dawn mi?” ka ti a. Ka bengbeh beh tur thlangin ka tlereuh bawm ka hai paha.

‘Chhuak dawn chiah,Bike ka lo keng mai dawn sin.Motor chu Parkna tur a buaithlak duh lutuka’ a rawn ti a.

‘Pawi miah lo,I tih dan dan animai’ ka ti awlsam leh mai.

‘Ok..Ka lo thleng har lo vang’

Phone ka daha, ka kawrhak tur ka la chhuaka,ka ha a.Mahse, ka confi lehpek lo.Ka hlip leha,ka thawmhnaw inkhai tlar put chu ka en a, Sunday chawhma chauh inkhawm ṭhin ka ni nangin thawmhnaw erawh ka nei del dul. Mizo Designer ṭha ho kutchhuak ka inbel ve nasa a. Ka nu hian a buaipui bawka,thawmhnaw ka nei ṭeuh hi amak lem lo.Sangkima Bialnu Amber-i kutchhuak pawh ka nei nual. Mahse, Sangkima bialnu a ni tih ka hriat hnuah khan vawikhatmah a dawrah ka kal nawn leh tawh lo. Bakah,ka neihsa ho pawh ka ha nawn lo hrim hrim. Ka hak tak loh chhan sawitur ka hre lo,ka duh lo tih bak chu. Kar hmasa lawka ka lei, ‘Kc_ Fashionista’ kutchhuak ka ha ta zawk. Ani hi Desginer tharlam leh la naupang tak, hmathlir nei ṭha ber zinga mi a ni a. Mission vengah nikum mai aṭangin dawr an hawng ṭana. An kutchhuak hian belhchian a dawl takzet. Ka bengbeh beh tura ka lakchhuah  sa beh tumin ka beh lai ka phelha, ka nu a rawn lut ve chiah bawk.

‘Ampuia a lo kal tawh mi?” a rawn ti lut a.

‘Kal tawh,alo thleng har lo vang. Enge?” ka tihzawm zat.

‘Nizanah Rosangkima te Hotelah kangmei achhuaka’ min zawt pawh ni loin a ti a.

‘Chuan…” ngaipawimawh lo hmel zetin ka ti liam puat.

‘Kangmeichhuak satliah nge ni anga midangin an chhuah luihtir tih vel ka lo ngaihtuaha’ a ti leh a.

‘Vanduai vang animai ang chu’ ngaihsam hmel tak bawkin ka ti leh mai.

‘Nia,a ni tho mai. Bakah,an nun a chhe em maia,hmelma keini lo pawh an nei ṭeuh ang chu’ a ti leh a.A awah thinrim insum a ang.

‘I pi pumna kha an entir nawn leh a, Cancer alo nia’ amah bawkin a ti leh a.  Min ṭhawng deuh zawk. Ka pi atih hi  Ka pa nu ni loin ama nu zawk a ni a, kum 74 vel a ni tawha. Tun hnaiah a pum a sawisel deuh renga, an entir a. Awmzia vak a nei  thei lo va, Doctor an thlak leh a,awmzia a nei chuang lo.Ka nu pawh a kal phei deuh reng bawk.

‘Ehe!! Aman a inhria em?” ka ti vat.

‘Hre lo aniang.I Putea khan engmah kan hrilh lo a tih kha,mahse ani hi chu a fing em maia,a lo hrethiam leh tho maithei’ a ti leh a. Nia, tar fing tak a ni a. Kan inhnaih lutuk loh vang leh helaiah ka pa nu leh pa nen insi rengin kan awma,Pi leh Pu nih an tlin em em bawk si nen ka nu nu leh pa te lam hi chu ka ngai tehchiam lo.

‘Engtin nge tihzel an tuma? Zai chi a ni em?” ka ti leh a.

‘Ka hre lo,ka phei dawna. Chaw i ei chhuak dawn tho bawka,keipawh ka phei law law chuan ka ei nghal anga. Rorel deuh te angai dawn a,Phai lama kalpui pawh a tul maitheia’ a ti leh a. Ka bu nghauh,ka Putea hi a sual lem lo nangin a nep ve a. Eizawnna lamah chuan P&E ah SDO a ni ve vunga, mahse Unau zinga naupangber leh mipa awmchhun a ni bawk nen an duat no ve laklawha. Eng emaw hlekah ka nu leh ka Nutei a pun ruai ziah hrim hrim. A nupui a fel ve hrim hrim bawka.Fel viau lo se chuan farnu pasal nei tawh te hoin  ro va rel sek chu a buaina tham a tling ang.

Inneihna tur hmun kan thlenin an lo thleng ṭhup tawh. Ampuia Cousin te ho hi ka hre ve nual tawha,An fel viau vek.Nupui nei ber hi Dentist a ni a, a nupui erawh Social welfareah a thawk thung. Mi pangngai tak ve ve innei anni bawka,Biakin kan khat hneh ngei mai.

Inneih inkhawm a zo va,Ampuia telve ngai chi thlalakpui tur an ziah lawkah a awm nual avangin Biakin chhungah keimahin ka lo ṭhu a. Midang pawh ṭhu an awm ve nual bawk. Ka ṭhutna a che data, ka hawi nghal vat. Ka beisei loh lutuka Sangkima ka hmuh takah chuan ka ṭhu mar deuh awk thei. Min lo en reng zui. Nizanah a Hotelah kangmei a chhuaka,tunah inneihna lamah a kal mai maia. Kawngro a su leh vak dawn lo tihna a ni mai angem? Ka inngaihtuah harh thut, tunah hian zawhna ṭul lo lutuk lo inzawhchiam hun a ni lo chiang.

‘I ṭha maw?” ka ti nghat.

‘Ṭha alawm,nang ?’

‘Ṭha…’ka ti tawi leh tak.

Ka melh leh zawka, mahse min en loin a Phone a lo en a.Chik zetin a incheina ka en a.Blazer Uk a haa,a hnuaiah Kamiz var thianghlim zet a ha bawk. A kamiz hak chuan a tilang hang zual deuh a, mahse alang pa em em thung.Huizz,engvangin nge hetiang zawnga ka lo ngaihtuah ni a??!!

‘Nizanah i Hotel a kang tih ka lo hriaa.A zia lo hle mai’ ka ti leh a.

‘Tak tak maw?” a ti hmuk. Ka en vata, hriatthiam har lutukin min lo en vung vung.

‘I ngaihdan dan le..’ ka then sak.

‘I lam chiam ang chu ka lo tia’ zawi fiah zetin ati leh hmuk. Chhan tumin ka ang ziaua,mahse Ampuia leh Amber-i rawn inzui lut ka hmuh takah chuan ka chip lehnghal hmak. Designer a ni bawka,a inhmeh tur a hre em em a,tunah pawh a nalh lehpek.

‘Hey,Sangkim.Nizan chanchin ka lo hriaa,a va pawi ve.I lo kal pawh ka lo beisei ngam chiah lo asin’ Ampuia’n a rawn ti nghal mawlh mawlh. Ka ṭhutna hma chiah ṭhutthleng karah a rawn kal pheia. Ka ṭhutna zawn chiahah a rawn ṭhu ve nghal a.

‘Nia..A zia lo’ Sangkima’n a ti tawi tuk. Nui var var chungin Ampuia ka en a, ka mitsirin Sangkima malchunga Amber- i kut dah chu ka hmu theia. Ka hriatthiam chiah si lohin ka awm a nuam lo nghal ringawt.

‘I ril aṭam em?” Ampuia’n min ti a.

‘Tlem in..In zo tawh mi?” ka ti a.

‘Um,Chhungkua chu zo animai. Thil ei ila..’ min en loin Sangkima te lam a en a.

‘Nia,ka ril a ṭam tawh’ Amber-in a lo ti vat.

Sangkima te kan hmaah an kala,an hnungah kan kala,Biakin hnuai lamah eitur a awma.Stepah kan chhuk thlaa,ka pheikhawk a sang deuh bawk nen Ampuia banah ka vuana.Kal pahin biak thlak tur a nei zul mai.

‘Sangkima Hotel kang kha i hria em?” a ti liam puat.

‘Um,hria e.In lo kal lai khan kan lo sawi a’ ka tiṭha ve mai.

‘Amak khawp mai. Tunlai chu an vanduai thei riau ka lo tia. Hmanni khan an Barah khan buaina a awm chiam tawha. Nizanah khatiang kha a thleng leha,chuan Becky thihna pawh kha an chhungkaw chhiatna zingah kan chhiartel thei ang chu’ a ti leh duah.

‘Nia…An vanduai khawp mai’ ka ti sap. Becky hming a sawichhuak chuan ka Mood a thlak nghal titih.

‘I dik lo tlat.Na i nei em?” thil kan ei laiin Ampuia’n a ti a. Ka lu ka thing nak ringawt.

Sangkima te nen kan la ṭhu ho ta zel. Amber-i nen pawh kan inbe ve luam.Mak deuhin ka chhungril hian min ngaina lo angin min hriattir ve tawp bawk. Picnic naa ka hmuh kha atakah ka hmuhna hmasa ber a ni a, a kutchhuak thawmhnaw inbel fo mah ila regular Client ka nih lem loh avangin amah nen hian mimal taka inhriatna kan nei ngai lo. Min ngaina lo ni a ka hria hi ka ngaihtuahna mai mai pawh a ni mahna le.

‘I lipstick a pherh ania’ rawn kun hnaih pahin Ampuia’n a ti sup

‘Wash Roomah ka va kal ang.A pherh nasa em?” ka ti a.

‘Aih,khawi…’ tih pahin Napkin in ka hmui a rawn hru a.

‘Ti khan a ṭha tawh,kal sawn duh lo mai rawh’ a nui zui nghal huk huk. Tihngaihna hre loin ka nui ve ringawt. Sangkima te lam ka melh zawka,Sangkima’n nuihzat hmel zetin min lo en reng.

Thim hnuah ka haw ta chauh. Zan lam Party erawh ka peih ta ngang lo. Ampuia’n inah min daha.Party naa kal min dil vei thlap. Ka phalna ala chuan ka awm a tinuam lo lehpek viau thung. Misual tak niin ka inhre miaua.

Dingi room lamah lehkha a zira, Sitting roomah keimahin ka ṭhu a. Tv ka on nangin ka en lem lo. Ka Phoneah Corona chungchang update a awm leh awm loh ka en kuala,Indiaah pawh positive an awm ta nual mai. Khawvel ram lian apiangah a tla na emaw tihmai turin an buaia,Mizo erawh atam zawk kan la thlamuang ta viau zel.

February thla chanve kan  pela.Nunphung danglam awm loin nitin angaiin kan kal ve bek bek a, ka nu leh Malsawma’n Drug Lisence an la buaipui zela,Malsawma zarah leh ka pa ṭhiante ho zarah mi nawlpui leh thei fal inti pawhin an tihtheih mang tawh loh kha kan hmu tluk chu a nita der.Chu pawh kan beisei phak aia ṭha daih Area ala nizui cheu.

Ka nu in ka pi a tlawh nitina,hna pawimawhah a chhuak anih pawhin a tlawh pah ziaha. Kei pawh ka kal zauh zauh.  Tlema azia leh tak deuh avangin phai lama kal an rawt pawh an han nghak leh riha. Chumai bakah Hrileng vel vangin zin a lo chakawm tehchiam lo bawka,a zia leh deuh hi kan lawm tlang lehzual viau.

Kangmeichhuak avang khan eng emaw tak a lo thlen ringin ka inkau deuh renga, mahse engmah thleng a awm ta rih lo. Ruatsaka hnen atangin Sangkima chet vel dan nitin ka la dawng zat zata. A nunphungah thlak danglam a awm meuh lo. Bar lama thil thleng ai khan Hotel kang chuan nghawng a nei lian ta zawka. Ka ngaihtuah apiangin nuam ka ti veng veng zel bawk.Kawngkhat talah hlawhtling niin ka inhriaa, Becky phuba mai bakah min thah tuma a naute a rawn tirhna kha rul letah ka inngai ve hmiah bawk.

Dawr aṭanga ka haw in ka nu in Phone ah tu emaw a lo biaa.A ṭawngkam a mawi tehchiam lo. Dingi mitmeiin ka zawta, a lu a thing nar nar ringawt. A biak zawh hun nghakin Sofaah ka ṭhu a, a thinrim ngang aniang,a teikual sek.

‘Mai maia’ phone ṭhutthlenga thehthlak pahin a ti hmak. A ṭhu thla zui ve nghal hnawk bawk.

‘Enge a?” ka ti a.Min rawn en a.

‘Kan thil buaipui kha thla thara engkim fel tur ania. Vawiinah an lo reject ngawt a’ lungawi lo zetin a ti a.

‘Eh!! Ti leh si nge a?”

‘Ka hre lo,I Pa Mawia ka va biaa.A lo ne ne kual mai maia,Malsawma lah hi phone la thei reng reng lo mai’ a ti leh hmawk hmawk. Atir khan hetiang tak hian a la buaipui ang tih ka lo ngaihtuah pha lo a,mahse ka nu kha a ni tlata. Neih a duh tawh leh ata ang maia a lo ngaih tawh thil engmah chan a duh ngai lo tih ka chiang.

‘Naktukah Office lama kal chi a ni lo maw? Pa Mawia pawh tunah Officeah a awm tawh bik awm si lo va’ ka ti leha.

‘A hmantlak loh Mawia ve hi. I pa damlaia min tihbuai nasat theih tehreng nen.Dingi,khawnge Thingpui chu? Ala so na nge? Chu chen chen chhuan angai ami?’ a ti zui leh chiam.

‘Hahdam phawt rawh,a fel mai ang’ tih pahin ka tho a.

‘Tehngawt zel che hian a. I hmantlak loh nangpawh hi’ a ti leh a. Min han hmer tel ṭalh chu ka chhang let chaka,mahse a thinrim laklawha,tih thinrim belh ka chak lo. Bakah,englaipawha hmantlak loh fanu kha ka ni ve hranpa hrim hrima. Ka u boral hnuah min hrilh khat ta deuh tih mai chauh a ni.

Zanah Ampuia a lo lenga, Malsawma a lo kal bawk.Mahse, Ka nu nen an inkawm a. An titi muk hmel danah chuan an thil buaipui an sawi a ni tih ka hre thiam mai.

Tlaiah Dawrah Malsawma a rawn lang hlawl.Tunhnai chu In lamah a lo kal zauh zauh tho nangin Dawr lam a rawn tlawh meuh lo.Staff hmeichhe pathum an phur lehpek viau. An la tleirawl tlang bawka,an han lai vel hian ka nuih an ti za ṭhin.

‘Intur i  duh em?” ka ti a.

‘A pawi lo khawp ang’ a ti ve mai. A induh zawng a sawia,an rawn dahsak vat.

‘Ka nu nen inchhuak ta mi?” ka ti a.

‘Um..Chuvang ania ka lo kal’ a ti a. Customer bill pekna an rawn daha..Ka tifel leh rih.

‘Enge chanchin? An reject kha atia’ ka ti a. Diktak chuan ka ngaihven peih tehchiam lo.

‘Nia,a fel vek tlukah ka ngai kha ania…’Fan deuh ruihin a ti a.

‘Achhan inhre thei em?” ka ti leh a.

‘Um..’

‘Engtin?”

‘Minister lam daih a ni..’

‘Eh..Minister inrawlh nan a va te tham ve’ ka ti nghauh.Ka ngaihdan diktak a ni bawk.

‘Nia,mahse Minister te hi an lo inrawlh nasa khawpa.Eng lo,a landanah chuan…’ kan nula pakhat a lo kal hnaih avangin a ngawi leh daih.

‘I ṭhianpa hian min block a chak a ni ber mai e’ ati hul huk. Ka ṭhianpa atih chu ka hrethiam mai lo.

‘Tu ka ṭhianpa? Ampuia maw?” ka ti deuh ha..

‘Aih,Sangkima zawk. In inhre tho in ka lo hriaa’a ti leh a.Ngeiawm zawnga sawi a ni lo nangin min deng dawt tho.

‘Sangkima maw? Tinge a lo tel ve ngawt a?’ ka ti hmak. A hotel kan hnuah khan engmah ka chungah a thleng ta miah lo va, hei hi a lo Target chat anih zawk dawn hi a.

‘Amah chauhin a hria ang chu’ a ti leh a.Ka rilruah ka nu a lo lang nghal zawk.

‘Ka nu-in a hria em?” nuam ti vak loin ka ti a.

‘Hre ta se ti nge?” ka rilru hriat tum niawm takin uluk zetin min en a.

‘Hre lo se ka duh zawk’

‘Achhan a awm em?” a ti leh a. Ka thle bak; Chhan tamtak a awm maitheia,mahse pakhat chiang taka ka hriat hi chu hriat loh ka duh zawk.

‘A hre lo. Kei pawn fiahna ka la nei lo,mahse a inrawlh tih ka chiang’ a ti leh a. Ka thaw huai mai.

‘Kan hmu thei dawn lo tihna nge beiseina a awm tho?” ka ti leh a.

’50-50 ..Mahse, ka theihtawp ka chhuah ang,a tawp dawn hnaia zuzi leh ngawt chu ka tum lo’ inringtawk zetin a ti a. Sangkima’n a kawng a lo dal hrim hrim a hua nge ka u thattu ni a a hriat avangin a ṭhianpa tana beiah a inngai zawk ang tih ka ngaihtuaha,ka lu ka thing nak. Eng zawk zawk pawh chu lo nise kan tana bei a ni ve ve a.Mi ṭha tak chu a ni ve hranpa hrim hrim.

Ka nu Mood a lo la fuh lo tluang zel. Dingi a lo vin hlawk hlawka,a thil lei tir alei dik lo a ni chek ang.Hmanhmawh zetin thleng turin Dingi a tlan chhuak dar dara,ka khawngaih ṭhin.. Ka nu anih tlat avangin a mize pakhat zawk achhuah chang hian ngei viau ṭhin mah ila awmzia a awm der si lo. Dingi tak pawh hian a thinrim hian hlau viau e ti loin a ngainat loh phah chuang miah lo va, nakin lawkah an nui dun leh bawk bawk anga.A mood fuh loh laia avin phar viauna kha a theihnghilh zui leh mai ang.

Ka mu deuh chiah tihin Malsawma’n msg min rawn thawna ‘Kan kawng daltu Minister kha Sangkima nu nen an lo inchhung hnai viau a’ tih zawng. Ka reply lo,be turin min ti lo va, bakah inrawlh tumna ka nei lo deuh tlat.

Ka Phone riin min tiharha,kan Manger a lo ni a,zing karah hian kan inbe ngai lo tluk a ni.’Nizana kan Restaurant a chhungkaw lo kal, inneih champha lawm te kha an vaiin  thil eisual avangin an dam lo a. Damdawiinah pa 5 an dah luta. Midang erawh Admit ngai lo anni thung.’

Inchei pawh inchei loin Dawr ka pana,Staff te thlabar lutuk chuan min ti mangang vek thei. An eitur Order ho ka enkual nghal zung zunga,dik lo enge awm ka hre nghal ngawt thei lo. Kan Cook lah a mangang lutuk a ṭap lo chauh a ni ber.Dawr kan khar nghal veka,ka thawpik lutuk ka a deuh huih thei..Ampuia a rawn thleng vata,a hnu lawkah Malsawma a rawn thleng ve bawk.Ka phone ri ngun lutuk chuan min tichau zuala,pick pawh ka pick peih tawh lo

Damlo chhunghnai  te zinga mi ṭhenkhat lungawi loin FIR an lo thehluta, a neitu ka nih tlat si vangin thu zawhfiah turin min rawn laa,hnial buai loin ka zui ve tawp. Malsawma leh Ampuia bakah ka Patea te an che vata, rei ka awm hmain min rawn lachhuak a. Ka ipik ngawih ngawih a, mangchhia in min bawhbuai hi a ang ka ti ber.

‘Engtin nge maw a thlen theih le aw?” ka nuin rilru hah hmel zetin a ti hap. Vawiina Police-in min rawn hruai lai khan a mangang lutuk kha ka hmuh hmaih lo.Min duat ngai lo va, min hau deuh reng ṭhin mah se a tawpkhawkah chuan a fanu vangin a mangang a,min lo ngaihven nameuh mai.

‘Thil thleng palh anih theih rualin amak viau mai.Tunah chuan damlo chhungte kha enge an an tih lam ngaihven a ṭha phawt a.An lung dam zan na tura kan buaipui a ṭha ang’ Patea’n a ti a.

‘Nia, ka lo buaipui dawn nia’Malsawma’n a ti a. Thil eng eng maw an sawizui leh ṭeuha,mahse ka ngaithla liam mai mai.

Zing ka thawh veleh Dingi’n ka lehkha tur min lo pe a. Mak ka ti deuh,Lehkhathawn hi Bank lam anih loh chuan ka hminga lo kal a awm ngai mang tlat lo a. Mahse, tun ami hi a landanah Bank lehkha a ni lo tih ka hre thei mai bawk.A charna ka hawnga..

’Kan inrul tawk niin ka hria,I duhtawk lo anih chuan a dawt leh chu i nu a ni tawh ang’

Tu rawn thawn nge ka hria,ka nuai hlawm nawk nawka,Bawlhhlawh bawmah ka vawm lut nghal hmak.

Pen ri ka hriaa, muangchangin ka dinna hmun atangin ka penchhuak ve nghala. Ka bula Car ding chu ka kal huala, Pen ri a lo hnai zela, Motor bul a rawn thlen rualin Sangkima hmaah tak ka ding ve nghal hmak.

Inkuangkuah fel than chungin ka en chho a,min hmuh vanga mak tihna a hmelah alang lo. A landanah chuan min lo beisei reng a ang zawk mah.Hreptak hian a..Nia,khatiang lehkha kha chuan kei hi min awm tir mai mai dawn lo tih a hre chiang lutuk.

‘I ṭha maw?” awihawm loh khawpa zangkhaiin a ti a. Over Coat dum a haa,ahnuaiah kawrlum phiar pawl leh Kamiz var a hak hnan leha,a incheina chuan a tilang lian zual emaw tih mai tur a ni.

‘Ka ṭhat i ring em?” ka ti chang fak. Ka aw nelawm lo zet chu ngaipawimawh lo fahranin a mithmul a ti sang awk duh chauh.

‘In chanchin ka lo hriaa,a zia lo hle mai. Enge hetah itih a? khawnge?” tih pahin ka hnung lam a thleka,Ampuia a zawng tih ka hria. Kan awmna hmun hi a Hotel Parkingah a ni a. Amah hmuh ka duh avangin darkar hnih dawn helaiah hian ka thu tawh.

‘Keimahin…’ ka ti leh hmak.

‘Ahh,anih chuan min lo nghak tihna mi?” a sawi zawh rualin a nui suk.

‘Thil tamtak,kei nena inzawmna nei chu tihchhiat tum rawh.A pawi ka ti lo,mahse ka nu hi chu khawih suh’ ka ti dam thlap. A hmel landan inthlak nghal chu ka hmuh hmaih miah lo. A mitmeng hlauhawm zet chu tim map loin ka en ve ngar bawk.

‘Thupek a ni em?” thluk nei lo zetin ati mar ut.

‘Aw..Ka nu chauh hi ka neia,ka tan a hlu lutuk’ ka ti leh nghauh.

‘Ka lo hrereng dawn nia’ a ti bung vut. A awmdan chuan min ti thinrim ngawih ngawih thei. Ka thusawi engmah kha ngaihpawimawhna tak tak nei hmel a pu tlat lo.

‘Anih phawt le…’ ka chhungrila thinrimna in up hluah hluah thup nan ka aw a dam thlap thung.

Ka inhera, Gate lam pan tumin ka inhera,ka pen zui nghal mai.’ Kal suh…’ a ti hrawih riin min ti ding dat.Mahse, ka pen leh nghal mai. A ri deuh dawta,ka phu zawka.Ka inher nghal vat.

Motor bula Sangkima lo tlu chu mak ti lutukin ka en a, ka khawng lo chauh a ni ber!!!

Note:Naktuk Zan hi chawlh puang thut thei reng ka ni. Ka mit a fiah lo zuala,a harsa deuh a...