ANNEM - 15

Chapter- 15

‘Eng maw i sawi?” harsa tihhmel lutukin a tichhuak hrawih. Chhang loin ka mittui ka hru hula,ka chhungrila tahchhuah lutuk inmun mek chu ka haider angai tih ka hria.

‘I hriat duh ka hrilh che a. Tunah chuan kal tawh rawh. Sawi dun tur kan nei lo va, kan inhriattirh phata kan nih dan ngai ang khan Hmelma kan ni. Abak a awm lo’ ka theihtawpa pangngaiin ka ti a. Ka tho a, Room kawngkhar lam ka pan pheia. Kawngkhar ka hawng nghala,Sangkima en chungin chhuak turin ka ti tih hriat nan kawngkhar lamah ka thle nghal zauh bawk.

Che loin a thut ngaiin a thu a,a thaw huaia,a hmai a tuai leh pawk. A rawn tho a, a rawn kal pheia,a chhuahna tur kianin ka tawlhsawn nghal hrat. Ka bulah a rawn dinga, inkuangkuah fel than chungin kawngkhar lam bawk ka melh leh zauh.

A inhera, ka mit ka chhing ve nghal hmak thung. Ka mittui a tlak loh nan ka inpetruh tlat bawk.Kawngkhar inkhar ri khap chu thil puak ring tak ang maiin ka hriaa,ka naupanlai atang leh tun thlenga mi Special ka nihthu min hrilhtu awmchhun leh hairual loha ka duhthlanna Control theitu,amah avanga ka nihna zawng zawng ka hloh phahna leh ka hmelma a ni chunga  a natna aia humhim ka duh tlat lawi si chu a kalbo ta chu ania..

Ka hmui ka peta, ka kut lehlamin ka kawng ka dawma; lehlamin ka mit ka hup thung. . Tah ka duh lo,mahse ka mittui erawh ka dang zo chuang lo.. ka nu leh pa fanu ka ni a, ka u pawh chutiang thoin ka nu leh pa fapa a ni.Amah thattu chu ka mipa duh awmchhun pawh nise phuba ka lak theih nan ka kaltir mai a tul a,ka na hi chu ala dam leh mai ang.. Mahse, ka tawrhna hi ropui leh chhuanawm a ni lo anih pawhin ka chhungril haiderin, ka chhungkaw tan ka inhlan ve tlata; mittui chu ani leh kei hian khan a phu alawm.

Ka menchhuah rualin kawngkhar nghenga Sangkima lo ding  chu ka hmu nghal zat. Ka  beisei lo  satliah pawh a ni lo,ka hamhaih lutuk a, ka thaw a tawp titih. A kekawr ipte zen chugin hriatthiam harsa lutukin min lo thlir reng chu niin..Ka mit ka chhin tlat avangin kawngkhar inkhar kha a rawn nem khar emaw ka ti a. Mahse, a landanah chuan chhuak loin kawngkhar a pawtkhar zawk tih achiang. Ka ngaihtuah leta,ka awmdan kha a hmu vek tih hairual a ni lo. Ka hmai sa nghal hat hat chu ka zah vang nge pawi ka tihvang ka hre thiam hek lo.

‘Ih..’ sawi tur ber hre loin ka ti sap ringawt. A thle buka,a mitmu thim leh fiah zet lawi si chu ka en a,’ I hmangaih tur a ni lo’ zawitein chhungril atangin awin min rawn ti a. Ka hrawk ro lutuk tinawng turin ka chil ka lem a, zawitea ka chhungrila aw awm reng chu haider ka tuma. Ka zam a ni tih thup nan ka dak deuh vaha,ka kut nghet zetin ka hum kawp tlat bawk. Tawng tum lo niawm takin min en vung vung. Ka awm a nuam lo ru ngawih ngawih thung.

‘I duh duh i sawia,ka sawi vena hun min pe lo kha a fair miah lo ania’ a ngawih vung vung hnuah a ti dam thlup.

‘Engmah hi Hmelma karah fair takin tih a ni ngai lo.Kal tawh rawh’ inrintawk hmel takin ka ti a,ka beisei aia nasa fein ka tawngchhuak pawh a nghet charh mai.Nichina kal tura ka tih laia ka  tawngdan leh a kal amaw ka tih hnua ka awmdan kha a inpersan lulai lutuka, a hmu vek bawk si nen tuna inlak engemaw that leh hia sawt lo maitheia. Mahse, ka thiltumah ka dingnghet tih a hriat nan ka inlak khawng luih a tul tho alawm le.

‘Ka fapa darkar thum chhung lek kawlbo tura i tirh khan i hming alam lai khan midangin an hriat hlauin ka thup mawi che a. Achhan i hria em?”  Ka beisei loh lutuk a sawi ta tlat.

‘I fapa chungchangah khan tel vena pakhatmah ka nei lo. Min hum lah ka mamawh hek lo’ ka ti bung nghat.

‘Keipawh i u leh Becky chungchangah hian ka tel bik lo.Chuan,ka hum che a tul zia hi  i hrethiam pha lo zawk ang’

‘Anih chu,a va ropui ve…Mahse, nang hi thil engkimah i inrawlh’

‘Ka tel lo tih i chhungril khan a hriat kha,haider suh. Kei pawh hian fiahna ka nei chung hian i tih a ni lo tih ka inpawmluihtir ve tho ania’ a ti vawt leh ruih. A thilsawi awmzia hriat tumin ka hmui ka peta, ka khap sak sak bawk.

‘I hming chuanna Cheque ka kuta keng chung khan fiahna dang ka mamawh lo ania’ a ti vawt leh ruih. Angaihna hre loin ka nuichhuak hak mai.

‘I a anih kha..Enteh,kal mai rawh.A buaithlak ania,engmah hi a fel tak tak dawn lo’ nui chung bawkin ka ti leh a. Engvanga nui tlat nge ka nih ka inhre lo. Ka nuihchhan hriat pawh tul ka ti chuang lo,ngaipawimawh lo hmel taka ka nui thei hi chunglam puihna te pawh aniang a..

‘Inbum tum suh,tlanchhiatna tur a awm lo ania’ a ti leh hmuk.

‘Tlanchhiat maw? Teuh nang..Ka tlanchhiat dawn loh vang takin alawm i kal angaih zawk. Ka huatchhan che i hre tawha, kan inbei ang chu’ ka ti leh fak fak.

‘I sawiah khan ka tel lo..Pen khat pawh anni pahnih tina tur khan ka pen lo.Nangin ka fapa i khawih ang kha ni loin’ a ti leh hluk.

‘Aw..Nia,ka khawih.I fapa kha ka khawih.A tha em? Kal tawh rawh’

Ka sawi zawh rualin min rawn hnaihchilh nghal ruaka,ka lo inring lawk miah lo,mahse tawlhsawn lo turin ka inti paukhauh lui tlat. Hnai zetah min rawn en a, hlau miah lo ang maiin ka melh chho ve ran bawk.

‘I ti lo…’

‘Ka ti…A tha em? Chuan,kal rawh. Tu  emaw tal ka koh chuan a pawi ang tih i hriat kha’

‘I ti dawn si lo a’ inringtawk zetin a ti leh nghut.

‘I chiang maw? Ok,lo nghak rawh’ ka ti hmak.

Khum lam ka pan phei nghala, Ka Patea te nen insi deuhthawin awm mahila ka ngaihtuah naah Malsawma  alangsar zawk fe. Lukham bula ka Phone dah ka laa; Malsawma number ka thaichhuaka, ka call nghal zat. Ka chhungril hrechiang tawk anga inngaia a inringtawk lutuk hi ka tihchhiat a tul. Midang ka ko ngam tih a hriat chuan ka duh ang ngeiin a kal anga,kei pawh ka nu tan fanu tha ka nih ve na kawng ka zawh tan tihna animai.

‘Hello..’ Malsawma’n a rawn ti a. Mahse,ka rin loh lutukin Sangkima’n ka phone min rawn laksak thut.A Off nghala,a kekawr ipteah a thun zui nghal hmak.

‘Enge itih a?” ka ti vak.

‘Ka Off mawle’ a ti bung vut. Ka thaw hak mai.

‘A tha alawm,tunah chuan midang ka ko ngam em em tih i hre tawh bawka. I kal mai a hun tawh’ ka ti dam thlap. A hmel tur zet chu cho zetin ka en chho ha bawk.

‘Engvangin nge mahni inbum chu i tum tlat a? enge min hmuhtir i tum?” a ti leh nghut.

‘Ka inbum miah lo. Ka Hmelma ini chunga zalen taka kan inchhunga i lo kal kual vel thin kha ka indem a. Ka piangthar ti mai ang’ ka sawi zawh veleh ka nui lui hak; a ner sawk thung.

‘I hmelma ni tur hian engmah tih ka nei lo’ a ti leh hmuk.

‘A ninawm tan ania. I duh phawt chuan i pha theia,mahse sawi nawn hian ka ngaihdan che a thlak dawn lo. Midang ka ko ngam lo emaw itih kha ka ngam tih i hmu tawha. Kal la,lo inbuatsaih rawh’

‘Fiahna ka duh,ka tih ngei a ni tih fiahna….’ A ti leh sup.

‘Ha..Mi a ini lo,eng fiahna nge i hnutchhiah duh ang? Mahse, pakhat chauh ka sawi ang. Becky khan ka u kha in hal hlum tih a sawi..Eee,inhmu tura min rawn koh zan khan min thattu tur i rawn tir bawka. Becky thih atanga reiloteah khan…’ inringtawk lutukin ka ti hmak.

‘Mi sawi vangin i ngaihdan siam suh. I nau,min chhui rengtu khan chhuichhuah tur a hre ngang lo zawk nge?” tihelna a awah a hriat theih.

‘Nia,ala hmu thuai ang’ ka ti hmak. Ruatsaka chungchang a sawina a ni tih ka hriaa,phat nawi kual ka tum lo.

‘Bar a zu chhia i rawn dah luh te,Hotela kangmei chhuakte,ka fapa i kawlbo vanga kan buainate…Heng zawng zawng hi mi sawi ni loin fiahna keichuan ka nei. Anih chuan ka hmelma ini ka ti ve dawn che em ni?’  a ti nghet churh.

‘I thu alawm,enge ka sawi ang? ‘

‘I ni lo,ini ngai lo vang’

‘Aaa,kal tawh rawh’

‘Ka kal kal ang chu. Mahse, zawhna ka la neih hi chhanna ka hmuh hunah..’

‘Engvangin nge i hmelma chu a nunna i chhan si?”  amah bawkin zawifiah zetin a ti leh sup.Chhan mai tumin ka ang ziaua,mahse ka chip leh hmak.

‘Min chhang rawh,dawt tel loin’ a ti leh hmuk. Min rawn din hnaiha,a Purfume rimpa zet chuan ka hnar a rawn verha,kan inhnaih lutuka,ka awm a tinuam lo lehpek tawh.Mahse, ka ti laklawh tawh tlat.

‘Nang inih vang ni loin,nunna hi  ka hlut lutuk’ a mita en kar chungin ka ti hmak.

‘Ok,anih chuan engvangin nge hman zanah khan Malsawma hnenah dawt i sawi kher? A awm laia ka lo kal kha enge a pawina?” a ti leh sup. Ka awmdan kha a lo hmu a ni ngei ang. Huizz,mit pahnih nei ve tho si hian engkim hi a hmu vek bik emaw tihtur a ni.

‘Kei chauh hian Hmelma ini ka ti lo a,I hrethiam em?’ alangah erawh ka ti nghauh.

‘Oh,hria e..Chuti anih chuan min bei mai se la..A tha em?”

‘Aw,tha lutuk.Tunah chuan keimah chauh ka ni tawh dawn hleinem.Ka bulah Malsawma a ding zel tawh ang’

‘Ani kha lo tel ve miah suh se’

‘Sorry..A tel dawn tlat’

‘Khapa kha ka duh lo ka tih tawh kha’ a ti hluk.  A mitthim khup chu ka en a.

‘I duh leh duh loh sawi turin i ta ka ni lo’ ka ti hmak.

‘Hetah hian tu ta nge inih chu achiang alawm.A ni em?” tih pahin ka awmah a kut a rawn daha,ka tawlhsawn tur ka kawngah a rawn kuah leha,amah si chetin min pawt bet nghal hmiah.

‘Min thlah rawh..’ tih pahin ka tal nghal laiha,mahse ngaipawimawh lo zetin min kuah bet nghet sauha, ka dar leh ka nghawng inzawmna laiah tak a rawn fawp nghala,ka thaw a tawp deuh chawt thei.

‘Min kaltir tum suh. Ka thei rih lo..Ka mamawh lutuk che’ a ti thawp sut. Chet mai dan tur hre loin ka ding khawng deuh laha,a awmdan inthlak danglam chuan min ti hamhaih tlat. A hmui lum thar thar chuan ka kawr nghawngin a khuh loh lai,ka taksa lawng a fawp kual pah dun duna,ka tum loh lutukin ka thaw hak mai.

‘Ka sawi kha i ring tih ka hria,kei pawn ka ring che. Kan chhungril hi ngaithla ang. Khawngaihin…’ a ti tham leh tuak. Amah mai ni loin Room chhung boruak a inthlak danglam ta thawk nimaiin ka hria. Mahse, chhungte phatsantu nih chu enge a hlutna? Ka tihluih angai.

‘Ni lo…I kal a tha’ nem sawn ka tuma,awmzia a awm lo. Ka tum tawk lo pawh a ni mahna.

‘Min enteh…’ a ti thut. Ka biang tawn tawnah a vuana,amah en thei turin min kuaidak zui nghal a,thuawih zetin ka melh ve kar ringawt. Diktak chuan hetianga nem leh ngawt tur chuan khatiang zata tam kha ka sawi lo ang.Mahse, a awmdan chuan ka chhungril a fan tlata, a mitmeng thim khup leh ngengawl lutuk chuan min Control tlat nimaiin ka hria.Ka nep mang e…

‘Thil kal tawh chu vuan lui loin liamtir ang,kan pahnih hi chuan intina tawn tawh lo vang, Kan inhmangaih lo anih pawhin inzawmna danglam bik kan nei tih hi hai tawh suh’ inringtawk zetin a ti leh sup. Ni e, chiang takin ka hria. Kan inhmangaih lo pawh a ni thei,mahse kan inzawm tih hi ka pawm dan a ni ve tho.

‘Vawikhat chiah Chance min pe rawh.Fiahna zawng zawng ka pe ang che.Chuan,I chhungte phatsantu anga inngaih pawh bansan rih la, hlau miah loin ka tihtur lo nghak tawp phawt rawh. ..A fel vek ang, vawikhat chauh hun min pe rawh’ amah bawkin a ti leh a. Ka chhang lo,ka mit ka chhinga. Hnial duh em em mah ila ka chhungril hian a pawm fel veka,vawikhat tal Chance pe turin min nawr a..Ka u leh ka nu ka mitthlaah an rawn langa, ka tum loh lutukin ka biang a rawn lum thla papa.Ka insut zui leh hraih..

 ‘Shh…Tap suh,nang ang bawk hian keipawh hian ka fight ve ania’ a ti leh sup. Engthil nge Fight a lo intih ve ka hre lo.Ka bianga ka mittui luangthla a rawn fawpa, ka mitah a rawn fawp leh dun dun bawk. Thawklehkhatah ka ngaihtuah naah Amber-i a rawn langnghal zawk. Ka tawlhsawn nghal thut,a lo in thlahdul ve bawk nen min dang hman bik lo.

‘A rem thei lo..I hria,min khawngaih la..Kal tawh rawh’ ka ti sap. Ka aw khur teivet lah chu ka ngei takzet.

‘Engvangin nge a rem loh? Malsawma vang maw? Ampuia chu sawi lo law law la” a ti hluk.

‘Aw..Amber-i pawh…’ Malsawma ka bialpa a ni lo tih ka hria,mahse kawng daltu ala ni dawn tih pawh ka hria.

‘A tawp tawh..Chuan,khapa kha i hnaih leh chuan tualthattu tak tak i hmachhawn ang’ a ti leh nghut.

‘A tawp…Enge a awmzia?”

‘I khum ka rawn tawm che atang khan a tawp tawh’

‘Mahse…’ ka ti a, ka tawp leh daih. Ka ringngam dawn em ka hre lo.

‘Malsawma kha,I bulah ka hmuh leh chuan a pawi ang.Vawiin ang phei kha chu tinawn tawh suh’  a ti leh hluk.

‘Enge ka tih a?” ka ti hmak. A rawn kal hnaia.Ka hmaah tak a rawn ding leha,ka sam chhawlleng ka bengah a rawn zepa,ka beng a tuai zui zauh.

‘Khawlaia Helmet inkhumtir vel kha mawle’ a sehchilh titih.Ka nui chhuak nghal hak mai.

‘A nuihzatthlak loh ania’ a ti leh hluk. Min rawn ban leha, ka tal lehnghal phat thung.

‘Oh…’ a ti supa, khumah a thu thla hnawka,na nei tihhriat takin a ner zui nawk bawk.

‘Ti nge? Khawilai nge ka tihfuh?” hlauthawng zetin ka din hnaiha..Min rawn ban thuta, khumah min pawt thlu a, min rawn bawhbet nghal zat.

‘kal turin min tia,mahse ka kal tak tak emaw itih vanga i mittui tla kha a hmuhnawm takzet’ a ti sup. A rawn kun hnaia,ka mit ka chhinga, a hmui lum ham ham leh fawh nuam zetin ka hmui a rawn si a, zei zetin a rawn nawr kau a..

‘Enteh,kan mak ve e. Nupa nisi lo,zan laia inhaua,inthlem lungawi leh awmchhun kan ni maithei ania..Chu pawh hmeichhe Roomah..Mi a pahnih’ ka nui a…Ka awmah a hmai a rawn phuma,a nui hawk hawk ri chu ngaihnawm ti em emin ka ngaithlaa.Ka nu leh ka u chu nakinah atan nise,tunah chuan Sangkima chauh hmuh ka duh rih.

Door Bell a rawn ri thut..A rawn hawichhuaka, tun ang hunah tu nge ni ang? Ni lo..Malsawma ka call kha..

‘Malsawma’ ka ti nghal sap. A mitmeng danglam zawk chu reilote mah nise ka hmuh hmaih hauh lo.

Ka room kawngkhar ka hawng tur min pawt let leha, a sam chhip lam tlema buk lai bik chu a hnawk deuh a,ka bana..Ka chul mam saka. ‘Engtin nge i chhuah ang?” ka ti leh rih.

‘Ngaihtuah suh..Ka hrilh che chuan i thinchhe ve sia,nakinah ka buai mai mai ang’ a nui suk a. Ka nui ve hak bawk.

 Ka kut a vuana,a pawt hnaia,a fawp nghal zauh. ‘Ka kal phawt anga.Mahse, naktuk zanah ka lo let leh ang’ a ti sup. Ka chhan hmain min rawn fawp nghal vang vang.

Kawngkhar bulah Malsawma a lo dinga, muhil harh hlawl ang maiin ka mit ka nuai chat chat.

‘I tha em?” a ti vat.

‘Aw,tinge tunah ilo kala?” inchhunga zui luh pahin ka ti a.

‘I hre lo maw?” a ti deuh hu. Angaihna hre lo niawm takin ka dar ka ti sang zauh thung.

‘Min rawn call kha,engmah i sawi lo va. Ka rawn call back lah i pick bawk si lo va’ a ti dam thlup.

‘Maw?! Ka lo call che tih ka hre miah lo. Ava mak ve’ mak ti tak tak ka ang lutuk chu mak ka inti letling zawk.

‘I lo call ngei chu ania’ a ti leh hmuk. Chik zetin min en a, kei lah mak tih hmel fein ka hawi lui ha bawk.

‘Ava mak..Ka muhil hma lutuka,Phone pawh ka khawih lo reng reng, ka delh palh nge mawni le?” ka ti leh niah niah. A thaw deuh huaia.

‘Ka lo hlauthawng hman deuha,ok..A tha animai’

‘A zia lo e…I lo kal phah vang vang bawk si’ tlawn titihin ka ti a. Diktak chuan nuam lo ka ti tak tak.

‘A pawi lo titawh mai ang’ a ti a, za lo zetin a nui suk.

‘Nakinah ka treat mai ang che. Chuan,min ngaihtuah vangin ka lawm ania.Mahse, puitling ka ni ve tawha.Min ngaihtuah hah lutuk duh suh’ ka ti leh a.

‘A tha alawm..Mahse, puitling anga en che hi ka la thiam chiah lo aniang’ a nui leh suka. A tho a, ka tho ve nghal vat. A pai deuh dawt chu rang zetin ka vuana..A lu a dawm nghal vang vang mai.

‘I tha em?” ka ti a.

‘Ka hre lo,ka lu a hai deuh tlata’ a ti a. A hnaih ber thutthlengah ka thuttira. Han tih vak ngaihna ka hre lo. Tawng loin a thut ngaiin a thua,ka be buai duh lo.

A rawn che thuta,thawh a tum a, ka pui leh vat.

‘Bathroomah .. ‘ a ti sup. Bathroomah ka kai luta, a uak zui nghal pawp pawp mai.

Malsawma muhil chu ka en a,a mutna ep chiah Sofaah ka mu ve thung.Kal tura tihluih chi anih loh avangin ka riahtir mai angai. Sangkima’n hnaih lo turin min ti mah se tun dinhmunah chuan tihtheih dang a awm lo.A muthilh hnuah pawh muhil thei loin ka meng kara,ka ngaihtuahna erawh Sangkima hnenah a awm daih thung. Amber-i ka ngaihtuah leha,mi hriat laih khawpa inkawp anni a, keimah vang mai maiin a then tak tak angem? lo thlen tak tak ta se ka thiam loh chiang bal a ni tih ka hria. Nuam tih lohnain min rawn fana,kei ni ila na ka ti dawn lutuk.Mi kara tlazep ka huat theih zia ka ngaihtuah thleng duh lo law law. Ampuia hi ka hmang tangkai mai mai angin a ngai tih ka hria. Mahse, Malsawma angaithei thak lo erawh a mak deuh tlat thung.Hmm,Amber-i bawk ka ngaihtuah leha,misual tak niin ka inhre lehnghal zat.

Ka harhin Malsawma a lo mu tawh lo. Mahse, Kitchen lama thawm ri avangin a awm hla lo tih ka hre thiam mai thung. Kan inah hian a mikhual lo em maia,a duh phawt chuan thingpui emaw eitur dang pawh a insiam thei vek ang. Thil dahna tam zawk a hriat mai bakah ka u damlai atang tawhin an phur a chhuah chuan eitur an siam hluai zel kha ania..Ka u ka ngaihtuah chhuah lehna chuan ka awm a tinuam lo lehnghal ringawt.

Ka pen thawm hriain a rawn hawi vat. A hmelah na nei hmel a pu tawh lo.Nizan kha chuan a nuam lo tih kha hairual a ni lo.

‘I tha deuh tawh em?” ka ti a.

‘Um ,tha..Ka tibuai ta chiam mai che’ nui chungin a ti a

‘A ho em maia..I Bp lam a ni angem?” tuilumna On pahin ka ti a.

‘Ka hre lo,tunlai chu ka mu tha vak lo va, ka pum vang pawh a ni zawk maithei’

‘Naktukah incheck hrim hrim la,I awmdan kha a serious riau ania’ ka ti leh a.

‘Nia,min kalpui la..’

‘Nia….E,Lawmi te huanah kan riak dawn tak. Dil kan sah dawna’ ka ti leh a.

‘Eheu! Ava nuam dawn ve. Lawmi chuan min sawm ve se tha tur’

‘I zin dawn kha, in entir i ngai bawka’

‘Ni tak,ava ho e aw..Mahse, ka la confirm chiah lo a..’ a ti leh a.

‘Kan lo kal kep hum hum ang che. Thingpui i siam tawh mi?”

‘Siam dawn chiah..I duh ve nghal em?” zangkhai takin a ti leh a. Nizana lu hai ka buaipui kha ang tawh lo tak a ni.

‘Aih, tuilum ka duhtawk’

‘Ka in zo anga, ka phei mai teh ang.Kumin chu ka la kal kima’ a nui a. Awih lo zetin ka nui ner nghal naka,a nui nasa zual sauh thung.

Chawhma ka inkhawma,inkhawm banah ka thiante pathum an lo lenga, kan thawm a na lehpek.Tlaiah chaw ei nghal turin ka ti a, nidang ang bawkin an aw lehnghal dial.

‘I Phone kha tinge i bih seka?” Zohmingi’n min rawn nghawk pahin a ti a. ‘Awihawm loh,ka en chiah lawm le’ ka ti hlak.

‘Teuh lo,nichin atangin i bih seka..Ampuia vang ami?” a nui zui awr awr.

‘No…Ka en lo’ ka ti leh a. Diktak chuan vawi tamtak Sangkima msg dawn  ringin ka en chhen a,mahse a reh veng veng. Nidangah pawh min be ziah chuang miah lo,mahse nizana kan pahnih inkar avang khan min biak ka beisei ru ve tawp.

‘En lawk teh u’ Rasky-in a ti hluai.

‘Eng maw?” Lawmi’n a ti a. Zohmingin nen engmah kan sawi lo thung.

‘An inhual aniang…Awi,ka thik’ a ti leh chiam. Zohmingi nen kan in en a, kan innuih ringawt. Kan tleirawl lai atanga tun thlengin Rasky hian Sap milar ho hi a buaipui ber anni a, an thenawm hnaite niawm khawpin a duh zawng tawh chu an chanchin a hre thei thina.Fiamthu-in ‘ in thenawmte’ kan tihsak thin renga. A haw ngai lem hlei lo va.

‘In thenawmte zinga tu ber nge?” nui chungin ka ti a, Lawmi leh Zohmingi an nui nghek nghek bawk.

‘Tun tum chu Aizawl lam thenawmte..Awi’ a ti leh rih.

‘Tu te nge a? kei chu Mizo milar hi ka follow mang hlawm lo va’ Lawmi’n a ti a.

‘Kei chu ka follow nual mai..Awi, ka’n chhiar ang aw..’ hlim zetin a ti leh a.

‘Aaa…Romantic vel lutuk hi a..En ve mai teh u’ a ti leh lawia. A Phone a rawn dah hnaia, hmeichhe kut tih hriat taka inhualna zungbun nalh zet lo lang chu ka zuk hmu a.

‘Ehe!! Sangkima leh Amber-i law? An inkawp rei tawh reng a…’

Ka beng a ngawng chuah chuaha, ngam leh ngam loin Amber-in a post hun chu ka zuk en leha, darkar khat liamta ami kha a ni a. Sangkima a mention kalh bawk…