ANNEM - 17

Chapter -17

Hmanhmawh lo thei ang berin ka inhaa. Mahse, ka riak dawn anih ngawt loh chuan Bathroomah tawm reng theih ni hek lo, muang thei ang bera ka inhak zawh hnuah ka chhuak ta chauh.

A thutna ngaiah a lo la thu reng.Ka chhuak thawm hriaiin a rawn hawi nghal vuta; Dressing Table bula thutthleng awm ka pana. Ka thu thlaa,amah lam hawi zawngin ka thu a, ngawirengin a tawng hun ka nghak ve hmiah. Diktak chuan vawiin lama kan chet velna bakah ka Motor chuang ka chaua,zan ka mu tha bawk si lo nen mut ka chawk ru ngawih ngawih. Mahse, alangah erawh hmeichhe kawlh tak ang maiin ka thu mar auha, timna nei lo ang maiin ka dak deuh vah bawk.

‘Thu ngawi tawp lo khan i duh chuan min rawn chum pawp thei reng ania’  minute 10 vel zet engmah sawi loa kan thut ngawihreng hnuah a tichhuak ta sup.  A thilsawi chu ka rin loh lam daih a ni bawk.

‘Ngai lo mai rawhse. I sawi tur neih kha ka nghak reng che ania’ ka ti hmak.

‘Ka nghak zawk che’

‘Sawi tur ka nei lo..’

‘I ngah ka ring’ a ti tawi leh tuk. Min chhaih thinrim a tum tih ka hriaa. Diktak chuan ka chhungrilah  chuan ka dawhtheihna chhe mek control hram hram turin ka infuih ru mawlh mawlh. A duhdan tihpuitlinsak ka tum bau lo.

‘Enteh,ka chau hle a. Sana kha en la,tun hun hi inleng polite lo lutuk neih hun a ni lo a. Bakah, sawitur pawimawh inei anih loh chuan kei chuan ka nei miah lo. Chuvangin kal tawh la a that ka ring’ inringtawk zetin ka ti dam thlap. Tho chuang loin Kawngkhar lamah ka thle zauh. Ka thusawi chu engtin nge a dawnsawn hriat tumin a hmel landan ka en kara,mahse engmah alang lo. Chet tum awm pawhin a awm lem lo.

‘Amber-i post vang khan kei hi misual leh pawisak nei lo ka nih mek ka ringa,sawichhuak ngam si loin i tap bawk anga.A ni em?” a mit a tizima,kei erawh a sawi dik lutuk chuan min ti hamhaih vek.

‘Sawi la…I sawi vek hunah ka sawifiah thei em kan en ang chu’ ati leh nghut. A mitmeng fing leh fiah zet chu ka melh zawka, ka pawn lam landan letling thawk ka chhungril a hmuh thiam ka hlaua,en rei ngam loin ka hawisawn lehnghal vat.

‘Engmah sawi tur ka nei lo’

‘I nei..Sawi mai rawh’ thupe aw zetin a ti leh hmuk. Thinrim em em tur zawk ka nih laiin ani zawk hi nichin atang khan a thinrim viau zawk tlat!!

‘Enge sawise min tiha? Ka lawmpui che ka ti mai dawn mi? nia,ka lawmpui che u.In inzui rei tawh a,tawp mai tur chi a ni lo tih ka lo hre lo atin ni..Aaaa, tihian tizawk ang.Ka rilru a lo na lutuka, ka tap vak vaka’ ngeiawm zetin ka nui zui hak.

‘A tawp tih ka sawi kha..’

‘Aaaaa, a ninawm..Ka chau lutuk ka tih kha,kal mai rawh. Chuan,inthiam lo duhsuh; I awmdan kha chu thilmak leh awm lo lutuk pawh a ni lo a.Mipa mize pakhat ve mai ania,thil pawi lutuk a ni lo.Sawifiah chiam pawh angai hleinem. Mahse, inngaizawng rei lo ber Record kan siam’ pawlawh zetin ka ti leh a. Ka tho a, Khum sira ka phone leh Earphone ka laa,Kawngkhar lam pana. Ka chevel chu min thlir zui zel tih ka hai lo. Ngaipawimawh awmin ka awm lo,hetianga pawisak nei lo niawm taka ka lan thinna hian tun chauh ni lo,hman atang tawhin buaina lakah min chhanhim fo tawha. Ka miziaah chuan ka duh ber lai a ni hial thina,mahse pawn lama hnehna chang ka nih ruala chhungrila ka kehsawm tel erawh a rukin ka tuar ngat ngat zel thung.

‘I duh hunah i chhuak mai dawn nia.Chuan,hmuh nawn leh che ka inbeisei tawh lo bawk ania’ ka ti hmak. Kawngkhar ka hawnga, nem khar tawh loin inhnuai lam ka pan thlaa, ka nu te Roomah ka lut a. Ka kalh nghal hmak..Kawngkhar nghengin ka ding deuh vang vanga, ka luak a chhuak deuh hlui thei. Duhthawh zetin Boruak a hip luta,tunah chuan a tawp chiang ta bal tih ka hria. Nia, tawp rawhse.

Ka  sam tuamna Towel ka phelha, ala huh nasa lutuk. Ka chhem ro ang ka ti kha ania,ka tum dan angin ka awm leh lo nasa si, ka nu hian Hair Dryer hi a hmang ve ngai lo tluk a ni a. Thlasik vanglaiin laklawh thilah a hmang ve zauh chauh thina. Tunah lah an roomah ka awma, ka Roomah zawk Hair Dryer a awm daih. Huizzz, Sangkima ka hriat hnua ka nuna thil thleng hi thawnthu nise a ngaihnawm loh pawhin a maksak ve ngawt ang.

Khumah ka lawna, Ear phone ka vuaha, ka Playlist a hmun chungnung ber luah ngun ber zing ami Imagine Dragons zai ka playa a, muthilh tumin ka mit ka chhing nghal hmiah. A duh hunah hunah Sangkima chu kal mai tehse.

Ka Phone nghawr dar darin min tiharha,phak zetin ka mengchhuaka..Ka Phone ka en a, dar 7 a ri tawh.

‘Aw’ ka ti mawl tawp.

‘I la tho na nge?” ka nuina rawn ti a.

‘Tho lo..Nizan kan thleng tlai lutuka’ ka ti sap,Ka tawng zawnga ka hrawkna tuk vangin ka ner sawk.

‘Tho tawh rawh,Dawr pawh i tlawh lo rei tawh ania. Chuan,keini hi karleh  Tuesday ah kan lo haw dawna. Tesen-in ticket pawh a tifel vek tawh’ a rawn ti leh duah.

‘Ka pi chu tukin lam enge a an a?” ka ti leha.

‘A zia tawh, naktukah Damdawiin atangin kan chhuak ang.E,thil pawimawh lutuk pakhat chu vawiinah Buhfai bag leh Alu,Dal nen i Patea ka chaha,tlaiah a lo hawn ang. Kan chin a hriat loha,hei kan ralkhel nasa ania. Inchhung mamawh ho kha Store Roomah khan en la,tel leh bawnghnute tih vel kha lo check la. Lak angaih chuan laknghal vek bawk tur’ a rawn ti leh a. Nu phili chi anih chu thuhran,ka pa damlai atang tawhin eitur chhe mai thei lo chi hi chu kan nei khawl vek thin hrim hrim.

Rit lukin ka tho a, ka lu anat mai bakah ka hrawk a thip hlur a. Ka awm a nuam lo takzet. Mahse,nizan lama ka sam huh chunga ka mut vang tih ka hriaa,ngaihthat loh nan ka hmang lem lo.

‘Phone i pick si lo va, ka rawn kal risk a..’ Malsawma’n rawn luh pahin a ti a.

‘I lo call lai ka hre lo reng reng. Lo thu rawh’ ka ti a, ka khuh zui khauh khauha,ka hrawkna bawk si nen ka hrawk ka dawm pah.

‘I va mak bur bur ve..Nang ho Corona ilo kai reng te hi a ni lo maw?” nui chungin a ti leha.

‘Kai awm lo em maia,hritlang satliah anih hi. Mahse, nidang ai chuan ka hrawk hi a thip zawk’

‘I entir la..’

‘A ho em maia,hritlang mai mai te chu ka hnehsawh lutuk’ ka ti liam leh puat.

‘Um..A tha alawm. Tak takin vawiin khan kolkatta lamah positive an hmu a,Mizo ho hi Kolkatta lamah kan tei hawi nasa angrenga. Kan fimkhur deuh angaih ka ring. North Eastah la hmu chhuak lo mahse School leh College an khar tana,phai lama awm ho an lo haw zut zut a..A natna kaidan lah hi Mizo zinga pung duh ber chi tur ania,tihkhawm neuh neuh kan ngah si a’ a ti leh duah.

‘Nia,rilru chu a nuam zan lo. Mahse, kan theihtawpa lo fimkhur ve bak chu Pathian thu ania. Kut hi silfai hle ila animai’ ka nui a.

‘Fai viau ila animai. Sanitizer leh vitamin C pawh a zo duak duak an ti ania’ a nui huk huk.

‘Over thei…Mahse, midang Over zarah hian leitur awm loh thup awm thei ania.Haw pahin ka lei ang’

‘I nu te hi enge chanchin?” a ti leh a.

‘Karleh Tuesdayah lo haw an tuma, Ticket pawh an hmu tawh’

‘A that chu..Damdawi i ei em?” a tihzawm leh daih.

‘Ei nel nual..’

‘Tui lum in tam la,I hrawk kha thuah deuh angai dawn anih kha,I aw pawh a Speaker aw tan tlat’ a nui a.. Ka nui ve hak hak.

‘Khawnge ikal a?’ ka ti leh hnuhnawh.

‘Ka lo kal..’

‘Pawimawh a awm ami?” ka ti leh a.

‘Awm lem nang,ka zin tum ka thulh leh rih sia.Ka rawn teikual vel mai mai.Lawk,chhan tha tawk nei lo chuan ka lo kal thei lo tihna a ni em?’ a ti a.

‘Min lo call iti bawk sia, a pawimawh hmel em a’

‘Ka ngai che pawh a ni maitheia’ a nui a, mahse a mitmu buang thakah chuan a fiamthu lo tih ka hmuthiam vek.Atthlak lutukin Sangkima ka ngaihtuahchhuak lehnghal zat.

‘Nupui nei vat rawh. Anih loh chuan mahni nau ngaizawng an ti mai ang che’ ka ti nghauh.

‘A pawi pawh ka ti chuang hleinem’ a ti leh a.

‘I ninawm..’ ka ti hlak..A nui huk huk a, mahse ka nuih aza ve miah lo thung.

Dar 5 pelh hretah in ka thlenga, ka thlen hnu lawkah Patea’n kan thiltur ka nu chah ho a rawn daha. Store roomah kan dah fel nghal veka,kan thil rem tlar hi chu ka thlir kuala; Thlahnih vel chu tam pawh thleng se kan tam lo ang.

Zanah Ampuia a rawn kal hlawla,a hmelah vei nei sawi hreh deuh nei si a ang a. Nidang angin a ri bawrh bawrh hek lo. Lawmi hnena a thil lo sawi vang khan keilah ka inthiam lo a, sawithiam chiah si lohin kan inkar a hla ta du mai.

‘I hrethiam ang tih ka ringa, zanin khan hrilh che ka tuma.Hmaichhanah chuan ka ngam ngang lo’ tih msg a haw hnuah min rawn thawna,hmeichhe pakhat nena an thlalak a rawn thawn tel bawk.

‘Ka hrethiam em em che.Congrats’ tih ka thawn leta, ka thawveng huai mai.Tunah chuan amah ka play ni a ka hriatna kha a bo theih tawh ka beisei a. Mipa tha leh rintlak a ni a, kei aia hmeichhe tha zawk a phu chiang bal.

Ka rin loh deuhin nidang aiin ka pik ta zawk fe. Ni 3 chhung chu ka in entir bak ka chhuak ta miah lo. Ka khuh bur bur renga, a khat tawkin ka khua a sik bawk nen ka zawia, thil ka ei thei bawk si lo. Bakah,tunlaiah chuan hritlang khuh satliah pawh midang tan kan hlauhawm thum vek tawha. Mi bula awm loh a nuam zawk hrim hrim. Malsawma a lo kal deuh renga, Lawmi a lo kal zauh zauh bawk.Min riahpui a tum erawh ka hnial fithla thak. Ka natna mai piah lamah ka chhungril hliam hian midang bula awm minti chak lo va, awmze nei miah lo tih hre mah ila vawilehkhatah na a dam nghal thei miau si lo.

Sangkima bulah khan pawiti lo leh pawisa miah lo angin ka lang ngeia, mahse ka chhungril hian insawifiah tura min rawn biak ala beisei ru cheu tho. Min duh  tak tak anih chuan insawifiahna ngaithla duh lo mah ila,min umzui anga, min rawn hmuh pawh a tum zui ngar ngar turah ka la ngai ru deuh tlata. Mahsse,min hmuh chu sawi loh,biak pawh min rawn be eih lo. Keimah zawk hian tlawm inti em em siin a last seen ka check a, IGah enge a Post tih mai mai buaipuiin ka hmanhlel leh ta zawk..Tlawm inti em em mah ila ka en lo thei der lo. Malsawma zawk a lo lang chamchi a, Ampuia lo lang ve miah si lo hi a lo chhut thiam leh vek nge ka hre lo.  Tun nihnih thum vel atang hian ngaihbel theih turin min duh tih a tilang ta zauh zauh. Mahse,Hope ka pe lo va, ahma ang khan ka endan ngai rengin ka en ve thung.  

Ni li na erawh tlemin ka zia ta deuha, chhunah vawikhat ka khua asika,chubak chu khawsik pawh a awm tawh lo. Thil ka ei thei ta deuh bawka, tam erawh ka la ei chuang lo thung.Living Room Sofaah ka mu a,Tv ka en a, ka movie en mek in ka ngaihtuahna ala peng a, tunhnaia ka chunga thil thleng ka ngaihtuah kuala. Ka tleirawl lai atangin nula luck leh lar ka ni ngai lo, Tun hnaiah erawh mipa chhe lo leh rintlak tak tak ka nunah an rawn lang rual thawt a, min duhdan chen tehna a awm miau loh avangin ka hre lo.Mahse, ka nunah erawh an  rawn in tat lut vek. Sangkima leh Ampuia an kal tawha,Malsawma ala awm ta cheu. Hmmm…Senior luck an tih pawh hi a lo awm tak tak a ni mahna..Ka ngaihtuahna avangin ka nui chhuak nghal hak mai.

Ka nu-in ka zia deuh em tih min rawn zawta, thildang dang kan sawi teuh bawk. Kan inbe zo deuh chiah tihin number ka hriat ngai lohin min rawn call ve nghal zat.

‘Hello..’ zangkhai takin ka ti a.

‘Anun..Bsa ka nia, ibuai em?” ka beisei loh lutukin a rawn ti a. Ka mengphawk deuh vak bawk.

‘Aw..Aih, buai lo e’ ka ti nawi nak. Nula puitling pui tawh si hi eng emaw hlekah ka nawi leh tlat thin.

‘A zan thil tawh nangin,I buai  viau loh chuan hmuh lawk che ka duha’ a rawn ti dam leh thlap.

‘Maw? Ti nge a?” ka ti vata, mahse ka sawi zawh rualin thawklehkhatah hlauhthawnnain min rawn fan nghal thuta, Sangkima chungah thil tha lo a thleng anih ringin ka lungphu a rang nghal dawt dawt mai.

‘A pawimawh angrenga,I remchan chuan ka awmna ka rawn thawn che anga, ilo kal thei mai angem?” a rawn ti leh a.

‘Ka damtha chiah lo deuha. Mahse,Eng thil nge min hmuh duh chhan tur? Ka hrethiam chiah lo a” ka ti a, Sangkima hming lam rik loh tumin ka finkhur viau,mahse  ka hlauhthawn luatah ka aw a khur titih a, a hre hial maithei.

‘Sangkima chungchang ania’

‘Aw..Anih chu,mahse ka la hrethiam chiah chuang lo” ka ti leh hap. Ka hlauthawng lutuk kha ka ngaihtuah leta, atthlak ka ti leh lawi.Bakah,Bsa hian engvangin nge Sangkima chungchang min sawipui a duh ngawt tih ka ngaihtuaha,amak riau.

‘Enteh, ilo kal hunah kan inbia anga tiraw.Khawngaihin lo kal hram la,ka ngen che’ a rawn ti leh a.

‘Ka lo tum dawn nia’ ka tita nge nge.

Phone ka off hnuah a awmna hmun min rawn thawna, Sihphirah daih. Ka nawm loh zia ka ngaihtuaha,ka inkhalhchhuak huphurh a. Bakah,Sangkima chungchang anih avanga chutiang chen chen han kal tak ruak ruak chu a tlawmthlak ka ti deuh bawka.Mahse, Bsa khan min ngen hial si a, a pawimawh viau anih ka ring lawi. Tun hnaiah Sangkima chungchang hrim hrim hre turin Ruatsaka pawh ka tir ngai lo a. Kan pahnih mimal thil bak kha Phuba tihvelin ka rilru a luah rih miau lo. Ka ngaihtuahna a fim lo a, kal ka duhna leh kal loh ka duhna a inchen deuh reng.Kal ta ila ka tana pawithei lo ni se ka inchhir ang.Mahse, kal ta lo ila Sangkima tana pawithei lo nise ka inchhir tho ang. Huizz,tikhawp hian ka chhungril hi a lo la thunun cheu mai chu ania..

Durtlangah ka tlanchho a, March thlatir ni tawh mah se ala lum tehchiam chuang lo. Ka hritlang a zual ka hlauh avangin ka inthuam lum ve hranpa. Sihphir ka thlenga,Sihphir a thlen huna call tura min tih angin kawngsirah ka dinga. Ka call a,vawikhat chauh a ring hman tihin a pick nghal mai.

‘I lo thleng tawh mi?” a rawn ti nghala.

‘Um,Sihphirah ka awm meka’

‘Ok,anih chuan lo tlan zel la,Sihphir neihbawi lamah khan. Kawngah ka lo nghak dawn che nia’ a rawn ti leh a. Ka thaw halh,thil hi a pangngai hlawl lo.Mahse,ka kal tawh laklawha,inchhir leh vel awmzia a awm lo.

Thui fe ka tlan leh hnuah kawngchhakah a lo dinga, ‘Ka lawm hle mai,a hla tham bawk sia..Mahse, tihngaihna dang a awm miau lo va’ inthlahrun hmel takin a ti a. A lo awmna lai chu ka enkuala,Lirthei lam chi engmah a awm lo.

‘Khilai lawkah khian peng a awma. A hla lo bawka, kein ka lo chhuka..Kawng a chhe deuha, ka lo khalh dawn mi?” ka rilru hria niawm takin a ti leh vat.

Ka chhuka,amah zawkin a khalha,a sawi ang ngeiin kawikhat kan tlana,dinglamah peng a lo awm a. Thir Gate hlui tawh tak hi inhawng sain a lo awm a.A kawng chu Scooty head Light engah a hmuh theiha,Tunhma lamah chuan an lo metal tawh ang tih a hriattheiha,mahse tunah chuan alang thei chin chu a mam tehchiam lo.Mahse, chhe over erawh a nih hmel loh.

Inhlui lam kawtah kan dinga, kawtzawl zau vak lo chu a lo eng iar. I20 a lo dinga, a bulah hmanlai chhuak Cycle hlui tawh tak a awm bawk. Pangpar a awm niala,enkawl an hlawh lem lo hmel. Mahse, A hmun landan chu eng emawti takin a lunglenthlak tlat.

‘Lut ila…’ dam thlapin a ti a.

‘Hei hi eng hmun nge?” hawikual chungin ka ti a.

‘Sangkima huan lei thar anih hi…’a ti a.. Ka bu nghat ringawt. Inbe tur ngawta he tah daih han inkoh mai chu thil pangngai a ni lo tih ka ngaihtuah nawn leha, mahse ka kal ta sa sa a,achhan chu engpawhnise hriat ngei ka tum tur a ni tawp.

Inchhungah kan inzui luta, thutkhawmna pindan mawlmang tak a lo awm nghala, chunglam atangin electric Bulb a rawn uaithlaa, Ceilling fan hmanlai chhuak a inkhai tel bawk. Ceilling pawh a hlui bakah a rawn fual deuh lai te a awma,ruah farna hnu niawm tak a val kue kuau bawk.

‘Helamah hian aw’ Bsa-an a tih riah ka hawi nghal vat, ding lamah a kal phei nghala,ka zui a,Corridor tawite kan kal phei hnuah room kawngkhar a lo awma, Dimtein a hawnga. Angaihna hre lo zetin ka zui ve zel ringawt.

‘Le…’ zawi tein a ti nghal hap. A ding sawna, a din sawn rualin khuma Sangkima lo mu ka va hmu nghal chat. Ka tawlh deuh dawrha, inring hman loin ‘ Awi’ ka ti nghal halh bawk.

‘A muhil rih a,hlauhawm a awm lo’ thluk nei lo zetin Bsa-an a ti mar ut.

Sangkima lam  ka en leh a, a mit achhinga, a chalah bandage in an vet kuala, hmunkhat lai chu  rawng duk deuhin a rawn tlanga. Thisen nge Damdawi ka hre lo. Puan sin loin a mu a, a nak na laiah khan ahma aia lian zawk mahin an lo bel leha. Drip an khai mek bawk. Engmah hre hmel pawh a pu lo a,a dang deuh lap a,a khabehmul pawh tunhnaiah a met lo anih hmel.A dum kual deuh raih bawk. A landan chu en thuak pawhin ka hmu kim nghal vek.Diktak chuan thil pangngai zan lo a awm ang tih chu ka ring saa,mahse hetiang a hmuh hi chu ka inbeisei lo nasa lutuk..

‘Ngatinge?” ka ti chhuak sep.

‘Mi kut a tuara” a ti tawi tak.

‘Thu phawt la, kan sawi dawn nia..Eee,enge i an?” a ti leh rih.

‘Ka tha..Hritlang satliah’ ka ti a. Khum bula Thinga siam Chair lian leh hlui tawh tak awm lam chu ka pan pheia, Sangkima lak atangin ka mit ka lasawn lo tluk a ni.

Khumah a rawn thu thla ve a, Sangkima chalah a khawiha,a drip kal lai a kal tha em a en leh a; a chevel chu ka thlir mawl tawp.

‘Engtikah nge hetiang hian a awm a?” reife kan ngawih hnuah ka tichhuak sap.

‘Vawiin hi ni hnihna..’

‘Ti nge Damdawiiah inkal mai loh? ‘ ka ti hul hak.

‘Kan thei lo..’ a ti tawi ve tak.

‘Hetiang ringawt hi a dik loin ka hria..Ka sawi tur a ni em ka hre lo va, mahse enge ani hian dik lohna a neih a? tu in nge hetiang hian ti a?” ka ti leh halh.

‘Dik lohna a nei lo. Chuan,a khawihtu hi amah pawhin a sawi duh lo va. Ka hre bik lo.Nidangah hrim hrim pawh achhan min hrilh anih loh chuan ka zawt ngai lo. Ka best friend ni mah se ka nawrlui thei lo bawka..Tun hi a vawikhatna a ni lo a. I hriat kha,I Roomah ngei pawh a thlen tawh kha..Diktak chuan ,tun tum bik  erawh hi chu tlemin keipawh ka hlauthawng ve deuha,nidang aiin a thisen a hloh hnema.A tawngvai nasaa..A ko nasa che a,a harh apiangin a zawng bawk si che a. Ka rawn call hma che khan a muhil leh a, amuthilh hma hian a harh hunah ilo awm lo ang tiin ka tiama. Ka tibuai che a, pawi ka ti.Mahse, a luhlul em a ni’ a tita duah.

‘Khawiah nge Amber-i?” ka tichhuak hlawl.

‘Maw? ‘

‘Amber-i,hetah hian kei ni loin ani kha awm tur niin ka hria..’ ka theihtawpa pangngaiin ka ti a. Bsa hmela thinrimna niawm tak lang zawk chu a rei lo hle nangin ka hmu hman tho.

‘Anun,min hrethiam la..Sangkima hian Amber-i mamawh ni se chuan amah ka ko ang. Mahse, a mamawh chu ani kha niloin nangmah ini a’ a vawikhat nan a tawngkam a chang tha beng bawng viau. Vawi hnih ka hmu tawha, kan inhmun apiangin damthlap leh nelawm takin min be ziah miaua.

‘Ka hrethiam lo..A nupui hual a ni a’

‘Ni lo..Ni miah lo,a ni ngai lo bawk ang’ ka tawng lak lawh lai titawpin a ti chiam. Phawk zetin ka en a, a insehruh teuh chu ka melh reng ringawt.

‘Sorry…Ka thinrim thut anih kha. Eng lo ania, Sangkim nen an inthen tawh. Kha thil kha ama thu a a post mai a ni a. Dik tak chuan Fair takin Sangkima hian a titawp thlap. Mahse, amah khan a pawm lo mai zawk. Tin, hmeichhe fing leh fel tak a ni a. A duh tawh naah chuan pawisak pawh a nei lem lo a’ a ti leh duah.

‘Ka hrethiam hlawl lo..’ beidawng zetin ka ti chhuak hap.

‘Nilai ni khan a zin dawn tih min hrilha, mahse zanah hetah hian a awm thu min rawn hrilh leh lawia. Heilai hmun hi a lei tih pawh ka lo hre lo. Ka kal hnuah min hrilh chauha,Thla hmasa lawka a lei alo ni a. Ka thlen hnu lawkah a chatthla fel hmak. Ka riak nghala, zinga ka harh leh pawhin zu a lo in leh hman tawh. A awmdan kha nidang nen a danglam avangin achhan ka zawta, a nui mai maia.Chhanna min pe lo. Chhunah hna kal ka ngaih avangin ka hawsana,zanah min rawn call leh a. Ka han thlen chuan tihian a lo let reng tawh..’ a ti leh duah. Ka melh vang vanga, kan in a lo kal hnuhnun ber zan kha thawhleh zan a ni a. Mahse,kei nena kan buaina vang anih ka ring lo.

‘A chhungten heta a awm hi an hre lo em ni?” ka ti sep.

‘Hre lo..Nidangah pawh hetianga a awm chuan a zin angin an hre mai zel’  a ti awlsam et.

‘A harh hun tur a hriat lawk si loh va, I riak mai thei ang tiraw? I nu awm loh lai ala ni thoin ka hriaa.Room pakhat zawkah ka riak anga, I duh phawt chuan khumah hian i mu ve thei a’ a ti leh a.A aw a dam leh thlap tawh.

Bsa chhuah hnuah Chairah ka thu tawm taka,Sangkima muhil chu ka thlir dauh dauh. Amber-i nen an inkar a tawp atih kha a lo tawp takzet anih hmel. Bsa commentna te,tuna a sawi leh te pawh a inman fuh kual vel vek.Sawifiahna hun kha pe lo pawh ni ila min hrilhfiah tumlui tal se ni tur ania. ‘Hetianga a awm vawikhatna a ni lo’ a tih kha ka bengah a rawn ri nawn leha, ka nu-in ‘ an nunrawng em mai,hmelma tamtak an nei ang’ atih pawh ka hrechhuak nawn leh zat. Mahse, tinge? Mi chunga leng leh hausa fal bik annih vang maia hmelma neih chu thil theih loh a ni tih ka chiang.

Thil tla ri bawlah ka harh zawk,ka thu mar zawta, Sangkima lam ka en nghal vat bawk. Khum sira tui Bottle awm chu lak tumin a lo ban meka, a ban phak chiah loh vangin Bottle bula no a titla anih hmel.

Ka tho vata, tui Bottle ka laksaka,ka pe a. Mahse, Min en loin chauh hmel zetin a mut ngaiin a mu leh a.Inchung lam melhin a thaw hlawp hlawp mai.

Chhuata no tla chu ka chhara ,tui ka thli chhuaka..Khumah ka thu thlaa..’Kha in la..’ ka ti sap. A rawn che thuta, ka tui ken a rawn vai pawpa. Khumah ka thlauha, a baw nghal vek ’ Kalbo rawh’ a ti tuar bawk. A chetdan tehthut chuan min thawng lutuka,tih leh mai tur hre loin ka en mawl tawp.

‘Mangchhia,atakah awm leh ngai si lo…’ ati leh sup. Na zetin khum a chum nghal pawpa,ka phu leh nghek.

NOTE : CAPTION CHHIAR THIN TEH U.KHAWNGAIH MITTUI TLAIN..NIZANAH PAWH 'POST DAWN EM? DAH DAWN LOH CHUAN SAWI MAI AWM' TIH VEL COMMENT A AWM LEH A.KA LO INTI CHAWL VE THEI SI,COMMENT PAWH THLAMUANG TAKIN KA LO EN LO VE A,KA INTHLAHRUNG THEI EM MAI.CAPTION PAWH A NGAIHNAWM TEL THO ANIA.LO CHHIAR TEL VE THIN TEH U'N