ANNEM - 18

Chapter- 18

Keihi mangchhiaah min ngai maw? Ni lo, thildang zawk a ni ang. Mangchhia ka nih ngawtna tur a awm lo. Ka inpetruha, ka lu ka thing deuh nawk.

‘Sangkim..Keimah’ tim daiin a luah ka khawiha. Che loin a mut ngaiin a mu a,ka koh chu hreawm pawhin a awm lo. Ka ngaihtuahna a buai a,Bsa sawi ang kha thil nihdan ni loin kei hi mangchhia ka ni tak tak zawk aniang.

Ka tho tham thama,khuma no awm chu ka laa, mahse ka tho tur chiah ka banrekah a rawn man chawt. Ka phu zawka, rang lutukin ka en nghala, min lo en reng.

‘I ni em? I ni tak tak em?” a ti zawi sup. Amah nena inhmeh lo em emin a hmelah chuan inrintawk lohna lian tak a lang tel ve tlat bawk.

‘Aw..Keimah.Bsa’n min rawn ko a’ nui lui sak chungin ka ti a, a thaw nghal hawk thung.Khap miah loin min en a, ka sawi chu a ringngam dawn em tih ngaihtuah a ang. Hawisawn duh loin ka en ve kar mai.

Ka rin loh lutukin a che ta thut; amah bawh rawk khawpin min pawt let thuta, a nak na lai tihfuh hlau em emin ka indang ve thung,mahse tlanbosan hlau niawm takin nghet lutukin min kuahbeta, ataksa khuhtu awm lo chu ka nghenga,a lumna ka feel nghal vang vang thei.

‘I hliam hi ka ti na ange’ ka ti sap.

‘Shh,tawng suh..Tawng suh’ a ti nghal sup. Ka awmdan kawisawi lutuk chu insiamrem ka tuma,mahse min kuah nghet zual sauh. A awmdan engkim mai chu tider a ni lo tih ka chiang lutuka, hetiang khawpa min lo mamawh tih ka hriatna hian min fana,ka mittui a hnai kuar thei hial!

‘Ka kalsan dawn hleinem che,ka awmdan a dik lo a, ka insiamrem lawk dawna’ ka ti sap.

‘Mahse,awm lo leh thut la….’ A ti leh nghut.

‘Ka awm ang,min mamawh chhung chu ka awm ang’ rang zetin ka ti vat. Ka tum lawk pawh ni loin ka sawichhuak nghal pawp a ni ber.

Min thlaha,insiamrem mai loin ka tho a, min rawn ban leh hman tho ; ka nui nghal hak mai.

‘Khumah hian tui a buaa’

‘A pawi lo..Lo mu phawt rawh’ dawhthei lo zetin a ti hmuk.

‘Lawk,puan dang phah thuah ang,anih loh chuan a hrehawm ang’ luhlul chhuahin ka ti ve hmiah. Puan dang ka zawnga,ka hmu mai si lo a, ka Shawl ka thlep chhaha,ka phah ta ngawt. Ka mut theihna turin a insiamrema, a nakna lo lam delh zawngin a mu a, ka kawngah a rawn kuaha,ka darah a hmai a rawn phum nghal vang vang.

‘Engtin nge i awm?” ka ti leh hnuhnawh.

‘Ka ngai che’ ka mit ka chhing sawk. Hetiang khawpa mipaah pawh mipa hian min ngaihthu a zep thei lo chu ania..Ka luhlulna leh ka natna chauh ka en avanga ka chet dan awmze nei lo vangin ka inthiam lo zual sauh.

‘I hliam kha alawm ka zawh che’  alangah erawh ka ti leh sep.

‘Ka dam tawh’

‘Bsa’n thisen i hloh hnem a ti a,mahse i zia zel a ti thunga’

‘I lo kala,ka dam tawh,mahse khatiang khan i awm leh chuan ka damlo leh animai…I sual si’ a ti leh sup. A tawngdan naupangchhia lutuk chu insum hman loin zawitein ka nui nghal hak mai.

‘Nui suh…’ a ti leh hluka,mahse a awah thinrimna hriat tur a awm lo.

‘Tui kha….’ka hrechhuak thut.

‘Ka in duh leh lo.Ka mut achhuaka’

‘Um..Muhil la’

‘Aih…’ ati leh lawi.

‘Ti nge? I chau lutuk ang.I mut tam a pawimawh ka ring’

‘Lo inher teh ‘a ti zawi sup. Thuawih zetin ka insiamrem sat sata, amah lam hawi zawngin ka mu a,a darah ka lu ka nghata. A awmah ka kut ka daha, a lungphu nghawr dat dat ka hre thei.

‘Muhil tawh rawh’ ka ti leh sap. Ka khabeah a rawn vuana,amah en thei turin min kuaidaka, a mitah tak ka en a, a mitmeng thim khap maiah chuan enge tih a tum ka hria. Ka mit ka chhinga, a hmui lum ham hamin ka hmui a rawn si a, mahse a inlahrang lehnghal mai.

‘Ka harh hunah ila awm ang tih min tiam la…’

‘Ka tiam che, ka awm ang’

‘Kha thil thleng kha ka sawifiah theia…’a ti leha.

‘Aih, angai rih lo. Nakinah i sawi zawk dawn nia’ ka ti vat.

‘Mahse, Nakinah chuan i awm angem?” a tawngdanah chuan min ringngam lo tih ka hai lo.Mahse, a aw a hlauhthawnna chu ka la hriat ngai miah loh a ni a, engkim mai hian min mamawh zia a tilang chiang zel ni berin ka hriaa,ka hlim ru veng veng.

‘Ka awm ang ka tih kha..Muhil rawh le’ ka ti leh sap. Ka inbengkanga, dimtein a hmuiah ka fawp de de a, a thaw hawk. Duhthawh zetin min rawn fawp let nghal a, mahse inlakhran a hun tih ka hriaa. Ka inlahrang ta zawk. A rum deuh nghuta,a phun zui hluk bawk.

Reiloteah a muhil a, a thaw ri sak sak chu ka ngaithlaa, puan ka pawt chho a, ka sinpuia..Muthilh tumin ka mit ka chhing ve nghala.Ka thlamuang ngawih ngawih mai chu mak ka inti lo. Ani chauh hian min mamawh lova, keipawh hian ka mamawh ve tih ka hai lo. Tuna ka thlamuang ngawih ngawih pawh hi  thilmak a ni lo,a angchhunga muthilh nawmzia hre tawh tu ka ni miaua.

Ka mengchhuaka, Sangkima lukhama inkamkang deuhin a lo thu mu a, min lo thlir reng tawh.

‘Good Morning’ a ti sup.

‘Morning…I va harh hma ve,I zia deuh em? ‘ ka ti a, ka mit ka nuai nghal chat chat.

‘Tha lutuk..’ a ti supa. Ka biangah a rawn khawiha, ka bekah a rawn khawih leha, ka beng a tuai zui leh hauh hauh.Ka tawlhnaia, a hliam lai tihpalh hlau deuhin a kawngah ka kuaha, a nakah ka fawp zauh. A thaw nghal hawk;  a rawn kuna,ka chhip samah a rawn fawp nghal vang vang mai.

‘Thingpui lumna tur a awm em? Ka va siam ang aw.Thil ei la a that ka ring’ ka ti sap, ka thuchhuak nghala.

‘Pawi miah lo,ka ril a tam’ a ti ve mai.

Khum atangin ka chhuka, rawn thawh ve a tum chu ka nem mu leh vat.

‘Tho lo vang,ka rawn la mai ang’

‘Toilet kal ka mamawh alawm..’ a ti sup.

‘Um..Bsa ala tho awm si lo ,a pawi lo..Min rinchhan mai anga. I tluk palh pawn ka dahphei leh..’ a nui hmel chuan ka thilsawi lai min tawptir nghal chawt.

‘Enge? ‘ ka ti nghat.

‘I sawi danah khan i nu len hmel ka lo tia’ a nui leh a, a nuih zawngin a hliam lai ana tih hriat takin a then zui nghal nawk.

‘Nuih kher angai hleinem,I nuih zawngin a nat kha’ ka ti hmak.

‘Sorry..Anih leh i nu lian’ ngeiawm zetin a ti leh a. Ngei lutukin ka melh vak, A mitmeng de sawr sawrah chuan min chhaih thinrim achak tih ka hria. Hrereng mah ila ka tum hmak tho. Ani erawh za zetin a nui chhuak hawk thung.

Thutkhawmna pindan lamah kan phei duna, kan thawm hriaiin Bsa a rawn dak vat. ‘Eheu leh!! Kan va tha chak si ve’ hlim zetin a rawn ti nghal chul.

‘Ngawi mai mai teh’ Sangkima’n a ti hluk. Ka hriat thin Sangkima, induhtawk zet kha a lo ni leh daih tawh.

‘Enge in an a? in pahnih khan ka zawt ve ve che u ania’ Bsa’n a ti leh a.

‘Ka tha..’ ka ti vat.

‘Nizan khan i khuh nasa angreng lutuka, chuvang mawle’ a ti leh a.

‘Ka tha lutuk,ka khuh tih pawh ka hre lo reng reng’ ka ti leh a. Sangkima ka en a,’Khawi lamah nge Toilet a awm a?” ka ti nghal zat.

Toilet awmna lamah kan phei dun leha, min rinchhan deuh tho nangin kan inlenhleih lutuka, min ring tak tak pawn ka hre lo. Kawngkhar ka hawnga, ka thaw hak mai. Building nena inhmeh lo zet Bathroom zau tha hem hawm leh  thianghlim zet mai a ni tlat. Chhuat leh bang chanveah Floor tile an phah veka, Bualthleng mawlmang tak,lian tha zet a inhunga, Shower a awm thlap bawk.Toilet awmna lai tak erawh sarang chhah chi in an zar hliah leha, a zau that bakah a felfai thlap mai.

‘Ka lei tirh khan avaiin siamthat vek ka tuma,mahse hun ka la nei lo a. Bathroom leh Toilet hi ka ngaipawimawha,ka siamtir hmasaa’ ka ngaihtuahna hria niawm takin a ti nghut.

‘A nawm hmel tawp..Pawnah ka lo awm ang,kawngkhar kalh lo mai rawh’ ka tih zawm a. A bu nghuta.

‘I damlo ami?” a ti leh a,ka en vat.

‘Dam e..Tinge?” ka ti ha.

‘Bsa khan a sawi kha’

‘Ah,ka hritlang ringawt. Ka khawsik pawh a awm tawh lo va’

‘Ok..Anih chuan a that chu’ a ti ve mai.

Bsa nen eitur kan siama, Sangkima erawh a mu leh tawh thung. ‘Engtin nge i awm ang? ‘ satliah deuh takin min ti a.’Ka hre lo’ ka ti mawl ve tawp. Ka hre miau lo va, kalsan loh ka tiama. Tunah rih chuan a la tha tawk lo tih alang reng.Mahse, engchen nge hetah ka awm theih ang ka hre lo. Ka nu awm rih lo mah se ka awmbo reng thei tihna a ni chuang tlat lo.

‘A hliam hian a kawchhung a thleng lo hlauha,a chal pawh hi hmun thumah ka chilhsaka, a thisen a hloh hnem em avangin a chau zual ta deuh kha ania.Mahse, tunah chuan a tha chak deuh tawh turah ka ngaia.Thil a ei bawk chuan’ a ti leh a.

‘Hetah hian a awmreng thei dawn si lo va, engtin nge niang?”

‘Tunkar a awm chuan a tawk mai ang’ a ti awlsam et.

‘Enteh, ka sawi tur a ni lo maitheia..An chhungkua hi an in ngeih em?” nuam ti chiah loin ka ti sap.

‘Engtizawngin?”

‘Ka sawithiam chiah lo. A chhungte hnenah hetiang thil a zep hi mak ka ti deuha. Chhungte mamawh hun lai ber ania’ ka ti leh a.

‘Adik alawm..Thil tamtak sawi tur ka hre lo maitheia. Mahse, achak lohna midangin an hmuh hi a thil duh loh ber ania. Mahse, ani hi chu buaina hian a kiansan meuh lo.A nupui thih atang phei kha chuan…Eheu! Ka sawi loh tur ka sawi tlat mai’ hrehawm tih hmel zetin a ti hul hak. Room lam a hawi phei nghala,a thaw deuh huai bawk.

‘A nupui maw? Nupui a nei tih ka hre lo va’ nupui tih tawngkam chuan engtin emaw min fana, ka awm a nuam lo niberin ka hria.

‘Min hrethiam teh’ a nuam ti lo hmel chu ka en a. Nawrluih ka tum lo.

Thil kan ei zawh hnuah Bsa a hawa, kei erawh Dawr lam ka biaa, ka kal dawn lo tih ka hrilh a. Tun hnaiah ka nawm loh avangin ka kal meuh lo hrim hrim. Ka pi ka be leha, ka thian pakhat damlo ka awmpui tih ka hrilha,zanah pawh ka haw lo maithei tih ka hrilh nghal bawk. Ka nu hnenah pawh ka pi bula ka sawi ang chiahin ka sawia, mahse ka nu erawh chuan ka thian khawi ami nge tih a hre duh. ‘Thantei ania. Office a ka thawhpui thin kha, a chhungte thingtlang lam mi annia.An lo kal maithei si lo va’ ka rilrua lo lang apiang ka sawi nghal pawp.’Anih chu a, mahse i damtha lo si a, midang awm se a va tha ve’ a rawn ti a. Ka sawi a pawm thlap tih ka hria,mahse chiang lutuka dawt han sawi ngawt mai chu nuam ka ti hlawl lo. Him chu ka him phah ngeia, mahse chhungrilah inthiamlohna a awm vang vang thung.

Sangkima bed sheet ka thlaksaka. Ni hnih lai inbual tawh lo a ni a, a hliam tihzual an hlauh avangin inbual chi a ni lo hrim hrim. Tui lumah ka shawl hmawr lam ka chiah huha,ka hrufai ta ngawt. Bsa’n a kal dawnah a a damdawi eitur min hrilhfiah veka, A khua a rawn sik leha, nachhawkna ka pe a, ka pek hnu lawkah a muhil zui nghal mai.

Chairah ka thu a, ka ngaihtuahna ka kawm a, ‘a nupui’ tihlai kha ka bengah a ri nawn zing tawh lutuk. A fapa hringtu nu nen an innei lo tih ka chianga, Ruatsaka khan a hriattheih zawng zawng min hriatsak veka, mahse englaiah mah khan a nupui chanchin alang miah lo.

 ‘Min zawt la…’ Sangkima’n  a rawn ti thut. Ka en vata, Lukhama inkamkang chungin a lo thu mu titiha,englaiin nge a harh ka hre lo reng reng.

‘I harh tawh maw? I khua ala sik em?” ka ti nghal hliai.

‘Sawi la…’ ka zawhna chhang loin a ti leh daih.

‘Eng maw?” hrethiam lo fein ka ti ringawt.

‘Bsa hrilh che kha, min zawt thei ania’ a ti leh nghut. Kan titi kha a lo hre vek tih ka hrethiam chiah.

‘Zawh tur che a awm hleinem’ ka tum aiin ka aw a chang lam hret.

‘Lo mu la…’ tih pahin a mutna bul a beng thuk. Ka lu ka thing vat thung.

‘Tih thinrim che ka duh lo ania..Khawngaihin lo mu la,I duh duh min zawt la,ka chhang ang che’ a ti dam leh thlup.  A awmdan chuan engtin emaw tak min Control leh ta tlat,ka tho tham thama. Khumah ka lawna, a sirah ka mu ve a. Min rawn kuaha,a kut lehlamin ka kut arawn vuana,a kutzungtang sei thlurh chu ka kut karah a rawn rawlha,ka kut a te bawk nen a hum pil deuh vek thei.

‘Le…. Khawi atangin nge kan tan ang?” a ti leh sup. A sawi zawh rualin ka bekah a rawn fawp leh nghal vang vang.

‘Ka hre lo…Ih,tlemin min Shock deuha’ ka ti sap ringawt.

‘Um,ka hria alawm.I Mood pawh a inthlak vek a’

‘Aih…Aw, nia’ ka ti bah nak.

‘Kum 23 ka nih laiin kan intawnga, ka pa duhzawng a ni lo,mahse ka duh a,neih ngei ka tum bawk a, tuma hriat lohin Courtah kan innei a. Mahse, thla 3  lek hnuah a thi a…’ ka ip chawih thei.

‘Sorry…Ka hre miah lo va,sawi kher pawh angai lo ania’ ka ti nghal sap.

‘I thiam loh a ni hleinem..A thih hnu khan ka pawm thei lo va, ka talbuai zui a. Ka fapa nu nen hian Party naah kan in tawnga, zankhat kawp zuai anih ber chu.Kan inkawp zui bawk lo va, a rai tih min rawn hrilh hnuah kan mudun tih pawh ka ngaihtuahchhuak leh chauh. Kan inzawmna a derthawn luat avangin ani pawhin min neih a phut lo.Neih ka tum ngeia, mahse alo duh bik lo. Kan fapa erawh kum khat a tlin veleh kan enkawl ta a. Chu zawng chu’ a sawi zawh rualin a thaw deuh huai mai. Engvanga thi nge ni ang?

‘A pawi ka ti,zawh kher che ka tum miah lo ania. Bakah,Bsa pawh khan min hrilh kha a tum lo.A sawi palh a..’ ka ti halh.

‘A pawi lo..I la hre dawn tho. I hriat duh phawt chuan engmah zep ka tum lo’ a ti supa, ka chhang lo.

‘I thinrim em?” amah bawkin a ti leh sup.

‘Aih, tinge ka thinrim ang?”

‘Nupui ka lo neih tawh vangin mawle..’

‘Hun kal tawh ania…’ ka ti leh sap. Ka khuh zui kharh kharha, ka awm a nuam lo leh tan viau tih ka inhriaa..Ka damdawi engmah ka keng si lo va, ka khuasik lo hram se ka ti takzet.

‘Nia, mahse hun kal tawh kha nangmahah hian a lo let leh niin ka hria’ a ti sup.

‘Maw? Keimah maw?” ka ti deuh ha mai.

‘Aw.I mitmeng nalh leh pawisawi lo lutuk ka en apiang hian amah kha ka hmu thina’ a ti leh sup.Mahse, min thawng deuh dawt a,ka na nghal vawng vawng thei. Keimah ka nih vang ni loin hmeichhe dang,a nuna pawimawh ber hmuh nana min hmang chuan min ti tlawm nghal vang vang bawk.

‘Eitur ka va siam ang,ka ril a tam’ ka tita daih. Khum atangin ka chhuk nghala, ka chhungril atangin khawsikin min tham ar ar a, ka lu a na leh fuk fuk tawh bawk.

‘Enge tih dik loh ka neih leh tak?” a ti fan ruih. Chhang loin ka thle baka,ka nui lui sak bawk. Enge ka sawi tehlul ang? A nupui, Mitthi nitawh nena min compare vang leh amah hmuh nana min hman vangin ka lawm e titurin min beisei zawk nge mawni le a??!!

Keimahin Choka zim leh mawlmang zetah chuan ka dinga, tah ka chak em em lutuk chu in control tumin ka inhumruh ngat ngat a, ka hmui ka pet tlat bawk. Ka Special emaw ka lo ti a, mahse a nupui vangin Special angin min lo hmu a.Ti nge keimah ka nih vangin min mamawh mai loh? A nunhluiah mi an awm vangin ka thinrim a ni lo,tu pawhin nunhlui kan nei vek.Mahse, a nunhluia tuemaw ber hlimthla nih erawh ka duh lo hlawl. Ka thaw haka, ka lu ka thing zui leh nawk bawk.

Eitur siam awlsam chi ka hmuh ka siama, diktak chuan ka ril a tam lo ve hranpa,chhuanlam atana hmang mai ka ni zawka.Ka thilsiam pawh ei chakna ka nei chuang lo hrim hrim.

‘Malsawma’n a rawn call che a, ka pick lo ‘ eitur chawia ka luh veleh a lo ti hmuk. .Ka Phone ka akchhuak lo tih ka hre chiah. Malsawma a ngaitheih loh zia ka hria,mahse tun tumah kher chuan min lo call pawi ka ti miah lo. Ani pawn a nupui hlui hriatchhuah tirtu atan min hmang ve tho.Khumah eitur ka kenna Tray ka nghata, ‘a lum laiin lo ei rawh’ pangngai takin ka ti a. Min chhang loin nelawmna tel miah loin min en reng,mahse ka ngaipawimawh lo lui tlat thung.

Ka Phone ka la nghala, ‘Ka’n call back lawk ang’ ka ti dam thlap. Kawngkhar lam ka pana,ka dial pah bawk. Min enzui reng tih ka hriaa,mahese ka haider tlat. Engtin emaw tak runluih ka chak tlata,ka inthunun zo lo. A duh leh lo thinrim vel mai mai tehse a.

Rei pawh a ring hmain a pick nghal mai. ‘Hello..’ a rawn ti dam thlup. Thutkhawmna pindana thu loin Kawngkharpui ka hawnga, pawnah ka chhuak tlanga. Duh lo eng ang mah ila dawt ka sawi leh dawn chianga, Sangkima’n min hmuhsit theihna tura amah vanga dawt ka sawi lai a hriat ka duh lo. Chumai bakah thuruk engmah sawi dawn lo mah ila a ngei tur hrim hrim atan ka che ve chak tlat.

‘I lo call lai ka hre lo va’ zangkhai thei ang berin ka ti a. Kawtzawl chhak lama pangpar ho dahna lungrem lam ka pan chho a.

‘Nia, min ti hlauthawng hman alawm’ a rawn ti a, ka ner nghal nak mai.

‘Naa, hlauhthawn tur enge awm a? ‘ ka ti let ve vat. Lungrem chungah ka thu a, thlifim rawn thaw heuh heuh chuan min tihahdam nghal sawng sawng thei.

‘Awm lo maw? I damthat loh em kha,I lo tlu reng thei a’ thutak zetin a rawn ti a.

‘Ka tha lutuk, enge itih a?”

‘Ka lo kal dawn mawni ka tia’ ka lungphu a rang nghal dawt dawt.

‘Ka awm hleinem’ ka awkiah min manchhuah hlau in ka ti ban chat.

‘I chhuak amaw? Indim deuh rih tur inia sin’

‘Aaa,a ninawm ve tawh alawm..Tak takin ka thian pakhat damlo ka tlawha’ zangkhai zetin ka tihzawm leh a.

‘Khawiah? ‘

‘Ka hrilh duh lo che,ilo kal ve palh ang’ ka nui a. Hetianga ngeiawm deuha tih tum hi ka nei thina, mahse a haw duh ngai eih lo.

‘Kal duh chiang e…’dam thlupin a rawn titha ve mai.

‘Ngai lo mai rawhse..’ ka nui a. A nui ve nghal hawk hawk.

‘Chimawm thei si,ka la pen ang che. A hrim hrimin i khuh nasat em kha,an hlau lo che mi? nangmah kha Corona inih ber kha’ min rawn chhaih fiama,ka nui leh hak hak mai.

‘I haw har angem?’ amah bawkin thutak zawkin a rawn ti leha.

‘Ka hre lo..Tinge?”

‘Ka nuin i eitur thil a siam a..Lo dah ka duh mawle’ ka thaw nghal halh mai. A nu te tan chuan fanu ang mai ka nih avangin mak ka ti lo.Mahse,Malsawma min endan erawh adang tih ka chiang tawh.

‘Ka van lawm,mahse ka haw har maitheia.Diktak chuan ka riahpui zawk maithei.A chhungte hi thingtlang lamah an awm veka, an lo kal mai thei si lo a’ ka ti a. Dawt vawikhatin vawi tamtak a hring leh ta.

‘Uh…I fel thei si ,mahse i la nuam chiah si lo a, midang awm thei se..Ok..A tha vek tho mai,Min mamawh chuan ka awmreng ka tih kha aw’ a rawn ti leh duah.. ‘Tehreng,nang lo chu koh ngam ka nei lo tih i hriat kha’ ka ti let ve a.

In enkawl uluk turin min rawn ti leh a, ka ‘aw’ ve mai bawk. Phone ka off a, tho nghal loin ka awmna bul vel ka thlir kual a, Inskut huan alo ni a, a zamna atan thirlen a lo in phan vek tih ka hmu chiah. Boruak a nuam takzeta, van lam ka hawi a,chhum awm loin alang pawl ruih a, Khawpui a seilian ni mah ila a thawm awm lova, reh leh damraih mai chuan min hip veng veng.

Malsawma  nena kan inbiakna ka ngaihtuah leta, a aw dam thlap mai kha  ngaihthlak a nuam takzet. Mipa tha tak hi chu a ni chiang teh e. Atthlak zetin Sangkima nen ka khaikhin zauh,an in ang lo let tawp. Malsawma hi chuan min ti thinrim ngai lo va, min ngaihtuah em em a, engthilahmah min nawrlui ngai lo. Min endan ka haider lui tlat chung pawhin min hnaih a thulh chuang lo. Min dawhthei tih hi ka hai lo.Sangkima nena kan awmdan erawh a danglam hlak. Inngeih taka kan awm aiin kan inhauh buai tum a tam zawk. Kan dawhthei lo tawn ve ve a, kan inhriatna la rei lo mah se tha leh chuang tur awm lo ang maiin kan inhau buai ngun tawh. Kan awmdan hi a hahthlak a, kan boruak lah a tang at reng bawk. Malsawma lakah ka vuivai ngai lo va, beisei ka nei lo. Mahse, engkim min tihsak reng tho. Sangkima erawh chuan engmah min la tihsak lo.Mi pahnih, an eizawnna kawnga hlawhtling ve ve leh rintlak tak ve ve anni tih bak chu in anna reng reng nei lo anni tawp mai. Malsawma hi ka hriattirh atangin insualbuai naah a tel ka hre ngai lo hrim hrim a, a rui buai lai pawh ka la hmu lo. Sangkima erawh hmelma tamtak nei ang maiin a nun a zalen lo. Mahse, an pahnihah hian duhthlan tur tise,hmeichhia tu pawhin  Sangkima zawk an thlang vek ang tih ka chiang. Engkimah a chungnung zawk lam ni loin amahah hian mi  hip theihna leh thunun theihna mak tak a awm miau a.

Roomah ka luta, Sangkima a lo muhil leh hman tawh. A eitur ka dahsak a lo ei zo vek bawk. Thawm dim zetin ka chhuak leh tham thama, ka silfel vek hnuah Bsa ka msg a, nachhawkna min rawn ken turin ka chaha, A duty buai lai aniang,Msg a read lo..

Motor kawngkhar inkhar ri dat thawmah ka harh nghal zawk. Thutthlengah ka lo muhil pek chu niin..Ka thuchhuaka,ka khuh bawrh bawrha,vawt ka ti ngang mai .Ka hawi kuala, khua a lo thim titih tawh.

Kawngkhar a rawn inhawnga, Bsa a rawn nui lut nghal var var.’ I va awm thim ve,Enge i an?” a rawn ti luta, Kawngkhar sira Switch a hmeta,a eng nghal iar. ‘Ka khua a sik pek anih hi..Ka msg kha i hmu em? I buai hmel sia ka lo call ngam lo che a’ ka ti a, ka khuh leh bawrh bawrh.

‘Aw, hmu e…Ka lo keng thlap e’ nui chungin a ti leh a. A thil rawn khai bawr tun ho dawhkanah a nghata, a hai nghal rawk rawk.’ Hei le,ei la,I mu nghal dawn nia’ a ti a. Min rawn pe a, ka lo ban vat. Ka Doctor min chawh nen a in ang lo.’ Tlemin a sang deuha, I pik ka ti riaua,kha kha ei la a zia ka ring. I rui maithei aw’ a ti leh bawrh bawrh.

‘Va mu hahdam rawh,eitur siamsa vek ka rawn kenga. Tihlum animai..In ril a tam tawh em?” a ti leh rih.

‘Tam lo,Sangkima chu chhunah khan eitur ka pe a.Ala muhil riha..Enteh,Room pakhat zawk ka hmang mai thei angem? ka mangchhe lutuka..Tihfuh palh ka hlaua’ inthlahrung ru zetin ka ti a.

‘Lutuk, a nuam tehvak lo nangin a awm theih nawk nawk ania’ zangkhai zetin a ti damthlap. Ka sawi kha a awih tih ka hrethiama,ka thaw huai.

A sawi ang tak takin Sangkima awmna room lam aiin a lo zim zawk fe, khum pakhat a awm tlawng. Abak engmah bungrua a awm lo. Khuma thu chungin ka hawi kuala, khum  lu lamah tukverh pakhat a awma,  Curtain pan lam a inzar a, Bar atan Rod an hmang bawk.

Khum bula Switch awm ka hmeta, Room a thim ta khap.Pawi ka ti lo,eng uarah hian muthilh harsa ka ti thin miaua. Ka mu fel deuh chauh tihin Mutchhuakin min rawn zem nghal chiai chiaia, ka damdawi ei kha ka rui a nih hmel viau tak tak..

Ka harh lehin ka tui a hal huam huam a, ka khawsik erawh a lo reh tawh thung. Khum atangin ka chhuka,  Thutkhawmna pindan lam ka pana,Bsa  hmuh mai ka inrin laiin a lo reh thap. Sangkima mutna room lamah an awm anih ka ring mai. Fridge atangin tui ka lachhuaka,ka in nghal khawlh khawlh.

Tui keng chungin Sangkima mutna room lam ka pana, eng emaw laklawh an lo neih takin tiin kawngkhar ka kik a, mahse chhanna awm loin a reh thap. Ka nem a, a inhawng nghal mai thung. Mahse, tumah mah an lo awm lo. A ruak vek tho!!

Thutkhawmna pindan lamah ka tlan let leh nghal a, Bathroom lamah ka tlanpheia,mahse a lo ruak tho..Pawnah ka tlanchhuaka, Motor a awm lo..Scooty erawh a awm lawi !! Ka Phone…

Ka Phone ka phawrhchhuak nghala, Sangkima ka call a.Vawi thum lai ka call hnuah pawh a pick lo,hlauhthawnnain min rawn tuama,ka thlan a sa nghal phat phat mai.Mahse, chiai loh hram tum chungin Bsa ka call leha,vanneihthlak lutukin a pick nghal hlauh..’ Aw, Anun…’ hello pawh ti loin a rawn ti dam thlap. Ka thawveng nghal hawk.

‘Khawnge in awm?”  ka ti nghal vat.

‘Maw? kei chu Damdawiinah ka awm a,hnaah Emergency kan nei thuta..Ka kal dawn khan Sangkima kha ka hrilh a, a sawina nge?” a rawn tita mai..

‘Aih..Ni lo.Engmah a sawi lo’

‘Dik lo a awm em? I that loh hmel riau’ a rawn ti leh a.

‘Sangkima a awm lo..’ ka ti zuai raih ringawt.

NOTE - CAPTION LAMAH ENG ENG EMAW KA ZIAK TELA,CHHIAR HRAM ANG AW🤗