ANNEM - 20

Chapter- 20

‘Ka ngai takzet che’ amah bawkin a ti leh sup. Keipawhin ka ngai tih ka chiang lutuk. Mahse, hetah hian lo kal tur a ni lo hulhual.

‘Tinge ilo kal?” ka ti sep.

‘I hria alawm…Ka ngai che a, i Birthday hmanpui che ka duh bawka’ a ti leh sup. Ka kawr a rawn zena, ka hnute a rawn hum nghal chat.

‘Min rawn wish thei renga,mahse i reh hmaka..’ ka tum loh lutukin ka awah titau aw a hriat theih.

‘Min enteh..’ a ti sup. Amah en thei turin min kuai hera, hnial loin atih ang angin ka awm ve mai bawk. A kut zungtang sei thlurhin ka khabe a rawn rin kual zai zaia, ka biangah a kut zungpuiin a tuai zui leh hauh hauh. A rawn kun hniama, ka hmuiah a hmui lum ham hamin a rawn fawpa, mahse reilote chauh. A inlahranga,ka hmui hnuailam a rawn tuai leha.

‘Tih thinrim che hi nuam ka ti thina, I lungawi leh lai pawh en che nuam ka tih vangin. Mahse, vawiinah chuan ka tum vang niloin thil buaipui ngei ngei ngai ka nei a. Chuan, I birthday liam hma ngeiin i khum ka rawn tawmpui ang che tih ka chiang thunga. Ka ngai hluah hluah che’ a tita duah.

‘I tan helai hi a him lo a, lo kal tawh lo la ka duh’

‘Ka hria, mahse i awm tlat sia.Enge ka tih ang?” a ti sup.

‘Ih…’ ka tawng zawm tur ka hmui a rawn khar nghal hmiah,duhthawh lutukin min rawn fawpa, kei pawh ka dang chuang lo. Kan inmamawh tawnna sang lutuk chu tawngka a sawi loin chetzia in kan lantira, chin tawk  nei lo khawpa nasain kan che nghal buan buana,kan chau thei lo emaw tih mai tur a ni.

‘Ka ning tawh, I tel loa mut pawh ka peih tawh lo’ a thaw nghal hawk. Engmah sawi loin a hnute hmur ka khal niap niap ringawt.

‘Min nei mai rawh’ a ti chhuak leh hrawih mai.

‘Tu emawin an hmu che a, ka nu pawhin helai hnaiah an hmu thin che tih a hre tawha’ ka ti sap.

‘Chuan…”

‘Lo kal tawh lo la ka duh ka tih kha, I him lo palh anih chuan ka inthiam thei dawn lo asin’

‘Ka him ang,hlauthawng suh.Mahse, Malsawma hi ka duh miah lo ka tih kha. Hei aia hnaih zual che a tum anih chuan dam nuam a ti lo tawp ang’ a aw chang zetah chuan a ti mai mai lo tih a chiang reng.

‘Ka engmah a ni lo,mahse engtiang chiahin nge kan chhungkua nen kan inzawm i hriaa, ka hnar ngawt thei lo..Bakah,tunah pawh a chhui dawn che niin ka hria.Mahse, ka lo dang ang’

‘Aih,a teuh lo.Lo telve turin ka duh lo che. A chiang em?” ngenna a ni lo,thupek a ni.

‘Mahse…Ka pui thei che anga,chuan…’ ka sawi laklawh laiin ka hmuiah a kut a rawn daha.

‘I tel ve lovang.Achiang em?” a mitmu dum fiah leh tak zetah chuan ka en a. Sawi tur dang a awm lo. Ka mitin ka chhanga,a nui nghal suk.Mahse, a nuihzat vang erawh a ni lo tih a mitah ka hmu thei thung.

‘Khawi atangin nge ilo luh thin?” ka ti sep.

‘A pawimawh lo..Mahse, engtikah emaw chuan mi pangngai angin,Kawngkhar atang ngeiin ka lo la lut ang tih ka tiam che’ a ti dam thlup. A awmah ka kut ka nghata, a lungphu ri ngaihthlak ka duh avangin ka beng si chetin ka kuaha..Ka chhip samah arawn fawp vang vang.

‘Mambawih..’ ka nu in room pawn lam atangin a rawn ti a. Ka mar nghal awt thei.Sangkima ka en nghal vata, ka hmui a rawn khawiha,Zaizirin chhang turin min ti a. Ka hlauthawng lutuk chu ka khur nghal titih. Nghet zetin min kuaha, ka hnungah a chul nghal hauh hauh thung.

‘Mambawih…’

‘Aw…Enge?” ka aw khur lek lek chu a hriat loh hram ka beisei.

‘Lo chhuk teh,I pi a chau thut an ti ania’ ka nuin a rawn ti a. Ka hahdam nghal huai huai mai.

‘Aw…Ka lo kal’ ka au let nghala.. Sangkima ka en a, a then suk.

‘Engtin nge niang?” ka ti sep.

‘A tha vek,ka lo chhuak ang Tuman min hmu lovang’ a ti supa.Min kuah bet leh vang vang.

Ka pi teinah ka nu nen kan phei nghala, ka pi hi BP sang leh zunthlum nei a ni a, hetianga chauh thut thut tum hi a nei thina. Nidang ang bawkin ka hlauthawng lutuk lo.’ Nidang a ang lo riau ania, Zuia, Damdawiin kal mai atha ang’ ka nuin ka Patea hnenah a ti a. ‘Motor a chhiaa, siamturin Workshopah ka dah a’ a ti nuah nuah.

‘Aw, nangni chauhin Motor innei hleinem mawle. Kan Motor pawh a inhung mai maia’ ka nuin a ti leh hmawk hmawk. ‘Chahbi va la rawh.Mawite,kan pahnihin kalpui mai ila.Ka pa leh naupang ho lo awm sela’ a ti leh zung zung. Ka nu hi nu thawmna leh phili thei tak a nih vei nen hian,hetiang thilah hian upa zawk anihna alang leh tlat thina. A rintlak thei em em bawk. Ka nutei pawh hi chhungril takah pawh harsa thin deuh mah se ka nu hi a hnial ngai lo.

Ka nu te kal hnuah hawphei loin ka pu teinah ka awm ve riha, Living roomah kan thu thap,min nghengin Mite-i a thu a, a mittui a hru leh zauh zauh thina, ani hi kan cousin hoah chuan a naupan fal bakah ka pi hian a kuah tam avangin a ngaina zual bika. Ka pi awmdan vang khan a mangang tih ka hria.

‘A tha leh mai ang,nidangah pawh khatiang khan a awm thin kha’ kuah chungin ka ti a. Min chhang loin a mit a hru leh chat chat. Sana ka thlek zauha, zing lam dar 3 a ni tawha, ka rilruah Sangkima leh ka pi an inlan chhawk sek. Ka nu kal tur insiam lai khan Roomah ka chho ta miah lova, mahse ka nu te Damdawiin lam pana an chhuah hnu lawkah Msg a rawn thawna, ‘Ka thleng e.Ka him aw’ a rawn ti a, ka thawveng ru nghal hawk.

Ka nuin min rawn calla, an Admit dawn thu leh amah a riah tlang nghal dawn thu a rawn sawia. Ngaihtuahawm a ni lo tih a rawn sawi tel bawk.Patea fanu upa ber  Zari nen an thil mamawh tura kan rin ho kan theih ang angin kan lo siam lawka, reivak loah Patea leh Nutei an rawn thlenga,kan thil lo siam lawk ho Nutei’n a enfel leh thuak thuaka.Patea Damdawiinah pe turin  a tlan let leha ; A lo haw hun nghak tawh loin in lamah ka pheia. Khawvar hun a hlat tawh loh avangin Room a chho tawh loin Living Room Sofaah ka mu a, ka beisei loh deuhin mumang bo thak khawpin ka muhil a. Zinga Patea Door bell rawn hmet riah ka harh ta chauh.

‘Kan hun tawn hian a zir si lova, pakhat bak riah an phal lova, inkan pawh an remti lo. Mahse,na chhia a ni lo bawka a zia viau mai. Doctor khan kan awmrei loh min beiseipui deuha,a theih chen chen chu ka riak mai ang’ ka nuin a ti a. Nidang ang bawkin Malsawma a tangkai lehpek viau. Patea pawh hian fa en takin a en ve a,a mamawh chuan a ko thuai mai zel.

‘Mala nen hian inngaizawng tiraw?” ka Cousin Zari’n min ti thut. Mite-i lo chek tlak ri ka hre nghal zat bawk.

‘Ngaizawng nang, tinge?” ka ti liam puat. Ka thil ei lai ka ei zawm mawlh mawlh.

‘Ka awih lo em maia, Sangzuali pawn inngaizawng atia’ a ti leh a. Sangzuali hi Malsawma te veng ami a ni a, Zari nen an inkawmngeih viaua. A hmain anni pawh kan vengah an awm thin tho a, apa boral hnuah a nu te Colonyah an insawn phei a. Malsawma te nen an inhlat vak lo.

‘A hre awm lo em maia’ Mite-in a lo ti nem diai.

‘Dik chiah,ani khan lo hriat ngawtna tur a nei lo’ ka ti ve vat.

‘Aaa,a Star rapthlak sia,a chanchin angaihven ve zia chu a. Hetah Au Mama a awm tawh lo chungin a lo kal renga, inchhuak dun ngun si.Keipawn ka ringhlel che u’ nui chungin a ti leh duah. A sawi dik vek tih ka hria,ni e..Mi tana mak khawpin min buaipui miaua.

‘Ka lo tihpui ang.Mahse, a zin lo haw hunah.Phone a sawi atan chuan a uiawm ’ ka nui zui hak.

‘Hmanniah ka hrilha, a nui mai mai mawle’ a ti leh a.

‘A intithei mai mai anih chu,ka lo sawi ang..A tha dawn lutuk tlat’ phur fein ka ti leha.

‘Ngaizawng awm lo em maia, kei chu Anun-i bialpa ka hre ker’ Mite-in a rawn ti leh a, tawngtam lo leh nghal ru zet lawi si a ni a. Ka va en a, intithei zetin a lo nui a, ka lei ka chhuahkhum zauh.

‘Tu? Ampuia maw?” Zari’n a ti ha.

‘Teuh nang,chhe lo pariat animai..Chutah la hausa zui’ a mitmeng de sar maiah chuan hriat a nei anih ka ring thuta, ka lungphu a rawn rang nghal zaih zaih mai.

‘Tu nge a? a lo kal ngai lo mi?” Zari bawkin a ti leh a. Ka chil ka lem a, a sak talh talh mai.

‘Kal tawh e,vawihnih ka hmu tawh. Mahse, ka sawi mai mai dawn lo.A neitu hian a phal hunah a tlangzarh mai ang chu’ a ti leh siam siama. Ka thaw deuh huai,mahse a sawi danah tu dang ni loin Sangkima a ni tih ka hrethiam veka. Mite-i hian a ringhlel satliah nge thildang a hre zawk? Hmanni a a phone atanga min lo biak khan Mite-i a awm hnai a ni ngei ngei ang. Ka awm a nuam lo lutuka,ka pum a na rum rumin ka hre hial mai.

Kan rin angin Ka pi a tha mai ta tlat lo.Ka nu awmpui a duh bera; mahse, ka nu rin chawt chi anih bik si loh avangin zanhnih a riah hnuah kan inriahchhawka, tu pawh riak ila a phun chuang lo. Mahse, kan vaiin ka nu a duh ber tih ka hre vek tho. Ka pu-in angaihtuah em em a, mahse Hrileng hi kum upa lam tana him lo zual nia sawi anih lehzel avangin a kal an phalsak lo. Nihnih vel chauh awm tura inngai kha kar khat dawn kan awm hnuah pawh zia lam a pan hleithei lova, investigation kan ti tha leha, a result a lawmawm lam a ni lo lehzel. A zunthlum vangin a kal te pawh a lo chhe tan tawha, a taksa chak tawk loh avangin hmalak a harsa em em bawk.

 Hrileng zual zel avangin khawvel a manganga,Mizoram pawh kan bang bik si lo.Positive la awm ve lo mah ila tupawh kan ti duka,thlamuang taka nun hman a harsa talh tawh. A hmaa hlau lo em em a fiamthu nana hmangtu te kha hlau ber ber anni leh lawi tawha. Phai lam atangin an lo haw zut zut reng bawk. Nun a nuam lo zo va, tihtheih nei si loin kan phawklek em em a,news maksak tak tak a darh chamchi bawk.

‘Naktuk Curfew a ni dawna, Monday atangin Lockdown in a zui leh dawn bawk si a, I pi hi ka awmchilh deuh law law mai ang.Keimah bak a duh tehchiam mang si lo a’ ka nuin a ti a. Ka pi muhil hmel chu ka thlir vang vang.

‘Mamawh lamkhawmna velah harsatna a awm angem le?” ka ti halh. Sawrkarin engtiang chiahin nge a kalpui dawn kan la hre lo a,mahse Lock down anih chuan chhuah mai mai ngaihna a awm dawn lo tih mi pangngai tan hairual a ni lo.

‘I pa la damse kan buai lo tur ania..Engpawhnise ipa thiante an awm nek neka, kan ngen thei mai ang.Bakah,Malsawma hian a kawng a hre leh mai ang’ a ti duah. Malsawma chunga rinna a nghat leh lutuk hi ka dem dawn apiangin Malsawma kan tana a tangkai zia ka hmuh hmaih thei ngai lo a,ka dem hleithei lo leh thin.

‘Kal tawh rawh. I tlai lutuk ang’ amah bawkin a ti leh a.Ka thil hawn tur ho Baga ka dahsa ka khaia.

‘Chhuah vah loh tum tlat tur ania. Bakah, uluk takin kut silfai zel ang che. Natna hi khawi atanga lo kal tur nge kan hre lova, Lazira kha a inkhung miah lo an ti lehnghala.Fimkhur hle rawh u’ a ti leh bawrh bawrh. Lalzira hi kan inpiah chiaha awm anni a. London atangin a lo hawa, ni 14 inkhung tura tih anih laiin pawnah a chhuak lo ringawta,inchhungah chuan abika khunhran a ni lo.

In ka thlen hnu lawkah ka rin loh deuhin Malsawma a lo lang hlawl. Ka pi Damdawiin luh tuk lawkah hna pawimawh avangin a zina, a lo haw tih ka hre miah lo..A zin laiin min rawn be ngai lem lo a. Thilmakah pawh ka ngai hran lo.

‘I lo haw alaw?” ka ti nghal hliai.

‘Um,vawiinah…I pi enge a an?” a ti ve a. Tlangnel takin Sofaah a thu nghala,a bawp a khawkherha,hnunglamah a ban a dah a.

‘A la zia thei lo. Rin aiin ala awm rei hmel a’ ka ti a.

‘Anih chu a,a zia lo hle mai..’

‘I hlauhawm em?” ka ti thut.Hrethiam lo niawm takin a hawi buai deuha, mahse ka sawi tum a man lehnghal mai tih ka hria.

‘I nghal sia maw..Ramri ka kan lo chiah chiah’ a nui ve huk.

‘Ha…Tunlaiah chuan kan hlauhawm vek alawm le a’

‘Nia,a dik tho mai. Curfew bakah Lock down anih zui chuan chhuahvah a theih dawn loha.Inbuai phah angem le?” a ti leh vut.

‘Ka hre lo,ka nu chuan nangmah a ring leh ngawt tawh che’ nuam ti vak loin ka ti a.

‘A pawi hleinem,tihdan a awm mai ang ka ring. Bakah,ka duty ka ring a’ a ti leh a.

‘Eng Duty maw?” ka ti deuh ha.

‘Local Task Force mawle..YMA lam atangin ka telve dawn a’

‘A vat ha tak…Mahse,I buai phian maithei ania’ ka nui leh a.

‘A pawi hleinem.Midang niloin ipi ania..Ka pi pawh a ni ve tho a’ a ti a, a mitmeng buang thak chu en rei duh loin ka hawisawn nghal daih.

‘Thingpui i in duh em?” ka ti daih.

‘Pawi miah lo..Chuan,thil hrilh tur che ka nei bawka’ a ti a. Ka tho uaih tawh ka thu leh a, mahse amah zawk a rawn tho ve a.

‘Ka lo kal ang..Thingpui lum pahin kan sawi dawn nia’ a ti zangkhai vuh.Enge kei min biakna tur awm ang ka ngaihtuah kual nghal chiam pek. Achhan hriat si lohin ka awm a nuam lo em em bawk.

Thingpui ka chhuanga, Dinning Table kilin a thu a, amah ep zawngin ka thu thla ve a, a phone a en a.

‘Enge a?..Eeee, Star tu che ka hria..A chhe lo nasa mai’ ka ti zui zat.

‘Tu? A va lawmawm ve ‘  a ti a, mahse a awah chuan lawmna a lang der lo.

‘Sangzuali..Ka tihpui dawn che’

‘Ka lawm e,midang duh neih chuan a buaithlak khawp ang’ a ti duh lek.

‘Naa, I ninawm. I upa tawh si’

‘Nia,min nei mai la’

‘Aaaa…Enge min hrilh tur chu?” ka tihzawm leh daih.

‘I pi damloh zan khan in kawtah hian Sangkima an hmu leha..’ ka ip nghal chawih thei.Mahse, ka inveng lehnghal vat.

‘Chuan?” ka ti ngauh.A mitmu buang leh fing lutuk chuan ka chetsual palh zeuh a hmuh hmaih dawn lo tih ka chiang lutuk tlat.

‘Thil pangngai niin ka hre lo.I nu nen hian in himna turin vengtu in mamawhin ka hria’ ka tum loh lam a sawi ta thung.

‘Aaaa,kan inah a lo kal chuang lo a’ ka ti halh. A mitko hmul a tisang nghal awk chuan ka tawngsual emaw ka inti hman.

‘Inah a lo kal meuh chuan a pawi viau thei a..A ni em?” a ti dam thlap. Chhang loin ka bu liam satliah ringawt.

‘I nu bulah chuan ka sawi lova, sawi tul pawh ka ti lem lo.Mahse, keima kutah a dah avangin venhim che u hi ka thupui ber a ni tawha,ahma pawh khan a ni tho.Mahse, tunah phei chuan inchungah engpawh thleng se ka inthiam thei ngai lo ang tih ka chiang. Chuvangin Inah hian CCTV dah ka duh,chuan Gate bula mi chauh saw a tawk lo. In hnung lamah pawh dah athat ka ringa’ a ti leh duah. Ka hmui ka pet a, a chet lak tum danah chuan kan himna tur a ni tih ka hai lo.Mahse, a theih loh hulhual.

‘Ka lo ngaihtuah ang.Mahse, hlauthawng lutuk lo la.Tunah Lock down a ni dawna,ani pawh a kalchhuak thei nang”  thutak fein ka ti a. Ka awihawm hmel hian ka hre ve lutuk.

‘Um…Nia,mahse rilru a nuam mawh viau ania’ a ti nghet chut.

‘Ka hrethiam alawm.Mahse, mak deuh chu tinge aniin min chhui pawh nise amah a lo kal ang? Midang a ruai thei reng sia’ ka ti halh.

‘Nia..Adik..Keipawn ka lo ngaihtuah ve chiaha.Mi a a ni loh zia lah achiang a’ a ti ve mai.

‘Ka hrethiam lo e a..Aaa, thingpui a so’ tih leh thawh ka ruala.Gas ka off a, thingpui ka siam zui nghal rak rak.Mahse, ka rilruah erawh Sangkima bak alang eih lo. Ka Birthday zana ka hmuh bak kha ka la hmu nawn leh lo a, hna thilah tihtur a nei tih a sawi lawka. Ni thum lai kan inbe tawh lo a.Ngaihthat loh nana hmang lo tura min tih lawk anih avangin ka hlauthawng lem lo thung.

Thingpui kan in laiin thildang kan sawi ta hlauh. Sangkima chungchang a sawi chhuah leh mai ka hlau ru zek zeka,ka thlamuang thei lo,mahse ka chetsual palh loh nan theihtawp ka chhuah bawka, ka awm danah engmah a rinhlelh ka ring lo.

‘Enge a?” Dawhkana bawm phek thlir thler a rawn dahchhuah rualin ka ti a.

‘Hawng la…’ a ti awlsam mai.

‘Enge ka tia lawm.Bomb pawh alo awm thei a’ nui chungin ka ti a.

‘I Birthday khan ka pe ang che ka tia, mahse hun kha a awm ta chiah lo a.Hawng rawh, I duhzawng a ni angem ka hre lo a’ a ti leh a.

Ka laa, a hawnna tur lo awm ka hmet a,a inperh hawng nghal auh. A chhunga thi nalh zet lo awm ka hmuh rualin ka thaw nghal hawk mai. Ka lachhuaka, Rangkachak sinte,nalh zeta inphiar a ni a. Ka lakchhuah hnuah adang ala awm cheu. A vaia ka lakchhuah hnuah ka en deuh reng. Bengbeh, thi leh Sana a ni a. An nalh vel vek.

‘Ka la thei lo ang’ ka ti nghal hap.

‘Engvangin maw? ‘ a ti hmuk.

‘A to em mai,hetiang in Present chi pawh a ni lo’ ka ngaihdan diktak ka sawi hmiah.

‘Midang hnena pe ka ni lo tih ka inhriaa..Pawi ka ti lo,mahse i dawng duh lo anih chuan ka rilru a nuam lo ve viau dawn animai’ a ti dam thlap.

‘Aaaa..Ka inthlahrung alawm’

‘Keimah ka nih hi..I u’

‘Min duat sual zo vek ang’ ka nui a.

‘Pawi ka ti lo chiang viau ang’ a nui ve hawk hawk.

‘Sangzuali chu..Engtin nge niang?”  ka ti leh thut. A thle buka,a mitmeng danglam zawk ka hmu hmana,rei ni lo mahse min ti tim zawk thei. Ka hlau nge pawh ka hre lo.

‘Midang min kawhhmuh ila tum tang tang hi a dik chiah em?” a ti hul hak.

‘Ka va phei ange’ a ti leh thuta, atho nghal vut. Ka tho ve vat bawk.Kawngka lamah ka zui pheia.Pawna zui chhuak loin kawngka bulah ka dinga.’ Mangtha aw’ zangkhai takin ka ti a.

‘Mangtha le…,Min mamawh chuan lo sawi ula’

‘Nia…Chuan,ka lawm tak tak’ ka ti leh a.

‘Lawmthusawina dang ka phut dawn mawni?”

‘Eng?” rang zetin ka ti vat. .Min chhang loin min rawn hnaih thuta, ka biangah a rawn fawp a, a tawlhsawn lehnghal daih. A thleng rang lutuka hnialna hun a awm eih lo.

‘Min ngaidam rawh..’ a ti supa,a kal zui nghal daih.

Khumah ka thu a, Malsawma thil min pek ,khuma ka dah chu ka en vang vang. A man a tlem dawn lo tih ka chiang. Ka kut ka lekkanga, ka kut dinglam zunglaia ka zungbun bun chu ka en leh a. Ka mit ka chhing nghal vang vang.

Ka Birthday tuk chiahah Delivery Boy pakhatin min rawn pe a. Engmah ka chah loh avangin mak ti zetin ka hawnga, a chhungah Zungbun a lo awma. Card leh thlalak pakhat nen..’ Nizan khan ka pe ang che ka tia, mahse hun a awm ta si lova.Ka nupui hual ini tih hria la,keipawh i pasal hual..’ tih hi Mipa kutziak tihhriat taka hraw hraih maiin a lo inziak kalh. Rangkachaka siam a ni a, Design a nei lo,a chhung lamah S&Z tih a inchhu kalh. Thlalak awm tel chu ka en a, Mipa pian nalh zet a ni a, tu nge anih ka hai lo. A nakah chho zawngin,tereuhtein ‘Zoeyy’ tih a inchhu kalh. Ka pian hlim atangin kha aia Gift ropui zawk kha ka la dawng ngai lo. Ka hlimna khan van a tawng chiang bal anih kha.

Kawngkhar inhawng riah ka hawichhuak vat. Ka beisei loh lutukin Sangkima a rawn lut a, ka mitvai emaw tiin ka mit ka chhing leha;mahse ka men leh pawn a lo la awm reng.Min rawn pan pheia,ka che nghal thut. Ka ngai lutuk tlat. Ka pawm nghal chawta, min rawn kuah a, ka samah a hmai a rawn phum ve nghal zat. Mahse, rei min kuah loin a inlahrang a,mak ti deuh takin Thutthleng lam a pan chu ka en ringawt.

‘Dik lo a awm em?” ka ti sap.

‘Awm lo…’ a chauh hmel takzet.

‘Enteh,lo kal tur ini lo a’ ka ti leh hnuhnawh.Diktak chuan alo kal hi ka lawm tih piah lam a ni,Mahse,Malsawma kalna ala rei si loa,a hmuh hman ka hlau lo thei lo.

‘Ka lo kal tawh dawn hleinem’ a tih ri chuan min tikhawng deuh lah.

‘Ti nge?” ka ti nghal ha.Atan a hlauhawm avangin a lo kal ka hlaua.Mahse,lo kal a tum tawh lo tih a sawi chuan min thawng tho.

‘Amber-i a rai…’

‘Maw?” ka ti that mai.

‘Aw..Amber-i arai,mipa ka ni a.Duhthlan tur ka nei lo.Ka mawhphurhna ka hlen angai’

Thil na deuhin min deng dawt ang maiin ka pai nawka, ka thidang mai dawnin ka hria..

🖤🖤🖤🖤
CLICK LEH ZEUH ILA...