ANNEM - 21

Chapter- 21

Ka tluk mai hlauin khumah ka thu thla nghal rawka, ka mit vai deuh chum chum chu tihreh tumin ka mit ka chhinga, muangchangin thawk ka la raih raih bawk. Ka mit ka chhin deuh vang vang hnuah ka mengchhuaka,Sangkima ka en a, a thut ngaiin a thu a. Hriatthiam harsa lutukin min lo en reng. A hmelpa leh thutak lutukah chuan fiamthu leh thu ho mai mai sawi anih loh zia alang a, ngaihsual luih talh pawh ka tum buai lo law law.

‘Chuan…’ ka ti chhuak a.Ka awki dam thlap mai chu keipawhin ka awih lo zawk hial.

‘Enge ka tih ang? ‘ a hmai atuai pawk.

‘I sawi kha..I nei ang’ ka ti dam leh thlap. Awihawm loh tawpkhawkin ka nui zui sak!! Ka nuihchhan ka hre lo hrim hrim. Ka hriat zawng chu ka ral riai riai tih chauh.

‘Ka thentawha, let leh tumna ka nei ngai lo. Nupui ka nei leh dawn anih chuan midang niloin nangmah chauh neih ka tum bawka. Niminah min rawn biaa, a rai tih a rawn sawia.  Thla 2 a ni tawha, ka fa a ni ang tih ka chiang. Achhan chu nangmah nen kan inzawm hma khan inzawmna kan lo nei tawh a. Ka ni lo tih sawi ka tum lo.Mahse, neih ka tum lo a, aduh dan dana titurin ka ti a. Hrilh kher che pawh ngai ka ti lo zawka. Mahse….’ Sawi zawm loin a hmai a tuai leh pawka. A  hmel pawr zia leh a mitmeng dul ruih chu a lo kal tirh khan ka lo hmu miah lo. Mahse, tunah hian chiang takin ka hmu a, ni reilote chhung hian a lo lang upa ta sawt tih pawh ka hmufiah ta chauh.

‘Amber-in ka nu a lo hrilha, mahse ka nu hian eng thilah mah min nawrlui ngai lo. Tun tumah pawh hian min ngen a,‘ ka fapa i ni a, ka fapa hian ama fa ngei paih turin a tih ka ring thei lo. I fapa pawh hi en la,I enkawl vang hian i inchhir hauh lo tih ka hria. Chuvangin ngaihtuah nawn leh rawh’ min ti a..Enge ka tih ang? Duhthlan tur ka nei em ni? Ka fa ngei chu midang ka hmangaih avangin ka paih tir dawn tihna a ni em? ” a ti leh a. Engmah sawi tur ka hre lo. A dinhmun ka ngaihtuaha, mahni fa ngei chunga mawhphurhna ala tur hi mipa diktak tihtur tih ka chianga, demna ka nei lo. Mahse, enge ka tih bik chuan ang?

‘Amahin a rai thei lo va, keipawh ka tel ve. Duhthlanna harsa ber ka siama,Nizanah ka hruai hawa…Mahse, ka khawih lo.Tunah leh nakinah pawh ka khawih lo ang tih ka chiang.Thildang vang niloin Naute vang a ni a.Ani pawhin tu nge ka nunah pawimawh a hria.Pasal tak tak niturin min beisei lo’ amah bawkin a ti leha. Ka chawmawlh tlata, nupui a ru tih a sawi pawh chuan engtinmah min deng hek lo.

‘Ngawireng lo khan engemaw tal i sawi thei angem? ‘ beidawn hmel lutukin a ti sup.

‘Aw…Aw, a tha alawm.I tihtur diktak ania’ ka thle bak.

‘Ni lo, khatianga dam leh nui chung ni lo khan sawi rawh’ a ti tuara. Ka phu nghal vak thung.

‘Enge ka sawi ang? Ka tel ve lohna thilah sawi tur ka nei em ni?” ka ti dam leh thlap.

‘Ka telna anih chuan i telve, khatianga calm lutuka i awm kha ka duh lo’ a ti leh hrawk.

‘Anih chuan ka tap dawn em ni?”

‘Aw..Ni lo…I na tih ka hria, ka thiltawn mek vang hian ka tina che tih ka hria.Kei pawh ka na,Lo kal tur ka ni lo tih pawh ka chiang.Mahse, a tawp nan tal pawh hmuh che ka duh. Min ngaidam turin ka ngen dawn lo che. Chutiang ka beisei tur niin ka hre lo’ a ti leh duah.Ni e,ngaihdam indila dam ngawt tur chuan a serious lutuk.

‘Min hmu tawha, chuan duh i thlang fel tawh bawka, ka lawmpui che’ ka ti sap.

‘Khatianga pawisak nei lo khan lan tum suh’

‘Oh..Enge ni vak?..Nia, ka na..A dik thlap.Mahse, enge ka tih chuan ang?” ka dar ka ti sang zui ak bawk. Na zetin min rawn melha, a mitmu dum fiah zetah chuan natna ka hmu thei a,mahse he natna kan tawrh mekah inhnem tur chuang kan awm lo tih ka chianga.Engtinmah chet lak ka tum lo.

‘Kut min thlak la,I rilru na a ziaawm theih nan i duhtawkin min khawih rawh.Khatianga bu ngheuh ngheuh ringawt lo khan..’

‘Chhuak rawh…’ Kawngkhar lam ka kawka. Sawi tur dang ka hre lo..Ni lo, ka hre teuh.Mahse, tangkaina nei miah lo tur anih avangin engmah sawi loh ka duh zawk.Eng emaw sawi tum niawm takin a ang zuaua,mahse a chip leh hmak.A tho a, Kawngkhar lam a pana; a hawnga a chhuak a dimtein a rawn nem khar leh a..A tawp ta.A lo let leh tawh ngai lovang.

A reh thap rualin khumah ka letthla hlawl.Tah pawh tap chhuak thei loin ka khur hlawk hlawka, ka hrawkah min hnawhtu a awm a, ka awm ka chum ka chum ringawt.Khumah ka let kual seka, ka chawmawlh vek a ni ber. Achang leh awmze nei loin ka nui a,ka awm tawt tlat leh chhungril na vung vung chu tihzia tumin ka awm ka chum a, ka uak bawk..Reife hnuah mak takin ka mittui a rawn baw zawiha, ka zawi ta hnawk bawk.  Ka mittui a rawn luanga, ka bekah a rawn luangthla zela.Hru loin ka awm ngaiin ka awm a, ka kawchhung atangin tahchhuak lutukin min rawn hnawha, ka inhnit zui nghal hlawp hlawpa; mahse, ka aw erawh vawikhat pawh a ri chhuak eih lo.

Che loin ka mu mar ata, pawn lama Lala-i bauh that that thawm leh Mite-in a au ri chu ka hretheia, khua a var tawh tih ka hria. Chhin khat mah ka chhing ta miah lo.Mahse, ka rilru erawh ka siamfel ta thung.

Ka natzia sawifiahna turin eng tawngkam mah hi a tawk zo lo tih ka chiang. Mahse,Sangkima erawh huatna ka nei tlat lo. Thil thleng kha kan inkawp hnua thleng ni loin kan inkawp hmaa thleng a ni a. Mipa tamtak anga kawp vanga thleng a ni lo. Ka chhungril hian tu nge Sangkima’n a duh ka hria,mahse chuti chung chuan a fa avangin mawhphurhna la turin a rilru a siama. Mipa tamtak,an bialnu te rai lai tlansan tum thin khawpa dawihzep ang kha ni loin.Mipa tak tak,rilru nghet leh mipa nih tling,ka duhthusam mipa a nih zia ka hmu tel tlat. Ka duhthusam Mipa erawh ka tan ni loin Amber-i vanneihna atan a ni tihna animai. Ka na a, ka kehchhia, ni e…Ka na..Mahse,ka dam leh mai ang.Hun angai rei deuh anih pawhin Naute pakhat nunna ka chhanchhuakah ka ngai a, ka la hlim leh em em ang tih ka chiang. Kan pahniha ka hun hman dun erawh ka damchhunga hlu ber a ni reng tawh ang.

Mizoram chhung chauha Lock down kalpui tumna kha hrileng a nasat tak avangin Rampumah total lock down puan a nita rup. Lock down kan kalpui atanga reiloteah mizo zinga Positive hmasaber hmuh chhuah a ni a. Mipui kan chiai nasa ta,chhuah hrim hrim kan hlaua. Min chhuah luih tir dawn pawh nise kan duh lo thum vek zawk ang.

Pawnchhuah khap ngai leh hetiang Boruak hahthlak hi thil lawmawm a ni thei lo. Mahse,ka tan erawh vanneihna tih loh theih a ni lo ve thung. Ka thiante ka hmuh an ngai lo va, thianho groupa kan nawina hmun pawh ka pi damlohna chhuamlamin ka lut ngai loa. Pawimawh em em sawitur a awm miau loh avangin min rawn be lui tawng tawng hek lo.. Duhtawkin Inah ka rilru natna ka talpui theia, ka inkhung tlawk tlawka. Diktak chuan ka helnuai takmeuh. Sangkima lam kaihhnawih hrim hrim chu ka en duh lo vek. Block erawh ka block lo,mi Block hi ka tlawmngaihna lam tak a ni ve tlat. Status a nei ngai lo tihtheih a ni a. A number ka neih hnu leh kan inkawp tak hnu pawh khan Status a nei mai mai lo. Ngaihzawng chungchang phei chu khawiahmah hmuh turin a dah dawn lo tih achiang reng.A reh tlawk tlawk chu min tichaktu pakhat ni mah se min nat tir zualtu a ni tel tho. Min bia se ka ti lova, mahse ‘enge a tih mek?” tih zawhna erawhin min chhuahsan ngai lo tluk a ni.

Lock down thawh khatna kan hmang zo a, ka pi a rawn chhuak ta bawk. A sawi lawk ang ngeiin Malsawma kan tangkaipui lawr leh lak. Inah erawh vawihnih chiah a lo kala,chu pawh reilote chauh awm turin. Ka Gift tur a rawn dah zan bak kha engmah sawizui a nei lo.

Lock down neih zawm leh tura ruahmanna kalpui a ni a, mahse a hmasa zawk ai chuan tlemin an thlahdul hret hreta, Mizo zingah Positive kan awm lem lo bawka,ramchhungah chuan kan thlamuang leh ta hlawm viau.

‘Zonunmawi,fimkhur ta che’ ka nuin a tih riah ka harh deuh zawk. Chhuata no tla keh darh hneh lutuk chu ka en a, ka nu ang zui hlawk hlawk chu ka dem lo.A no zinga a tha tha ka tikeh hnem tawh lulai em atin ni.

‘Enge maw i hriat ni? Tunhnaiah ringawt pawh pali iti keh tawh ania’ rawn kal hnaih pahin a ti leh hmarh hmarh. Nia,ka thil tih laklawh lai te hian ka hriat reng naah ‘ Amber-i a raia,ka mawhphurhna ka hlen angai’ tih a lo lan tawh hi chuan khawvel hi a chawl thuap thin miaua. Ka zia tan hle tawh chungin min vilh ngut ngut tu hi chuan min la kiansan hleithei meuh lo chu anih hi a.

‘Phiatkhawm vat rawh,a them te kha kan rap riau riau ange. Nula puitling pui si hi fimkhur thei reng reng lo mai’ ati leh a,ala ang duhtawk lo.

Ngawirengin ka phiatfaia, ka phiah laiin ka rin loh deuhin Lawmi a rawn lut hlawl.’ Awi, ka lunglen tawh zia hi a..In lo dam em?” thawveng leh vei nei lo zetin a rawn ti nghal ham ham.

‘Dam e, engtin nge ilo chhuah theiha?” ka ti deuh ha.

‘Nula fel hi chu maw kan heti tlat zel’ tih pahin a kekawr ipte atangin ID a rawn phawrhchhuaka,ka hmuh theih turin a rawn lek hnaia. LTFah a lo tel ve chu niin.

‘Ve ngei che hian a…’ ka ti nghauh.

‘Nge? Ka fel alawm…Tak takin tunah min ruat chiah alawm. Ka peih lo zia chu a, mahse kan tihtheih tawk a tlema, pawi ka ti hran lo. Hey, hmeli..I va ngui ve’ a tih zawm zat. A kut zungtangin dawhkan tlang a tlir zui nghal dar dar bawk.

‘Ngui nang…Bonus ka lo dawng zo chiaha’ nui lui sak chungin ka no tihkeh ka kawk zauh,za zetin a nui ve nghal hak hak mai.

Haw leh mai loin a awm ta reng,inchung lamah kan chho duna, thlifim a thaw heuh heuha,ka harh sawng sawng thei.

‘Eee, enteh…’ tih pahin ka hmai bulah a phone a rawn lek hnaia. ‘Enge?” ka ti satliah.

‘En la…Amber-i te annih kha,Quarantine an lo hmang dun bik vel aniang.Mi hi ngatinge an nun a nawm em em bik le?’ a ti zui halh. Chhang loin a phone ka laksaka, ka thawk a rawn saka,ka awmah min hnawh tu awm ang maiin a na nghal vang vang bawk.

Sangkima inkamkang deuh chungin a thu mu a.Muhil niawm takin a mit a chhinga,kawr a ha lo.Amah kuah chungin Amber-i a mua,lehkhabu a chhiar thunga. Nimin maia Amber-i post a ni a, a Caption pawhin mi a hip viau ang. Kei erawh chu min hip lo satliah mai pawh ni loin ka thaw tha thei lo.

Ngawirengin Lawmi Phone ka pe a, ka thutna thutthleng ban nghet lutukin ka hum thung.

‘An inhmeh sia, an inru anih ka ring.Anih loh chuan Quarantine chhung zawng an khawsa dun tihna nimai. Tumah kan chhuak miau si lova.Awi, an nun hi a awhawm tiraw? Mi sawi mai mai an ngaipawimawh der si lo” ka rilru hre lo em emin ati leha, ka bu satliah ringawt. ‘Nupui anga khawsakpui ka tum lo,ka fa vang chauh a inzawm kan ni’ a tih ri kha tun lawka sawi ang maiin ka bengah chiang lutukin a rawn ria..Ka ring alawm,ni e..Ka ring anih kha.,Mahse, tuna an thlalakah kha chuan a sawi dan letling thawk vek a ni.

‘I van nawm loh hmel,I dang vek ania’ mak tih hmel zetin min ti a. Ka lu ka thinga, na vak loin ka awm ka chum pah bawk.

‘Engtin nge i awm a?” a tho nghal hliai.

‘Ka tha…Ka thaw a hah thut a’ ka tichhuak halha,thawklehkhatah ka awm min hnawhtu kha a kiang thuta, ka thaw nghal kawk mai. Ka sawithiam dan ber chuan tui tla,an chhar hnua rawn thawchhuak thut hi ka inchan ber.

‘I hmai a dang vek alawm le…I tha tak tak em?” min rin loh hmel zetin a ti leh a.

‘Um..Tha’ harsa lutukin ka nui lui sak.

Chaw tihtham ka ei leh ta pek lo. Ka mitthlaah Sangkima leh Amber-i an awm renga, ka chawei chakna a bo vek. Chaweina ka tihfel hnuah roomah ka chho a, ka nu erawh ka Pite inah a phei thung. Tihtur a awm loh thin avangin Patea te nen Card an deng thina, ka nuam tih zawng a nih ve lem loh avangin ka deng ve ngai lem lo.

‘Jump ila…’ tih hi Ampuia’n min rawn thawna. Ka melh reng…Ka reply lo dawn zeta, mahse inkhel ila ka zia zawk maithei..’ Ok..Lut ila’ tih ka thawn let ta zawk.

Ka lut fel deuh chiah tihin Ampuia’n min rawn invite a,midang a rawn hruai lut tel bawka, khel ho thang hi chu kan inhre tham tawha, hei hi chu ka la hre ngai lo. Ka enkual vel a,’ Zoeyy’tiin a indaha,a Rank a pangngai viau.Mahse, thil ka hrechhuak lehzawk. Sangkima naka tattoo ‘Zoeyy’ tih inchhu kalh kha a tak anih chuan Amber-i pawn a hmu tawh ngei ang.A sawi anga a awm loh zia Amber-i photo upload atang khan achiang reng miau a,vawi tamtak kawr ha loin a awm tawh ang chu..Huizz,engmah hi ka hre thiam tawh lo.Ka haw ngai lova, a thil tih engkimah khan Mipa tihtur a ti niin ka hre thin a..Mahse, vawiina ka thil hmuh atang khan ka rinna zawng zawng a tlahniam vek tawh. Huh…Englai chu nge maw rin ka la tum cheu ni a??!! midang ta a ni a. Engzata tam pawh Tattoo ,ka hming ngei pawh lo nei biai buai mah se ka tan sawtna a awm lo.

‘Anun, Start lawk mai aw..’ Ampuia’n min rawn ti a. Leaderah min rawn dah nghal zat. Ka ngaihtuahna khawvel atangin ka harhchhuak nghal zawk bawk.

‘ Eee,Zoeyy hi ka khelhpui thin ania..Nidangah pawh kan khelho ziah tawh anga tiraw’ Ampuia’n thawveng fein a rawn ti a, kei erawh a hming vangin ka phu deuh zawk.

‘Nia, tha lawm…Nula hi chu welcome viau zel ang’ nui huk huk chungin Engkima’n a ti a. Ka ngawi reng.

‘Anun,Zoeyy hi kan Clanah ka Add dawn ania’ a rawn ti leh a.

‘I thu thu…’ ka ti tawi tak ringawt.

Kan duhtawk kan khelh meuh chuan zinglam dar 4 a ri der tawh. A game hi hun awh rei chi a ni a, khelh tluan phei chuan darkar a ni thuak zel maia. Rilru tawt lutuk paih thawl nan chuan thil tha tak a ni ve tlat. Zanin pawh hian khel lo ila chuan ka ngaihtuah leh ngut ngut anga, awmze nei lo kha ka natpui leh viau dawn tih ka chiang. A tir lamah kan khelhpui nu hming vangin ka buai deuh phat nangin,kan khelh rei hnuah erawh ka ngaihtuah lo zawm ve ta mai. A lo thiam reuh phian bawk nen midang tel loin kan paliin kan khel tluan ta thak. Kan khelh ho hmasakberna a ni chungin kan inman nghal pang.Min venga, ka bulah a tlan deuh chawt bawk. Mahse,Kan khelh chhung zawng khan vawikhatmah Zoeyy kha a tawng ve lo va. A sawi duh a rawn type mai zel. Engkima’n a chhiah fiam hlut chung pawhin tawngkain a chhang duh der lo.Hmeichhe induhtawk tak chu a ni phawt ang.

‘Vawiin chu ipi te inah ka phei angai,chhuah phalna pawh ka la vek tawha’ ka thawh veleh ka nuin a lo ti nghala. Ka mu tlai bawk nen ka rit deuh luk.

‘Enge? A nuam lo leh deuh ami?” ka ti a. Tuilum ka thlichhuaka, ser tui nen ka pawlha.Ka in nghal pawp.

‘Aw. nuam vak lo aniang.Nizan kan mu mang lo an tia,mahse tukin lam chu a zia deuh an ti a’ a ti a. A chawhmeh chan lai a chan zawm mawlh mawlh.

‘Ka lo kal ve dawn mi?”

‘Angai lo ang.A awmdan azirin riah mai pawh ka duh maitheia, in kalsan vek chu a buaithlak ang’ a ti liam leh puat.

‘Engtin nge i kal chuan anga?” ka ti ve thung.

‘Malsawma’n min thlah ang. Lock down hi han zo se Motor khalh hi zir ka duh, aaa..nangmah zawk hian zir la a tha ang.Driver lak ngawt dawn lah in mamawhna a tlem si. I pa khan khalh zir kha a phal lo teiveta, min dampui kumkhua tur ni awm takin’ a ti zui leh a. A aw tlema zuih ral deuh chuan ka pa angaihtuah zui tih ka hre thiam .Nu phili thei tak nimahse a chhungrilah nu sehhel leh lu zo tak anih avangin ka pa awm loh hnuah pawh han  talbuai phat mah se rei a ni lo. Nu leh pa nih a kawpa, a pasal leh a fapa kumkhat chhungin chan mah se nu rilru lian leh tihtawh lam titlat chi anih avangin ngai a awh leh thuaia,kawng engkimah a rintlak zia haider chi a ni lo.

‘Ka thlah thei tho che sin le.Malsawma tihbuai kher angai lo tur ania’ ka ngaihtuahna nena inmil lo fein ka ti a.

‘A ho em mai. Ani te chu eng phalna mah la loin a tlan zung zung thei alawm’ a awki pangngaiin a ti mar pat.

‘Thla hmasa inluahman kha ka free hlawma, tun thla chu a chanve angin laksak ka tuma. Ac ah an rawn transfer ang’ a ti leh a. Ka bu liam leh ringawt.Kan awmna in ni lo, Khatlaah in kan nei a. Chhawng thum niin a awmna hmun a rem bawka, luah man pawh a tlawm hlawm lo. A luahtu te pawh mi pangngai tak tak anni a, ka nu hian thlaruk chhung atan inremna a neihpui phawta, an awmzui duh chuan an ziak tha leh mai zel.Kan vanneia,mi tha lo takin an luah pawh ka la hre lo.

Chaw kan eikham hnu lawkah Malsawma a rawn thlenga..’ Motor ka rawn keng mai, ka Bike a chiang lo a’ a rawn ti lut nghala.

‘Anih chuan ka lo kal ve dawn mi? I rualin ka haw leh anga’ ka ti vat.

‘I kal thei nang,keima hming chauh alawm ka ziahtir’ ka nuin a lo ti a.

‘I kal thei ang ka ring. Duh leh lo kal la, kal pah pawn Officeah kan ziahbelh tir anga nimai alawm’ awlsam zetin Malsawma’n a ti a. Ka ngaihtuahnaah Lawmi a lo awm zawk.

‘Lawmi kan bia ang.Duty zingah a tel ve alawm’ ka ti a.

‘Angai lo.A hma ang khan an khauh lutuk tawh lo vek. Ka awm a,kan tlang thei ang’ Malsawma’n a ti leh ta tlat. Nia,ID an nei veka, tu pawn lo tiding se, excuse chu a siam thei vek ang.En mai pawn dawt sawi mai mai chi a ni lo tih alang renga,min man luih talh pawh ka ring lem lo.

Ka rin ai takin ka Pi a lo thaa, ka pa nu that leh that loh lam a lo ngaihven zaw mah. Ka pu a tawng chuar chuara, nidang ang bawkin Pitei a lo virbuai leh hle tawh bawk.Kan thlen hnu lawkah ka nutei leh a fanu an rawn thleng ve a.Nutei fanu nen hian miin kan inan zia an sawi thin; kei erawh chuan kan inang pawh ka ti ve lem lo. Mak takin a hringtu nu aiin ka nu mizia a chhun zawk.Harhvang leh lu zo tak,a awmna chin hriat ve tak a ni a. Engkim a hnehsawh vel vek bawk. College kan kal lai pawhin lam an tih leh alam maia, Modelah atul leh atang leh mai a. Lehkha lah a thiam thei viau bawk.Mahse, vawiin chu Malsawma lo awm ve vang ani ngei ang.A bengchheng lo ve tlat, mahse a awmdan leh chezia engkimah chuan Malsawma mit lak a tum tih ka hai lo.Nia,ka u Boral bawr velah pawh khan Malsawma bulah khan a tawlh nasaa,mahse Malsawma hian a ngaihven lo nihmiang.An inngaizawng dawn emaw ka tih laiin an inngaizawng ta lem hlei lova.

‘Angela-i khan a star che’ kan haw kawngah ka ti a.

‘Chuan…’ a ti duh lek.

‘I duh chi a ni lo mi?”

‘Ka duh lo….’ A ti tawl.

‘Enteh…Diktak chuan’ sawi zawm loin ka ngawi leh daih.

‘I sawi tum ka hria, sawi duh lo mai rawh. I inpeih thlap hun ka nghak thei che’ a ti a. Ka awm a nuam lo nghal teuh thung. Ka ngaihtuahnaah Sangkima a lo langa, inzawmna kan nei tawh lo tih ka hria. Ka engkim,ka thianghlimna nen lam ka pe a. A tawpna erawh kan tum loh lamah a nita daiha.Mahse, nimina Amber-i thlalak post ka hmuh hma kha chuan kan pahniha kan khawsak danah khan  inchhirna ka nei ngai lo.Tunah erawh a ka inti ngawih ngawih thung.

‘A harsa ang tih ka hriaa..I tan chuan u ka ni a, keipawn ka nau angin  ka en thin che a. Mahse, a lo inthlak danglam ta thuta’ Malsawma’n a ti leh a.

‘Ka thei rih lo..Min hrethiam rawh’ inthlahrung zetin ka ti halh.Amah en loin pawn lam ka thlir daih bawk.

‘A pawi lo..Ka nawrlui dawn lo che ka tih kha’ a ti dam leh thlup.

Inah lo lut ve loin a kaltlanga, kan in lama lut loin ka pi ka tlawh hmasa a. Reivak lo ka thut hnuah inah ka phei a. Living room Sofaah ka thu thla hnak. Malsawma thusawi kha ka ngaihtuah leta, amah ka mitthlaah a lo langa. Mipa rintlak,eizawnna kawngah pawh hlawhtling tak leh an chhungkua pawh sawisel kai lo anni a. Kei engmah ni lo min duha, ka duh ve lo tih a hre chung pawha min nghak tura a inpeih thlap kha a awihawm loh rum rum. Ka hmeltha lova, ka mizia lah mi aia tha chungchuang a ni hek lo. Kei aia tha zawk a hmu teuh dawn tih achiang,mahse midang tihpui ka tum pawn a hnial fithla thak zela.  A lerh thin nen,tunah chuan hmeichhe han ngaihbel tur takngial pawh ka hre lo..Ka lu ka thing nak, nula thianghlim lo ka ni a, vawikhat mai ni lo ka mutpui a, ka mutpui lah chu tudang ni loin a huat em em Sangkima ala ni zuia.Hre vaih se chuan min duh zui lo hle ang.

Nitin nun a pangngaiin a kal bek bek a, khawvel hi a ninawm tih ngawih ngawih chang ka nei zing ngiang mai. Kan chhuah theih loh vang leh inkhung nasat vang a ni lo tih ka chiang. Sangkima vanga ka tawrhna te a hlimchhawn ang em chu ni tawh lo mah se ngaiawh tak tak erawh ala theih loh tluk a ni a. Muthilh ka harsat em em a, ka mumangah lah vawi tamtak zanah a lo kala,min rawn mutpui thina. ‘I special a, I bulah chuan ka hahdam vek ‘ ka beng bulah a lo ti thina. Mahse,ka harh apianga keimah chauh ka ni tih ka hriat rualin mittui nen bawk hun ka hmang leh nge nge thin.Min duatna kha ka ngaia, a lungphu ri dat dat pawh ka la feel thei cheu.Mahse, na eng ang mah ila Sangkima biaka, va inbunruah tumna ka nei ngai lo. Ka natna aiin ka luhlulna a chak zawk tih ka chianga, ka thih phah dawn lo tih pawh ka hria…Huat ka duh ngawih ngawih laia ka haw thei hlawl lo hi ka manganpuia, min bum niin ngaih chang nei mah ila a dinhmun in a zir lo tihah zawk ka chiang leh tlat thin. A hmuh lai khan tihnat theih loh khawpa chak ang maiin ka langa, mahse ka chhungril sahal erawh tunah pawh ala reh der si lo.

Lock Down thawh hnihna a zo a, Mizoramah vei an pun belh ta lo bawk nen Green zoneah kan awma. Inkhung beh chawrh chawrh reng kha thil harsa a lo nih tawh avangin a vawithum nan ti leh mah se nunphung a pangngai ta thuak. Restaurant tam zawk  an inhawng a, keini erawh kan la inhawng ve lo. Kan eizawnna ber a ni lo va, ka pa khan pawisa min hnutchhiah nual bakah kan inluah man atangin pawisa kan lalut renga, harsatna kan nei lem lo.

‘I pi damdawiinah an kalpui mek anih chu,insiam vat la.Kal nghal ang’ rooma ka awm laiin ka nuin a rawn ti a. Ka phawk nghal hra mai.

Minute tam pawh a liam leh hmain kan inphurchhuak fel hman der tawh. Damdawiin kawtah Scooty ka daha, ka dahfel pawh min nghak hman loin ka nu erawh a lut nghal daih.

Putea leh Pitei an lo awma, ka pi erawh Doctorin a lo en mek thung. Darkar khat zen zawn kan awm hnuah kan admit fel chu a ni leh ta der.

‘Kan tlanchhuak rum rum lutuka,in lamah thawmhnaw vel lo siam sela.Mambawih,nang iva la lawk mai dawn em ni?” Pite-in min ti a, ka bu nghat.

Inhnuai lamah ka chhuk thlaa, Damdawiin luhchhuahna Main Gate lam ka pana, mahse rawn lut mek ka hmuh rualin ka ding chawt. Min rawn hmuh ve hmaa pen bo maina tur ka en nghala,mahse a awm der lo. Tihngaihna a awm lo, dak deuh vahin ka kal pheia,Min rawn hmu ve nghal chiah. Thla hnih dawn hnua ka hmuh lehna hmasa ber a ni a. Enmgah danglam ala awm lo.A chhiat loh ngaiin ala chhe lo renga, mi a hipna pawh ala ngai reng.A mitmu dum fiah zet leh a hmelpa lutuk pawh ala ngai.

Dak vahin ka kalphei a, kan intawk ta chat. Ka melh chho a, ka nui lui sang bawk.Ka thle baka, engmah sawi loin ka kalpel nghal hmiah. Hmuh loh der tul ka ti lova, mahse ka ngaipawimawh lo tih erawh chiang taka lantir ka duha, ka tita reng bawk.

‘Anun…I tha em?” ka hmaah tak Bsa a rawn ding chat.

‘Aw,aw…Tha e,nang zawk?” zangkhai thei ang berin ka ti a. Ka hnung zang a za mar mar a, tu emaw chuan min en reng tih ka chiang ve tawp.

‘Um..Tha,Enge hetah i tih?” a ti leh a.

‘Ka pi kan rawn kalpuia’ ka ti a.

‘Um,anih chu..An lo admit tihna mi?”

‘Aw…Kan indah fel chiah animai..Lawk,hetah i thawk tih ka hre lova’ ka ti a. A thle deuh bak..

‘Aih,thawk lo..Ih,Sangkima te an awma..Amber-in nau a chhiat a’ zawi deuh zawkin a ti dam thlap..A thilsawi chuan na zetin min deng sawk thung.

‘Maw? ava mak ve’ ka ti chhuak thei hram.

‘Nia, a kawchhungah a thi a..’ a ti leh a. Harsa ti zetin ka hrawk ro lutuk tihnawng turin chil ka lem a, ka lum deuh pup pup chuan ka thawkna lamah harsatna min siama,ka thaw tha hleithei lo…

NOTE- A THEI TAN INTHLAHRUNG LOIN CLICK LEH ANG AW.IN ENTIR KA NGAI ANIA,PAWISA KA NEI LO🤭