ANNEM - 22

Chapter- 22

‘A zia lo e…’ ka tichhuak leh sap.Sawi tur dang ka hre hlawl lo. Na taka min siamtu ni mah se ka inhlan vena a thlawn ta chuan min thawng lo thei lo.

‘Um..Nia’ a ti tawi ve tak.Kan pahnih chungchang hi engchen nge ahriat ang ka hre lo. Mahse, kei leh Sangkima chauh ni lo,Amber-i leh Sangkima chungchang pawh thui tak a hria ang tih ka chiang.

‘Ka kalsan dawn che..Lo dam zel rawhse’ ka ti leh a.

‘Lawk…Biak duhna che ka neia, engtikah nge hun i neih ang?” a ti leh a. Ka beisei loh lam anih avangin insum hman loin ka mengphar deuh awk.

‘Eng chungchangah nge?’

‘A tam mai…’

‘Min hrethiam la, kei….Sawi dun tur kan neih ka ring chiah lo,a tawp tawh a’ ka nui  lui sak. A hmel danglam zawk chu ka hmu hmana, mahse ngai a awh leh vat.

‘Ok…Ka hria e..Mipa pawh hi kan lo inthlakdanglam nasa thei khawp mai’ a ti leh daih. A sawi tum ka man lo,zawhfiah tumna ka nei chuang lo.

‘Ka kal phawt ang.Min nghaktu an awm sia’ ka ti daih.Ka then lui sak bawk.

‘Ok..Anih le’ a ti dam leh thlap.Hmanhmawh zetin ka Scooty dahna lam ka pan phei nghal hlawk hlawk.

Ka pite In atangin Damdawiinah ka let leha, duhthlang thei ila chuan ka let tawh hauh lovang.Mahse, kal mai tur an awm loh avangin kal lo thei ka ni lo. Vanneihthlak zetin Sangkima emaw amah lam hnaih hrim hrim tumah ka hmu ta lo hlauh.

Ka nu leh Putea te nupain ro an lo rel fel vek tawha. Ka nu a riak anga, a tul dan azirin inriahchhawk zel turin an lo tifel diama.In lam atanga chaw inpek a buaithlak an tih avangin tul bik thilah lo chuan Damdawiinah Order mai tur an ti bawk.Cabin an lo book fel tawha, tunah ruak mai ala awm lo a,mahse zanin bak chu kan chan mai a rinawm zawk tih Pite-in a sawi mawlh mawlh.

‘I pi Doctor hi ipa te nen khan an inhre thaa, a tihzia thei ania. I pa hi chuan a awm tawh loh hnuah pawh thiltha hlir min hnutchhiaha’ Pite-in a ti vang vang.  

In ka thlenin khua a thim titih tawh;  ka pu a lo lut vata, chanchin min rawn zawt ve luam. Ka hrilh hnuah thut pawh thu muang loin a chhuak zui leh mai. Eirawngbawl ka tum zeta, mahse keimah chauh ka nih dawn avangin zing lama kan siamsa rin mai ka duh leh zawk. Bakah,Amber-i nauchhiat thu khan min thawng na lutuka,ka awm a nuam thei lo. Chawei chakna pawh ka nei hek lo.A finthlak lem loh tih ka hre reng chungin engtin emaw tak min fan tlata, inthlahdul hleithei loin ka insangmar teuh reng bawk.

Thil ei loh ngawt aiah tiin tlem ka ei lui hrama,ka ei kham hnuah ka nu chanchin zawtin ka be leh zuaia. ‘A la pangngai reng.Ngaihtuahawm lutuk a ni lovang. Chuan,naktukah Dawr kha an khawih tan tawh dawna.I pi hi kalsan mai theih a ni rih dawn si lova, I lo enpui angai dawn ania.Hnathawktu tur chu Malsawma khan a hriatsa kha’ a rawn ti mawlh mawlh.

‘Naktuk te chu Sunday aalawm a’ ka ti hlak.

‘Eeee,ni tak.Monday emaw ka tia. Kan lock down hian min ti chhaw zo vek. Engpawh chu nise Malsawma chu lo be hrim hrim la.Bungraw lei ngai pawh amah khan a hria ang.I Patea te dawrah lak leh mai tur’ a rawn ti leh duah.

‘Malsawm be kher loin tihtheih a ni lo mi a?” ka ti leh hlak. Kan pahnih inkara thil thleng engmah ka nu hian a hre lo tih ka hria,mahse ka inthlahrung tlat tawha. Kan chhungkaw thil pawimawha biak chhen nuam ka ti tawh lo.

‘Theih nang,aman atir atangin a buaipui alawm mawle.Lo be rawh,ani leh keini inkarah engmah nuam lo a awm lo’ pawisak nei lo zetin a rawn ti leh hmiah. Ka ner vak ringawt.Tunah chung chung biak a tulna a awm lo,Monday ami daih tur ania.Naktukah bia ila a tawk reng.

Mite-i a rawn kala, Movie entur ka neih leh neih loh min rawn zawt dak dak. Ka tleirawl lai atangin thian kawma lenchhuah aiin Movie en leh lehkhabu chhiar mai mai nuam ka ti zawk thina, keima puala Laptop ka neih tak hnuah phei chuan ka en nasa lehzual. FRIENDS phei chu ka en ngun lutuka ka sawichhuak thei deuh vek. Jennifer Aniston atchilh burtu ka ni a, keimah emaw ka inti lo chauh zela. Brad Pitt nen an inthen vangin ka lo na ve chiam. Angelina Joile ka hmelma kumhlun anih phah ta bawka.Min hre miah lo mah se a tel vena tawh hrim hrim chu engmah ka en ngai lo a ni tawp.Movie chi hrang hrang ka Download nasaa, Release thar a awm apiangin neih tumin ka buai nghal phat zel a, ka neih sa hi ka Cousin te leh ka thianten an la chhawng ve leh zel thung, athar ka nei thei bawka min ring deuh tawp.

Mite-i chhuah hnuah Lawmi’n min rawn call a, ‘Inkhel ila…’ a rawn ti a. A moodah ka awm dawn lo lutuk tih ka hria,mahse ka khelh chuan ka rilru tawt lutuk a zia deuh beiseiin ka ‘aw’ ta zawk.

Kan lut fel deuh chiah tihin Ampuia leh Engkima an rawn lut ve leh bawk.’ Zoeyy a va reh ve’ Engkima’n a rawn ti dut dut.

‘Nia,nimin atangin ala Online lo reng reng.A buai ve aniang’ Ampuia’n a ti awlsam mai. Ka ngaihtuahnaah eng emaw a lo lang zawk. Kha Zoeyy kha hmeichhia angin a awm a, mahse Sangkima a ni mai angem? A tawng ngai miah loh avangin hmeichhia ni turah kan ngai ve ngawta,a lo ni miah lo thei tho.Mahse, kan inhriatna ala rei lo chungin Sangkima kha nihna thupa khawsa chi a ni lo tih ka chianga. Chu chu tun thlengin ka ngaihdan ala ni reng.Chuvangin kha Zoeyy kha Sangkima a ni lo tawp ang.

‘Zonunmawi,Zuang ta che..I net a chhia nge? ‘ Ampuia’n vin deuhin a rawn ti a. Ka ngaihtuahna atangin ka harhchhuak zawk.

‘Call ka dawng alawm,lo zuang mai teh’ tih pahin ama hnenah ka transfer nghala. A phun nung nung.

‘Enge i hriat a? I thi char chara, ka kick mai dawn che ‘ Engkima’n a rawn ti a. Nia, zanin chu ka tilui hleithei lo.Kan Start chauha,min knock nghal zel. Huizz, ka ngaihtuahna a fim hlawl lo.

‘Nia, ka duhtawk mai ang’ ka ti hlawl.

Muhil thei loin ka tal ka tala, ka ngaihtuah naah lah ka duh loh tawpin Amber-i leh Sangkima hlir an awma, thildang ngaihtuah ka tum ngial pawn an mahniah bawk ka lut leh zel tho.Huizz,thla tel an chanchin ngaihven lo leh hre loin ka awm tawha. Mahse, ka hriat leh hmasak hian ka tum loh lamah na takin min thawng leha. Pawn lama hahdamtaka ka lanna phenah hian ka chhungril a sahal huam huama,Sangkima laka ka feelings hi reh mai tur chi a ni lo tih ka hrereng a, vawiina ka hmuh leh chiah phei kha chuan mipa dang ka nunah la lut leh mah ila amah nen ka khaikhin kumkhua tawh dawn tih ka chiang bal. Mahse, ka natna leh ka tawrhna hi tumah hmuh tir ka tum lova,ka luhlulna vanga namnul the ihram hram zel ka nih tlat avangin, he ka chhungril awmdan  hi chu ka nihdan tur reng a ni tih erawh ka pawm thlap tho.

Rit lukin ka tho a, ka lu a hai deuh rum rum. Zan ka mut mumal mumal loh leh thil ka ei mumal lohna a rei tawh lutuka,ka rihna pawh a tlahniam ta nual.Lock Down atangin inkhawm a awm tawh rih lo bawka. Sunday pawh Sunday a ni ve satliah ta ngawt.

‘Damdawiinah i kal leh dawn em?” Zari’n min hmuh veleh a lo ti a.

‘Kal ang, ka nu hruai angai dawna’ ka ti tha ve mai.

‘Ka pa khan tlawh ve ka duh atia, mahse intlawh an phal lo em?” a ti leh a.

‘Phal lem lo,kei pawh ka lut thei kher lo vang’

‘Ka ringa, bakah Sunday hi Curfew a ni hrim hrim a,lut thei ta pawh nise a…’ sawi zo loin a phone lam a en vat.

‘Hello..’ tih pahin a tho nghal that. Pawnah a chhuaka, kei leh Mite-i leh Nanu-i kan titi zui liam. ‘Lo lut ru’ Zari awin a tih ri ka hriaa, ka hawi let vat. Mahse, kawngkaa lo lut mek ka hmuh rualin ka thaw a tawp chawt. Sangkima nau mipa,hmel ngeiawm em em mai kha a ni tlat.

Min rawn en ve a, mahse a hawisawn lehnghal mai. Keiin ka hriatchian angin min hre ve tlat lo.Living Room lamah an inzui pheia, kan thutna atangin an thutna alang theia. Ka va en leha, a hnar kawm deuh van leh abiang thawp deuh te,a mitkhur thuk dak maite chuan ka pawi a sawi ngawih ngawih. Mahse, chu aia pawimawh a awm. Engtin nge Zari nen an lo inhriat? Thian ni loin thil pawimawh,Zari hna nena inkaihnawihah a lo kal zawk nge?

‘Te, amak e’ ka hmai bulah Nanu-in a kut a rawn vaia. Ka phu zuk..Thing thei bawk si….

‘Nge?” ka ti deuh ha.

‘I va han ngaihtuah muk mai mai tak.Love Rosie kha i nei em?” a tih zawm leha.

‘Nei e.Mahse, Youtubeah a awm reng kha’

‘Maw? a awm tih ka hre lo reng reng.Ka en leh chak tawpa’ a ti a. A hmaa Rasmalai inchhawp a tem pah a.

‘Hmuhnawm namen e..Ka sawichhuak vek thei’ nui chungin ka ti a. Mahse, ka rilru erawh Zari leh a inlengpa lamah a awm daih thung.

‘A u Bialpa thar hmelchhiat zia saw.Curfew zawng zawng thlawhkhumin a rawn kal ve ngei bawk sia’ Mite-in a rawn ti sa saa.Ka insangmar ru nghal vak thung.

‘Bialpa maw?’ ka ngaihtuahna tilang lo thei ang ber turin awlsam hmel takin ka ti a.

‘Um,ala rei vak lo..Awi,chhia hi ka ti sia maw’a ti leh a.

‘A neitu berin a duh chuan aho em maia.Bakah,an class buru…Hmel mai mai’ Nanu-in a ti hlak.Sawizui ka tum lo,Ka Patea fate zingah pawh Nanu-i hian a nu a chhun lawrlaka,ani nena inhnial hi englaimahin ka peih ngai lo. Tunah engemaw zawngin lo sawi vaih ila chuan Mite-i ngei pawh hian a u te a tan dawn tih ka hre ru kar bawk.Mahse…Mahse a awm tlat.

‘Thingpui ka lum dawna,in duh ve em?” Zari’n a rawn ti a. Ka tho nghal that.

‘Duh lo mai ang. Damdawiin kal hmain inbual zuai ka duha,ka va phei zawk ang’ ka ti a. ‘Curfew chu..I kal thei bik dawn mi?” a ti ha.’Thei ang,Damdawiin lam chu tihdan a awm’ ka ti awlsam et. Diktak chuan ka kal theih dawn leh dawn loh ka hre miah lo thung.

‘Min lo nghak,Movie chu ka lo la,You tube ami en ai chuan Download sa chu a awlsam zawk. Kan wi-fi a chhe bawk si’ Nanu-in a ti a, kan inzui pheia. ‘Roomah ka dah,lo han la mai rawh’ ka ti a. Stepah a tlanchho nghal zai zai.

Ka nuin min rawn biaa.’Lo kal leh lo mai rawh. I Pitei a lu a haia,zanin chu ka riak leh law law mai ang. I nutei lah Reuben-a te naktuk an lo haw tur kha a buaia’ a rawn ti a. Reuben-a hi ka nutei fapa upa ber a ni a, Chennaiah ama pualin sumdawnna a kalpui ve a, lo haw thei lo tangkhang zingah a tel ve hlauh.Mahse, vanneihthlak lutukin Sawrkarin hawna hun a siamsak zingah a rawn tel ve thei dawn a. Ka Nutei lawm lutukin chhungkaw groupah a rawn sawi thuai thuaia.Hri len nasatna hmuna awm annih avangin ngaihtuah an naa, an lo hawi thei tur hi kan lawm em em a ni tawp mai.

‘Home Quarantine kha an dil ta mi?” ka ti a.

‘Teuh nang,I nutei’n a phal lo.I Pa Dinga pawn a phal lo.Sawrkarin tihtur an ti a, thuawih a tha an tih kha’

‘Anih chuan tinge a lo buai viaua?” hrethiam lo zetin ka ti a.

‘Aaa,ka hre bik nang mawle.An thawmhnaw an laksak dawn niang’ a ti awlsam leh then.

‘Mala chu i be tawh em? Kartharah an zawh hman ngei ngei angai ania’ a rawn ti leh a. Be tura min tih kha ka hre chhuak leh chiah.

‘La be lo,ka lo bia ang’

‘Ava mak e aw.Nizanah ka hrilh daih tawh che sia’ a rawn ti leh a. A awkiah a lungawi chiah lo tih ka hrethiam.Nia, a sawi tawh chu tihnghal zat zat duh thin a ni miaua.

‘Aw, ka lo be nghal ang. Naktuk ami daih tur ania,hmanhmawhthlak loh e lawm’ a lawm vak lo tih ka haider ve tlat. Diktak chuan ka be hreh ve em atin ni.

‘Anih chu a. Lo be vat rawh,sawi ang hian timai zel thin rawh,mahni thu te a awm tum zel mai’ a ti leh hlawk hlawk.

Nanui chhuah hnuah ka inbuala, ka inbual zawhah Malsawma ka call ta chauh.Hel viau pawh ni ila ka biak tho tho angai dawna, awmzia a awm lo.Bakah,Zari te inah Sangkima nau a lo kal tih kha hrilh hriat ka duh tel hrim hrim. Nula leh Tlangval anni a, inngaizawng thei anni reng;mahse,Thil pangngai ni loin thil thleng tur ni lo thleng lui niin ka ngai tlat.

‘Hello’ a rawn ti dam thlup.

‘I buai em?” zangkhai takin ka ti a. Ka biak hreh zia tihlan ka tum lo.

‘Buai lo e.Enge nita?” a rawn ti leh dut.

‘Ka nuin naktuk atangin dawr khawih tan tur atia. Hnathawktu vel kha’

‘Ee..Nia, ka be fel tawh. Naktukah ka va enpui zuai anga’ a ti awlsam mai.Hmm,fel deuh hian awm lo se ka ti.Anih loh chuan ka duh vang niloin ka inthlahrung lutuk hi ka intal awk ang tih ka hlau. Ka rilru ka pe dawn tak tak der si loa,ka inthiam lo tam mai mai ang tih ka hria.

‘Ka nu hi Damdawiinah a riaka,keimah ka lo kal ve ang’ ka ngaihtuahna nen inmil lo zetin ka ti hul hak.

‘Damdawiinah maw? tu nge awm leh ta?” a ti vut.

‘Ka pi, a hla zawk..Niminah kan dahluta’ ka ti tha ve mai.

‘A va zia lo ve, tunah enge a an a?”

‘Ala ngai reng.Vawiinah Cabinah an insawn luta’

‘Um…Tihtur a awm leh min lo hrilh leh la’ ka chhing sawk.

‘Tehreng..Enteh,thildang daih’ ka ti a. Sawi zawm mai loin ka ngawi leh rih. Sawi tur a ni em ka ngaihtuah leh a, sawi loh leh mai ka duh leh lawi.

‘Eng nge a?”

‘Aaa,ngai leh lo mai rawhse’ ka nui a.

‘I va han ho reuh tak..A tha alawm’ a nui ve huk huk.

Kan inbiak zawh veleh Ruatsaka ka be ta zawk. ‘Enge nita Boss?” zawi hmel zetin a rawn ti a. Amah chang pawh ni lo,a aw thleng hian a thatchhiat hmel ngawih ngawih.Mahse, a hna angah hian ani aia rintlak an awm leh der si lo.Mak ve tak chu a ni.Amahah hian pawn lam landan pawimawh loh zia hi a chiang ber hian ka hria.

‘Ka mamawh che’ ka ti deuh tawl.

‘Sawi la….’ Mutchhuah hmel zetin a rawn ti leh a.

‘Sangkima nau hi a chanchin ka hre duha.A nau Mipa kha’

‘Ok..Englai ber nge? A vaiin tihna mi?”

‘Um,a vaiin..’

‘Yes,Boss…Ka theih anga rangin ka rawn hrilh ang che’

Damdawiin kal angaih leh tak loh avangin tihtur hre loin ka awm ta vel mai mai. Ka pi te in lam ka thlir phei leh thina, Living Room lam tukverh inhawng atangin Zari leh Sangkima nau rawn inzui chhuak ka va hmu a. A haw daih tawh emaw ka lo ti zawk. Zari nen hian kan intiat tawk viaua,mahse kei aiin a hmeltha zawk. A vun erawh a ngo lutuk loa, mahse hang tihtur a ni lo. PWD Deptah kumin atangin anghet loin a luta,amah hi Smart leh ni khauh mai chi a ni a,a sualna lai tak sawi fak tur awm si loin pawh mai mai a harsa em em bawk.Gate lam pana an kal dun chu ka en zui zela;Sangkima nau,cher sang zet leh kul deuh khen khawn nen chuan an inhmeh lo vel vek a ni tawp mai.Eng mitin nge a en ang ka ngaihtuaha, ka tum loh deuhin ka nui chhuak hak mai. Khawilaimah han duh chhan tur a awm hlawl lo.Ka lo ngaihdan tak phei chuan Hmeichhia zawng zawng tentur chi hmel a nei a ni tawp mai.Mahse, ka ngaihdan letling thawkin ka Cousin nen an lo ni daih.

‘Ka rawn lam kual dawn che mi?” Malsawma’n a rawn ti a.

‘Aih,ngai lo ang.Kal kawina tur ka neia, Scooty ka keng ang’ ka ti tha ve mai.

‘Ok..Lawk,I Scooty number tawp kha Even number nge Odd number?” a rawn ti leh riha,angaihna hre lo zetin ka ner nak.

‘Even number..Tinge?” ka sam ka phiar pah mawlh mawlh.

‘Sawrkarin Order an siam thar berah kha chuan lirthei intlanchhawk turah khan Even leh Odd numberin an thena,Vawiin hi Odd number ho tlan ni ania’ a rawn tita duah. Ka lo hre ve leh pek tawh lo.Hahthlak thei.

‘Naa,avan ho tak..’ka ti hlak.

‘Nia, ho angreng.Anih chuan ka rawn lamkual thei che tihna ni em?”

‘Ngai lo,Taxi a awm ang’

‘Ok..Dawrah kan inhmu dawn nia’ a ti a.Ka chhan let hmain a off zui nghal daih.

Taxi in ka kala,ka thlenin Malsawma a lo awm tawh. Hnathawktu tur pawh an lo awm tawha, hna tih tan dan tur vel an lo inhrilh mek.Tih ve tur hre loin ka lo hawi tawi vel mai mai. Malsawma kutah ka nuin a dah vek tluk a ni a, atir phat atangin ka ngaihven ngai lo a. Ngaihdan lo thawh ve chiam tur pawh ka hre lo.

‘Duh chuan i kalsan thei reng ania’ Malsawma’n min ti a.

‘Eitur vel hi engtin nge niang?”

‘An inngaihtuah mai ang.Daily-in kan chhawr hleinem.Contract turin ka pe.Mahse, tunkarah an zawh angai thung anga’ a ti awlsam mai.

‘A that chu..Ka nu khan a sawi si lo va’ ka ti ve mai.

‘Khawiah nge i kal leh dawn?” a ti leh a.

‘Mi hmuh lawk tur ka neia’

‘Ok..Anih chuan ka kalsan dawn che’ tih pahin a tho vut.

 Ruatsaka nen kan inhmuhna tur lam ka pana,reipawh ka nghah hmain a lo thleng ve mai. Phone pawha sawi mai theih anih laiin thildang min hmuh duh chhan nei a intih avangin kan inhmu a ni deuh ber. Lock down hnuah kan la inhmu leh ta miah lova, a inzuah buk lutuka ka hai thelh.

‘Min nghak rei em?” a ti a. Zawi zetin a thu thla hnak.A hmai tuamna a la thlaa.

‘Rei nang..I va tar ve’ ka nui a. A nui ve sak,a khabe hmul a Chula,a sam buk zet a tuai leh puat.

‘Ka sawi tan nghal pawp pawp mai dawn mi?” a ti a.

‘Pawi miah lo..’ ka ti ve mai. Thli a rawn thaw heuh heuha, ka sam chhawlleng a chhem leng dar dara, kan thutna bula thingkung ho thli thawin a chhem kur siau siau a. Eng emaw ti takin ka lung a leng vawng vawng.

‘A hmaa ka sawi tawh ang khan an chhungkaw sumdawnnaah eng eng emaw tel vena a neia. Lehkha a thiam a, amah hi a hmel nena inrem lo zetin a smart viau anih hmel.Mahse engkimah Main chu Sangkima vek.Bialnu a neia, Zari..Lawk,in veng a in ang.Mahse, an la ni rei lo.Kumin Feb vel atangin an ni tan chauh.Chuan,Party leh thianhoa thiltihkhawm  vel hi nuam a tih zawng a ni a. A inkhel thina, chuan Sangkima fapa nen an inngaina fal hle bawk.A inkhelh naah pawh a hruai fo.Abak chu sawitur chiam a awm lo’ a ti a. Ka bu nghauh ringawt.

‘Ka lawm ,min lo enzui sak thei angem?” ka ti hap.

‘Tehreng…Ka lo enzui ang’

‘Enge min hmuh duh chhan dang chu?”

‘Um..Kha kha,eng lo mawle..Niminah ka thian pakhat hian thilmak deuh mai a sawia.Tu emawin nangmah hi a lo chhui tira’ phawk zetin ka en vat.

‘Tu nge?”

‘Ka hre lo,a sawi lo. Ka thian tih lemah Private Detective pangngai ni loin amah hi Martial Arts lamah pawh tawn hriat nei tha tak a ni a. Mi chhui tur ni satliah loin venghim tura  an rawih thin a ni a. A sawi dan chuan enge itiha khawiah nge i awm? tih zawng zawng a hre duh veka,a chhui che a,engmah dik lohna inei bawk si lova, mak a ti deuh a. A ruaitu lah chuan thlahfal miah lo tur chein a ti bur niawm tak a ni’ a ti leh duah. Ka thaw nghal hawk thung. Tu nge ni ang? Engvangin nge min chhui ang?

‘Hmelma ka va neih hmel ve’ ka ti fan deuh raih.

‘Maithei,mahse a sawi zel dan chuan i tihsual lai chang ni loin a veng che a ang a ti..I tan ka thawk tih a hriat loh vangin chu pawh a sawi mai maia, thlalak min entir a. Nangmah ilo ni sia, min shock deuh hleka.Chuan,amah pawh kei anga chhawr a ni lo ka tih kha’ a ti leh nuah nuah.

Tu nge ni ang? Engvangin nge enthlak ka ngaih ang? Venhim ngai turin hmelma ka nei si lo.Ka neih ber lah Sangkima a ni a, ani nen inzawmna kan nei tawh bawk si lo.Zawhna hlir,min hrilhtu Ruatsaka lah hian angaihna a hre der lo zui lehnghala.

‘Achhan min hriatsak lo tum la’ alangah erawh ka ti a.

‘Um,ka lo ngaihven zui ang.

Karkhat zen zawn chu ka pi Damdawiinah a awm taa, a tha viau emaw tih laiin a tha lo leh thina, inkohkhawm rap rap tum pawh a awm ta zauh zauh.Pakhat chauh riahpuitu awm phal anih laiin kan natdan a serious  em avangin pahnih awm min phalsaka,ka nu a riak chawta, Pitei leh Ka Nutei an in riakchhawk zantin bawk. Ka nu erawh riahchhawk ve kan tum pawhin a duh bau lo.

‘Haw tawh rawh, zan lam Curfew a ni si’ ka nuin min ti a. Ka Nutei pawn haw turin min ti ve bawk.

In a ka tlan lut tur leh Sangkima nau haw tur kan intawka, karkhat lek chhungin vawi thum lai a lo kal hman tawh.  A lo kal ka hmuh apiangin ka awm a lo nuam lo ve ziah ringawt. Achhan erawh ka hre der lo thung.

Inchhung ka lut fel deuh chiah tihin Bsa’n min rawn call hlawl. Mak ti deuhin ka en a, Damdawiina kan inhmuh atang khan kan la inhmu nawn leh ta miah lo. Damdawiinah ka kal zauh zauh chungin Sangkima te pawh ka hmu nawn leh tawh chuang lo.Ka hahdam hawk dawn emaw ka tih laiin ka hahdam phah chuang miah lo.Ruatsaka’n tu emawin min chhui ru tih min hrilh atang phei kha chuan ka awm a nuam thei lova, khawiah pawh kal ila min zuitu an awm leh awm loh ka ngaihven ru kar zela. Mahse, chutiang awm ka hmu ngai miah lo thung.

Ka pick ta lo, Thutthlengah ka Bag leh Phone ka dahthlaa, Kitchen lam pan ka tuma, mahse a rawn ti leh zat. Bsa bawk..

‘Hello…’ thluk nei lo zetin ka ti mar pat.

‘I buai em?” a rawn ti ve thung.

‘Buai lutuk lo e..Enge nita?”

‘Tihbuai che hi ka duh lo a,I hriat kha..Mahse, Sangkima hi tunhnaiah kan be tlang thei miah lova’ inthlahrung awin a rawn ti a. Ka insehruh nghal vak thung. An biak tlang theih loh vangin engvangin kei min rawn zawh ngawt? Ka pasal ni loin Amber-i pasal alawm mawle.

‘Chuan…?” ari erawh chuan ka ti nghauh.

‘A rawn biak che ka ringa, emaw a lo kal em?”

‘Aih…’ ka ti tawi tak.Ka tum aiin ka aw achang hret bawk.

‘Sorry…Ni thumlai  kan be tlang thei tawh lova, a nu a mangang lutukin min rawn biaa’ a rawn ti leh a. A thaw deuh huai ri ka hre thei bawk.

‘Anih chu mawle..’ sawi tur dang hre loin ka ti leh halh ringawt. Mahse, ka chhungril erawh chuan zawhna a pai tun a. Kei min rawn biak hial angai anih chuan Bsa a mangang tawpkhawk ang tih pawh ka chiang.

‘Um..A tha tih zawng a nu a hrilha, ngaihtuah lo turin a chah bawka.Thil eng emaw buaipui a nei tih a hrilh leh tlawnga.Mahse, ni thum ngawt biak tlang theih tak loh chu a nu a manganga, kei lah engmah min hrilh lo bawka’ a rawn ti leh a. Ka mit ka chhing sawk, ka hriat duh miah loh thil engvanga min rawn hrilh nge anih ka hre thiam lo. Ani tluka kan inkar hre chiang a awm lova, a chanchin min hrilh tur anih loh zia pawh a inhre chiang lutuk tlat.

‘A lo bia che anih chuan min lo hrilh aw..Ka lawm ngawt ang’ amah bawkin a rawn ti leh a.

‘Ok,min biak ka ring lo a.Mahse, ka lo hre dawn nia’ ka ti dam thlap.

‘Anun,engmah hi i hre lo tak tak em?” a rawn ti leh a. Ka thaw deuh halh.

‘Hriat tur ka nei hleinem..Anih phawt aw’ pawisak nei lo hmel lutukin ka ti leh a.

‘Anih le…’ a ti tha ve mai.

Ka thu deuh vang vanga, Bsa nen kan inbiak lai khan ka awmdan a normal hle angin alanga, mahse kan inbiak zawh veleh ka chau nghal hnawk thei. Khawiah nge a awm ang? Engvangin nge biak tlang theih loh tura a awm ngawt? Bsa pawn a hre lo anih chuan thil dik lo a awm tih ka chiang lutuk..

Thil ka ei zawhah ka intleuh zuaia, tihtur dang awm hek lo,kawngkhar ka kalha.Mu turin Room lam ka pan a. Mahse, ka muhil dawn lo tih ka chiang ngang mai thung.Ruatsaka ka call leh ta nge nge. Sangkima awmna min lo hriatsak turin ka ngen a, nidang ang bawkin a rawn ‘aw’ leh thliam.

Ka muhil hman sek tihin inhnuai lama thil eng emaw tla ri deuh bawl thawm niawm takah ka harh nghal zawk.Thawhphan pawh nei loin ka thuchhuak nghala, mahse chhuk loin thawm ngaithlain ka thu thung.

Thil ri deuh khut khut ka hre leha, thawklehkhatah hlauhna in min rawn tuam nghal hlup.Keimah chauha ka awm tih hretu,misual emaw thil ruk tum anni ngei ang.Ka Phone ka la vata, Patea biak ka tuma.Hreptaka..Battery low lutuk a lo in Switch Off daih.Mut dawn khan ka charge emaw ka tia, Charger vit lut siin Switch ka on lo..

Khum atangin ka chhuka, Ka room kawngkhar si chetin ka beng ka dawha, pen thawm niawm tak ka hriaa. A lo hnai zel niin ka hre bawk.Ka kalh vek avangin a lo luh dawn chuan thawm a neih angai ang. Mahse, ka room hi hnung lama awm anih avangin au mah ila ka thawm Patea ten an hre kher lo thei tlat. Kawta awm nise chuan an hre mahna,mahse tunah chuan muttui vanglai tak pawh a lo ni thei a...Enge ka tih ang? Ka chemte ka hrechhuak nghal zawk.

Kawngkhar hawnna che dat dat chu ka en reng,a inlock miau avangin pawn lam atangin herh mahse a inhawng thei lo..A tawp thuta, thawm awm loin a reh nghal vawng vawng. Ka thlanfim a rawn bawl tiam tiama, thawk pawh ka thaw tha ngam lo.

‘Zo…’ Sangkima awin ring vak loin a rawn ti a. Kawngkhar a ri deuh dawta, kei erawh ka beisei loh lutuk thil thleng chuan min ti khawng vek.

Min rawn ko nawn leh thawmah ka harhchhuak deuh zawk. Kawngkhar a rawn chum a, a aw nidang ang a ni lo.Mahse, tuman ‘Zo-i’ ti hian min ko lo a, chuvangin a aw dang deuh mah se amah a ni tih ka chiang.

Tim daiin Kawngkhar ka hawnga, engpawh tihtum se vit mai thei turin Chemte ka lekchhuak sa bawk.Mahse, bang nem chungin a lo dinga, min hmuh veleh a then suk. Hamhaih zetin ka en mawl tawp thung. A rawn kal hnai hruta, a kut lehlamin a ban lehlam a a dawma, a pai deuh dawta, min rawn bawh titiha..A zawi nghal hnawk bawk.

NOTE- CLICK THEI KHAN MIN CLICK SAK LEH ULA, A THEI LO TAN INTHLAHRUNNA TUR ERAWH A AWM LO.CLICK THEI TEN AN CLICK  KEP VEK CHE U A. KA SAWI SEK AVANG HIAN KA THUPUI BER A NI TIHNA A NI LO ANIA. "A THEI TAN " TIH CHAUH AW.TIN,CHROME ATANGA LUT TAN CLICK A AWLSAM BIK TIH TE HI KAN SAWI TEL LEH ANGE.