ANNEM - 23

Chapter- 23

Hamhaih zetin ka din ngaiin ka dinga, thil thlen dan tehthut chuan min thawng lutuka, chetlak dan tur ka bo vek. ‘Zo..’ a ti sup chuan ka mang deuh mup leh chhaw hu chu min fan nghal raih raiha; min rinchhana Sangkima ding hram hram chu ka en a. Kan chen mekna khawvelah a aia chiang lehzual awm thei lo tur khawpa chiangin ka harh nghal kawk..

‘Hey…Tinge?” ka ti nghal halh. Min chhang loin a rawn hawichhuaka, ka darah a hmai a phum lehnghala.Din ngheh tumin ka kawngah a ban lehlamin min kuah tlat bawk.

Thlan sa phat khawpa ka beih hnuah khumah ka nghata,a letthla hlawl mai. Light ka on nghala, ka pan hnai leha; Ka mut that tira, a Pheikhawk ka phelhsak hnuah a T-shirt chunga a kamiz hak ka phelh leh a,mahse a ban veilam ka khawih rualin na nei tih tihhriat takin a then nghal sawk.

‘Ka lo phelh lawk ang,a na lai ka lo en ang’ ka ti a. Min chhang loin a rawn meng zawka, a mit a chhing zui lehnghal mai.

Dimtein ka phelhsaka,a kawr dahsawn tumin ka tho a, mahse ka banrekah a rawn vuan nghal vat.’ Kal suh..’ a titham tuak.A aw a ri chang chang a ni ber.

‘I kawr hi ka dahsawn anga, I na lai kha ka lo en ang’ ka ti dam thlap.

‘Engmah na ka nei lo.Mahse, ka che thei lo’ a aw a zuih ral titih.

‘Maw? I che thei lo maw?” ka ti deuh ha. Min chhang lo…

A ban na lam ka en a, engmah alang theiah hliam a awm lo.Mahse,khawih chet hlek pawn na a ti tih hriat takin a then nawk zel thung. Bsa ka ngaihtuah a, ko mai ila a that ka ring.Mahse, zan lam Curfew a ni a, chumai bakah tun ang dar 2 vel bawra inkohchhuah chu thil dik niin ka hre lo.Keima tan tak pawh zanreh lai taka mipa kan ina a lo kal hi hmu palh lo awm se thil nih dan pangngai anih loh avangin ka talbuai viau thei. Patea te emaw kan thenawmte zingah pawh lo harh palh an awm theia. Ka nu beng a thlen vaih chuan pawi zawng zawngah a pawi ber ang tih ka chiang lutuk.Mahse, Sangkima awmdanah hian enkawl a mamawh em em tih alang reng.Chumai bakah a rawn hruai loh chuan a landanah kal leh mai chi niin alang tlat lo.

‘Bsa ka ko anga,a rawn hruai thei ang che’ ka ti a. Min rawn en a, a mitmeng dul ruih maiah chuan a chau tih hairual a ni lo.

‘Ka duh lo..’zawi fiah zetin a ti sup.

‘Duhthlang turin ka ti hleinem che’ ka ti nghat. Ka tho a, Kawngkhar lam ka pan nghala. Ka chhuah veleh pawn lam atangin ka kalh nghal hmak.

Inhnuaiah ka chhukthlaa, ka Phone ka On chawpa, Battery tlem chu a lo awm hman.

‘Aw, Anun….’ Vawikhat chauh a ring hman tihin a rawn pick nghal mai! Ka call hun chang reng te pawh a ang hial mai.

‘A tlai tawh tih chu ka hriaa..Eng lo ania, tunah hian hetah a awm meka.I rawn hruai thei angem?” ka ti nghal pawp. A thaw ri hawk ka hre thei.

‘Tunah maw? Ok,ka lo kal ang’

‘Curfew hian a tibuai che angem?”

‘Aih, keini chu eng hunah pawh chhuah phalna kan nei e’ a rawn ti leh a.Nia, Doctor alawm anih.Ka thaw deuh huai mai.

‘Ka lawm ngawt ang’  ari erawh chuan ka ti nghat.

‘Keipawh ka lawm,lawk…Amah a tha em?” a rawn ti leh a.

‘Ka hre chiah lo. Na nei a anga, mahse langtheiah chuan engmah hliam ka hmu lo’

‘Ok…Ok,ka lo thleng har lovang’ a rawn ti leh nghal vat.

Bsa lo thlen hma chu inhnuai lamah ka awm ta reng,mahse ka ngaihtuahna erawh Sangkima hnenah a awm daih lawi. Ngaihven nih ka duh loh vang leh kan inkarah engmah a awm lo tih hria se ka duh avangin ka luhlulna hian min thunun hram hram tih ka hai lo. Kha lehchen ka lo tuar tawh kha a thlawna luanrual tir ka tum lo bur. Tun hi ka paltlang anih chuan Nextah engmah harsa a awm lovang.

‘Gateah ka awma’ Bsa’n a rawn ti a. Motor thawm ka ngaichang reng sia, a Motor thawm ka hre miah lo.

Gate pawnah a lo dinga, Gate sira mihring kalna tur awm ka hawnsaka,a rawn inzep lut vat. Ka hawikual thuak a,tumah ka hmu lo. In lamah kan inzui pheia, Patea te pawh an reh thap.

‘Ka Roomah a awm’ ka ti a. Kan inzui chho a..’ Motor ka hmu lova.Engtin nge ilo kal?” kal pahin ka ti a.

‘Sawlai deuhah sawn ka daha,Motor thawm a ring dawn riauin ka hriaa’ a ti awlsam et. A ngaihtuah kim lehpek.

Ka kalsan laia a mut dan ang chiahin alo la mu a, kan lut thawmah pawh a chet loh avangin a muhil anih ka ring ve ngawt.

‘Kawngkhar a rawn kika,tihian a rawn tlu lut chu animai’ ka ti sap.

‘Um..A hahdamna hmun apan ka ring renga’ a ti a,ka en vat. Min en ve loin Sangkima a lo en a. A nur deuh nung bawk.

Engmah sawi leh tawh loin a enkual nghal zung zunga, a ban a khawih chet rualin Sangkima a rawn rumchhuak nghal hawk. Bsa a en a, min rawn en leha, a hmelah mak tihna alang zawk.Mahse, a mit a chhing zui leh mai.

‘Damdawi chak deuhin an Jection anih ka ring. Lang theiah chuan hliam a awm lova, mahse Damdawi hnathawh hian a fan anih hmel’ min rawn en chungin a ti a.

‘A ruh lam turah ka lo ngaia,chuti anih chuan a tihzia hlauh chu’ ka ti halh.

‘Nia,mahse Damdawi hi enge an hman ka hre thei mai lova. Na a tihchhan chu vawikhat mai ni loin vawi hnih lai vihna hnu a awma.An vit sual anih ka ring. A taksaa damdawi hnathawh hi a reh hunah zawi muangin a pangngai leh mai ang’ a ti dam leh thlup.

‘Dude…I tha em?i ban hi ka khawih che leh dawn ania’ Sangkima hnenah a ti leh a.A rawn meng a, ‘ka tha..muhil ila a zia mai ang’ a ti zawi sup.

‘Ok…Nia, chu chu keipawh ka ngaihdan ania.Mahse, kan kal angai’

‘Tui ka duh’ Bsa sawi hre lo ang maiin a ti daih. Bsa’n min rawn en a, ka tho nghal phat.

Tui ka zuk laa, ka let chho leh vat. Ka thlen chhoh veleh ka thlitchhuah saka,Bsa’n a lo kamkang deuh tawha, harsa lutuk loin a in thei mai.Mahse, a chet zawnga ner nawk zel chu ka hmuh hmaih miah lo thung.

‘Lo hahdam rawh, Anuni nen kan inbe lawk anga. Kan rei lovang’ Bsa’n a ti a. Min rawn en a, a mitmeiin chhuak turin min rawn signala,kan chhuak nghal vat.

‘Theih se chuan hetah zanin riak mai se ka duha…’

‘Aih, a theih loh’ a sawi zawh hun pawh nghak loin ka ti vat.

‘Nia,ka hrethiam che alawm. Tunah khian Damdawi hnawthawh a reh lam a ni tawha, engtin nge a lo thlen theih zawk tih erawh ngaihtuah tham a ni..’ a ti fan raih.

‘Engpawhnise hetah chuan a awm thei lo ang’ ka ti leh hap. Ngilnei lo em em angin min ngai dawn mah se pawi ka ti lo.

‘Ka kalpui ang,mahse thil hrilh che ka duh’ hnial chi miah lova khauh zetin a ti a. Ka tehkhin dan ber chuan Doctorin a Damlo enkawl lai a bia a ang ka ti. A thianpa ang thoin a duh loh lamah chuan nawr chiam a finthlak loh ve tho tih ka hrethiam chiah bawk.

‘Sawi la…’ ka ti sap.

‘Amber-i..’

‘Aih…Ka hre duh lo’ ka ti nghal hmak.

‘I hriat a that ka ring. Sangkima hian na a tih tluk zetin nangpawh i na tih ka hria. Duhtawk teh u’ a thaw deuh huai.

‘Eng maw kan duhtawk ang? Mi pasal ni tura ka thlah ni atang khan let leh ka tum hleinem’ ka ti chang fak.

‘Mi pasal a ni lo. Amber-i lakah khan a mawhphurhna hlen a tum mai zawk.Tunah chuan a mawhphurhna ber Naute a awm tawh lova, Amber-i pawh reiloteah a chhuak ang’

‘Maw?!”  mak ti lutukin ka ti halh mai. Mak ka tihzia ka awah pawh alang thei hial bawk.

‘Fahrah siam a duh lo..Mahse, thil pakhat erawh ka hria,naute vang chauhin Amber-i kha a hruai lut. Inru angin an kala,mahse  Sangkima’n naute pian hmaa engmah bawhzui a duh lo thunga. Hmeichhe lamin neih loh an hlauh lutuk avangin hruai let leh loin tisawn a awm tlang ve tawp bawka.  A nu leh pa hnenah a duhdan tlang takin a sawipuia, midang a nunah an awm tih erawh Amber-i tan a hrehawm dawn avangin a sawi lang lo.Mahse, a nu chuan a hre tho. Amah Amber-i pawhin engvanga hruai lut nge anih a inhre ve bawka.. Mipa lerh tak angin lang mahse mipa ka hriatah chuan a fair ber.Ka thianpa anih vang ni loin ka ngaisang. A bialnu hlui a rai avang hian a khawsa uchuak tihna a ni lo,Mipa hi chu hetiang mi hi kan ni deuh vek zawk;mahse tamtak chuan mawhphurhna an la ngam lo thina. Ani hi chu a ni ve lo.Chu chu hriatpui la ka duh.Thildang zawng zawng chu engpawh nise,midang duh zawk nei chunga a bialnu hlui rai lai neih tuma rilru siam hi thil harsa lutuk a ni tih ka chiang bal.Khawtlang mit hmuhah chuan fapa pakhat nei tawh leh nupui ru a nei leh lo a ni dawn. Mahse a ni lo; a fapa nu nen an inkawp dan kha zankhat lek thil a ni a. A duh chuan a pha thei..Diktak chuan a fa anih miau loh avangin’ a tita duah. Sawi ve tur hre loin ka khap sak sak ringawt.  Ka thuhriat leh ka  awm mek dan hi atak ni loin Thawnthu emaw Movie chhunga cheng ang mai ka ni.

‘A fapa…’ ka ngawih vang vang hnuah ka tichhuak halh.

‘Aw…A fapa,mahse ama fa a ni lo. Ka sawi chhuah hmasak ber leh a tawpna tur a ni. Chu pawh a tul ngang vangin.Thuruk sawichhuaktu nih nawm lohzia i hre thiam em erawh ka hre lo’ a ti leh a. Pawi tih hmel zetin a hmai a tuai pawk.

‘Mahse…’ awmze nei miah loin ka ban ka vai kual puat.

‘A fapa hi a hrisel lova, a tet laiin thisen pek ngai khawpin a damlo a, tah chuan Sangkima hian thisen pek a tuma. An Blood group a lo in mil lova.A nu lam zawk nen an in ang emaw kan tih laiin a nu Blood group pawh a mil chuang lo. A awmziaah chuan a fa ni lo kha a fa angin an puh tihna’ a ti leh a. Ka thaw tha hleithei lo..A pa anna reng reng nei lo,mipa naupang ria thel thawl kha ka mitthlaah a lo lang nghal zat.

‘Ka…Ni lo,engmah hriat belh ka duh tawh lo’ ka ti tawl. Anih loh chuan ka chhungril buai lutuk hi ka puakkeh mai ang tih ka hlau.

‘A fapa chungchang hi kei leh Sangkima bakah a hringtu nu chauh hretu kan ni a. Tunah chuan nang nen pali kan nita tihna anih chu’

‘Engvangin nge min hrilh? Hriat ka duh lova, ka zawt hek lo che’ ka ti sap. Za lo zetin a then sak.

‘Ka thianpa chhungril hi tlem tal hriat pui la, a mamawhna che hi huatnaa chhang let lo tura ka duh vang chein’ a dar a tichhing ak.

‘A tawp tawh ka tih kha,bul tan leh ka duh tawh lo’

‘Engmah ala tawp lo..Anun,I hriat kha’ a ti dam leh thlup. Chhang loin ka hrawk ro halh tihnawng turin ka chil ka lem a, chil lem hi tiang em em hian a harsa tih ka lo hre ngai lo.

‘Kalpui tawh la’ ka tita ngawt.

‘Ok..Nia, kan kal ang.Chuan,ka lawm tih ka sawi nawn leh ang’ a ti leh a. Nelawm takin a nui leh suk.

Khumah ka thu a, ka khupah ka khabe ka nghata, ka chawmawlh vel vek. An kal hnu atang khan ngaihtuahna hman ka tum ngial pawhin ka beidawng thak. Ka thluak a chawmawlh veka, ka beng hi Bsa thilsawi khan a khat mup mup nimaiin ka hre bawk.’Sangkima fapa a ni lo,a hretu chu kei leh Sangkima bakah a hringtu nu leh nang’ …Engmah hi ka man thiam tawh lo.Mahse, ka hriat Sangkima, mipa zawng zawnga mipa nihna hlenchhuak chiang ber tu ni a ka ngaih kha a lo ni tak tak. A fapa tak tak a ni emaw ni lo emaw,atan chuan Fapa a ni a, a tawk.Chu chu kei ngei pawhin atakin ka hmu tawh. Amaha takna leh nghehna awm  haider theih a ni lo,amah hian chhuang takin tilang lo mah se amah hnaihtu apiang hian an hrechiang dawn a lo ni.Um, na taka min siam lai pawh khan chu chu ka hmuh hmaih hauh lo anih kha.

 ‘A chhungril hriatpui la, a mamawhna che hi huatnaa chhang let lo turin ka duh che’ ka beng ka hup a. Ni e, min mamawh tih ka hai hauh lo. Kei pawn ka mamawh. Ka nun tikimtu a ni tlat.Mahse, enge ka tih chuan ang? Amber-i awm lo pawh nise kan inkar hi engtikahmah a pangngai ve ngai dawn lo tih ka hria.Buaina hi kan ta a ni zel dawn. Tunah hian ka kaltir hlen thei anih phawt chuan ka nun hi a chanve hmawk a kim dawn lo tih hre mah ila Inhmangaih leh induh tawn tura chunglam ruat kan ni lo.

‘I va nawm loh hmel ve’ min en ran chungin Lawmi’n a ti a.

‘Nuam e, ti nge?”

‘Ka hre lo..I nguai,I mood a uih bawk’

‘I ngaihdan anih chu a’ ka ti nghauh.

‘A ni lo bawk’

‘I ninawm’ ka ti leh hlak.

‘Ka hrechiang ve che e lawm..’

‘E…’

‘Ih maw. .i thil ngainat lutuk kha ei miah lova i chawkkawi mai mai khan thil dik tawk lo awm a tilang fiah vek aw. Mahse, achhan ka zawt lui lo che ania’ thutak zawkin a ti a. Ka hmaa eitur inchhawp ka en vat. A sawi ang ngeiin tihtham ka ei lo,ka chawkkual vel mai mai.

‘Ka mu tha lo thina, ka chau bawka’ ka ti halh.

‘Ka ring, I Dark circle a lian em mai. I pi enge a an a?” a ti leh a. ‘A tha animai.Mahse, hriatthiam a har’

‘Thinrim suh aw..Thil tamtak zep nei tun ang hian ka hria che.Amak lutuk,tun hnaiah pawh a ni lo.A rei tawh mai’ a ti leh a. Ka melh zawka, chik fahranin min lo melh kawr.

‘Ka zep tun mai’ ka nui a. A nui ve der lo. Kan naupanlai atanga inkawm,inhrechiang lutuk kan ni a.Kan Mood atang leh ka hawiher atang hian thil tamtak kan inman tawn tawh tlata.Ka awmdanah rinhlelh a lo nei hi mak ka ti lo.

‘Ka uang anih kha..Ka u leh ka pa awm loh hnuah hian ngaiawh a harsa em atinni’ ka ti nghauh. ‘Ka hrethiam che ti ila ka hrethiam phak lo ang che.Mahse, ka dem lo che ania…Chuan,Mala hi’ atihzawm leh daih.A mitmeng de sawr sawrah chuan min chhaih zui turin a inpeih at tih ka hrethiam.

‘Enge?”

‘Nih pui ve mai la’

‘I hmelchhia’ ka ti hmak.Za zetin a nui zui awr awra,tihngaihna hre loin ka nui ve ta ngawt.

‘I duh loh chhan ka hre chak tak tak,kei ni ila kan Yes nasat dawn pingling nen’ a ti leh a.

‘Ka hre bik lo,a fel a..A puitling bawka.Aaaa ,ka hre lo’ thutak zetin ka ti hap.

‘Tu emaw kalsan harsa ti em em i ang thin; mahse chutiang an awm lo tih kei aia hrechiang an awm der si lo.Engpawhnise lungngai lo phawt ang aw’ min rawn kuaha, a nui a.Ka nui ve hak.Mahse, ka chhungrilah erawh Sangkima  vang a ni tih ka chianga, ka bula thu mek hi ka Best a ni a. Engmah ka hrilh miah lo hi bum anga inngaih loh ka tum lui hram hram bawk.

Sangkima kan in a a lo kal atangin kar a liam leh tawh.A that leh that loh hriat chak em em mah ila ka zawt lo.Amah emaw Bsa pawh biak tumna ka nei lo. Ka hmasawnna hi tuman min hriatpui lo mah se hnungtawlh zawnga kal ka tum lo.Tihsual nei miah lo mah se thil theih loh tur anih tlat avangin Beiseina atthlak insiamsak ka duh tawh lo. Achang chuan zanah a lo kal leh mai ka ring thina, ka harh veleh min kuah chunga a lo muthilh leh mai te ka ring thin.Mahse, a reh vang vanga,lo kal chu sawi loh Phone pawhin min rawn be lo. Kan tawp tawha, bul tan that leh ka duh lo tih ka chiang em em chungin,a reh vang vang thawm hi ka nunah hian a ring mah maha, ka thawveng chuang miah lo bawk.

Lock Down thawh thumna a zova, thawh lina kan hmang leh tan taa. Mahse, thil danglam tehchiam a awm lo. Phai lama Mizo tangkhang mek te hruai kir tura hmalak zel a ni a. Mi hausa leh rethei thliar loin Sawrkarin nasa takin hma a laa, a lo haw apiang khung hranna turin Aizawl khawpui chhunga Kohhran  Hall remchang hman an dila, an phalsak fur tawh bawk. Mahse, Mizo hi hnam inlungrual leh tlawmngai kan nihna phenah  phunchiar leh buaithlak,Social media vela huaisar taka au thin kan ni tel tlat. Lo haw a, mahni ram lo thlen pawh a lawmawm tawk tawh tehlul nen, Sawrkar ti luhai zawngin ei leh in chungchangah pawh lawm mai lova phun nawi tawk an awm lehzel mai.Mipui lah a sawi thiam thiam lamah kan thle dual duala;milar kan neih te lah kan hnampui tangkhang te ngaihtuah anga lang siin,mahni chana engmah dah thiam lova tawngvai niawm taka duh duh sawi mai mai pawl an awm ve zel bawk. Hnam tlemte,eng emaw changa lungrual tak nisi,achanga kan hmuhsit zawng hnam te pawh tluk lo khawpa thil te tham buaipuia ri hluai thin kan ni leh lawi.

Ka nu a rimtawng deuh avangin a duh mang lo chung Ina riak turin an nawr a, ka hruai haw thei hram.Zan khat a rawn riaka,a tukah Damdawiinah a let leha..Vanneihthlak takin ka luh ve an lo phal miala. Ka awm ve ta reng. Ka pi a muhil deuh chawrh chawrha, a harh chhunah pawh a vai deuh riaia,a ban a phar a phar a. Harh tha niawm takin a phun leh thina.Bia ila min chhang chuang miah lo thung.

Damdawiin atanga ka haw hnu lawkah ka pi a tha lo tih sawiin min rawn ko lehnghala. Ka tlan let leha, ka thlen hnu lawkah midang an lo thleng ve nghal a. Mahse, awm teuh phal anih loh avangin pawn lamah kan thu thap. Nidangah pawh hetiang chuk chuk hi kan neih fo avangin a that leh mai kan beisei hlawm. Mahse, rin loh takin reipawh kan thut hmain a boral tih an rawn sawi ta thut.Ka tho nghal suau mai.

 An awmna veng YMA te Dan siam angin lumen a ni anga, atuk zing dar 7ah kan vui dawn thung. Kan chhungkaw ho bak chu an veng YMA hruaitu te anni leh maia. Thenawm hnaite pawh kal phal a ni lo. Ka beisei loh zetin Malsawma a rawn lang hlawl. Ruang bulah ka nu nen kan thu a, ka nu mittui tla fap fap reng mai chu ka en a, ka lainat.Nikum lawkah ka pa leh ka u a suna,tunah a hringtu nu a sun leha. Nu chak tak ni lo pheise chuan a tlusawp rawp hian ka ring hial.Mahse, midang ni loin ka nu a ni a. Unau zinga upa ber anih angin buai miah loin ro a rel fel vek.

‘Ka mu dawn.Mala,naktukah chuan Mambawihi nen va kal ula..I hman em?” ka nuin thawhchhuah pahin a ti a. Ka pi boral atangin ni thum aliam tawha.Ka pi te in lamah kan awm deuh chawta, zan erawh ka nu chauh a riak. A lo haw zan anih avangin ka pi leh pu bakah Patea te nupa an lo lenga, mahse rei an awm lo thung.

‘Hman ang. Vawiinah hna ka zo thawkhata’ Mala’n a ti awlsam mai.

‘Anih chuan athat nasat chu. Leng reng rawh,nang chu zanah kalchhuah i harsat loh kha’ a ti leh a. ‘ Harsat ve tho e. Ka chhuak mang lo zawka,mahse zanin chu lo kal ka duha,Duty te ka rawn be ve thlap’ nui chungin a ti a.

‘Aaa, I thei bik reng reng.Mangtha phawt’ ka nuin a ti leh a.

Eng eng emaw sawiin kan ti ti a, Thingpui ka lumsak leh bawk. Kan inkar hi a hma anga nuam kha chu a nita lo tih kan hai lo  ve ve a, kan inveng thawn tawn run nimaiin ka hre bawk.

‘Thil pakhat…’ thutak angreng fein a ti a, sawi zawm loin a ngawi leh daih.

‘Eng?” ka ti satliah.

‘I hria em ka hre lova.Zari leh Rohlua an inngaizawng tih ka hriaa..Eee,Sangkima nau kha’

‘Chuan…?” ka lungphu rang zaih zaih chu a hriat ka hlau ngang mai. Engvanga hlauthawng em em nge ka nih erawh ka inhre bik lo.

‘I nu hian hre ta se kan buai nuai angem ka lo ti mai mai’ a ti leh sup.Chik zetin min en reng tih ka hriat avangin ka awmdanah danglam a awm ka hlau zek zek.

‘Ka hre lo le..Mahse, enteh..Ka u Boralna thilah khan tel vena a nei tak tak angem?” ka ti sap.

‘Tinge? Kan chiang ve ve emaw ka lo tia sin’ a ti mar ut.

‘Ka chiang emaw ka tia, ka chiang ta lo.Fiahna kan hmu thei miah lo hi mak ka ti tlat’ pangngai takin ka ti leh hap.A mitmeng fing lutuk pumpelh tumin Tv lam ka en lui tlat bawk.

‘Keiman ka nei maithei ania..’

‘Maw?” ka inveng hman lo.

‘Um,ka nei maithei..Mahse, engkimah hian i remtihna ka mamawh’ a ti leh a.

‘Engvangin maw? ka nu khan i kutah a dah kha’ ka aw a khur lo chauh.

‘Ka hria,mahse nang hian chhungkuaah min pawm em tih ka hriat hma chuan chet ka la thei lo’ a ti leh a. Ka chhang lo,chhan dan tur pawh ka hre lo hrim hrim. Chet ala anih vaih chuan Sangkima hi a him rei dawn miah lo,a chhe vek kher lo ang.Mahse, tuartir ka duh lo bur.

‘Zari chu ka lo sawipui chhin hrim hrim dawn mi?” ka ngawih ren rawn hnuah ka tichhuak halh.

‘Aih, angai lo..Ka lo buaipui ang’

‘Engtin maw? ‘

‘Min ring tawp mai rawh,engmah pawi a thleng lovang’

Karkhat a liama, Zari leh Rohlua an inthen fel der. Engthil nge Malsawma’n a tih ka hre lo.Mahse, Mite-i sawi hmangah an inthen chiang viau anih hmel. Eng hmanrua nge a hman ka zawt lo.Mahse, tel vena a nei tih erawh ka hming ka hriatchian tluk zetin ka hre chiang tho.A hma aia nasa zawkin Sangkima tan ka hlauthawng lehzual sauh bawk.

‘Zonunmawi…Rawn chhuak nghal teh’ Bathroom kawngkha bul mai atangin ka nuin a rawn ti vak. Ka phu zawk thung.

‘Ka zo tep’ ka ti a, ka hming puma min koh hi chuan thil hmanhmawhthlak a ni thin tih ka hriaa,mahse ka la phuan vel vek.

‘Aih, tunah…Hmanhmawh rawh’ a ti leh a. A aw a ring tawh lo a, mahse tuna a tawngdan ki kha chu ka naupanlai atangin ka hrethiam vek tawh;ka nu thinrimin a vawrtawp a thleng mek tihna..Mahse tinge tunah a thinrim ang? Zari ka ngaihtuah chhuak nghala..A tawp tawh bawk si.

Khumah ngil auhin a lo thu a, a bawp a khawkherh bawk.’ Enge a?” ka ti a,ka lu ka hru pah mawlh mawlh.

‘Hei hi enge?” tih pahin a phone a rawn lek chhuaka. Ka laksaka, mahse ka thil zuk hmuh chuan min thawng lutuka,Phone ka thlauh bawl mai.

 Bsa nen Sangkima Motora kan dah lut lai a ni a, kan hmel a langchiang lutuka, phat ngaihna a awm lo. Mahse, engtin nge a neih theih? Khami zan khan tumah an awm hnai si lo.

‘Sawifiahna ka duh,achhan a tha tawk tur a ni’ a ti chang fak.

‘Ka…Eng lo..’ ka ti bah nawk nawk.

‘Ka fapa chunga kut lektu kha zan laiah ka inah a lo luta, him takin a chhuak leha..’ a rawn dingchhuaka.

‘Ni lo…’ ka ti leh sep.Ka aw a zawi lutuka,a hre phak em ka hre lo.

’ Keiman ka sawifiah thei ang’ Mipa awin a rawn ti a, kan hawi rual nghal thawt.Amah en kher lo pawhin tu nge anih ka hria…Mahse, ani hian engtin nge a sawifiah tehlul ang???

Note: Fakna milen hmet leh siau siau ang aw🤭