ANNEM - 24

Chapter- 24

‘Nu Mam,ka lo sawifiah ang.Anuni thiam loh engmah a awm lo’ a ti nawn leha, min en loin ka nu a en a. Tih tur hre loin ka ding tlawn at ringawt.

‘Nang maw? enge i sawi anga? Ka fanu ka be mek anih hi. Inhnuaiah min lo nghak mai ta che’ Khauh lutukin ka nuin a ti hmak.Mahse, a tawngkam chhuak khauh zet chu ngaipawimawh lo hmel zetin a dinna ngaiah ala ding reng.

‘Min hrethiam rawh. In buaina bul tak chu ka hre lo maitheia,mahse hei hi keipawn ka dawnga. Mahse, thil thleng hi ka hriatsa vek avangin mak ka ti ve lo’ inringtawk lutukin Malsawma’n a ti leh ta tlat. Mak ti lutukin a rawn kal phei chu ka en a, enge ani hian a lo hriat ve ngawt ang le?

Ka nu lamah a phone a pe a. Ka nuin a thlek zawka,min rawn en nghal a; ka ip leh chawih. Ka nu thinrim hi naupang ka nih lai atanga tun thlengin ka hlauh dan ala ngai reng.Ka nu anih tlat avangin ka hlau hi amak hek lo. A thinrim satliah leh a tawngkam vin bak hlak hi chu ka hlau bik lo. Mahse, tun anga a awm hi chuan kei chang lo ka unaute pawh khan an hlau ve vek.

‘Sawifiah rawh u’ a ti leh hmak.

‘Ka….’ Ka tawng thui hmain Malsawma bawkin min rawn tawng khalh leh hmiah.

‘Keiman ka lo sawi ang. Zanah inah hian alo kala. Thil pawi a thlen hmain ka nauten an hmu a, damdawiin lamah i buai avang leh pawi lutuk a thlen chuang loh avangin engmah kan hrilh ta lo mai che anih kha..Chuan,he photo hi chu amah Sangkima te hian in nufa inkar tihbuai nana an rawn hman mai mai anih ka ring’  a awki hniam leh dam thlap maiah chuan rinhlelh tur lai a awm lo. Thil thlen dan a ni miah lo tih ka hre chung pawhin ka awih ve titih thei hial!!

Ka dinna ngaiah ka ding a, ka kut ka hum kawp tlat. Malsawma dawt chiang lutuk sawi chuan min chhanhim dawn tih ka nu hmel landan inthlak mek atang chuan ka hre nghal vek.Mahse, engvangin nge dawt a sawi ngawt? Min chhan duh vang pawh  lo nise kan buaina tak engtin nge a hriat? A phoneah pawh an thawn tih a sawia? Tu nge nita ang? A sawi ang tak tak khan ka nu nen kan inkar tibuai turin Sangkima hian chet ala ta a ni mai angem?khami zan khan tuin nge thla lo la ang? Kan pathum chauh kan ni a, midang an awm pawh ka hre si lo..Mahse, an la ngei.Tu nge ? zawhna,chhanna awm si lo hian ka thluak a ti na ngut ngut.

‘Engkim min hrilh tur ania,anih loh chuan ka ringhlel khaw lo mai dawn a’ ka nuin a ti a. A aw a nem ta deuh.

‘Nia, angaihtuah vang che ania.Lo hrilh vek che ila tha tur ania’ Malsawma’n a ti leh a. A nui zui suka, a awmdan vel chuan min ti hamhaih a, sawi ve tur reng reng hre loin mi a ang maiin ka awm mawl tawpa.Malsawma lahin min en duh miah lo bawk.

‘Inthlak rawh.Inhnuaiah lo chhuk ang che’ ka nuin ram hmakin a ti leh a. Ka bu ringawt. Malsawma nen an inzui chhuaka, kawngka bulah Malsawma a ding chut a. Min rawn en a, a kutin hahdam turin min rawn signal a, ka en mawl tawp.

An chhuah veleh khup sai dar dar chungin khum ka pana, ka thu thla nghal hnawk. Thil thleng kha a rang mah maha, mahse chuvanga hlauthawng ka ni lo tih ka hria. A thleng rang emaw rang lo emaw,eng hun pawh nise ka hlauthawng dawn tho tho. Mahse, tu nge ka nu kha thawn ang?Malsawma pawh khan an thawn tih a sawi ve tho. Engvangin nge ani an thawn ve ngawt? Tuna min hum tura a rawn chet dan lah kha ala mak lehzual cheu bawk.

Ka inhak zawh hnuah ka chhuk thlaa, ka nu leh Malsawma muk hmel zetin an lo titia, ka pen thawm hriaiin an rawn hawi dun vat. Mahse, ka nuin a sawi ngai a sawi zawm leh mai.

‘Nia,ka sawi tawh kha.Helai velah hian an hmu leh thina,mak ka tih deuh avangin en zui tur ka daha’ Malsawma’n a ti a. Min rawn en a, a nui suk.Kei erawh ka tirilah min fan laklawha, engkim mai chuan min ti hlauthawng em em vek.

‘A that hlauh chu,engtia hmalak chi nge niang? Police hnenah in lo pe lo chu a pawi ta a ni’ ka nuin a ti leh a.

‘Pe lo,kha aia chance tha zawk kha kan neih leh mai ka beiseia.Bakaha, Thianpa chunga thil thleng zawng zawng kha fiah taka hriat ka duh avangin a zalen rih angai’ Malsawma’n inringtawk zetin a ti leh a.Ka nuin pawmpui fahranin a bu nghauh nghauha.Kei erawh chuan sawi ve tur ka hre lo tluang zel.

Nutei a rawn luta, ka nu hnenah a thlai tiak ho enpui turin a rawn sawma, an inzui chhuaka. An chhuah hnuah Malsawma nen engmah sawi loin kan thu ren rawn.Kan ngaihtuahna ve ve kan kawma, kan ngaihtuahna erawh a inhlat vakin ka ring lo.

‘Tinge?”

‘Thil thleng kha…’ kan tawng rual thawt. Tihngaihna hre loin ka nui nghal hak,ani pawh a nui ve huk bawk.

‘Sawi hmasa rawh’

‘Aih..Sawi hmasa zawk rawh,zawhna i ngah tih ka hria’ a ti dam thluam. Nia, ka ngah lutuk tlat.

‘Ih…I thil tih kha mak ka lo tia.Thil thlen laia awm ang mai khan i sawi a’ ka ti halh.Ka hmui hnuai lam ka pet zui nauh nauh bawk.

‘Nia..Ka awm ve lo nangin ka hria alawm.I nu khan a hmuh rualin ngaihdan a siam dawn tih pawh,ka rin ang ngeiin a lo thleng bawka’ za lo fahranin a then leh a.

‘Diktak chuan khami zan khan kawngkhar a rawn kika,a rawn tlu lut tawp mai. A zawi veka,chuan a hnuah a thianpa-in a rawn hruai a;lo call che ka duh a, mahse ka hamhaih lutuka’ inringtawk taka sawi ka tum nangin ka aw khur deuh chu a hriat tho ka ring.

‘Min rawn call la tha tur ania.Mahse, I ngaihtuah naah ka awm hrim hrim pawh chu a lawmawm’

‘Ka hamhaih veka, bakah min tihnat tum pawh a ang lo.Amah kha a zawi veka,a lo tlu lut tawp animai’ ka ti leh a.Ka kuttin ka sik nauh nauh.

‘Amak hle mai.Helaiah lo pawh tluk luhna tur a tam tehreng nen. Mahse, ka sawi kha..I nu nen in inkar tihchhiat tumna pawh a ni theia. Ka nau pakhat hian a enzui viaua.Mahse, khami zan berkher kha chu a hmu tlat lo a’ a ti leh duah. A sawi zawhah a tho a, ka thutnaah a rawn thu phei ve a. Tho nghal ngawt lo turin ka insum tang tang.

‘Min ringhlel lo tihna mi?”

‘Engvangin nge ka rinhhlelh ang che? ‘

‘Ka hre lo..Mahse, ka nu ang bawk khan ngaihdan i siam ve thei renga. Min humhim ta daih sia’ ka ti leh niah niah.

‘Rinhlelh che ka duh hleinem.Bakah,chutiang khawpa hmeichhe mawl leh ngaihtuah tawi ini lo bawka’ a ti fan leh ruih.

‘A landanah kha chuan hriatfiah tum pawh ngai lova ngaihdan siam mai a awlsam dawn em a.Min ring thei hi amak’ ka ti leh sap.

‘Um,a dik reng,I nu pawh a demawm lem lo;mahse,kei chu ngaihdan siam hmaa fiahna zawng hmasa thin ka ni tlat..Chuan,I hriat tur erawh chu i him lo,I nu hi chu an tum ve tak tak hek lo. ‘

‘Maw? ‘ ka ti hap.

‘Helai velah an hmu ka tih atang khan ka enzui tir renga, atirah chuan nangmah nen inzawmna innei emaw ka ti hman hial.Mahse, kan nau khan chutiang lam hawiin rinhlelhna tur che a hmu lo.Chuvang takin nangmah hi an beih tur ber niin i him ta lova, achhan chu i thil lo tih tawh te vang khan; chuan,venhim che ka duh a’ a ti leh a. Ka kut a rawn vuana,ka insangmar nghal vak. Sangkima’n ‘ka venghim ang che’ atih lai kha tun lawka mi ang maiin ka bengah a rawn ri a, ka lu ka thing nak. Maslawma ka en a, a sawi mai ni loin a hmelah pawh min ringhlel hmel a pu lo. Mahse Ruatsaka’n a thianpa min zui tu atih kha tu tana thawk nge anih ka hrethiam ta vek bawk. Atthlak em emin Sangkima tih zawk nise ka tih ka ngaihtuah leh zauh.

‘Thlahfal che ka tum lo a..Mahse, I duhthlanna a pawimawha’ ka ngawihreng vang nge a rawn tichhuak leh a; ka thaw nghal halh..

‘Nia..ih..ka hriaa,ni lo..Ka him lo maitheia..Mahse, buaina thlen che ka duh lo’ ka ti bah nawk nawk.Ka kut a vawn lai laksawn ka tuma, mahse a hum nghet sauh. Ka melh zawka, chiang zetin min lo en reng.A mitmu buang thak leh fing zet chu hawisawn tawh loin ka en lui ve ran mai..

‘Min ring rawh,ka nawr lo ang che ka tih kha, mahse min nghah rei tir lutuk lo la..’ a ti leh sup. A sawi tum ka hria, atir atanga tun thlengin ka chhanna ala ngai reng tih pawh ka hria. Nia, atir phat atang khan Sangkima bakin ka nunah hmun an luah ngai dawn lo tih ka chiang miau a.

A rawn kun hnai thuta, ka hmui sirah a rawn fawp thawi thuaka,ka thu mar nghal auh. Mahse, a inlahrang lehnghal vata, ka kut a vawnna a thlah nghal bawk.

‘Thil pakhat hrilh che ka duh,I nu erawh chuan hre lo se..Rosangkima hian nang leh i nu tan chauh pawi a khawih lo. Ka eizawnnah pawh min khawih tela, buaina min siamsak ve a’

‘Maw? tinge?” ka ti nghal vat.

‘A tih chhan ka hre hauh lo mai. A nei tamtawk tawh hle chungin ala duhtawk lo animai. Sihphirah hian huan pakhat lei tumin ka dawra, ka dawr laklawh laiin ka dawrna aia sangin a lo leifel a. A pawi lo,ka chang lo animai.Mahse, Petrol pump siam phalna hmu,siam leh thei si lo an awma. Location pawh Aizawlah chuan duhthusam a ni.Ka hriat veleh an run theih loh chuan run pui tur in ka biaa. Mahse, chu pawh min lo lakkhalh leh a. Thil lian tham lutuk leh chan tehchiam chu ka ni lo.Ngai ka awh reng tho a’ a tita duah. Kei erawh min thawng ngang mai thung. Sihphira a huan kha Lock down hma lawka a lei tih ka hriaa. Thildang chu ka hre lo. Mahse, engvangin nge Malsawma nena indawr lai kher chu a lo chuhbuai ka hrethiam ta hauh lo.

‘Kan tana bei ni loin i pawi a lo sawi ve vanga hua ini tih sawi i tumin ka hria’ ka ngaihtuahna ka sawichhuak nghal pawp.

‘Um,adik a a dik lo bawk. I u kha ka peng lehlam a ni a, a thihnaah khan ka naa, thihnaah chuan tumah dem thei ka ni lo tih ka hria. Mahse, kha thih naah khan tel ve an awm tih ka hriat rualin hremna pek hi ka tihturah ka ngai.Chuan,ka pawi a sawi lui leh kher hi min cho hleah ka ngai bawka. Amah tichhe tur hian tihchhan pahnih ka nei tihna anih chu’ a ti chang fuk.

‘ A mak hle mai…’ sawi mai tur hre loin ka ti hap.

‘Nia, i rilru a nuam deuh thei tawh em ang chu. I luhlulna khan ka telve a phal tlat si lova.Mahse, tihchhiat duhna chhan ka mimal takin ka nei tih i hre tawha, kan thawk dun thei tawhin ka ring.Chuti ni lo se chuan ka hrilh kher che angai lo a’ a sawi zawh rualin a nui a, mahse a mitah erawh ka la hmuh ngai loh ka hmu thung.

‘Engtin nge tih i tum?”

‘Partner kan ni em?” a ti leh tlat.

‘Ka lo ngaihtuah ang…’

‘Ok,anih chuan i ngaihtuah fel hunah ka tihtur ka hrilh ang che’

‘Min ring lo anih chuan Partner kan ni thei nang’ ka ti hmak.

‘Ka ring che tih i hriat kha, mahse, hei chu mimal thil piah lam a ni a…’ a then leh suk. Za miah loin ka nui ve sak bawk.

Muhil thei loin ka inlet seka,ka mit a thial urh tawh bawk. Kha zana thil thleng leh Sangkima nena kan chungchang zawng zawng Malsawma khan a hrechhuak emaw ka ti hmana,mahse a lo ni lo. A enthla ngeia, chu erawh kan tawp hnu atang chauh a nih hmel. Hria se chuan min humhim a tum lo ang.Bakah,thawhpui atan min sawm lovanga, Sangkima a huat chhan pawh min hrilh lo bawk ang.

Ka phone ka hmet enga, Sangkima number ka en vang vang. Biak ka duh,mahse enge ka sawi ang? Malsawma’n tihtak zetin a bei dawn che a,fimkhur rawh ka ti mai dawn nge ni ang? Malsawma tan a fair lo chiang bal,min chhanhim tu a nia, min ring thlap bawk. Mahse, ani a ni emaw midang pawh nise tuman Sangkima an tihnat ka phal thei ngai lovang.

‘Ka be duh che’ …SEND…ka rilru ka thlak hmaa ka ti anih loh chuan ka ti lo tlang dawn chiang. Phatsantu ka ni anih pawhin a pawi lo. A thi tih hriat emaw mi zawng zawngin a chanchin chhe zawng an sawi huna ka inthiam loh ai chuan tunah hian vawikhat chauh ka hmu anga, Next erawh a awm lovang.

Darkar chanve lai a liam leh hnuah pawh msg a la en lo cheu,a Online vu tho si; Delete leh mai ka chaka,mahse tihsual palh vang pawh nil ova msg Delete leh zuk zuk ching hi thil mawi lo tak niin ka hre ve tlat. Msg ka thawna, biak ka tum ngeia,chuti chunga a en loh vanga ka Delete leh anih chuan ka inti hlu lo zo vek thei.

Zing ka harh veleh ka phone ka en nghala, a lo la read chuang lo fo. Hrep taka,tunah chuan engmah thiam lohna ka nei tawh lo. Warning pek tum ka ni a, angaipawimawh lo anih chuan a thu a nimai.

‘Hei hi i Pu va pe rawh,tunah a ei nghal duh’ ka nuin min hmuh veleh a lo ti a, Damdawi bur ka kutah a rawn hmehbel nghal nawk nawk.

Ka pute in a ka lut tur leh hmanhmawh zeta Zari rawn chhuak tur chiah kan intawka, min en loin min kal pel zui nghal mai. Inchhungah ka luta, Mite-i amahin Dinning Table kilin a lo thu a, a hmelah chuan a thawhna ala rei bik lo tih a hriat theih.

‘Khawnge ka pu?” ka ti a.

‘Roomah..Enge a?” a ti a, ka thil ken en chungin a ham zui bai bai.

‘Damdawi aniang.Ka nuin a ei nghal duh atia,ka va pe ange’ ka ti a. A tawng leh pawh nghak lem loin ka pute room lam ka pan phei nghala, nidang ang bawkin tukverh bula thu chungin Vanglaini a lo chhiara, ka pi erawh khum phah a lo pawt mar mek thung.

‘Hei Damdawi..’

‘Ee,athat kha.I pu kha chhin khat lo eitir nghal teh,niminah i Patea te ka chaha,an theihnghilh aa’ Ka piin a lo ti vat.  Ka pu Damdawi ka pe a, rei awm loin ka chhuahsan lehnghal mai. Mite-i amahin alo la thu a,midang an awm lo.

‘Khawnge i u kha a kal dawna? A va hmanhmawh em em’ ka ti satliah. Rohlua nen an inthen hnuah ka hmu ngai mang lova,a la rei lo hle nangin a tuar ve viau pawh a nimahna.Engvanga inthen nge annih erawh ka hre ta lova, ka buaina tur ni a ka hriat loh avangin ka zawt lo hrim hrim.Malsawma pawh ka zawt chuang lo.

‘Eng lo…’ a ti a, sawi zawm loin midang awm leh awm loh a thlek kual vat vat. A awmdan chuan ka awm a tinuam lo ve ringawt lehnghala.

‘U Rohlua kha nizanah a accident an ti a,tukinah an hmu chauh zui a..A hriat veleh a insiama,a kal nghal anih kha’ a ti se se. A thilsawi chuan min ti phu deuh zawka, mahse ka inthunun leh vat.

‘Ehe!! Ava zia lo ve. .Mahse, an inthen tawh ni lawmni?” zawitein ka ti ve a.

‘Um,then..Mahse, a lo be reng zela,ka u in a chhan duh loh pawn a lo call tlut tlut zel tho’ a ti leh sap.

‘Aaaa,a accident chu anat vak loh beisei ila..An tha leh mai ang’ ka chhungril letling thawkin ka sawi a, ka nui lui var var bawk.

‘Nia, na vak lo se ka ti.Mahse, inthen daih se ka ti,a hmelchhe si.A hmel khan ka pawi a sawi’ inthiam leh lo niawm takin a sawi zawh rualin a lei a chhuah zauh.Insum hman loin ka nui ve hak mai.

‘Ka va phei ange’ tih pahin kawngkhar lam ka pan nghala, mahse min koh leh avangin ka ding leh rih.

‘Um,enge?” ka en a.

‘U Rohlua u kha amah kha tiraw? “ a mitmeng pawisawi lo lutukin min melh kiau bawk. Chhan mai dan tur ka hre lo.

‘Tu?” ka hrawk ro ta halh vangin ka khuh zui khauh.

‘Amah kha..Tu nge kha? Um..Sangzual,ni lo…Sangkima.A dik em?” a ti leh a.

‘Sangkima maw? hmana min hmuh tuma lo kal kha’ pehhel takin ka ti ban chat.

‘Aw, ka phone atang pawhin a lo biak che kha,ka stalk na atangin ka hmu a, u Rohlua nen chuan an in ang lo bawn tawp.Mahse, unau an lo ni renga,I van zep thei’ a ti leh siam siam.

‘Ka zep lo,unau anni tih ka hre bik lo a.Bakah,ka bialpa a ni lo’ ka nui lui sak.

‘Awihawm lo hem maia’ a ner deuh nang.

‘Ania lawm..Kan ni lo,kan Gym ho thina, chuta tang chuan kan inhriaa, Ampuia thianpa anih kha’ ka rilrua lo lang apiang ka sawi nghal pawp pawp.

‘Naa,ka awih chuang lo e a.Amah pawn a sawi vek a’

‘Eng maw? ‘ rang lutukin ka ti a,a mengphak deuh ak.

‘A bialnu ini tih mawle..In intih thinrim vangin Phone i pick duh lo tih pawh a sawia,chuvang alawm ka phone atangin ka lo biaktir leh che. Chuan,a lo biak lai che pawh khan ka awm ve reng. Engtin nge kha aw? Eee,ka hre leh si..I lo haw hun tur sawi rawh,anih loh chuan ka lo kal ang tih vel kha…’ chimawm zetin a nui a, a mitmeng pawisawi lo zet chu a de sar sar bawk.

‘Enteh…’ ka tawng zawm hmain ka nuin min rawn au a, ka thle bak. ‘Nakinah kan sawi dawn nia. Mahse, nang leh kei chiahin kan hria. Tunah phei chuan kan inthen tawh.Chuvangin sawi chhuah awih loh’ tlawn titihin ka ti a. Nghal zetin a ner nanga, mahse a bu ta zauh.

Chaw kan eikham hnuah muangchangin ka insiama,ka nu nen Dawr thar lamah kan kal dawna. Malsawma lo telve ngai thil a awm nangin tukinah hna hmanhmawhthlak aneih avangin a zin chhuak thung.

Dawrah kan awm deuh renga, achhung siam zawng zawng kan zo tawha,mahse kan boruak vel avangin bul tan tak tak theih ala ni lo thung.Mumal taka run anih hun atan Malsawma Cousin,Pharmacist tha zet  Malsawma’n a lo be fel vek tawha,ani a thu anga. Ka nu pawisa lam khawih turin a thu ve bawk anga. Mahse, account enfel erawh keiman a hlawmin thla tawpah ka ti vek thung ang.

‘I pi te inah tlang phei lawk ang, kan chhuak ta rau rau’ a ti a. Ka pi teinah darkar khat vel kan awma,Pitei’n chawei turin min ti nangin zan lam Curfew ala nih avangin ka nuin a hnial thung.

Tiharhtu awm ang maiin chiang zetin ka mutui lai ka harh hlawl. Ka inlet a, lukhama ka phone dah ka laa,dar zat ka en a. Zing lam dar 3 ala ri lo deuh. Phone ka dahthla leha, muthilh leh tumin ka mit ka chhinga, thawklehkhatah keimah chauha awm lo a inhriatna ka nei thut.

Rang zetin ka thuchhuak nghala, khum bula Switch awm ka bana,ka hmet nghal khap. A eng ta uar..Ka hawikual nghala, ka rin loh lutuka Sangkima lo thu ka hmuh rualin insum hman lovin ka te chhuak nghal thawt.

In tha zo zetin a rawn tho nghal zawka, mitkhapkar pawh tling loah khum a rawn thleng phei nghal chu a ni der. Ka hmui a rawn hup zui nghal hmak. Thil thlen dan tehthut chuan min ti hamhaih vek.

‘I au vak vak chuan i nu a lo chho mai ang.A mu nghet vak lo ania’ ka beng bulah zawi fiah zetin a ti zui sup bawk.

Ka talnghal phata, mahse hneh zetin min pawmkang nawlha, khumah min lehthlak puia, hnung lam atangin ka hmui a hupa, lehlamin ka ban pahnih a hum kawpa, ka mal pahnih a kherh bet nghal hmiah.Min man bet chiang lutuka, tal ngaihna lam a awm lo.

‘Mambawih,I tha em? Lo hawng teh’ ka nu awin kawngkhar bul atangin a rawn ti a, kawngkhar a rawn kik zui nghal zat. Ka tal leh phat..

‘Min hmuh i duh kha, chuvangin i nu hnenah sawn engmah dik lo a awm lo tih hrilh la... Anih loh chuan ka lo luhna kawngkharah hian hmeichhe tereuhte pakhat pu chung pawhin ka kalchhuak thei ania.A tha em?’  ka beng si chetin a ti sup.  A thaw lum ham ham chuan min fan raih raih bawk.

NOTE- CLICK HI KA SAWI VE TAK ZIAH AVANG HIAN CLICK THEI LO TE IN LO INTHLAHRUNG ANGE AW. INTHLAHRUNG SUH U,IN LO CHHIAR HRIM HRIM HIAN KA LAWM TAWK LUTUK A,CHUAN CLICK THEI HOIN AN CLICK KEP VEK ZEL CHU A. TIH MAKMAWH A NI LO ANIA AW.