ANNEM - 26

Chapter- 26

‘I va mutui ve’ ka ti sap. Engmah sawi loin a malchungah min thuttira, ka kawngah a kuaha, ka awmah a hmai a rawn phum nghal vang vang thung.

‘I lo kal dawnah lo sawi rawh ka tih kha’ a tawng dawn lo emaw ka tih hnuah a ti sup.

‘Nia, mahse ruah a tla deuh bawk sia.Lo kal chhuah abuaithlak mai mai alawm’

‘Um..Nia,I hnawng chuap mai’ a ti leh sup.

‘Tlan chuan huh a awlsam bik e lawm’

‘Ka kawr hak tur a awm ang. Aaah,ha lo leh mai si la, I ha rei dawn chuang lova’ zawitein a nui zui hawka, kei erawh ka hmai a sa nghal hat hat mai.

A T-shirt ka hak saka, a lian deuh bawk nen ka mal chanve a khuh pha..Ka thawmhnaw ka zar nghal vek bawk. Khumah kan mu duna, a dar hlai hlap ka khama, a awmah ka kut ka daha,a lungphu nghawr dat dat ka ngaithlaa, ka thlamuang ngawih ngawiha,mutchhuakin min zem zui chiai chiai bawk.

‘Hey, muthilh i tum ngawt alaw?” ka hnarah a rawn khawih zauh.

‘Ka mut achhuak alawm’ ka ti sep.

‘Karkhat reiber ka hmang zo chiaha, nang lah muthilh i tum daiha,a va fair lo ve’ a ti leh sup. Min pawt hnai lehzual a, ka kawngah a kuaha, ka mal a khan beta, ka samah a rawn fawp zui leh vang vang.

‘Sex vangin maw min hmuh duh?’ ka sawi zawh ruala a taksa inlehkhawng nghal luh chu ka hre thei.

‘Min enteh’ a ti nghal hluk. Thuawih zetin ka en chho ve mai bawk.

‘Ka hrilh che tawh che em? Hahdam taka awm turin i lakah hian sex ka mamawh lo.Sex tel lo pawn ka hahdam thei. Mahse, min si renga i awm chuan incontrol hi a harsa thin mai zawka. I duh loh chuan tihluih che ka tum ngai lo’ nghet churhin a ti nghut.

‘Ka hria alawm…’ ka ti sap. A hnute hmur tereuhte ka khawiha, ka kut a rawn man nghal chat.

‘Hetianga i tih phei chuan i muhil miah lovang aw’ a aw a khur titih.Ka en chho a, a mitthim raih maiah chuan a duh ka hmu theia. Kei pawn ka duh,vawikhatna khan vawihnih a hringa, tunah phei chuan thil dik lo anih zia ngaihtuah buai loin kan inmamawh tawnna hian pawisak neih lohna a hring tawha. Ti hlawhtling tura hmalak bak kan ngaihtuah ngai tawh lo.

Ka tawlh hniama, a hnute hmur zawnah ka tawp chat..Ka samah a rawn tham ve thung.’I ha rei chuang lo vang ka tih kha’ tih pahin ka kawr hak lai a pawt hlim chho a, awlsam zetin a phelha, a thehsawn zui nghal daih bawk.

‘Sangkim…’

‘Shh…Inbe tur chuan Phone pawh a awma,tunah chuan thildang ka duh’ a titham tuak.Zawitein ka nui hak,mahse ka nui rei lo.A hmui chhah tap leh fawh nuam zetin ka hmui a rawn khar a,hmanhmawh lutukin kan che zui buan buan.  Mak takin damthlapa chet aia nasain a chetdan chuan min tiphur zawk tlat bawk.A tawp kan thlen meuh chuan kan thlan dun hlapa, a thaw ham ham a,ka hmui a rawn tuaia,’ Min nei tawh mai teh’ a ti chhuak hrawih bawk.

‘’Ka muhil tawh dawn aw’ ka ti ve thung,a awmah ka hmai ka phum kaka, ka hnungah a chul hauh hauh.

Ka Phone riin min tiharha, ka awmna ka hai thelh. Ka Phone zawngin lukham ka dapa,a awm lo; ka tho mai dawna, hnunglam atangin Sangkima’n min lo kuaha, a mal sei thlurhin min khan bet tlat bawk.Dimtein min kuahna ka dahsawn saka,ka tawlhsawna. A rawn inlet thuk,a harh dawn emaw ka ti hmana,mahse a muhil zui leh mai.

Nizana Sangkima T-shirt ka hak,chhuata lo tla bal chu ka chhara, ka inthawlh nghal puat. Hmanhmawh zetin ka phone ka en nghala, ka nu a lo ni a. Ka thaw deuh hak..Thutkhawmna pindan lamah ka chhuak phei tham thama,ka pick hmain dar zat ka en leh te te a, ka thaw leh ham ham mai.

‘Aw, Nu’ zangkhai angreng takin ka ti a.

‘Engtikah nge in lo haw dawna?” a rawn ti a.

‘Kan lo haw tep ang..I kal duh tawh mi?”

‘Duh deuh mai e,vawiin chu lo kal lo mai rawh.Dawngkima bakah nula kha a awm dawn tho a, kan buai viau pawn ka ring lo’ a rawn ti leh duah. Ka sawi lem lo nangin dawrah hian telve tumna ka nei miah lo; mahse eng emawchenah chuan ka tel ve angaihna chin a awm lo thei lova, Account pawh keiman ka buaipui angai dawn tho.Mahse, Restaurant lam ka hawn fel hunah chuan kal ve tuin a nazawng chuan min phut zui lo ang.Keima pualin buaina tur ka nei ve miaua.

‘Nia, ka lo kal lo mai ang.Eee, Nizanah Malsawma’n min lo calla,I thilchah kha a hmu zo lo ati’ ka ti leh a.

‘Awhaw,a lo hawn ang chu tih naklaia..’ pawiti zetin a ti nghal a. Enge an lo inchah pawh chu ka hre lem hlei lova.

 Kan inbiak zawh hnuah Rooma let leh mai loin ka ding deuh vang vang. Ka nu hmel ka mitthlaah a lo langa, ka awmdan hi hria se engtin nge min tih ang? Sangkima hian engmah a ti lo angin ka ringa.A tih a ni emaw ni lo emaw,eng zawk zawkah mah fiahna ka la hmu ta miah lo.Ka chhungrilah inthiam lohna a lo lut zauh,chhungte phatsantu,hmeichhe tha lo tak leh zahpuiawm tak niin ka inhriaa..Mahse, Sangkima tel lo a nun hman leh chu ngaihtuah pawh ka ngaihtuah ngam eih lo thung.

Ka hnung lam atangin ka kawngah a rawn kuah thuta,ka phu zawk. A lo kal thawm ka hre der lo.Ka beng hnuaiah a fawp zauha,ka darah a hmai a phum zui lehnghal zat.Kawr a hak loh avangin a taksa lumna ka feel nghal vang vang.

‘Ka tawng riin a tiharh che mi?” ka ti sap. Ka ngheng zui ar ar bawk.

‘Um,I au vak vaka’ a nui a..

‘Dawheh’ ka ti hlak.

‘I kal daih emaw ka tia…’ a ti leh sup.Ka kawr hak a rawn zen chho a, ka hnute a rawn hum nghal chat bawk.

‘Ka kal angai’ a kut ka vuana.

‘Ninawm…’ a ti hluk.

‘Ania lawm..Ka kal angai’

‘Kal rawh tih leh ka kal angai tih tawngkam hi ka hua’ a ti leh hmuk. Ka kawnga a kuahna ka phelhsaka,ka inhera;a nghawngah ka kut ka suiha, dingdihlip titihin ka dinga,ka kawngah a kuah ve thung.

‘Ka nu nen kan inbiaa’ a mitah tak ka en a.

‘Chuan…?” a ti sup. Amah si chetin min pawt hnai zui nghal zata, a Boxer hnuaia a mipatna inpeih leh at tawh chu ka hre thei.

‘Fanu tha lo tak ang maiin ka inngaia,ih..Tun thlengin engmah fiahna min la pe si lova’ ka aw a zuih ral titih.

‘I inpeih em?” ka thilsawi nena inpersan zetin a ti sup. Hrethiam lo lutukin ka en a, a nui suk.

‘I nu hnenah engmah ka ti lo tih sawi turin ka lo kal ang.Nangmah zawk hi i inpeih em?” a ti leh a. Ka thaw nghal hak mai.

‘Aih,ni lo..Chutiang chu a chi loh’

‘Ka tel loh zia fiah turin hmanrua a awm thei lo. Tih loh na na na chuan sawi tur pawh a awm lo. Tlang takin i nu ka kawm duha, hrihfiah ka duh bawka’ a ti leh a.

‘Biak loh athat zawk ka ring’

‘I thu thu le,I thu loin engmah tih ka tum lo.Mahse, I chhungkua phatsan ang hian inngai tawh suh’ a ti leh a.Ka biangah a kut lehlamin a rawn khawiha,a kutzungpuiin a tuai zui leh hauh hauh mai.

‘Bia la enge i sawi ang?”

‘Thil tamtak sawi tur a awm hran lo.I bula ka sawi ang tho kha animai.Becky leh i u chungchang te, avaiin’

‘Becky leh ka u inbiaknaah kha chuan i hming chiang takin alanga, Becky khan ka u kha fimkhur turin a chaha,I chhuah dawn lo tih te pawh a sawia.Chuan a hnuah pawh Becky khan ka u thihnaah khan i telve ngei tih a sawi leha.A sawi hnu lawkah a thi zui leha’ ka ti leh halh.

‘Ka hrethiam chiah lo anih chu. I u nen khan kan intibuai ngei tih ka pawm thlap.Mahse, vawikhat chauh.A hnuah chuan biak emaw hmuh leh pawh ka nei lo.Bekcy chuan engvangin nge a sawi ka hre lo’ a ti nghet churh.

‘Naute kha…an tan chuan ana dawn lutuka’

‘Ka tih anih i ring tak tak em?”ka mitah tak a en a. Ka lu ka thing nak mai. Ama fa ni miah lo pawh fa anga enkawla, Pathlawi nih pawisa lo tu hian nunna angaihlu dawn lutuk tlat.

‘Ka hminga Game khel an awm tih ka chianga, tu ber nge anih erawh ka la hre lo..Rei erawh ka nghak tawh lo turah ka ngai’ a ti leh sup.

‘A tha alawm..’

‘Um,hahdam phawt la..Ka damchhung chuan tuman an tihnat che ka phal lo vang ka tih kha.I nu pawh telin…’ a ti leh nghut. Ka chhan hmain ka hmui a rawn khar leh hmak.

Ka kalchhuah hmain Lawmi ka calla,a pick thei der lo. Zingah inbia ang tiin kan inthlah thlap kha a ni sia. Ka nghak deuh ren rawna,ka call leha,a pick chuang lo fo.Awmreng thei ka ni si lo,ka haw ta ngawt. In ka thlen hnuah ka call leha, Switch Off..Ka awm a tinuam lo,an inlam va call ngawt dawn ila a tihchi der bawk si lo.

Ka room kawngkhar inhawng thawmah ka hawichhuak vat. Ka nu a lo ni a, ka thil tih lai ka tihzawm leh mai.

‘Enge a an hmel?” ka ti satliah.

‘Eng tehvak mah..Nizanah khawiah nge i kal?” a ti hmak.Ka khawng nghal laha, a aw ring lo mah se dik lo a awm tih ka manthiam nghal vek.

‘Eng…Khawiah nge ka kal a? I hriat kha’ ka ti nghat. Pawn lamah pangngai tak angin lang mah ila chhungril erawh hlauhthawnna avangin a khur a, ka zam chhe lo chauh chu a ni ber.

‘Hria e, Lawmi nuin min rawn biaa. Tunah Lawmi ala haw lo a rawn ti a, enge a awmzia? Biak pawh an be tlang thei lo a’ a ti leh a. Kei leh Sangkima chungchang a ni lo tih ka hriat rualin ka thawl nghal hawk. thawl nghal hawk.

‘Chuvang chuan maw ka kalna min zawh?” ka thilsawi atthlak zia ka ngaihtuaha,mahse ka sawi zo vek tawh.

‘Enge a awmzia? In kal duh a ni lawmni?nge insawinaah khan in kal lo hrim hrim zawk?” mak tih hmel fein a ti leh a, a mitmeng lian leh fiah zetin min en a. Ka mawl luatah ka inpuang lo chauh chu ania.Hahthlak lutuk a..

‘Kal e.Kan kal loh ten enge zan zanah kan tih anga?’ ka ti ban chat. Mawl ka inti ru ngawih ngawih.

‘Anih si chuan in haw rual lo em ni? ’ a ti leh nghat. Engtin nge ka chhan tak ang? Keipawn zing atangin Lawmi ka be thei bik lova, tun thlengin ala reh veng venga. Rca  lah ka call a reject zel.In ka thlen hnu a ka call leh khan a Switch Off daiha, ka rilru a nuam lo viau nangin chawhnu lamah pawh Lawmi chhungten min lo be miah bawk si lo kha a haw tawh turah ka ngai ve ta ngawta. Ngaihtha deuhin ka lo awm ve veng veng tawp maia. Ani a lo haw der si lo;a chhungte lahin kei min be loin ka nu zawk an lo be daih bawk si.

‘Ih…’ sawi ber tur pawh hre chuang loin ka ti a,mahse vanneihthlak deuhin ka phone a rawn ri a, Ka Phone charge mek ka pan phei vat, min rawn call tu ka hmuh rualin ka thaw nghal hak.Rca number atangin a ni a; ka nu ka en a, a mitmeiin tu nge anih min rawn zawta, ka phone a hmuh theih turin ka kenga, a bu nghat.

‘Khawiah nge in awm a?” ka ti nghal tawng. Hello tih khawmawi vel pawh ka tum buai peih lo.

‘Awi, thiannu… Ka buai vek’ mangan hmel zetin Lawmi zawkin a rawn ti hap.

‘Nang aiin kan buai daih zawk.Khawiah nge i awma? Call pick lo,call back bawk lo’ ka ti hlak.

‘Chu chu lawm, Rca hian haw a phal tawh si lova.Ka phone pawh kan inchuh nalamah a chhe daiha.Awi, ka rilru ahah lutuka’ a rawn ti leh halh.

‘Engtia awm nge i tuma? I nu te pawn ka nu an lo zawta.Keimah min lo be bawk si lova, I haw daih tawh turah ka lo ngaia’ ka ti leh a.

‘Nia, lo call che ka tuma, mahse ka phone chu a chhiat daih chu. Tunah chuan a thianpa Inluahah kan awm meka. Eng lo,I hreh viau loh chuan ka nu te chu min lo biaksak mai teh’

‘In inru dawn tihna maw?” ka ti deuh ha.

‘Anih ber hi..Chutiang inzawh kher angai ami? ‘a bak hlar mai.

‘A va ho tak’ ka ti ringawt.

‘Nia, ho tak a ni..Mahse, ih..duhthlan tur kan nei lo a.Ka ruak tawh bawk si lova’ a aw a zuai raih mai. Kei erawh a thilsawi chuan min thawng dawt thung.Nimina kan inhmuh khan a thau deuh emawni ka lo ti rilru mai maia, mahse kan inhmuh khat vang leh a thawmhnaw hak vanga lang thau deuh mai maiah ka ngai leh mai kha ania.

‘Nizan atanga sawi vek angai dawn sia..’ ka ti sap.Ka nu ka melh zawka, tur zetin min lo melh kur.

‘I sawi vek mai dawn nia. Tihngaihna a awm lo..Awi, buaina ka thlensak chiam dawn che anih hi.Mahse,kei hi ka mangang zawk..Ih…Enteh,Pasal neih tum hi a lo namai lo e.Ka khur ka khur mai’ a tawng tawp lamah tap tur ang maiin a awm zuia. Ka thinrimna a bo nghal duaka, ka khawngaih nghal ringawt.

‘Ka lo hrilh dawn nia.Lo lungngai lo phawt rawh.Nakinah ka lo bia ang che’ ka ti a. Phone ka off a, ka nu lam ka hawia. Englai maha midang buainaa inrawlh duh ngai lo a ni a. Vawiin ni loin nizan lamah thil thleng a awm tih kan inbiakna atang khan a hre thiam vek tih ka hriaa.An inruk vang ni loin ka lo buaipui vang zawkin a thinrim dawn tih ka chiang.

‘An inru a, achhungte min lo hrilhsak rawh a ti’ ka ti ban chat.

‘Nizan lam thil nisi hre lo der kual lo khan sawi thuai ta che. An mangang em em a,nang lah ilo tel ve tih chiang reng’ a ti bul hmak.

‘Aw…Nizanah Rca a lo kala,zep pui turin min ngen ve a’

‘Anih chu a. Va hrilh vat rawh.An mangan em kha’ a ti bak leh hlak. Ka rin ai takin min hau nasa lo hlauh.

‘Aaa,Phone atanga sawi chi pawh a ni lo.An inah va kal rawh. Zohmingthangi leh Rasky pawh ko tel law law la’ a ti leh hmawk hmawk.

Huphurh zetin kan thian hoin kan inzui lut tham thama, ‘Khawiah nge a awm a? zahpuiawm leh lutuk mai’ Min hmuh veleh Lawmi nuin a lo ti hluk hluk.

‘Ava mak buan buan e aw. An sawi tur te pawh ngaithla ta che’ a pain a lo ti a. A ngawi zui ve mai bawk. Kan kalchhan ka sawia, a ruak lo tih pawh ka sawi tela. Ka thiante pahnihin min lo pui ve zauh zauh bawk. Lawmi nu hmela thinrimna langchhuak chu ka hmu ru kara, Inneih an duh anih chuan tuna an chet lak dan bak hi thlan tur dang an nei lo tih ka hmuthiam nghal vek.

Mu chungin Sangkima nen kan inbiaa, Lawmi te inruk thu ka hrilha, a nuin a duh lo thu leh duhthlan tur an nei lo tih ka sawia..’Keini pawhin kha tho kha kan hmabak ve a..Ka nghakhlel tawh’ a rawn ti sup. Ka mit ka chhinga, Lawmi ka ngaihtuaha,tluk lo ka inti vang vang.

‘Zoeyy’ a rawn ti leh sup..

‘Um…’

‘Ka ngai che’ a ti leh a, a aw pa zet chuan min fan raih raih mai.

‘Kei pawh…’

Dawr kan hawn atangin thla a liam tawha, Restaurant pawh pangngai takin kan run leh tawh bawk. A tir lamah kha chuan an duh an rawn Ordera, kan deliver mai thina. Mahse, Pathian zarah hrilengin zia lam a pan hreta, Mizoramah bik phei chuan an lo haw khawm nasat aiin a hlauhthawnawm zui lutuk lo hlauh.

Damdawi dawr lam pawh dawr thar kan ni nangin kan thil zawrh hi tupawhin an mamawh anih avang leh kan awmna lai hi Damdawiin lian tak bul mai anih avangin  Sale a chak a. Hralhchhuak satliah mai ni loin Malsawma puihna bawkin District danga damdawi dawr lian pangngai tak pahnihin min rawn dawr nghal pang mai.Ka sawi chhuak hauh lo nangin Malsawma virbuai ve sek hi thil tha anih ka ring lo.Atir phat atang khan Sangkima te tihbuai nan a tul tih a sawi tlata, sawi nawn leh awm lo mah se ka la theihnghilh chhin lo hrim hrim zawk..Thla tawpa Account ka enfel hmasak berna atangin awihawm loh khawpin a inlumlet chak tih ka hrethiam nghala.Dan dik lova sumdawnna ni si loah chuan Damdawi dawr aia sumdawnna lian chak tur hi a awm pawhin ka ring ta lo hial.

Inhnuai panna stepa ka chhuk laiin Malsawma a rawn lut ve chiah. Kan inhmu khat viau,ka hel nasat vang chu ni tho mah se a lo kal khat ve hranpa hrim hrim.

‘Kan va inhmu khat ve’ ka ti satliah.

‘Nia, ka buai ve deuh bawka’ a ti a. Thutthleng lam a pana,a sam huh deuh tuai chungin a thu nghal a.Amah ep zawngin ka thu thla ve bawk.

‘A  va sur duh ve le’ a ti leh a.

‘Nia, a baw tlawrh tlawrh maiin ka hria’

‘Kawngpuiah pawh tui a tling put mai,awihawm loh khawpin a tling thei..Khawnge i nu hi?” a tihzawm leh daih.

‘Roomah aniang.I be duh mi?”

‘Duh tho mai ,nangpawh tel in..’

‘Ka va ko ang. A inbual a nimaitheia.Kan haw rual titiha’ ka ti a. Pawn lamah ruah a la sur tlawrh tlawrh mai.

Ka rin ang ngeiin a lo inbual zo chiah. Malsawma lo kal thu leh a hmu duh tih ka hrilha, ka chhuahsan lehnghal mai.

‘A sur nasat lai laia enge nita?” ka nuin a ti a.

‘Nia,a pawimawh angrenga. Kan thiante khan min rawn biaa,kan indawrna tihtawp lailawk an duha’ ka en vat.Ka nu ka en leha, a hawi phawk ve ngang mai bawk.

‘Enge a awmzia? Midang aia tlawm zawkin kan pe a.Ti nge a?” khauh zetin ka nuin a ti hmak.

‘An dawr hmasak thinte khan kan rate aia hniamin an pe dawn a..’

‘Anni aia hniamin ti leh ila…’ Ka nuin a ti vat.

‘Kan theih ka ring chiah lo..Anni chuan khu lama kan lakna rate aia Duli vek chauhin an pe ang…’

‘Eeh!! Engtin nge chutianga an tih theih a?’ mak ti zetin ka nuin a ti a. Kei pawn ka lo ngaihtuah ve chiah.

‘An thei ang.Anni chu an lian alawm.Bakah,min tihtawp nan an tih angai hrim hrim’ a ti leh nghut.

‘Tu te nge annih a?”

‘Sangkima te annia..Anni hi an lo dawr thina, keini hnenah khan kan rate tlawm vangin an rawn insawna,mahse tunah chuan an tla ta dawrh sia..’ thildang a sawi zawm mawlh mawlha,mahse ka bengah thildang a leng tawh lo.

‘An va ngam zawk ve..Chutiang mai maia min han tih chu le..Dingi,thingpui rawn dah teh’ vin zetin a ti zui a. Ka phu deuh zawk thung.Ka nu ka melh zawka, a hmelah engmah lang lo mah se chhungrilah a kang hluah hluah ang tih ka chiang lutuk ringawt. Sangkima ka biak angai…Buaina engmah chingfel loin engvangin nge harsatna a siambelh kher ni?

‘Chuan,kan Order pawh kha nextah khulam khan an rawn thawn dawna,kan hmaah Sangkima te bawk an awm leh anih chu..’ Malsawma’n a ti leh a. Ka hrawk a ro vel vek.

‘He pa hi keiman hriatchian ka duh hle mai. Mala,a chanchin hriat theih ang ang hriat ka duh ania.Min lo ngaihven sak thei angem?” ka nuin a ti dam thlap.

Khumah ka thu a, Sangkima min lo call back hun ka nghak ngawt ngawt. Vawi 3 ka calla,a pick lo veka,a lo call back mai ka ring a,light ka off a, mu loin ka thu a, ka nghak mawl tawp.Biak ngei ngei ka duh tlat..

Khawvar dawn thlengin ka nghaka, mahse a lo call back lo.A online hek lo..Luhai deuh burin ka tho a, ka dinchhuah rualin luakchhuakin min rawn hnawha, hmanhmawh lutukin Bathroomah ka tlan lut rawk rawk mai.

Zawi zetin Bathroom atangin ka chhuaka, khumah ka thu thla hnak..Ka uak nasa lutuka ka chau hnawk thei..

Ka phone nghawr dar dar ka hriat rualin hmanhmawh lutukin ka ban a,Sangkima…

‘Sorry,Mate..Nizan kha ka pa a that loh thut avangin ka buai deuha’ Sangkima’n a rawn ti dam thlup.

‘A pawi lo..Mahse, ka ngaihtuah che a..I lo call back mai si lova’ ka ti sap.

‘Thinrim lo la…’  

‘Aih rim lo..Mahse, inhmuh ka duh’ ka ti leh sap.

‘Ok, keipawn ka duh..Khawiah nge niang?” a rawn ti zangkhai vuh.

‘Ka hre lo..Nangman lo buaipui mai la’

‘Um..Ka lo buaipui ang..Lawk,iva nawm loh hmel ve’ a rawn ti leh sup. Ka mit ka chhinga, ka luakchhuak inhnawh leh up up tawh chu insum tumin thawk ka la nghek.

‘Ka tha…Ka dah aw’

‘Ok,Bye’

Phone ka daha, ka kekawr ipte ka zen a…Pregnancy test kit ka lachhuaka, line hnih sen kalh mai chu ka en a,ka thaw leh halh.

Ka inher rualin ka nu ka hnunga ngawirenga lo ding ka hmu nghal a, englaiin nge a lo luh ka hre eih lo.Hlauhthawn nain min rawn tuam nghal hlupa, ka sa nghal pup pup bawk.

‘Min pe rawh’ a ti vawt raih.

‘Eng…Eng” ka tawng hleithei lo..

‘I ipte ami kha..’ a aw vawt leh dam raih mai chuan hlauhna namen lo min pe a, ka khup a sai dar dar bawk. A mitmeiin pe turin min ti leh a, khur hlak hlak chungin ka lachhuaka, ka lachhuak fel deuh chiah tihin a rawn pawtthla nghal hmak. A en zawka, khumah a vawm phei nghal daih.

‘Tu nge? ‘ a ti tuar. Ka phu nghal vak bawk.