ANNEM- 27

Chapter- 27

A mitmeng hlauhawm lutuk chu tim daiin ka en a, ka kun leh vat. A thinrim em em tih ka hrethiama, ka dem lo.Tu nu mah hian an fanu te pasal tel lova an rai anih chuan an ngaithiam lovang. Mahse, kei hi chu chumi piah lamah chuan thil pawi lehzual ala awm cheu. Tu fa nge ka pai a hriat hunah phei chuan tuna a hmel landan hi chu ala nep hle zawk ngei ang. Kei ngei pawh hian Sangkima fa ni loin Malsawma emaw Ampuia fa zawk lo pai ila chuan ka nu hi hlau mah ila chuti taka ka hlauh a tul dawn lo. Mahse, midang ni loin Sangkima a ni tlat.

‘I beng a ngawng ta elaw? ‘ a ti leh a. Ka phu leh zawk..Tawng tumin ka ang ziaua,mahse ka tawngchhuak zo lo.

‘Malsawma em ni? Nge Ampuia?” ka mipa hnaih thin te pahnih hming a rawn lamchhuak a, a demawm loh.

‘Nu….’ Ka tichhuak thei hram.

‘Tu zawk nge?” tlemin a aw a dam ta deuh.Mahse, a hlauhawm lo tihna erawh a ni lo.

‘Nu…’ ka ti leh ringawt.

‘Nu,nu…Ka zawhna che chu chhang ta che’ thinrim zetin a ti leh a. Ka ang ziau,mahse ka chip leh daih. Ka kawr tlang ka pawt a, hnuai lam ka melh tlat bawk.

‘Tu zawk nge?” a ti leh vak. Ka chhan ngei ngei angai tih ka hria..Ngam leh ngam loin ka en a, tawngkaa sawi ngam loin ka lu ka thing ta ngawt.

Ka biang a ri nghal thuaia, a thip zui nghal vang vanga, ka samah a rawn thama.Min phih thu hnawk.

‘Mi tenawm nu,ka hlauh ang ngei ngei maw? engtin nge kha mi tenawm kha ilo mutpui ngam a?” a aw hniam sat mai chu ka bengah chuan Bomb puak tlukin a ring thung. Ka rai vanga thinrim satliah ni loin Sangkima fa ka pai tih a hriat vanga thinrim zawk a ni.Mahse, engtin nge a hriat ang?

‘Nu,min ngaidam rawh…’

‘Thi rawh,thi mai rawh. I pian hlim atangin enge tangkaina i neih a? min tibuai tur ringawt mai.I u te kha la dam se, nang hi lo thi la a tha tur ania. Malsawma’n in inkawp tih min hrilh khan lo awih ila chuan i rai lek lo tur. Khapa khan enge a tih i hria em? I u a that..Mi hur nu’ a ti leh a tuara,A rem lai laiah min chuma, min tlawha, min chhir zui pawp pawp bawk. Duh ila chuan ka hneh ngei ang tih ka chiang. Mahse, ka ti let eih lo. Kei angin Sangkima a ring ve lova, ring ve ngawt turin a hrechiang ve hek lo. Atan chuan hmelma a ni a, keiin a fa ka lo pai hi thinrim lo chi a ni lo a, a duhtawkin min khawih pawh nise lungawi lo ngam tur ka ni lo.

Mittui tla zawih zawihin min khawih ang angin ka dawh tawp. Ka intihchak theih nan Sangkima chauh ngaihtuah ka tum lui tlata,ka chhula nau insiam mek chan lo turin ka pum zawnah ka kut pahnih ka suih kawp tlat bawk.

‘Duhtawk tawh rawh’ Ka Patea rawn lut chu mittui kar atangin ka en a, a hnungah Nutei a rawn tlan lut ve bawk. Ka nuin na zetin ka dulah a rawn chhir leh pawpa, ka bawk nghal rawk mai.

‘Ekhai,ka u..A tawk alawm’ Patea bawkin a ti leh a. Kan inkarah a rawn ding tih ka hria.Ngam leh ngam loin ka nu ka en chho a, a che leh thuta, mahse Patea’n a lo dang vat. Patea’n a vawn beh avangin min rawn khawih thei ta loa. Mahse, chil min rawn chhak khum leh hram tho.

‘A thil tih hi inhria em? Thah mai ka duh’ ka nuin khur hlawk hlawk chungin min kawka.

‘A tawk tawh.I ti hlum tak tak mai ang’ Patea’n ring angreng takin a ti a. Nutei’n min rawn kuah ve vat.

‘Thi se ka duh zawk. Chuvang takin thi turin ka khawih reng bawka’ ka nu bawk.

‘Eng pawh a lo ti ang.Thah em em chu i duh loh tawp tur a ni.Kalsan rawh,inhnuai lamah kan sawi dawn nia. Thenawmte tan pawh in thawm a hriat hial ang.In thawm ana lutuk’ Patea’n a ti leha.

‘Hre rawhse. A pawi ka ti hlawl lo;hetiang mihur’

‘Mami,a tawk’ ka pu aw a ni ve ta thung.

‘Lo chhuk rawh u. Thangi, Mambawihi kha lo buaipui la,nangni chu lo kal rawh u’ Ka puin a ti a, a awah thupe aw a ni.

Ka pute chhuah hnuah Nutei’n min kaithoa, thutthlengah min thuttira, a chhuak zawka. Reivak loah Dingi nen an rawn let leh mai. Tui lum pep pepin ka hmai a hru a, Dingi’n chhuata ka thisen far a tifai ve thung.

‘Lo hahdam vang vang rawh. I nu chu i pu leh i Patea’n an bia anga,a fel vek mai ang’ min hnem tum takin Nutei’n a ti a, ka chhang lo. Ka pu leh Patea ngei pawhin anihna tak an hriat hunah chuan an rilru an thlak dawn tih ka chiang vek. Pa zaidam tak,tih tawh loh lamah chuan nawrluih chi loh tawpa luhlul anni a. An zia ka hre chiang lutuk ringawt.

Dingi leh Nutei chhuah hnuah muangchangin Bathroomah ka luta, ka dula a chhirna vang khan ka tai lam a naa, min pawt kun deuh tlata,pen zawngin a na zawk zawk bawk.

Darthlalanga ka hmel lang chu ngam leh ngam loin ka en a, ka hmai a pem thluaha, ka mit bul a duk chur bawk. Hei hi chu lang theia ka pem mai chauh a ni a, ka taksa lamah pawh na lo lai a awm mang lo zawk. Ka mittui a rawn tla lehnghal a, insum loin chhuak em emin ka tap zui ta hlawp hlawp.

Thawm nei lo thei ang berin Room kawngkhar ka hawnga, inhnuai lama an thilsawi ka ngaithla ve duh tlat. Ke lawngin thawm nei mang loin ka kal pheia, inhnuai lam atang min rawn hmuh lohna lai turah ka ding chat.

‘I sawi ang pawh chu lo nise palai kal se a tha. A tu a pawh lo nise Mizo dan kan zawm tur a ni’ ka puin a ti chat chat.Ka nuin eng emaw chen chu a hrilh tawh tih ka hrethiam mai.

‘Ka pa, chutiang kan ti lovang. Nau apai tih pawh hriattir an ngai lo.Bakah,pai zui tir ka tum lo’ ka nu a aw ni.

‘Ekhai,chutiang ngawt zawng thil nihdan a ni ngai lo. A lo tisual anih pawhin naute chuan tihsual a nei hleinem’ ka puin a ti leh tlat. Ka lo thaw ru deuh huaia,ka pu hi chu an hnial tak vak vak ka hre ngai lo a. Tunah pawh ka him maiin ka ring.

‘Ka pa, ka ngaihtuaha.U Mami hian a sawi dik zawk ang. Malsawma ka lo zawt fiah anga, an sawi anga Mama chunga kut lo thlak tu anih chuan kei chuan anni nena inzawm ka duh hauh lo mai. Mahse, hriatchian phawt erawh ka duh’ Patea thusawi chuan ka beiseina tereuhte la neih chhun kha a thamral tir lehnghal riai riai mai.

‘Malsawma chuan engemaw a hriat ve vak le? In sawi hleka, Malsawma inti zel maia’ ka pu bawkin a ti leh boh.

‘Hmanni deuh khan min hrilh tawha, kan in velah hian Rosangkima chu an hmu fo niawm tak ania. Chu chu Malsawma hian a lo enzui tira, fiahna pawh tha tawk tak min pe tawh nghe nghea, mahse ka thinrim lutuk a hlauh avangin min lo hrilh mai lo zawk a lo nia. Anihna takah chuan Malsawma hian a ngaizawnga, neih a duh thu pawh min hrilh vek tawha,Pawi tihna ka nei lo. An inkawp tih a hriat hnuah pawh neih pawi ala ti chuang lo a. Mahse,  Zonunmawii hi a awmdanah rai a ang riau a, ka chik ka chika.Tukinah ka chiang ta chauha, phat ngaihna pawh a hre reng reng lo.Aaaa, han khawih leh deuh ka la duh’ ka nuin a ti leh hmawk hmawk.Ka mitthlaah Malsawma a lo langa, huatnain ka khata, kha leh chen kha engtin nge mi tha tak anga ka lo ngaih theih ka hrethiam lo. A rukin min lo chhuia, a thil hriat zawng zawng ka nu hnenah a hrilh bawka. Min neih a duh thu te a lo hrilh veka,ka ten lutuk.

‘Engpawh chu nise naute paih chu ka la thlawp chuang lo. Thildang chu hrechiang ila, kan inzawm loh a pawina a awm lo’ ka puin a ti leh chuar chuar.

‘Naute a awm chuan kan inzawm tihna animai’ Patea’n a ti bak hluk. Reilote chhungin ka nuin a thluak a su hman hle tih alang vek. Bakah,ka u kha fapa a neih loh avangin a fapa ang maiin a en a, a duat em em thina. Mama chungchangah chuan rilru a siamfel hma anih pawhin a thiam awm tho mai.

‘Tikhian Roomah kalh hnan rih ila..Roomah eitur pawh pek mai tur.Malsawma pawh chu i hriat duh ang ang lo zawt la, mahse a rai tih hrilh lo ila. Mawi lo deuh mah se neih pawh kan neih luih tir mai ang.Ven sen anih loh hun ala awm chuan buaina mai mai’ ka nuin a ti leh hmawk hmawk.

Roomah ka tawlh lut zal zala,  khumah ka lawna. Rei vak loah pen thawm ka hriaa ; Pen thawm a lo hnai zela, kawngkhar a ri zui rak raka. An rawn kalh nghal tih ka hre thiam. Ka pu hi ka pa pawh khan a hnial mai mai ngai lova, a fapa te mai bakah a mo te pawn an zah. Mahse, tun tumah kha chuan Ka nu leh Patea an tang dun tlata, an nawr lui ngei ngei dawn tih ka chiang. Ka dul ka khawiha,thisen hlawm chauh ala ni.Mahse, chan ka tum lo bur. Malsawma neih ai chuan thih pawh ka thlang zawk tih ka chiang em em bawk.

Rooma min kalh hnan atangin nithum a liam tawh,Dingi’n eitur min rawn pe thina. A lo kal lai remgchanga laa tlanchhuah tih vel chu tum pawh ka tum buai lo law law. Kan Gate ka tlanpel hman dawn chuang lo tih ka chiang vek. Phone ka nuin min laksak avangin Sangkima biak ngaihna a awm lo hrim hrim. Nitin inbia kan nih avangin a ngaih a tha dawn lo tih ka hria, mahse tihngaihna a awm chuang der lo. Ka awmdan vangin beidawn loh hram hram ka tuma, engtikah emaw chuan Sangkima a lo kal ang tih ka beisei ru tlata, chu chuan min chelh hram hram a ni ber.

Thil ei chakna ka nei lova, mahse ka naupai tan tiin ka ei lui hram hram zel thung. Ka muhil hleithei lova, ngaihtuahna mumal lah ka pu thei hek lo. Ka thu a, ka mu a, ka teikuala..Achang leh Tukverh atangin pawnlam ka thlira, thenawmte bang bak chu hmuh theih erawh a awm tam lo.

Tukverh bulah ka thu a,pawn lam ka thlir dauh dauh.Kawngkhar ri rak rak ka hriaa, mahse Dingi eitur rawn dah tur bak a ni dawn lo tih ka hria.

‘Eitur ka dah aw…’ ka rin ang ngeiin Dingi awin a ti a. Muang changin ka hawi leta, Dressing table sira Dawhkan lianvak lo awmah ka eitur a lo dah mek.

‘I ei tlem thei lutuka’ a ti leh a.

‘Kal tawh rawh,I awm rei chuan a lo vin leh ang che’ ka nui lui sak.

‘Achhuak alawm..Enteh..’ a ti a, a ngawi leh daih. Kawngkhar lam a pana, chhuak loin pawn lamah a va daka,awm hnai an awm leh awm loh a thlithlai vel a ang. Kawngkhar a khara,ngaitha ta niawm takin a lo let leh. A chet vel dan chu ngawi rengin ka lo en mawl tawp.

‘Ila ei dawn lo mi?” min rawn en a. Ka lu ka thing mai.Khumah a thu a, ngaihtuah muk deuh nei ang maiin a hmui a pet nauh nauh.

‘Enge ?” ka ti sap.

‘Nimin tlaiah a lo kala’ a ti tawi tak.

‘Tu?”

‘Amah kha,ka pi nen an inhau a’ ka lungphu rang leh ring lutuk chu Dingi pawn a hriat hial ka ring. Malsawma ni loin Sangkima a ni tih ka chiang.Mahse, engvangin nge a lo kal? Helaiah hian amah that duhtu vek an awm tih a hre lo nge mawni??

‘Sangkima maw? ‘ ka ngaihtuahna tilang loin ka ti halh.

‘Um, pi hnenah khan engmah tih a nei lo tih vel a sawia. Ka insuk lai anih vangin an inbiakna ka hre vek thei lova.Bakah an sawi kha ka hrethiam chiah lo hrim hrima. Pi kha a thinrim ropuia.Chuan,neih che a duh tih pawh a sawia. Mahse, pi in chhuak turin a ti a’ a ti leha, Hlauh nei tihhriat lutukin a hawi zak zak. Kei erawh sawi tur reng reng hre loin mi a ang maiin Dingi ka melh reng thung.Ka beisei loh lutuk thleng chuan min ti lawm nge min ti mangang pawh ka hretiam mai lo.

‘Tlanbo daih ula ka ti. A kal hnuah khan Mitei pa a lo pheia..Ka pi nen an inbiakna ka hre ru a, Naute tihtlak tih vel ania..Chuan,u Mala hming pawh an sawi ri a.Zaninah palai tir turin bia ang tih te an sawia.Ka hlauthawng em mai’ a ti leh a. Ka khawng vek lo chauh. Pawn lamah Motor thawm a rawn awma, rang zetin Dingi a dingnghal auh.

‘Hei ka phone ka dah a..I hman duh takin aw.Chuan maw,nakinah pawh ka hming sawi lo hram rawh.Anih loh chuan ka pi ka hlau ania’ a ti leha. Chhan pawh ka chhan hmain nizan lama ka thil eitur a rawn dahna ala a. Hmanhmawh zetin a chhuak zui  nghal vat.

Dingi phone keng chungin Bathroomah ka thu a, Sangkima number ka chhu a. Ka call nghal a, a ring ral ral chu lungphu ri dup dup chungin ka ngaithla kar.

‘Hello…’ a awpa zet ka hriat rualin ka mittui a rawn tla nghal zawih.

‘Dingi…Enge nita?” a rawn ti leh a. Ka mittui ka hru a, Dingi nen engtin nge an lo inhriat hman ka hre lo.Ka va biakna pawh  Dingi number a ni tih a lo hre nghal chat.Mahse, ahriatna lam a pawimawh lo.Ka biak theih chuan a tawk mai.

‘Zoeyy…I ni em? Mate, nangmah ini tiraw?” a awah chuan ka la hriat ngai loh manganna niawm tak ka hre theia. A hmel ka mitthlaah a lo langa, ka ngai vawng vawng. Ka dul ka dawma, tunah chuan thla khat vel chauh ala ni a, mahse ka tan chuan a hlu lutuk.

‘Kan naute…’ ka ti lawi rat. A thaw hawk ri ka hre theia.

‘Ka hria..Ka hria e, hlauthawng miah suh. Tuman an khawih che u ka phal tawh dawn lo.Min ring tiraw?”  a rawn ti leh a. Ka chhang thei lo,min duatna leh ngaihsakna chuan ka chhungril zawng zawng a tikeh sawm veka,insum bawk siin ka insut nghal hlawp hlawp mai.

‘Sshhh….A tha vek, ka rawn hruai dawn che..Hahdam rawh,aw..Hahdam rawh’ a aw dam thlap mai chuan ka tah a tichhuak zual sauha.A hma a insum taka ka tap kha insum hman loin ka tapchhuak nghal hawka, chhungril atangin min rawn hnawha,ka mittui a tla zung zung bawk.

Ka mu meng kar mai. Sangkima lo kal hun ka nghaka,ka thawmhnaw ken tur pawh ka siam fel vek tawh.’ Zanah ka lo kal ang.Khatah kha chuan i duh loh chuan i let leh tawh ngai lovang’ a tih ri kha ka bengah hian tun maia a sawi angin ala chiang reng. Min hnem nana sawi mai mai ni loin a lo kal ngei ngei dawn tih ka chiang lutuk tlat.

‘Kum khat chhungin nupui vawi hnih i ru a, mihrang ve ve lehnghal,I mualpho nasa dawn lutuk asin’

‘Mi thusawi hi ka tana tangkai lo anih chuan hnung lamah ka dah mai zel. Bakah,midang vang pawha ka mualpho thei anih chuan nang leh kan naute tan phei chuan mualpho mai mai chu engmah a ni lo’ nghet leh khauh zeta a tih ri pawh kha a tak tih ka hria.

Dimtea kawngkhar rawn hawn tum thawm  ka hriaa, rang lutukin ka thuchhuak nghal vat.Che loin kawngkhar lam ka en a, a rawn inhawng a, Sangkima a rawn inzep lut a. Ka thaw nghal huai mai. A lo kal ta…

Ka tho vata, ani erawh a ding chawt thung. Nia, ka hmaiah belkang a awm thluaha, ka hmui vung ala reh fel hek lo. Ka mit bul a duk bawk nen ka landan nalh loh tur zia ka hria.

Harhchhuak thut niawm takin a lu a thing nawka, a bawp sei zetin a rawn pen phei nghal pawk pawka..Ka bul a rawn thlenga, amah si chetin min pawt bet nghal a, a kawngah ka kuaha,a awmah ka hmai ka phum nghal kak bawk.

Muangchanna chi a ni lo tih kan hriaa.Sangkima’n ka bag a khaia, inhnuai lamah kan inzui thlaa, hlauhthawn hmel lutukin Dingi a lo ding zum zat mai. Ka nu mizia a hrechiang em em chungin hetiang hian min puia, ruahmanna zawng zawng erawh Sangkima siam vek a ni thung. Mahse, a lo pui ngam hi kan tan chuan Vantirhkoh a ni ringawt. A tawrh let tur ngaihtuah miah loin min puia, chutihrual chuan amah an rinhlelh loh theih dan tur berin Plan an siam vek.

‘Ka lawm e aw..’ kuah pahin ka ti sep.

‘A ho lutuk,naute hmeltha deuh nei la..Ka awm thin anga aw’ a nui seng.

‘Ka nu thinrim i hlau lo tak tak em?” ka ti leh rih.

‘Hlau tho e. Mahse, naute nunna ka chhanhim dawna, pawi ka ti lo.A thinrim anga, ka tih ngei tih fiahna a nei chuang dawn lova. Ka him mai ang’ a ti fel leh thliam.

Kawngkhar pangngai atangin kan chhuaka, Gate bula CCTV  kan dah kha,tlaiah Dingi’n pangpar zam chi siam tha pah anga lang siin a tichhe hman vek tawh.

Gate atanga hla vak loah Motor a lo awma, kan luta, kan tlanchhuak zui chu animai. Ka hawileta, kan in ka lo tihve thin chu alan theih chhung ka thlira, tunah chuan ka thisen zawmpuite nen mihrang kan nita tih ka hria. Ka nu tan chuan fanu ni loin hmelma ka ni anga, ka Patea leh ka pu tan pawh mihrang mai ka ni ang.An tana mualphona nasa tak ka thlensak avangin ka Cousin te pawh ka lam tang an awm hek lovang.Keimah chauh ka nita. Sangkima’n ka kut a rawn hum a, ka en vat. ‘Hahdam rawh,a tha leh vek ang. Ka tiam che’ a ti sup.Ka kut a lakanga, ahmuiah a nem bet vang vang mai.

‘Khawiah nge kan kal ang?” ka ti sap.

‘Kan inah…’

‘Maw?” ka ti deuh ha. Ka hriat loh vanga zawt ka ni lo.

‘Inah kal ila a tha ber, Ka nu leh ka pa ka hrilh lawk tawha, a la hmu lo chung chein ka nu chuan tunge i nih a hre tho. Tunah hian ka pa nen min lo nghak mek ang’ a ti dam thlup. Ka ngaihtuah na a mumal thei rih lo. Kei leh Naute kan him tih ka hriaa, chu zawng chu a ni deuh mai. Ka nuin a hriat hunah engtin nge hma alak ang tih lam phei chu ka ngaihtuah duh lo law law.

‘Ka hmel hi..Engtin nge min lo dawn sawn ang? Amber-i chhuah atangin rei pawh ala ni si lo’ ka ti sep.

‘Ngaihtuah suh, I landanah pawh dik lo a awm lo; ka nu leh pa hian min ringa, enge ka tih ka hrechiang thin tih pawh an hria’ inringtawk zetin a ti leh sup.Ka kut a hum zui leh vang vanga. Engmah ka sawi tawh lo.An in thlen ka chakna leh huphurhna a inzat reng. Bakah,tunah ka him a,naktukah enge thleng dawn hriat lawk a ni si lo..Ka hrehawmna let tam tak kha ka nu hian thlentir a pawi ti dawn lo tih ka hming ka hriatchian tluk zetin ka chiang.

Bawngkawn kan tlanpela, Durtlang lam kan pan zela. Kan tlanpelh tawh leh tlan mek naah mihring leh Motor hmuh tur an awm lo.

Kan tlan zela, khawchhung kan pel titiha, minute 2 vel lek kan tlan leh tihin vei lamah kan penga, Kawng lian vak lo,chho euh euhah kan tlan chho a. Thui vak lo kan tlan leh hnuah Gate lian zet leh rinawm hmel lutuk alo ding luah mai.

Kan tlan luta, kan hmaa in nalh zet ding chu ka en a..Ka lut hurphurh lutuka ka tiril a khur titih.

‘Chhuk ila…’ min rawn en a. Ka bu nghat,mahse ka che chuang lo.

‘Min enteh..Engmah thil tha lo a thleng dawn lo.Kan lut anga, ka nu leh pa ka hmelhriattir che anga. Abak chu Roomah i mu hahdam vang vang dawn nia’ a ti dam leh thlup.

Ka bag a khaia, a kut lehlamin min kaia, inchhungah kan lut a..Ka nu ang rual vel,nu hmeltha leh Smart tak,sam dum hlap leh a fapa ang maia mitmu dum fiah zet neitu leh Pa upa lam,Palian leh hmel nelawm vak lo nen kan inhmachhawn ta ran mai.

‘In lo thleng maw?” a nu zawkin a ti thawp sat. Min rawn en a, a nui nghal sak bawk.A nuih takah phei chuan Sangkima nen an in ang lehzual.

‘Aw…Anun-i chu ania. Chuan,ka nu leh ka pa annih hi..’ Sangkima’n min rawn en a. Sawi mai tur hre loin ka bu nghat ringawt. Diktak chuan ka hmel landan mawi hnai lo lutuk vangin ka awm a nuam lo zual.

‘Hlauh tur engmah hetah chuan a awm lo ania. Zan a rei tawha, tunah chuan mu hahdam phawt la..Naktuk lamah i nu be turin Palai kan tir anga. A fel duak mai ang’ a nu zawkin a ti leh a. Mi a ang maiin ka bu leh ringawt.

Inchung panna Step lian leh nalh zet, kual pup maiah kan chho duna, tlak dal atan Darthlalang chhah zet zet an vuah chhuak vek. Room kawngkhar a hawnga,min kai luta. Room chhung ka hmuh rualin ka thaw hak mai. Kan in lamah pawh khan kan in leh room kha that lohna a nei lo..Mahse, Sangkima room nen chuan khaikhin chi a ni lo hulhual..

Kawngkhar a khara, ka bulah a rawn dinga, min pawt hnai nghal zat. Ka khabeah a rawn dawma,ka nu min khawihna vanga ka hmai duk leh vung te, a belkang lai te nen dimtein a khawih kual nghal dun dun a. Engmah sawi loin ka ding ngawi reng thung.

‘A la na em?” a ti sup.

‘Aih…’

‘Um…Chuan ,min ngaidam la..Ka venhim loh che vangin’ a ti a, a thaw nghal hawk.

‘I tihsual a ni hleinem..Hei chu ka tawhrtur ve reng ania..Mahse, tunah chuan ka bulah i awm a’

‘Khawiahmah ka tel loin i awm tawh lovang..’a ti leh nghut. A kawngah ka kuaha, a awmah ka hmai ka phum nghal kak mai.

Khum lian zetah kan mu duna, a dar lai hlap ka khama; a awmah ka kut ka daha,a lungphu nghawr dat dat ka hretheia..Ka nun hi a famkim ngawih ngawihin ka hriaa,him hliah hliahin ka inhre bawk..

‘Sangkim…’

‘Muhil la,zingah thildang chu kan sawi dawn nia…’ a ti sup. Hnial loin ka mit ka chhinga, amah si chetin min kuah bet a. Ka samah a rawn fawp vang vang bawk.

‘Tuman an khawih na leh tawh lovang che..Tunah chuan i bulah ka awm tawh ania’ a ti leh sup.

Room kawngkhar kik thawmah ka harh zawk. Min kuah chungin Sangkima a lo la muhil a,kawngkhar kik ri a awm leh a..Sangkima a rawn harh zui ve mai.

‘Good Morning…Enge i an?”

‘Ka tha…Enteh,kawngkhar an lo kika’ ka ti sep.

‘Um…Ka hria alawm..Ka va en ang’ a ti a. Ka tho ve tur min nem mu leh a, ka chalah a rawn fawp zauh.

A chhuah hnuah ka tho ve nghala, Room chhung zau leh nuam lutuk chu ka thlir kual dan dan mai.Curtain chhah zet in zar ka pawthlima, Room bul chiah Balcony ka hmuh veleh ka thaw nghal hawk..Cushion chhah zet zet a awm a..Pangpar khawi nalh lutuk a awm thluah bawk..

Room kawngkhar kik ri ka hriat leh rualin ka inher zawk. Ka pan phei vata, ka hawng nghala. Hmeichhe tleirawl,hnar per deuh hlek a lo ding ran mai.

‘Pi, inhnuaiah lo chhuk turin ka piin a ti che a’ a ti a. Ka bu nghata, ka zui chhuak ve nghal mai.

Sangkima nu leh pa Bakah a nau mipa a lo awm a, Police pahnih an awm tel bawk. Min hmuh veleh Sangkima a rawn dingchhuak nghal vat.

‘Hei hi ka nupui tura ka hruai chu ania. In duh phawt chuan in zawt thei ang. Eng inruk bona mah a awm lo’ Sangkima thilsawi chu ka hresual emaw tiin ka melh vat. Mahse, a hmel thutak zet leh a nu leh pa bakah a nau hmelah chuan thudik a sawi tih alang vek.

‘Ka hrethiam e…Mahse, Report a lut miau si a...’

‘Ni lo…’ midang tawng ve hmain ka tichhuak sap. Min rawn en nghal thap mai.

Sangkima’n min rawn pan hnaia, ka biang tawn tawnah a rawn vuana..

‘Hei hi chu a thleng dawn tih ka hre lawk a, ka inbuatsaih lawk vek alawm..Ka zui phawt anga, hahdam deuhin lo awm la, ka lo let leh vat ang’ zawi fiah lutukin a ti sup.

Sawi tur reng reng ka hre lo,ka hriat chhun chu ka nu in inrukbona a ni lo tih a hrereng chungin FIR a thehlut lui tih zawng animai..